ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦠꦶꦠꦸꦱ꧀
ꦩꦫꦁꦠꦶꦠꦸꦱ꧀꧈꧂
꧇꧑꧇
1-4꧋ꦭꦪꦁꦱꦁꦏꦦꦈꦭꦸꦱ꧀ꦩꦫꦁꦠꦶꦠꦸꦱ꧀ꦲꦤꦏ꧀ꦏꦸ꧉ꦥꦚ꧀ꦕꦺꦤ꧀ꦏꦺꦴꦮꦺꦠꦏ꧀ꦲꦏꦸꦲꦤꦏ꧀ꦠꦼꦤꦤ꧀ ꦲꦮꦶꦠ꧀ꦲꦮꦏ꧀ꦏꦺꦢꦺꦮꦺꦠꦸꦁꦒꦭ꧀ꦥꦽꦕꦪꦲꦶꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦭꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧈ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁꦏꦺꦴꦮꦺ꧉ꦲꦏꦸꦲꦶꦏꦶꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦫꦱꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦶꦏꦺꦴꦁꦏꦺꦴꦤ꧀ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺꦮꦺꦴꦁꦮꦺꦴꦁꦱꦶꦁꦮꦶꦱ꧀ꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦩꦸꦭꦁꦔꦶꦱꦸꦥꦪꦧꦶꦱꦩꦔꦼꦂꦠꦺꦤ꧀ꦤꦶꦥꦶꦠꦸꦠꦸꦂꦱꦶꦁꦧꦼꦤꦼꦂ꧉ꦢꦢꦶꦤꦺꦲꦸꦫꦶꦥ꧀ꦥꦺꦧꦶꦱꦕꦺꦴꦕꦺꦴꦏ꧀ꦏꦫꦺꦴꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦧꦶꦱꦤ꧀ꦢꦸꦮꦺꦤ꧀ꦤꦶꦥꦼꦔꦉꦥ꧀ꦲꦉꦥ꧀ꦲꦸꦫꦶꦥ꧀ꦭꦁꦒꦼꦁ꧉ꦪꦲꦶꦏꦶꦱꦶꦁꦮꦶꦱ꧀ꦢꦶꦗꦚ꧀ꦗꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦏꦮꦶꦠ꧀ꦩ꧀ꦧꦶꦪꦺꦤ꧀ꦭꦤ꧀ꦢꦺꦏ꧀ꦤꦺꦲꦺꦴꦫꦥꦶꦱꦤ꧀ꦥꦶꦱꦤ꧀ꦒꦺꦴꦫꦺꦴꦃ꧉ꦥꦚ꧀ꦕꦺꦤ꧀ ꦲꦮꦏ꧀ꦏꦺꦢꦺꦮꦺꦥꦢꦤꦶꦠꦺꦤ꧀ꦤꦶꦤꦺꦏ꧀ꦲꦥꦱꦶꦁꦢꦶꦗꦚ꧀ꦗꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦱꦲꦶꦏꦶꦮꦶꦱ꧀ꦏꦼꦠꦸꦫꦸꦠ꧀ꦠꦤ꧀ ꦲꦮꦶꦠ꧀ꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦧꦧ꧀ꦲꦸꦫꦶꦥ꧀ꦭꦁꦒꦼꦁꦲꦶꦏꦶꦱꦲꦶꦏꦶꦮꦶꦱ꧀ꦢꦶꦏꦧꦂꦫꦏꦺ꧉ꦪꦥꦶꦠꦸꦠꦸꦂꦲꦶꦏꦶꦱꦶꦁꦠꦏ꧀ꦏꦧꦂꦫꦏꦺ꧉ꦲꦶꦏꦶꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧈ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧈ꦩꦫꦁꦲꦏꦸ꧉
5꧋ꦠꦶꦠꦸꦱ꧀ ꦏꦺꦴꦮꦺꦠꦏ꧀ꦠꦶꦁꦒꦭ꧀ꦤꦁꦥꦸꦭꦏꦿꦺꦠꦏꦸꦮꦶꦱꦸꦥꦪꦏꦺꦴꦮꦺꦔꦿꦩ꧀ꦥꦸꦁꦔꦏꦺꦥꦼꦁꦒꦮꦺꦏꦸꦱꦶꦁꦲꦶꦗꦶꦏ꧀ꦏꦸꦢꦸꦢꦶꦏꦼꦂꦗꦤ꧀ꦤꦶ꧉ꦱꦶꦁꦥꦼꦤ꧀ꦠꦶꦁꦢꦺꦮꦺꦪꦏꦸꦮꦶ꧈ꦲꦶꦁꦱꦧꦼꦤ꧀ꦏꦸꦠꦏꦺꦴꦮꦺꦏꦸꦢꦸꦩꦶꦭꦶꦃꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦏꦸꦢꦸꦢꦢꦶꦥꦼꦤꦸꦤ꧀ꦠꦸꦤ꧀ ꦪꦏꦪꦱꦶꦁꦮꦶꦱ꧀ꦠꦏ꧀ꦲꦺꦴꦩꦺꦴꦁꦏꦲꦺ꧉ 6ꦠꦼꦒꦼꦱ꧀ꦱꦺ꧈ꦱꦼꦢꦸꦭꦸꦂꦱꦶꦁꦲꦩ꧀ꦧꦺꦴꦏ꧀ꦥꦶꦭꦶꦃꦢꦢꦶꦥꦼꦤꦸꦤ꧀ꦠꦸꦤ꧀ꦏꦸꦮꦶꦏꦸꦢꦸꦤꦺꦱꦼꦢꦸꦭꦸꦂꦱꦶꦁꦧ꧀ꦭꦱ꧀ꦲꦺꦴꦫꦏꦼꦤꦺꦁꦢꦶꦱꦭꦃꦲꦏꦺꦏꦫꦺꦴꦮꦺꦴꦁꦭꦶꦪꦤꦺ꧈ꦲꦮꦶꦠ꧀ꦲꦥꦶꦏ꧀ꦏ꧀ꦭꦏꦸꦮꦤ꧀ꦤꦺ꧉ꦏꦸꦢꦸꦤꦺꦱꦼꦢꦸꦭꦸꦂꦱꦶꦁꦤ꧀ꦢꦸꦮꦺꦧꦺꦴꦗꦺꦴꦱꦶꦗꦶ꧉ꦲꦤꦏ꧀ꦲꦤꦏ꧀ꦏꦺꦏꦸꦢꦸꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦺꦴꦫꦏꦼꦤꦺꦁꦢꦶꦲꦺꦴꦩꦺꦴꦁꦮꦺꦴꦁꦤꦺꦏ꧀ꦲꦺꦴꦫꦲꦸꦫꦸꦱ꧀ꦲꦥꦲꦺꦴꦫꦩꦤꦸꦠ꧀꧈ 7ꦮꦺꦴꦁꦢꦢꦶꦥꦼꦤꦸꦤ꧀ꦠꦸꦤ꧀ꦏꦸꦮꦶꦔꦸꦫꦸꦱ꧀ꦱꦶꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶꦄꦭ꧀ꦭꦃ꧈ꦩꦸꦭꦤꦺꦏꦸꦢꦸꦲꦥꦶꦏ꧀ꦏ꧀ꦭꦏꦸꦮꦤ꧀ꦤꦺꦭꦤ꧀ꦧ꧀ꦭꦱ꧀ꦲꦺꦴꦫꦔꦼꦏꦺꦏ꧀ꦏꦶꦗꦭꦂꦫꦤ꧀ꦩꦫꦁꦮꦺꦴꦁꦭꦶꦪꦏꦁꦒꦺꦴꦔꦿꦱꦤꦶꦢꦺꦏ꧀ꦤꦺ꧉ꦩꦸꦭꦤꦺ꧈ꦲꦗꦩꦶꦭꦶꦃꦮꦺꦴꦁꦱꦶꦁꦩꦶꦏꦶꦂꦥꦶꦤ꧀ꦠꦼꦂꦢꦺꦮꦺꦲꦥꦮꦺꦴꦁꦱꦶꦁꦒꦩ꧀ꦥꦁꦤꦼꦱꦸ꧉ꦲꦗꦮꦺꦴꦁꦱꦶꦁꦱꦼꦤꦼꦁꦔꦺꦴꦩ꧀ꦧꦺꦲꦥꦮꦺꦴꦁꦱꦶꦁꦱꦼꦤꦼꦁꦔ꧀ꦭꦮꦤ꧀ꦭꦶꦪꦤꦺ꧉ꦲꦗꦩꦶꦭꦶꦃꦮꦺꦴꦁꦱꦶꦁꦩ꧀ꦧ꧀ꦭꦸꦧꦸꦠ꧀ꦲꦥꦩꦠꦢꦸꦮꦶꦠ꧀ꦠꦼꦤ꧀꧈ 8ꦩꦭꦃꦔ꧀ꦒꦺꦴꦭꦺꦏ꧀ꦏꦤꦮꦺꦴꦁꦱꦶꦁꦲꦺꦴꦫꦲꦺꦩꦤ꧀ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ ꦮꦺꦴꦁꦱꦶꦁꦤꦩꦸꦁꦱꦼꦤꦼꦁꦔ꧀ꦒꦮꦺꦧꦼꦕꦶꦏ꧀ꦩꦫꦁꦭꦶꦪꦤꦺꦭꦤ꧀ꦮꦺꦴꦁꦱꦶꦁꦥꦢꦁꦥꦶꦏꦶꦂꦫꦤ꧀ꦤꦺ꧉ꦔ꧀ꦒꦺꦴꦭꦺꦏ꧀ꦏꦤꦮꦺꦴꦁꦱꦶꦁꦧꦼꦕꦶꦏ꧀ꦲꦶꦁꦱꦼꦩ꧀ꦧꦫꦁꦥꦽꦏꦫꦭꦤ꧀ꦱꦶꦁꦩꦤꦸꦠ꧀ꦒꦸꦱ꧀ꦠꦶꦄꦭ꧀ꦭꦃꦱꦼꦤꦗꦤ꧀ꦏꦼꦥꦿꦶꦪꦺꦮꦲꦺ꧈ꦮꦺꦴꦁꦱꦶꦁꦔ꧀ꦒꦼꦤꦃꦲꦔꦼꦤ꧀ꦤꦔꦼꦤ꧀ꦤꦺ꧉ 9ꦭꦤ꧀ꦩꦼꦤꦺꦃ꧈ꦮꦺꦴꦁꦱꦶꦁꦢꦢꦶꦥꦼꦤꦸꦤ꧀ꦠꦸꦤ꧀ꦏꦸꦮꦶꦏꦸꦢꦸꦤ꧀ꦢꦸꦮꦺꦤ꧀ꦤꦶꦥꦼꦔꦤ꧀ꦢꦼꦭ꧀ꦱꦶꦁꦩꦤ꧀ꦠꦼꦥ꧀ꦩꦫꦁꦥꦶꦠꦸꦠꦸꦂꦱꦶꦁꦧꦼꦤꦼꦂ꧈ꦪꦏꦸꦮꦶꦥꦶꦠꦸꦠꦸꦂꦱꦶꦁꦮꦶꦱ꧀ꦠꦏ꧀ꦮꦸꦭꦁꦔꦏꦺ꧉ꦲꦶꦏꦶꦥꦼꦂꦭꦸꦧꦔꦼꦠ꧀ ꦲꦮꦶꦠ꧀ꦥꦶꦠꦸꦠꦸꦂꦱꦶꦁꦧꦼꦤꦼꦂꦏꦸꦮꦶꦏꦼꦤꦺꦁꦢꦶꦲꦼꦁꦒꦺꦴꦲꦩ꧀ꦧꦔꦸꦤ꧀ ꦱꦸꦥꦪꦧꦶꦱꦩꦸꦤ꧀ꦢꦏ꧀ꦥꦼꦔꦤ꧀ꦢꦼꦭ꧀ꦭꦺ꧉ꦲꦸꦒꦏꦼꦤꦺꦁꦢꦶꦲꦼꦁꦒꦺꦴꦤ꧀ꦢꦸꦢꦸꦃꦲꦏꦺꦏ꧀ꦭꦺꦫꦸꦤꦺꦮꦺꦴꦁꦱꦶꦁꦩꦸꦭꦁꦔꦶꦥꦶꦠꦸꦠꦸꦂꦭꦶꦪꦤꦺ꧉
10꧋ꦠꦶꦠꦸꦱ꧀ ꦏꦺꦴꦮꦺꦏꦸꦢꦸꦩꦶꦭꦶꦃꦥꦼꦤꦸꦤ꧀ꦠꦸꦤ꧀ꦏꦪꦱꦶꦁꦠꦏ꧀ꦲꦺꦴꦩꦺꦴꦁꦏꦸꦮꦶꦩꦲꦸ꧈ꦲꦮꦶꦠ꧀ꦲꦺꦴꦏꦺꦃꦮꦺꦴꦁꦱꦶꦁꦲꦺꦴꦫꦒꦼꦊꦩ꧀ꦩꦤꦸꦠ꧀ꦩꦫꦁꦱꦥꦱꦥ꧉ꦱꦼꦤꦼꦁꦔꦺꦔꦽꦩ꧀ꦧꦸꦏ꧀ꦧꦫꦁꦱꦶꦁꦧ꧀ꦭꦱ꧀ꦲꦺꦴꦫꦩꦶꦒꦸꦤꦤꦶꦭꦤ꧀ꦩꦸꦭꦁꦔꦶꦧꦫꦁꦱꦶꦁꦲꦺꦴꦫꦧꦼꦤꦼꦂ꧉ꦮꦺꦴꦁꦙꦸꦲꦺꦴꦏꦺꦃꦱꦶꦁꦏꦪꦔꦺꦴꦤꦺꦴꦏꦸꦮꦶ꧈ꦥꦢꦩꦸꦭꦁꦔꦶꦮꦺꦴꦁꦱꦶꦁꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀ꦏꦺꦴꦁꦏꦺꦴꦤ꧀ꦔ꧀ꦭꦏꦺꦴꦤ꧀ꦤꦶꦱꦸꦤꦠ꧀ ꦲꦩ꧀ꦧꦫꦁ꧉ꦲꦺꦴꦩꦺꦴꦁꦔꦺꦤꦺꦏ꧀ꦲꦺꦴꦫꦱꦸꦤꦠ꧀ꦲꦺꦴꦫꦢꦶꦠꦩ꧀ꦥꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ 11ꦥꦫꦥꦼꦤꦸꦤ꧀ꦠꦸꦤ꧀ꦏꦸꦢꦸꦔꦼꦤ꧀ꦢꦼꦏ꧀ꦮꦺꦴꦁꦱꦶꦁꦩꦸꦭꦁꦔꦶꦏꦪꦔꦺꦴꦤꦺꦴꦏꦸꦮꦶ꧉ꦲꦶꦏꦶꦥꦼꦂꦭꦸꦧꦔꦼꦠ꧀ ꦲꦮꦶꦠ꧀ꦮꦶꦱ꧀ꦥꦢꦩꦫꦏ꧀ꦏꦏꦺꦢꦢꦶꦧꦶꦔꦸꦁꦔꦺꦥꦶꦫꦁꦥꦶꦫꦁꦧꦿꦪꦠ꧀꧈ꦱꦶꦁꦢꦶꦒꦺꦴꦭꦺꦏ꧀ꦏꦶꦩꦸꦁꦢꦸꦮꦶꦠ꧀ꦠꦺ꧉ 12ꦮꦺꦴꦁꦏꦿꦺꦠꦏꦺꦴꦤꦺꦴꦢꦺꦮꦺꦱꦶꦁꦔꦼꦂꦠꦶꦏ꧀ꦭꦏꦸꦮꦤ꧀ꦤꦺꦧꦁꦱꦤꦺ꧈ꦠꦲꦸꦔꦺꦴꦩꦺꦴꦁꦔꦺꦤꦺꦩ꧀ꦧꦶꦪꦺꦤ꧀:“ꦮꦺꦴꦁꦏꦿꦺꦠꦏꦸꦮꦶꦱꦼꦤꦼꦁꦒꦺꦴꦫꦺꦴꦃ꧉ꦏ꧀ꦭꦏꦸꦮꦤ꧀ꦤꦺꦏꦪꦏꦺꦮꦤ꧀ꦒꦭꦏ꧀꧈ꦲꦺꦴꦫꦱꦼꦤꦼꦁꦚꦩ꧀ꦧꦸꦠ꧀ꦠ꧈ꦤꦩꦸꦁꦱꦼꦤꦼꦁꦩꦁꦔꦤ꧀꧈” 13ꦮꦺꦴꦁꦱꦶꦁꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦥꦚ꧀ꦕꦺꦤ꧀ꦧꦼꦤꦼꦂꦧꦔꦼꦠ꧀꧈ꦩꦸꦭꦤꦺ꧈ꦮꦺꦴꦁꦮꦺꦴꦁꦏꦸꦮꦶꦏꦸꦢꦸꦲꦩ꧀ꦧꦺꦴꦏ꧀ꦮꦼꦭꦺꦏ꧀ꦏꦏꦺꦱꦶꦁꦠꦼꦤꦤ꧀ꦤꦤ꧀ ꦱꦸꦥꦪꦧꦶꦱꦥꦽꦕꦪꦩꦫꦁꦥꦶꦠꦸꦠꦸꦂꦱꦶꦁꦧꦼꦤꦼꦂ꧉
14꧋ꦢꦢꦶꦤꦺꦲꦺꦴꦫꦥꦢꦔ꧀ꦒꦠꦺꦏ꧀ꦏꦏꦺꦩꦫꦁꦢꦺꦴꦔꦺꦔꦤ꧀ꦢꦺꦴꦔꦺꦁꦔꦤ꧀ꦒꦮꦺꦪꦤ꧀ꦤꦺꦮꦺꦴꦁꦙꦸꦭꦤ꧀ꦲꦺꦴꦫꦥꦢꦤꦸꦫꦸꦠ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦒꦮꦺꦪꦤ꧀ꦤꦺꦩꦤꦸꦁꦱꦱꦶꦁꦥꦢꦤꦩ꧀ꦥꦶꦏ꧀ꦥꦶꦠꦸꦠꦸꦂꦱꦶꦁꦧꦼꦤꦼꦂ꧉ 15ꦮꦺꦴꦁꦤꦺꦏ꧀ꦉꦱꦶꦏ꧀ꦲꦔꦼꦤ꧀ꦤꦔꦼꦤ꧀ꦤꦺꦩꦼꦱ꧀ꦠꦶꦪꦉꦱꦶꦏ꧀ꦏ꧀ꦭꦏꦸꦮꦤ꧀ꦤꦺꦲꦸꦒ꧉ꦤꦁꦔꦶꦁꦮꦺꦴꦁꦱꦶꦁꦏꦺꦴꦠꦺꦴꦂꦲꦔꦼꦤ꧀ꦤꦔꦼꦤ꧀ꦤꦺꦭꦤ꧀ꦲꦺꦴꦫꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦩꦼꦱ꧀ꦠꦶꦪꦤꦩꦸꦁꦔ꧀ꦭꦏꦺꦴꦤ꧀ꦤꦶꦲꦭ꧉ꦱꦶꦁꦢꦶꦥꦶꦏꦶꦂꦤꦩꦸꦁꦧꦫꦁꦱꦶꦁꦲꦭꦭꦤ꧀ꦱꦼꦤꦗꦤ꧀ꦤꦔ꧀ꦭꦏꦺꦴꦤ꧀ꦤꦶꦲꦭ꧈ꦪꦮꦶꦱ꧀ꦧ꧀ꦭꦱ꧀ꦲꦺꦴꦫꦫꦸꦩꦁꦱ꧉ 16ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦢꦶꦮꦼꦭꦺꦃꦲꦏꦺ꧉ꦔꦏꦸꦤꦺꦥꦽꦕꦪ꧈ꦤꦁꦔꦶꦁꦒꦺꦴꦫꦺꦴꦃ꧈ꦲꦮꦶꦠ꧀ꦏ꧀ꦭꦏꦸꦮꦤ꧀ꦤꦺꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃ꧉ꦥꦢꦱꦼꦤꦼꦁꦔ꧀ꦭꦏꦺꦴꦤ꧀ꦤꦶꦧꦫꦁꦱꦶꦁꦢꦶꦱꦼꦔꦶꦠ꧀ꦠꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦺꦴꦫꦥꦢꦩꦤꦸꦠ꧀ꦢꦺꦏ꧀ꦤꦺ꧉ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦲꦺꦴꦫꦧꦶꦱꦤꦶꦤ꧀ꦢꦏ꧀ꦏꦏꦺꦧꦼꦕꦶꦏ꧀ꦧ꧀ꦭꦱ꧀꧈
꧇꧒꧇ 1꧋ꦤꦁꦔꦶꦁꦏꦺꦴꦮꦺꦠꦶꦠꦸꦱ꧀ ꦏꦺꦴꦮꦺꦲꦺꦴꦫꦏꦪꦮꦺꦴꦁꦮꦺꦴꦁꦏꦸꦮꦶ꧉ꦩꦸꦭꦤꦺ꧈ꦮꦺꦴꦁꦱꦶꦁꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦥꦢꦮꦸꦭꦁꦔꦤꦲꦥꦱꦶꦁꦕꦺꦴꦕꦺꦴꦏ꧀ꦏꦫꦺꦴꦥꦶꦠꦸꦠꦸꦂꦱꦶꦁꦧꦼꦤꦼꦂ꧉ 2ꦮꦺꦴꦁꦭꦤꦁꦭꦤꦁꦱꦶꦁꦠꦸꦮꦥꦢꦮꦸꦭꦁꦔꦤꦱꦸꦥꦪꦥꦢꦁꦥꦶꦏꦶꦂꦫꦤ꧀ꦤꦺ꧈ꦔ꧀ꦒꦼꦤꦃꦲꦔꦼꦤ꧀ꦤꦔꦼꦤ꧀ꦤꦺꦭꦤ꧀ꦥꦤ꧀ꦠꦼꦱ꧀ꦏ꧀ꦭꦏꦸꦮꦤ꧀ꦤꦺ꧉ꦏꦸꦢꦸꦩꦤ꧀ꦠꦼꦥ꧀ꦥꦼꦔꦤ꧀ꦢꦼꦭ꧀ꦭꦺꦩꦫꦁꦥꦶꦠꦸꦠꦸꦂꦱꦶꦁꦧꦼꦤꦼꦂꦭꦤ꧀ꦠꦿꦺꦱ꧀ꦤꦠꦼꦤꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉ꦲꦸꦒꦲꦶꦁꦏꦱꦁꦱꦫꦤ꧀ꦏꦸꦢꦸꦱꦧꦂꦩꦤ꧀ꦠꦼꦥ꧀꧈ 3ꦮꦺꦴꦁꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁꦠꦸꦮꦲꦸꦒꦥꦢꦢꦶꦮꦸꦭꦁꦔꦶꦱꦸꦥꦪꦲꦸꦫꦶꦥ꧀ꦥꦺꦢꦶꦱꦮꦁꦥꦤ꧀ꦠꦼꦱ꧀ꦢꦢꦶꦮꦺꦴꦁꦱꦶꦁꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉ꦲꦗꦲꦺꦤ꧀ꦠꦸꦏ꧀ꦚꦠꦸꦂꦲꦭꦩꦫꦁꦭꦶꦪꦤꦺꦭꦤ꧀ꦲꦗꦲꦺꦤ꧀ꦠꦸꦏ꧀ꦔꦺꦴꦩ꧀ꦧꦺꦲꦁꦒꦸꦂꦲꦺꦴꦏꦺꦃ꧈ꦩꦭꦃꦲꦶꦤ꧀ꦠꦼꦂꦫꦩꦸꦭꦁꦔꦶꦭꦶꦪꦤꦺꦧꦧ꧀ꦱꦶꦁꦧꦼꦕꦶꦏ꧀꧈ 4-5ꦢꦢꦶꦤꦺꦏꦼꦤꦺꦁꦢꦶꦠꦶꦫꦸꦏꦫꦺꦴꦮꦺꦴꦁꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁꦲꦼꦤꦺꦴꦩ꧀ ꦱꦸꦥꦪꦥꦢꦤꦿꦺꦱ꧀ꦤꦤ꧀ꦤꦶꦭꦤ꧀ꦔꦿꦸꦩꦠ꧀ꦠꦶꦧꦺꦴꦗꦺꦴꦭꦤ꧀ꦲꦤꦏ꧀ꦏꦺ꧈ꦥꦢꦔ꧀ꦒꦼꦤꦃꦲꦔꦼꦤ꧀ꦤꦔꦼꦤ꧀ꦤꦺꦭꦤ꧀ꦉꦱꦶꦏ꧀ꦲꦠꦶꦤꦺ꧉ꦤꦺꦏ꧀ꦔꦺꦴꦤꦺꦴꦧꦶꦱꦤꦠꦲꦺꦴꦩꦃꦲꦺꦴꦩꦃꦱꦶꦁꦲꦥꦶꦏ꧀ꦭꦤ꧀ꦒꦼꦩꦠꦶꦭꦤ꧀ꦩꦤꦸꦠ꧀ꦩꦫꦁꦧꦺꦴꦗꦺꦴꦤꦺ꧉ꦢꦢꦶꦤꦺꦲꦺꦴꦫꦚ꧀ꦗꦭꦂꦫꦶꦮꦺꦴꦁꦭꦶꦪꦤꦺꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃ꧉
6꧋ꦥꦫꦲꦼꦤꦺꦴꦩ꧀ꦩꦼꦤꦺꦴꦩ꧀ꦩꦤ꧀ꦭꦤꦁꦲꦸꦒꦏꦸꦢꦸꦢꦶꦮꦸꦭꦁꦔꦶꦱꦸꦥꦪꦥꦢꦔ꧀ꦒꦼꦤꦃꦲꦔꦼꦤ꧀ꦤꦔꦼꦤ꧀ꦤꦺ꧉ 7ꦏꦺꦴꦮꦺꦢꦺꦮꦺꦏꦸꦢꦸꦠꦼꦩꦼꦤ꧀ꦔ꧀ꦭꦏꦺꦴꦤ꧀ꦤꦶꦱꦼꦩ꧀ꦧꦫꦁꦱꦶꦁꦧꦼꦕꦶꦏ꧀ ꦢꦢꦶꦤꦺꦏꦼꦤꦺꦁꦢꦶꦠꦶꦫꦸꦏꦫꦺꦴꦱꦶꦁꦲꦼꦤꦺꦴꦩ꧀ꦲꦼꦤꦺꦴꦩ꧀ꦏꦸꦮꦶ꧉ꦤꦺꦏ꧀ꦩꦸꦭꦁꦔꦶ꧈ꦩꦸꦭꦁꦔꦤꦥꦶꦠꦸꦠꦸꦂꦱꦶꦁꦧꦼꦤꦼꦂ꧉ꦏꦺꦴꦮꦺꦏꦸꦢꦸꦱꦶꦁꦠꦼꦤꦤ꧀ꦤꦤ꧀ ꦢꦢꦶꦤꦺꦏꦺꦴꦮꦺꦢꦶꦲꦗꦺꦤ꧀ꦤꦶ꧉ 8ꦠꦼꦩ꧀ꦧꦸꦁꦩꦸꦏꦸꦢꦸꦱꦶꦁꦧꦼꦤꦼꦂꦱꦸꦥꦪꦏꦺꦴꦮꦺꦲꦺꦴꦫꦢꦶꦱꦭꦃꦲꦏꦺꦮꦺꦴꦁ꧉ꦢꦢꦶꦤꦺꦮꦺꦴꦁꦱꦶꦁꦱꦼꦤꦼꦁꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦥꦢꦏꦶꦱꦶꦤ꧀ꦤꦤ꧀ꦢꦺꦮꦺ꧈ꦲꦮꦶꦠ꧀ꦲꦺꦴꦫꦤꦼꦩꦸꦏ꧀ꦭꦺꦫꦸꦏꦁꦒꦺꦴꦚꦭꦃꦚꦭꦃꦲꦏꦺꦲꦮꦏ꧀ꦏꦺꦢꦺꦮꦺ꧉
9꧋ꦥꦫꦱ꧀ꦭꦥ꦳꧀ꦲꦸꦒꦥꦢꦢꦶꦮꦸꦭꦁꦔꦶꦱꦸꦥꦪꦩꦤꦸꦠ꧀ꦩꦫꦁꦱꦶꦁꦤ꧀ꦢꦸꦮꦺꦲꦺꦴꦩꦃꦲꦶꦁꦧꦧ꧀ꦲꦥꦮꦲꦺ꧈ꦲꦗꦲꦺꦤ꧀ꦠꦸꦏ꧀ꦩ꧀ꦧꦮꦭ꧀ꦭꦶ꧈ꦩꦭꦃꦧꦶꦱꦲꦔ꧀ꦒꦮꦺꦊꦒꦤꦺꦢꦺꦏ꧀ꦤꦺ꧉ 10ꦲꦗꦲꦺꦤ꧀ꦠꦸꦏ꧀ꦚꦺꦴꦭꦺꦴꦁꦔꦶꦧꦫꦁꦔꦺꦱꦶꦁꦤ꧀ꦢꦸꦮꦺꦲꦺꦴꦩꦃ꧈ꦩꦭꦃꦧꦶꦱꦲꦏꦼꦤꦺꦁꦢꦶꦲꦼꦤ꧀ꦢꦼꦭ꧀ꦭꦏꦺꦲꦶꦁꦱꦼꦩ꧀ꦧꦫꦁ꧉ꦢꦢꦶꦤꦺꦮꦺꦴꦁꦮꦺꦴꦁꦧꦶꦱꦤꦶꦠꦺꦤ꧀ꦤꦶꦢꦺꦮꦺꦭꦤ꧀ꦥꦢꦒꦼꦊꦩ꧀ꦤꦩ꧀ꦥꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃ꧈ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧉
11꧋ꦮꦺꦴꦁꦥꦽꦕꦪꦏꦸꦢꦸꦤ꧀ꦢꦸꦮꦺꦤ꧀ꦤꦶꦏ꧀ꦭꦏꦸꦮꦤ꧀ꦱꦶꦁꦏꦪꦔꦺꦴꦤꦺꦴ꧈ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦱꦸꦥꦪꦏꦧꦺꦃꦮꦺꦴꦁꦧꦶꦱꦱ꧀ꦭꦩꦼꦠ꧀꧈ 12ꦩꦸꦭꦤꦺꦲꦮꦏ꧀ꦏꦺꦢꦺꦮꦺꦏꦸꦢꦸꦢꦸꦤꦸꦁꦲꦶꦏꦶꦭꦤ꧀ꦏꦸꦢꦸꦤꦶꦁꦒꦭ꧀ꦏ꧀ꦭꦏꦸꦮꦤ꧀ꦱꦶꦁꦤ꧀ꦢꦢꦺꦏ꧀ꦏꦏꦺꦱꦼꦢꦶꦤꦺꦒꦸꦱ꧀ꦠꦶꦄꦭ꧀ꦭꦃ꧉ꦲꦗꦥꦢꦤ꧀ꦢꦸꦮꦺꦤ꧀ꦤꦶꦏꦼꦱꦼꦤꦼꦁꦔꦤ꧀ꦲꦭꦩꦼꦤꦺꦃꦏꦪꦱꦶꦁꦢꦶꦏꦼꦥꦺꦔꦶꦤ꧀ꦤꦶꦮꦺꦴꦁꦱꦶꦁꦱꦼꦔꦶꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉ꦩꦭꦃꦩꦭꦃ꧈ꦱꦸꦮꦺꦤꦺꦲꦮꦏ꧀ꦏꦺꦢꦺꦮꦺꦲꦸꦫꦶꦥ꧀ꦲꦶꦁꦢꦺꦴꦚꦏꦺꦤꦺ꧈ꦲꦮꦏ꧀ꦏꦺꦢꦺꦮꦺꦏꦸꦢꦸꦔ꧀ꦒꦼꦤꦃꦲꦔꦼꦤ꧀ꦤꦔꦼꦤ꧀ꦤꦺ꧈ꦏꦸꦢꦸꦔ꧀ꦭꦏꦺꦴꦤ꧀ꦤꦶꦱꦶꦁꦧꦼꦕꦶꦏ꧀ꦭꦤ꧀ꦱꦶꦁꦤ꧀ꦢꦢꦺꦏ꧀ꦏꦏꦺ ꦊꦒꦤꦺꦒꦸꦱ꧀ꦠꦶꦄꦭ꧀ꦭꦃ꧉ 13ꦪꦏꦪꦔꦺꦴꦤꦺꦴꦏꦸꦮꦶꦏꦸꦢꦸꦤꦺꦲꦸꦫꦶꦥ꧀ꦥꦺꦲꦮꦏ꧀ꦏꦺꦢꦺꦮꦺꦱꦸꦮꦺꦤꦺꦲꦮꦏ꧀ꦏꦺꦢꦺꦮꦺꦔꦼꦤ꧀ꦠꦺꦤ꧀ꦤꦶꦠꦼꦏꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦱꦶꦁꦒꦼꦢꦺꦢꦺꦮꦺ꧉ꦤꦺꦏ꧀ꦢꦺꦏ꧀ꦤꦺꦠꦼꦏꦮꦺꦴꦁꦏꦧꦺꦃꦧꦏꦭ꧀ꦮꦼꦫꦸꦃꦏꦩꦸꦭꦾꦤꦺ꧉ 14ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦱꦩ꧀ꦥꦺꦏ꧀ꦢꦶꦥꦠꦺꦤ꧀ꦤꦶ꧈ꦱꦸꦥꦪꦲꦮꦏ꧀ꦏꦺꦢꦺꦮꦺꦧꦶꦱꦲꦸꦕꦸꦭ꧀ꦱꦁꦏꦏ꧀ꦮꦱꦤꦺꦲꦭꦭꦤ꧀ꦱꦸꦥꦪꦲꦮꦏ꧀ꦏꦺꦢꦺꦮꦺꦲꦶꦏꦶꦧꦶꦱꦉꦱꦶꦏ꧀ꦭꦤ꧀ꦢꦢꦶꦲꦸꦩꦠ꧀ꦠꦺꦒꦸꦱ꧀ꦠꦶꦢꦺꦮꦺ꧈ꦱꦶꦁꦱꦼꦤꦼꦁꦔ꧀ꦒꦮꦺꦧꦼꦕꦶꦏ꧀꧈
15꧋ꦠꦶꦠꦸꦱ꧀ ꦥꦶꦠꦸꦠꦸꦂꦥꦶꦠꦸꦠꦸꦂꦲꦶꦏꦸꦩꦲꦸꦏꦸꦢꦸꦲꦩ꧀ꦧꦺꦴꦏ꧀ꦮꦸꦭꦁꦔꦏꦺ꧉ꦮꦺꦴꦁꦮꦺꦴꦁꦱꦶꦁꦥꦽꦕꦪꦏꦸꦢꦸꦲꦩ꧀ꦧꦺꦴꦏ꧀ꦢꦸꦤꦸꦁꦢꦸꦤꦸꦁꦔꦏꦺ꧈ꦱꦸꦥꦪꦥꦢꦔ꧀ꦭꦏꦺꦴꦤ꧀ꦤꦶꦏꦸꦮꦶ꧉ꦱꦶꦁꦲꦺꦴꦫꦒꦼꦊꦩ꧀ꦩꦤꦸꦠ꧀ꦏꦸꦢꦸꦲꦩ꧀ꦧꦺꦴꦏ꧀ꦧꦼꦤꦼꦂꦫꦏꦺꦠꦤ꧀ꦥꦮꦼꦢꦶ꧉ꦲꦗꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁꦚꦼꦥꦺꦭꦺꦏ꧀ꦏꦏꦺꦏꦺꦴꦮꦺ꧉
꧇꧓꧇ 1꧋ꦠꦶꦠꦸꦱ꧀ ꦮꦺꦴꦁꦮꦺꦴꦁꦥꦢꦢꦶꦲꦺꦭꦶꦁꦔꦏꦺꦤꦺꦏ꧀ꦏꦸꦢꦸꦩꦤꦸꦠ꧀ꦩꦫꦁꦱꦶꦁꦤꦠꦭꦤ꧀ꦔ꧀ꦮꦱꦤꦶꦤꦼꦒꦫ꧉ꦏꦸꦢꦸꦩꦤꦸꦠ꧀ꦩꦫꦁꦥꦫꦥꦼꦔꦉꦥ꧀ꦭꦤ꧀ꦱꦏ꧀ꦮꦚ꧀ꦕꦶꦮꦚ꧀ꦕꦶꦏꦸꦢꦸꦒꦼꦊꦩ꧀ꦔ꧀ꦒꦸꦪꦸꦥ꧀ꦥꦶꦱꦼꦩ꧀ꦧꦫꦁꦱꦶꦁꦧꦼꦕꦶꦏ꧀꧈ 2ꦲꦗꦲꦺꦤ꧀ꦠꦸꦏ꧀ꦔꦿꦱꦤꦶꦭꦶꦪꦤꦺꦲꦥꦠꦸꦏꦂꦥꦢꦸꦏꦫꦺꦴꦭꦶꦪꦤꦺ꧈ꦩꦭꦃꦩꦭꦃꦏꦸꦢꦸꦒꦼꦩꦠꦶꦭꦤ꧀ꦔꦗꦺꦤ꧀ꦤꦶꦩꦫꦁꦱꦧꦼꦤ꧀ꦮꦺꦴꦁ꧉ 3ꦥꦢꦢꦶꦲꦺꦭꦶꦁꦔꦏꦺ꧈ꦲꦮꦶꦠ꧀ꦩ꧀ꦧꦶꦪꦺꦤ꧀ꦲꦮꦏ꧀ꦏꦺꦢꦺꦮꦺꦪꦥꦢꦮꦲꦺꦧꦺꦴꦢꦺꦴ꧉ꦲꦺꦴꦫꦒꦼꦊꦩ꧀ꦩꦤꦸꦠ꧀ꦩꦫꦁꦱꦥꦱꦥ꧈ꦩꦭꦃꦤꦸꦫꦸꦠ꧀ꦥꦶꦠꦸꦠꦸꦂꦱꦶꦁꦲꦺꦴꦫꦧꦼꦤꦼꦂ꧉ꦲꦮꦏ꧀ꦏꦺꦢꦺꦮꦺꦏꦭꦃꦏꦫꦺꦴꦱꦏ꧀ꦮꦼꦂꦤꦤꦺꦏꦼꦱꦼꦤꦼꦁꦔꦤ꧀ꦱꦶꦁꦲꦭ꧉ꦱꦶꦁꦢꦶꦥꦶꦏꦶꦂꦄꦮꦤ꧀ꦮꦼꦔꦶꦤꦩꦸꦁꦧꦫꦁꦱꦶꦁꦲꦺꦴꦫꦔ꧀ꦒꦼꦤꦃ꧉ꦱꦼꦤꦼꦁꦩꦺꦫꦶꦏꦫꦺꦴꦭꦶꦪꦤꦺ꧉ꦢꦶꦱꦼꦔꦶꦠ꧀ꦠꦶꦮꦺꦴꦁꦭꦤ꧀ꦲꦮꦏ꧀ꦏꦺꦢꦺꦮꦺꦪꦥꦢꦮꦲꦺꦱꦼꦤꦼꦁꦚꦼꦔꦶꦠ꧀ꦠꦶꦭꦶꦪꦤꦺ꧉ 4ꦤꦁꦔꦶꦁꦠꦼꦫꦸꦱ꧀ꦲꦺꦤꦺꦁꦮꦚ꧀ꦕꦶꦤꦺꦗꦸꦫꦸꦱ꧀ꦭꦩꦼꦠ꧀ꦠꦺꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺꦤ꧀ꦢꦸꦢꦸꦃꦲꦏꦺꦏꦮꦼꦭꦱ꧀ꦱꦤ꧀ꦤꦺꦭꦤ꧀ꦏꦠꦿꦺꦱ꧀ꦤꦤꦺꦩꦫꦁꦩꦤꦸꦁꦱ꧉ 5ꦱꦲꦶꦏꦶꦲꦮꦏ꧀ꦏꦺꦢꦺꦮꦺꦮꦶꦱ꧀ꦢꦶꦱ꧀ꦭꦩꦼꦠ꧀ꦠꦏꦺ꧉ꦲꦺꦴꦫꦗꦭꦂꦫꦤ꧀ꦲꦮꦏ꧀ꦏꦺꦢꦺꦮꦺꦲꦶꦏꦶꦔ꧀ꦭꦏꦺꦴꦤ꧀ꦤꦶꦧꦼꦕꦶꦏ꧀ꦲꦥꦏꦼꦥꦿꦶꦪꦺꦮꦲꦺ꧈ꦲꦺꦴꦫ꧈ꦤꦁꦔꦶꦁꦗꦭꦂꦫꦤ꧀ꦢꦺꦏ꧀ꦤꦺꦠꦿꦺꦱ꧀ꦤꦭꦤ꧀ꦩꦼꦭꦱ꧀ꦩꦫꦁꦲꦮꦏ꧀ꦏꦺꦢꦺꦮꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦔꦼꦢꦸꦱ꧀ꦱꦶꦲꦮꦏ꧀ꦏꦺꦢꦺꦮꦺꦭꦤ꧀ꦠꦂꦫꦤ꧀ꦫꦺꦴꦃꦱꦸꦕꦶ꧉ꦪꦫꦺꦴꦃꦱꦸꦕꦶꦲꦶꦏꦶꦱꦶꦁꦮꦶꦱ꧀ꦔ꧀ꦭꦲꦶꦂꦫꦏꦺꦲꦮꦏ꧀ꦏꦺꦢꦺꦮꦺꦩꦼꦤꦺꦃꦭꦤ꧀ꦔꦚꦂꦫꦏꦺꦲꦸꦫꦶꦥ꧀ꦥꦺꦭꦤ꧀ꦏ꧀ꦭꦏꦸꦮꦤ꧀ꦤꦺꦲꦮꦏ꧀ꦏꦺꦢꦺꦮꦺ꧉ 6ꦭꦤ꧀ꦠꦂꦫꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧈ꦒꦸꦱ꧀ꦠꦶꦄꦭ꧀ꦭꦃꦔꦼꦢꦸꦤ꧀ꦤꦏꦺꦫꦺꦴꦃꦱꦸꦕꦶꦏꦁꦒꦺꦴꦤꦸꦭꦸꦁꦔꦶꦲꦮꦏ꧀ꦏꦺꦢꦺꦮꦺꦲꦶꦁꦲꦥꦮꦲꦺ꧉ 7ꦩꦼꦁꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦭꦤ꧀ꦱꦲꦶꦏꦶꦢꦺꦏ꧀ꦤꦺꦮꦶꦱ꧀ꦔꦁꦒꦼꦥ꧀ꦲꦮꦏ꧀ꦏꦺꦢꦺꦮꦺꦧꦼꦤꦼꦂ꧈ꦲꦺꦴꦫꦤ꧀ꦢꦸꦮꦺꦱꦭꦃꦩꦼꦤꦺꦃ꧉ꦲꦮꦏ꧀ꦏꦺꦢꦺꦮꦺꦮꦶꦱ꧀ꦤꦩ꧀ꦥꦲꦸꦫꦶꦥ꧀ꦭꦁꦒꦼꦁꦱꦶꦁꦢꦶꦲꦉꦥ꧀ꦲꦉꦥ꧀꧈ 8ꦲꦶꦏꦶꦥꦶꦠꦸꦠꦸꦂꦱꦶꦁꦧꦼꦤꦼꦂ꧉
꧋ꦏꦉꦥ꧀ꦏꦸꦏꦧꦺꦃꦲꦶꦏꦶꦲꦩ꧀ꦧꦺꦴꦏ꧀ꦮꦸꦭꦁꦔꦏꦺꦱꦶꦁꦠꦼꦤꦤ꧀ꦤꦤ꧀꧈ꦢꦢꦶꦤꦺꦮꦺꦴꦁꦮꦺꦴꦁꦱꦶꦁꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦶꦱꦩꦸꦤ꧀ꦢꦏ꧀ꦲꦼꦁꦒꦺꦴꦤꦺꦔ꧀ꦒꦮꦺꦧꦼꦕꦶꦏ꧀꧈ꦏꦸꦮꦶꦲꦥꦶꦏ꧀ꦭꦤ꧀ꦏꦁꦒꦺꦴꦒꦮꦺ꧉ 9ꦤꦁꦔꦶꦁꦏꦺꦴꦮꦺꦲꦗꦩꦺꦭꦸꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦧꦧ꧀ꦉꦩ꧀ꦧꦸꦏ꧀ꦏꦤ꧀ꦱꦶꦁꦲꦺꦴꦫꦲꦺꦤꦺꦁꦠꦼꦒꦼꦱ꧀ꦱꦺ꧉ꦲꦸꦒꦧꦧ꧀ꦮꦺꦠ꧀ꦮꦺꦠ꧀ꦠꦺꦮꦺꦴꦁꦙꦸꦭꦤ꧀ꦧꦧ꧀ꦩ꧀ꦧꦃꦩ꧀ꦧꦲꦤ꧀ꦤꦺꦩ꧀ꦧꦶꦪꦺꦤ꧀ꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ꧉ꦏꦸꦮꦶꦢꦶꦱꦶꦁꦏꦶꦂꦫꦶꦮꦲꦺ꧈ꦲꦮꦶꦠ꧀ꦏꦸꦮꦶꦧ꧀ꦭꦱ꧀ꦲꦺꦴꦫꦏꦁꦒꦺꦴꦒꦮꦺꦲꦥꦲꦥ꧉ 10ꦮꦺꦴꦁꦱꦶꦁꦲꦉꦥ꧀ꦔ꧀ꦒꦮꦺꦧꦸꦧꦿꦃꦲꦺꦥꦱꦩꦸꦮꦤ꧀ꦏꦸꦢꦸꦲꦩ꧀ꦧꦺꦴꦏ꧀ꦒꦫꦥ꧀꧈ꦤꦺꦏ꧀ꦲꦶꦗꦶꦏ꧀ꦢꦶꦠꦼꦫꦸꦱ꧀ꦱꦏꦺ꧈ꦢꦶꦲꦺꦭꦶꦁꦔꦏꦺꦱꦼꦥꦶꦱ꧀ꦱꦤ꧀ꦩꦼꦤꦺꦃ꧉ꦤꦺꦏ꧀ꦮꦺꦴꦁꦔꦺꦩꦼꦏ꧀ꦱꦢꦸꦫꦸꦁꦩꦤꦸꦠ꧀ ꦢꦶꦲꦼꦠꦺꦴꦏ꧀ꦏꦏꦺ꧉ 11ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦲꦺꦴꦫꦔ꧀ꦒꦺꦴꦭꦺꦏ꧀ꦧꦫꦁꦧꦼꦕꦶꦏ꧀ ꦤꦁꦔꦶꦁꦤꦸꦗꦸꦧꦫꦁꦲꦭ꧉ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦏꦼꦠꦫꦧꦔꦼꦠ꧀ꦱꦭꦃꦲꦺ꧉
12꧋ꦠꦶꦠꦸꦱ꧀ ꦲꦶꦏꦶꦲꦶꦗꦶꦏ꧀ꦲꦺꦤꦺꦁꦏꦧꦂꦏꦧꦂꦩꦼꦤꦺꦃ꧉ꦄꦂꦠꦺꦩꦱ꧀ꦭꦤ꧀ꦡꦶꦏꦶꦏꦸꦱ꧀ꦲꦉꦥ꧀ꦠꦏ꧀ꦏꦺꦴꦁꦏꦺꦴꦤ꧀ꦤꦁꦔ꧀ꦒꦺꦴꦤ꧀ꦩꦸ꧉ꦤꦺꦏ꧀ꦮꦺꦴꦁꦭꦺꦴꦫꦺꦴꦲꦶꦏꦶꦮꦶꦱ꧀ꦠꦼꦏꦤ꧀ꦏꦺꦴꦤꦺꦴ꧈ꦲꦏꦸꦚꦸꦮꦸꦤ꧀ꦏꦺꦴꦮꦺꦲꦶꦤ꧀ꦠꦼꦂꦫꦩꦼꦠꦸꦮꦲꦏꦸꦤꦁꦤꦶꦏꦺꦴꦥꦺꦴꦭꦶꦱ꧀꧈ꦲꦏꦸꦩꦶꦏꦶꦂꦲꦏꦸꦧꦏꦭ꧀ꦤꦁꦏꦺꦴꦤꦺꦴ꧈ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦚ꧀ꦕꦶꦲꦢꦼꦩ꧀ꦭꦤ꧀ꦲꦔꦶꦤ꧀ꦧꦤ꧀ꦠꦼꦂ꧉ 13ꦯꦺꦤꦱ꧀ ꦱꦶꦁꦥꦁꦏꦠ꧀ꦠꦺꦲꦢ꧀ꦮ꦳ꦺꦴꦏꦠ꧀ꦭꦤ꧀ꦄꦥꦺꦴꦭꦺꦴꦱ꧀ꦥꦢꦢꦶꦫꦺꦮꦁꦔꦶꦧꦺꦤ꧀ꦤ꧀ꦢꦁꦧꦸꦢꦭ꧀ꦭꦤ꧀ꦲꦗꦱꦩ꧀ꦥꦺꦏ꧀ꦏꦼꦏꦸꦫꦁꦔꦤ꧀ꦲꦥꦲꦥ꧉ 14ꦭꦤ꧀ꦩꦼꦤꦺꦃ꧈ꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦥꦽꦕꦪꦥꦢꦢꦶꦮꦸꦭꦁꦔꦶ꧈ꦱꦸꦥꦪꦥꦢꦔ꧀ꦭꦸꦩꦸꦃꦲꦶꦤꦸꦭꦸꦁꦔꦶꦭꦤ꧀ꦚꦸꦏꦸꦥ꧀ꦥꦶꦭꦶꦪꦤꦺꦱꦶꦁꦏꦼꦏꦸꦫꦁꦔꦤ꧀ꦲꦶꦁꦱꦤ꧀ꦢꦁꦥꦔꦤ꧀ꦤꦺ꧉ꦢꦢꦶꦤꦺꦲꦸꦫꦶꦥ꧀ꦥꦺꦲꦺꦴꦫꦩꦸꦱ꧀ꦥꦿ꧈ꦤꦁꦔꦶꦁꦏꦁꦒꦺꦴꦒꦮꦺꦏꦁꦒꦺꦴꦭꦶꦪꦤꦺ꧉
15꧋ꦕꦸꦏꦸꦥ꧀ꦱꦼꦩꦺꦤꦺꦮꦲꦺ꧈ꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦤꦁꦏꦺꦤꦺꦏꦫꦺꦴꦲꦏꦸꦥꦢꦏꦶꦫꦶꦩ꧀ꦱ꧀ꦭꦩꦼꦠ꧀ ꦩꦫꦁꦏꦺꦴꦮꦺ꧉ꦲꦮꦏ꧀ꦏꦺꦢꦺꦮꦺꦲꦸꦒꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦏꦫꦺꦴꦏꦺꦴꦮꦺ꧈ꦱꦶꦁꦥꦢꦠꦿꦺꦱ꧀ꦤꦲꦮꦏ꧀ꦏꦺꦢꦺꦮꦺ꧉
꧋ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉
ꦦꦈꦭꦸꦱ꧀
| ← ꧇꧒꧇ꦠꦶꦩꦺꦴꦠꦶꦪꦸꦱ꧀ | ꦥ꦳ꦶꦭꦺꦩꦺꦴꦤ꧀ → |