Alkitab/Pangentasan/10

Kaca iki nganggo aksara Jawa. Yen perambanmu ora ndukung, kowé ora bakal isa ndeleng sauntara tulisan nganggo aksara Jawa ing halaman iki.
Kanggo mbeneraké, mangga diwaca Pitulung:Aksara Jawa.

^10:1 ꦒꦸꦱ꧀ꦠꦶꦄꦭ꧀ꦭꦃꦝꦮꦸꦃꦩꦫꦁ꧊ꦩꦸꦱ꧈"ꦩꦁꦏꦠ꧀ꦠꦱꦺꦴꦮꦤ꧀ꦱꦁꦥꦿꦶꦔꦺꦴꦤ꧀꧉ꦫꦗꦩꦲꦸꦭꦤ꧀ꦥꦫꦥꦼꦁꦒꦼꦝꦺꦤꦺꦮꦶꦱ꧀ꦢꦏ꧀ꦢꦢꦺꦏ꧀ꦏꦏꦺꦮꦁꦏꦺꦴꦠ꧀ꦲꦠꦶꦤꦺ꧈ꦱꦸꦥꦪꦲꦏꦸꦧꦶꦱꦒꦮꦺꦏꦲꦺꦭꦺꦴꦏꦤ꧀ꦏꦲꦺꦭꦺꦴꦏꦤ꧀ꦲꦶꦁꦱꦠꦼꦔꦃꦲꦺꦮꦺꦴꦁꦮꦺꦴꦁꦩꦲꦸ꧈

^10:2 ꦱꦂꦠꦏꦺꦴꦮꦺꦧꦏꦭ꧀ꦧꦶꦱꦕꦿꦶꦠꦩꦫꦁꦲꦤꦏ꧀ꦥꦸꦠꦸꦩꦸ꧈ꦏꦼꦥꦿꦶꦪꦺꦥꦼꦤ꧀ꦢꦩꦼꦭ꧀ꦏꦸꦩꦫꦁꦧꦁꦱ꧊ꦩꦺꦱꦶꦂꦭꦤ꧀ꦧꦧ꧀ꦱꦏꦺꦃꦲꦺꦏꦲꦺꦭꦺꦴꦏ꧀ꦏꦤ꧀ꦏꦁꦏꦼꦭꦏꦺꦴꦤ꧀ꦲꦤꦲꦶꦁꦏꦺꦴꦤꦺꦴ꧈ꦱꦸꦥꦪꦏꦺꦴꦮꦺꦥꦝꦮꦼꦫꦸꦃꦪꦺꦤ꧀ꦲꦏꦸꦲꦶꦏꦶꦄꦭ꧀ꦭꦃ꧉"

^10:3 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦱꦺꦴꦮꦤ꧀ꦱꦁꦥꦿꦶꦔꦺꦴꦤ꧀ꦱꦂꦠꦩꦠꦸꦂ꧈"ꦒꦸꦱ꧀ꦠꦶꦄꦭ꧀ꦭꦃ꧈ꦲꦶꦁꦒꦶꦃꦲꦭ꧀ꦭꦃꦲꦶꦥꦸꦤ꧀ꦧꦁꦱ꧊ꦆꦧꦿꦤꦶ꧈ꦔꦤ꧀ꦢꦶꦏꦩꦼꦏꦠ꧀ꦠꦼꦤ꧀꧈‘ꦔꦤ꧀ꦠꦶꦏꦥꦤ꧀ꦲꦼꦁꦒꦺꦴꦤ꧀ꦩꦸꦩ꧀ꦧꦁꦏꦁꦩꦫꦁꦲꦏꦸ?ꦲꦸꦩꦠ꧀ꦏꦸ ꦭꦶꦭꦤꦤꦭꦸꦔ꧈ꦱꦸꦥꦪꦧꦶꦱꦔꦶꦧꦢꦃꦩꦫꦁꦲꦏꦸ꧉

^10:4 ꦩꦼꦤꦮꦏꦺꦴꦮꦺꦲꦶꦱꦶꦃꦠꦼꦠꦼꦥ꧀ꦲꦺꦴꦫꦔ꧀ꦭꦶꦭꦤꦶ꧈ꦱꦺꦱꦸꦏ꧀ꦲꦏꦸꦧꦏꦭ꧀ꦤꦼꦏꦏ꧀ꦏꦏꦺꦮꦭꦁꦲꦶꦁꦤꦼꦒꦫꦩꦸ꧉

^10:5 ꦧꦏꦭ꧀ꦲꦤꦮꦭꦁꦲꦏꦺꦃꦧꦔꦼꦠ꧀ꦤꦸꦠꦸꦥ꧀ꦥꦶꦊꦩꦃꦲꦺꦧꦸꦩꦶ꧈ꦔꦤ꧀ꦠꦶꦲꦺꦴꦫꦏꦠꦺꦴꦤ꧀ꦊꦩꦃꦲꦺ꧉ꦮꦭꦁꦮꦭꦁꦩꦲꦸꦧꦏꦭ꧀ꦩꦁꦔꦤ꧀ꦲꦥꦮꦲꦺꦱꦶꦁꦢꦸꦫꦸꦁꦱꦶꦂꦤꦢꦺꦤꦶꦁꦲꦸꦢꦤ꧀ꦲꦺꦱ꧀꧈ꦩꦭꦃꦮꦶꦠ꧀ꦮꦶꦠ꧀ꦠꦤ꧀ꦱꦶꦁꦲꦶꦱꦶꦃꦲꦸꦫꦶꦥ꧀ꦲꦶꦪꦧꦏꦭ꧀ꦢꦶꦥꦔꦤ꧀ꦔꦤ꧀ꦠꦶꦭꦸꦝꦼꦱ꧀꧉

^10:6 ꦮꦭꦁꦏꦸꦮꦶꦧꦏꦭ꧀ꦤꦸꦠꦸꦥ꧀ꦥꦶꦏꦿꦠꦺꦴꦤ꧀ꦩꦸ꧈ꦲꦺꦴꦩꦃꦲꦺꦥꦫꦥꦼꦁꦒꦼꦝꦺꦭꦤ꧀ꦫꦏꦾꦠ꧀꧉ꦏꦱꦁꦱꦫꦤ꧀ꦲꦶꦏꦶꦭꦸꦮꦶꦃꦔ꧀ꦒꦼꦒꦶꦫꦶꦱꦶꦪꦺꦤ꧀ꦢꦶꦠꦤ꧀ꦝꦶꦁꦏꦫꦺꦴꦱꦶꦁꦢꦶꦲꦭꦩ꧀ꦩꦶꦊꦭꦸꦲꦸꦂꦩꦸ꧉’"꧊ꦩꦸꦱꦧꦚ꧀ꦗꦸꦂꦩꦸꦤ꧀ꦢꦸꦂꦱꦏꦲꦶꦁꦔꦂꦱꦤꦺꦱꦁꦥꦿꦶꦔꦺꦴꦤ꧀꧉

^10:7 ꦥꦫꦥꦼꦁꦒꦼꦝꦺꦧꦚ꧀ꦗꦸꦂꦥꦝꦩꦠꦸꦂꦩꦫꦁꦱꦁꦥꦿꦶꦔꦺꦴꦤ꧀꧈"ꦔꦤ꧀ꦠꦺꦴꦱ꧀ꦩ꧀ꦧꦺꦚ꧀ꦗꦶꦁꦩꦼꦤꦥꦠꦶꦪꦁꦩꦼꦤꦶꦏꦏꦼꦢꦃꦢꦩꦼꦭ꧀ꦱꦁꦱꦫꦏꦶꦠ?ꦠꦶꦪꦁꦠꦶꦪꦁ꧊ꦆꦱꦿꦲꦺꦭ꧀ꦩꦼꦤꦶꦏꦩꦸꦒꦶꦥꦚ꧀ꦗꦼꦤꦼꦁꦔꦤ꧀ꦭꦶꦭꦤꦶꦏꦺꦱꦃꦏꦺꦩꦮꦺꦴꦤ꧀꧈ꦱꦸꦥꦢꦺꦴꦱ꧀ꦱꦒꦼꦢ꧀ꦔꦶꦧꦢꦃꦝꦠꦼꦁꦲꦭ꧀ꦭꦃꦲꦶꦥꦸꦤ꧀꧉ꦩꦼꦤꦥꦱꦁꦥꦿꦧꦸꦩ꧀ꦧꦺꦴꦠꦼꦤ꧀ꦥꦶꦂꦱ꧈ꦧꦶꦭꦶꦃꦤꦼꦒꦫꦶ꧊ꦩꦺꦱꦶꦂꦱꦩ꧀ꦥꦸꦤ꧀ꦫꦶꦱꦏ꧀?"

^10:8 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦢꦶꦠꦶꦩ꧀ꦧꦭ꧀ꦭꦶꦩꦼꦤꦺꦃꦢꦺꦤꦶꦁꦱꦁꦥꦿꦧꦸꦱꦂꦠꦏꦢꦔꦸ꧈"ꦏꦺꦴꦮꦺꦏꦧꦺꦃꦥꦝꦏꦼꦤꦔꦶꦧꦢꦃꦩꦫꦁꦲꦭ꧀ꦭꦃꦩꦸ꧈ꦤꦁꦔꦶꦁꦱꦼꦗꦠꦶꦤꦺꦱꦥꦱꦶꦁꦲꦉꦥ꧀ꦭꦸꦔ?"

^10:9 ꦲꦠꦸꦂꦫꦺ꧊ꦩꦸꦱ꧈"ꦏꦸꦭꦱꦼꦢꦪ꧈ꦩꦼꦏꦠ꧀ꦠꦼꦤ꧀ꦲꦸꦒꦶꦭꦫꦺꦭꦫꦺꦱꦲꦠꦶꦪꦁꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦱꦼꦥꦸꦃ꧉ꦏꦸꦭꦱꦩꦶꦧꦝꦺꦩ꧀ꦧꦼꦏ꧀ꦠꦭꦫꦺꦭꦫꦺꦏꦸꦭ꧈ꦩꦺꦤ꧀ꦢꦒꦺꦩ꧀ꦧꦺꦭ꧀꧈ꦩꦺꦤ꧀ꦢꦧꦺꦫꦺꦴꦏ꧀ꦱꦲꦊꦩ꧀ꦧꦸꦏꦸꦭꦱꦼꦢꦪ꧈ꦱꦼꦧꦧ꧀ꦏꦸꦭꦱꦩꦶꦧꦝꦺꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦫꦶꦪꦪꦏꦁꦒꦺꦔꦸꦂꦩꦠ꧀ꦠꦶꦒꦸꦱ꧀ꦠꦶꦄꦭ꧀ꦭꦃ꧉"

^10:10 ꦝꦮꦸꦃꦲꦺꦫꦗ꧈"ꦲꦏꦸꦱꦸꦩ꧀ꦥꦃꦢꦼꦩꦶꦄꦭ꧀ꦭꦃ꧈ꦪꦺꦤ꧀ꦲꦏꦸꦲꦺꦴꦫꦧꦏꦭ꧀ꦔ꧀ꦭꦶꦭꦤꦶꦏꦺꦴꦮꦺꦥꦝꦔ꧀ꦒꦮꦧꦺꦴꦗꦺꦴꦩꦸꦭꦤ꧀ꦲꦤꦏ꧀ꦲꦤꦏ꧀ꦩꦸ!ꦮꦶꦱ꧀ꦕꦼꦛꦪꦺꦤ꧀ꦏꦺꦴꦮꦺꦲꦉꦥ꧀ꦥꦝꦔꦤꦏ꧀ꦏꦏꦺꦏꦺꦴꦩ꧀ꦥ꧀ꦭꦺꦴꦠ꧀ꦠꦤ꧀ꦲꦉꦥ꧀ꦩ꧀ꦧꦿꦺꦴꦤ꧀ꦠꦏ꧀꧉

^10:11 ꦲꦺꦴꦫ!ꦏꦺꦴꦮꦺꦏꦼꦤꦭꦸꦔ꧈ꦤꦁꦔꦶꦁꦔꦩꦸꦁꦤꦮꦺꦴꦁꦮꦺꦴꦁꦭꦤꦁꦮꦲꦺꦱꦶꦁꦔꦶꦧꦢꦃꦩꦫꦁꦄꦭ꧀ꦭꦃ!"ꦏꦤ꧀ꦛꦶꦠꦼꦠꦼꦩ꧀ꦧꦸꦁꦔꦤ꧀ꦩꦲꦸ꧊ꦩꦸꦱꦭꦤ꧀ꦲꦫꦸꦤ꧀ꦢꦶꦠꦸꦤ꧀ꦝꦸꦁꦱꦏꦏꦼꦝꦠꦺꦴꦤ꧀꧉

^10:12 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈"ꦠꦼꦏꦼꦤ꧀ꦩꦸꦲꦛꦸꦁꦤꦲꦶꦁꦱꦤ꧀ꦝꦸꦮꦸꦂꦫꦶꦁꦠꦤꦃ꧊ꦩꦺꦱꦶꦂ꧉ꦮꦭꦁꦮꦭꦁꦧꦏꦭ꧀ꦥꦝꦠꦼꦏꦭꦤ꧀ꦩꦁꦔꦤ꧀ꦱꦏꦺꦃꦲꦶꦁꦠꦤ꧀ꦢꦸꦂꦫꦤ꧀ꦱꦶꦁꦢꦸꦫꦸꦁꦱꦶꦂꦤꦩꦼꦂꦒꦲꦸꦢꦤ꧀ꦲꦺꦱ꧀꧉"

^10:13 ꧊ꦩꦸꦱꦧꦚ꧀ꦗꦸꦂꦔꦛꦸꦁꦔꦏꦺꦠꦼꦏꦼꦤꦺꦭꦤ꧀ꦄꦭ꧀ꦭꦃꦤ꧀ꦝꦠꦼꦁꦔꦏꦺꦲꦔꦶꦤ꧀ꦱꦏꦮꦺꦠꦤ꧀꧈ꦩꦶꦢꦶꦢ꧀ꦱꦼꦢꦶꦤꦩꦸꦥꦸꦠ꧀ꦱꦂꦠꦱꦼꦮꦼꦔꦶꦤꦠꦱ꧀꧉ꦧꦉꦁꦮꦪꦃꦲꦺꦱꦸꦏ꧀ꦲꦔꦶꦤ꧀ꦩꦲꦸꦮꦶꦱ꧀ꦔ꧀ꦒꦮꦮꦭꦁ꧉

^10:14 ꦮꦭꦁꦮꦭꦁꦔꦺꦥꦝꦤꦼꦧ꧈ꦕꦕꦃꦲꦺꦲꦏꦺꦃꦧꦔꦼꦠ꧀ꦔꦤ꧀ꦠꦶꦱꦠꦤꦃ꧊ꦩꦺꦱꦶꦂꦏꦼꦧꦏ꧀ꦮꦭꦁꦏꦧꦺꦃ꧉ꦮꦺꦴꦁꦮꦺꦴꦁꦢꦸꦫꦸꦁꦠꦲꦸꦭꦤ꧀ꦲꦺꦴꦫꦧꦏꦭ꧀ꦩꦼꦫꦸꦃꦲꦶꦩꦼꦤꦺꦃꦮꦭꦁꦱꦶꦁꦱꦼꦩꦺꦴꦤꦺꦴꦲꦏꦺꦃꦲꦺ꧉

^10:15 ꦮꦭꦁꦮꦭꦁꦩꦲꦸꦔꦼꦧꦏ꧀ꦏꦶꦱꦠꦤꦃ꧊ꦩꦺꦱꦶꦂꦏꦧꦺꦃ꧈ꦔꦤ꧀ꦠꦶꦏꦠꦺꦴꦤ꧀ꦲꦶꦉꦁ꧈ꦱꦂꦠꦥꦝꦩꦁꦔꦤ꧀ꦲꦥꦮꦲꦺꦱꦶꦁꦢꦸꦫꦸꦁꦩꦸꦱ꧀ꦤꦱꦮꦶꦱ꧀ꦱꦺꦲꦸꦢꦤ꧀ꦲꦺꦱ꧀꧈ꦩꦼꦁꦏꦺꦴꦤꦺꦴꦲꦸꦒꦮꦺꦴꦃꦮꦺꦴꦃꦲꦤ꧀꧉ꦮꦶꦠ꧀ꦮꦶꦠ꧀ꦠꦤ꧀ꦱꦂꦠꦠꦤ꧀ꦢꦸꦂꦫꦤ꧀ꦲꦶꦁꦠꦤꦃ꧊ꦩꦺꦱꦶꦂꦧꦧꦂꦥꦶꦱꦤ꧀ꦮꦶꦱ꧀ꦲꦺꦴꦫꦲꦤꦱꦶꦁꦲꦶꦗꦺꦴꦫꦸꦥꦤꦺ꧉

^10:16 ꦱꦁꦥꦿꦧꦸꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦤꦶꦩ꧀ꦧꦭ꧀ꦭꦶ꧊ꦩꦸꦱꦭꦤ꧀ꦲꦫꦸꦤ꧀ꦱꦂꦠꦝꦮꦸꦃ꧈"ꦲꦏꦸꦮꦶꦱ꧀ꦒꦮꦺꦢꦺꦴꦱꦩꦫꦁꦲꦭ꧀ꦭꦃꦩꦸꦱꦂꦠꦩꦫꦁꦏꦺꦴꦮꦺꦏꦧꦺꦃ꧉

^10:17 ꦱꦼꦥꦶꦱ꧀ꦱꦤ꧀ꦲꦶꦏꦶꦲꦥꦸꦫꦤꦼꦤ꧀ꦢꦺꦴꦱꦏꦸꦱꦂꦠꦤ꧀ꦢꦼꦢꦺꦴꦔꦲꦩꦫꦁꦲꦭ꧀ꦭꦃꦩꦸ꧈ꦱꦸꦥꦪꦏꦼꦂꦱꦚꦶꦁꦏꦶꦂꦫꦏꦺꦧꦼꦧꦪꦥꦠꦶꦲꦶꦏꦶꦱꦏꦲꦏꦸ꧉"

^10:18 ꧊ꦩꦸꦱꦧꦚ꧀ꦗꦸꦂꦩꦸꦤ꧀ꦢꦸꦂꦭꦤ꧀ꦤ꧀ꦢꦼꦢꦺꦴꦔꦩꦫꦁꦄꦭ꧀ꦭꦃ꧉

^10:19 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦶꦔꦼꦂꦫꦏꦺꦲꦼꦤꦼꦂꦫꦶꦁꦲꦔꦶꦤ꧀꧈ꦢꦶꦮꦭꦶꦏ꧀ꦢꦢꦶꦲꦔꦶꦤ꧀ꦱꦏ꧊ꦏꦸꦭꦺꦴꦤ꧀ꦱꦶꦁꦧꦤ꧀ꦠꦼꦂꦧꦔꦼꦠ꧀꧉ꦮꦭꦁꦮꦭꦁꦥꦝꦏꦠꦸꦠ꧀ꦲꦶꦁꦲꦔꦶꦤ꧀ꦩꦼꦚꦁꦲꦶꦁꦠꦼꦭꦸꦏ꧀꧊ꦱꦸꦮꦺꦗ꦳꧀꧉ꦱꦠꦤꦃ꧊ꦩꦺꦱꦶꦂꦲꦺꦴꦫꦲꦤꦮꦭꦁꦱꦶꦗꦶꦮꦲꦺꦱꦶꦁꦏꦺꦫꦶ꧉

^10:20 ꦤꦁꦔꦶꦁꦫꦗ꧊ꦩꦺꦱꦶꦂꦠꦼꦠꦼꦥ꧀ꦩꦁꦏꦺꦴꦠ꧀ꦠꦏꦺꦥꦼꦁꦒꦭꦶꦃꦲꦺꦭꦤ꧀ꦲꦺꦴꦫꦔ꧀ꦭꦶꦭꦤꦶꦮꦺꦴꦁ꧊ꦆꦱꦿꦲꦺꦭ꧀ꦭꦸꦔ꧉

^10:21 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈"ꦠꦔꦤ꧀ꦩꦸꦲꦛꦸꦁꦤꦲꦶꦁꦭꦔꦶꦠ꧀꧈ꦠꦤꦃ꧊ꦩꦺꦱꦶꦂꦧꦚ꧀ꦗꦸꦂꦧꦏꦭ꧀ꦥꦼꦠꦼꦁꦤ꧀ꦝꦼꦝꦼꦠ꧀꧉"

^10:22 ꧊ꦩꦸꦱꦔꦛꦸꦁꦔꦏꦺꦲꦱ꧀ꦠꦤꦺ꧈ꦭꦤ꧀ꦱꦗꦿꦺꦴꦤꦺꦠꦼꦭꦸꦁꦢꦶꦤ꧊ꦩꦺꦱꦶꦂꦥꦼꦠꦼꦁꦤ꧀ꦝꦼꦝꦼꦠ꧀꧉

^10:23 ꦱꦗꦿꦺꦴꦤꦺꦠꦼꦭꦸꦁꦢꦶꦤꦩꦲꦸꦮꦺꦴꦁ꧊ꦩꦺꦱꦶꦂꦲꦺꦴꦫꦮꦼꦫꦸꦃꦲꦥꦲꦥꦱꦂꦠꦲꦺꦴꦫꦲꦤꦱꦶꦗꦶꦮꦲꦺꦱꦶꦁꦩꦼꦠꦸꦱꦏꦲꦶꦁꦲꦺꦴꦩꦃꦲꦺ꧉ꦲꦺꦮꦱꦼꦩꦺꦴꦤꦺꦴꦲꦶꦁꦥꦁꦒꦺꦴꦤ꧀ꦤꦤ꧀ꦤꦺꦮꦺꦴꦁ꧊ꦆꦱꦿꦲꦺꦭ꧀ꦠꦼꦠꦼꦥ꧀ꦥꦝꦁ꧉

^10:24 ꦫꦗ꧊ꦩꦺꦱꦶꦂꦤꦶꦩ꧀ꦧꦭ꧀ꦭꦶ꧊ꦩꦸꦱꦭꦤ꧀ꦝꦮꦸꦃ꧈"ꦏꦺꦴꦮꦺꦥꦝꦏꦼꦤꦭꦸꦔꦔꦶꦧꦢꦃꦩꦫꦁꦄꦭ꧀ꦭꦃ꧉ꦥꦫꦮꦺꦴꦁꦮꦢꦺꦴꦤ꧀ꦭꦤ꧀ꦧꦺꦴꦕꦃꦧꦺꦴꦕꦃꦏꦼꦤꦩꦺꦭꦸ;ꦤꦁꦔꦶꦁꦮꦼꦝꦸꦱ꧀ꦒꦺꦩ꧀ꦧꦺꦭ꧀꧈ꦮꦼꦝꦸꦱ꧀ꦧꦺꦫꦺꦴꦏ꧀ꦭꦤ꧀ꦱꦥꦶꦩꦸꦏꦸꦢꦸꦢꦶꦠꦶꦁꦒꦭ꧀ꦲꦶꦁꦏꦺꦤꦺ꧉"

^10:25 ꧊ꦩꦸꦱꦩꦠꦸꦂ꧈"ꦩꦼꦤꦮꦶꦩꦼꦏꦠ꧀ꦠꦼꦤ꧀ꦱꦁꦥꦿꦧꦸꦏꦼꦢꦃꦩꦫꦶꦁꦔꦶꦏꦺꦮꦤ꧀ꦏꦁꦒꦺꦱꦼꦱꦲꦺꦴꦱ꧀ꦱꦤ꧀ꦱꦲꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦏꦒꦼꦩ꧀ꦄꦭ꧀ꦭꦃꦏꦸꦭ꧉

^10:26 ꦩ꧀ꦧꦺꦴꦠꦼꦤ꧀!ꦏꦸꦭꦧꦝꦺꦱꦩꦶꦩ꧀ꦧꦼꦏ꧀ꦠꦏꦺꦮꦤ꧀ꦏꦸꦭꦱꦼꦢꦪ;ꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦧꦝꦺꦏꦸꦭꦠꦶꦭꦂ꧉ꦏꦸꦭꦥꦶꦪꦩ꧀ꦧꦏ꧀ꦲꦶꦁꦏꦁꦧꦝꦺꦩꦶꦭꦶꦃꦏꦺꦮꦤ꧀ꦲꦶꦁꦏꦁꦧꦝꦺꦏꦲꦠꦸꦂꦫꦏꦼꦤ꧀ꦝꦠꦼꦁꦄꦭ꧀ꦭꦃ꧉ꦱꦢꦺꦫꦺꦁꦔꦶꦥꦸꦤ꧀ꦢꦸꦩꦸꦒꦶꦲꦶꦁꦔꦿꦶꦏ꧈ꦏꦸꦭꦩ꧀ꦧꦺꦴꦠꦼꦤ꧀ꦱꦸꦩꦼꦉꦥ꧀ꦏꦺꦮꦤ꧀ꦲꦶꦁꦏꦁꦥꦸꦤ꧀ꦢꦶꦲꦶꦁꦏꦁꦧꦝꦺꦏꦸꦭꦲꦠꦸꦂꦫꦏꦼꦤ꧀ꦝꦠꦼꦁꦒꦸꦱ꧀ꦠꦶꦄꦭ꧀ꦭꦃ꧉"

^10:27 ꦒꦸꦱ꧀ꦠꦶꦄꦭ꧀ꦭꦃꦩꦁꦏꦺꦴꦠ꧀ꦠꦏꦺꦥꦼꦁꦒꦭꦶꦃꦲꦺꦫꦗ꧊ꦩꦺꦱꦶꦂ꧈ꦩꦸꦭꦲꦺꦴꦫꦔ꧀ꦭꦶꦭꦤꦶꦧꦁꦱ꧊ꦆꦱꦿꦲꦺꦭ꧀ꦭꦸꦔ꧉

^10:28 ꦝꦮꦸꦃꦲꦺꦫꦗꦩꦫꦁ꧊ꦩꦸꦱ꧈"ꦭꦸꦔꦲꦱꦏꦔꦉꦥ꧀ꦏꦸ꧉ꦲꦗꦔꦤ꧀ꦠꦶꦲꦏꦸꦮꦼꦫꦸꦃꦏꦺꦴꦮꦺꦩꦼꦤꦺꦃ!ꦪꦺꦤ꧀ꦔꦤ꧀ꦠꦶꦏꦼꦠꦼꦩꦸꦏꦺꦴꦮꦺꦩꦼꦤꦺꦃ꧈ꦏꦺꦴꦮꦺꦧꦏꦭ꧀ꦩꦠꦶ!"

^10:29 ꦲꦠꦸꦂꦫꦺ꧊ꦩꦸꦱ꧈"ꦱꦲꦺꦱ꧀ꦠꦸꦧꦝꦺꦏꦼꦭꦩ꧀ꦥꦃꦲꦤ꧀ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦔꦤ꧀ꦢꦶꦏꦏ꧀ꦏꦏꦼꦤ꧀꧉ꦱꦁꦥꦿꦧꦸꦩ꧀ꦧꦺꦴꦠꦼꦤ꧀ꦧꦝꦺꦥꦶꦂꦱꦏꦸꦭꦩꦭꦶꦃ꧉"