Alkitab/Pangentasan/16

Saka Wikisumber

16:1 ꦲꦸꦩꦠ꧀꧊ꦆꦱꦿꦲꦺꦭ꧀ꦏꦧꦺꦃꦧꦚ꧀ꦗꦸꦂꦥꦝꦩꦁꦏꦠ꧀ꦱꦏꦲꦶꦁ꧊ꦌꦭꦶꦩ꧀;ꦭꦤ꧀ꦲꦶꦁꦠꦁꦒꦭ꧀ꦭꦶꦩꦭꦱ꧀ꦱꦱꦶꦭꦺꦴꦫꦺꦴ꧈​ꦠꦼꦏꦤ꧀ꦱꦼꦒꦫꦮꦼꦝꦶ꧊ꦱꦶꦤ꧀꧈​ꦪꦏꦸꦮꦶꦲꦤ꧀ꦠꦫꦤꦺ꧊ꦌꦭꦶꦩ꧀ꦭꦤ꧀ꦒꦸꦤꦸꦁ꧊ꦱꦶꦤꦲꦶ꧉​
16:2 ꦲꦤꦲꦶꦁꦏꦺꦴꦤꦺꦴꦲꦸꦩꦠ꧀꧊ꦆꦱꦿꦲꦺꦭ꧀ꦥꦝꦔ꧀ꦒꦸꦤ꧀ꦢꦼꦭ꧀ꦭꦶ꧊ꦩꦸꦱꦭꦤ꧀ꦲꦫꦸꦤ꧀꧈​
16:3 ꦠꦼꦩ꧀ꦧꦸꦁꦔꦺ꧈​"ꦭꦁꦏꦸꦁꦱꦲꦺꦩꦼꦤꦮꦶꦒꦸꦱ꧀ꦠꦶꦄꦭ꧀ꦭꦃꦲꦼꦁꦒꦺꦤ꧀ꦤꦶꦥꦸꦤ꧀ꦩꦼꦗꦃꦲꦶꦏꦸꦭꦮꦺꦴꦤ꧀ꦠꦼꦤ꧀ꦲꦶꦁ꧊ꦩꦺꦱꦶꦂ꧈​ꦱꦼꦧꦧ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦏꦸꦭꦱꦩ꧀ꦧꦺꦴꦠꦼꦤ꧀ꦩ꧀ꦧꦺꦴꦠꦼꦤ꧀ꦤꦶꦥꦸꦤ꧀ꦱꦒꦼꦢ꧀ꦔꦝꦼꦥ꧀ꦏꦸꦮꦭꦶꦲꦶꦱꦶꦢꦒꦶꦁꦭꦤ꧀ꦫꦺꦴꦠꦶꦔꦤ꧀ꦠꦺꦴꦱ꧀ꦠꦸꦮꦸꦏ꧀꧉​ꦤꦁꦔꦶꦁꦱꦩꦼꦤꦶꦏꦥꦚ꧀ꦗꦼꦤꦼꦁꦔꦤ꧀ꦱꦩ꧀ꦥꦸꦤ꧀ꦔꦶꦫꦶꦢ꧀ꦏꦸꦭꦱꦥꦱꦩꦸꦮꦤ꧀ꦢꦸꦩꦸꦒꦶꦔꦿꦶꦏꦶꦱꦸꦥꦢꦺꦴꦱ꧀ꦏꦸꦭꦱꦩꦶꦥꦼꦗꦃꦏꦭꦶꦂꦫꦼꦤ꧀꧉"​
16:4 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​"ꦲꦏꦸꦧꦏꦭ꧀ꦤꦼꦏꦏ꧀ꦏꦏꦺꦥꦔꦤ꧀ꦏꦪꦲꦸꦢꦤ꧀ꦱꦏꦲꦶꦁꦭꦔꦶꦠ꧀ꦏꦁꦒꦺꦴꦏꦺꦴꦮꦺꦏꦧꦺꦃ꧉​ꦱꦧꦼꦤ꧀ꦢꦶꦤꦏꦺꦴꦮꦺꦏꦸꦢꦸꦥꦝꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦔꦤ꧀ꦏꦸꦮꦶꦱꦕꦸꦏꦸꦥ꧀ꦥꦺꦏꦁꦒꦺꦴꦱꦼꦢꦶꦤ꧉​ꦱꦿꦤꦥꦠꦿꦥ꧀ꦩꦼꦁꦏꦺꦴꦤꦺꦴꦲꦏꦸꦧꦏꦭ꧀ꦥꦶꦂꦱꦲꦥꦮꦺꦴꦁꦮꦺꦴꦁꦲꦶꦏꦸꦲꦶꦪꦥꦝꦩ꧀ꦧꦔꦸꦤ꧀ꦠꦸꦫꦸꦠ꧀ꦏꦫꦺꦴꦝꦮꦸꦃꦏꦸꦲꦥꦲꦺꦴꦫ꧉​
16:5 ꦲꦶꦁꦢꦶꦤꦏꦥꦶꦁꦤꦼꦩ꧀ꦮꦺꦴꦁ꧊ꦆꦱꦿꦲꦺꦭ꧀ꦏꦸꦢꦸꦥꦝꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦂꦠꦩꦱꦏ꧀ꦥꦔꦤ꧀ꦩꦲꦸꦠꦶꦏꦼꦭ꧀ꦭꦺꦴꦫꦺꦴꦤꦺꦲꦢꦠ꧀ꦠꦺ꧉"​
16:6 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦔꦤ꧀ꦢꦶꦏꦩꦫꦁꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀꧈​"ꦩꦼꦁꦏꦺꦴꦱꦺꦴꦫꦺꦏꦺꦴꦮꦺꦧꦏꦭ꧀ꦥꦝꦔꦼꦂꦠꦶꦪꦺꦤ꧀ꦄꦭ꧀ꦭꦃꦱꦶꦁꦔ꧀ꦭꦸꦮꦂꦫꦶꦏꦺꦴꦮꦺꦱꦏꦲꦶꦁꦠꦤꦃ꧊ꦩꦺꦱꦶꦂ꧉​
16:7 ꦱꦺꦱꦸꦏ꧀ꦏꦺꦴꦮꦺꦧꦏꦭ꧀ꦥꦝꦤ꧀ꦢꦼꦊꦁꦕꦲꦾꦤꦶꦁꦥꦔꦺꦫꦤ꧀ꦏꦁꦩ꧀ꦧ꧀ꦭꦼꦉꦁꦔꦶ꧈​ꦩꦽꦠꦤ꧀ꦝꦤꦶꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦫꦮꦸꦃ꧉​ꦥꦚ꧀ꦗꦼꦤꦼꦁꦔꦤ꧀ꦤꦺꦮꦶꦱ꧀ꦩꦶꦉꦁꦔꦏꦺꦥꦁꦒꦸꦤ꧀ꦢꦼꦭ꧀ꦩꦸꦩꦫꦁꦥꦚ꧀ꦗꦼꦤꦼꦁꦔꦤ꧀ꦤꦺ꧈​ꦲꦶꦪꦩꦫꦁꦥꦚ꧀ꦗꦼꦤꦼꦁꦔꦤ꧀ꦤꦺꦥꦶꦪꦩ꧀ꦧꦏ꧀꧈​ꦱꦼꦧꦧ꧀ꦲꦏꦸꦲꦶꦏꦶꦫꦏ꧀ꦩꦸꦁꦤꦶꦤ꧀ꦢꦏ꧀ꦏꦏꦺꦝꦮꦸꦃꦲꦺ꧉"​
16:8 ꧊ꦩꦸꦱꦧꦚ꧀ꦗꦸꦂꦔꦤ꧀ꦢꦶꦏ꧈​"ꦩꦼꦁꦏꦺꦴꦱꦺꦴꦫꦺꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦩꦫꦶꦁꦔꦶꦢꦒꦶꦁꦩꦫꦁꦏꦺꦴꦮꦺ꧈​ꦱꦂꦠꦱꦺꦱꦸꦏ꧀ꦲꦺꦱꦸꦏ꧀ꦫꦺꦴꦠꦶꦔꦤ꧀ꦠꦶꦱꦮꦉꦒ꧀ꦩꦸ꧈​ꦩꦼꦂꦒꦥꦚ꧀ꦗꦼꦤꦼꦁꦔꦤ꧀ꦤꦺꦮꦶꦱ꧀ꦩꦶꦪꦂꦱꦥꦁꦒꦸꦤ꧀ꦢꦼꦭ꧀ꦩꦸꦩꦫꦁꦄꦭ꧀ꦭꦃ꧉​ꦪꦺꦤ꧀ꦏꦺꦴꦮꦺꦔ꧀ꦒꦼꦤꦼꦁꦔꦶꦲꦏꦸ꧈​ꦲꦶꦏꦸꦱꦠꦼꦩꦼꦤ꧀ꦤꦺꦏꦺꦴꦮꦺꦔ꧀ꦒꦼꦤꦼꦁꦔꦶꦒꦸꦱ꧀ꦠꦶꦄꦭ꧀ꦭꦃ꧉"​
16:9 ꧊ꦩꦸꦱꦧꦚ꧀ꦗꦸꦂꦔꦤ꧀ꦢꦶꦏꦩꦫꦁꦲꦫꦸꦤ꧀꧈​"ꦲꦸꦩꦠ꧀ꦏꦧꦺꦃꦏꦸꦩ꧀ꦥꦸꦭ꧀ꦤꦲꦶꦁꦔꦂꦱꦤꦺꦄꦭ꧀ꦭꦃ꧈​ꦱꦼꦧꦧ꧀ꦥꦚ꧀ꦗꦼꦤꦼꦁꦔꦤ꧀ꦤꦺꦮꦶꦱ꧀ꦩꦶꦝꦔꦼꦠ꧀ꦥꦁꦒꦸꦤ꧀ꦢꦼꦭ꧀ꦭꦺ꧉"​
16:10 ꦧꦉꦁꦲꦫꦸꦤ꧀ꦔꦤ꧀ꦢꦶꦏꦩꦫꦁꦲꦸꦩꦠ꧀꧊ꦆꦱꦿꦲꦺꦭ꧀꧈​ꦏꦧꦺꦃꦧꦚ꧀ꦗꦸꦂꦥꦝꦩꦝꦼꦥ꧀ꦩꦫꦁꦲꦶꦁꦲꦫꦲꦫꦱꦩꦸꦤ꧀꧉​ꦱꦤꦭꦶꦏꦲꦶꦏꦸꦲꦸꦒꦕꦲꦾꦏꦩꦸꦭꦾꦤꦺꦄꦭ꧀ꦭꦃꦔꦼꦠꦶꦔꦭ꧀ꦲꦤꦲꦶꦁꦱꦗꦿꦺꦴꦤꦶꦁꦩꦺꦒ꧉​
16:11 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​
16:12 "ꦲꦏꦸꦮꦶꦱ꧀ꦩꦶꦝꦔꦼꦠ꧀ꦥꦁꦒꦸꦤ꧀ꦢꦼꦭ꧀ꦭꦺꦮꦺꦴꦁ꧊ꦆꦱꦿꦲꦺꦭ꧀꧉​ꦏꦤ꧀ꦝꦏ꧀ꦤꦏꦫꦺꦴꦮꦺꦴꦁꦮꦺꦴꦁꦲꦶꦏꦸ꧈​ꦪꦺꦤ꧀ꦲꦶꦁꦮꦪꦃꦱꦺꦴꦫꦺꦧꦏꦭ꧀ꦥꦝꦩꦁꦔꦤ꧀ꦢꦒꦶꦁ꧈​ꦭꦤ꧀ꦲꦶꦁꦮꦪꦃꦲꦺꦱꦸꦏ꧀ꦧꦏꦭ꧀ꦥꦝꦩꦁꦔꦤ꧀ꦫꦺꦴꦠꦶꦱꦮꦉꦒ꧉​ꦱꦿꦤꦩꦼꦁꦏꦺꦴꦤꦺꦴꦮꦺꦴꦁꦮꦺꦴꦁꦧꦏꦭ꧀ꦥꦝꦔꦼꦂꦠꦶꦪꦺꦤ꧀ꦲꦏꦸꦲꦶꦏꦶꦥꦔꦺꦫꦤ꧀ꦲꦭ꧀ꦭꦃꦲꦺ꧉"​
16:13 ꦲꦶꦁꦮꦪꦃꦱꦺꦴꦫꦺꦲꦤꦩꦤꦸꦏ꧀ꦒꦼꦩꦏ꧀ꦒꦼꦒꦿꦺꦴꦩ꧀ꦧꦺꦴꦭ꧀ꦭꦤ꧀ꦲꦏꦺꦃꦧꦔꦼꦠ꧀ꦥꦝꦤꦼꦧꦔꦤ꧀ꦠꦶꦤꦸꦠꦸꦥ꧀ꦥꦶꦥꦁꦒꦺꦴꦤ꧀ꦤꦤ꧀ꦱꦶꦁꦏꦁꦒꦺꦴꦔꦼꦢꦼꦒꦏꦺꦏꦺꦩꦃ;ꦢꦺꦤꦺꦲꦺꦱꦸꦏ꧀ꦏꦺꦧꦚ꧀ꦗꦸꦂꦲꦤꦧꦸꦤ꧀ꦲꦶꦁꦱꦏꦸꦧꦼꦁꦔꦶꦁꦏꦺꦩꦃ꧉​
16:14 ꦧꦉꦁꦧꦸꦤ꧀ꦩꦲꦸꦮꦶꦱ꧀ꦔꦸꦮꦧ꧀꧈​ꦧꦚ꧀ꦗꦸꦂꦏꦠꦺꦴꦤ꧀ꦲꦤꦧꦫꦁꦠꦶꦥꦶꦱ꧀ꦏꦪꦱꦶꦱꦶꦏ꧀ꦫꦠꦱꦲꦫꦲꦫꦱꦩꦸꦤ꧀꧉​ꦮꦸꦗꦸꦢ꧀ꦢꦺꦲꦭꦸꦱ꧀ꦧꦔꦼꦠ꧀ꦏꦪꦧꦸꦤ꧀ꦱꦶꦁꦚ꧀ꦗꦼꦤ꧀ꦝꦼꦭ꧀꧉​
16:15 ꦧꦉꦁꦮꦺꦴꦁ꧊ꦆꦱꦿꦲꦺꦭ꧀ꦮꦼꦫꦸꦃ꧈​ꦧꦚ꧀ꦗꦸꦂꦥꦝꦠꦏꦺꦴꦤ꧀ꦠꦶꦤꦏꦺꦴꦤ꧀꧈​"ꦲꦥꦏꦸꦮꦶ?"꧊ꦩꦸꦱꦧꦚ꧀ꦗꦸꦂꦔꦤ꧀ꦢꦶꦏꦩꦫꦁꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀꧈​"ꦲꦶꦪꦲꦶꦏꦶꦥꦔꦤ꧀ꦱꦶꦁꦢꦶꦥꦫꦶꦁꦔꦏꦺꦩꦫꦁꦏꦺꦴꦮꦺꦏꦧꦺꦃ꧉​
16:16 ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦝꦮꦸꦃ꧈​ꦱꦸꦥꦪꦱꦧꦼꦤ꧀ꦮꦺꦴꦁꦚ꧀ꦗꦸꦥꦸꦏ꧀ꦱꦕꦸꦏꦸꦥ꧀ꦥꦺꦏꦁꦒꦺꦴꦧꦿꦪꦠ꧀ꦠꦺ꧈​ꦮꦺꦴꦁꦱꦶꦗꦶꦫꦺꦴꦁꦭꦶꦠꦼꦂ꧈​ꦱꦧꦼꦤ꧀ꦧꦿꦪꦠ꧀ꦚ꧀ꦗꦸꦥꦸꦏ꧀ꦏꦩꦶꦠꦸꦫꦸꦠ꧀ꦗꦶꦮꦤꦺ꧉"​
16:17 ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦥꦝꦤꦶꦤ꧀ꦢꦏ꧀ꦏꦏꦺꦝꦮꦸꦃꦩꦲꦸ;ꦤꦭꦶꦏꦢꦶꦠꦏꦼꦂꦔꦁꦒꦺꦴꦒꦺꦴꦩꦺꦂꦲꦤꦱꦶꦁꦲꦺꦴꦭꦺꦃꦲꦺꦔ꧀ꦭꦸꦩ꧀ꦥꦸꦏ꧀ꦏꦏꦺꦭꦸꦮꦶꦃ꧈​ꦤꦁꦔꦶꦁꦲꦸꦒꦲꦤꦱꦶꦁꦏꦸꦫꦁ꧉​
16:18 ꦱꦶꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦏꦺꦃꦗꦼꦧꦸꦭ꧀ꦲꦺꦴꦫꦠꦸꦫꦃ꧈​ꦭꦤ꧀ꦱꦶꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦼꦛꦶꦛꦶꦏ꧀ꦲꦶꦪꦲꦺꦴꦫꦏꦸꦫꦁ꧈​ꦩꦸꦭꦱꦧꦼꦤ꧀ꦮꦺꦴꦁꦩꦸꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦼꦥꦶꦫꦧꦸꦠꦸꦃꦲꦺ꧉​
16:19 ꧊ꦩꦸꦱꦏꦤ꧀ꦝꦏꦫꦺꦴꦮꦺꦴꦁꦮꦺꦴꦁꦩꦲꦸ꧈​"ꦲꦗꦚꦶꦩ꧀ꦥꦼꦤ꧀ꦥꦔꦤ꧀ꦲꦶꦏꦶꦠꦼꦏꦤ꧀ꦱꦺꦱꦸꦏ꧀ꦲꦺꦱꦸꦏ꧀꧉"​
16:20 ꦤꦁꦔꦶꦁꦲꦤꦱꦮꦼꦠꦫꦮꦺꦴꦁ꧊ꦆꦱꦿꦲꦺꦭ꧀ꦱꦶꦁꦥꦝꦲꦺꦴꦫꦔ꧀ꦒꦸꦒꦸꦩꦫꦁꦝꦮꦸꦃꦲꦺ꧊ꦩꦸꦱ꧉​ꦮꦺꦴꦁꦮꦺꦴꦁꦩꦲꦸꦥꦝꦚꦶꦩ꧀ꦥꦼꦤ꧀ꦥꦔꦤ꧀ꦠꦼꦏꦤ꧀ꦢꦶꦤꦲꦺꦱꦸꦏ꧀ꦏꦺ꧉​ꦤꦁꦔꦶꦁꦲꦺꦱꦸꦏ꧀ꦏꦺꦥꦔꦤ꧀ꦩꦲꦸꦗꦼꦧꦸꦭ꧀ꦩꦩ꧀ꦧꦸꦭꦤ꧀ꦏꦼꦧꦏ꧀ꦱꦺꦠ꧀ꦠꦺ꧈​ꦤ꧀ꦢꦢꦺꦏ꧀ꦏꦏꦺꦢꦸꦏꦤꦺ꧊ꦩꦸꦱ꧉​
16:21 ꦱꦧꦼꦤ꧀ꦲꦺꦱꦸꦏ꧀ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦥꦝꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦔꦤ꧀ꦱꦕꦸꦏꦸꦥ꧀ꦥꦺ꧈​ꦢꦺꦤꦺꦪꦺꦤ꧀ꦱꦽꦔꦺꦔꦺꦤꦺꦮꦶꦱ꧀ꦥꦤꦱ꧀꧈​ꦥꦔꦤ꧀ꦱꦶꦁꦏꦺꦫꦶꦲꦶꦁꦊꦩꦃꦧꦚ꧀ꦗꦸꦂꦲꦗꦺꦂ꧉​
16:22 ꦲꦶꦁꦢꦶꦤꦏꦤꦼꦩ꧀ꦮꦺꦴꦁꦮꦺꦴꦁꦥꦝꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦔꦤ꧀ꦔꦤ꧀ꦠꦶꦠꦶꦏꦼꦭ꧀ꦭꦺꦴꦫꦺꦴ꧈​ꦮꦺꦴꦁꦱꦶꦗꦶꦥꦠꦁꦭꦶꦠꦼꦂ꧉​ꦥꦫꦥꦼꦩꦶꦩ꧀ꦥꦶꦤꦺꦲꦸꦩꦠ꧀ꦏꦧꦺꦃꦥꦝꦠꦼꦏꦱꦂꦠꦔ꧀ꦭꦥꦸꦂꦫꦏꦺꦩꦫꦁ꧊ꦩꦸꦱ꧉​
16:23 ꧊ꦩꦸꦱꦧꦚ꧀ꦗꦸꦂꦏꦤ꧀ꦝꦩꦫꦁꦮꦺꦴꦁꦮꦺꦴꦁꦩꦲꦸ꧈​"ꦱꦺꦱꦸꦏ꧀ꦏꦸꦮꦶꦢꦶꦤ꧊ꦱꦧ꧀ꦧꦠ꧀꧉​ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦤꦼꦠꦼꦥ꧀ꦥꦏꦺꦪꦺꦤ꧀ꦢꦶꦤ꧊ꦱꦧ꧀ꦧꦠ꧀ꦏꦸꦮꦶꦢꦶꦤꦏꦁꦒꦺꦴꦔꦱꦺꦴ꧈​ꦪꦏꦸꦮꦶꦢꦶꦤꦏꦒꦼꦩ꧀ꦥꦚ꧀ꦗꦼꦤꦼꦁꦔꦤ꧀ꦤꦺ꧉​ꦲꦶꦁꦢꦶꦤꦏꦸꦮꦶꦲꦥꦱꦶꦁꦲꦉꦥ꧀ꦏꦺꦴꦏ꧀ꦥꦁꦒꦁ꧈​ꦥꦁꦒꦁꦔꦼꦤ꧀꧈​ꦭꦤ꧀ꦲꦥꦱꦶꦁꦲꦉꦥ꧀ꦏꦺꦴꦏ꧀ꦒꦺꦴꦝꦺꦴꦒ꧀꧈​ꦒꦺꦴꦝꦺꦴꦒꦤ꧀꧉​ꦠꦸꦫꦃꦲꦤ꧀ꦤꦺꦏꦸꦢꦸꦢꦶꦱꦶꦱꦶꦃꦲꦏꦺꦭꦤ꧀ꦢꦶꦱꦶꦩ꧀ꦥꦼꦤ꧀ꦏꦁꦒꦺꦴꦲꦺꦱꦸꦏ꧀ꦏꦺ꧉"​
16:24 ꦠꦸꦫꦃꦲꦤ꧀ꦤꦺꦥꦔꦤ꧀ꦩꦲꦸꦧꦚ꧀ꦗꦸꦂꦥꦝꦢꦶꦱꦶꦩ꧀ꦥꦼꦤ꧀ꦏꦁꦒꦺꦴꦲꦶꦁꦢꦶꦤꦲꦺꦱꦸꦏ꧀ꦏꦺꦤꦼꦠꦼꦥ꧀ꦥꦶꦝꦮꦸꦃꦲꦺ꧊ꦩꦸꦱ꧉​ꦥꦔꦤ꧀ꦩꦲꦸꦲꦺꦴꦫꦩꦩ꧀ꦧꦸꦭꦤ꧀ꦲꦺꦴꦫꦲꦤꦱꦺꦠ꧀ꦠꦺ꧉​
16:25 ꧊ꦩꦸꦱꦔꦤ꧀ꦢꦶꦏ꧈​"ꦪꦲꦶꦏꦶꦥꦔꦤ꧀ꦩꦸꦏꦁꦒꦺꦴꦲꦶꦁꦢꦶꦤꦲꦶꦏꦶ꧈​ꦱꦼꦧꦧ꧀ꦢꦶꦤꦲꦶꦏꦶꦢꦶꦤ꧊ꦱꦧ꧀ꦧꦠ꧀꧈​ꦢꦶꦤꦥꦼꦔꦱꦺꦴꦮꦤ꧀ꦏꦁꦒꦺꦴꦔꦸꦂꦩꦠ꧀ꦠꦶꦄꦭ꧀ꦭꦃ꧈​ꦱꦂꦠꦏꦺꦴꦮꦺꦱꦼꦛꦶꦛꦶꦏ꧀ꦮꦲꦺꦲꦺꦴꦫꦧꦏꦭ꧀ꦤꦼꦩꦸꦥꦔꦤ꧀ꦲꦶꦁꦱꦚ꧀ꦗꦧꦤꦶꦁꦏꦺꦩꦃ꧉​
16:26 ꦤꦼꦩ꧀ꦢꦶꦤꦭꦮꦱ꧀ꦱꦺꦏꦺꦴꦮꦺꦏꦸꦢꦸꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦔꦤ꧀꧈​ꦤꦁꦔꦶꦁꦢꦶꦤꦏꦥꦶꦠꦸꦏꦸꦮꦶꦢꦶꦤꦏꦁꦒꦺꦴꦔꦱꦺꦴ;ꦲꦶꦁꦢꦶꦤꦲꦶꦏꦸꦲꦺꦴꦫꦲꦤꦫꦺꦴꦠꦶ꧉"​
16:27 ꦲꦶꦁꦢꦶꦤꦏꦥꦶꦠꦸꦲꦤꦮꦺꦴꦁ꧊ꦆꦱꦿꦲꦺꦭ꧀ꦱꦮꦼꦠꦫꦲꦉꦥ꧀ꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦔꦤ꧀꧈​ꦤꦁꦔꦶꦁꦲꦺꦴꦫꦲꦺꦴꦭꦺꦃꦲꦥꦲꦥ꧉​
16:28 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦔꦤ꧀ꦠꦶꦥꦶꦫꦭꦮꦱ꧀ꦱꦺꦲꦼꦁꦒꦺꦴꦤ꧀ꦩꦸꦥꦝꦲꦺꦴꦫꦩ꧀ꦧꦔꦸꦤ꧀ꦠꦸꦫꦸꦠ꧀ꦩꦫꦁꦝꦮꦸꦃꦝꦮꦸꦃꦏꦸ?
16:29 ꦠꦶꦠꦺꦤ꧀ꦤꦤꦪꦺꦤ꧀ꦲꦏꦸ꧈​ꦄꦭ꧀ꦭꦃ꧈​ꦮꦶꦱ꧀ꦩꦫꦶꦁꦔꦶꦏꦺꦴꦮꦺꦢꦶꦤꦏꦁꦒꦺꦴꦔꦱꦺꦴ꧉​ꦩꦸꦭꦤꦺꦲꦶꦁꦢꦶꦤꦏꦤꦼꦩ꧀ꦲꦏꦸꦩꦫꦶꦁꦔꦶꦥꦔꦤ꧀ꦏꦁꦒꦺꦴꦫꦺꦴꦁꦢꦶꦤ꧉​ꦲꦶꦁꦢꦶꦤꦏꦥꦶꦠꦸꦏꦸꦢꦸꦥꦝꦔꦱꦺꦴꦲꦶꦁꦲꦺꦴꦩꦃ꧈​ꦲꦺꦴꦫꦏꦼꦤꦭꦸꦔ꧉"​
16:30 ꦢꦢꦶꦲꦶꦁꦢꦶꦤꦏꦥꦶꦠꦸꦮꦺꦴꦁꦮꦺꦴꦁꦥꦝꦲꦺꦴꦫꦚꦩ꧀ꦧꦸꦠ꧀ꦒꦮꦺ꧉​
16:31 ꦥꦔꦤ꧀ꦩꦲꦸꦢꦶꦗꦼꦤꦼꦁꦔꦏꦺꦩꦤ꧀ꦤꦢꦺꦤꦶꦁꦮꦺꦴꦁ꧊ꦆꦱꦿꦲꦺꦭ꧀꧉​ꦩꦤ꧀ꦤꦏꦸꦮꦶꦫꦸꦥꦤꦺꦏꦪꦮꦶꦗꦶꦕꦶꦭꦶꦏ꧀꧈​ꦮꦼꦂꦤꦤꦺꦥꦸꦠꦶꦃꦭꦤ꧀ꦫꦱꦤꦺꦏꦪꦧꦶꦱ꧀ꦏꦸꦮꦶꦠ꧀꧈​ꦱꦶꦁꦢꦶꦒꦮꦺꦔꦁꦒꦺꦴꦩꦢꦸ꧉​
16:32 ꦥꦔꦤ꧀ꦢꦶꦏꦤꦺ꧊ꦩꦸꦱ꧈​"ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦤ꧀ꦝꦮꦸꦃꦲꦶꦏꦶꦠ꧈​ꦱꦸꦥꦪꦤꦶꦱꦶꦃꦲꦏꦺꦩꦤ꧀ꦤꦱꦼꦛꦶꦛꦶꦏ꧀ꦏꦁꦒꦺꦴꦠꦸꦫꦸꦤ꧀ꦏꦶꦠ꧈​ꦱꦸꦥꦪꦠꦸꦫꦸꦤ꧀ꦏꦶꦠꦥꦝꦔꦼꦂꦠꦶꦥꦔꦤ꧀ꦱꦶꦁꦢꦶꦥꦫꦶꦁꦔꦏꦺꦢꦺꦤꦶꦁꦄꦭ꧀ꦭꦃꦩꦫꦁꦏꦶꦠꦲꦤꦲꦶꦁꦲꦫꦲꦫꦱꦩꦸꦤ꧀;ꦪꦏꦸꦮꦶꦤꦭꦶꦏꦒꦸꦱ꧀ꦠꦶꦄꦭ꧀ꦭꦃꦔꦶꦫꦶꦢ꧀ꦏꦶꦠꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧉"​
16:33 ꦝꦮꦸꦃꦲꦺ꧊ꦩꦸꦱꦩꦫꦁꦲꦫꦸꦤ꧀꧈​"ꦚ꧀ꦗꦸꦥꦸꦏ꧀ꦏꦒꦸꦕꦶ꧈​ꦲꦶꦱꦺꦤ꧀ꦤꦤꦩꦤ꧀ꦤꦫꦺꦴꦁꦭꦶꦠꦼꦂꦱꦂꦠꦢꦺꦴꦏꦺꦴꦏ꧀ꦤꦲꦶꦁꦥꦥꦤ꧀ꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧈​ꦢꦶꦱꦶꦩ꧀ꦥꦼꦤ꧀ꦏꦁꦒꦺꦴꦠꦸꦫꦸꦤ꧀ꦏꦶꦠ꧉"​
16:34 ꦲꦫꦸꦤ꧀ꦧꦚ꧀ꦗꦸꦂꦚꦺꦭꦺꦃꦲꦏꦺꦒꦸꦕꦶꦲꦶꦁꦱꦔꦉꦥ꧀ꦥꦶꦁꦥꦼꦛꦶꦲꦁꦒꦼꦂꦲꦁꦒꦼꦂ꧈​ꦢꦶꦱꦶꦩ꧀ꦥꦼꦤ꧀꧈​ꦩꦤꦸꦠ꧀ꦝꦮꦸꦃꦲꦺꦄꦭ꧀ꦭꦃꦩꦫꦁ꧊ꦩꦸꦱ꧉​
16:35 ꦩꦤ꧀ꦤꦏꦸꦮꦶꦢꦢꦶꦥꦔꦤ꧀ꦤꦺꦮꦺꦴꦁ꧊ꦆꦱꦿꦲꦺꦭ꧀ꦱꦗꦿꦺꦴꦤꦺꦥꦠꦁꦥꦸꦭꦸꦃꦠꦲꦸꦤ꧀꧈​ꦔꦤ꧀ꦠꦶꦥꦝꦠꦼꦏꦤ꧀꧊ꦏꦺꦤꦲꦤ꧀꧈​ꦥꦁꦒꦺꦴꦤ꧀ꦤꦤ꧀ꦤꦺꦱꦶꦁꦠꦼꦠꦼꦥ꧀꧉​
16:36 ꧌ꦒꦺꦴꦩꦺꦂꦲꦶꦏꦸꦠꦏꦼꦂꦫꦤ꧀ꦏꦁꦒꦺꦴꦧꦫꦁꦒꦫꦶꦁꦱꦶꦁꦭꦸꦩꦿꦃꦲꦺꦢꦶꦲꦼꦁꦒꦺꦴꦝꦺꦏ꧀ꦗꦩꦤ꧀ꦱꦼꦩꦤ;ꦱꦒꦺꦴꦩꦺꦂꦥꦝꦏꦫꦺꦴꦫꦺꦴꦁꦥꦸꦭꦸꦃꦭꦶꦠꦼꦂ꧉꧍​