Alkitab/Pangentasan/19

Saka Wikisumber

19:1 (19:1-2)ꦱꦮꦶꦱ꧀ꦱꦺꦊꦭꦏꦺꦴꦤ꧀ꦩꦲꦸꦧꦁꦱ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦧꦸꦝꦭ꧀ꦱꦏ꧊ꦫꦥ꦳ꦶꦢꦶꦩ꧀꧉​ꦲꦶꦁꦠꦁꦒꦭ꧀ꦱꦶꦗꦶꦱꦱꦶꦏꦠꦼꦭꦸꦱꦥꦸꦁꦏꦸꦂꦫꦺꦱꦏ꧊ꦩꦺꦱꦶꦂ꧈​ꦥꦝꦠꦼꦏꦤ꧀ꦲꦶꦁꦲꦫꦲꦫꦱꦩꦸꦤ꧀ꦲꦶꦁꦥꦼꦒꦸꦤꦸꦁꦔꦤ꧀꧊ꦱꦶꦤꦲꦶ꧉​ꦧꦚ꧀ꦗꦸꦂꦥꦝꦔꦼꦢꦼꦒꦏꦺꦏꦺꦩꦃꦲꦶꦁꦱꦶꦏꦶꦭ꧀ꦭꦶꦁꦒꦸꦤꦸꦁ꧊ꦱꦶꦤꦲꦶꦏꦺꦴꦤꦺꦴ꧈​
19:2 (19:1)
19:3 ꦢꦺꦤꦺ꧊ꦩꦸꦱꦩꦶꦁꦒꦃꦲꦶꦁꦒꦸꦤꦸꦁꦥꦽꦭꦸꦱꦺꦴꦮꦤ꧀ꦲꦶꦁꦔꦂꦱꦤꦺꦒꦸꦱ꧀ꦠꦶꦄꦭ꧀ꦭꦃ꧉​ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦱꦺꦴꦫꦱꦏꦲꦶꦁꦒꦸꦤꦸꦁꦩꦲꦸꦭꦤ꧀꧊ꦩꦸꦱꦏꦝꦮꦸꦃꦲꦤ꧀ꦤꦼꦫꦸꦱ꧀ꦱꦏꦺꦥꦔꦤ꧀ꦢꦶꦏꦩꦲꦸꦩꦫꦁꦮꦺꦴꦁ꧊ꦆꦱꦿꦲꦺꦭ꧀꧈​ꦠꦸꦫꦸꦤ꧀ꦤꦺ꧊ꦪꦏꦸꦧ꧀꧈​
19:4 "ꦏꦺꦴꦮꦺꦏꦧꦺꦃꦮꦶꦱ꧀ꦥꦝꦮꦼꦫꦸꦃꦲꦥꦏꦁꦢꦏ꧀ꦠꦤ꧀ꦢꦸꦏ꧀ꦏꦏꦺꦩꦫꦁꦮꦺꦴꦁ꧊ꦩꦺꦱꦶꦂ꧈​ꦭꦤ꧀ꦏꦼꦥꦿꦶꦪꦺꦲꦼꦁꦒꦺꦴꦤ꧀ꦏꦸꦔꦶꦫꦶꦢ꧀ꦏꦺꦴꦮꦺꦢꦏ꧀ꦥꦫꦏ꧀ꦏꦏꦺꦲꦶꦁꦔꦂꦱꦏꦸꦏꦺꦤꦺꦏꦤ꧀ꦛꦶꦥꦔ꧀ꦮꦱꦏꦁꦒꦼꦝꦺ꧈​ꦏꦪꦢꦺꦤꦺꦩꦤꦸꦏ꧀ꦒꦫꦸꦝꦱꦶꦁꦔ꧀ꦒꦺꦤ꧀ꦝꦺꦴꦁꦲꦤꦏ꧀ꦏꦺꦲꦶꦁꦱ꧀ꦮꦶꦮꦶꦤꦺ꧉​
19:5 ꦏꦁꦲꦶꦏꦸ꧈​ꦱꦲꦶꦏꦶꦪꦺꦤ꧀ꦏꦺꦴꦮꦺꦥꦝꦩ꧀ꦧꦔꦸꦤ꧀ꦠꦸꦫꦸꦠ꧀ꦩꦫꦁꦝꦮꦸꦃꦏꦸꦱꦂꦠꦥꦝꦤꦼꦠꦼꦥ꧀ꦥꦶꦗꦚ꧀ꦗꦶꦏꦸ꧈​ꦏꦺꦴꦮꦺꦧꦏꦭ꧀ꦥꦝꦢꦏ꧀ꦢꦢꦺꦏ꧀ꦏꦏꦺꦲꦸꦩꦠ꧀ꦏꦼꦏꦱꦶꦃꦏꦸ꧉​ꦱꦭꦸꦩꦃꦲꦶꦁꦧꦸꦩꦶꦲꦶꦏꦶꦏꦒꦸꦁꦔꦤ꧀ꦏꦸ꧈​ꦢꦺꦤꦺꦏꦺꦴꦮꦺꦏꦧꦺꦃꦧꦏꦭ꧀ꦢꦢꦶꦲꦸꦩꦠ꧀ꦏꦸꦏꦁꦥꦶꦤꦶꦭꦶꦃ꧈​
19:6 ꦱꦂꦠꦏꦺꦴꦮꦺꦧꦏꦭ꧀ꦥꦝꦢꦢꦶꦲꦸꦩꦠ꧀ꦏꦁꦢꦏ꧀ꦱꦼꦁꦏꦼꦂꦔ꧀ꦭꦢꦺꦴꦱ꧀ꦱꦶꦲꦏꦸꦲꦤꦲꦶꦁꦏꦿꦠꦺꦴꦤ꧀ꦏꦸ꧉"​
19:7 ꧊ꦩꦸꦱꦧꦚ꧀ꦗꦸꦂꦩꦤ꧀ꦝꦥ꧀ꦱꦂꦠꦔꦸꦩ꧀ꦥꦸꦭ꧀ꦭꦏꦺꦥꦫꦠꦸꦮꦠꦸꦮꦤꦺꦧꦁꦱ꧈​ꦢꦶꦕꦿꦶꦠꦤꦶꦲꦥꦱꦶꦁꦮꦶꦱ꧀ꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱ꧉​
19:8 (19:8-9)ꦏꦧꦺꦃꦥꦝꦩꦁꦱꦸꦭ꧀ꦭꦶꦧꦼꦧꦉꦁꦔꦤ꧀꧈​"ꦏꦸꦭꦧꦝꦺꦱꦩꦶꦤꦶꦤ꧀ꦢꦏ꧀ꦏꦏꦼꦤ꧀ꦱꦝꦮꦸꦃꦲꦶꦥꦸꦤ꧀ꦒꦸꦱ꧀ꦠꦶꦄꦭ꧀ꦭꦃ꧉"​ꦭꦤ꧀ꦮꦁꦱꦸꦭ꧀ꦭꦤ꧀ꦲꦶꦏꦶꦢꦶꦲꦠꦸꦂꦫꦏꦺꦢꦺꦤꦶꦁ꧊ꦩꦸꦱꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​"ꦲꦏꦸꦧꦏꦭ꧀ꦔꦿꦮꦸꦃꦲꦶꦏꦺꦴꦮꦺꦲꦶꦁꦱꦗꦿꦺꦴꦤꦶꦁꦩꦼꦤ꧀ꦝꦸꦁꦏꦁꦥꦼꦠꦼꦁ;ꦱꦂꦠꦮꦺꦴꦁꦮꦺꦴꦁꦧꦏꦭ꧀ꦥꦝꦏꦿꦸꦔꦸꦥꦔꦤ꧀ꦢꦶꦏꦏꦸꦩꦫꦁꦏꦺꦴꦮꦺ;ꦮꦶꦮꦶꦠ꧀ꦮꦼꦏ꧀ꦠꦸꦲꦶꦏꦶꦮꦺꦴꦁꦮꦺꦴꦁꦧꦏꦭ꧀ꦥꦝꦔꦤ꧀ꦢꦼꦭ꧀ꦩꦫꦁꦏꦺꦴꦮꦺ꧉​
19:9 (19:8)
19:10 ꦱꦲꦶꦏꦶꦮꦺꦴꦁꦮꦺꦴꦁꦲꦶꦏꦸꦥꦫꦤ꧀ꦤꦤ꧈​ꦥꦝꦏꦺꦴꦤ꧀ꦤꦼꦤ꧀ꦱꦼꦱꦸꦕꦶꦲꦶꦁꦢꦶꦤꦲꦶꦏꦶꦭꦤ꧀ꦱꦺꦱꦸꦏ꧀ꦏꦁꦒꦺꦴꦔꦶꦧꦢꦃ꧉​ꦱꦤ꧀ꦝꦁꦔꦤ꧀ꦤꦺꦏꦸꦢꦸꦥꦝꦢꦶꦏꦸꦩ꧀ꦧꦃ꧉​
19:11 ꦩ꧀ꦧꦺꦱꦸꦏ꧀ꦲꦼꦩ꧀ꦧꦺꦤ꧀ꦏꦸꦢꦸꦮꦶꦱ꧀ꦥꦝꦕꦼꦩꦮꦶꦱ꧀꧉​ꦲꦶꦁꦢꦶꦤꦏꦸꦮꦶꦲꦏꦸꦧꦏꦭ꧀ꦠꦼꦝꦏ꧀ꦩꦼꦚꦁꦒꦸꦤꦸꦁ꧊ꦱꦶꦤꦲꦶ꧈​ꦱꦸꦥꦪꦮꦺꦴꦁꦮꦺꦴꦁꦏꦧꦺꦃꦥꦝꦤ꧀ꦢꦼꦊꦁꦩꦫꦁꦲꦏꦸ꧉​
19:12 ꦒꦮꦺꦪꦥꦒꦼꦂꦲꦶꦁꦱꦏꦸꦧꦼꦁꦔꦺꦒꦸꦤꦸꦁꦏꦸꦮꦶ꧈​ꦱꦸꦥꦪꦲꦗꦲꦤꦱꦶꦁꦩꦸꦁꦒꦃꦲꦶꦁꦒꦸꦤꦸꦁ꧈​ꦲꦥꦩꦼꦤꦺꦃꦚꦼꦝꦏ꧀ꦲꦶꦁꦱꦶꦏꦶꦭ꧀ꦭꦺꦒꦸꦤꦸꦁ꧉​ꦱꦶꦁꦱꦥꦔ꧀ꦭꦶꦮꦠ꧀ꦠꦶꦥꦒꦼꦂ꧈​ꦧꦏꦭ꧀ꦏꦲꦸꦏꦸꦩ꧀ꦥꦠꦶ꧉​
19:13 ꦮꦺꦴꦁꦩꦲꦸꦏꦸꦢꦸꦢꦶꦧꦼꦤ꧀ꦠꦸꦂꦫꦶꦮꦠꦸꦲꦸꦠꦮꦢꦶꦥꦤꦃ꧈​ꦭꦤ꧀ꦲꦺꦴꦫꦏꦼꦤꦢꦶꦒꦼꦥꦺꦴꦏ꧀ꦲꦶꦁꦠꦔꦤ꧀꧉​ꦭꦫꦁꦔꦤ꧀ꦲꦶꦏꦶꦏꦁꦒꦺꦴꦩꦤꦸꦁꦱꦭꦤ꧀ꦏꦺꦮꦤ꧀;ꦱꦥꦮꦲꦺꦱꦶꦁꦔ꧀ꦭꦶꦮꦠ꧀ꦠꦶꦥꦒꦼꦂꦏꦸꦢꦸꦢꦶꦲꦸꦏꦸꦩ꧀ꦥꦠꦶ꧉​ꦩꦸꦁꦱꦮꦶꦱ꧀ꦱꦺꦏꦿꦸꦔꦸꦲꦸꦤꦶꦤꦶꦁꦱ꧀ꦭꦺꦴꦩ꧀ꦥꦿꦺꦠ꧀꧈​ꦧꦁꦱꦩꦲꦸꦏꦧꦺꦃꦭꦒꦶꦏꦼꦤꦩꦸꦁꦒꦃꦲꦶꦁꦒꦸꦤꦸꦁ꧉"​
19:14 (19:14-15)꧊ꦩꦸꦱꦧꦚ꧀ꦗꦸꦂꦩꦤ꧀ꦝꦥ꧀ꦱꦏꦒꦸꦤꦸꦁꦭꦤ꧀ꦝꦮꦸꦃꦱꦸꦥꦪꦮꦺꦴꦁꦮꦺꦴꦁꦥꦝꦱꦼꦱꦸꦕꦶꦏꦁꦒꦺꦴꦔꦶꦧꦢꦃ꧉​ꦝꦮꦸꦃꦲꦺ꧈​"ꦩ꧀ꦧꦺꦱꦸꦏ꧀ꦲꦼꦩ꧀ꦧꦺꦤ꧀ꦏꦺꦴꦮꦺꦏꦸꦢꦸꦮꦶꦱ꧀ꦥꦝꦕꦼꦕꦮꦶꦱ꧀ꦭꦤ꧀ꦠꦼꦏꦤ꧀ꦢꦶꦤꦏꦥꦶꦁꦠꦼꦭꦸꦤꦺꦏꦺꦴꦮꦺꦲꦺꦴꦫꦏꦼꦤꦥꦝꦚꦼꦝꦏ꧀ꦏꦶꦮꦺꦴꦁꦮꦢꦺꦴꦤ꧀꧉"​ꦧꦁꦱꦩꦲꦸꦤꦸꦭꦶꦥꦝꦱꦼꦱꦸꦕꦶꦱꦂꦠꦔꦸꦩ꧀ꦧꦃꦲꦶꦱꦤ꧀ꦝꦁꦔꦤ꧀ꦤꦺ꧉​
19:15 (19:14)
19:16 ꦲꦶꦁꦢꦶꦤꦏꦠꦼꦭꦸꦲꦤꦒ꧀ꦭꦸꦝꦸꦒ꧀ꦭꦤ꧀ꦧ꧀ꦭꦼꦝꦺꦒ꧀꧉​ꦩꦼꦤ꧀ꦝꦸꦁꦏꦤ꧀ꦢꦼꦭ꧀ꦏꦠꦺꦴꦤ꧀ꦲꦤꦲꦶꦁꦱꦤ꧀ꦝꦸꦮꦸꦂꦫꦶꦁꦒꦸꦤꦸꦁ꧈​ꦧꦚ꧀ꦗꦸꦂꦏꦼꦥꦿꦸꦔꦸꦱ꧀ꦮꦫꦤꦺꦱ꧀ꦭꦺꦴꦩ꧀ꦥꦿꦺꦠ꧀ꦧꦤ꧀ꦠꦼꦂꦧꦔꦼꦠ꧀꧉​ꦮꦺꦴꦁꦮꦺꦴꦁꦲꦶꦁꦏꦺꦩꦃꦥꦝꦒꦶꦫꦶꦱ꧀ꦏꦧꦺꦃ꧉​
19:17 ꧊ꦩꦸꦱꦧꦚ꧀ꦗꦸꦂꦔꦶꦫꦶꦢ꧀ꦮꦺꦴꦁꦮꦺꦴꦁꦩꦲꦸꦩꦼꦠꦸꦱꦏꦥꦊꦉꦧ꧀ꦧꦤ꧀ꦤꦺꦱꦺꦧꦲꦶꦁꦔꦂꦱꦤꦺꦒꦸꦱ꧀ꦠꦶꦄꦭ꧀ꦭꦃ;ꦧꦚ꧀ꦗꦸꦂꦥꦝꦔꦢꦼꦒ꧀ꦲꦶꦁꦱꦶꦏꦶꦭ꧀ꦭꦶꦁꦒꦸꦤꦸꦁ꧉​
19:18 ꦒꦸꦤꦸꦁ꧊ꦱꦶꦤꦲꦶꦏꦧꦺꦃꦏꦼꦠꦸꦠꦸꦥ꧀ꦥꦤ꧀ꦩꦼꦤ꧀ꦝꦸꦁꦏꦁꦥꦼꦠꦼꦁ꧈​ꦩꦼꦂꦒꦄꦭ꧀ꦭꦃꦮꦶꦱ꧀ꦫꦮꦸꦃꦲꦶꦁꦒꦸꦤꦸꦁꦲꦤꦲꦶꦁꦱꦗꦿꦺꦴꦤꦺꦲꦸꦫꦸꦧ꧀ꦧꦶꦁꦒꦼꦤꦶ꧉​ꦩꦼꦤ꧀ꦝꦸꦁꦩꦲꦸꦏꦸꦩꦼꦭꦸꦤ꧀ꦏꦪꦏꦼꦭꦸꦏ꧀ꦏꦺꦥꦮꦺꦴꦤ꧀꧉​ꦒꦸꦤꦸꦁꦔꦺꦢꦢꦶꦲꦺꦴꦉꦒ꧀꧉​
19:19 ꦱ꧀ꦮꦫꦤꦺꦱ꧀ꦭꦺꦴꦩ꧀ꦥꦿꦺꦠ꧀ꦱꦪꦧꦤ꧀ꦠꦼꦂ꧉​꧊ꦩꦸꦱꦧꦚ꧀ꦗꦸꦂꦩꦸꦚ꧀ꦗꦸꦏ꧀꧈​ꦢꦺꦤꦺꦄꦭ꧀ꦭꦃꦥꦫꦶꦁꦮꦁꦱꦸꦭ꧀ꦭꦤ꧀ꦱꦏꦲꦶꦁꦱꦗꦿꦺꦴꦤꦶꦁꦒ꧀ꦭꦸꦝꦸꦒ꧀꧉​
19:20 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦠꦸꦩꦼꦝꦏ꧀ꦩꦫꦁꦥꦸꦕꦸꦏ꧀ꦏꦶꦁꦒꦸꦤꦸꦁ꧊ꦱꦶꦤꦲꦶꦱꦂꦠꦤꦶꦩ꧀ꦧꦭ꧀ꦭꦶ꧊ꦩꦸꦱꦱꦸꦥꦪꦩꦉꦏ꧀꧉​꧊ꦩꦸꦱꦲꦸꦒꦧꦚ꧀ꦗꦸꦂꦩꦶꦁꦒꦃ꧉​
19:21 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦩꦸꦝꦸꦤꦱꦂꦠꦧꦁꦱꦏꦸꦮꦶꦲꦺꦭꦶꦁꦤ꧈​ꦪꦺꦤ꧀ꦲꦺꦴꦫꦏꦼꦤꦩ꧀ꦧꦿꦺꦴꦧꦺꦴꦱ꧀ꦲꦶꦁꦥꦒꦼꦂ꧈​ꦱꦂꦠꦚꦼꦝꦏ꧀ꦤ꧀ꦢꦼꦊꦁꦲꦏꦸ꧈​ꦠꦼꦩꦃꦲꦏꦺꦃꦱꦶꦁꦧꦏꦭ꧀ꦥꦝꦩꦠꦶ꧉​
19:22 ꦩꦼꦁꦏꦺꦴꦤꦺꦴꦲꦸꦒꦥꦫꦲꦶꦩꦩ꧀ꦱꦶꦁꦏꦼꦥꦺꦔꦶꦤ꧀ꦚꦼꦝꦏ꧀ꦏꦶꦲꦏꦸ꧈​ꦏꦸꦢꦸꦱꦼꦱꦸꦕꦶ꧈​ꦱꦸꦥꦪꦲꦗꦏꦼꦠꦩꦤ꧀ꦲꦶꦁꦧꦼꦧꦼꦤ꧀ꦢꦸ꧉"​
19:23 ꦲꦠꦸꦂꦫꦺ꧊ꦩꦸꦱꦩꦫꦁꦄꦭ꧀ꦭꦃ꧈​"ꦧꦁꦱꦩꦼꦤꦶꦏꦩ꧀ꦧꦺꦴꦠꦼꦤ꧀ꦧꦝꦺꦩꦶꦁꦒꦃ꧈​ꦩꦼꦂꦒꦶꦒꦸꦱ꧀ꦠꦶꦱꦩ꧀ꦥꦸꦤ꧀ꦔꦤ꧀ꦢꦶꦏꦤꦶꦏꦮꦸꦭ꧈​ꦧꦶꦭꦶꦃꦉꦢꦶꦩꦼꦤꦶꦏꦏꦢꦢꦺꦴꦱ꧀ꦤꦥꦁꦒꦺꦤ꧀ꦤꦤ꧀ꦲꦶꦁꦏꦁꦱꦸꦕꦶ;ꦱꦲꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦒꦼꦂꦫꦶꦥꦸꦤ꧀ꦩꦸꦧꦼꦁ꧉"​
19:24 ꦝꦮꦸꦃꦲꦺꦒꦸꦱ꧀ꦠꦶꦄꦭ꧀ꦭꦃ꧈​"ꦩꦸꦝꦸꦤꦱꦂꦠꦩꦿꦺꦤꦺꦪꦩꦼꦤꦺꦃꦏꦫꦺꦴꦲꦫꦸꦤ꧀꧉​ꦤꦁꦔꦶꦁꦥꦫꦲꦶꦩꦩ꧀ꦭꦤ꧀ꦫꦏꦾꦠ꧀ꦲꦗꦔꦤ꧀ꦠꦶꦩ꧀ꦧꦿꦺꦴꦧꦺꦴꦱ꧀ꦲꦶꦁꦥꦒꦼꦂ꧈​ꦱꦺꦴꦮꦤ꧀ꦲꦶꦁꦔꦂꦱꦏꦸ꧈​ꦠꦼꦩꦃꦏꦼꦤꦲꦶꦁꦧꦼꦧꦼꦤ꧀ꦢꦸ꧉"​
19:25 ꧊ꦩꦸꦱꦧꦚ꧀ꦗꦸꦂꦩꦤ꧀ꦝꦥ꧀ꦱꦂꦠꦤꦼꦫꦸꦱ꧀ꦱꦏꦺꦝꦮꦸꦃꦲꦺꦄꦭ꧀ꦭꦃꦩꦫꦁꦮꦺꦴꦁꦮꦺꦴꦁꦩꦲꦸ꧉​