Alkitab/Pangentasan/13

^13:1 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​

^13:2 "ꦱꦏꦺꦃꦲꦶꦁꦲꦤꦏ꧀ꦭꦤꦁꦩ꧀ꦧꦉꦥ꧀ꦱꦲꦺꦴꦱ꧀ꦤꦩꦫꦁꦲꦏꦸ꧉​ꦱꦧꦼꦤ꧀ꦲꦤꦏ꧀ꦭꦤꦁꦩ꧀ꦧꦉꦥ꧀ꦥꦺꦮꦺꦴꦁ꧊ꦆꦱꦿꦲꦺꦭ꧀꧈​ꦭꦤ꧀ꦱꦧꦼꦤ꧀ꦏꦺꦮꦤ꧀ꦭꦤꦁꦱꦶꦁꦭꦲꦶꦂꦮꦶꦮꦶꦠ꧀ꦠꦤ꧀ꦏꦸꦮꦶꦏꦒꦸꦁꦔꦤ꧀ꦏꦸ꧉"​

^13:3 ꦥꦿꦺꦤ꧀ꦠꦃꦲꦺ꧊ꦩꦸꦱꦩꦫꦁꦧꦁꦱ꧊ꦆꦱꦿꦲꦺꦭ꧀ꦩꦼꦁꦏꦺꦤꦺ꧈​"ꦢꦶꦤꦲꦶꦏꦶꦥꦺꦔꦼꦠ꧀ꦠꦤ꧈​ꦪꦏꦸꦮꦶꦢꦶꦤꦲꦼꦁꦒꦺꦴꦤ꧀ꦩꦸꦥꦝꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧈​ꦥꦁꦒꦺꦴꦤ꧀ꦤꦤ꧀ꦩꦸꦢꦢꦶꦧꦠꦸꦂꦠꦸꦏꦺꦴꦤ꧀꧉​ꦲꦶꦪꦲꦶꦁꦢꦶꦤꦏꦸꦮꦶꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦩꦼꦂꦢꦶꦏꦏ꧀ꦏꦏꦺꦏꦺꦴꦮꦺꦏꦧꦺꦃꦱꦏꦥꦔ꧀ꦮꦱꦤꦺꦮꦺꦴꦁ꧊ꦩꦺꦱꦶꦂ꧉​ꦲꦗꦥꦝꦩꦁꦔꦤ꧀ꦫꦺꦴꦠꦶꦔꦁꦒꦺꦴꦫꦒꦶ꧉​

^13:4 ꦲꦶꦁꦢꦶꦤꦲꦶꦏꦶ꧈​ꦱꦱꦶ꧊ꦄꦧꦶꦧ꧀ꦏꦺꦴꦮꦺꦏꦧꦺꦃꦥꦝꦭꦸꦔꦱꦏꦠꦤꦃ꧊ꦩꦺꦱꦶꦂ꧉​

^13:5 ꦔꦁꦒꦺꦴꦱꦸꦩ꧀ꦥꦃꦄꦭ꧀ꦭꦃꦚ꧀ꦗꦚ꧀ꦗꦺꦤ꧀ꦤꦶꦊꦭꦸꦲꦸꦂꦩꦸꦲꦉꦥ꧀ꦩꦫꦶꦁꦔꦏꦺꦠꦤꦃꦲꦺꦮꦺꦴꦁ꧊ꦏꦺꦤꦲꦤ꧀꧈​꧊ꦲꦺꦠ꧀꧈​꧊ꦄꦩꦺꦴꦫꦶ꧈​꧊ꦲꦺꦮꦶꦭꦤ꧀꧊ꦪꦺꦧꦸꦱ꧀꧉​ꦱꦮꦶꦱ꧀ꦱꦺꦄꦭ꧀ꦭꦃꦔꦶꦫꦶꦢ꧀ꦏꦺꦴꦮꦺꦭꦤ꧀ꦏꦺꦴꦮꦺꦔꦼꦁꦒꦺꦴꦤ꧀ꦤꦶꦤꦼꦒꦫꦱꦶꦁꦱꦸꦒꦶꦃꦱꦂꦠꦱꦸꦧꦸꦂꦏꦸꦮꦶ꧈​ꦱꦧꦼꦤ꧀ꦠꦲꦸꦤ꧀ꦲꦶꦁꦱꦱꦶꦏꦥꦶꦱꦤ꧀ꦏꦺꦴꦮꦺꦏꦧꦺꦃꦏꦸꦢꦸꦔꦤꦏ꧀ꦏꦏꦺꦫꦶꦪꦪꦩꦼꦁꦏꦺꦴꦤꦺꦴ꧉​

^13:6 ꦱꦗꦿꦺꦴꦤꦺꦥꦶꦠꦸꦁꦢꦶꦤꦏꦺꦴꦮꦺꦏꦸꦢꦸꦥꦝꦩꦁꦔꦤ꧀ꦫꦺꦴꦠꦶꦠꦤ꧀ꦥꦫꦒꦶ꧈​ꦭꦤ꧀ꦲꦶꦁꦢꦶꦤꦏꦥꦶꦠꦸꦔꦤꦏ꧀ꦤꦫꦶꦪꦪꦏꦁꦒꦺꦴꦔꦸꦂꦩꦠ꧀ꦠꦶꦄꦭ꧀ꦭꦃ꧉​

^13:7 ꦲꦶꦪꦱꦗꦿꦺꦴꦤꦺꦥꦶꦠꦸꦁꦢꦶꦤꦲꦶꦁꦤꦼꦒꦫꦩꦸꦲꦗꦔꦤ꧀ꦠꦶꦲꦤꦫꦺꦴꦠꦶꦱꦶꦁꦔꦁꦒꦺꦴꦫꦒꦶ꧉​

^13:8 ꦲꦶꦁꦮꦶꦮꦶꦠ꧀ꦠꦤ꧀ꦤꦶꦁꦫꦶꦪꦪ꧈​ꦏꦺꦴꦮꦺꦏꦸꦢꦸꦚꦿꦶꦠꦤꦶꦲꦤꦏ꧀ꦥꦸꦠꦸꦩꦸ꧈​ꦪꦺꦤ꧀ꦲꦺꦴꦭꦺꦃꦲꦺꦥꦝꦔꦤꦏ꧀ꦏꦏꦺꦫꦶꦪꦪꦲꦶꦏꦸꦏꦁꦒꦺꦴꦩꦺꦔꦼꦠ꧀ꦠꦶꦲꦥꦱꦶꦁꦮꦶꦱ꧀ꦢꦶꦠꦶꦤ꧀ꦢꦏ꧀ꦏꦏꦺꦄꦭ꧀ꦭꦃꦏꦁꦒꦺꦴꦏꦺꦴꦮꦺꦏꦧꦺꦃ꧈​ꦪꦏꦸꦮꦶꦧꦸꦝꦭ꧀ꦭꦤ꧀ꦱꦏꦲꦶꦁꦠꦤꦃ꧊ꦩꦺꦱꦶꦂ꧉​

^13:9 ꦥꦽꦤꦠꦤ꧀ꦩꦼꦁꦏꦺꦴꦤꦺꦴꦩꦲꦸꦢꦢꦶꦪꦥꦽꦠꦤ꧀ꦝꦲꦤꦲꦶꦁꦠꦔꦤ꧀ꦱꦂꦠꦠꦼꦠꦼꦔꦼꦂꦲꦤꦲꦶꦁꦧꦛꦸꦏ꧀ꦩꦸ꧉​ꦱꦿꦤꦥꦺꦔꦼꦠ꧀ꦠꦤ꧀ꦲꦶꦏꦸꦏꦺꦴꦮꦺꦧꦏꦭ꧀ꦠꦤ꧀ꦱꦃꦢꦶꦲꦺꦭꦶꦁꦔꦏꦺꦱꦸꦥꦪꦲꦁꦒꦼꦂꦲꦁꦒꦼꦂꦫꦺꦄꦭ꧀ꦭꦃꦠꦤ꧀ꦱꦃꦏꦺꦴꦏ꧀ꦲꦸꦕꦥ꧀ꦥꦏꦺꦭꦤ꧀ꦏꦺꦴꦏ꧀ꦱꦶꦤꦲꦸ꧉​ꦱꦼꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔ꧀ꦭꦸꦮꦂꦫꦶꦏꦺꦴꦮꦺꦏꦧꦺꦃꦱꦏꦲꦶꦁꦠꦤꦃ꧊ꦩꦺꦱꦶꦂꦔꦁꦒꦺꦴꦥꦔ꧀ꦮꦱꦱꦶꦁꦒꦼꦝꦺ꧉​

^13:10 ꦫꦶꦪꦪꦲꦶꦏꦶꦏꦸꦢꦸꦢꦶꦲꦤꦏ꧀ꦏꦏꦺꦱꦧꦼꦤ꧀ꦠꦲꦸꦤ꧀ꦲꦶꦁꦮꦼꦏ꧀ꦠꦸꦱꦶꦁꦮꦶꦱ꧀ꦢꦶꦠꦼꦩ꧀ꦠꦺꦴꦏ꧀ꦏꦏꦺ꧉"​

^13:11 ꦥꦿꦺꦤ꧀ꦠꦃꦲꦺ꧊ꦩꦸꦱꦩꦫꦁꦧꦁꦱ꧊ꦆꦱꦿꦲꦺꦭ꧀ꦩꦼꦁꦏꦺꦤꦺ꧈​"ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔꦶꦫꦶꦢ꧀ꦏꦺꦴꦮꦺꦏꦧꦺꦃꦩꦼꦚꦁꦤꦼꦒꦫ꧊ꦏꦺꦤꦲꦤ꧀꧈​ꦱꦶꦁꦢꦶꦗꦚ꧀ꦗꦺꦏ꧀ꦏꦏꦺꦔꦁꦒꦺꦴꦱꦸꦩ꧀ꦥꦃꦩꦫꦁꦏꦺꦴꦮꦺꦱꦂꦠꦩꦫꦁꦊꦭꦸꦲꦸꦂꦩꦸ꧉​ꦱꦮꦶꦱ꧀ꦱꦺꦠꦤꦃꦩꦲꦸꦢꦶꦥꦱꦿꦃꦲꦏꦺꦩꦫꦁꦏꦺꦴꦮꦺ꧈​

^13:12 ꦏꦺꦴꦮꦺꦏꦧꦺꦃꦏꦸꦢꦸꦚꦲꦺꦴꦱ꧀ꦱꦏꦺꦲꦤꦏ꧀ꦩꦸꦭꦤꦁꦱꦶꦁꦩ꧀ꦧꦉꦥ꧀ꦭꦤ꧀ꦏꦺꦮꦤ꧀ꦭꦤꦁꦱꦶꦁꦭꦲꦶꦂꦏꦮꦶꦠ꧀ꦠꦤ꧀꧉​ꦏꦧꦺꦃꦏꦸꦮꦶꦏꦒꦸꦁꦔꦤ꧀ꦤꦺꦄꦭ꧀ꦭꦃ꧉​

^13:13 ꦤꦁꦔꦶꦁꦱꦧꦼꦤ꧀ꦏꦸꦭ꧀ꦢꦶꦭꦤꦁꦱꦶꦁꦭꦲꦶꦂꦏꦮꦶꦠ꧀ꦠꦤ꧀ꦏꦸꦢꦸꦢꦶꦠꦼꦧꦸꦱ꧀ꦔꦁꦒꦺꦴꦚꦲꦺꦴꦱ꧀ꦱꦏꦺꦕꦼꦩ꧀ꦥꦺꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦩꦶꦤꦁꦏꦒꦤ꧀ꦠꦶꦤꦺ꧉​ꦢꦺꦤꦺꦪꦺꦤ꧀ꦏꦺꦴꦮꦺꦲꦺꦴꦫꦒꦼꦊꦩ꧀ꦤꦼꦧꦸꦱ꧀ꦏꦸꦭ꧀ꦢꦶꦩꦲꦸ꧈​ꦏꦺꦮꦤ꧀ꦩꦲꦸꦏꦸꦢꦸꦢꦶꦥꦸꦠꦸꦁꦒꦸꦭꦸꦤꦺ꧉​ꦱꦼꦩꦺꦴꦤꦺꦴꦲꦸꦒꦲꦤꦏ꧀ꦩꦸꦭꦤꦁꦱꦶꦁꦩ꧀ꦧꦉꦥ꧀ꦲꦶꦪꦏꦸꦢꦸꦏꦺꦴꦏ꧀ꦠꦼꦧꦸꦱ꧀꧉​

^13:14 ꦢꦺꦤꦺꦪꦺꦤ꧀ꦲꦶꦁꦠꦼꦩ꧀ꦧꦺꦩ꧀ꦧꦸꦫꦶꦲꦤꦏ꧀ꦩꦸꦠꦏꦺꦴꦤ꧀ꦠꦼꦒꦼꦱ꧀ꦱꦺꦥꦽꦤꦠꦤ꧀ꦲꦶꦏꦶ꧈​ꦏꦸꦢꦸꦏꦺꦴꦏ꧀ꦮꦁꦱꦸꦭ꧀ꦭꦶꦩꦼꦁꦏꦺꦤꦺ꧈​‘ꦏꦤ꧀ꦛꦶꦥꦔ꧀ꦮꦱꦏꦁꦒꦼꦝꦺꦒꦸꦱ꧀ꦠꦶꦄꦭ꧀ꦭꦃꦔꦶꦫꦶꦢ꧀ꦏꦶꦠꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧈​ꦏꦸꦮꦶꦥꦁꦒꦺꦴꦤ꧀ꦤꦤ꧀ꦏꦶꦠꦢꦢꦶꦧꦠꦸꦂꦠꦸꦏꦺꦴꦤ꧀꧉​

^13:15 ꦤꦭꦶꦏꦱꦁꦥꦿꦶꦔꦺꦴꦤ꧀ꦩꦁꦏꦺꦴꦠ꧀ꦠꦏꦺꦥꦼꦁꦒꦭꦶꦃꦲꦺꦱꦂꦠꦲꦺꦴꦫꦔ꧀ꦭꦶꦭꦤꦶꦏꦶꦠꦥꦝꦭꦸꦔꦱꦏꦲꦶꦁ꧊ꦩꦺꦱꦶꦂ꧈​ꦒꦸꦱ꧀ꦠꦶꦄꦭ꧀ꦭꦃꦩꦼꦗꦃꦲꦶꦱꦧꦼꦤ꧀ꦲꦤꦏ꧀ꦭꦤꦁꦥꦼꦩ꧀ꦧꦉꦥ꧀꧈​ꦲꦶꦪꦩꦤꦸꦁꦱ꧈​ꦲꦶꦪꦏꦺꦮꦤ꧀꧉​ꦪꦏꦸꦮꦶꦱꦼꦧꦧ꧀ꦧꦺꦏꦶꦠꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦄꦭ꧀ꦭꦃꦮꦸꦗꦸꦢ꧀ꦏꦺꦮꦤ꧀ꦭꦤꦁꦱꦶꦁꦭꦲꦶꦂꦏꦮꦶꦠ꧀ꦠꦤ꧀꧈​ꦤꦁꦔꦶꦁꦏꦸꦢꦸꦤꦼꦧꦸꦱ꧀ꦲꦤꦏ꧀ꦩ꧀ꦧꦉꦥ꧀ꦏꦶꦠ꧉’​

^13:16 ꦱꦿꦤꦩꦼꦁꦏꦺꦴꦤꦺꦴꦥꦽꦤꦠꦤ꧀ꦩꦲꦸꦔꦺꦭꦶꦁꦔꦏꦺꦩꦫꦁꦏꦶꦠ꧈​ꦢꦢꦶꦥꦽꦠꦤ꧀ꦝꦲꦤꦲꦶꦁꦠꦔꦤ꧀ꦭꦤ꧀ꦲꦶꦁꦧꦛꦸꦏ꧀ꦏꦶꦠ꧈​ꦏꦁꦠꦤ꧀ꦱꦃꦔꦺꦭꦶꦁꦔꦏꦺꦩꦫꦁꦏꦶꦠ꧈​ꦪꦺꦤ꧀ꦄꦭ꧀ꦭꦃꦔꦼꦤ꧀ꦠꦱ꧀ꦱꦏꦺꦏꦶꦠꦱꦏꦲꦶꦁꦠꦤꦃ꧊ꦩꦺꦱꦶꦂꦔꦒꦼꦩ꧀ꦥꦔ꧀ꦮꦱꦒꦼꦝꦺ꧉"​

^13:17 ꦤꦭꦶꦏꦧꦁꦱ꧊ꦆꦱꦿꦲꦺꦭ꧀ꦢꦶꦭꦶꦭꦤꦶꦭꦸꦔꦢꦺꦤꦶꦁꦱꦁꦥꦿꦶꦔꦺꦴꦤ꧀꧈​ꦄꦭ꧀ꦭꦃꦲꦼꦁꦒꦺꦴꦤꦺꦔꦶꦫꦶꦢ꧀ꦲꦺꦴꦫꦩꦼꦠꦸꦥꦼꦱꦶꦱꦶꦂꦤꦸꦗꦸꦤꦼꦒꦫ꧊ꦥ꦳ꦶꦭꦶꦱ꧀ꦠꦶꦪ꧈​ꦱꦼꦤꦗꦤ꧀ꦢꦭꦤ꧀ꦲꦶꦏꦸꦭꦸꦮꦶꦃꦕꦼꦝꦏ꧀꧉​ꦒꦸꦱ꧀ꦠꦶꦄꦭ꧀ꦭꦃꦩꦼꦁꦒꦭꦶꦃ꧈​"ꦧꦁꦱꦲꦶꦏꦶꦩꦼꦤꦮꦏꦼꦕꦸꦮꦤ꧀ꦲꦠꦶꦤꦺ꧈​ꦲꦗꦔꦤ꧀ꦠꦶꦧꦚ꧀ꦗꦸꦂꦧꦭꦶꦩꦼꦚꦁꦠꦤꦃ꧊ꦩꦺꦱꦶꦂ꧈​ꦪꦲꦶꦏꦸꦱꦩꦱꦔꦼꦂꦠꦶꦪꦺꦤ꧀ꦝꦺꦮꦺꦏ꧀ꦤꦺꦏꦸꦢꦸꦥꦼꦫꦁ꧉"​

^13:18 ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃꦲꦼꦁꦒꦺꦴꦤꦺꦔꦶꦫꦶꦢ꧀ꦧꦁꦱꦲꦶꦏꦸꦢꦶꦲꦺꦁꦒꦺꦴꦏ꧀ꦏꦏꦺꦩꦼꦠꦸꦲꦫꦲꦫꦱꦩꦸꦤ꧀ꦤꦸꦗꦸꦩꦫꦁꦱꦼꦒꦫ꧊ꦠꦺꦧꦺꦫꦲꦸ꧉​ꦭꦤ꧀ꦮꦺꦴꦁ꧊ꦆꦱꦿꦲꦺꦭ꧀ꦠꦤ꧀ꦱꦃꦕꦼꦕꦮꦶꦱ꧀ꦩꦗꦸꦲꦶꦁꦥꦼꦫꦁ꧉​

^13:19 ꦧꦭꦸꦁꦔꦺ꧊ꦪꦸꦱꦸꦥ꦳꧀ꦢꦶꦒꦮꦢꦺꦤꦶꦁ꧊ꦩꦸꦱꦱꦏꦠꦤꦃ꧊ꦩꦺꦱꦶꦂ꧈​ꦱꦼꦧꦧ꧀ꦤꦭꦶꦏꦲꦸꦫꦶꦥ꧀ꦥꦺꦮꦶꦱ꧀ꦚ꧀ꦗꦭꦸꦏ꧀ꦱꦸꦩ꧀ꦥꦃꦲꦺꦮꦺꦴꦁ꧊ꦆꦱꦿꦲꦺꦭ꧀ꦩꦼꦁꦏꦺꦴꦤꦺꦴ꧉​꧊ꦪꦸꦱꦸꦥ꦳꧀ꦮꦶꦱ꧀ꦮꦼꦭꦶꦁ꧈​"ꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦔꦼꦤ꧀ꦠꦱ꧀ꦱꦏꦺꦏꦺꦴꦮꦺꦏꦧꦺꦃ꧈​ꦗꦶꦱꦶꦩ꧀ꦏꦸꦒꦮꦤꦼꦤ꧀ꦱꦏꦥꦁꦒꦺꦴꦤ꧀ꦤꦤ꧀ꦲꦶꦏꦶ꧉"​

^13:20 ꦮꦺꦴꦁ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦥꦝꦩꦁꦏꦠ꧀ꦱꦏ꧊ꦱꦸꦏꦺꦴꦠ꧀ꦠꦼꦏꦤ꧀ꦏꦸꦛ꧊ꦌꦠꦩ꧀꧈​ꦲꦶꦁꦠꦥꦼꦭ꧀ꦮꦠꦼꦱ꧀ꦱꦺꦲꦫꦲꦫꦱꦩꦸꦤ꧀꧉​

^13:21 ꦒꦸꦱ꧀ꦠꦶꦄꦭ꧀ꦭꦃꦠꦶꦤ꧀ꦢꦏ꧀ꦲꦤꦲꦶꦁꦔꦉꦥ꧀ꦥꦺ꧈​ꦲꦶꦁꦮꦪꦃꦲꦮꦤ꧀ꦲꦤꦲꦶꦁꦠꦸꦒꦸꦩꦺꦒ꧈​ꦢꦺꦤꦺꦲꦶꦁꦮꦪꦃꦧꦼꦔꦶꦲꦤꦲꦶꦁꦠꦸꦒꦸꦒꦼꦤꦶꦏꦁꦒꦺꦴꦤꦸꦤ꧀ꦠꦸꦤ꧀ꦭꦏꦸꦤꦺ;ꦩꦸꦭꦤꦺꦮꦺꦴꦁꦮꦺꦴꦁꦩꦲꦸꦲꦮꦤ꧀ꦧꦼꦔꦶꦧꦶꦱꦤꦼꦫꦸꦱ꧀ꦱꦏꦺꦭꦏꦸꦤꦺ꧉​

^13:22 ꦱꦼꦢꦶꦤꦩꦸꦥꦸꦠ꧀ꦠꦸꦒꦸꦩꦺꦒꦩꦲꦸꦲꦤꦲꦶꦁꦔꦉꦥ꧀ꦥꦺ꧈​ꦭꦤ꧀ꦱꦼꦮꦼꦔꦶꦤꦠꦱ꧀ꦠꦸꦒꦸꦒꦼꦤꦶꦔꦶꦫꦶꦢ꧀ꦧꦁꦱꦩꦲꦸ꧉​