ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥ꦳ꦶꦭꦺꦩꦺꦴꦤ꧀

꧁꧋ꦭꦪꦁꦔꦺꦫꦱꦸꦭ꧀ꦦꦈꦭꦸꦱ꧀
ꦩꦫꦁꦥ꦳ꦶꦭꦺꦩꦺꦴꦤ꧀꧈​꧂

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

^1-2꧋ꦲꦶꦏꦶ​ꦭꦪꦁ​ꦱꦁꦏꦦꦈꦭꦸꦱ꧀ ꦱꦶꦁ​ꦢꦶꦱꦼꦠꦿꦥ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦭꦤ꧀ꦱꦁꦏꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ ꦩꦫꦁ​ꦥ꦳ꦶꦭꦺꦩꦺꦴꦤ꧀ ꦏꦚ꧀ꦕꦏꦸ​ꦠꦸꦁꦒꦭ꧀ꦥꦼꦁꦒꦮꦺꦏꦸ꧉​ꦭꦪꦁ​ꦲꦶꦏꦶ​ꦲꦸꦒ​ꦏꦁꦒꦺꦴ​ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦄꦥꦶꦪꦭꦤ꧀ꦱꦼꦢꦸꦭꦸꦂ​ꦄꦂꦏꦶꦥꦸꦱ꧀ ꦏꦚ꧀ꦕꦏꦸ​ꦠꦸꦁꦒꦭ꧀ꦥꦼꦁꦒꦮꦺꦏꦸꦲꦶꦁ​ꦒꦸꦱ꧀ꦠꦶ​ꦭꦤ꧀ꦲꦸꦒ​ꦏꦁꦒꦺꦴ​ꦥꦱꦩꦸꦮꦤ꧀ꦱꦶꦁ​ꦔꦸꦩ꧀ꦥꦸꦭ꧀ꦤꦁꦲꦺꦴꦩꦃꦩꦸ​꧉​

³꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

꧋ꦏꦠꦿꦺꦱ꧀ꦤꦤꦺꦭꦤ꧀ꦥꦼꦔꦤ꧀ꦢꦼꦭ꧀ꦭꦺ​ꦥ꦳ꦶꦭꦺꦩꦺꦴꦤ꧀꧈​

^4-5꧋ꦥ꦳ꦶꦭꦺꦩꦺꦴꦤ꧀ ꦱꦧꦼꦤ꧀ꦱꦧꦼꦤ꧀ꦲꦏꦸ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧈​ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶꦏꦸ​꧈​ꦲꦮꦶꦠ꧀ꦲꦏꦸ​ꦏꦿꦸꦔꦸ​ꦧꦧ꧀ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦥꦫ​ꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​ꦭꦤ꧀ꦧꦧ꧀ꦥꦽꦕꦪꦩꦸ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ⁶ꦱꦶꦁ​ꦠꦏ꧀ꦱꦸꦮꦸꦤ꧀ ꦲꦼꦁꦒꦺꦴꦤ꧀ꦩꦸ​ꦥꦢ​ꦥꦽꦕꦪ​ꦧꦼꦧꦉꦁꦔꦤ꧀ꦧꦶꦱꦲ​ꦩꦫꦏ꧀ꦏꦏꦺꦏꦺꦴꦮꦺ​ꦏꦧꦺꦃ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦩꦫꦁ​ꦱꦼꦩ꧀ꦧꦫꦁ​ꦱꦶꦁ​ꦧꦼꦕꦶꦏ꧀꧈​ꦢꦢꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦧꦶꦱ​ꦢꦶꦭꦸꦲꦸꦂꦫꦏꦺ꧉​ ⁷ꦥ꦳ꦶꦭꦺꦩꦺꦴꦤ꧀ ꦏꦠꦿꦺꦱ꧀ꦤꦤ꧀ꦩꦸꦤ꧀ꦢꦢꦺꦏ꧀ꦏꦏꦺꦧꦸꦔꦃꦏꦸ​ꦭꦤ꧀ꦲꦩ꧀ꦧꦔꦸꦤ꧀ꦲꦠꦶꦏꦸ​꧈​ꦗꦭꦂꦫꦤ꧀ꦏꦺꦴꦮꦺ​ꦚꦼꦒꦼꦂꦫꦏꦺꦭꦤ꧀ꦔꦪꦼꦩꦏꦺꦲꦠꦶꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦠꦸꦁꦒꦭ꧀ꦥꦽꦕꦪ​꧉​

꧋ꦥꦚꦸꦮꦸꦤ꧀ꦤꦺ​ꦫꦱꦸꦭ꧀ꦦꦈꦭꦸꦱ꧀꧈​

^8-9꧋ꦲꦏꦸ​ꦲꦶꦏꦶ​ꦮꦏꦶꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦩꦸꦭꦤꦺ​ꦲꦏꦸ​ꦪ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦩꦿꦺꦤ꧀ꦠꦃ​ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦧꦫꦁ​ꦱꦶꦁ​ꦥꦼꦂꦭꦸ​꧉​ꦤꦁꦔꦶꦁ​ꦲꦏꦸ​ꦲꦺꦴꦫ​ꦩꦿꦺꦤ꧀ꦠꦃ​꧈​ꦲꦏꦸ​ꦭꦸꦮꦸꦁꦤꦼꦩ꧀ꦧꦸꦁ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦲꦏꦸ​ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​꧉​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺ꧈​ꦲꦏꦸ​ꦲꦶꦏꦶ​ꦮꦶꦱ꧀ꦠꦸꦮ​ꦭꦤ꧀ꦩꦼꦤꦺꦃ​ꦲꦏꦸ​ꦤꦁꦱꦼꦠꦿꦥꦤ꧀ꦲꦶꦏꦶ​ꦗꦭꦂꦫꦤ꧀ꦲꦏꦸ​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀꧈​ ¹⁰ꦲꦏꦸ​ꦤꦼꦩ꧀ꦧꦸꦁ​ꦏꦺꦴꦮꦺ​ꦧꦧ꧀ꦎꦤꦺꦱꦶꦩꦸꦱ꧀꧈​ꦢꦺꦏ꧀ꦤꦺꦠꦏ꧀ꦲꦏꦸ​ꦲꦤꦏ꧀ꦏꦸ​ꦢꦺꦮꦺ꧈​ꦲꦮꦶꦠ꧀ꦲꦏꦸ​ꦱꦶꦁ​ꦤꦸꦤ꧀ꦠꦸꦤ꧀ꦢꦺꦏ꧀ꦤꦺꦤꦁꦢꦭꦤ꧀ꦤꦺ​ꦒꦸꦱ꧀ꦠꦶ​꧈​ꦪ​ꦤꦁꦱꦼꦠꦿꦥꦤ꧀ꦏꦺꦤꦺ​꧉​ ¹¹ꦎꦤꦺꦱꦶꦩꦸꦱ꧀ꦲꦶꦏꦶ​ꦩꦲꦸꦤꦺ​ꦲꦺꦴꦫ​ꦏꦁꦒꦺꦴ​ꦒꦮꦺ​ꦲꦥꦲꦥ​ꦏꦁꦒꦺꦴ​ꦏꦺꦴꦮꦺ​꧈​ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦏꦁꦒꦺꦴ​ꦒꦮꦺ​꧈​ꦲꦺꦴꦫ​ꦤꦩꦸꦁ​ꦏꦁꦒꦺꦴ​ꦏꦺꦴꦮꦺ​ꦮꦲꦺ​꧈​ꦤꦁꦔꦶꦁ​ꦲꦸꦒ​ꦏꦁꦒꦺꦴ​ꦲꦏꦸ​꧉​

¹²꧋ꦥꦚ꧀ꦕꦺꦤ꧀ꦢꦺꦏ꧀ꦤꦺꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦠꦏ꧀ꦏꦺꦴꦁꦏꦺꦴꦤ꧀ꦧꦭꦶꦏ꧀ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦩꦸ​꧉​ ¹³ꦏꦉꦥ꧀ꦏꦸ​ꦎꦤꦺꦱꦶꦩꦸꦱ꧀ꦪ​ꦮꦶꦱ꧀ꦧꦺꦤ꧀ꦤꦁꦏꦺꦤꦺ​ꦮꦲꦺ​ꦏꦫꦺꦴ​ꦲꦏꦸ​꧈​ꦢꦢꦶꦤꦺ​ꦧꦶꦱ​ꦢꦢꦶ​ꦮꦏꦶꦭ꧀ꦩꦸ​ꦔꦿꦺꦮꦁꦔꦶ​ꦲꦏꦸ​ꦱꦸꦮꦺꦤꦺ​ꦲꦏꦸ​ꦤꦁꦱꦼꦠꦿꦥꦤ꧀ꦏꦺꦤꦺ​꧉​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦏꦸ​ꦢꦶꦱꦼꦠꦿꦥ꧀ꦗꦭꦂꦫꦤ꧀ꦲꦏꦸ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ¹⁴ꦤꦁꦔꦶꦁ​ꦲꦏꦸ​ꦲꦼꦩꦺꦴꦃ​ꦩꦼꦏ꧀ꦱ​ꦏꦺꦴꦮꦺ​꧉​ꦲꦏꦸ​ꦩꦭꦃ​ꦱꦼꦤꦼꦁ​ꦤꦺꦏ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦲꦏꦸ​ꦏꦸꦮꦶ​ꦱꦁꦏꦏꦉꦥ꧀ꦩꦸ​ꦢꦺꦮꦺ꧉​ꦩꦸꦭꦤꦺ​ꦲꦏꦸ​ꦪ​ꦤꦼꦩ꧀ꦧꦸꦁ​ꦩꦫꦁ​ꦏꦺꦴꦮꦺ​ꦤ꧀ꦢꦶꦱꦶꦏ꧀꧈​

¹⁵꧋ꦏꦺꦴꦮꦺ​ꦏꦺꦭꦁꦔꦤ꧀ꦎꦤꦺꦱꦶꦩꦸꦱ꧀ꦱꦼꦢꦺꦭꦺꦴꦏ꧀ ꦤꦁꦔꦶꦁ​ꦩꦼꦤꦮ​ꦮꦲꦺ​ꦱꦲꦶꦏꦶ​ꦢꦺꦏ꧀ꦤꦺꦧꦏꦭ꧀ꦤꦁꦔ꧀ꦒꦺꦴꦤ꧀ꦩꦸ​ꦩꦼꦤꦺꦃ​ꦱ꧀ꦭꦮꦱ꧀ꦱꦺ꧉​ ¹⁶ꦱꦲꦶꦏꦶ​ꦢꦺꦏ꧀ꦤꦺꦢꦸꦢꦸ​ꦩꦸꦁ​ꦱ꧀ꦭꦥ꦳꧀ꦮꦲꦺ​꧈​ꦤꦁꦔꦶꦁ​ꦔꦸꦁꦏꦸꦭ꧀ꦭꦶ​ꦏꦸꦮꦶ​꧈​ꦢꦺꦏ꧀ꦤꦺꦱꦲꦶꦏꦶ​ꦱꦼꦢꦸꦭꦸꦂꦩꦸꦲꦶꦁ​ꦥꦽꦕꦪ​ꦭꦤ꧀ꦲꦶꦁ​ꦏꦠꦿꦺꦱ꧀ꦤꦤ꧀꧈​ꦲꦏꦸ​ꦠꦿꦺꦱ꧀ꦤꦧꦔꦼꦠ꧀ꦩꦫꦁ​ꦎꦤꦺꦱꦶꦩꦸꦱ꧀ ꦏꦺꦴꦮꦺ​ꦩꦼꦱ꧀ꦠꦶꦪ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦏꦸ​ꦠꦿꦺꦱ꧀ꦤꦤꦺꦩꦫꦁ​ꦢꦺꦏ꧀ꦤꦺ꧈​ꦲꦮꦶꦠ꧀ꦏꦸꦮꦶ​ꦱ꧀ꦭꦥ꦳꧀ꦩꦸꦢꦺꦮꦺꦭꦤ꧀ꦢꦺꦏ꧀ꦤꦺꦥꦽꦕꦪ​ꦲꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

¹⁷꧋ꦩꦸꦭꦤꦺ​꧈​ꦤꦺꦏ꧀ꦏꦺꦴꦮꦺ​ꦠꦼꦤꦤ꧀ꦔꦏꦸ​ꦲꦏꦸ​ꦲꦶꦏꦶ​ꦏꦚ꧀ꦕꦩꦸ​ꦠꦸꦁꦒꦭ꧀ꦥꦽꦕꦪ​꧈​ꦎꦤꦺꦱꦶꦩꦸꦱ꧀ꦪ​ꦢꦶꦠꦩ꧀ꦥ​ꦩꦼꦤꦺꦃ​ꦏꦪ​ꦲꦼꦁꦒꦺꦴꦤ꧀ꦩꦸ​ꦤꦩ꧀ꦥ​ꦲꦏꦸ​꧉​ ¹⁸ꦤꦺꦏ꧀ꦢꦺꦏ꧀ꦤꦺꦤ꧀ꦢꦸꦮꦺꦱꦭꦃ​ꦲꦥ​ꦤ꧀ꦢꦸꦮꦺꦲꦸꦠꦁ​ꦏꦫꦺꦴ​ ꦏꦺꦴꦮꦺ​꧈​ꦲꦏꦸ​ꦱꦶꦁ​ꦠꦁꦒꦸꦁ​꧉​ ¹⁹ꦲꦏꦸ​꧈​ꦦꦈꦭꦸꦱ꧀ ꦲꦏꦸ​ꦢꦺꦮꦺꦱꦶꦁ​ꦤꦸꦭꦶꦱ꧀ꦭꦪꦁ​ꦲꦶꦏꦶ​꧈​ꦲꦏꦸ​ꦱꦒꦸꦃ​ꦲꦩ꧀ꦧꦪꦂ​꧉​ꦲꦏꦸ​ꦲꦺꦴꦫ​ꦲꦸꦱꦃꦔꦺꦭꦶꦁꦔꦏꦺꦧꦧ꧀ꦲꦸꦠꦁꦩꦸ​ꦩꦫꦁ​ꦲꦏꦸ​꧈​ꦪꦏꦸꦮꦶ​ꦲꦸꦫꦶꦥ꧀ꦩꦸ​ꦢꦺꦮꦺ꧈​ꦲꦮꦶꦠ꧀ꦲꦏꦸ​ꦱꦶꦁ​ꦤꦸꦤ꧀ꦠꦸꦤ꧀ꦏꦺꦴꦮꦺ​ꦤꦁꦢꦭꦤ꧀ꦤꦺ​ꦒꦸꦱ꧀ꦠꦶ​꧉​ ²⁰ꦥ꦳ꦶꦭꦺꦩꦺꦴꦤ꧀ꦱꦼꦢꦸꦭꦸꦂꦏꦸ​꧈​ꦲꦏꦸ​ꦒꦼꦤ꧀ꦠꦺꦤ꧀ꦢꦶꦠꦸꦭꦸꦁꦔꦶ​꧉​ꦲꦮꦏ꧀ꦏꦺ​ꦢꦺꦮꦺꦠꦸꦁꦒꦭ꧀ꦥꦽꦕꦪ​ꦲꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ ꦲꦏꦸ​ꦲꦩ꧀ꦧꦺꦴꦏ꧀ꦢꦶꦧꦔꦸꦤ꧀꧈​

²¹꧋ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​꧈​ꦲꦮꦶꦠ꧀ꦲꦏꦸ​ꦥꦽꦕꦪ​ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦧꦏꦭ꧀​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦼꦚ꧀ꦗꦭꦸꦏ꧀ꦏꦸ​꧉​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦧꦏꦭ꧀ꦤꦩ꧀ꦥ​ꦎꦤꦺꦱꦶꦩꦸꦱ꧀ꦭꦤ꧀ꦧꦏꦭ꧀ꦒꦼꦩꦠꦶ​ꦩꦫꦁ​ꦢꦺꦏ꧀ꦤꦺ꧉​ ²²ꦏꦼꦗꦧ​ꦱꦁꦏꦏꦸꦮꦶ​꧈​ꦲꦏꦸ​ꦥꦽꦕꦪ​ꦤꦺꦏ꧀ꦱꦁꦏꦥꦤ꧀ꦢꦺꦴꦔꦩꦸ​ꦲꦏꦸ​ꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦼꦠꦿꦥꦤ꧀ꦏꦺꦤꦺ​꧉​ꦢꦢꦶꦤꦺ​ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦧꦏꦭ꧀ꦏꦼꦥꦼꦠꦸꦏ꧀ꦏꦫꦺꦴ​ꦏꦺꦴꦮꦺ​꧉​ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ ꦲꦏꦸ​ꦩꦺꦴꦭꦃꦲꦶꦢꦶꦕꦮꦶꦱ꧀ꦱꦏꦺ​ꦏꦩꦂ​꧉​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

²³꧋ꦱꦼꦢꦸꦭꦸꦂ​ꦌꦥꦥ꦳ꦿꦱ꧀ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦢꦺꦏ꧀ꦤꦺꦢꦶꦱꦼꦠꦿꦥ꧀ꦧꦉꦁ​ꦏꦫꦺꦴ​ꦲꦏꦸ​ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀꧈​ ²⁴ꦏꦚ꧀ꦕꦏꦚ꧀ꦕꦏꦸ​ꦱꦶꦁ​ꦚꦩ꧀ꦧꦸꦠ꧀ꦠꦏꦫꦺꦴ​ꦲꦏꦸ​꧈​ꦏꦪ​ꦩꦂꦏꦸꦱ꧀ ꦄꦫꦶꦱ꧀ꦠꦂꦏꦸꦱ꧀ ꦢꦺꦩꦱ꧀ꦭꦤ꧀ꦭꦸꦏꦱ꧀ꦲꦸꦒ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀꧈​

²⁵꧋ꦕꦸꦏꦸꦥ꧀ꦱꦼꦩꦺꦤꦺꦭꦪꦁꦏꦸꦲꦶꦏꦶ꧉​

꧋ꦩꦸꦒꦩꦸꦒꦒꦸꦱ꧀ꦠꦶꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀

↑ ↑ ↑

← ꦠꦶꦠꦸꦱ꧀

ꦆꦧꦿꦤꦶ →