ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧑꧇ꦠꦶꦩꦺꦴꦠꦶꦪꦸꦱ꧀

꧁꧋ꦭꦪꦁꦔꦺꦫꦱꦸꦭ꧀ꦦꦈꦭꦸꦱ꧀
ꦩꦫꦁꦠꦶꦩꦺꦴꦠꦶꦪꦸꦱ꧀꧈​꧂
ꦭꦪꦁꦤꦺꦴꦩꦼꦂꦱꦶꦗꦶ

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

^1-2꧋ꦠꦶꦩꦺꦴꦠꦶꦪꦸꦱ꧀ꦲꦤꦏ꧀ꦏꦸ꧈​ꦲꦶꦏꦶꦭꦪꦁꦱꦁꦏꦔ꧀ꦒꦺꦴꦤ꧀ꦏꦸ꧈​ꦦꦈꦭꦸꦱ꧀꧈​ꦏꦺꦴꦮꦺꦥꦚ꧀ꦕꦺꦤ꧀ꦠꦼꦤꦤ꧀ꦲꦤꦏ꧀ꦏꦸꦢꦺꦮꦺꦲꦶꦁꦥꦼꦔꦤ꧀ꦢꦼꦭ꧀ ꦲꦮꦶꦠ꧀ꦲꦏꦸꦱꦶꦁꦩꦶꦠꦸꦠꦸꦂꦫꦶꦏꦺꦴꦮꦺꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦏꦸꦮꦶꦱꦶꦁꦩꦫꦏ꧀ꦏꦏꦺꦏꦺꦴꦮꦺꦥꦽꦕꦪꦩꦫꦁꦢꦺꦏ꧀ꦤꦺ꧉​ꦒꦸꦱ꧀ꦠꦶꦄꦭ꧀ꦭꦃ꧈​ꦗꦸꦫꦸꦱ꧀ꦭꦩꦼꦠ꧀ꦠꦺꦭꦤ꧀ꦒꦸꦱ꧀ꦠꦶꦪꦺꦯꦸꦱ꧀ ꦥꦶꦠꦸꦭꦸꦁꦔꦤ꧀ꦤꦺꦭꦤ꧀ꦥꦼꦔꦉꦥ꧀ꦲꦉꦥ꧀ꦥꦺꦲꦮꦏ꧀ꦏꦺꦢꦺꦮꦺ꧈​ꦱꦶꦁꦩꦿꦺꦤ꧀ꦠꦃꦲꦏꦸꦏꦺꦴꦁꦏꦺꦴꦤ꧀ꦢꦢꦶꦫꦱꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧋ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦭꦤ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦒꦸꦱ꧀ꦠꦶꦤꦺꦲꦮꦏ꧀ꦏꦺꦢꦺꦮꦺ꧈​ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ꧈​ꦏꦮꦼꦭꦱ꧀ꦱꦤ꧀ꦤꦺꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁꦏꦺꦴꦮꦺ꧉​

꧋ꦥꦶꦮꦸꦭꦁꦱꦶꦁꦚꦤ꧀ꦢꦶꦁ꧉​

³꧋ꦠꦶꦩꦺꦴꦠꦶꦪꦸꦱ꧀ ꦲꦥꦶꦏ꧀ꦏꦺ​ꦏꦺꦴꦮꦺ​ꦠꦼꦫꦸꦱ꧀ꦤꦁꦌꦥ꦳ꦺꦱꦼꦤ꧀ꦢꦶꦱꦶꦏ꧀ ꦏꦪ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦧꦼꦤ꧀ꦤꦺꦏꦲꦺ​ꦢꦺꦴꦁꦔꦺꦲꦏꦸ​ꦲꦉꦥ꧀ꦧꦸꦢꦭ꧀ꦤꦁꦩꦱꦼꦢꦺꦴꦤꦶꦪ꧉​ꦲꦥ​ꦗꦭꦂꦫꦤ꧀ꦤꦺ​ꦏꦺꦴꦮꦺ​ꦏꦺꦴꦏ꧀ꦠꦏ꧀ꦏꦺꦴꦁꦏꦺꦴꦤ꧀ꦤꦁꦏꦺꦴꦤꦺꦴ​ꦮꦲꦺ​ꦤ꧀ꦢꦶꦱꦶꦏ꧀?ꦲꦮꦶꦠ꧀ꦤꦁꦏꦸꦠꦌꦥ꦳ꦺꦱꦼꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦱꦶꦁ​ꦥꦢ​ꦩꦸꦭꦁꦔꦶꦥꦶꦮꦸꦭꦁ​ꦱꦶꦁ​ꦏ꧀ꦭꦺꦫꦸ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦼꦤ꧀ꦢꦺꦏ꧀꧈​ ⁴ꦲꦗ​ꦲꦺꦤ꧀ꦠꦸꦏ꧀ꦩꦸꦭꦁꦔꦶꦢꦺꦴꦔꦺꦔꦤ꧀ꦢꦺꦴꦔꦺꦁꦔꦤ꧀ꦧꦧ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦮꦺꦴꦁ​ꦙꦸ꧈​ꦢꦺꦴꦔꦺꦁꦔꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​꧉​ꦏꦸꦮꦶ​ꦤꦩꦸꦁ​ꦩꦫꦏ꧀ꦏꦏꦺꦥꦢꦸ​꧈​ꦲꦺꦴꦫ​ꦕꦺꦴꦕꦺꦴꦏ꧀​ꦧ꧀ꦭꦱ꧀ꦏꦫꦺꦴ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​꧈​ꦱꦸꦥꦪ​ꦏꦧꦺꦃ​ꦮꦺꦴꦁ​ꦧꦶꦱ​ꦱ꧀ꦭꦩꦼꦠ꧀ ꦪ​ꦮꦺꦴꦁ​ꦱꦶꦁ​ꦒꦼꦊꦩ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ⁵ꦏꦼꦤꦺꦁꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦩꦿꦺꦤ꧀ꦠꦃ​ꦲꦮꦏ꧀ꦏꦺ​ꦢꦺꦮꦺꦏꦺꦴꦁꦏꦺꦴꦤ꧀ꦩꦸꦭꦁꦔꦶꦥꦶꦠꦸꦠꦸꦂꦫꦺ​?ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦠꦿꦺꦱ꧀ꦤꦱꦶꦁ​ꦠꦼꦤꦤ꧀ꦤꦤ꧀ꦩꦫꦁ​ꦱꦏ꧀ꦥꦢꦥꦢ꧈​ꦠꦿꦺꦱ꧀ꦤꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀ꦭꦤ꧀ꦠꦼꦩꦼꦤ꧀ꦭꦤ꧀ꦏꦫꦺꦴ​ꦥꦼꦔꦤ꧀ꦢꦼꦭ꧀ꦱꦶꦁ​ꦠꦼꦤꦤ꧀ꦤꦤ꧀ ꦲꦺꦴꦫ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​ ⁶ꦲꦺꦤꦺꦁꦱꦶꦁ​ꦥꦢ​ꦚꦼꦥꦺꦭꦺꦏ꧀ꦏꦏꦺꦲꦶꦏꦶ​꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦩꦭꦶꦃ​ꦏꦪ​ꦠꦺꦴꦁꦏꦺꦴꦱꦺꦴꦁ​:ꦲꦺꦴꦏꦺꦃꦲꦺꦴꦩꦺꦴꦁꦔꦤ꧀ꦤꦺ​꧈​ꦤꦁꦔꦶꦁ​ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ ⁷ꦮꦺꦴꦁꦮꦺꦴꦁꦏꦸꦮꦶꦏꦼꦥꦺꦔꦶꦤ꧀ꦢꦶꦲꦁꦒꦼꦥ꧀ꦏꦪꦒꦸꦫꦸꦒꦸꦫꦸꦱꦶꦁꦩꦸꦭꦁꦔꦶꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃ꧈​ꦤꦁꦔꦶꦁꦢꦺꦏ꧀ꦤꦺꦢꦺꦮꦺꦲꦺꦴꦫꦥꦢꦔꦼꦂꦠꦶꦲꦥꦱꦶꦁꦢꦶꦲꦺꦴꦩꦺꦴꦁ꧉​ꦮꦢꦸꦃ꧈​ꦤꦺꦏ꧀ꦩꦸꦭꦁꦔꦶꦮꦲꦺꦏꦪꦠꦼꦤꦤ꧀ꦠꦼꦤꦤ꧀ꦤ꧈​ꦤꦁꦔꦶꦁꦱꦏ꧀ꦗꦤꦺꦢꦺꦏ꧀ꦤꦺꦢꦺꦮꦺꦲꦺꦴꦫꦢꦸꦤꦸꦁꦲꦥꦱꦶꦁꦢꦶꦮꦸꦭꦁꦔꦏꦺ꧉​

⁸꧋ꦲꦮꦏ꧀ꦏꦺ​ꦢꦺꦮꦺꦭꦲꦸꦠ꧀ꦔꦼꦂꦠꦶ​ꦠ​ꦤꦺꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦥꦶꦏ꧀ꦤꦺꦏ꧀ꦢꦶꦏꦁꦒꦺꦴꦏ꧀ꦏꦏꦺꦱꦏ꧀ꦩꦼꦱ꧀ꦠꦶꦤꦺ꧉​ ⁹ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦢꦸꦤꦸꦁꦤꦺꦏ꧀ꦮꦺꦠ꧀ꦏꦸꦮꦶ​ꦲꦺꦴꦫ​ꦢꦶꦒꦮꦺ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦧꦼꦕꦶꦏ꧀ꦲꦥ​ꦮꦺꦴꦁ​ꦱꦶꦁ​ꦲꦥꦶꦏ꧀​ꦏ꧀ꦭꦏꦸꦮꦤ꧀ꦤꦺ​꧈​ꦲꦺꦴꦫ​!ꦮꦺꦠ꧀ꦏꦸꦮꦶ​ꦢꦶꦒꦮꦺ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧈​ꦮꦺꦴꦁ​ꦱꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦤ꧀ꦢꦧ꧀ꦊꦏ꧀ ꦱꦶꦁ​ꦲꦺꦴꦫ​ꦥꦼꦂꦢꦸꦭꦶꦏꦫꦺꦴ​ꦮꦺꦠ꧀ꦭꦤ꧀ꦥꦼꦂꦤꦠꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁰ꦮꦺꦠ꧀ꦏꦸꦮꦶ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦩꦠꦺꦤ꧀ꦤꦶ​ꦧꦥꦧꦶꦪꦸꦁꦔꦺ​꧈​ꦮꦺꦴꦁ​ꦱꦶꦁ​ꦠꦸꦏꦁ​ꦩꦠꦺꦤ꧀ꦤꦶ​ꦮꦺꦴꦁ​꧈​ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁꦭꦤ꧀ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲ꦳ꦺꦴꦩꦺꦴꦱꦺꦏ꧀꧈​ꦲꦸꦒ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦠꦸꦏꦁ​ꦢꦺꦴꦢꦺꦴꦭ꧀ꦱ꧀ꦭꦥ꦳꧀ ꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦥꦸꦱ꧀ꦱꦶ​ꦭꦤ꧀ꦱꦶꦁ​ꦢꦢꦶ​ꦱꦼꦏ꧀ꦱꦶ​ꦱꦶꦁ​ꦒꦺꦴꦫꦺꦴꦃ​꧉​ꦮꦺꦠ꧀ꦏꦸꦮꦶ​ꦲꦸꦒ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦭꦶꦪꦭꦶꦪꦤꦺ​ꦱꦶꦁ​ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ¹¹ꦪ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦲꦶꦏꦶ​ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​꧉​ꦭꦤ꧀ꦥꦶꦠꦸꦠꦸꦂ​ꦲꦶꦏꦶ​ꦱꦶꦁ​ꦤ꧀ꦢꦸꦢꦸꦃꦲꦏꦺꦒꦼꦢꦺꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦼꦕꦶꦏ꧀꧈​

꧋ꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​꧉​

¹²꧋ꦲꦏꦸ​ꦗꦤ꧀ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​ꦏꦁꦒꦺꦴ​ꦚꦩ꧀ꦧꦸꦠ꧀ꦠꦔ꧀ꦭꦢꦺꦤ꧀ꦤꦶ​ꦢꦺꦏ꧀ꦤꦺ꧉​ ¹³ꦭꦤ꧀ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦔꦁꦒꦼꦥ꧀ꦲꦏꦸ​ꦥꦤ꧀ꦠꦼꦱ꧀ꦚꦩ꧀ꦧꦸꦠ꧀ꦠꦏꦁꦒꦺꦴ​ꦢꦺꦏ꧀ꦤꦺ꧈​ꦱꦼꦤꦗꦤ꧀ꦲꦏꦸ​ꦩ꧀ꦧꦶꦪꦺꦤ꧀ꦲꦸꦒ​ꦚꦶꦪꦚꦶꦪ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦸꦫꦸꦠ꧀ꦢꦺꦏ꧀ꦤꦺ꧉​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦏ꧀ꦱ​ꦲꦶꦗꦶꦏ꧀ꦩꦼꦭꦱ꧀ꦩꦫꦁ​ꦲꦏꦸ​꧈​ꦲꦮꦶꦠ꧀ꦲꦏꦸ​ꦩꦲꦸꦤꦺ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧈​ꦗꦭꦂꦫꦤ꧀ꦲꦏꦸ​ꦢꦸꦫꦸꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ¹⁴ꦥꦚ꧀ꦕꦺꦤ꧀ ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦲꦏꦸ​ꦗꦤ꧀ꦒꦼꦢꦺꦠꦼꦤꦤ꧀ꦭꦤ꧀ꦲꦏꦸ​ꦢꦶꦏꦺꦏ꧀ꦏꦶꦥꦼꦔꦤ꧀ꦢꦼꦭ꧀ꦭꦤ꧀ꦏꦠꦿꦺꦱ꧀ꦤꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁵ꦠꦶꦩꦺꦴꦠꦶꦪꦸꦱ꧀ ꦠꦼꦩ꧀ꦧꦸꦁ​ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦠꦼꦤꦤ꧀ꦭꦤ꧀ꦏꦼꦤꦺꦁꦲꦩ꧀ꦧꦺꦴꦏ꧀ꦒꦸꦒꦸ꧈​ꦪꦏꦸꦮꦶ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦤꦁꦗꦒꦠ꧀ꦏꦺꦤꦺ​ꦠꦸꦗꦸꦮꦤ꧀ꦤꦺꦤꦸꦭꦸꦁꦔꦶ​ꦮꦺꦴꦁ​ꦲꦭ​ꦱꦸꦥꦪ​ꦧꦶꦱ​ꦱ꧀ꦭꦩꦼꦠ꧀꧈​ꦪ​ꦏꦪ​ꦲꦏꦸ​ꦲꦶꦏꦶ​꧈​ꦱꦶꦁ​ꦒꦼꦢꦺꦢꦺꦮꦺꦱꦭꦃꦲꦺ​꧉​ ¹⁶ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦭꦱ꧀ꦱꦶ​ꦲꦏꦸ​꧈​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏꦼꦱꦧꦂꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦏꦁꦒꦺꦴ​ꦕꦺꦴꦤ꧀ꦠꦺꦴ​ꦩꦫꦁ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦲꦶꦁ​ꦠꦼꦩ꧀ꦧꦺ​ꦧꦏꦭ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦭꦤ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧉​ ¹⁷ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦸꦁꦒꦭ꧀ꦭꦺ​꧈​ꦫꦠꦸ​ꦭꦁꦒꦼꦁ​ꦱꦶꦁ​ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺꦭꦤ꧀ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦢꦶꦭꦸꦲꦸꦂꦫꦏꦺꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

¹⁸꧋ꦠꦶꦩꦺꦴꦠꦶꦪꦸꦱ꧀ꦲꦤꦏ꧀ꦏꦸ​꧈​ꦏꦺꦴꦮꦺ​ꦠꦏ꧀ꦥꦱꦿꦃꦲꦶ​ꦥꦼꦁꦒꦮꦺꦏꦸꦲꦶꦏꦶ​꧈​ꦩꦤꦸꦠ꧀ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦶꦁ​ꦮꦶꦱ꧀ꦏꦮꦼꦠꦸꦩ꧀ꦧꦶꦪꦺꦤ꧀ ꦔꦺꦴꦩꦺꦴꦁꦔꦏꦺꦤꦺꦏ꧀ꦏꦺꦴꦮꦺ​ꦧꦏꦭ꧀ꦚꦩ꧀ꦧꦸꦠ꧀ꦠꦏꦪ​ꦔꦺꦤꦺ​ꦲꦶꦏꦶ​꧉​ ¹⁹ꦩꦸꦭꦤꦺ​꧈​ꦲꦺꦭꦶꦁꦔ​ꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦏꦸꦮꦶ​ꦭꦤ꧀ꦢꦶꦭꦏꦺꦴꦤ꧀ꦤꦶ​ꦱꦶꦁ​ꦠꦼꦤꦤ꧀ꦤꦤ꧀꧈​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦥꦼꦔꦤ꧀ꦢꦼꦭ꧀ꦭꦤ꧀ꦏꦫꦺꦴ​ꦏꦼꦧꦠꦶꦤ꧀ꦤꦤ꧀ꦱꦶꦁ​ꦉꦱꦶꦏ꧀꧈​ꦲꦮꦶꦠ꧀ꦲꦺꦤꦺꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺꦏꦸꦲꦶꦏꦶ​꧈​ꦤꦁꦔꦶꦁ​ꦲꦺꦴꦫ​ꦏꦫꦺꦴ​ꦏꦼꦧꦠꦶꦤ꧀ꦤꦤ꧀ꦱꦶꦁ​ꦉꦱꦶꦏ꧀ ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ ²⁰ꦏꦪꦢꦺꦤꦺꦲ꦳ꦶꦩꦺꦤꦺꦪꦸꦱ꧀ꦭꦤ꧀ꦄꦭꦺꦏ꧀ꦱꦤ꧀ꦢꦺꦂ​꧈​ꦱꦶꦁ​ꦮꦶꦱ꧀ꦠꦏ꧀ꦥꦱꦿꦃꦲꦏꦺꦩꦫꦁ​ꦱꦺꦠꦤ꧀ ꦱꦸꦥꦪ​ꦥꦢ​ꦏꦥꦺꦴꦏ꧀ꦲꦼꦁꦒꦺꦴꦤꦺ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦥꦤ꧀ꦢꦺꦴꦔ​ꦏꦁꦒꦺꦴ​ꦥꦫ​ꦥꦼꦁꦒꦼꦢꦺ꧉​

꧇​꧒꧇​ ¹꧋ꦠꦶꦩꦺꦴꦠꦶꦪꦸꦱ꧀ ꦏꦉꦥ꧀ꦏꦸ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦩꦫꦁ​ꦏꦺꦴꦮꦺ​ꦪꦏꦸꦮꦶ​꧈​ꦥꦢ​ꦤ꧀ꦢꦼꦢꦺꦴꦔꦲ​꧈​ꦚꦸꦮꦸꦤ​ꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦮꦺꦴꦁ​ꦏꦧꦺꦃ​꧉​ ²ꦥꦢ​ꦤ꧀ꦢꦼꦢꦺꦴꦔꦲ​ꦏꦁꦒꦺꦴ​ꦥꦼꦁꦒꦼꦢꦺꦤꦺꦤꦼꦒꦫ​ꦭꦤ꧀ꦮꦺꦴꦁ​ꦏꦧꦺꦃ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦥꦼꦚ꧀ꦗꦮꦧ꧀ꦒꦼꦢꦺ꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦧꦶꦱ​ꦲꦪꦼꦩ꧀ꦭꦤ꧀ꦠꦼꦤ꧀ꦠꦽꦩ꧀ꦭꦤ꧀ꦧꦶꦱ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦠꦶꦁꦏꦃ​ꦭꦤ꧀ꦭꦏꦸ​ꦱꦶꦁ​ꦧꦼꦤꦼꦂ​꧉​ ³ꦥꦤ꧀ꦢꦺꦴꦔꦏꦪꦔꦺꦴꦤꦺꦴꦏꦸꦮꦶꦲꦥꦶꦏ꧀ꦭꦤ꧀ꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈​ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧉​ ⁴ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦶꦱꦲ​ꦏꦧꦺꦃ​ꦮꦺꦴꦁ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ꦭꦤ꧀ꦔꦼꦂꦠꦶ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ⁵ꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦲꦸꦒ꧈​ꦧꦶꦱꦲꦮꦺꦴꦁꦮꦺꦴꦁꦥꦢꦔꦼꦂꦠꦶꦤꦺꦏ꧀ꦤꦩꦸꦁꦲꦺꦤꦺꦁꦒꦸꦱ꧀ꦠꦶꦄꦭ꧀ꦭꦃꦱꦶꦗꦶꦭꦤ꧀ꦤꦩꦸꦁꦲꦺꦤꦺꦁꦮꦺꦴꦁꦱꦶꦗꦶꦱꦶꦁꦧꦶꦱꦔ꧀ꦒꦠꦸꦏ꧀ꦏꦏꦺꦩꦤꦸꦁꦱꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦪꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧉​ ⁶ꦢꦺꦏ꧀ꦤꦺꦔ꧀ꦭꦧꦸꦃꦲꦶꦩꦤꦸꦁꦱꦱꦩ꧀ꦥꦺꦏ꧀ꦩꦠꦶ꧈​ꦱꦸꦥꦪꦩꦤꦸꦁꦱꦧꦶꦱꦲꦸꦕꦸꦭ꧀ꦱꦁꦏꦏ꧀ꦮꦱꦤꦺꦲꦭ꧉​ꦥꦠꦶꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦢꦶꦒꦮꦺꦠꦤ꧀ꦢꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦤꦺꦏ꧀ꦢꦺꦏ꧀ꦤꦺꦏꦼꦥꦺꦔꦶꦤ꧀ꦤꦸꦭꦸꦁꦔꦶꦏꦧꦺꦃꦩꦤꦸꦁꦱ꧈​ꦱꦸꦥꦪꦥꦢꦱ꧀ꦭꦩꦼꦠ꧀꧈​ꦥꦚ꧀ꦕꦺꦤ꧀ꦮꦚ꧀ꦕꦶꦤꦺꦪꦮꦶꦱ꧀ꦥꦼꦤꦼꦂꦠꦼꦤꦤ꧀꧈​ ⁷ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦭꦶꦃ​ꦲꦏꦸ​ꦢꦢꦶ​ꦫꦱꦸꦭ꧀ꦱꦶꦁ​ꦏꦸꦢꦸ​ꦩꦸꦭꦁꦔꦶꦭꦶꦪꦭꦶꦪ​ꦧꦁꦱ​ꦧꦧ꧀ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦢꦢꦶꦤꦺ​ꦧꦁꦱ​ꦭꦶꦪꦤꦺ​ꦧꦶꦱ​ꦥꦽꦕꦪ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​

⁸꧋ꦠꦶꦩꦺꦴꦠꦶꦪꦸꦱ꧀ ꦏꦉꦥ꧀ꦏꦸ​꧈​ꦤꦁꦲꦼꦤ꧀ꦢꦶ​ꦮꦲꦺ​ꦤꦺꦏ꧀ꦥꦢ​ꦔꦸꦩ꧀ꦥꦸꦭ꧀ ꦮꦺꦴꦁ​ꦭꦤꦁꦭꦤꦁ​ꦤꦺꦏ꧀​ꦤ꧀ꦢꦼꦢꦺꦴꦔ​ꦏꦸꦢꦸꦤꦺ​ꦏꦫꦺꦴ​ꦲꦠꦶ​ꦱꦶꦁ​ꦥꦱꦿꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦤꦺꦏ꧀​ꦤ꧀ꦢꦺꦴꦁꦔꦧꦶꦱ​ꦔꦸꦩ꧀ꦧꦸꦭ꧀ꦭꦏꦺꦠꦔꦤ꧀ꦤꦺ​꧈​ꦲꦮꦶꦠ꧀ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦫꦱ​ꦤꦼꦱꦸ​ꦲꦥ​ꦱꦁꦱꦶꦤꦺꦏ꧀ꦲꦺꦴꦫ​ꦧꦏꦭ꧀ꦏꦼꦠꦩ꧀ꦥꦥꦤ꧀ꦢꦺꦴꦔꦤꦺ​꧉​ ⁹ꦱꦼꦩꦺꦴꦤꦺꦴꦲꦸꦒꦏꦉꦥ꧀ꦏꦸꦏꦁꦒꦺꦴꦮꦺꦴꦁꦮꦺꦢꦺꦴꦏ꧀ꦮꦺꦢꦺꦴꦏ꧀ ꦥꦢꦔꦁꦒꦺꦴꦮꦱꦭꦶꦤ꧀ꦱꦶꦁꦥꦤ꧀ꦠꦼꦱ꧀ꦭꦤ꧀ꦥꦕꦏ꧀ꦏꦤ꧀ꦱꦶꦁꦭꦸꦩꦿꦃ꧉​ꦲꦺꦴꦫꦲꦸꦱꦃꦫꦩ꧀ꦧꦸꦠ꧀ꦠꦺꦢꦶꦒꦮꦺꦱꦶꦁꦲꦺꦴꦫꦲꦺꦴꦫꦭꦤ꧀ꦢꦶꦥꦱꦁꦔꦶꦲꦼꦩꦱ꧀ꦲꦥꦧꦫꦁꦭꦶꦪꦤꦺꦱꦶꦁꦥꦠꦶꦁꦏꦼꦂꦭꦶꦥ꧀ ꦲꦺꦴꦫ꧉​ꦭꦤ꧀ꦲꦺꦴꦫꦲꦸꦱꦃꦔꦁꦒꦺꦴꦱꦭꦶꦤ꧀ꦱꦶꦁꦭꦫꦁꦭꦫꦁ꧉​ ¹⁰ꦠꦼꦤꦶꦩ꧀ꦧꦁꦔ꧀ꦒꦺꦴꦭꦺꦏ꧀ꦥꦼꦔꦊꦩ꧀ꦩꦤ꧀ꦏꦫꦺꦴꦥꦕꦏ꧀ꦏꦤ꧀ꦱꦶꦁꦏꦪꦔꦺꦴꦤꦺꦴꦏꦸꦮꦶ꧈​ꦭꦸꦮꦸꦁꦥꦢꦔ꧀ꦭꦸꦩꦸꦃꦲꦶ ꦔ꧀ꦒꦮꦺꦧꦼꦕꦶꦏ꧀ꦮꦲꦺ꧉​ꦏꦸꦮꦶꦲꦥꦶꦏ꧀ꦭꦤ꧀ꦥꦤ꧀ꦠꦼꦱ꧀ꦏꦁꦒꦺꦴꦔꦺꦠꦺꦴꦏ꧀ꦏꦏꦺꦤꦺꦏ꧀ꦤꦸꦫꦸꦠ꧀ꦒꦸꦱ꧀ꦠꦶꦄꦭ꧀ꦭꦃ꧉​ ¹¹ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦱꦶꦁ​ꦲꦤ꧀ꦠꦼꦁ​꧈​ꦠꦿꦶꦩ​ꦢꦶꦧ꧀ꦭꦗꦂꦫꦶꦏꦫꦺꦴ​ꦮꦺꦴꦁ​ꦭꦤꦁ​꧉​ ¹²ꦲꦏꦸ​ꦲꦺꦴꦫ​ꦒꦼꦊꦩ꧀ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦩꦸꦭꦁꦔꦶꦤꦁꦏꦸꦩ꧀ꦥꦸꦭ꧀ꦭꦤ꧀꧈​ꦭꦤ꧀ꦲꦏꦸ​ꦲꦸꦒ​ꦲꦺꦴꦫ​ꦔ꧀ꦭꦶꦭꦤꦶ​ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦩꦤ꧀ꦢꦺꦴꦂꦫꦶꦱꦶꦁ​ꦭꦤꦁ​꧉​ꦥꦤ꧀ꦠꦼꦱ꧀ꦱꦺ​ꦏꦸꦮꦶ​ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦱꦶꦁ​ꦲꦤ꧀ꦠꦼꦁ​꧉​ ¹³ꦒꦸꦱ꧀ꦠꦶ​ꦄꦭ꧀ꦭꦃ​ꦭꦲꦸꦠ꧀​ꦔ꧀ꦒꦮꦺ​ꦄꦢꦩ꧀​ꦤ꧀ꦢꦶꦱꦶꦏ꧀ꦠ​꧈​ꦱꦏ꧀ꦮꦶꦱ꧀ꦱꦺ​ꦄꦢꦩ꧀ꦠꦼꦫꦸꦱ꧀ꦌꦮ꦳꧉​ ¹⁴ꦏꦫꦺꦴꦩꦼꦤꦺꦃ​꧈​ꦢꦸꦢꦸ​ꦄꦢꦩ꧀ꦱꦶꦁ​ꦢꦶꦏꦼꦤꦺꦁꦏꦫꦺꦴ​ꦱꦺꦠꦤ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺ꧈​ꦤꦁꦔꦶꦁ​ꦱꦶꦁ​ꦮꦺꦢꦺꦴꦏ꧀꧈​ꦢꦺꦏ꧀ꦤꦺꦱꦶꦁ​ꦔ꧀ꦒꦸꦒꦸ​ꦲꦥꦸꦱꦤ꧀ꦤꦺꦱꦺꦠꦤ꧀ꦠꦼꦫꦸꦱ꧀ꦤꦼꦫꦏ꧀ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦤꦁꦔꦶꦁ​ꦏꦼꦥꦿꦶꦪꦺ​ꦮꦲꦺ​ꦮꦺꦴꦁ​ꦮꦺꦢꦺꦴꦏ꧀ꦧꦏꦭ꧀ꦱ꧀ꦭꦩꦼꦠ꧀ ꦱꦼꦤꦗꦤ꧀ꦤ​ꦧꦏꦭ꧀ꦔꦿꦱꦏ꧀ꦏꦏꦺꦭꦫ​ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦲꦤꦏ꧀ꦲꦤꦏ꧀ ꦥꦺꦴꦏꦺꦴꦏ꧀ꦏꦺ​ꦗꦚ꧀ꦗꦶ​ꦥꦢ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦥꦽꦕꦪ​ꦭꦤ꧀ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦱꦸꦕꦶ​ꦭꦤ꧀ꦱꦶꦁ​ꦥꦤ꧀ꦠꦼꦱ꧀꧈​

↑ ↑ ↑

꧋ꦥꦫ​ꦥꦼꦤꦸꦤ꧀ꦠꦸꦤ꧀꧈​

꧇​꧓꧇​ ¹꧋ꦠꦶꦩꦺꦴꦠꦶꦪꦸꦱ꧀ ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀ ꦱꦼꦢꦸꦭꦸꦂ​ꦏꦸꦮꦶ​ꦥꦚ꧀ꦕꦺꦤ꧀ꦱꦼꦤꦼꦁ​ꦏꦫꦺꦴ​ꦥꦼꦁꦒꦮꦺꦏꦸꦱꦶꦁ​ꦲꦥꦶꦏ꧀ꦧꦔꦼꦠ꧀꧈​ꦏꦸꦮꦶ​ꦲꦥꦶꦏ꧀ꦠꦼꦤꦤ꧀꧈​ ²ꦩꦸꦭꦤꦺ​꧈​ꦱꦼꦢꦸꦭꦸꦂ​ꦱꦶꦁ​ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀ꦏꦸꦮꦶ​ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦧ꧀ꦭꦱ꧀ꦲꦺꦴꦫ​ꦏꦼꦤꦺꦁꦢꦶꦱꦭꦃꦲꦏꦺꦏꦫꦺꦴ​ꦮꦺꦴꦁ​ꦭꦶꦪꦤꦺ​꧈​ꦲꦮꦶꦠ꧀ꦲꦥꦶꦏ꧀​ꦏ꧀ꦭꦏꦸꦮꦤ꧀ꦤꦺ​꧉​ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦱꦶꦗꦶ​ꦭꦤ꧀ꦩꦼꦤꦺꦃ​ꦱꦼꦢꦸꦭꦸꦂ​ꦏꦸꦮꦶ​ꦏꦸꦢꦸ​ꦥꦢꦁꦥꦶꦏꦶꦂꦫꦤ꧀ꦤꦺ​꧈​ꦔ꧀ꦒꦼꦤꦃ​ꦲꦔꦼꦤ꧀ꦤꦔꦼꦤ꧀ꦤꦺꦭꦤ꧀ꦥꦤ꧀ꦠꦼꦱ꧀​ꦏ꧀ꦭꦏꦸꦮꦤ꧀ꦤꦺ​꧉​ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦲꦺꦩꦤ꧀ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦩꦫꦁ​ꦭꦶꦪꦤꦺ​ꦭꦤ꧀ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦧꦶꦱ​ꦩꦸꦭꦁꦔꦶ꧉​ ³ꦲꦺꦴꦫ​ꦏꦼꦤꦺꦁꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦺꦴꦩ꧀ꦧꦺ​ꦲꦥ​ꦮꦺꦴꦁ​ꦱꦶꦁ​ꦒꦩ꧀ꦥꦁ​ꦤꦼꦱꦸ​꧈​ꦲꦺꦴꦫ​꧉​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦒꦿꦥꦾꦏ꧀ꦭꦤ꧀ꦱꦼꦤꦼꦁ​ꦫꦸꦏꦸꦤ꧀ ꦲꦺꦴꦫ​ꦮꦺꦴꦁ​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀꧈​ ⁴ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦧꦶꦱ​ꦤꦠ​ꦧꦿꦪꦠ꧀ꦠꦺ​ꦭꦤ꧀ꦧꦶꦱ​ꦩꦸꦭꦁꦔꦶꦲꦤꦏ꧀ꦏꦺ​ꦱꦸꦥꦪ​ꦥꦢ​ꦩꦤꦸꦠ꧀ꦭꦤ꧀​ꦤ꧀ꦢꦸꦮꦺꦏ꧀ꦭꦏꦸꦮꦤ꧀ꦱꦶꦁ​ꦲꦥꦶꦏ꧀꧈​ ⁵ꦲꦮꦶꦠ꧀ꦮꦺꦴꦁ​ꦱꦶꦁ​ꦲꦺꦴꦫ​ꦧꦶꦱ​ꦤꦠ​ꦲꦺꦴꦩꦃꦲꦺ​ꦢꦺꦮꦺꦩꦼꦱ꧀ꦠꦶꦪ​ꦲꦺꦴꦫ​ꦧꦏꦭ꧀ꦧꦶꦱ​ꦤꦠ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​꧉​ ⁶ꦲꦗ​ꦱꦼꦢꦸꦭꦸꦂ​ꦱꦶꦁ​ꦲꦶꦗꦶꦏ꧀ꦲꦚꦂ​꧈​ꦱꦶꦁ​ꦢꦸꦫꦸꦁ​ꦱꦸꦮꦶꦤꦸꦫꦸꦠ꧀ꦒꦸꦱ꧀ꦠꦶ​꧈​ꦩꦼꦁꦏꦺꦴ​ꦤ꧀ꦢꦏ꧀ꦩꦭꦶꦃ​ꦱꦺꦴꦩ꧀ꦧꦺꦴꦁꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦢꦶꦱꦼꦠꦿꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦺꦠꦤ꧀​ꦩ꧀ꦧꦶꦪꦺꦤ꧀꧈​ ⁷ꦩꦭꦃꦩꦭꦃ꧈​ꦱꦼꦢꦸꦭꦸꦂ​ꦱꦶꦁ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦏꦸꦮꦶ​ꦏꦸꦢꦸꦤꦺ​ꦱꦼꦢꦸꦭꦸꦂ​ꦱꦶꦁ​ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦏ꧀​ꦚ꧀ꦗꦧꦤꦺ​ꦥꦱꦩꦸꦮꦤ꧀꧈​ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​꧈​ꦩꦼꦁꦏꦺꦴ​ꦤ꧀ꦢꦏ꧀ꦢꦶꦲꦺꦴꦩꦺꦴꦁꦮꦺꦴꦁ​ꦭꦤ꧀ꦧꦶꦱ​ꦏꦼꦤꦺꦁꦥꦱꦁꦔꦤ꧀ꦤꦺ​ꦱꦺꦠꦤ꧀꧈​

꧋ꦥꦫ​ꦥꦼꦭꦢꦺꦤ꧀꧈​

⁸꧋ꦱꦼꦩꦺꦴꦤꦺꦴ​ꦲꦸꦒ​꧈​ꦱꦼꦢꦸꦭꦸꦂ​ꦱꦶꦁ​ꦢꦢꦶ​ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀ꦏꦸꦮꦶ​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦲꦥꦶꦏ꧀​ꦏ꧀ꦭꦏꦸꦮꦤ꧀ꦤꦺ​ꦭꦤ꧀ꦲꦺꦴꦫ​ꦱꦼꦤꦼꦁ​ꦒꦺꦴꦫꦺꦴꦃ​꧉​ꦲꦺꦴꦫ​ꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦺꦴꦩ꧀ꦧꦺ​ꦲꦥ​ꦮꦺꦴꦁ​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀꧈​ ⁹ꦩꦭꦃ​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦩꦤ꧀ꦠꦼꦥ꧀ꦤꦸꦫꦸꦠ꧀ꦥꦶꦮꦸꦭꦁ​ꦱꦶꦁ​ꦧꦼꦤꦼꦂ​ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​ꦏꦫꦺꦴ​ꦥꦶꦮꦸꦭꦁ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦢꦸꦃꦲꦏꦺꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦢꦺꦏ꧀ꦤꦺꦩꦸꦭꦁꦔꦶꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ¹⁰ꦱꦼꦢꦸꦭꦸꦂ​ꦲꦶꦏꦶ​ꦲꦩ꧀ꦧꦫꦁ​ꦏꦸꦢꦸ​ꦢꦶꦗꦗꦭ꧀​ꦤ꧀ꦢꦶꦱꦶꦏ꧀꧈​ꦤꦺꦏ꧀ꦱꦏ꧀ꦮꦶꦱ꧀ꦱꦺ​ꦢꦶꦗꦗꦭ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦥꦢ​ꦊꦒ​ꦏꦫꦺꦴ​ꦢꦺꦏ꧀ꦤꦺ꧈​ꦪ​ꦏꦼꦤꦺꦁꦢꦶꦏꦺꦴꦁꦏꦺꦴꦤ꧀ꦩꦺꦴꦭꦃꦲꦶꦥꦼꦁꦒꦮꦺꦪꦤ꧀ꦏꦸ꧉​ ¹¹ꦱꦼꦩꦺꦴꦤꦺꦴ​ꦲꦸꦒ​꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦔ꧀ꦭꦢꦺꦤ꧀ꦤꦶ​ꦤꦁꦥꦱꦩꦸꦮꦤ꧀ ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦲꦥꦶꦏ꧀​ꦏ꧀ꦭꦏꦸꦮꦤ꧀ꦤꦺ​꧉​ꦲꦺꦴꦫ​ꦏꦼꦤꦺꦁꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦺꦴꦩꦺꦴꦁꦔꦏꦺꦲꦺꦭꦺꦏ꧀ꦏꦺ​ꦭꦶꦪꦤꦺ​꧈​ꦤꦁꦔꦶꦁ​ꦏꦸꦢꦸꦤꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦥꦢꦁꦥꦶꦏꦶꦂꦫꦤ꧀ꦤꦺ​ꦭꦤ꧀ꦏꦼꦤꦺꦁꦢꦶꦥꦽꦕꦪ​ꦲꦶꦁ​ꦲꦥ​ꦮꦲꦺ​꧉​ ¹²ꦠꦸꦏꦁ​ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀ꦱꦶꦁ​ꦭꦤꦁ​ꦏꦸꦮꦶ​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦤꦩꦸꦁ​ꦤ꧀ꦢꦸꦮꦺꦧꦺꦴꦗꦺꦴ​ꦱꦶꦗꦶ​ꦭꦤ꧀ꦧꦶꦱ​ꦤꦠ​ꦧꦿꦪꦠ꧀ꦠꦺ​ꦱꦶꦁ​ꦲꦥꦶꦏ꧀꧈​ ¹³ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦏꦧꦺꦃ​ꦥꦼꦤ꧀ꦠꦶꦁ​ꦧꦔꦼꦠ꧀ ꦲꦮꦶꦠ꧀ꦮꦺꦴꦁ​ꦱꦶꦁ​ꦔ꧀ꦭꦢꦺꦤ꧀ꦤꦶ​ꦥꦱꦩꦸꦮꦤ꧀ꦱꦶꦁ​ꦲꦥꦶꦏ꧀ꦭꦤ꧀ꦱꦏ꧀ꦩꦼꦱ꧀ꦠꦶꦤꦺꦧꦏꦭ꧀ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦭꦶꦪꦤꦺ​ꦭꦤ꧀ꦧꦏꦭ꧀ꦠꦩ꧀ꦧꦃ​ꦏꦼꦤ꧀ꦢꦼꦭ꧀ꦭꦺ​ꦲꦼꦁꦒꦺꦴꦤꦺ​ꦔꦧꦂꦫꦏꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦱꦶꦁ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​

¹⁴꧋ꦠꦶꦩꦺꦴꦠꦶꦪꦸꦱ꧀ ꦲꦏꦸ​ꦩꦶꦏꦶꦂ​ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦤ꧀ꦢꦁꦧꦶꦱ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ ¹⁵ꦤꦁꦔꦶꦁ​ꦩꦼꦤꦮ​ꦮꦲꦺ​ꦲꦺꦤꦺꦁꦲꦭꦁꦔꦭꦔꦤ꧀ꦤꦺꦱꦶꦁ​ꦩꦫꦏ꧀ꦏꦏꦺꦠꦼꦏꦏꦸ​ꦫꦢ​ꦱꦸꦮꦶ꧈​ꦩꦸꦭꦤꦺ​ꦲꦏꦸ​ꦩꦺꦴꦭꦃꦲꦶꦏꦶꦫꦶꦩ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧉​ꦢꦢꦶꦤꦺ​ꦏꦺꦴꦮꦺ​ꦔꦼꦂꦠꦶ​ꦭꦤ꧀ꦧꦶꦱ​ꦩꦸꦭꦁꦔꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦧꦧ꧀ꦲꦸꦫꦶꦥ꧀ꦥꦺꦭꦤ꧀​ꦏ꧀ꦭꦏꦸꦮꦤ꧀ꦤꦺ​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦪ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦥꦱꦩꦸꦮꦤ꧀ꦏꦸꦢꦸ​ꦩꦤ꧀ꦠꦼꦥ꧀ꦲꦼꦁꦒꦺꦴꦤꦺ​ꦥꦽꦕꦪ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ ꦧꦼꦤꦼꦂ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦸꦢꦸ​ꦚ꧀ꦗꦒ​꧈​ꦱꦸꦥꦪ​ꦲꦗ​ꦱꦩ꧀ꦥꦺꦏ꧀ꦥꦶꦠꦸꦠꦸꦂ​ꦏꦸꦮꦶ​ꦢꦶꦮꦭꦶꦏ꧀ꦏꦫꦺꦴ​ꦮꦺꦴꦁ​ꦭꦶꦪ​꧉​ ¹⁶ꦲꦮꦏ꧀ꦏꦺ​ꦢꦺꦮꦺꦔꦏꦺꦴꦤ꧀ꦤꦶ​ꦠꦼꦤꦤ꧀ ꦤꦺꦏ꧀ꦥꦶꦠꦸꦠꦸꦂ​ꦱꦶꦁ​ꦢꦶꦏꦧꦂꦫꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦥꦚ꧀ꦕꦺꦤ꧀ꦮꦼꦮꦢꦶ​ꦱꦶꦁ​ꦒꦼꦢꦺ​ꦧꦔꦼꦠ꧀꧈​ꦥꦶꦠꦸꦠꦸꦂ​ꦲꦶꦏꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀

ꦒꦸꦱ꧀ꦠꦶ​ꦪꦺꦯꦸꦱ꧀ꦢꦢꦶ​ꦩꦤꦸꦁꦱ​
ꦭꦤ꧀ꦫꦺꦴꦃ​ꦱꦸꦕꦶ​ꦚꦼꦏ꧀ꦱꦺꦤ꧀ꦤꦶ​
ꦤꦺꦏ꧀ꦲꦸꦫꦶꦥ꧀ꦥꦺꦢꦺꦏ꧀ꦤꦺꦲꦶꦁ​ꦢꦺꦴꦚ​
ꦕꦺꦴꦕꦺꦴꦏ꧀​ꦏꦫꦺꦴ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
ꦢꦺꦏ꧀ꦤꦺꦔꦺꦠꦺꦴꦏ꧀ꦩꦫꦁ​ꦩꦸꦭꦺꦏꦠ꧀ꦩꦸꦭꦺꦏꦠ꧀​
ꦭꦤ꧀ꦧꦁꦱꦧꦁꦱ​ꦥꦢ​ꦏꦿꦸꦔꦸ​
ꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦢꦺꦏ꧀ꦤꦺ꧈​
ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦢꦺꦏ꧀ꦤꦺꦠꦼꦫꦸꦱ꧀ꦩꦸꦁꦒꦃ​ꦤꦁꦱ꧀ꦮꦂꦒ​꧈​
ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦒꦼꦢꦺ​ꦏ꧀ꦮꦱꦤꦺ​꧉​

↑ ↑ ↑

꧋ꦒꦸꦫꦸꦒꦸꦫꦸ​ꦥꦼꦤꦱꦂꦫꦤ꧀꧈​

꧇​꧔꧇​ ¹꧋ꦤꦁꦔꦶꦁ​ꦫꦺꦴꦃ​ꦱꦸꦕꦶ​ꦮꦶꦱ꧀ꦠꦼꦫꦁ​ꦧꦔꦼꦠ꧀ꦲꦼꦁꦒꦺꦴꦤꦺ​ꦔꦺꦴꦩꦺꦴꦁꦔꦶꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦱꦸꦮꦶꦱꦸꦮꦶꦲꦺꦤꦺꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦼꦤꦺꦃ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧈​ꦲꦮꦶꦠ꧀ꦥꦢ​ꦔ꧀ꦒꦸꦒꦸ​ꦩꦫꦁ​ꦫꦺꦴꦃꦫꦺꦴꦃ​ꦱꦶꦁ​ꦚꦤ꧀ꦢꦶꦁꦭꦤ꧀ꦥꦢ​ꦤꦸꦫꦸꦠ꧀ꦥꦶꦮꦸꦭꦁꦔꦺ​ꦱꦺꦠꦤ꧀ꦱꦺꦠꦤ꧀꧈​ ²ꦏꦸꦮꦶ​ꦥꦶꦮꦸꦭꦁꦔꦺ​ꦮꦺꦴꦁ​ꦱꦶꦁ​ꦒꦺꦴꦫꦺꦴꦃ​꧈​ꦱꦼꦤꦗꦤ꧀ꦤ​ꦥꦢ​ꦩꦶꦏꦶꦂ​ꦤꦺꦏ꧀ꦱꦶꦁ​ꦢꦶꦮꦸꦭꦁꦔꦏꦺꦏꦸꦮꦶ​ꦧꦼꦤꦼꦂ​꧉​ꦮꦶꦱ꧀ꦲꦺꦴꦫ​ꦥꦢ​ꦫꦸꦩꦁꦱ​ꦤꦺꦏ꧀​ꦏ꧀ꦭꦺꦫꦸ​꧈​ꦲꦮꦶꦠ꧀ꦲꦔꦼꦤ꧀ꦤꦔꦼꦤ꧀ꦤꦺꦮꦶꦱ꧀ꦒꦥꦸꦏ꧀꧈​ ³ꦮꦺꦴꦁꦮꦺꦴꦁ​ꦏꦸꦮꦶ​ꦩꦼꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤ꧀ꦠꦸꦏ꧀ꦏꦮꦶꦤ꧀ꦭꦤ꧀ꦲꦺꦴꦫ​ꦲꦺꦤ꧀ꦠꦸꦏ꧀ꦩꦁꦔꦤ꧀ꦲꦶꦏꦶ​ꦲꦥ​ꦏꦲꦺ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦱꦏ꧀ꦮꦼꦂꦤꦤꦺ​ꦥꦔꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦱꦶꦁ​ꦔ꧀ꦒꦸꦒꦸ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦥꦔꦤ꧀ꦤꦤ꧀ꦏꦸꦮꦶ​ꦏꦧꦺꦃ​ꦏꦼꦤꦺꦁꦢꦶꦥꦔꦤ꧀ ꦗꦚ꧀ꦗꦶ​ꦲꦮꦏ꧀ꦏꦺ​ꦢꦺꦮꦺꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦢꦺꦏ꧀ꦤꦺ꧉​ ⁴ꦥꦔꦤ꧀ꦤꦤ꧀ꦱꦼꦩ꧀ꦧꦫꦁ​ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦥꦶꦏ꧀ ꦲꦺꦴꦫ​ꦲꦺꦤꦺꦁꦱꦶꦗꦶ​ꦮꦲꦺ​ꦱꦶꦁ​ꦲꦺꦴꦫ​ꦲꦥꦶꦏ꧀꧈​ꦩꦸꦭꦤꦺ​ꦱꦼꦩ꧀ꦧꦫꦁ​ꦏꦸꦢꦸ​ꦢꦶꦠꦩ꧀ꦥ​꧉​ ⁵ꦲꦮꦏ꧀ꦏꦺꦢꦺꦮꦺꦏꦸꦢꦸꦩꦠꦸꦂꦏꦼꦱꦸꦮꦸꦤ꧀ ꦲꦮꦶꦠ꧀ꦏꦧꦺꦃꦥꦔꦤ꧀ꦤꦤ꧀ꦮꦶꦱ꧀ꦢꦶꦱꦸꦕꦺꦏ꧀ꦏꦏꦺꦏꦫꦺꦴꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦏꦫꦺꦴꦥꦤ꧀ꦢꦺꦴꦔ꧉​

꧋ꦥꦼꦭꦢꦺꦤ꧀ꦤꦺꦏꦿꦶꦱ꧀ꦡꦸꦱ꧀ꦱꦶꦁꦲꦥꦶꦏ꧀꧈​

⁶꧋ꦏꦸꦮꦶ​ꦩꦲꦸ​ꦏꦧꦺꦃ​ꦏꦸꦢꦸ​ꦢꦶꦮꦸꦭꦁꦔꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​꧈​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦢꦢꦶ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦲꦥꦶꦏ꧀꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦧꦏꦭ꧀ꦥꦢ​ꦮꦼꦫꦸꦃ​ꦤꦺꦏ꧀ꦏꦺꦴꦮꦺ​ꦩꦤ꧀ꦠꦼꦥ꧀ꦲꦶꦁ​ꦥꦶꦮꦸꦭꦁ​ꦱꦶꦁ​ꦲꦩ꧀ꦧꦺꦴꦏ꧀ꦠꦸꦫꦸꦠ꧀ꦏꦫꦺꦴ​ꦠꦼꦩꦼꦤ꧀ꦏꦸꦮꦶ​꧉​ ⁷ꦲꦗ​ꦩꦺꦭꦸꦩꦺꦭꦸ​ꦏꦫꦺꦴ​ꦉꦩ꧀ꦧꦸꦏ꧀ꦏꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧈​ꦏꦸꦮꦶ​ꦢꦶꦱꦶꦁꦏꦶꦂꦫꦶꦮꦲꦺ​꧉​ꦩꦭꦃꦩꦭꦃ꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦭꦤ꧀ꦔꦼꦩꦼꦤ꧀ꦔꦼꦩꦼꦤ꧀ꦤꦏꦺꦱꦸꦥꦪ​ꦲꦸꦫꦶꦥ꧀ꦩꦸ​ꦧꦶꦱ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦤꦺꦏ꧀ꦮꦺꦴꦁ​ꦔꦼꦠꦿꦺꦤ꧀ꦲꦮꦏ꧀ꦏꦺ​꧈​ꦏꦸꦮꦶ​ꦪ​ꦲꦺꦤꦺꦁꦲꦥꦶꦏ꧀ꦏꦺ​꧈​ꦤꦁꦔꦶꦁ​ꦤꦺꦏ꧀ꦔꦼꦠꦿꦺꦤ꧀ꦏꦱꦸꦏ꧀ꦩꦤꦺ​꧈​ꦏꦸꦮꦶ​ꦗꦤ꧀ꦲꦥꦶꦏ꧀ꦧꦔꦼꦠ꧀ ꦏꦼꦥꦿꦶꦪꦺ​ꦮꦲꦺ​ꦲꦺꦤꦺꦁꦧꦠꦶꦤꦺ​꧉​ꦏꦸꦮꦶ​ꦤ꧀ꦢꦢꦺꦏ꧀ꦏꦏꦺꦧꦼꦕꦶꦏ꧀ꦏꦺ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦱꦲꦶꦏꦶ​ꦭꦤ꧀ꦲꦩ꧀ꦧꦺꦱꦸꦏ꧀꧈​ ⁹ꦠꦼꦩ꧀ꦧꦸꦁ​ꦏꦸꦮꦶ​ꦩꦲꦸ​ꦧꦼꦤꦼꦂ​ꦭꦤ꧀ꦏꦸꦢꦸ​ꦢꦶꦒꦸꦒꦸ​꧉​ ¹⁰ꦩꦸꦭꦤꦺꦲꦮꦏ꧀ꦏꦺꦢꦺꦮꦺꦪꦚꦩ꧀ꦧꦸꦠ꧀ꦠꦥꦼꦠꦼꦭ꧀ꦠꦼꦤꦤ꧀ ꦱꦼꦤꦗꦤ꧀ꦏꦸꦢꦸꦔ꧀ꦭꦏꦺꦴꦤ꧀ꦤꦶꦱꦏ꧀ꦮꦼꦂꦤꦤꦺꦏꦔꦺꦭ꧀ꦭꦤ꧀꧈​ꦲꦮꦶꦠ꧀ꦲꦮꦏ꧀ꦏꦺꦢꦺꦮꦺꦚ꧀ꦗꦒꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉​ꦢꦺꦏ꧀ꦤꦺꦱꦶꦁꦢꦢꦶꦗꦸꦫꦸꦱ꧀ꦭꦩꦼꦠ꧀ꦠꦺꦏꦧꦺꦃꦮꦺꦴꦁ꧈​ꦭꦸꦮꦶꦃꦭꦸꦮꦶꦃꦮꦺꦴꦁꦱꦶꦁꦥꦽꦕꦪ꧉​

¹¹꧋ꦮꦺꦴꦁꦮꦺꦴꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸꦏꦸꦮꦶ​ꦩꦲꦸ​ꦭꦤ꧀ꦏꦸꦮꦶ​ꦢꦶꦮꦸꦭꦁꦔꦏꦺꦠꦼꦫꦸꦱ꧀꧈​ ¹²ꦠꦶꦩꦺꦴꦠꦶꦪꦸꦱ꧀ ꦥꦚ꧀ꦕꦺꦤ꧀ꦏꦺꦴꦮꦺ​ꦲꦶꦗꦶꦏ꧀ꦲꦼꦤꦺꦴꦩ꧀ ꦤꦁꦔꦶꦁ​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦚꦼꦥꦺꦭꦺꦏ꧀ꦏꦏꦺꦏꦺꦴꦮꦺ​ꦗꦭꦂꦫꦤ꧀ꦲꦸꦩꦸꦂꦩꦸ​꧉​ꦏꦺꦴꦮꦺ​ꦩꦭꦃ​ꦏꦸꦢꦸ​ꦢꦢꦶ​ꦠꦸꦭꦢꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦽꦕꦪ​꧉​ꦢꦢꦶꦪ​ꦠꦸꦭꦢꦲꦶꦁ​ꦠꦼꦩ꧀ꦧꦸꦁꦩꦸ​꧈​ꦲꦶꦁ​ꦏ꧀ꦭꦏꦸꦮꦤ꧀ꦩꦸ꧈​ꦲꦶꦁ​ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦏ꧀ꦥꦢꦥꦢ꧈​ꦲꦸꦒ​ꦲꦶꦁ​ꦏꦠꦼꦩꦼꦤ꧀ꦤꦤ꧀ꦲꦼꦁꦒꦺꦴꦤ꧀ꦩꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦭꦤ꧀ꦲꦼꦁꦒꦺꦴꦤ꧀ꦩꦸ​ꦤ꧀ꦢꦸꦮꦺꦤ꧀ꦤꦶ​ꦲꦠꦶ​ꦱꦶꦁ​ꦉꦱꦶꦏ꧀꧈​ ¹³ꦲꦺꦴꦫꦱꦸꦮꦶꦩꦼꦤꦺꦃꦲꦏꦸꦧꦏꦭ꧀ꦠꦼꦏ꧈​ꦤꦁꦔꦶꦁꦱꦸꦮꦺꦤꦺꦲꦏꦸꦢꦸꦫꦸꦁꦠꦼꦏꦏꦺꦴꦮꦺꦏꦸꦢꦸꦔꦼꦩꦼꦤ꧀ꦤꦏꦺꦩꦕꦏ꧀ꦏꦺꦮꦺꦴꦁꦮꦺꦴꦁꦱꦁꦏꦏꦶꦠꦧ꧀ ꦲꦩ꧀ꦧꦔꦸꦤ꧀ꦭꦤ꧀ꦩꦸꦭꦁꦔꦶ꧉​ ¹⁴ꦒꦸꦱ꧀ꦠꦶ​ꦮꦶꦱ꧀ꦔꦼꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦏꦺꦴꦮꦺ​꧈​ꦢꦺꦴꦁꦔꦺꦥꦫ​ꦥꦼꦤꦸꦤ꧀ꦠꦸꦤ꧀ꦧꦼꦧꦉꦁꦔꦤ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦭꦤ꧀​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦠꦼꦫꦸꦱ꧀ꦢꦶꦏꦺꦏ꧀ꦏꦶꦠꦼꦩ꧀ꦧꦸꦁ​ꦏꦫꦺꦴ​ꦒꦸꦱ꧀ꦠꦶ​ꦏꦁꦒꦺꦴ​ꦏꦺꦴꦮꦺ​꧉​ꦏꦥꦶꦤ꧀ꦠꦼꦂꦫꦤ꧀ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺ꧉​ ¹⁵ꦱꦼꦩ꧀ꦧꦫꦁꦩ꧀ꦧꦫꦁꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦢꦶꦭꦏꦺꦴꦤ꧀ꦤꦶ​ꦠꦼꦤꦤ꧀ ꦢꦢꦶꦤꦺ​ꦮꦺꦴꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦤꦺꦏ꧀ꦏꦺꦴꦮꦺ​ꦩꦗꦸ​꧉​ ¹⁶ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦲꦮꦏ꧀ꦩꦸ​ꦢꦺꦮꦺꦭꦤ꧀ꦲꦸꦒ​ꦏꦫꦺꦴ​ꦱꦶꦁ​ꦲꦩ꧀ꦧꦺꦴꦏ꧀ꦮꦸꦭꦁꦔꦏꦺ꧉​ꦲꦗ​ꦱꦩ꧀ꦥꦺꦏ꧀ꦏꦼꦤ꧀ꦢꦺꦴꦲꦼꦁꦒꦺꦴꦤ꧀ꦩꦸ​ ꦲꦠꦶꦲꦠꦶ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦩꦸ​ꦭꦤ꧀ꦲꦸꦒ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦩꦸ​꧉​

↑ ↑ ↑

꧋ꦠꦸꦩꦶꦤ꧀ꦢꦏ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀꧈​

꧇​꧕꧇​ ¹꧋ꦠꦶꦩꦺꦴꦠꦶꦪꦸꦱ꧀ ꦤꦺꦏ꧀ꦏꦺꦴꦮꦺ​ꦲꦉꦥ꧀​ꦩ꧀ꦧꦼꦤꦼꦂꦫꦏꦺꦱꦼꦢꦸꦭꦸꦂ​ꦭꦤꦁ​ꦱꦶꦁ​ꦠꦸꦮ​꧈​ꦲꦗ​ꦢꦶꦱꦼꦤꦺꦤ꧀ꦤꦶ꧈​ꦤꦁꦔꦶꦁ​ꦮꦺꦴꦁꦔꦺ​ꦢꦶꦲꦗꦺꦤ꧀ꦤꦶ​ꦏꦪ​ꦧꦥꦏ꧀ꦩꦸ​ꦢꦺꦮꦺꦭꦤ꧀ꦢꦶꦲꦼꦗꦺꦏ꧀ꦉꦩ꧀ꦧꦸꦏ꧀ꦏꦤ꧀꧈​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦤꦁ​ꦱꦶꦁ​ꦲꦼꦤꦺꦴꦩ꧀ ꦢꦶꦲꦁꦒꦼꦥ꧀ꦏꦪ​ꦏꦏꦁ​ꦭꦤ꧀ꦲꦢꦶꦏ꧀ꦩꦸꦢꦺꦮꦺ꧉​ ²ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀ꦠꦸꦮ​ꦢꦶꦲꦁꦒꦼꦥ꧀ꦏꦪ​ꦲꦶꦧꦸꦩꦸ​ꦢꦺꦮꦺꦭꦤ꧀ꦤꦺꦏ꧀ꦔꦺꦴꦩꦺꦴꦁꦔꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦲꦼꦤꦺꦴꦩ꧀ꦲꦁꦒꦼꦥ꧀ꦥꦏꦪ​ꦲꦢꦶꦏ꧀ꦩꦸꦢꦺꦮꦺ꧉​ꦤꦺꦏ꧀ꦔꦺꦴꦩꦺꦴꦁꦔꦶꦱꦶꦁ​ꦥꦤ꧀ꦠꦼꦱ꧀ꦭꦤ꧀ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​

³꧋ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦧ꧀ꦭꦱ꧀ꦲꦺꦴꦫ​ꦤ꧀ꦢꦸꦮꦺꦏꦿꦤ꧀ꦢꦃꦏꦸꦢꦸ​ꦢꦶꦫꦸꦩꦠ꧀ꦠꦶ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ ⁴ꦤꦁꦔꦶꦁ​ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦤ꧀ꦢꦸꦮꦺꦲꦤꦏ꧀ꦥꦸꦠꦸ​꧈​ꦲꦤꦏ꧀ꦥꦸꦠꦸꦤꦺ​ꦱꦶꦁ​ꦏꦸꦢꦸ​ꦔꦿꦸꦩꦠ꧀ꦠꦶ​ꦏꦁꦒꦺꦴ​ꦩ꧀ꦧꦊꦱ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦮꦺꦴꦁ​ꦠꦸꦮ​꧉​ꦏꦸꦮꦶ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦸꦮꦶ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦤꦤ꧀꧈​ ⁵ꦭꦃ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦥꦚ꧀ꦕꦺꦤ꧀ꦫꦤ꧀ꦢꦠꦼꦤꦤ꧀ꦭꦤ꧀ꦲꦺꦴꦫ​ꦤ꧀ꦢꦸꦮꦺꦱꦥꦱꦥ​ꦧ꧀ꦭꦱ꧀ꦏꦸꦢꦸ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦄꦮꦤ꧀ꦮꦼꦔꦶꦏꦸꦢꦸ​ꦠꦼꦩꦼꦤ꧀​ꦤ꧀ꦢꦼꦢꦺꦴꦔ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦸꦮꦸꦤ꧀ꦥꦶꦠꦸꦭꦸꦁꦔꦤ꧀ꦤꦺ​꧉​ ⁶ꦤꦁꦔꦶꦁ​ꦫꦤ꧀ꦢꦱꦶꦁ​ꦲꦸꦫꦶꦥ꧀ꦥꦺꦩꦸꦁ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺ꧈​ꦫꦤ꧀ꦢꦏꦸꦮꦶ​ꦱꦏ꧀ꦗꦤꦺꦮꦶꦱ꧀ꦩꦠꦶ​꧈​ꦱꦼꦤꦗꦤ꧀ꦏꦺꦠꦺꦴꦏ꧀ꦲꦶꦗꦶꦏ꧀ꦲꦸꦫꦶꦥ꧀꧈​ ⁷ꦩꦸꦭꦤꦺ​ꦠꦶꦩꦺꦴꦠꦶꦪꦸꦱ꧀ ꦫꦤ꧀ꦢꦫꦤ꧀ꦢꦏꦸꦢꦸ​ꦲꦩ꧀ꦧꦺꦴꦏ꧀ꦮꦸꦭꦁꦔꦶꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​꧈​ꦱꦸꦥꦪ​ꦲꦺꦴꦫ​ꦏꦼꦤꦺꦁꦢꦶꦱꦭꦃꦲꦏꦺꦮꦺꦴꦁ​꧉​ ⁸ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦒꦼꦊꦩ꧀ꦔꦿꦸꦩꦠ꧀ꦠꦶ​ꦱꦼꦢꦸꦭꦸꦂꦫꦺ​ꦢꦺꦮꦺ꧈​ꦩꦭꦃꦩꦭꦃꦱꦼꦢꦸꦭꦸꦂꦫꦺ​ꦢꦺꦮꦺꦠꦸꦁꦒꦭ꧀ꦱꦏ꧀ꦲꦺꦴꦩꦃ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦢꦸꦤꦸꦁꦲꦥ​ꦠꦼꦒꦼꦱ꧀ꦱꦺ​ꦤꦸꦫꦸꦠ꧀ꦒꦸꦱ꧀ꦠꦶ​ꦭꦤ꧀​ꦏ꧀ꦭꦏꦸꦮꦤ꧀ꦤꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦥꦫ​ꦫꦤ꧀ꦢ꧉​

⁹꧋ꦥꦱꦩꦸꦮꦤ꧀ꦏꦸꦢꦸꦔꦿꦸꦩꦠ꧀ꦠꦶꦩ꧀ꦧꦺꦴꦏ꧀ꦫꦤ꧀ꦢ꧈​ꦪꦏꦸꦮꦶ꧈​ꦫꦤ꧀ꦢꦱꦶꦁꦲꦸꦩꦸꦂꦫꦺꦱ꧀ꦮꦶꦢꦏ꧀ꦩꦸꦁꦒꦃꦭꦤ꧀ꦱꦶꦁꦩꦲꦸꦤꦺꦤꦩꦸꦁꦏꦮꦶꦤ꧀ꦱꦼꦥꦶꦱ꧀ꦱꦤ꧀ ꦮꦺꦴꦁꦱꦶꦁꦱꦼꦤꦼꦁꦔ꧀ꦒꦮꦺꦧꦼꦕꦶꦏ꧀꧈​ ¹⁰ꦩꦸꦭꦤꦺ​ꦮꦺꦴꦁ​ꦏꦧꦺꦃ​ꦏꦸꦢꦸ​ꦔꦫꦤ꧀ꦤꦶ​ꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦮꦺꦴꦁ​ꦲꦥꦶꦏ꧀꧈​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦔꦿꦸꦩꦠ꧀ꦠꦶ​ꦭꦤ꧀ꦩꦸꦭꦁꦔꦶꦲꦤꦏ꧀ꦲꦤꦏ꧀ꦏꦺ​ꦱꦶꦁ​ꦲꦥꦶꦏ꧀ꦭꦤ꧀ꦲꦺꦴꦫ​ꦲꦺꦩꦤ꧀ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦩꦫꦁ​ꦢꦪꦺꦴꦃꦲꦺ꧉​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦱꦼꦤꦼꦁ​ꦔ꧀ꦭꦢꦺꦤ꧀ꦤꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦱꦶꦁ​ꦱꦼꦤꦼꦁ​ꦤꦸꦭꦸꦁꦔꦶ​ꦮꦺꦴꦁ​ꦏꦔꦺꦭ꧀ꦭꦤ꧀ ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦥꦼꦁꦒꦮꦺꦏꦸꦱꦶꦁ​ꦲꦥꦶꦏ꧀꧈​ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦏꦸꦢꦸ​ꦢꦶꦠꦸꦭꦶꦱ꧀ꦗꦼꦤꦼꦁꦔꦺ​ꦤꦁꦧꦸꦏꦸ​꧉​

¹¹꧋ꦤꦁꦔꦶꦁ​ꦫꦤ꧀ꦢꦫꦤ꧀ꦢꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦲꦗ​ꦢꦶꦠꦸꦭꦶꦱ꧀ꦗꦼꦤꦼꦁꦔꦺ​ꦤꦁꦧꦸꦏꦸ​꧈​ꦲꦮꦶꦠ꧀ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤ꧀ꦢꦸꦮꦺꦱꦼꦤꦼꦁꦱꦼꦤꦼꦁꦔꦤ꧀ꦩꦼꦤꦺꦃ​ꦠꦼꦫꦸꦱ꧀ꦥꦢ​ꦤꦶꦁꦒꦭ꧀ꦒꦸꦱ꧀ꦠꦶ​ꦭꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦧꦺꦴꦗꦺꦴ​ꦩꦼꦤꦺꦃ​꧉​ ¹²ꦢꦢꦶꦤꦺ​ꦠꦼꦫꦸꦱ꧀ꦥꦢ​ꦩꦼꦢꦺꦴꦠ꧀ꦗꦚ꧀ꦗꦶꦤꦺ​ꦩꦲꦸꦤꦺ​꧉​ ¹³ꦏꦫꦺꦴꦩꦼꦤꦺꦃ​꧈​ꦗꦭꦂꦫꦤ꧀ꦲꦺꦴꦫ​ꦤ꧀ꦢꦸꦮꦺꦥꦼꦁꦒꦮꦺꦏꦸꦲꦥꦲꦥ​꧈​ꦠꦼꦫꦸꦱ꧀ꦥꦢ​ꦩ꧀ꦊꦧꦸꦩꦼꦠꦸ​ꦠꦸꦫꦸꦠ꧀ꦲꦺꦴꦩꦃ​ꦔ꧀ꦒꦸꦤꦼꦩ꧀ꦮꦺꦴꦁ​ꦭꦶꦪ​ꦭꦤ꧀ꦩꦺꦭꦸꦩꦺꦭꦸ​ꦔꦿꦸꦱꦸꦃꦲꦶꦲꦸꦫꦶꦥ꧀ꦥꦺꦭꦶꦪꦤꦺ​꧉​ ¹⁴ꦩꦸꦭꦤꦺ​꧈​ꦏꦉꦥ꧀ꦏꦸ​ꦫꦤ꧀ꦢꦫꦤ꧀ꦢꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦧꦺꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦧꦺꦴꦗꦺꦴ​ꦩꦼꦤꦺꦃ​ꦭꦤ꧀ꦲꦺꦴꦩꦃꦲꦺꦴꦩꦃ​ꦮꦲꦺ​꧈​ꦱꦸꦥꦪ​ꦥꦢ​ꦤ꧀ꦢꦸꦮꦺꦲꦤꦏ꧀ꦭꦤ꧀ꦧꦶꦱ​ꦔꦸꦫꦸꦱ꧀ꦱꦶ​ꦧꦿꦪꦠ꧀ꦠꦺ​ꦢꦺꦮꦺ꧉​ꦢꦢꦶꦤꦺ​ꦲꦺꦴꦫ​ꦔꦼꦏꦺꦏ꧀ꦏꦶꦗꦭꦂꦫꦤ꧀ꦩꦫꦁ​ꦩꦸꦁꦱꦸꦃꦲꦺ​ꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦚꦭꦃꦚꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ꧉​ ¹⁵ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦮꦶꦱ꧀ꦲꦺꦤꦺꦁꦫꦤ꧀ꦢꦫꦤ꧀ꦢꦱꦶꦁ​ꦤꦶꦁꦒꦭ꧀ꦒꦸꦱ꧀ꦠꦶ​ꦭꦤ꧀​ꦔ꧀ꦒꦸꦒꦸ​ꦩꦫꦁ​ꦱꦺꦠꦤ꧀꧈​ ¹⁶ꦤꦺꦏ꧀ꦲꦺꦤꦺꦁꦮꦺꦴꦁ​ꦏꦿꦶꦱ꧀ꦠꦼꦤ꧀ꦮꦺꦢꦺꦴꦏ꧀​ꦤ꧀ꦢꦸꦮꦺꦫꦤ꧀ꦢꦤꦁꦲꦺꦴꦩꦃ​꧈​ꦫꦤ꧀ꦢꦏꦸꦮꦶ​ꦏꦸꦢꦸ​ꦢꦶꦫꦸꦩꦠ꧀ꦠꦶ​꧈​ꦱꦸꦥꦪ​ꦲꦺꦴꦫ​ꦢꦢꦶ​ꦉꦁꦒꦤꦺꦥꦱꦩꦸꦮꦤ꧀꧈​ꦢꦢꦶꦤꦺ​ꦥꦱꦩꦸꦮꦤ꧀ꦧꦶꦱ​ꦔꦿꦸꦩꦠ꧀ꦠꦶ​ꦫꦤ꧀ꦢꦫꦤ꧀ꦢꦱꦶꦁ​ꦲꦺꦴꦫ​ꦤ꧀ꦢꦸꦮꦺꦱꦥꦱꦥ​꧉​

꧋ꦥꦫ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀꧈​

¹⁷꧋ꦠꦶꦩꦺꦴꦠꦶꦪꦸꦱ꧀ ꦥꦫ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦧꦶꦱ​ꦤꦠ​ꦭꦤ꧀ꦤꦸꦤ꧀ꦠꦸꦤ꧀ꦥꦱꦩꦸꦮꦤ꧀ꦱꦶꦁ​ꦲꦥꦶꦏ꧀ꦏꦸꦢꦸ​ꦢꦶꦠꦩ꧀ꦧꦃꦲꦶ​ꦲꦸꦥꦃꦲꦺ꧈​ꦩꦭꦃꦩꦭꦃꦥꦼꦤꦸꦤ꧀ꦠꦸꦤ꧀ꦱꦶꦁ​ꦠꦸꦏꦁ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦭꦤ꧀ꦱꦶꦁ​ꦠꦸꦏꦁ​ꦩꦸꦭꦁꦔꦶ꧉​ꦏꦸꦮꦶ​ꦱꦏ꧀ꦩꦼꦱ꧀ꦠꦶꦤꦺ꧉​ ¹⁸ꦤꦁꦏꦶꦠꦧ꧀ꦱꦸꦕꦶ​ꦭꦲꦸꦠ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​ꦠ​:“ꦱꦥꦶ​ꦱꦶꦁ​ꦔꦶꦊꦱ꧀ꦲꦗ​ꦢꦶꦧꦶꦁꦏꦼꦩ꧀ꦕꦁꦏꦼꦩ꧀ꦩꦺ​꧉”ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦏꦸꦢꦸ​ꦤꦩ꧀ꦥ​ꦲꦸꦥꦃꦲꦺ꧉​” ^19-20ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦚꦭꦃꦚꦭꦃꦲꦏꦺꦱꦏ꧀ꦮꦶꦗꦶꦤꦺꦥꦼꦤꦸꦤ꧀ꦠꦸꦤ꧀ ꦲꦗ​ꦢꦶꦠꦩ꧀ꦥ​ꦤꦺꦏ꧀ꦲꦺꦴꦫ​ꦲꦺꦤꦺꦁꦱꦼꦏ꧀ꦱꦶꦤꦺ​ꦭꦺꦴꦫꦺꦴ​ꦲꦥ​ꦠꦼꦭꦸ​꧉​ꦤꦺꦏ꧀ꦥꦼꦤꦸꦤ꧀ꦠꦸꦤ꧀ꦏꦸꦮꦶ​ꦥꦚ꧀ꦕꦺꦤ꧀ꦱꦭꦃ​ꦠꦼꦤꦤ꧀ ꦮꦺꦴꦁꦔꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦧꦼꦤꦼꦂꦫꦏꦺꦤꦁꦔꦉꦥ꧀ꦥꦺ​ꦱꦼꦢꦸꦭꦸꦂ​ꦭꦶꦪꦭꦶꦪꦤꦺ​꧈​ꦱꦸꦥꦪ​ꦲꦺꦴꦫ​ꦥꦢ​ꦤꦶꦫꦸ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦏꦸꦮꦶ​꧉​

²¹꧋ꦲꦏꦸ​ꦩꦿꦺꦤ꧀ꦠꦃ​ꦏꦺꦴꦮꦺ​ꦠꦼꦤꦤ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦥꦫ​ꦩꦸꦭꦺꦏꦠ꧀ꦱꦶꦁ​ꦱꦸꦕꦶ​:ꦲꦥ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦤ꧀ꦢꦁꦔꦶ​ꦠꦼꦤꦤ꧀꧈​ꦤꦺꦏ꧀ꦲꦉꦥ꧀​ꦩ꧀ꦧꦼꦤꦼꦂꦫꦏꦺꦱꦼꦢꦸꦭꦸꦂ​꧈​ꦲꦗ​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦧꦧ꧀ꦱꦼꦢꦸꦭꦸꦂ​ꦏꦸꦮꦶ​ꦱꦏ꧀ꦢꦸꦫꦸꦁꦔꦺ꧉​ ²²ꦲꦗ​ꦏꦼꦱꦸꦱꦸ​ꦤꦸꦩ꧀ꦥꦁꦔꦶ​ꦠꦔꦤ꧀ꦭꦤ꧀​ꦤ꧀ꦢꦺꦴꦔꦏ꧀ꦏꦏꦺꦱꦼꦢꦸꦭꦸꦂ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦲꦥ​ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀꧈​ꦩꦼꦤꦮ​ꦮꦲꦺ​ꦮꦺꦴꦁꦔꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦏꦺꦴꦮꦺ​ꦩꦼꦁꦏꦺꦴ​ꦏꦠꦸꦠ꧀ꦱꦭꦃ​꧉​ꦩꦸꦭꦤꦺ​꧈​ꦱꦶꦁ​ꦲꦠꦶꦲꦠꦶꦭꦤ꧀ꦲꦸꦫꦶꦥ꧀ꦩꦸ​ꦏꦸꦢꦸ​ꦱꦶꦁ​ꦉꦱꦶꦏ꧀꧈​

²³꧋ꦏꦺꦴꦮꦺ​ꦲꦗꦼꦏ꧀ꦭꦫ​ꦮꦼꦠꦼꦁꦔꦺ​꧈​ꦩꦸꦭꦤꦺ​ꦪ​ꦢꦶꦲꦺꦴꦩ꧀ꦧꦺꦤ꧀ꦤꦶ​ꦲꦁꦒꦸꦂ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦲꦗ​ꦤꦩꦸꦁ​ꦧꦚꦸ​ꦮꦲꦺ​꧉​

²⁴꧋ꦲꦺꦤꦺꦁꦮꦺꦴꦁ​ꦱꦶꦁ​ꦢꦺꦴꦱꦤꦺ​ꦗꦤ꧀ꦏꦼꦠꦫ​ꦧꦔꦼꦠ꧀ ꦏꦼꦠꦫꦤꦺꦲꦺꦴꦫ​ꦲꦸꦱꦃꦔꦼꦤ꧀ꦠꦺꦤ꧀ꦤꦶ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦭꦶꦪꦤꦺ​ꦢꦺꦴꦱꦤꦺ​ꦱꦲꦶꦏꦶ​ꦢꦸꦫꦸꦁ​ꦏꦺꦠꦺꦴꦏ꧀ ꦏꦼꦠꦫꦤꦺꦲꦩ꧀ꦧꦺꦱꦸꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁵ꦏꦪ​ꦔꦺꦴꦤꦺꦴ​ꦲꦸꦒ​꧈​ꦥꦼꦁꦒꦮꦺ​ꦧꦼꦕꦶꦏ꧀ꦲꦺꦴꦏꦺꦃꦲꦺꦴꦏꦺꦃꦲꦺꦱꦲꦶꦏꦶ​ꦮꦶꦱ꧀ꦏꦺꦠꦺꦴꦏ꧀꧈​ꦤꦁꦔꦶꦁ​ꦲꦸꦒ​ꦥꦼꦁꦒꦮꦺ​ꦧꦼꦕꦶꦏ꧀ꦱꦶꦁ​ꦢꦸꦫꦸꦁ​ꦏꦺꦠꦺꦴꦏ꧀ꦱꦲꦶꦏꦶ​꧈​ꦲꦩ꧀ꦧꦺꦱꦸꦏ꧀ꦏꦺꦠꦺꦴꦏ꧀꧈​

↑ ↑ ↑

꧋ꦥꦫ​ꦱ꧀ꦭꦥ꦳꧀꧈​

꧇​꧖꧇​ ¹꧋ꦥꦫ​ꦱ꧀ꦭꦥ꦳꧀ꦱꦶꦁ​ꦏꦿꦶꦱ꧀ꦠꦼꦤ꧀ꦏꦸꦢꦸ​ꦔꦗꦺꦤ꧀ꦤꦶ​ꦩꦫꦁ​ꦱꦶꦁ​ꦤ꧀ꦢꦸꦮꦺ꧈​ꦢꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦶꦮꦸꦭꦁꦔꦺ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤ꧀ꦠꦸꦏ꧀ꦲꦺꦭꦺꦏ꧀꧈​ ²ꦱ꧀ꦭꦥ꦳꧀ꦏꦿꦶꦱ꧀ꦠꦼꦤ꧀ꦱꦶꦁ​ꦮꦺꦏ꧀ꦏꦺꦮꦺꦴꦁ​ꦏꦿꦶꦱ꧀ꦠꦼꦤ꧀ꦲꦺꦴꦫ​ꦏꦼꦤꦺꦁꦚꦼꦥꦺꦭꦺꦏ꧀ꦏꦏꦺꦱꦶꦁ​ꦤ꧀ꦢꦸꦮꦺ꧈​ꦢꦸꦩꦺꦃꦢꦺꦏ꧀ꦤꦺꦠꦸꦁꦒꦭ꧀ꦱꦼꦢꦸꦭꦸꦂ​ꦲꦶꦁ​ꦒꦸꦱ꧀ꦠꦶ​ꦮꦲꦺ​꧉​ꦱ꧀ꦭꦥ꦳꧀ꦏꦸꦮꦶ​ꦩꦭꦃ​ꦏꦸꦢꦸ​ꦔ꧀ꦭꦢꦺꦤ꧀ꦤꦶ​ꦱꦶꦁ​ꦤ꧀ꦢꦸꦮꦺꦭꦸꦮꦶꦃ​ꦲꦥꦶꦏ꧀ ꦲꦮꦶꦠ꧀ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦢꦺꦏ꧀ꦤꦺꦏꦸꦮꦶ​ꦠꦸꦁꦒꦭ꧀ꦱꦼꦢꦸꦭꦸꦂ​ꦲꦶꦁ​ꦒꦸꦱ꧀ꦠꦶ​ꦭꦤ꧀ꦢꦺꦏ꧀ꦤꦺꦥꦤ꧀ꦠꦼꦱ꧀ꦢꦶꦠꦿꦺꦱ꧀ꦤꦤ꧀ꦤꦶ꧉​

꧋ꦠꦶꦩꦺꦴꦠꦶꦪꦸꦱ꧀ ꦥꦽꦏꦫꦥꦽꦏꦫ​ꦲꦶꦏꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦮꦸꦭꦁꦔꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦤ꧀ꦥꦢ​ꦢꦶꦲꦺꦭꦶꦁꦔꦏꦺꦤꦺꦏ꧀ꦏꦸꦢꦸ​ꦤꦸꦫꦸꦠ꧀ꦲꦥ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​꧉​

꧋ꦥꦶꦮꦸꦭꦁ​ꦭꦤ꧀ꦭꦏꦸ​ꦱꦶꦁ​ꦏ꧀ꦭꦺꦫꦸ​꧉​

³꧋ꦮꦺꦴꦁ​ꦱꦶꦁ​ꦩꦸꦭꦁꦔꦶꦥꦶꦠꦸꦠꦸꦂ​ꦱꦶꦁ​ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦥꦶꦠꦸꦠꦸꦂ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​꧈​ꦏꦸꦮꦶ​ꦮꦺꦴꦁ​ꦱꦺꦴꦩ꧀ꦧꦺꦴꦁ꧉​ ⁴ꦱꦼꦤꦗꦤ꧀ꦩꦶꦏꦶꦂ​ꦤꦺꦏ꧀ꦥꦶꦤ꧀ꦠꦼꦂ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦔꦼꦂꦠꦶ​ꦲꦥꦲꦥ​꧉​ꦤꦩꦸꦁ​ꦱꦼꦤꦼꦁ​ꦫꦩꦺ​ꦭꦤ꧀ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦧꦧ꧀ꦱꦼꦩ꧀ꦧꦫꦁꦩ꧀ꦧꦫꦁ꧉​ꦏꦸꦮꦶ​ꦤꦩꦸꦁ​ꦩꦫꦏ꧀ꦏꦏꦺꦱꦼꦔꦶꦠ꧀ꦱꦼꦔꦶꦠ꧀ꦠꦤ꧀ ꦠꦸꦏꦂꦫꦤ꧀ ꦚꦠꦸꦂ​ꦲꦭ​ꦭꦤ꧀ꦩꦶꦏꦶꦂ​ꦲꦭ​ꦧꦧ꧀ꦱꦏ꧀ꦥꦢꦥꦢ꧉​ ⁵ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦏꦼꦧ꧀ꦭꦶꦔꦼꦂ​ꦭꦤ꧀ꦲꦺꦴꦫ​ꦔꦼꦂꦠꦶ​ꦧꦧ꧀ꦱꦶꦁ​ꦧꦼꦤꦼꦂ​꧉​

⁶꧋ꦩꦶꦏꦶꦫꦺꦧꦶꦱ​ꦔ꧀ꦒꦺꦴꦭꦺꦏ꧀ꦏꦱꦸꦒꦶꦃꦲꦤ꧀ꦏꦫꦺꦴ​ꦲꦒꦩꦤꦺ​꧉​ꦥꦚ꧀ꦕꦺꦤ꧀ꦲꦒꦩ​ꦧꦶꦱ​ꦩꦫꦏ꧀ꦏꦏꦺꦱꦸꦒꦶꦃ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦿꦶꦩ​ꦏꦫꦺꦴ​ꦲꦥ​ꦤ꧀ꦢꦸꦮꦺꦪ꧉​ ⁷ꦲꦮꦏ꧀ꦏꦺ​ꦢꦺꦮꦺꦭꦲꦶꦂ​ꦲꦶꦁ​ꦢꦺꦴꦚ​ꦲꦺꦴꦫ​ꦔ꧀ꦒꦮ​ꦲꦥꦲꦥ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦩꦠꦶ​ꦪ​ꦲꦺꦴꦫ​ꦧꦶꦱ​ꦔ꧀ꦒꦮ​ꦲꦥꦲꦥ​꧉​ ⁸ꦩꦸꦭꦤꦺ​꧈​ꦤꦺꦏ꧀ꦧꦶꦱ​ꦱꦩ꧀ꦥꦺꦲꦶꦁ​ꦱꦤ꧀ꦢꦁꦭꦤ꧀ꦥꦔꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦮꦶꦱ꧀ꦠꦿꦶꦩ​꧉​ ⁹ꦤꦁꦔꦶꦁ​ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦱꦸꦒꦶꦃ​ꦧꦏꦭ꧀ꦏꦠꦸꦠ꧀​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀ ꦱꦁꦏꦶꦁꦔꦼꦧꦺꦴꦠ꧀ꦠꦶ​ꦢꦸꦮꦶꦠ꧀ꦭꦤ꧀ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦔ꧀ꦒꦼꦤꦃ​꧉​ꦪ​ꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦔꦿꦸꦱꦏ꧀ꦲꦸꦫꦶꦥ꧀ꦥꦺꦩꦤꦸꦁꦱ​꧉​ ¹⁰ꦲꦥ​ꦠ​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦲꦸꦫꦶꦥ꧀ꦤꦶꦤ꧀ꦢꦏ꧀ꦏꦏꦺꦱꦏ꧀ꦮꦼꦂꦤꦤꦺ​ꦲꦭ​?ꦗꦭꦂꦫꦤ꧀ꦥꦢ​ꦩꦠꦢꦸꦮꦶꦠ꧀ꦠꦼꦤ꧀ ꦏꦼꦥꦺꦔꦶꦤ꧀ꦱꦸꦒꦶꦃ​꧉​ꦲꦺꦴꦏꦺꦃꦮꦺꦴꦁ​ꦱꦶꦁ​ꦥꦢ​ꦤꦶꦁꦒꦭ꧀ꦒꦸꦱ꧀ꦠꦶ​ꦭꦤ꧀ꦲꦸꦫꦶꦥ꧀ꦥꦺꦏꦼꦭꦫꦭꦫ​꧈​ꦗꦭꦂꦫꦤ꧀ꦔꦼꦧꦺꦴꦠ꧀ꦠꦶ​ꦢꦸꦮꦶꦠ꧀꧈​

꧋ꦠꦼꦩꦼꦤ꧀ꦠꦼꦏꦤ꧀ꦫꦩ꧀ꦥꦸꦁꦔꦺ​꧉​

¹¹꧋ꦤꦁꦔꦶꦁ​ꦏꦺꦴꦮꦺ​ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦺꦴꦮꦺ​ꦏꦸꦢꦸ​ꦔꦼꦢꦺꦴꦃꦲꦶ​ꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ꦏꦺꦴꦮꦺ​ꦩꦭꦃ​ꦏꦸꦢꦸ​ꦔ꧀ꦭꦸꦩꦸꦃꦲꦶꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ꦭꦤ꧀ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦢꦸ​ꦏꦼꦤꦺꦁꦢꦶꦥꦽꦕꦪ​ꦭꦤ꧀ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦠꦸꦁꦒꦭ꧀ꦱꦼꦢꦸꦭꦸꦂ​꧉​ꦲꦸꦒ​ꦲꦶꦁ​ꦮꦪꦃ​ꦲꦧꦺꦴꦠ꧀ꦭꦤ꧀ꦲꦔꦺꦭ꧀ꦏꦸꦢꦸ​ꦧꦶꦱ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦭꦤ꧀ꦏꦫꦺꦴ​ꦮꦺꦴꦁ​ꦭꦶꦪ​ꦏꦸꦢꦸ​ꦱꦶꦁ​ꦲꦭꦸꦱ꧀꧈​ ¹²ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦠꦼꦤꦤ꧀ ꦱꦸꦥꦪ​ꦧꦶꦱ​ꦢꦢꦶ​ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦲꦥꦶꦏ꧀ꦭꦤ꧀ꦧꦶꦱ​ꦤꦩ꧀ꦥ​ꦲꦸꦥꦃꦲꦺ꧈​ꦪꦏꦸꦮꦶ​꧈​ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺꦏꦫꦺꦴ​ꦢꦺꦏ꧀ꦤꦺꦤꦁꦱ꧀ꦮꦂꦒ​꧉​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦩꦶꦭꦶꦃ​ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦢꦺꦮꦺꦲꦸꦒ​ꦮꦶꦱ꧀ꦔꦏꦺꦴꦤ꧀ꦤꦶ​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃꦤꦺꦏ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦭꦤ꧀ꦲꦉꦥ꧀ꦤꦸꦫꦸꦠ꧀ꦢꦺꦏ꧀ꦤꦺꦠꦼꦫꦸꦱ꧀꧈​ ^13-14ꦩꦸꦭꦤꦺ​꧈​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁ​ꦱꦼꦩ꧀ꦧꦫꦁ​ ꦭꦤ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦔꦏꦺꦴꦤ꧀ꦤꦶ​ꦤꦁꦔꦉꦥ꧀ꦥꦺ​ꦒꦿꦩꦁꦥꦺꦴꦤ꧀ꦠꦶꦪꦸꦱ꧀ꦥꦶꦭꦠꦸꦱ꧀ꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦏꦸ​ꦩꦿꦺꦤ꧀ꦠꦃ​ꦏꦺꦴꦮꦺ​꧈​ꦠꦶꦩꦺꦴꦠꦶꦪꦸꦱ꧀:ꦥꦼꦁꦒꦮꦺꦏꦸꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦱꦶꦁ​ꦠꦼꦩꦼꦤ꧀ꦠꦼꦫꦸꦱ꧀ꦔꦤ꧀ꦠꦶ​ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦧꦶꦱ​ꦤꦼꦩꦸ​ꦗꦭꦂꦫꦤ꧀ꦏꦁꦒꦺꦴ​ꦚꦭꦃꦚꦭꦃꦲꦏꦺꦏꦺꦴꦮꦺ​꧉​ ¹⁵ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦧꦏꦭ꧀ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦔꦫꦤ꧀ꦤꦶꦮꦚ꧀ꦕꦶꦤꦺꦏꦥꦤ꧀꧈​ꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦒꦸꦱ꧀ꦠꦶꦱꦶꦁꦏ꧀ꦮꦱꦢꦺꦮꦺ꧈​ꦏ꧀ꦮꦱꦤꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦫꦠꦸꦭꦤ꧀ꦥꦔ꧀ꦮꦱꦭꦶꦪꦭꦶꦪꦤꦺ꧉​ ¹⁶ꦢꦺꦏ꧀ꦤꦺꦢꦺꦮꦺꦲꦺꦴꦫ​ꦧꦶꦱ​ꦩꦠꦶ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦺꦴꦤ꧀ꦤꦁꦥꦼꦥꦢꦁꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦕꦼꦢꦼꦏ꧀ꦏꦶ​ꦩꦤꦸꦁꦱ​꧉​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦠꦲꦸ​ꦮꦼꦫꦸꦃ​ꦢꦺꦏ꧀ꦤꦺꦭꦤ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦮꦼꦫꦸꦃ​ꦢꦺꦏ꧀ꦤꦺ꧉​ꦮꦺꦴꦁ​ꦲꦸꦫꦶꦥ꧀ꦏꦧꦺꦃ​ꦥꦤ꧀ꦠꦼꦱ꧀ꦩꦼꦩꦸꦗꦶ​ꦢꦺꦏ꧀ꦤꦺꦭꦤ꧀ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦱꦶꦁ​ꦏ꧀ꦮꦱ​ꦢꦺꦮꦺꦱꦭꦮꦱ꧀ꦭꦮꦱ꧀ꦱꦺ​꧉​ꦄꦩꦺꦤ꧀꧈​

꧋ꦏꦱꦸꦒꦶꦃꦲꦤ꧀ꦱꦶꦁ​ꦱꦼꦗꦠꦶ​꧉​

¹⁷꧋ꦠꦶꦩꦺꦴꦠꦶꦪꦸꦱ꧀ ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦱꦲꦶꦏꦶ​ꦱꦸꦒꦶꦃ​ꦲꦶꦁ​ꦢꦺꦴꦚ​ꦏꦺꦤꦺ​ꦥꦢ​ꦢꦶꦲꦺꦴꦩꦺꦴꦁꦔꦶꦢꦶꦥꦼꦔꦶꦁ​ꦱꦺꦴꦩ꧀ꦧꦺꦴꦁ꧉​ꦲꦗ​ꦲꦺꦤ꧀ꦠꦸꦏ꧀ꦔꦼꦤ꧀ꦢꦼꦭ꧀ꦭꦏꦺꦧꦤ꧀ꦢꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧈​ꦤꦁꦔꦶꦁ​ꦏꦺꦴꦁꦏꦺꦴꦤ꧀ꦥꦢ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦢꦺꦏ꧀ꦤꦺꦲꦺꦴꦫ​ꦲꦺꦩꦤ꧀ ꦢꦺꦏ꧀ꦤꦺꦩꦭꦃ​ꦚꦮꦶꦱ꧀ꦱꦶ​ꦱꦼꦩ꧀ꦧꦫꦁ​ꦭꦸꦧꦺꦂꦭꦸꦧꦺꦂ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ¹⁸ꦩꦸꦭꦤꦺ​꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦢꦶꦮꦸꦭꦁꦔꦶꦱꦸꦥꦪ​ꦥꦢ​ꦤꦸꦭꦸꦁꦔꦶ​ꦱꦏ꧀ꦥꦢꦥꦢ꧉​ꦏꦱꦸꦒꦶꦃꦲꦤ꧀ꦱꦶꦁ​ꦱꦼꦗꦠꦶ​ꦏꦸꦮꦶ​ꦪ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦭꦶꦪꦤꦺ​꧉​ꦲꦗ​ꦥꦢ​ꦲꦺꦩꦤ꧀ ꦤꦁꦔꦶꦁ​ꦱꦼꦩ꧀ꦧꦫꦁ​ꦏꦸꦢꦸ​ꦢꦶꦲꦼꦢꦸꦩ꧀ꦏꦫꦺꦴ​ꦭꦶꦪꦤꦺ​꧉​ ¹⁹ꦢꦢꦶꦤꦺ​ꦥꦢ​ꦚꦶꦩ꧀ꦥꦼꦤ꧀ꦏꦱꦸꦒꦶꦃꦲꦤ꧀ꦤꦁꦱ꧀ꦮꦂꦒ​ꦱꦶꦁ​ꦏꦼꦤꦺꦁꦢꦶꦗꦒꦏ꧀ꦏꦏꦺꦏꦁꦒꦺꦴ​ꦲꦸꦫꦶꦥ꧀ꦥꦺꦲꦩ꧀ꦧꦺꦱꦸꦏ꧀ ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

²⁰꧋ꦠꦶꦩꦺꦴꦠꦶꦪꦸꦱ꧀ ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦩꦺꦴꦁꦔꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦭꦤ꧀ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦱꦶꦁꦏꦶꦂꦫꦶ꧉​ꦲꦸꦒ​ꦲꦺꦴꦩꦺꦴꦁꦔꦤ꧀ꦱꦶꦁ​ꦗꦫꦺꦤꦺ​ꦏꦥꦶꦤ꧀ꦠꦼꦂꦫꦤ꧀ ꦤꦁꦔꦶꦁ​ꦤꦩꦸꦁ​ꦩꦫꦏ꧀ꦏꦏꦺꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀꧈​ꦏꦸꦮꦶ​ꦲꦩ꧀ꦧꦫꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦼꦢꦺꦴꦃꦲꦶ꧉​ ²¹ꦲꦺꦤꦺꦁꦱꦶꦁꦥꦢꦩꦶꦏꦶꦂꦤ꧀ꦢꦸꦮꦺꦤ꧀ꦤꦶꦏꦥꦶꦤ꧀ꦠꦼꦂꦫꦤ꧀ꦱꦶꦁꦏꦪꦔꦺꦴꦤꦺꦴꦏꦸꦮꦶ꧈​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦲꦥ?ꦩꦭꦃꦱꦲꦶꦏꦶꦥꦢꦤꦶꦁꦒꦭ꧀ꦥꦶꦠꦸꦠꦸꦂꦱꦶꦁꦧꦼꦤꦼꦂ꧉​ꦲꦺꦴꦫꦭꦶꦮꦠ꧀ ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦲꦩ꧀ꦧꦼꦂꦏꦃꦲꦶꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀

↑ ↑ ↑

← ꧇꧒꧇ꦠꦺꦱꦴꦭꦺꦴꦤꦶꦏꦴ

꧇꧒꧇ꦠꦶꦩꦺꦴꦠꦶꦪꦸꦱ꧀ →