Alkitab/Wilangan/31

Saka Wikisumber

31:1 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦩꦸꦱ꧈​
31:2 ꦝꦮꦸꦃꦲꦺ꧈​"ꦮꦺꦴꦁ​꧊ꦩꦶꦢꦶꦪꦤ꧀ꦮꦊꦱ꧀ꦱꦼꦤ꧀ꦩꦼꦂꦒꦥꦼꦁꦒꦮꦺꦤꦺꦩꦫꦁꦧꦁꦱ​꧊ꦆꦱꦿꦲꦺꦭ꧀꧉​ꦱꦮꦶꦱ꧀ꦱꦺꦏꦸꦮꦶꦏꦺꦴꦮꦺꦧꦏꦭ꧀ꦠꦶꦁꦒꦭ꧀ꦢꦺꦴꦚ꧉"​
31:3 ​꧊ꦩꦸꦱꦧꦚ꧀ꦗꦸꦂꦏꦤ꧀ꦝꦏꦫꦺꦴꦮꦺꦴꦁ​꧊ꦆꦱꦿꦲꦺꦭ꧀꧈​"ꦥꦝꦱꦶꦪꦒꦲꦲꦶꦁꦥꦼꦫꦁꦔ꧀ꦭꦮꦤ꧀ꦧꦁꦱ​꧊ꦩꦶꦢꦶꦪꦤ꧀꧈​ꦠꦸꦩ꧀ꦥꦼꦱ꧀ꦱꦼꦤ꧀꧈​ꦩꦼꦂꦒꦥꦼꦁꦒꦮꦺꦤꦺꦩꦫꦁꦄꦭ꧀ꦭꦃ꧉​
31:4 ꦏꦁꦒꦺꦴꦏꦼꦥꦽꦭꦸꦮꦤ꧀ꦩꦲꦸ꧈​ꦱꦧꦼꦤ꧀ꦠꦊꦂꦚꦮꦶꦱ꧀ꦤꦥꦽꦗꦸꦫꦶꦠ꧀ꦱꦺꦮꦸ꧉"​
31:5 ꦱꦧꦼꦤ꧀ꦠꦊꦂꦧꦚ꧀ꦗꦸꦂꦩꦶꦭꦶꦃꦮꦺꦴꦁꦱꦺꦮꦸ꧈​ꦢꦢꦶꦏꦧꦺꦃꦲꦤꦮꦺꦴꦁꦫꦺꦴꦭꦱ꧀ꦲꦺꦮꦸꦱꦶꦁꦲꦉꦥ꧀ꦩꦁꦏꦠ꧀ꦥꦼꦫꦁ꧉​
31:6 ​꧊ꦩꦸꦱꦔꦸꦤ꧀ꦠꦥ꧀ꦥꦏꦺꦭꦏꦸꦤꦺꦥꦫꦥꦽꦗꦸꦫꦶꦠ꧀ꦩꦲꦸ꧉​ꦱꦺꦤꦥꦠꦶꦤꦺ​꧊ꦥꦶꦤꦺꦲꦱ꧀꧈​ꦲꦤꦏ꧀ꦏꦺꦲꦶꦩꦩ꧀​꧊ꦌꦭꦺꦪꦗ꦳ꦂ꧉​​꧊ꦥꦶꦤꦺꦲꦱ꧀ꦏꦸꦮꦶꦠꦸꦒꦱ꧀ꦱꦺꦔꦸꦫꦸꦱ꧀ꦱꦶꦧꦫꦁꦧꦫꦁꦱꦸꦕꦶꦭꦤ꧀ꦱ꧀ꦭꦺꦴꦩ꧀ꦥꦿꦺꦠ꧀ꦱ꧀ꦭꦺꦴꦩ꧀ꦥꦿꦺꦠ꧀ꦱꦶꦁꦢꦶꦲꦼꦁꦒꦺꦴꦲꦮꦺꦃꦠꦤ꧀ꦝꦚꦱ꧀ꦩꦶꦠꦤ꧀ꦤꦶꦲꦸꦩꦠ꧀꧉​
31:7 ꦤꦼꦠꦼꦥ꧀ꦥꦶꦝꦮꦸꦃꦲꦺꦄꦭ꧀ꦭꦃꦩꦫꦁ​꧊ꦩꦸꦱ꧈​ꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦚꦼꦫꦁꦮꦺꦴꦁ​꧊ꦩꦶꦢꦶꦪꦤ꧀ꦭꦤ꧀ꦩꦠꦺꦤ꧀ꦤꦶꦮꦺꦴꦁꦔꦺꦭꦤꦁꦏꦧꦺꦃ꧉​
31:8 ꦏ꧀ꦭꦼꦧꦸꦲꦸꦒꦫꦗꦭꦶꦩꦪꦏꦸꦮꦶ:​꧊ꦌꦮꦶ꧈​​꧊ꦫꦺꦏꦺꦩ꧀꧈​​꧊ꦗ꦳ꦸꦂ꧈​​꧊ꦲꦸꦂꦭꦤ꧀​꧊ꦫꦺꦧ꧉​​꧊ꦧꦶꦭꦺꦪꦩ꧀ꦧꦶꦤ꧀​꧊ꦧꦺꦪꦺꦴꦂꦲꦸꦒꦩꦺꦭꦸꦢꦶꦥꦠꦺꦤ꧀ꦤꦶ꧉​
31:9 ꦮꦺꦴꦁꦔꦺꦮꦢꦺꦴꦤ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺꦥꦝꦢꦶꦠꦮꦤ꧀꧉​ꦏꦺꦮꦤ꧀ꦫꦗꦏꦪꦱꦂꦠꦧꦤ꧀ꦝꦤꦺꦏꦧꦺꦃꦢꦶꦫꦩ꧀ꦥꦱ꧀꧉​
31:10 ꦏꦸꦛꦏꦸꦛꦭꦤ꧀ꦥꦼꦢꦺꦱꦤ꧀ꦥꦼꦢꦺꦱꦤ꧀ꦤꦺꦢꦶꦲꦺꦴꦧꦺꦴꦁ꧉​
31:11 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦮꦺꦴꦁ​꧊ꦆꦱꦿꦲꦺꦭ꧀ꦤꦸꦭꦶꦔ꧀ꦒꦮꦧꦫꦁꦧꦫꦁꦫꦩ꧀ꦥꦱ꧀ꦱꦤ꧀ꦱꦂꦠꦥꦫꦠꦮꦤ꧀ꦤꦤ꧀ꦭꦤ꧀ꦏꦺꦮꦤ꧀ꦏꦺꦮꦤ꧀ꦩꦲꦸ꧈​
31:12 ꦩꦼꦚꦁꦔꦉꦥ꧀ꦥꦺ​꧊ꦩꦸꦱ꧈​​꧊ꦌꦭꦺꦪꦗ꦳ꦂꦭꦤ꧀ꦥꦫꦥꦼꦁꦒꦼꦝꦺꦤꦺ​꧊ꦆꦱꦿꦲꦺꦭ꧀꧉​ꦤꦭꦶꦏꦱꦼꦩꦤꦮꦺꦴꦁ​꧊ꦆꦱꦿꦲꦺꦭ꧀ꦭꦒꦶꦥꦝꦩꦁꦒꦺꦴꦤ꧀ꦲꦶꦁꦊꦧꦏ꧀​꧊ꦩꦺꦴꦮꦧ꧀꧈​ꦱꦕꦼꦝꦏ꧀ꦏꦺꦏꦭꦶ​꧊ꦪꦂꦢꦺꦤ꧀꧈​ꦲꦶꦁꦔꦉꦥ꧀ꦥꦺꦏꦸꦛ​꧊ꦪꦺꦫꦶꦏꦺꦴ꧉​
31:13 ​꧊ꦩꦸꦱ꧈​​꧊ꦌꦭꦺꦪꦗ꦳ꦂꦭꦤ꧀ꦥꦫꦥꦼꦁꦒꦼꦝꦺꦤꦺ​꧊ꦆꦱꦿꦲꦺꦭ꧀ꦏꦧꦺꦃꦥꦝꦩꦼꦠꦸꦱꦏꦏꦺꦩꦃꦩꦼꦛꦸꦏ꧀ꦏꦏꦺꦠꦼꦤ꧀ꦠꦫꦤꦺ​꧊ꦆꦱꦿꦲꦺꦭ꧀ꦱꦶꦁꦧꦭꦶꦱꦏꦥꦼꦥꦿꦁꦔꦤ꧀꧉​
31:14 ꦥꦫꦥꦼꦂꦮꦶꦫ꧈​ꦥꦫꦏꦺꦴꦩꦤ꧀ꦝꦤ꧀ꦧꦠꦭꦶꦪꦺꦴꦤ꧀ꦭꦤ꧀ꦏꦺꦴꦩꦤ꧀ꦝꦤ꧀ꦏꦺꦴꦩ꧀ꦥꦶꦱꦶꦁꦧꦭꦶꦱꦏꦥꦼꦥꦿꦁꦔꦤ꧀ꦩꦲꦸꦥꦝꦢꦶꦢꦸꦏꦤꦶꦢꦺꦤꦶꦁ​꧊ꦩꦸꦱ꧉​
31:15 ꦏꦤ꧀ꦝꦤꦺ꧈​"ꦪꦒꦺꦤꦺꦮꦺꦴꦁꦮꦢꦺꦴꦤ꧀​꧊ꦩꦶꦢꦶꦪꦤ꧀ꦏꦺꦴꦏ꧀ꦲꦺꦴꦫꦏꦺꦴꦏ꧀ꦥꦠꦺꦤ꧀ꦤꦶ?
31:16 ꦲꦺꦭꦶꦁꦔ꧈​ꦪꦺꦤ꧀ꦮꦺꦴꦁꦮꦺꦴꦁꦏꦸꦮꦶꦱꦶꦁꦥꦝꦔ꧀ꦭꦏꦺꦴꦤ꧀ꦤꦶꦥꦶꦉꦩ꧀ꦧꦸꦒ​꧊ꦧꦶꦭꦺꦪꦩ꧀꧈​ꦥꦝꦩ꧀ꦧꦸꦗꦸꦏ꧀ꦮꦺꦴꦁ​꧊ꦆꦱꦿꦲꦺꦭ꧀ꦱꦸꦥꦪꦥꦝꦤꦶꦁꦒꦭ꧀ꦩꦫꦁꦄꦭ꧀ꦭꦃ!ꦭꦤ꧀ꦏꦸꦮꦶꦱꦶꦁꦩꦫꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃꦤꦼꦏꦏ꧀ꦏꦏꦺꦥꦲꦸꦏꦸꦩ꧀ꦩꦤ꧀ꦩꦫꦁ​꧊ꦆꦱꦿꦲꦺꦭ꧀!
31:17 ꦮꦶꦱ꧀ꦱꦲꦶꦏꦶꦥꦠꦺꦤ꧀ꦤꦤꦏꦧꦺꦃꦧꦺꦴꦕꦃꦭꦤꦁꦭꦤ꧀ꦮꦺꦴꦁꦮꦢꦺꦴꦤ꧀ꦱꦶꦁꦢꦸꦢꦸꦥꦿꦮꦤ꧀꧉​
31:18 ꦤꦁꦔꦶꦁꦏꦧꦺꦃꦱꦶꦁꦲꦶꦱꦶꦃꦥꦿꦮꦤ꧀ꦏꦼꦤꦏꦺꦴꦏ꧀ꦥꦺꦏ꧀꧉​
31:19 ꦱꦼꦧꦚ꧀ꦗꦸꦂꦫꦺꦏꦺꦴꦮꦺꦏꦧꦺꦃꦱꦶꦁꦮꦶꦱ꧀ꦩꦠꦺꦤ꧀ꦤꦶꦮꦺꦴꦁꦲꦸꦠꦮꦔ꧀ꦒꦼꦥꦺꦴꦏ꧀ꦩꦪꦶꦠ꧀ꦲꦺꦴꦫꦏꦼꦤꦩ꧀ꦭꦼꦧꦸꦲꦶꦁꦏꦺꦩꦃꦔꦤ꧀ꦠꦶꦥꦶꦠꦸꦁꦢꦶꦤꦭꦮꦱ꧀ꦱꦺ꧉​ꦲꦶꦁꦢꦶꦤꦏꦠꦼꦭꦸꦭꦤ꧀ꦏꦥꦶꦠꦸ꧈​ꦏꦺꦴꦮꦺꦭꦤ꧀ꦥꦫꦮꦺꦴꦁꦮꦢꦺꦴꦤ꧀​꧊ꦩꦶꦢꦶꦪꦤ꧀ꦏꦸꦮꦶꦏꦸꦢꦸꦔꦤꦏ꧀ꦏꦏꦺꦲꦸꦥꦕꦫꦥꦱꦸꦕꦺꦤ꧀꧉​
31:20 ꦱꦤ꧀ꦝꦁꦔꦤ꧀ꦭꦤ꧀ꦲꦥꦮꦲꦺꦱꦶꦁꦢꦶꦒꦮꦺꦱꦏꦭꦸꦭꦁ꧈​ꦮꦸꦭꦸꦮꦼꦝꦸꦱ꧀ꦲꦸꦠꦮꦏꦪꦸ꧈​ꦏꦸꦢꦸꦢꦶꦱꦸꦕꦺꦏ꧀ꦏꦏꦺꦩꦶꦠꦸꦫꦸꦠ꧀ꦥꦽꦤꦠꦤꦶꦁꦲꦒꦩ꧉"​
31:21 ​꧊ꦌꦭꦺꦪꦗ꦳ꦂꦧꦚ꧀ꦗꦂꦏꦤ꧀ꦝꦏꦫꦺꦴꦮꦺꦴꦁꦮꦺꦴꦁꦱꦶꦁꦥꦝꦧꦭꦶꦱꦏꦥꦼꦥꦿꦁꦔꦤ꧀ꦩꦲꦸ꧈​"ꦒꦸꦱ꧀ꦠꦶꦄꦭ꧀ꦭꦃꦩꦫꦶꦁꦔꦏꦺꦩꦫꦁ​꧊ꦩꦸꦱꦥꦽꦤꦠꦤ꧀ꦥꦽꦤꦠꦤ꧀ꦩꦼꦁꦏꦺꦤꦺ:
31:22 (31:22-23)ꦱꦏꦺꦃꦲꦺꦧꦫꦁꦱꦶꦁꦲꦺꦴꦫꦧꦶꦱꦏꦺꦴꦧꦺꦴꦁ꧈​ꦏꦸꦢꦸꦢꦶꦱꦸꦕꦺꦏ꧀ꦏꦏꦺꦔꦁꦒꦺꦴꦒꦼꦤꦶ꧈​ꦏꦪꦠ:ꦲꦼꦩꦱ꧀꧈​ꦱ꧀ꦭꦏ꧈​ꦠꦼꦩ꧀ꦧꦒ꧈​ꦮꦼꦱꦶ꧈​ꦠꦶꦩꦃꦥꦸꦠꦶꦃꦭꦤ꧀ꦠꦶꦩꦃꦲꦶꦉꦁ꧉​ꦧꦫꦁꦧꦫꦁꦭꦶꦪꦤꦺꦱꦶꦁꦧꦶꦱꦏꦺꦴꦧꦺꦴꦁ꧈​ꦏꦸꦢꦸꦢꦶꦱꦸꦕꦺꦏ꧀ꦏꦏꦺꦔꦁꦒꦺꦴꦧꦚꦸ꧉​
31:23 (31:22)
31:24 ꦲꦶꦁꦢꦶꦤꦏꦥꦶꦠꦸꦏꦺꦴꦮꦺꦏꦸꦢꦸꦥꦝꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦩꦸ꧉​ꦪꦺꦤ꧀ꦮꦶꦱ꧀ꦩꦼꦁꦏꦺꦴꦤꦺꦴꦏꦺꦴꦮꦺꦭꦒꦶꦢꦢꦶꦉꦱꦶꦏ꧀ꦩꦶꦠꦸꦫꦸꦠ꧀ꦥꦽꦤꦠꦤꦺꦲꦒꦩ꧈​ꦭꦤ꧀ꦲꦺꦴꦭꦺꦃꦩ꧀ꦭꦼꦧꦸꦲꦶꦁꦏꦺꦩꦃ꧉"​
31:25 ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃꦩꦫꦁ​꧊ꦩꦸꦱ꧈​
31:26 "ꦏꦺꦴꦮꦺꦭꦤ꧀​꧊ꦌꦭꦺꦪꦗ꦳ꦂꦱꦂꦠꦥꦫꦥꦼꦁꦒꦼꦝꦺꦤꦺꦧꦁꦱ​꧊ꦆꦱꦿꦲꦺꦭ꧀ꦭꦶꦪꦤꦺ꧈​ꦏꦸꦢꦸꦤꦕꦃꦲꦏꦺꦧꦫꦁꦧꦫꦁꦱꦶꦁꦮꦶꦱ꧀ꦢꦶꦫꦩ꧀ꦥꦱ꧀꧈​ꦲꦸꦒꦥꦫꦠꦮꦤ꧀ꦤꦤ꧀ꦭꦤ꧀ꦏꦺꦮꦤ꧀꧉​
31:27 ꦧꦫꦁꦧꦫꦁꦩꦲꦸꦢꦸꦩ꧀ꦩꦼꦤ꧀ꦢꦢꦶꦭꦺꦴꦫꦺꦴꦱꦶꦁꦥꦝꦲꦏꦺꦃꦲꦺ꧉​ꦱꦶꦁꦱꦼꦥꦫꦺꦴꦏꦁꦒꦺꦴꦥꦫꦥꦽꦗꦸꦫꦶꦠ꧀ꦭꦤ꧀ꦱꦶꦁꦱꦼꦥꦫꦺꦴꦭꦶꦪꦤꦺꦏꦁꦒꦺꦴꦫꦏꦾꦠ꧀꧉​
31:28 ꦱꦼꦧꦚ꧀ꦗꦸꦂꦫꦺꦩꦶꦤꦁꦏꦥꦶꦱꦸꦁꦱꦸꦁꦩꦫꦁꦄꦭ꧀ꦭꦃ꧈​ꦱꦧꦼꦤ꧀ꦥꦽꦗꦸꦫꦶꦠ꧀ꦏꦸꦢꦸꦚꦲꦺꦴꦱ꧀ꦱꦏꦺꦱꦥꦿꦭꦶꦩꦁꦲꦠꦸꦱ꧀ꦱꦺꦧꦒꦺꦪꦤ꧀ꦤꦺ꧈​ꦫꦸꦥꦮꦺꦴꦁꦠꦮꦤ꧀ꦤꦤ꧀꧈​ꦫꦸꦥꦱꦥꦶ꧈​ꦏꦸꦭ꧀ꦢꦶ꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀꧈​ꦲꦸꦠꦮꦮꦼꦝꦸꦱ꧀ꦗꦮ꧈​
31:29 ꦏꦸꦮꦶꦠꦩ꧀ꦥꦏ꧀ꦤꦩꦫꦁꦲꦶꦩꦩ꧀​꧊ꦌꦭꦺꦪꦗ꦳ꦂꦩꦶꦤꦁꦏꦥꦶꦱꦸꦁꦱꦸꦁꦏꦸꦱꦸꦱ꧀ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃ꧉​
31:30 ꦢꦺꦤꦺꦧꦒꦺꦪꦤ꧀ꦤꦺꦫꦏꦾꦠ꧀ꦱꦥꦿꦱꦺꦏꦼꦠ꧀ꦠꦺꦏꦸꦢꦸꦢꦶꦱꦲꦺꦴꦱ꧀ꦱꦏꦺꦩꦶꦤꦁꦏꦥꦶꦱꦸꦁꦱꦸꦁꦏꦸꦱꦸꦱ꧀ꦩꦫꦁꦄꦭ꧀ꦭꦃ꧈​ꦲꦶꦪꦱꦶꦁꦫꦸꦥꦠꦮꦤ꧀ꦤꦤ꧀꧈​ꦲꦸꦠꦮꦱꦶꦁꦫꦸꦥꦱꦥꦶ꧈​ꦏꦸꦭ꧀ꦢꦶ꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤ꧀ꦮꦼꦝꦸꦱ꧀ꦗꦮ꧉​ꦏꦸꦮꦶꦠꦩ꧀ꦥꦏ꧀ꦤꦩꦫꦁꦮꦺꦴꦁ​꧊ꦭꦺꦮꦶꦱꦶꦁꦔꦸꦫꦸꦱ꧀ꦱꦶꦏꦺꦩꦃꦱꦸꦕꦶ꧉"​
31:31 ​꧊ꦩꦸꦱꦭꦤ꧀​꧊ꦌꦭꦺꦪꦗ꦳ꦂꦧꦚ꧀ꦗꦸꦂꦤꦶꦤ꧀ꦢꦏ꧀ꦏꦏꦺꦲꦥꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦩꦲꦸ꧉​
31:32 (31:32-35)ꦏꦼꦗꦧꦧꦫꦁꦧꦫꦁꦫꦩ꧀ꦥꦱ꧀ꦱꦤ꧀꧈​ꦏꦧꦺꦃꦒꦸꦁꦒꦸꦁꦔꦺꦩꦼꦁꦏꦺꦤꦺ:ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤ꧀ꦮꦼꦝꦸꦱ꧀ꦗꦮ:675.000;ꦱꦥꦶ:72.000;ꦏꦸꦭ꧀ꦢꦶ:61.000;ꦥꦿꦮꦤ꧀32.000꧉​
31:33 (31:32)
31:34 (31:32)
31:35 (31:32)
31:36 (31:36-40)ꦧꦫꦁꦱꦼꦩꦺꦴꦤꦺꦴꦩꦲꦸꦱꦶꦁꦱꦼꦥꦫꦺꦴꦢꦶꦮꦺꦤꦺꦃꦲꦏꦺꦩꦫꦁꦥꦫꦥꦽꦗꦸꦫꦶꦠ꧀꧈​ꦪꦏꦸꦮꦶ:ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤ꧀ꦮꦼꦝꦸꦱ꧀ꦗꦮ337.500꧉​ꦱꦏꦕꦕꦃꦱꦼꦩꦺꦴꦤꦺꦴꦩꦲꦸ675ꦢꦶꦥꦶꦱꦸꦁꦱꦸꦁꦔꦏꦺꦩꦫꦁꦄꦭ꧀ꦭꦃ꧉​ꦱꦥꦶ:36.000꧈​ꦱꦶꦁ72ꦢꦶꦥꦶꦱꦸꦁꦱꦸꦁꦔꦏꦺꦩꦫꦁꦄꦭ꧀ꦭꦃ꧉​ꦏꦸꦭ꧀ꦢꦶ:30.500꧈​ꦱꦶꦁ61ꦏꦁꦒꦺꦴꦥꦶꦱꦸꦁꦱꦸꦁꦩꦫꦁꦄꦭ꧀ꦭꦃ꧉​ꦥꦿꦮꦤ꧀16.000ꦱꦶꦁ31ꦢꦶꦥꦶꦱꦸꦁꦱꦸꦁꦔꦏꦺꦩꦫꦁꦄꦭ꧀ꦭꦃ꧉​
31:37 (31:36)
31:38 (31:36)
31:39 (31:36)
31:40 (31:36)
31:41 ꦥꦶꦱꦸꦁꦱꦸꦁꦏꦧꦺꦃꦩꦲꦸꦧꦚ꧀ꦗꦸꦂꦢꦶꦥꦱꦿꦃꦲꦏꦺꦢꦺꦤꦶꦁ​꧊ꦩꦸꦱꦩꦫꦁ​꧊ꦌꦭꦺꦪꦗ꦳ꦂ꧈​ꦩꦶꦤꦁꦏꦥꦶꦱꦸꦁꦱꦸꦁꦏꦸꦱꦸꦱ꧀ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃ꧈​ꦩꦶꦠꦸꦫꦸꦠ꧀ꦝꦮꦸꦃꦲꦺꦄꦭ꧀ꦭꦃꦥꦶꦪꦩ꧀ꦧꦏ꧀꧉​
31:42 (31:42-46)ꦥꦤ꧀ꦢꦸꦩ꧀ꦩꦤ꧀ꦤꦺꦫꦏꦾꦠ꧀ꦥꦝꦲꦏꦺꦃꦲꦺꦏꦫꦺꦴꦥꦤ꧀ꦢꦸꦩ꧀ꦩꦤ꧀ꦤꦺꦥꦫꦥꦽꦗꦸꦫꦶꦠ꧀꧉​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤ꧀ꦮꦼꦝꦸꦱ꧀ꦗꦮ:337.500;ꦱꦥꦶ:36.000;ꦏꦸꦭ꧀ꦢꦶ:30.500;ꦥꦿꦮꦤ꧀16.000꧉​
31:43 (31:42)
31:44 (31:42)
31:45 (31:42)
31:46 (31:42)
31:47 ꦏꦪꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧈​​꧊ꦩꦸꦱꦚ꧀ꦗꦸꦥꦸꦏ꧀ꦱꦥꦿꦱꦺꦏꦼꦠ꧀ꦠꦺꦮꦺꦴꦁꦠꦮꦤ꧀ꦤꦤ꧀ꦭꦤ꧀ꦏꦺꦮꦤ꧀꧈​ꦧꦚ꧀ꦗꦸꦂꦢꦶꦠꦩ꧀ꦥꦏ꧀ꦏꦏꦺꦩꦫꦁꦮꦺꦴꦁ​꧊ꦭꦺꦮꦶꦱꦶꦁꦥꦝꦔ꧀ꦭꦏꦺꦴꦤ꧀ꦤꦶꦲꦪꦃꦲꦤ꧀ꦲꦶꦁꦏꦺꦩꦃꦱꦸꦕꦶ꧉​
31:48 ꦥꦫꦥꦼꦂꦮꦶꦫꦱꦶꦁꦥꦝꦢꦢꦶꦏꦺꦴꦩꦤ꧀ꦝꦤ꧀ꦤꦺꦠꦼꦤ꧀ꦠꦫ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦥꦝꦔꦝꦼꦥ꧀ꦩꦫꦁ​꧊ꦩꦸꦱ꧈​
31:49 ꦱꦂꦠꦭꦥꦸꦂꦩꦼꦁꦏꦺꦤꦺ꧈​"ꦥꦏ꧀꧈​ꦏꦸꦭꦱꦩ꧀ꦥꦸꦤ꧀ꦔꦺꦠꦁꦱꦼꦢꦪꦥꦽꦗꦸꦫꦶꦠ꧀꧈​ꦧꦭꦏꦸꦭꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧈​ꦭꦤ꧀ꦏꦼꦠꦶꦠꦶꦏ꧀ꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦱꦼꦠꦸꦁꦒꦭ꧀ꦏꦺꦩꦮꦺꦴꦤ꧀ꦲꦶꦁꦏꦁꦠꦶꦮꦱ꧀꧉​
31:50 ꦱꦩꦼꦤꦶꦏꦏꦸꦭꦧꦝꦺꦚꦲꦺꦴꦱ꧀ꦱꦏꦼꦤ꧀ꦧꦫꦁꦲꦼꦩꦱ꧀ꦩꦱ꧀ꦱꦤ꧀ꦫꦸꦥꦶꦒꦼꦭꦁꦠꦔꦤ꧀꧈​ꦒꦼꦭꦁꦱꦸꦏꦸ꧈​ꦱꦼꦱꦸꦥ꧀ꦥꦺ꧈​ꦲꦤ꧀ꦠꦶꦁꦲꦤ꧀ꦠꦶꦁꦭꦤ꧀ꦏꦭꦸꦁꦲꦶꦁꦏꦁꦏꦸꦭꦫꦩ꧀ꦥꦱ꧀꧈​ꦏꦺꦴꦚ꧀ꦗꦸꦏ꧀ꦝꦠꦼꦁꦄꦭ꧀ꦭꦃꦩꦶꦤꦁꦏꦠꦼꦧꦸꦱ꧀ꦱꦤ꧀ꦏꦁꦒꦺꦚꦮꦏꦸꦭꦱꦼꦢꦪ꧈​ꦱꦸꦥꦢꦺꦴꦱ꧀ꦩ꧀ꦧꦺꦚ꧀ꦗꦶꦁꦱꦭꦗꦼꦁꦔꦶꦥꦸꦤ꧀ꦏꦸꦭꦱꦩꦶꦢꦶꦥꦸꦤ꧀ꦉꦏ꧀ꦱ꧉"​
31:51 ​꧊ꦩꦸꦱꦭꦤ꧀​꧊ꦌꦭꦺꦪꦗ꦳ꦂꦧꦚ꧀ꦗꦸꦂꦤꦩ꧀ꦥꦤꦶꦧꦫꦁꦲꦼꦩꦱ꧀ꦩꦱ꧀ꦱꦤ꧀ꦩꦲꦸ꧈​ꦫꦸꦥꦉꦉꦁꦒꦤ꧀꧉​
31:52 ꦥꦶꦱꦸꦁꦱꦸꦁꦔꦺꦥꦫꦥꦼꦂꦮꦶꦫꦩꦲꦸꦧꦺꦴꦧꦺꦴꦠ꧀ꦠꦺꦏꦧꦺꦃꦩꦺꦃꦫꦺꦴꦁꦲꦠꦸꦱ꧀ꦏꦶꦭꦺꦴꦒꦿꦩ꧀꧉​
31:53 ꦢꦺꦤꦺꦥꦫꦥꦽꦗꦸꦫꦶꦠ꧀ꦱꦶꦁꦢꦸꦢꦸꦥꦼꦂꦮꦶꦫꦱꦶꦁꦲꦶꦪꦥꦝꦔꦿꦩ꧀ꦥꦱ꧀ꦥꦝꦔꦼꦥꦺꦏ꧀ꦧꦫꦁꦧꦫꦁꦩꦲꦸꦏꦁꦒꦺꦴꦲꦮꦏ꧀ꦏꦺꦝꦺꦮꦺ꧉​
31:54 ​꧊ꦩꦸꦱꦭꦤ꧀​꧊ꦌꦭꦺꦪꦗ꦳ꦂꦧꦚ꧀ꦗꦸꦂꦔ꧀ꦒꦮꦧꦫꦁꦧꦫꦁꦩꦲꦸꦢꦶꦱꦶꦩ꧀ꦥꦼꦤ꧀ꦲꦶꦁꦏꦺꦩꦃꦱꦸꦕꦶ꧈​ꦱꦸꦥꦪꦒꦸꦱ꧀ꦠꦶꦄꦭ꧀ꦭꦃꦔꦽꦏ꧀ꦱꦩꦫꦁꦧꦁꦱ​꧊ꦆꦱꦿꦲꦺꦭ꧀꧉​