ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧒꧇ꦠꦶꦩꦺꦴꦠꦶꦪꦸꦱ꧀

꧁꧋ꦭꦪꦁꦔꦺꦫꦱꦸꦭ꧀ꦦꦈꦭꦸꦱ꧀
ꦩꦫꦁꦠꦶꦩꦺꦴꦠꦶꦪꦸꦱ꧀꧈​꧂
ꦭꦪꦁꦤꦺꦴꦩꦼꦂꦭꦺꦴꦫꦺꦴ

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

^1-2꧋ꦠꦶꦩꦺꦴꦠꦶꦪꦸꦱ꧀ ꦲꦤꦏ꧀ꦏꦸꦱꦶꦁꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ ꦲꦶꦏꦶꦭꦪꦁꦱꦁꦏꦔ꧀ꦒꦺꦴꦤ꧀ꦏꦸ꧈​ꦦꦈꦭꦸꦱ꧀꧈​ꦲꦏꦸꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦏꦺꦴꦁꦏꦺꦴꦤ꧀ꦢꦢꦶꦫꦱꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧉​ꦏꦸꦮꦶꦮꦶꦱ꧀ꦢꦢꦶꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦏꦁꦒꦺꦴꦲꦏꦸ꧉​ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦗꦚ꧀ꦗꦶꦤꦺꦏ꧀ꦲꦮꦏ꧀ꦏꦺꦢꦺꦮꦺꦧꦏꦭ꧀ꦲꦸꦫꦶꦥ꧀ꦢꦢꦶꦱꦶꦗꦶꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧉​ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃꦩꦿꦺꦤ꧀ꦠꦃꦲꦏꦸꦏꦺꦴꦁꦏꦺꦴꦤ꧀ꦔꦧꦂꦫꦏꦺꦥꦶꦠꦸꦠꦸꦂꦲꦶꦏꦶ꧉​

꧋ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦭꦤ꧀ꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱꦭꦤ꧀ꦒꦸꦱ꧀ꦠꦶꦤꦺꦲꦮꦏ꧀ꦏꦺꦢꦺꦮꦺ꧈​ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ꧈​ꦏꦮꦼꦭꦱ꧀ꦱꦤ꧀ꦤꦺꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁꦏꦺꦴꦮꦺ꧉​

꧋ꦲꦗꦲꦶꦱꦶꦤ꧀ꦭꦤ꧀ꦲꦗꦮꦼꦢꦶ꧉​

³꧋ꦠꦶꦩꦺꦴꦠꦶꦪꦸꦱ꧀ ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦠꦏ꧀ꦭꦢꦺꦤ꧀ꦤꦶꦱꦏ꧀ꦲꦠꦶꦏꦸ​꧈​ꦪ​ꦏꦪ​ꦩ꧀ꦧꦃꦩ꧀ꦧꦲꦤ꧀ꦏꦸꦩ꧀ꦧꦶꦪꦺꦤ꧀꧈​ꦄꦮꦤ꧀ꦮꦼꦔꦶꦤꦺꦏ꧀ꦲꦏꦸ​ꦤ꧀ꦢꦺꦴꦁꦔ꧈​ꦲꦏꦸ​ꦪ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧉​ ⁴ꦤꦺꦏ꧀ꦲꦏꦸ​ꦏꦺꦭꦶꦁꦔꦤ꧀ꦲꦼꦭꦸꦃꦩꦸꦢꦺꦴꦁꦔꦺꦏꦺꦴꦮꦺ​ꦠꦏ꧀ꦠꦶꦁꦒꦭ꧀ ꦲꦏꦸ​ꦠꦼꦫꦸꦱ꧀ꦏꦁꦔꦼꦤ꧀ꦩꦫꦁ​ꦏꦺꦴꦮꦺ​꧉​ꦧꦸꦔꦃꦲꦺ​ꦏꦪ​ꦔꦥ​ꦤꦺꦏ꧀ꦲꦏꦸ​ꦮꦼꦫꦸꦃ​ꦏꦺꦴꦮꦺ​ꦩꦼꦤꦺꦃ​꧉​ ⁵ꦲꦏꦸ​ꦲꦶꦗꦶꦏ꧀ꦏꦺꦭꦶꦁꦔꦤ꧀ꦏꦼꦩꦤ꧀ꦠꦼꦥꦤ꧀ꦤꦺꦥꦽꦕꦪꦩꦸ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦥꦚ꧀ꦕꦺꦤ꧀ ꦏꦺꦴꦮꦺ​ꦏꦫꦺꦴ​ꦲꦶꦧꦸꦩꦸ​ꦌꦤꦶꦱ꧀ꦭꦤ꧀ꦱꦶꦩ꧀ꦧꦃꦩꦸꦭꦺꦴꦮꦶꦱ꧀ꦠꦸꦁꦒꦭ꧀ꦭꦺ​ꦮꦲꦺ​ꦥꦼꦔꦤ꧀ꦢꦼꦭ꧀ꦭꦺ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦏꦼꦤ꧀ꦢꦺꦴ꧉​ ⁶ꦩꦸꦭꦤꦺ​ꦲꦏꦸ​ꦱꦲꦶꦏꦶ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧉​ꦢꦺꦴꦁꦔꦺꦲꦏꦸ​ꦤ꧀ꦢꦺꦴꦔꦏ꧀ꦏꦏꦺꦭꦤ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦏꦺꦴꦮꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦏꦺꦴꦮꦺ​꧈​ꦏꦥꦶꦤ꧀ꦠꦼꦂꦫꦤ꧀ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺ꧉​ ⁷ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦫꦺꦴꦃꦲꦺ​ꦩꦫꦁ​ꦏꦺꦴꦮꦺ​꧈​ꦲꦺꦴꦫ​ꦱꦸꦥꦪ​ꦏꦺꦴꦮꦺ​ꦮꦼꦢꦶ​꧈​ꦤꦁꦔꦶꦁ​ꦱꦸꦥꦪ​ꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦤꦶꦤ꧀ꦢꦏ꧀ꦏꦏꦺꦏꦉꦥ꧀ꦥꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦫꦺꦴꦃꦲꦺ​ꦲꦸꦒ​ꦱꦸꦥꦪ​ꦏꦺꦴꦮꦺ​ꦧꦶꦱ​ꦤꦿꦺꦱ꧀ꦤꦤ꧀ꦤꦶꦏꦧꦺꦃ​ꦮꦺꦴꦁ​ꦭꦤ꧀ꦱꦸꦥꦪ​ꦏꦺꦴꦮꦺ​ꦧꦶꦱ​ꦲꦸꦫꦶꦥ꧀ꦱꦶꦁ​ꦥꦤ꧀ꦠꦼꦱ꧀꧈​

⁸꧋ꦩꦸꦭꦤꦺ​꧈​ꦱꦲꦶꦏꦶ​ꦏꦺꦴꦮꦺ​ꦲꦗ​ꦲꦶꦱꦶꦤ꧀ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦲꦗ​ꦲꦶꦱꦶꦤ꧀ꦗꦭꦂꦫꦤ꧀ꦲꦏꦸ​ꦢꦶꦱꦼꦠꦿꦥ꧀꧈​ꦲꦏꦸ​ꦤꦁꦱꦼꦠꦿꦥꦤ꧀ꦲꦶꦏꦶ​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦗ​ꦮꦼꦢꦶ​꧈​ꦤꦁꦔꦶꦁ​ꦏꦪ​ꦲꦏꦸ​ꦲꦶꦏꦶ​꧈​ꦏꦺꦴꦮꦺ​ꦏꦸꦢꦸ​ꦱꦒꦸꦃ​ꦤꦤ꧀ꦢꦁꦏꦔꦺꦭ꧀ꦭꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​꧈​ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦏꦺꦴꦮꦺ​꧉​ ⁹ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦏ꧀ꦮꦱꦤꦺ​ꦲꦭ​ꦭꦤ꧀ꦱꦲꦶꦏꦶ​ꦩꦁꦒꦶꦭ꧀ꦲꦮꦏ꧀ꦏꦺ​ꦢꦺꦮꦺꦏꦺꦴꦁꦏꦺꦴꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦤꦸꦭꦸꦁꦔꦶ​ꦭꦤ꧀ꦩꦁꦒꦶꦭ꧀ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦤꦺꦁꦥꦤ꧀ꦠꦼꦱ꧀ꦱꦺ​ꦢꦶꦲꦸꦥꦃꦲꦶ꧈​ꦲꦺꦴꦫ​!ꦤꦁꦔꦶꦁ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦢꦸꦃꦲꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦥꦚ꧀ꦕꦺꦤ꧀ ꦮꦶꦱ꧀ꦏꦮꦶꦠ꧀​ꦩ꧀ꦧꦶꦪꦺꦤ꧀ ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦭꦔꦶꦠ꧀ꦭꦤ꧀ꦧꦸꦩꦶ​꧈​ꦢꦺꦏ꧀ꦤꦺꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦥꦶꦏꦶꦂꦫꦤ꧀ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦧꦿꦺꦤꦺ꧈​ꦏꦁꦒꦺꦴ​ꦤ꧀ꦢꦸꦢꦸꦃꦲꦏꦺꦱꦼꦥꦶꦫ​ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦩꦼꦢꦺꦴꦠ꧀ꦲꦮꦏ꧀ꦏꦺ​ꦢꦺꦮꦺꦱꦁꦏꦏ꧀ꦮꦱꦤꦺ​ꦲꦭ​꧉​ ¹⁰ꦭꦤ꧀ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦠꦼꦏ​ꦠꦼꦤꦤ꧀ ꦢꦺꦏ꧀ꦤꦺꦮꦸꦗꦸꦠ꧀ꦠꦺꦪ​ꦩꦼꦢꦺꦴꦠ꧀ꦲꦮꦏ꧀ꦏꦺ​ꦢꦺꦮꦺꦱꦁꦏꦏ꧀ꦮꦱꦤꦺ​ꦲꦭ​ꦭꦤ꧀​ꦤ꧀ꦢꦸꦢꦸꦃꦲꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦔꦿꦩ꧀ꦥꦸꦁꦔꦏꦺꦏ꧀ꦮꦱꦤꦺ​ꦥꦠꦶ​ꦭꦤ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺꦏꦫꦺꦴ​ꦢꦺꦏ꧀ꦤꦺꦔꦁꦒꦺꦴ​ꦫꦒꦲꦚꦂ​꧉​

¹¹꧋ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦭꦶꦃ​ꦲꦏꦸ​ꦏꦺꦴꦁꦏꦺꦴꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧉​ꦲꦏꦸ​ꦢꦢꦶ​ꦫꦱꦸꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦺꦴꦁꦏꦺꦴꦤ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦲꦸꦫꦶꦥ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​ ¹²ꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦱꦲꦶꦏꦶ​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀ꦲꦶꦏꦶ​꧉​ꦤꦁꦔꦶꦁ​ꦲꦺꦴꦫ​ꦢꦢꦶ​ꦲꦥ​꧈​ꦲꦏꦸ​ꦲꦺꦴꦫ​ꦱꦁꦱꦶ꧈​ꦲꦮꦶꦠ꧀ꦲꦏꦸ​ꦔꦼꦂꦠꦶ​ꦱꦥ​ꦱꦶꦁ​ꦠꦏ꧀ꦗꦒꦏ꧀ꦏꦏꦺ꧉​ꦭꦤ꧀ꦲꦏꦸ​ꦲꦸꦒ​ꦮꦶꦱ꧀ꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦢꦺꦏ꧀ꦤꦺꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦚ꧀ꦗꦒ​ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦲꦶꦏꦶ​ꦔꦤ꧀ꦠꦶ​ꦠꦼꦏꦤ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦠꦼꦏ​ꦩꦼꦤꦺꦃ​꧉​ ¹³ꦥꦶꦠꦸꦠꦸꦂꦱꦶꦁꦧꦼꦤꦼꦂꦱꦶꦁꦮꦶꦱ꧀ꦠꦏ꧀ꦮꦸꦭꦁꦔꦏꦺꦩꦫꦁꦏꦺꦴꦮꦺꦏꦸꦢꦸꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶꦠꦼꦤꦤ꧀ꦭꦤ꧀ꦥꦶꦮꦸꦭꦁꦏꦸꦮꦶꦒꦮꦺꦤꦼꦤ꧀ꦠꦸꦭꦢꦱꦶꦁꦏꦸꦢꦸꦩ꧀ꦧꦺꦴꦏ꧀ꦠꦸꦫꦸꦠ꧀꧈​ꦢꦶꦠꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦩꦸꦚ꧀ꦗꦒꦏ꧀ꦏꦏꦺꦩꦫꦁꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱꦭꦤ꧀ꦠꦿꦺꦱ꧀ꦤꦲꦩꦫꦁꦭꦶꦪꦤꦺꦏꦫꦺꦴꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ꧉​ ¹⁴ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦏꦺꦴꦮꦺ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦱꦶꦩ꧀ꦥꦼꦤ꧀ꦱꦶꦁ​ꦲꦥꦶꦏ꧀꧈​ꦫꦺꦴꦃ​ꦱꦸꦕꦶ​꧈​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦔꦿꦺꦮꦁꦔꦶ​ꦏꦺꦴꦮꦺ​ꦚꦶꦩ꧀ꦥꦼꦤ꧀ꦲꦶꦏꦶ​꧉​

¹⁵꧋ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦧꦮꦃꦄꦱꦶꦪ​ꦥꦢ​ꦤꦶꦁꦒꦭ꧀ꦲꦏꦸ​ꦏꦧꦺꦃ​꧈​ꦏꦪꦢꦺꦤꦺꦦ꦳ꦶꦒꦺꦭꦸꦱ꧀ꦭꦤ꧀ꦲ꦳ꦺꦂꦩꦺꦴꦒꦺꦤꦼꦱ꧀꧈​ ¹⁶ꦱꦶꦁ​ꦠꦏ꧀ꦱꦸꦮꦸꦤ꧀ꦒꦸꦱ꧀ꦠꦶ​ꦲꦩ꧀ꦧꦼꦂꦏꦃꦲꦶ​ꦏꦿꦧꦠ꧀ꦠꦺ​ꦎꦤꦺꦱꦶꦥ꦳ꦺꦴꦫꦶꦱ꧀꧈​ꦢꦺꦏ꧀ꦤꦺꦲꦗꦼꦏ꧀ꦠꦼꦏ​ꦲꦩ꧀ꦧꦔꦸꦤ꧀ꦭꦤ꧀​ꦔ꧀ꦭꦶꦥꦸꦂ​ꦲꦏꦸ​ꦭꦤ꧀ꦢꦺꦏ꧀ꦤꦺꦲꦺꦴꦫ​ꦮꦼꦢꦶ​ꦲꦥ​ꦲꦶꦱꦶꦤ꧀ꦤꦶꦭꦶꦏ꧀ꦏꦶ​ꦲꦏꦸ​ꦤꦁꦱꦼꦠꦿꦥꦤ꧀꧈​ ¹⁷ꦩꦭꦃ​ꦢꦺꦴꦁꦔꦺꦢꦺꦏ꧀ꦤꦺꦠꦼꦏ​ꦤꦁꦏꦸꦠꦬꦸꦩ꧀ꦏꦺꦤꦺ​꧈​ꦢꦺꦏ꧀ꦤꦺꦠꦺꦏꦺꦴꦏ꧀ꦠꦺꦏꦺꦴꦏ꧀ꦠꦼꦫꦸꦱ꧀ꦔꦤ꧀ꦠꦶ​ꦏꦼꦠꦼꦩꦸ​ꦏꦫꦺꦴ​ꦲꦏꦸ​꧉​ ¹⁸ꦱꦶꦁ​ꦠꦏ꧀ꦱꦸꦮꦸꦤ꧀ꦲꦩ꧀ꦧꦺꦱꦸꦏ꧀ ꦤꦺꦏ꧀ꦮꦺꦴꦁ​ꦏꦧꦺꦃ​ꦧꦏꦭ꧀ꦢꦶꦏꦿꦸꦠꦸ꧈​ꦒꦸꦱ꧀ꦠꦶ​ꦧꦏꦭ꧀ꦩꦼꦭꦱ꧀ꦩꦫꦁ​ꦎꦤꦺꦱꦶꦥ꦳ꦺꦴꦫꦶꦱ꧀꧈​ꦏꦺꦴꦮꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦗꦤ꧀ꦤꦸꦭꦸꦁꦔꦶ​ꦲꦏꦸ​ꦠꦼꦤꦤ꧀ꦤꦁꦏꦸꦠꦌꦥ꦳ꦺꦱꦼ꧉​

↑ ↑ ↑

꧋ꦥꦼꦭꦢꦺꦤ꧀ꦱꦶꦁ​ꦠꦼꦩꦼꦤ꧀꧈​

꧇​꧒꧇​ ¹꧋ꦠꦶꦩꦺꦴꦠꦶꦪꦸꦱ꧀ꦲꦤꦏ꧀ꦏꦸ꧈​ꦏꦺꦴꦮꦺꦏꦸꦢꦸꦚꦩ꧀ꦧꦸꦠ꧀ꦠꦏꦫꦺꦴꦏꦼꦤ꧀ꦢꦼꦭ꧀ ꦲꦮꦶꦠ꧀ꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧈​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁꦏꦺꦴꦮꦺꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ꧉​ ²ꦭꦤ꧀ꦩꦼꦤꦺꦃ​꧈​ꦥꦶꦠꦸꦠꦸꦂꦏꦸ​ꦩꦫꦁ​ꦏꦺꦴꦮꦺ​ꦱꦶꦁ​ꦠꦏ꧀ꦲꦺꦴꦩꦺꦴꦁꦔꦏꦺꦤꦁꦔꦉꦥ꧀ꦥꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦥꦶꦫꦁꦥꦶꦫꦁ​ꦏꦲꦺ​꧈​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦮꦸꦭꦁꦔꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦏꦼꦤꦺꦁꦢꦶꦗꦒꦏ꧀ꦏꦏꦺꦭꦤ꧀ꦱꦶꦁ​ꦏꦼꦤꦺꦁꦢꦶꦲꦼꦤ꧀ꦢꦼꦭ꧀ꦭꦏꦺꦩꦸꦭꦁꦔꦶꦭꦶꦪꦭꦶꦪꦤꦺ​꧉​

³꧋ꦲꦗꦮꦼꦢꦶꦤꦤ꧀ꦢꦁꦱꦁꦱꦫꦔ꧀ꦭꦧꦸꦃꦲꦶꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧉​ꦤꦁꦔꦶꦁꦏꦺꦴꦮꦺꦏꦸꦢꦸꦱꦒꦸꦃꦔ꧀ꦭꦏꦺꦴꦤ꧀ꦤꦶꦏꦔꦺꦭ꧀ꦭꦤ꧀ꦏꦪꦱꦺꦴꦭ꧀ꦢꦠ꧀ꦱꦶꦁꦧꦸꦢꦭ꧀ꦥꦼꦫꦁꦏꦲꦺ꧉​ ⁴ꦮꦺꦴꦁ​ꦱꦶꦁ​ꦢꦢꦶ​ꦱꦺꦴꦭ꧀ꦢꦠ꧀ꦏꦲꦺ​ꦤꦺꦏ꧀ꦚꦩ꧀ꦧꦸꦠ꧀ꦠꦩꦼꦱ꧀ꦠꦶꦤꦩꦸꦁ​ꦤꦸꦫꦸꦠ꧀ꦠꦶ​ꦲꦥ​ꦥꦿꦺꦤ꧀ꦠꦃꦲꦺ​ꦏꦸꦩꦼꦤ꧀ꦢꦤ꧀ꦤꦺꦭꦤ꧀ꦲꦺꦴꦫ​ꦩꦶꦏꦶꦂ​ꦧꦧ꧀ꦭꦶꦪꦭꦶꦪꦤꦺ​꧉​ ⁵ꦲꦺꦴꦫ​ꦧꦺꦢ​ꦮꦺꦴꦁ​ꦱꦶꦁ​ꦩꦺꦭꦸ​ꦧꦭꦥ꧀ꦥꦤ꧀ꦲꦩ꧀​ꦧ꧀ꦭꦪꦸꦏꦲꦺ​꧉​ꦧꦶꦱꦤꦺ​ꦩꦼꦤꦁ​ꦤꦩꦸꦁ​ꦤꦺꦏ꧀ꦢꦺꦏ꧀ꦤꦺꦤꦸꦫꦸꦠ꧀ꦥꦼꦂꦤꦠꦤ꧀ꦤꦺ꧉​ ⁶ꦭꦤ꧀ꦩꦼꦤꦺꦃ​꧈​ꦮꦺꦴꦁ​ꦠꦤ꧀ꦢꦸꦂꦱꦶꦁ​ꦚꦩ꧀ꦧꦸꦠ꧀ꦠꦩꦼꦩ꧀ꦥꦼꦁ​ꦏꦲꦺ​ꦩꦼꦱ꧀ꦠꦶꦧꦏꦭ꧀ꦩꦁꦔꦤ꧀ꦮꦺꦴꦃꦲꦺ​ꦤ꧀ꦢꦶꦱꦶꦏ꧀ꦢꦺꦮꦺ꧈​ꦤꦺꦏ꧀ꦮꦪꦃꦲꦺ​ꦥꦤꦺꦤ꧀꧈​ ⁷ꦲꦗ​ꦭꦭꦶ​ꦩꦫꦁ​ꦲꦺꦴꦩꦺꦴꦁꦏꦸꦲꦶꦏꦶ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦤ꧀ꦢꦸꦤꦸꦁꦔꦏꦺꦱꦼꦩ꧀ꦧꦫꦁ​ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦲꦥꦶꦏ꧀꧈​

⁸꧋ꦲꦺꦭꦶꦁꦔ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​ꦪ​ꦲꦶꦏꦸ​ꦱꦶꦁ​ꦠꦏ꧀ꦲꦺꦴꦩꦺꦴꦁꦔꦏꦺꦤꦺꦏ꧀ꦲꦏꦸ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁹ꦭꦤ꧀ꦗꦭꦂꦫꦤ꧀ꦲꦏꦸ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦸ​ꦲꦏꦸ​ꦱꦲꦶꦏꦶ​ꦤꦤ꧀ꦢꦁꦱꦁꦱꦫ​꧉​ꦲꦏꦸ​ꦢꦶꦱꦼꦠꦿꦥ꧀ꦭꦤ꧀ꦢꦶꦫꦤ꧀ꦠꦺ​ꦏꦪ​ꦮꦺꦴꦁ​ꦤꦏꦭ꧀꧈​ꦤꦁꦔꦶꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏꦼꦤꦺꦁꦢꦶꦫꦤ꧀ꦠꦺ​ꦲꦥ​ꦢꦶꦲꦼꦤ꧀ꦢꦼꦏ꧀꧈​ ¹⁰ꦩꦸꦭꦤꦺ​꧈​ꦗꦭꦂꦫꦤ꧀ꦏꦸꦮꦶ​ꦲꦏꦸ​ꦱꦧꦂ​ꦚꦁꦒ​ꦱꦁꦱꦫ​ꦲꦶꦏꦶ​꧈​ꦔ꧀ꦭꦧꦸꦃꦲꦶ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦤꦸꦭꦸꦁꦔꦶ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦱꦸꦥꦪ​ꦧꦶꦱ​ꦱ꧀ꦭꦩꦼꦠ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ ¹¹ꦥꦚ꧀ꦕꦺꦤ꧀ꦧꦼꦤꦼꦂ​ꦠꦸꦭꦶꦱ꧀ꦱꦤ꧀ꦤꦁꦏꦶꦠꦧ꧀ꦱꦸꦕꦶ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦶꦁꦒꦭ꧀ꦲꦸꦫꦶꦥ꧀ꦱꦶꦁ​ꦭꦮꦱ꧀
ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​
¹²ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦤ꧀ꦠꦼꦥ꧀ꦭꦤ꧀ꦱꦧꦂ​ꦚꦁꦒ​ꦏꦔꦺꦭ꧀ꦭꦤ꧀ꦤꦺ​꧈​
ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦪ​ꦧꦏꦭ꧀ꦩꦺꦭꦸ​ꦚ꧀ꦗꦒꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦪ​ꦫꦠꦸ​꧉​
ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦚꦺꦭꦏ꧀ꦏꦶ​ꦢꦺꦏ꧀ꦤꦺ꧈​
ꦢꦺꦏ꧀ꦤꦺꦲꦩ꧀ꦧꦺꦱꦸꦏ꧀ꦲꦸꦒ​ꦧꦏꦭ꧀ꦚꦺꦭꦏ꧀ꦏꦶ​ꦲꦮꦏ꧀ꦏꦺ​ꦢꦺꦮꦺ
ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
¹³ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦠꦼꦩꦼꦤ꧀
ꦢꦺꦏ꧀ꦤꦺꦠꦼꦩꦼꦤ꧀ꦠꦼꦫꦸꦱ꧀
ꦲꦮꦶꦠ꧀ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦚꦺꦭꦏ꧀ꦏꦶ​ꦗꦚ꧀ꦗꦶꦤꦺ​꧉​”

꧋ꦲꦗ​ꦩꦺꦭꦸ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀꧈​

¹⁴꧋ꦠꦶꦩꦺꦴꦠꦶꦪꦸꦱ꧀ ꦱꦼꦢꦸꦭꦸꦂꦱꦼꦢꦸꦭꦸꦂ​ꦥꦢ​ꦢꦶꦲꦺꦭꦶꦁꦔꦏꦺꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​ꦱꦶꦁ​ꦮꦶꦱ꧀ꦠꦏ꧀ꦲꦺꦴꦩꦺꦴꦁ​꧉​ꦥꦢ​ꦢꦶꦲꦺꦴꦩꦺꦴꦁꦔꦶꦲꦸꦒ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦱꦼꦏ꧀ꦱꦶ​꧈​ꦢꦶꦥꦼꦔꦶꦁ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦧꦧ꧀ꦲꦺꦴꦩꦺꦴꦁꦔꦤ꧀ꦱꦶꦁ​ꦲꦺꦴꦫꦲꦺꦴꦫ​꧉​ꦏꦸꦮꦶ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​ꦧ꧀ꦭꦱ꧀ ꦩꦭꦃ​ꦤꦩꦸꦁ​ꦚꦼꦩ꧀ꦥ꧀ꦭꦏ꧀ꦏꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦶꦁ​ꦥꦢ​ꦔꦿꦸꦔꦺꦴꦏ꧀ꦏꦏꦺ꧉​ ¹⁵ꦏꦺꦴꦮꦺ​ꦏꦸꦢꦸ​ꦠꦼꦩꦼꦤ꧀ꦠꦼꦤꦤ꧀ ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦊꦒ​ꦏꦫꦺꦴ​ꦥꦼꦁꦒꦮꦺꦪꦤ꧀꧈​ꦢꦢꦶꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦲꦸꦱꦃꦲꦶꦱꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺꦪꦤ꧀ꦏꦸ꧈​ꦮꦺꦴꦁ​ꦱꦶꦁ​ꦔꦼꦂꦠꦶ​ꦭꦤ꧀ꦧꦶꦱ​ꦩꦸꦭꦁꦔꦶꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ ¹⁶ꦤꦁꦔꦶꦁ​ꦲꦗ​ꦩꦺꦭꦸꦩꦺꦭꦸ​ꦏꦫꦺꦴ​ꦲꦺꦴꦩꦺꦴꦁꦔꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦭꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ꦏꦸꦮꦶ​ꦤꦩꦸꦁ​ꦩꦫꦏ꧀ꦏꦏꦺꦮꦺꦴꦁꦮꦺꦴꦁ​ꦩꦸꦤ꧀ꦢꦸꦂ​ꦲꦢꦺꦴꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁷ꦥꦶꦮꦸꦭꦁꦔꦺ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦔꦿꦸꦱꦏ꧀ꦲꦸꦫꦶꦥ꧀ꦥꦺꦮꦺꦴꦁ​꧈​ꦏꦪ​ꦭꦫ​ꦏꦤ꧀ꦏꦼꦂꦏꦲꦺ​꧈​ꦔꦿꦺꦴꦏꦺꦴꦠ꧀ꦢꦒꦶꦁ​ꦔꦤ꧀ꦠꦶ​ꦮꦺꦴꦁꦔꦺ​ꦩꦠꦶ​꧉​ꦲ꦳ꦶꦩꦺꦤꦺꦪꦸꦱ꧀ꦭꦤ꧀ꦥ꦳ꦶꦭꦺꦠꦸꦱ꧀ꦥꦶꦮꦸꦭꦁꦔꦺ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ¹⁸ꦥꦚ꧀ꦕꦺꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦥꦢ​ꦚꦶꦩ꧀ꦥꦁꦔꦶꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦩꦭꦃ​ꦥꦢ​ꦩꦸꦭꦁꦔꦶꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦮꦺꦴꦁ​ꦩꦠꦶ​꧉​ꦏꦸꦮꦶ​ꦥꦚ꧀ꦕꦺꦤ꧀​ꦩ꧀ꦧꦶꦔꦸꦁꦔꦏꦺꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​꧉​ ¹⁹ꦤꦁꦔꦶꦁ​꧈​ꦱꦼꦤꦗꦤ꧀ꦏꦼꦥꦿꦶꦪꦺ​ꦮꦲꦺ​꧈​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦼꦤꦼꦂ​ꦏꦸꦮꦶ​ꦲꦺꦴꦫ​ꦧꦏꦭ꧀ꦏꦼꦤꦺꦁꦢꦶꦮꦭꦶꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦔꦺꦴꦩꦺꦴꦁꦭꦤ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦂꦠꦶ​ꦱꦥ​ꦱꦶꦁ​ꦤꦸꦫꦸꦠ꧀ꦢꦺꦏ꧀ꦤꦺꦱꦏ꧀ꦲꦠꦶꦤꦺ​”ꦭꦤ꧀ꦠꦸꦭꦶꦱ꧀ꦱꦤ꧀ꦭꦶꦪꦤꦺ​ꦔꦺꦴꦩꦺꦴꦁꦔꦺꦤꦺ​:“ꦱꦥ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀ꦏꦸꦢꦸ​ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦲꦭ​!”

²⁰꧋ꦤꦁꦔꦶꦁ​ꦪꦏꦸꦮꦶ​꧈​ꦲꦶꦁ​ꦱꦏ꧀​ꦚ꧀ꦗꦼꦫꦺꦴꦤꦺ​ꦲꦺꦴꦩꦃ​ꦒꦼꦢꦺꦲꦶꦱꦶꦤꦺ​ꦮꦼꦂꦤꦮꦼꦂꦤ​꧈​ꦲꦺꦴꦫ​ꦤꦩꦸꦁ​ꦧꦫꦁ​ꦒꦮꦺꦪꦤ꧀ꦲꦼꦩꦱ꧀ꦲꦥ​ꦱꦼꦭꦏ​꧈​ꦤꦁꦔꦶꦁ​ꦲꦸꦒ​ꦲꦺꦤꦺꦁꦱꦶꦁ​ꦒꦮꦺꦪꦤ꧀ꦏꦪꦸ​ꦭꦤ꧀ꦒꦮꦺꦪꦤ꧀ꦊꦩ꧀ꦥꦸꦁ​꧉​ꦱꦶꦁ​ꦒꦮꦺꦪꦤ꧀ꦲꦼꦩꦱ꧀ꦭꦤ꧀ꦱꦼꦭꦏ​ꦏꦸꦮꦶ​ꦏꦁꦒꦺꦴ​ꦤꦺꦏ꧀ꦲꦺꦤ꧀ꦠꦸꦏ꧀ꦢꦪꦺꦴꦃꦒꦼꦢꦺ꧈​ꦱꦶꦁ​ꦭꦶꦪꦤꦺ​ꦏꦁꦒꦺꦴ​ꦱꦧꦼꦤ꧀ꦢꦶꦤꦤꦺ​꧉​ ²¹ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦪ​ꦥꦢ​ꦮꦲꦺ​ꦏꦪ​ꦔꦺꦴꦤꦺꦴ​꧉​ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦠꦼꦩꦼꦤ꧀ꦭꦤ꧀ꦉꦱꦶꦏ꧀ꦩꦼꦱ꧀ꦠꦶꦢꦶꦲꦺꦩꦤ꧀ꦏꦫꦺꦴ​ꦒꦸꦱ꧀ꦠꦶ​ꦭꦤ꧀ꦧꦏꦭ꧀ꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦥꦼꦁꦒꦮꦺꦏꦸꦱꦶꦁ​ꦒꦼꦢꦺ꧉​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦏꦭ꧀ꦧꦶꦱ​ꦔꦼꦂꦗꦤ꧀ꦤꦶꦏꦉꦥ꧀ꦥꦺ​ꦒꦸꦱ꧀ꦠꦶ​ꦲꦥ​ꦮꦲꦺ​꧉​ ²²ꦩꦸꦭꦤꦺ​ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦲꦗ​ꦤꦸꦫꦸꦠ꧀ꦠꦶ​ꦲ꦳ꦮ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ ꦏꦪ​ꦭꦸꦩꦿꦃꦲꦺ​ꦮꦺꦴꦁ​ꦲꦼꦤꦺꦴꦩ꧀ ꦤꦁꦔꦶꦁ​ꦔ꧀ꦒꦺꦴꦭꦺꦏ꧀ꦏꦤ​ꦧꦫꦁ​ꦱꦶꦁ​ꦧꦼꦕꦶꦏ꧀꧈​ꦥꦽꦕꦪꦲ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦿꦺꦱ꧀ꦤꦲꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦱꦏ꧀ꦥꦢꦥꦢ꧉​ꦏꦺꦴꦮꦺ​ꦏꦸꦢꦸ​ꦲꦸꦫꦶꦥ꧀ꦱꦶꦁ​ꦫꦸꦏꦸꦤ꧀ꦏꦫꦺꦴ​ꦭꦶꦪꦭꦶꦪꦤꦺ​꧉​ꦱꦼꦩ꧀ꦧꦫꦁ​ꦏꦸꦮꦶ​ꦩꦲꦸ​ꦢꦶꦠꦶꦤ꧀ꦢꦏ꧀ꦏꦏꦺꦧꦼꦧꦉꦁꦔꦤ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦩꦼꦩꦸꦗꦶ​ꦭꦤ꧀​ꦤ꧀ꦢꦼꦢꦺꦴꦔ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​ ²³ꦤꦁꦔꦶꦁ​ꦲꦗ​ꦩꦺꦭꦸꦩꦺꦭꦸ​ꦏꦫꦺꦴ​ꦉꦩ꧀ꦧꦸꦏ꧀ꦏꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦲꦶꦱꦶꦤꦺ​ꦲꦥ​ꦧꦤ꧀ꦠꦃꦧꦤ꧀ꦠꦃꦲꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ꦏꦸꦮꦶ​ꦤꦩꦸꦁ​ꦩꦫꦏ꧀ꦏꦏꦺꦥꦢꦸ​꧉​ ²⁴ꦭꦤ꧀ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦏꦸꦮꦶ​ꦲꦺꦴꦫ​ꦏꦼꦤꦺꦁꦥꦢꦸ​꧈​ꦩꦭꦃ​ꦏꦸꦢꦸ​ꦒꦿꦥꦾꦏ꧀ꦩꦫꦁ​ꦱꦥ​ꦮꦲꦺ​ꦭꦤ꧀ꦏꦸꦢꦸ​ꦧꦶꦱ​ꦩꦸꦭꦁꦔꦶꦱꦶꦁ​ꦲꦥꦶꦏ꧀ꦭꦤ꧀ꦱꦶꦁ​ꦲꦭꦸꦱ꧀꧈​ ²⁵ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦸꦭꦁꦔꦶꦥꦶꦠꦸꦠꦸꦂ​ꦱꦶꦁ​ꦏ꧀ꦭꦺꦫꦸ​ꦏꦸꦢꦸ​ꦢꦶꦧꦼꦤꦼꦂꦫꦏꦺꦏꦫꦺꦴ​ꦱꦧꦂ​꧉​ꦩꦼꦤꦮ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦏꦺꦏ꧀ꦏꦶꦏꦼꦭꦸꦁꦒꦂꦫꦤ꧀ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦱꦸꦥꦪ​ꦧꦶꦱ​ꦩꦭꦶꦃ​ꦥꦶꦏꦶꦂꦫꦤ꧀ꦤꦺ​ꦭꦤ꧀ꦧꦶꦱ​ꦢꦸꦤꦸꦁꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ²⁶ꦢꦢꦶꦤꦺ​ꦧꦶꦱ​ꦲꦺꦭꦶꦁ​ꦭꦤ꧀ꦧꦶꦱ​ꦲꦸꦕꦸꦭ꧀ꦱꦁꦏꦥꦱꦁꦔꦤ꧀ꦤꦺ​ꦱꦺꦠꦤ꧀ ꦱꦶꦁ​ꦔ꧀ꦮꦱꦤꦶ​ꦲꦸꦫꦶꦥ꧀ꦥꦺ꧉​

↑ ↑ ↑

꧋ꦏꦱꦸꦱꦃꦲꦤ꧀ꦒꦼꦢꦺ꧉​

꧇​꧓꧇​ ¹꧋ꦠꦶꦩꦺꦴꦠꦶꦪꦸꦱ꧀ ꦔꦼꦂꦠꦶꦪ​꧈​ꦤꦺꦏ꧀ꦲꦶꦁ​ꦗꦩꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀ ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​꧈​ꦧꦏꦭ꧀ꦲꦺꦤꦺꦁꦏꦱꦸꦱꦃꦲꦤ꧀ꦒꦼꦢꦺꦮꦼꦂꦤꦮꦼꦂꦤ​꧉​ ²ꦲꦥ​ꦗꦭꦂꦫꦤ꧀ꦤꦺ​?ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦤꦩꦸꦁ​ꦩꦶꦏꦶꦂꦫꦏꦺꦲꦸꦫꦶꦥ꧀ꦥꦺꦢꦺꦮꦺꦮꦲꦺ​ꦭꦤ꧀ꦲꦺꦴꦫ​ꦥꦼꦂꦢꦸꦭꦶꦏꦫꦺꦴ​ꦭꦶꦪꦤꦺ​꧉​ꦥꦢ​ꦩꦠꦢꦸꦮꦶꦠ꧀ꦠꦼꦤ꧀ ꦏꦼꦩ꧀ꦭꦺꦭꦺꦠ꧀ꦭꦤ꧀ꦱꦺꦴꦩ꧀ꦧꦺꦴꦁ꧉​ꦥꦢ​ꦱꦼꦩ꧀ꦧꦿꦤ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦭꦶꦪꦤꦺ​ꦭꦤ꧀ꦲꦺꦴꦫ​ꦥꦢ​ꦩꦤꦸꦠ꧀ꦩꦫꦁ​ꦮꦺꦴꦁ​ꦠꦸꦮꦤꦺ​꧉​ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦫꦸꦩꦁꦱ​ꦏꦼꦱꦸꦮꦸꦤ꧀ꦭꦤ꧀ꦲꦺꦴꦫ​ꦔꦗꦺꦤ꧀ꦤꦶ​ꦧ꧀ꦭꦱ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦫꦁ​ꦱꦶꦁ​ꦱꦸꦕꦶ​꧉​ ³ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦫꦱ​ꦠꦿꦺꦱ꧀ꦤ꧈​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺꦭꦤ꧀ꦱꦼꦤꦼꦁ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦭꦶꦪꦤꦺ​꧉​ꦲꦺꦴꦫ​ꦔꦼꦂꦠꦶ​ꦮꦠꦼꦱ꧀ ꦩꦭꦃ​ꦔꦸꦩ꧀ꦧꦂ​ꦏꦼꦏꦉꦥ꧀ꦥꦤ꧀ꦱꦶꦁ​ꦲꦺꦴꦫ​ꦔ꧀ꦒꦼꦤꦃ​꧈​ꦠꦼꦒꦼꦭ꧀ꦭꦤ꧀ꦭꦤ꧀ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦱꦼꦤꦼꦁ​ꦧ꧀ꦭꦱ꧀ ꦏꦫꦺꦴ​ꦧꦫꦁ​ꦧꦼꦕꦶꦏ꧀꧈​ ⁴ꦲꦺꦴꦫ​ꦏꦼꦤꦺꦁꦢꦶꦥꦽꦕꦪ​ꦭꦤ꧀ꦱꦼꦩ꧀ꦧꦿꦤ​ꦲꦶꦁ​ꦱꦼꦩ꧀ꦧꦫꦁ​꧈​ꦲꦺꦴꦫ​ꦩꦶꦏꦶꦂ​ꦲꦩ꧀ꦧꦸꦫꦶꦤꦺ​꧈​ꦩꦭꦃ​ꦔꦼꦒꦸꦭ꧀ꦭꦏꦺꦱꦺꦴꦩ꧀ꦧꦺꦴꦁꦔꦺ꧉​ꦤꦼꦩꦼꦤ꧀ꦧꦔꦼꦠ꧀ꦲꦼꦁꦒꦺꦴꦤꦺ​ꦤꦸꦫꦸꦠ꧀ꦠꦶ​ꦱꦼꦤꦼꦁꦔꦺ​ꦠꦼꦤꦶꦩ꧀ꦧꦁꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦗꦫꦺꦤꦺ​ꦮꦺꦴꦁ​ꦥꦽꦕꦪ​꧈​ꦤꦁꦔꦶꦁ​ꦤꦺꦏ꧀ꦚꦮꦁ​ꦏ꧀ꦭꦏꦸꦮꦤ꧀ꦤꦺ​ꦏꦼꦠꦫ​ꦠꦼꦤꦤ꧀ꦤꦺꦏ꧀ꦲꦺꦴꦫ​ꦠꦲꦸ​ꦔ꧀ꦭꦶꦭꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦠ​ꦲꦸꦫꦶꦥ꧀ꦥꦺ꧉​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦭꦤ꧀ꦲꦗ​ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ⁶ꦲꦺꦤꦺꦁꦱꦶꦁ​ꦥꦢ​ꦩ꧀ꦊꦧꦸꦩꦼꦠꦸ​ꦤꦁꦲꦺꦴꦩꦃꦲꦺ​ꦮꦺꦴꦁ​ꦭꦤ꧀ꦧꦶꦱ​ꦔꦼꦤꦺꦁꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁ​ꦒꦼꦊꦩ꧀​ꦔ꧀ꦒꦸꦒꦸ​ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ꦗꦭꦂꦫꦤ꧀ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦏꦸꦮꦶ​ꦲꦸꦫꦶꦥ꧀ꦥꦺꦲꦺꦴꦫ​ꦔ꧀ꦒꦼꦤꦃ​꧈​ꦤꦩꦸꦁ​ꦥꦢ​ꦤꦸꦫꦸꦠ꧀ꦱꦼꦤꦼꦁꦔꦺ​ꦠꦼꦫꦸꦱ꧀ꦥꦢ​ꦫꦸꦩꦁꦱ​ꦱꦭꦃ​꧉​ ⁷ꦥꦢ​ꦏꦼꦥꦺꦔꦶꦤ꧀ꦢꦶꦮꦸꦭꦁꦔꦶꦥꦶꦠꦸꦠꦸꦂꦥꦶꦠꦸꦠꦸꦂꦱꦶꦁ​ꦲꦚꦂ​꧈​ꦤꦁꦔꦶꦁ​ꦤꦩꦸꦁ​ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​꧉​ꦮꦺꦴꦁꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦧꦏꦭ꧀ꦧꦶꦱ​ꦤꦼꦩꦸ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦭꦤ꧀ꦥꦶꦠꦸꦠꦸꦂ​ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦏꦪ​ꦪꦤꦺꦱ꧀ꦭꦤ꧀ꦪꦩ꧀ꦧꦿꦺꦱ꧀ꦱꦶꦁ​ꦩ꧀ꦧꦶꦪꦺꦤ꧀ꦥꦢ​ꦔ꧀ꦭꦮꦤ꧀ꦤꦧꦶ​ꦩꦺꦴꦱꦼꦱ꧀ ꦏꦪ​ꦔꦺꦴꦤꦺꦴ​ꦲꦸꦒ​ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦱꦲꦶꦏꦶ​ꦥꦢ​ꦔ꧀ꦭꦮꦤ꧀ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦥꦶꦏꦶꦂꦫꦤ꧀ꦤꦺ​ꦮꦶꦱ꧀ꦲꦺꦴꦫ​ꦔ꧀ꦒꦼꦤꦃ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦶꦱ​ꦔꦁꦒꦺꦴꦏ꧀ꦏꦏꦺꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦥꦢ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ ⁹ꦤꦁꦔꦶꦁ​꧈​ꦏꦪ​ꦪꦤꦺꦱ꧀ꦭꦤ꧀ꦪꦩ꧀ꦧꦿꦺꦱ꧀ꦢꦺꦏ꧀​ꦩ꧀ꦧꦶꦪꦺꦤ꧀ ꦒꦸꦫꦸꦒꦸꦫꦸ​ꦏꦸꦮꦶ​ꦲꦺꦴꦫ​ꦧꦏꦭ꧀ꦧꦶꦱ​ꦔꦥꦸꦱ꧀ꦱꦶ​ꦮꦺꦴꦁꦮꦺꦴꦁ​ꦱꦩ꧀ꦥꦺꦏ꧀ꦱꦸꦮꦶ꧈​ꦲꦮꦶꦠ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦮꦼꦫꦸꦃ​ꦭꦤ꧀ꦤꦶꦠꦺꦤ꧀ꦤꦶ​ꦢꦺꦮꦺꦤꦺꦏ꧀ꦒꦸꦫꦸꦒꦸꦫꦸ​ꦏꦸꦮꦶ​ꦏ꧀ꦭꦺꦫꦸ​꧉​

꧋ꦥꦼꦁꦔꦺꦭꦶꦁꦔꦺꦭꦶꦁ​ꦱꦶꦁ​ꦥꦼꦤ꧀ꦠꦶꦁ​꧉​

¹⁰꧋ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦲꦏꦸ​ꦲꦺꦴꦫ​ꦏꦪ​ꦒꦸꦫꦸꦒꦸꦫꦸ​ꦏꦸꦮꦶ​꧈​ꦲꦮꦶꦠ꧀ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦲꦥ​ꦱꦶꦁ​ꦠꦏ꧀ꦮꦸꦭꦁꦔꦏꦺꦭꦤ꧀ꦏꦺꦴꦮꦺ​ꦮꦼꦫꦸꦃ​ꦲꦸꦫꦶꦥ꧀ꦏꦸ​꧉​ꦏꦺꦴꦮꦺ​ꦔꦼꦂꦠꦶ​ꦠꦸꦗꦸꦮꦤ꧀ꦤꦺꦲꦸꦫꦶꦥ꧀ꦏꦸ​꧉​ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦤꦺꦏ꧀ꦲꦏꦸ​ꦥꦽꦕꦪ​ꦭꦤ꧀​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦲꦼꦁꦒꦺꦴꦤ꧀ꦏꦸ​ꦱꦧꦂ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦮꦤ꧀ꦲꦏꦸ​꧉​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦏꦸ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦠꦸꦁꦒꦭ꧀ꦩꦤꦸꦁꦱ​꧉​ꦏꦺꦴꦮꦺ​ꦮꦼꦫꦸꦃ​ꦢꦺꦮꦺꦤꦺꦏ꧀ꦲꦏꦸ​ꦠꦼꦫꦸꦱ꧀ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦏꦔꦺꦭ꧀ꦭꦤ꧀ꦤꦺ​ꦭꦤ꧀ꦲꦭꦁꦔꦭꦔꦤ꧀ꦤꦺꦲꦺꦤꦺꦁꦮꦲꦺ​꧉​ ¹¹ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦏꦸ​ꦢꦶꦱꦶꦪꦱꦶꦪ​ꦏꦫꦺꦴ​ꦮꦺꦴꦁꦮꦺꦴꦁ​ꦭꦤ꧀ꦲꦏꦸ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦏꦱꦁꦱꦫꦤ꧀꧈​ꦮꦼꦂꦤꦮꦼꦂꦤ​ꦏꦔꦺꦭ꧀ꦭꦤ꧀ꦮꦶꦱ꧀ꦠꦏ꧀ꦭꦏꦺꦴꦤ꧀ꦤꦶ​ꦤꦁꦄꦤ꧀ꦠꦶꦪꦺꦴꦏꦶ꧈​ꦤꦁꦆꦏꦺꦴꦤꦶꦪꦸꦩ꧀ꦭꦤ꧀ꦤꦁꦭꦶꦱ꧀ꦠꦿ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦭꦸꦁꦔꦶ​ꦲꦏꦸ​ꦲꦶꦁ​ꦏꦔꦺꦭ꧀ꦭꦤ꧀ꦏꦸꦮꦶ​ꦏꦧꦺꦃ​꧉​ ¹²ꦥꦚ꧀ꦕꦺꦤ꧀ꦪ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺ꧉​ꦱꦥ​ꦮꦲꦺ​ꦱꦶꦁ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦠꦼꦤꦤ꧀ꦤꦤ꧀ꦩꦼꦱ꧀ꦠꦶꦧꦏꦭ꧀ꦢꦶꦱꦁꦱꦫ​꧉​ ¹³ꦤꦁꦔꦶꦁ​ꦮꦺꦴꦁ​ꦲꦭ​ꦭꦤ꧀ꦮꦺꦴꦁ​ꦔꦥꦸꦱ꧀ꦱꦶ​ꦩꦭꦃ​ꦱꦼꦭꦺꦴꦠ꧀​ꦤ꧀ꦢꦢꦿ​ꦲꦼꦁꦒꦺꦴꦤꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦲꦮꦶꦠ꧀ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦤꦩꦸꦁ​ꦔꦥꦸꦱ꧀ꦱꦶ​ꦮꦺꦴꦁ​ꦭꦶꦪꦤꦺ​꧈​ꦤꦁꦔꦶꦁ​ꦱꦸꦮꦶꦱꦸꦮꦶꦢꦺꦏ꧀ꦤꦺꦢꦺꦮꦺꦔ꧀ꦒꦸꦒꦸ​ꦲꦥꦸꦱꦤ꧀ꦤꦺꦢꦺꦮꦺ꧉​ ¹⁴ꦤꦁꦔꦶꦁ​ꦏꦺꦴꦮꦺ​ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦏꦸꦢꦸ​ꦤꦸꦫꦸꦠ꧀ꦥꦶꦮꦸꦭꦁ​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​ꦭꦤ꧀ꦮꦶꦱ꧀ꦲꦩ꧀ꦧꦺꦴꦏ꧀ꦲꦏꦺꦴꦤ꧀ꦤꦶꦧꦼꦤꦼꦂ​꧉​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦱꦥ​ꦱꦶꦁ​ꦩꦸꦭꦁꦔꦶꦏꦺꦴꦮꦺ​꧉​ ¹⁵ꦏꦮꦶꦠ꧀ꦕꦶꦭꦶꦏ꧀ꦏꦺꦴꦮꦺꦮꦶꦱ꧀ꦢꦶꦧ꧀ꦭꦗꦂꦫꦶꦱꦁꦏꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃ꧈​ꦢꦢꦶꦤꦺꦏꦺꦴꦮꦺꦔꦼꦂꦠꦶꦤꦺꦏ꧀ꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦧꦶꦱꦔꦼꦏꦺꦏ꧀ꦏꦶꦏꦮꦼꦫꦸꦃꦩꦫꦁꦏꦺꦴꦮꦺ꧉​ꦏꦮꦼꦫꦸꦃꦱꦶꦁꦤ꧀ꦢꦸꦢꦸꦃꦲꦏꦺꦩꦫꦁꦏꦺꦴꦮꦺꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧈​ꦠꦼꦏꦲꦶꦁꦢꦺꦴꦚꦔ꧀ꦭꦸꦮꦂꦫꦶꦏꦺꦴꦮꦺꦱꦁꦏꦏ꧀ꦮꦱꦤꦺꦲꦭ꧈​ꦱꦸꦥꦪꦏꦺꦴꦮꦺꦧꦶꦱꦲꦸꦫꦶꦥ꧀ꦭꦁꦒꦼꦁ꧉​ ¹⁶ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦲꦶꦱꦶꦤꦺ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦧꦺꦃ​ꦩꦼꦠꦸꦤꦺ​ꦱꦁꦏꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ꦩꦸꦭꦤꦺ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦏꦸꦮꦶ​ꦏꦧꦺꦃ​ꦏꦼꦤꦺꦁꦢꦶꦲꦼꦁꦒꦺꦴ​ꦩꦸꦭꦁꦔꦶꦧꦧ꧀ꦱꦶꦁ​ꦧꦼꦤꦼꦂ​꧈​ꦏꦼꦤꦺꦁꦢꦶꦲꦼꦁꦒꦺꦴ​ꦩ꧀ꦧꦼꦤꦼꦂꦫꦏꦺꦥꦶꦮꦸꦭꦁ​ꦱꦶꦁ​ꦏ꧀ꦭꦺꦫꦸ​꧈​ꦏꦼꦤꦺꦁꦢꦶꦲꦼꦁꦒꦺꦴ​ꦩ꧀ꦧꦼꦤꦼꦂꦫꦏꦺꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦭꦤ꧀ꦲꦸꦒ​ꦏꦼꦤꦺꦁꦢꦶꦲꦼꦁꦒꦺꦴ​ꦩ꧀​ꦧ꧀ꦭꦗꦂꦫꦶꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦤꦸꦫꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁷ꦢꦢꦶꦤꦺ​ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦥꦶꦤ꧀ꦠꦼꦂꦫꦤ꧀ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦲꦥ​ꦮꦲꦺ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦢꦺꦏ꧀ꦤꦺ꧉​

↑ ↑ ↑

 

꧇​꧔꧇​ ¹꧋ꦠꦶꦩꦺꦴꦠꦶꦪꦸꦱ꧀ ꦱꦶꦁꦲꦉꦥ꧀ꦠꦏ꧀ꦲꦺꦴꦩꦺꦴꦁꦲꦶꦏꦶꦥꦼꦤ꧀ꦠꦶꦁꦠꦼꦤꦤ꧀ ꦩꦸꦭꦤꦺꦏꦸꦢꦸꦩ꧀ꦧꦺꦴꦏ꧀ꦒꦠꦺꦏ꧀ꦏꦏꦺꦱꦶꦁꦲꦥꦶꦏ꧀꧈​ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧈​ꦱꦶꦁꦢꦢꦶꦱꦼꦏ꧀ꦱꦶꦤꦺꦏ꧀ꦲꦏꦸꦔꦺꦴꦩꦺꦴꦁꦲꦶꦏꦶꦩꦫꦁꦏꦺꦴꦮꦺ꧉​ꦠꦼꦩ꧀ꦧꦸꦁꦏꦸꦩꦫꦁꦏꦺꦴꦮꦺꦪꦲꦶꦏꦶ:ꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦏꦸꦢꦸꦩ꧀ꦧꦺꦴꦏ꧀ꦏꦧꦂꦫꦏꦺ꧉​ꦲꦮꦶꦠ꧀ꦏꦥꦤ꧀ꦏꦥꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦧꦏꦭ꧀ꦠꦼꦏꦩꦼꦤꦺꦃꦭꦤ꧀ꦢꦺꦏ꧀ꦤꦺꦧꦏꦭ꧀ꦠꦼꦏꦏꦪꦫꦠꦸ꧈​ꦔ꧀ꦮꦱꦤꦶꦱꦼꦩ꧀ꦧꦫꦁ꧉​ꦩꦸꦭꦤꦺ꧈​ꦤꦺꦏ꧀ꦢꦺꦏ꧀ꦤꦺꦠꦼꦏ꧈​ꦢꦺꦏ꧀ꦤꦺꦧꦏꦭ꧀ꦔꦿꦸꦠꦸꦏꦧꦺꦃꦮꦺꦴꦁꦱꦶꦁꦲꦶꦗꦶꦏ꧀ꦲꦸꦫꦶꦥ꧀ꦲꦶꦁꦮꦚ꧀ꦕꦶꦏꦸꦮꦶꦭꦤ꧀ꦱꦶꦁꦮꦶꦱ꧀ꦥꦢꦩꦠꦶ꧉​ ²ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​ꦠꦶꦩꦺꦴꦠꦶꦪꦸꦱ꧀:ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦶꦏꦧꦂꦫꦏꦺ꧉​ꦲꦺꦴꦫ​ꦥꦼꦂꦢꦸꦭꦶꦮꦺꦴꦁꦮꦺꦴꦁ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦲꦥ​ꦲꦺꦴꦫ​꧈​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦧꦂꦫꦏꦺꦠꦼꦫꦸꦱ꧀꧈​ꦥꦢ​ꦢꦶꦢꦸꦤꦸꦁꦔꦏꦺ꧈​ꦱꦸꦥꦪ​ꦥꦢ​ꦮꦼꦫꦸꦃ​ꦤꦺꦏ꧀​ꦏ꧀ꦭꦺꦫꦸ​꧉​ꦥꦢ​ꦢꦶꦧꦼꦤꦼꦂꦫꦏꦺꦭꦤ꧀ꦢꦶꦮꦸꦭꦁꦔꦶꦏꦫꦺꦴ​ꦱꦧꦂ​꧈​ꦱꦸꦥꦪ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀꧈​ ³ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦔꦺꦴꦤꦺꦴ​ꦏꦸꦮꦶ​ꦩꦲꦸ​꧈​ꦲꦮꦶꦠ꧀ꦲꦩ꧀ꦧꦺꦱꦸꦏ꧀ꦧꦏꦭ꧀ꦲꦺꦤꦺꦁꦮꦪꦃꦲꦺ​ꦮꦺꦴꦁꦮꦺꦴꦁ​ꦲꦺꦴꦫ​ꦧꦏꦭ꧀ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦩꦭꦃ​ꦧꦏꦭ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦒꦸꦫꦸꦒꦸꦫꦸ​ꦢꦺꦮꦺꦭꦤ꧀ꦒꦸꦫꦸꦒꦸꦫꦸ​ꦏꦸꦮꦶ​ꦧꦏꦭ꧀ꦩꦸꦭꦁꦔꦶꦲꦥ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦢꦢꦶꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦶꦱ​ꦤꦼꦫꦸꦱ꧀ꦱꦏꦺꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​꧉​ ⁴ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦲꦺꦴꦫ​ꦥꦢ​ꦔꦿꦸꦔꦺꦴꦏ꧀ꦏꦏꦺꦩꦫꦁ​ꦥꦶꦠꦸꦠꦸꦂ​ꦧꦼꦤꦼꦂ​꧈​ꦩꦭꦃ​ꦥꦢ​ꦱꦼꦤꦼꦁ​ꦩꦫꦁ​ꦢꦺꦴꦔꦺꦔꦤ꧀ꦢꦺꦴꦔꦺꦁꦔꦤ꧀ꦱꦶꦁ​ꦲꦺꦴꦫꦲꦺꦴꦫ​꧉​ ⁵ꦩꦸꦭꦤꦺ​ꦠꦶꦩꦺꦴꦠꦶꦪꦸꦱ꧀ ꦱꦼꦤꦗꦤ꧀ꦏꦼꦥꦿꦶꦪꦺ​ꦮꦲꦺ​꧈​ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦥꦶꦏꦶꦂꦫꦤ꧀ꦱꦶꦁ​ꦥꦢꦁ꧉​ꦲꦗ​ꦮꦼꦢꦶ​ꦤꦤ꧀ꦢꦁꦏꦔꦺꦭ꧀ꦭꦤ꧀ꦭꦤ꧀ꦢꦶꦠꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦩꦸ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦥꦼꦁꦒꦮꦺꦪꦤ꧀ꦏꦁꦒꦺꦴ​ꦒꦸꦱ꧀ꦠꦶ​ꦢꦶꦏꦼꦂꦗꦤ꧀ꦤꦶꦏꦧꦺꦃ​꧉​

⁶꧋ꦤꦺꦏ꧀ꦲꦏꦸ​ꦩꦶꦏꦶꦂ​ꦲꦸꦫꦶꦥ꧀ꦏꦸ​ꦢꦺꦮꦺ꧈​ꦲꦏꦸ​ꦔꦼꦂꦠꦶ​ꦤꦺꦏ꧀ꦮꦶꦱ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦁꦒꦶꦭ꧀ꦲꦏꦸ​ꦩꦸꦭꦶꦃ​꧉​ ⁷ꦲꦼꦁꦒꦺꦴꦤ꧀ꦏꦸꦚꦩ꧀ꦧꦸꦠ꧀ꦠꦏꦁꦒꦺꦴꦒꦸꦱ꧀ꦠꦶꦪꦺꦯꦸꦱ꧀ꦪꦱꦏ꧀ꦏꦸꦮꦠ꧀ꦏꦸ꧉​ꦱꦲꦶꦏꦶꦥꦼꦁꦒꦮꦺꦤꦺꦮꦶꦱ꧀ꦠꦏ꧀ꦫꦩ꧀ꦥꦸꦁꦔꦏꦺꦏꦧꦺꦃꦭꦤ꧀ꦲꦏꦸꦲꦺꦴꦫꦔ꧀ꦒꦤ꧀ꦠꦶꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦧ꧀ꦭꦱ꧀ ꦱꦏ꧀ꦏꦼꦕꦥ꧀ꦮꦲꦺꦲꦺꦴꦫ꧉​ ⁸ꦲꦸꦥꦃꦏꦸꦤꦁꦱ꧀ꦮꦂꦒ​ꦱꦲꦶꦏꦶ​ꦮꦶꦱ꧀ꦔꦼꦤ꧀ꦠꦺꦤ꧀ꦤꦶ​ꦲꦏꦸ​꧉​ꦲꦏꦸ​ꦲꦺꦤ꧀ꦠꦸꦏ꧀ꦲꦸꦥꦃꦏꦸꦮꦶ​꧈​ꦲꦮꦶꦠ꧀ꦲꦏꦸ​ꦠꦼꦩꦼꦤ꧀ꦤꦸꦫꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦔꦿꦸꦠꦸꦏꦧꦺꦃ​ꦮꦺꦴꦁ​ꦱꦏ꧀ꦧꦼꦤꦼꦂꦫꦺ​꧈​ꦢꦺꦏ꧀ꦤꦺꦢꦺꦮꦺꦱꦶꦁ​ꦧꦏꦭ꧀ꦔꦼꦭꦸꦁꦔꦏꦺꦲꦸꦥꦃꦲꦶꦏꦶ​ꦩꦫꦁ​ꦲꦏꦸ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦔꦿꦸꦠꦸꦏꦧꦺꦃ​ꦮꦺꦴꦁ​꧉​ꦤꦁꦔꦶꦁ​ꦲꦺꦴꦫ​ꦤꦩꦸꦁ​ꦲꦏꦸ​ꦢꦺꦮꦺꦱꦶꦁ​ꦧꦏꦭ꧀ꦤꦩ꧀ꦥ​ꦲꦸꦥꦃ꧈​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦔꦉꦥ꧀ꦲꦉꦥ꧀ꦠꦼꦏꦤꦺ​ꦢꦺꦏ꧀ꦤꦺꦧꦏꦭ꧀ꦤꦩ꧀ꦥ​ꦲꦸꦒ​꧉​

꧋ꦮꦼꦂꦤꦮꦼꦂꦤ​ꦏꦧꦂ​꧉​

^9-10꧋ꦠꦶꦩꦺꦴꦠꦶꦪꦸꦱ꧀ ꦤꦺꦏ꧀ꦲꦶꦤ꧀ꦠꦼꦂꦏꦺꦴꦮꦺ​ꦤ꧀ꦢꦁꦠꦼꦏ​ꦤꦁꦔ꧀ꦒꦺꦴꦤ꧀ꦏꦸ​꧈​ꦲꦮꦶꦠ꧀ꦢꦺꦩꦱ꧀ꦤꦶꦁꦒꦭ꧀ꦲꦏꦸ​꧉​ꦢꦺꦏ꧀ꦤꦺꦧꦸꦢꦭ꧀ꦤꦁꦠꦺꦱꦴꦭꦺꦴꦤꦶꦏꦴ꧈​ꦗꦭꦂꦫꦤ꧀ꦢꦺꦏ꧀ꦤꦺꦔꦼꦧꦺꦴꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦢꦺꦴꦚ​ꦲꦶꦏꦶ​ꦠꦼꦤꦶꦩ꧀ꦧꦁꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦿꦺꦱ꧀ꦏꦺꦱ꧀ꦮꦶꦱ꧀ꦧꦸꦢꦭ꧀ꦤꦁꦧꦮꦃꦒꦭꦱꦶꦪꦴꦭꦤ꧀ꦠꦶꦠꦸꦱ꧀ꦤꦁꦣꦭ꧀ꦩꦱꦶꦪ꧉​ ¹¹ꦱꦶꦁ​ꦲꦶꦗꦶꦏ꧀ꦏꦫꦺꦴ​ꦲꦏꦸ​ꦤꦁꦏꦺꦤꦺ​ꦪ​ꦤꦩꦸꦁ​ꦭꦸꦏꦱ꧀꧈​ꦤꦺꦏ꧀ꦏꦺꦴꦮꦺ​ꦩ꧀ꦧꦿꦺꦤꦺꦤꦁꦔ꧀ꦒꦺꦴꦤ꧀ꦏꦸ​꧈​ꦩꦂꦏꦸꦱ꧀ꦢꦶꦒꦮ​ꦥꦶꦱꦤ꧀ ꦲꦮꦶꦠ꧀ꦢꦺꦏ꧀ꦤꦺꦲꦶꦤ꧀ꦠꦼꦂꦔꦿꦺꦮꦁꦔꦶ​ꦲꦏꦸ​꧉​ ¹²ꦡꦶꦏꦶꦏꦸꦱ꧀ꦲꦩ꧀ꦧꦫꦁ​ꦮꦶꦱ꧀ꦧꦸꦢꦭ꧀꧈​ꦢꦺꦏ꧀ꦤꦺꦠꦏ꧀ꦏꦺꦴꦁꦏꦺꦴꦤ꧀ꦤꦁꦏꦸꦠꦌꦥ꦳ꦺꦱꦼ꧉​ ¹³ꦲꦺꦴ​ꦪ​꧈​ꦤꦺꦏ꧀​ꦩ꧀ꦧꦿꦺꦤꦺꦏꦺꦴꦮꦺ​ꦩꦩ꧀ꦥꦶꦂ​ꦤꦁꦔ꧀ꦒꦺꦴꦤ꧀ꦤꦺꦱꦼꦢꦸꦭꦸꦂ​ꦏꦂꦥꦸꦱ꧀ꦤꦁꦠꦿꦺꦴꦮꦱ꧀ ꦲꦮꦶꦠ꧀ꦗꦱ꧀ꦏꦸꦏꦼꦠꦶꦁꦒꦭ꧀ꦭꦤ꧀ꦤꦁꦏꦤ​꧉​ꦢꦶꦕꦁ​ꦏꦶꦁ​ꦔꦏꦺ​ꦥꦶꦱꦤ꧀ꦭꦤ꧀ꦧꦸꦏꦸꦧꦸꦏꦸꦤꦺ​ꦲꦩ꧀ꦧꦫꦁ​꧉​ꦱꦶꦁ​ꦠꦏ꧀ꦧꦸꦠꦸꦃꦲꦏꦺꦠꦼꦤꦤ꧀ꦪ​ꦧꦸꦏꦸꦧꦸꦏꦸ​ꦥꦺꦂꦏꦩꦺꦤ꧀ꦒꦸꦭꦸꦁꦔꦤ꧀꧈​ꦏꦸꦮꦶ​ꦲꦗ​ꦱꦩ꧀ꦥꦺꦏ꧀ꦭꦭꦶ​꧉​ ¹⁴ꦏꦺꦴꦮꦺ​ꦔꦼꦂꦠꦶ​ꦄꦭꦺꦏ꧀ꦱꦤ꧀ꦢꦺꦂ​ꦠ​꧈​ꦱꦶꦁ​ꦠꦸꦏꦁ​ꦏꦺꦴꦥꦿꦺꦴꦏꦲꦺ​꧈​ꦢꦺꦏ꧀ꦤꦺꦗꦤ꧀​ꦤ꧀ꦢꦢꦺꦏ꧀ꦏꦏꦺꦱꦁꦱꦫꦤꦺ​ꦲꦸꦫꦶꦥ꧀ꦏꦸ​ꦠꦼꦤꦤ꧀꧈​ꦒꦸꦱ꧀ꦠꦶ​ꦧꦏꦭ꧀​ꦩ꧀ꦧꦊꦱ꧀ꦢꦺꦏ꧀ꦤꦺ꧉​ ¹⁵ꦤꦁꦔꦶꦁ​ꦏꦺꦴꦮꦺ​ꦲꦩ꧀ꦧꦫꦁ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦮꦺꦴꦁ​ꦏꦸꦮꦶ​꧈​ꦲꦮꦶꦠ꧀ꦢꦺꦏ꧀ꦤꦺꦔ꧀ꦭꦮꦤ꧀ꦥꦶꦮꦸꦭꦁꦔꦺ​ꦲꦮꦏ꧀ꦏꦺ​ꦢꦺꦮꦺꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦫꦺ꧈​ꦱꦸꦥꦪ​ꦮꦺꦴꦁꦮꦺꦴꦁ​ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺ꧉​

꧋ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦤꦸꦭꦸꦁꦔꦶ​ꦲꦏꦸ​꧉​

¹⁶꧋ꦢꦺꦴꦁꦔꦺꦲꦏꦸ​ꦤꦁꦏꦿꦸꦠꦺꦴꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦲꦺ​ꦗꦤ꧀​ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦗꦶꦱꦶꦗꦶꦪ​ꦱꦶꦁ​ꦔꦿꦺꦮꦁꦔꦶ​ꦲꦏꦸ​꧉​ꦏꦧꦺꦃ​ꦥꦢ​ꦭꦸꦔ​ꦤꦶꦁꦒꦭ꧀ꦲꦏꦸ​꧉​ꦱꦶꦁ​ꦠꦏ꧀ꦱꦸꦮꦸꦤ꧀ꦒꦸꦱ꧀ꦠꦶ​ꦒꦼꦊꦩ꧀ꦔꦥꦸꦫ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​꧉​ ¹⁷ꦤꦁꦔꦶꦁ​ꦱꦼꦤꦗꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦶꦁꦒꦭ꧀ꦲꦏꦸ​꧈​ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦔꦿꦺꦮꦁꦔꦶ​ꦲꦏꦸ​꧉​ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦤ꧀ꦢꦸꦤꦸꦁꦔꦏꦺꦩꦫꦁ​ꦮꦺꦴꦁꦮꦺꦴꦁ​ꦤꦺꦏ꧀ꦲꦏꦸ​ꦧꦼꦤꦼꦂ​꧉​ꦱꦲꦶꦏꦶ​ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦭꦤ꧀ꦲꦺꦴꦫ​ꦲꦺꦤꦺꦁꦱꦶꦁ​ꦔꦭꦁꦔꦭꦁꦔꦶꦩꦼꦤꦺꦃ​꧉​ꦢꦢꦶꦤꦺ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸꦏꦧꦺꦃ​ꦧꦶꦱ​ꦏꦿꦸꦔꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦲꦩ꧀ꦧꦫꦁ​꧉​ꦥꦚ꧀ꦕꦺꦤ꧀ ꦤꦺꦏ꧀ꦒꦸꦱ꧀ꦠꦶ​ꦲꦺꦴꦫ​ꦤꦸꦭꦸꦁꦔꦶ​ꦲꦏꦸ​꧈​ꦲꦏꦸ​ꦮꦶꦱ꧀ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​꧉​ ¹⁸ꦒꦸꦱ꧀ꦠꦶ​ꦧꦏꦭ꧀​ꦔ꧀ꦭꦸꦮꦂꦫꦶ​ꦲꦏꦸ​ꦠꦼꦫꦸꦱ꧀ꦱꦁꦏꦏꦔꦺꦭ꧀ꦭꦤ꧀ꦲꦥ​ꦮꦲꦺ​ꦭꦤ꧀​ꦔ꧀ꦒꦮ​ꦲꦏꦸ​ꦏꦤ꧀ꦠꦶꦱ꧀ꦭꦩꦼꦠ꧀ꦲꦶꦁ​ꦏꦿꦠꦺꦴꦤꦺ​ ꦲꦶꦁ​ꦱ꧀ꦮꦂꦒ​꧉​ꦩꦸꦭꦤꦺ​꧈​ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦢꦶꦭꦸꦲꦸꦂꦫꦏꦺꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

¹⁹꧋ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦥꦿꦶꦱ꧀ꦏꦭꦤ꧀ꦄꦏ꧀ꦮꦶꦭ​꧉​ꦲꦸꦒ​ꦩꦫꦁ​ꦏꦿꦧꦠ꧀ꦠꦺ​ꦎꦤꦺꦱꦶꦥ꦳ꦺꦴꦫꦶꦱ꧀꧈​ ²⁰ꦌꦫꦱ꧀ꦠꦸꦱ꧀ꦱꦲꦶꦏꦶ​ꦲꦶꦗꦶꦏ꧀ꦤꦁꦏꦺꦴꦫꦶꦤ꧀ꦠꦴꦭꦤ꧀ꦠꦿꦺꦴꦥ꦳ꦶꦩꦸꦱ꧀ꦠꦏ꧀ꦠꦶꦁꦒꦭ꧀ꦤꦁꦩꦶꦭꦺꦠꦸꦱ꧀꧈​ꦢꦺꦏ꧀ꦤꦺꦭꦫ​꧉​ ²¹ꦠꦶꦩꦺꦴꦠꦶꦪꦸꦱ꧀ ꦤꦺꦏ꧀ꦲꦶꦤ꧀ꦠꦼꦂꦤ꧀ꦢꦁꦠꦼꦏ​ꦱꦏ꧀ꦢꦸꦫꦸꦁꦔꦺꦮꦪꦃ​ꦲꦢꦼꦩ꧀꧈​

꧋ꦌꦧꦸꦭꦸꦱ꧀ ꦦꦸꦢꦺꦱ꧀ ꦭꦶꦤꦸꦱ꧀ꦭꦤ꧀​ꦏ꧀ꦭꦲꦸꦢꦶꦪ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦤꦁꦏꦺꦤꦺ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ ²²ꦕꦸꦏꦸꦥ꧀ꦱꦼꦩꦺꦴꦤꦺꦴꦭꦪꦁꦲꦶꦏꦶ꧉​

꧋ꦩꦸꦒꦩꦸꦒꦒꦸꦱ꧀ꦠꦶꦤꦸꦤ꧀ꦠꦸꦤ꧀ꦭꦤ꧀ꦲꦩ꧀ꦧꦼꦂꦏꦃꦲꦶꦏꦺꦴꦮꦺ꧉​

ꦦꦈꦭꦸꦱ꧀

↑ ↑ ↑

← ꧇꧑꧇ꦠꦶꦩꦺꦴꦠꦶꦪꦸꦱ꧀

ꦠꦶꦠꦸꦱ꧀ →