Alkitab/Kaimaman/9

^9:1 ꦱꦮꦶꦱ꧀ꦱꦺꦲꦸꦥꦕꦫꦠꦼꦠꦼꦥ꧀ꦥꦤ꧀ꦫꦩ꧀ꦥꦸꦁ꧈​ꦲꦺꦱꦸꦏ꧀ꦏꦺ​꧊ꦩꦸꦱꦔꦸꦤ꧀ꦢꦁꦲꦫꦸꦤ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺ꧈​ꦱꦂꦠꦥꦫꦥꦶꦤꦶꦠꦸꦮꦤꦺꦲꦸꦩꦠ꧀​꧊ꦆꦱꦿꦲꦺꦭ꧀꧉​

^9:2 ​꧊ꦩꦸꦱꦏꦤ꧀ꦝꦏꦫꦺꦴꦲꦫꦸꦤ꧀꧈​"ꦚ꧀ꦗꦸꦥꦸꦏ꧀ꦏꦥꦼꦝꦺꦠ꧀ꦭꦤꦁꦤꦺꦴꦩ꧀ꦱꦶꦗꦶꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦶꦗꦶꦱꦶꦁꦠꦤ꧀ꦥꦕꦕꦢ꧀꧈​ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃ꧉​ꦱꦥꦶꦤꦺꦭꦤꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦭꦤ꧀ꦮꦼꦝꦸꦱ꧀ꦱꦺꦒꦺꦩ꧀ꦧꦺꦭ꧀ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧉​

^9:3 ꦲꦸꦩꦠ꧀​꧊ꦆꦱꦿꦲꦺꦭ꧀ꦏꦺꦴꦤ꧀ꦤꦼꦤ꧀ꦔ꧀ꦒꦮꦮꦼꦝꦸꦱ꧀ꦭꦤꦁꦱꦶꦗꦶ꧈​ꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦥꦼꦝꦺꦠ꧀ꦱꦶꦗꦶꦭꦤ꧀ꦕꦼꦩ꧀ꦥꦺꦱꦶꦗꦶ꧈​ꦭꦺꦴꦫꦺꦴꦭꦺꦴꦫꦺꦴꦤꦺꦲꦸꦩꦸꦂꦱꦼꦠꦲꦸꦤ꧀ꦭꦤ꧀ꦠꦤ꧀ꦥꦕꦕꦢ꧀꧉​

^9:4 ꦧꦚ꧀ꦗꦸꦂꦱꦥꦶꦭꦤꦁꦱꦶꦗꦶꦭꦤ꧀ꦮꦼꦝꦸꦱ꧀ꦭꦤꦁꦱꦶꦗꦶ꧈​ꦏꦁꦒꦺꦴꦏꦸꦂꦧꦤ꧀ꦏꦼꦱ꧀ꦭꦩꦼꦠ꧀ꦠꦤ꧀꧉​ꦏꦺꦮꦤ꧀ꦏꦺꦮꦤ꧀ꦩꦲꦸꦏꦸꦢꦸꦢꦶꦲꦼꦁꦒꦺꦴꦏꦸꦂꦧꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃ꧈​ꦧꦼꦧꦉꦁꦔꦤ꧀ꦏꦫꦺꦴꦏꦸꦂꦧꦤ꧀ꦝꦲꦂꦫꦤ꧀ꦱꦶꦁꦢꦶꦕꦫꦸꦧ꧀ꦏꦫꦺꦴꦊꦔ꧉​ꦏꦸꦮꦶꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺ꧈​ꦩꦼꦂꦒꦲꦶꦁꦢꦶꦤꦲꦶꦏꦶꦄꦭ꧀ꦭꦃꦧꦏꦭ꧀ꦔꦿꦮꦸꦃꦲꦶꦲꦸꦩꦠ꧀ꦠꦺ꧉"​

^9:5 ꦏꦧꦺꦃꦱꦶꦁꦢꦶꦝꦮꦸꦃꦲꦏꦺ​꧊ꦩꦸꦱꦩꦲꦸꦥꦝꦢꦶꦒꦮꦲꦶꦁꦔꦉꦥ꧀ꦏꦺꦩꦃꦭꦤ꧀ꦲꦸꦩꦠ꧀ꦏꦧꦺꦃꦥꦝꦔ꧀ꦭꦸꦩ꧀ꦥꦸꦏ꧀ꦲꦶꦁꦏꦺꦴꦤꦺꦴ꧈​ꦥꦝꦱꦸꦁꦏꦼꦩ꧀ꦱꦸꦗꦸꦢ꧀ꦩꦫꦁꦄꦭ꧀ꦭꦃ꧉​

^9:6 ​꧊ꦩꦸꦱꦧꦚ꧀ꦗꦸꦂꦏꦤ꧀ꦝ꧈​"ꦏꦺꦴꦮꦺꦢꦶꦝꦮꦸꦃꦲꦶꦤꦶꦤ꧀ꦢꦏ꧀ꦏꦏꦺꦏꦸꦮꦶꦩꦲꦸꦏꦧꦺꦃ꧈​ꦱꦸꦥꦪꦏꦺꦴꦮꦺꦧꦶꦱꦥꦝꦮꦼꦫꦸꦃꦏꦩꦸꦭꦾꦤꦺꦄꦭ꧀ꦭꦃꦱꦶꦁꦔꦺꦫꦩ꧀ꦲꦺꦫꦩ꧀ꦩꦏꦺ꧉"​

^9:7 ꦧꦚ꧀ꦗꦸꦂꦕ꧀ꦭꦛꦸꦏꦫꦺꦴꦲꦫꦸꦤ꧀꧈​"ꦩꦼꦚꦁꦔꦩꦼꦱ꧀ꦧꦺꦃ꧈​ꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦭꦤ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦲꦶꦏꦶꦱꦲꦺꦴꦱ꧀ꦤ꧈​ꦱꦸꦥꦪꦲꦺꦴꦭꦺꦃꦥꦔꦥꦸꦫꦤꦶꦁꦢꦺꦴꦱꦩꦸꦭꦤ꧀ꦢꦺꦴꦱꦤꦺꦲꦸꦩꦠ꧀꧉​ꦠꦶꦤ꧀ꦢꦏ꧀ꦤꦩꦤꦸꦠ꧀ꦝꦮꦸꦃꦲꦺꦄꦭ꧀ꦭꦃ꧉"​

^9:8 ꦲꦫꦸꦤ꧀ꦤꦸꦭꦶꦩꦁꦏꦠ꧀ꦭꦤ꧀ꦚꦼꦩ꧀ꦧꦼꦭꦺꦃꦱꦥꦶꦭꦤꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦤꦺꦝꦺꦮꦺ꧉​

^9:9 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦒꦼꦠꦶꦃꦲꦺꦏꦺꦮꦤ꧀ꦩꦲꦸꦢꦶꦒꦮꦲꦤꦏ꧀ꦲꦤꦏ꧀ꦏꦺꦩꦫꦁꦲꦫꦸꦤ꧀꧉​ꦲꦫꦸꦤ꧀ꦚꦼꦭꦸꦥ꧀ꦥꦏꦺꦢꦿꦶꦗꦶꦤꦺꦲꦶꦁꦒꦼꦠꦶꦃꦩꦲꦸ꧈​ꦢꦶꦭꦺꦭꦺꦠ꧀ꦠꦏꦺꦲꦶꦁꦱꦸꦔꦸꦱꦸꦔꦸꦲꦶꦁꦥꦺꦴꦗꦺꦴꦏ꧀ꦏꦺꦩꦼꦱ꧀ꦧꦺꦃ꧉​ꦠꦸꦫꦃꦲꦤ꧀ꦤꦺꦢꦶꦱꦶꦫꦩ꧀ꦩꦏꦺꦲꦶꦁꦱꦶꦏꦶꦭ꧀ꦭꦺꦩꦼꦱ꧀ꦧꦺꦃꦩꦸꦧꦼꦁ꧉​

^9:10 ꦒꦗꦶꦃ꧈​ꦒꦶꦚ꧀ꦗꦼꦭ꧀ꦭꦤ꧀ꦥꦺꦫꦁꦔꦤ꧀ꦤꦺꦲꦠꦶꦱꦶꦁꦲꦥꦶꦏ꧀ꦝꦺꦮꦺꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧈​ꦏꦪꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦫꦁ​꧊ꦩꦸꦱ꧉​

^9:11 ꦤꦁꦔꦶꦁꦢꦒꦶꦁꦭꦤ꧀ꦭꦸꦭꦁꦔꦺꦏꦺꦮꦤ꧀ꦩꦲꦸꦢꦶꦲꦺꦴꦧꦺꦴꦁꦲꦶꦁꦱꦚ꧀ꦗꦧꦤꦺꦏꦺꦩꦃ꧉​

^9:12 ꦲꦫꦸꦤ꧀ꦧꦚ꧀ꦗꦸꦂꦚ꧀ꦗꦸꦥꦸꦏ꧀ꦏꦺꦮꦤ꧀ꦱꦶꦁꦲꦉꦥ꧀ꦢꦶꦲꦼꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦏꦁꦒꦺꦴꦲꦮꦏ꧀ꦏꦺꦝꦺꦮꦺ꧈​ꦤꦸꦭꦶꦢꦶꦱꦼꦩ꧀ꦧꦼꦭꦺꦃ꧉​ꦒꦼꦠꦶꦃꦲꦺꦢꦶꦒꦮꦢꦺꦤꦶꦁꦲꦤꦏ꧀ꦲꦤꦏ꧀ꦏꦺꦢꦶꦥꦱꦿꦃꦲꦏꦺꦩꦫꦁꦲꦫꦸꦤ꧀꧉​ꦲꦫꦸꦤ꧀ꦚꦶꦫꦩ꧀ꦩꦏꦺꦒꦼꦠꦶꦃꦩꦲꦸꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃꦩꦸꦧꦼꦁ꧉​

^9:13 ꦲꦼꦤ꧀ꦝꦱ꧀ꦭꦤ꧀ꦥꦺꦫꦔꦤ꧀ꦥꦺꦫꦔꦤ꧀ꦭꦶꦪꦤꦺꦲꦸꦒꦢꦶꦥꦱꦿꦃꦲꦏꦺꦩꦫꦁꦲꦫꦸꦤ꧀꧈​ꦧꦚ꧀ꦗꦸꦂꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧉​

^9:14 ꦗꦼꦫꦺꦴꦮꦤ꧀ꦭꦤ꧀ꦱꦩ꧀ꦥꦶꦭ꧀ꦭꦺꦏꦺꦮꦤ꧀ꦩꦲꦸꦧꦚ꧀ꦗꦸꦂꦢꦶꦉꦱꦶꦏ꧀ꦏꦶ꧈​ꦤꦸꦭꦶꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧈​ꦢꦶꦠꦸꦩ꧀ꦥꦁꦔꦏꦺꦲꦤꦲꦶꦁꦠꦸꦫꦃꦲꦤ꧀ꦤꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧉​

^9:15 ꦱꦮꦶꦱ꧀ꦱꦺꦫꦩ꧀ꦥꦸꦁ꧈​ꦲꦫꦸꦤ꧀ꦧꦚ꧀ꦗꦸꦂꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦏꦁꦒꦺꦴꦲꦸꦩꦠ꧀​꧊ꦆꦱꦿꦲꦺꦭ꧀꧉​ꦮꦼꦝꦸꦱ꧀ꦱꦶꦁꦲꦉꦥ꧀ꦢꦶꦲꦼꦁꦒꦺꦴꦏꦸꦂꦧꦤ꧀ꦏꦁꦒꦺꦴꦥꦔꦿꦸꦮꦠ꧀ꦠꦶꦁꦢꦺꦴꦱꦧꦚ꧀ꦗꦸꦂꦢꦶꦗꦸꦥꦸꦏ꧀꧈​ꦢꦶꦱꦼꦩ꧀ꦧꦼꦭꦺꦃꦭꦤ꧀ꦢꦶꦱꦲꦺꦴꦱ꧀ꦱꦏꦺ꧈​ꦥꦠꦿꦥ꧀ꦥꦺꦏꦪꦲꦼꦁꦒꦺꦴꦤꦺꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦏꦁꦒꦺꦴꦝꦺꦮꦺꦏ꧀ꦏꦺꦝꦺꦮꦺ꧉​

^9:16 ꦲꦸꦒꦏꦺꦮꦤ꧀ꦱꦶꦁꦲꦉꦥ꧀ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦢꦶꦗꦸꦥꦸꦏ꧀꧈​ꦧꦚ꧀ꦗꦸꦂꦢꦶꦱꦲꦺꦴꦱ꧀ꦱꦏꦺꦩꦤꦸꦠ꧀ꦥꦽꦤꦠꦤ꧀꧉​

^9:17 ꦲꦸꦒꦢꦶꦱꦲꦺꦴꦱ꧀ꦱꦏꦺꦏꦸꦂꦧꦤ꧀ꦝꦲꦂꦫꦤ꧀꧉​ꦒ꧀ꦭꦼꦥꦸꦁꦔꦺꦢꦶꦗꦸꦥꦸꦏ꧀ꦱꦼꦒꦼꦒꦼꦩ꧀꧈​ꦧꦚ꧀ꦗꦸꦂꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧈​ꦏꦁꦒꦺꦴꦠꦩ꧀ꦧꦃꦲꦤ꧀ꦤꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦥꦼꦢꦶꦤ꧀ꦤꦤ꧀꧉​

^9:18 ꦲꦫꦸꦤ꧀ꦧꦚ꧀ꦗꦸꦂꦚꦼꦩ꧀ꦧꦼꦭꦺꦃꦱꦥꦶꦤꦺꦭꦤꦁꦱꦶꦁꦏꦁꦒꦺꦴꦏꦸꦂꦧꦤ꧀ꦏꦼꦱ꧀ꦭꦩꦼꦠ꧀ꦠꦤ꧀ꦠꦸꦩꦿꦥ꧀ꦲꦸꦩꦠ꧀​꧊ꦆꦱꦿꦲꦺꦭ꧀꧉​ꦒꦼꦠꦶꦃꦲꦺꦏꦺꦮꦤ꧀ꦩꦲꦸꦢꦶꦠꦼꦂꦫꦏꦺꦢꦺꦤꦶꦁꦲꦤꦏ꧀ꦲꦤꦏ꧀ꦏꦺ;ꦱꦮꦶꦱ꧀ꦱꦺꦢꦶꦠꦩ꧀ꦥꦤꦶ꧈​ꦒꦼꦠꦶꦃꦩꦲꦸꦧꦚ꧀ꦗꦸꦂꦢꦶꦱꦶꦫꦩ꧀ꦩꦏꦺꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃꦩꦸꦧꦼꦁ꧉​

^9:19 ꦒꦗꦶꦃꦲꦺꦱꦥꦶꦭꦤ꧀ꦮꦼꦝꦸꦱ꧀ꦩꦲꦸꦢꦶꦠꦸꦩ꧀ꦥꦁꦔꦏꦺꦲꦶꦁꦝꦝꦤꦺꦏꦺꦮꦤ꧀ꦭꦺꦴꦫꦺꦴꦱꦶꦁꦢꦶꦱꦼꦩ꧀ꦧꦼꦭꦺꦃꦩꦲꦸ꧈​

^9:20 ꦧꦚ꧀ꦗꦸꦂꦢꦶꦒꦮꦩꦼꦚꦁꦩꦼꦱ꧀ꦧꦺꦃ꧉​ꦒꦗꦶꦃꦲꦺꦧꦚ꧀ꦗꦸꦂꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧈​

^9:21 ꦤꦁꦔꦶꦁꦢꦒꦶꦁꦔꦺꦝꦝꦭꦤ꧀ꦱꦩ꧀ꦥꦶꦭ꧀ꦭꦺꦩ꧀ꦧꦸꦫꦶꦢꦶꦥꦱꦿꦃꦲꦏꦺꦩꦫꦁꦥꦫꦲꦶꦩꦩ꧀꧈​ꦢꦢꦶꦥꦶꦱꦸꦁꦱꦸꦁꦩꦶꦫꦸꦁꦒꦤ꧀ꦩꦫꦁꦄꦭ꧀ꦭꦃ꧈​ꦏꦁꦒꦺꦴꦥꦫꦲꦶꦩꦩ꧀꧈​ꦏꦪꦱꦶꦁꦢꦶꦝꦮꦸꦃꦲꦏꦺꦩꦫꦁ​꧊ꦩꦸꦱ꧉​

^9:22 ꦱꦮꦶꦱ꧀ꦱꦺꦏꦸꦂꦧꦤ꧀ꦩꦲꦸꦏꦧꦺꦃꦢꦶꦭꦢꦺꦏ꧀ꦏꦏꦺ꧈​ꦲꦫꦸꦤ꧀ꦧꦚ꧀ꦗꦸꦂꦔꦁꦏꦠ꧀ꦠꦔꦤ꧀ꦤꦺꦭꦤ꧀ꦩ꧀ꦧꦼꦂꦏꦃꦲꦶꦲꦸꦩꦠ꧀​꧊ꦆꦱꦿꦲꦺꦭ꧀꧈​ꦤꦸꦭꦶꦩꦸꦝꦸꦤ꧀꧉​

^9:23 ​꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦩ꧀ꦭꦼꦧꦸꦲꦶꦁꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧉​ꦱꦩꦼꦠꦸꦤꦺꦱꦏꦏꦺꦴꦤꦺꦴꦧꦚ꧀ꦗꦸꦂꦩ꧀ꦧꦼꦂꦏꦃꦲꦶꦲꦸꦩꦠ꧀꧉​ꦕꦲꦾꦏꦩꦸꦭꦾꦤꦺꦄꦭ꧀ꦭꦃꦔꦼꦠꦶꦔꦭ꧀ꦩ꧀ꦧ꧀ꦭꦼꦉꦁꦔꦶꦥꦫꦲꦸꦩꦠ꧀ꦱꦶꦁꦥꦝꦲꦤꦲꦶꦁꦏꦺꦴꦤꦺꦴ꧉​

^9:24 ꦢꦸꦩꦢꦏ꧀ꦏꦤ꧀ꦄꦭ꧀ꦭꦃꦤꦼꦏꦏ꧀ꦏꦏꦺꦒꦼꦤꦶꦱꦏꦲꦶꦁꦭꦔꦶꦠ꧀ꦭꦤ꧀ꦔꦺꦴꦧꦺꦴꦁꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦭꦤ꧀ꦱꦏꦺꦃꦲꦺꦏꦁꦲꦤꦲꦶꦁꦩꦼꦱ꧀ꦧꦺꦃ꧉​ꦮꦼꦫꦸꦃꦊꦭꦏꦺꦴꦤ꧀ꦩꦼꦁꦏꦺꦴꦤꦺꦴꦩꦲꦸꦮꦺꦴꦁꦏꦧꦺꦃꦥꦝꦒꦶꦪꦏ꧀ꦒꦶꦪꦏ꧀ꦭꦤ꧀ꦧꦚ꧀ꦗꦸꦂꦱꦸꦁꦏꦼꦩ꧀ꦱꦸꦗꦸꦢ꧀ꦩꦫꦁꦄꦭ꧀ꦭꦃ꧉​