Alkitab/Wilangan/36

^36:1 ꦥꦫꦥꦼꦔꦉꦥ꧀ꦥꦺꦠꦸꦫꦸꦤ꧀ꦒꦶꦭꦺꦪꦢ꧀꧈​ꦲꦤꦏ꧀ꦏꦺ​꧊ꦩꦏꦶꦂ꧈​ꦪꦏꦸꦮꦶꦥꦸꦠꦸꦤꦺ​꧊ꦩꦤꦱꦾꦺꦲꦤꦏ꧀ꦏꦺ​꧊ꦪꦸꦱꦸꦥ꦳꧀꧈​ꦥꦝꦤꦼꦩꦺꦴꦤ꧀ꦤꦶ​꧊ꦩꦸꦱꦭꦤ꧀ꦥꦫꦥꦼꦁꦒꦼꦝꦺꦭꦶꦪꦤꦺ꧉​

^36:2 ꦠꦼꦩ꧀ꦧꦸꦁꦔꦺ꧈​"ꦒꦸꦱ꧀ꦠꦶꦄꦭ꧀ꦭꦃꦱꦩ꧀ꦥꦸꦤ꧀ꦤ꧀ꦝꦮꦸꦃꦲꦶꦥꦚ꧀ꦗꦼꦤꦼꦁꦔꦤ꧀ꦔꦼꦢꦸꦩ꧀ꦱꦶꦠꦶꦲꦶꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦧꦁꦱ​꧊ꦆꦱꦿꦲꦺꦭ꧀ꦱꦿꦤꦲꦸꦤ꧀ꦝꦶ꧉​ꦒꦸꦱ꧀ꦠꦶꦄꦭ꧀ꦭꦃꦲꦸꦒꦶꦱꦩ꧀ꦥꦸꦤ꧀ꦤ꧀ꦝꦮꦸꦃꦲꦶꦥꦚ꧀ꦗꦼꦤꦼꦁꦔꦤ꧀ꦚꦸꦏꦏ꧀ꦏꦏꦼꦤ꧀ꦱꦶꦠꦶꦮꦫꦶꦱ꧀ꦱꦤ꧀ꦤꦶꦥꦸꦤ꧀ꦱꦼꦝꦺꦫꦺꦏ꧀ꦏꦸꦭ​꧊ꦗ꦳ꦺꦭꦥ꦳ꦺꦲꦢ꧀ꦝꦠꦼꦁꦲꦤꦏ꧀ꦲꦤꦏ꧀ꦏꦶꦥꦸꦤ꧀ꦲꦺꦱ꧀ꦠꦿꦶ꧉​

^36:3 ꦤꦁꦔꦶꦁꦏꦶꦠꦔꦼꦂꦠꦺꦴꦱ꧀ꦩꦼꦤꦮꦶꦭꦫꦺꦭꦫꦺꦩꦼꦤꦶꦏꦱꦩꦶꦲꦺꦩꦃꦲꦺꦩꦃꦏꦭꦶꦪꦤ꧀ꦠꦶꦪꦁꦗꦊꦂꦱꦏꦶꦁꦠꦊꦂꦱꦤꦺꦱ꧀꧈​ꦱꦶꦠꦶꦮꦫꦶꦱ꧀ꦱꦤ꧀ꦤꦶꦥꦸꦤ꧀ꦩꦼꦤꦶꦏꦧꦝꦺꦝꦮꦃꦝꦠꦼꦁꦠ꧀ꦭꦼꦂꦱꦤꦺꦱ꧀ꦮꦲꦸ꧉​ꦱꦿꦤꦩꦼꦏꦠ꧀ꦠꦼꦤ꧀ꦱꦶꦠꦶꦲꦶꦁꦏꦁꦱꦩ꧀ꦥꦸꦤ꧀ꦏꦠꦼꦩ꧀ꦠꦺꦴꦏ꧀ꦏꦏꦼꦤ꧀ꦢꦢꦺꦴꦱ꧀ꦥꦤ꧀ꦢꦸꦩ꧀ꦩꦤ꧀ꦏꦸꦭꦱꦼꦢꦪ꧈​ꦧꦝꦺꦏꦼꦭꦺꦴꦁ꧉​

^36:4 ꦲꦶꦁꦠꦲꦸꦤ꧀​꧊ꦪꦺꦴꦧꦺꦭ꧀꧈​ꦩꦼꦤꦮꦶꦱꦶꦠꦶꦱꦶꦠꦶꦲꦶꦁꦏꦁꦏꦠꦸꦩ꧀ꦧꦱ꧀ꦏꦮꦁꦱꦸꦭ꧀ꦭꦏꦼꦤ꧀ꦝꦠꦼꦁꦲꦶꦁꦏꦁꦒꦝꦃ꧈​ꦱꦶꦠꦶꦤꦶꦥꦸꦤ꧀ꦭꦫꦺꦭꦫꦺꦲꦺꦱ꧀ꦠꦿꦶꦲꦤꦏ꧀ꦏꦶꦥꦸꦤ꧀​꧊ꦗ꦳ꦺꦭꦥ꦳ꦺꦲꦢ꧀ꦩꦼꦤꦶꦏꦧꦝꦺꦠꦼꦠꦼꦥ꧀ꦢꦢꦺꦴꦱ꧀ꦲꦏ꧀ꦏꦶꦥꦸꦤ꧀ꦥꦫꦠꦶꦪꦁꦗꦊꦂꦲꦶꦁꦏꦁꦩꦼꦤ꧀ꦝꦼꦠ꧀ꦭꦫꦺꦭꦫꦺꦲꦺꦱ꧀ꦠꦿꦶꦮꦲꦸ꧈​ꦔꦤ꧀ꦠꦺꦴꦱ꧀ꦠꦊꦂꦏꦸꦭꦭꦗꦼꦁꦏꦺꦕꦭ꧀ꦭꦤ꧀ꦱꦶꦠꦶꦮꦲꦸ꧉"​

^36:5 ꦩꦸꦭꦤꦺ​꧊ꦩꦸꦱꦧꦚ꧀ꦗꦸꦂꦔꦸꦩꦸꦩ꧀ꦩꦏꦺꦩꦫꦁꦧꦁꦱ​꧊ꦆꦱꦿꦲꦺꦭ꧀ꦝꦮꦸꦲꦺꦒꦸꦱ꧀ꦠꦶꦄꦭ꧀ꦭꦃꦩꦲꦸ꧈​ꦩꦼꦁꦏꦺꦤꦺ:"ꦥꦼꦤꦼꦩꦸꦤꦺꦮꦺꦴꦁꦮꦺꦴꦁꦠꦊꦂ​꧊ꦩꦤꦱꦾꦺꦏꦸꦮꦶꦧꦼꦤꦼꦂ꧈​

^36:6 ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏ꧈​‘ꦧꦺꦴꦕꦃꦧꦺꦴꦕꦃꦮꦢꦺꦴꦤ꧀ꦲꦤꦏ꧀ꦏꦺ​꧊ꦗ꦳ꦺꦭꦥ꦳ꦺꦲꦢ꧀ꦏꦸꦮꦶꦧꦺꦧꦱ꧀꧈​ꦏꦼꦤꦲꦺꦴꦩꦃꦲꦺꦴꦩꦃꦏꦫꦺꦴꦱꦥꦮꦲꦺ꧈​ꦱꦶꦁꦢꦶꦱꦼꦤꦼꦁꦔꦶ꧈​ꦲꦁꦒꦼꦂꦏꦫꦺꦴꦮꦺꦴꦁꦭꦤꦁꦠꦊꦂꦫꦺꦝꦺꦮꦺ꧉​

^36:7 ꦊꦩꦃꦥꦸꦱꦏꦥꦤ꧀ꦢꦸꦩ꧀ꦩꦤ꧀ꦤꦺꦮꦺꦴꦁ​꧊ꦆꦱꦿꦲꦺꦭ꧀ꦏꦸꦢꦸꦠꦼꦠꦼꦥ꧀ꦲꦤꦲꦶꦁꦠꦊꦂꦫꦺ꧉​

^36:8 ꦱꦧꦼꦤ꧀ꦮꦺꦴꦁꦮꦢꦺꦴꦤ꧀ꦱꦶꦁꦲꦺꦴꦭꦺꦃꦮꦫꦶꦱ꧀ꦱꦤ꧀ꦊꦩꦃꦲꦶꦁꦠꦊꦂꦫꦺ​꧊ꦆꦱꦿꦲꦺꦭ꧀꧈​ꦏꦸꦢꦸꦲꦺꦴꦩꦃꦲꦺꦴꦩꦃꦏꦫꦺꦴꦮꦺꦴꦁꦭꦤꦁꦱꦏꦠꦊꦂꦫꦺꦝꦺꦮꦺ꧉​ꦱꦿꦤꦩꦼꦁꦏꦺꦴꦤꦺꦴꦱꦧꦼꦤ꧀ꦮꦺꦴꦁ​꧊ꦆꦱꦿꦲꦺꦭ꧀ꦧꦏꦭ꧀ꦩꦫꦶꦱ꧀ꦱꦶꦊꦩꦃꦥꦸꦱꦏꦤꦺꦊꦭꦸꦲꦸꦂꦫꦺ꧈​

^36:9 ꦭꦤ꧀ꦊꦩꦃꦥꦸꦱꦏꦩꦲꦸꦲꦺꦴꦫꦧꦏꦭ꧀ꦔꦭꦶꦃꦢꦢꦶꦢꦸꦮꦺꦏ꧀ꦏꦺꦠꦊꦂꦭꦶꦪ꧉​ꦱꦧꦼꦤ꧀ꦠꦊꦂꦧꦏꦭ꧀ꦠꦼꦠꦼꦥ꧀ꦤ꧀ꦢꦸꦮꦺꦤ꧀ꦤꦶꦊꦩꦃꦥꦸꦱꦏꦤꦺꦝꦺꦮꦺꦝꦺꦮꦺ꧉’"​

^36:10 (36:10-11)ꦩꦼꦂꦒꦱꦏꦝꦮꦸꦃꦲꦺꦄꦭ꧀ꦭꦃꦩꦫꦁ​꧊ꦩꦸꦱꦩꦲꦸ꧈​ꦧꦺꦴꦕꦃꦮꦢꦺꦴꦤ꧀ꦭꦶꦩꦲꦤꦏ꧀ꦏꦺ​꧊ꦗ꦳ꦺꦭꦥ꦳ꦺꦲꦢ꧀꧈​ꦪꦏꦸꦮꦶ:​꧊ꦩꦃꦲ꧀ꦭ꧈​​꧊ꦠꦶꦂꦗ꦳꧈​​꧊ꦲꦺꦴꦒ꧀ꦭ꧈​​꧊ꦩꦶꦭ꧀ꦏꦭꦤ꧀​꧊ꦤꦺꦴꦮꦧꦚ꧀ꦗꦸꦂꦥꦝꦲꦺꦴꦩꦃꦲꦺꦴꦩꦃꦏꦫꦺꦴꦱꦤꦏ꧀ꦱꦼꦢꦸꦭꦸꦂꦫꦺꦝꦺꦮꦺ꧈​

^36:11 (36:10)

^36:12 ꦪꦏꦸꦮꦶꦏꦫꦺꦴꦮꦺꦴꦁꦱꦏꦠꦸꦫꦸꦤ꧀ꦤꦤ꧀ꦤꦺꦠꦊꦂ​꧊ꦩꦤꦱꦾꦺ꧈​ꦲꦤꦏ꧀ꦏꦺ​꧊ꦪꦸꦱꦸꦥ꦳꧀꧉​ꦱꦿꦤꦩꦼꦁꦏꦺꦴꦤꦺꦴꦠꦤꦃꦥꦸꦱꦏꦤꦺꦧꦺꦴꦕꦃꦧꦺꦴꦕꦃꦮꦢꦺꦴꦤ꧀ꦩꦲꦸꦠꦼꦠꦼꦥ꧀ꦢꦢꦶꦢꦸꦱꦺꦏ꧀ꦏꦺꦠꦊꦂ​꧊ꦩꦤꦱꦾꦺ꧉​

^36:13 ꦩꦼꦁꦏꦺꦴꦤꦺꦴꦥꦽꦤꦠꦤ꧀ꦥꦽꦤꦠꦤ꧀ꦭꦤ꧀ꦥꦸꦠꦸꦱꦤ꧀ꦥꦸꦠꦸꦱꦤ꧀ꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦲꦭ꧀ꦭꦃꦩꦫꦁꦧꦁꦱ​꧊ꦆꦱꦿꦲꦺꦭ꧀ꦭꦤ꧀ꦠꦂꦫꦤ꧀​꧊ꦩꦸꦱ꧈​ꦤꦭꦶꦏꦧꦁꦱ​꧊ꦆꦱꦿꦲꦺꦭ꧀ꦲꦶꦱꦶꦃꦥꦝꦲꦤꦲꦶꦁꦠꦤꦃꦔꦫꦺ​꧊ꦩꦺꦴꦮꦧ꧀꧈​ꦱꦕꦼꦝꦏ꧀ꦏꦺꦏꦭꦶ​꧊ꦪꦂꦢꦺꦤ꧀꧈​ꦱꦔꦉꦥ꧀ꦥꦺꦏꦸꦛ​꧊ꦪꦺꦫꦶꦏꦺꦴ꧉​