Alkitab/Kaimaman/16

Saka Wikisumber
Menyang navigasi Menyang panggolèkan

16:1 ꦱꦥꦠꦶꦤꦺꦲꦤꦏ꧀ꦏꦺꦲꦫꦸꦤ꧀ꦭꦺꦴꦫꦺꦴ꧈​ꦤꦭꦶꦏꦭꦒꦶꦥꦝꦩꦉꦏ꧀ꦲꦶꦁꦔꦂꦱꦤꦺꦄꦭ꧀ꦭꦃ꧈​ꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦩꦸꦱ꧈​
16:2 ꦥꦔꦤ꧀ꦢꦶꦏꦤꦺ꧈​"ꦏꦤ꧀ꦝꦲꦏꦫꦺꦴꦏꦏꦁꦩꦸꦲꦫꦸꦤ꧀꧈​ꦪꦺꦤ꧀ꦩꦸꦁꦲꦺꦴꦭꦺꦃꦩ꧀ꦭꦼꦧꦸꦲꦶꦁꦥꦥꦤ꧀ꦩꦲꦱꦸꦕꦶꦱꦶꦁꦲꦤꦲꦶꦁꦱꦩ꧀ꦧꦸꦫꦶꦤꦺꦒꦼꦧꦼꦂ꧈​ꦩꦸꦁꦲꦶꦁꦮꦼꦏ꧀ꦠꦸꦱꦶꦁꦮꦶꦱ꧀ꦢꦏ꧀ꦠꦼꦠꦼꦥ꧀ꦥꦏꦺ꧈​ꦩꦼꦂꦒꦲꦶꦁꦏꦺꦴꦤꦺꦴꦲꦼꦁꦒꦺꦴꦤ꧀ꦏꦸꦔꦼꦠꦶꦔꦭ꧀ꦲꦶꦁꦩꦺꦒ꧈​ꦲꦶꦁꦤ꧀ꦝꦸꦮꦸꦂꦫꦺꦥꦼꦛꦶꦥꦽꦗꦚ꧀ꦗꦶꦪꦤ꧀꧉​ꦪꦺꦤ꧀ꦤꦼꦫꦏ꧀ꦝꦮꦸꦃꦏꦸꦮꦶ꧈​ꦲꦫꦸꦤ꧀ꦧꦏꦭ꧀ꦩꦠꦶ꧉​
16:3 ꦱꦩꦱꦩ꧀ꦭꦼꦧꦸꦏꦸꦢꦸꦔ꧀ꦒꦮꦥꦼꦝꦺꦠ꧀ꦭꦤꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧉"​
16:4 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦩꦫꦶꦁꦔꦏꦺꦥꦽꦤꦠꦤ꧀ꦥꦽꦤꦠꦤ꧀ꦩꦼꦁꦏꦺꦤꦺ꧈​"ꦱꦢꦸꦫꦸꦁꦔꦺꦩ꧀ꦭꦼꦧꦸꦲꦶꦁꦥꦥꦤ꧀ꦩꦲꦱꦸꦕꦶ꧈​ꦲꦫꦸꦤ꧀ꦏꦸꦢꦸꦔꦁꦒꦺꦴꦱꦤ꧀ꦝꦁꦔꦤ꧀ꦲꦶꦩꦩ꧀꧈​ꦪꦏꦸꦮꦶꦏ꧀ꦭꦩ꧀ꦧꦶꦭꦤ꧀ꦕ꧀ꦭꦤꦕꦼꦤ꧀ꦝꦏ꧀ꦱꦏꦭꦺꦤ꧈​ꦱꦧꦸꦏ꧀ꦭꦤ꧀ꦱꦼꦂꦧꦤ꧀꧉"​
16:5 ꦲꦸꦩꦠ꧀​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦏꦸꦢꦸꦩꦱꦿꦃꦲꦏꦺꦮꦼꦝꦸꦱ꧀ꦭꦤꦁꦭꦺꦴꦫꦺꦴꦩꦫꦁꦲꦫꦸꦤ꧀꧈​ꦱꦶꦗꦶꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦭꦤ꧀ꦱꦶꦗꦶꦤꦺꦏꦁꦒꦺꦴꦏꦸꦂꦧꦤ꧀ꦧꦏꦂꦫꦤ꧀꧉​
16:6 ꦭꦤ꧀ꦲꦫꦸꦤ꧀ꦏꦸꦢꦸꦚꦲꦺꦴꦱ꧀ꦱꦏꦺꦱꦥꦶꦭꦤꦁꦱꦶꦗꦶꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦤꦺꦝꦺꦮꦺꦭꦤ꧀ꦢꦺꦴꦱꦤꦶꦁꦧꦿꦪꦠ꧀ꦠꦺ꧉​
16:7 ꦮꦼꦝꦸꦱ꧀ꦭꦤꦁꦭꦺꦴꦫꦺꦴꦱꦶꦁꦏꦁꦒꦺꦴꦲꦸꦩꦠ꧀​꧊ꦆꦱꦿꦲꦺꦭ꧀ꦩꦲꦸꦏꦸꦢꦸꦢꦶꦒꦮꦢꦺꦤꦶꦁꦲꦫꦸꦤ꧀ꦩꦼꦚꦁꦭꦮꦁꦔꦺꦏꦺꦩꦃꦱꦸꦕꦶ꧉​
16:8 ꦲꦤꦲꦶꦁꦏꦺꦴꦤꦺꦴꦮꦼꦝꦸꦱ꧀ꦭꦺꦴꦫꦺꦴꦩꦲꦸꦢꦶꦲꦸꦤ꧀ꦝꦶ꧈​ꦱꦶꦁꦱꦶꦗꦶꦢꦶꦠꦼꦔꦼꦂꦫꦶ"ꦏꦒꦼꦩ꧀ꦒꦸꦱ꧀ꦠꦶ꧈"​ꦱꦶꦁꦱꦶꦗꦶꦤꦺ"ꦏꦁꦒꦺꦴ​꧊ꦄꦗ꦳ꦗ꦳ꦺꦭ꧀"꧉​
16:9 ꦮꦼꦝꦸꦱ꧀ꦱꦶꦁꦏꦒꦼꦩ꧀ꦒꦸꦱ꧀ꦠꦶꦏꦸꦢꦸꦢꦶꦲꦼꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧉​
16:10 ꦢꦺꦤꦺꦱꦶꦁꦏꦁꦒꦺꦴ​꧊ꦄꦗ꦳ꦗ꦳ꦺꦭ꧀ꦏꦸꦢꦸꦢꦶꦱꦲꦺꦴꦱ꧀ꦱꦏꦺꦲꦶꦁꦔꦂꦱꦤꦺꦄꦭ꧀ꦭꦃꦲꦸꦫꦶꦥ꧀ꦲꦸꦫꦶꦥ꧀ꦥꦤ꧀꧈​ꦧꦚ꧀ꦗꦸꦂꦢꦶꦕꦸꦭ꧀ꦭꦏꦺꦲꦶꦁꦲꦫꦲꦫꦱꦩꦸꦤ꧀꧈​ꦏꦁꦒꦺꦴ​꧊ꦄꦗ꦳ꦗ꦳ꦺꦭ꧀꧈​ꦱꦸꦥꦪꦢꦺꦴꦱꦤꦺꦲꦸꦩꦠ꧀​꧊ꦆꦱꦿꦲꦺꦭ꧀ꦢꦶꦲꦥꦸꦫꦢꦺꦤꦶꦁꦄꦭ꧀ꦭꦃ꧉​
16:11 ꦱꦗꦿꦺꦴꦤꦺꦚꦲꦺꦴꦱ꧀ꦱꦏꦺꦱꦥꦶꦭꦤꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦤꦺꦲꦮꦏ꧀ꦏꦺꦝꦺꦮꦺꦭꦤ꧀ꦧꦿꦪꦠ꧀ꦠꦺ꧈​
16:12 ꦲꦫꦸꦤ꧀ꦏꦸꦢꦸꦚ꧀ꦗꦸꦥꦸꦏ꧀ꦥꦢꦸꦥꦤ꧀ꦱꦶꦁꦢꦶꦏꦼꦧꦏ꧀ꦏꦶꦩꦮꦱꦏꦩꦼꦱ꧀ꦧꦺꦃ꧈​ꦱꦂꦠꦩꦼꦚꦤ꧀ꦲꦭꦸꦱ꧀ꦫꦺꦴꦁꦒꦼꦒꦼꦩ꧀꧈​ꦢꦶꦒꦮꦩꦼꦚꦁꦥꦥꦤ꧀ꦩꦲꦱꦸꦕꦶ꧉​
16:13 ꦲꦤꦲꦶꦁꦔꦂꦱꦤꦺꦄꦭ꧀ꦭꦃꦏꦺꦴꦤꦺꦴꦲꦫꦸꦤ꧀ꦏꦸꦢꦸꦔꦸꦮꦸꦂꦫꦏꦺꦩꦼꦚꦤ꧀ꦩꦲꦸꦲꦶꦁꦥꦼꦢꦸꦥ꧀ꦥꦤ꧀꧉​ꦏꦼꦭꦸꦏ꧀ꦏꦺꦩꦼꦚꦤ꧀ꦩꦲꦸꦧꦏꦭ꧀ꦩꦸꦊꦏ꧀ꦔꦼꦧꦼꦏ꧀ꦏꦶꦠꦸꦠꦸꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀꧈​ꦱꦸꦥꦪꦲꦫꦸꦤ꧀ꦲꦺꦴꦫꦮꦼꦫꦸꦃꦥꦼꦛꦶꦩꦲꦸ꧈​ꦱꦼꦧꦧ꧀ꦪꦺꦤ꧀ꦮꦼꦫꦸꦃꦩꦼꦱ꧀ꦛꦶꦧꦏꦭ꧀ꦩꦠꦶ꧉​
16:14 ꦲꦫꦸꦤ꧀ꦧꦚ꧀ꦗꦸꦂꦏꦸꦢꦸꦚ꧀ꦗꦸꦥꦸꦏ꧀ꦒꦼꦠꦶꦃꦲꦺꦱꦥꦶꦩꦲꦸꦱꦼꦛꦶꦛꦶꦏ꧀꧈​ꦢꦶꦏꦼꦥꦾꦸꦂꦏꦼꦥꦾꦸꦂꦫꦏꦺꦔꦁꦒꦺꦴꦢꦿꦶꦗꦶꦤꦺꦲꦶꦁꦠꦸꦠꦸꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀ꦱꦶꦁꦱꦶꦱꦶꦃꦔꦉꦥ꧀꧉​ꦔꦉꦥ꧀ꦥꦺꦥꦼꦛꦶꦲꦸꦒꦢꦶꦏꦼꦥꦾꦸꦂꦫꦶꦫꦩ꧀ꦧꦃꦥꦶꦁꦥꦶꦠꦸ꧉​
16:15 ꦱꦮꦶꦱ꧀ꦱꦺꦏꦸꦮꦶꦲꦫꦸꦤ꧀ꦏꦸꦢꦸꦚꦼꦩ꧀ꦧꦼꦭꦺꦃꦮꦼꦝꦸꦱ꧀ꦱꦶꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧉​ꦒꦼꦠꦶꦃꦲꦺꦮꦼꦝꦸꦱ꧀ꦩꦲꦸꦧꦚ꧀ꦗꦸꦂꦏꦸꦢꦸꦢꦶꦒꦮꦩꦼꦚꦁꦥꦥꦤ꧀ꦩꦲꦱꦸꦕꦶ꧈​ꦢꦶꦏꦼꦥꦾꦸꦂꦏꦼꦥꦾꦸꦂꦫꦏꦺꦲꦶꦁꦠꦸꦠꦸꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀ꦭꦤ꧀ꦲꦶꦁꦔꦉꦥ꧀ꦥꦺ꧈​ꦏꦪꦥꦠꦿꦥ꧀ꦥꦺꦔꦼꦥꦾꦸꦂꦔꦼꦥꦾꦸꦂꦫꦏꦺꦒꦼꦠꦶꦃꦲꦺꦱꦥꦶꦭꦤꦁꦩꦲꦸ꧉​
16:16 ꦏꦪꦩꦼꦁꦏꦺꦴꦤꦺꦴꦥꦠꦿꦥ꧀ꦥꦺꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦏꦁꦒꦺꦴꦤꦸꦕꦺꦏ꧀ꦏꦏꦺꦥꦥꦤ꧀ꦩꦲꦱꦸꦕꦶꦱꦏꦤꦗꦶꦱ꧀ꦱꦺꦭꦤ꧀ꦱꦏꦱꦏꦺꦃꦲꦺꦢꦺꦴꦱꦤꦺꦲꦸꦩꦠ꧀​꧊ꦆꦱꦿꦲꦺꦭ꧀꧉​ꦏꦺꦩꦃꦱꦸꦕꦶꦏꦸꦮꦶꦏꦸꦢꦸꦢꦶꦱꦸꦕꦺꦏ꧀ꦏꦏꦺ꧈​ꦩꦼꦂꦒꦢꦸꦩꦸꦤꦸꦁꦲꦤꦲꦶꦁꦠꦼꦔꦃꦠꦼꦔꦃꦲꦺꦏꦺꦩꦃ꧈​ꦩꦁꦏꦏꦺꦩꦃꦩꦲꦸꦤꦗꦶꦱ꧀꧉​
16:17 ꦮꦶꦮꦶꦠ꧀ꦩ꧀ꦭꦼꦧꦸꦲꦶꦁꦥꦥꦤ꧀ꦩꦲꦱꦸꦕꦶꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦱꦼꦱꦸꦕꦶꦔꦤ꧀ꦠꦶꦱꦩꦼꦠꦸꦤꦺꦲꦫꦸꦤ꧀ꦱꦏꦲꦶꦁꦏꦺꦴꦤꦺꦴ꧈​ꦮꦺꦴꦁꦱꦶꦗꦶꦮꦲꦺꦲꦺꦴꦫꦏꦼꦤꦩ꧀ꦭꦼꦧꦸꦲꦶꦁꦏꦺꦩꦃꦱꦸꦕꦶ꧉​ꦱꦮꦶꦱ꧀ꦱꦺꦫꦩ꧀ꦥꦸꦁꦲꦼꦁꦒꦺꦴꦤꦺꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦏꦁꦒꦺꦴꦲꦮꦏ꧀ꦏꦺꦝꦺꦮꦺ꧈​ꦧꦚ꧀ꦗꦸꦂꦏꦁꦒꦺꦴꦧꦿꦪꦠ꧀ꦠꦺꦭꦤ꧀ꦏꦁꦒꦺꦴꦲꦸꦩꦠ꧀ꦏꦧꦺꦃ꧉​
16:18 ꦩꦼꦠꦸꦱꦏꦏꦺꦴꦤꦺꦴꦲꦫꦸꦤ꧀ꦏꦸꦢꦸꦩꦼꦚꦁꦩꦼꦱ꧀ꦧꦺꦃꦱꦶꦁꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧈​ꦤꦸꦕꦺꦏ꧀ꦏꦏꦺꦩꦼꦱ꧀ꦧꦺꦃꦩꦲꦸ꧉​ꦲꦫꦸꦤ꧀ꦏꦸꦢꦸꦚ꧀ꦗꦸꦥꦸꦏ꧀ꦒꦼꦠꦶꦃꦲꦺꦱꦥꦶꦭꦤ꧀ꦒꦼꦠꦶꦃꦲꦺꦮꦼꦝꦸꦱ꧀ꦱꦼꦛꦶꦛꦶꦏ꧀꧈​ꦢꦶꦱꦶꦫꦩ꧀ꦩꦏꦺꦲꦶꦁꦱꦸꦔꦸꦱꦸꦔꦸꦱꦶꦁꦲꦤꦲꦶꦁꦥꦺꦴꦗꦺꦴꦏ꧀ꦏꦺꦩꦼꦱ꧀ꦧꦺꦃ꧉​
16:19 ꦒꦼꦠꦶꦃꦩꦲꦸꦢꦶꦏꦼꦥꦾꦸꦂꦏꦼꦥꦾꦸꦂꦫꦏꦺꦔꦁꦒꦺꦴꦢꦿꦶꦗꦶꦤꦺꦫꦩ꧀ꦧꦃꦥꦶꦁꦥꦶꦠꦸꦲꦶꦁꦤ꧀ꦝꦸꦮꦸꦂꦩꦼꦱ꧀ꦧꦺꦃ꧉​ꦩꦼꦁꦏꦺꦴꦤꦺꦴꦥꦠꦿꦥ꧀ꦥꦺꦤꦸꦕꦺꦏ꧀ꦏꦏꦺꦩꦼꦱ꧀ꦧꦺꦃꦱꦏꦢꦺꦴꦱꦢꦺꦴꦱꦤꦺꦲꦸꦩꦠ꧀​꧊ꦆꦱꦿꦲꦺꦭ꧀꧈​ꦱꦸꦥꦪꦩꦼꦱ꧀ꦧꦺꦃꦏꦸꦮꦶꦢꦢꦶꦱꦸꦕꦶ꧉​
16:20 "ꦱꦮꦶꦱ꧀ꦱꦺꦫꦩ꧀ꦥꦸꦁꦲꦼꦁꦒꦺꦴꦤꦺꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦏꦁꦒꦺꦴꦤꦸꦕꦺꦏ꧀ꦏꦏꦺꦥꦥꦤ꧀ꦩꦲꦱꦸꦕꦶꦭꦤ꧀ꦥꦺꦫꦔꦤ꧀ꦥꦺꦫꦔꦤ꧀ꦤꦺꦏꦺꦩꦃꦱꦸꦕꦶꦱꦂꦠꦩꦼꦱ꧀ꦧꦺꦃ꧈​ꦲꦫꦸꦤ꧀ꦧꦚ꧀ꦗꦸꦂꦏꦸꦢꦸꦚꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃꦮꦼꦝꦸꦱ꧀ꦲꦸꦫꦶꦥ꧀ꦱꦶꦁꦏꦁꦒꦺꦴ​꧊ꦄꦗ꦳ꦗ꦳ꦺꦭ꧀꧉​
16:21 ꦲꦫꦸꦤ꧀ꦏꦸꦢꦸꦤꦸꦩ꧀ꦥꦁꦔꦏꦺꦠꦔꦤ꧀ꦤꦺꦭꦺꦴꦫꦺꦴꦭꦺꦴꦫꦺꦴꦤꦺꦲꦶꦁꦲꦼꦤ꧀ꦝꦱ꧀ꦱꦺꦮꦼꦝꦸꦱ꧀ꦩꦲꦸ꧈​ꦏꦫꦺꦴꦔꦏꦺꦴꦤ꧀ꦤꦶꦱꦏꦺꦃꦲꦺꦏꦼꦭꦸꦥꦸꦠ꧀ꦠꦤ꧀꧈​ꦢꦺꦴꦱꦭꦤ꧀ꦥꦤꦼꦫꦏ꧀ꦏꦺꦲꦸꦩꦠ꧀​꧊ꦆꦱꦿꦲꦺꦭ꧀꧉​ꦱꦿꦤꦩꦼꦁꦏꦺꦴꦤꦺꦴꦢꦸꦫꦏꦤꦺꦲꦸꦩꦠ꧀​꧊ꦆꦱꦿꦲꦺꦭ꧀ꦏꦧꦺꦃꦢꦶꦲꦼꦩꦺꦴꦠ꧀ꦠꦏꦺꦲꦶꦁꦲꦼꦤ꧀ꦝꦱ꧀ꦱꦺꦮꦼꦝꦸꦱ꧀ꦩꦲꦸ꧉​ꦮꦼꦝꦸꦱ꧀ꦱꦺꦧꦚ꧀ꦗꦸꦂꦏꦸꦢꦸꦢꦶꦲꦼꦕꦸꦭ꧀ꦭꦏꦺꦲꦶꦁꦲꦫꦲꦫꦱꦩꦸꦤ꧀ꦢꦺꦤꦶꦁꦮꦺꦴꦁꦱꦶꦁꦠꦶꦤꦁꦒꦼꦤꦃꦤꦶꦤ꧀ꦢꦏ꧀ꦏꦏꦺ꧉​
16:22 ꦮꦼꦝꦸꦱ꧀ꦏꦸꦮꦶꦚꦁꦒꦱꦏꦺꦃꦲꦺꦢꦺꦴꦱꦤꦺꦲꦸꦩꦠ꧀​꧊ꦆꦱꦿꦲꦺꦭ꧀꧈​ꦢꦶꦒꦮꦩꦼꦚꦁꦥꦁꦒꦺꦴꦤ꧀ꦤꦤ꧀ꦱꦶꦁꦕꦼꦁꦏꦂꦭꦤ꧀ꦱꦸꦮꦸꦁ꧉​
16:23 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦲꦫꦸꦤ꧀ꦏꦸꦢꦸꦩ꧀ꦭꦼꦧꦸꦲꦶꦁꦏꦺꦩꦃꦱꦸꦕꦶꦚꦺꦴꦥꦺꦴꦠ꧀ꦱꦤ꧀ꦝꦁꦔꦤ꧀ꦤꦺꦲꦶꦩꦩ꧀ꦱꦶꦁꦢꦶꦲꦼꦁꦒꦺꦴ꧈​ꦧꦚ꧀ꦗꦸꦂꦢꦶꦠꦶꦁꦒꦭ꧀ꦲꦶꦁꦏꦺꦴꦤꦺꦴ꧉​
16:24 ꦝꦺꦮꦺꦏ꧀ꦏꦺꦤꦸꦭꦶꦏꦸꦢꦸꦲꦢꦸꦱ꧀ꦲꦶꦁꦥꦁꦒꦺꦴꦤ꧀ꦤꦤ꧀ꦱꦶꦁꦱꦸꦕꦶꦭꦤ꧀ꦔꦁꦒꦺꦴꦱꦤ꧀ꦝꦁꦔꦤ꧀ꦤꦺꦝꦺꦮꦺ꧉​ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦧꦚ꧀ꦗꦸꦂꦏꦸꦢꦸꦩꦼꦠꦸꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦏꦁꦒꦺꦴꦔꦿꦸꦮꦠ꧀ꦢꦺꦴꦱꦤꦺꦝꦺꦮꦺꦭꦤ꧀ꦢꦺꦴꦱꦤꦺꦲꦸꦩꦠ꧀​꧊ꦆꦱꦿꦲꦺꦭ꧀꧉​
16:25 ꦒꦗꦶꦃꦲꦺꦏꦺꦮꦤ꧀ꦱꦶꦁꦢꦶꦲꦼꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱꦧꦚ꧀ꦗꦸꦂꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧉​
16:26 ꦮꦺꦴꦁꦱꦶꦁꦔꦼꦕꦸꦭ꧀ꦭꦏꦺꦮꦼꦝꦸꦱ꧀ꦱꦶꦁꦏꦁꦒꦺꦴ​꧊ꦄꦗ꦳ꦗ꦳ꦺꦭ꧀ꦲꦶꦁꦲꦫꦲꦫꦱꦩꦸꦤ꧀꧈​ꦱꦢꦸꦫꦸꦁꦔꦺꦩ꧀ꦭꦼꦧꦸꦏꦺꦩꦃꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦲꦢꦸꦱ꧀ꦝꦶꦱꦶꦏ꧀꧉​
16:27 ꦱꦥꦶꦭꦤꦁꦭꦤ꧀ꦮꦼꦝꦸꦱ꧀ꦱꦶꦁꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦱꦶꦁꦒꦼꦠꦶꦃꦲꦺꦢꦶꦒꦮꦩ꧀ꦭꦼꦧꦸꦲꦶꦁꦥꦥꦤ꧀ꦩꦲꦱꦸꦕꦶꦏꦁꦒꦺꦴꦔꦿꦸꦮꦠ꧀ꦢꦺꦴꦱ꧈​ꦏꦸꦢꦸꦢꦶꦒꦮꦩꦼꦠꦸꦱꦏꦏꦺꦩꦃꦭꦤ꧀ꦢꦶꦲꦺꦴꦧꦺꦴꦁ꧉​ꦏꦸꦭꦶꦠ꧀꧈​ꦢꦒꦶꦁꦭꦤ꧀ꦗꦼꦫꦺꦴꦮꦤ꧀ꦤꦺꦏꦸꦢꦸꦢꦶꦲꦺꦴꦧꦺꦴꦁꦏꦧꦺꦃ꧉​
16:28 ꦮꦺꦴꦁꦱꦶꦁꦔꦺꦴꦧꦺꦴꦁꦩꦲꦸꦱꦢꦸꦫꦸꦁꦔꦺꦩ꧀ꦭꦼꦧꦸꦏꦺꦩꦃꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦲꦢꦸꦱ꧀꧉"​
16:29 (16:29-31)"ꦥꦽꦤꦠꦤ꧀ꦥꦽꦤꦠꦤ꧀ꦲꦶꦁꦔꦶꦱꦺꦴꦂꦲꦶꦏꦶꦏꦸꦢꦸꦢꦶꦠꦼꦠꦼꦥ꧀ꦥꦶꦱꦼꦭꦮꦱ꧀ꦭꦮꦱ꧀ꦱꦺ꧉​ꦱꦧꦼꦤ꧀ꦠꦁꦒꦭ꧀ꦱꦼꦥꦸꦭꦸꦃꦱꦱꦶꦏꦥꦶꦠꦸ꧈​ꦮꦺꦴꦁ​꧊ꦆꦱꦿꦲꦺꦭ꧀ꦭꦤ꧀ꦮꦺꦴꦁꦩꦚ꧀ꦕꦱꦶꦁꦩꦁꦒꦺꦴꦤ꧀ꦲꦶꦁꦱꦠꦼꦔꦃꦲꦺꦲꦸꦩꦠ꧀ꦩꦲꦸꦏꦸꦢꦸꦥꦱꦭꦤ꧀ꦲꦺꦴꦫꦏꦼꦤꦚꦩ꧀ꦧꦸꦠ꧀ꦒꦮꦺ꧈​ꦩꦼꦂꦒꦢꦶꦤꦏꦸꦮꦶꦢꦶꦤꦱꦸꦕꦶ꧉​ꦲꦶꦁꦢꦶꦤꦩꦲꦸꦏꦸꦢꦸꦢꦶꦲꦤꦏ꧀ꦏꦏꦺꦲꦸꦥꦕꦫꦏꦁꦒꦺꦴꦤꦸꦕꦺꦏ꧀ꦏꦏꦺꦧꦁꦱ​꧊ꦆꦱꦿꦲꦺꦭ꧀ꦱꦏꦢꦺꦴꦱꦤꦺ꧈​ꦱꦸꦥꦪꦢꦢꦶꦉꦱꦶꦏ꧀ꦩꦤꦸꦠ꧀ꦥꦽꦤꦠꦤꦶꦁꦲꦒꦩ꧉​
16:30 (16:29)
16:31 (16:29)
16:32 ꦲꦶꦩꦩ꧀ꦲꦒꦸꦁꦱꦶꦁꦮꦶꦱ꧀ꦢꦶꦠꦼꦠꦼꦥ꧀ꦥꦏꦺꦭꦤ꧀ꦏꦼꦗꦶꦧꦃꦔ꧀ꦒꦤ꧀ꦠꦶꦧꦥꦏ꧀ꦤꦺ꧈​ꦏꦸꦢꦸꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦥꦱꦸꦕꦺꦤ꧀ꦩꦲꦸ꧉​ꦲꦶꦩꦩ꧀ꦲꦒꦸꦁꦩꦲꦸꦏꦸꦢꦸꦔꦁꦒꦺꦴꦱꦤ꧀ꦝꦁꦔꦤ꧀ꦲꦶꦩꦩ꧀꧈​
16:33 ꦧꦚ꧀ꦗꦸꦂꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦤꦸꦕꦺꦏ꧀ꦏꦏꦺꦥꦥꦤ꧀ꦩꦲꦱꦸꦕꦶ꧈​ꦥꦺꦫꦔꦤ꧀ꦥꦺꦫꦔꦤ꧀ꦤꦺꦏꦺꦩꦃꦱꦸꦕꦶ꧈​ꦩꦼꦱ꧀ꦧꦺꦃ꧈​ꦥꦫꦲꦶꦩꦩ꧀ꦭꦤ꧀ꦲꦸꦩꦠ꧀​꧊ꦆꦱꦿꦲꦺꦭ꧀ꦏꦧꦺꦃ꧉​
16:34 ꦲꦸꦥꦕꦫꦩꦼꦁꦏꦺꦴꦤꦺꦴꦩꦲꦸꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦱꦼꦠꦲꦸꦤ꧀ꦱꦼꦥꦶꦱ꧀ꦱꦤ꧀ꦏꦁꦒꦺꦴꦤꦸꦕꦺꦏ꧀ꦏꦏꦺꦧꦁꦱ​꧊ꦆꦱꦿꦲꦺꦭ꧀ꦱꦏꦱꦏꦺꦃꦲꦶꦁꦢꦺꦴꦱꦤꦺ꧉​ꦩꦼꦁꦏꦺꦴꦤꦺꦴꦥꦽꦤꦠꦤ꧀ꦥꦽꦤꦠꦤ꧀ꦱꦶꦁꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦱꦼꦭꦮꦱ꧀ꦭꦮꦱ꧀ꦱꦺ꧉"​​꧊ꦩꦸꦱꦲꦶꦪꦧꦚ꧀ꦗꦸꦂꦤꦶꦤ꧀ꦢꦏ꧀ꦏꦏꦺꦏꦪꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧉​