ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧒꧇ꦦꦺꦠꦿꦸꦱ꧀

꧁꧋ꦭꦪꦁꦔꦺꦫꦱꦸꦭ꧀ꦦꦺꦠꦿꦸꦱ꧀꧈​꧂
ꦭꦪꦁꦤꦺꦴꦩꦼꦂꦭꦺꦴꦫꦺꦴ

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫꦱꦼꦢꦸꦭꦸꦂ꧈​ꦲꦶꦏꦶꦭꦪꦁꦱꦁꦏꦔ꧀ꦒꦺꦴꦤ꧀ꦏꦸꦱꦶꦩꦺꦴꦤ꧀ꦦꦺꦠꦿꦸꦱ꧀ ꦫꦱꦸꦭ꧀ꦭꦺꦭꦤ꧀ꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦭꦪꦁꦲꦶꦏꦶꦠꦏ꧀ꦏꦶꦫꦶꦩꦏꦺꦩꦫꦁꦱꦼꦢꦸꦭꦸꦂꦏꦧꦺꦃꦱꦶꦁꦠꦸꦁꦒꦭ꧀ꦭꦺꦮꦲꦺꦏꦫꦺꦴꦲꦏꦸꦤꦩ꧀ꦥꦥꦽꦕꦪꦱꦶꦁꦒꦼꦢꦺꦧꦔꦼꦠ꧀ꦲꦗꦶꦤꦺ꧉​ꦲꦮꦏ꧀ꦏꦺꦢꦺꦮꦺꦤꦩ꧀ꦥꦥꦽꦕꦪꦲꦶꦏꦶꦱꦁꦏꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦄꦭ꧀ꦭꦃꦲꦺꦭꦤ꧀ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧉​ꦢꦺꦏ꧀ꦤꦺꦔꦺꦠꦺꦴꦏ꧀ꦏꦏꦺꦏꦧꦼꦤꦼꦂꦫꦤ꧀ꦤꦺꦲꦺꦴꦫꦤꦩꦸꦁꦩꦫꦁꦲꦏꦸ꧈​ꦤꦁꦔꦶꦁꦲꦸꦒꦩꦫꦁꦏꦺꦴꦮꦺꦏꦧꦺꦃ꧉​

²꧋ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦧꦶꦱ​ꦩꦸꦤ꧀ꦢꦏ꧀ꦠꦼꦫꦸꦱ꧀ꦲꦶꦁ​ꦲꦸꦫꦶꦥ꧀ꦩꦸ​꧈​ꦧꦉꦁ​ꦏꦫꦺꦴ​ꦲꦼꦁꦒꦺꦴꦤ꧀ꦩꦸ​ꦥꦢ​ꦩꦸꦤ꧀ꦢꦏ꧀ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦪꦺꦯꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦩꦸꦤ꧀ꦢꦏ꧀ꦲꦶꦁ​ꦏꦿꦶꦱ꧀ꦡꦸꦱ꧀꧈​

³꧋ꦥꦫ​ꦱꦼꦢꦸꦭꦸꦂ​꧈​ꦱꦁꦏꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦲꦥ​ꦮꦲꦺ​ꦱꦶꦁ​ꦢꦶꦧꦸꦠꦸꦃꦲꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦤ꧀ꦢꦸꦮꦺꦲꦸꦫꦶꦥ꧀ꦭꦁꦒꦼꦁ​꧈​ꦤꦁꦔꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦩꦁꦒꦶꦭ꧀ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦺꦭꦸ​ꦔꦿꦱꦏ꧀ꦏꦏꦺꦏ꧀ꦮꦱꦤꦺ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​ ⁴ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦒꦼꦢꦺꦧꦔꦼꦠ꧀ꦲꦗꦶꦤꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦼꦢꦺꦴꦠ꧀ꦱꦁꦏꦥꦔ꧀ꦮꦱꦤꦺ​ꦥꦔꦿꦸꦱꦏ꧀ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺꦢꦺꦴꦚ​ꦲꦶꦏꦶ​꧉​ ⁵ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦠꦼꦩꦼꦤ꧀ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦩꦸ​꧉​ꦢꦶ​ꦲꦤ꧀ꦠꦼꦥ꧀ꦥꦏꦺ​ꦔꦁꦒꦺꦴ​ꦠꦸꦩꦶꦤ꧀ꦢꦏ꧀ꦱꦶꦁ​ꦧꦼꦕꦶꦏ꧀꧈​ ⁶ꦤꦺꦏ꧀ꦏꦸꦮꦶ​ꦮꦶꦱ꧀ꦏꦼꦠꦸꦫꦸꦠ꧀ꦠꦤ꧀ ꦥꦼꦔꦤ꧀ꦢꦼꦭ꧀ꦩꦸ​ꦢꦶꦲꦸꦤ꧀ꦢꦏ꧀ꦏꦏꦺꦔꦁꦒꦺꦴ​ꦏꦮꦼꦫꦸꦃ꧉​ꦤꦺꦏ꧀ꦮꦶꦱ꧀ꦤꦼꦩꦸ​ꦏꦮꦼꦫꦸꦃ꧈​ꦔ꧀ꦒꦺꦴꦭꦺꦏ꧀ꦏꦤ​ꦏꦼꦏꦸꦮꦠ꧀ꦠꦤ꧀ꦧꦶꦱ​ꦔ꧀ꦮꦱꦤꦶ​ꦲꦮꦏ꧀ꦩꦸ​ꦢꦺꦮꦺ꧉​ꦱꦁꦏꦏꦸꦮꦶ​ꦒꦺꦴꦭꦺꦏ꧀ꦏꦤ​ꦏꦼꦩꦤ꧀ꦠꦼꦥꦤ꧀ꦤꦺꦲꦠꦶ​꧉​ ⁷ꦤꦺꦏ꧀ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦏꦼꦩꦤ꧀ꦠꦼꦥꦤ꧀ꦤꦺꦲꦠꦶ​꧈​ꦥꦢ​ꦤꦸꦗꦸꦮꦧꦶꦱ​ꦲꦸꦫꦶꦥ꧀ꦱꦶꦁ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦏꦸꦮꦶ​ꦮꦶꦱ꧀ꦏꦼꦠꦸꦫꦸꦠ꧀ꦠꦤ꧀ ꦲꦸꦤ꧀ꦢꦏ꧀ꦏꦏꦺꦔꦁꦒꦺꦴ​ꦏꦠꦿꦺꦱ꧀ꦤꦤ꧀ꦩꦫꦁ​ꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​꧉​ꦤꦺꦏ꧀ꦮꦶꦱ꧀ꦧꦶꦱ​ꦠꦿꦺꦱ꧀ꦤꦩꦫꦁ​ꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​ꦠꦼꦫꦸꦱ꧀ꦥꦢ​ꦤꦸꦗꦸꦮ꧈​ꦱꦸꦥꦪ​ꦧꦶꦱ​ꦠꦿꦺꦱ꧀ꦤꦩꦫꦁ​ꦏꦧꦺꦃ​ꦮꦺꦴꦁ​꧉​ ⁸ꦤꦺꦏ꧀ꦏꦺꦴꦮꦺ​ꦮꦶꦱ꧀ꦧꦶꦱ​ꦤꦶꦤ꧀ꦢꦏ꧀ꦏꦏꦺꦥꦽꦏꦫꦥꦽꦏꦫ​ꦏꦸꦮꦶ​ꦩꦲꦸ​ꦏꦧꦺꦃ​ꦠꦤ꧀ꦥ​ꦏꦔꦺꦭ꧀ꦭꦤ꧀ ꦏꦺꦴꦮꦺ​ꦧꦏꦭ꧀ꦏꦼꦤꦭ꧀ꦲꦥꦶꦏ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦚꦩ꧀ꦧꦸꦠ꧀ꦠꦔ꧀ꦭꦢꦺꦤ꧀ꦤꦶ​ꦢꦺꦏ꧀ꦤꦺꦱꦶꦁ​ꦱꦏ꧀ꦩꦼꦱ꧀ꦠꦶꦤꦺꦭꦤ꧀ꦥꦼꦁꦒꦮꦺꦪꦤ꧀ꦧꦏꦭ꧀ꦏꦺꦠꦺꦴꦏ꧀ꦥꦩꦼꦠꦸꦤꦺ​꧉​ ⁹ꦤꦁꦔꦶꦁ​ꦱꦥ​ꦮꦲꦺ​ꦱꦶꦁ​ꦲꦺꦴꦫ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦩꦲꦸ​ꦏꦧꦺꦃ​ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦱꦶꦁ​ꦕꦼꦠꦺꦏ꧀​ꦥꦶꦏꦶꦂꦫꦤ꧀ꦤꦺ​꧉​ꦩꦭꦃ​ꦏꦪ​ꦮꦺꦴꦁ​ꦭꦩꦸꦂ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦤꦁꦲꦼꦤ꧀ꦢꦶ​ꦥꦫꦤ꧀ꦤꦺ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦮꦶꦱ꧀ꦭꦭꦶ​ꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦢꦶꦔꦥꦸꦫꦢꦺꦴꦱꦢꦺꦴꦱꦤꦺ​꧉​

¹⁰꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦲꦗ​ꦥꦢ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦲ꦳ꦪꦸꦏ꧀ꦥꦢ​ꦔ꧀ꦭꦸꦩꦸꦃꦲꦶꦲꦼꦁꦒꦺꦴꦤ꧀ꦩꦸ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦁꦏꦺꦴꦤ꧀ꦏꦺꦴꦮꦺ​ꦭꦤ꧀ꦢꦺꦏ꧀ꦤꦺꦱꦶꦁ​ꦩꦶꦗꦶ​ꦏꦺꦴꦮꦺ​꧉​ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​꧈​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦠꦶꦧ​ꦤꦁꦏꦫꦸꦱꦏ꧀ꦏꦤ꧀꧈​ ¹¹ꦏꦺꦴꦮꦺ​ꦩꦭꦃ​ꦧꦏꦭ꧀ꦏꦼꦭꦶꦭ꧀ꦭꦤ꧀​ꦩ꧀ꦊꦧꦸ​ꦲꦶꦁ​ꦏꦿꦠꦺꦴꦤ꧀ꦱꦶꦁ​ꦭꦁꦒꦼꦁ​꧈​ꦏꦿꦠꦺꦴꦤꦺ​ꦒꦸꦱ꧀ꦠꦶꦤꦺ​ꦭꦤ꧀ꦗꦸꦫꦸ​ꦱ꧀ꦭꦩꦼꦠ꧀ꦠꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦧꦏꦭ꧀ꦤꦩ꧀ꦥ​ꦏꦺꦴꦮꦺ​ꦏꦫꦺꦴ​ꦧꦸꦔꦃ​꧉​

¹²꧋ꦩꦸꦭꦤꦺ​ꦲꦏꦸ​ꦧꦏꦭ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦠꦼꦫꦸꦱ꧀ꦧꦧ꧀ꦥꦽꦏꦫꦥꦽꦏꦫ​ ꦩꦲꦸ​꧈​ꦱꦼꦤꦗꦤ꧀ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦭꦤ꧀ꦮꦶꦱ꧀ꦩꦤ꧀ꦠꦼꦥ꧀ꦥꦽꦕꦪ​ꦩꦫꦁ​ꦥꦶꦮꦸꦭꦁ​ꦱꦶꦁ​ꦧꦼꦤꦼꦂ​꧈​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​ꦲꦶꦁ​ꦲꦠꦶꦩꦸ​꧉​ ¹³ꦥꦚ꧀ꦕꦺꦤ꧀ ꦱꦸꦮꦺꦤꦺ​ꦲꦏꦸ​ꦲꦸꦫꦶꦥ꧀ꦲꦏꦸ​ꦧꦏꦭ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦠꦼꦫꦸꦱ꧀ꦧꦧ꧀ꦥꦽꦏꦫꦥꦽꦏꦫ​ꦏꦸꦮꦶ​ꦩꦲꦸ​꧈​ꦲꦮꦶꦠ꧀ꦏꦸꦮꦶ​ꦮꦶꦱ꧀ꦠꦏ꧀ꦲꦁꦒꦼꦥ꧀ꦢꦢꦶ​ꦥꦼꦚ꧀ꦗꦮꦧ꧀ꦏꦸ꧉​ ¹⁴ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦗꦭꦂꦫꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦏꦸꦢꦸ​ꦤꦶꦁꦒꦭ꧀ꦧꦢꦤ꧀ꦱꦶꦁ​ꦠꦏ꧀ꦲꦼꦁꦒꦺꦴꦤ꧀ꦤꦶ​ꦲꦶꦏꦶ​꧉​ꦲꦏꦸ​ꦥꦽꦕꦪ​ꦏꦸꦮꦶ​꧈​ꦲꦮꦶꦠ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦮꦺ꧈​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦮꦶꦱ꧀​ꦤ꧀ꦢꦸꦤꦸꦁꦔꦏꦺꦩꦫꦁ​ꦲꦏꦸ​ꦏꦤ꧀ꦠꦶꦗꦼꦭꦱ꧀꧈​ ¹⁵ꦩꦸꦭꦤꦺ​ꦲꦏꦸ​ꦪ​ꦩꦼꦂꦭꦺꦴꦏ꧀ꦏꦏꦺꦭꦤ꧀ꦔꦼꦩꦼꦤ꧀ꦤꦏꦺꦠꦼꦤꦤ꧀ꦱꦧꦼꦤ꧀ꦱꦧꦼꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧈​ꦢꦢꦶꦤꦺ​ꦤꦺꦏ꧀ꦲꦏꦸ​ꦮꦶꦱ꧀ꦲꦺꦴꦫ​ꦲꦺꦤꦺꦁ꧈​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦭꦭꦶ​ꦩꦫꦁ​ꦥꦽꦏꦫꦥꦽꦏꦫ​ꦏꦸꦮꦶ​ꦩꦲꦸ​ꦏꦧꦺꦃ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦤꦺꦏ꧀ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦠꦼꦏ​ꦩꦼꦤꦺꦃ​ꦔꦁꦒꦺꦴ​ꦥꦔ꧀ꦮꦱ​ꦱꦶꦁ​ꦒꦼꦢꦺ꧉​ꦲꦶꦏꦸ​ꦲꦺꦴꦫ​ꦢꦺꦴꦔꦺꦁꦔꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦏꦫꦺꦴ​ꦩꦿꦶꦥꦠ꧀ꦏꦸ​ꦢꦺꦮꦺꦲꦏꦸ​ꦚꦼꦏ꧀ꦱꦺꦤ꧀ꦤꦶ​ꦏ꧀ꦮꦱꦤꦺ​ꦒꦸꦱ꧀ꦠꦶ​꧉​ ¹⁷ꦲꦏꦸ​ꦢꦺꦮꦺꦤꦁꦏꦤ​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦭꦸꦲꦸꦂꦫꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ꦲꦏꦸ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​ꦔꦺꦴꦩꦺꦴꦁꦔꦺꦤꦺ​:“ꦲꦶꦏꦶ​ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦲꦠꦶꦏꦸ​꧉​” ¹⁸ꦲꦏꦸ​ꦢꦺꦮꦺꦏꦿꦸꦔꦸ​ꦱ꧀ꦮꦫ​ꦏꦸꦮꦶ​ꦱꦁꦏꦱ꧀ꦮꦂꦒ​꧈​ꦢꦺꦴꦁꦔꦺꦲꦏꦸ​꧈​ꦫꦱꦸꦭ꧀ꦭꦶꦪꦤꦺ​ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦒꦸꦤꦸꦁ​ꦱꦸꦕꦶ​꧉​

¹⁹꧋ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦏꦸ​ꦩꦭꦃ​ꦠꦩ꧀ꦧꦃ​ꦥꦼꦔꦤ꧀ꦢꦼꦭ꧀ꦭꦺ​ꦩꦫꦁ​ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​꧉​ꦩꦸꦭꦤꦺ​ꦏꦺꦴꦮꦺ​ꦪ​ꦏꦸꦢꦸ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​꧈​ꦲꦮꦶꦠ꧀ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​ꦏꦸꦮꦶ​ꦏꦪ​ꦢꦶꦪꦤ꧀ꦱꦶꦁ​ꦩꦸꦫꦸꦥ꧀ꦲꦶꦁ​ꦮꦪꦃ​ꦮꦼꦔꦶ​ꦩꦢꦁꦔꦶꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦼꦠꦼꦁ​꧈​ꦠꦼꦏꦤ꧀ꦲꦺꦱꦸꦏ꧀ꦏꦺ​꧈​ꦤꦺꦏ꧀ꦥꦢꦁꦠꦼꦏ​꧉​ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​ꦲꦸꦒ​ꦏꦪ​ꦭꦶꦤ꧀ꦠꦁ​ꦥꦚ꧀ꦗꦼꦂ​ꦲꦺꦱꦸꦏ꧀ꦱꦶꦁ​ꦩꦢꦁꦔꦶꦲꦠꦶꦩꦸ​꧉​ ²⁰ꦤꦁꦔꦶꦁ​ꦥꦽꦏꦫ​ꦱꦶꦗꦶ​ꦲꦶꦏꦶ​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦭꦭꦶ​ꦥꦫ​ꦱꦼꦢꦸꦭꦸꦂ​꧈​ꦪꦏꦸꦮꦶ​:ꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦲꦺꦴꦫ​ꦏꦼꦤꦺꦁꦢꦶꦢꦸꦤꦸꦁꦔꦏꦺꦔꦁꦒꦺꦴ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​ꦢꦺꦮꦺꦢꦺꦮꦺ꧉​ ²¹ꦲꦮꦶꦠ꧀ꦠꦼꦩ꧀ꦧꦸꦁꦔꦺ​ꦥꦫ​ꦤꦧꦶ​ꦏꦸꦮꦶ​ꦲꦺꦴꦫ​ꦩꦼꦠꦸ​ꦱꦁꦏꦏꦉꦥ꧀ꦥꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦩꦤꦸꦠ꧀ꦥꦶꦤꦸꦤ꧀ꦠꦸꦤ꧀ꦤꦺꦫꦺꦴꦃ​ꦱꦸꦕꦶ​ꦩꦤꦸꦁꦱ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦒꦸꦫꦸꦒꦸꦫꦸ​ꦥꦭ꧀ꦱꦸ​꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦲꦺꦤꦺꦁꦤꦧꦶꦤꦧꦶ​ꦥꦭ꧀ꦱꦸ​ꦥꦢ​ꦚ꧀ꦗꦼꦢꦸꦭ꧀ꦤꦁꦠꦼꦔꦃꦲꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦪ​ꦲꦗ​ꦏꦒꦺꦠ꧀ꦤꦺꦏ꧀ꦤꦁꦠꦼꦔꦃꦩꦸ​ꦲꦸꦒ​ꦧꦏꦭ꧀ꦲꦺꦤꦺꦁꦒꦸꦫꦸꦒꦸꦫꦸ​ꦥꦭ꧀ꦱꦸ​ꦥꦢ​ꦚ꧀ꦗꦼꦢꦸꦭ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀​ꦔ꧀ꦊꦧꦺꦴꦏ꧀ꦏꦏꦺꦥꦶꦮꦸꦭꦁꦥꦶꦮꦸꦭꦁ​ꦱꦶꦁ​ꦚꦤ꧀ꦢꦶꦁꦭꦤ꧀ꦱꦶꦁ​ꦔ꧀ꦒꦮꦺ​ꦫꦸꦱꦏ꧀ ꦲꦮꦶꦠ꧀ꦥꦢ​ꦤꦩ꧀ꦥꦶꦏ꧀ꦒꦸꦱ꧀ꦠꦶꦤꦺ​ꦱꦶꦁ​ꦮꦶꦱ꧀ꦤꦼꦧꦸꦱ꧀ꦲꦸꦫꦶꦥ꧀ꦥꦺꦮꦺꦴꦁꦮꦺꦴꦁ​ꦏꦸꦮꦶ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤ꧀ꦢꦁꦧꦏꦭ꧀ꦤꦼꦏꦏ꧀ꦏꦏꦺꦏꦫꦸꦱꦏ꧀ꦏꦤ꧀ꦱꦶꦁ​ꦔ꧀ꦒꦼꦒꦶꦭꦤ꧀ꦤꦶꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ²ꦤꦁꦔꦶꦁ​ꦮꦺꦴꦁ​ꦲꦺꦴꦏꦺꦃꦧꦏꦭ꧀ꦏꦠꦸꦠ꧀ꦏꦫꦺꦴ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦏꦸꦮꦶ​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦮꦺꦴꦁꦮꦺꦴꦁ​ꦩꦶꦏꦶꦂ​ꦤꦺꦏ꧀ꦲꦸꦫꦶꦥ꧀ꦤꦸꦫꦸꦠ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦲꦥꦶꦏ꧀꧈​ ³ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦧꦏꦭ꧀ꦩꦼꦉꦱ꧀ꦏꦺꦴꦮꦺ​ꦔꦁꦒꦺꦴ​ꦢꦺꦴꦔꦺꦔꦤ꧀ꦢꦺꦴꦔꦺꦁꦔꦤ꧀ꦒꦮꦺꦪꦤ꧀ꦤꦺ​ꦢꦺꦮꦺ꧈​ꦲꦮꦶꦠ꧀ꦮꦶꦱ꧀ꦏꦠꦸꦠ꧀ꦏꦫꦺꦴ​ꦮꦫꦶꦱꦤ꧀ꦤꦺꦱꦿꦏꦃ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦱꦸꦮꦶꦲꦼꦁꦒꦺꦴꦤꦺ​ꦠꦠꦠꦠ​ꦲꦉꦥ꧀ꦔꦿꦸꦠꦸꦮꦺꦴꦁꦮꦺꦴꦁ​ꦏꦸꦮꦶ​꧉​ꦏꦫꦸꦱꦏ꧀ꦏꦤ꧀ꦮꦶꦱ꧀ꦔꦼꦤ꧀ꦠꦺꦤ꧀ꦤꦶ​꧉​

⁴꧋ꦮꦸꦗꦸꦠ꧀ꦠꦺꦩꦸꦭꦺꦏꦠ꧀ꦩꦸꦭꦺꦏꦠ꧀ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦲꦺꦴꦫ​ꦢꦶꦲꦺꦩꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦢꦶꦫꦤ꧀ꦠꦺ​ꦤꦁꦱꦼꦠꦿꦥꦤ꧀ꦱꦶꦁ​ꦥꦼꦠꦼꦁ​ꦤ꧀ꦢꦼꦢꦼꦠ꧀ ꦔꦼꦤ꧀ꦠꦺꦤ꧀ꦤꦶ​ꦢꦶꦤꦤꦺ​ꦏꦿꦸꦠꦺꦴꦤ꧀꧈​ ⁵ꦲꦸꦒ​ꦮꦺꦴꦁꦮꦺꦴꦁ​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦲꦺꦴꦫ​ꦢꦶꦲꦺꦩꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦩꦭꦃ​ꦤꦼꦏꦏ꧀ꦏꦏꦺꦏꦼꦊꦥ꧀ꦥꦤ꧀ꦒꦼꦢꦺꦱꦶꦁ​ꦩꦠꦺꦤ꧀ꦤꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦤꦩꦸꦁ​ꦤꦧꦶ​ꦟꦺꦴꦮꦃꦭꦤ꧀ꦮꦺꦴꦁ​ꦥꦶꦠꦸ​ꦭꦶꦪꦤꦺ​ꦱꦶꦁ​ꦢꦶꦱ꧀ꦭꦩꦼꦠ꧀ꦠꦏꦺ꧈​ꦲꦺꦴꦫ​ꦩꦠꦶ​꧈​ꦲꦮꦶꦠ꧀ꦤꦧꦶ​ꦟꦺꦴꦮꦃꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦤꦺꦏ꧀ꦏꦸꦢꦸ​ꦲꦸꦫꦶꦥ꧀ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦏꦺꦴꦮꦺ​ꦩꦼꦱ꧀ꦠꦶꦥꦢ​ꦏꦺꦭꦶꦁꦔꦤ꧀ꦧꦧ꧀ꦏꦸꦠꦱꦺꦴꦢꦺꦴꦩ꧀ꦭꦤ꧀ꦏꦸꦠꦓꦺꦴꦩꦺꦴꦫꦃ꧈​ꦱꦶꦁ​ꦢꦶꦲꦺꦴꦧꦺꦴꦁ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦠꦏꦸꦠꦏꦸꦮꦶ​ꦢꦶꦫꦸꦱꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦼꦠꦿꦥ꧀ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​ ⁷ꦤꦁꦔꦶꦁ​ꦭꦺꦴꦠ꧀ꦢꦶꦱ꧀ꦭꦩꦼꦠ꧀ꦠꦏꦺ꧈​ꦲꦺꦴꦫ​ꦩꦠꦶ​꧈​ꦲꦮꦶꦠ꧀ꦢꦺꦏ꧀ꦤꦺꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦺꦴꦠ꧀ꦥꦼꦒꦼꦭ꧀ꦲꦶꦁ​ꦲꦠꦶꦤꦺ​ꦔꦿꦱꦏ꧀ꦏꦏꦺꦏ꧀ꦭꦏꦸꦮꦤ꧀ꦤꦺ​ꦮꦺꦴꦁꦮꦺꦴꦁ​ꦱꦶꦁ​ ꦲꦺꦴꦫ​ꦥꦤ꧀ꦠꦼꦱ꧀ꦭꦤ꧀ꦱꦶꦁ​ꦲꦺꦴꦫ​ꦥꦢ​ꦥꦼꦂꦢꦸꦭꦶꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦭꦺꦴꦠ꧀ꦩꦁꦒꦺꦴꦤ꧀ꦤꦁꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦭꦤ꧀ꦢꦶꦤꦢꦶꦤ​ꦢꦺꦏ꧀ꦤꦺꦏꦸꦢꦸ​ꦚꦮꦁ​ꦭꦤ꧀ꦔꦿꦸꦔꦺꦴꦏ꧀ꦏꦏꦺꦠꦶꦁꦏꦃꦲꦺꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦸꦮꦶ​꧉​ꦥꦚ꧀ꦕꦺꦤ꧀ꦥꦼꦢꦼꦱ꧀ꦫꦱꦤꦺ​ꦲꦶꦁ​ꦲꦠꦶ​꧉​ ⁹ꦤꦁꦔꦶꦁꦒꦸꦱ꧀ꦠꦶꦔꦼꦂꦠꦶꦏꦼꦥꦿꦶꦪꦺꦲꦼꦁꦒꦺꦴꦤꦺꦤꦸꦭꦸꦁꦔꦶꦏꦧꦺꦃꦮꦺꦴꦁꦱꦶꦁꦥꦢꦩꦤꦸꦠ꧀ꦩꦫꦁꦢꦺꦏ꧀ꦤꦺ꧈​ꦱꦸꦥꦪꦧꦶꦱꦲꦸꦕꦸꦭ꧀ꦱꦁꦏꦥꦚ꧀ꦕꦺꦴꦧ꧉​ꦒꦸꦱ꧀ꦠꦶꦲꦸꦒꦔꦼꦂꦠꦶꦏꦼꦥꦿꦶꦪꦺꦱꦶꦁꦔ꧀ꦒꦫꦥ꧀ꦮꦺꦴꦁꦱꦶꦁꦥꦢꦔ꧀ꦭꦏꦺꦴꦤ꧀ꦤꦶꦲꦭ꧉​ꦮꦺꦴꦁꦮꦺꦴꦁꦲꦶꦏꦶꦮꦶꦱ꧀ꦢꦶꦕꦮꦶꦱ꧀ꦱꦶꦱꦼꦠꦿꦥꦤ꧀ꦏꦁꦒꦺꦴꦲꦩ꧀ꦧꦺꦱꦸꦏ꧀ꦲꦶꦁꦢꦶꦤꦏꦿꦸꦠꦺꦴꦤ꧀꧈​ ¹⁰ꦩꦭꦃꦩꦭꦃꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦏꦠꦸꦠ꧀ꦏꦫꦺꦴ​ꦏꦉꦥ꧀ꦥꦺ​ꦏꦼꦢꦒꦶꦁꦔꦤ꧀ꦤꦺ​ꦭꦤ꧀ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦮꦼꦢꦶ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦲꦶꦏꦶ​ꦮꦶꦱ꧀ꦩꦼꦱ꧀ꦠꦶꦤꦺꦏ꧀ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦥꦫ​ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦱꦺꦴꦩ꧀ꦧꦺꦴꦁꦔꦺꦲꦺꦫꦩ꧀ꦩꦺꦫꦩ꧀ ꦩꦭꦃ​ꦮꦤꦶ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦤꦁꦱ꧀ꦮꦂꦒ​꧉​ ¹¹ꦥꦫ​ꦩꦸꦭꦺꦏꦠ꧀ꦮꦲꦺ​꧈​ꦱꦶꦁ​ꦏꦸꦮꦠ꧀ꦠꦺꦭꦤ꧀ꦏ꧀ꦮꦱꦤꦺ​ꦔꦸꦁꦏꦸꦭ꧀ꦭꦶ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦺꦴꦫ​ꦮꦤꦶ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦤꦁꦱ꧀ꦮꦂꦒ​ꦏꦸꦮꦶ​꧉​ꦔꦼꦭꦃꦲꦏꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​ꦲꦺꦴꦫ​ꦮꦤꦶ​꧉​ ¹²ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦸꦫꦶꦥ꧀ꦥꦺꦤꦩꦸꦁ​ꦏꦪ​ꦏꦺꦮꦤ꧀ꦒꦭꦏ꧀ꦏꦲꦺ​ꦱꦶꦁ​ꦩꦤꦸꦠ꧀ꦫꦱ​꧈​ꦲꦺꦴꦫ​ꦧꦶꦱ​ꦩꦶꦏꦶꦂ​꧉​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦪ​ꦩꦼꦱ꧀ꦠꦶꦧꦏꦭ꧀ꦏꦼꦗꦶꦉꦠ꧀ꦭꦤ꧀ꦢꦶꦥꦠꦺꦤ꧀ꦤꦶ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦩꦫꦁ​ꦥꦽꦏꦫꦥꦽꦏꦫ​ꦱꦶꦁ​ꦲꦺꦴꦫ​ꦢꦶꦔꦼꦂꦠꦺꦤ꧀ꦤꦶ​꧉​ꦩꦸꦭꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦠꦶꦧ​ꦲꦶꦁ​ꦏꦫꦸꦱꦏ꧀ꦏꦤ꧀ ꦗꦭꦂꦫꦤ꧀ꦱꦁꦏꦠꦸꦩꦶꦤ꧀ꦢꦏ꧀ꦏꦺ​ꦢꦺꦮꦺ꧉​ ¹³ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦩꦼꦱ꧀ꦠꦶꦧꦏꦭ꧀ꦲꦺꦤ꧀ꦠꦸꦏ꧀ꦧꦊꦱꦤ꧀ꦤꦺꦲꦼꦁꦒꦺꦴꦤꦺ​ꦥꦢ​ꦔ꧀ꦒꦮꦺ​ꦲꦭ​ꦩꦫꦁ​ꦭꦶꦪꦤꦺ​꧉​ꦤꦺꦏ꧀ꦲꦮꦤ꧀ꦥꦢ​ꦱꦼꦤꦼꦁ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦮꦲꦺ​ꦏꦁꦒꦺꦴ​ꦔꦸꦩ꧀ꦧꦂ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ꦥꦚ꧀ꦕꦺꦤ꧀ꦪ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦠꦼꦤꦤ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦤꦺꦏ꧀ꦥꦢ​ꦩꦺꦭꦸ​ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦤꦩꦸꦁ​ꦔꦽꦒꦼꦠ꧀ꦠꦶꦏꦸꦩ꧀ꦥꦸꦭ꧀ꦭꦤ꧀ꦩꦸ​꧈​ꦲꦮꦶꦠ꧀ꦲꦺꦴꦫ​ꦥꦢ​ꦲꦶꦱꦶꦤ꧀ꦤꦸꦫꦸꦠ꧀ꦠꦶ​ꦲꦥ​ꦱꦼꦤꦼꦁꦔꦺ​꧉​ ¹⁴ꦩꦿꦶꦥꦠ꧀ꦠꦺ​ꦤꦩꦸꦁ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦲꦺꦴꦫ​ꦥꦢ​ꦗꦼꦭꦺꦃ​ꦲꦼꦁꦒꦺꦴꦤꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ꦩꦭꦃ​ꦥꦢ​ꦱꦼꦤꦼꦁ​ꦤꦫꦶꦏ꧀ꦱꦶꦁ​ꦫꦶꦁꦏꦶꦃ​ꦲꦶꦁ​ꦥꦼꦔꦤ꧀ꦢꦼꦭ꧀ ꦱꦸꦥꦪ​ꦥꦢ​ꦩꦺꦭꦸ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ꦥꦚ꧀ꦕꦺꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦤ꧀ꦢꦸꦮꦺꦤ꧀ꦤꦶ​ꦮꦫꦶꦱꦤ꧀ꦤꦺꦱꦿꦏꦃ​ꦭꦤ꧀ꦩꦠꦢꦸꦮꦶꦠ꧀ꦠꦼꦤ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦚꦮꦶꦱ꧀ꦱꦏꦺꦱꦼꦠꦿꦥꦤ꧀ꦏꦁꦒꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ¹⁵ꦗꦭꦂꦫꦤ꧀ꦥꦢ​ꦤꦶꦁꦒꦭ꧀ꦢꦭꦤ꧀ꦱꦶꦁ​ꦧꦼꦤꦼꦂ​ꦮꦺꦴꦁꦮꦺꦴꦁ​ꦏꦸꦮꦶ​ꦱꦲꦶꦏꦶ​ꦥꦢ​ꦏꦼꦱꦱꦂ​꧈​ꦲꦮꦶꦠ꧀ꦥꦢ​ꦤꦸꦫꦸꦠ꧀​ꦏ꧀ꦭꦏꦸꦮꦤ꧀ꦤꦺ​ꦧꦶꦭꦺꦪꦩ꧀ ꦲꦤꦏ꧀ꦏꦺ​ꦧꦺꦪꦺꦴꦂ​꧈​ꦱꦶꦁ​ꦱꦼꦤꦼꦁ​ꦤꦩ꧀ꦥ​ꦧꦪꦂꦫꦤ꧀ꦲꦼꦁꦒꦺꦴꦤꦺ​ꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦥꦼꦁꦒꦮꦺ​ꦱꦶꦁ​ꦲꦭ​꧉​ ¹⁶ꦤꦁꦔꦶꦁ​ꦧꦶꦭꦺꦪꦩ꧀ꦢꦶꦮꦼꦭꦺꦃꦲꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦢꦸꦤꦸꦁꦤꦺꦏ꧀ꦢꦺꦏ꧀ꦤꦺꦏ꧀ꦭꦺꦫꦸ​ꦧꦔꦼꦠ꧀꧈​ꦏꦶꦩꦂꦫꦺꦧꦶꦭꦺꦪꦩ꧀ꦠꦼꦫꦸꦱ꧀ꦧꦶꦱ​ꦔꦺꦴꦩꦺꦴꦁꦏꦪ​ꦮꦺꦴꦁ​ꦲꦸꦫꦶꦥ꧀ ꦩꦫꦏ꧀ꦏꦏꦺꦤꦧꦶ​ꦧꦶꦭꦺꦪꦩ꧀ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦱꦸꦩꦸꦂ​ꦱꦶꦁ​ꦲꦱꦠ꧀ ꦢꦶꦗꦒꦏ꧀ꦏꦏꦺꦔꦪꦔꦪ꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦲꦶꦱꦶꦤꦺ​꧉​ꦲꦸꦒ​ꦏꦪ​ꦩꦺꦒ​ꦱꦶꦁ​ꦏꦧꦸꦂ​ꦏꦠꦸꦠ꧀ꦲꦔꦶꦤ꧀ꦧꦤ꧀ꦠꦼꦂ​ꦏꦲꦺ​꧈​ꦤꦁꦔꦶꦁ​ꦲꦺꦴꦫ​ꦩꦼꦠꦸ​ꦲꦸꦢꦤ꧀ꦤꦺ​꧉​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦤ꧀ꦠꦺꦤ꧀ꦤꦶ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦪꦏꦸꦮꦶ​ꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦼꦠꦼꦁ​ꦤ꧀ꦢꦼꦢꦼꦠ꧀꧈​ ¹⁸ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦩꦺꦴꦁꦔꦤ꧀ꦤꦺ​ꦒꦼꦢꦺꦒꦼꦢꦺ꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦲꦶꦱꦶꦤꦺ​꧈​ꦠꦸꦗꦸꦮꦤ꧀ꦤꦺꦔꦼꦤꦺꦁꦮꦺꦴꦁꦮꦺꦴꦁ​ꦱꦶꦁ​ꦢꦸꦫꦸꦁ​ꦱꦸꦮꦶꦲꦸꦕꦸꦭ꧀ꦱꦁꦏꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦏꦼꦱꦱꦂ​꧉​ꦮꦺꦴꦁ​ꦱꦶꦁ​ꦲꦚꦂꦫꦚꦂꦏꦸꦮꦶ​ꦢꦶꦲꦺꦴꦩꦺꦴꦁꦔꦶꦗꦫꦺꦤꦺ​ꦲꦺꦴꦫ​ꦲꦥꦲꦥ​꧈​ꦱꦼꦤꦗꦤ꧀ꦲꦸꦫꦶꦥ꧀ꦥꦺꦱꦏ꧀ꦏꦉꦥ꧀ꦥꦺ​ꦭꦤ꧀ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦲꦥ​ꦮꦲꦺ​꧉​ ¹⁹ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦥꦚ꧀ꦕꦺꦤ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦲꦺꦤ꧀ꦠꦸꦏ꧀ꦲꦸꦫꦶꦥ꧀ꦱꦏ꧀ꦏꦉꦥ꧀ꦥꦺ​꧈​ꦲꦺꦴꦫ​ꦲꦸꦱꦃꦥꦼꦂꦢꦸꦭꦶꦏꦫꦺꦴ​ꦥꦼꦂꦤꦠꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦏ꧀ꦗꦤꦺꦒꦸꦫꦸꦒꦸꦫꦸ​ꦏꦸꦮꦶ​ꦢꦺꦮꦺꦢꦶꦏ꧀ꦮꦱꦤꦶ​ꦏꦫꦺꦴ​ꦭꦏꦸ​ꦲꦭ​ꦱꦶꦁ​ꦔꦿꦸꦱꦏ꧀ꦩꦤꦸꦁꦱ​꧉​ꦢꦢꦶꦤꦺ​ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦱꦏ꧀ꦧꦼꦤꦼꦂꦫꦺ​ꦪ​ꦢꦢꦶ​ꦥꦼꦭꦢꦺꦤ꧀ꦤꦺ​ꦥꦔ꧀ꦮꦱꦤꦺ​ꦲꦭ​꧈​ꦲꦮꦶꦠ꧀ꦮꦺꦴꦁ​ꦤꦺꦏ꧀ꦲꦸꦫꦶꦥ꧀ꦥꦺꦢꦶꦭꦏꦺꦴꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦥꦽꦏꦫ​꧈​ꦮꦺꦴꦁ​ꦏꦸꦮꦶ​ꦪ​ꦥꦼꦭꦢꦺꦤ꧀ꦤꦺ​ꦥꦽꦏꦫ​ꦏꦸꦮꦶ​꧉​ ²⁰ꦤꦺꦏ꧀ꦲꦺꦤꦺꦁꦱꦏ꧀ꦮꦶꦗꦶꦤꦺꦮꦺꦴꦁꦧꦶꦱꦩꦼꦤ꧀ꦠꦱ꧀ꦱꦁꦏꦥꦼꦕꦼꦂꦫꦺꦤ꧀ꦤꦺꦢꦺꦴꦚꦗꦭꦂꦫꦤ꧀ꦮꦺꦴꦁꦏꦸꦮꦶꦏꦼꦤꦭ꧀ꦩꦫꦁꦒꦸꦱ꧀ꦠꦶꦤꦺꦭꦤ꧀ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦤꦁꦔꦶꦁꦮꦺꦴꦁꦔꦺꦠꦼꦫꦸꦱ꧀ꦠꦶꦧꦩꦼꦤꦺꦃꦤꦁꦥꦼꦕꦼꦂꦫꦺꦤ꧀ꦩꦲꦸꦭꦤ꧀ꦲꦺꦴꦫꦒꦼꦊꦩ꧀ꦠꦔꦶꦩꦼꦤꦺꦃ꧈​ꦮꦺꦴꦁꦏꦸꦮꦶꦠꦶꦧꦤꦺꦗꦼꦫꦸꦤꦺꦔꦸꦁꦏꦸꦭ꧀ꦭꦶꦩꦲꦸꦩꦲꦸꦤꦺ꧉​ ²¹ꦏꦁꦒꦺꦴ​ꦮꦺꦴꦁ​ꦏꦸꦮꦶ​ꦭꦸꦮꦶꦃ​ꦲꦥꦶꦏ꧀ ꦤꦺꦏ꧀ꦩꦲꦸꦤꦺ​ꦲꦺꦴꦫ​ꦔꦼꦂꦠꦶ​ꦩꦫꦁ​ꦢꦭꦤ꧀ꦱꦶꦁ​ꦧꦼꦤꦼꦂ​꧈​ꦠꦼꦤꦶꦩ꧀ꦧꦁꦔꦼꦂꦠꦶ​꧈​ꦤꦁꦔꦶꦁ​ꦩꦭꦃ​ꦠꦼꦫꦸꦱ꧀ꦲꦺꦴꦫ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦸꦕꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ²²ꦥꦤ꧀ꦠꦼꦱ꧀ꦠꦼꦤꦤ꧀ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦢꦶꦥꦢꦏ꧀ꦏꦏꦺꦏꦫꦺꦴꦲꦱꦸꦱꦶꦁꦤ꧀ꦢꦶꦭꦠ꧀ꦠꦶꦲꦸꦠꦃꦲꦸꦠꦃꦲꦤ꧀ꦤꦺꦲꦥꦧꦧꦶꦱꦶꦁꦮꦶꦱ꧀ꦢꦶꦲꦼꦢꦸꦱ꧀ꦱꦶꦏꦶꦥꦸꦩꦼꦤꦺꦃꦤꦁꦥꦼꦕꦼꦂꦫꦺꦤ꧀ꦤꦺ꧉​

↑ ↑ ↑

꧋ꦲꦶꦁꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦩꦤꦸꦁꦱꦧꦏꦭ꧀ꦱꦼꦩ꧀ꦧꦿꦤ꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦏꦸ​ꦱꦲꦶꦏꦶ​ꦮꦶꦱ꧀ꦤꦸꦭꦶꦱ꧀ꦱꦶ​ꦏꦺꦴꦮꦺ​ꦥꦶꦁ​ꦥꦶꦤ꧀ꦢꦺꦴ꧉​ꦤꦁꦭꦪꦁ​ꦏꦧꦺꦃ​ꦭꦺꦴꦫꦺꦴꦤꦺ​ꦲꦏꦸ​ꦤꦸꦗꦸ​ꦔ꧀ꦒꦸꦒꦃ​ꦲꦔꦼꦤ꧀ꦲꦔꦼꦤ꧀ꦱꦶꦁ​ꦉꦱꦶꦏ꧀ꦲꦶꦁ​ꦲꦠꦶꦩꦸ​꧉​ ²ꦩꦸꦭꦤꦺꦲꦏꦸꦪꦔꦺꦭꦶꦁꦔꦏꦺꦩꦫꦁꦏꦺꦴꦮꦺꦧꦧ꧀ꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦺꦥꦫꦤꦧꦶꦱꦸꦕꦶꦱꦶꦁꦮꦶꦱ꧀ꦢꦶꦲꦼꦠꦺꦴꦏ꧀ꦏꦏꦺꦲꦶꦁꦗꦩꦤ꧀ꦤꦺꦩ꧀ꦧꦶꦪꦺꦤ꧀꧈​ꦲꦏꦸꦲꦸꦒꦔꦺꦭꦶꦁꦔꦏꦺꦩꦫꦁꦏꦺꦴꦮꦺꦧꦧ꧀ꦥꦶꦮꦸꦭꦁꦔꦺꦒꦸꦱ꧀ꦠꦶꦤꦺꦭꦤ꧀ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧈​ꦱꦶꦁꦮꦶꦱ꧀ꦢꦶꦢꦸꦤꦸꦁꦢꦸꦤꦸꦁꦔꦏꦺꦩꦫꦁꦏꦺꦴꦮꦺꦏꦫꦺꦴꦥꦫꦫꦱꦸꦭ꧀꧈​ ^3-4ꦥꦽꦏꦫ​ꦱꦶꦗꦶ​ꦲꦶꦏꦶ​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦭꦭꦶ​ꦥꦫ​ꦱꦼꦢꦸꦭꦸꦂ​!ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦮꦺꦴꦁꦮꦺꦴꦁ​ꦧꦏꦭ꧀ꦔꦸꦩ꧀ꦧꦂ​ꦏꦼꦢꦒꦶꦁꦔꦤ꧀ꦤꦺ​ꦭꦤ꧀ꦧꦏꦭ꧀ꦩꦺꦴꦪꦺꦴꦏ꧀ꦏꦶ​ꦏꦺꦴꦮꦺ​꧈​ꦠꦏꦺꦴꦤ꧀:“ꦗꦫꦺꦤꦺ​ꦪꦺꦯꦸꦱ꧀ꦮꦶꦱ꧀ꦗꦚ꧀ꦗꦶ​ꦲꦉꦥ꧀ꦠꦼꦏ​ꦩꦼꦤꦺꦃ​꧈​ꦭꦃ​ꦲꦼꦤ꧀ꦢꦶ​?ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦢꦶꦏꦸꦧꦸꦂ​꧈​ꦤꦁꦔꦶꦁ​ꦱꦼꦩ꧀ꦧꦫꦁ​ꦲꦶꦗꦶꦏ꧀ꦏꦪ​ꦩ꧀ꦧꦶꦪꦺꦤ꧀ꦮꦲꦺ​꧈​ꦮꦶꦮꦶꦠ꧀ꦠꦤ꧀ꦤꦺ​ꦭꦔꦶꦠ꧀ꦭꦤ꧀ꦧꦸꦩꦶ​꧉​” ⁵ꦮꦺꦴꦁꦮꦺꦴꦁ​ꦏꦸꦮꦶ​ꦚ꧀ꦗꦫꦏ꧀ꦲꦺꦴꦫ​ꦒꦼꦊꦩ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦩ꧀ꦧꦶꦪꦺꦤ꧀ꦮꦶꦱ꧀ꦲꦺꦤꦺꦁꦭꦔꦶꦠ꧀ꦭꦤ꧀ꦧꦸꦩꦶ​ꦱꦶꦁ​ꦠꦼꦏꦤꦺ​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦸꦩꦶ​ꦩꦼꦤ꧀ꦠꦱ꧀ꦱꦁꦏꦧꦚꦸ​ꦭꦤ꧀ꦗꦭꦂꦫꦤ꧀ꦧꦚꦸ​ꦢꦶꦥꦶꦱꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦸꦩꦶ​ꦧꦶꦱ​ꦲꦺꦤꦺꦁ꧉​ ⁶ꦤꦁꦔꦶꦁ​ꦪ​ꦔꦁꦒꦺꦴ​ꦧꦚꦸ​ꦲꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦱꦏ꧀ꦧꦸꦩꦶ​ꦱꦶꦁ​ꦤ꧀ꦢꦶꦱꦶꦏ꧀ ꦧꦸꦩꦶ​ꦢꦶꦏꦼꦊꦥ꧀ꦥꦏꦺꦱꦏ꧀ꦏꦧꦺꦃꦲꦺ꧉​ ⁷ꦭꦤ꧀ꦲꦸꦒ​ꦩꦤꦸꦠ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦔꦶꦠ꧀ꦭꦤ꧀ꦧꦸꦩꦶ​ꦱꦶꦁ​ꦲꦺꦤꦺꦁꦲꦶꦏꦶ​ꦏꦱꦶꦩ꧀ꦥꦼꦤ꧀ꦠꦼꦏꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦧꦏꦭ꧀ꦢꦶꦫꦸꦱꦏ꧀ꦔꦁꦒꦺꦴ​ꦒꦼꦤꦶ​꧈​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦭꦤ꧀ꦔꦿꦸꦱꦏ꧀ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​

꧋ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

⁸꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦥꦽꦏꦫ​ꦱꦶꦗꦶ​ꦲꦶꦏꦶ​ꦏꦺꦴꦮꦺ​ꦲꦗ​ꦥꦢ​ꦭꦭꦶ​꧈​ꦪꦏꦸꦮꦶ​:ꦱꦶꦁ​ꦢꦶꦲꦫꦤ꧀ꦤꦶ​ꦱꦺꦮꦸ​ꦠꦲꦸꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦱꦼꦢꦶꦤ​꧉​ꦢꦢꦶꦤꦺ​ꦏꦁꦒꦺꦴ​ꦢꦺꦏ꧀ꦤꦺꦱꦼꦢꦶꦤ​ꦠꦸꦁꦒꦭ꧀ꦭꦺ​ꦏꦫꦺꦴ​ꦱꦺꦮꦸ​ꦠꦲꦸꦤ꧀꧈​ ⁹ꦩꦸꦭꦤꦺ​ꦲꦗ​ꦥꦢ​ꦩꦶꦏꦶꦂ​ꦤꦺꦏ꧀ꦮꦶꦱ꧀ꦏꦼꦱꦸꦮꦺꦤ꧀ꦧꦔꦼꦠ꧀ꦭꦤ꧀ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦠꦼꦏ​ꦩꦼꦤꦺꦃ​꧉​ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦮꦶꦱ꧀ꦔꦼꦠꦺꦴꦏ꧀ꦏꦏꦺꦗꦚ꧀ꦗꦶ​ꦧꦏꦭ꧀ꦧꦭꦶꦏ꧀ꦩꦼꦤꦺꦃ​꧈​ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦠꦼꦏ​ꦩꦼꦤꦺꦃ​꧈​ꦱꦼꦤꦗꦤ꧀ꦲꦺꦤꦺꦁꦱꦶꦁ​ꦥꦢ​ꦩꦶꦏꦶꦂ​ꦤꦺꦏ꧀ꦒꦸꦱ꧀ꦠꦶ​ꦏꦼꦱꦸꦮꦺꦤ꧀ꦠꦼꦏꦤꦺ​꧉​ꦤꦁꦔꦶꦁ​ꦲꦥ​ꦠ​ꦗꦭꦂꦫꦤ꧀ꦤꦺ​ꦏꦺꦴꦏ꧀ꦒꦸꦱ꧀ꦠꦶ​ꦢꦸꦫꦸꦁ​ꦠꦼꦏ​?ꦗꦭꦂꦫꦤ꧀ꦒꦸꦱ꧀ꦠꦶ​ꦔꦼꦠꦺꦴꦏ꧀ꦏꦏꦺꦏꦼꦱꦧꦂꦫꦤ꧀ꦤꦺ​ꦩꦫꦁ​ꦏꦺꦴꦮꦺ​꧉​ꦏꦉꦥ꧀ꦥꦺ​ꦒꦸꦱ꧀ꦠꦶ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦠꦶꦧ​ꦲꦶꦁ​ꦏꦫꦸꦱꦏ꧀ꦏꦤ꧀ ꦤꦁꦔꦶꦁ​ꦧꦶꦱꦲ​ꦏꦧꦺꦃ​ꦮꦺꦴꦁ​ꦥꦢ​ꦤꦶꦁꦒꦭ꧀ꦲꦸꦫꦶꦥ꧀ꦢꦺꦴꦱ​ꦭꦤ꧀ꦥꦢ​ꦤꦸꦫꦸꦠ꧀ꦩꦫꦁ​ꦒꦸꦱ꧀ꦠꦶ​꧉​

¹⁰꧋ꦤꦁꦔꦶꦁꦮꦚ꧀ꦕꦶꦤꦺꦠꦼꦏꦤꦺꦒꦸꦱ꧀ꦠꦶꦏꦪꦠꦼꦏꦤꦺꦩꦭꦶꦁꦏꦲꦺ꧈​ꦲꦺꦴꦫꦏꦼꦤꦺꦁꦢꦶꦗꦒꦏ꧀ꦏꦏꦺ꧉​ꦤꦺꦏ꧀ꦒꦸꦱ꧀ꦠꦶꦠꦼꦏ꧈​ꦭꦔꦶꦠ꧀ꦧꦏꦭ꧀ꦲꦶꦭꦁꦔꦁꦒꦺꦴꦱ꧀ꦮꦫꦏꦪꦤꦺꦏ꧀ꦏꦤꦺꦴꦤ꧀​ꦚ꧀ꦗꦼꦧ꧀ꦭꦸꦏ꧀ꦏꦲꦺꦭꦤ꧀ꦥꦺꦫꦁꦥꦺꦫꦁꦔꦤ꧀ꦤꦺꦧꦸꦩꦶꦧꦏꦭ꧀ꦏꦺꦴꦧꦺꦴꦁꦏꦧꦺꦃ꧉​ꦗꦒꦠ꧀ꦱꦏ꧀ꦥꦼꦁꦒꦮꦺꦤꦺꦧꦏꦭ꧀ꦏꦸꦢꦸꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦱꦼꦩ꧀ꦧꦫꦁ​ꦏꦸꦮꦶ​ꦩꦲꦸ​ꦏꦧꦺꦃ​ꦧꦏꦭ꧀ꦢꦶꦫꦸꦱꦏ꧀ꦏꦪ​ꦔꦺꦴꦤꦺꦴ​꧈​ꦏꦼꦥꦿꦶꦪꦺ​ꦥꦼꦂꦭꦸꦤꦺꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦱꦸꦕꦶ​ꦭꦤ꧀ꦱꦶꦁ​ꦤꦸꦫꦸꦠ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹²ꦥꦢ​ꦔꦉꦥ꧀ꦥꦉꦥ꧀ꦥꦢꦶꦤ​ꦠꦼꦏꦤꦺ​ꦒꦸꦱ꧀ꦠꦶ​ꦏꦤ꧀ꦠꦶꦠꦼꦤꦤ꧀ꦤꦤ꧀ ꦔꦁꦒꦺꦴ​ꦲꦸꦫꦶꦥ꧀ꦱꦶꦁ​ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦒꦸꦱ꧀ꦠꦶ​ꦠꦼꦏ​꧈​ꦭꦔꦶꦠ꧀ꦧꦏꦭ꧀ꦏꦺꦴꦧꦺꦴꦁ​ꦭꦤ꧀ꦥꦺꦫꦁꦥꦺꦫꦁꦔꦤ꧀ꦤꦺ​ꦧꦸꦩꦶ​ꦧꦏꦭ꧀ꦲꦶꦭꦁ​꧈​ꦗꦭꦂꦫꦤ꧀ꦱꦁꦏꦥꦤꦱ꧀ꦱꦺ​ꦒꦼꦤꦶ​꧉​ ¹³ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦔꦉꦥ꧀ꦲꦉꦥ꧀ꦭꦔꦶꦠ꧀ꦲꦚꦂ​ꦭꦤ꧀ꦧꦸꦩꦶ​ꦲꦚꦂ​꧈​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​꧉​ꦤꦁꦥꦁꦒꦺꦴꦤ꧀ꦤꦤ꧀ꦲꦚꦂ​ꦲꦶꦏꦶ​ꦱꦼꦩ꧀ꦧꦫꦁ​ꦧꦏꦭ꧀​ꦩ꧀ꦭꦏꦸ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁴꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦥꦢ​ꦔꦼꦤ꧀ꦠꦺꦤ꧀ꦤꦶ​ꦏꦸꦮꦶ​ꦩꦲꦸ​ꦏꦧꦺꦃ​ꦏ꧀ꦭꦏꦺꦴꦤ꧀ ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦉꦱꦶꦏ꧀ꦭꦤ꧀ꦱꦶꦁ​ꦥꦤ꧀ꦠꦼꦱ꧀ ꦫꦸꦏꦸꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦤꦺꦏ꧀ꦒꦸꦱ꧀ꦠꦶ​ꦠꦼꦏ​꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦼꦩꦸ​ꦔꦺꦴꦤꦺꦴ​꧉​ ¹⁵ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦪ​ꦏꦼꦱꦧꦂꦫꦤ꧀ꦤꦺ​ꦒꦸꦱ꧀ꦠꦶ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦶꦱ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀꧈​ꦲꦸꦒ​ ꦭꦪꦁꦭꦪꦁꦔꦺ​ꦱꦼꦢꦸꦭꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺꦲꦶꦁ​ꦏꦠꦿꦺꦱ꧀ꦤꦤ꧀ ꦱꦼꦢꦸꦭꦸꦂ​ꦦꦈꦭꦸꦱ꧀ ꦲꦼꦁꦒꦺꦴꦤꦺ​ꦔꦺꦴꦩꦺꦴꦁꦪ​ꦔꦁꦒꦺꦴ​ꦏꦮꦼꦫꦸꦃꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁶ꦮꦸꦗꦸꦠ꧀ꦠꦺ꧈​ꦤꦁꦭꦪꦁꦭꦪꦁꦔꦺ​ꦏꦧꦺꦃ​ꦢꦺꦏ꧀ꦤꦺꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​꧉​ꦪ​ꦧꦼꦤꦼꦂ​꧈​ꦭꦪꦁꦭꦪꦁꦔꦺ​ꦱꦼꦢꦸꦭꦸꦂ​ꦦꦈꦭꦸꦱ꧀ꦪ​ꦔꦽꦩ꧀ꦧꦸꦏ꧀ꦏꦏꦺꦥꦽꦏꦫꦥꦽꦏꦫ​ꦱꦶꦁ​ꦲꦔꦺꦭ꧀ꦢꦸꦤꦸꦁꦔꦺ​꧉​ꦮꦺꦴꦁ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦭꦤ꧀ꦲꦺꦴꦫ​ꦗꦼꦫꦸꦏꦮꦼꦫꦸꦃꦲꦺꦲꦺꦴꦫ​ꦧꦶꦱ​ꦚꦩ꧀ꦥꦺꦤ꧀ꦤꦶꦏꦸꦮꦶ​꧈​ꦢꦶꦒꦮꦺ​ꦗꦭꦂꦫꦤ꧀ꦏꦁꦒꦺꦴ​ꦚꦶꦩ꧀ꦥꦁꦔꦏꦺꦠꦼꦒꦼꦱ꧀ꦱꦺ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦲꦺꦴꦫ​ꦤꦩꦸꦁ​ꦏ꧀ꦭꦺꦫꦸ​ꦲꦼꦁꦒꦺꦴꦤꦺ​ꦤ꧀ꦢꦸꦤꦸꦁꦔꦏꦺꦭꦪꦁꦭꦪꦁꦔꦺ​ꦱꦼꦢꦸꦭꦸꦂ​ꦦꦈꦭꦸꦱ꧀ ꦮꦸꦗꦸꦠ꧀ꦠꦺꦲꦼꦁꦒꦺꦴꦤꦺ​ꦥꦢ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦲꦶꦱꦶꦲꦶꦱꦶꦤꦺꦏꦶꦠꦧ꧀ꦱꦸꦕꦶ​ꦱꦶꦁ​ꦭꦶꦪꦭꦶꦪꦤꦺ​ꦪ​ꦏ꧀ꦭꦺꦫꦸ​꧉​ꦏ꧀ꦭꦏꦸꦮꦤ꧀ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦤꦼꦏꦏ꧀ꦏꦏꦺꦏꦫꦸꦱꦏ꧀ꦏꦤ꧀ꦏꦁꦒꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺ꧉​

¹⁷꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦏꦺꦴꦮꦺ​ꦏꦧꦺꦃ​ꦱꦲꦶꦏꦶ​ꦮꦶꦱ꧀ꦠꦏ꧀ꦲꦺꦭꦶꦁꦔꦏꦺꦭꦤ꧀ꦮꦶꦱ꧀ꦥꦢ​ꦔꦼꦂꦠꦶ​ꦱꦏ꧀ꦢꦸꦫꦸꦁꦔꦺ꧉​ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦥꦶꦮꦸꦭꦁꦔꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦗ​ꦱꦩ꧀ꦥꦺꦏ꧀ꦏꦠꦸꦠ꧀ꦥꦼꦤꦱꦫꦤ꧀ꦤꦺꦮꦺꦴꦁꦮꦺꦴꦁ​ꦏꦸꦮꦶ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦥꦼꦢꦺꦴꦠ꧀ꦱꦁꦏꦥꦼꦔꦤ꧀ꦢꦼꦭ꧀ꦩꦸ​꧉​ ¹⁸ꦩꦭꦃꦥꦢꦩꦸꦤ꧀ꦢꦏ꧀ꦏꦲꦶꦁꦏꦧꦼꦕꦶꦏ꧀ꦏꦤ꧀ꦤꦺꦒꦸꦱ꧀ꦠꦶꦤꦺꦭꦤ꧀ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦥꦢꦩꦸꦤ꧀ꦢꦏ꧀ꦏꦲꦼꦁꦒꦺꦴꦤ꧀ꦩꦸꦏꦼꦤꦭ꧀ꦩꦫꦁꦢꦺꦏ꧀ꦤꦺ꧉​ꦩꦸꦒꦩꦸꦒꦒꦸꦱ꧀ꦠꦶꦢꦶꦭꦸꦲꦸꦂꦫꦏꦺ꧈​ꦱꦲꦶꦏꦶꦭꦤ꧀ꦱ꧀ꦭꦮꦱ꧀ꦭꦮꦱ꧀ꦱꦺ!ꦄꦩꦺꦤ꧀꧈​

ꦦꦺꦠꦿꦸꦱ꧀

↑ ↑ ↑

← ꧇꧑꧇ꦦꦺꦠꦿꦸꦱ꧀

꧇꧑꧇ꦪꦺꦴꦲ꦳ꦤꦼꦱ꧀ →