ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/13

꧋ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦢꦶꦥꦶꦭꦶꦃ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​

꧇​꧑꧓꧇​ ¹꧋ꦤꦁꦥꦱꦩꦸꦮꦤ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​ꦲꦺꦤꦺꦁꦤꦧꦶꦤꦧꦶ​ꦭꦤ꧀ ꦒꦸꦫꦸꦒꦸꦫꦸ​ꦏꦪꦢꦺꦤꦺꦧꦂꦤꦧꦱ꧀ ꦱꦶꦩꦺꦪꦺꦴꦤ꧀ ꦱꦶꦁ​ꦲꦸꦒ​ꦏꦕꦼꦭꦸꦏ꧀​ꦤꦶꦒꦺꦂ​꧈​ꦭꦸꦱꦶꦪꦸꦱ꧀ꦱꦁꦏꦏꦶꦫꦺꦤꦺ​꧈​ꦩꦤꦆꦤ꧀ꦭꦤ꧀ꦱꦲꦸꦭꦸꦱ꧀꧈​ꦩꦤꦆꦤ꧀ꦏꦸꦮꦶ​ꦕꦶꦭꦶꦏ꧀ꦏꦤ꧀ꦏꦸ​ꦢꦶꦲꦼꦩꦺꦴꦁ​ꦧꦉꦁ​ꦏꦫꦺꦴ​ꦫꦠꦸ​ꦲ꦳ꦺꦫꦺꦴꦢꦺꦱ꧀꧈​ ²ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​꧈​ꦢꦺꦴꦁꦔꦺꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦔꦸꦩ꧀ꦥꦸꦭ꧀ꦩꦼꦩꦸꦗꦶ​ꦒꦸꦱ꧀ꦠꦶ​ꦭꦤ꧀ꦥꦱ​꧈​ꦫꦺꦴꦃ​ꦱꦸꦕꦶ​ꦔꦺꦴꦩꦺꦴꦁ:“ꦲꦏꦸ​ꦩ꧀ꦧꦸꦠꦸꦃꦲꦏꦺꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦏꦁꦒꦺꦴ​ꦥꦼꦁꦒꦮꦺꦏꦸꦱꦶꦁ​ꦒꦼꦢꦺ꧉​” ³ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦱ​ꦭꦤ꧀​ꦤ꧀ꦢꦺꦴꦁꦔꦠꦼꦫꦸꦱ꧀ꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦤꦸꦩ꧀ꦥꦁꦔꦶ​ꦠꦔꦤ꧀​ꦤ꧀ꦢꦺꦴꦔꦏ꧀ꦏꦏꦺꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀꧈​

꧋ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦤꦁꦥꦸꦭꦱꦶꦥꦿꦸꦱ꧀꧈​

⁴꧋ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦠꦼꦫꦸꦱ꧀ꦩꦤꦸꦠ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦫꦺꦴꦃ​ꦱꦸꦕꦶ​ꦧꦸꦢꦭ꧀ꦤꦁꦏꦸꦠꦯꦼꦭꦸꦏꦶꦪ꧉​ꦱꦁꦏꦏꦺꦴꦤꦺꦴ​ꦠꦼꦫꦸꦱ꧀ꦤꦸꦩ꧀ꦥꦏ꧀ꦥꦿꦲꦸ​ꦔꦧꦿꦃꦤꦁꦥꦸꦭꦱꦶꦥꦿꦸꦱ꧀꧈​ ⁵ꦏꦢꦸꦁ​ꦮꦶꦱ꧀ꦠꦼꦏꦤ꧀ꦏꦸꦠꦱꦭꦩꦶꦱ꧀ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦠꦼꦫꦸꦱ꧀ꦥꦢ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀ꦏꦺꦮꦺꦴꦁ​ꦙꦸ꧉​ꦪꦺꦴꦲꦤꦼꦱ꧀ꦲꦩ꧀ꦧꦫꦁ​ꦪ​ꦩꦺꦭꦸ​ꦔꦿꦺꦮꦁꦔꦶ​ꦤꦁꦏꦺꦴꦤꦺꦴ​꧉​ꦲꦶꦏꦶ​ꦪꦺꦴꦲꦤꦼꦱ꧀ꦱꦶꦁ​ꦲꦸꦒ​ꦏꦕꦼꦭꦸꦏ꧀​ꦩꦂꦏꦸꦱ꧀꧈​

⁶꧋ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦥꦢ​ꦤ꧀​ꦢ꧀ꦭꦗꦃꦲꦶ​ꦥꦸꦭꦱꦶꦥꦿꦸꦱ꧀ꦱꦩ꧀ꦥꦺꦏ꧀ꦫꦠ​ꦔꦤ꧀ꦠꦶ​ꦠꦼꦏꦤ꧀ꦏꦸꦠꦥꦥ꦳ꦺꦴꦱ꧀꧈​ꦤꦁꦏꦸꦠꦥꦥ꦳ꦺꦴꦱ꧀ꦏꦺꦴꦤꦺꦴ​ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦏꦼꦥꦼꦠꦸꦏ꧀ꦏꦫꦺꦴ​ꦮꦺꦴꦁ​ꦙꦸꦱꦶꦁ​ꦗꦼꦤꦼꦁꦔꦺ​ꦨꦂꦪꦺꦱꦸꦱ꧀꧈​ꦨꦂꦪꦺꦱꦸꦱ꧀ꦲꦶꦏꦶ​ꦔꦏꦸꦤꦺ​ꦤꦧꦶ​꧈​ꦤꦁꦔꦶꦁ​ꦢꦺꦏ꧀ꦤꦺꦔꦁꦒꦺꦴꦏ꧀ꦏꦏꦺꦥꦔ꧀ꦮꦱ​ꦥꦼꦥꦼꦠꦼꦁ​꧉​ ⁷ꦨꦂꦪꦺꦱꦸꦱ꧀ꦲꦶꦏꦶ​ꦏꦚ꧀ꦕꦤꦺ​ꦱꦺꦂꦒꦶꦪꦸꦱ꧀ꦦꦈꦭꦸꦱ꧀ ꦒꦿꦩꦁꦔꦺꦥꦸꦭꦏꦺꦴꦤꦺꦴ​꧈​ꦮꦺꦴꦁ​ꦱꦶꦁ​ꦗꦼꦫꦸꦏꦮꦼꦫꦸꦃꦲꦺ꧉​ꦒꦿꦩꦁꦱꦺꦂꦒꦶꦪꦸꦱ꧀ꦦꦈꦭꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦚꦼꦭꦸꦏ꧀ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ ꦲꦮꦶꦠ꧀ꦏꦼꦥꦺꦔꦶꦤ꧀ꦏꦿꦸꦔꦸ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦤꦁꦔꦶꦁ​ꦌꦭꦶꦩꦱ꧀ ꦏꦸꦮꦶ​ꦗꦼꦤꦼꦁꦔꦺ​ꦨꦂꦪꦺꦱꦸꦱ꧀ꦲꦶꦁ​ꦠꦼꦩ꧀ꦧꦸꦁ​ꦒꦿꦶꦏ꧀ ꦔꦭꦁꦔꦭꦁꦔꦶꦱꦸꦥꦪ​ꦒꦿꦩꦁꦔꦺꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ⁹ꦱꦲꦸꦭꦸꦱ꧀ ꦱꦶꦁ​ꦲꦸꦒ​ꦏꦼꦕꦼꦭꦸꦏ꧀​ꦦꦈꦭꦸꦱ꧀ ꦩꦤ꧀ꦢꦼꦁ​ꦮꦺꦴꦁꦔꦺ​꧉​ ¹⁰ꦲꦶꦁ​ꦏ꧀ꦮꦱꦤꦺ​ꦫꦺꦴꦃ​ꦱꦸꦕꦶ​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦌꦭꦶꦩꦱ꧀ ꦏꦺꦴꦮꦺ​ꦏꦸꦮꦶ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦱꦺꦠꦤ꧀꧈​ꦲꦠꦶꦩꦸ​ꦏꦼꦧꦼꦏ꧀ꦏꦫꦺꦴ​ꦥꦶꦏꦶꦂꦫꦤ꧀ꦱꦶꦁ​ꦲꦭ​꧈​ꦩꦸꦭꦤꦺ​ꦏꦺꦴꦮꦺ​ꦔ꧀ꦭꦮꦤ꧀ꦱꦼꦩ꧀ꦧꦫꦁ​ꦱꦶꦁ​ꦧꦼꦕꦶꦏ꧀꧈​ꦱꦼꦤꦼꦁꦩꦸ​ꦤꦩꦸꦁ​ꦩꦭꦶꦏ꧀ꦥꦶꦮꦸꦭꦁꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦱꦶꦁ​ꦧꦼꦤꦼꦂ​꧉​ ¹¹ꦱꦲꦶꦏꦶ​ꦠꦔꦤ꧀ꦤꦺ​ꦒꦸꦱ꧀ꦠꦶ​ꦧꦏꦭ꧀​ꦔ꧀ꦒꦼꦧꦸꦏ꧀ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦧꦏꦭ꧀ꦭꦩꦸꦂ​ꦭꦤ꧀ꦲꦺꦴꦫ​ꦧꦏꦭ꧀ꦮꦼꦫꦸꦃ​ꦥꦢꦁꦔꦺꦱꦽꦔꦺꦔꦺ​ꦱꦏ꧀ꦲꦸꦤ꧀ꦠꦂꦫ꧉​”

꧋ꦱꦏ꧀ꦮꦠ꧀ꦌꦭꦶꦩꦱ꧀ꦩꦿꦶꦥꦠ꧀ꦠꦺ​ꦭꦩꦸꦂ​ꦭꦤ꧀ꦲꦺꦴꦫ​ꦮꦼꦫꦸꦃ​ꦲꦥꦲꦥ​꧈​ꦠꦼꦫꦸꦱ꧀ꦕꦼꦩꦸꦩꦏ꧀ꦕꦼꦩꦸꦩꦸꦏ꧀​ꦔ꧀ꦒꦺꦴꦭꦺꦏ꧀ꦢꦭꦤ꧀ꦭꦤ꧀​ꦚ꧀ꦗꦭꦸꦏ꧀ꦢꦶꦠꦸꦤ꧀ꦠꦸꦤ꧀꧈​ ¹²ꦒꦿꦩꦁꦔꦺꦮꦼꦫꦸꦃ​ꦊꦭꦏꦺꦴꦤ꧀ꦏꦸꦮꦶ​ꦠꦼꦫꦸꦱ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺꦔ꧀ꦒꦸꦩꦸꦤ꧀ꦤꦺꦲꦺꦫꦩ꧀ꦩꦺꦫꦩ꧀ꦧꦧ꧀ꦥꦶꦮꦸꦭꦁꦔꦺ​ꦒꦸꦱ꧀ꦠꦶ​꧉​

꧋ꦧꦂꦤꦧꦱ꧀ꦭꦤ꧀ꦦꦈꦭꦸꦱ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧈​ꦧꦮꦃꦦꦶꦱꦶꦢꦶ꧉​

¹³꧋ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦱꦏ꧀ꦏꦚ꧀ꦕꦤꦺ​ꦠꦼꦫꦸꦱ꧀ꦤꦸꦩ꧀ꦥꦏ꧀ꦥꦿꦲꦸ​ꦭꦸꦔ​ꦱꦁꦏꦏꦸꦠꦥꦥ꦳ꦺꦴꦱ꧀ ꦧꦸꦢꦭ꧀ꦤꦁꦏꦸꦠꦦꦺꦂꦒꦶꦤꦁꦧꦮꦃꦦꦩ꧀ꦥ꦳ꦶꦭꦶ꧉​ꦤꦁꦔꦶꦁ​ꦪꦺꦴꦲꦤꦼꦱ꧀ꦩꦂꦏꦸꦱ꧀ꦲꦺꦴꦫ​ꦒꦼꦊꦩ꧀ꦩꦺꦭꦸ​ꦠꦼꦫꦸꦱ꧀ ꦩꦭꦃ​ꦧꦭꦶꦏ꧀ꦤꦁꦪꦺꦫꦸꦱꦭꦺꦩ꧀꧈​ ¹⁴ꦱꦁꦏꦏꦸꦠꦦꦺꦂꦒꦶꦧꦂꦤꦧꦱ꧀ꦭꦤ꧀ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦠꦼꦫꦸꦱ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶꦤꦁꦧꦮꦃꦦꦶꦱꦶꦢꦶ꧉​ꦲꦶꦁ​ꦢꦶꦤ​ꦱꦧꦠ꧀ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦠꦼꦫꦸꦱ꧀ꦩꦺꦭꦸ​ꦔꦸꦩ꧀ꦥꦸꦭ꧀ꦤꦁꦱꦶꦤꦒꦸꦏ꧀꧈​ ¹⁵ꦱꦏ꧀ꦮꦶꦱ꧀ꦱꦺ​ꦩꦕ​ꦱꦁꦏꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦭꦤ꧀ꦏꦶꦠꦧ꧀ꦧꦺ​ꦥꦫ​ꦤꦧꦶ​꧈​ꦥꦫ​ꦥꦶꦤꦶꦠꦸꦮꦤꦺ​ꦱꦶꦤꦒꦸꦏ꧀ꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦠꦏꦺꦴꦤ꧀ꦩꦫꦁ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ ꦩꦼꦤꦮ​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦏꦁꦒꦺꦴ​ꦲꦩ꧀ꦧꦔꦸꦤ꧀ꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​꧉​ ¹⁶ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦔꦸꦩ꧀ꦧꦸꦭ꧀ꦭꦏꦺꦠꦔꦤ꧀ꦤꦺ​꧈​ꦔꦼꦏꦺꦏ꧀ꦏꦶꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​꧉​ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦔꦺꦤꦺ​:

꧋“ꦥꦫ​ꦱꦼꦢꦸꦭꦸꦂ​ꦧꦁꦱ​ꦆꦱꦿꦌꦭ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦁ​ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦥꦁꦒꦺꦴꦤ꧀ꦤꦤ꧀ꦏꦺꦤꦺ​!ꦲꦏꦸ​ꦚꦸꦮꦸꦤ꧀ꦥꦢ​ꦔꦿꦸꦔꦺꦴꦏ꧀ꦏꦏꦺꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​꧉​ ¹⁷ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦧꦁꦱ​ꦆꦱꦿꦌꦭ꧀ ꦮꦶꦱ꧀ꦩꦶꦭꦶꦃ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦧꦁꦱ​ꦲꦶꦏꦶ​ꦢꦶꦢꦢꦺꦏ꧀ꦏꦏꦺꦧꦁꦱ​ꦱꦶꦁ​ꦒꦼꦢꦺ꧈​ꦢꦺꦴꦁꦔꦺꦲꦶꦗꦶꦏ꧀ꦩꦁꦒꦺꦴꦤ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ꦔꦁꦒꦺꦴ​ꦏ꧀ꦮꦱ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀​ꦔ꧀ꦭꦸꦮꦂꦫꦶ​ꦧꦁꦱ​ꦲꦶꦏꦶ​ꦱꦁꦏꦥꦔ꧀ꦮꦱꦤꦺ​ꦤꦼꦒꦫ​ꦌꦒꦶꦥ꧀ꦠꦼ꧉​ ¹⁸ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦱꦸꦮꦺꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦧꦂꦫꦶ​ꦮꦔꦶꦮꦔꦶꦤꦺꦧꦁꦱ​ꦲꦶꦏꦶ​ꦱꦸꦮꦺꦤꦺ​ꦤꦁꦮꦸꦱ꧀ꦠꦺꦤ꧀꧈​ ¹⁹ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦭꦸꦏ꧀ꦏꦏꦺꦧꦁꦱ​ꦥꦶꦠꦸ​ꦤꦁꦤꦼꦒꦫ​ꦑꦤꦄꦤ꧀ꦭꦤ꧀ꦤꦼꦒꦫꦤꦺ​ꦢꦶꦏꦺꦏ꧀ꦏꦏꦺꦩꦫꦁ​ꦧꦁꦱ​ꦆꦱꦿꦌꦭ꧀ꦏꦺꦴꦁꦏꦺꦴꦤ꧀ꦔꦼꦁꦒꦺꦴꦤ꧀ꦤꦶ​꧈​ꦥꦠꦁ​ꦲꦠꦸꦱ꧀ꦱꦺꦏꦼꦠ꧀ꦠꦲꦸꦤ꧀ꦱꦸꦮꦺꦤꦺ​꧉​

²⁰꧋“ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦢꦶꦏꦺꦏ꧀ꦏꦶꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦔꦤ꧀ꦠꦶ​ꦗꦩꦤ꧀ꦤꦺ​ꦤꦧꦶ​ꦱꦩꦸꦮꦺꦭ꧀꧈​ ²¹ꦧꦁꦱ​ꦆꦱꦿꦌꦭ꧀ꦠꦼꦫꦸꦱ꧀​ꦚ꧀ꦗꦭꦸꦏ꧀ ꦫꦠꦸ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦔꦼꦏꦺꦏ꧀ꦏꦶꦱꦲꦸꦭ꧀ ꦲꦤꦏ꧀ꦏꦺ​ꦏꦶꦱ꧀ ꦢꦢꦶ​ꦫꦠꦸꦤꦺ​꧉​ꦱꦲꦸꦭ꧀ꦲꦶꦏꦶ​ꦱꦁꦏꦠꦸꦫꦸꦤ꧀ꦤꦤ꧀ꦤꦺ​ꦧꦺꦚꦩꦶꦤ꧀ꦭꦤ꧀ꦢꦺꦏ꧀ꦤꦺꦢꦢꦶ​ꦫꦠꦸ​ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦱꦸꦮꦺꦤꦺ​꧉​ ²²ꦤꦁꦔꦶꦁ​ꦱꦲꦸꦭ꧀ꦠꦼꦫꦸꦱ꧀ꦢꦶꦲꦼꦢꦸꦤ꧀ꦤꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦣꦮ꦳ꦼꦢ꧀ꦱꦶꦁ​ꦢꦶꦢꦢꦺꦏ꧀ꦏꦏꦺꦫꦠꦸ​꧉​ꦧꦧ꧀ꦣꦮ꦳ꦼꦢ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:'ꦣꦮ꦳ꦼꦢ꧀ꦲꦶꦏꦶ​꧈​ꦲꦤꦏ꧀ꦏꦺ​ꦆꦱꦲꦶ​꧈​ꦥꦚ꧀ꦕꦺꦤ꧀ꦮꦺꦴꦁ​ꦱꦶꦁ​ꦠꦏ꧀ꦱꦼꦤꦼꦁꦔꦶ​ꦠꦼꦤꦤ꧀꧈​ꦢꦺꦏ꧀ꦤꦺꦧꦏꦭ꧀ꦤꦸꦫꦸꦠ꧀ꦠꦶ​ꦲꦥ​ꦏꦉꦥ꧀ꦏꦸ​꧉'​ ²³ꦭꦤ꧀ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦸꦫꦸꦤ꧀ꦤꦤ꧀ꦤꦺ​ꦣꦮ꦳ꦼꦢ꧀ ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦢꦶ​ꦗꦸꦫꦸ​ꦱ꧀ꦭꦩꦼꦠ꧀ꦠꦺ​ꦧꦁꦱ​ꦆꦱꦿꦌꦭ꧀꧈​ ²⁴ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​꧈​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦮꦶꦱ꧀ꦔꦸꦤ꧀ꦢꦁꦔꦶ​ꦮꦺꦴꦁ​ꦆꦱꦿꦌꦭ꧀ꦏꦺꦴꦁꦏꦺꦴꦤ꧀ꦥꦢ​ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦲꦭ​ꦭꦤ꧀ꦩꦺꦴꦭꦃꦲꦶꦲꦸꦫꦶꦥ꧀ꦲꦚꦂ​ꦭꦤ꧀ꦢꦶꦧꦥ꧀ꦠꦶꦱ꧀꧈​ ²⁵ꦱꦏ꧀ꦢꦸꦫꦸꦁꦔꦺꦫꦩ꧀ꦥꦸꦁ​ꦏꦼꦂꦗꦤꦤ꧀ꦤꦺ꧈​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦩꦲꦸ​ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:'ꦲꦏꦸ​ꦲꦶꦏꦶ​ꦢꦸꦢꦸ​ꦏꦿꦶꦱ꧀ꦡꦸꦱ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦉꦥ꧀ꦲꦉꦥ꧀ ꦢꦸꦢꦸ​꧉​ꦤꦁꦔꦶꦁ​ꦢꦺꦏ꧀ꦤꦺꦧꦏꦭ꧀ꦠꦼꦏ​ꦱꦏ꧀ꦲꦩ꧀ꦧꦸꦫꦶꦏꦸ​꧉​ꦔꦸꦕꦸꦭ꧀ꦭꦶ​ꦱꦼꦥꦠꦸꦤꦺꦢꦺꦏ꧀ꦤꦺꦮꦲꦺ​ꦢꦸꦫꦸꦁ​ꦥꦤ꧀ꦠꦼꦱ꧀ꦲꦏꦸ​꧉​’

²⁶꧋“ꦥꦫ​ꦱꦼꦢꦸꦭꦸꦂ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦮꦶꦱ꧀ꦢꦶꦒꦼꦭꦂꦫꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ²⁷ꦮꦺꦴꦁꦮꦺꦴꦁ​ꦤꦁꦏꦸꦠꦪꦺꦫꦸꦱꦭꦺꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦲꦺꦴꦫ​ꦥꦢ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦗꦸꦫꦸ​ꦱ꧀ꦭꦩꦼꦠ꧀ꦠꦺ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦢꦸꦤꦸꦁꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​꧈​ꦱꦼꦤꦗꦤ꧀ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​ꦩꦲꦸ​ꦱꦧꦼꦤ꧀ꦏꦸꦩ꧀ꦥꦸꦭ꧀ꦭꦤ꧀ꦲꦶꦁ​ꦢꦶꦤ​ꦱꦧꦠ꧀ꦢꦶꦮꦕ​꧉​ꦮꦺꦴꦁꦮꦺꦴꦁ​ꦩꦲꦸ​ꦩꦭꦃ​ꦥꦢ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦼꦁꦏꦺꦴꦤꦺꦴ​ꦏꦸꦮꦶ​ꦩꦭꦃ​ꦥꦢ​ꦤꦸꦫꦸꦠ꧀ꦠꦶ​ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​꧉​ ²⁸ꦱꦼꦤꦗꦤ꧀ꦲꦺꦴꦫ​ꦤ꧀ꦢꦸꦮꦺꦗꦭꦂꦫꦤ꧀​ꦧ꧀ꦭꦱ꧀ꦏꦁꦒꦺꦴ​ꦚꦼꦠꦿꦥ꧀ꦥꦠꦶ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦩꦼꦏ꧀ꦱ​ꦥꦢ​ꦚꦸꦮꦸꦤ꧀ꦩꦫꦁ​ꦒꦿꦩꦁꦥꦶꦭꦠꦸꦱ꧀ꦱꦸꦥꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦠꦺꦤ꧀ꦤꦶ​꧉​ ²⁹ꦱꦏ꧀ꦮꦶꦱ꧀ꦱꦺ​ꦮꦺꦴꦁꦮꦺꦴꦁ​ꦩꦲꦸ​ꦔ꧀ꦭꦏꦺꦴꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ ꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦼꦢꦸꦤ꧀ꦤꦏꦺꦱꦁꦏꦏꦪꦸ​ꦥꦼꦤ꧀ꦠꦺꦁꦔꦤ꧀ꦭꦤ꧀ꦢꦶꦱꦺꦭꦺꦃꦲꦏꦺꦤꦁꦏꦸꦧꦸꦂꦫꦤ꧀꧈​ ³⁰ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧉​ ³¹ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦶꦁ​ꦩꦲꦸꦤꦺ​ꦩꦺꦭꦸ​ꦢꦺꦏ꧀ꦤꦺꦤ꧀​ꦢ꧀ꦭꦗꦃꦲꦶ​ꦧꦮꦃꦓꦭꦶꦭꦺꦪ​ꦔꦤ꧀ꦠꦶ​ꦠꦼꦏꦤ꧀ꦏꦸꦠꦪꦺꦫꦸꦱꦭꦺꦩ꧀꧈​ꦪ​ꦮꦺꦴꦁꦮꦺꦴꦁ​ꦲꦶꦏꦶ​ꦱꦶꦁ​ꦱꦲꦶꦏꦶ​ꦢꦢꦶ​ꦱꦼꦏ꧀ꦱꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦧꦁꦱ​ꦆꦱꦿꦌꦭ꧀꧈​ ^32-33ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦠꦼꦏ​ꦩ꧀ꦧꦿꦺꦤꦺꦲꦶꦏꦶ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦪꦏꦸꦮꦶ​꧈​ꦲꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦏꦼꦠꦸꦫꦸꦠ꧀ꦠꦤ꧀ ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦤꦁ​ꦏꦶꦠꦧ꧀ꦩꦱ꧀ꦩꦸꦂ​ꦧꦧ꧀ꦭꦺꦴꦫꦺꦴ​ꦭꦲꦸꦠ꧀ꦏꦼꦠꦸꦭꦶꦱ꧀ꦔꦺꦤꦺ​ꦠ​:

‘ꦏꦺꦴꦮꦺ​ꦏꦸꦮꦶ​ꦲꦤꦏ꧀ꦏꦸ​꧈​
ꦲꦶꦁ​ꦢꦶꦤ​ꦲꦶꦏꦶ​ꦲꦏꦸ​ꦢꦢꦶ​ꦧꦥꦏ꧀ꦩꦸ​!’

³⁴ꦭꦤ꧀ꦧꦧ꧀ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧈​ꦱꦸꦥꦪ​ꦧꦢꦤ꧀ꦤꦺ​ꦲꦺꦴꦫ​ꦫꦸꦱꦏ꧀ ꦏꦼꦠꦸꦭꦶꦱ꧀ꦔꦺꦤꦺ​:

‘ꦲꦏꦸ​ꦧꦏꦭ꧀ꦔꦼꦏꦺꦏ꧀ꦏꦶꦧꦼꦂꦏꦃ​ꦩꦫꦁ​ꦏꦺꦴꦮꦺ​
ꦱꦶꦁ​ꦮꦶꦱ꧀ꦠꦏ꧀ꦗꦚ꧀ꦗꦶ​ꦩꦫꦁ​ꦣꦮ꦳ꦼꦢ꧀!’

³⁵ꦩꦸꦭꦤꦺ​ꦤꦁꦏꦶꦠꦧ꧀ꦩꦱ꧀ꦩꦸꦂ​ꦭꦶꦪꦤꦺ​ꦪ​ꦲꦺꦤꦺꦁꦠꦸꦭꦶꦱ꧀ꦱꦤ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

‘ꦒꦸꦱ꧀ꦠꦶ​꧈​ꦏꦺꦴꦮꦺ​ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦤꦺꦏ꧀ꦧꦢꦤ꧀ꦤꦺ​ꦥꦼꦭꦢꦺꦤ꧀ꦩꦸ​꧈​
ꦱꦶꦁ​ꦩꦤꦸꦠ꧀ꦩꦫꦁ​ꦏꦺꦴꦮꦺ​꧈​ꦱꦩ꧀ꦥꦺꦏ꧀ꦫꦸꦱꦏ꧀꧈​’

³⁶ꦥꦫ​ꦱꦼꦢꦸꦭꦸꦂ​꧈​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦁꦏꦏꦶꦠꦧ꧀ꦏꦸꦮꦶ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦫꦠꦸ​ꦣꦮ꦳ꦼꦢ꧀ ꦲꦺꦴꦫ​꧉​ꦲꦮꦶꦠ꧀ꦫꦠꦸ​ꦣꦮ꦳ꦼꦢ꧀ꦩꦠꦶ​꧈​ꦱꦏ꧀ꦮꦶꦱ꧀ꦱꦺ​ꦢꦺꦏ꧀ꦤꦺꦤꦸꦤ꧀ꦠꦸꦤ꧀ꦧꦁꦱꦤꦺ​ꦩꦶꦠꦸꦫꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦠꦼꦫꦸꦱ꧀ꦏꦏꦸꦧꦸꦂ​ꦕꦩ꧀ꦥꦸꦂ​ꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦤꦺꦭꦤ꧀ꦧꦢꦤ꧀ꦤꦺ​ꦮꦸꦗꦸꦠ꧀ꦠꦺꦪ​ꦫꦸꦱꦏ꧀꧈​ ³⁷ꦤꦁꦔꦶꦁ​ꦧꦢꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦫꦸꦱꦏ꧀꧈​ ³⁸ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦏꦶ​ꦱꦶꦁ​ꦩꦫꦏ꧀ꦏꦏꦺꦏꦺꦴꦮꦺ​ꦧꦶꦱ​ꦔꦼꦂꦠꦶ​ꦤꦺꦏ꧀ꦢꦺꦴꦱꦢꦺꦴꦱꦩꦸ​ꦧꦶꦱ​ꦢꦶꦔꦥꦸꦫ꧉​ ³⁹ꦱꦥ​ꦱꦶꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦮꦶꦱ꧀ꦢꦶꦔꦥꦸꦫꦢꦺꦴꦱꦱꦭꦃꦲꦺꦏꦧꦺꦃ​ꦭꦤ꧀ꦧꦏꦭ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦢꦺꦴꦱꦱꦭꦃꦲꦺꦏꦧꦺꦃ​ꦢꦶꦔꦥꦸꦫ꧉​ ⁴⁰ꦩꦸꦭꦤꦺ​ꦥꦢ​ꦱꦶꦁ​ꦲꦠꦶꦲꦠꦶ꧈​ꦱꦸꦥꦪ​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦔꦭꦩ꧀ꦩꦶ​ꦏꦪ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦥꦫ​ꦤꦧꦶ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

⁴¹‘ꦲꦮꦱ꧀ꦏꦺꦴꦮꦺ​꧈​
ꦱꦶꦁ​ꦥꦢ​ꦱꦼꦤꦼꦁ​ꦚꦼꦥꦺꦭꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
ꦏꦺꦴꦮꦺ​ꦧꦏꦭ꧀ꦏꦒꦺꦠ꧀꧈​
ꦭꦸꦔꦲ​ꦱꦁꦏꦔꦉꦥ꧀ꦏꦸ​꧉​
ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦥꦽꦕꦪ​
ꦩꦫꦁ​ꦥꦼꦁꦒꦮꦺꦏꦸꦱꦶꦁ​ꦧꦏꦭ꧀ꦠꦏ꧀ꦠꦶꦤ꧀ꦢꦏ꧀ꦏꦏꦺꦱꦲꦶꦏꦶ​꧈​
ꦱꦼꦤꦗꦤ꧀ꦤ​ꦲꦺꦤꦺꦁꦮꦺꦴꦁ​ꦱꦶꦁ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​!’”

⁴²ꦱꦏ꧀ꦮꦶꦱ꧀ꦱꦺ​ꦩꦼꦠꦸ​ꦱꦁꦏꦱꦶꦤꦒꦸꦏ꧀ꦩꦲꦸ​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦩꦫꦁ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ꦠꦼꦏ​ꦩꦼꦤꦺꦃ​꧈​ꦱꦸꦥꦪ​ꦲꦶꦁ​ꦢꦶꦤ​ꦱꦧꦠ꧀ꦩꦶꦁꦒꦸꦤꦺꦔꦉꦥ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦩꦲꦸ​꧉​ ⁴³ꦱꦏ꧀ꦫꦩ꧀ꦥꦸꦁꦔꦺ​ꦏꦸꦩ꧀ꦥꦸꦭ꧀ꦭꦤ꧀ꦲꦺꦴꦏꦺꦃꦮꦺꦴꦁ​ꦙꦸꦭꦤ꧀ꦮꦺꦴꦁ​ꦭꦶꦪꦤꦺ​ꦱꦶꦁ​ꦩꦺꦭꦸ​ꦲꦒꦩ​ꦙꦸꦥꦢ​ꦥꦽꦕꦪ​ꦩꦫꦁ​ꦥꦶꦮꦸꦭꦁꦔꦺ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀꧈​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦲꦶꦏꦶ​ꦏꦤ꧀ꦠꦶꦠꦼꦤꦤ꧀ꦤꦤ꧀ ꦱꦸꦥꦪ​ꦥꦢ​ꦠꦼꦩꦼꦤ꧀ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦲꦸꦫꦶꦥ꧀​ꦚ꧀ꦗꦒꦏ꧀ꦏꦏꦺꦩꦫꦁ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁴⁴꧋ꦲꦶꦁ​ꦢꦶꦤ​ꦱꦧꦠ꧀ꦩꦶꦁꦒꦸ​ꦭꦶꦪꦤꦺ​ꦩꦺꦃ​ꦮꦺꦴꦁ​ꦱꦏ꧀ꦏꦸꦠꦏꦧꦺꦃ​ꦥꦢ​ꦠꦼꦏ​ꦤꦁꦱꦶꦤꦒꦸꦏ꧀ ꦏꦼꦥꦺꦔꦶꦤ꧀ꦔꦿꦸꦔꦺꦴꦏ꧀ꦏꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ ⁴⁵ꦤꦁꦔꦶꦁ​ꦥꦫ​ꦥꦼꦔꦉꦥ꧀ꦥꦺ​ꦲꦒꦩ​ꦙꦸꦠꦼꦫꦸꦱ꧀ꦥꦢ​ꦥꦤꦱ꧀ꦲꦠꦶꦤꦺ​ꦮꦼꦫꦸꦃ​ꦤꦺꦏ꧀ꦮꦺꦴꦁ​ꦲꦺꦴꦏꦺꦃꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦶꦮꦸꦭꦁꦔꦺ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦫꦱꦸꦭ꧀ꦦꦈꦭꦸꦱ꧀ꦔꦁꦒꦺꦴ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀꧈​ ⁴⁶ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ꦲꦼꦁꦒꦺꦴꦤꦺ​ꦩꦸꦭꦁ​ꦩꦭꦃ​ꦩꦸꦤ꧀ꦢꦏ꧀ꦏꦼꦤ꧀ꦢꦼꦭ꧀ꦭꦤ꧀ꦔꦺꦴꦩꦺꦴꦁꦔꦺꦤꦺ​:“ꦥꦚ꧀ꦕꦺꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦒꦮ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​ꦤ꧀ꦢꦶꦱꦶꦏ꧀꧈​ꦤꦁꦔꦶꦁ​ꦩꦭꦃ​ꦲꦩ꧀ꦧꦺꦴꦏ꧀ꦠꦩ꧀ꦥꦶꦏ꧀ꦭꦤ꧀ꦏꦺꦴꦮꦺ​ꦥꦢ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦲꦺꦴꦫ​ꦥꦤ꧀ꦠꦼꦱ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦩꦫꦤꦶ​ꦧꦁꦱ​ꦭꦶꦪꦤꦺ​꧈​ꦱꦶꦁ​ꦢꦸꦫꦸꦁ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁴⁷ꦲꦮꦶꦠ꧀ꦒꦸꦱ꧀ꦠꦶ​ꦮꦶꦱ꧀ꦔꦺꦴꦁꦏꦺꦴꦤ꧀ꦲꦮꦏ꧀ꦏꦺ​ꦢꦺꦮꦺ꧈​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:

‘ꦏꦺꦴꦮꦺ​ꦮꦶꦱ꧀ꦠꦏ꧀ꦢꦢꦺꦏ꧀ꦏꦏꦺꦥꦼꦥꦢꦁ
ꦏꦁꦒꦺꦴ​ꦧꦁꦱꦧꦁꦱ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦱꦸꦥꦪ​ꦏꦺꦴꦮꦺ​ꦔ꧀ꦒꦮ​ꦢꦭꦤ꧀ꦏꦼꦱ꧀ꦭꦩꦼꦠ꧀ꦠꦤ꧀
ꦩꦫꦁ​ꦏꦧꦺꦃ​ꦩꦤꦸꦁꦱ​ꦤꦁꦱꦏ꧀ꦗꦼꦩ꧀ꦧꦂꦫꦺ​ꦗꦒꦠ꧀꧈​’”

⁴⁸꧋ꦮꦺꦴꦁꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦥꦢ​ꦧꦸꦔꦃ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦫꦱꦸꦭ꧀ꦦꦈꦭꦸꦱ꧀ꦏꦸꦮꦶ​ꦭꦤ꧀ꦥꦢ​ꦔꦼꦊꦩ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦱꦶꦁ​ꦮꦶꦱ꧀ꦠꦠꦠꦠ​ꦏꦼꦥꦺꦔꦶꦤ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​ꦠꦼꦫꦸꦱ꧀ꦥꦢ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦒꦸꦱ꧀ꦠꦶ​꧉​

⁴⁹꧋ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦠꦼꦫꦸꦱ꧀ꦱꦸꦩꦼꦧꦂ​ꦤꦁꦲꦼꦤ꧀ꦢꦶꦲꦼꦤ꧀ꦢꦶ​꧈​ꦫꦠ​ꦤꦁꦱꦏ꧀ꦧꦮꦃꦏꦺꦴꦤꦺꦴ​꧉​ ⁵⁰ꦤꦁꦔꦶꦁ​ꦥꦫ​ꦥꦼꦔꦉꦥ꧀ꦥꦺ​ꦲꦒꦩ​ꦙꦸꦲꦺꦴꦫ​ꦱꦼꦤꦼꦁ​ꦏꦫꦺꦴ​ꦊꦭꦏꦺꦴꦤ꧀ꦏꦸꦮꦶ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ​ꦥꦫ​ꦥꦼꦁꦒꦼꦢꦺꦤꦺꦏꦸꦠꦏꦺꦴꦤꦺꦴ​꧈​ꦲꦸꦒ​ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁ​ꦥꦢ​ꦩꦺꦭꦸ​ꦲꦒꦩ​ꦙꦸꦭꦤ꧀ꦱꦶꦁ​ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦤꦁꦏꦺꦴꦤꦺꦴ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦥꦢ​ꦚꦶꦪꦚꦶꦪ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ꦠꦼꦫꦸꦱ꧀ꦥꦢ​ꦢꦶꦲꦸꦱꦶꦂ​ꦏꦺꦴꦁꦏꦺꦴꦤ꧀ꦥꦢ​ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​ ⁵¹ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦧꦂꦤꦧꦱ꧀ꦠꦼꦫꦸꦱ꧀ꦔꦼꦠꦺꦴꦏ꧀ꦲꦼꦠꦺꦴꦏ꧀ꦏꦏꦺꦊꦩꦃꦲꦺ​ꦱꦁꦏꦱꦶꦏꦶꦭ꧀ꦭꦺ​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃꦏꦸꦮꦶ​꧈​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦮꦶꦱ꧀ꦲꦺꦴꦫ​ꦔꦼꦂꦠꦶ​ꦗꦮꦤꦺ꧈​ꦠꦼꦫꦸꦱ꧀ꦭꦸꦔ​ꦤꦁꦏꦸꦠꦆꦏꦺꦴꦤꦶꦪꦸꦩ꧀꧈​ ⁵²ꦤꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦱꦶꦁ​ꦤꦁꦏꦸꦠꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​ꦥꦢ​ꦧꦸꦔꦃ​ꦠꦼꦤꦤ꧀ꦭꦤ꧀ꦥꦢ​ꦏꦼꦧꦼꦏ꧀ꦏꦫꦺꦴ​ꦫꦺꦴꦃ​ꦱꦸꦕꦶ​꧉​

↑ ↑ ↑

← ꧇​꧑꧒꧇​

꧇​꧑꧔꧇​ →