Alkitab/Pangentasan/38

^38:1 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦩꦼꦱ꧀ꦧꦺꦃꦱꦏꦏꦪꦸꦲꦏꦱꦶꦪꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧉​ꦮꦸꦗꦸꦢ꧀ꦢꦺꦥꦼꦱꦒꦶ꧈​ꦢꦮꦭꦤ꧀ꦲꦩ꧀ꦧꦤꦺꦥꦝ2,2ꦩꦺꦠꦼꦂ꧈​ꦢꦺꦤꦺꦝꦸꦮꦸꦂꦫꦺ1,3ꦩꦺꦠꦼꦂ꧉​

^38:2 ꦲꦶꦁꦥꦺꦴꦗꦺꦴꦏ꧀ꦏꦺꦩꦼꦱ꧀ꦧꦺꦃꦥꦥꦠ꧀ꦩꦲꦸꦢꦶꦒꦮꦺꦏ꧀ꦏꦏꦺꦱꦸꦔꦸꦥꦥꦠ꧀꧈​ꦢꦶꦲꦶꦫꦱ꧀ꦢꦢꦶꦱꦶꦗꦶꦏꦫꦺꦴꦩꦼꦱ꧀ꦧꦺꦃꦲꦺ꧉​ꦏꦧꦺꦃꦩꦲꦸꦥꦝꦢꦶꦭꦥꦶꦱ꧀ꦱꦶꦔꦁꦒꦺꦴꦠꦼꦩ꧀ꦧꦒ꧉​

^38:3 ꦲꦸꦒꦢꦶꦒꦮꦺꦏ꧀ꦏꦏꦺꦱꦏꦺꦃꦲꦺꦥꦶꦫꦤ꧀ꦠꦶꦤꦶꦁꦩꦼꦱ꧀ꦧꦺꦃꦩꦲꦸ꧈​ꦏꦪꦠ:ꦏꦸꦮꦭꦶꦏꦸꦮꦭꦶ꧈​ꦱꦺꦫꦺꦴꦏ꧀꧈​ꦩꦁꦏꦺꦴꦏ꧀ꦩꦁꦏꦺꦴꦏ꧀꧈​ꦒꦂꦥꦸꦒꦂꦥꦸꦱꦂꦠꦮꦝꦃꦒꦼꦤꦶ꧉​ꦥꦶꦫꦤ꧀ꦠꦶꦩꦲꦸꦏꦧꦺꦃꦢꦶꦒꦮꦺꦱꦏꦠꦼꦩ꧀ꦧꦒ꧉​

^38:4 ꦢꦶꦒꦮꦺꦏ꧀ꦏꦏꦺꦗꦭꦱꦏꦠꦼꦩ꧀ꦧꦒꦱꦶꦁꦢꦶꦲꦸꦧꦼꦢ꧀ꦢꦏꦺꦲꦶꦁꦩꦼꦱ꧀ꦧꦺꦃꦮꦶꦮꦶꦠ꧀ꦱꦏꦔꦶꦱꦺꦴꦂꦔꦤ꧀ꦠꦶꦠꦼꦏꦤ꧀ꦠꦼꦔꦃꦠꦼꦔꦃꦲꦺ꧉​

^38:5 ꦧꦚ꧀ꦗꦸꦂꦢꦶꦒꦮꦺꦏ꧀ꦏꦏꦺꦒꦼꦭꦁꦔꦤ꧀ꦏꦁꦒꦺꦴꦔꦸꦱꦸꦁ꧈​ꦢꦶꦥꦱꦁꦲꦶꦁꦱꦔꦶꦱꦺꦴꦂꦫꦶꦁꦥꦺꦴꦗꦺꦴꦏ꧀ꦏꦺꦩꦼꦱ꧀ꦧꦺꦃ꧈​ꦥꦥꦠ꧀꧉​

^38:6 ꦥꦶꦏꦸꦭ꧀ꦭꦤ꧀ꦤꦺꦥꦝꦢꦶꦒꦮꦺꦱꦏꦏꦪꦸꦲꦏꦱꦶꦪꦱꦶꦁꦢꦶꦭꦥꦶꦱ꧀ꦱꦶꦠꦼꦩ꧀ꦧꦒ꧉​

^38:7 ꦥꦶꦏꦸꦭ꧀ꦭꦤ꧀ꦤꦺꦩꦲꦸꦢꦶꦱ꧀ꦭꦺꦴꦧꦺꦴꦏ꧀ꦏꦏꦺꦲꦶꦁꦒꦼꦭꦁꦔꦤ꧀ꦱꦶꦁꦲꦤꦲꦶꦁꦲꦶꦫꦶꦁꦔꦤ꧀ꦤꦶꦁꦩꦼꦱ꧀ꦧꦺꦃ꧉​ꦩꦼꦱ꧀ꦧꦺꦃꦩꦲꦸꦢꦶꦒꦮꦺꦱꦏꦧ꧀ꦭꦧꦒ꧀ꦱꦂꦠꦲꦶꦁꦚ꧀ꦗꦼꦫꦺꦴꦤꦺꦢꦶꦒꦮꦺꦏꦪꦏꦺꦴꦛꦏ꧀꧉​

^38:8 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦥꦢꦱ꧀ꦱꦤ꧀ꦠꦼꦩ꧀ꦧꦒ;ꦢꦺꦤꦺꦝꦱꦂꦫꦺꦲꦶꦪꦠꦼꦩ꧀ꦧꦒ;ꦲꦱꦭ꧀ꦭꦺꦱꦏꦥꦼꦔꦶꦭꦺꦴꦤꦺꦥꦫꦮꦺꦴꦁꦮꦢꦺꦴꦤ꧀ꦱꦶꦁꦥꦝꦔ꧀ꦭꦢꦺꦤ꧀ꦤꦶꦲꦶꦁꦭꦮꦁꦔꦶꦁꦏꦺꦩꦃꦥꦊꦁꦒꦃꦲꦤ꧀ꦤꦶꦁꦄꦭ꧀ꦭꦃ꧉​

^38:9 ꧊ꦧꦺꦗ꦳ꦭꦺꦲꦺꦭ꧀ꦩꦒꦼꦂꦫꦶꦥ꧀ꦭꦠꦂꦫꦤ꧀ꦤꦶꦁꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃꦔꦁꦒꦺꦴꦒꦺꦴꦂꦝꦺꦤ꧀ꦒꦺꦴꦂꦝꦺꦤ꧀ꦏꦲꦶꦤ꧀ꦭꦺꦤꦲꦭꦸꦱ꧀꧉​ꦢꦮꦤꦺꦒꦺꦴꦂꦝꦺꦤ꧀ꦲꦶꦁꦱꦶꦱꦶꦃ꧊ꦏꦶꦢꦸꦭ꧀44ꦩꦺꦠꦼꦂ꧈​

^38:10 ꦢꦶꦱꦁꦒꦕꦒꦏ꧀ꦠꦼꦩ꧀ꦧꦒꦫꦺꦴꦁꦥꦸꦭꦸꦃ;ꦱꦧꦼꦤ꧀ꦕꦒꦏ꧀ꦔꦁꦒꦺꦴꦲꦸꦩ꧀ꦥꦏ꧀ꦠꦼꦩ꧀ꦧꦒ꧈​ꦢꦺꦤꦺꦕꦤ꧀ꦛꦺꦭ꧀ꦭꦤ꧀ꦱꦂꦠꦱꦶꦁꦏꦁꦒꦺꦴꦚꦩ꧀ꦧꦸꦁꦢꦶꦒꦮꦺꦱꦏꦱ꧀ꦭꦏ꧉​

^38:11 ꦲꦶꦁꦱꦶꦱꦶꦃ꧊ꦭꦺꦴꦂꦲꦸꦒꦢꦶꦒꦮꦺꦏꦪꦩꦼꦁꦏꦺꦴꦤꦺꦴ꧉​

^38:12 ꦲꦶꦁꦱꦶꦱꦶꦃ꧊ꦏꦸꦭꦺꦴꦤ꧀ꦢꦶꦥꦱꦁꦔꦶꦒꦺꦴꦂꦝꦺꦤ꧀ꦢꦮꦤꦺ22ꦩꦺꦠꦼꦂ;ꦕꦒꦏ꧀ꦱꦼꦥꦸꦭꦸꦃꦲꦤꦲꦸꦩ꧀ꦥꦏ꧀ꦏꦺꦝꦺꦮꦺꦝꦺꦮꦺ꧈​ꦕꦤ꧀ꦛꦺꦭ꧀ꦭꦤ꧀ꦱꦂꦠꦱꦶꦁꦏꦁꦒꦺꦴꦚꦩ꧀ꦧꦸꦁꦱ꧀ꦭꦏ꧉​

^38:13 ꦲꦶꦁꦱꦶꦱꦶꦃꦮꦺꦠꦤ꧀꧈​ꦱꦶꦁꦲꦤꦭꦮꦁꦔꦺ꧈​ꦲꦩ꧀ꦧꦤꦺꦥꦒꦼꦂꦲꦶꦪ22ꦩꦺꦠꦼꦂ꧉​

^38:14 (38:14-15)ꦲꦶꦁꦏꦶꦮꦠꦼꦔꦼꦤ꧀ꦤꦺꦭꦮꦁꦩꦲꦸꦲꦤꦒꦺꦴꦂꦝꦺꦤ꧀ꦲꦩ꧀ꦧꦤꦺ6,6ꦩꦺꦠꦼꦂ꧈​ꦔꦁꦒꦺꦴꦕꦒꦏ꧀ꦠꦼꦭꦸꦲꦤꦲꦸꦩ꧀ꦥꦏ꧀ꦏꦺꦝꦺꦮꦺꦝꦺꦮꦺ꧉​

^38:15 (38:14)

^38:16 ꦒꦺꦴꦂꦝꦺꦤ꧀ꦲꦶꦁꦱꦏꦸꦧꦼꦁꦔꦺꦥ꧀ꦭꦠꦂꦫꦤ꧀ꦩꦲꦸꦏꦧꦺꦃꦢꦶꦒꦮꦺꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧉​

^38:17 ꦲꦸꦩ꧀ꦥꦏ꧀ꦏꦶꦁꦕꦒꦏ꧀ꦕꦒꦏ꧀ꦏꦺꦢꦶꦒꦮꦺꦱꦏꦠꦼꦩ꧀ꦧꦒ꧈​ꦢꦺꦤꦺꦕꦤ꧀ꦛꦺꦭ꧀ꦭꦤ꧀ꦤꦺ꧈​ꦱꦩ꧀ꦧꦸꦁꦔꦤ꧀ꦱꦂꦠꦥꦸꦕꦸꦏ꧀ꦏꦶꦁꦕꦒꦏ꧀ꦢꦶꦒꦮꦺꦱꦏꦱ꧀ꦭꦏ꧉​

^38:18 ꦒꦺꦴꦂꦝꦺꦤ꧀ꦲꦶꦁꦭꦮꦁꦔꦶꦁꦥ꧀ꦭꦠꦂꦫꦤ꧀ꦩꦲꦸꦱꦏꦏꦲꦶꦤ꧀ꦭꦺꦤꦲꦭꦸꦱ꧀꧈​ꦢꦶꦠꦼꦤꦸꦤ꧀ꦔꦁꦒꦺꦴꦧꦼꦤꦁꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁꦱꦂꦠꦢꦶꦲꦶꦪꦱ꧀ꦔꦁꦒꦺꦴꦱꦸꦭꦩ꧀ꦩꦤ꧀꧉​ꦢꦮꦤꦺ9ꦩꦺꦠꦼꦂꦱꦂꦠꦝꦸꦮꦸꦂꦫꦺ2ꦩꦺꦠꦼꦂ꧈​ꦏꦪꦒꦺꦴꦂꦝꦺꦤ꧀ꦤꦺꦥ꧀ꦭꦠꦂꦫꦤ꧀꧉​

^38:19 ꦒꦺꦴꦂꦝꦺꦤ꧀ꦩꦲꦸꦢꦶꦱꦁꦒꦕꦒꦏ꧀ꦥꦥꦠ꧀꧈​ꦱꦶꦗꦶꦱꦶꦗꦶꦤꦺꦔꦁꦒꦺꦴꦲꦸꦩ꧀ꦥꦏ꧀꧉​ꦕꦤ꧀ꦛꦺꦭ꧀ꦭꦤ꧀꧈​ꦠꦸꦠꦸꦥ꧀ꦲꦶꦁꦤ꧀ꦝꦸꦮꦸꦂꦱꦂꦠꦱꦶꦁꦏꦁꦒꦺꦴꦚꦩ꧀ꦧꦸꦁꦢꦶꦒꦮꦺꦱꦏꦱ꧀ꦭꦏ꧉​

^38:20 ꦏꦧꦺꦃꦧ꧀ꦭꦤ꧀ꦢꦂꦭꦤ꧀ꦥꦒꦼꦂꦫꦺꦱꦶꦁꦔꦸꦧꦼꦁꦔꦶꦥ꧀ꦭꦠꦂꦫꦤ꧀ꦢꦶꦒꦮꦺꦱꦏꦠꦼꦩ꧀ꦧꦒ꧉​

^38:21 ꦲꦶꦏꦶꦢꦥ꦳꧀ꦠꦂꦫꦺꦧꦫꦁꦧꦫꦁꦱꦶꦁꦢꦶꦲꦼꦁꦒꦺꦴꦲꦶꦁꦱꦗꦿꦺꦴꦤꦶꦁꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧈​ꦥꦁꦒꦺꦴꦤ꧀ꦤꦤ꧀ꦏꦁꦒꦺꦴꦚꦶꦩ꧀ꦥꦼꦤ꧀ꦥꦥꦤ꧀ꦮꦠꦸꦭꦺꦴꦫꦺꦴꦱꦶꦁꦲꦤꦠꦸꦭꦶꦱ꧀ꦱꦤ꧀ꦤꦺꦲꦁꦒꦼꦂꦲꦁꦒꦼꦂꦫꦶꦁꦄꦭ꧀ꦭꦃ꧈​ꦪꦲꦶꦏꦸꦥꦼꦥꦏꦺꦴꦤ꧀ꦱꦼꦥꦸꦭꦸꦃ꧉​ꦢꦥ꦳꧀ꦠꦂꦲꦶꦏꦸꦢꦶꦒꦮꦺꦲꦠꦱ꧀ꦝꦮꦸꦃꦲꦺ꧊ꦩꦸꦱ;ꦢꦺꦤꦺꦮꦺꦴꦁꦮꦺꦴꦁ꧊ꦭꦺꦮꦶꦱꦶꦁꦚꦩ꧀ꦧꦸꦠ꧀ꦒꦮꦺ꧈​ꦢꦶꦥꦶꦩ꧀ꦥꦶꦤ꧀꧊ꦆꦠꦩꦂ꧈​ꦥꦸꦠꦿꦤꦺꦲꦶꦩꦩ꧀ꦲꦫꦸꦤ꧀꧉​

^38:22 ꧊ꦧꦺꦗ꦳ꦭꦺꦲꦺꦭ꧀꧌ꦲꦤꦏ꧀ꦏꦺ꧊ꦈꦫꦶꦭꦤ꧀ꦥꦸꦠꦸꦤꦺ꧊ꦲꦸꦂꦱꦏꦏ꧀ꦭꦺꦴꦩ꧀ꦥꦺꦴꦏ꧀꧊ꦪꦺꦲꦸꦢ꧍​ꦔ꧀ꦒꦫꦥ꧀ꦱꦏꦺꦃꦲꦶꦁꦧꦫꦁꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧉​

^38:23 ꦥꦼꦩ꧀ꦧꦤ꧀ꦠꦸꦤꦺ꧈​꧊ꦄꦲꦺꦴꦭꦶꦪꦧ꧀ꦲꦤꦏ꧀ꦏꦺ꧊ꦄꦲꦶꦱꦩꦏ꧀ꦱꦏꦏ꧀ꦭꦺꦴꦩ꧀ꦥꦺꦴꦏ꧀꧊ꦝꦤ꧀꧈​ꦠꦸꦏꦁꦲꦃꦲ꧀ꦭꦶꦔꦿꦚ꧀ꦕꦁꦱꦶꦁꦲꦸꦒꦥꦶꦤ꧀ꦠꦼꦂꦤꦼꦤꦸꦤ꧀ꦏꦲꦶꦤ꧀ꦭꦺꦤꦲꦭꦸꦱ꧀꧈​ꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁ꧉​

^38:24 ꦩꦱ꧀ꦱꦶꦁꦢꦶꦥꦶꦱꦸꦁꦱꦸꦁꦔꦏꦺꦩꦫꦁꦄꦭ꧀ꦭꦃꦏꦁꦒꦺꦴꦏꦺꦩꦃꦱꦸꦕꦶꦏꦧꦺꦃꦲꦤꦱꦺꦮꦸꦏꦶꦭꦺꦴꦒꦿꦩ꧀꧈​ꦢꦶꦠꦶꦩ꧀ꦧꦁꦩꦤꦸꦠ꧀ꦠꦶꦩ꧀ꦧꦁꦔꦤ꧀ꦉꦱ꧀ꦩꦶ꧉​

^38:25 ꦱ꧀ꦭꦏꦱꦶꦁꦢꦶꦥꦶꦱꦸꦁꦱꦸꦁꦔꦏꦺꦩꦶꦠꦸꦫꦸꦠ꧀ꦕꦕꦃꦗꦶꦮꦤꦺꦧꦁꦱ꧊ꦆꦱꦿꦲꦺꦭ꧀ꦒꦸꦁꦒꦸꦁꦔꦺꦲꦤ3.430ꦏꦶꦭꦺꦴꦒꦿꦩ꧀꧈​ꦢꦶꦠꦶꦩ꧀ꦧꦁꦩꦤꦸꦠ꧀ꦠꦶꦩ꧀ꦧꦁꦔꦤ꧀ꦉꦱ꧀ꦩꦶ꧉​

^38:26 ꦏꦧꦺꦃꦩꦲꦸꦥꦝꦏꦫꦺꦴꦱꦶꦁꦢꦶꦧꦪꦂꦢꦺꦤꦶꦁꦮꦺꦴꦁꦮꦺꦴꦁꦱꦶꦁꦮꦶꦱ꧀ꦢꦶꦢꦥ꦳꧀ꦠꦂꦱꦢꦸꦫꦸꦁꦔꦺ꧉​ꦱꦧꦼꦤ꧀ꦮꦺꦴꦁꦏꦸꦢꦸꦩ꧀ꦧꦪꦂꦉꦒꦱꦶꦁꦮꦶꦱ꧀ꦢꦶꦠꦼꦩ꧀ꦠꦺꦴꦏ꧀ꦏꦏꦺ꧈​ꦢꦶꦠꦶꦩ꧀ꦧꦁꦩꦤꦸꦠ꧀ꦠꦶꦩ꧀ꦧꦁꦔꦤ꧀ꦉꦱ꧀ꦩꦶ꧉​ꦤꦭꦶꦏꦢꦶꦲꦺꦠꦸꦁꦏꦧꦺꦃꦲꦤꦮꦺꦴꦁ603.550꧈​ꦪꦏꦸꦮꦶꦮꦺꦴꦁꦭꦤꦁꦱꦶꦁꦮꦶꦱ꧀ꦲꦸꦩꦸꦂ20ꦠꦲꦸꦤ꧀ꦩꦸꦁꦒꦃ꧉​

^38:27 ꦱ꧀ꦭꦏ꧈​ꦱꦶꦁꦕꦕꦃꦲꦺ3.400ꦏꦶꦭꦺꦴꦒꦿꦩ꧀ꦏꦸꦮꦶꦢꦶꦲꦼꦁꦒꦺꦴꦒꦮꦺꦲꦸꦩ꧀ꦥꦏ꧀ꦏꦶꦁꦕꦒꦏ꧀ꦱꦠꦸꦱ꧀꧈​ꦪꦏꦸꦮꦶꦕꦒꦏ꧀ꦏꦺꦏꦺꦩꦃꦱꦸꦕꦶꦭꦤ꧀ꦒꦺꦴꦂꦝꦺꦤ꧀꧉​ꦱꦧꦼꦤ꧀ꦲꦸꦩ꧀ꦥꦏ꧀ꦧꦺꦴꦧꦺꦴꦠ꧀ꦠꦺ34ꦏꦶꦭꦺꦴꦒꦿꦩ꧀꧉​

^38:28 ꦢꦺꦤꦺꦠꦸꦫꦃꦲꦤ꧀ꦤꦺꦲꦤ30ꦏꦶꦭꦺꦴꦒꦿꦩ꧀꧉​ꦢꦺꦤꦶꦁ꧊ꦧꦺꦗ꦳ꦭꦺꦲꦺꦭ꧀ꦢꦶꦲꦼꦁꦒꦺꦴꦱꦩ꧀ꦧꦸꦁꦔꦤ꧀꧈​ꦕꦤ꧀ꦛꦺꦭ꧀ꦭꦤ꧀꧈​ꦏꦁꦒꦺꦴꦕꦒꦏ꧀ꦕꦒꦏ꧀ꦏꦺ꧈​ꦱꦂꦠꦠꦸꦠꦸꦥ꧀ꦥꦸꦕꦸꦏ꧀ꦏꦶꦁꦕꦒꦏ꧀ꦕꦒꦏ꧀ꦩꦲꦸ꧉​

^38:29 ꦥꦿꦸꦁꦒꦸꦱꦶꦁꦢꦶꦥꦶꦱꦸꦁꦱꦸꦁꦔꦏꦺꦏꦧꦺꦃꦲꦤ2.425ꦏꦶꦭꦺꦴꦒꦿꦩ꧀꧉​

^38:30 ꦥꦿꦸꦁꦒꦸꦩꦲꦸꦢꦶꦲꦼꦁꦒꦺꦴꦲꦸꦩ꧀ꦥꦏ꧀ꦭꦮꦁꦔꦶꦁꦏꦺꦩꦃꦥꦊꦁꦒꦃꦲꦤ꧀ꦤꦶꦁꦄꦭ꧀ꦭꦃ꧈​ꦩꦼꦱ꧀ꦧꦺꦃꦏꦫꦺꦴꦗꦭꦤꦺꦱꦶꦁꦱꦏꦥꦿꦸꦁꦒꦸ꧈​ꦏꦧꦺꦃꦥꦶꦫꦤ꧀ꦠꦶꦤꦶꦁꦩꦼꦱ꧀ꦧꦺꦃ꧈​

^38:31 ꦲꦸꦩ꧀ꦥꦏ꧀ꦏꦶꦁꦥꦒꦼꦂꦲꦶꦁꦱꦏꦸꦧꦼꦁꦔꦶꦁꦥ꧀ꦭꦠꦂꦫꦤ꧀ꦭꦤ꧀ꦭꦮꦁꦔꦶꦁꦥ꧀ꦭꦠꦂꦫꦤ꧀꧈​ꦧ꧀ꦭꦤ꧀ꦢꦂꦫꦶꦁꦏꦺꦩꦃꦏꦧꦺꦃꦭꦤ꧀ꦕꦒꦏ꧀ꦒꦺꦴꦂꦝꦺꦤ꧀꧉​