Kakawin Arjunawiwāha/Pupuh 24
Pupuh 24 – Puṣpasañcaya 
1.
- a. prāpta ri lambung ikang girirāja kidul suranātha sĕnāddha sanggraha
- b. āpan awās pangapuyni musuhnira tut gĕgĕring gigiring gunung midĕr
- c. sāk sira sang kahawan kahalâlaradan kapapag tĕkaping surāpsara
- d. śeṣanikang tinawan pinangan hinañang tĕkaping bala daitya rākṣasa
2.
- a. tan dwa tĕkâlad-alad Maṇimāntakarāja manalyani sāhasângusī
- b. tan patuhan waragang-waragang kalawan panĕngĕrnya tatan pasañjata
- c. kagyat anon magĕlar makukud ta ya mangkin atambĕh atimbun akrama
- d. byūha surādhipa kātara sök makarānana yêka dumehnya kāṇḍĕga
3.
- a. de suranātha madan sira sāraśarīra huwus pinakāngganing gĕlar
- b. mukhya tĕmĕn nṛpaputra Dhanañjaya pangharĕping sura ring raṇāngga
- c. Citrarathâdhikaramitra nirâparĕk ing ratha sāra n umunggu ring liman
- d. mwang surasanggha gajāśwarathanya padātisamūha wilangnya sārwuda
4
- a. tĕkwan ikang giri durga tĕgal palagān aratā hinapitnikang jurang
- b. śuṣka kurang bañu pöng wadarā hawaning lĕwu guntur atap tikang watu
- c. pringga jurangnya kakilyan i raryanirân humaḍang humarĕp rikang musuh
- d. sangkaṭa sangkananing mamĕgat-mĕgati pratisāra hanângrĕpêng sukĕt