Alkitab/Kaimaman/1

^1:1 ꦒꦸꦱ꧀ꦠꦶꦄꦭ꧀ꦭꦃꦤꦶꦩ꧀ꦧꦭ꧀ꦭꦶ​꧊ꦩꦸꦱꦱꦂꦠꦢꦶꦥꦔꦤ꧀ꦢꦶꦏꦤꦶꦱꦏꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧈​ꦧꦚ꧀ꦗꦸꦂꦢꦶꦥꦫꦶꦁꦔꦶꦥꦽꦤꦠꦤ꧀ꦥꦽꦤꦠꦤ꧀

^1:2 ꦱꦶꦁꦏꦸꦢꦸꦢꦶꦠꦼꦠꦼꦥ꧀ꦥꦶꦢꦺꦤꦶꦁꦮꦺꦴꦁ​꧊ꦆꦱꦿꦲꦺꦭ꧀ꦱꦩꦱꦱꦲꦺꦴꦱ꧀ꦏꦸꦂꦧꦤ꧀꧉​ꦪꦺꦤ꧀ꦲꦤꦮꦺꦴꦁꦲꦉꦥ꧀ꦱꦲꦺꦴꦱ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦫꦸꦥꦏꦺꦮꦤ꧀꧈​ꦧꦶꦱꦫꦸꦥꦫꦗꦏꦪ:ꦱꦥꦶ꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦲꦸꦠꦮꦮꦼꦝꦸꦱ꧀ꦗꦮ꧉​

^1:3 ꦪꦺꦤ꧀ꦱꦥꦶ꧈​ꦏꦸꦢꦸꦱꦥꦶꦭꦤꦁ꧈​ꦱꦶꦁꦠꦤ꧀ꦥꦕꦕꦢ꧀꧉​ꦱꦥꦶꦩꦲꦸꦏꦸꦢꦸꦢꦶꦱꦲꦺꦴꦱ꧀ꦱꦏꦺꦲꦤꦲꦶꦁꦔꦉꦥ꧀ꦭꦮꦁꦔꦺꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧈​ꦱꦸꦥꦪꦏꦼꦠꦿꦶꦩꦲꦲꦶꦁꦔꦂꦱꦤꦺꦄꦭ꧀ꦭꦃ꧉​

^1:4 ꦮꦺꦴꦁꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦏꦸꦢꦸꦤꦸꦩ꧀ꦥꦁꦔꦏꦺꦠꦔꦤ꧀ꦤꦺꦲꦶꦁꦲꦼꦤ꧀ꦝꦱ꧀ꦱꦺꦱꦥꦶꦩꦲꦸ꧈​ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦧꦏꦭ꧀ꦤꦩ꧀ꦥꦶꦱꦲꦺꦴꦱ꧀ꦱꦤ꧀ꦏꦸꦮꦶꦭꦤ꧀ꦔꦥꦸꦫꦢꦺꦴꦱꦢꦺꦴꦱꦤꦺ꧉​

^1:5 ꦱꦥꦶꦩꦲꦸꦏꦸꦢꦸꦢꦶꦱꦼꦩ꧀ꦧꦼꦭꦺꦃꦲꦶꦁꦔꦉꦥ꧀ꦭꦮꦁꦏꦺꦩꦃꦱꦸꦕꦶ꧉​ꦒꦼꦠꦶꦃꦲꦺꦏꦸꦢꦸꦢꦶꦱꦲꦺꦴꦱ꧀ꦱꦏꦺꦢꦺꦤꦶꦁꦲꦶꦩꦩ꧀ꦲꦤꦏ꧀ꦠꦸꦫꦸꦤꦺꦲꦫꦸꦤ꧀ꦩꦫꦁꦄꦭ꧀ꦭꦃ꧈​ꦧꦚ꧀ꦗꦸꦂꦢꦶꦱꦶꦫꦩ꧀ꦩꦏꦺꦏꦼꦩ꧀ꦥꦸꦠ꧀ꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃ꧈​ꦱꦶꦁꦲꦤꦲꦶꦁꦔꦉꦥ꧀ꦭꦮꦁꦔꦺꦏꦺꦩꦃꦱꦸꦕꦶꦩꦲꦸ꧉​

^1:6 ꦮꦺꦴꦁꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦩꦲꦸꦧꦚ꧀ꦗꦸꦂꦏꦸꦢꦸꦔꦼꦭꦺꦠ꧀ꦠꦶꦭꦸꦭꦁꦔꦺꦭꦤ꧀ꦩꦿꦒꦠ꧀ꦱꦥꦶꦩꦲꦸ꧉​

^1:7 ꦲꦶꦩꦩ꧀ꦏꦸꦢꦸꦤꦠꦲꦏꦪꦸꦲꦺꦴꦧꦺꦴꦁꦲꦤꦲꦶꦁꦩꦼꦱ꧀ꦧꦺꦃ꧈​ꦧꦚ꧀ꦗꦸꦂꦢꦶꦱꦸꦩꦼꦢ꧀꧉​

^1:8 ꦠꦼꦁꦏꦼꦭ꧀ꦠꦼꦁꦏꦼꦭ꧀ꦭꦤ꧀ꦱꦥꦶꦩꦲꦸꦤꦸꦭꦶꦏꦠꦸꦩ꧀ꦥꦁꦤꦲꦤꦲꦶꦁꦤ꧀ꦝꦸꦮꦸꦂꦏꦪꦸ꧈​ꦱꦼꦩꦺꦴꦤꦺꦴꦲꦸꦒꦲꦼꦤ꧀ꦝꦱ꧀ꦭꦤ꧀ꦒꦗꦶꦃꦲꦺ꧉​

^1:9 ꦮꦺꦴꦁꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦩꦲꦸꦏꦸꦢꦸꦔꦽꦱꦶꦏ꧀ꦏꦶꦗꦼꦫꦺꦴꦮꦤ꧀ꦭꦤ꧀ꦱꦩ꧀ꦥꦶꦭ꧀ꦭꦺꦱꦶꦁꦩ꧀ꦧꦸꦫꦶ꧈​ꦏꦧꦺꦃꦩꦲꦸꦧꦚ꧀ꦗꦸꦂꦢꦶꦲꦺꦴꦧꦺꦴꦁꦔꦢꦺꦤꦶꦁꦲꦶꦩꦩ꧀ꦲꦶꦁꦩꦼꦱ꧀ꦧꦺꦃ꧉​ꦒꦤ꧀ꦢꦤꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦏꦸꦮꦶꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^1:10 ꦪꦺꦤ꧀ꦱꦶꦁꦢꦶꦒꦮꦺꦏꦸꦂꦧꦤ꧀ꦫꦸꦥꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦲꦸꦠꦮꦮꦼꦝꦸꦱ꧀ꦗꦮ꧈​ꦏꦺꦮꦤ꧀ꦩꦲꦸꦏꦸꦢꦸꦭꦤꦁꦭꦤ꧀ꦩꦸꦭꦸꦱ꧀꧈​ꦠꦤ꧀ꦥꦕꦕꦢ꧀꧉​

^1:11 ꦮꦺꦴꦁꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦏꦸꦢꦸꦚꦼꦩ꧀ꦧꦼꦭꦺꦃꦮꦼꦝꦸꦱ꧀ꦱꦺꦲꦶꦁꦕꦼꦝꦏ꧀ꦏꦺꦩꦼꦱ꧀ꦧꦺꦃꦱꦶꦱꦶꦃ​꧊ꦭꦺꦴꦂ꧈​ꦭꦤ꧀ꦥꦫꦲꦶꦩꦩ꧀ꦏꦸꦢꦸꦚꦶꦫꦩ꧀ꦩꦏꦺꦒꦼꦠꦶꦃꦲꦺꦏꦺꦮꦤ꧀ꦩꦲꦸꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃꦩꦸꦧꦼꦁ꧉​

^1:12 ꦱꦮꦶꦱ꧀ꦱꦺꦮꦼꦝꦸꦱ꧀ꦩꦲꦸꦢꦶꦠꦼꦁꦏꦼꦭ꧀ꦠꦼꦁꦏꦼꦭ꧀ꦲꦶꦩꦩ꧀ꦧꦚ꧀ꦗꦸꦂꦔ꧀ꦭꦼꦧꦺꦴꦏ꧀ꦏꦏꦺꦠꦼꦁꦏꦼꦭ꧀ꦠꦼꦁꦏꦼꦭ꧀ꦭꦤ꧀ꦩꦲꦸ꧈​ꦏꦫꦺꦴꦲꦼꦤ꧀ꦝꦱ꧀ꦭꦤ꧀ꦒꦗꦶꦃꦲꦺꦲꦤꦲꦶꦁꦒꦼꦤꦶꦤꦶꦁꦩꦼꦱ꧀ꦧꦺꦃ꧉​

^1:13 ꦮꦺꦴꦁꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦩꦲꦸꦏꦸꦢꦸꦔꦽꦱꦶꦏ꧀ꦏꦶꦗꦼꦫꦺꦴꦮꦤ꧀ꦭꦤ꧀ꦱꦩ꧀ꦥꦶꦭ꧀ꦭꦺꦮꦼꦝꦸꦱ꧀ꦱꦶꦁꦩ꧀ꦧꦸꦫꦶ꧈​ꦏꦧꦺꦃꦩꦲꦸꦧꦚ꧀ꦗꦸꦂꦢꦶꦲꦺꦴꦧꦺꦴꦁꦔꦢꦺꦤꦶꦁꦲꦶꦩꦩ꧀ꦲꦤꦲꦶꦁꦩꦼꦱ꧀ꦧꦺꦃꦱꦸꦩꦲꦺꦴꦱ꧀ꦩꦫꦁꦄꦭ꧀ꦭꦃ꧉​ꦒꦤ꧀ꦢꦤꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦩꦲꦸꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^1:14 ꦪꦺꦤ꧀ꦱꦶꦁꦢꦶꦒꦮꦺꦏꦸꦂꦧꦤ꧀ꦫꦸꦥꦩꦤꦸꦏ꧀꧈​ꦏꦸꦢꦸꦥꦶꦪꦶꦏ꧀ꦢꦫꦲꦸꦠꦮꦩꦤꦸꦏ꧀ꦢꦽꦏꦸꦏꦸ꧉​

^1:15 ꦩꦤꦸꦏ꧀ꦏꦺꦩꦲꦸꦏꦸꦢꦸꦢꦶꦒꦮꦢꦺꦤꦶꦁꦲꦶꦩꦩ꧀ꦩꦼꦚꦁꦩꦼꦱ꧀ꦧꦺꦃ꧈​ꦒꦸꦭꦸꦤꦺꦧꦚ꧀ꦗꦸꦂꦢꦶꦥꦸꦤ꧀ꦠꦶꦂꦭꦤ꧀ꦲꦼꦤ꧀ꦝꦱ꧀ꦱꦺꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃꦏꦺꦴꦤꦺꦴ꧉​ꦒꦼꦠꦶꦃꦲꦺꦧꦚ꧀ꦗꦸꦂꦢꦶꦮꦼꦠꦺꦴꦏ꧀ꦏꦏꦺꦱꦿꦤꦢꦶꦥꦶꦗꦺꦠ꧀ꦲꦤꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃꦩꦸꦧꦼꦁ꧉​

^1:16 ​꧊ꦠꦺꦭꦶꦃꦱꦲꦶꦱꦶꦤꦺꦏꦸꦢꦸꦢꦶꦮꦼꦠꦺꦴꦏ꧀ꦏꦏꦺꦭꦤ꧀ꦢꦶꦧꦸꦮꦁꦲꦶꦁꦱꦶꦱꦶꦃꦮꦺꦠꦤꦺꦩꦼꦱ꧀ꦧꦺꦃ꧈​ꦥꦁꦒꦺꦴꦤ꧀ꦤꦤ꧀ꦧꦸꦮꦁꦔꦤ꧀ꦲꦮꦸ꧉​

^1:17 ꦩꦤꦸꦏ꧀ꦩꦲꦸꦏꦸꦢꦸꦢꦶꦕꦼꦏꦼꦭ꧀ꦲꦶꦁꦥꦺꦴꦏ꧀ꦏꦶꦁꦱ꧀ꦮꦶꦮꦶꦤꦺꦭꦤ꧀ꦢꦶꦱꦼꦩ꧀ꦥꦭ꧀꧈​ꦩꦸꦁꦲꦗꦔꦤ꧀ꦠꦶꦥꦶꦱꦃꦱꦏꦲꦮꦏ꧀ꦏꦺ꧈​ꦧꦚ꧀ꦗꦸꦂꦏꦸꦢꦸꦢꦶꦲꦺꦴꦧꦺꦴꦁꦮꦸꦠꦸꦃꦲꦤꦲꦶꦁꦩꦼꦱ꧀ꦧꦺꦃ꧉​ꦒꦤ꧀ꦢꦤꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦩꦲꦸꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​