ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/18

꧋ꦫꦱꦸꦭ꧀ꦦꦈꦭꦸꦱ꧀ꦤꦁꦏꦸꦠꦏꦺꦴꦫꦶꦤ꧀ꦠꦴ꧉​

꧇​꧑꧘꧇​ ¹꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦏꦸꦠꦄꦠꦺꦤꦼ​ꦧꦸꦢꦭ꧀ꦤꦁꦏꦸꦠꦏꦺꦴꦫꦶꦤ꧀ꦠꦴ꧉​ ²ꦤꦁꦏꦺꦴꦫꦶꦤ꧀ꦠꦴꦏꦺꦴꦤꦺꦴ​ꦫꦱꦸꦭ꧀ꦦꦈꦭꦸꦱ꧀ꦏꦼꦥꦼꦠꦸꦏ꧀ꦏꦫꦺꦴ​ꦮꦺꦴꦁ​ꦙꦸꦱꦶꦁ​ꦗꦼꦤꦼꦁꦔꦺ​ꦄꦏ꧀ꦮꦶꦭ​꧈​ꦮꦺꦴꦁ​ꦱꦁꦏꦏꦸꦠꦥꦺꦴꦤ꧀ꦠꦸꦱ꧀꧈​ꦄꦏ꧀ꦮꦶꦭ​ꦢꦸꦫꦸꦁ​ꦱꦸꦮꦶꦠꦼꦏ​ꦱꦁꦏꦤꦼꦒꦫ​ꦆꦠꦭꦶꦏꦫꦺꦴ​ꦧꦺꦴꦗꦺꦴꦤꦺ​ꦱꦶꦁ​ꦗꦼꦤꦼꦁꦔꦺ​ꦥꦿꦶꦱ꧀ꦏꦶꦭ​꧉​ꦠꦼꦏꦤꦺ​ꦤꦁꦏꦸꦠꦏꦺꦴꦫꦶꦤ꧀ꦠꦴꦏꦺꦴꦤꦺꦴ​꧈​ꦗꦭꦂꦫꦤ꧀ꦫꦠꦸꦤꦺ​ꦬꦸꦩ꧀ꦱꦶꦁ​ꦗꦼꦤꦼꦁꦔꦺ​ꦏ꧀ꦭꦲꦸꦢꦶꦪꦸꦱ꧀ ꦔꦸꦱꦶꦂ​ꦮꦺꦴꦁ​ꦙꦸꦏꦧꦺꦃ​ꦏꦺꦴꦁꦏꦺꦴꦤ꧀ꦭꦸꦔ​ꦱꦁꦏꦏꦸꦠꦬꦸꦩ꧀꧈​ ³ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀​ꦔ꧀ꦒꦺꦴꦭꦺꦏ꧀ꦏꦶ​ꦲꦺꦴꦩꦃꦲꦺ​ꦄꦏ꧀ꦮꦶꦭ​ꦭꦤ꧀ꦥꦿꦶꦱ꧀ꦏꦶꦭ​ꦠꦼꦫꦸꦱ꧀ꦩꦁꦒꦺꦴꦤ꧀ꦏꦫꦺꦴ​ꦧꦿꦪꦠ꧀ꦏꦸꦮꦶ​ꦭꦤ꧀ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦶꦠ꧀ꦏꦼꦂꦗꦤꦤ꧀ꦤꦺꦠꦸꦁꦒꦭ꧀ꦭꦺ​꧈​ꦪꦏꦸꦮꦶ​ꦔ꧀ꦒꦮꦺꦤ꧀ꦤꦶ​ꦲꦺꦴꦩꦃ​ꦭꦸꦭꦁ​꧉​ ⁴ꦱꦧꦼꦤ꧀ꦢꦶꦤ​ꦱꦧꦠ꧀ꦫꦱꦸꦭ꧀ꦦꦈꦭꦸꦱ꧀​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦤꦁꦱꦶꦤꦒꦸꦏ꧀ ꦠꦸꦗꦸꦮꦤ꧀ꦤꦺꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦮꦺꦴꦁꦮꦺꦴꦁ​ꦙꦸꦭꦤ꧀ꦒꦿꦶꦏ꧀ ꦱꦸꦥꦪ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

⁵꧋ꦱꦏ꧀ꦮꦶꦱ꧀ꦱꦺ​ꦱꦶꦭꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀ꦠꦼꦏ​ꦱꦁꦏꦩꦱꦼꦢꦺꦴꦤꦶꦪ꧈​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦤꦩꦸꦁ​ꦩꦼꦂꦭꦺꦴꦏ꧀ꦏꦏꦺꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦤ꧀ꦢꦸꦤꦸꦁꦔꦏꦺꦩꦫꦁ​ꦮꦺꦴꦁ​ꦙꦸ꧈​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦏꦿꦶꦱ꧀ꦡꦸꦱ꧀꧈​ ⁶ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦭꦃ​ꦥꦢ​ꦤꦩ꧀ꦥꦶꦏ꧀ꦭꦤ꧀ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ ꦩꦸꦭꦤꦺ​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦼꦧꦸꦠ꧀ꦠꦏꦺꦊꦩꦃꦲꦺ​ꦱꦁꦏꦱꦭꦶꦤ꧀ꦤꦺꦏꦫꦺꦴ​ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺ​ꦏꦼꦤꦺꦁꦱꦁꦱꦫ​꧈​ꦏꦸꦮꦶ​ꦪ​ꦱꦭꦃꦩꦸ​ꦢꦺꦮꦺ꧉​ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦱꦭꦃ​ꦲꦥꦲꦥ​ꦩꦫꦁ​ꦏꦺꦴꦮꦺ​꧉​ꦮꦶꦮꦶꦠ꧀ꦱꦲꦶꦏꦶ​ꦲꦏꦸ​ꦲꦉꦥ꧀ꦩꦫꦤꦶ​ꦮꦺꦴꦁ​ꦭꦶꦪꦭꦶꦪ​ꦧꦁꦱ​꧉​” ⁷ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦢꦶꦠꦶꦁꦒꦭ꧀ꦭꦸꦔ​ꦏꦫꦺꦴ​ꦫꦱꦸꦭ꧀ꦦꦈꦭꦸꦱ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦺꦴꦤ꧀ꦢꦺꦴꦏ꧀ꦤꦁꦲꦺꦴꦩꦃꦲꦺ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦱꦶꦁ​ꦗꦼꦤꦼꦁꦔꦺ​ꦠꦶꦠꦶꦪꦸꦱ꧀ꦪꦸꦱ꧀ꦠꦸꦱ꧀꧈​ꦮꦺꦴꦁ​ꦲꦶꦏꦶ​ꦩꦺꦭꦸ​ꦲꦒꦩ​ꦙꦸꦭꦤ꧀ꦲꦺꦴꦩꦃꦲꦺ​ꦤꦁꦗꦺꦗꦺꦂꦫꦺ​ꦱꦶꦤꦒꦸꦏ꧀꧈​ ⁸ꦥꦼꦁꦒꦼꦢꦺꦤꦺꦱꦶꦤꦒꦸꦏ꧀ꦱꦶꦁ​ꦗꦼꦤꦼꦁꦔꦺ​ꦏꦿꦶꦱ꧀ꦥꦸꦱ꧀ꦱꦏ꧀ꦧꦿꦪꦠ꧀ꦠꦺ​ꦲꦸꦒ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦸꦒ​ꦮꦺꦴꦁ​ꦭꦶꦪꦭꦶꦪꦤꦺ​ꦩꦼꦤꦺꦃ​ꦤꦁꦏꦺꦴꦫꦶꦤ꧀ꦠꦴꦏꦺꦴꦤꦺꦴ​ꦥꦢ​ꦔꦿꦸꦔꦺꦴꦏ꧀ꦏꦏꦺꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦢꦶꦒꦼꦭꦂꦫꦏꦺꦏꦫꦺꦴ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦱꦶꦁ​ꦥꦽꦕꦪ​ꦩꦲꦸ​ꦠꦼꦫꦸꦱ꧀ꦥꦢ​ꦢꦶꦧꦥ꧀ꦠꦶꦱ꧀꧈​

⁹꧋ꦲꦶꦁ​ꦱꦏ꧀ꦮꦶꦗꦶꦤꦺꦮꦼꦔꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦈꦭꦸꦱ꧀ꦲꦶꦁ​ꦚ꧀ꦗꦼꦫꦺꦴꦤꦺ​ꦮꦼꦮꦼꦫꦸꦃ꧉​ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦦꦈꦭꦸꦱ꧀ ꦲꦗ​ꦮꦼꦢꦶ​!ꦢꦶꦠꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦩꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦭꦤ꧀ꦲꦗ​ꦩꦤ꧀ꦢꦼꦏ꧀ ꦲꦮꦶꦠ꧀ꦲꦏꦸ​ꦔꦿꦺꦮꦁꦔꦶ​ꦏꦺꦴꦮꦺ​꧉​ ¹⁰ꦤꦁꦏꦸꦠꦏꦺꦤꦺ​ꦲꦺꦴꦏꦺꦃꦮꦺꦴꦁ​ꦱꦶꦁ​ꦧꦏꦭ꧀ꦢꦢꦶ​ꦲꦸꦩꦠ꧀ꦏꦸ​꧈​ꦩꦸꦭꦤꦺ​ꦲꦗ​ꦮꦼꦢꦶ​꧈​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦏꦭ꧀​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​꧉​” ¹¹ꦩꦸꦭꦤꦺ​ꦫꦱꦸꦭ꧀ꦦꦈꦭꦸꦱ꧀ꦲꦼꦁꦒꦺꦴꦤꦺ​ꦩꦁꦒꦺꦴꦤ꧀ꦤꦁꦏꦸꦠꦏꦺꦴꦤꦺꦴ​ꦪ​ꦱꦩ꧀ꦥꦺꦏ꧀ꦱꦼꦠꦲꦸꦤ꧀ꦱꦼꦠꦼꦔꦃ​ꦱꦸꦮꦺꦤꦺ​꧈​ꦏꦫꦺꦴ​ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹²꧋ꦤꦁꦔꦶꦁ​ꦏꦢꦸꦁ​ꦒꦭꦶꦪꦺꦴ​ꦢꦢꦶ​ꦒꦿꦩꦁꦤꦁꦢꦶꦱ꧀ꦠꦿꦶꦏ꧀ꦄꦏꦪ꧈​ꦮꦺꦴꦁ​ꦙꦸꦠꦼꦫꦸꦱ꧀ꦔꦿꦺꦴꦪꦺꦴꦏ꧀ꦫꦱꦸꦭ꧀ꦦꦈꦭꦸꦱ꧀꧈​ꦫꦱꦸꦭ꧀ꦦꦈꦭꦸꦱ꧀ꦢꦶꦕꦼꦏꦼꦭ꧀ꦠꦼꦫꦸꦱ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦏꦤ꧀ꦠꦺꦴꦂ​ꦏꦿꦸꦠꦺꦴꦤ꧀꧈​ ¹³ꦮꦺꦴꦁꦮꦺꦴꦁ​ꦔꦼꦭꦃꦲꦏꦺ ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦲꦶꦏꦶ​ꦔꦼꦗꦺꦏ꧀ꦮꦺꦴꦁ​ꦲꦺꦴꦏꦺꦃꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦥꦠꦿꦥ꧀ꦱꦶꦁ​ꦱꦺꦗꦺ​ꦏꦫꦺꦴ​ꦥꦼꦂꦤꦠꦤ꧀ꦤꦺꦲꦒꦩꦤꦺ​ꦲꦮꦏ꧀ꦏꦺ​ꦢꦺꦮꦺ꧉​”

¹⁴꧋ꦏꦢꦸꦁ​ꦫꦱꦸꦭ꧀ꦦꦈꦭꦸꦱ꧀ꦲꦶꦗꦶꦏ꧀ꦲꦉꦥ꧀ꦚꦲꦸꦂꦫꦶ​ꦏꦼꦭꦃꦲꦤ꧀ꦩꦲꦸ​꧈​ꦒꦿꦩꦁꦒꦭꦶꦪꦺꦴ​ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦮꦺꦴꦁꦮꦺꦴꦁ​ꦙꦸꦏꦸꦮꦶ​:“ꦏꦺꦴꦮꦺ​ꦮꦺꦴꦁ​ꦙꦸ꧈​ꦤꦺꦏ꧀ꦮꦺꦴꦁ​ꦲꦶꦏꦶ​ꦤꦼꦫꦏ꧀ꦥꦼꦂꦤꦠꦤ꧀ꦤꦺꦤꦼꦒꦫ​ꦲꦥ​ꦔ꧀ꦭꦏꦺꦴꦤ꧀ꦤꦶ​ꦱꦭꦃ​ꦱꦶꦁ​ꦒꦼꦢꦺ꧈​ꦥꦚ꧀ꦕꦺꦤ꧀ꦧꦼꦤꦼꦂ​ꦲꦏꦸ​ꦤꦩ꧀ꦥ​ꦏꦼꦭꦲꦤ꧀ꦩꦸ꧉​ ¹⁵ꦤꦁꦔꦶꦁ​ꦥꦽꦏꦫ​ꦱꦶꦁ​ꦩꦫꦏ꧀ꦏꦏꦺꦥꦢꦸ​ꦲꦶꦏꦸ​ꦭꦲꦸꦠ꧀ꦧꦧ꧀ꦠꦼꦩ꧀ꦧꦸꦁ​ꦭꦤ꧀ꦗꦼꦤꦼꦁ​ꦭꦤ꧀ꦥꦽꦏꦫꦥꦽꦏꦫ​ꦧꦧ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦲꦒꦩꦩꦸ​ꦢꦺꦮꦺ꧉​ꦥꦽꦏꦫ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦸꦫꦸꦱ꧀ꦱꦶꦢꦺꦮꦺ꧉​ꦲꦏꦸ​ꦲꦼꦩꦺꦴꦃ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦧꦧ꧀ꦏꦸꦮꦶ​!” ¹⁶ꦮꦺꦴꦁꦮꦺꦴꦁ​ꦙꦸꦩꦲꦸ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦩꦼꦠꦸ​ꦏꦧꦺꦃ​꧉​ ¹⁷ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦚꦼꦏꦼꦭ꧀ꦱꦺꦴꦱ꧀ꦠꦺꦤꦺꦱ꧀ ꦥꦼꦁꦒꦼꦢꦺꦤꦺꦱꦶꦤꦒꦸꦏ꧀ꦏꦺꦴꦤꦺꦴ​꧉​ꦮꦺꦴꦁꦔꦺ​ꦢꦶꦒꦼꦧꦸꦏ꧀ꦏꦶꦤꦁꦔꦉꦥ꧀ꦥꦺ​ꦏꦿꦸꦠꦺꦴꦤ꧀ꦏꦺꦴꦤꦺꦴ​꧉​ꦤꦁꦔꦶꦁ​ꦒꦿꦩꦁꦒꦭꦶꦪꦺꦴ​ꦲꦺꦴꦫ​ꦔꦿꦺꦮꦺꦱ꧀​ꦧ꧀ꦭꦱ꧀꧈​

꧋ꦫꦱꦸꦭ꧀ꦦꦈꦭꦸꦱ꧀ꦩꦸꦭꦶꦃ​ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧉​

¹⁸꧋ꦫꦱꦸꦭ꧀ꦦꦈꦭꦸꦱ꧀ꦲꦶꦗꦶꦏ꧀ꦫꦢ​ꦱꦸꦮꦶꦩꦼꦤꦺꦃ​ꦤꦁꦏꦺꦴꦫꦶꦤ꧀ꦠꦴꦏꦺꦴꦤꦺꦴ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​꧈​ꦤꦸꦩ꧀ꦥꦏ꧀ꦏꦥꦭ꧀ꦏꦫꦺꦴ​ꦥꦿꦶꦱ꧀ꦏꦶꦭ​ꦭꦤ꧀ꦄꦏ꧀ꦮꦶꦭ​꧈​ꦧꦸꦢꦭ꧀ꦤꦁꦧꦮꦃꦯꦶꦫꦶꦪ​꧉​ꦱꦏ꧀ꦢꦸꦫꦸꦁꦔꦺꦧꦸꦢꦭ꧀ꦫꦱꦸꦭ꧀ꦦꦈꦭꦸꦱ꧀ꦚꦸꦏꦸꦂ​ꦫꦩ꧀ꦧꦸꦠ꧀ꦠꦺ​ꦤꦁꦏꦸꦠꦏꦺꦁꦏꦿꦺꦪ​꧈​ꦏꦁꦒꦺꦴ​ꦤꦼꦠꦼꦥ꧀ꦥꦶ​ꦗꦚ꧀ꦗꦶꦤꦺ​꧉​ ¹⁹ꦏꦢꦸꦁ​ꦠꦼꦏꦤ꧀ꦏꦸꦠꦌꦥ꦳ꦺꦱꦼ꧈​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦥꦿꦶꦱ꧀ꦏꦶꦭ​ꦭꦤ꧀ꦄꦏ꧀ꦮꦶꦭ​꧈​ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦱꦶꦤꦒꦸꦏ꧀ꦭꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦩꦫꦁ​ꦮꦺꦴꦁꦮꦺꦴꦁ​ꦙꦸ꧉​ ²⁰ꦮꦺꦴꦁꦮꦺꦴꦁ​ꦏꦸꦮꦶ​ꦚꦸꦮꦸꦤ꧀ꦩꦫꦁ​ꦫꦱꦸꦭ꧀ꦦꦈꦭꦸꦱ꧀ ꦱꦸꦥꦪ​ꦫꦢ​ꦱꦸꦮꦶꦤꦁꦏꦺꦴꦤꦺꦴ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦧꦶꦱ​꧉​ ²¹ꦩꦸꦭꦤꦺ​ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦶꦭꦤꦶ​꧈​ꦱꦸꦏ꧀ꦩꦼꦤꦺꦃ​ꦲꦏꦸ​ꦧꦭꦶꦏ꧀​ꦩ꧀ꦧꦿꦺꦤꦺ꧉”ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦏꦸꦠꦌꦥ꦳ꦺꦱꦼ꧉​

²²꧋ꦠꦼꦏꦤ꧀ꦏꦸꦠꦯꦺꦱꦫꦺꦪꦫꦱꦸꦭ꧀ꦦꦈꦭꦸꦱ꧀​ꦩ꧀ꦭꦏꦸ​ꦠꦼꦫꦸꦱ꧀ ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀ ꦲꦉꦥ꧀ꦤꦶꦭꦶꦏ꧀ꦏꦶ​ꦥꦱꦩꦸꦮꦤ꧀ꦤꦁꦏꦺꦴꦤꦺꦴ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧉​ ²³ꦫꦱꦸꦭ꧀ꦦꦈꦭꦸꦱ꧀ꦲꦺꦴꦫ​ꦱꦸꦮꦶꦤꦁꦏꦸꦠꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​꧈​ꦤꦁꦔꦶꦁ​ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦠꦸꦫꦸꦠ꧀ꦧꦮꦃꦒꦭꦱꦶꦪꦴꦭꦤ꧀ꦥ꦳ꦿꦶꦒꦶꦪ​꧈​ꦠꦸꦗꦸꦮꦤ꧀ꦤꦺꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​ꦤꦁꦏꦺꦴꦤꦺꦴ​꧉​

꧋ꦄꦥꦺꦴꦭꦺꦴꦱ꧀ꦤꦁꦏꦸꦠꦌꦥ꦳ꦺꦱꦼꦭꦤ꧀ꦏꦺꦴꦫꦶꦤ꧀ꦠꦴ꧉​

²⁴꧋ꦤꦁꦏꦸꦠꦌꦥ꦳ꦺꦱꦼꦲꦺꦤꦺꦁꦮꦺꦴꦁ​ꦙꦸꦠꦼꦏ​ꦱꦶꦁ​ꦗꦼꦤꦼꦁꦔꦺ​ꦄꦥꦺꦴꦭꦺꦴꦱ꧀ ꦭꦲꦶꦂꦫꦤ꧀ꦱꦁꦏꦏꦸꦠꦄꦭꦺꦏ꧀ꦱꦤ꧀ꦢꦿꦶꦪ​꧉​ꦄꦥꦺꦴꦭꦺꦴꦱ꧀ꦏꦸꦮꦶ​ꦮꦺꦴꦁ​ꦱꦶꦁ​ꦧꦶꦱ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦭꦤ꧀ꦢꦺꦏ꧀ꦤꦺꦪ​ꦗꦼꦫꦸꦥꦔꦼꦂꦠꦶꦤꦺꦧꦧ꧀ꦏꦶꦠꦧ꧀ꦱꦸꦕꦶ​꧉​ ²⁵ꦄꦥꦺꦴꦭꦺꦴꦱ꧀ꦮꦶꦱ꧀ꦤꦩ꧀ꦥ​ꦥꦶꦮꦸꦭꦁ​ꦧꦧ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​꧈​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦩꦸꦭꦁꦔꦏꦺꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦲꦠꦶ​ꦱꦶꦁ​ꦱꦼꦩꦲꦸꦂꦫ꧈​ꦱꦼꦤꦗꦤ꧀ꦢꦺꦏ꧀ꦤꦺꦤꦩꦸꦁ​ꦔꦼꦂꦠꦶ​ꦧꦧ꧀ꦧꦥ꧀ꦠꦶꦱ꧀ꦱꦤ꧀ꦤꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​ ²⁶ꦲꦸꦒ​ꦤꦁꦱꦶꦤꦒꦸꦏ꧀ꦄꦥꦺꦴꦭꦺꦴꦱ꧀ꦩꦸꦭꦁꦔꦶꦏꦫꦺꦴ​ꦏꦼꦤ꧀ꦢꦼꦭ꧀꧈​ꦏꦢꦸꦁ​ꦥꦿꦶꦱ꧀ꦏꦶꦭ​ꦭꦤ꧀ꦄꦏ꧀ꦮꦶꦭ​ꦏꦿꦸꦔꦸ​ꦥꦶꦮꦸꦭꦁꦔꦺ​꧈​ꦄꦥꦺꦴꦭꦺꦴꦱ꧀ꦠꦼꦫꦸꦱ꧀ꦢꦶꦲꦩ꧀ꦥꦶꦂꦫꦏꦺꦤꦁꦲꦺꦴꦩꦃꦲꦺ​꧈​ꦱꦸꦥꦪ​ꦧꦶꦱ​ꦢꦶꦢꦸꦤꦸꦁꦢꦸꦤꦸꦁꦔꦏꦺꦱꦶꦁ​ꦕꦼꦠ​ꦧꦧ꧀ꦥꦶꦮꦸꦭꦁ​ꦏꦿꦶꦱ꧀ꦠꦼꦤ꧀ꦱꦏ꧀ꦏꦧꦺꦃꦲꦺ꧉​ ²⁷ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦄꦥꦺꦴꦭꦺꦴꦱ꧀ꦏꦼꦥꦺꦔꦶꦤ꧀ꦧꦸꦢꦭ꧀ꦤꦁꦧꦮꦃꦄꦏꦪ꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦤꦁꦌꦥ꦳ꦺꦱꦼꦏꦺꦴꦤꦺꦴ​ꦥꦢ​ꦧꦸꦔꦃ​ꦏꦫꦺꦴ​ꦥꦶꦏꦶꦂꦫꦤ꧀ꦏꦸꦮꦶ​꧈​ꦩꦸꦭꦤꦺ​ꦠꦼꦫꦸꦱ꧀​ꦔ꧀ꦒꦮꦤꦶ​ꦭꦪꦁ​꧈​ꦱꦸꦥꦪ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦧꦮꦃꦄꦏꦪꦏꦺꦴꦤꦺꦴ​ꦥꦢ​ꦤꦩ꧀ꦥ​ꦄꦥꦺꦴꦭꦺꦴꦱ꧀ꦱꦶꦁ​ꦲꦥꦶꦏ꧀꧈​ꦏꦢꦸꦁ​ꦠꦼꦏ​ꦤꦁꦄꦏꦪ꧈​ꦄꦥꦺꦴꦭꦺꦴꦱ꧀ꦧꦶꦱ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦏꦺꦴꦤꦺꦴ​꧈​ꦗꦭꦂꦫꦤ꧀ꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁸ꦤꦁꦱꦏ꧀ꦠꦼꦔꦃꦲꦺ​ꦮꦺꦴꦁ​ꦥꦶꦫꦁꦥꦶꦫꦁ​ꦄꦥꦺꦴꦭꦺꦴꦱ꧀ꦧꦤ꧀ꦠꦃꦧꦤ꧀ꦠꦃꦲꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦙꦸꦭꦤ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦱꦁꦏꦏꦶꦠꦧ꧀ꦱꦸꦕꦶ​꧈​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦏꦿꦶꦱ꧀ꦡꦸꦱ꧀꧈​

↑ ↑ ↑

← ꧇​꧑꧗꧇​

꧇​꧑꧙꧇​ →