ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧑꧇ꦪꦺꦴꦲ꦳ꦤꦼꦱ꧀

꧁꧋ꦭꦪꦁꦔꦺꦫꦱꦸꦭ꧀ꦪꦺꦴꦲꦤꦼꦱ꧀꧈​꧂
ꦭꦪꦁꦤꦺꦴꦩꦼꦂꦱꦶꦗꦶ

---

꧋ꦠꦼꦩ꧀ꦧꦸꦁꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀꧈​

꧇​꧑꧇​

¹꧋ꦭꦪꦁ​ꦱꦁꦏꦪꦺꦴꦲꦤꦼꦱ꧀꧈​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦢꦢꦶ​ꦠꦼꦩ꧀ꦧꦸꦁ​ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀꧈​ꦢꦺꦏ꧀ꦤꦺꦮꦶꦱ꧀ꦲꦺꦤꦺꦁꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​꧉​ꦤꦁꦔꦶꦁ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦚꦮꦁ​ꦭꦤ꧀​ꦤ꧀ꦢꦼꦩꦺꦏ꧀ꦢꦺꦏ꧀ꦤꦺ꧉​ ²ꦠꦼꦩ꧀ꦧꦸꦁ​ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦲꦶꦏꦶ​ꦩꦼꦢꦸꦤ꧀ꦲꦶꦁ​ꦢꦺꦴꦚ​ꦫꦸꦥ​ꦩꦤꦸꦁꦱ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦢꦢꦶ​ꦫꦱꦸꦭ꧀ꦮꦶꦱ꧀ꦥꦢ​ꦮꦼꦫꦸꦃ​ꦢꦺꦏ꧀ꦤꦺꦭꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦢꦺꦏ꧀ꦤꦺꦱꦏ꧀ꦧꦼꦤꦼꦂꦫꦺ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦔꦧꦂꦫꦏꦺꦧꦧ꧀ꦢꦺꦏ꧀ꦤꦺ꧈​ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦩꦤꦸꦁꦱ​꧉​ꦩꦲꦸꦤꦺ​ꦢꦺꦏ꧀ꦤꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦮꦶꦱ꧀ꦢꦶꦏꦺꦠꦺꦴꦏ꧀ꦏꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦢꦢꦶ​ꦫꦱꦸꦭ꧀꧈​ ³ꦲꦏꦸ​ꦩꦲꦸ​ꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦢꦢꦶ​ꦫꦱꦸꦭ꧀ꦮꦶꦱ꧀ꦮꦼꦫꦸꦃ​ꦭꦤ꧀ꦏꦿꦸꦔꦸ​ꦏꦿꦶꦱ꧀ꦡꦸꦱ꧀ ꦪ​ꦢꦺꦏ꧀ꦤꦺꦱꦶꦁ​ꦢꦶꦏꦧꦂꦫꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦱꦸꦥꦪ​ꦏꦺꦴꦮꦺ​ꦲꦸꦒ​ꦧꦶꦱ​ꦧꦉꦁ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁴ꦩꦸꦭꦤꦺ​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦩꦺꦭꦸ​ꦧꦸꦔꦃ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦲꦶꦏꦸ​ꦱꦶꦁ​ꦩꦫꦏ꧀ꦏꦏꦺꦏꦧꦸꦔꦃꦲꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦱꦩ꧀ꦥꦸꦂꦤ​꧉​

꧋ꦩ꧀ꦭꦏꦸ​ꦲꦶꦁ​ꦥꦼꦥꦢꦁ꧉​

⁵꧋ꦥꦫ​ꦱꦼꦢꦸꦭꦸꦂ​꧈​ꦏꦧꦂ​ꦱꦶꦁ​ꦢꦶꦮꦸꦭꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦱꦶꦁ​ꦲꦸꦒ​ꦢꦶꦮꦸꦭꦁꦔꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦏꦺꦴꦮꦺ​ꦲꦸꦤꦶꦤꦺ​ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦸ​ꦥꦼꦥꦢꦁꦭꦤ꧀ꦲꦺꦴꦫ​ꦲꦺꦤꦺꦁꦥꦼꦥꦼꦠꦼꦁꦔꦺ​ꦧ꧀ꦭꦱ꧀꧈​” ⁶ꦢꦢꦶꦤꦺ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦸꦤꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦶꦗꦶꦏ꧀ꦲꦸꦫꦶꦥ꧀ꦲꦶꦁ​ꦢꦺꦴꦱ​꧈​ꦲꦮꦏ꧀ꦏꦺ​ꦢꦺꦮꦺꦒꦺꦴꦫꦺꦴꦃ​ꦭꦤ꧀ꦲꦺꦴꦫ​ꦲꦸꦫꦶꦥ꧀ꦤꦸꦫꦸꦠ꧀ꦱꦶꦁ​ꦧꦼꦤꦼꦂ​꧉​ ⁷ꦤꦁꦔꦶꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩ꧀ꦭꦏꦸ​ꦲꦶꦁ​ꦥꦼꦥꦢꦁ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦥꦼꦥꦢꦁ꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦧꦼꦧꦉꦁꦔꦤ꧀ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ꦠꦼꦒꦼꦱ꧀ꦱꦺ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦤꦼꦂ​꧈​ꦲꦮꦏ꧀ꦏꦺ​ꦢꦺꦮꦺꦤꦶꦫꦸ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦥꦠꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦔꦽꦱꦶꦏ꧀ꦏꦶ​ꦱꦏ꧀ꦏꦺꦃꦲꦺꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

⁸꧋ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦁꦒꦼꦥ꧀ꦲꦺꦴꦫ​ꦤ꧀ꦢꦸꦮꦺꦢꦺꦴꦱ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦔꦥꦸꦱ꧀ꦱꦶ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦺꦴꦫ​ꦤꦸꦫꦸꦠ꧀ꦱꦏ꧀ꦧꦼꦤꦼꦂꦫꦺ​꧉​ ⁹ꦤꦁꦔꦶꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦺꦴꦤ꧀ꦤꦶ​ꦱꦭꦃꦲꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦔꦥꦸꦫ​ꦭꦤ꧀ꦔꦽꦱꦶꦏ꧀ꦏꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦏ꧀ꦲꦺꦤꦺꦁꦔꦺꦢꦺꦴꦱ​꧉​ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦤꦺꦁꦢꦶꦥꦽꦕꦪ​ꦭꦤ꧀ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧉​ ¹⁰ꦩꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦸꦤꦺ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧈​ꦲꦮꦏ꧀ꦏꦺ​ꦢꦺꦮꦺꦱꦏ꧀ꦗꦤꦺꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦒꦺꦴꦫꦺꦴꦃ​꧉​ꦠꦶꦧꦏꦺ​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦤꦸꦫꦸꦠ꧀ꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

↑ ↑ ↑

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦮꦏ꧀ꦏꦺ​ꦢꦺꦮꦺ꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂꦏꦸ​ꦱꦶꦁ​ꦠꦏ꧀ꦲꦏꦸ​ꦲꦤꦏ꧀ ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦲꦺꦴꦫ​ꦲꦸꦫꦶꦥ꧀ꦲꦶꦁ​ꦢꦺꦴꦱ​꧉​ꦤꦁꦔꦶꦁ​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦔ꧀ꦒꦮꦺ​ꦢꦺꦴꦱ​꧈​ꦔꦼꦂꦠꦶꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦥꦸꦫ​ꦏꦺꦴꦮꦺ​꧈​ꦲꦮꦶꦠ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦮꦏ꧀ꦏꦺ​ꦢꦺꦮꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ꦮꦺꦴꦁ​ꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦒꦼꦢꦺꦏꦧꦼꦤꦼꦂꦫꦤ꧀ꦤꦺ​꧉​ ²ꦪ​ꦢꦺꦏ꧀ꦤꦺꦱꦶꦁ​ꦩꦠꦶ​ꦚꦁꦒ​ꦱꦼꦠꦿꦥꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦥꦔꦥꦸꦫ​꧉​ꦥꦠꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦢꦢꦶ​ꦥꦔꦥꦸꦫꦤꦺ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦮꦲꦺ​꧈​ꦲꦺꦴꦫ​꧈​ꦤꦁꦔꦶꦁ​ꦲꦸꦒ​ꦢꦺꦴꦱꦤꦺ​ꦮꦺꦴꦁ​ꦏꦧꦺꦃ​꧉​

꧋ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

³꧋ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​?ꦧꦶꦱꦤꦺ​ꦔꦼꦂꦠꦶ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁴ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦤꦺꦏ꧀ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦲꦺꦴꦫ​ꦩꦤꦸꦠ꧀ꦥꦶꦠꦸꦠꦸꦂꦫꦺ​꧈​ꦮꦺꦴꦁ​ꦏꦸꦮꦶ​ꦒꦺꦴꦫꦺꦴꦃ​ꦭꦤ꧀ꦲꦺꦴꦫ​ꦔꦼꦂꦠꦶ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ⁵ꦤꦁꦔꦶꦁ​ꦮꦺꦴꦁ​ꦱꦶꦁ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦔꦼꦂꦠꦶ​ꦤꦺꦏ꧀ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦱꦥ​ꦱꦶꦁ​ꦔꦏꦸ​ꦤꦺꦏ꧀ꦲꦸꦫꦶꦥ꧀ꦥꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦸꦫꦶꦥ꧀ꦥꦺꦪ​ꦏꦸꦢꦸ​ꦏꦪ​ꦏꦿꦶꦱ꧀ꦡꦸꦱ꧀꧈​

꧋ꦱꦼꦢꦸꦭꦸꦂꦫꦤ꧀ꦲꦶꦁ​ꦏꦠꦿꦺꦱ꧀ꦤꦤ꧀꧈​

⁷꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦤꦁꦭꦪꦁ​ꦲꦶꦏꦶ​ꦲꦺꦴꦫ​ꦥꦽꦏꦫ​ꦱꦶꦁ​ꦲꦚꦂ​꧈​ꦲꦺꦴꦫ​꧈​ꦲꦶꦏꦶ​ꦲꦁꦒꦼꦂꦫꦁꦒꦼꦂ​ꦱꦶꦁ​ꦭꦮꦱ꧀;ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦧꦧ꧀ꦲꦶꦏꦶ​ꦏꦮꦶꦠ꧀ꦏꦺꦴꦮꦺ​ꦩꦺꦴꦭꦃꦲꦶꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦪ​ꦥꦶꦠꦸꦠꦸꦂ​ꦲꦶꦏꦶ​ꦱꦶꦁ​ꦢꦶꦮꦸꦭꦁꦔꦏꦺ꧉​ ⁸ꦤꦁꦔꦶꦁ​ꦱꦼꦤꦗꦤ꧀ꦤ​ꦭꦮꦱ꧀ ꦲꦁꦒꦼꦂꦫꦁꦒꦼꦂ​ꦲꦶꦏꦶ​ꦲꦺꦤꦺꦁꦲꦚꦂꦫꦺ꧈​ꦲꦮꦶꦠ꧀ꦏꦺꦠꦺꦴꦏ꧀ꦲꦚꦂ​ꦲꦶꦁ​ꦲꦸꦫꦶꦥ꧀ꦥꦺꦏꦿꦶꦱ꧀ꦡꦸꦱ꧀ꦭꦤ꧀ꦲꦸꦒ​ꦲꦶꦁ​ꦲꦸꦫꦶꦥ꧀ꦩꦸ​꧉​ꦮꦸꦗꦸꦠ꧀ꦠꦺ꧈​ꦲꦭ​ꦱꦶꦁ​ꦏꦪ​ꦥꦼꦥꦼꦠꦼꦁ​ꦮꦶꦱ꧀ꦭꦸꦔ​ꦱꦁꦏꦲꦸꦫꦶꦥ꧀ꦩꦸ​ꦭꦤ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦼꦤꦼꦂ​ꦮꦶꦱ꧀ꦠꦼꦏ​꧈​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦥꦼꦥꦢꦁ꧉​

⁹꧋ꦢꦢꦶꦤꦺ​꧈​ꦱꦥ​ꦱꦶꦁ​ꦔꦏꦸꦤꦺ​ꦩ꧀ꦭꦏꦸ​ꦲꦶꦁ​ꦥꦼꦥꦢꦁ꧈​ꦤꦁꦔꦶꦁ​ꦱꦼꦔꦶꦠ꧀ꦩꦫꦁ​ꦱꦼꦢꦸꦭꦸꦂꦫꦺ​꧈​ꦮꦺꦴꦁ​ꦏꦸꦮꦶ​ꦱꦏ꧀ꦧꦼꦤꦼꦂꦫꦺ​ꦲꦶꦗꦶꦏ꧀​ꦩ꧀ꦭꦏꦸ​ꦲꦶꦁ​ꦥꦼꦥꦼꦠꦼꦁ​ꦠꦼꦏꦤ꧀ꦱꦼꦥꦿꦺꦤꦺ​꧉​ ¹⁰ꦮꦺꦴꦁ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦱꦼꦢꦸꦭꦸꦂꦫꦺ​꧈​ꦏꦸꦮꦶ​ꦱꦶꦁ​ꦩ꧀ꦭꦏꦸ​ꦲꦶꦁ​ꦥꦼꦥꦢꦁꦭꦤ꧀ꦲꦺꦴꦫ​ꦲꦺꦤꦺꦁꦥꦽꦏꦫ​ꦱꦶꦁ​ꦧꦏꦭ꧀ꦤꦶꦧꦏ꧀ꦏꦏꦺꦢꦺꦏ꧀ꦤꦺ꧉​ ¹¹ꦤꦁꦔꦶꦁ​ꦮꦺꦴꦁ​ꦱꦶꦁ​ꦱꦼꦔꦶꦠ꧀ꦩꦫꦁ​ꦱꦼꦢꦸꦭꦸꦂꦫꦺ​꧈​ꦮꦺꦴꦁ​ꦏꦸꦮꦶ​ꦲꦸꦫꦶꦥ꧀ꦥꦺꦲꦶꦁ​ꦥꦼꦥꦼꦠꦼꦁ​ꦭꦤ꧀ꦪ​ꦩ꧀ꦭꦏꦸ​ꦲꦶꦁ​ꦥꦼꦥꦼꦠꦼꦁ​꧉​ꦮꦺꦴꦁꦔꦺ​ꦲꦺꦴꦫ​ꦔꦼꦂꦠꦶ​ꦤꦁꦲꦼꦤ꧀ꦢꦶ​ꦥꦫꦤ꧀ꦤꦺ​꧈​ꦲꦮꦶꦠ꧀ꦥꦼꦥꦼꦠꦼꦁ​ꦏꦸꦮꦶ​ꦩꦫꦏ꧀ꦏꦏꦺꦮꦺꦴꦁꦔꦺ​ꦲꦺꦴꦫ​ꦮꦼꦫꦸꦃ​ꦢꦭꦤ꧀꧈​

꧋ꦲꦗ​ꦤ꧀ꦢꦸꦮꦺꦤ꧀ꦤꦶ​ꦱꦼꦤꦼꦁ​ꦩꦫꦁ​ꦏꦢꦺꦴꦚꦃꦲꦤ꧀꧈​

¹²꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦲꦏꦸ​ꦲꦤꦏ꧀ꦲꦤꦏ꧀ꦏꦸ​꧈​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦥꦸꦫ​ꦢꦺꦴꦱꦩꦸ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ ¹³ꦥꦫ​ꦧꦥ​꧈​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦏꦼꦤꦭ꧀ꦩꦫꦁ​ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦲꦺꦤꦺꦁꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​꧉​ꦥꦫ​ꦱꦼꦢꦸꦭꦸꦂ​ꦱꦶꦁ​ꦲꦼꦤꦺꦴꦩ꧀ ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦩꦼꦤꦁꦔꦏꦺꦱꦺꦠꦤ꧀꧈​

¹⁴꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦲꦏꦸ​ꦲꦤꦏ꧀ꦲꦤꦏ꧀ꦏꦸ​꧈​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​:ꦏꦺꦴꦮꦺ​ꦔꦼꦂꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ꦭꦤ꧀ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦸꦮ​꧈​ꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦧꦥꦏ꧀ ꦠꦏ꧀ꦧꦭꦺꦤ꧀ꦤꦶꦱꦼꦥꦶꦱ꧀ꦱꦤ꧀ꦩꦼꦤꦺꦃ​꧈​ꦏꦺꦴꦮꦺ​ꦮꦶꦱ꧀ꦥꦢ​ꦏꦼꦤꦭ꧀ꦩꦫꦁ​ꦏꦿꦶꦱ꧀ꦡꦸꦱ꧀ꦱꦶꦁ​ꦮꦶꦱ꧀ꦲꦺꦤꦺꦁꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​꧉​ꦭꦤ꧀ꦏꦺꦴꦮꦺ​ꦱꦶꦁ​ꦲꦼꦤꦺꦴꦩ꧀ ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦥꦢ​ꦏꦸꦮꦠ꧀꧈​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦮꦶꦱ꧀ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​ꦠꦼꦤꦤ꧀ꦭꦤ꧀ꦏꦺꦴꦮꦺ​ꦪ​ꦮꦶꦱ꧀ꦔꦭꦃꦲꦏꦺꦱꦺꦠꦤ꧀꧈​

¹⁵꧋ꦲꦗ​ꦥꦢ​ꦠꦿꦺꦱ꧀ꦤꦩꦫꦁ​ꦏꦢꦺꦴꦚꦃꦲꦤ꧀ꦭꦤ꧀ꦱꦼꦩ꧀ꦧꦫꦁ​ꦲꦶꦁ​ꦢꦺꦴꦚ​꧉​ꦲꦮꦶꦠ꧀ꦱꦥ​ꦱꦶꦁ​ꦠꦿꦺꦱ꧀ꦤꦩꦫꦁ​ꦲꦭ​ꦲꦶꦁ​ꦢꦺꦴꦚ​ꦲꦶꦏꦶ​ꦲꦺꦴꦫ​ꦧꦶꦱ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ ¹⁶ꦱꦼꦩ꧀ꦧꦫꦁ​ꦲꦶꦁ​ꦢꦺꦴꦚ​ꦏꦺꦤꦺ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦮꦺꦴꦁ​ꦢꦺꦴꦱ​꧈​ꦱꦼꦩ꧀ꦧꦫꦁ​ꦱꦶꦁ​ꦢꦶꦏꦼꦥꦺꦔꦶꦤ꧀ꦤꦶꦏꦫꦺꦴ​ꦩꦿꦶꦥꦠ꧀ꦭꦤ꧀ꦱꦶꦁ​ꦢꦶꦲꦼꦁꦒꦺꦴ​ꦥꦩꦺꦂꦫꦤ꧀ ꦏꦸꦮꦶ​ꦏꦧꦺꦃ​ꦠꦼꦏꦤꦺ​ꦲꦺꦴꦫ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦱꦁꦏꦏꦢꦺꦴꦚꦃꦲꦤ꧀꧈​ ¹⁷ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦢꦺꦴꦚ​ꦭꦤ꧀ꦏꦼꦱꦼꦤꦼꦔꦤ꧀ꦤꦺꦏꦧꦺꦃ​ꦧꦏꦭ꧀ꦲꦶꦭꦁ​꧉​ꦤꦁꦔꦶꦁ​ꦱꦥ​ꦱꦶꦁ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

꧋ꦧꦧ꧀ꦲꦤ꧀ꦠꦶꦏꦿꦶꦱ꧀ꦡꦸꦱ꧀꧈​

¹⁸꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦲꦏꦸ​ꦲꦤꦏ꧀ꦲꦤꦏ꧀ꦏꦸ​꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦲꦶꦏꦶ​ꦮꦶꦱ꧀ꦕꦼꦢꦼꦏ꧀​꧉​ꦭꦤ꧀ꦏꦪ​ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧈​ꦲꦤ꧀ꦠꦶꦏꦿꦶꦱ꧀ꦡꦸꦱ꧀ꦧꦏꦭ꧀ꦠꦼꦏ​꧉​ꦱꦲꦶꦏꦶ​ꦮꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦏꦪ​ꦲꦤ꧀ꦠꦶꦏꦿꦶꦱ꧀ꦡꦸꦱ꧀ ꦱꦶꦁ​ꦥꦢ​ꦔ꧀ꦭꦮꦤ꧀ꦏꦿꦶꦱ꧀ꦡꦸꦱ꧀ ꦪ​ꦮꦶꦱ꧀ꦥꦢ​ꦚ꧀ꦗꦼꦢꦸꦭ꧀꧈​ꦲꦶꦏꦶ​ꦠꦤ꧀ꦢꦤꦺꦤꦺꦏ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦮꦶꦱ꧀ꦕꦼꦢꦼꦏ꧀​ꦠꦼꦤꦤ꧀꧈​ ¹⁹ꦥꦫ​ꦲꦤ꧀ꦠꦶꦏꦿꦶꦱ꧀ꦡꦸꦱ꧀ꦏꦸꦮꦶ​ꦩꦲꦸꦤꦺ​ꦧꦼꦧꦉꦁꦔꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦠꦼꦫꦸꦱ꧀ꦥꦢ​ꦭꦸꦔ​꧉​ꦱꦼꦤꦗꦤ꧀ꦩꦲꦸꦤꦺ​ ꦧꦼꦧꦉꦁꦔꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦱꦼꦩꦸꦁꦒꦺꦴꦤ꧀ꦤꦺꦠꦸꦁꦒꦭ꧀ꦭꦺ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦔꦺꦴꦤꦺꦴ​꧈​ꦩꦼꦱ꧀ꦠꦶꦪ​ꦲꦶꦗꦶꦏ꧀ꦧꦼꦧꦉꦁꦔꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤꦶꦁꦒꦭ꧀ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦏꦼꦠꦫ​ꦤꦺꦏ꧀ꦱꦶꦗꦶ​ꦮꦲꦺ​ꦲꦺꦴꦫ​ꦠꦸꦁꦒꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺ꧉​

²⁰꧋ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧉​ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦤꦩ꧀ꦥ​ꦫꦺꦴꦃ​ꦱꦸꦕꦶ​ꦥꦮꦺꦃꦲꦺ​ꦏꦿꦶꦱ꧀ꦡꦸꦱ꧀꧈​ꦩꦸꦭꦤꦺ​ꦏꦺꦴꦮꦺ​ꦪ​ꦥꦢ​ꦔꦼꦂꦠꦶ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ²¹ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦲꦺꦴꦫ​ꦗꦭꦂꦫꦤ꧀ꦲꦏꦸ​ꦩꦶꦏꦶꦂ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧈​ꦲꦺꦴꦫ​꧉​ꦲꦏꦸ​ꦤꦸꦭꦶꦱ꧀ꦱꦶ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦔꦼꦂꦠꦶ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦤꦺꦏ꧀ꦧꦫꦁ​ꦒꦺꦴꦫꦺꦴꦃ​ꦏꦸꦮꦶ​ꦠꦼꦏꦤꦺ​ꦲꦺꦴꦫ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

²²꧋ꦱꦥ​ꦠ​ꦱꦶꦁ​ꦠꦸꦏꦁ​ꦒꦺꦴꦫꦺꦴꦃ​ꦏꦸꦮꦶ​?ꦏꦸꦮꦶ​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦸꦢꦸ​ꦏꦿꦶꦱ꧀ꦡꦸꦱ꧀ ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦁꦔꦶ​ꦩꦤꦸꦁꦱ​ꦱꦶꦁ​ꦢꦺꦴꦱ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦢꦶꦲꦫꦤ꧀ꦤꦶ​ꦲꦤ꧀ꦠꦶꦏꦿꦶꦱ꧀ꦡꦸꦱ꧀ ꦱꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​꧉​ ²³ꦱꦥ​ꦱꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ꦤꦁꦔꦶꦁ​ꦱꦥ​ꦱꦶꦁ​ꦤꦩ꧀ꦥ​ꦒꦸꦱ꧀ꦠꦶ​ꦪꦺꦯꦸꦱ꧀ ꦮꦺꦴꦁ​ꦏꦸꦮꦶ​ꦢꦢꦶ​ꦱꦶꦗꦶ​ꦲꦸꦒ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​

²⁴꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦱꦶꦩ꧀ꦥꦼꦤ꧀ꦲꦶꦁ​ꦲꦠꦶꦩꦸ​꧉​ꦤꦺꦏ꧀ꦥꦶꦠꦸꦠꦸꦂ​ꦏꦸꦮꦶ​ꦲꦩ꧀ꦧꦺꦴꦏ꧀ꦱꦶꦩ꧀ꦥꦼꦤ꧀ꦠꦼꦤꦤ꧀ꦲꦶꦁ​ꦲꦠꦶꦩꦸ​꧈​ꦏꦺꦴꦮꦺ​ꦧꦏꦭ꧀ꦏꦼꦚ꧀ꦕꦼꦁ​ꦠꦼꦫꦸꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦸꦒ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ ²⁵ꦩꦼꦁꦏꦺꦴꦤꦺꦴ​ꦏꦸꦮꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ ꦪꦏꦸꦮꦶ​꧈​ꦲꦸꦫꦶꦥ꧀ꦭꦁꦒꦼꦁ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

²⁶꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​꧈​ꦱꦸꦥꦪ​ꦏꦺꦴꦮꦺ​ꦥꦢ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦚꦤ꧀ꦢꦶꦁꦏꦺꦴꦮꦺ​ꦏꦫꦺꦴ​ꦥꦶꦮꦸꦭꦁꦔꦺ​꧉​ ²⁷ꦤꦁꦔꦶꦁ​ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦔꦼꦢꦸꦤ꧀ꦤꦏꦺꦫꦺꦴꦃ​ꦱꦸꦕꦶ​ꦩꦫꦁ​ꦏꦺꦴꦮꦺ​ꦭꦤ꧀ꦪ​ꦫꦺꦴꦃ​ꦱꦸꦕꦶ​ꦲꦶꦏꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧉​ꦢꦢꦶꦤꦺ​ꦏꦺꦴꦮꦺ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦢꦺꦮꦺꦱꦶꦁ​ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦲꦥ​ꦮꦲꦺ​꧉​ꦥꦶꦮꦸꦭꦁꦔꦺ​ꦫꦺꦴꦃ​ꦱꦸꦕꦶ​ꦚꦠ​꧈​ꦲꦺꦴꦫ​ꦒꦺꦴꦫꦺꦴꦃ​꧈​ꦩꦸꦭꦤꦺ​꧈​ꦥꦢ​ꦩꦤ꧀ꦠꦼꦥ꧀ꦥ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦏꦪ​ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧉​

꧋ꦱꦥ​ꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁸꧋ꦲꦤꦏ꧀ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦥꦢ​ꦢꦢꦶꦪ​ꦱꦶꦗꦶ​ꦠꦼꦫꦸꦱ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦢꦺꦏ꧀ꦤꦺꦠꦼꦏ​꧈​ꦲꦮꦏ꧀ꦏꦺ​ꦢꦺꦮꦺꦮꦤꦶ​ꦩꦫ​ꦠꦤ꧀ꦥ​ꦮꦼꦢꦶ​꧈​ꦲꦺꦴꦫ​ꦲꦶꦱꦶꦤ꧀ꦩꦼꦠꦸꦮꦢꦺꦏ꧀ꦤꦺ꧉​ ²⁹ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ꧈​ꦢꦢꦶꦤꦺ​ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦤꦺꦁꦢꦶꦲꦫꦤ꧀ꦤꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

 

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦢꦺꦮꦺ!ꦥꦚ꧀ꦕꦺꦤ꧀ꦒꦼꦢꦺꦠꦼꦤꦤ꧀ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦭꦃ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦢꦶꦲꦫꦤ꧀ꦤꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦏ꧀ꦏꦺ​ꦢꦺꦮꦺꦪ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​ꦤꦁꦔꦶꦁ​ꦮꦺꦴꦁ​ꦗꦒꦠ꧀ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦪ​ꦲꦺꦴꦫ​ꦢꦸꦤꦸꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦥꦫ​ꦱꦼꦢꦸꦭꦸꦂꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦮꦏ꧀ꦏꦺ​ꦢꦺꦮꦺꦥꦢ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦩ꧀ꦧꦺꦱꦸꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦼꦩ꧀ꦧꦸꦃ​ꦏꦪ​ꦔꦥ​꧈​ꦲꦮꦏ꧀ꦏꦺ​ꦢꦺꦮꦺꦢꦸꦫꦸꦁ​ꦔꦼꦂꦠꦶ​꧉​ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦮꦼꦫꦸꦃ​ꦏꦿꦶꦱ꧀ꦡꦸꦱ꧀ ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦠꦼꦏ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦢꦢꦶ​ꦏꦪ​ꦢꦺꦏ꧀ꦤꦺ꧉​ ³ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦥꦼꦔꦉꦥ꧀ꦲꦉꦥ꧀ꦲꦶꦏꦶ​꧈​ꦏꦺꦴꦮꦺ​ꦪ​ꦏꦸꦢꦸ​ꦲꦸꦫꦶꦥ꧀ꦱꦶꦁ​ꦉꦱꦶꦏ꧀ꦱꦁꦏꦢꦺꦴꦱ​꧈​ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦪ​ꦉꦱꦶꦏ꧀꧈​

⁴꧋ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦢꦺꦴꦱ​ꦏꦸꦮꦶ​ꦤꦼꦫꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦴꦱ​ꦏꦸꦮꦶ​ꦥꦤꦼꦫꦏ꧀ꦏꦺ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ꦲꦶꦁ​ꦢꦺꦴꦚ​ꦏꦺꦤꦺ​ꦠꦸꦗꦸꦮꦤ꧀ꦤꦺꦲꦩ꧀ꦧꦸꦮꦁ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦢꦺꦮꦺꦲꦺꦴꦫ​ꦠꦲꦸ​ꦔ꧀ꦒꦮꦺ​ꦢꦺꦴꦱ​꧉​ ⁶ꦩꦸꦭꦤꦺ​ꦪ​ꦕꦼꦠ​ꦧꦔꦼꦠ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦏꦼꦤꦺꦁꦲꦸꦫꦶꦥ꧀ꦲꦶꦁ​ꦢꦺꦴꦱ​꧉​ꦢꦢꦶꦤꦺ​꧈​ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦲꦶꦁ​ꦢꦺꦴꦱ​ꦏꦸꦮꦶ​ꦲꦺꦴꦫ​ꦢꦸꦤꦸꦁꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦥ​꧉​ ꦱꦏ꧀ꦧꦼꦤꦼꦂꦫꦺ​ꦮꦺꦴꦁ​ꦏꦸꦮꦶ​ꦲꦺꦴꦫ​ꦏꦼꦤꦭ꧀​ꦧ꧀ꦭꦱ꧀ꦩꦫꦁ​ꦏꦿꦶꦱ꧀ꦡꦸꦱ꧀꧈​

⁷꧋ꦲꦤꦏ꧀ꦲꦤꦏ꧀ꦏꦸ​꧈​ꦥꦢ​ꦱꦶꦁ​ꦲꦠꦶꦲꦠꦶ꧈​ꦲꦗ​ꦱꦩ꧀ꦥꦺꦏ꧀ꦏꦼꦤꦺꦁꦢꦶꦱꦱꦂꦫꦏꦺꦏꦫꦺꦴ​ꦱꦥ​ꦮꦲꦺ​꧉​ꦮꦺꦴꦁ​ꦱꦶꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪ​ꦮꦺꦴꦁ​ꦏꦸꦮꦶ​ꦱꦶꦁ​ꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪꦢꦺꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦤꦁꦔꦶꦁ​ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦲꦶꦁ​ꦢꦺꦴꦱ​ꦏꦸꦮꦶ​ꦲꦤꦏ꧀ꦏꦺ​ꦱꦺꦠꦤ꧀ ꦲꦮꦶꦠ꧀ꦱꦺꦠꦤ꧀ꦏꦸꦮꦶ​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦔ꧀ꦒꦮꦺ​ꦢꦺꦴꦱ​ꦠꦼꦫꦸꦱ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦼꦂꦠꦶ​ꦲꦶꦏꦶ​:ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦏꦤꦺ​ꦤꦁꦗꦒꦠ꧀ꦠꦸꦗꦸꦮꦤ꧀ꦤꦺꦔꦿꦸꦱꦏ꧀ꦥꦼꦁꦒꦮꦺꦤꦺ​ꦱꦺꦠꦤ꧀꧈​

⁹꧋ꦱꦥ​ꦮꦲꦺ​ꦱꦶꦁ​ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏꦼꦤꦺꦁꦲꦸꦫꦶꦥ꧀ꦲꦶꦁ​ꦢꦺꦴꦱ​ꦠꦼꦫꦸꦱ꧀ ꦲꦮꦶꦠ꧀ꦮꦺꦴꦁꦔꦺ​ꦏꦁꦒꦺꦴꦤ꧀ꦤꦤ꧀ꦲꦸꦫꦶꦥ꧀ꦥꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁ​ꦏꦸꦮꦶ​ꦲꦺꦴꦫ​ꦧꦶꦱ​ꦲꦸꦫꦶꦥ꧀ꦲꦶꦁ​ꦢꦺꦴꦱ​ꦠꦼꦫꦸꦱ꧀ ꦲꦮꦶꦠ꧀ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁰ꦲꦥ​ꦧꦺꦢꦤꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦲꦤꦏ꧀ꦏꦺ​ꦱꦺꦠꦤ꧀?ꦮꦺꦴꦁ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦺꦴꦫ​ꦤꦿꦺꦱ꧀ꦤꦤ꧀ꦤꦶꦱꦼꦢꦸꦭꦸꦂꦫꦺ​꧈​ꦮꦺꦴꦁ​ꦏꦸꦮꦶ​ꦢꦸꦢꦸ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦏꦺꦴꦮꦺ​ꦮꦶꦱ꧀ꦢꦶꦮꦸꦭꦁꦔꦶꦤꦺꦏ꧀ꦏꦺꦴꦮꦺ​ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧉​ ¹²ꦲꦮꦏ꧀ꦏꦺꦢꦺꦮꦺꦲꦗꦏꦪꦏꦆꦤ꧀ ꦲꦤꦏ꧀ꦏꦺꦧꦥꦄꦢꦩ꧀꧈​ꦢꦺꦏ꧀ꦤꦺꦤꦸꦫꦸꦠ꧀ꦠꦶꦏꦼꦏꦉꦥ꧀ꦥꦤ꧀ꦤꦺꦱꦺꦠꦤ꧀ꦭꦤ꧀ꦩꦠꦺꦤ꧀ꦤꦶꦲꦢꦶꦏ꧀ꦏꦺ꧉​ꦏꦼꦤꦺꦁꦲꦥꦏꦆꦤ꧀ꦏꦺꦴꦏ꧀ꦩꦠꦺꦤ꧀ꦤꦶꦲꦢꦶꦏ꧀ꦏꦺ?ꦲꦮꦶꦠ꧀ꦢꦺꦏ꧀ꦤꦺꦱꦼꦔꦶꦠ꧀ꦩꦫꦁꦲꦢꦶꦏ꧀ꦏꦺ꧈​ꦗꦭꦂꦫꦤ꧀ꦲꦢꦶꦏ꧀ꦏꦺꦤꦸꦫꦸꦠ꧀ꦠꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉​ꦤꦁꦔꦶꦁꦏꦆꦤ꧀ꦢꦺꦮꦺꦤꦶꦤ꧀ꦢꦏ꧀ꦏꦏꦺꦱꦶꦁꦲꦭ꧉​

¹³꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦏꦒꦺꦠ꧀ꦤꦺꦏ꧀ꦮꦺꦴꦁ​ꦗꦒꦠ꧀ꦱꦼꦔꦶꦠ꧀ꦩꦫꦁ​ꦏꦺꦴꦮꦺ​꧉​ ¹⁴ꦱꦶꦁ​ꦥꦼꦤ꧀ꦠꦶꦁ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀​ꦤ꧀ꦢꦸꦮꦺꦲꦸꦫꦶꦥ꧀ꦭꦁꦒꦼꦁ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦧꦺꦴꦪꦺꦴꦁ​ꦱꦁꦏꦥꦔ꧀ꦮꦱꦤꦺ​ꦥꦠꦶ​꧉​ꦮꦸꦗꦸꦠ꧀ꦠꦺꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧉​ꦮꦺꦴꦁ​ꦱꦶꦁ​ꦲꦺꦴꦫ​ꦠꦿꦺꦱ꧀ꦤꦩꦫꦁ​ꦱꦼꦢꦸꦭꦸꦂꦫꦺ​ꦏꦸꦮꦶ​ꦲꦶꦗꦶꦏ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦥꦠꦶ​꧉​ ¹⁵ꦱꦥ​ꦱꦼꦔꦶꦠ꧀ꦩꦫꦁ​ꦱꦼꦢꦸꦭꦸꦂꦫꦺ​꧈​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁ​ꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁ​ꦱꦶꦁ​ꦠꦸꦏꦁ​ꦩꦠꦺꦤ꧀ꦤꦶ​ꦮꦺꦴꦁ​꧉​ꦭꦤ꧀ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦠꦸꦏꦁ​ꦩꦠꦺꦤ꧀ꦤꦶ​ꦮꦺꦴꦁ​ꦏꦸꦮꦶ​ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦭꦁꦒꦼꦁ​꧉​ꦢꦢꦶꦤꦺ​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦼꦔꦶꦠ꧀ꦩꦫꦁ​ꦠꦸꦁꦒꦭ꧀ꦱꦼꦢꦸꦭꦸꦂꦫꦺ​꧈​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁ​ꦏꦸꦮꦶ​ꦪ​ꦩꦠꦺꦤ꧀ꦤꦶ​ꦱꦼꦢꦸꦭꦸꦂꦫꦺ​ꦭꦤ꧀ꦮꦺꦴꦁꦔꦺ​ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦭꦁꦒꦼꦁ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦧꦶꦱꦤꦺ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦿꦺꦱ꧀ꦤꦩꦫꦁ​ꦲꦮꦏ꧀ꦏꦺ​ꦢꦺꦮꦺꦪꦏꦸꦮꦶ​꧈​ꦢꦺꦏ꧀ꦤꦺꦮꦶꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦏꦁꦒꦺꦴ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦤ꧀ꦢꦸꦮꦺꦏꦸꦮꦗꦶꦧ꧀ꦧꦤ꧀ꦲꦶꦏꦶ​ꦲꦸꦒ​꧈​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦱꦒꦸꦃ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦏꦁꦒꦺꦴ​ꦔ꧀ꦭꦧꦸꦃꦲꦶ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺ꧉​ ¹⁷ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦱꦩ꧀ꦥꦺꦲꦶꦁ​ꦱꦤ꧀ꦢꦁꦥꦔꦤ꧀ꦭꦤ꧀ꦮꦼꦫꦸꦃ​ꦱꦼꦢꦸꦭꦸꦂ​ꦭꦶꦪꦤꦺ​ꦏꦼꦏꦸꦫꦁꦔꦤ꧀ ꦤꦁꦔꦶꦁ​ꦲꦺꦴꦫ​ꦒꦼꦊꦩ꧀ꦤꦸꦭꦸꦁꦔꦶ​꧈​ꦏꦼꦥꦿꦶꦪꦺ​ꦱꦼꦢꦸꦭꦸꦂ​ꦏꦸꦮꦶ​ꦧꦶꦱ​ꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦲꦤꦏ꧀ꦲꦤꦏ꧀ꦏꦸ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦲꦗ​ꦤꦩꦸꦁ​ꦠꦿꦺꦱ꧀ꦤꦔꦁꦒꦺꦴ​ꦠꦼꦩ꧀ꦧꦸꦁ​꧈​ꦤꦁꦔꦶꦁ​ꦲ꦳ꦪꦸꦏ꧀ꦏꦠꦿꦺꦱ꧀ꦤꦤ꧀ꦢꦶꦏꦺꦠꦺꦴꦏ꧀ꦏꦏꦺꦭꦤ꧀ꦠꦂꦫꦤ꧀ꦠꦸꦭꦸꦁꦠꦶꦤꦸꦭꦸꦁ​꧉​

¹⁹꧋ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢꦔꦁꦒꦺꦴ​ꦕꦫ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦏꦺꦏ꧀ꦏꦶꦠꦤ꧀ꦢꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦢꦢꦶꦤꦺ​ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦏꦿꦱ​ꦠꦼꦤ꧀ꦠꦽꦩ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦤꦁꦔꦶꦁ​ꦱꦼꦤꦗꦤ꧀ꦲꦶꦁ​ꦲꦠꦶ​ꦫꦱꦤꦺ​ꦲꦺꦴꦫ​ꦏꦼꦥꦺꦤꦏ꧀ꦗꦭꦂꦫꦤ꧀ꦫꦸꦩꦁꦱ​ꦤ꧀ꦢꦸꦮꦺꦱꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦠꦼꦤ꧀ꦠꦽꦩ꧀ꦲꦠꦶꦤꦺ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦂꦠꦶ​ꦫꦱꦤꦺ​ꦲꦠꦶꦤꦺ​ꦭꦤ꧀ꦲꦔꦼꦤ꧀ꦤꦔꦼꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦏ꧀ꦏꦧꦺꦃꦲꦺ꧈​ꦩꦭꦃ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦮꦏ꧀ꦏꦺ​ꦢꦺꦮꦺ꧉​ ²¹ꦥꦫ​ꦱꦼꦢꦸꦭꦸꦂꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦤꦺꦏ꧀ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦫꦸꦩꦁꦱ​ꦤ꧀ꦢꦸꦮꦺꦱꦭꦃ​ꦲꦥꦲꦥ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦲꦸꦱꦃꦮꦼꦢꦶ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦤ꧀ꦢꦺꦴꦔ​꧉​ ²²ꦲꦥ​ꦥꦼꦚ꧀ꦗꦭꦸꦏꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦶꦤ꧀ꦢꦏ꧀ꦏꦏꦺꦲꦥ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦢꦺꦏ꧀ꦤꦺ꧉​ ²³ꦲꦥ​ꦠ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​?ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦶꦏꦶ​:ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦠꦿꦺꦱ꧀ꦤꦩꦫꦁ​ ꦱꦏ꧀ꦥꦢꦥꦢ꧈​ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦮꦶꦱ꧀ꦩꦿꦺꦤ꧀ꦠꦃ​ꦲꦮꦏ꧀ꦏꦺ​ꦢꦺꦮꦺꦔꦺꦴꦤꦺꦴ​꧉​ ²⁴ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀ꦚꦠ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦱꦶꦗꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ?ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦫꦺꦴꦃ​ꦱꦸꦕꦶ​ꦱꦲꦶꦏꦶ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

꧋ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦫꦺꦴꦃꦲꦺ​ꦲꦤ꧀ꦠꦶꦏꦿꦶꦱ꧀ꦡꦸꦱ꧀꧈​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗ​ꦒꦩ꧀ꦥꦁ​ꦥꦽꦕꦪ​ꦱꦧꦼꦤ꧀ꦮꦺꦴꦁ​ꦱꦶꦁ​ꦔꦏꦸꦤꦺ​ꦤ꧀ꦢꦸꦮꦺꦠꦼꦩ꧀ꦧꦸꦁ​ꦱꦁꦏꦫꦺꦴꦃ​ꦱꦸꦕꦶ​꧉​ꦢꦶꦠꦶꦠꦺꦤ꧀ꦤꦶ​ꦱꦶꦁ​ꦲꦥꦶꦏ꧀​ꦤ꧀ꦢꦶꦱꦶꦏ꧀ꦮꦺꦴꦁ​ꦏꦸꦮꦶ​ꦤ꧀ꦢꦸꦮꦺꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀ꦲꦥ​ꦲꦺꦴꦫ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦔꦺꦴꦤꦺꦴ​?ꦲꦮꦶꦠ꧀ꦲꦺꦤꦺꦁꦮꦺꦴꦁ​ꦔꦥꦸꦱ꧀ꦱꦶ​ꦲꦺꦴꦏꦺꦃꦥꦢ​ꦤ꧀​ꦢ꧀ꦭꦗꦃꦲꦶ​ꦗꦒꦠ꧀ ꦔꦏꦸꦤꦺ​ꦤꦧꦶꦤꦧꦶ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦭꦃ​ꦏꦼꦥꦿꦶꦪꦺ​ꦧꦶꦱꦤꦺ​ꦔꦼꦂꦠꦶ​ꦱꦥ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦲꦶꦏꦸ​ꦔꦺꦤꦺ​:ꦱꦥ​ꦱꦶꦁ​ꦔꦏꦺꦴꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦶꦏꦸ​ꦠꦼꦏ​ꦤꦁꦗꦒꦠ꧀ꦮꦸꦗꦸꦠ꧀ꦩꦤꦸꦁꦱ​꧈​ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³ꦤꦁꦔꦶꦁ​ꦱꦥ​ꦱꦶꦁ​ꦲꦺꦴꦫ​ꦒꦼꦊꦩ꧀ꦔꦏꦺꦴꦤ꧀ꦤꦶ​ꦏꦸꦮꦶ​ꦲꦺꦴꦫ​ꦤ꧀ꦢꦸꦮꦺꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁ​ꦏꦸꦮꦶ​ꦩꦭꦃ​ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦲꦤ꧀ꦠꦶꦏꦿꦶꦱ꧀ꦡꦸꦱ꧀ ꦩꦸꦁꦱꦸꦃꦲꦺ​ꦏꦿꦶꦱ꧀ꦡꦸꦱ꧀꧈​ꦏꦺꦴꦮꦺ​ꦮꦶꦱ꧀ꦏꦿꦸꦔꦸ​ꦤꦺꦏ꧀ꦫꦺꦴꦃ​ꦏꦸꦮꦶ​ꦧꦏꦭ꧀ꦠꦼꦏ​;ꦥꦚ꧀ꦕꦺꦤ꧀ꦪ​ꦮꦶꦱ꧀ꦠꦼꦏ​ꦠꦼꦤꦤ꧀ꦤꦁꦗꦒꦠ꧀ꦏꦺꦤꦺ​꧉​

⁴꧋ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦲꦸꦱꦃꦮꦼꦢꦶ​ꦲꦤꦏ꧀ꦲꦤꦏ꧀ꦏꦸ​!ꦏꦺꦴꦮꦺ​ꦏꦸꦮꦶ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦢꦶꦏꦭꦃꦲꦏꦺꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦶꦠ꧀ꦫꦺꦴꦃ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​ꦏꦸꦮꦶ​ꦒꦼꦢꦺꦏ꧀ꦮꦱꦤꦺ​꧈​ꦔꦸꦁꦏꦸꦭ꧀ꦭꦶ​ꦫꦺꦴꦃ​ꦱꦶꦁ​ꦲꦶꦁ​ꦲꦠꦶꦤꦺ​ꦮꦺꦴꦁꦮꦺꦴꦁ​ꦗꦒꦠ꧀ꦏꦸꦮꦶ​꧉​ ⁵ꦤꦧꦶꦤꦧꦶ​ꦥꦭ꧀ꦱꦸ​ꦏꦸꦮꦶ​ꦠꦸꦏꦸꦭ꧀ꦭꦺꦱꦁꦏꦗꦒꦠ꧀ ꦩꦸꦭꦤꦺ​ꦠꦼꦩ꧀ꦧꦸꦁꦔꦺ​ꦪ​ꦤꦩꦸꦁ​ꦥꦽꦏꦫꦥꦽꦏꦫ​ꦏꦢꦺꦴꦚꦃꦲꦤ꧀꧈​ꦩꦸꦭꦤꦺ​ꦮꦺꦴꦁ​ꦗꦒꦠ꧀ꦱꦼꦤꦼꦁ​ꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦺ​꧉​ ⁶ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦪ​ꦮꦺꦴꦁ​ꦱꦶꦁ​ꦔꦼꦂꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁ​ꦱꦶꦁ​ꦢꦸꦢꦸ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦏꦭ꧀ꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦲꦮꦏ꧀ꦏꦺ​ꦢꦺꦮꦺ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦶꦠꦺꦤ꧀ꦤꦶ​ꦱꦥ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔ꧀ꦒꦮ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦭꦤ꧀ꦱꦥ​ꦱꦶꦁ​ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃ​ꦱꦶꦁ​ꦔꦥꦸꦱ꧀ꦱꦶ​꧉​

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦮꦸꦗꦸꦠ꧀ꦏꦠꦿꦺꦱ꧀ꦤꦤ꧀꧈​

⁷꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲ꦳ꦪꦸꦏ꧀ꦠꦿꦺꦱ꧀ꦤꦠꦼꦫꦸꦱ꧀ꦩꦫꦁ​ꦱꦏ꧀ꦥꦢꦥꦢ꧈​ꦲꦮꦶꦠ꧀ꦏꦠꦿꦺꦱ꧀ꦤꦤ꧀ꦏꦸꦮꦶ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​꧈​ꦱꦼꦢꦸꦭꦸꦂ​ꦱꦶꦁ​ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦸꦮꦶ​ꦔꦼꦏꦺꦏ꧀ꦏꦶꦠꦤ꧀ꦢꦤꦺꦏ꧀ꦢꦺꦏ꧀ꦤꦺꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦔꦼꦂꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦤꦁꦔꦶꦁ​ꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦸꦮꦶ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦮꦸꦗꦸꦠ꧀ꦏꦠꦿꦺꦱ꧀ꦤꦤ꧀꧈​ ⁹ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦿꦺꦱ꧀ꦤꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦠꦤ꧀ꦢꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​:ꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦸꦁꦒꦭ꧀ꦭꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦠꦼꦏ​ꦤꦁꦗꦒꦠ꧀ꦏꦺꦤꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧈​ꦤꦺꦏ꧀ꦒꦼꦊꦩ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ¹⁰ꦲꦥ​ꦠ​ꦱꦶꦁ​ꦢꦶꦲꦫꦤ꧀ꦤꦶ​ꦏꦠꦿꦺꦱ꧀ꦤꦤ꧀ꦏꦸꦮꦶ​?ꦲꦺꦴꦫ​ꦏꦪ​ꦕꦫꦤꦺ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦤꦿꦺꦱ꧀ꦤꦤ꧀ꦤꦶꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧈​ꦤꦁꦔꦶꦁ​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺꦭꦤ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦠꦼꦏ​ꦤꦁꦗꦒꦠ꧀ꦢꦢꦶ​ꦏꦸꦂꦧꦤ꧀ꦤꦺ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦥꦔꦥꦸꦫ​꧉​

¹¹꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦔꦼꦂꦠꦶ​ꦱꦼꦩꦺꦴꦤꦺꦴ​ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧉​ ¹²(ꦲꦗ​ꦥꦢ​ꦔ꧀ꦒꦸꦒꦸ​꧈​ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦩꦺꦴꦁꦗꦫꦺꦤꦺ​ꦧꦶꦱ​ꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​꧉​)ꦲꦺꦴꦫ​ꦠꦲꦸ​ꦲꦺꦤꦺꦁꦮꦺꦴꦁ​ꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦺꦴꦤ꧀ꦤꦁꦠꦼꦔꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦿꦺꦱ꧀ꦤꦤ꧀ꦤꦶꦱꦏ꧀ꦥꦢꦥꦢ꧈​ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦺꦠꦺꦴꦏ꧀ꦱꦏ꧀ꦏꦧꦺꦃꦲꦺ꧉​꧌ꦭꦃ​ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦺꦠꦺꦴꦏ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​)

¹³꧋ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦩꦁꦒꦺꦴꦤ꧀ꦤꦁꦠꦼꦔꦃꦲꦺ​ ꦲꦮꦏ꧀ꦏꦺ​ꦢꦺꦮꦺ?ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦏꦸꦮꦶ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ ¹⁴ꦲꦏꦸꦢꦺꦮꦺꦮꦶꦱ꧀ꦮꦼꦫꦸꦃꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦱꦲꦶꦏꦶꦲꦏꦸꦔꦧꦂꦫꦏꦺꦩꦫꦁꦮꦺꦴꦁꦭꦶꦪꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦱꦶꦁꦔꦺꦴꦁꦏꦺꦴꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ꧈​ꦢꦢꦶꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧉​ ¹⁵ꦱꦥ​ꦱꦶꦁ​ꦔꦏꦺꦴꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀ꦏꦁꦒꦺꦴꦤ꧀ꦤꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁶ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦮꦏ꧀ꦏꦺ​ꦢꦺꦮꦺꦚ꧀ꦗꦒꦏ꧀ꦏꦏꦺꦏꦸꦮꦶ​꧉​

꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦮꦸꦗꦸꦠ꧀ꦏꦠꦿꦺꦱ꧀ꦤꦤ꧀꧈​ꦢꦢꦶꦤꦺ​ꦱꦼꦢꦸꦭꦸꦂ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦭꦶꦪꦤꦺ​ꦏꦸꦮꦶ​ꦪ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦪ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦱꦼꦢꦸꦭꦸꦂ​ꦏꦸꦮꦶ​꧉​ ¹⁷ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦶꦤ꧀ꦢꦏ꧀ꦏꦏꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧈​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦤꦁꦗꦒꦠ꧀ꦏꦺꦤꦺ​ꦧꦶꦱ​ꦏꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦤ꧀ꦢꦸꦮꦺꦮꦼꦢꦶ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦮꦼꦢꦶ​꧈​ꦲꦮꦶꦠ꧀ꦏꦠꦿꦺꦱ꧀ꦤꦤ꧀ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺꦏꦸꦮꦶ​ꦔꦶꦭꦁꦔꦏꦺꦫꦱ​ꦮꦼꦢꦶ​꧉​ꦮꦺꦴꦁ​ꦱꦶꦁ​ꦲꦶꦗꦶꦏ꧀​ꦤ꧀ꦢꦸꦮꦺꦫꦱ​ꦮꦼꦢꦶ​ꦏꦸꦮꦶ​ꦢꦸꦫꦸꦁ​ꦔꦿꦱꦏ꧀ꦏꦏꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧈​ꦲꦮꦶꦠ꧀ꦢꦺꦏ꧀ꦤꦺꦲꦶꦗꦶꦏ꧀​ꦤ꧀ꦢꦸꦮꦺꦮꦼꦢꦶ​ꦤꦺꦏ꧀ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀꧈​

¹⁹꧋ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦮꦺꦴꦁ​ꦭꦶꦪꦤꦺ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺꦤ꧀ꦢꦶꦱꦶꦏ꧀꧈​ ²⁰ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦏꦸꦤꦺ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦼꦔꦶꦠ꧀ꦩꦫꦁ​ꦱꦼꦢꦸꦭꦸꦂꦫꦺ​꧈​ꦮꦺꦴꦁ​ꦏꦸꦮꦶ​ꦠꦶꦧꦏꦺ​ꦒꦺꦴꦫꦺꦴꦃ​꧉​ꦭꦃ​ꦤꦺꦏ꧀ꦮꦺꦴꦁꦔꦺ​ꦲꦺꦴꦫ​ꦧꦶꦱ​ꦠꦿꦺꦱ꧀ꦤꦩꦫꦁ​ꦱꦼꦢꦸꦭꦸꦂꦫꦺ​ꦱꦶꦁ​ꦢꦺꦏ꧀ꦤꦺꦧꦶꦱ​ꦮꦼꦫꦸꦃ​꧈​ꦒꦺꦏ꧀ꦏꦼꦥꦿꦶꦪꦺ​ꦮꦺꦴꦁ​ꦏꦸꦮꦶ​ꦧꦶꦱ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦮꦼꦫꦸꦃ​꧉​ ²¹ꦲꦁꦒꦼꦂꦫꦁꦒꦼꦂꦫꦺꦒꦸꦱ꧀ꦠꦶꦄꦭ꧀ꦭꦃꦏꦁꦒꦺꦴꦲꦮꦏ꧀ꦏꦺꦢꦺꦮꦺꦲꦸꦤꦶꦤꦺꦔꦺꦤꦺꦥꦫꦱꦼꦢꦸꦭꦸꦂ:“ꦱꦥꦱꦶꦁꦠꦿꦺꦱ꧀ꦤꦩꦫꦁꦒꦸꦱ꧀ꦠꦶꦄꦭ꧀ꦭꦃꦏꦸꦢꦸꦠꦿꦺꦱ꧀ꦤꦩꦫꦁꦱꦼꦢꦸꦭꦸꦂꦫꦺ꧉​”

↑ ↑ ↑

꧋ꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦔꦏꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦏꦿꦶꦱ꧀ꦡꦸꦱ꧀ ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧈​ꦩꦼꦱ꧀ꦠꦶꦪ​ꦠꦿꦺꦱ꧀ꦤꦩꦫꦁ​ꦲꦤꦏ꧀ꦲꦤꦏ꧀ꦏꦺ​꧉​ ²ꦩꦸꦭꦤꦺ​꧈​ꦧꦶꦱꦤꦺ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦩꦫꦁ​ꦥꦫ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪꦏꦸꦮꦶ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦼꦠꦼꦥ꧀ꦥꦶ​ꦲꦁꦒꦼꦂꦫꦁꦒꦼꦂꦫꦺ​꧉​ ³ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦸꦤꦺ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦏꦸꦢꦸ​ꦤꦼꦠꦼꦥ꧀ꦥꦶ​ꦲꦁꦒꦼꦂꦫꦁꦒꦼꦂꦫꦺ​꧉​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦧꦺꦴꦠ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ⁴ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​꧈​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦱꦧꦼꦤ꧀ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏꦼꦏꦸꦮꦠ꧀ꦠꦤ꧀ꦩꦼꦤꦁꦔꦏꦺꦢꦺꦴꦚ​꧉​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦩꦼꦤꦁꦔꦏꦺꦢꦺꦴꦚ​ꦭꦤ꧀ꦠꦂꦫꦤ꧀ꦥꦼꦔꦤ꧀ꦢꦼꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ⁵ꦲꦮꦶꦠ꧀ ꦱꦥ​ꦠ​ꦱꦶꦁ​ꦧꦶꦱ​ꦩꦼꦤꦁꦔꦏꦺꦥꦔ꧀ꦮꦱꦤꦺ​ꦲꦭ​ꦤꦁꦗꦒꦠ꧀ꦏꦼꦗꦧ​ꦮꦺꦴꦁ​ꦱꦶꦁ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦥꦚ꧀ꦕꦺꦤ꧀ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦠꦼꦏ​ꦤꦁꦗꦒꦠ꧀ꦠꦼꦫꦸꦱ꧀ꦢꦶꦧꦥ꧀ꦠꦶꦱ꧀ꦏꦫꦺꦴ​ꦧꦚꦸ​ꦭꦤ꧀ꦒꦼꦠꦶꦃꦲꦺ​ꦠꦸꦩꦺꦠꦺꦱ꧀ꦢꦺꦴꦁꦔꦺꦢꦺꦏ꧀ꦤꦺꦢꦶꦥꦠꦺꦤ꧀ꦤꦶ​꧉​ꦢꦺꦏ꧀ꦤꦺꦲꦺꦴꦫ​ꦤꦩꦸꦁ​ꦢꦶꦧꦥ꧀ꦠꦶꦱ꧀ꦲꦶꦁ​ꦧꦚꦸ​꧈​ꦲꦺꦴꦫ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦸꦒ​ꦢꦶꦥꦠꦺꦤ꧀ꦤꦶ​꧉​ꦭꦤ꧀ꦫꦺꦴꦃ​ꦱꦸꦕꦶ​ꦢꦺꦮꦺꦱꦶꦁ​ꦢꦢꦶ​ꦱꦼꦏ꧀ꦱꦶ​ꦤꦺꦏ꧀ꦏꦸꦮꦶ​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦲꦺꦴꦫ​ꦒꦺꦴꦫꦺꦴꦃ​꧉​

^7-8꧋ꦢꦢꦶꦤꦺ​ꦲꦺꦤꦺꦁꦠꦤ꧀ꦢꦠꦼꦭꦸꦁ​ꦮꦼꦂꦤ​ꦱꦶꦁ​ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦤꦼꦠꦼꦥ꧀ꦥꦏꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦤꦏ꧀ꦏꦺ​꧈​ꦪꦏꦸꦮꦶ​:ꦢꦺꦴꦁꦔꦺꦫꦺꦴꦃ​ꦱꦸꦕꦶ​ꦩꦼꦢꦸꦤ꧀ꦫꦸꦥ​ꦩꦤꦸꦏ꧀ꦢꦫ​꧈​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦧꦥ꧀ꦠꦶꦱ꧀ꦲꦶꦁ​ꦧꦚꦸ​ꦭꦤ꧀ꦢꦺꦴꦁꦔꦺꦢꦺꦏ꧀ꦤꦺꦢꦶꦥꦠꦺꦤ꧀ꦤꦶ​ꦭꦤ꧀ꦒꦼꦠꦶꦃꦲꦺ​ꦠꦸꦩꦺꦠꦺꦱ꧀꧈​ꦠꦤ꧀ꦢꦏꦧꦺꦃ​ꦠꦼꦭꦸ​ꦲꦶꦏꦶ​ꦪ​ꦥꦚ꧀ꦕꦺꦤ꧀ꦕꦺꦴꦕꦺꦴꦏ꧀​ꦠꦼꦤꦤ꧀꧈​ ⁹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦠꦼꦩ꧀ꦧꦸꦁꦔꦺ​ꦩꦤꦸꦁꦱ​ꦮꦲꦺ​ꦲꦮꦏ꧀ꦏꦺ​ꦢꦺꦮꦺꦔꦤ꧀ꦢꦼꦭ꧀ ꦭꦃ​ꦠꦤ꧀ꦢꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦸꦢꦸ​ꦔꦤ꧀ꦢꦼꦭ꧀?ꦪꦏꦸꦮꦶ​ꦠꦤ꧀ꦢꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦤꦏ꧀ꦏꦺ​꧉​ ¹⁰ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦮꦶꦱ꧀ꦔꦼꦂꦠꦶ​ꦲꦸꦒ​ꦲꦶꦁ​ꦲꦠꦶꦤꦺ​ꦤꦺꦏ꧀ꦲꦶꦏꦶ​ꦠꦼꦤꦤ꧀꧈​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦤ꧀ꦢꦢꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦮꦺꦴꦁ​ꦒꦺꦴꦫꦺꦴꦃ​꧈​ꦲꦮꦶꦠ꧀ꦮꦺꦴꦁꦔꦺ​ꦲꦺꦴꦫ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦲꦤꦏ꧀ꦏꦺ​꧉​ ¹¹ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦲꦤꦏ꧀ꦏꦺ​ꦏꦸꦮꦶ​ꦕꦼꦏꦏ꧀ꦏꦺ​ꦔꦺꦤꦺ​:ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦸꦫꦶꦥ꧀ꦭꦁꦒꦼꦁ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦤꦩ꧀ꦥ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹²ꦠꦼꦒꦼꦱ꧀ꦱꦺ​꧈​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦮꦺꦴꦁ​ꦏꦸꦮꦶ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦭꦁꦒꦼꦁ​꧉​ꦮꦺꦴꦁ​ꦱꦶꦁ​ꦲꦺꦴꦫ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦤ꧀ꦢꦸꦮꦺꦲꦸꦫꦶꦥ꧀ꦭꦁꦒꦼꦁ​꧉​

꧋ꦧꦧ꧀ꦲꦸꦫꦶꦥ꧀ꦭꦁꦒꦼꦁ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦢ​ꦔꦼꦂꦠꦶ​ꦏꦧꦺꦃ​ꦤꦺꦏ꧀ꦏꦺꦴꦮꦺ​ꦮꦶꦱ꧀​ꦤ꧀ꦢꦸꦮꦺꦲꦸꦫꦶꦥ꧀ꦭꦁꦒꦼꦁ​꧉​ ¹⁴ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦮꦤꦶ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦏꦼꦤ꧀ꦢꦼꦭ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦔꦺꦴꦏ꧀ꦏꦏꦺꦥꦤ꧀ꦢꦺꦴꦔꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦗꦚ꧀ꦗꦶ​ꦥꦼꦚ꧀ꦗꦭꦸꦏꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦕꦺꦴꦕꦺꦴꦏ꧀​ꦏꦫꦺꦴ​ꦏꦼꦏꦉꦥ꧀ꦥꦤ꧀ꦤꦺ​꧉​ ¹⁵ꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦔꦺꦴꦏ꧀ꦏꦏꦺꦩꦫꦁ​ꦥꦼꦚ꧀ꦗꦭꦸꦏꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦥ​ꦮꦲꦺ​꧈​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦩ꧀ꦥ​ꦲꦥ​ꦱꦶꦁ​ꦢꦶꦗꦭꦸꦏ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

¹⁶꧋ꦩꦸꦭꦤꦺ​꧈​ꦤꦺꦏ꧀ꦏꦺꦴꦮꦺ​ꦮꦼꦫꦸꦃ​ꦱꦼꦢꦸꦭꦸꦂꦩꦸꦔ꧀ꦒꦮꦺ​ꦢꦺꦴꦱ​꧈​ꦤꦁꦔꦶꦁ​ꦢꦸꦢꦸ​ꦢꦺꦴꦱ​ꦥꦠꦶ​꧈​ꦱꦼꦢꦸꦭꦸꦂ​ꦏꦸꦮꦶ​ꦢꦶꦢꦺꦴꦔꦏ꧀ꦏꦏꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁ​ꦱꦼꦢꦸꦭꦸꦂ​ꦩꦲꦸ​꧉​ꦏꦸꦮꦶ​ꦏꦁꦒꦺꦴ​ꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦔ꧀ꦒꦮꦺ​ꦢꦺꦴꦱ​꧈​ꦤꦁꦔꦶꦁ​ꦢꦸꦢꦸ​ꦢꦺꦴꦱ​ꦥꦠꦶ​꧉​ꦲꦮꦶꦠ꧀ꦲꦸꦒ​ꦲꦺꦤꦺꦁꦢꦺꦴꦱ​ꦥꦠꦶ​꧉​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦏꦸꦮꦶ​ꦮꦶꦱ꧀ꦲꦺꦴꦫ​ꦲꦸꦱꦃꦲꦩ꧀ꦧꦺꦴꦏ꧀ꦢꦺꦴꦔꦏ꧀ꦏꦺ꧉​ ¹⁷ꦧꦼꦤꦼꦂ​꧈​ꦏꦧꦺꦃ​ꦲꦭ​ꦪ​ꦢꦺꦴꦱ​꧈​ꦤꦁꦔꦶꦁ​ꦲꦺꦴꦫ​ꦏꦧꦺꦃ​ꦢꦺꦴꦱ​ꦏꦸꦮꦶ​ꦢꦺꦴꦱ​ꦥꦠꦶ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦲꦸꦫꦶꦥ꧀ꦲꦶꦁ​ꦢꦺꦴꦱ​꧈​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦒꦼꦂꦫꦶ​ꦮꦺꦴꦁ​ꦏꦸꦮꦶ​꧉​ꦱꦺꦠꦤ꧀ꦲꦺꦴꦫ​ꦧꦶꦱ​ꦔ꧀ꦮꦱꦤꦶ​ꦢꦺꦏ꧀ꦤꦺ꧉​

¹⁹꧋ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦤꦗꦤ꧀ꦗꦒꦠ꧀ꦱꦏ꧀ꦏꦧꦺꦃꦲꦺꦮꦶꦱ꧀ꦢꦶꦏ꧀ꦮꦱꦤꦶ​ꦱꦺꦠꦤ꧀꧈​

²⁰꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦠꦼꦏ​ꦤꦁꦗꦒꦠ꧀ꦭꦤ꧀ꦮꦶꦱ꧀ꦔꦼꦏꦺꦏ꧀ꦏꦶꦏꦮꦼꦫꦸꦃꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦼꦗꦠꦶ​꧉​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦼꦗꦠꦶ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦲꦤꦏ꧀ꦏꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦺꦏ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦼꦗꦠꦶ​ꦭꦤ꧀ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​꧉​

²¹꧋ꦲꦤꦏ꧀ꦲꦤꦏ꧀ꦏꦸ꧈​ꦥꦢꦱꦶꦁꦲꦠꦶꦲꦠꦶꦭꦤ꧀ꦥꦢꦔꦼꦢꦺꦴꦃꦲꦶꦱꦏ꧀ꦮꦼꦂꦤꦤꦺꦧꦿꦲꦭ꧉​

ꦪꦺꦴꦲꦤꦼꦱ꧀

↑ ↑ ↑

← ꧇꧒꧇ꦦꦺꦠꦿꦸꦱ꧀

꧇꧒꧇ꦪꦺꦴꦲ꦳ꦤꦼꦱ꧀ →