ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/7

꧋ꦠꦼꦩ꧀ꦧꦸꦁꦔꦺ​ꦱ꧀ꦠꦺꦥ꦳ꦤꦸꦱ꧀꧈​

꧇​꧗꧇​ ¹꧋ꦲꦶꦩꦩ꧀ꦒꦼꦢꦺꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦱ꧀ꦠꦺꦥ꦳ꦤꦸꦱ꧀:“ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦼꦤꦼꦂ​?”

²꧋ꦱ꧀ꦠꦺꦥ꦳ꦤꦸꦱ꧀ꦱꦼꦩꦲꦸꦂ​:“ꦥꦫ​ꦱꦼꦢꦸꦭꦸꦂ​ꦭꦤ꧀ꦥꦫ​ꦧꦥꦏ꧀ꦏꦧꦺꦃ​꧉​ꦲꦺꦴꦩꦺꦴꦁꦏꦸꦲꦶꦏꦶ​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​꧈​ꦮꦶꦱ꧀ꦔꦺꦠꦺꦴꦏ꧀ꦩꦫꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦄꦨꦿꦲꦩ꧀ ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀ꦩꦁꦒꦺꦴꦤ꧀ꦤꦁꦠꦤꦃ​ꦩꦺꦱꦺꦴꦥꦺꦴꦠꦩꦶ꧉​ꦏꦸꦮꦶ​ꦱꦏ꧀ꦢꦸꦫꦸꦁꦔꦺꦧꦥ​ꦄꦨꦿꦲꦩ꧀ꦧꦺꦴꦪꦺꦴꦁꦔꦤ꧀ꦤꦁꦏꦸꦠꦲ꦳ꦫꦤ꧀꧈​ ³ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦢꦺꦏ꧀ꦤꦺ:'ꦄꦨꦿꦲꦩ꧀ ꦏꦤ​ꦭꦸꦔꦲ​꧈​ꦱꦼꦢꦸꦭꦸꦂꦩꦸꦭꦤ꧀ꦥꦁꦒꦺꦴꦤ꧀ꦤꦤ꧀ꦩꦸ​ꦠꦶꦁꦒꦊꦤ꧀ꦭꦤ꧀ꦭꦸꦔꦲ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦧꦏꦭ꧀ꦠꦏ꧀ꦢꦸꦢꦸꦃꦲꦏꦺ!’ ⁴ꦧꦥ​ꦄꦨꦿꦲꦩ꧀ꦠꦼꦫꦸꦱ꧀ꦤꦶꦁꦒꦭ꧀ꦠꦤꦃ​ꦑꦭ꧀ꦢꦺꦪꦠꦼꦫꦸꦱ꧀ꦩꦁꦒꦺꦴꦤ꧀ꦤꦁꦏꦸꦠꦲ꦳ꦫꦤ꧀꧈​ꦱꦏ꧀ꦮꦶꦱ꧀ꦱꦺ​ꦧꦥꦏ꧀ꦏꦺꦩꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦧꦥ​ꦄꦨꦿꦲꦩ꧀ꦧꦺꦴꦪꦺꦴꦁꦔꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦲꦶꦏꦶ​꧈​ꦱꦶꦁ​ꦲꦩ꧀ꦧꦺꦴꦏ꧀ꦲꦼꦁꦒꦺꦴꦤ꧀ꦤꦶ​ꦱꦲꦶꦏꦶ​꧉​ ⁵ꦲꦶꦁ​ꦮꦪꦃ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦼꦏꦺꦏ꧀ꦏꦶꦏꦼꦧꦺꦴꦤ꧀ꦩꦫꦁ​ꦧꦥ​ꦄꦨꦿꦲꦩ꧀ ꦱꦏ꧀ꦩꦺꦠꦼꦂ​ꦮꦲꦺ​ꦲꦺꦴꦫ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦥꦁꦒꦺꦴꦤ꧀ꦤꦤ꧀ꦲꦶꦏꦶ​ꦧꦏꦭ꧀ꦢꦶꦏꦺꦏ꧀ꦏꦏꦺꦩꦫꦁ​ꦢꦺꦏ꧀ꦤꦺꦭꦤ꧀ꦠꦸꦫꦸꦤ꧀ꦤꦤ꧀ꦤꦺ​꧈​ꦱꦼꦤꦗꦤ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦧꦥ​ꦄꦨꦿꦲꦩ꧀ꦢꦸꦫꦸꦁ​ꦤ꧀ꦢꦸꦮꦺꦲꦤꦏ꧀꧈​ ⁶ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦧꦥ​ꦄꦨꦿꦲꦩ꧀:'ꦠꦸꦫꦸꦤꦤ꧀ꦩꦸꦧꦏꦭ꧀ꦩꦁꦒꦺꦴꦤ꧀ꦤꦁꦤꦼꦒꦫ​ꦭꦶꦪ​ꦭꦤ꧀ꦧꦏꦭ꧀ꦢꦢꦶ​ꦱ꧀ꦭꦥ꦳꧀ꦱꦶꦁ​ꦢꦶꦱꦶꦪꦱꦶꦪ​ꦥꦠꦁ​ꦲꦠꦸꦱ꧀ꦠꦲꦸꦤ꧀ꦱꦸꦮꦺꦤꦺ​꧉​ ⁷ꦤꦁꦔꦶꦁ​ꦱꦏ꧀ꦫꦩ꧀ꦥꦸꦁꦔꦺ​ꦏꦸꦮꦶ​ꦲꦏꦸ​ꦧꦏꦭ꧀ꦚꦼꦠꦿꦥ꧀ꦧꦁꦱ​ꦱꦶꦁ​ꦔ꧀ꦮꦱꦤꦶ​ꦏꦺꦴꦮꦺ​ꦭꦤ꧀ꦠꦸꦫꦸꦤꦤ꧀ꦩꦸꦧꦏꦭ꧀ꦥꦢ​ꦩꦼꦠꦸ​ꦱꦁꦏꦤꦼꦒꦫ​ꦏꦸꦮꦶ​ꦭꦤ꧀ꦧꦏꦭ꧀ꦔꦧꦼꦏ꧀ꦠꦶ​ꦩꦫꦁ​ꦲꦏꦸ​ꦤꦁꦥꦁꦒꦺꦴꦤ꧀ꦤꦤ꧀ꦏꦺꦤꦺ​ꦲꦶꦏꦶ​꧉'​ ⁸ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦔꦼꦏꦺꦏ꧀ꦏꦶꦥꦼꦂꦤꦠ꧀ꦠꦤ꧀ꦱꦸꦤꦠ꧀ꦩꦫꦁ​ꦧꦥ​ꦄꦨꦿꦲꦩ꧀ ꦏꦁꦒꦺꦴ​ꦤꦼꦔꦼꦂꦫꦶ​ꦥꦽꦗꦚ꧀ꦗꦶꦪꦤ꧀ꦲꦶꦏꦶ​꧉​ꦩꦸꦭꦤꦺ​ꦧꦥ​ꦄꦨꦿꦲꦩ꧀ꦪ​ꦠꦼꦫꦸꦱ꧀ꦚꦸꦤꦠ꧀ꦠꦶꦲꦤꦏ꧀ꦏꦺ​ꦱꦶꦁ​ꦗꦼꦤꦼꦁꦔꦺ​ꦆꦱꦏ꧀ ꦮꦺꦴꦭꦸꦁ​ꦢꦶꦤ​ꦱꦏ꧀ꦮꦶꦱ꧀ꦱꦺ​ꦭꦲꦶꦂ​꧉​ꦧꦥ​ꦆꦱꦏ꧀ꦱꦼꦩꦺꦴꦤꦺꦴ​ꦲꦸꦒ​ꦠꦼꦫꦸꦱ꧀ꦚꦸꦤꦠ꧀ꦠꦶꦪꦏꦸꦧ꧀ ꦲꦤꦏ꧀ꦏꦺ​ꦭꦤ꧀ꦧꦥ​ꦪꦏꦸꦧ꧀ꦲꦸꦒ​ꦠꦼꦫꦸꦱ꧀ꦚꦸꦤꦠ꧀ꦠꦶꦠꦸꦫꦸꦤ꧀ꦤꦤ꧀ꦤꦺ​꧈​ꦪꦏꦸꦮꦶ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦫꦺꦴꦭꦱ꧀꧈​

^9-10꧋“ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦔꦼꦢꦺꦴꦭ꧀ꦪꦺꦴꦱꦺꦥ꦳꧀ꦢꦢꦶ​ꦱ꧀ꦭꦥ꦳꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧈​ꦗꦭꦂꦫꦤ꧀ꦥꦢ​ꦩꦺꦫꦶ​ꦩꦫꦁ​ꦢꦺꦏ꧀ꦤꦺ꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦤ꧀ꦠꦸꦤ꧀ꦪꦺꦴꦱꦺꦥ꦳꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦸꦮꦂꦫꦶ​ꦪꦺꦴꦱꦺꦥ꦳꧀ꦱꦁꦏꦱꦏ꧀ꦮꦼꦂꦤꦤꦺ​ꦥꦶꦪꦭ​꧉​ꦢꦺꦴꦁꦔꦺꦪꦺꦴꦱꦺꦥ꦳꧀ꦏꦸꦢꦸ​ꦩꦫ​ꦤꦁꦔꦉꦥ꧀ꦥꦺ​ꦫꦠꦸꦤꦺ​ꦌꦒꦶꦥ꧀ꦠꦼ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦮꦼꦫꦸꦃꦒꦼꦢꦺꦩꦫꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦫꦠꦸꦤꦺ​ꦔꦸꦁꦒꦃꦲꦏꦺꦪꦺꦴꦱꦺꦥ꦳꧀ꦢꦢꦶ​ꦒꦿꦩꦁꦔꦺꦤꦼꦒꦫ​ꦌꦒꦶꦥ꧀ꦠꦼꦭꦤ꧀ꦥꦼꦔꦸꦫꦸꦱ꧀ꦱꦺ​ꦥꦭꦺꦱ꧀ꦱꦺꦫꦠꦸꦤꦺ​꧉​ ¹¹ꦲꦶꦁ​ꦮꦪꦃ​ꦏꦸꦮꦶ​ꦤꦼꦒꦫ​ꦌꦒꦶꦥ꧀ꦠꦼꦭꦤ꧀ꦑꦤꦄꦤ꧀ꦏꦠꦼꦏꦤ꧀ꦏꦱꦸꦱꦃꦲꦤ꧀ꦒꦼꦢꦺ꧈​ꦲꦮꦶꦠ꧀ꦲꦺꦤꦺꦁꦏꦼꦏꦸꦫꦁꦔꦤ꧀ꦥꦔꦤ꧀꧈​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦧꦶꦱ​ꦤꦼꦩꦸ​ꦥꦔꦤ꧀꧈​ ¹²ꦧꦥ​ꦪꦏꦸꦧ꧀ꦏꦿꦸꦔꦸ​ꦤꦺꦏ꧀ꦤꦁꦤꦼꦒꦫ​ꦌꦒꦶꦥ꧀ꦠꦼꦲꦺꦤꦺꦁ꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦲꦤꦏ꧀ꦏꦺ​꧈​ꦏꦸꦮꦶ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦤꦶꦭꦶꦏ꧀ꦏꦶ​ꦤꦁꦏꦤ​꧉​ꦏꦸꦮꦶ​ꦠꦼꦏꦠꦼꦏꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦱꦼꦥꦶꦱꦤ꧀ꦤꦤ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ ¹³ꦏꦢꦸꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦠꦼꦏ​ꦥꦶꦁ​ꦥꦶꦤ꧀ꦢꦺꦴꦤꦺꦤꦁꦌꦒꦶꦥ꧀ꦠꦼ꧈​ꦪꦺꦴꦱꦺꦥ꦳꧀ꦠꦼꦫꦸꦱ꧀​ꦧ꧀ꦭꦏ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦭꦤ꧀ꦫꦠꦸꦤꦺ​ꦠꦼꦫꦸꦱ꧀ꦲꦸꦒ​ꦧꦶꦱ​ꦏꦼꦤꦭ꧀ꦩꦫꦁ​ꦱꦼꦢꦸꦭꦸꦂꦫꦺ​ꦪꦺꦴꦱꦺꦥ꦳꧀꧈​ ¹⁴ꦪꦺꦴꦱꦺꦥ꦳꧀ꦠꦼꦫꦸꦱ꧀ꦲꦩ꧀ꦧꦺꦴꦪꦺꦴꦁ​ꦧꦥꦏ꧀ꦏꦺꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦏꦧꦺꦃ​ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ꦏꦧꦺꦃꦲꦺꦲꦺꦤꦺꦁꦮꦺꦴꦁ​ꦥꦶꦠꦸꦁ​ꦥꦸꦭꦸꦃ​ꦭꦶꦩ​꧉​ ¹⁵ꦧꦥ​ꦪꦏꦸꦧ꧀ꦭꦤ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩꦠꦶꦤꦺ​ꦪ​ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ ¹⁶ꦭꦪꦺꦴꦤꦺ​ꦧꦥ​ꦪꦏꦸꦧ꧀ꦭꦤ꧀ꦲꦤꦏ꧀ꦲꦤꦏ꧀ꦏꦺ​ꦩꦲꦸ​ꦠꦼꦫꦸꦱ꧀ꦢꦶꦒꦮ​ꦤꦁꦏꦸꦠꦱꦶꦏꦺꦩ꧀ꦭꦤ꧀ꦢꦶꦏꦸꦧꦸꦂ​ꦤꦁꦏꦺꦴꦤꦺꦴ​꧉​ꦧꦥ​ꦄꦨꦿꦲꦩ꧀ꦱꦏ꧀ꦢꦸꦫꦸꦁꦔꦺꦮꦶꦱ꧀ꦠꦸꦏꦸ​ꦏꦸꦧꦸꦂꦫꦤ꧀ꦲꦶꦏꦶ​ꦱꦁꦏꦧꦁꦱ​ꦲ꦳ꦩꦺꦴꦂ​꧉​

¹⁷꧋“ꦏꦢꦸꦁ​ꦩꦺꦃ​ꦮꦶꦱ꧀ꦠꦼꦏꦤ꧀ꦮꦪꦃꦲꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦉꦥ꧀ꦤꦸꦫꦸꦠ꧀ꦠꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ ꦧꦁꦱ​ꦆꦱꦿꦌꦭ꧀ꦱꦶꦁ​ꦩꦁꦒꦺꦴꦤ꧀ꦤꦁꦌꦒꦶꦥ꧀ꦠꦼꦮꦶꦱ꧀ꦩꦸꦤ꧀ꦢꦏ꧀ꦢꦢꦶ​ꦲꦺꦴꦏꦺꦃꦧꦔꦼꦠ꧀꧈​ ¹⁸ꦤꦼꦒꦫ​ꦌꦒꦶꦥ꧀ꦠꦼꦠꦼꦫꦸꦱ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦠꦸ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦪꦺꦴꦱꦺꦥ꦳꧀꧈​ ¹⁹ꦫꦠꦸ​ꦲꦶꦏꦶ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦺꦴꦫ​ꦲꦥꦶꦏ꧀ꦭꦤ꧀ꦚꦶꦪꦚꦶꦪ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧉​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦶꦥꦼꦏ꧀ꦱ​ꦲꦩ꧀ꦧꦸꦮꦁ​ꦧꦪꦶꦧꦪꦶ​ꦱꦶꦁ​ꦲꦼꦤ꧀ꦠꦱ꧀ꦭꦲꦶꦂ​ꦧꦺꦤ꧀ꦩꦠꦶ​꧉​ ²⁰ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦤꦧꦶ​ꦩꦺꦴꦱꦼꦱ꧀ꦭꦲꦶꦂ​꧉​ꦫꦸꦥꦤꦺ​ꦗꦤ꧀​ꦔ꧀ꦒꦤ꧀ꦠꦼꦁꦠꦼꦤꦤ꧀꧈​ꦠꦼꦭꦸꦁ​ꦱꦱꦶ​ꦱꦸꦮꦺꦤꦺ​ꦤꦧꦶ​ꦩꦺꦴꦱꦼꦱ꧀ꦢꦶꦫꦸꦩꦠ꧀ꦠꦶ​ꦤꦁꦲꦺꦴꦩꦃꦲꦺ​ꦮꦺꦴꦁ​ꦠꦸꦮꦤꦺ​꧉​ ²¹ꦤꦁꦔꦶꦁ​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦲꦸꦒ​ꦢꦶꦧꦸꦮꦁ​꧉​ꦤ꧀ꦢꦶꦭꦭꦃꦲꦺꦢꦶꦠꦼꦩꦸ​ꦏꦫꦺꦴ​ꦲꦤꦏ꧀ꦏꦺ​ꦫꦠꦸꦤꦺ​ꦱꦶꦁ​ꦮꦺꦢꦺꦴꦏ꧀꧈​ꦢꦺꦏ꧀ꦤꦺꦱꦶꦁ​ꦔꦿꦸꦩꦠ꧀ꦠꦶ​ꦤꦧꦶ​ꦩꦺꦴꦱꦼꦱ꧀ ꦩꦭꦃ​ꦏꦪ​ꦲꦤꦏ꧀ꦏꦺ​ꦢꦺꦮꦺꦮꦲꦺ​꧉​ ²²ꦤꦧꦶ​ꦩꦺꦴꦱꦼꦱ꧀ꦠꦼꦫꦸꦱ꧀ꦢꦶꦧ꧀ꦭꦗꦂꦫꦶꦱꦏ꧀ꦲꦺꦤꦺꦁꦔꦺꦏꦥꦶꦤ꧀ꦠꦼꦂꦫꦤ꧀ꦤꦺ​ꦮꦺꦴꦁ​ꦌꦒꦶꦥ꧀ꦠꦼ꧈​ꦩꦸꦭꦤꦺ​ꦪ​ꦠꦼꦫꦸꦱ꧀ꦢꦢꦶ​ꦮꦺꦴꦁ​ꦱꦶꦁ​ꦒꦼꦢꦺꦧꦔꦼꦠ꧀ꦏ꧀ꦮꦱꦤꦺ​꧈​ꦲꦶꦁ​ꦠꦼꦩ꧀ꦧꦸꦁꦔꦺ​ꦭꦤ꧀ꦲꦶꦁ​ꦠꦸꦩꦶꦤ꧀ꦢꦏ꧀ꦏꦺ​꧉​

²³꧋“ꦏꦢꦸꦁ​ꦮꦶꦱ꧀​ꦤ꧀ꦢꦸꦮꦺꦲꦸꦩꦸꦂ​ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦢꦺꦏ꧀ꦤꦺꦠꦼꦫꦸꦱ꧀ꦏꦼꦥꦺꦔꦶꦤ꧀ꦤꦶꦭꦶꦏ꧀ꦏꦶ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧈​ꦏꦸꦮꦶ​ꦧꦁꦱ​ꦆꦱꦿꦌꦭ꧀꧈​ ²⁴ꦤꦁꦏꦺꦴꦤꦺꦴ​ꦤꦧꦶ​ꦩꦺꦴꦱꦼꦱ꧀ꦮꦼꦫꦸꦃ​ꦮꦺꦴꦁ​ꦌꦒꦶꦥ꧀ꦠꦼꦔꦤ꧀ꦠꦼꦩ꧀ꦩꦶ​ꦮꦺꦴꦁ​ꦆꦱꦿꦌꦭ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦲꦩ꧀ꦧꦺꦭꦤꦶ​ꦧꦁꦱꦤꦺ​ꦭꦤ꧀​ꦩ꧀ꦧꦊꦱ꧀ꦮꦺꦴꦁ​ꦌꦒꦶꦥ꧀ꦠꦼꦩꦲꦸ​꧈​ꦱꦩ꧀ꦥꦺꦏ꧀ꦮꦺꦴꦁꦔꦺ​ ꦩꦠꦶ​꧉​ ²⁵ꦢꦺꦏ꧀ꦤꦺꦩꦶꦏꦶꦂ​ꦤꦺꦏ꧀ꦧꦁꦱꦤꦺ​ꦢꦺꦏ꧀ꦤꦺꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦁꦒꦺꦴꦏ꧀ꦏꦏꦺꦢꦺꦏ꧀ꦤꦺꦔ꧀ꦭꦸꦮꦂꦫꦶ​ꦧꦁꦱꦤꦺ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦧꦁꦱ​ꦆꦱꦿꦌꦭ꧀ꦲꦺꦴꦫ​ꦢꦸꦤꦸꦁ꧉​ ²⁶ꦲꦶꦁ​ꦭꦶꦪꦤꦺ​ꦢꦶꦤ​ꦤꦧꦶ​ꦩꦺꦴꦱꦼꦱ꧀ꦮꦼꦫꦸꦃ​ꦮꦺꦴꦁ​ꦆꦱꦿꦌꦭ꧀ꦭꦺꦴꦫꦺꦴ​ꦥꦢ​ꦒꦼꦭꦸꦠ꧀꧈​ꦢꦺꦏ꧀ꦤꦺꦗꦮꦤꦺꦲꦉꦥ꧀ꦩꦶꦱꦃ​ꦱꦶꦁ​ꦒꦼꦭꦸꦠ꧀ꦩꦲꦸ​꧈​ꦩꦸꦭꦤꦺ​ꦔꦺꦴꦩꦺꦴꦁ:'ꦏꦺꦴꦮꦺ​ꦭꦲꦸꦠ꧀ꦠꦸꦁꦒꦭ꧀ꦱꦼꦢꦸꦭꦸꦂ​ꦠ​?ꦭꦃ​ꦏꦺꦴꦏ꧀ꦥꦢ​ꦒꦼꦭꦸꦠ꧀ꦔꦺꦴꦤꦺꦴ​?’ ^27-28ꦤꦁꦔꦶꦁ​ꦮꦺꦴꦁ​ꦱꦶꦁ​ꦔꦤ꧀ꦠꦼꦩ꧀ꦭꦶꦪꦤꦺ​ꦩꦲꦸ​ꦩꦭꦃ​ꦩꦲꦶꦢꦺꦴ​ꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁ:'ꦱꦥ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦏꦺꦴꦮꦺ​ꦢꦢꦶ​ꦫꦺꦏ꧀ꦠꦼꦫꦺꦲꦮꦏ꧀ꦏꦺ​ꦢꦺꦮꦺ?ꦲꦥ​ꦏꦺꦴꦮꦺ​ꦲꦸꦒ​ꦲꦉꦥ꧀ꦩꦠꦺꦤ꧀ꦤꦶ​ꦲꦮꦏ꧀ꦏꦺ​ꦢꦺꦮꦺꦏꦪ​ꦲꦼꦁꦒꦺꦴꦤ꧀ꦩꦸ​ꦩꦠꦺꦤ꧀ꦤꦶ​ꦮꦺꦴꦁ​ꦌꦒꦶꦥ꧀ꦠꦼꦢꦺꦏ꧀ꦮꦶꦔꦶ​ꦏꦲꦺ​?’ ²⁹ꦏꦿꦸꦔꦸ​ꦮꦺꦴꦁꦔꦺ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦤꦧꦶ​ꦩꦺꦴꦱꦼꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦌꦒꦶꦥ꧀ꦠꦼ꧈​ꦧꦸꦢꦭ꧀ꦤꦁꦠꦤꦃ​ꦩꦶꦢꦶꦪꦤ꧀ꦭꦤ꧀ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​꧉​ꦤꦁꦏꦺꦴꦤꦺꦴ​ꦤꦧꦶ​ꦩꦺꦴꦱꦼꦱ꧀ꦔꦼꦥꦺꦏ꧀ꦧꦺꦴꦗꦺꦴ​ꦠꦼꦫꦸꦱ꧀​ꦤ꧀ꦢꦸꦮꦺꦲꦤꦏ꧀ꦭꦤꦁ​ꦭꦺꦴꦫꦺꦴ​꧉​

³⁰꧋“ꦱꦏ꧀ꦮꦶꦱ꧀ꦱꦺ​ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦤꦁꦠꦤꦃ​ꦩꦶꦢꦶꦪꦤ꧀ꦠꦼꦫꦸꦱ꧀ꦲꦺꦤꦺꦁꦩꦸꦭꦺꦏꦠ꧀ꦔꦺꦠꦺꦴꦏ꧀ꦩꦫꦁ​ꦤꦧꦶ​ꦩꦺꦴꦱꦼꦱ꧀ꦤꦁꦒꦿꦸꦩ꧀ꦧꦸꦭ꧀ꦭꦤ꧀ꦱꦶꦁ​ꦩꦼꦠꦸ​ꦒꦼꦤꦶꦤꦺ​꧈​ꦤꦁꦮꦸꦱ꧀ꦠꦺꦤ꧀ꦤꦁꦒꦸꦤꦸꦁ​ꦯꦶꦤꦻ꧉​ ^31-32ꦢꦺꦏ꧀ꦤꦺ​ꦔ꧀ꦒꦸꦩꦸꦤ꧀ꦮꦼꦫꦸꦃ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦩꦸꦭꦤꦺ​ꦠꦼꦫꦸꦱ꧀ꦚꦼꦢꦼꦏ꧀ꦏꦶ꧉​ꦤꦁꦔꦶꦁ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:'ꦲꦏꦸ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦩ꧀ꦧꦃꦩ꧀ꦧꦲꦤ꧀ꦩꦸ꧈​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀꧉'​ꦱꦁꦏꦶꦁꦏꦒꦺꦠ꧀ꦠꦺ​ꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦮꦤꦶ​ꦤ꧀ꦢꦼꦭꦺꦴꦏ꧀ꦏꦏꦺ꧉​ ³³ꦤꦁꦔꦶꦁ​ꦒꦸꦱ꧀ꦠꦶ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦢꦺꦏ꧀ꦤꦺ:'ꦱꦼꦥꦠꦸꦩꦸ​ꦢꦶꦕꦼꦥꦺꦴꦠ꧀​꧈​ꦲꦮꦶꦠ꧀ꦏꦺꦴꦮꦺ​ꦔꦢꦼꦏ꧀ꦤꦁꦊꦩꦃ​ꦱꦶꦁ​ꦱꦸꦕꦶ​꧉​ ³⁴ꦲꦏꦸ​ꦮꦶꦱ꧀ꦮꦼꦫꦸꦃ​ꦏꦱꦁꦱꦫꦤꦺ​ꦲꦸꦩꦠ꧀ꦏꦸ​ꦱꦶꦁ​ꦤꦁꦌꦒꦶꦥ꧀ꦠꦼꦭꦤ꧀ꦲꦏꦸ​ꦮꦶꦱ꧀ꦏꦿꦸꦔꦸ​ꦱꦩ꧀ꦧꦠ꧀ꦠꦺ​꧉​ꦲꦏꦸ​ꦠꦼꦏ​ꦲꦉꦥ꧀​ꦔ꧀ꦭꦸꦮꦂꦫꦶ​ꦲꦸꦩꦠ꧀ꦏꦸ​꧈​ꦩꦸꦭꦤꦺ​ꦲꦏꦸ​ꦲꦉꦥ꧀ꦔꦺꦴꦁꦏꦺꦴꦤ꧀ꦏꦺꦴꦮꦺ​ꦧꦸꦢꦭ꧀ꦤꦁꦌꦒꦶꦥ꧀ꦠꦼ꧉​’

³⁵꧋“ꦪ​ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦢꦶꦠꦩ꧀ꦥꦶꦏ꧀ꦏꦫꦺꦴ​ꦧꦁꦱꦤꦺ​ꦢꦺꦮꦺꦔꦁꦒꦺꦴ​ꦠꦼꦩ꧀ꦧꦸꦁ​:'ꦱꦥ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦏꦺꦴꦮꦺ​ꦢꦢꦶ​ꦫꦺꦏ꧀ꦠꦼꦫꦺꦲꦮꦏ꧀ꦏꦺ​ꦢꦺꦮꦺ?’ꦪ​ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦧꦁꦱꦤꦺ​ꦭꦤ꧀ꦱꦶꦁ​ꦏꦸꦢꦸ​ꦔ꧀ꦭꦸꦮꦂꦫꦶ​ꦧꦁꦱꦤꦺ​ꦔꦁꦒꦺꦴ​ꦥꦶꦠꦸꦭꦸꦁꦔꦤ꧀ꦤꦺ​ꦩꦸꦭꦺꦏꦠ꧀ ꦱꦶꦁ​ꦔꦺꦠꦺꦴꦏ꧀ꦩꦫꦁ​ꦢꦺꦏ꧀ꦤꦺꦤꦁꦒꦿꦸꦩ꧀ꦧꦸꦭ꧀ꦭꦤ꧀ꦱꦶꦁ​ꦩꦼꦠꦸ​ꦒꦼꦤꦶꦤꦺ​꧉​ ³⁶ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦤꦸꦤ꧀ꦠꦸꦤ꧀ꦧꦁꦱ​ꦆꦱꦿꦌꦭ꧀ꦩꦼꦠꦸ​ꦱꦁꦏꦤꦼꦒꦫ​ꦌꦒꦶꦥ꧀ꦠꦼꦔꦁꦒꦺꦴ​ꦩꦸꦗꦶꦗꦠ꧀ꦩꦸꦗꦶꦗꦠ꧀ꦭꦤ꧀ꦠꦤ꧀ꦢꦠꦤ꧀ꦢꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​ꦤꦁꦌꦒꦶꦥ꧀ꦠꦼꦭꦤ꧀ꦤꦁꦱꦼꦒꦫ​ꦲꦧꦁ​ꦭꦤ꧀ꦲꦸꦒ​ꦤꦁꦮꦸꦱ꧀ꦠꦺꦤ꧀ ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦱꦸꦮꦺꦤꦺ​꧉​ ³⁷ꦪ​ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦔꦺꦴꦩꦺꦴꦁꦩꦫꦁ​ꦧꦁꦱꦤꦺ​:'ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦺꦴꦁꦏꦺꦴꦤ꧀ꦤꦧꦶ​ꦏꦪ​ꦲꦏꦸ​ꦲꦶꦏꦶ​ꦱꦁꦏꦠꦼꦔꦃꦲꦺ​ꦱꦼꦢꦸꦭꦸꦂꦩꦸꦏꦁꦒꦺꦴ​ꦏꦺꦴꦮꦺ​ꦏꦧꦺꦃ​!’ ³⁸ꦪ​ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦔ꧀ꦭꦸꦩ꧀ꦥꦸꦏ꧀ꦏꦫꦺꦴ​ꦧꦁꦱ​ꦆꦱꦿꦌꦭ꧀ꦤꦁꦮꦸꦱ꧀ꦠꦺꦤ꧀꧈​ꦢꦺꦏ꧀ꦤꦺꦤꦁꦏꦺꦴꦤꦺꦴ​ꦧꦼꦧꦉꦁꦔꦤ꧀ꦏꦫꦺꦴ​ꦩꦸꦭꦺꦏꦠ꧀ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦩꦫꦁ​ꦢꦺꦏ꧀ꦤꦺꦤꦁꦒꦸꦤꦸꦁ​ꦯꦶꦤꦻꦭꦤ꧀ꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧉​ꦤꦧꦶ​ꦩꦺꦴꦱꦼꦱ꧀ꦲꦶꦏꦶ​ꦱꦶꦁ​ꦤꦩ꧀ꦥ​ꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦩ꧀ꦧꦸꦁ​ꦱꦶꦁ​ꦤꦼꦏꦏ꧀ꦏꦏꦺꦲꦸꦫꦶꦥ꧀ꦭꦤ꧀ꦱꦶꦁ​ꦏꦸꦢꦸ​ꦢꦶꦏꦧꦂꦫꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

³⁹꧋“ꦤꦁꦔꦶꦁ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦤꦧꦶ​ꦩꦺꦴꦱꦼꦱ꧀ ꦩꦭꦃ​ꦥꦢ​ꦤꦩ꧀ꦥꦶꦏ꧀ꦢꦺꦏ꧀ꦤꦺꦭꦤ꧀​ꦚ꧀ꦗꦭꦸꦏ꧀ꦧꦭꦶꦏ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ ⁴⁰ꦮꦺꦴꦁꦮꦺꦴꦁ​ꦩꦲꦸ​ꦔꦺꦴꦩꦺꦴꦁꦩꦫꦁ​ꦄꦫꦺꦴꦤ꧀:'ꦲꦮꦏ꧀ꦏꦺ​ꦢꦺꦮꦺꦲꦩ꧀ꦧꦺꦴꦏ꧀ꦢꦶꦒꦮꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦶꦱ​ꦤꦸꦤ꧀ꦠꦸꦤ꧀ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​ꦲꦼꦩ꧀ꦧꦸꦃ​ꦏꦼꦥꦿꦶꦪꦺ​ꦱꦲꦶꦏꦶ​ꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ ꦱꦶꦁ​ꦲꦩ꧀ꦧꦺꦴꦪꦺꦴꦁ​ꦲꦮꦏ꧀ꦏꦺ​ꦢꦺꦮꦺꦱꦁꦏꦌꦒꦶꦥ꧀ꦠꦼ꧉'​ ⁴¹ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦥꦢ​ꦔ꧀ꦒꦮꦺ​ꦉꦕ​ꦫꦸꦥ​ꦱꦥꦶ​ꦥꦼꦢꦺꦠ꧀ꦠꦼꦫꦸꦱ꧀ꦢꦶꦱꦗꦺꦤ꧀ꦤꦶ​꧉​ꦠꦼꦫꦸꦱ꧀ꦥꦢ​ꦩꦁꦔꦤ꧀ꦲꦺꦤꦏ꧀ꦏꦁꦒꦺꦴ​ꦔꦸꦂꦩꦠ꧀ꦒꦮꦺꦪꦤ꧀ꦤꦺ​ꦢꦺꦮꦺ꧉​ ⁴²ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦚꦶꦁꦏꦸꦂꦫꦶꦮꦺꦴꦁꦮꦺꦴꦁ​ꦩꦲꦸ​꧈​ꦩꦸꦭꦤꦺ​ꦢꦶꦲꦼꦗꦂꦫꦏꦺꦲꦼꦁꦒꦺꦴꦤꦺ​ꦥꦢ​ꦚꦼꦩ꧀ꦧꦃ​ꦩꦫꦁ​ꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀꧈​ꦥꦚ꧀ꦕꦺꦤ꧀​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦧꦺ​ꦥꦫ​ꦤꦧꦶ​꧈​ꦲꦸꦤꦶꦤꦺ​ꦔꦺꦤꦺ​:

‘ꦲꦺ​ꦮꦺꦴꦁ​ꦆꦱꦿꦌꦭ꧀!ꦲꦼꦁꦒꦺꦴꦤ꧀ꦩꦸ​ꦚꦼꦩ꧀ꦧꦼꦭꦺꦃ​ꦭꦤ꧀ꦏꦸꦂꦧꦤ꧀ꦏꦺꦮꦤ꧀ꦏꦺꦮꦤ꧀
ꦱꦸꦮꦺꦤꦺ​ꦏꦺꦴꦮꦺ​ꦤꦁꦮꦸꦱ꧀ꦠꦺꦤ꧀ꦥꦠꦁ​ꦥꦸꦭꦸꦃ​ꦠꦲꦸꦤ꧀
ꦏꦸꦮꦶ​ꦲꦥ​ꦏꦁꦒꦺꦴ​ꦲꦏꦸ​?
⁴³ꦲꦺꦴꦫ​!ꦤꦁꦔꦶꦁ​ꦠꦫꦸꦥ꧀ꦥꦺꦩꦺꦴꦭꦺꦴꦏ꧀
ꦭꦤ꧀ꦭꦶꦤ꧀ꦠꦁꦔꦺ​ꦢꦺꦮ​ꦫꦺꦥ꦳ꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦫꦏ꧀ꦲꦫꦏ꧀꧈​
ꦏꦸꦮꦶ​ꦉꦕꦉꦕ​ꦱꦶꦁ​ꦲꦩ꧀ꦧꦺꦴꦏ꧀ꦒꦮꦺ​ꦭꦤ꧀ꦲꦩ꧀ꦧꦺꦴꦏ꧀ꦱꦼꦩ꧀ꦧꦃ​꧉​
ꦗꦭꦂꦫꦤ꧀ꦱꦁꦏꦏꦸꦮꦶ​

꧋ꦏꦺꦴꦮꦺ​ꦧꦏꦭ꧀ꦠꦏ꧀ꦲꦸꦱꦶꦂ
ꦲꦢꦺꦴꦃꦲꦺ​ꦔ꧀ꦭꦶꦮꦠ꧀ꦠꦶ​ꦤꦼꦒꦫ​ꦨꦧꦶꦭꦺꦴꦤ꧀꧈​’

⁴⁴“ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦥꦢ​ꦤ꧀ꦢꦸꦮꦺꦤ꧀ꦤꦶ​ꦠꦫꦸꦥ꧀ꦥꦺꦥꦽꦗꦚ꧀ꦗꦶꦪꦤ꧀ꦤꦁꦮꦸꦱ꧀ꦠꦺꦤ꧀꧈​꧌ꦏꦸꦮꦶ​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦺꦴꦤ꧀ꦤꦁꦠꦼꦔꦃꦲꦺ​ꦲꦸꦩꦠ꧀ꦠꦺ​)꧉​ꦡꦫꦸꦥ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦒꦮꦺꦪꦤ꧀ꦤꦺ​ꦩꦶꦠꦸꦫꦸꦠ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦤꦧꦶ​ꦩꦺꦴꦱꦼꦱ꧀ ꦩꦤꦸꦠ꧀ꦒꦩ꧀ꦧꦂ​ꦱꦶꦁ​ꦮꦶꦱ꧀ꦢꦶꦢꦸꦢꦸꦃꦲꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦤꦧꦶ​ꦩꦺꦴꦱꦼꦱ꧀꧈​ ⁴⁵ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤꦩ꧀ꦥ​ꦡꦫꦸꦥ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦱꦁꦏꦮꦺꦴꦁ​ꦠꦸꦮꦤꦺ​꧉​ꦡꦫꦸꦥ꧀ꦩꦲꦸ​ꦢꦶꦒꦮ​ꦱꦏ꧀ꦱꦸꦮꦺꦤꦺ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦶꦠꦸꦤ꧀ꦠꦸꦤ꧀ꦏꦫꦺꦴ​ꦪꦺꦴꦱꦸꦮ​ꦩ꧀ꦊꦧꦸ​ꦤꦼꦒꦫ​ꦲꦶꦏꦶ​꧉​ꦤꦼꦒꦫ​ꦲꦶꦏꦶ​ꦏꦉꦧꦸꦠ꧀ꦱꦁꦏꦧꦁꦱꦧꦁꦱ​ꦱꦶꦁ​ꦢꦶꦲꦸꦱꦶꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱꦏ꧀ꦔꦉꦥ꧀ꦥꦺ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧉​ꦡꦫꦸꦥ꧀ꦩꦲꦸ​ꦏꦱꦶꦩ꧀ꦥꦼꦤ꧀ꦔꦤ꧀ꦠꦶ​ꦠꦼꦏꦤ꧀ꦗꦩꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​ ⁴⁶ꦫꦠꦸ​ꦣꦮ꦳ꦼꦢ꧀ꦤꦩ꧀ꦥ​ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦚꦸꦮꦸꦤ꧀ꦩꦫꦁ​ꦢꦺꦏ꧀ꦤꦺ꧈​ꦱꦸꦥꦪ​ꦢꦶꦭꦶꦭꦤꦶ​ꦔ꧀ꦒꦮꦺꦏ꧀ꦏꦏꦺꦲꦺꦴꦩꦃ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦱꦼꦩ꧀ꦧꦃꦲꦤ꧀ꦤꦺ​ꦪꦏꦸꦧ꧀꧈​ ⁴⁷ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦶꦁ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦲꦸ​ꦠꦶꦧ​ꦯꦺꦴꦭꦺꦩꦤ꧀꧈​

⁴⁸꧋“ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​ꦲꦺꦴꦫ​ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦏꦪ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦧꦺ​ꦥꦫ​ꦤꦧꦶ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

⁴⁹‘ꦭꦔꦶꦠ꧀ꦏꦸꦮꦶ​ꦗꦒꦺꦴꦔꦤ꧀ꦏꦸ
ꦭꦤ꧀ꦧꦸꦩꦶ​ꦏꦸꦮꦶ​ꦲꦚ꧀ꦕꦶꦏ꧀ꦲꦚ꧀ꦕꦶꦏ꧀ꦏꦺ​ꦱꦶꦏꦶꦭ꧀ꦏꦸ​꧉​
ꦲꦺꦴꦩꦃ​ꦱꦶꦁ​ꦏꦪ​ꦔꦥ​ꦲꦉꦥ꧀ꦲꦩ꧀ꦧꦺꦴꦏ꧀ꦒꦮꦺ​ꦏꦁꦒꦺꦴ​ꦲꦏꦸ​
ꦭꦤ꧀ꦤꦁꦲꦼꦤ꧀ꦢꦶ​ꦥꦁꦒꦺꦴꦤ꧀ꦤꦤ꧀ꦏꦸ​ꦏꦁꦒꦺꦴ​ꦭꦺꦫꦺꦤ꧀꧈​
⁵⁰ꦲꦥ​ꦲꦺꦴꦫ​ꦲꦏꦸ​ꦢꦺꦮꦺ
ꦱꦶꦁ​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦲꦶꦏꦶ​ꦏꦧꦺꦃ​?ꦪꦏꦸꦮꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​!’

⁵¹꧋“ꦏꦺꦴꦏ꧀ꦮꦁꦏꦺꦴꦠ꧀ꦠꦼꦩꦼꦤ꧀ꦲꦠꦶꦩꦸ​!ꦏꦺꦴꦏ꧀ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​!ꦏꦺꦴꦮꦺ​ꦲꦺꦴꦫ​ꦱꦺꦗꦺ​ꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦩꦸꦱꦶꦁ​ꦠꦤ꧀ꦱꦃ​ꦔ꧀ꦭꦮꦤ꧀ꦩꦫꦁ​ꦫꦺꦴꦃ​ꦱꦸꦕꦶ​! ⁵²ꦲꦥ​ꦲꦺꦤꦺꦁꦤꦧꦶ​ꦱꦶꦁ​ꦲꦺꦴꦫ​ꦢꦶꦱꦶꦪꦱꦶꦪ​ꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦩꦸ?ꦮꦺꦴꦁꦮꦺꦴꦁ​ꦱꦶꦁ​ꦔꦧꦂꦫꦏꦺꦠꦼꦏꦤꦺ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦥꦢ​ꦲꦩ꧀ꦧꦺꦴꦏ꧀ꦥꦠꦺꦤ꧀ꦤꦶ​ꦭꦤ꧀ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦢꦺꦮꦺꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁ​ꦩꦸꦁꦱꦸꦃꦲꦺ​ꦏꦺꦴꦁꦏꦺꦴꦤ꧀ꦩꦠꦺꦤ꧀ꦤꦶ​꧉​ ⁵³ꦪ​ꦏꦺꦴꦮꦺ​ꦏꦸꦮꦶ​ꦱꦶꦁ​ꦮꦶꦱ꧀ꦤꦩ꧀ꦥ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦁꦏꦥꦫ​ꦩꦸꦭꦺꦏꦠ꧀ ꦤꦁꦔꦶꦁ​ꦮꦺꦠ꧀ꦮꦺꦠ꧀ꦏꦸꦮꦶ​ꦲꦺꦴꦫ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​”

꧋ꦱ꧀ꦠꦺꦥ꦳ꦤꦸꦱ꧀ꦢꦶꦥꦠꦺꦤ꧀ꦤꦶ​꧉​

⁵⁴꧋ꦏꦿꦸꦔꦸ​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦺ​ꦱ꧀ꦠꦺꦥ꦳ꦤꦸꦱ꧀ꦏꦸꦮꦶ​ꦥꦫ​ꦮꦂꦒꦤꦺ​ꦏꦿꦸꦠꦺꦴꦤ꧀ꦲꦒꦩ​ꦠꦼꦫꦸꦱ꧀ꦥꦢ​ꦥꦤꦱ꧀ꦧꦔꦼꦠ꧀ꦲꦠꦶꦤꦺ​ꦭꦤ꧀ꦥꦢ​ꦔ꧀ꦒꦼꦒꦼꦠ꧀ꦲꦸꦤ꧀ꦠꦸ​ꦱꦁꦏꦶꦁꦒꦽꦒꦼꦠ꧀ꦠꦼꦤ꧀ꦠꦼꦤꦤ꧀꧈​ ⁵⁵ꦤꦁꦔꦶꦁ​ꦱ꧀ꦠꦺꦥ꦳ꦤꦸꦱ꧀ꦏꦼꦧꦼꦏ꧀ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ꦢꦺꦏ꧀ꦤꦺꦚꦮꦁ​ꦤꦁꦭꦔꦶꦠ꧀ꦮꦼꦫꦸꦃ​ꦏꦩꦸꦭꦾꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦸꦒ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦢꦼꦏ꧀ꦤꦁꦠꦼꦔꦼꦤꦺ​꧉​ ⁵⁶ꦱ꧀ꦠꦺꦥ꦳ꦤꦸꦱ꧀ꦔꦺꦴꦩꦺꦴꦁ:“ꦢꦼꦭꦺꦴꦏ꧀ꦏꦼꦤ꧀ ꦲꦏꦸ​ꦮꦼꦫꦸꦃ​ꦱ꧀ꦮꦂꦒ​ꦩꦼꦔ​ꦭꦤ꧀ꦲꦤꦏ꧀ꦏꦺ​ꦩꦤꦸꦁꦱ​ꦔꦢꦼꦏ꧀ꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

⁵⁷꧋ꦏꦢꦸꦁ​ꦏꦿꦸꦔꦸ​ꦠꦼꦩ꧀ꦧꦸꦁ​ꦏꦸꦮꦶ​ꦥꦫ​ꦮꦂꦒꦤꦺ​ꦏꦿꦸꦠꦺꦴꦤ꧀ꦲꦒꦩ​ꦠꦼꦫꦸꦱ꧀ꦥꦢ​ꦧꦼꦔꦺꦴꦏ꧀ꦧꦼꦔꦺꦴꦏ꧀ꦏꦫꦺꦴ​ꦤꦸꦠꦸꦥ꧀ꦥꦶ​ꦏꦸꦥꦶꦁꦔꦺ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦔꦿꦺꦴꦪꦺꦴꦏ꧀ꦱ꧀ꦠꦺꦥ꦳ꦤꦸꦱ꧀꧈​ ⁵⁸ꦱ꧀ꦠꦺꦥ꦳ꦤꦸꦱ꧀ꦢꦶꦱꦺꦫꦺꦠ꧀ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠ꧈​ꦠꦼꦫꦸꦱ꧀ꦢꦶꦧꦤ꧀ꦢꦼꦩ꧀ꦩꦶꦮꦠꦸ​꧉​ꦮꦺꦴꦁꦮꦺꦴꦁ​ꦱꦶꦁ​ꦚꦼꦏ꧀ꦱꦺꦤ꧀ꦤꦶ​ꦩꦲꦸ​ꦠꦼꦫꦸꦱ꧀ꦥꦢ​ꦲꦸꦕꦸꦭ꧀ꦲꦸꦕꦸꦭ꧀​ꦭꦤ꧀ꦱꦭꦶꦤ꧀ꦤꦺꦚ꧀ꦗꦧ​ꦠꦼꦫꦸꦱ꧀ꦢꦶꦱꦺꦭꦺꦃꦲꦏꦺꦤꦁꦔꦉꦥ꧀ꦥꦺ​ꦱꦏ꧀ꦮꦶꦗꦶꦤꦺꦮꦺꦴꦁ​ꦲꦼꦤꦺꦴꦩ꧀ꦱꦶꦁ​ꦗꦼꦤꦼꦁꦔꦺ​ꦱꦲꦸꦭꦸꦱ꧀꧈​ ⁵⁹ꦱꦏ꧀ꦧꦉꦁꦔꦺꦢꦶꦧꦤ꧀ꦢꦼꦩ꧀ꦩꦶꦮꦠꦸ​ꦩꦲꦸ​ꦱ꧀ꦠꦺꦥ꦳ꦤꦸꦱ꧀​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦔꦺꦴꦩꦺꦴꦁ:“ꦢꦸꦃꦒꦸꦱ꧀ꦠꦶ​ꦪꦺꦯꦸꦱ꧀ ꦠꦩ꧀ꦥꦤꦼꦤ꧀ꦚꦮꦏꦸ​꧉​” ⁶⁰ꦢꦺꦏ꧀ꦤꦺꦠꦼꦫꦸꦱ꧀ꦱꦼꦢꦼꦏꦸꦭꦤ꧀ꦔꦺꦴꦩꦺꦴꦁꦧꦤ꧀ꦠꦼꦂ​:“ꦢꦸꦃꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦱꦭꦃꦲꦺ​ꦮꦺꦴꦁꦮꦺꦴꦁ​ꦲꦶꦏꦶ​ꦢꦶꦔꦥꦸꦫ!”ꦱꦏ꧀ꦮꦶꦱ꧀ꦱꦺ​ꦔꦺꦴꦩꦺꦴꦁꦏꦸꦮꦶ​ꦱ꧀ꦠꦺꦥ꦳ꦤꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀꧈​

↑ ↑ ↑

← ꧇​꧖꧇​

꧇​꧘꧇​ →