Alkitab/Pangentasan/32

Saka Wikisumber

32:1 ꦤꦭꦶꦏꦧꦁꦱ꧊ꦆꦱꦿꦲꦺꦭ꧀ꦔꦼꦂꦠꦶꦪꦺꦤ꧀꧊ꦩꦸꦱꦱꦸꦮꦺꦲꦺꦴꦫꦩꦤ꧀ꦝꦥ꧀ꦩꦤ꧀ꦝꦥ꧀ꦱꦏꦲꦶꦁꦒꦸꦤꦸꦁ꧈​ꦧꦚ꧀ꦗꦸꦂꦥꦝꦔꦸꦩ꧀ꦥꦸꦭ꧀ꦱꦺꦴꦮꦤ꧀ꦲꦫꦸꦤ꧀꧈​ꦲꦠꦸꦂꦫꦺ꧈​"ꦏꦶꦠꦩ꧀ꦧꦺꦴꦠꦼꦤ꧀ꦱꦩꦶꦱꦸꦩꦼꦉꦥ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀꧊ꦩꦸꦱ꧈​ꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦔꦶꦫꦶꦢ꧀ꦏꦶꦠꦩꦼꦢꦭ꧀ꦱꦏꦶꦁꦠꦤꦃ꧊ꦩꦺꦱꦶꦂ꧉​ꦩꦶꦭꦩꦁꦒꦏꦸꦭꦥꦚ꧀ꦗꦼꦤꦼꦁꦔꦤ꧀ꦢꦩꦼꦭ꧀ꦭꦏꦼꦤ꧀ꦲꦭ꧀ꦭꦃꦲꦶꦁꦏꦁꦱꦒꦼꦢ꧀ꦔꦶꦫꦶꦢ꧀ꦏꦶꦠ꧉"​
32:2 ꦲꦫꦸꦤ꧀ꦧꦚ꧀ꦗꦸꦂꦔꦤ꧀ꦢꦶꦏꦩꦫꦁꦮꦺꦴꦁꦮꦺꦴꦁꦩꦲꦸ꧈​"ꦲꦤ꧀ꦠꦶꦁꦲꦤ꧀ꦠꦶꦁꦲꦼꦩꦱ꧀ꦱꦶꦁꦢꦶꦲꦼꦁꦒꦺꦴꦧꦺꦴꦗꦺꦴꦭꦤ꧀ꦲꦤꦏ꧀ꦲꦤꦏ꧀ꦩꦸꦕꦺꦴꦥꦺꦴꦠ꧀ꦠꦼꦤ꧀ꦭꦤ꧀ꦒꦮꦤꦼꦤ꧀ꦩꦿꦺꦤꦺ꧉"​
32:3 ꦮꦺꦴꦁꦮꦺꦴꦁꦩꦲꦸꦧꦚ꧀ꦗꦸꦂꦥꦝꦚꦺꦴꦥꦺꦴꦠ꧀ꦲꦤ꧀ꦠꦶꦁꦲꦤ꧀ꦠꦶꦁꦔꦺꦲꦼꦩꦱ꧀ꦱꦶꦁꦢꦶꦲꦼꦁꦒꦺꦴꦧꦺꦴꦗꦺꦴꦭꦤ꧀ꦲꦤꦏ꧀ꦲꦤꦏ꧀ꦏꦺꦢꦶꦲꦠꦸꦂꦫꦏꦺꦩꦫꦁꦲꦫꦸꦤ꧀꧉​
32:4 ꦲꦫꦸꦤ꧀ꦤꦩ꧀ꦥꦺꦤ꧀ꦤꦶꦲꦤ꧀ꦠꦶꦁꦲꦤ꧀ꦠꦶꦁꦩꦲꦸ꧈​ꦢꦶꦊꦧꦸꦂꦭꦤ꧀ꦢꦶꦲꦶꦭꦶꦁꦲꦶꦁꦕꦶꦛꦏ꧀ꦏꦤ꧀꧈​ꦢꦢꦶꦉꦕꦱꦥꦶ꧉​ꦧꦁꦱꦩꦲꦸꦥꦝꦔꦸꦕꦥ꧀꧈​"ꦲꦺ꧊ꦆꦱꦿꦲꦺꦭ꧀꧈​ꦲꦶꦏꦶꦲꦭ꧀ꦭꦃꦏꦶꦠꦱꦶꦁꦔꦶꦫꦶꦢ꧀ꦏꦶꦠꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ!"
32:5 ꦲꦫꦸꦤ꧀ꦧꦚ꧀ꦗꦸꦂꦪꦱꦩꦼꦱ꧀ꦧꦺꦃꦲꦶꦁꦱꦔꦉꦥ꧀ꦥꦶꦁꦱꦥꦶꦲꦼꦩꦱ꧀ꦩꦲꦸꦭꦤ꧀ꦔꦤ꧀ꦢꦶꦏ꧈​"ꦱꦺꦱꦸꦏ꧀ꦏꦶꦠꦥꦝꦥꦺꦱ꧀ꦠꦏꦁꦒꦺꦴꦔꦸꦂꦩꦠ꧀ꦠꦶꦄꦭ꧀ꦭꦃ꧉"​
32:6 ꦲꦺꦱꦸꦏ꧀ꦏꦺ꧈​ꦲꦶꦱꦶꦃꦲꦸꦩꦸꦤ꧀ꦲꦸꦩꦸꦤ꧀꧈​ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦥꦝꦔ꧀ꦒꦮꦏꦺꦮꦤ꧀ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦭꦤ꧀ꦏꦸꦂꦧꦤ꧀ꦱ꧀ꦭꦩꦼꦠ꧀ꦠꦤ꧀꧉​ꦮꦺꦴꦁꦮꦺꦴꦁꦩꦲꦸꦥꦝꦥꦺꦱ꧀ꦠꦒꦼꦝꦺꦤ꧀꧈​ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺꦱꦂꦠꦱꦼꦤꦼꦁꦱꦼꦤꦼꦁ꧉​
32:7 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦲꦺꦁꦒꦭ꧀ꦩꦸꦝꦸꦤ꧈​ꦱꦼꦧꦧ꧀ꦧꦁꦱꦩꦸꦱꦶꦁꦏꦺꦴꦏ꧀ꦲꦶꦫꦶꦢ꧀ꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂꦏꦸꦮꦶꦮꦶꦱ꧀ꦥꦝꦒꦮꦺꦢꦺꦴꦱꦭꦤ꧀ꦤꦩ꧀ꦥꦶꦏ꧀ꦩꦫꦁꦲꦏꦸ꧉​
32:8 ꦮꦺꦴꦁꦮꦺꦴꦁꦏꦸꦮꦶꦮꦶꦱ꧀ꦚꦶꦩ꧀ꦥꦁꦱꦏꦢꦭꦤ꧀ꦱꦶꦁꦢꦏ꧀ꦠꦼꦢꦃꦲꦏꦺ꧉​ꦮꦺꦴꦁꦮꦺꦴꦁꦥꦝꦒꦮꦺꦱꦥꦶꦱꦏꦲꦼꦩꦱ꧀ꦕꦺꦴꦂꦕꦺꦴꦂꦫꦤ꧀꧈​ꦢꦶꦱꦼꦩ꧀ꦧꦃꦱꦂꦠꦢꦶꦱꦗꦺꦤ꧀ꦤꦶ꧉​ꦥꦔꦸꦕꦥ꧀ꦥꦺꦮꦺꦴꦁꦮꦺꦴꦁꦩꦲꦸ꧈​‘ꦪꦏꦸꦮꦶꦲꦭ꧀ꦭꦃꦱꦶꦁꦔꦶꦫꦶꦢ꧀ꦏꦶꦠꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧉’​
32:9 ꦲꦏꦸꦩꦶꦂꦱꦪꦺꦤ꧀ꦮꦺꦴꦁꦮꦺꦴꦁꦩꦲꦸꦥꦝꦮꦁꦏꦺꦴꦠ꧀ꦲꦠꦶꦤꦺ꧉​ꦲꦏꦸꦲꦗꦏꦺꦴꦏ꧀ꦥꦼꦁꦒꦏ꧀꧉​ꦲꦏꦸꦢꦸꦏꦩꦫꦁꦮꦺꦴꦁꦮꦺꦴꦁꦩꦲꦸꦱꦂꦠꦧꦏꦭ꧀ꦢꦏ꧀ꦠꦸꦩ꧀ꦥꦼꦱ꧀꧉​ꦏꦺꦴꦮꦺꦱꦂꦠꦠꦸꦫꦸꦤ꧀ꦩꦸꦧꦏꦭ꧀ꦢꦏ꧀ꦢꦢꦺꦏ꧀ꦏꦏꦺꦧꦁꦱꦱꦶꦁꦒꦼꦝꦺ꧉"​
32:10 ꦱꦲꦶꦏꦶꦲꦏꦸꦲꦗꦏꦺꦴꦏ꧀ꦥꦼꦁꦒꦏ꧀꧉​ꦲꦏꦸꦢꦸꦏꦩꦫꦁꦮꦺꦴꦁꦮꦺꦴꦁꦩꦲꦸꦱꦂꦠꦧꦏꦭ꧀ꦢꦏ꧀ꦠꦸꦩ꧀ꦥꦼꦱ꧀꧉​ꦏꦺꦴꦮꦺꦱꦂꦠꦠꦸꦫꦸꦤ꧀ꦩꦸꦧꦏꦭ꧀ꦢꦏ꧀ꦢꦢꦺꦏ꧀ꦏꦏꦺꦧꦁꦱꦱꦶꦁꦒꦼꦝꦺ꧉"​
32:11 ꦤꦁꦔꦶꦁ꧊ꦩꦸꦱꦔꦠꦸꦂꦫꦏꦺꦥꦚꦸꦮꦸꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦲꦠꦸꦂꦫꦺ꧈​"ꦒꦸꦱ꧀ꦠꦶ꧈​ꦏꦺꦁꦔꦶꦁꦩꦼꦤꦥꦒꦸꦱ꧀ꦠꦶꦢꦢꦺꦴꦱ꧀ꦢꦸꦏꦱꦔꦼꦠ꧀ꦝꦠꦼꦁꦧꦁꦱꦩꦼꦤꦶꦏ?ꦥꦢꦸꦏꦱꦩ꧀ꦥꦸꦤ꧀ꦩꦶꦭꦸꦗꦼꦁꦔꦏꦼꦤ꧀ꦧꦁꦱꦩꦼꦤꦶꦏꦱꦏꦶꦁ꧊ꦩꦺꦱꦶꦂꦏꦤ꧀ꦛꦶꦥꦔ꧀ꦮꦱꦱꦲꦏꦼꦏꦶꦪꦠ꧀ꦠꦤ꧀ꦲꦶꦁꦏꦁꦲꦒꦼꦁ!
32:12 ꦩꦼꦤꦮꦶꦥꦢꦸꦏꦤꦸꦩ꧀ꦥꦼꦱ꧀ꦠꦶꦪꦁꦠꦶꦪꦁꦩꦼꦤꦶꦏ꧈​ꦠꦶꦪꦁ꧊ꦩꦺꦱꦶꦂꦧꦝꦺꦱꦩꦶꦩꦸꦔꦼꦭ꧀ꦧꦶꦭꦶꦃꦒꦸꦱ꧀ꦠꦶꦄꦭ꧀ꦭꦃꦱꦩ꧀ꦥꦸꦤ꧀ꦔꦶꦫꦶꦢ꧀ꦧꦁꦱꦩꦼꦤꦶꦏꦩꦼꦢꦭ꧀ꦱꦏꦶꦁꦠꦤꦃ꧊ꦩꦺꦱꦶꦂ꧈​ꦩꦼꦂꦒꦶꦧꦝꦺꦩꦼꦗꦃꦲꦶꦠꦶꦪꦁꦠꦶꦪꦁꦩꦼꦤꦶꦏꦲꦶꦁꦥꦉꦢꦺꦤ꧀ꦱꦂꦠꦤꦸꦩ꧀ꦥꦼꦱ꧀ꦠꦶꦪꦁꦠꦶꦪꦁꦩꦼꦤꦶꦏꦧꦧꦂꦥꦶꦱꦤ꧀꧉​ꦒꦸꦱ꧀ꦠꦶꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦏꦼꦭꦗꦼꦁꦢꦸꦏ꧈​ꦏꦼꦂꦱꦲꦩꦼꦁꦒꦭꦶꦃꦩꦭꦶꦃ꧈​ꦱꦂꦠꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦤ꧀ꦝꦮꦃꦲꦏꦼꦤ꧀ꦮꦼꦮꦼꦭꦏ꧀ꦝꦠꦼꦁꦧꦁꦱꦩꦼꦤꦶꦏ꧉​
32:13 ꦏꦼꦂꦱꦲꦲꦺꦔꦼꦠ꧀ꦝꦠꦼꦁꦊꦭꦸꦲꦸꦂꦏꦮꦸꦭ꧊ꦄꦧꦿꦲꦩ꧀꧈​꧊ꦆꦱ꧀ꦏꦏ꧀ꦭꦤ꧀꧊ꦪꦏꦸꦧ꧀꧉​ꦏꦼꦂꦱꦲꦔꦺꦔꦼꦠ꧀ꦠꦶꦧꦶꦭꦶꦃꦥꦢꦸꦏꦱꦩ꧀ꦥꦸꦤ꧀ꦗꦚ꧀ꦗꦶꦏꦤ꧀ꦛꦶꦱꦸꦥꦲꦺꦴꦱ꧀ꦝꦠꦼꦁꦠꦶꦪꦁꦠꦶꦪꦁꦩꦼꦤꦶꦏ꧈​ꦧꦝꦺꦩꦫꦶꦁꦔꦶꦠꦸꦫꦸꦤ꧀ꦏꦛꦃꦲꦶꦥꦸꦤ꧀ꦏꦢꦺꦴꦱ꧀ꦭꦶꦤ꧀ꦠꦁꦲꦶꦁꦭꦔꦶꦠ꧀꧈​ꦩꦼꦏꦠ꧀ꦠꦼꦤ꧀ꦲꦸꦒꦶꦧꦶꦭꦶꦃꦠꦤꦃꦲꦶꦁꦏꦁꦱꦩ꧀ꦥꦸꦤ꧀ꦥꦢꦸꦏꦗꦚ꧀ꦗꦺꦏ꧀ꦏꦏꦼꦤ꧀ꦩꦼꦤꦶꦏꦧꦝꦺꦢꦢꦺꦴꦱ꧀ꦮꦫꦶꦱ꧀ꦱꦤ꧀ꦤꦺꦠꦸꦫꦸꦤ꧀ꦤꦶꦥꦸꦤ꧀ꦲꦶꦁꦱꦼꦭꦩꦶꦤꦶꦥꦸꦤ꧀꧉"​
32:14 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦲꦺꦴꦫꦔ꧀ꦭꦗꦼꦁꦔꦏꦺꦏꦼꦂꦱꦤꦺꦭꦤ꧀ꦲꦺꦴꦫꦤ꧀ꦢꦮꦃꦲꦏꦺꦮꦼꦮꦼꦭꦏ꧀ꦩꦫꦁꦧꦁꦱꦩꦲꦸ꧉​
32:15 ꧊ꦩꦸꦱꦧꦚ꧀ꦗꦸꦂꦩꦤ꧀ꦝꦥ꧀ꦱꦏꦲꦶꦁꦒꦸꦤꦸꦁꦏꦫꦺꦴꦔꦱ꧀ꦠꦥꦥꦤ꧀ꦮꦠꦸꦱꦶꦁꦢꦶꦠꦸꦭꦶꦱ꧀ꦱꦶꦝꦮꦸꦃꦝꦮꦸꦃꦲꦺꦄꦭ꧀ꦭꦃꦫꦺꦴꦁꦱꦶꦱꦶꦃ꧉​
32:16 ꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦱꦶꦁꦢꦩꦼꦭ꧀ꦥꦥꦤ꧀ꦮꦠꦸꦩꦲꦸꦱꦂꦠꦔꦸꦏꦶꦂꦝꦮꦸꦃꦝꦮꦸꦃꦲꦺꦲꦶꦁꦏꦺꦴꦤꦺꦴ꧉​
32:17 ꦤꦭꦶꦏꦩꦤ꧀ꦝꦥ꧀꧈​꧊ꦪꦺꦴꦱꦸꦮꦏꦿꦸꦔꦸꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦥꦝꦱꦸꦫꦏ꧀ꦱꦸꦫꦏ꧀꧈​ꦧꦚ꧀ꦗꦸꦂꦩꦠꦸꦂꦩꦫꦁ꧊ꦩꦸꦱ꧈​"ꦏꦸꦭꦩꦶꦉꦁꦱꦸꦫꦏ꧀ꦱꦸꦫꦏ꧀ꦏꦶꦁꦥꦼꦫꦁꦲꦶꦁꦥꦁꦒꦺꦤ꧀ꦤꦤ꧀ꦏꦺꦩꦃ꧉"​
32:18 ꦥꦔꦤ꧀ꦢꦶꦏꦤꦺ꧊ꦩꦸꦱ꧈​"ꦲꦶꦏꦸꦢꦸꦢꦸꦱꦸꦫꦏ꧀ꦏꦺꦥꦼꦫꦁꦲꦸꦠꦮꦥꦚ꧀ꦗꦼꦫꦶꦠ꧀ꦠꦺꦮꦺꦴꦁꦏꦭꦃ;ꦏꦲꦺꦱ꧀ꦮꦫꦤꦺꦮꦺꦴꦁꦩꦼꦚꦚꦶ꧉"​
32:19 ꦧꦉꦁ꧊ꦩꦸꦱꦮꦶꦱ꧀ꦫꦢꦕꦼꦝꦏ꧀ꦏꦫꦺꦴꦥꦁꦒꦺꦴꦤ꧀ꦤꦤ꧀ꦏꦺꦩꦃꦩꦲꦸ꧈​ꦧꦚ꧀ꦗꦸꦂꦥꦶꦂꦱꦱꦥꦶꦩꦱ꧀꧈​ꦢꦺꦤꦺꦮꦺꦴꦁꦮꦺꦴꦁꦥꦝꦗꦼꦗꦺꦴꦒꦺꦢ꧀ꦢꦤ꧀꧈​ꦩꦸꦭ꧊ꦩꦸꦱꦧꦚ꧀ꦗꦸꦂꦩꦸꦤ꧀ꦠꦧ꧀ꦢꦸꦏꦧꦔꦼꦠ꧀꧉​ꦲꦤꦲꦶꦁꦱꦶꦏꦶꦭ꧀ꦭꦶꦁꦒꦸꦤꦸꦁꦏꦺꦴꦤꦺꦴꦥꦥꦤ꧀ꦮꦠꦸꦱꦶꦁꦢꦶꦲꦱ꧀ꦠꦤꦸꦭꦶꦢꦶꦧꦤ꧀ꦠꦶꦁꦠꦼꦩꦃꦥꦼꦕꦃ꧉​
32:20 ꧊ꦩꦸꦱꦧꦚ꧀ꦗꦸꦂꦩꦸꦤ꧀ꦢꦸꦠ꧀ꦱꦥꦶꦒꦮꦺꦪꦤ꧀ꦤꦺꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦩꦲꦸ꧈​ꦤꦸꦭꦶꦢꦶꦲꦼꦗꦸꦂꦲꦼꦗꦸꦂꦔꦤ꧀ꦠꦶꦊꦩ꧀ꦧꦸꦠ꧀꧈​ꦢꦶꦲꦸꦝꦼꦒ꧀ꦲꦶꦁꦧꦚꦸ꧈​ꦧꦚ꧀ꦗꦸꦂꦢꦶꦏꦺꦴꦤ꧀ꦔꦺꦴꦩ꧀ꦧꦺꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀꧉​
32:21 ꦥꦔꦸꦕꦥ꧀ꦥꦺꦩꦫꦁꦲꦫꦸꦤ꧀꧈​"ꦏꦺꦴꦮꦺꦢꦶꦏꦥꦏ꧀ꦏꦏꦺꦢꦺꦤꦶꦁꦮꦺꦴꦁꦮꦺꦴꦁꦲꦶꦏꦸ꧈​ꦏꦺꦴꦏ꧀ꦏꦺꦴꦮꦺꦔꦺꦴꦭꦺꦃꦲꦏꦺꦮꦺꦴꦁꦮꦺꦴꦁꦥꦝꦒꦮꦺꦢꦺꦴꦱꦱꦼꦩꦺꦴꦤꦺꦴꦒꦼꦝꦺꦤꦺ?"
32:22 ꦮꦁꦱꦸꦭ꧀ꦭꦤ꧀ꦤꦺꦲꦫꦸꦤ꧀꧈​"ꦱꦩ꧀ꦥꦸꦤ꧀ꦢꦸꦏꦝꦠꦼꦁꦏꦸꦭ꧉​ꦠꦶꦪꦁꦠꦶꦪꦁꦩꦼꦤꦶꦏꦲꦢꦽꦁꦱꦔꦼꦠ꧀ꦲꦼꦁꦒꦺꦤ꧀ꦤꦶꦥꦸꦤ꧀ꦠꦸꦩꦶꦤ꧀ꦢꦏ꧀ꦢꦸꦫꦏ꧉​
32:23 ꦱꦩꦶꦮꦶꦕꦤ꧀ꦠꦼꦤ꧀ꦩꦼꦏꦠ꧀ꦠꦼꦤ꧀꧈​‘ꦏꦶꦠꦩ꧀ꦧꦺꦴꦠꦼꦤ꧀ꦱꦸꦩꦼꦉꦥ꧀ꦏꦢꦺꦴꦱ꧀ꦥꦸꦤ꧀ꦢꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀꧊ꦩꦸꦱ꧈​ꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦔꦶꦫꦶꦢ꧀ꦏꦶꦠꦩꦼꦢꦭ꧀ꦱꦏꦶꦁꦠꦤꦃ꧊ꦩꦺꦱꦶꦂ;ꦢꦢꦺꦴꦱ꧀ꦩꦁꦒꦏꦸꦭꦥꦚ꧀ꦗꦼꦤꦼꦁꦔꦤ꧀ꦢꦩꦼꦭ꧀ꦭꦏꦼꦤ꧀ꦲꦭ꧀ꦭꦃꦲꦶꦁꦏꦁꦱꦒꦼꦢ꧀ꦔꦶꦫꦶꦢ꧀ꦏꦶꦠ꧉’​
32:24 ꦏꦸꦭꦭꦗꦼꦁꦲꦏꦺꦤ꧀ꦠꦶꦪꦁꦠꦶꦪꦁꦩꦼꦤꦶꦏꦩꦱꦿꦃꦲꦏꦼꦤ꧀ꦩꦱ꧀ꦩꦱ꧀ꦱꦤ꧀ꦤꦶꦥꦸꦤ꧀ꦝꦠꦼꦁꦏꦸꦭ꧉​ꦲꦁꦒꦺꦤ꧀ꦲꦁꦒꦺꦤ꧀ꦩꦼꦤꦶꦏꦭꦗꦼꦁꦏꦸꦭꦊꦧꦸꦂꦢꦢꦺꦴꦱ꧀ꦊꦩ꧀ꦧꦸꦩꦼꦤꦶꦏ!"
32:25 ꧊ꦩꦸꦱꦥꦶꦂꦱꦪꦺꦤ꧀ꦲꦫꦸꦤ꧀ꦱꦶꦁꦔꦼꦕꦸꦭ꧀ꦭꦏꦺꦧꦁꦱ꧊ꦆꦱꦿꦲꦺꦭ꧀ꦏꦪꦢꦺꦤꦺꦗꦫꦤ꧀ꦏꦁꦩ꧀ꦧꦼꦝꦭ꧀ꦩꦼꦠꦸꦱꦏꦲꦶꦁꦒꦼꦝꦺꦴꦒꦤ꧀ꦤꦺ꧈​ꦠꦼꦩꦃꦢꦢꦶꦥꦺꦴꦪꦺꦴꦏ꧀ꦏꦤ꧀ꦤꦺꦥꦫꦱꦠꦿꦸꦤꦺ꧉​
32:26 ꧊ꦩꦸꦱꦧꦚ꧀ꦗꦸꦂꦗꦸꦩꦼꦤꦼꦁꦲꦶꦁꦱꦔꦉꦥ꧀ꦥꦺꦒꦥꦸꦫꦤꦶꦁꦥꦊꦉꦧ꧀ꦧꦤ꧀ꦱꦂꦠꦔꦤ꧀ꦢꦶꦏꦏ꧀ꦭꦮꦤ꧀ꦱꦺꦴꦫ꧈​"ꦱꦧꦼꦤ꧀ꦮꦺꦴꦁꦱꦶꦁꦔꦧꦼꦏ꧀ꦠꦶꦩꦫꦁꦄꦭ꧀ꦭꦃꦩꦗꦸꦮꦩꦿꦺꦤꦺ!"ꦏ꧀ꦭꦺꦴꦩ꧀ꦥꦺꦴꦏ꧀꧊ꦭꦺꦮꦶꦧꦚ꧀ꦗꦸꦂꦥꦝꦠꦼꦏꦚꦼꦝꦏ꧀ꦏꦶ꧊ꦩꦸꦱ꧉​
32:27 ꦥꦔꦤ꧀ꦢꦶꦏꦤꦺ꧊ꦩꦸꦱꦩꦫꦁꦮꦺꦴꦁꦮꦺꦴꦁꦩꦲꦸ꧈​"ꦒꦸꦱ꧀ꦠꦶꦄꦭ꧀ꦭꦃꦝꦮꦸꦃꦱꦸꦥꦪꦏꦺꦴꦮꦺꦏꦧꦺꦃꦥꦝꦔꦸꦤꦸꦱ꧀ꦱꦥꦼꦝꦁꦩꦸ꧈​ꦩ꧀ꦭꦏꦸꦮꦔ꧀ꦭꦶꦮꦠ꧀ꦠꦶꦏꦺꦩꦃꦏꦺꦩꦃꦲꦶꦏꦶ꧈​ꦮꦶꦮꦶꦠ꧀ꦱꦏꦒꦥꦸꦫꦲꦶꦏꦶꦠꦼꦏꦤ꧀ꦲꦶꦁꦒꦥꦸꦫꦏꦤꦱꦂꦠꦩꦠꦺꦤ꧀ꦤꦤꦱꦼꦢꦸꦭꦸꦂꦱꦼꦢꦸꦭꦸꦂꦩꦸ꧈​ꦏꦚ꧀ꦕꦏꦚ꧀ꦕꦩꦸꦭꦤ꧀ꦠꦁꦒꦠꦁꦒꦩꦸ꧉"​
32:28 ꦏ꧀ꦭꦺꦴꦩ꧀ꦥꦺꦴꦏ꧀꧊ꦭꦺꦮꦶꦤꦶꦤ꧀ꦢꦏ꧀ꦏꦏꦺꦝꦮꦸꦃꦩꦲꦸꦭꦤ꧀ꦲꦶꦁꦢꦶꦤꦏꦸꦮꦶꦏꦶꦫꦏꦶꦫꦲꦤꦮꦺꦴꦁꦠꦼꦭꦸꦁꦲꦺꦮꦸꦱꦶꦁꦢꦶꦥꦠꦺꦤ꧀ꦤꦶ꧉​
32:29 ꦥꦔꦤ꧀ꦢꦶꦏꦤꦺ꧊ꦩꦸꦱꦩꦫꦁꦏ꧀ꦭꦺꦴꦩ꧀ꦥꦺꦴꦏ꧀꧊ꦭꦺꦮꦶ꧈​"ꦮꦶꦮꦶꦠ꧀ꦢꦶꦤꦲꦶꦏꦶꦏꦺꦴꦮꦺꦮꦶꦱ꧀ꦥꦝꦩꦶꦱꦸꦁꦱꦸꦁꦔꦏꦺꦲꦮꦏ꧀ꦩꦸꦝꦺꦮꦺꦭꦸꦩꦢꦶꦩꦫꦁꦄꦭ꧀ꦭꦃ꧈​ꦱꦿꦤꦲꦼꦁꦒꦺꦴꦤ꧀ꦩꦸꦥꦝꦩꦠꦺꦤ꧀ꦤꦶꦲꦤꦏ꧀ꦲꦤꦏ꧀ꦩꦸꦭꦤꦁꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ꧉​ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦩ꧀ꦧꦼꦂꦏꦃꦲꦶꦏꦺꦴꦮꦺꦏꦧꦺꦃ꧉"​
32:30 ꦲꦺꦱꦸꦏ꧀ꦏꦺ꧊ꦩꦸꦱꦔꦤ꧀ꦢꦶꦏꦏꦫꦺꦴꦧꦁꦱꦩꦲꦸ꧈​"ꦏꦺꦴꦮꦺꦏꦧꦺꦃꦮꦶꦱ꧀ꦔ꧀ꦭꦏꦺꦴꦤ꧀ꦤꦶꦢꦺꦴꦱꦒꦼꦝꦺ꧉​ꦢꦺꦤꦺꦱꦲꦶꦏꦶꦲꦏꦸꦲꦉꦥ꧀ꦩꦸꦁꦒꦃꦒꦸꦤꦸꦁꦩꦼꦤꦺꦃꦱꦂꦠꦱꦺꦴꦮꦤ꧀ꦩꦫꦁꦄꦭ꧀ꦭꦃ;ꦩꦸꦒꦩꦸꦒꦏꦺꦴꦮꦺꦥꦝꦏꦥꦫꦶꦁꦔꦤ꧀ꦥꦔꦥꦸꦫ꧉"​ꦧꦚ꧀ꦗꦸꦂꦩꦶꦁꦒꦃꦩꦼꦤꦺꦃꦱꦺꦴꦮꦤ꧀ꦲꦶꦁꦔꦂꦱꦤꦺꦄꦭ꧀ꦭꦃꦭꦤ꧀ꦩꦠꦸꦂ꧈​"ꦧꦁꦱꦩꦼꦤꦶꦏꦱꦩ꧀ꦥꦸꦤ꧀ꦔ꧀ꦭꦩ꧀ꦥꦃꦲꦶꦢꦺꦴꦱꦲꦶꦁꦏꦁꦲꦒꦼꦁ꧉​ꦠꦶꦪꦁꦠꦶꦪꦁꦩꦼꦤꦶꦏꦱꦩꦶꦢꦩꦼꦭ꧀ꦲꦭ꧀ꦭꦃꦩꦱ꧀꧈​ꦭꦗꦼꦁꦢꦶꦥꦸꦤ꧀ꦱꦼꦩ꧀ꦧꦃ꧉​
32:31 ꧊ꦩꦸꦱꦧꦚ꧀ꦗꦸꦂꦩꦶꦁꦒꦃꦩꦼꦤꦺꦃꦱꦺꦴꦮꦤ꧀ꦲꦶꦁꦔꦂꦱꦤꦺꦄꦭ꧀ꦭꦃꦭꦤ꧀ꦩꦠꦸꦂ꧈​"ꦧꦁꦱꦩꦼꦤꦶꦏꦱꦩ꧀ꦥꦸꦤ꧀ꦔ꧀ꦭꦩ꧀ꦥꦃꦲꦶꦢꦺꦴꦱꦲꦶꦁꦏꦁꦲꦒꦼꦁ꧉​ꦠꦶꦪꦁꦠꦶꦪꦁꦩꦼꦤꦶꦏꦱꦩꦶꦢꦩꦼꦭ꧀ꦲꦭ꧀ꦭꦃꦩꦱ꧀꧈​ꦭꦗꦼꦁꦢꦶꦥꦸꦤ꧀ꦱꦼꦩ꧀ꦧꦃ꧉​
32:32 ꦩꦸꦒꦶꦒꦸꦱ꧀ꦠꦶꦏꦼꦂꦱꦔꦥꦸꦤ꧀ꦠꦼꦤ꧀ꦢꦺꦴꦱꦤꦶꦥꦸꦤ꧀;ꦩꦼꦤꦮꦶꦩ꧀ꦧꦺꦴꦠꦼꦤ꧀꧈​ꦤꦩꦏꦮꦸꦭꦩꦸꦒꦶꦥꦢꦸꦏꦲꦶꦕꦭ꧀ꦭꦶꦏꦺꦩꦮꦺꦴꦤ꧀ꦱꦏꦶꦁꦏꦶꦠꦧ꧀ꦲꦶꦁꦏꦁꦱꦩ꧀ꦥꦸꦤ꧀ꦥꦢꦸꦏꦱꦼꦫꦠ꧀ꦠꦶꦤꦩꦤꦩꦤꦶꦥꦸꦤ꧀ꦲꦸꦩꦠ꧀ꦥꦢꦸꦏ꧉"​
32:33 ꦥꦔꦤ꧀ꦢꦶꦏꦤꦺꦄꦭ꧀ꦭꦃ꧈​"ꦮꦺꦴꦁꦮꦺꦴꦁꦏꦁꦒꦮꦺꦢꦺꦴꦱꦩꦫꦁꦲꦏꦸꦲꦶꦏꦸꦗꦼꦤꦼꦁꦔꦺꦧꦏꦭ꧀ꦢꦏ꧀ꦧꦸꦱꦏ꧀ꦱꦏꦲꦶꦁꦏꦶꦠꦧ꧀ꦏꦸ꧉​
32:34 ꦱꦲꦶꦏꦶꦭꦸꦔꦲ꧈​ꦱꦂꦠꦮꦺꦴꦁꦮꦺꦴꦁꦏꦸꦮꦶꦲꦶꦫꦶꦢ꧀ꦢꦼꦤ꧀ꦩꦼꦚꦁꦥꦁꦒꦺꦴꦤ꧀ꦤꦤ꧀ꦏꦁꦮꦶꦱ꧀ꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧉​ꦲꦺꦭꦶꦁꦔ꧈​ꦪꦺꦤ꧀ꦩꦭꦲꦺꦏꦠ꧀ꦏꦸ ꦧꦏꦭ꧀ꦔꦶꦫꦶꦢ꧀ꦭꦏꦸꦩꦸꦲꦤꦲꦶꦁꦔꦉꦥ꧀꧈​ꦤꦁꦔꦶꦁꦧꦏꦭ꧀ꦠꦼꦏꦤ꧀ꦮꦼꦏ꧀ꦠꦸꦤꦺꦧꦁꦱꦲꦶꦏꦶꦢꦏ꧀ꦲꦸꦏꦸꦩ꧀ꦩꦼꦂꦒꦱꦏꦢꦺꦴꦱꦢꦺꦴꦱꦤꦺ꧉"​
32:35 ꦄꦭ꧀ꦭꦃꦧꦚ꧀ꦗꦸꦂꦤ꧀ꦝꦠꦼꦁꦔꦏꦺꦮꦼꦮꦼꦭꦏ꧀ꦩꦫꦁꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦏꦁꦥꦝꦩꦼꦏ꧀ꦱꦲꦫꦸꦤ꧀ꦒꦮꦺꦱꦥꦶꦩꦱ꧀ꦩꦲꦸ꧉​