Kajawen 035
[ Cover ] ꧋ꦎꦁꦏ 35꧈ ꧔꧇ ꦩꦸꦭꦸꦢ꧀꧈ ꦠꦲꦸꦤ꧀ꦗꦶꦩꦏꦶꦂ꧇ ꧑꧘꧕꧘꧇꧈ 1 ꦄꦒꦸꦱ꧀ꦠꦸꦱ꧀ 1927꧈ ꦠꦲꦸꦤ꧀ II. ꦏꦗꦮꦺꦤ꧀
ꦏꦮꦼꦢꦭ꧀ꦭꦏꦼꦤ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦼꦩꦶꦱ꧀꧉
ꦧꦪꦫꦤꦶꦥꦸꦤ꧀ꦏꦱꦸꦮꦸꦤ꧀ꦫꦸꦩꦶꦪꦶꦤ꧀꧈ꦧꦺꦴꦠꦼꦤ꧀ꦏꦺꦔꦶꦁꦭꦁꦒꦤꦤ꧀ꦏꦶꦫꦁꦱꦏꦶꦁ 3 ꦮꦸꦭꦤ꧀꧉ ꧋ꦗꦸꦫꦸꦔꦫꦁꦲꦢ꧀ꦩꦶꦤꦶꦱ꧀ꦠꦿꦱꦶ ꦧꦭꦺꦥꦸꦱ꧀ꦠꦏ꧈ꦲꦶꦁꦱꦮꦶꦁꦏꦶꦔꦶꦁꦏꦤ꧀ꦠꦺꦴꦂꦥꦭꦶꦱ꧀꧈ ꦠꦶꦭ꧀ꦥꦸꦤ꧀ꦤꦺꦴꦩꦼꦂ 2791 ꦮꦺꦭ꧀ꦠꦼꦦ꦳ꦿꦺꦝꦼꦤ꧀꧉ ꧋ꦒꦼꦝꦺꦴꦁꦒꦺꦩꦶꦤ꧀ꦠꦼꦫꦢ꧀ꦲꦶꦤ꧀ꦱꦸꦫꦧꦪ꧉
꧋ꦲꦶꦁꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦒꦼꦝꦺꦴꦁꦒꦼꦩꦶꦤ꧀ꦠꦼꦫꦢ꧀ꦲꦶꦁꦯꦸꦫꦧꦪ꧉ꦲꦶꦁꦔꦿꦶꦏꦶꦥꦫꦩꦲꦺꦴꦱ꧀ꦱꦒꦼꦢ꧀ꦲꦤꦼꦏ꧀ꦱꦺꦤ꧀ꦤꦶꦥꦶꦪꦩ꧀ꦧꦏ꧀ꦲꦒꦼꦁꦱꦲꦲꦱꦿꦶꦤꦶꦁꦒꦿꦶꦪꦒꦼꦩꦶꦤ꧀ꦠꦼꦥꦸꦤꦶꦏ꧉ |
Ăngka 35, 4 Mulud Taun Jimakir 1858, 1 Agustus[1] 1927, Taun II.
Kajawèn Kawêdalakên sabên dintên Kêmis. Rêgining sêrat kabar punika ing dalêm tigang wulan ... f 1.50, bayaranipun kasuwun rumiyin, botên kenging langganan kirang saking 3 wulan. Juru ngarang - administrasi Bale Pustaka, ing sawingkinging kantor palis, tilpun nomêr 2791 - Wèltêprèdhên. Gêdhong Gêmintê Rad ing Surabaya. [Grafik] Ing nginggil punika gambar gêdhong gêmintê rad ing Surabaya. Ing ngriki para maos sagêd anêksèni piyambak agêng saha asrining griya gêmintê punika. | ||
|
[ 604 ]꧋ꦮꦮꦱ꧀ꦱꦤ꧀ꦠꦸꦩꦿꦥ꧀ꦱꦼꦫꦠ꧀ꦱꦼꦫꦠ꧀ꦲꦁꦒꦶꦠ꧀ꦠꦤ꧀ꦢꦊꦩ꧀ꦱ꧀ꦮꦂꦒꦶꦑꦁꦗꦼꦁꦓꦸꦱ꧀ꦠꦶꦦꦔꦺꦫꦤ꧀ꦲꦢꦶꦦꦠꦶꦲꦂꦪꦩꦁꦏꦸꦟꦓꦫ IV. ꧋ꦩꦶꦤꦺꦴꦁꦏꦥꦼꦥꦺꦁꦔꦼꦠ꧀꧈ (ꦩꦶꦠꦸꦫꦸꦠ꧀ꦏꦫꦔꦤ꧀ꦤꦶꦥꦸꦤ꧀ Dr. Th. Pigeaud). ꧋ꦕꦤ꧀ꦝꦏ꧀ꦏꦶꦥꦸꦤ꧀ꦏꦗꦮꦺꦤ꧀ꦎꦁꦏ 34. ꧋ꦱꦼꦫꦠ꧀ꦥꦶꦠꦸꦠꦸꦂꦥꦸꦤꦶꦏꦮꦺꦴꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦧꦧ꧀꧈ꦏꦥꦺꦫꦁꦥꦺꦫꦁꦩꦤꦸꦠ꧀ꦒꦺꦴꦭꦺꦴꦁꦒꦺꦴꦭꦺꦴꦁꦔꦤ꧀ꦤꦶꦁꦠꦶꦪꦁꦲꦶꦁꦏꦁꦏꦠꦸꦗꦸ(ꦱꦤ꧀ꦠꦤ꧈ꦥꦸꦁꦒꦮ꧈ꦥꦫꦲꦸꦥ꧀ꦱꦶꦂꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀)꧈ꦲꦶꦱꦶꦤꦶꦥꦸꦤ꧀ꦥꦶꦠꦸꦠꦸꦂꦮꦲꦸꦲꦶꦁꦏꦁꦏꦛꦃꦏꦛꦃꦲꦮꦂꦤꦶꦥꦩꦿꦪꦺꦴꦒꦶꦝꦠꦼꦁꦏꦲꦸꦠꦩꦺꦤ꧀꧈ꦲꦶꦁꦏꦁꦒꦒꦪꦸꦠꦤ꧀ꦏꦭꦶꦪꦤ꧀ꦒꦼꦱꦁꦔꦶꦁꦠꦶꦪꦁꦲꦶꦁꦱꦢꦶꦤ꧀ꦠꦼꦤ꧀ꦢꦶꦤ꧀ꦠꦼꦤ꧀꧈ꦱꦂꦠꦏꦛꦃꦲꦶꦁꦏꦁꦏꦠꦼꦫꦁꦔꦏꦼꦤ꧀ꦔꦁꦒꦺꦲꦸꦥꦩꦶꦲꦸꦠꦮꦶꦠꦸꦠꦸꦭꦢꦤ꧀ꦩꦶꦫꦶꦠ꧀ꦝꦠꦼꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦏꦺꦴꦢꦿꦠ꧀꧉ꦱꦠꦸꦁꦒꦭ꧀ꦠꦸꦁꦒꦭ꧀ꦭꦶꦁꦲꦁꦒꦶꦠ꧀ꦠꦤ꧀ꦲꦶꦱꦶꦥꦶꦮꦸꦭꦁꦠꦼꦩ꧀ꦧꦸꦁꦔꦶꦁꦒꦸꦫꦸ(ꦲꦶꦁꦔꦿꦶꦏꦶ꧇ꦏꦁꦗꦼꦁꦓꦸꦱ꧀ꦡꦶꦥꦶꦪꦩ꧀ꦧꦏ꧀)ꦝꦠꦼꦁꦥꦫꦩꦸꦫꦶꦢ꧀ꦢꦶꦥꦸꦤ꧀꧈ꦲꦤꦔꦶꦁꦮꦂꦤꦶꦥꦶꦠꦸꦠꦸꦂꦭꦸꦒꦸ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦲꦚ꧀ꦗꦭꦺꦤ꧀ꦠꦿꦺꦃꦲꦏꦼꦤ꧀ꦥꦩꦁꦒꦶꦃ꧉ ꧋ꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦲꦶꦁꦏꦁꦭꦁꦏꦸꦁꦱꦼꦥꦸꦃꦠꦶꦤꦶꦩ꧀ꦧꦁꦏꦫꦁꦔꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦲꦶꦁꦒꦶꦃꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦝꦥꦸꦂꦥꦶꦠꦸꦠꦸꦂ꧉ꦏꦢꦺꦴꦱ꧀ꦠꦱꦼꦫꦠ꧀ꦮꦸꦭꦔꦿꦺꦃ꧉ꦩꦼꦁꦒꦃꦱꦸꦫꦲꦺꦴꦱ꧀ꦲꦶꦁꦏꦁꦢꦢꦺꦴꦱ꧀ꦲꦶꦱꦶꦤꦶꦥꦸꦤ꧀ꦱꦼꦫꦠ꧀ꦥꦶꦠꦸꦠꦸꦂꦏꦫꦁꦔꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦮꦲꦸꦏꦺꦔꦶꦁꦏꦮꦱ꧀ꦠꦤꦤ꧀ꦱꦩꦶꦏꦺꦩꦮꦺꦴꦤ꧀ꦏꦭꦶꦪꦤ꧀ꦱꦼꦫꦠ꧀ꦮꦸꦭꦔꦿꦺꦃ꧈ꦗꦭꦂꦫꦤ꧀ꦱꦩꦶꦢꦺꦤꦺꦔꦸꦒꦼꦩ꧀ꦲꦸꦒꦼꦩ꧀ꦩꦶꦝꦼꦝꦱꦂꦫꦶꦁꦏꦲꦸꦠꦩꦤ꧀ꦩꦶꦠꦸꦫꦸꦠ꧀ꦥꦩꦁꦒꦶꦃꦆꦱ꧀ꦭꦩ꧀ꦗꦮꦶ꧉ꦤꦩꦸꦁꦏꦺꦩꦮꦺꦴꦤ꧀ꦩꦤꦮꦶꦢꦶꦥꦸꦤ꧀ꦠꦶꦠꦶꦏ꧀ꦠꦶꦠꦶꦏ꧀꧈ꦏꦫꦁꦔꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦏꦢꦺꦴꦱ꧀ꦏꦢꦺꦴꦱ꧀ꦫꦢꦶꦔꦤ꧀ꦠꦼꦥ꧀ꦥꦏꦼꦤ꧀ꦠꦠꦁꦒꦼꦭ꧀ꦭꦤ꧀ꦤꦶꦁꦥꦫꦲꦒꦼꦁꦲꦁꦒꦺꦤ꧀ꦤꦶꦥꦸꦤ꧀ꦔꦽꦏ꧀ꦱꦏꦫꦲꦂꦗꦤ꧀ꦤꦶꦁꦠꦶꦪꦁꦲꦭꦶꦠ꧀꧉ꦱꦼꦫꦠ꧀ꦥꦶꦠꦸꦠꦸꦂꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦮꦲꦸꦤꦩꦸꦁꦱꦩꦶꦠꦸꦩꦿꦥ꧀ꦥꦱꦿꦮꦸꦁꦔꦤ꧀ꦤꦶꦁꦒꦼꦱꦁꦱꦱꦉꦁꦔꦤ꧀꧉ꦱꦼꦫꦠ꧀ꦲꦶꦱꦶꦏꦮꦿꦸꦃꦧꦠꦺꦴꦱ꧀ꦲꦶꦁꦏꦁꦏꦕꦫꦶꦪꦺꦴꦱ꧀ꦱꦏꦼꦤ꧀ꦲꦁꦒꦶꦠ꧀ꦠꦤ꧀ꦩꦁꦏꦸꦟꦓꦫꦤ꧀ IV ꦲꦶꦁꦒꦶꦃꦮꦺꦴꦤ꧀ꦠꦼꦤ꧀꧈ꦲꦤꦔꦶꦁꦱꦼꦩꦸꦤꦶꦥꦸꦤ꧀ꦏꦭꦶꦤ꧀ꦠꦸ꧉ ꧋ꦱꦼꦫꦠ꧀ꦱꦼꦫꦠ꧀ꦥꦶꦠꦸꦠꦸꦂꦮꦲꦸꦧꦱꦤꦶꦥꦸꦤ꧀ꦏꦊꦧꦼꦠ꧀ꦥꦿꦱꦗ꧈ꦧꦺꦴꦠꦼꦤ꧀ꦤꦶꦪꦠ꧀ꦏꦁꦒꦺꦔꦺꦧꦂꦫꦏꦼꦤ꧀ꦏꦱꦒꦼꦢ꧀ꦢꦤ꧀ꦲꦶꦁꦧꦧ꧀ꦥꦔꦁꦒꦺꦤ꧀ꦤꦶꦁꦠꦼꦩ꧀ꦧꦸꦁ꧈ꦩꦶꦭꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦶꦥꦸꦤ꧀ꦏꦮꦶꦲꦶꦁꦒꦶꦃꦧꦺꦴꦠꦼꦤ꧀ꦏꦛꦃ꧈ꦧꦺꦢꦱꦔꦼꦠ꧀ꦏꦭꦶꦪꦤ꧀ꦲꦶꦁꦏꦁꦱꦼꦫꦠ꧀ꦱꦼꦫꦠ꧀ꦫꦸꦫꦸꦩ꧀ꦥꦏ꧀ꦏꦤ꧀꧉ ꧋ꦱꦼꦫꦠ꧀ꦱꦼꦫꦠ꧀ꦏꦫꦁꦔꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦆꦮ꦳꧀ꦲꦶꦁꦏꦁꦱꦤꦺꦱ꧀ꦒꦺꦴꦭꦺꦴꦁꦔꦤ꧀꧈ꦤꦔꦶꦁꦏꦛꦃꦲꦺꦩ꧀ꦥꦼꦂꦫꦶꦥꦸꦤ꧀ꦏꦭꦶꦪꦤ꧀ꦱꦼꦫꦠ꧀ꦥꦶꦠꦸꦠꦸꦂꦮꦲꦸ꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦲꦮꦂꦤꦶꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦩꦮꦶꦱꦶꦤꦮꦸꦁꦲꦶꦁꦱꦼꦏꦂ꧈ꦲꦶꦁꦏꦁꦏꦛꦃꦠꦸꦩꦸꦗꦸꦝꦠꦼꦁꦥꦫꦥꦸꦠꦿꦲꦸꦠꦮꦶꦱꦤ꧀ꦠꦤ꧉ꦱꦼꦫꦠ꧀ꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦥꦸꦤꦶꦏꦭꦶꦩꦿꦃꦲꦶꦥꦸꦤ꧀ꦲꦸꦒꦶꦱꦩꦶꦲꦶꦱꦶꦥꦶꦠꦸꦠꦸꦂ꧈ꦧꦺꦴꦠꦼꦤ꧀ꦤꦶꦥꦸꦤ꧀ꦲꦶꦁꦒꦶꦃꦲꦶꦱꦶꦮꦮꦱ꧀ꦱꦤ꧀ꦤꦶꦁꦥꦁꦒꦭꦶꦃ꧈ꦲꦤꦔꦶꦁꦩꦼꦱ꧀ꦛꦶꦮꦺꦴꦤ꧀ꦠꦼꦤ꧀ꦱꦭꦃꦱꦠꦸꦁꦒꦶꦭ꧀ꦭꦶꦁꦧꦧ꧀ꦲꦶꦁꦏꦁꦢꦢꦺꦴꦱ꧀ꦭꦤ꧀ꦠꦂꦫꦤ꧀꧈ꦩꦶꦭꦭꦗꦼꦁꦮꦺꦴꦤ꧀ꦠꦼꦤ꧀ꦲꦺꦩ꧀ꦥꦼꦂꦫꦶꦥꦸꦤ꧀ꦱꦮꦠꦮꦶꦱ꧀ꦏꦭꦶꦪꦤ꧀ꦲꦁꦒꦶꦠ꧀ꦠꦤ꧀ꦲꦶꦁꦏꦁꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦤꦩꦸꦁꦩꦤꦮꦶꦏꦼꦊꦉꦱ꧀ꦱꦤ꧀ꦏꦭꦩꦁꦱꦤꦶꦥꦸꦤ꧀꧉ꦧꦱꦤꦶꦥꦸꦤ꧀ꦱꦼꦫꦠ꧀ꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦮꦲꦸꦏꦛꦃꦲꦺꦩ꧀ꦥꦼꦂꦫꦶꦥꦸꦤ꧀ꦏꦭꦶꦪꦤ꧀ꦲꦶꦁꦏꦁꦏꦲꦁꦒꦺꦮꦺꦴꦤ꧀ꦠꦼꦤ꧀ꦲꦶꦁꦥꦶꦠꦸꦠꦸꦂ꧈ꦲꦤꦔꦶꦁꦮꦺꦴꦤ꧀ꦠꦼꦤ꧀ꦲꦸꦒꦶꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦲꦶꦁꦏꦁꦫꦶꦤꦏꦶꦠ꧀ꦮꦁꦱꦭ꧀ꦭꦤ꧀꧈ꦢꦢꦺꦴꦱ꧀ꦩꦶꦫꦶꦧ꧀ꦏꦭꦶꦪꦤ꧀ꦲꦁꦒꦶꦠ꧀ꦠꦤ꧀ꦲꦶꦁꦏꦁꦔꦺꦧꦂꦫꦏꦼꦤ꧀ꦥꦩ꧀ꦧꦸꦱꦤꦤꦶꦁꦧꦱ꧉ꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦱꦶꦤꦮꦸꦁꦲꦶꦁꦱꦼꦏꦂꦮꦲꦸꦏꦺꦔꦶꦁꦏꦮꦱ꧀ꦠꦤ꧀ꦤꦤ꧀ꦲꦢꦲꦢꦤꦶꦥꦸꦤ꧀ꦏꦁꦗꦼꦁ [ 605 ]ꦓꦸꦱ꧀ꦡꦶꦩꦁꦏꦸꦟꦓꦫ IV ꦥꦶꦪꦩ꧀ꦧꦏ꧀꧉ꦲꦶꦁꦒꦶꦃꦊꦉꦱ꧀ꦲꦶꦁꦱꦢꦺꦫꦺꦁꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦢꦲꦢꦮꦲꦸꦲꦸꦒꦶꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦼꦫꦠ꧀ꦏꦶꦤ꧀ꦠꦸꦤ꧀ꦤꦤ꧀ꦩꦮꦶꦱꦼꦏꦂ꧈ꦲꦤꦔꦶꦁꦤꦩꦸꦁꦩꦤꦮꦶꦥꦚ꧀ꦕꦺꦤ꧀ꦢꦢꦺꦴꦱ꧀ꦱꦥꦺꦫꦁꦔꦤ꧀ꦤꦶꦁꦱꦼꦫꦠ꧀ꦱꦼꦫꦠ꧀ꦕꦫꦶꦪꦺꦴꦱ꧀ꦲꦶꦁꦏꦁꦏꦱꦼꦏꦂꦫꦏꦼꦤ꧀꧉ ꧋ꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦲꦶꦁꦏꦁꦱꦒꦺꦴꦭꦺꦴꦁꦔꦤ꧀ꦩꦭꦶꦃꦧꦧꦒ꧀ꦒꦤ꧀ꦧꦸꦱꦤꦤꦶꦁꦧꦱ꧈ꦲꦶꦁꦒꦶꦃꦥꦸꦤꦶꦏꦱꦢꦪꦤꦶꦁꦲꦁꦒꦶꦠ꧀ꦠꦤ꧀꧈ꦲꦶꦁꦏꦁꦥꦔꦿꦏꦶꦠ꧀ꦠꦶꦥꦸꦤ꧀ꦩꦮꦶꦫꦶꦤꦼꦁꦒꦉꦁꦒ꧉ꦲꦁꦒꦶꦠ꧀ꦠꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦲꦶꦁꦏꦁꦧꦧꦂꦥꦶꦱꦤ꧀ꦲꦮꦸꦗꦸꦢ꧀ꦮꦁꦱꦭ꧀ꦭꦤ꧀꧈ꦱꦂꦠꦏꦼꦠꦶꦠꦶꦏ꧀ꦧꦶꦭꦶꦃꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦏꦤ꧀ꦛꦶꦥꦔꦠꦺꦴꦱ꧀ꦲꦠꦺꦴꦱ꧀ꦩꦸꦫꦶꦃꦫꦸꦤ꧀ꦠꦸꦠ꧀ꦠꦶꦁꦱꦢꦪꦤꦶꦥꦸꦤ꧀꧉ ꧋ꦏꦗꦮꦶꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦲꦶꦁꦏꦁꦲꦮꦂꦤꦶꦱꦼꦏꦂꦩꦕꦥꦠ꧀꧈ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦲꦸꦒꦶꦮꦺꦴꦤ꧀ꦠꦼꦤ꧀ꦲꦶꦁꦏꦁꦱꦶꦤꦮꦸꦁꦲꦶꦁꦱꦼꦏꦂꦠꦼꦔꦃꦲꦤ꧀ꦱꦂꦠꦱꦼꦏꦂꦲꦒꦼꦁ꧈ꦲꦶꦁꦏꦁꦱꦊꦉꦱ꧀ꦱꦶꦥꦸꦤ꧀ꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦏꦼꦭꦶꦩꦿꦃ꧉ꦩꦭꦃꦏꦁꦗꦼꦁꦓꦸꦱ꧀ꦡꦶꦲꦸꦒꦶꦪꦱꦠꦼꦩ꧀ꦧꦁꦲꦺꦁꦒꦭ꧀꧈ꦱꦮꦼꦤꦺꦃꦩꦶꦫꦶꦧ꧀ꦠꦼꦩ꧀ꦧꦁꦲꦶꦁꦏꦁꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀꧈ꦱꦮꦼꦤꦺꦃꦩꦭꦶꦃꦲꦮꦸꦗꦸꦢ꧀ꦠꦼꦩ꧀ꦧꦁꦱꦸꦁꦱꦸꦤ꧀꧈ꦏꦲꦺꦱ꧀ꦛꦏꦢꦺꦴꦱ꧀ꦥꦶꦠꦏꦺꦤ꧀ꦭꦤ꧀ꦮꦁꦱꦸꦭ꧀ꦭꦤ꧀꧉ ꧋ꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦩꦛꦸꦏ꧀ꦏꦶꦥꦸꦤ꧀ꦩꦤꦮꦶꦏꦭꦒꦺꦴꦑꦏꦼꦤ꧀꧈ꦩꦭꦃꦏꦛꦃꦲꦶꦁꦏꦁꦧꦏꦸꦤꦶꦥꦸꦤ꧀ꦥꦚ꧀ꦕꦺꦤ꧀ꦏꦁꦒꦺꦒꦺꦫꦺꦴꦁꦔꦤ꧀꧉ꦒꦼꦤ꧀ꦝꦶꦁꦲꦶꦁꦏꦁꦢꦢꦺꦴꦱ꧀ꦗꦺꦴꦝꦺꦴꦤꦶꦥꦸꦤ꧀ꦒꦺꦫꦺꦴꦁꦔꦤ꧀ꦲꦁꦒꦶꦠ꧀ꦠꦤ꧀ꦩꦁꦏꦸꦟꦓꦫꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦏꦁꦒꦼꦤ꧀ꦝꦶꦁꦭꦩꦶꦮꦺꦴꦤ꧀ꦠꦼꦤ꧀ꦲꦶꦁꦏꦁꦥꦚ꧀ꦕꦺꦤ꧀ꦪꦱꦤ꧀ꦲꦺꦁꦒꦭ꧀꧈ꦲꦸꦒꦶꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦥꦶꦪꦩ꧀ꦧꦏ꧀꧈ꦧꦺꦴꦠꦼꦤ꧀ꦤꦶꦥꦸꦤ꧀ꦲꦶꦁꦒꦶꦃꦩꦼꦏ꧀ꦱꦏꦤ꧀ꦛꦶꦥꦶꦠꦼꦢꦃꦲꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶ꧉ ꧋ꦱꦸꦫꦲꦺꦴꦱ꧀ꦱꦶꦁꦒꦺꦫꦺꦴꦁꦔꦤ꧀ꦮꦲꦸꦩꦮꦶꦱꦼꦢꦾꦤꦶꦁꦥꦁꦒꦭꦶꦃꦤꦭꦶꦏꦥꦔꦁꦒꦶꦠ꧀ꦠꦶꦥꦸꦤ꧀꧈ꦲꦶꦁꦏꦁꦏꦛꦃꦏꦛꦃꦲꦮꦸꦗꦸꦢ꧀ꦮꦼꦝꦂꦫꦶꦁꦫꦲꦺꦴꦱ꧀ꦱꦶꦥꦸꦤ꧀ꦩꦤꦃꦒꦤ꧀ꦢꦿꦸꦁꦝꦠꦼꦁꦮꦤꦶꦠ꧈ꦲꦤꦔꦶꦁꦮꦺꦴꦤ꧀ꦠꦼꦤ꧀ꦲꦸꦒꦶꦲꦶꦁꦏꦁꦤꦩꦸꦁꦔꦿꦸꦩ꧀ꦥꦏꦮꦶꦠ꧀ꦮꦶꦠ꧀ꦠꦤ꧀꧈ꦠꦸꦠꦸꦮꦸꦲꦤ꧀꧈ꦱꦼꦱꦼꦏꦫꦤ꧀ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦩꦮꦶꦏꦱꦼꦩ꧀ꦥꦺꦠ꧀ꦠꦏꦼꦤ꧀ꦝꦠꦼꦁꦫꦲꦺꦴꦱ꧀ꦲꦸꦠꦮꦶꦏꦪꦸꦔꦾꦸꦤ꧀ꦤꦶꦁꦩꦤꦃ꧉ ꧋ꦲꦶꦁꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦥꦸꦤꦶꦏꦏꦼꦠꦶꦔꦭ꧀ꦱꦔꦼꦠ꧀ꦏꦛꦲꦶꦁꦱꦼꦱꦼꦉꦥ꧀ꦥꦤ꧀ꦱꦂꦠꦱꦼꦁꦱꦼꦩ꧀ꦩꦶꦥꦸꦤ꧀ꦱ꧀ꦮꦂꦒꦶꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦝꦠꦼꦁꦏꦺꦴꦢꦿꦠ꧀ꦠꦶꦁꦲꦭꦩ꧀꧉ ꧋ꦱꦢꦔꦸꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦏꦥꦶꦁꦆꦮ꦳꧀ꦔꦁꦒꦶꦠ꧀ꦲꦁꦒꦶꦠ꧀꧈ꦮꦶꦮꦶꦠ꧀ꦏꦮꦶꦠ꧀ꦠꦤ꧀ꦩꦶꦭꦱꦩ꧀ꦥꦸꦤ꧀ꦔꦁꦒꦶꦠ꧀ꦲꦁꦒꦶꦠ꧀ꦫꦸꦫꦸꦩ꧀ꦥꦏꦤ꧀ꦩꦏꦠꦼꦤ꧀ꦮꦲꦸ꧈ꦲꦤꦔꦶꦁꦲꦶꦁꦏꦁꦏꦛꦃꦏꦛꦃꦱꦩꦶꦲꦁꦒꦶꦠ꧀ꦠꦤ꧀ꦲꦶꦁꦱꦧꦏ꧀ꦢꦤꦶꦥꦸꦤ꧀ꦠꦲꦸꦤ꧀ꦗꦮꦶ 1800 ꦲꦸꦠꦮꦶꦠꦲꦸꦤ꧀ꦮꦭꦤ꧀ꦢꦶ 1871꧉ꦲꦁꦒꦶꦠ꧀ꦠꦤ꧀ꦲꦶꦁꦏꦁꦏꦁꦒꦺꦒꦺꦫꦺꦴꦁꦔꦤ꧀ꦮꦲꦸꦫꦢꦶꦮꦺꦴꦤ꧀ꦠꦼꦤ꧀ꦲꦺꦩ꧀ꦥꦼꦂꦫꦶꦥꦸꦤ꧀ꦏꦭꦶꦪꦤ꧀ꦲꦶꦁꦏꦁꦢꦢꦺꦴꦱ꧀ꦫꦸꦫꦸꦩ꧀ꦥꦏ꧀ꦏꦤ꧀ꦤꦶꦁꦭꦩ꧀ꦥꦃ꧈ꦧꦺꦢꦱꦔꦼꦠ꧀ꦏꦭꦶꦪꦤ꧀ꦲꦶꦁꦏꦁꦲꦶꦱꦶꦥꦶꦠꦸꦠꦸꦂ꧉ ꧋ꦒꦼꦒꦺꦫꦺꦴꦁꦔꦤ꧀ꦮꦲꦸꦏꦺꦔꦶꦁꦏꦮꦱ꧀ꦠꦤꦤ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦲꦶꦁꦏꦁꦥꦼꦛꦶꦁꦔꦤ꧀ꦱꦂꦠꦩꦸꦂꦤꦶꦱꦪꦼꦏ꧀ꦠꦺꦴꦱ꧀꧉ꦲꦶꦁꦔꦿꦶꦏꦸꦏꦼꦠꦶꦔꦭ꧀ꦭꦸꦲꦸꦂꦫꦶꦁꦥꦁꦒꦭꦶꦃ꧈ꦲꦭꦸꦱ꧀ꦭꦤ꧀ꦊꦩ꧀ꦧꦠ꧀ꦠꦶꦁꦫꦲꦺꦴꦱ꧀ꦱꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦥꦸꦤꦥꦢꦺꦤꦺꦱꦸꦒꦶꦃꦲꦶꦥꦸꦤ꧀ꦲꦁꦒꦶꦠ꧀꧈ꦱꦩ꧀ꦥꦸꦤ꧀ꦩꦛꦸꦏ꧀ꦱꦔꦼꦠ꧀ꦠꦸꦩꦿꦥ꧀ꦥꦶꦁꦏꦒꦸꦤꦤ꧀ꦏꦿꦠꦺꦴꦤ꧀ꦲꦶꦁꦱꦸꦫꦏꦂꦠ꧈ꦲꦶꦁꦏꦁꦏꦭꦱꦩꦤ꧀ꦠꦼꦤ꧀ꦫꦢꦶꦩꦸꦩ꧀ꦧꦸꦭ꧀ꦩꦭꦶꦃꦲꦶꦁꦱꦮꦠꦮꦶꦱ꧀꧉ꦒꦼꦒꦺꦫꦺꦴꦁꦔꦤ꧀ꦱꦂꦠꦒꦼꦤ꧀ꦝꦶꦁꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦮꦲꦸꦏꦺꦔꦶꦁꦏꦮꦱ꧀ꦠꦤꦤ꧀ꦮꦼꦝꦂꦫꦶꦁꦫꦲꦺꦴꦱ꧀ꦱꦶꦥꦸꦤ꧀ꦤꦒꦫꦶꦱꦸꦫꦏꦂꦠꦲꦶꦁꦧꦧ꧀ꦏꦒꦸꦤꦤ꧀ꦲꦶꦁꦏꦁꦱꦏꦼꦭꦁꦏꦸꦁꦲꦭꦸꦱ꧀꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦲꦚ꧀ꦗꦭꦫꦶꦏꦺꦉꦩ꧀ꦭꦤ꧀ꦏꦺꦴꦫꦸꦥꦶꦁꦩꦤꦃ꧉ꦏꦗꦮꦶꦥꦸꦤꦶꦏꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦮꦲꦸꦠꦼꦫꦃꦠꦸꦩꦼꦫꦃꦭꦗꦼꦁꦢꦢꦺꦴꦱ꧀ꦲꦚ꧀ꦕꦼꦂꦲꦚ꧀ꦕꦼꦂꦠꦸꦩꦿꦥ꧀ꦥꦶꦁꦥꦔꦸꦢꦶꦝꦠꦼꦁꦠꦼꦩ꧀ꦧꦁꦱꦂꦠꦒꦼꦤ꧀ꦝꦶꦁ꧉ꦏꦢꦺꦴꦱ꧀ꦢꦺꦤꦺꦥꦔꦸꦢꦶꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ V ꦥꦸꦤꦶꦏꦲꦶꦁꦒꦶꦃꦤꦥꦏ꧀ꦠꦶꦭꦱ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦏꦥꦶꦁ IV꧉ ꧋ꦲꦶꦁꦔꦶꦁꦒꦶꦭ꧀ꦢꦺꦫꦺꦁꦏꦕꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃ [ 606 ]ꦮꦺꦴꦤ꧀ꦠꦼꦤ꧀ꦏꦫꦁꦏꦫꦁꦔꦤ꧀ꦱꦮꦠꦮꦶꦱ꧀ꦲꦶꦁꦏꦁꦏꦲꦏꦼꦤ꧀ꦤꦏꦼꦤ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV꧈ꦤꦔꦶꦁꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦤꦺꦱ꧀ꦠꦥꦏ꧀ꦲꦱ꧀ꦠꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦲꦶꦁꦏꦁꦱꦭꦸꦒꦸ꧈ꦗꦭꦂꦫꦤ꧀ꦧꦺꦴꦏ꧀ꦩꦤꦮꦶꦏꦺꦩꦮꦺꦴꦤ꧀ꦏꦁꦗꦼꦁꦓꦸꦱ꧀ꦡꦶꦤꦩꦸꦁꦲꦸꦫꦸꦤ꧀ꦲꦸꦫꦸꦤ꧀ꦱꦮꦠꦮꦶꦱ꧀꧉ꦏꦫꦁꦔꦤ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦲꦸꦒꦶꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦥꦼꦛꦶꦁꦔꦤ꧀ꦤꦶꦥꦸꦤ꧀ꦲꦶꦁꦏꦁꦥꦚ꧀ꦕꦺꦤ꧀ꦏꦺꦔꦶꦁꦏꦁꦒꦺꦠꦶꦠꦶꦏ꧀ꦏꦤ꧀ꦏꦭꦁꦏꦸꦁꦔꦤ꧀ꦤꦶꦁꦏꦱꦒꦼꦢ꧀ꦢꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦲꦶꦁꦧꦧ꧀ꦔꦁꦒꦶꦠ꧀ꦲꦁꦒꦶꦠ꧀꧉ ꧋ꦩꦼꦁꦒꦃꦲꦶꦁꦏꦁꦢꦢꦺꦴꦱ꧀ꦏꦭꦁꦏꦸꦁꦔꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦆꦮ꦳꧀ꦮꦲꦸꦧꦺꦴꦠꦼꦤ꧀ꦲꦶꦁꦱꦮꦂꦤꦶꦤꦶꦁꦧꦧ꧀ꦔꦁꦒꦶꦠ꧀ꦲꦁꦒꦶꦠ꧀꧈ꦏꦢꦺꦴꦱ꧀ꦠ꧇ꦲꦶꦁꦧꦧ꧀ꦔꦁꦒꦶꦠ꧀ꦕꦫꦶꦪꦺꦴꦱ꧀ꦱꦂꦠꦔꦫꦁꦧꦧꦢ꧀ꦱꦶꦤꦮꦸꦁꦲꦶꦁꦱꦼꦏꦂ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦠꦶꦏ꧀ꦏꦶꦁꦏꦭꦁꦏꦸꦁꦔꦤ꧀ꦤꦶꦥꦸꦤ꧀꧉ꦲꦶꦁꦧꦧ꧀ꦔꦁꦒꦶꦠ꧀ꦱꦼꦫꦠ꧀ꦥꦶꦠꦸꦠꦸꦂꦲꦶꦁꦒꦶꦃꦧꦺꦴꦠꦼꦤ꧀ꦤꦩꦭꦶꦤꦁꦏꦸꦁ꧉ꦱꦼꦫꦠ꧀ꦱꦼꦫꦠ꧀ꦥꦶꦠꦸꦠꦸꦂꦲꦶꦁꦏꦁꦢꦼꦊꦱ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦆꦮ꦳꧀ꦥꦶꦪꦩ꧀ꦧꦏ꧀꧈ꦥꦸꦤꦶꦏꦲꦶꦁꦒꦶꦃꦊꦉꦱ꧀ꦢꦶꦥꦸꦤ꧀ꦲꦗꦶꦲꦗꦶꦲꦶꦁꦲꦏꦛꦃ꧈ꦲꦤꦔꦶꦁꦥꦔꦗꦶꦲꦗꦶꦤꦶꦥꦸꦤ꧀ꦥꦸꦤꦶꦏꦧꦏꦸꦤꦶꦥꦸꦤ꧀ꦗꦭꦂꦫꦤ꧀ꦔꦺꦔꦼꦠ꧀ꦠꦶꦪꦺꦤ꧀ꦪꦱꦤꦶꦁꦥꦿꦶꦪꦒꦸꦁꦭꦸꦲꦸꦂ꧉ ꧋ꦱꦼꦫꦠ꧀ꦱꦼꦫꦠ꧀ꦲꦁꦒꦶꦠ꧀ꦠꦤ꧀ꦢꦊꦩ꧀ꦱ꧀ꦮꦂꦒꦶꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦲꦶꦁꦏꦁꦥꦤ꧀ꦠꦼꦱ꧀ꦢꦶꦥꦸꦤ꧀ꦲꦗꦶꦲꦗꦶꦱꦔꦼꦠ꧀ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦤꦺꦭꦑꦏꦼꦤ꧀ꦥꦶꦤꦸꦚ꧀ꦗꦸꦭ꧀ꦭꦶꦁꦝꦼꦝꦱꦂꦝꦠꦼꦁꦒꦼꦤ꧀ꦝꦶꦁꦱꦂꦠꦊꦭꦒꦺꦴꦤ꧀꧈ꦊꦩ꧀ꦧꦠ꧀ꦠꦶꦁꦫꦲꦺꦴꦱ꧀ꦝꦠꦼꦁꦱ꧀ꦮꦫꦱꦂꦠꦮꦶꦫꦩꦥꦸꦤꦥꦢꦺꦤꦺꦏꦮꦼꦒꦶꦒꦤꦶꦁꦔꦁꦒꦶꦠ꧀ꦲꦁꦒꦶꦠ꧀ꦩꦮꦶꦫꦶꦤꦼꦁꦒꦲꦶꦁꦧꦸꦱꦤꦤꦶꦁꦧꦱ꧉ꦏꦭꦁꦏꦸꦁꦔꦤ꧀ꦤꦶꦁꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦥꦸꦤꦶꦏꦧꦏꦸꦤꦶꦥꦸꦤ꧀ꦲꦶꦁꦥꦿꦏꦮꦶꦱ꧀ꦩꦂꦢꦮꦭꦒꦸꦱꦂꦠꦧꦸꦱꦤꦤꦶꦁꦧꦱ꧉ꦠꦸꦩꦿꦥ꧀ꦲꦶꦁꦗꦩꦤ꧀ꦲꦺꦁꦒꦭ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫ IV ꦮꦲꦸꦥꦚ꧀ꦕꦺꦤ꧀ꦏꦺꦔꦶꦁꦏꦮꦱ꧀ꦠꦤ꧀ꦤꦤ꧀ꦄꦃꦭꦶꦫꦸꦩ꧀ꦥꦏ꧀ꦏꦤ꧀ꦏꦿꦠꦺꦴꦤꦤ꧀ꦲꦶꦁꦏꦁꦥꦶꦤꦸꦚ꧀ꦗꦸꦭ꧀ꦥꦶꦪꦩ꧀ꦧꦏ꧀꧈ꦲꦁꦒꦶꦠ꧀ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦤꦩꦢꦢꦺꦴꦱ꧀ꦠꦸꦠꦸꦁꦒꦸꦭ꧀ꦠꦸꦩꦿꦥ꧀ꦥꦶꦁꦧꦧꦢ꧀ꦢꦶꦥꦸꦤ꧀ꦏꦱꦸꦱꦱ꧀ꦠꦿꦤ꧀ꦗꦮꦶ꧈ꦠꦼꦠꦼꦥ꧀ꦔꦤ꧀ꦠꦺꦴꦱ꧀ꦢꦸꦩꦸꦒꦶꦲꦶꦁꦠꦶꦠꦶꦩꦺꦴꦁꦱꦥꦸꦤꦶꦏꦠꦏ꧀ꦱꦶꦃꦢꦢꦺꦴꦱ꧀ꦠꦸꦭꦢꦤ꧀꧉ ꧋ꦧꦝꦺꦏꦢꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦲꦶꦁꦠꦼꦩ꧀ꦧꦺꦢꦺꦫꦺꦁꦏꦺꦔꦶꦁꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀꧈ꦲꦁꦒꦶꦠ꧀ꦠꦤ꧀ꦤꦶꦥꦸꦤ꧀ꦏꦁꦗꦼꦁꦓꦸꦱ꧀ꦡꦶꦩꦁꦏꦸꦟꦓꦫꦆꦮ꦳꧀ꦮꦲꦸꦥꦸꦤꦥꦊꦱ꧀ꦠꦤ꧀ꦠꦸꦤ꧀ꦢꦢꦺꦴꦱ꧀ꦥꦲꦸꦒꦼꦂꦫꦤ꧀꧈ꦥꦸꦤꦥꦲꦶꦁꦏꦁꦧꦝꦺꦱꦪꦔꦽꦧ꧀ꦢꦥꦸꦤꦶꦏꦠꦿꦗꦁꦲꦺꦁꦒꦭ꧀꧈ꦲꦶꦁꦏꦁꦮꦶꦮꦶꦠ꧀ꦤꦼꦧꦶꦃꦲꦶꦫꦲꦺꦴꦱ꧀ꦥꦔꦿꦲꦺꦴꦱ꧀ꦱꦶꦁꦠꦿꦃꦔꦭꦸꦲꦸꦂꦲꦶꦁꦏꦁꦏꦭꦸꦱ꧀ꦱꦼꦤ꧀꧉ ꧋ꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦥꦩꦸꦭꦁꦔꦤ꧀ꦝꦺꦴꦏ꧀ꦠꦼꦂꦭꦸꦲꦸꦂ꧉ ꧋ꦕꦤ꧀ꦝꦏ꧀ꦏꦶꦥꦸꦤ꧀ꦏꦗꦮꦺꦤ꧀ꦎꦁꦏ 34꧉ ꧋ꦱꦺꦴꦱꦺꦴꦫꦃꦲꦶꦥꦸꦤ꧀ꦠꦸꦮꦤ꧀ Prof. Boeke. ꧋ꦲꦶꦁꦱꦢꦺꦫꦺꦁꦔꦶꦥꦸꦤ꧀ꦲꦔ꧀ꦭꦲꦶꦂꦫꦏꦼꦤ꧀ꦥꦶꦒꦸꦤꦤꦶꦁꦥꦩꦸꦭꦁꦔꦤ꧀ꦝꦺꦴꦏ꧀ꦠꦼꦂꦲꦶꦁꦒꦶꦭ꧀꧈ꦥꦩꦼꦝꦂꦱꦧ꧀ꦢꦔꦠꦸꦂꦫꦏꦼꦤ꧀ꦒꦼꦁꦔꦶꦁꦥꦤꦸꦮꦸꦤ꧀ꦝꦠꦼꦁꦥꦫꦠꦸꦮꦤ꧀ꦠꦸꦮꦤ꧀ꦲꦶꦁꦏꦁꦱꦩꦶꦩꦶꦉꦏꦲꦺꦴꦱ꧀ꦤꦶꦤ꧀ꦢꦑꦏꦼꦤ꧀ꦲꦶꦁꦢꦩꦼꦭ꧀꧈ꦲꦶꦁꦏꦁꦔꦤ꧀ꦠꦺꦴꦱ꧀ꦏꦱꦼꦩ꧀ꦧꦢꦤ꧀ꦱ |
Wawasan Tumrap Sêrat-sêrat Anggitan Dalêm Swargi Kangjêng Gusti Pangeran Adipati Arya Mangkunagara IV. Minăngka Pêpèngêt. (Miturut karanganipun Dr. Th. Pigeaud). Candhakipun Kajawèn ăngka 34. [Sêrat pitutur punika wontên pintên-pintên bab, kaperang-perang manut golong-golonganing tiyang ingkang katuju (santana, punggawa, para upsir lan sanès-sanèsipun), isinipun pitutur wau ingkang kathah-kathah awarni pamrayogi dhatêng kautamèn, ingkang gêgayutan kalihan gêsanging tiyang ing sadintên-dintên, sarta kathah ingkang katêrangakên ngangge upami utawi têtuladan mirit dhatêng kawontênaning kodrat. Satunggal-tunggaling anggitan isi piwulang têmbunging guru (ing ngriki: kangjêng gusti piyambak) dhatêng para muridipun, ananging warni pitutur lugu, botên wontên ingkang anjalèntrèhakên pamanggih. Anggit-anggitan ingkang langkung sêpuh tinimbang karanganipun Kangjêng Gusti Mangkunagara IV inggih sampun wontên ingkang dhapur pitutur. Kados ta Sêrat Wulangrèh. Mênggah suraos ingkang dados isinipun sêrat pitutur karanganipun Kangjêng Gusti Mangkunagara wau kenging kawastanan sami kemawon kalihan Sêrat Wulangrèh, jalaran sami dene ngugêm-ugêmi dhêdhasaring kautaman miturut pamanggih Islam Jawi. Namung kemawon manawi dipun titik-titik, karanganipun Kangjêng Gusti Mangkunagara IV kados-kados radi ngantêpakên têtanggêlaning para agêng anggènipun ngrêksa karaharjaning tiyang alit. Sêrat pitutur anggitanipun Kangjêng Gusti Mangkunagara wau namung sami tumrap pasrawunganing gêsang sêsarêngan. Sêrat isi kawruh batos ingkang kacariyosakên anggitan Mangkunagaran IV inggih wontên, ananging sêmunipun kalintu. Sêrat-sêrat pitutur wau basanipun kalêbêt prasaja, botên niyat kangge ngebarakên kasagêdan ing bab panganggening têmbung, mila têmbung-têmbungipun Kawi inggih botên kathah, beda sangêt kalihan ingkang sêrat-sêrat rêrumpakan. Sêrat-sêrat karanganipun Kangjêng Gusti Mangkunagara IV ingkang sanès golongan, nanging kathah èmpêripun kalihan sêrat pitutur wau, inggih punika ingkang awarni sêrat kintunan mawi sinawung ing sêkar, ingkang kathah tumuju dhatêng para putra utawi santana. Sêrat-sêrat kintunan punika limrahipun ugi sami isi pitutur, botênipun inggih isi wawasaning panggalih, ananging mêsthi wontên salah satunggiling bab ingkang dados lantaran, mila lajêng wontên èmpêripun sawatawis kalihan anggitan ingkang pandamêlipun namung manawi kêlêrêsan kalamangsanipun. Basanipun sêrat-sêrat kintunan wau kathah èmpêripun kalihan ingkang kaangge wontên ing pitutur, ananging wontên ugi sêrat kintunan ingkang rinakit wangsalan, dados mirib kalihan anggitan ingkang ngebarakên pambusananing basa. Sêrat kintunan sinawung ing sêkar wau kenging kawastanan ada-adanipun Kangjêng Gusti Mangkunagara IV piyambak. Inggih lêrês ing sadèrèngipun wontên ada-ada wau ugi sampun wontên sêrat kintunan mawi sêkar, ananging namung manawi pancèn dados saperanganing sêrat-sêrat cariyos ingkang kasêkarakên. Anggit-anggitanipun Kangjêng Gusti Mangkunagara IV ingkang sagolongan malih babagan busananing basa, inggih punika sadayaning anggitan, ingkang pangrakitipun mawi rinêngga-rêngga. Anggitan punika wontên ingkang babar pisan awujud wangsalan, sarta kêtitik bilih pandamêlipun kanthi pangatos-atos murih runtuting sadayanipun. Kajawi anggit-anggitan ingkang awarni sêkar Macapat, anggitanipun Kangjêng Gusti Mangkunagara IV ugi wontên ingkang sinawung ing sêkar Têngahan sarta sêkar Agêng, ingkang salêrêsipun sampun botên kêlimrah. Malah kangjêng gusti ugi yasa têmbang enggal, sawênèh mirib têmbang ingkang sampun wontên, sawênèh malih awujud têmbang sungsun, kaestha kados pitakèn lan wangsulan. Anggit-anggitan ingkang makatên punika mathukipun manawi kalagokakên, malah kathah ingkang bakunipun pancèn kangge gerongan. Gêndhing ingkang dados jodhonipun gerongan anggitan Mangkunagaran wau wontên ingkang gêndhing lami wontên ingkang pancèn yasan enggal, ugi anggitanipun Kangjêng Gusti Mangkunagara IV piyambak, botênipun inggih mêksa kanthi pitêdahipun kangjêng gusti. Suraosing gerongan wau mawi sêdyaning panggalih nalika panganggitipun, ingkang kathah-kathah awujud wêdharing raosipun manah gandrung dhatêng wanita, ananging wontên ugi ingkang namung ngrumpaka wit-witan, têtuwuhan, sêsêkaran lan sanès-sanèsipun, mawi kasêmpètakên dhatêng raos utawi kayungyuning manah. Ing anggit-anggitan punika kêtingal sangêt kathahing sêsêrêpan sarta sêngsêmipun swargi Kangjêng Gusti Mangkunagara IV dhatêng kodrating alam. Sadangunipun Kangjêng Gusti kaping IV nganggit-anggit, wiwit kawitan mila sampun nganggit-anggit rêrumpakan makatên wau, ananging ingkang kathah-kathah sami anggitan ing sabakdanipun taun Jawi 1800 utawi taun Walandi 1871. Anggitan ingkang kangge gerongan wau radi wontên èmpêripun kalihan ingkang dados rêrumpakaning lampah, beda sangêt kalihan ingkang isi pitutur. Gêgerongan wau kenging kawastanan anggitanipun Kangjêng Lusti[2] Mangkunagara IV ingkang pêthingan sarta murni sayêktos. Ing ngriku kêtingal luhuring panggalih, alus lan lêmbating raosipun kangjêng gusti punapadene sugihipun anggit, sampun mathuk sangêt tumraping kagunan kraton ing Surakarta, ingkang kala samantên radi mumbul malih ing sawatawis. Gêgerongan sarta gêndhing anggitanipun Kangjêng Gusti Mangkunagara IV wau kenging kawastanan wêdharing raosipun nagari Surakarta ing bab kagunan ingkang sakêlangkung alus, ngantos sagêd anjalari kèrêm lan koruping manah. Kajawi punika anggit-anggitanipun Kangjêng Gusti Mangkunagara IV wau têrah-tumêrah lajêng dados ancêr-ancêr tumraping pangudi dhatêng têmbang sarta gêndhing. Kadosdene pangudinipun Kangjêng Gusti Mangkunagara V punika inggih napak tilas anggitanipun Kangjêng Gusti kaping IV. Ing nginggil dèrèng kacariyosakên, bilih wontên karang-karangan sawatawis ingkang kaakênakên anggitanipun Kangjêng Gusti Mangkunagara IV, nanging kintên-kintên sanès tapak astanipun kangjêng gusti ingkang salugu, jalaran bokmanawi kemawon kangjêng gusti namung urun-urun sawatawis. Karangan ingkang makatên punika ugi botên wontên pêthinganipun ingkang pancèn kenging kangge titikan kalangkunganing kasagêdanipun kangjêng gusti ing bab nganggit-anggit. Mênggah ingkang dados kalangkunganipun Kangjêng Gusti Mangkunagara IV wau botên ing sawarnining bab nganggit-anggit, kados ta: ing bab nganggit cariyos sarta ngarang babad sinawung ing sêkar, botên wontên titiking kalangkunganipun. Ing bab nganggit sêrat pitutur inggih botên nama linangkung. Sêrat-sêrat pitutur ingkang dêlês anggitanipun Kangjêng Gusti Mangkunagara IV piyambak, punika inggih lêrês dipun aji-aji ing akathah, ananging pangaji-ajinipun punika bakunipun jalaran ngèngêti yèn yasaning priyagung luhur. Sêrat-sêrat anggitan dalêm swargi Kangjêng Gusti Mangkunagara IV ingkang pantês dipun aji-aji sangêt inggih punika ingkang nelakakên pinunjuling dhêdhasar dhatêng gêndhing sarta lêlagon, lêmbating raos dhatêng swara sarta wirama punapadene kawêgiganing nganggit-anggit mawi rinêngga ing busananing basa. Kalangkunganing anggitanipun Kangjêng Gusti Mangkunagara IV punika bakunipun ing prakawis mardawalagu sarta busananing basa. Tumrap ing jaman enggal Kangjêng Gusti Mangkunagara IV wau pancèn kenging kawastanan ahli rumpakan kratonan ingkang pinunjul piyambak, anggit-anggitanipun nama dados têtunggul tumraping babadipun kasusastan Jawi, têtêp ngantos dumugi ing titimăngsa punika taksih dados tuladan. Badhe kadadosanipun ing têmbe dèrèng kenging kakintên-kintên, anggitanipun Kangjêng Gusti Mangkunagara IV wau punapa lêstantun dados paugêran, punapa ingkang badhe saya ngrêbda punika trajang enggal, ingkang wiwit nêbihi raos pangraosing trah ngaluhur ingkang kalusên. | ||
|
[ 607 ]ꦒꦼꦢ꧀ꦔꦼꦢꦼꦒ꧀ꦒꦏꦼꦤ꧀ꦥꦩꦸꦭꦁꦔꦤ꧀ꦭꦸꦲꦸꦂꦥꦸꦤꦶꦏ꧉ꦥꦤꦸꦮꦸꦤ꧀ꦮꦲꦸꦏꦠꦸꦂꦝꦸꦩꦠꦼꦁꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦓꦸꦥꦽꦤꦸꦂꦗꦺꦤ꧀ꦢꦿꦭ꧀ D. Fock ꦠꦸꦮꦶꦤ꧀ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦲꦶꦁꦏꦁꦗꦸꦩꦼꦤꦼꦁꦱꦥꦸꦤꦶꦏ꧈ꦩꦏꦠꦼꦤ꧀ꦩꦭꦶꦃꦝꦠꦼꦁꦲꦶꦁꦏꦁꦱꦩꦶꦒꦒꦪꦸꦠ꧀ꦠꦤ꧀ꦧꦧ꧀ꦮꦲꦸ꧉ ꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦫꦶꦥꦸꦤ꧀ꦥꦢꦸꦏꦠꦸꦮꦤ꧀ Prof. Dr. J. Boeke. ꧋ꦥꦶꦒꦸꦤꦤꦶꦁꦥꦩꦸꦭꦁꦔꦤ꧀ꦭꦸꦲꦸꦂ꧉ ꧋ꦲꦢꦼꦒ꧀ꦒꦶꦁꦥꦩꦸꦭꦁꦔꦤ꧀ꦭꦸꦲꦸꦂꦥꦸꦤꦶꦏꦱꦲꦺꦱ꧀ꦠꦸꦲꦢꦩꦼꦭ꧀ꦒꦩ꧀ꦧꦶꦫꦤꦶꦁꦩꦤꦃ꧈ꦢꦺꦤꦶꦁꦧꦺꦴꦠꦼꦤ꧀ꦥꦽꦭꦸꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦝꦼꦝꦱꦂꦏꦛꦃ꧈ꦲꦮꦶꦠ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀꧈ꦲꦶꦁꦒꦶꦃꦥꦸꦤꦶꦏ Stovia ꦲꦶꦁꦏꦁꦱꦩ꧀ꦥꦸꦤ꧀ꦠꦸꦩꦶꦤ꧀ꦢꦏ꧀ 76 ꦠꦲꦸꦤ꧀꧉ ꧋ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ Stovia ꦪꦏꦭꦶꦪꦤ꧀ Nias ꦥꦸꦤꦶꦏꦩꦶꦒꦸꦤꦤ꧀ꦤꦶꦲꦒꦼꦁꦱꦔꦼꦠ꧀ꦠꦸꦩꦿꦥ꧀ꦏꦮꦶꦭꦸꦗꦼꦁꦔꦤ꧀ꦤꦶꦁꦫꦏꦾꦠ꧀꧉ ꧋ꦧꦧ꧀ꦫꦸꦩꦼꦏ꧀ꦱꦤꦶꦁꦏꦱꦫꦱ꧀ꦱꦤ꧀꧈ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦶꦤ꧀ꦢꦑꦏꦼꦤ꧀ꦢꦺꦤꦶꦁ Stovia ꦠꦸꦮꦶꦤ꧀ Nias꧈ꦥꦸꦤꦶꦏꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦲꦶꦁꦥꦩꦸꦭꦁꦔꦤ꧀ꦭꦸꦲꦸꦂꦮꦲꦸꦲꦶꦁꦒꦶꦃꦏꦠꦶꦤ꧀ꦢꦑꦏꦼꦤ꧀꧈ꦩꦭꦃꦏꦥꦫꦢꦶꦥꦸꦤ꧀ꦲꦗꦼꦁꦔꦏꦼꦤ꧀꧉ ꧋ꦥꦩꦸꦭꦁꦔꦤ꧀ꦭꦸꦲꦸꦂꦥꦸꦤꦶꦏꦏꦁꦒꦺꦲꦶꦁꦔꦏꦛꦃ꧈ꦏꦭꦶꦪꦤ꧀ Stovia ꦮꦺꦴꦤ꧀ꦠꦼꦤ꧀ꦧꦺꦢꦤꦶꦥꦸꦤ꧀꧈ꦠꦸꦮꦶꦤ꧀ Stovia ꦏꦥꦺꦠꦁꦤꦩꦸꦁꦥꦔꦗꦂꦫꦤ꧀ꦠꦼꦔꦃꦲꦤ꧀꧉ꦢꦺꦤꦺꦠꦸꦩꦿꦥ꧀ꦥꦶꦥꦸꦤ꧀ꦥꦩꦸꦭꦁꦔꦤ꧀ꦭꦸꦲꦸꦂꦥꦸꦤꦶꦏ꧈ꦱꦤꦢꦾꦤ꧀ꦠꦶꦪꦁꦲꦶꦁꦏꦁꦕꦭꦺꦴꦤ꧀ꦝꦺꦴꦏ꧀ꦠꦼꦂꦤꦒꦫꦶꦮꦭꦤ꧀ꦢꦶ꧈ꦲꦸꦒꦶꦱꦒꦼꦢ꧀ꦏꦠꦩ꧀ꦥꦺꦤ꧀ꦲꦶꦁꦔꦿꦶꦏꦸ꧈ꦲꦮꦶꦠ꧀ꦥꦔꦗꦂꦫꦤ꧀ꦤꦶꦥꦸꦤ꧀ꦱꦩꦶꦏꦺꦩꦮꦺꦴꦤ꧀꧉ ꧋ꦥꦩꦸꦭꦁꦔꦤ꧀ꦝꦺꦴꦏ꧀ꦠꦼꦂꦭꦸꦲꦸꦂꦥꦸꦤꦶꦏꦢꦢꦺꦴꦱ꧀ꦠꦼꦊꦁꦔꦶꦁꦏꦮꦿꦸꦃ꧈ꦩꦶꦭꦱꦱꦁꦒꦺꦤ꧀ꦤꦶꦥꦸꦤ꧀ꦲꦮꦿꦠ꧀꧉ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦱꦩꦸꦏꦮꦶꦱ꧀ꦢꦩꦼꦭ꧀ꦲꦶꦁꦧꦧ꧀ꦱꦱꦏꦶꦠ꧀꧈ꦧꦧ꧀ꦥꦤꦸꦭꦏ꧀ꦏꦶꦁꦱꦱꦏꦶꦠ꧀꧈ꦧꦧ꧀ꦔꦺꦭ꧀ꦩꦸꦧꦢꦤ꧀ꦤꦶꦁꦩꦤꦸꦁꦱ꧈ꦱꦺꦫꦸꦩ꧀ꦠꦸꦮꦶꦤ꧀ꦧꦏ꧀ꦠꦺꦫꦶ꧈ꦥꦸꦤꦶꦏꦱꦩ꧀ꦥꦸꦤ꧀ꦢꦶꦥꦸꦤ꧀ꦲꦁꦒꦼꦥ꧀ꦭꦁꦏꦸꦁꦢꦺꦤꦶꦁꦥꦫꦧꦶꦗꦏ꧀ꦱꦤꦲꦶꦁꦤꦒꦫꦶꦮꦭꦤ꧀ꦢꦶ꧉ꦩꦏꦠꦼꦤ꧀ꦲꦸꦒꦶꦩꦼꦁꦒꦃꦲꦶꦁꦥꦔꦁꦒꦼꦥ꧀ꦥꦶꦥꦸꦤ꧀ꦯꦶꦂꦄꦤ꧀ꦢꦿꦺꦮ꧀ꦨꦭ꧀ꦥ꦳ꦺꦴꦲꦸꦂꦧꦶꦗꦏ꧀ꦱꦤꦧꦺꦴꦁꦱꦆꦁꦒꦿꦶꦱ꧀꧈ꦲꦶꦁꦏꦁꦩꦶꦱꦸꦮꦸꦂꦲꦶꦁꦲꦱ꧀ꦩ꧈ꦲꦸꦒꦶꦩꦱ꧀ꦠꦤ꧀ꦤꦶꦭꦁꦏꦸꦁꦝꦠꦼꦁꦧꦧ꧀ꦏꦝꦺꦴꦏ꧀ꦠꦼꦂꦫꦤ꧀ꦲꦶꦁꦲꦶꦤ꧀ꦢꦶꦪꦔꦿꦶꦏꦶ꧉ꦤꦔꦶꦁꦲꦺꦮꦼꦢ꧀ꦥꦏꦺꦮꦼꦢ꧀ꦠꦸꦮꦶꦤ꧀ꦉꦏꦲꦺꦴꦱ꧀ꦮꦲꦸ꧈ꦧꦝꦺꦱꦒꦼꦢ꧀ꦲꦺꦤ꧀ꦛꦺꦁꦩꦤꦮꦶꦢꦶꦥꦸꦤ꧀ꦲꦼꦕꦏ꧀ꦏꦏꦼꦤ꧀ꦏꦤ꧀ꦛꦶꦚꦩ꧀ꦧꦸꦠ꧀ꦢꦩꦼꦭ꧀ꦱꦱꦉꦁꦔꦤ꧀꧉ ꧋ꦏꦸꦮꦗꦶꦧ꧀ꦧꦤ꧀ꦤꦶꦁꦝꦺꦴꦏ꧀ꦠꦼꦂ꧉ ꧋ꦠꦸꦮꦤ꧀ Prof. J. Boeke ꦭꦗꦼꦁꦔꦤ꧀ꦝꦂꦫꦏꦼꦤ꧀ꦧꦧ꧀ꦠꦶꦤ꧀ꦢꦏ꧀ꦏꦶꦁꦒꦸꦫꦸꦲꦒꦼꦁꦏꦭꦶꦪꦤ꧀ꦱꦼꦠꦸꦝꦺꦤ꧀꧈ꦮꦺꦴꦱ꧀ꦱꦶꦥꦸꦤ꧀ꦩꦼꦁꦒꦃꦲꦶꦁꦝꦺꦴꦏ꧀ꦠꦼꦂ꧈ꦏꦼꦢꦃꦏꦢꦸꦤꦸꦁꦔꦤ꧀ꦠꦽꦱ꧀ꦤꦲꦶꦁꦱꦱꦩꦶ꧉ ꧋ꦮꦼꦢꦭ꧀ꦭꦶꦥꦸꦤ꧀ꦏꦗꦮꦺꦤ꧀ꦧꦺꦚ꧀ꦗꦶꦁꦲꦶꦁꦢꦶꦤ꧀ꦠꦼꦤ꧀ꦏꦼꦩꦶꦱ꧀ꦔꦗꦼꦁ꧈ꦧꦝꦺꦔꦼꦮꦿꦠ꧀ꦱꦺꦴꦱꦺꦴꦫꦃꦢꦊꦩ꧀ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦓꦸꦥꦽꦤꦸꦂꦗꦺꦤ꧀ꦢꦿꦭ꧀꧉ [ 608 ]꧋ꦥꦫꦒꦸꦫꦸꦄꦒꦼꦁꦲꦶꦁꦥꦩꦸꦭꦁꦔꦤ꧀ꦝꦺꦴꦏ꧀ꦠꦼꦂꦭꦸꦲꦸꦂ꧉ Prof. Dr. C. Bakker. Prof. Dr. W.A. Mijsberg. Prof. Dr. W.M. Docters van Leeuwen. Prof. Dr. N.J.A.F. Boerma. Prof. Dr. H.C. Delsman. Prof. Dr. C. Bonne. Prof. Dr. Otten. Prof. Dr. J. Boerema. |
Pambikakipun Pamulangan Dhoktêr Luhur[besut]Candhakipun Kajawèn ăngka 34. Sêsorahipun Tuwan Prof. Boeke. Ing sadèrèngipun anglairakên pigunaning pamulangan dhoktêr inggil, pamêdhar sabda ngaturakên gênging panuwun dhatêng para tuwan-tuwan ingkang sami mirêkaos nindakakên ing damêl, ingkang ngantos kasêmbadan sagêd ngêdêgakên pamulangan luhur punika. Panuwun wau katur dhumatêng Kangjêng Tuwan Ingkang Wicaksana Guprênur Jendral D. Fock tuwin kangjêng tuwan ingkang wicaksana ingkang jumênêng sapunika, makatên malih dhatêng ingkang sami gêgayutan bab wau. [Grafik] Nginggil punika gambaripun Paduka Tuwan Prof. Dr. J. Boeke. Pigunaning pamulangan luhur[besut]Adêging pamulangan luhur punika saèstu adamêl gambiraning manah, dening botên prêlu ngawontênakên dhêdhasar kathah, awit sampun wontên, inggih punika Stovia ingkang sampun tumindak 76 taun. Wontênipun Stovia kalihan Nias punika migunani agêng sangêt tumrap kawilujênganing rakyat. Bab rumêksaning kasarasan, kados ingkang sampun dipun tindakakên dening Stovia tuwin Nias, punika wontênipun ing pamulangan luhur wau inggih katindakakên, malah kapara dipun ajêngakên. Pamulangan luhur punika kangge ing ngakathah, kalihan Stovia wontên bedanipun, tuwin Stovia kapetang namung pangajaran têngahan. Dene tumrapipun pamulangan luhur punika, sanadyan tiyang ingkang calon dhoktêr nagari Walandi, ugi sagêd katampèn ing ngriku, awit pangajaranipun sami kemawon. Pamulangan dhoktêr luhur punika dados têlênging kawruh, mila sêsanggenipun awrat. Kawontênaning samukawis damêl ing bab sêsakit, bab panulaking sêsakit, bab ngèlmu badaning manungsa, serum tuwin baktèri, punika sampun dipun anggêp langkung dening para bijaksana ing nagari Walandi. Makatên ugi mênggahing panganggêpipun Sir Andrew Balfour bijaksana băngsa Inggris, ingkang misuwur ing asma, ugi mastani langkung dhatêng bab kadhoktêran ing India ngriki. Nanging èwêd-pakèwêd tuwin rêkaos wau, badhe sagêd ènthèng manawi dipun êcakakên kanthi nyambutdamêl sêsarêngan. Kuwajibaning dhoktêr[besut]Tuwan Prof. J. Boeke lajêng ngandharakên bab tindaking guru agêng kalihan sêtudhèn, wosipun mênggah ing dhoktêr, kêdah kadunungan trêsna ing sasami. Wêdalipun Kajawèn benjing ing dintên Kêmis ngajêng, badhe ngêwrat sêsorah dalêm kangjêng tuwan ingkang wicaksana guprênur jendral. Para Guru Agêng ing Pamulangan Dhoktêr Luhur. [Grafik] Prof. Dr. C. Bakker. [Grafik] Prof. Dr. W.A. Mijsberg. [Grafik] Prof. Dr. W.M. Docters van Leeuwen. [Grafik] Prof. Dr. N.J.A.F. Boerma. [Grafik] Prof. Dr. H.C. Delsman. [Grafik] Prof. Dr. C. Bonne. [Grafik] Prof. Dr. Otten. [Grafik] Prof. Dr. J. Boerema. | ||
|
[ 609 ]꧋ꦧꦤ꧀ꦢꦺꦫꦏꦧꦁꦱꦤ꧀ꦗꦼꦦꦁ꧉ ꧋ꦥꦫꦩꦲꦺꦴꦱ꧀ꦠꦩ꧀ꦠꦸꦤꦶꦥꦸꦤ꧀ꦱꦩ꧀ꦥꦸꦤ꧀ꦱꦩꦶꦲꦔꦸꦤꦶꦁꦔꦤ꧀ꦤꦶꦥꦶꦪꦩ꧀ꦧꦏ꧀꧈ꦱꦧꦼꦤ꧀ꦱꦧꦼꦤ꧀ꦮꦺꦴꦤ꧀ꦠꦼꦤ꧀ꦏꦫꦩꦺꦪꦤ꧀ꦲꦒꦼꦁ꧈ꦲꦶꦁꦏꦁꦒꦒꦪꦸꦠ꧀ꦠꦤ꧀ꦏꦭꦶꦪꦤ꧀ꦲꦶꦁꦠꦤꦃꦗꦼꦦꦁ꧈ꦥꦫꦠꦶꦠꦶꦪꦁꦗꦼꦦꦁꦲꦶꦁꦏꦁꦱꦩꦶꦧꦶꦏꦏ꧀ꦠꦺꦴꦏꦺꦴꦮꦺꦴꦤ꧀ꦠꦼꦤ꧀ꦲꦶꦁꦗꦗꦃꦲꦤ꧀ꦤꦒꦫꦶꦔꦿꦶꦏꦶ꧈ꦱꦩꦶꦠꦸꦩꦸꦠ꧀ꦲꦔꦸꦂꦩꦠ꧀ꦠꦶꦲꦩ꧀ꦧꦺꦧꦺꦂꦧꦤ꧀ꦢꦺꦫꦤꦶꦥꦸꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦲꦝꦱꦂꦥꦼꦛꦏ꧀ꦲꦶꦁꦠꦼꦔꦃꦩꦮꦶꦧꦸꦤ꧀ꦢꦼꦂꦫꦤ꧀ꦲꦧꦿꦶꦠ꧀꧉ꦧꦸꦤ꧀ꦢꦼꦂꦫꦤ꧀ꦲꦧꦿꦶꦠ꧀ꦲꦶꦁꦠꦼꦔꦃꦠꦼꦔꦃꦲꦶꦁꦧꦤ꧀ꦢꦺꦫꦮꦲꦸ꧈ꦢꦢꦺꦴꦱ꧀ꦥꦱꦼꦩꦺꦴꦤ꧀ꦥꦊꦛꦺꦏ꧀ꦏꦶꦁꦱꦸꦂꦪ꧉ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦏꦫꦗꦤ꧀ꦗꦼꦦꦁꦔꦁꦒꦺꦧꦤ꧀ꦢꦺꦫꦕꦶꦫꦶꦥꦊꦛꦺꦏ꧀ꦏꦶꦁꦱꦸꦂꦪ꧈ꦥꦸꦤꦶꦏꦩꦶꦠꦸꦫꦸꦠ꧀ꦱꦼꦫꦠ꧀ꦏꦭꦮꦂꦠꦶ The Young East ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦩꦏꦠꦼꦤ꧀꧇ ꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦫꦶꦁꦧꦤ꧀ꦢꦺꦫꦏꦧꦁꦱꦤ꧀ꦗꦼꦦꦁ꧉ ꧋ꦤꦒꦫꦶꦗꦼꦦꦁꦥꦸꦤꦶꦏꦱꦩꦶꦱꦩꦶꦤꦒꦫꦶ꧈ꦱꦧꦼꦤ꧀ꦠꦲꦸꦤ꧀ꦠꦲꦸꦤ꧀ꦤꦶꦥꦸꦤ꧀ꦏꦛꦃꦠꦼꦫꦁꦔꦶꦥꦸꦤ꧀ꦏꦠꦶꦩ꧀ꦧꦁꦗꦮꦃꦲꦶꦥꦸꦤ꧀꧈ꦲꦩꦶꦭꦲꦶꦁꦒꦶꦃꦩꦺꦩ꧀ꦥꦼꦂꦩꦤꦮꦶꦢꦶꦥꦸꦤ꧀ꦮꦱ꧀ꦠꦤ꧀ꦤꦤ꧇ꦤꦒꦫꦶꦥꦁꦒꦺꦤ꧀ꦤꦤ꧀ꦱꦸꦂꦪ꧉ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦥꦸꦤ꧀ꦯꦁꦥꦸꦠꦿꦶꦄꦩꦠꦼꦫꦱꦸ꧈ꦲꦶꦁꦒꦶꦃꦲꦶꦁꦏꦁꦏꦱꦸꦮꦸꦂꦏꦮꦱ꧀ꦠꦤ꧀ꦤꦤ꧀ꦢꦺꦮꦶꦤꦶꦁꦱꦽꦔꦺꦔꦺ꧈ꦥꦸꦤꦶꦏꦏꦲꦁꦒꦼꦥ꧀ꦲꦶꦁꦏꦁꦤꦸꦫꦸꦤ꧀ꦤꦏꦼꦤ꧀ꦮꦂꦒꦏꦫꦗꦤ꧀ꦗꦼꦦꦁꦥꦚ꧀ꦕꦼꦂꦱꦏꦶꦁꦲꦺꦱ꧀ꦠꦿꦶ꧉ꦲꦶꦁꦧꦧꦢ꧀ꦚꦫꦶꦪꦺꦴꦱ꧀ꦱꦏꦼꦤ꧀꧈ꦩꦶꦠꦸꦫꦸꦠ꧀ꦥꦶꦪꦤ꧀ꦢꦼꦭ꧀ꦭꦶꦁꦧꦺꦴꦁꦱꦗꦼꦦꦁ꧈ꦏꦭꦱꦁꦥꦸꦠꦿꦶꦲꦸꦩ꧀ꦥꦼꦠ꧀ꦠꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦺꦴꦫꦶꦤꦶꦁꦭꦔꦶꦠ꧀꧈ꦲꦶꦁꦢꦺꦴꦚꦭꦗꦼꦁꦥꦼꦠꦼꦁꦲꦤ꧀ꦝꦼꦝꦼꦠ꧀꧉ꦫꦗꦗꦼꦦꦁꦥꦸꦤꦶꦏꦲꦸꦒꦶꦢꦶꦥꦸꦤ꧀ꦲꦁꦒꦼꦥ꧀ꦠꦼꦝꦏ꧀ꦏꦶꦁꦱꦽꦔꦺꦔꦺ꧈ꦭꦤ꧀ꦮꦶꦱꦺꦱꦤꦶꦥꦸꦤ꧀ꦢꦶꦥꦸꦤ꧀ꦱꦩꦺꦑꦏꦼꦤ꧀ꦏꦢꦺꦴꦱ꧀ꦱꦺꦴꦫꦺꦴꦠ꧀ꦠꦶꦁꦱꦽꦔꦺꦔꦺꦲꦩꦝꦁꦔꦶꦗꦒꦢ꧀ꦧꦺꦴꦠꦼꦤ꧀ꦩꦮꦶꦥꦶꦭꦶꦃꦥꦥꦤ꧀꧉ꦏꦭꦗꦩꦤ꧀ꦏꦶꦤꦤꦶꦥꦸꦤ꧀ꦠꦶꦠꦶꦪꦁꦧꦺꦴꦁꦱꦕꦶꦟ꧈ꦩꦤꦮꦶꦩꦱ꧀ꦠꦤ꧀ꦤꦶꦗꦼꦦꦁ꧇ꦯꦶꦥꦺꦴꦤ꧀꧈ꦩꦼꦁꦒꦃꦠꦼꦒꦼꦱ꧀ꦱꦶꦥꦸꦤ꧀꧇ꦲꦱ꧀ꦭꦶꦤꦶꦁꦱꦽꦔꦺꦔꦺ꧈ꦢꦺꦤꦺꦤꦒꦫꦶꦤꦶꦥꦸꦤ꧀꧇ꦤꦒꦫꦶꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦱꦽꦔꦺꦔꦺꦩ꧀ꦭꦼꦛꦺꦏ꧀꧉ꦤꦩꦯꦶꦥꦺꦴꦤ꧀ꦮꦲꦸ꧈ꦢꦺꦤꦶꦁꦥꦫꦲꦶꦁꦏꦁꦱꦩꦶꦔꦸꦩ꧀ꦧꦫꦲꦶꦁꦗꦩꦤ꧀ꦏꦶꦤ꧈ꦏꦢꦺꦴꦱ꧀ꦠ꧇ Marco Polo ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦢꦶꦥꦸꦤ꧀ꦱꦼꦧꦸꦠ꧀꧇ꦯꦶꦥꦔꦸ꧈ꦢꦔꦸꦤꦶꦁꦢꦔꦸꦭꦗꦼꦁꦢꦶꦥꦸꦤ꧀ꦮꦱ꧀ꦠꦤ꧀ꦤꦶꦗꦼꦦꦁ꧉ꦢꦢꦺꦴꦱ꧀ꦗꦼꦦꦁꦲꦸꦠꦮꦶꦯꦶꦥꦺꦴꦤ꧀ꦲꦶꦁꦒꦶꦃꦥꦸꦤꦶꦏꦩꦶꦠꦸꦫꦸꦠ꧀ꦱꦼꦱꦼꦧꦸꦠꦤꦶꦥꦸꦤ꧀ꦠꦶꦠꦶꦪꦁꦗꦼꦦꦁꦥꦶꦪꦩ꧀ꦧꦏ꧀꧈ꦥꦸꦤꦶꦏꦲꦁꦒꦝꦃꦲꦶꦠꦼꦒꦼꦱ꧀꧇ꦲꦱꦭꦶꦥꦸꦤ꧀ꦱꦽꦔꦺꦔꦺ꧉ꦢꦸꦩꦸꦒꦶꦤꦶꦁꦢꦶꦤ꧀ꦠꦼꦤ꧀ꦱꦩꦁꦏꦺ꧈ꦠꦶꦠꦶꦪꦁꦗꦼꦦꦁꦲꦶꦁꦥꦝꦸꦱꦸꦤ꧀ꦤꦤ꧀ꦠꦏ꧀ꦱꦶꦃꦏꦛꦃꦲꦚꦼꦩ꧀ꦧꦲꦾꦁꦔꦶꦱꦽꦔꦺꦔꦺ꧉ꦲꦶꦁꦏꦁꦥꦸꦤꦶꦏꦲꦩꦶꦭꦲꦶꦁꦒꦶꦃꦧꦺꦴꦠꦼꦤ꧀ꦲꦁꦒꦸꦩꦸꦤ꧀ꦤꦏꦼꦤ꧀꧈ꦧꦶꦭꦶꦃꦥꦩ꧀ꦭꦼꦛꦺꦏ꧀ꦏꦶꦁꦱꦽꦔꦺꦔꦺꦥꦸꦤꦶꦏꦱꦭꦗꦼꦁꦔꦶꦥꦸꦤ꧀ꦤꦸꦤ꧀ꦠꦼꦤ꧀ꦢꦢꦺꦴꦱ꧀ꦒꦩ꧀ꦧꦂꦥꦱꦼꦩꦺꦴꦤ꧀ꦤꦶꦁꦏꦧꦁꦱꦤ꧀꧉ ꧋ꦏꦭꦲꦶꦁꦠꦲꦸꦤ꧀ 1056 ꦠꦶꦪꦁꦤꦩ Abe Yoritoki ꦲꦱ꧀ꦭꦶꦱꦏꦶꦁꦱꦭꦺꦂꦮꦺꦠꦤ꧀ꦤꦶꦁꦠꦤꦃꦗꦼꦦꦁ꧈ꦲꦩ꧀ꦧꦭꦺꦭꦝꦠꦼꦁꦯꦁꦫꦗ Gorezei. ꦲꦶꦁꦏꦁꦢꦢꦺꦴꦱ꧀ꦠꦸꦠꦸꦁꦒꦸꦭ꧀ꦭꦶꦁꦥꦿꦗꦸꦫꦶꦠ꧀ꦠꦶꦁꦤꦫꦺꦤ꧀ꦢꦿꦲꦩꦁꦱꦃꦏꦿꦩꦤ꧀ꦮꦲꦸ꧈ꦤꦩ Minamoto Yoryoshi꧈ꦱꦥꦼꦗꦃꦲꦶꦥꦸꦤ꧀ Abe Youtoki ꦏꦿꦩꦤ꧀ꦮꦲꦸꦏꦭꦗꦼꦁꦔꦏꦼꦤ꧀ꦢꦺꦤꦶꦁꦲꦤꦏ꧀ꦏꦶꦥꦸꦤ꧀ꦏꦏꦭꦶꦃꦤꦩ꧇ Sadato ꦠꦸꦮꦶꦤ꧀ Muneto ꧈ꦢꦺꦤꦺꦲꦶꦁꦏꦁꦏꦗꦶꦧꦃ [ 610 ]꧋ꦲꦔꦮꦺꦴꦤ꧀ꦤꦏꦼꦤ꧀ꦏꦿꦩꦤ꧀ꦲꦶꦁꦏꦁꦏꦤ꧀ꦠꦸꦤ꧀ꦥꦸꦤꦶꦏ꧇ꦗꦺꦤ꧀ꦢꦿꦭ꧀ Yosiihye ꦲꦶꦁꦒꦶꦃꦏꦊꦧꦼꦠ꧀ꦧꦿꦪꦠ꧀ꦠꦶꦥꦸꦤ꧀ Minꦏꦱ꧀ꦧꦸꦠ꧀ꦔꦶꦁꦒꦶꦭ꧀꧉ꦢꦔꦸꦤꦶꦁꦏꦿꦩꦤ꧀ꦥꦸꦤꦶꦏꦏꦶꦫꦁꦭꦁꦏꦸꦁ꧇꧙꧇ꦠꦲꦸꦤ꧀꧈ꦲꦩꦶꦭꦲꦶꦁꦧꦧꦢ꧀ꦗꦼꦦꦁꦥꦼꦫꦁꦱꦧꦺꦴꦁꦱꦮꦲꦸ꧈ꦢꦶꦥꦸꦤ꧀ꦮꦱ꧀ꦠꦤ꧀ꦤꦶꦥꦥꦿꦁꦔꦤ꧀ꦱꦔꦁꦠꦲꦸꦤ꧀꧈ꦤꦩꦸꦁꦥꦸꦤꦶꦏꦏꦁꦒꦺꦲꦩ꧀ꦧꦺꦢꦑꦏꦼꦤ꧀ꦏꦭꦶꦪꦤ꧀ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦥꦿꦁꦔꦤ꧀ꦠꦶꦒꦁꦠꦲꦸꦤ꧀꧈ꦲꦶꦁꦏꦁꦮꦶꦮꦶꦠ꧀ꦠꦶꦥꦸꦤ꧀ꦲꦶꦁꦠꦲꦸꦤ꧀꧇꧑꧐꧘꧘꧇꧈ꦲꦶꦁꦒꦶꦃꦥꦸꦤꦶꦏꦏꦭꦱꦝꦺꦫꦺꦏ꧀ꦏꦏꦭꦶꦃ꧇ Kiyohara Takehira ꦭꦤ꧀ Iyehira ꦲꦩ꧀ꦧꦭꦺꦭꦝꦠꦼꦁꦯꦁꦫꦗ꧈ꦢꦺꦤꦺꦲꦶꦁꦏꦁꦲꦩ꧀ꦧꦺꦁꦏꦱ꧀ꦱꦏꦼꦤ꧀ꦏꦿꦩꦤ꧀ꦮꦲꦸ꧈ꦲꦶꦁꦒꦶꦃꦗꦺꦤ꧀ꦢꦿꦭ꧀ Yoshiiye ꦔꦶꦁꦒꦶꦭ꧀ꦮꦲꦸ꧉ ꧋ꦗꦭꦂꦫꦤ꧀ꦱꦏꦶꦁꦲꦒꦼꦁꦔꦶꦁꦭꦭꦧꦼꦠ꧀ꦠꦤ꧀ꦤꦶꦥꦸꦤ꧀ꦧꦧꦿꦪꦠ꧀ꦠꦤ꧀ꦤꦶꦁ Minamoto ꦝꦠꦼꦁꦫꦗ꧈ꦮꦸꦱꦤꦯꦁꦫꦗꦭꦗꦼꦁꦲꦩꦫꦶꦁꦔꦶꦝꦠꦼꦁꦗꦺꦤ꧀ꦢꦿꦭ꧀ Yoriyoshi ꦧꦤ꧀ꦢꦺꦫꦭꦏꦼꦤ꧀ꦏꦏꦭꦶꦃ꧈ꦲꦶꦁꦏꦁꦱꦠꦸꦁꦒꦭ꧀ꦱꦶꦤꦸꦭꦩ꧀ꦲꦶꦁꦧꦼꦤꦁꦲꦼꦩꦱ꧀ꦲꦥꦼꦛꦱꦽꦔꦺꦔꦺ꧈ꦱꦠꦸꦁꦒꦭ꧀ꦭꦶꦥꦸꦤ꧀ꦱꦶꦤꦸꦭꦩ꧀ꦲꦶꦁꦧꦼꦤꦁꦱꦭꦏꦲꦥꦼꦛꦉꦩ꧀ꦧꦸꦭꦤ꧀꧉ꦱꦧꦶꦧꦂꦫꦶꦥꦸꦤ꧀ꦥꦥꦿꦁꦔꦤ꧀ꦱꦔꦁꦠꦲꦸꦤ꧀ꦠꦸꦮꦶꦤ꧀ꦥꦥꦿꦁꦔꦤ꧀ꦠꦶꦒꦁꦠꦲꦸꦤ꧀ꦮꦲꦸ꧈ꦧꦤ꧀ꦢꦺꦫꦏꦏꦭꦶꦃꦭꦗꦼꦁꦏꦥꦫꦶꦁꦔꦏꦼꦤ꧀ꦝꦠꦼꦁ Minamoto Yoshikuni ꦲꦶꦁꦒꦶꦃꦥꦸꦤꦶꦏꦥꦸꦠꦿꦤꦶꦥꦸꦤ꧀ꦗꦺꦤ꧀ꦢꦿꦭ꧀ Yohiiye ꦲꦶꦁꦏꦁꦎꦁꦏꦠꦶꦒ꧈ꦱꦭꦗꦼꦁꦔꦶꦥꦸꦤ꧀ Yoshikuni ꦲꦢꦩꦼꦭ꧀ꦧꦤ꧀ꦢꦺꦫꦏꦭꦶꦃꦲꦶꦁꦏꦁꦮꦸꦗꦸꦢ꧀ꦢꦶꦥꦸꦤ꧀ꦏꦢꦺꦴꦱ꧀ꦢꦺꦤꦺꦧꦤ꧀ꦢꦺꦫꦥꦫꦶꦁꦔꦶꦥꦸꦤ꧀ꦱꦁꦤꦠ꧈ꦱꦲꦭꦗꦼꦁꦏꦥꦫꦶꦁꦔꦏꦼꦤ꧀ꦥꦸꦠꦿꦤꦶꦥꦸꦤ꧀ꦗꦊꦂꦏꦏꦭꦶꦃ꧉ꦧꦤ꧀ꦢꦺꦫꦲꦶꦁꦏꦁꦱꦠꦸꦁꦒꦭ꧀ꦲꦶꦁꦏꦁꦩꦮꦶꦕꦶꦫꦶꦱꦽꦔꦺꦔꦺ꧈ꦱꦲꦲꦶꦁꦏꦁꦮꦺꦴꦤ꧀ꦠꦼꦤ꧀ꦧꦸꦤ꧀ꦢꦼꦂꦫꦤ꧀ꦤꦶꦥꦸꦤ꧀ꦏꦤ꧀ꦛꦶꦒꦫꦶꦱ꧀ꦏꦼꦚ꧀ꦕꦼꦁꦱꦠꦸꦁꦒꦭ꧀[foto]ꦏꦥꦫꦶꦁꦔꦏꦼꦤ꧀ꦝꦠꦼꦁ Minamoto Yoshishige꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦭꦗꦼꦁꦤꦸꦫꦸꦤ꧀ꦤꦏꦼꦤ꧀ꦢꦫꦃ Nitta꧈ꦢꦺꦤꦺꦧꦤ꧀ꦢꦺꦫꦱꦠꦸꦁꦒꦶꦭ꧀ꦭꦶꦥꦸꦤ꧀ꦲꦶꦁꦏꦁꦲꦕꦶꦫꦶꦉꦩ꧀ꦧꦸꦭꦤ꧀ꦱꦲꦮꦺꦴꦤ꧀ꦠꦼꦤ꧀ꦧꦸꦤ꧀ꦢꦼꦂꦫꦤ꧀ꦤꦶꦥꦸꦤ꧀ꦩꦮꦶꦒꦫꦶꦱ꧀ꦏꦼꦚ꧀ꦕꦼꦁꦏꦏꦭꦶꦃ[ꦓꦿꦥ꦳ꦶꦏ꧀]ꦏꦥꦫꦶꦁꦔꦏꦼꦤ꧀ꦝꦠꦼꦁ Yoshiyasu ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦤꦸꦫꦸꦤ꧀ꦤꦏꦼꦤ꧀ Ashikaga ꦲꦶꦁꦏꦁꦗꦸꦩꦼꦤꦼꦁꦥꦔꦒꦼꦁꦲꦶꦁꦤꦒꦫꦶꦗꦼꦦꦁꦏꦭꦠꦲꦸꦤ꧀ 1338 ꦢꦸꦩꦸꦒꦶꦠꦲꦸꦤ꧀ 1573꧉ꦢꦺꦤꦺꦢꦫꦃ Shimatsu ꦲꦶꦁꦏꦁꦢꦸꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦱꦏꦶꦢꦸꦭ꧀ꦭꦶꦥꦸꦤ꧀ (ꦗꦼꦦꦁ)꧈ꦥꦸꦤꦶꦏꦢꦺꦢꦺꦧꦁꦱꦤꦶꦁꦢꦫꦃ Minamoto ꦱꦂꦠꦲꦁꦒꦝꦃꦲꦶꦧꦤ꧀ꦢꦺꦫꦥꦶꦪꦩ꧀ꦧꦏ꧀꧈ꦲꦕꦶꦫꦶꦧꦸꦤ꧀ꦢꦼꦂꦫꦤ꧀ꦤꦶꦥꦸꦤ꧀ꦒꦫꦶꦱ꧀ꦩꦿꦥꦠ꧀[foto]꧉ ꧋ꦗꦺꦤ꧀ꦢꦿꦭ꧀ Yoshishige ꦏꦱ꧀ꦧꦸꦠ꧀ꦔꦶꦁꦒꦶꦭ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦤꦸꦫꦸꦤ꧀ꦤꦏꦼꦤ꧀ꦢꦫꦃ Nitta꧈ꦲꦸꦒꦶꦲꦤꦸꦫꦸꦤ꧀ꦤꦏꦼꦤ꧀ꦢꦫꦃ Tokugawa ꦏꦭꦶꦪꦤ꧀ꦢꦫꦃ Sakai꧉ ꦥꦫꦢꦫꦃ Tokugawa ꦥꦸꦤꦶꦏꦏꦛꦃꦲꦶꦁꦏꦁꦱꦩꦶꦢꦢꦺꦴꦱ꧀ꦲꦢꦶꦥꦠꦶꦲꦔꦸꦮꦱꦤ꧀ꦤꦶꦠꦤꦃꦗꦼꦦꦁ(1603 - 1868)꧈ꦢꦺꦤꦺꦢꦫꦃꦲꦶꦥꦸꦤ꧀ Sakai ꦥꦸꦤꦶꦏꦏꦭꦲꦭꦩꦶꦥꦸꦤ꧀ꦥꦫꦲꦢꦶꦥꦠꦶꦢꦫꦃ Tokugawa ꦏꦛꦃꦲꦶꦁꦏꦁꦱꦩꦶꦢꦢꦺꦴꦱ꧀ꦧꦺꦴꦁꦱꦭꦸꦲꦸꦂ꧉ꦢꦫꦃꦏꦏꦭꦶꦃꦮꦲꦸꦱꦩꦶꦲꦁꦒꦝꦃꦲꦶꦧꦤ꧀ꦢꦺꦫꦲꦶꦁꦏꦁꦲꦕꦶꦫꦶꦱꦽꦔꦺꦔꦺꦏꦥꦸꦭꦱ꧀ꦲꦧꦿꦶꦠ꧀ꦢꦶꦥꦸꦤ꧀ꦝꦱꦫꦶꦥꦼꦛꦏ꧀꧈ꦢꦢꦺꦴꦱ꧀ꦮꦸꦗꦸꦢ꧀ꦢꦶꦥꦸꦤ꧀ꦏꦢꦺꦴꦱ꧀ꦢꦺꦤꦺꦧꦤ꧀ꦢꦺꦫꦗꦼꦦꦁꦏꦧꦁꦱꦤ꧀ꦱꦩꦁꦏꦺꦥꦸꦤꦶꦏ꧉ꦧꦤ꧀ꦢꦺꦫꦲꦶꦁꦏꦁꦮꦸꦗꦸꦢ꧀ꦩꦏꦠꦼꦤ꧀ꦮꦲꦸ꧈ꦠꦸꦮꦸꦃꦲꦶꦥꦸꦤ꧀ꦏꦭꦲꦶꦁꦲꦧꦢ꧀ 15꧈ꦢꦢꦺꦴꦱ꧀ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦧꦤ꧀ꦢꦺꦫꦲꦶꦁꦏꦁꦲꦕꦶꦫꦶꦥꦊꦛꦺꦏ꧀ꦏꦶꦁꦱꦸꦂꦪꦥꦸꦤꦶꦏ꧈ꦲꦶꦁꦒꦶꦃꦱꦩ꧀ꦥꦸꦤ꧀ꦮꦶꦮꦶꦠ꧀ꦏꦭꦲꦧꦢ꧀ 15 ꦮꦲꦸ꧉ ꧋ꦲꦶꦁꦠꦲꦸꦤ꧀ 1854 ꦦꦩꦫꦺꦤ꧀ꦠꦃꦗꦼꦦꦁꦲꦤ꧀ꦝꦮꦸꦃꦲꦏꦼꦤ꧀ꦝꦠꦼꦁꦥꦫꦏꦮꦸꦭꦤꦶꦥꦸꦤ꧀ꦱꦢꦪ꧈ꦧꦶꦭꦶꦃꦧꦤ꧀ꦢꦺꦫꦲꦶꦁꦏꦁꦲꦕꦶꦫꦶꦥꦊꦛꦺꦏ꧀ꦏꦶꦁꦱꦸꦂꦪ꧈ꦢꦢꦺꦴꦱ꧀ꦧꦤ꧀ꦢꦺꦫꦤꦶꦥꦸꦤ꧀ꦱꦢꦪꦧꦲꦶꦠꦲꦶꦁꦠꦤꦃꦗꦼꦦꦁ꧈ꦱꦲꦱꦭꦗꦼꦁꦔꦶꦥꦸꦤ꧀ꦥꦫꦢꦫꦃꦢꦫꦃꦮꦲꦸꦱꦢꦪꦢꦶꦥꦸꦤ꧀ꦲꦶꦕꦭ꧀ꦭꦶ꧈ꦲꦶꦁꦮꦸꦱꦤꦧꦤ꧀ꦢꦺꦫꦏꦱ꧀ꦧꦸꦠ꧀ꦔꦶꦁꦒꦶꦭ꧀ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦧꦤ꧀ꦢꦺꦫꦤꦶꦁꦏꦧꦁꦱꦤ꧀꧉ |
Bandera Kabangsan Jêpang[besut]Para maos tamtunipun sampun sami anguningani piyambak, sabên-sabên wontên karamean agêng, ingkang gêgayutan kalihan ing tanah Jêpang, para têtiyang Jêpang ingkang sami bikak toko wontên ing jajahan nagari ngriki, sami tumut angurmati ambèbèr banderanipun, inggih punika ingkang adhasar pêthak ing têngah mawi bundêran abrit. Bundêran abrit ing têngah-têngahing bandera wau, dados pasêmon palêthèking surya. Wontênipun karajan Jêpang ngangge bandera ciri palêthèking surya, punika miturut sêrat kalawarti The Young East kintên-kintên makatên: [Grafik] Nginggil punika gambaring bandera kabangsan Jêpang. Nagari Jêpang punika sami-sami nagari, sabên taun-taunipun kathah têrangipun katimbang jawahipun, amila inggih mèmpêr manawi dipun wastanana: nagari panggenan surya. Miturut cariyosipun Sang Putri Amatêrasu, inggih ingkang kasuwur kawastanan dèwining srêngenge, punika kaanggêp ingkang nurunakên warga karajan Jêpang pancêr saking èstri. Ing babad nyariyosakên, miturut piandêling băngsa Jêpang, kala sang putri umpêtan wontên ing korining langit, ing donya lajêng pêtêng andhêdhêt. Raja Jêpang punika ugi dipun anggêp têdhaking srêngenge, lan wisesanipun dipun samèkakên kados soroting srêngenge amadhangi jagad botên mawi pilih papan. Kala jaman kinanipun têtiyang băngsa Cina, manawi mastani Jêpang: Sipon, mênggah têgêsipun: aslining srêngenge, dene nagarinipun: nagari panggenanipun srêngenge mlêthèk. Nama Sipon wau, dening para ingkang sami ngumbara ing jaman kina, kados ta: Marco Polo lan sanès-sanèsipun, dipun sêbut: Sipangu, danguning dangu lajêng dipun wastani Jêpang. Dados Jêpang utawi Sipon inggih punika miturut sêsêbutanipun têtiyang Jêpang piyambak, punika anggadhahi têgês: asalipun srêngenge. Dumugining dintên samangke, têtiyang Jêpang ing padhusunan taksih kathah anyêmbahyangi srêngenge. Ingkang punika amila inggih botên anggumunakên, bilih pamlêthèking srêngenge punika salajêngipun nuntên dados gambar pasêmoning kabangsan. Kala ing taun 1056: tiyang nama Abe Yoritoki asli saking salèr wetaning tanah Jêpang, ambalela dhatêng Sang Raja Gorezei. Ingkang dados têtungguling prajuriting narendra amangsah kraman wau, nama Minamoto Yoryoshi, sapêjahipun Abe Youtoki kraman wau kalajêngakên dening anakipun kêkalih nama: Sadato tuwin Muneto, dene ingkang kajibah angawonakên kraman ingkang kantun punika: Jendral Yosiihye inggih kalêbêt brayatipun Minamoto kasbut nginggil. Danguning kraman punika kirang langkung 9 taun, amila ing babad Jêpang pêrang sabăngsa wau, dipun wastani paprangan sangang taun, namung punika kangge ambedakakên kalihan wontênipun paprangan tigang taun, ingkang wiwitipun ing taun 1088, inggih punika kala sadhèrèk kêkalih: Kiyohara Takehira lan Iyehira ambalela dhatêng sang raja, dene ingkang ambengkasakên kraman wau, inggih Jendral Yoshiiye nginggil wau. Jalaran saking agênging lêlabêtanipun bêbrayataning Minamoto dhatêng raja, wusana sang raja lajêng amaringi dhatêng Jendral Yoriyoshi bandera lakên kêkalih, ingkang satunggal sinulam ing bênang êmas apêtha srêngenge, satunggalipun sinulam ing bênang salaka apêtha rêmbulan. Sabibaripun paprangan sangang taun tuwin paprangan tigang taun wau, bandera kêkalih lajêng kaparingakên dhatêng Minamoto Yoshikuni inggih punika putranipun Jendral Yohiiye ingkang ăngka tiga, salajêngipun Yoshikuni adamêl bandera kalih ingkang wujudipun kadosdene bandera paringipun sang nata, saha lajêng kaparingakên putranipun jalêr kêkalih. Bandera ingkang satunggal ingkang mawi ciri srêngenge, saha ingkang wontên bundêranipun kanthi garis kêncêng satunggal [Grafik] kaparingakên dhatêng Minamoto Yoshishige, inggih punika ingkang lajêng nurunakên darah Nitta, dene bandera satunggilipun ingkang aciri rêmbulan saha wontên bundêranipun mawi garis kêncêng kêkalih [Grafik] kaparingakên dhatêng Yoshiyasu inggih punika ingkang nurunakên Ashikaga ingkang jumênêng pangagêng ing nagari Jêpang kala taun 1338 dumugi taun 1573. Dene darah Shimatsu ingkang dêdunung wontên ing sakidulipun Kijushu (Jêpang), punika dede bangsaning darah Minamoto sarta anggadhahi bandera piyambak, aciri bundêranipun garis mrapat [Grafik]. Jendral Yoshishige kasbut nginggil, inggih punika ingkang nurunakên darah Nitta, ugi anurunakên darah Tokugawa kalihan darah Sakai. Para darah Tokugawa punika kathah ingkang sami dados adipati anguwasani tanah Jêpang (1603-1868), dene darahipun Sakai punika kala alamipun para adipati darah Tokugawa kathah ingkang sami dados băngsa luhur. Darah kêkalih wau sami anggadhahi bandera ingkang aciri srêngenge kapulas abrit dipun dhasari pêthak, dados wujudipun kadosdene bandera Jêpang kabangsan samangke punika. Bandera ingkang wujud makatên wau, tuwuhipun kala ing abad 15, dados wontênipun bandera ingkang aciri palêthèking surya punika, inggih sampun wiwit kala abad 15 wau. Ing taun 1854 pamarentah Jêpang andhawuhakên dhatêng para kawulanipun sadaya, bilih bandera ingkang aciri palêthèking surya, dados banderanipun sadaya baita ing tanah Jêpang, saha salajêngipun para darah-darah wau sadaya dipun icali, ing wusana bandera kasbut nginggil katêtêpakên dados banderaning kabangsan. | ||
|
[ 611 ]꧋ꦧꦧꦢ꧀ꦢꦶꦥꦸꦤ꧀ꦠꦶꦪꦁꦠꦤꦶꦥꦿꦶꦧꦸꦩꦶ꧉ ꧋(ꦱꦩ꧀ꦧꦼꦠ꧀ꦠꦶꦥꦸꦤ꧀ꦏꦗꦮꦺꦤ꧀ꦎꦁꦏ 34) ꧋ꦢꦔꦸꦢꦔꦸꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦲꦮꦸꦲꦮꦸꦲꦶꦁꦒꦶꦃꦏꦱꦸꦩꦼꦉꦥ꧀ꦥꦤ꧀ꦲꦶꦁꦱꦤꦺꦱ꧀ ꦩꦭꦃꦠꦸꦮꦤ꧀ ꦲꦂꦗꦢꦶꦥꦸꦫꦭꦗꦼꦁꦲꦱꦿꦶꦁꦏꦠꦩꦸꦮꦤ꧀ꦠꦶꦪꦁꦲꦶꦁꦏꦁꦭꦗꦼꦁꦢꦢꦺꦴꦱ꧀ꦩꦶꦠꦿ꧈ꦠꦸꦮꦶꦤ꧀ꦠꦽꦏꦝꦁꦏꦠꦩꦸꦮꦤ꧀ꦥꦿꦶꦪꦤ꧀ꦠꦸꦤ꧀꧉ ꧋ꦲꦶꦁꦠꦲꦸꦤ꧀ 1923 ꦠꦸꦮꦤ꧀ ꦲꦂꦗꦢꦶꦥꦸꦫꦢꦶꦥꦸꦤ꧀ꦥꦶꦭꦶꦃꦢꦢꦺꦴꦱ꧀ꦥꦔꦂꦱꦥꦏꦼꦩ꧀ꦥꦭ꧀ꦭꦤ꧀ "Tani Kopi" ꦲꦶꦁꦏꦮꦼꦢꦤꦤ꧀ꦒꦼꦤ꧀ꦠꦺꦁ꧉ꦲꦶꦁꦔꦿꦶꦏꦸꦭꦗꦼꦁꦠꦼꦥꦁꦏꦭꦶꦪꦤ꧀ꦠꦸꦮꦤ꧀ Ottolander꧉ꦠꦸꦮꦤ꧀ꦲꦂꦗꦢꦶꦥꦸꦫꦲꦁꦱꦭ꧀ꦥꦶꦮꦸꦭꦁꦏꦛꦃꦲꦶꦁꦧꦧ꧀ꦠꦼꦠꦤꦺꦤ꧀꧈ꦩꦭꦃꦭꦗꦼꦁꦔꦁꦒꦼꦥ꧀ꦒꦸꦫꦸꦝꦠꦼꦁꦠꦸꦮꦤ꧀ Ottolander꧈ꦮꦸꦱꦤꦥꦶꦠꦼꦥꦁꦔꦤ꧀ꦤꦶꦥꦸꦤ꧀ꦮꦲꦸꦭꦗꦼꦁꦔꦶꦤ꧀ꦝꦑꦏꦼꦤ꧀ꦏꦛꦃꦲꦶꦁꦥꦶꦠꦼꦥꦁꦔꦤ꧀ꦝꦠꦼꦁꦠꦶꦠꦶꦪꦁꦲꦃꦭꦶꦠꦸꦮꦶꦤ꧀ꦥꦫꦥꦿꦶꦪꦤ꧀ꦠꦸꦤ꧀꧉ ꧋ꦱꦱꦼꦭꦤꦶꦁꦮꦗꦶꦧ꧀꧈ꦱꦼꦤꦼꦁꦱꦼꦤꦼꦁꦲꦤ꧀ꦢꦿꦮꦶꦤꦮꦺꦴꦤ꧀ꦠꦼꦤ꧀ꦲꦶꦁꦥꦏꦼꦧꦺꦴꦤ꧀ꦤꦤ꧀꧉ (keterangan foto) ꧋ꦥꦫꦠꦸꦮꦤ꧀ꦠꦸꦮꦤ꧀ꦥꦶꦠꦼꦥꦁꦔꦤ꧀ꦤꦶꦥꦸꦤ꧀ꦠꦸꦮꦤ꧀ ꦲꦂꦗꦢꦶꦥꦸꦫ꧉ꦠꦸꦮꦤ꧀ ꦲꦂꦗꦢꦶꦥꦸꦫꦲꦶꦁꦏꦁꦔꦢꦼꦒ꧀ꦲꦶꦁꦱꦶꦱꦶꦃꦏꦶꦮ꧉ ꧋ꦲꦶꦁꦮꦼꦏꦱ꧀ꦱꦤ꧀ꦤꦶꦁꦠꦲꦸꦤ꧀ 1924 ꦠꦸꦮꦤ꧀ ꦲꦂꦗꦢꦶꦥꦸꦫꦢꦶꦥꦸꦤ꧀ꦥꦶꦭꦶꦃꦢꦢꦺꦴꦱ꧀ꦏꦶꦢ꧀ꦥꦺꦴꦊꦏ꧀ꦏꦿꦺꦝꦶꦠ꧀ꦧꦁꦲꦶꦁꦧꦚꦸꦮꦔꦶꦠꦸꦮꦶꦤ꧀ꦢꦢꦺꦴꦱ꧀ꦧꦼꦱ꧀ꦠꦶꦂꦏꦺꦴꦩꦶꦠꦺ "Pertoeloengan Among Tani". ꧋ꦲꦶꦁꦠꦲꦸꦤ꧀ 1925 ꦲꦢꦼꦒ꧀ꦒꦶꦁꦏꦧꦸꦢꦶꦢꦪꦤ꧀ꦮꦲꦸꦲꦁꦱꦭ꧀ꦥꦩ꧀ꦧꦶꦪꦤ꧀ꦠꦸꦤꦶꦥꦸꦤ꧀ꦏꦸꦭꦮꦂꦒꦤꦶꦥꦸꦤ꧀ꦠꦸꦮꦤ꧀ ꦲꦂꦗꦢꦶꦥꦸꦫ꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦧꦿꦶꦏ꧀ꦏꦁꦒꦺꦏꦥꦽꦭꦸꦮꦤ꧀ꦤꦶꦁꦮꦸꦭꦸꦥꦩꦼꦢꦭ꧀꧈ꦠꦸꦮꦶꦤ꧀ꦱꦶꦠꦶꦤꦶꦥꦸꦤ꧀ꦢꦢꦺꦴꦱ꧀ 475 ꦧꦲꦸ꧈ꦲꦶꦁꦏꦁ 100 ꦧꦲꦸꦥꦏꦺꦴꦥꦺꦤ꧀꧈ꦲꦶꦁꦏꦁ 225 ꦧꦲꦸꦱꦧꦶꦤ꧀꧈ꦢꦺꦤꦺꦱꦤꦺꦱ꧀ꦱꦶꦥꦸꦤ꧀ꦕꦭꦺꦴꦤ꧀ꦥ [ 612 ]ꦏꦺꦴꦥꦺꦤ꧀꧉ꦕꦼꦏꦏ꧀ꦏꦶꦥꦸꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦏꦧꦸꦢꦶꦢꦪꦤ꧀ꦮꦲꦸꦱꦂꦮꦩꦶꦏꦤ꧀ꦠꦸꦏ꧀ꦏꦶꦝꦠꦼꦁꦥꦁꦒꦼꦱꦁꦔꦤ꧀ꦤꦶꦁꦠꦶꦪꦁ꧉ ꧋ꦲꦶꦁꦱꦥꦸꦤꦶꦏꦱꦼꦢꦾꦤꦶꦥꦸꦤ꧀ꦠꦸꦮꦤ꧀ ꦲꦂꦗꦢꦶꦥꦸꦫꦲꦁꦒꦺꦤ꧀ꦤꦶꦥꦸꦤ꧀ꦧꦝꦺꦲꦚ꧀ꦗꦼꦩ꧀ꦧꦂꦫꦏꦼꦤ꧀ꦏꦮꦿꦸꦃꦧꦧ꧀ꦠꦼꦠꦤꦺꦤ꧀ꦝꦠꦼꦁꦠꦤꦃꦌꦫꦺꦴꦥꦃꦏꦱꦼꦩ꧀ꦧꦢ꧀ꦢꦤ꧀꧈ꦱꦱꦉꦔꦤ꧀ꦏꦭꦶꦠꦤ꧀ꦠꦸꦮꦤ꧀ Ottolander꧉ꦲꦶꦁꦏꦁꦧꦝꦺꦢꦶꦥꦸꦤ꧀ꦲꦩ꧀ꦧꦃꦱꦏꦶꦁꦒꦺꦤꦸꦮꦝꦠꦼꦁ Rome꧈ꦲꦶꦁꦔꦿꦶꦏꦸꦮꦺꦴꦤ꧀ꦠꦼꦤ꧀ Internationale Landsbouwvereeniging꧉ꦱꦏꦶꦁ Rome ꦝꦠꦼꦁꦥꦱꦶꦠꦺꦤ꧀ꦮꦫꦢꦶꦤ꧀ꦲꦶꦁ Po꧈ꦲꦶꦁꦔꦿꦶꦏꦸꦥꦥꦤ꧀ꦠꦠꦤꦺꦤ꧀ꦲꦶꦁꦌꦫꦺꦴꦥꦃꦱꦶꦱꦶꦃꦏꦶꦢꦸꦭ꧀꧉ꦱꦏꦶꦁ Po ꦝꦠꦼꦁ Berlijn ꦔ꧀ꦭꦁꦏꦸꦁꦔꦶ Zwitserland꧈ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦧꦝꦺꦱꦺꦴꦮꦤ꧀ꦠꦸꦮꦤ꧀ Dr. Zimmerman꧈ꦫꦸꦩꦶꦪꦶꦤ꧀ꦝꦶꦫꦺꦏ꧀ꦠꦸꦂ Proefstation꧉ꦱꦏꦶꦁ Berlijn ꦝꦠꦼꦁ Boskoop ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦧꦝꦺꦱꦶꦤꦲꦸꦲꦶꦁꦧꦧ꧀ꦔꦺꦭ꧀ꦩꦶꦮꦺꦴꦮꦺꦴꦃꦲꦤ꧀꧉ꦱꦭꦗꦼꦁꦔꦶꦥꦸꦤ꧀ꦝꦠꦼꦁꦥꦁꦒꦺꦤ꧀ꦤꦤ꧀ꦱꦤꦺꦱ꧀ꦱꦶꦥꦸꦤ꧀ꦩꦭꦶꦃꦲꦶꦁꦏꦁꦢꦶꦥꦸꦤ꧀ꦩꦤꦃꦥꦽꦭꦸ꧉ꦲꦸꦒꦶꦧꦝꦺꦩꦩ꧀ꦥꦶꦂꦝꦠꦼꦁꦩꦼꦯꦶꦂꦤꦶꦔꦭ꧀ꦭꦶꦥꦱꦶꦠꦺꦤ꧀ꦲꦶꦁꦟꦶꦭ꧀ꦲꦶꦁꦏꦁꦩꦶꦱꦸꦮꦸꦂꦭꦺꦴꦃ꧈ꦠꦸꦮꦶꦤ꧀ꦤꦶꦔꦭ꧀ꦭꦶꦧꦼꦤ꧀ꦢꦸꦁꦔꦤ꧀ꦲꦶꦁ Asoean꧈ꦲꦶꦁꦏꦁꦱꦗꦒꦢ꧀ꦲꦒꦼꦁꦥꦶꦪꦩ꧀ꦧꦏ꧀꧉ ꧋ꦮꦸꦱꦤꦏꦗꦮꦺꦤ꧀ꦩꦼꦩꦸꦗꦶ꧈ꦩꦸꦒꦶꦠꦶꦤ꧀ꦢꦏ꧀ꦏꦶꦥꦸꦤ꧀ꦠꦸꦮꦤ꧀ ꦲꦂꦗꦢꦶꦥꦸꦫꦮꦲꦸꦱꦩ꧀ꦥꦸꦤ꧀ꦏꦶꦫꦁꦱꦠꦸꦁꦒꦭ꧀ꦥꦸꦤꦥ꧈ꦠꦸꦮꦶꦤ꧀ꦱꦒꦼꦢꦔꦸꦤ꧀ꦝꦸꦃꦮꦺꦴꦃꦲꦶꦥꦸꦤ꧀꧉ ꧋ꦏꦼꦛꦺꦴꦥꦿꦏ꧀ꦲꦶꦁꦔꦪꦺꦴꦓꦾꦏꦂꦠ꧉ ꧋ꦮꦶꦮꦶꦠ꧀ꦠꦶꦥꦸꦤ꧀ꦲꦶꦁꦔꦪꦺꦴꦓꦾꦏꦂꦠꦮꦺꦴꦤ꧀ꦠꦼꦤ꧀ꦠꦶꦠꦶꦁꦔꦭꦤ꧀ꦏꦼꦛꦺꦴꦥꦿꦏ꧀꧈ꦥꦸꦤꦶꦏꦮꦺꦴꦤ꧀ꦠꦼꦤ꧀ꦲꦶꦁꦠꦼꦔꦃꦠꦼꦔꦃꦲꦶꦁꦠꦲꦸꦤ꧀ 1926꧈ꦏꦧꦂꦫꦶꦥꦸꦤ꧀ꦲꦱ꧀ꦭꦶꦱꦏꦶꦁꦯꦸꦫꦏꦂꦠ꧈ꦢꦺꦤꦺꦢꦸꦩꦸꦒꦶꦤꦶꦥꦸꦤ꧀ꦲꦶꦁꦔꦪꦺꦴꦓꦾꦏꦂꦠ꧈ꦲꦶꦁꦏꦁꦢꦶꦥꦸꦤ꧀ꦗꦸꦗꦸꦒ꧀ꦲꦶꦁꦏꦩ꧀ꦥꦸꦁꦢꦼꦩꦁꦔꦤ꧀꧈ꦱꦭꦺꦂꦧꦭꦥ꧀ꦥꦤ꧀꧈ꦢꦶꦥꦸꦤ꧀ꦥꦶꦠꦺꦴꦁꦠꦺꦴꦤ꧀ꦤꦏꦼꦤ꧀꧉ꦱꦏꦮꦶꦠ꧀ꦲꦶꦁꦏꦁꦤꦶꦔꦭ꧀ꦭꦶꦲꦶꦁꦒꦶꦃꦧꦺꦴꦠꦼꦤ꧀ꦱꦥꦶꦤ꧀ꦠꦼꦤ꧀ꦤ꧈ꦤꦔꦶꦁꦢꦔꦸꦢꦔꦸꦱꦪꦏꦛꦃ꧈ꦩꦭꦃꦔꦤ꧀ꦠꦺꦴꦱ꧀ꦩꦁꦱꦸꦭ꧀ꦭꦏꦼꦤ꧀ꦲꦶꦁꦏꦁꦤꦶꦔꦭ꧀ꦭꦶ꧈ꦱꦏꦶꦁꦏꦠꦼꦭꦱ꧀ꦱꦤ꧀ꦥꦁꦒꦺꦤ꧀ꦤꦤ꧀꧉ ꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦫꦶꦥꦸꦤ꧀ꦏꦼꦛꦺꦴꦥꦿꦏ꧀꧈ꦲꦶꦁꦏꦩ꧀ꦥꦸꦁꦟꦠꦠꦫꦸꦤꦤ꧀꧈ꦦꦏꦸꦄꦭꦩ꧀ꦩꦤ꧀꧈ꦲꦶꦁꦏꦁꦱꦩ꧀ꦥꦸꦤ꧀ꦤꦠꦺꦏꦠꦶꦩ꧀ꦧꦭ꧀ꦭꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦿꦠꦺꦴꦤ꧀ꦱꦸꦫꦏꦂꦠ꧈ꦱꦧꦒꦺꦪꦤ꧀ꦭꦩ꧀ꦥꦃꦲꦤ꧀ꦩꦢ꧀ꦱꦭꦶꦩ꧀꧉(keterangan foto) ꧋ꦠꦠꦧꦸꦃꦲꦤ꧀ꦤꦶꦥꦸꦤ꧀ꦏꦼꦛꦺꦴꦥꦿꦏ꧀ꦥꦸꦤꦶꦏ꧇ꦊꦱꦸꦁ꧈ꦱꦸꦭꦶꦁ꧈ꦠꦽꦧꦁꦭꦤ꧀ꦏꦼꦤ꧀ꦝꦁ꧉ꦱꦤ꧀ꦝꦁꦥꦔꦁꦒꦺꦤ꧀ꦤꦶꦥꦸꦤ꧀ꦭꦶꦩꦿꦃꦏꦢꦺꦴꦱ꧀ꦥꦔꦁꦒꦺꦥꦢꦶꦤ꧀ꦠꦼꦤ꧀ꦤꦤ꧀꧉ꦱꦶꦤ꧀ꦝꦺꦤꦤ꧀ꦤꦶꦥꦸꦤ꧀ꦩꦮꦶꦠꦼꦩ꧀ꦧꦁꦥꦸꦕꦸꦁꦭꦤ꧀ꦩꦶꦗꦶꦭ꧀꧉ ꧋ꦱꦧꦶꦧꦂꦫꦶꦥꦸꦤ꧀ꦏꦼꦛꦺꦴꦥꦿꦏ꧀ꦲꦶꦁꦔꦶꦁꦒꦶꦭ꧀ꦮꦲꦸ꧈ꦭꦗꦼꦁꦮꦺꦴꦤ꧀ꦠꦼꦤ꧀ꦏꦼꦛꦺꦴꦥꦿꦏ꧀ꦧꦫꦁꦔꦤ꧀ꦲꦶꦁꦏꦁꦲꦩ꧀ꦧꦫꦁꦝꦠꦼꦁꦥꦏꦩ꧀ꦥꦸꦁꦔꦤ꧀꧈ꦲꦸꦒꦶꦏꦛꦃꦲꦶꦁꦏꦁꦤꦁꦒꦥ꧀꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦸꦤꦶꦏꦭꦗꦼꦁꦔꦼꦩ꧀ꦧꦿꦃ꧈ |
Babadipun Tiyang Tani Pribumi[besut](Sambêtipun Kajawèn ăngka 34) Dangu-dangu kawontênanipun ing Awu-awu inggih kasumêrêpan ing sanès, malah Tuwan Arjadipura lajêng asring katamuwan tiyang ingkang lajêng dados mitra, tuwin trêkadhang katamuwan priyantun. Ing taun 1923 Tuwan Arjadipura dipun pilih dados pangarsa pakêmpalan Tani Kopi ing kawêdanan Gêntèng. Ing ngriku lajêng têpang kalihan Tuwan Ottolander. Tuwan Arjadipura angsal piwulang kathah ing bab têtanèn, malah lajêng nganggêp guru dhatêng Tuwan Ottolander, wusana pitêpanganipun wau lajêng ngindhakakên kathahing pitêpangan dhatêng têtiyang ahli tuwin para priyantun. [Grafik] Sasêlaning wajib, sênêng-sênêng andrawina wontên ing pakêbonan. [Grafik] Para tuwan-tuwan pitêpanganipun Tuwan Arjadipura. Tuwan Arjadipura ingkang ngadêg ing sisih kiwa. Ing wêkasaning taun 1924 Tuwan Arjadipura dipun pilih dados Widpolêk kredhit bang ing Banyuwangi tuwin dados bêstir komite "Pertoeloengan Among Tani". Ing taun 1925 adêging kabudidayan wau angsal pambiyantunipun kulawarganipun Tuwan Arjadipura, ngantos sagêd ngawontênakên pabrik kangge kaprêluwaning wulu pamêdal, tuwin sitinipun dados 475 bau, ingkang 100 bau pakopèn, ingkang 225 bau sabin, dene sanèsipun calon pakopèn. Cêkakipun kawontênanipun ing kabudidayan wau sarwa mikantuki dhatêng panggêsanganing tiyang. Ing sapunika sêdyanipun Tuwan Arjadipura anggènipun badhe anjêmbarakên kawruh bab têtanèn dhatêng tanah Eropah kasêmbadan, sêsarêngan kalihan Tuwan Ottolander. Ingkang badhe dipun ambah saking genua dhatêng Rome, ing ngriku wontên internationale landsbouw vereeniging. Saking Rome dhatêng pasitèn waradin ing po, ing ngriku papan têtanèn ing Eropah sisih kidul. Saking Po dhatêng Berlijn nglangkungi Zwitserland, wontên ing ngriku badhe sowan Tuwan Dr. Zimmerman, rumiyin dhirèktur Proefstation. Saking Berlijn dhatêng Boskoop wontên ing ngriku badhe sinau ing bab ngèlmi wowohan. Salajêngipun dhatêng panggenan sanèsipun malih ingkang dipun manah prêlu. Ugi badhe mampir dhatêng Mêsir ningali pasitèn ing Nil ingkang misuwur loh, tuwin ningali bêndungan ing Asoean, ingkang sajagad agêng piyambak. Wusana Kajawèn mêmuji, mugi tindakipun Tuwan Arjadipura wau sampun kirang satunggal punapa, tuwin sagêda ngundhuh wohipun. Kêthoprak ing Ngayogyakarta. Wiwitipun ing Ngayogyakarta wontên têtingalan kêthoprak, punika wontên ing têngah-têngahing taun 1926, kabaripun asli saking Surakarta, dene dumuginipun ing Ngayogyakarta, ingkang dipun jujug ing kampung Dêmangan, salèr Balapan, dipun pitongtonakên. Sakawit ingkang ningali inggih botên sapintêna, nanging dangu-dangu saya kathah, malah ngantos mangsulakên ingkang ningali, saking katêlasan panggenan. [Grafik] Nginggil punika gambaripun kêthoprak, ing kampung Natatarunan, Pakualaman, ingkang sampun nate katimbalan wontên ing kraton Surakarta, sabagean lampahan Mad Salim. Têtabuhanipun kêthoprak punika: lêsung, suling, trêbang lan kêndhang. Sandhang panganggenipun limrah kados pangangge padintênan. Sindhènipun mawi têmbang Pucung[3] lan Mijil. Sabibaripun kêthoprak ing nginggil wau, lajêng wontên kêthoprak barangan ingkang ambarang dhatêng pakampungan, ugi kathah ingkang nanggap. Sasampunipun punika lajêng ngêmbrah, mèh sabên pakampungan wontên ingkang damêl pakêmpalan kêthoprak. Ingkang nyuwun palilah dhatêng pamarentah kemawon sampun 260 pakêmpalan, malah kapara langkung, punika dèrèng sajawining kitha. [Grafik] Kêthoprak, Natatarunan, Pakualaman, sabagean lampahan Jakasuraya[besut]Kêthoprak pakampungan wau sakawit têtabuhan tuwin panganggenipun inggih kados ingkang dipun tulad, nanging lajêng dipun wêwahi gitar, mandholin tuwin piyul, panganggenipun kados bangsawan, punapa malih têtêmbanganipun inggih dipun wêwahi. Dene lêlampahanipun mêndhêt saking sêrat-sêrat kina utawi suluk, kados ta: Jaka Tarub, Yusup, Suksma Nglêmbara, Jaka Kusnun tuwin sanès-sanèsipun. Kawontênaning kêthoprak ing Ngayogyakarta punika pancèn ngeram-eramakên, paribasan ngantos dados kêmbang lambenipun tiyang sanagari, ngantos sagêd ngawonakên têtingalan sanèsipun, sanadyan para luhur pisan ugi sami karênan dhatêng kêthoprak. Sintên ingkang dhatêng ing Ngayogya tamtu lajêng sagêd sumêrêp dhatêng nyataning wartos wau, awit ing samargi-margi lajêng mirêng suwaraning tiyang rêngêng-rêngêng lagu kêthoprak, tuwin sabên dalu tamtu mirêng bilih ing kampung anu wontên kêthoprak. Salêbêtipun Jaarmarkt ing Ngayogyakarta ugi wontên têtingalanipun kêthoprak, tuwin sanès-sanèsipun. Ing ngriku kathahipun tiyang ningali, botên wontên ingkang nyamèni kados ingkang ningali kêthoprak. Dalah jèsbènipun rèsturan Yap, punika manawi sampun ngancik têngah dalu, sasêlaning dhansah ugi mungêl lagu Pucung utawi Mijil kêthoprak. Tumrap tiyang ingkang kêsêngsêm, sagêd nyăndra: bilih ungêling jèsbèn lagu kêthoprak ing wanci têngah dalu wau, kados kumandhanging Jaarmarkt ingkang sami ngajak ngaso, wusana kumênyuting manahipun ingkang sami mirêng ngantos nabêt dipun bêkta dhatêng jaman pasupênan. [Iklan] | ||
|
[ 613 ]ꦩꦺꦃꦱꦧꦼꦤ꧀ꦥꦏꦩ꧀ꦥꦸꦁꦔꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦢꦩꦼꦭ꧀ꦥꦏꦼꦩ꧀ꦥꦭ꧀ꦭꦤ꧀ꦏꦼꦛꦺꦴꦥꦿꦏ꧀꧉ꦲꦶꦁꦏꦁꦚꦸꦮꦸꦤ꧀ꦥꦭꦶꦭꦃꦝꦠꦼꦁꦦꦩꦫꦺꦤ꧀ꦠꦃꦏꦺꦩꦮꦺꦴꦤ꧀ꦱꦩ꧀ꦥꦸꦤ꧀ 260 ꦥꦏꦼꦩ꧀ꦥꦭ꧀ꦭꦤ꧀꧈ꦩꦭꦃꦏꦥꦫꦭꦁꦏꦸꦁ꧈ꦥꦸꦤꦶꦏꦢꦺꦫꦺꦁꦱꦗꦮꦶꦤꦶꦁꦏꦶꦛ꧉ ꧋ꦏꦼꦛꦺꦴꦥꦿꦏ꧀꧈ꦟꦠꦠꦫꦸꦤꦤ꧀꧈ꦦꦏꦸꦄꦭꦩ꧀ꦩꦤ꧀꧈ꦱꦧꦒꦺꦪꦤ꧀ꦭꦩ꧀ꦥꦃꦲꦤ꧀ꦗꦏꦯꦸꦫꦪ꧉ (keterangan foto) ꧋ꦏꦼꦛꦺꦴꦥꦿꦏ꧀ꦥꦏꦩ꧀ꦥꦸꦁꦔꦤ꧀ꦮꦲꦸꦱꦏꦮꦶꦠ꧀ꦠꦠꦧꦸꦲꦤ꧀ꦠꦸꦮꦶꦤ꧀ꦥꦔꦁꦒꦺꦤꦶꦥꦸꦤ꧀ꦲꦶꦁꦒꦶꦃꦏꦢꦺꦴꦱ꧀ꦲꦶꦁꦏꦁꦢꦶꦥꦸꦤ꧀ꦠꦸꦭꦢ꧀꧈ꦤꦔꦶꦁꦭꦗꦼꦁꦢꦶꦥꦸꦤ꧀ꦮꦼꦮꦃꦲꦶꦒꦶꦠꦂ꧈ꦩꦤ꧀ꦝꦺꦴꦭꦶꦤ꧀ꦠꦸꦮꦶꦤ꧀ꦥꦶꦪꦸꦭ꧀꧈ꦥꦔꦁꦒꦺꦤꦶꦥꦸꦤ꧀ꦏꦢꦺꦴꦱ꧀ꦧꦁꦱꦮꦤ꧀꧈ꦥꦸꦤꦥꦩꦭꦶꦃꦠꦼꦠꦼꦩ꧀ꦧꦔꦤ꧀ꦤꦶꦥꦸꦤ꧀ꦲꦶꦁꦒꦶꦃꦢꦶꦥꦸꦤ꧀ꦮꦼꦮꦃꦲꦶ꧉ꦢꦺꦤꦺꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦩꦼꦤ꧀ꦝꦼꦠ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦶꦤꦲꦸꦠꦮꦶꦱꦸꦭꦸꦏ꧀꧈ꦏꦢꦺꦴꦱ꧀ꦠ꧇ꦗꦏꦡꦫꦸꦧ꧀꧈ꦪꦸꦯꦸꦥ꧀꧈ꦯꦸꦏ꧀ꦱ꧀ꦩꦔ꧀ꦭꦼꦩ꧀ꦧꦫ꧈ꦗꦏꦏꦸꦱ꧀ꦤꦸꦤ꧀ꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ ꧋ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦏꦼꦛꦺꦴꦥꦿꦏ꧀ꦲꦶꦁꦔꦪꦺꦴꦓꦾꦏꦂꦠꦥꦸꦤꦶꦏꦥꦚ꧀ꦕꦺꦤ꧀ꦔꦺꦫꦩ꧀ꦲꦺꦫꦩ꧀ꦩꦏꦼꦤ꧀꧈ꦥꦫꦶꦧꦱꦤ꧀ꦔꦤ꧀ꦠꦺꦴꦱ꧀ꦢꦢꦺꦴꦱ꧀ꦏꦼꦩ꧀ꦧꦁꦭꦩ꧀ꦧꦺꦤꦶꦥꦸꦤ꧀ꦠꦶꦪꦁꦱꦤꦒꦫꦶ꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦔꦮꦺꦴꦤ꧀ꦤꦏꦼꦤ꧀ꦠꦶꦠꦶꦔꦭ꧀ꦭꦤ꧀ꦱꦤꦺꦱ꧀ꦱꦶꦥꦸꦤ꧀꧈ꦱꦤꦢꦾꦤ꧀ꦥꦫꦭꦸꦲꦸꦂꦥꦶꦱꦤ꧀ꦲꦸꦒꦶꦱꦩꦶꦏꦉꦤꦤ꧀ꦝꦠꦼꦁꦏꦼꦛꦺꦴꦥꦿꦏ꧀꧉ ꧋ꦱꦶꦤ꧀ꦠꦼꦤ꧀ꦲꦶꦁꦏꦁꦝꦠꦼꦁꦲꦶꦁꦔꦪꦺꦴꦓꦾꦠꦩ꧀ꦠꦸꦭꦗꦼꦁꦱꦒꦼꦢ꧀ꦱꦸꦩꦼꦉꦥ꧀ꦝꦠꦼꦁꦚꦠꦤꦶꦁꦮꦂꦠꦺꦴꦱ꧀ꦮꦲꦸ꧈ꦲꦮꦶꦠ꧀ꦲꦶꦁꦱꦩꦂꦒꦶꦩꦂꦒꦶꦭꦗꦼꦁꦩꦶꦉꦁꦱꦸꦮꦫꦤꦶꦁꦠꦶꦪꦁꦉꦔꦼꦁꦉꦔꦼꦁꦭꦒꦸꦏꦼꦛꦺꦴꦥꦿꦏ꧀꧈ꦠꦸꦮꦶꦤ꧀ꦱꦧꦼꦤ꧀ꦢꦭꦸꦠꦩ꧀ꦠꦸꦩꦶꦉꦁꦧꦶꦭꦶꦃꦲꦶꦁꦏꦩ꧀ꦥꦸꦁꦲꦤꦸꦮꦺꦴꦤ꧀ꦠꦼꦤ꧀ꦏꦼꦛꦺꦴꦥꦿꦏ꧀꧉ ꧋ꦱꦊꦧꦼꦠ꧀ꦠꦶꦥꦸꦤ꧀ Jaarmarkt ꦲꦶꦁꦔꦪꦺꦴꦓꦾꦏꦂꦠꦲꦸꦒꦶꦮꦺꦴꦤ꧀ꦠꦼꦤ꧀ꦠꦶꦠꦶꦔꦭ꧀ꦭꦤ꧀ꦤꦶꦥꦸꦤ꧀ꦏꦼꦛꦺꦴꦥꦿꦏ꧀꧈ꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦲꦶꦁꦔꦿꦶꦏꦸꦏꦛꦃꦲꦶꦥꦸꦤ꧀ꦠꦶꦪꦁꦤꦶꦔꦭ꧀ꦭꦶ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦚꦩꦺꦤ꧀ꦤꦶꦏꦢꦺꦴꦱ꧀ꦲꦶꦁꦏꦁꦤꦶꦔꦭ꧀ꦭꦶꦏꦼꦛꦺꦴꦥꦿꦏ꧀꧉ ꧋ꦢꦭꦃꦗꦺꦱ꧀ꦧꦺꦤ꧀ꦤꦶꦥꦸꦤ꧀ꦫꦺꦱ꧀ꦠꦸꦫꦤ꧀ Yap꧈ꦥꦸꦤꦶꦏꦩꦤꦮꦶꦱꦩ꧀ꦥꦸꦤ꧀ꦔꦚ꧀ꦕꦶꦏ꧀ꦠꦼꦔꦃꦢꦭꦸ꧈ꦱꦱꦼꦭꦤꦶꦁꦝꦤ꧀ꦱꦃꦲꦸꦒꦶꦩꦸꦔꦼꦭ꧀ꦭꦒꦸꦥꦸꦕꦸꦁꦲꦸꦠꦮꦶꦩꦶꦗꦶꦭ꧀ꦏꦼꦛꦺꦴꦥꦿꦏ꧀꧉ꦠꦸꦩꦿꦥ꧀ꦠꦶꦪꦁꦲꦶꦁꦏꦁꦏꦼꦱꦼꦁꦱꦼꦩ꧀꧈ꦱꦒꦼꦢ꧀ꦚꦺꦴꦤ꧀ꦢꦿ꧇ꦧꦶꦭꦶꦃꦲꦸꦔꦼꦭ꧀ꦭꦶꦁꦗꦺꦱ꧀ꦧꦺꦤ꧀ꦭꦒꦸꦏꦼꦛꦺꦴꦥꦿꦏ꧀ꦲꦶꦁꦮꦚ꧀ꦕꦶꦠꦼꦔꦃꦢꦭꦸꦮꦲꦸ꧈ꦏꦢꦺꦴꦱ꧀ꦏꦸꦩꦤ꧀ꦝꦁꦔꦶꦁ Jaarmarkt ꦲꦶꦁꦏꦁꦱꦩꦶꦔꦗꦏ꧀ꦔꦱꦺꦴ꧈ꦮꦸꦱꦤꦏꦸꦩꦼꦚꦸꦠ꧀ꦠꦶꦁꦩꦤꦃꦲꦶꦥꦸꦤ꧀ꦲꦶꦁꦏꦁꦱꦩꦶꦩꦶꦉꦁꦔꦤ꧀ꦠꦺꦴꦱ꧀ꦤꦧꦼꦠ꧀ꦢꦶꦥꦸꦤ꧀ꦧꦼꦏ꧀ꦠꦝꦠꦼꦁꦗꦩꦤ꧀ꦥꦱꦸꦥꦼꦤꦤ꧀꧉ [ 614 ]꧋ꦲꦶꦁꦏꦁꦧꦸꦥꦠꦶꦲꦺꦁꦒꦭ꧀ꦲꦶꦁꦨꦠꦮꦶꦫꦢꦺꦤ꧀ꦠꦸꦩꦼꦁꦒꦸꦁꦄꦃꦩꦢ꧀꧈ ꧋ꦏꦭꦠꦁꦒꦭ꧀ꦏꦥꦶꦁ꧇꧒꧕꧇ꦄꦒꦸꦱ꧀ꦠꦸꦱ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦨꦠꦮꦶꦱꦩ꧀ꦥꦸꦤ꧀ꦲꦔꦼꦥꦾꦏ꧀ꦏꦏꦼꦤ꧀ꦫꦢꦺꦤ꧀ꦄꦃꦩꦢ꧀꧈ꦥꦠꦶꦃꦏꦧꦸꦥꦠꦺꦤ꧀ꦧꦠꦮꦶꦠꦼꦠꦼꦥ꧀ꦗꦸꦩꦼꦤꦼꦁꦧꦸꦥꦠꦶꦲꦶꦁꦨꦠꦮꦶ꧉ꦏꦭꦥꦸꦤꦶꦏꦲꦶꦁꦏꦁꦱꦩꦶꦲꦚ꧀ꦗꦼꦤꦼꦁꦔꦶꦧꦺꦴꦁꦱꦭꦸꦲꦸꦂꦮꦭꦤ꧀ꦢꦶꦭꦤ꧀ꦥꦿꦶꦪꦪꦶꦥꦿꦶꦧꦸꦩꦶꦏꦛꦃꦱꦔꦼꦠ꧀꧉ꦗꦩ꧀꧇꧙꧇꧉꧇꧓꧐꧇ꦲꦺꦚ꧀ꦗꦶꦁ꧈ꦥꦢꦸꦏꦠꦸꦮꦤ꧀ꦒꦸꦥꦼꦂꦤꦸꦂꦗꦮꦶꦏꦶꦭꦺꦤ꧀ꦱꦏꦭꦶꦪꦤ꧀ꦲꦶꦁꦏꦁꦧꦸꦥꦠꦶꦲꦺꦁꦒꦭ꧀ꦫꦮꦸꦃ꧈ꦩꦔꦒꦼꦩ꧀ꦧꦸꦱꦤꦥꦩꦺꦫꦤ꧀꧉ꦲꦶꦁꦔꦿꦶꦏꦶꦧꦺꦴꦠꦼꦤ꧀ꦥꦼꦂꦭꦸꦏꦕꦫꦶꦪꦺꦴꦱ꧀ꦱꦏꦼꦤ꧀ꦩꦭꦶꦃꦲꦁꦒꦺꦤ꧀ꦤꦶꦥꦸꦤ꧀ꦔꦼꦥꦾꦏ꧀ꦏꦏꦼꦤ꧀ꦲꦸꦠꦮꦶꦲꦩꦱꦿꦃꦲꦏꦼꦤ꧀ꦱꦼꦫꦠ꧀ꦏꦏꦚ꧀ꦕꦶꦁꦔꦤ꧀ꦤꦶꦥꦸꦤ꧀ꦝꦠꦼꦁꦲꦶꦁꦏꦁꦗꦸꦩꦼꦤꦼꦁꦧꦸꦥꦠꦶ꧈ꦗꦭꦂꦫꦤ꧀ꦱꦩ꧀ꦥꦸꦤ꧀ꦏꦮꦿꦠ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀ꦱꦶꦥꦸꦤ꧀꧈ꦲꦶꦁꦔꦿꦶꦏꦶꦤꦩꦸꦁꦧꦝꦺꦩꦼꦛꦶꦏ꧀ꦱꦏꦶꦁꦱꦼꦫꦠ꧀ꦏꦧꦂ Ind.Crt ꦩꦼꦁꦒꦃꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦫꦢꦺꦤ꧀ꦄꦃꦩꦢ꧀ꦱꦢꦺꦫꦺꦁꦔꦶꦥꦸꦤ꧀ꦗꦸꦩꦼꦤꦼꦁꦧꦸꦥꦠꦶꦏꦢꦺꦴꦱ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ꧇ ꧋ꦫꦢꦺꦤ꧀ꦠꦸꦩꦼꦁꦒꦸꦁꦄꦃꦩꦢ꧀꧈ (keterangan foto) ꧋ꦫꦢꦺꦤ꧀ꦄꦃꦩꦢ꧀ꦲꦁꦒꦺꦤ꧀ꦤꦶꦥꦸꦤ꧀ꦢꦢꦺꦴꦱ꧀ꦥꦠꦶꦃꦠꦶꦒꦁꦠꦲꦸꦤ꧀꧉ꦩꦶꦠꦸꦫꦸꦠ꧀ꦏꦠꦿꦔꦤ꧀ꦤꦶꦥꦸꦤ꧀ꦫꦢꦺꦤ꧀ꦄꦃꦩꦢ꧀ꦥꦶꦪꦩ꧀ꦧꦏ꧀꧈ꦱꦊꦧꦼꦠ꧀ꦠꦶꦥꦸꦤ꧀ꦢꦢꦺꦴꦱ꧀ꦥꦠꦶꦃꦱꦲꦱꦢꦔꦸꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦗꦮꦶꦏꦶꦭꦺꦤ꧀ꦮꦲꦸ꧈ꦱꦒꦼꦢ꧀ꦲꦸꦤꦶꦔꦩꦼꦁꦒꦃꦮꦠꦏ꧀ꦮꦠꦏ꧀ꦲꦸꦠꦮꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦶꦠꦶꦪꦁꦲꦶꦁꦗꦮꦶꦏꦶꦭꦺꦤ꧀ꦲꦶꦁꦏꦁꦧꦺꦢꦱꦔꦼꦠ꧀ꦏꦭꦶꦪꦤ꧀ꦮꦮꦠꦼꦏ꧀ꦏꦤ꧀ꦲꦸꦠꦮꦶꦏꦮꦺꦴꦤ꧀ꦠꦼꦤꦤꦶꦥꦸꦤ꧀ꦠꦶꦠꦶꦪꦁꦲꦶꦁꦗꦮꦶꦠꦼꦔꦃ꧉ꦏꦭꦱꦩꦤ꧀ꦠꦼꦤ꧀ꦫꦢꦺꦤ꧀ꦄꦃꦩꦢ꧀ꦤꦩꦸꦁꦤꦸꦩ꧀ꦥꦏ꧀ꦧꦲꦶꦠꦲꦸꦠꦮꦶꦠꦶꦤ꧀ꦢꦏ꧀ꦝꦫꦠ꧀ꦏꦺꦩꦮꦺꦴꦤ꧀꧉ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦏꦤ꧀ꦛꦶꦒꦸꦩꦸꦗꦼꦁ꧇ꦧꦺꦴꦏ꧀ꦩꦤꦮꦶꦤꦩꦸꦁꦱꦏꦶꦁꦲꦁꦒꦺꦤ꧀ꦏꦸꦭꦩ꧀ꦭꦩ꧀ꦥꦃꦏꦺꦩꦮꦺꦴꦤ꧀ꦥꦸꦤꦶꦏ꧈ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦏꦺꦤ꧀ꦠꦺꦴꦭ꧀ꦏꦸꦭꦏꦠꦶꦔꦭ꧀ꦏꦼꦚ꧀ꦕꦼꦁ꧉ꦲꦶꦁꦒꦶꦃꦗꦭꦂꦫꦤ꧀ꦱꦏꦶꦁꦩꦏꦠꦼꦤ꧀ꦮꦲꦸ꧈ꦫꦢꦺꦤ꧀ꦄꦃꦩꦢ꧀ꦭꦗꦼꦁꦱꦒꦼꦢ꧀ꦠꦩꦠ꧀ꦝꦠꦼꦁꦏꦮꦺꦴꦤ꧀ꦠꦼꦤ꧀ꦲꦸꦠꦮꦶꦮꦮꦠꦼꦏ꧀ꦏꦤ꧀ꦤꦶꦥꦸꦤ꧀ꦠꦶꦠꦶꦪꦁꦥꦿꦶꦧꦸꦩꦶꦲꦶꦁꦗꦮꦶꦏꦶꦭꦺꦤ꧀꧉ꦱꦤꦢꦾꦤ꧀ꦫꦢꦺꦤ꧀ꦄꦃꦩꦢ꧀ꦥꦸꦤꦶꦏꦥꦿꦶꦪꦤ꧀ꦠꦸꦤ꧀ꦗꦮꦶꦢꦼꦊꦱ꧀꧈ꦩꦶꦠꦸꦫꦸꦠ꧀ꦏꦠꦿꦔꦤ꧀ꦤꦶꦥꦸꦤ꧀꧈ꦠꦽꦱ꧀ꦤꦭꦤ꧀ꦲꦱꦶꦃꦱꦔꦼꦠ꧀ꦝꦠꦼꦁꦠꦶꦠꦶꦪꦁꦨꦠꦮꦶ꧈ꦲꦩꦂꦒꦶꦲꦁꦒꦺꦤ꧀ꦤꦶꦥꦸꦤ꧀ꦒꦝꦃꦮꦠꦼꦏ꧀ꦧ꧀ꦭꦏꦱꦸꦠꦱꦂꦠꦥꦿꦱꦗ꧉ ꧋ꦫꦢꦺꦤ꧀ꦄꦃꦩꦢ꧀ꦥꦸꦤꦶꦏꦢꦺꦢꦺꦒꦺꦴꦭꦺꦴꦔꦤ꧀ꦤꦶꦁꦏꦲꦸꦩ꧀ꦥꦸꦭꦶꦠꦶꦏ꧀꧈ꦱꦲꦧꦺꦴꦠꦼꦤ꧀ꦠꦸꦩꦸꦠ꧀ꦠꦸꦩꦸꦠ꧀ꦏꦭꦶꦪꦤ꧀ꦥꦏꦼꦩ꧀ꦥꦭ꧀ꦭꦤ꧀ꦥꦸꦤꦥꦏꦺꦩꦮꦺꦴꦤ꧀꧉ꦱꦥꦼꦁꦏꦼꦂꦫꦶꦥꦸꦤ꧀ꦱꦏꦶꦁꦯꦸꦫꦧꦪ꧈ꦫꦢꦺꦤ꧀ꦄꦃꦩꦢ꧀ꦭꦗꦼꦁꦩꦼꦁꦏꦼꦂꦝꦠꦼꦁꦒꦺꦴꦭꦺꦴꦔꦤ꧀ꦤꦶꦁꦥꦏꦼꦩ꧀ꦥꦭ꧀ꦭꦤ꧀꧉ꦥꦸꦤꦥꦩꦭꦶꦃꦱꦏꦶꦁꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀꧈ꦠꦶꦪꦁꦢꦢꦺꦴꦱ꧀ꦧꦸꦥꦠꦶꦥꦸꦤꦶꦏꦥꦁꦒꦭꦶꦃꦲꦤ꧀ꦤꦶꦥꦸꦤ꧀ꦏꦼꦢꦃꦩꦂꦢꦶꦏ(ꦤꦼꦠꦼꦥ꧀ꦥꦶꦏꦸꦮꦗꦶꦧꦤ꧀ꦤꦶꦥꦸꦤ꧀)ꦧꦺꦴꦠꦼꦤ꧀ꦏꦺꦔꦶꦁꦠꦸꦩꦸꦠ꧀ꦒꦒꦪꦸꦠꦤ꧀ꦏꦭꦶꦪꦤ꧀ꦥꦏꦼꦩ꧀ꦥꦭ꧀ꦭꦤ꧀꧉ꦱꦤꦢꦾꦤ꧀ꦩꦏꦠꦼꦤ꧀ꦤ꧈ꦫꦢꦺꦤ꧀ꦄꦃꦩꦢ꧀ꦧꦺꦴꦠꦼꦤ꧀ꦲꦮꦠꦏ꧀ꦏꦶꦤ꧈ꦲꦶꦁꦒꦶꦃꦲꦚ꧀ꦗꦩꦤ꧀ꦤꦶ꧉ꦱꦶꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦤꦠꦺꦲꦮꦮꦤ꧀ꦱꦧ꧀ꦢꦏꦭꦶꦪꦤ꧀ꦲꦶꦁꦏꦁꦧꦸꦥꦠꦶꦮꦲꦸ꧈ꦠꦩ꧀ꦠꦸꦭꦗꦼꦁꦩꦔꦼꦂꦠꦺꦴꦱ꧀ꦧꦶꦭꦶꦃꦫꦢꦺꦤ꧀ꦄꦃꦩꦢ꧀ꦥꦸꦤꦶꦏꦥꦁꦒꦭꦶꦃꦲꦤ꧀ꦤꦶꦥꦸꦤ꧀ꦗꦼꦩ꧀ꦧꦂ꧈ꦱꦲꦲꦔꦸꦤꦶꦁꦔꦤ꧀ꦤꦶꦝꦠꦼꦁꦏꦧꦼꦠꦃꦲꦤ꧀ꦤꦶꦥꦸꦤ꧀ꦠꦶꦠꦶꦪꦁꦗꦮꦶ꧈ꦲꦤꦔꦶꦁꦠꦸꦩꦶꦤ꧀ꦢꦏ꧀ꦏꦶꦁꦏꦩꦗꦼꦁꦔꦤ꧀ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦏꦼꦢꦃꦢꦶꦥꦸꦤ꧀ꦱ |
Ingkang Bupati Enggal ing Batawi Radèn Tumênggung Ahmad[besut]Kala tanggal kaping 25 Agustus ingkang kapêngkêr punika, ing Batawi sampun angêpyakakên Radèn Ahmad, patih Kabupatèn Batawi têtêp jumênêng bupati ing Batawi. Kala punika ingkang sami anjênêngi băngsa luhur Walandi lan priyayi pribumi kathah sangêt. Jam 9.30 enjing, Paduka Tuwan Gupêrnur Jawi Kilèn sakalihan ingkang bupati enggal rawuh, mangagêm busana pameran. Ing ngriki botên pêrlu kacariyosakên malih anggènipun ngêpyakakên utawi amasrahakên sêrat kêkancinganipun dhatêng ingkang jumênêng bupati, jalaran sampun kawrat wontên ing sêrat-sêrat kabar sanèsipun, ing ngriki namung badhe mêthik saking sêrat kabar ind.crt mênggah kawontênanipun Radèn Ahmad sadèrèngipun jumênêng bupati kados ing ngandhap punika: Kajawèn, Balai Pustaka, 1927-09-01, #33: Citra 1 dari 1 Radèn Tumênggung Ahmad Radèn Tumênggung Ahmad. Radèn Ahmad anggènipun dados patih tigang taun. Miturut katranganipun Radèn Ahmad piyambak, salêbêbtipun dados patih saha sadangunipun wontên ing Jawi Kilèn wau, sagêd uninga mênggah watak-watak utawi kawontênanipun têtiyang ing Jawi Kilèn ingkang beda sangêt kalihan wêwatêkan utawi kawontênanipun têtiyang ing Jawi Têngah. Kala samantên Radèn Ahmad namung numpak baita utawi tindak dharat kemawon. Pangandikanipun kanthi gumujêng: bokmanawi namung saking anggèn kula mlampah kemawon punika, wontênipun kentol kula katingal kêncêng. Inggih jalaran saking makatên wau, Radèn Ahmad lajêng sagêd tamat dhatêng kawontên utawi wêwatêkanipun têtiyang pribumi ing Jawi Kilèn. Sanadyan Radèn Ahmad punika priyantun Jawi dêlês, miturut katranganipun, trêsna lan asih sangêt dhatêng têtiyang Batawi, amargi anggènipun gadhah watêk blaka suta sarta prasaja. Radèn Ahmad punika dede golonganing kaum pulitik, saha botên tumut-tumut kalihan pakêmpalan punapa kemawon. Sapêngkêripun saking Surabaya, Radèn Ahmad lajêng mêngkêr dhatêng golonganing pakêmpalan. Punapa malih saking pangandikanipun, tiyang dados bupati punika panggalihanipun kêdah mardika (nêtêpi kuwajibanipun) botên kenging tumut gêgayutan kalihan pakêmpalan. Sanadyan makatêna, Radèn Ahmad botên awatak kina, inggih anjamani. Sintên tiyang ingkang sampun nate awawan sabda kalihan ingkang bupati wau, tamtu lajêng mangêrtos bilih Radèn Ahmad punika panggalihanipun jêmbar, saha anguningani dhatêng kabêtahanipun têtiyang Jawi, ananging tumindaking kamajêngan miturut pangandikanipun kêdah dipun saranani saking lampah kautaman, botên saking cara okol-okolan, awit punika namung badhe adamêl sangsaraning kawula kemawon. Wosing pamawasipun Radèn Ahmad: pulitiking pagêrakanipun têtiyang pribumi punika badhe tanpa aji babarpisan, bilih kamajênganing bab panggayuhing panggêsanganipun kècèr. Têmênipun bilih Radèn Ahmad punika sanès kaum kina, sagêd kasumêrêpan saking sadaya kuwajiban utawi padamêlanipun ingkang gêgayutan kalihan têtiyang pribumi. Radèn Ahmad sampun botên cocog kalihan bab lampahing pakurmatan dhodhok lan sêmbah. Dene ingkang dados jalaranipun makatên: Nalika panjênênganipun pinuju tindakan nitih kapal pêrlu ngupados anggrèk wulan, sarêng sampun cêlak, mèh dumugi panggenaning anggrèk wulan, dilalah kapalipun Radèn Ahmad lajêng nglumba ngadêg, ngantos Radèn Ahmad dhawah ing siti sacêlakipun wit ingkang wontên anggrèk wulanipun wau. Sarêng katitipriksa mênggah sabab-sababipun dene kapal ingkang dipun titihi wau anglumba, botên sabab punapa, jêbul wontên tiyang èstri têtiga ingkang kapêthuk saha lajêng urmat andhodhok. Inggih wiwit saking anggènipun Radèn Ahmad botên rêmên dhatêng pakurmatan dhodhok lan sêmbah wau. | ||
|
[ 615 ]ꦫꦤꦤꦶꦱꦏꦶꦁꦭꦩ꧀ꦥꦃꦏꦲꦸꦠꦩꦤ꧀꧈ꦧꦺꦴꦠꦼꦤ꧀ꦱꦏꦶꦁꦕꦫꦲꦺꦴꦏꦺꦴꦭ꧀ꦲꦺꦴꦏꦺꦴꦭ꧀ꦭꦤ꧀꧈ꦲꦮꦶꦠ꧀ꦥꦸꦤꦶꦏꦤꦩꦸꦁꦧꦝꦺꦲꦢꦩꦼꦭ꧀ꦱꦁꦱꦫꦤꦶꦁꦏꦮꦸꦭꦏꦺꦩꦮꦺꦴꦤ꧀꧉ꦮꦺꦴꦱ꧀ꦱꦶꦁꦥꦩꦮꦱ꧀ꦱꦶꦥꦸꦤ꧀ꦫꦢꦺꦤ꧀ꦄꦃꦩꦢ꧀꧇ꦥꦸꦭꦶꦠꦶꦏ꧀ꦏꦶꦁꦥꦒꦼꦫꦏ꧀ꦏꦤ꧀ꦤꦶꦥꦸꦤ꧀ꦠꦶꦠꦶꦪꦁꦥꦿꦶꦧꦸꦩꦶꦥꦸꦤꦶꦏꦧꦝꦺꦠꦤ꧀ꦥꦲꦗꦶꦧꦧꦂꦥꦶꦱꦤ꧀꧈ꦧꦶꦭꦶꦃꦏꦩꦗꦼꦁꦔꦤ꧀ꦤꦶꦁꦧꦧ꧀ꦥꦁꦒꦪꦸꦃꦲꦶꦁꦥꦁꦒꦼꦱꦁꦔꦤ꧀ꦤꦶꦥꦸꦤ꧀ꦏꦺꦕꦺꦂ꧉ ꧋ꦠꦼꦩꦼꦤ꧀ꦤꦶꦥꦸꦤ꧀ꦧꦶꦭꦶꦃꦫꦢꦺꦤ꧀ꦄꦃꦩꦢ꧀ꦥꦸꦤꦶꦏꦱꦤꦺꦱ꧀ꦏꦲꦸꦩ꧀ꦏꦶꦤ꧈ꦱꦒꦼꦢ꧀ꦏꦱꦸꦩꦼꦉꦥ꧀ꦥꦤ꧀ꦱꦏꦶꦁꦱꦢꦪꦏꦸꦮꦗꦶꦧ꧀ꦧꦤ꧀ꦲꦸꦠꦮꦶꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦏꦁꦒꦒꦪꦸꦠ꧀ꦠꦤ꧀ꦏꦭꦶꦪꦤ꧀ꦠꦶꦠꦶꦪꦁꦥꦿꦶꦧꦸꦩꦶ꧉ ꧋ꦫꦢꦺꦤ꧀ꦄꦃꦩꦢ꧀ꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦕꦺꦴꦕꦺꦴꦒ꧀ꦏꦭꦶꦪꦤ꧀ꦧꦧ꧀ꦭꦩ꧀ꦥꦃꦲꦶꦁꦥꦏꦸꦂꦩꦠ꧀ꦠꦤ꧀ꦝꦺꦴꦝꦺꦴꦏ꧀ꦭꦤ꧀ꦱꦼꦩ꧀ꦧꦃ꧉ꦢꦺꦤꦺꦲꦶꦁꦏꦁꦢꦢꦺꦴꦱ꧀ꦗꦭꦂꦫꦤ꧀ꦤꦶꦥꦸꦤ꧀ꦩꦏꦠꦼꦤ꧀꧇ ꧋ꦤꦭꦶꦏꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦥꦶꦤꦸꦗꦸꦠꦶꦤ꧀ꦢꦏ꧀ꦏꦤ꧀ꦤꦶꦠꦶꦃꦏꦥꦭ꧀ꦥꦼꦂꦭꦸꦔꦸꦥꦢꦺꦴꦱ꧀ꦲꦁꦒꦿꦺꦏ꧀ꦮꦸꦭꦤ꧀꧈ꦱꦉꦁꦱꦩ꧀ꦥꦸꦤ꧀ꦕꦼꦭꦏ꧀꧈ꦩꦺꦃꦢꦸꦩꦸꦒꦶꦥꦁꦒꦺꦤ꧀ꦤꦤ꧀ꦤꦶꦁꦲꦁꦒꦿꦺꦏ꧀ꦮꦸꦭꦤ꧀꧈ꦢꦶꦭꦭꦃꦏꦥꦭ꧀ꦭꦶꦥꦸꦤ꧀ꦫꦢꦺꦤ꧀ꦄꦃꦩꦢ꧀ꦭꦗꦼꦁꦔ꧀ꦭꦸꦩ꧀ꦧꦔꦢꦼꦒ꧀꧈ꦔꦤ꧀ꦠꦺꦴꦱ꧀ꦫꦢꦺꦤ꧀ꦄꦃꦩꦢ꧀ꦝꦮꦃꦲꦶꦁꦱꦶꦠꦶꦱꦕꦼꦭꦏ꧀ꦏꦶꦥꦸꦤ꧀ꦮꦶꦠ꧀ꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦁꦒꦿꦺꦏ꧀ꦮꦸꦭꦤ꧀ꦤꦶꦥꦸꦤ꧀ꦮꦲꦸ꧉ꦱꦉꦁꦏꦠꦶꦠꦶꦥꦿꦶꦏ꧀ꦱꦩꦼꦁꦒꦃꦱꦧꦧ꧀ꦱꦧꦧ꧀ꦧꦶꦥꦸꦤ꧀ꦢꦺꦤꦺꦏꦥꦭ꧀ꦲꦶꦁꦏꦁꦢꦶꦥꦸꦤ꧀ꦠꦶꦠꦶꦃꦲꦶꦮꦲꦸꦲꦔ꧀ꦭꦸꦩ꧀ꦧ꧈ꦧꦺꦴꦠꦼꦤ꧀ꦱꦧꦧ꧀ꦥꦸꦤꦥ꧈ꦗꦼꦧꦸꦭ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦲꦺꦱ꧀ꦠꦿꦶꦠꦶꦠꦶꦒꦲꦶꦁꦏꦁꦏꦥꦼꦛꦸꦏ꧀ꦱꦲꦭꦗꦼꦁꦲꦸꦂꦩꦠ꧀ꦲꦤ꧀ꦝꦺꦴꦝꦺꦴꦏ꧀꧉ꦲꦶꦁꦒꦶꦃꦮꦶꦮꦶꦠ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦫꦢꦺꦤ꧀ꦄꦃꦩꦢ꧀ꦧꦺꦴꦠꦼꦤ꧀ꦉꦩꦼꦤ꧀ꦝꦠꦼꦁꦥꦏꦸꦂꦩꦠ꧀ꦠꦤ꧀ꦝꦺꦴꦝꦺꦴꦏ꧀ꦭꦤ꧀ꦱꦼꦩ꧀ꦧꦃꦮꦲꦸ꧉ ꧋ꦉꦩ꧀ꦧꦒ꧀ꦒꦶꦥꦸꦤ꧀ꦦꦺꦠꦿꦸꦏ꧀ꦭꦤ꧀ꦓꦫꦺꦁ꧉ ꧋ꦧꦧ꧀ ꦱꦠꦩꦸꦫꦸꦒ꧀ꦒꦏꦼꦤ꧀ꦏꦸꦤ꧀ꦛꦶꦁ꧉ ꧋ꦦꦺꦠꦿꦸꦏ꧀꧇ꦮꦝꦸꦃꦫꦺꦁ꧈ꦲꦤ꧀ꦝꦂꦫꦤ꧀ꦩꦸꦧꦧ꧀ꦔꦶꦔꦸꦒꦿꦩꦺꦃꦧꦶꦪꦁꦭꦒꦶꦲꦤꦸꦏꦲꦺ꧈ꦱꦗꦏ꧀ꦏꦺꦩꦸꦭꦚꦩ꧀ꦭꦼꦁꦠꦼꦩꦼꦤ꧀ꦤꦤ꧀꧈ꦧꦺꦱꦸꦏ꧀ꦩꦤꦮꦲꦏꦸꦮꦶꦱ꧀ꦲꦺꦴꦭꦺꦃꦲꦸꦗꦸꦂꦫꦤ꧀ꦱꦏꦠꦁꦒꦏꦸꦲꦁꦒꦺꦴꦤ꧀ꦤꦺꦩꦼꦤꦁꦭꦺꦴꦠꦿꦺ꧈ꦩꦼꦱ꧀ꦛꦶꦧꦚ꧀ꦗꦸꦂꦲꦺꦁꦒꦭ꧀ꦢꦏ꧀ꦲꦢꦤ꧀ꦤꦶꦧꦲꦺ꧉ ꧋ꦓꦫꦺꦁ꧇ꦲꦼꦩ꧀꧈ꦕꦠꦸꦂꦫꦤ꧀ꦏꦫꦺꦴꦮꦺꦴꦁꦒꦼꦩ꧀ꦧ꧀ꦭꦸꦁ꧈ꦭꦲꦶꦪꦲꦔꦺꦭ꧀ꦠꦁꦒꦸꦃꦲꦺ꧉ꦮꦺꦴꦁꦲꦉꦥ꧀ꦲꦢꦲꦢ꧈ꦥꦮꦶꦠ꧀ꦠꦤꦺꦏꦛꦶꦏ꧀ꦲꦚ꧀ꦗꦒꦑꦏꦺꦲꦸꦗꦸꦂꦫꦤ꧀ꦤꦺꦠꦁꦒꦤꦺꦩꦤꦮꦲꦺꦴꦭꦺꦃ꧉ꦲꦶꦪꦤꦺꦏ꧀ꦠꦁꦒꦤꦺꦠꦸꦏꦸꦭꦺꦴꦠꦿꦺ꧈ꦭꦤ꧀ꦩꦤꦺꦃꦲꦥꦠꦁꦒꦤꦺꦮꦶꦱ꧀ꦩꦼꦱ꧀ꦛꦶꦒꦼꦊꦩ꧀ꦲꦮꦺꦃꦲꦸꦗꦸꦂꦫꦤ꧀꧉ ꧋ꦦꦺꦠꦿꦸꦏ꧀꧇ꦧꦧ꧀ꦲꦁꦒꦺꦴꦤ꧀ꦤꦺꦲꦉꦥ꧀ꦲꦮꦺꦃꦲꦸꦗꦸꦂꦫꦤ꧀ꦏꦸꦮꦶꦮꦶꦱ꧀ꦩꦼꦱ꧀ꦛꦶ꧈ꦲꦩꦂꦒꦮꦶꦱ꧀ꦉꦫꦱꦤ꧀ꦧꦺꦱꦸꦏ꧀ꦲꦉꦥ꧀ꦔꦼꦥꦺꦏ꧀ꦩꦤ꧀ꦠꦸꦥꦿꦸꦤꦤ꧀ꦩꦸꦱꦁꦧꦒꦸꦱ꧀ꦏꦩ꧀ꦥꦿꦺꦠ꧀꧉ꦢꦢꦶꦱꦧꦚ꧀ꦗꦸꦂꦫꦺꦢꦸꦮꦺꦏ꧀ꦏꦺꦏꦤꦢꦸꦮꦺꦏ꧀ꦏꦸ꧈ꦢꦸꦮꦺꦏ꧀ꦏꦸꦪꦢꦸꦮꦺꦏ꧀ꦏꦸꦝꦺꦮꦺ꧉ ꧋ꦓꦫꦺꦁ꧇ꦭ꧈ꦤꦺꦏ꧀ꦏꦪꦔꦺꦴꦤꦺꦴꦏꦸꦮꦶꦲꦫꦤ꧀ꦤꦺꦫꦏ꧀ꦔꦺꦭ꧀ꦩꦸꦩꦼꦤꦁꦩꦼꦤꦁꦔꦤ꧀꧉ꦮꦶꦱ꧀꧈ꦮꦶꦱ꧀꧈ꦠꦶꦤꦶꦩ꧀ꦧꦁꦒꦸꦒꦸꦪꦺꦴꦤ꧀ꦱꦶꦁꦲꦺꦴꦫꦧꦏꦭ꧀ꦩꦸꦥꦔꦠ꧀ꦠꦶ꧈ꦲꦪꦺꦴꦥꦝꦧꦚ꧀ꦗꦸꦂꦫꦏꦺꦉꦩ꧀ꦧꦸꦒ꧀ꦒꦤꦺꦭꦒꦶꦲꦤꦸꦏꦲꦺ꧉ ꧋ꦦꦺꦠꦿꦸꦏ꧀꧇ꦧꦒꦸꦱ꧀꧈ꦱꦲꦶꦏꦶꦠꦼꦫꦸꦱ꧀ꦠꦏ꧀ꦮꦶꦮꦶꦠ꧀ꦠꦶꦧꦲꦺ꧈ꦏꦥꦿꦶꦪꦺꦩꦸꦁꦒꦸꦃꦥꦔꦶꦔꦸꦤꦺꦲꦶꦮꦏ꧀ꦱꦶꦁ… ꧋ꦓꦫꦺꦁ꧇ꦪꦃ꧈ꦲꦶꦪꦲꦺꦴꦫꦗꦁꦗꦶ꧈ꦧꦶꦪꦺꦤ꧀ꦗꦁꦗꦶꦤꦺꦱꦶꦁꦲꦉꦥ꧀ꦢꦶꦉꦩ꧀ꦧꦸꦒ꧀ꦫꦏ꧀ꦢꦶꦒꦺꦴꦤ꧀ꦠꦒꦤ꧀ꦠꦶ꧈ꦪꦥꦿꦏꦫꦔꦶꦔꦸꦲꦶꦮꦏ꧀꧈ꦭꦶꦪꦢꦶꦤꦩꦤꦺꦃꦥꦿꦏꦫꦧꦏꦺꦴ꧉ ꧋ꦦꦺꦠꦿꦸꦏ꧀꧇ꦪꦏ꧀꧈ꦤꦺꦏ꧀ꦲꦺꦴꦩꦺꦴꦁꦧꦧ꧀ꦧꦏꦺꦴꦏꦸꦮꦶ꧈ꦢꦸꦫꦸꦁꦢꦸꦫꦸꦁꦮꦸꦱ꧀ꦤꦼꦒ꧀ꦫꦱꦤꦶꦁꦮꦸꦢꦼꦭ꧀ꦏꦸ꧈ꦭ꧀ꦲꦏꦥꦿꦶꦪꦺꦩꦤꦺꦃꦮꦺꦴꦁꦲꦏꦸꦏꦶꦪꦶꦮꦶꦱ꧀ꦏꦧꦚ꧀ꦗꦸꦂꦢꦺꦴꦪꦤ꧀ꦲꦸ [ 616 ]ꦢꦸꦢ꧀꧉ꦱꦧꦼꦤꦼꦂꦫꦺꦧꦲꦺꦲꦏꦸꦲꦭꦸꦮꦸꦁꦲꦺꦴꦫꦢꦶꦏꦺꦴꦤ꧀ꦩꦔꦤ꧀ꦒꦺꦴꦫꦺꦁꦔꦤ꧀ꦱꦼꦥꦸꦂ꧈ꦠꦶꦤꦶꦩ꧀ꦧꦁꦲꦺꦴꦫꦲꦸꦢꦸꦢ꧀꧈ꦩꦺꦴꦁꦏꦉꦩ꧀ꦧꦸꦒ꧀ꦩꦸꦧꦧ꧀ꦲꦸꦢꦸꦢ꧀ꦏꦸꦮꦶꦲꦺꦴꦫꦲꦤꦱꦶꦁꦔꦼꦥꦺꦤꦑꦏꦺꦥꦶꦏꦶꦂꦫꦤ꧀ꦥꦶꦱꦤ꧀ꦥꦶꦱꦤ꧀꧉ ꧋ꦓꦫꦺꦁ꧇ꦭꦺꦴ꧈ꦮꦺꦴꦁꦲꦸꦫꦶꦥ꧀ꦏꦸꦮꦶꦲꦗꦠꦸꦁꦏꦸꦭ꧀ꦩꦶꦏꦶꦂꦲꦮꦏ꧀ꦏꦺꦝꦺꦮꦺꦧꦲꦺ꧈ꦪꦺꦤ꧀ꦠꦸꦩꦿꦥ꧀ꦲꦮꦏ꧀ꦩꦸꦝꦺꦮꦺꦮꦶꦱ꧀ꦏꦱꦺꦥ꧀꧈ꦏꦼꦤꦲꦏꦁꦒꦺꦴꦩꦸꦩꦸꦭꦁꦲꦤꦏ꧀ꦥꦸꦠꦸꦩꦸꦲꦶꦁꦧꦺꦱꦸꦏ꧀꧈ꦢꦺꦤꦺꦱꦶꦁꦲꦉꦥ꧀ꦠꦏ꧀ꦲꦤ꧀ꦝꦂꦫꦏꦺꦱꦲꦶꦏꦶ꧈ꦪꦏꦸꦮꦶꦱꦧꦧ꧀ꦱꦧꦧꦺꦢꦺꦤꦺꦧꦏꦺꦴꦩꦫꦑꦏꦺꦏꦸꦤ꧀ꦛꦶꦁ꧉ ꧋ꦦꦺꦠꦿꦸꦏ꧀꧇ꦲꦫ꧈ꦲꦥꦏꦸꦮꦶꦲꦺꦴꦫꦗꦼꦤꦼꦁꦲꦩ꧀ꦧꦸꦧꦿꦃꦲꦒꦩ꧈ꦧꦏꦺꦴꦩꦫꦑꦏꦺꦭꦫꦲꦩ꧀ꦥꦼꦒ꧀꧈ꦩꦫꦑꦏꦺꦭꦫꦗꦤ꧀ꦠꦸꦁ꧈ꦱꦲꦶꦏꦶꦧꦚ꧀ꦗꦸꦂꦩꦫꦑꦏꦺꦏꦸꦤ꧀ꦛꦶꦁ꧉ꦱꦼꦠꦸꦤ꧀ꦱꦼꦠꦸꦤ꧀ꦧꦏꦺꦴꦩꦫꦑꦏꦺꦧꦶꦱꦢꦢꦶꦒꦼꦝꦼꦭꦺꦥꦺꦴꦊꦏ꧀ꦱꦿꦢ꧀꧈ꦲꦸꦠꦮꦢꦼꦭꦺꦂ꧈ꦭ꧈ꦫꦢꦲꦪꦼꦩ꧀ꦤꦁꦲꦠꦶ꧉ ꧋ꦓꦫꦺꦁ꧇ꦪꦃ꧈ꦮꦺꦴꦁꦗꦼꦤꦼꦁꦔꦺꦒꦼꦝꦺꦊꦒꦶꦝꦼꦂ꧌ꦓꦺꦢꦺꦭꦺꦒꦺꦲꦺꦂꦢꦺ꧍ꦭꦤ꧀ꦌꦝꦼꦭ꧀ꦲꦶꦂ꧈ꦏꦺꦴꦏ꧀ꦢꦶꦭꦶꦃꦱꦒꦼꦊꦩ꧀ꦩꦺꦧꦲꦺ꧉ꦮꦶꦱ꧀꧈ꦮꦶꦱ꧀꧈ꦲꦗꦢꦶꦧꦚ꧀ꦗꦸꦂꦧꦚ꧀ꦗꦸꦂꦫꦏꦺꦲꦁꦒꦺꦴꦤ꧀ꦤꦺꦏꦼꦤ꧀ꦛꦺꦴꦭꦁꦔꦤ꧀꧈ꦫꦸꦔꦺꦴꦏ꧀ꦤꦠꦏ꧀ꦏꦤ꧀ꦝꦤ꧀ꦤꦶ꧉ꦩꦸꦁꦒꦸꦃꦧꦢꦤ꧀ꦏꦸꦮꦶꦧꦶꦱꦤꦺꦒꦼꦝꦺ꧈ꦩꦸꦁꦒꦸꦩꦤ꧀ꦠꦸꦁꦱꦏꦥꦔꦤꦺ꧈ꦠꦼꦒꦼꦱ꧀ꦱꦺ꧇ꦩꦤꦮꦲꦫꦁꦱꦶꦁꦢꦶꦥꦔꦤ꧀ꦩꦲꦸꦲꦏꦺꦃꦱꦫꦶꦤꦺꦏꦁꦩꦲꦺꦢꦃꦲꦶꦚꦁꦧꦢꦤ꧀꧈ꦧꦢꦤ꧀ꦤꦺꦧꦶꦱꦩꦸꦤ꧀ꦝꦏ꧀ꦒꦼꦝꦺ꧈ꦲꦤꦔꦶꦁꦩꦤꦮꦏꦸꦫꦁꦱꦫꦶꦤꦺ꧈ꦪꦲꦺꦴꦫꦧꦶꦱꦩꦶꦒꦸꦤꦤ꧀ꦤꦶ꧉ ꧋ꦦꦺꦠꦿꦸꦏ꧀꧇ꦲꦼꦩ꧀꧈ꦲꦺꦴꦩꦺꦴꦁꦩꦸꦏꦶꦪꦶꦪꦧꦼꦤꦼꦂꦲꦺꦴꦫꦔꦁꦒꦺꦴꦧꦱꦪꦁꦏꦺꦴꦪꦁꦏꦺꦴ꧈ꦤꦔꦶꦁꦲꦏꦸꦏꦺꦴꦏ꧀ꦫꦢꦗꦸꦝꦼꦒ꧀ꦝꦶꦁ꧉ꦗꦗꦭ꧀ꦠꦼꦫꦸꦱ꧀ꦤꦝꦶꦱꦶꦏ꧀ꦲꦺꦴꦩꦺꦴꦁꦩꦸꦏꦸꦮꦶ꧈ꦧꦺꦴꦏ꧀ꦩꦤꦮꦩꦼꦁꦏꦺꦴꦤꦺꦧꦶꦱꦕꦸꦩꦼꦩ꧀ꦥ꧀ꦭꦺꦴꦁꦲꦶꦁꦲꦠꦶꦏꦸꦱꦶꦁꦫꦢꦧꦸꦚ꧀ꦗꦼꦠ꧀ꦏꦶꦪꦺ꧉ ꧋ꦓꦫꦺꦁ꧇ꦱꦢꦸꦫꦸꦁꦔꦺꦥꦥꦔꦤ꧀ꦤꦤ꧀ꦏꦗꦸꦥꦸꦏ꧀ꦱꦫꦶꦤꦺꦏꦁꦤꦸꦩꦿꦥ꧀ꦥꦶꦲꦶꦁꦧꦢꦤ꧀꧈ꦥꦼꦂꦭꦸꦏꦸꦢꦸꦢꦶꦊꦩ꧀ꦧꦸꦠ꧀ꦠꦏꦺꦝꦶꦱꦶꦏ꧀꧈ꦢꦺꦤꦺꦥꦥꦤ꧀ꦥꦔ꧀ꦭꦸꦭꦸꦃꦲꦺꦩꦲꦸꦲꦤꦲꦶꦁꦮꦝꦸꦏ꧀ꦱꦂꦠꦲꦶꦁꦲꦸꦱꦸꦱ꧀꧉ ꧋ꦦꦺꦠꦿꦸꦏ꧀꧇ꦱꦼꦩꦢꦤ꧀ꦔꦽꦠꦶꦲꦏꦸꦱꦲꦶꦏꦶꦏꦁꦢꦢꦶꦏꦉꦥ꧀ꦩꦸ꧈ꦏꦉꦥ꧀ꦩꦸꦫꦏ꧀ꦗꦭꦂꦫꦤ꧀ꦱꦏꦢꦪꦤꦶꦁꦧꦏꦺꦴ꧈ꦥꦶꦫꦤ꧀ꦠꦶꦥꦔ꧀ꦭꦸꦭꦸꦃꦲꦤ꧀ꦩꦲꦸꦧꦶꦱꦫꦸꦱꦏ꧀꧈ꦲꦶꦪꦲꦥꦲꦺꦴꦫ꧈ꦮꦺꦴꦁꦲꦏꦸꦮꦶꦱ꧀ꦩꦼꦱ꧀ꦛꦶꦧꦚ꧀ꦗꦸꦂꦚꦤ꧀ꦝꦏ꧀ꦧꦲꦺ꧉ ꧋ꦓꦫꦺꦁ꧇ꦲꦶꦪꦩꦸꦭꦩꦁꦏꦺꦴꦤꦺꦴ꧈ꦩꦸꦁꦧꦲꦺꦲꦏꦸꦲꦉꦥ꧀ꦥꦶꦠꦏꦺꦴꦤ꧀꧈ꦱꦼꦩꦢꦤ꧀ꦏꦸꦮꦶꦧꦼꦧꦸꦫꦺꦴꦤ꧀ꦲꦥ꧈ꦢꦺꦤꦺꦲꦏꦸꦭꦒꦶꦏꦿꦸꦔꦸꦱꦲꦶꦏꦶꦏꦶꦪꦶ꧉ ꧋ꦦꦺꦠꦿꦸꦏ꧀꧇ꦱꦼꦩꦢꦤ꧀ꦏꦸꦮꦶ꧈ꦤꦺꦏ꧀ꦏꦺꦴꦮꦺꦲꦉꦥ꧀ꦔꦽꦠꦶ꧈ꦧꦁꦱꦤꦺ꧇ꦲꦸ…ꦤ꧀ꦛꦸ ... ꦭ꧀ꦭꦺꦴ…ꦮꦸꦏ꧀ꦲꦗꦼꦩ꧀ꦧꦸꦮꦭ꧀꧈ꦩꦸꦁꦒꦸꦃꦠꦼꦒꦼꦱ꧀ꦱꦺ꧇ꦫꦢ꧉ ꧋ꦓꦫꦺꦁ꧇ꦲꦼꦩ꧀꧈ꦲꦤꦲꦤꦧꦲꦺꦱꦶꦦꦺꦠꦿꦸꦏ꧀ꦏꦶꦪꦶ꧉ꦢꦢꦶꦪꦺꦤ꧀ꦥꦶꦫꦤ꧀ꦠꦶꦥꦔ꧀ꦭꦸꦭꦸꦃꦲꦤ꧀ꦩꦲꦸꦫꦸꦱꦏ꧀꧈ꦥꦁꦒꦫꦥ꧀ꦥꦺꦪꦲꦺꦴꦫꦱꦩ꧀ꦥꦸꦂꦤ꧈ꦢꦢꦶꦏꦧꦺꦃꦱꦶꦁꦢꦶꦥꦔꦤ꧀ꦲꦺꦴꦫꦧꦶꦱꦲꦗꦸꦂꦠꦼꦩꦼꦤ꧀ꦤꦤ꧀꧉ꦱꦠꦼꦩꦃꦱꦫꦶꦤꦶꦁꦥꦼꦥꦔꦤ꧀ꦤꦤ꧀ꦏꦁꦧꦶꦱꦤꦸꦩꦿꦥ꧀ꦥꦶꦩꦫꦁꦗꦱꦠ꧀ꦠꦶꦁꦧꦢꦤ꧀ꦢꦢꦶꦤꦺꦪꦏꦸꦫꦁ꧈ꦩꦸꦭꦤꦺꦱꦤꦗꦤ꧀ꦲꦺꦴꦫꦏꦸꦏꦸꦫꦔꦤ꧀ꦥꦔꦤ꧀꧈ꦲꦤꦔꦶꦁꦱꦫꦤ꧀ꦢꦸꦤꦶꦁꦧꦢꦤ꧀ꦲꦺꦴꦫꦧꦶꦱꦲꦺꦴꦭꦺꦃꦱꦫꦶꦏꦁꦚꦸꦏꦸꦥ꧀ꦥꦶ꧉ꦩꦸꦭꦤꦺꦮꦺꦴꦁꦏꦁꦮꦸꦱ꧀ꦤꦝꦃꦩꦫꦁꦧꦏꦺꦴ꧈ꦲꦸꦤ꧀ꦝꦏ꧀ꦏꦶꦁꦥꦺꦫꦔꦤ꧀ꦤꦶꦁꦧꦢꦤ꧀ꦲꦺꦴꦫꦱꦥꦶꦫꦲ꧈ꦱꦠꦼꦩꦃꦲꦗꦼꦒ꧀ꦕꦶꦭꦶꦏ꧀ꦲꦸꦠꦮꦏꦸꦤ꧀ꦛꦶꦁ꧉ ꧋ꦦꦺꦠꦿꦸꦏ꧀꧇ꦲꦶꦪꦃ꧈ꦒꦒꦱ꧀ꦱꦤ꧀ꦤꦩꦸꦏꦸꦮꦶꦮꦺꦴꦁ |
Rêmbagipun Petruk lan Garèng[besut]Bab Sata Murugakên Kunthing. Petruk : Wadhuh Rèng, andharanmu bab ngingu gramèh biyang lagi anu kae, sajake mula nyamlêng têmênan, besuk manawa aku wis olèh ujuran saka tanggaku anggone mênang lotre, mêsthi banjur enggal dak adani bae. Garèng : Hêm, caturan karo wong gêmblung, lha iya angèl tangguhe. Wong arêp ada-ada, pawitane kathik anjagakake ujurane tanggane manawa olèh. Iya nèk tanggane tuku lotre, lan manèh apa tanggane wis mêsthi gêlêm awèh ujuran. Petruk : Bab anggone arêp awèh ujuran kuwi wis mêsthi, amarga wis rêrasan besuk arêp ngêpèk mantu prunanmu sang bagus Kamprèt. Dadi sabanjure duwèke kana duwèkku, duwèkku ya duwèkku dhewe. Garèng : Lha, nèk kaya ngono kuwi arane rak ngèlmu mênang-mênangan. Wis, wis, tinimbang gêguyon sing ora bakal mupangati, ayo padha banjurake rêmbugane lagi anu kae. Petruk : Bagus, saiki têrus tak wiwiti bae, kapriye mungguh pangingune iwak sing… Garèng : Yah, iya ora jangji, biyèn jangjine sing arêp dirêmbug rak digonta-ganti, ya prakara ngingu iwak, liya dina manèh prakara bako. Petruk : Yak, nèk omong bab bako kuwi, durung-durung wus nêg rasaning wudêlku, lha kapriye manèh wong aku kiyi wis kabanjur doyan udud. Sabênêre bae aku aluwung ora dikon mangan gorengan sêpur, tinimbang ora udud, măngka rêmbugmu bab udud kuwi ora ana sing ngêpenakake pikiran pisan-pisan. Garèng[4] [Grafik] Petruk : Hara, apa kuwi ora jênêng ambubrah agama, bako marakake lara ampêg, marakake lara jantung, saiki banjur marakake kunthing. Sêtun-sêtun bako marakake bisa dadi gêdhêle polêksrad, utawa dêlèr, lha, rada ayêm nang ati. Garèng : Yah, wong jênênge gêdhelêgidhêr (Gedelegeerde) lan èdhêlhir, kok dilih sagêlême bae. Wis, wis, aja dibanjur-banjurake anggone kêntholangan, rungokna tak kandhani. Mungguh badan kuwi bisane gêdhe, mung gumantung saka pangane, têgêse: manawa arang[5] sing dipangan mau akèh sarine kang maedahi nyang badan, badane bisa mundhak gêdhe, ananging manawa kurang sarine, ya ora bisa migunani. Petruk : Hêm, omongmu kiyi ya bênêr ora nganggo basa yangko-yangko, nanging aku kok rada judhêg dhing. Jajal têrusna dhisik omongmu kuwi, bokmanawa mêngkone bisa cumêmplong ing atiku sing rada bunjêt kiye. Garèng : Sadurunge pêpanganan kajupuk sarine kang numrapi ing badan, pêrlu kudu dilêmbutake dhisik, dene papan pangluluhe mau ana ing wadhuk sarta ing usus. Petruk : Sêmadan ngrêti aku saiki kang dadi karêpmu, karêpmu rak jalaran saka dayaning bako, piranti pangluluhan mau bisa rusak, iya apa ora, wong aku wis mêsthi banjur nyandhak bae. Garèng : Iya mula mangkono, mung bae aku arêp pitakon, sêmadan kuwi bêburon apa, dene aku lagi krungu saiki kiyi. Petruk : Sêmadan kuwi, nèk kowe arêp ngrêti, bangsane: u…nthu…lo…wuk ajêmbuwal, mungguh têgêse: rada. Garèng : Hêm, ana-ana bae Si Petruk kiyi. Dadi yèn piranti pangluluhan mau rusak, panggarape ya ora sampurna, dadi kabèh sing dipangan ora bisa ajur têmênan. Satêmah sarining pêpanganan kang bisa numrapi marang jasating badan dadine ya kurang, mulane sanajan ora kêkurangan pangan, ananging saranduning badan ora bisa olèh sari kang nyukupi. Mulane wong kang wus nadhah marang bako, undhaking peranganing badan ora sapiraa, satêmah ajêg cilik utawa kunthing. Petruk : Iyah, gagasanamu kuwi wong kêjêron, mêsthi bae ora ngêpenakake awak ajêgan. Garèng : E, lha, dikandhani têmênan, kathik dianggêp gagasan bae. Kunthinging badan kang jalaran saka bako kuwi, kayadene kêkayon kang oyode didèkèki ès, jalaran saka adhême, ora bisa subur uripe, sanadyan bisa urip, ananging tansah gêring, mêngkrak-mêngkrik. Ingkang Minulya Tuwan Prof. Dr.R. Tagore[besut][Grafik] Ing sisih kiwa, gambaripun sang minulya Prof. Dr. Tagore wontên salêbêting kapal Plancius sadumugining Tanjungpriuk. Ing têngên, panjênênganipun nitih oto ingkang sarwa prasaja, botên karsa nitihi oto ingkang rinêrêngga ing sêkar pêthukan saking băngsa Hindhu ing Batawi, kêbêkta saking lurusing panggalih, lumuh sinungga-sungga ing sasami. [Grafik] Nalika Sang Minulya sinugata ing buja andrawina dening para linangkung ing India wontên ing Batawi, manggèn ing hotèl Des Indes. Kathah para luhur ingkang rawuh, satêngênipun sang minulya: Tuwan Crosby, Kunsul Jendral Inggris, tuwin panjênênganipun Prof. Dr. R. H. Husin Jayadiningrat. | ||
|
[ 617 ]꧋ꦏꦼꦗꦼꦫꦺꦴꦤ꧀꧈ꦩꦼꦱ꧀ꦛꦶꦧꦲꦺꦲꦺꦴꦫꦔꦼꦥꦺꦤꦏ꧀ꦏꦏꦺꦲꦮꦏ꧀ꦲꦗꦼꦒ꧀ꦒꦤ꧀꧉ ꧋ꦓꦫꦺꦁ꧇ꦌ꧈ꦭ꧈ꦢꦶꦏꦤ꧀ꦝꦤ꧀ꦤꦶꦠꦼꦩꦼꦤ꧀ꦤꦤ꧀꧈ꦏꦛꦶꦏ꧀ꦢꦶꦪꦁꦒꦼꦥ꧀ꦒꦒꦱꦤ꧀ꦧꦲꦺ꧉ꦏꦸꦤ꧀ꦛꦶꦁꦔꦶꦁꦧꦢꦤ꧀ꦏꦁꦗꦭꦂꦫꦤ꧀ꦱꦏꦧꦏꦺꦴꦏꦸꦮꦶ꧈ꦏꦪꦢꦺꦤꦺꦏꦏꦪꦺꦴꦤ꧀ꦏꦁꦲꦺꦴꦪꦺꦴꦢꦺꦢꦶꦢꦺꦏꦺꦏ꧀ꦏꦶꦌꦱ꧀꧈ꦗꦭꦂꦫꦤ꧀ꦱꦏꦲꦝꦼꦩ꧀ꦩꦺ꧈ꦲꦺꦴꦫꦧꦶꦱꦱꦸꦧꦸꦂꦲꦸꦫꦶꦥ꧀ꦥꦺ꧈ꦱꦤꦢꦾꦤ꧀ꦧꦶꦱꦲꦸꦫꦶꦥ꧀꧈ꦲꦤꦔꦶꦁꦠꦤ꧀ꦱꦃꦒꦼꦫꦶꦁ꧈ꦩꦼꦁꦏꦿꦏ꧀ꦩꦼꦁꦏꦿꦶꦏ꧀꧉ ꧋ꦲꦶꦁꦏꦁꦩꦶꦤꦸꦭꦾꦠꦸꦮꦤ꧀ Prof. Dr.R. Tagore. ꧋ꦲꦶꦁꦱꦶꦱꦶꦃꦏꦶꦮ꧈ꦒꦩ꧀ꦧꦂꦫꦶꦥꦸꦤ꧀ꦱꦁꦩꦶꦤꦸꦭꦾ Prof. Dr. Tagore ꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁꦏꦥꦭ꧀ Plancius ꦱꦢꦸꦩꦸꦒꦶꦤꦶꦁꦠꦚ꧀ꦗꦸꦁꦥꦿꦶꦪꦸꦏ꧀꧉ꦲꦶꦁꦠꦼꦔꦼꦤ꧀꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦤꦶꦠꦶꦃꦎꦠꦺꦴꦲꦶꦁꦏꦁꦱꦂꦮꦥꦿꦱꦗ꧈ꦧꦺꦴꦠꦼꦤ꧀ꦏꦂꦱꦤꦶꦠꦶꦃꦲꦶꦎꦠꦺꦴꦲꦶꦁꦏꦁꦫꦶꦤꦼꦉꦁꦒꦲꦶꦁꦱꦼꦏꦂꦥꦼꦛꦸꦏ꧀ꦏꦤ꧀ꦱꦏꦶꦁꦧꦺꦴꦁꦱꦲꦶꦤ꧀ꦝꦸꦲꦶꦁꦨꦠꦮꦶ꧈ꦏꦼꦧꦼꦏ꧀ꦠꦱꦏꦶꦁꦭꦸꦫꦸꦱ꧀ꦱꦶꦁꦥꦁꦒꦭꦶꦃ꧈ꦭꦸꦩꦸꦃꦱꦶꦤꦸꦁꦒꦱꦸꦁꦒꦲꦶꦁꦱꦱꦩꦶ꧉ ꧋ꦤꦭꦶꦏꦯꦁꦩꦶꦤꦸꦭꦾꦱꦶꦤꦸꦒꦠꦲꦶꦁꦧꦸꦗꦲꦤ꧀ꦢꦿꦮꦶꦤꦢꦺꦤꦶꦁꦥꦫꦭꦶꦤꦁꦏꦸꦁꦲꦶꦁꦲꦶꦤ꧀ꦢꦶꦪꦮꦺꦴꦤ꧀ꦠꦼꦤ꧀ꦲꦶꦁꦨꦠꦮꦶ꧈ꦩꦁꦒꦺꦤ꧀ꦲꦶꦁꦲꦺꦴꦠꦺꦭ꧀ Des Indes꧉ ꦏꦛꦃꦥꦫꦭꦸꦲꦸꦂꦲꦶꦁꦏꦁꦫꦮꦸꦃ꧈ꦱꦠꦼꦔꦼꦤ꧀ꦤꦶꦥꦸꦤ꧀ꦱꦁꦩꦶꦤꦸꦭꦾ꧇ꦠꦸꦮꦤ꧀ Crosby꧈ꦏꦸꦤ꧀ꦱꦸꦭ꧀ꦗꦺꦤ꧀ꦢꦿꦭ꧀ꦆꦁꦒꦿꦶꦱ꧀꧈ꦠꦸꦮꦶꦤ꧀ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ Prof. Dr. R. H. ꦲꦸꦱꦶꦤ꧀ꦗꦪꦢꦶꦟꦶꦁꦔꦠ꧀꧉ [ 618 ]꧋ꦗꦒꦢ꧀ꦢꦶꦁꦮꦤꦶꦠ꧉ ꧋ꦏꦱꦼꦠꦾꦤꦶꦥꦸꦤ꧀ꦮꦤꦶꦠꦗꦼꦦꦁ꧉ ꧋(ꦕꦤ꧀ꦝꦏ꧀ꦏꦶꦥꦸꦤ꧀ꦏꦗꦮꦺꦤ꧀ꦎꦁꦏ 34) ꧋ꦱꦩꦤ꧀ꦠꦼꦤ꧀ꦱꦁꦱꦫꦤꦶꦥꦸꦤ꧀ꦚꦺꦴꦚꦃꦯꦝꦏꦺꦴꦏꦭꦲꦶꦁꦗꦩꦤ꧀ꦥꦸꦤꦶꦏ꧈ꦲꦤꦔꦶꦁꦱꦫꦺꦃꦤꦶꦁꦱꦼꦢꦾꦤꦶꦁꦚꦺꦴꦚꦃꦩꦲꦸꦧꦝꦺꦲꦔꦶꦔꦶꦫꦁꦔꦶꦮꦼꦢꦭ꧀ꦭꦶꦁꦲꦂꦠ꧈ꦲꦩꦶꦭꦲꦶꦁꦒꦶꦃꦧꦺꦴꦠꦼꦤ꧀ꦲꦩꦂꦢꦸꦭꦶꦧꦧꦂꦥꦶꦱꦤ꧀ꦝꦠꦼꦁꦥꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦲꦶꦁꦏꦁꦢꦶꦥꦸꦤ꧀ꦭꦲꦶꦂꦫꦏꦼꦤ꧀ꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦲꦲꦶꦁꦏꦁꦗꦊꦂ꧉ꦲꦺꦮꦢꦺꦤꦺꦱꦤꦢꦾꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦲꦔꦶꦔꦶꦫꦁꦔꦶꦮꦲꦸꦭꦁꦏꦸꦁꦱꦏꦶꦁꦩꦼꦱ꧀ꦛꦶ꧈ꦲꦤꦔꦶꦁꦲꦶꦁꦒꦶꦃꦩꦼꦏ꧀ꦱꦠꦏ꧀ꦱꦶꦃꦏꦶꦫꦁꦏꦺꦩꦮꦺꦴꦤ꧀꧉ꦗꦭꦂꦫꦤ꧀ꦧꦠꦶꦃꦲꦶꦥꦸꦤ꧀ꦱꦢꦪꦮꦺꦴꦤ꧀ꦠꦼꦤ꧀ꦠꦶꦪꦁ 6꧈ꦲꦶꦁꦩꦺꦴꦁꦏꦥꦺꦤ꧀ꦱꦶꦪꦸꦤ꧀ꦤꦶꦥꦸꦤ꧀ꦲꦶꦁꦏꦁꦗꦊꦂꦤꦩꦸꦁ f 198,-꧉ꦲꦶꦁꦢꦊꦩ꧀ꦱꦠꦲꦸꦤꦶꦥꦸꦤ꧀꧉ꦲꦶꦁꦒꦶꦃꦊꦉꦱ꧀ꦏꦭꦥꦸꦤꦶꦏꦉꦉꦒꦶꦤꦶꦁꦠꦼꦠꦼꦝꦤ꧀ꦭꦁꦏꦸꦁꦩꦶꦫꦃꦠꦶꦤꦶꦩ꧀ꦧꦁꦱꦩꦁꦏꦺ꧈ꦲꦤꦔꦶꦁꦲꦶꦁꦒꦶꦃꦩꦼꦏ꧀ꦱꦲꦮꦿꦠ꧀ꦲꦔꦽꦁꦒꦠꦼꦝꦤ꧀ꦤꦶꦥꦸꦤ꧀ꦠꦶꦪꦁ 6꧈ꦱꦫꦤꦥꦢꦩꦼꦭ꧀ꦤꦩꦸꦁ f 16.50 ꦱꦧꦼꦤ꧀ꦮꦸꦭꦤ꧀ꦤꦶꦥꦸꦤ꧀꧈ꦥꦸꦤꦥꦩꦭꦶꦃꦲꦂꦠꦱꦩꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦼꦢꦃꦏꦱꦶꦱꦶꦃꦲꦏꦼꦤ꧀ꦏꦁꦒꦺꦠꦸꦩ꧀ꦧꦱ꧀ꦗꦩ꧀ꦥꦶꦗꦩ꧀ꦥꦶꦤꦶꦥꦸꦤ꧀ꦲꦶꦁꦏꦁꦗꦊꦂ꧉ꦱꦉꦁꦒꦼꦱꦁꦔꦶꦥꦸꦤ꧀ꦱꦪꦢꦔꦸꦱꦪꦉꦏꦲꦺꦴꦱ꧀꧈ꦲꦶꦧꦸꦤꦶꦥꦸꦤ꧀ꦩꦫꦱꦼꦥꦸꦃꦩꦭꦃꦱꦪꦱꦔꦼꦠ꧀ꦲꦁꦒꦺꦤ꧀ꦤꦶꦥꦸꦤ꧀ꦲꦔꦸꦫꦶꦁꦲꦸꦫꦶꦁ꧈ꦏꦼꦉꦥ꧀ꦱꦔꦼꦠ꧀ꦚꦺꦴꦚꦃꦯꦝꦏꦺꦴꦢꦶꦥꦸꦤ꧀ꦲꦸꦔꦼꦭ꧀ꦲꦸꦔꦼꦭ꧀ꦭꦏꦼꦤ꧀ꦲꦶꦁꦏꦁꦧꦺꦴꦠꦼꦤ꧀ꦱꦏꦺꦕ꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ꦩꦫꦱꦼꦥꦸꦃꦲꦺꦱ꧀ꦠꦿꦶꦮꦲꦸ꧈ꦩꦶꦭꦚꦺꦴꦚꦃꦯꦝꦏꦺꦴꦧꦺꦴꦠꦼꦤ꧀ꦏꦺꦱꦃꦱꦏꦶꦁꦔꦿꦶꦏꦸꦥꦸꦤꦶꦏ꧈ꦗꦭꦂꦫꦤ꧀ꦤꦩꦸꦁꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦤꦼꦁꦒꦤꦶꦥꦺꦤ꧀ꦱꦶꦪꦸꦤ꧀ꦤꦶꦥꦸꦤ꧀ꦲꦶꦁꦏꦁꦗꦊꦂꦏꦺꦩꦮꦺꦴꦤ꧀꧉ꦠꦂꦏꦝꦁꦲꦶꦧꦸꦩꦫꦱꦼꦥꦸꦃꦮꦲꦸꦱꦺꦴꦏ꧀ꦔꦸꦱꦶꦂꦚꦺꦴꦚꦃꦯꦝꦏꦺꦴꦱꦸꦥꦢꦺꦴꦱ꧀ꦏꦺꦱꦃꦱꦏꦶꦁꦔꦿꦶꦏꦸ꧉ꦚꦺꦴꦚꦃꦯꦝꦏꦺꦴꦲꦶꦁꦧꦠꦺꦴꦱ꧀ꦭꦗꦼꦁꦲꦁꦒꦒꦱ꧀ꦩꦏꦠꦼꦤ꧀꧇ꦪꦺꦤ꧀ꦲꦏꦸꦔꦤ꧀ꦠꦶꦭꦸꦔꦱꦏꦏꦺꦤꦺ꧈ꦱꦥꦏꦁꦧꦏꦭ꧀ꦲꦚ꧀ꦗꦒꦧꦺꦴꦗꦺꦴꦏꦸ꧉ꦏꦁꦲꦶꦏꦸꦮꦶꦱ꧀ꦢꦢꦶꦮꦗꦶꦧ꧀ꦏꦸꦲꦏꦸꦲꦤꦲꦶꦁꦏꦺꦤꦺꦧꦲꦺꦲꦔꦺꦴꦥꦺꦤ꧀ꦤꦶꦭꦏꦶꦏꦸ꧉ꦩꦸꦫꦶꦃꦲꦢꦩꦼꦭ꧀ꦧꦶꦔꦃꦲꦶꦁꦩꦫꦱꦼꦥꦸꦃꦲꦶꦥꦸꦤ꧀ꦲꦺꦱ꧀ꦠꦿꦶ꧈ꦚꦺꦴꦚꦃꦯꦝꦏꦺꦴꦭꦗꦼꦁꦲꦔ꧀ꦭꦩ꧀ꦥꦃꦲꦶꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦱꦼꦏꦺꦴꦭꦃꦲꦤ꧀꧉ꦭꦤ꧀ꦔꦤ꧀ꦠꦺꦴꦱ꧀ꦭꦁꦏꦸꦁꦱꦏꦶꦁ 30 ꦠꦲꦸꦤ꧀ꦭꦩꦶꦤꦶꦥꦸꦤ꧀꧈ꦚꦺꦴꦚꦃꦯꦝꦏꦺꦴꦠꦤ꧀ꦱꦃꦲꦩꦸꦭꦱꦫꦭꦏꦶꦤꦶꦥꦸꦤ꧀ꦲꦶꦁꦏꦁꦭꦸꦩ꧀ꦥꦸꦃꦮꦲꦸ꧈ꦠꦤ꧀ꦥꦲꦔꦔ꧀ꦭꦸꦃ꧈ꦥꦸꦤꦥꦩꦭꦶꦃꦧꦺꦴꦠꦼꦤ꧀ꦤꦠꦺꦲꦔ꧀ꦭꦲꦶꦂꦫꦏꦼꦤ꧀ꦠꦼꦠꦼꦩ꧀ꦧꦸꦁꦔꦤ꧀ꦲꦶꦁꦏꦁꦧꦺꦴꦠꦼꦤ꧀ꦱꦏꦺꦕ꧉ꦱꦊꦧꦼꦠ꧀ꦠꦶꦥꦸꦤ꧀ꦒꦼꦱꦁꦏꦢꦺꦴꦱ꧀ꦩꦏꦠꦼꦤ꧀ꦥꦸꦤꦶꦏ꧈ꦚꦺꦴꦚꦃꦯꦝꦏꦺꦴꦱꦒꦼꦢ꧀ꦲꦩꦿꦒꦢ꧀ꦢꦶꦏꦥꦺꦤꦏꦤ꧀ꦤꦶꦥꦸꦤ꧀ꦲꦶꦁꦏꦁꦗꦊꦂꦭꦸꦩꦼꦧꦼꦠ꧀ꦲꦶꦁꦥꦩꦸꦭꦁꦔꦤ꧀ꦲꦺꦴꦥ꧀ꦱꦶꦂꦱꦲꦲꦤꦏ꧀ꦏꦶꦥꦸꦤ꧀ꦲꦺꦱ꧀ꦠꦿꦶꦏꦼꦏꦭꦶꦃꦝꦠꦼꦁꦥꦩꦸꦭꦁꦔꦤ꧀ꦮꦤꦶꦠꦲꦶꦁ Shiruoka꧉ꦱꦩꦁꦏꦺꦏꦥꦺꦤꦏ꧀ꦏꦤ꧀ꦗꦊꦂꦮꦲꦸꦱꦩ꧀ꦥꦸꦤ꧀ꦢꦢꦺꦴꦱ꧀ꦲꦺꦴꦥ꧀ꦱꦶꦂꦥꦁꦏꦠ꧀ꦲꦶꦁꦒꦶꦭ꧀꧈ꦲꦤꦏ꧀ꦏꦶꦥꦸꦤ꧀ꦲꦺꦱ꧀ꦠꦿꦶꦲꦶꦁꦏꦁꦱꦼꦥꦸꦃꦱꦺꦩꦃꦲꦁꦱꦭ꧀ꦱꦠꦸꦁꦒꦶꦭ꧀ꦭꦶꦁꦥꦸꦁꦒꦮꦩꦱ꧀ꦏꦥꦺꦲꦒꦼꦁꦲꦶꦁꦗꦼꦦꦁ꧈ꦢꦺꦤꦺꦲꦤꦏ꧀ꦏꦶꦥꦸꦤ꧀ꦲꦺꦱ꧀ꦠꦿꦶꦲꦶꦁꦏꦁꦲꦼꦤꦺꦩ꧀꧈ꦢꦺꦫꦺꦁꦢꦔꦸꦥꦸꦤꦶꦏꦱꦩ꧀ꦥꦸꦤ꧀ꦭꦸꦭꦸꦱ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦩꦸꦭꦁꦔꦤ꧀ꦲꦺꦱ꧀ꦠꦿꦶꦲꦶꦁ Karya꧉ꦱꦩꦁꦏꦺꦚꦺꦴꦚꦃꦯꦝꦏꦺꦴꦲꦸꦩꦸꦂꦫꦶꦥꦸꦤ꧀ꦏꦶꦫꦁꦭꦁꦏꦸꦁ 56 ꦠꦲꦸꦤ꧀꧈ꦒꦼꦱꦁꦔꦶꦥꦸꦤ꧀ꦏꦭꦶꦪꦤ꧀ꦲꦶꦁꦏꦁꦗꦊꦂꦠꦤ꧀ꦱꦃꦱꦼꦤꦼꦁꦭꦤ꧀ꦠꦼꦤ꧀ꦠꦽꦩ꧀꧉ꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦏꦁꦗꦊꦂꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦤꦸꦩ꧀ꦥꦏ꧀ꦒꦿꦺꦴꦧꦒ꧀ꦒꦤ꧀ꦏꦱꦸꦫꦸꦁꦢꦺꦤꦶꦁꦲꦶꦁꦏꦁꦲꦺꦱ꧀ꦠꦿꦶꦝꦠꦼꦁꦭꦺꦥꦺꦤ꧀ꦱꦸꦩꦼꦢꦾꦲꦩꦚ꧀ꦕꦶꦁ꧉ꦠꦶꦠꦶꦪꦁꦲꦶꦁꦏꦶꦛ Kariya ꦲꦶꦁꦏꦁꦱꦩꦶꦏꦼꦥꦼꦛꦸꦏ꧀꧈ꦱꦢꦪꦱꦩꦶꦠꦸꦩꦼꦁꦔꦲꦤꦶꦔꦭ꧀ꦭꦶ꧈ꦲꦔꦁꦒꦼꦥ꧀ꦚꦺꦴꦚꦃ |
Jagading Wanita[besut]Kasêtyanipun Wanita Jêpang. (Candhakipun Kajawèn ăngka 34) Samantên sangsaranipun Nyonyah Sadhako kala ing jaman punika, ananging sarèhning sêdyaning nyonyah mau badhe angêngirangi wêdaling arta, amila inggih botên amarduli babar pisan dhatêng pangolok-olok ingkang dipun lairakên dhatêng piyambakipun saha ingkang jalêr. Ewadene sanadyan anggènipun angêngirangi wau langkung saking mêsthi, ananging inggih mêksa taksih kirang kemawon. Jalaran batihipun sadaya wontên tiyang 6, ing măngka pènsiunipun ingkang jalêr namung f 198.- ing dalêm sataunipun. Inggih lêrês kala punika rêrêgining têtêdhan langkung mirah tinimbang samangke, ananging inggih mêksa awrat angrêngga têdhanipun tiyang 6, sarana padamêl namung f 16.50 sabên wulanipun, punapa malih arta samantên punika wontên ingkang kêdah kasisihakên kangge tumbas jampi-jampinipun ingkang jalêr. Sarêng gêsangipun saya dangu saya rêkaos, ibunipun marasêpuh malah saya sangêt anggènipun anguring-uring, kêrêp sangêt Nyonyah Sadhako dipun ungêl-ungêlakên ingkang botên sakeca, wicantênipun marasêpuh èstri wau, mila Nyonyah Sadhako botên kesah saking ngriku punika, jalaran namung saking anggènipun nênggani pènsiunipun ingkang jalêr kemawon. Tarkadhang ibu marasêpuh wau sok ngusir Nyonyah Sadhako supados kesah saking ngriku. Nyonyah Sadhako ing batos lajêng anggagas makatên: yèn aku nganti lunga saka kene, sapa kang bakal anjaga bojoku. Kang iku wis dadi wajibku aku ana ing kene bae angopèni lakiku. Murih adamêl bingahing marasêpuhipun èstri, Nyonyah Sadhako lajêng anglampahi nyambut damêl wontên ing salah satunggiling sêkolahan. Lan ngantos langkung saking 30 taun laminipun, Nyonyah Sadhako tansah amulasara lakinipun ingkang lumpuh wau, tanpa angangluh, punapa malih botên nate anglairakên têtêmbungan ingkang botên sakeca. Salêbêtipun gêsang kados makatên punika, Nyonyah Sadhako sagêd amragadi kapenakanipun ingkang jalêr lumêbêt ing pamulangan opsir saha anakipun èstri kêkalih dhatêng pamulangan wanita ing Shiruoka. Samangke kapenakan jalêr wau sampun dados opsir pangkat inggil, anakipun èstri ingkang sêpuh semah angsal satunggiling punggawa maskape agêng ing Jêpang, dene anakipun èstri ingkang ênèm, dèrèng dangu punika sampun lulus eksamênipun wontên ing pamulangan èstri ing Karya. Samangke nyonyah Sadhako umuripun kirang langkung 56 taun, gêsangipun kalihan ingkang jalêr tansah sênêng lan têntrêm. Padamêlanipun ingkang jalêr sabên dintênipun numpak grobagan kasurung dening ingkang èstri dhatêng lèpèn sumêdya amancing. Têtiyang ing kitha Kariya ingkang sami kêpêthuk, sadaya sami tumênga aningali, anganggêp Nyonyah Sadhako kadosdene satunggiling barang adi ingkang gêsang ing panggenan ngriku (ngantos dumugi samangke Nyonyah Sadhako wau taksih gêsang). Dèrèng dangu punika juru ngarang Tuwan K. Yamamoto ingkang nyariyosakên bab punika, mêntas apêpanggihan kalihan Nyonyah Keiko Hattori, satunggiling juru ngarang wanita ingkang kawitan ing tanah Jêpang, lan samangke abikak toko agêng wontên ing sacêcakipun statsiun Ohmori, pêrlu pitakèn bab kawontênanipun Nyonyah Sadhako, amargi Nyonyah Hattori wau kalêrês adhinipun. Wangsulanipun Nyonyah Hattori makatên: Kula botên mangêrtos babarpisan dene bakyu kula sagêd anglampahi gêsang ingkang sangsara makatên, amila inggih elok sangêt, ingatasipun satunggiling tiyang èstri ingkang badanipun ringkih lan kêra, têka tansah kuwawi anggendhong ingkang jalêr dhatêng griya sakit ngantos mataun-taun laminipun. Dene anggènipun angsal kamulyan wau, botên jalaran saking kakiyataning badanipun, ananging têtela saking gênging katrêsnaning manahipun. | ||
|
[ 619 ]ꦯꦝꦏꦺꦴꦏꦢꦺꦴꦱ꧀ꦢꦺꦤꦺꦱꦠꦸꦁꦒꦶꦭ꧀ꦭꦶꦁꦧꦫꦁꦲꦢꦶꦲꦶꦁꦏꦁꦒꦼꦱꦁꦲꦶꦁꦥꦁꦒꦺꦤ꧀ꦤꦤ꧀ꦔꦿꦶꦏꦸ(ꦔꦤ꧀ꦠꦺꦴꦱ꧀ꦢꦸꦩꦸꦒꦶꦱꦩꦁꦏꦺꦚꦺꦴꦚꦃꦯꦝꦏꦺꦴꦮꦲꦸꦠꦏ꧀ꦱꦶꦃꦒꦼꦱꦁ)꧉ ꧋ꦢꦺꦫꦺꦁꦢꦔꦸꦥꦸꦤꦶꦏꦗꦸꦫꦸꦔꦫꦁꦠꦸꦮꦤ꧀ K. Yamamoto ꦲꦶꦁꦏꦁꦚꦫꦶꦪꦺꦴꦱ꧀ꦱꦏꦼꦤ꧀ꦧꦧ꧀ꦥꦸꦤꦶꦏ꧈ꦩꦼꦤ꧀ꦠꦱ꧀ꦲꦥꦼꦥꦁꦒꦶꦃꦲꦤ꧀ꦏꦭꦶꦪꦤ꧀ꦚꦺꦴꦚꦃ Keiko Hattori꧈ꦱꦠꦸꦁꦒꦶꦭ꧀ꦭꦶꦁꦗꦸꦫꦸꦔꦫꦁꦮꦤꦶꦠꦲꦶꦁꦏꦁꦏꦮꦶꦠ꧀ꦠꦤ꧀ꦲꦶꦁꦠꦤꦃꦗꦼꦦꦁ꧈ꦭꦤ꧀ꦱꦩꦁꦏꦺꦲꦧꦶꦏꦏ꧀ꦠꦺꦴꦏꦺꦴꦲꦒꦼꦁꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦥꦸꦤ꧀ꦱꦺꦠꦠ꧀ꦱꦶꦪꦸꦤ꧀ Ohmori꧈ꦥꦼꦂꦭꦸꦥꦶꦠꦏꦺꦤ꧀ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦚꦺꦴꦚꦃꦯꦝꦏꦺꦴ꧈ꦲꦩꦂꦒꦶꦚꦺꦴꦚꦃ Hattori ꦮꦲꦸꦏꦊꦉꦱ꧀ꦲꦝꦶꦤꦶꦥꦸꦤ꧀꧉ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀ꦚꦺꦴꦚꦃ Hattori ꦩꦏꦠꦼꦤ꧀꧇ꦏꦸꦭꦧꦺꦴꦠꦼꦤ꧀ꦩꦔꦼꦂꦠꦺꦴꦱ꧀ꦧꦧꦂꦥꦶꦱꦤ꧀ꦢꦺꦤꦺꦧꦏꦾꦸꦏꦸꦭꦱꦒꦼꦢ꧀ꦲꦔ꧀ꦭꦩ꧀ꦥꦃꦲꦶꦒꦼꦱꦁꦲꦶꦁꦏꦁꦱꦁꦱꦫꦩꦏꦠꦼꦤ꧀꧈ꦲꦩꦶꦭꦲꦶꦁꦒꦶꦃꦲꦺꦭꦺꦴꦏ꧀ꦱꦔꦼꦠ꧀꧈ꦲꦶꦔꦠꦱ꧀ꦱꦶꦥꦸꦤ꧀ꦱꦠꦸꦁꦒꦶꦭ꧀ꦭꦶꦁꦠꦶꦪꦁꦲꦺꦱ꧀ꦠꦿꦶꦲꦶꦁꦏꦁꦧꦢꦤ꧀ꦤꦶꦥꦸꦤ꧀ꦫꦶꦁꦏꦶꦃꦭꦤ꧀ꦏꦼꦫ꧈ꦠꦼꦏꦠꦤ꧀ꦱꦃꦏꦸꦮꦮꦶꦲꦁꦒꦺꦤ꧀ꦝꦺꦴꦁꦲꦶꦁꦏꦁꦗꦊꦂꦝꦠꦼꦁꦒꦿꦶꦪꦱꦏꦶꦠ꧀ꦔꦤ꧀ꦠꦺꦴꦱ꧀ꦩꦠꦲꦸꦤ꧀ꦠꦲꦸꦤ꧀ꦭꦩꦶꦤꦶꦥꦸꦤ꧀꧉ꦢꦺꦤꦺꦲꦁꦒꦺꦤ꧀ꦤꦶꦥꦸꦤ꧀ꦲꦁꦱꦭ꧀ꦏꦩꦸꦭꦾꦤ꧀ꦮꦲꦸ꧈ꦧꦺꦴꦠꦼꦤ꧀ꦗꦭꦂꦫꦤ꧀ꦱꦏꦶꦁꦏꦏꦶꦪꦠ꧀ꦠꦤ꧀ꦤꦶꦁꦧꦢꦤ꧀ꦤꦶꦥꦸꦤ꧀꧈ꦲꦤꦔꦶꦁꦠꦼꦠꦺꦭꦱꦏꦶꦁꦒꦼꦁꦔꦶꦁꦏꦠꦽꦱ꧀ꦤꦤ꧀ꦤꦶꦁꦩꦤꦃꦲꦶꦥꦸꦤ꧀꧉ KRONIEK ꧋ꦏꦧꦂꦮꦂꦤꦶꦮꦂꦤꦶ꧉ ꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧉ ꧋ꦥꦏꦼꦩ꧀ꦥꦭ꧀ꦭꦤ꧀꧈ꦆꦱ꧀ꦭꦩ꧀ꦩꦶꦪꦃꦲꦶꦁꦔꦪꦺꦴꦓꦾꦏꦂꦠ꧈ꦱꦮꦠꦮꦶꦱ꧀ꦢꦶꦤ꧀ꦠꦼꦤ꧀ꦩꦭꦶꦃꦧꦝꦺꦲꦩ꧀ꦧꦶꦏꦏ꧀ꦥꦩꦸꦭꦁꦔꦤ꧀ H.I.S. ꦥꦂꦠꦶꦏꦼꦭꦶꦂꦮꦺꦴꦤ꧀ꦠꦼꦤ꧀ꦲꦶꦁꦝꦸꦱꦸꦤ꧀ꦧꦮꦁ꧈ꦝꦶꦱ꧀ꦠꦿꦶꦏ꧀ꦧꦤ꧀ꦝꦸꦭ꧀꧉ꦩꦁꦒꦺꦤ꧀ꦲꦶꦁꦒꦿꦶꦪꦤꦶꦥꦸꦤ꧀ꦏꦥꦭꦝꦸꦱꦸꦤ꧀ꦔꦿꦶꦏꦸ꧉ꦱꦏꦮꦶꦠ꧀ꦤꦩꦸꦁꦲꦩ꧀ꦧꦶꦏꦏ꧀ ꦏ꧀ꦭꦱ꧀ 1 ꦭꦤ꧀ 2꧈ꦤꦔꦶꦁꦱꦧꦼꦤ꧀ꦠꦲꦸꦤ꧀ꦧꦝꦺꦢꦶꦥꦸꦤ꧀ꦲꦶꦤ꧀ꦝꦏ꧀ꦏꦶꦏ꧀ꦭꦱ꧀ꦱꦶꦥꦸꦤ꧀꧉ ꧋ꦢꦺꦫꦺꦁꦢꦔꦸꦲꦶꦁꦧꦤ꧀ꦝꦸꦁꦏꦛꦃꦭꦫꦺꦭꦫꦺꦱꦩꦶꦲꦶꦕꦭ꧀꧉ꦲꦶꦁꦏꦁꦱꦩ꧀ꦥꦸꦤ꧀ꦏꦭꦥꦸꦂꦫꦏꦼꦤ꧀ꦲꦶꦁꦥꦸꦭꦶꦱꦶ꧈ 1 ꦗꦤꦸꦱ꧀꧈ꦲꦶꦁꦏꦩ꧀ꦥꦸꦁꦥ꧀ꦭꦺꦝꦁ꧉ꦮꦒꦶꦩꦤ꧀ꦲꦸꦩꦸꦂ 10 ꦠꦲꦸꦤ꧀꧈ꦲꦶꦁꦏꦩ꧀ꦥꦸꦁꦱꦤꦶꦤ꧀ꦠꦼꦤ꧀꧉ꦏꦂꦤ꧈ꦲꦸꦩꦸꦂ 13 ꦠꦲꦸꦤ꧀꧈ꦲꦶꦁꦏꦩ꧀ꦥꦸꦁꦥꦿꦗꦸꦫꦶꦠ꧀꧉ꦩꦸꦏ꦳ꦩꦢ꧀ꦠꦲꦶꦂ꧈ꦲꦸꦩꦸꦂ 8 ꦠꦲꦸꦤ꧀꧈ꦲꦶꦁꦏꦩ꧀ꦥꦸꦁꦱꦤꦶꦤ꧀ꦠꦼꦤ꧀ꦠꦸꦮꦶꦤ꧀ꦱꦲꦿꦶ꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦸꦩꦸꦂ 12 ꦠꦲꦸꦤ꧀꧈ꦲꦶꦁꦏꦩ꧀ꦥꦸꦁꦕꦶꦩꦼꦚꦤ꧀꧉ ꧋ꦲꦶꦁꦢꦶꦤ꧀ꦠꦼꦤ꧀ꦗꦸꦩꦸꦮꦃꦏꦥꦼꦁꦏꦼꦂ꧈ꦮꦺꦴꦤ꧀ꦠꦼꦤ꧀ꦠꦶꦪꦁꦏꦛꦃꦲꦶꦁꦏꦁꦏꦲꦁꦏꦠ꧀ꦠꦏꦼꦤ꧀ꦱꦏꦶꦁꦨꦠꦮꦶꦤꦸꦩ꧀ꦥꦏ꧀ꦱꦼꦥꦸꦂꦝꦠꦼꦁꦯꦸꦫꦧꦪ꧈ꦧꦺꦚ꧀ꦗꦶꦁꦠꦁꦒꦭ꧀ 2 ꦱꦺꦥ꧀ꦠꦺꦩ꧀ꦧꦼꦂꦏꦧꦶꦝꦭ꧀ꦭꦏꦼꦤ꧀ꦝꦠꦼꦁꦝꦶꦓꦸꦭ꧀ꦤꦸꦩ꧀ꦥꦏ꧀ꦏꦥꦭ꧀ Sirius꧉ ꧋ꦏꦮꦿꦠꦤ꧀ꦤꦶꦁꦥꦲꦺꦴꦱ꧀ꦥꦫꦠꦶꦠꦶꦪꦁꦲꦶꦁꦯꦸꦩꦠꦿꦱꦶꦱꦶꦃꦏꦶꦭꦺꦤ꧀ꦱꦩ꧀ꦥꦸꦤ꧀ꦏꦥꦿꦶꦏ꧀ꦱꦫꦩ꧀ꦥꦸꦁ꧈ꦥꦶꦏꦤ꧀ꦠꦸꦏ꧀ꦏꦶꦁꦥꦥꦿꦶꦏ꧀ꦱꦤ꧀ꦠꦸꦩꦸꦤ꧀ꦠꦼꦤ꧀ꦧꦝꦺꦲꦔꦠꦸꦂꦫꦏꦼꦤ꧀ꦲꦶꦁꦦꦫꦺꦤ꧀ꦠꦃ꧉ ꧋ꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀꧈ꦧꦶꦭꦶꦃꦠꦸꦮꦤ꧀ H.A. ꦯꦭꦶꦩ꧀ꦱꦥꦸꦤ꧀ꦧꦶꦝꦭ꧀ꦱꦏꦶꦁꦩꦼꦏꦃꦝꦠꦼꦁꦲꦶꦤ꧀ꦢꦶꦪ꧉ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦧꦝꦺꦏꦩ꧀ꦥꦶꦂꦲꦶꦁꦨꦺꦴꦩ꧀ꦧꦲꦆ꧉ꦒꦺꦴꦭꦺꦴꦔꦤ꧀ P.S.I. ꦱꦩ꧀ꦥꦸꦤ꧀ꦮꦶꦮꦶꦠ꧀ꦠꦠꦠꦧꦝꦺꦔꦸꦂꦩꦠ꧀ꦠꦶꦧꦺꦚ꧀ꦗꦶꦁꦝꦠꦼꦁꦔꦶꦥꦸꦤ꧀ꦠꦸꦮꦤ꧀ꦱꦭꦶꦩ꧀꧉ꦱꦏꦶꦁꦒꦺꦴꦭꦺꦴꦁꦔꦶꦁꦉꦩ꧀ꦧꦒ꧀ꦒꦶꦥꦸꦤ꧀ꦥꦫꦥꦏꦼꦩ꧀ꦥꦭ꧀ꦭꦤ꧀ꦆꦱ꧀ꦭꦩ꧀꧈ꦠꦸꦮꦤ꧀ꦱꦭꦶꦩ꧀ꦧꦝꦺꦢꦶꦥꦸꦤ꧀ꦲꦠꦸꦂꦫꦶꦱꦺꦴꦱꦺꦴꦫꦃꦲꦶꦁꦧꦧ꧀ꦭꦩ꧀ꦥꦃꦲꦶꦥꦸꦤ꧀꧈ꦠꦸꦮꦶꦤ꧀ꦧꦧ꧀ꦲꦁꦒꦺꦤ꧀ꦤꦶꦥꦸꦤ꧀ꦱꦺꦴꦮꦤ꧀ꦦꦿꦧꦸꦆꦧ꧀ꦤꦸꦯꦲꦺꦴꦢ꧀꧈ꦥꦸꦤꦥꦢꦺꦤꦺꦧꦧ꧀ꦱꦸꦮꦏ꧀ꦏꦶꦁꦩꦸꦏ꧀ꦠꦩꦂꦲꦶꦁꦠꦲꦸꦤ꧀ꦥꦸꦤꦶꦏ꧉ ꧋ꦲꦶꦁꦠꦁꦒꦭ꧀ 19 ꦄꦒꦸꦱ꧀ꦠꦸꦱ꧀ꦭꦤ꧀ꦢꦿꦢ꧀ꦲꦶꦁꦨꦽꦧꦼꦱ꧀ꦲꦤ꧀ꦝꦮꦃꦲꦏꦼꦤ꧀ꦏꦫꦩ꧀ꦥꦸꦁꦔꦤ꧀ꦝꦠꦼꦁꦥꦱꦏꦶꦠ꧀ꦠꦤ꧀ꦮꦭ꧀ꦏꦩ꧀꧈ꦏꦲꦸꦏꦸꦩ꧀ 15 ꦠꦲꦸꦤ꧀꧈ꦪꦏꦶꦩ꧀ 12 ꦠꦲꦸꦤ꧀꧈ꦩꦸꦮꦶꦠ꧀ 10 ꦠꦲꦸꦤ꧀꧈ꦱꦩꦶꦏꦊꦥꦠ꧀ꦠꦤ꧀ꦔꦺꦴꦪꦺꦴꦏ꧀ꦲꦶꦁꦒꦿꦶꦪꦤꦶꦥꦸꦤ꧀ꦏꦗꦶꦄꦩ꧀ꦧꦫꦶꦲꦶꦁꦪꦸꦮꦸꦔꦿꦒꦶ꧉ꦮꦺꦴꦤ꧀ꦠꦼꦤ꧀ꦥꦱꦏꦶꦠ꧀ꦠꦤ꧀ 5 ꦲꦶꦁꦏꦁꦭꦸꦮꦂ꧉ ꧋ꦲꦶꦁꦏꦤ꧀ꦠꦺꦴꦂ Jav. Bank ꦲꦶꦁꦕꦽꦨꦺꦴꦤ꧀꧈ꦥꦶꦤꦁꦒꦶꦃꦮꦺꦴꦤ꧀ꦠꦼꦤ꧀ꦲꦂꦠ f 8.900,-꧉ꦲꦶꦁꦏꦁꦢꦶꦥꦸꦤ꧀ꦱ꧀ꦭꦶꦁꦏꦸꦃꦲꦏꦼꦤ꧀ꦲꦶꦁꦠꦶꦪꦁ꧉ꦲꦂꦠꦮꦲꦸꦲꦮꦂꦤꦶꦲꦂꦠꦏꦽꦠꦱ꧀ꦲꦶꦁꦏꦁꦧꦝꦺꦢꦶꦥꦸꦤ꧀ꦱꦶꦂꦤꦑꦏꦼꦤ꧀꧈ꦤꦔꦶꦁꦢꦺꦫꦺꦁꦢꦶꦥꦸꦤ꧀ꦕꦶꦫꦺꦤꦶ꧉ꦏꦱꦶꦂꦏꦏꦭꦶꦃꦲꦶꦁꦏꦁꦏꦺꦔꦶꦁꦢꦏ꧀ꦮ꧈ꦱꦥꦸꦤꦶꦏꦢꦶꦥꦸꦤ꧀ꦠꦲꦤ꧀꧉ ꧋ꦱꦏꦶꦁꦥꦤꦶꦩ꧀ꦧꦁꦔꦶꦁꦏꦸꦩꦶꦱꦶꦏꦺꦴꦭꦺꦴꦤꦶꦱꦱꦶꦲꦶꦁꦏꦺꦴꦡꦲꦒꦸꦁ꧈ꦧꦶꦭꦶꦃꦦꦩꦫꦺꦤ꧀ꦠꦃꦩꦉꦁꦔꦏꦼꦤ꧀ꦚꦝꦶꦪꦤ꧀ꦤꦶꦮꦿꦒꦢ꧀ꦏꦁꦒꦺꦪꦱꦲꦶꦭꦺꦤ꧀ꦲꦶꦭꦺꦤ꧀ꦠꦺꦴ [ 620 ]ꦪꦠꦸꦮꦶꦤ꧀ꦔꦸꦢꦶꦏꦱꦫꦱ꧀ꦱꦤ꧀ꦲꦶꦁꦔꦿꦶꦏꦸ꧈ꦏꦺꦴꦭꦺꦴꦤꦶꦱꦱꦶꦮꦲꦸꦧꦝꦺꦏꦭꦗꦼꦁꦔꦏꦼꦤ꧀꧉ꦢꦺꦤꦺꦥꦽꦭꦸꦠꦸꦮꦶꦤ꧀ꦧꦺꦴꦠꦼꦤ꧀ꦤꦶꦥꦸꦤ꧀ꦏꦺꦴꦭꦺꦴꦤꦶꦱꦱꦶꦮꦲꦸꦏꦮꦶꦪꦂꦫꦏꦼꦤ꧀꧈ꦢꦺꦫꦺꦁꦏꦉꦩ꧀ꦧꦒ꧀꧉ ꧋ꦮꦶꦤꦶꦱꦸꦝꦢꦢꦺꦴꦱ꧀ꦫꦺꦱꦶꦝꦺꦤ꧀ꦲꦶꦁꦗꦩ꧀ꦧꦶꦠꦸꦮꦤ꧀ H.E.K. Ezerman꧈ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦏꦁꦏꦧꦤ꧀ꦠꦺꦴꦑꦏꦼꦤ꧀ꦲꦶꦁꦫꦺꦱꦶꦝꦺꦤ꧀ꦦꦭꦺꦩ꧀ꦧꦁ꧉ ꧋ꦧꦧ꧀ꦏꦢꦸꦂꦗꦤꦤ꧀ꦲꦂꦠꦲꦶꦁꦩꦺꦴꦧꦶꦭ꧀ꦥꦺꦴꦱ꧀ꦲꦶꦁꦩꦼꦂꦧꦲꦎ꧈ꦲꦶꦁꦱꦥꦸꦤꦶꦏꦠꦸꦮꦤ꧀ꦏꦺꦴꦤ꧀ꦠꦿꦺꦴꦭꦶꦂꦲꦶꦁꦩꦼꦂꦧꦲꦎꦱꦩ꧀ꦥꦸꦤ꧀ꦲꦁꦱꦭ꧀ꦏꦠꦿꦁꦔꦤ꧀ꦩꦭꦶꦃꦩꦁꦒꦶꦃꦧꦸꦠꦩꦭ꧀ꦲꦂꦠ f 5.500,-꧉ꦢꦶꦥꦸꦤ꧀ꦥꦼꦤ꧀ꦝꦼꦩ꧀ꦲꦶꦁꦱꦶꦠꦶ꧈ꦲꦸꦒꦶꦮꦺꦴꦤ꧀ꦠꦼꦤ꧀ꦲꦶꦁꦩꦼꦂꦧꦲꦎ꧈ꦢꦢꦺꦴꦱ꧀ꦢꦸꦩꦸꦒꦶꦱꦥꦸꦤꦶꦏ꧈ꦲꦶꦁꦏꦁꦥꦶꦤꦁꦒꦶꦃꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ f 18.000,-꧉꧉ ꧋ꦏꦱꦼꦧꦸꦠ꧀ꦲꦶꦁꦧꦼꦱ꧀ꦭꦶꦠ꧀ꦒꦸꦥꦽꦩꦺꦤ꧀꧈ꦤꦼꦠꦼꦥ꧀ꦥꦏꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦏꦸꦩꦶꦤꦶꦱ꧀ 33 ꦲꦶꦁꦏꦁꦏꦱꦶꦁꦏꦶꦂꦫꦏꦼꦤ꧀ꦝꦠꦼꦁꦝꦶꦓꦸꦭ꧀꧉ꦲꦶꦁꦏꦁꦏꦛꦃꦲꦱ꧀ꦭꦶꦱꦏꦶꦁꦡꦼꦂꦤꦠꦺ꧉ ꧋ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦲꦂꦠꦲꦶꦁꦏꦁꦏꦁꦒꦺꦩꦶꦠꦸꦭꦸꦁꦔꦶꦏꦱꦁꦱꦫꦤ꧀ꦧꦼꦧꦪꦲꦔꦶꦤ꧀ꦲꦒꦼꦁꦲꦶꦁꦤꦒꦫꦶꦮꦭꦤ꧀ꦢꦶ꧈ꦱꦼꦩꦺꦫꦸꦥꦺꦴꦤ꧀ꦠꦩ꧀ꦥꦶꦲꦂꦠꦢꦂꦩ f 13.892.71꧉ꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦩ꧀ꦥꦺꦤ꧀ꦤꦶꦮꦺꦴꦤ꧀ꦠꦼꦤ꧀ f 91.544.45 ꦢꦢꦺꦴꦱ꧀ꦱꦢꦪꦮꦺꦴꦤ꧀ꦠꦼꦤ꧀ f 105.447.16꧉ ꧋Aneta ꦩꦂꦠꦺꦴꦱ꧀ꦱꦏꦼꦤ꧀꧇ꦱꦩꦁꦏꦺꦮꦺꦴꦤ꧀ꦠꦼꦤ꧀ꦎꦂꦝꦺꦴꦤꦤ꧀ꦱꦶꦲꦺꦁꦒꦭ꧀ꦲꦶꦁꦏꦁꦔꦼꦮꦿꦠ꧀ꦠꦏꦼꦤ꧀ꦥꦲꦸꦏꦸꦩ꧀ꦩꦤ꧀ꦤꦶꦥꦸꦤ꧀ꦥꦫꦥꦔꦒꦼꦁꦲꦶꦁꦏꦁꦱꦩꦶꦩꦶꦱꦏꦶꦠ꧀ꦏꦭꦺꦫꦺꦃꦲꦤ꧀ꦤꦶꦥꦸꦤ꧀꧈ꦱꦤꦗꦤ꧀ꦠꦤꦩꦸꦁꦱꦥꦺꦭꦺ꧉ ꧋ꦏꦲꦁꦏꦠ꧀ꦢꦢꦺꦴꦱ꧀ꦩꦸꦝꦥꦔꦂꦱ (ondervoorzitter) ꦭꦤ꧀ꦢꦿꦢ꧀ꦲꦶꦁꦩꦓꦼꦭꦁꦱꦂꦠꦡꦼꦩꦁꦒꦸꦁ꧇ꦫꦢꦺꦤ꧀ꦱꦸꦦꦂꦠ꧈ꦲꦶꦁꦏꦁꦱꦸꦮꦲꦸꦭꦶꦢ꧀ꦭꦤ꧀ꦢꦿꦢ꧀꧉ꦏꦲꦁꦏꦠ꧀ꦢꦢꦺꦴꦱ꧀ꦩꦸꦝꦥꦔꦂꦱ (ondervoorzitter) ꦭꦤ꧀ꦢꦿꦢ꧀ꦲꦶꦁꦨꦁꦏꦭꦤ꧀(ꦩꦢꦸꦫ)꧇ꦫꦢꦺꦤ꧀ ꦯꦸꦒꦶꦪꦤ꧈ꦭꦶꦢ꧀ꦭꦤ꧀ꦢꦿꦢ꧀ꦲꦶꦁꦬꦼꦩ꧀ꦧꦁ꧉ ꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦏꦁꦮꦶꦕꦏ꧀ꦱꦤꦒꦸꦥꦽꦤꦸꦂꦗꦺꦤ꧀ꦢꦿꦭ꧀꧈ꦲꦤ꧀ꦝꦮꦸꦃꦲꦏꦼꦤ꧀ꦮꦫꦢꦶꦤ꧀ꦱꦂꦠꦝꦮꦸꦃꦮꦲꦸꦲꦸꦒꦶꦧꦝꦺꦏꦥꦕꦏ꧀ꦲꦶꦁꦱꦼꦠꦠ꧀ꦱꦼꦧ꧀ꦭꦠ꧀꧈ꦏꦢꦺꦴꦱ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ꧇ ꧋ꦲꦶꦁꦏꦁꦮꦶꦕꦏ꧀ꦱꦤꦲꦱꦿꦶꦁꦩꦶꦉꦁꦥꦮꦂꦠꦺꦴꦱ꧀ꦱꦂꦠꦲꦸꦒꦶꦲꦔꦸꦤꦶꦁꦔꦤ꧀ꦤꦶꦱꦏꦶꦁꦉꦩ꧀ꦧꦒꦽꦩ꧀ꦧꦒ꧀ꦥꦉꦥꦠ꧀ꦠꦤ꧀ꦥꦔꦿꦺꦃꦥꦿꦗ꧈ꦧꦶꦭꦶꦃꦏꦛꦃꦱꦮꦼꦤꦺꦃꦲꦶꦁꦲꦩ꧀ꦠꦼꦤꦂꦲꦶꦁꦏꦁꦏꦗꦶꦧꦃꦤꦶꦤ꧀ꦢꦑꦏꦼꦤ꧀ꦏꦮꦗꦶꦧ꧀ꦧꦤ꧀ꦥꦶꦪꦩ꧀ꦧꦏ꧀꧈ꦲꦶꦁꦏꦁꦭꦗꦼꦁꦭꦭꦪꦤ꧀ꦤꦤ꧀ꦏꦭꦶꦪꦤ꧀ꦏꦮꦸꦭꦧꦺꦴꦠꦼꦤ꧀ꦏꦤ꧀ꦛꦶꦱꦉꦩ꧀ꦧꦒ꧀ꦏꦭꦶꦪꦤ꧀ꦥꦿꦶꦪꦤ꧀ꦠꦸꦤ꧀ꦥꦔꦿꦺꦃꦥꦿꦗꦌꦫꦺꦴꦥꦃꦲꦸꦠꦮꦶꦥꦿꦶꦧꦸꦩꦶꦫꦸꦩꦶꦪꦶꦤ꧀꧉ꦗꦭꦂꦫꦤ꧀ꦱꦏꦶꦁꦥꦸꦤꦶꦏꦱꦫꦺꦃꦤꦶꦁꦥꦔꦿꦺꦃꦥꦿꦗꦥꦸꦤꦶꦏꦱꦩ꧀ꦥꦸꦤ꧀ꦠꦩ꧀ꦠꦸꦭꦁꦏꦸꦁꦱꦸꦩꦼꦉꦥ꧀ꦝꦠꦼꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦧꦮꦃꦲꦶꦥꦸꦤ꧀꧈ꦩꦶꦭꦭꦩ꧀ꦥꦃꦲꦶꦁꦥꦢꦩꦼꦭ꧀ꦭꦤ꧀ꦲꦶꦁꦏꦁꦤꦶꦭꦂꦥꦔꦿꦺꦃꦥꦿꦗꦮꦲꦸꦧꦺꦴꦠꦼꦤ꧀ꦏꦺꦔꦶꦁꦢꦶꦥꦸꦤ꧀ꦮꦱ꧀ꦠꦤꦶꦱꦲꦺ꧈ꦠꦸꦮꦶꦤ꧀ꦥꦁꦒꦭꦶꦃꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤ꧈ꦠꦶꦤ꧀ꦢꦏ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦏꦗꦮꦶꦤꦩꦚꦸꦢꦢꦫꦗꦢ꧀ꦢꦶꦁꦥꦔꦿꦺꦃꦥꦿꦗ꧈ꦲꦸꦒꦶꦤꦩꦤꦼꦫꦏ꧀ꦮꦮꦼꦤꦁꦔꦶꦁꦭꦶꦪꦤ꧀꧉ꦲꦩꦶꦭꦱꦩꦁꦏꦺꦥꦥꦺꦫꦁꦔꦤ꧀ꦤꦶꦁꦥꦢꦩꦼꦭ꧀ꦭꦤ꧀ꦤꦒꦫꦶꦲꦶꦁꦏꦁꦲꦁꦱꦭ꧀ꦝꦮꦸꦃꦤꦶꦤ꧀ꦢꦑꦏꦼꦤ꧀ꦥꦥꦿꦶꦏ꧀ꦱꦤ꧀ꦥꦶꦪꦩ꧀ꦧꦏ꧀꧈ꦏꦼꦢꦃꦱꦸꦏꦱꦸꦩꦼꦉꦥ꧀ꦫꦸꦩꦶꦪꦶꦤ꧀ꦝꦠꦼꦁꦥꦔꦒꦼꦁꦔꦶꦁꦥꦥꦿꦺꦤ꧀ꦠꦃꦲꦤ꧀꧈ꦏꦤ꧀ꦛꦶꦏꦠꦿꦁꦔꦤ꧀ꦧꦺꦚ꧀ꦗꦶꦁꦥꦸꦤꦥꦲꦁꦒꦺꦤ꧀ꦤꦶꦥꦸꦤ꧀ꦤꦶꦤ꧀ꦢꦑꦏꦼꦤ꧀ꦥꦥꦿꦶꦏ꧀ꦱꦤ꧀꧈ꦱꦸꦥꦢꦺꦴꦱ꧀ꦱꦒꦼꦢ꧀ꦲꦩ꧀ꦧꦼꦏ꧀ꦠꦭꦶꦪꦤ꧀ꦥꦔꦿꦺꦃꦥꦿꦗꦥꦿꦶꦧꦸꦩꦶ꧉ꦠꦸꦩꦿꦥ꧀ꦲꦶꦁꦠꦤꦃꦱꦧꦿꦁ꧈ꦱꦫꦺꦃꦤꦶꦁꦧꦺꦢꦏꦭꦶꦪꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦔꦿꦶꦏꦶ꧈ꦏꦼꦢꦃꦤꦼꦝꦥꦶꦠꦸꦭꦸꦁꦭꦸꦩꦤ꧀ꦠꦂꦥꦔꦿꦺꦃꦥꦿꦗꦧꦺꦴꦁꦱꦌꦫꦺꦴꦥꦃ꧈ꦱꦸꦥꦢꦺꦴꦱ꧀ꦏꦶꦤꦤ꧀ꦛꦺꦤ꧀ꦤꦤ꧀ꦲꦩ꧀ꦠꦼꦤꦂꦲꦸꦠꦮꦶꦥꦔꦒꦼꦁꦔꦶꦁꦠꦶꦪꦁꦥꦿꦶꦧꦸꦩꦶ꧉ ꧋ꦒꦒꦪꦸꦠ꧀ꦠꦤ꧀ꦏꦭꦶꦪꦤ꧀ꦧꦧ꧀ꦥꦸꦤꦶꦏ꧈ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦲꦸꦒꦶꦏꦼꦥꦺꦔꦶꦤ꧀ꦥꦫꦶꦁꦥꦼꦥꦺꦔꦼꦠ꧀꧈ꦩꦤꦮꦶꦥꦿꦤꦠꦤ꧀ꦲꦶꦁꦏꦁꦲꦚ꧀ꦗꦭꦂꦫꦶꦥꦔꦿꦺꦃꦥꦿꦗꦏꦼꦢꦃꦠꦸꦩꦸꦠ꧀ꦔꦸꦫꦸꦱ꧀ꦱꦏꦼꦤ꧀꧈ꦧꦺꦴꦠꦼꦤ꧀ꦏꦺꦔꦶꦁꦏꦊꦧꦼꦠ꧀ꦠꦏꦼꦤ꧀ꦲꦸꦱꦸꦭ꧀꧈ꦲꦸꦠꦮꦶꦚꦝꦶꦪꦤ꧀ꦤꦶꦥꦔꦒꦼꦁꦥꦶꦪꦩ꧀ꦧꦏ꧀꧈ꦱꦢꦺꦫꦺꦁꦔꦶꦥꦸꦤ꧀ꦥꦔꦒꦼꦁꦔꦶꦁꦒꦼꦮꦺꦱ꧀ꦲꦔ꧀ꦭꦲꦶꦂꦫꦏꦼꦤ꧀ꦱꦸꦫꦲꦺꦴꦱ꧀ꦱꦶꦁꦩꦤꦃꦠꦸꦩꦿꦥ꧀ꦥꦿꦤꦠꦤ꧀ꦮꦲꦸ꧉ ꧋ꦦꦫꦺꦤ꧀ꦠꦃꦱꦩ꧀ꦥꦸꦤ꧀ꦲꦔꦁꦒꦼꦥ꧀ꦲꦧ꧀ꦱꦃꦱꦂꦠꦔꦶꦢꦺꦤ꧀ꦤꦶꦲꦸꦤ꧀ꦝꦁꦲꦸꦤ꧀ꦝꦁꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦫꦢ꧀ꦏꦶꦛꦩꦗꦏꦼꦂꦠꦏꦁꦒꦺꦚꦸꦢꦮꦼꦮꦃꦲꦤ꧀ (Opcenten) ꦥꦲꦺꦴꦱ꧀ꦤꦒꦫꦶ꧈ꦲꦶꦁꦒꦶꦃꦥꦸꦤꦶꦏꦏꦱꦸꦢ 20 ꦢꦸꦩꦸꦒꦶ 15 ꦥꦽꦱꦺꦤ꧀꧉ ꧋ꦥꦫꦱꦸꦫꦝꦝꦸꦲꦶꦤ꧀ꦢꦶꦪꦲꦶꦁꦏꦁꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦮꦭꦤ꧀ꦢꦶ꧈ꦤꦭꦶꦏꦥꦩꦶꦠ꧀ꦠꦶꦥꦸꦤ꧀ꦝꦠꦼꦁꦥꦫꦩꦶꦠꦿꦤꦶꦥꦸꦤ꧀ꦧꦺꦴꦁꦱꦮꦭꦤ꧀ꦢꦶ꧉ |
KRONIEK Kabar Warni-warni. Pêthikan saking sêrat-sêrat kabar sanès. Pakêmpalan, Islamiyah ing Ngayogyakarta, sawatawis dintên malih badhe ambikak pamulangan H.I.S. partikêlir wontên ing dhusun Bawang, dhistrik Bandhul. Manggèn ing griyanipun kapala dhusun ngriku. Sakawit namung ambikak klas 1 lan 2, nanging sabên taun badhe dipun indhaki klasipun. Dèrèng dangu ing Bandhung kathah lare-lare sami ical. Ingkang sampun kalapurakên ing pulisi, 1 Janus, ing kampung Pledhang. Wagiman umur 10 taun, ing kampung Sanintên. Karna, umur 13 taun, ing kampung Prajurit. Mukhamad Tahir, umur 8 taun, ing kampung Sanintên tuwin Sahri, kintên-kintên umur 12 taun, ing kampung Cimênyan. Ing dintên Jumuwah kapêngkêr, wontên tiyang kathah ingkang kaangkatakên saking Batawi numpak sêpur dhatêng Surabaya, benjing tanggal 2 Sèptèmbêr kabidhalakên dhatêng Dhigul numpak kapal Sirius. Kawrataning paos para têtiyang ing Sumatra sisih kilèn sampun kapriksa rampung, pikantuking papriksan tumuntên badhe angaturakên ing parentah. Wontên wartos, bilih Tuwan H.A. Salim sapun[6] bidhal saking Mêkah dhatêng India. Kintên-kintên badhe kampir ing Bombai. Golongan P.S.I. sampun wiwit tatata[7] badhe ngurmati benjing dhatêngipun Tuwan Salim. Saking golonging rêmbagipun para pakêmpalan Islam Tuwan Salim badhe dipun aturi sêsorah ing bab lampahipun, tuwin bab anggènipun sowan Prabu Ibnu Saod, punapadene bab suwaking muktamar ing taun punika. Ing tanggal 19 Agustus landrad ing Brêbês andhawahakên karampungan dhatêng pasakitan Walkam, kaukum 15 taun, Yakim 12 taun, Muwit 10 taun, sami kalêpatan ngoyok ing griyanipun Kaji Ambari ing Yuwungragi. Wontên pasakitan 5 ingkang luwar. Ing kantor Jav.Bank ing Crêbon, pinanggih wontên arta f 8.900.- ingkang dipun slingkuhakên ing tiyang. Arta wau awarni arta krêtas ingkang badhe dipun sirnakakên, nanging dèrèng dipun cirèni. Kasir kêkalih ingkang kenging dakwa, sapunika dipun tahan. Saking panimbanging kumisi kolonisasi ing Kota Agung, bilih pamarentah marêngakên nyadhiyani wragad kangge yasa ilèn-ilèn toya tuwin ngudi kasarasan ing ngriku, kolonisasi wau badhe kalajêngakên. Dene prêlu tuwin botênipun kolonisasi wau kawiyarakên, dèrèng karêmbag. Winisudha dados residhèn ing Jambi Tuwan H.E.K. Ezerman, asistèn residhèn ingkang kabantokakên ing residhèn Palembang. Bab kadurjanan arta ing mobil pos ing Mêrbao, ing sapunika tuwan kontrolir ing Mêrbao sampun angsal katrangan malih manggih butamal arta f 5.500.- dipun pêndhêm ing siti, ugi wontên ing Mêrbao, dados dumugi sapunika, ingkang pinanggih sampun wontên f 18.000.-. Kasêbut ing bêslit guprêmèn, nêtêpakên wontên tiyang kuminis 33 ingkang kasingkirakên dhatêng Dhigul. Ingkang kathah asli saking Têrnate. Kawontênaning arta ingkang kangge mitulungi kasangsaran bêbaya angin agêng ing nagari Walandi, Sêmèrupon tampi arta darma f 13.892.71. Ingkang sampun dipun tampèni wontên f 91.544.45 dados sadaya wontên f 105.447.16. Aneta martosakên: samangke wontên ordhonansi enggal ingkang ngêwratakên paukumanipun para pangagêng ingkang sami misakit kalèrèhanipun, sanajan ta namung sapele. Kaangkat dados mudha pangarsa (ondervoorzitter) landrad ing Magêlang sarta Têmanggung: Radèn Suparta, ingkang suwau lid landrad. Kaangkat dados mudha pangarsa (ondervoorzitter) landrad ing Bangkalan (Madura): Radèn Sugiyana, lid landrad ing Rêmbang. Wontên pawartos, bilih ingkang wicaksana guprênur jendral, andhawuhakên waradin sarta dhawuh wau ugi badhe kapacak ing sêtatsêblat, kados ing ngandhap punika: Ingkang wicaksana asring mirêng pawartos sarta ugi anguningani saking rêmbag-rêmbag parêpatan pangrèh praja, bilih kathah sawênèhing amtênar ingkang kajibah nindakakên kawajiban piyambak, ingkang lajêng lêlayanan kalihan kawula botên kanthi sarêmbag kalihan priyantun pangrèh praja Eropah utawi pribumi rumiyin. Jalaran saking punika sarèhning pangrèh praja punika sampun tamtu langkung sumêrêp dhatêng kawontênaning bawahipun, mila lampahing padamêlan ingkang nilar pangrèh praja wau botên kenging dipun wastani sae, tuwin panggalih dalêm ingkang wicaksana, tindak ingkang makatên punika kajawi nama nyuda darajading pangrèh praja, ugi nama nêrak wawênanging liyan. Amila samangke paperanganing padamêlan nagari ingkang angsal dhawuh nindakakên papriksan piyambak, kêdah suka sumêrêp rumiyin dhatêng pangagênging paprentahan, kanthi katrangan benjing punapa anggènipun nindakakên papriksan, supados sagêd ambêkta liyan pangrèh praja pribumi. Tumrap ing tanah sabrang, sarèhning beda kalihan kawontênanipun ing ngriki, kêdah nêdha pitulung lumantar pangrèh praja băngsa Eropah, supados kinanthenan amtênar utawi pangagênging tiyang pribumi. Gêgayutan kalihan bab punika, kangjêng tuwan ingkang wicaksana ugi kêpengin paring pêpèngêt, manawi pranatan ingkang anjalari pangrèh praja kêdah tumut ngurusakên, botên kenging kalêbêtakên usul, utawi nyadhiyani pangagêng piyambak, sadèrèngipun pangagênging gêwès anglairakên suraosing manah tumrap pranatan wau. Parentah sampun anganggêp absah sarta ngidèni undhang-undhang damêlanipun rad kitha Majakêrta kangge nyuda wêwahan (Opcenten) paos nagari, inggih punika kasuda 20 dumugi 15 prêsèn. [Grafik] Para suradhadhu India ingkang sami wontên ing nagari Walandi, nalika pamitipun dhatêng para mitranipun băngsa Walandi. | ||
|
[ 621 ]FEUILLETON ꧋ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde. ꧇꧑꧖꧇ ꧋ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀ꦱꦁ Corneval꧇ꦥꦸꦤꦶꦏꦥꦼꦝꦁꦥꦢꦸꦏ꧈ꦱꦠꦿꦶꦪ꧈ꦏꦸꦭꦧꦼꦏ꧀ꦠꦑꦏꦼꦤ꧀ꦱꦏꦶꦁꦲꦶꦁꦏꦫꦠꦺꦴꦤ꧀꧉ ꧋ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦦꦿꦧꦸ Tristan꧇ꦱꦏꦭꦁꦏꦸꦁꦤꦸꦮꦸꦤ꧀꧈ꦒꦸꦫꦸ꧈ꦱꦥꦸꦤꦶꦏꦏꦸꦭꦧꦺꦴꦠꦼꦤ꧀ꦲꦗꦿꦶꦃꦝꦠꦼꦁꦱꦶꦤ꧀ꦠꦼꦤ꧀ꦏꦺꦩꦮꦺꦴꦤ꧀꧈ꦏꦗꦮꦶꦝꦠꦼꦁꦦꦔꦺꦫꦤ꧀ꦲꦶꦁꦏꦁꦩꦲꦮꦼꦭꦱ꧀ꦱꦂꦠꦩꦲꦲꦱꦶꦃ꧉ ꧋ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ Corneval꧇ꦝꦸꦃ꧈ꦱꦠꦿꦶꦪ꧈ꦲꦶꦁꦱꦔꦤ꧀ꦝꦥ꧀ꦥꦶꦁꦫꦱꦸꦏ꧀ꦏꦤ꧀ꦏꦮꦸꦭꦮꦺꦴꦤ꧀ꦠꦼꦤ꧀ꦫꦱꦸꦏ꧀ꦏꦤ꧀ꦤꦶꦥꦸꦤ꧀ꦏꦼꦫꦺ꧈ꦱꦸꦩꦺꦴꦁꦒꦱꦩ꧀ꦥꦺꦪꦤ꧀ꦲꦒꦼꦩ꧀ꦩꦤꦮꦶꦮꦺꦴꦤ꧀ꦠꦼꦤ꧀ꦥꦼꦂꦭꦸꦤꦶꦥꦸꦤ꧀꧉ ꧋ꦦꦿꦧꦸ Tristan ꦲꦩꦁꦱꦸꦭ꧀ꦭꦶ꧇ꦱꦩ꧀ꦥꦺꦪꦤ꧀ꦧꦼꦏ꧀ꦠꦩꦿꦶꦏꦶ꧈ꦒꦸꦫꦸ꧈ꦱꦥꦸꦤꦶꦏꦲꦸꦒꦶꦏꦸꦭꦧꦝꦺꦩꦶꦠꦸꦭꦸꦁꦔꦶ Isolde꧉ ꧋Corneval ꦮꦶꦕꦤ꧀ꦠꦼꦤ꧀ꦩꦭꦶꦃ꧇ꦎ꧈ꦱꦩ꧀ꦥꦸꦤ꧀ꦏꦱꦼꦱ꧈ꦱꦠꦿꦶꦪ꧈ꦱꦤꦗꦤ꧀ꦥꦢꦸꦏꦠꦤ꧀ꦱꦃꦫꦶꦤꦼꦏ꧀ꦱꦲꦶꦁꦦꦔꦺꦫꦤ꧀꧈ꦱꦂꦠꦏꦗꦸꦫꦸꦁꦔꦏꦼꦤ꧀ꦏꦁꦒꦺꦩꦊꦱ꧀ꦝꦠꦼꦁꦠꦶꦠꦶꦪꦁꦮꦲꦸ꧈ꦤꦔꦶꦁꦱꦥꦶꦤ꧀ꦠꦼꦤ꧀ꦏꦶꦪꦠ꧀ꦠꦶꦥꦸꦤ꧀ꦠꦶꦪꦁꦱꦠꦸꦁꦒꦭ꧀ꦩꦼꦁꦱꦃꦠꦶꦪꦁꦱꦩꦤ꧀ꦠꦼꦤ꧀ꦏꦛꦃꦲꦶꦥꦸꦤ꧀꧉ꦥꦢꦸꦏꦱꦲꦺꦱ꧀ꦠꦸꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦚꦼꦭꦏ꧀ꦏꦶꦥꦥꦤ꧀ꦥꦔꦺꦴꦧꦺꦴꦁꦔꦤ꧀ꦲꦶꦁꦏꦁꦢꦶꦥꦸꦤ꧀ꦗꦒꦶꦲꦶꦁꦠꦶꦪꦁꦏꦛꦃ꧈ꦲꦶꦁꦏꦁꦱꦩꦶꦲꦗꦿꦶꦃꦝꦠꦼꦁꦲꦶꦁꦯꦁꦦꦿꦧꦸ꧉ꦱꦤꦗꦤ꧀ꦏꦛꦃꦠꦶꦪꦁꦲꦶꦁꦏꦁꦏꦥꦺꦔꦶꦤ꧀ꦩꦶꦠꦸꦭꦸꦁꦔꦶꦝꦠꦼꦁꦱꦩ꧀ꦥꦺꦪꦤ꧀꧈ꦤꦔꦶꦁꦱꦢꦪꦮꦲꦸꦧꦝꦺꦲꦩꦽꦗꦪꦱꦩ꧀ꦥꦺꦪꦤ꧀꧈ꦥꦿꦩꦶꦭꦱꦲꦺꦢꦶꦥꦸꦤ꧀ꦲꦼꦤ꧀ꦠꦺꦴꦱ꧀ꦱꦶꦏꦺꦩꦮꦺꦴꦤ꧀ꦱꦮꦠꦮꦶꦱ꧀ꦢꦔꦸꦤꦶꦥꦸꦤ꧀꧉ꦱꦪꦏ꧀ꦠꦺꦴꦱ꧀ꦱꦶꦥꦸꦤ꧀ꦊꦉꦱ꧀ꦕꦫꦶꦪꦺꦴꦱ꧀ꦱꦶꦁꦠꦶꦪꦁꦩꦏꦠꦼꦤ꧀꧇ꦧꦺꦫꦶꦁꦏꦮꦤꦺꦤ꧀ꦲꦶꦁꦏꦁꦏꦶꦫꦁꦢꦸꦒꦶꦥꦿꦪꦺꦴꦒꦶꦥꦸꦤꦶꦏ꧈ꦢꦺꦤꦺꦮꦠꦏ꧀ꦏꦶꦁꦱꦠꦿꦶꦪꦲꦶꦁꦏꦁꦭꦶꦩ꧀ꦥꦢ꧀ꦲꦶꦁꦧꦸꦢꦶ꧉ ꧋ꦏꦕꦫꦶꦪꦺꦴꦱ꧀꧈ꦏꦭꦦꦿꦧꦸ Tristan ꦩ꧀ꦭꦸꦩ꧀ꦥꦠ꧀ꦱꦏꦶꦁꦲꦶꦁꦗꦤ꧀ꦝꦺꦭꦤ꧀ꦤꦶꦁꦒꦫꦺꦗꦮꦲꦸ꧈ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦠꦶꦪꦁꦩꦶꦱ꧀ꦏꦶꦤ꧀ꦲꦶꦁꦏꦁꦚꦸꦩꦼꦉꦥ꧀ꦥꦶꦝꦮꦃꦲꦶꦥꦸꦤ꧀ꦱꦲꦲꦁꦒꦺꦤ꧀ꦤꦶꦥꦸꦤ꧀ꦭꦸꦩꦗꦼꦁꦲꦚꦶꦁꦏꦶꦂꦫꦶꦧꦼꦧꦪ꧉ꦠꦶꦪꦁꦮꦲꦸꦲꦺꦁꦒꦭ꧀ꦝꦠꦼꦁꦲꦶꦁꦏꦶꦛꦒꦒꦚ꧀ꦕꦔꦤ꧀ꦱꦂꦠꦭꦗꦼꦁꦭꦸꦩꦼꦧꦼꦠ꧀ꦲꦶꦁꦏꦫꦠꦺꦴꦤ꧀ꦝꦼꦝꦼꦩꦶꦠ꧀ꦠꦤ꧀꧈ꦲꦩꦁꦒꦶꦃꦲꦶꦯꦁꦥꦸꦠꦿꦶ꧈ꦲꦠꦸꦂꦫꦶꦥꦸꦤ꧀꧇ꦯꦁꦦꦿꦩꦺꦱ꧀ꦮꦫꦶ꧈ꦩꦸꦒꦶꦱꦩ꧀ꦥꦸꦤ꧀ꦩꦸꦮꦸꦤ꧀ꦏꦺꦩꦮꦺꦴꦤ꧀꧈ꦩꦶꦠꦿꦥꦢꦸꦏꦱꦒꦼꦢ꧀ꦲꦔꦺꦴꦚ꧀ꦕꦠ꧀ꦠꦶꦧꦧꦪ꧉ ꧋ꦯꦁꦥꦸꦠꦿꦶꦲꦔꦤ꧀ꦢꦶꦏ꧇ꦱꦏꦭꦁꦏꦸꦁꦥꦤꦸꦮꦸꦤ꧀ꦏꦸꦭꦝꦠꦼꦁꦲꦶꦁꦦꦔꦺꦫꦤ꧀꧈ꦱꦤꦗꦤ꧀ꦏꦸꦭꦢꦶꦥꦸꦤ꧀ꦧꦺꦴꦤ꧀ꦢꦲꦸꦠꦮꦶꦢꦶꦥꦸꦤ꧀ꦲꦸꦕꦸꦭ꧀ꦭꦶꦧꦤ꧀ꦢꦤ꧀ꦏꦸꦭꦥꦸꦤꦶꦏ꧈ꦩꦏꦠꦼꦤ꧀ꦲꦸꦒꦶꦱꦤꦗꦤ꧀ꦏꦸꦭꦢꦶꦥꦸꦤ꧀ꦒꦼꦱꦔꦶꦲꦸꦠꦮꦶꦢꦶꦥꦸꦤ꧀ꦥꦼꦗꦃꦲꦶ꧈ꦱꦥꦸꦤꦶꦏꦠꦸꦩꦿꦥ꧀ꦥꦶꦁꦗꦱꦢ꧀ꦏꦸꦭꦱꦩꦶꦏꦺꦩꦮꦺꦴꦤ꧀꧉ꦱꦏꦶꦁꦱꦶꦁꦱꦼꦠ꧀ꦠꦶꦥꦸꦤ꧀ꦲꦁꦒꦺꦤ꧀ꦤꦶꦁꦲꦤꦁꦱꦸꦭ꧀ꦭꦶꦲꦱ꧀ꦠꦤꦶꦥꦸꦤ꧀ꦱꦁꦥꦸꦠꦿꦶ꧈ꦲꦱ꧀ꦠꦤꦶꦥꦸꦤ꧀ꦔꦤ꧀ꦠꦺꦴꦱ꧀ꦩꦼꦢꦭ꧀ꦫꦃꦲꦶꦥꦸꦤ꧀꧉ꦯꦁꦥꦸꦠꦿꦶꦔꦤ꧀ꦢꦶꦏꦱꦂꦮꦶꦩꦺꦱꦼꦩ꧀꧇ꦱꦲꦸꦥꦩꦶꦏꦸꦭꦤꦔꦶꦱ꧀ꦱꦩꦂꦒꦶꦤꦤ꧀ꦝꦁꦱꦏꦶꦠ꧀ꦥꦸꦤꦶꦏ꧈ꦱꦲꦺꦱ꧀ꦠꦸꦤꦶꦥꦸꦤ꧀ꦏꦸꦭꦏꦺꦔꦶꦁꦏꦮꦱ꧀ꦠꦤ꧀ꦤꦤ꧀ꦏꦶꦫꦁꦥꦤꦫꦶꦩꦃꦏꦸꦭꦝꦠꦼꦁꦲꦶꦁꦦꦔꦺꦫꦤ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦲꦥꦫꦶꦁꦏꦮꦼꦭꦱ꧀ꦱꦤ꧀ꦝꦠꦼꦁꦩꦶꦠꦿꦏꦸꦭꦮꦲꦸ꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦲꦔꦺꦴꦚ꧀ꦕꦠ꧀ꦠꦶꦧꦧꦪꦥꦼꦗꦃ꧉ ꧋ꦱꦉꦁꦯꦁꦦꦿꦧꦸ Marc ꦩꦶꦝꦔꦼꦠ꧀ꦮꦂꦠꦺꦴꦱ꧀ꦧꦶꦭꦶꦃꦦꦿꦧꦸ Tristan ꦱꦒꦼꦢ꧀ꦲꦸꦮꦭ꧀ꦱꦏꦶꦁꦠꦔꦤ꧀ꦤꦶꦁꦥꦫꦲꦧ꧀ꦢꦶꦲꦶꦁꦏꦁꦲꦔꦶꦫꦶꦢ꧀ꦱꦲꦲꦺꦴꦚ꧀ꦕꦠ꧀ꦱꦏꦶꦁꦧꦧꦪ꧈ꦱꦏꦭꦁꦏꦸꦁꦱꦔꦼꦠ꧀ꦢꦸꦏꦤꦶꦥꦸꦤ꧀꧈ꦤꦸꦤ꧀ꦠꦼꦤ꧀ꦝꦮꦸꦃ꧇ꦯꦁꦥꦸꦠꦿꦶꦏꦮꦼꦢꦭ꧀ꦤꦱꦏꦶꦁꦲꦶꦁꦏꦫꦠꦺꦴꦤ꧀꧉ꦯꦁꦥꦸꦠꦿꦶꦭꦗꦼꦁꦏꦧꦼꦏ꧀ꦠꦱꦺꦴꦮꦤ꧀ꦲꦶꦁꦔꦂꦱꦤꦶꦥꦸꦤ꧀ꦱꦁꦦꦿꦧꦸ꧈ꦢꦸꦩꦸꦒꦶꦲꦶꦁꦱꦔꦗꦼꦁꦔꦶꦁꦒꦿꦶꦪꦥꦥꦤ꧀ꦥꦊꦁꦒꦃꦲꦤ꧀ꦤꦶꦥꦸꦤ꧀ꦱꦁꦤꦠ꧈ꦯꦁꦥꦸꦠꦿꦶꦲꦔꦕꦸꦁꦔꦏꦼꦤ꧀ꦲꦱ꧀ꦠꦤꦶꦥꦸꦤ꧀ꦲꦶꦁꦏꦁꦩꦼꦢꦭ꧀ꦫꦃꦲꦶꦥꦸꦤ꧀ꦮꦲꦸ꧉ꦲꦶꦁꦩꦂꦒꦶꦏꦛꦃꦠꦶꦪꦁꦲꦶꦁꦏꦁꦲꦚ꧀ꦗꦼꦫꦶꦠ꧀ꦱꦱꦩ꧀ꦧꦠ꧀꧇ꦎ꧈ꦦꦔꦺꦫꦤ꧀꧈ꦩꦸꦒꦶꦲꦥꦫꦶꦁꦔꦥꦶꦮꦼꦭꦱ꧀ꦝꦠꦼꦁꦯꦁꦥꦸꦠꦿꦶ꧈ꦝꦸꦃ꧈ꦥꦸꦠꦿꦶ Isolde꧈ꦫꦠꦸꦲꦶꦁꦏꦁꦏꦩꦸꦭꦾꦑꦏꦼꦤ꧀ꦲꦶꦁꦔꦏꦛꦃ꧉ꦱꦲꦺꦱ꧀ꦠꦸꦤꦶꦥꦸꦤ꧀ꦠꦶꦠꦶꦪꦁꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀꧈ꦲꦶꦁꦏꦁꦲꦚ꧀ꦗꦭꦂꦫꦶꦥꦢꦸꦏꦝꦸꦩꦮꦃꦲꦶꦁꦥꦔꦸꦮꦱꦤꦶꦁꦥꦔꦢꦶꦭ꧀ꦭꦤ꧀ꦥꦸꦤꦶꦏ꧈ꦧꦝꦺꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦱꦶꦱꦃꦲꦤ꧀ꦲꦒꦼꦁ꧉ꦩꦸꦒꦶꦩꦸꦒꦶꦠꦶꦠꦶꦪꦁꦮꦲꦸꦱꦩꦶꦥꦶꦏꦤ꧀ꦠꦸꦏ꧀ꦏꦧꦼꦧꦼꦤ꧀ꦢꦸꦤꦶꦁꦦꦔꦺꦫꦤ꧀꧉ꦯꦁꦥꦸꦠꦿꦶꦭꦗꦼꦁꦏꦧꦼꦏ꧀ꦠꦝꦠꦼꦁꦲꦶꦁꦱꦕꦼꦭꦏ꧀ꦏꦶꦁꦥꦔꦺꦴꦧꦺꦴꦁꦔꦤ꧀꧉ꦏꦭꦱꦩꦤ꧀ꦠꦼꦤ꧀ꦧꦫꦺꦴꦤ꧀ Dinas ꦲꦶꦁ Lidan ꦤꦸꦤ꧀ꦠꦼꦤ꧀ꦲꦔꦿꦸꦁꦏꦼꦧ꧀ꦧꦶꦱꦩ꧀ꦥꦺꦪꦤ꧀ꦤꦶꦥꦸꦤ꧀ꦱꦁꦦꦿꦧꦸ꧈ꦲꦠꦸꦂꦫꦶꦥꦸꦤ꧀꧇ꦓꦸꦱ꧀ꦠꦶ꧈ꦩꦸꦒꦶꦥꦢꦸꦏꦏꦂꦱꦲꦩꦶꦝꦔꦼꦠ꧀ꦠꦏꦼꦤ꧀ꦲꦠꦸꦂꦏꦮꦸꦭ꧉ꦱꦩ꧀ꦥꦸꦤ꧀ꦭꦩꦶꦲꦁꦒꦺꦤ꧀ꦏꦮꦸꦭꦱꦸꦮꦶꦠꦮꦺꦴꦤ꧀ꦠꦼꦤ꧀ꦔꦂꦱꦥꦢꦸꦏ꧈ꦢꦢꦺꦴꦱ꧀ꦩꦤ꧀ꦠꦿꦶꦥꦔꦗꦼꦁꦔꦶꦁꦏꦫꦠꦺꦴꦤ꧀ꦏꦭꦪꦤ꧀ꦱꦼꦠꦾꦤꦶꦁꦩꦤꦃ꧈ꦠꦼꦩꦼꦤ꧀ꦱꦂꦠꦧꦺꦴꦠꦼꦤ꧀ꦲꦔꦗꦼꦁꦲꦗꦼꦁꦏꦲꦸꦤ꧀ꦠꦸꦁꦔꦤ꧀꧉ꦩꦶꦤꦺꦴꦁꦏꦒꦚ꧀ꦗꦂꦫꦤ꧀ꦥꦢꦸꦏꦝꦠꦼꦁꦏꦮꦸꦭ꧈ꦩꦸꦒꦶꦥꦢꦸꦏꦏꦂꦱꦲꦩꦫꦶꦁꦥꦔꦥꦸꦤ꧀ꦠꦼꦤ꧀ꦝꦠꦼꦁꦯꦁꦥꦸꦠꦿꦶ꧉ꦥꦢꦸꦏꦧꦝꦺꦲꦩ꧀ꦧꦼꦱ꧀ꦩꦶꦯꦁꦥꦸꦠꦿꦶ꧈ꦧꦺꦴꦠꦼꦤ꧀ꦔꦁꦒꦺꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦔꦢꦶꦭ꧀ꦭꦤ꧀ꦤꦶꦁꦥꦔꦺꦫꦤ꧀꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦏꦶꦫꦁꦲꦢꦶꦭ꧀ꦱꦔꦼꦠ꧀꧈ꦩꦂꦒꦶꦯꦁꦥꦸꦠꦿꦶꦧꦺꦴꦠꦼꦤ꧀ꦔꦏꦼꦤ꧀ꦤꦶꦝꦠꦼꦁꦥꦤ꧀ꦢꦏ꧀ꦮꦥꦢꦸꦏ꧉ꦏꦗꦮꦶꦥꦸꦤꦶꦏꦥꦢꦸꦏꦩꦸꦒꦶꦏꦂꦱꦲꦔꦺꦔꦼꦠ꧀ꦠꦶꦧꦶꦭꦶꦃ Tristan ꦱꦩ꧀ꦥꦸꦤ꧀ꦲꦺꦴꦚ꧀ꦕꦠ꧀ꦱꦏꦶꦁꦥꦔꦸꦮꦱꦥꦢꦸꦏ꧈ꦱꦂꦠꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶ Cornwallis ꦔꦿꦶꦏꦶꦗꦗꦃꦱꦔꦼꦠ꧀꧈ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦸꦩꦼꦉꦥ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦱꦢꦪꦲꦫꦲꦫ꧈ꦮꦤꦮꦤ꧈ꦭꦺꦥꦺꦤ꧀ꦭꦺꦥꦺꦤ꧀꧈ꦠꦸꦮꦶꦤ꧀ꦱꦢꦪꦩꦂꦒꦶꦩꦂꦒꦶꦲꦶꦁꦥꦉꦢꦺꦤ꧀꧈ꦮꦼꦮꦃꦮꦼꦮꦃꦧꦺꦂꦲꦶꦁꦏꦮꦤꦺꦤ꧀꧉ꦱꦲꦸꦥꦩꦶꦯꦁꦥꦸꦠꦿꦶꦱꦲꦺꦱ꧀ꦠꦸꦢꦶꦥꦸꦤ꧀ꦧꦼꦱ꧀ꦩꦶ꧈ꦤꦒꦫꦶ Cornwallis ꦱꦲꦺꦱ꧀ꦠꦸꦢꦢꦺꦴꦱ꧀ꦮꦼꦫꦶꦠ꧀ꦱꦔꦼꦠ꧀꧈ꦥꦫꦧꦫꦺꦴꦤ꧀ꦠꦸꦮꦶꦤ꧀ꦏꦭꦺꦫꦺꦃꦲꦤ꧀ꦥꦢꦸꦏꦱꦢꦪꦧꦝꦺꦧꦺꦴꦠꦼꦤ꧀ꦱꦒꦼꦢ꧀ꦠꦼꦤ꧀ꦠꦽꦩ꧀ꦒꦼꦱꦁꦔꦶꦥꦸꦤ꧀꧈ꦲꦮꦶꦠ꧀ꦱꦤꦗꦤ꧀ Tristan ꦧꦺꦴꦠꦼꦤ꧀ꦧꦝꦺꦩꦊꦱ꧀ꦲꦮꦺꦴꦤ꧀ꦝꦠꦼꦁꦥꦢꦸꦏ꧈ꦠꦼꦩ꧀ꦠꦸꦧꦝꦺꦩꦊꦱ꧀ꦩꦼꦗꦃꦲꦶꦝꦠꦼꦁꦱꦢꦪꦠꦶꦪꦁꦲꦶꦁꦏꦁꦥꦶꦤꦁꦒꦶꦃꦲꦶꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦲꦶꦁꦏꦁꦏꦲꦁꦒꦼꦥ꧀ꦢꦢꦺꦴꦱ꧀ꦱꦠꦿꦸꦤꦶꦥꦸꦤ꧀꧉ ꧋ꦩꦶꦉꦁꦲꦠꦸꦂꦫꦶꦥꦸꦤ꧀ꦧꦫꦺꦴꦤ꧀ Dinas ꦲꦶꦁ Lidan ꦩꦏꦠꦼꦤ꧀ꦥꦸꦤꦶꦏ꧈ꦧꦫꦺꦴꦤ꧀ꦱꦏꦮꦤ꧀ꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦮꦲꦸꦱꦩꦶꦥꦸꦕꦼꦠ꧀꧈ꦲꦩꦂꦒꦶꦫꦸꦩꦲꦺꦴꦱ꧀ꦒꦶꦫꦶꦱ꧀ꦩꦤꦃꦲꦶꦥꦸꦤ꧀꧈ꦥꦔꦿꦲꦺꦴꦱ꧀ꦱꦶꦥꦸꦤ꧀ Tristan ꦱꦩ꧀ꦥꦸꦤ꧀ꦠꦤ꧀ꦱꦃꦔꦸꦭꦠ꧀ꦲꦸꦭꦠ꧀ꦠꦏꦼꦤ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀꧉ ꧋ꦧꦫꦺꦴꦤ꧀ Dinas ꦩꦠꦸꦂꦩꦭꦶꦃ꧇ꦓꦸꦱ꧀ꦠꦶ꧈ꦱꦭꦩꦶꦤꦶꦥꦸꦤ꧀ꦏꦮꦸꦭꦱꦸꦮꦶꦠꦲꦶꦁꦔꦂꦱꦥꦢꦸꦏꦠꦤ꧀ꦱꦃꦱꦼꦠꦾꦱꦲꦠꦼꦩꦼꦤ꧀꧈ꦩꦶꦭꦩꦸꦒꦶꦏꦂꦱꦲꦲꦩꦫꦶꦁꦔꦏꦼꦤ꧀ꦱꦁꦥꦸꦠꦿꦶꦝꦠꦼꦁꦏꦮꦸꦭ꧈ꦏꦮꦸꦭꦱꦒꦃꦲꦚ꧀ꦗꦒ꧀ꦒꦶ꧈ꦱꦲꦱꦒꦃꦤꦁꦒꦼꦭ꧀ꦏꦱꦲꦺꦤꦤ꧀ꦤꦶꦥꦸꦤ꧀꧉ꦤꦔꦶꦁꦯꦁꦤꦠꦧꦺꦴꦠꦼꦤ꧀ꦏꦂꦱꦲꦤ꧀ꦝꦲꦂꦲꦠꦸꦂꦫꦶꦥꦸꦤ꧀ꦧꦫꦺꦴꦤ꧀ Dinas ꦮꦲꦸ꧉ꦭꦗꦼꦁꦲꦔꦱ꧀ꦠꦲꦱ꧀ꦠꦤꦶꦥꦸꦤ꧀ꦧꦫꦺꦴꦤ꧀ Dinas ꦱꦂꦮꦶꦥꦿꦱꦼꦠꦾꦧꦶꦭꦶꦃꦯꦁꦥꦸꦠꦿꦶꦧꦝꦺꦲꦺꦁꦒꦭ꧀ꦏꦥꦠꦿꦥ꧀ꦥꦤ꧀ꦥꦲꦸꦏꦸꦩ꧀ꦩꦤ꧀꧉ [ 622 ]꧋ꦧꦫꦺꦴꦤ꧀ Dinas ꦤꦸꦤ꧀ꦠꦼꦤ꧀ꦩꦠꦸꦂꦩꦭꦶꦃ꧇ꦯꦁꦦꦿꦧꦸ꧈ꦩꦤꦮꦶꦩꦏꦠꦼꦤ꧀ꦏꦮꦸꦭꦧꦝꦺꦮꦁꦱꦸꦭ꧀ꦝꦠꦼꦁꦲꦶꦁ Lidan꧈ꦱꦲꦏꦮꦸꦭꦧꦺꦴꦠꦼꦤ꧀ꦱꦒꦃꦢꦢꦺꦴꦱ꧀ꦩꦤ꧀ꦠꦿꦶꦥꦔꦗꦼꦁꦲꦶꦁꦏꦫꦠꦺꦴꦤ꧀꧉ꦯꦁꦥꦸꦠꦿꦶꦩꦺꦱꦼꦩ꧀ꦲꦩꦿꦶꦏ꧀ꦱꦤ꧀ꦤꦶꦧꦫꦺꦴꦤ꧀ Dinas ꦱꦂꦮꦶꦤꦭꦺꦴꦁꦱ꧉ꦧꦫꦺꦴꦤ꧀ Dinas ꦤꦸꦤ꧀ꦠꦼꦤ꧀ꦤꦸꦩ꧀ꦥꦏ꧀ꦏꦶꦏꦥꦭ꧀ꦭꦶꦥꦸꦤ꧀꧈ꦏꦱꦤ꧀ꦢꦼꦂꦫꦏꦼꦤ꧀ꦮꦁꦱꦸꦭ꧀ꦝꦠꦼꦁꦲꦶꦁ Lidan ꦏꦭꦪꦤ꧀ꦱꦸꦱꦃꦲꦶꦁꦩꦤꦃ꧉ ꧋ꦏꦕꦫꦶꦪꦺꦴꦱ꧀꧈ꦯꦁꦥꦸꦠꦿꦶꦔꦢꦼꦒ꧀ꦲꦶꦁꦱꦕꦼꦭꦏ꧀ꦏꦶꦁꦥꦔꦺꦴꦧꦺꦴꦁꦔꦤ꧀꧈ꦥꦫꦠꦶꦠꦶꦪꦁꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦥꦸꦤ꧀ꦱꦁꦥꦸꦠꦿꦶꦱꦢꦪꦱꦩꦶꦚꦸꦥꦠꦤ꧀ꦤꦶꦯꦁꦤꦠꦠꦸꦮꦶꦤ꧀ꦠꦶꦠꦶꦪꦁꦲꦶꦁꦏꦁꦱꦩꦶꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦮꦲꦸ꧉ꦯꦁꦥꦸꦠꦿꦶꦠꦤ꧀ꦱꦃꦩꦸꦮꦸꦤ꧀꧈ꦮꦱ꧀ꦥꦤꦶꦥꦸꦤ꧀ꦢꦭꦺꦮꦺꦂꦫꦤ꧀꧈ꦲꦤꦼꦊꦱ꧀ꦱꦶꦥꦔꦫꦱ꧀ꦱꦤ꧀ꦤꦶꦥꦸꦤ꧀꧉ꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦥꦸꦤ꧀ꦏꦭꦺꦠ꧀꧈ꦮꦂꦤꦶꦤꦶꦥꦸꦤ꧀ꦏ꧀ꦭꦮꦸ꧈ꦱꦶꦤꦸꦭꦩ꧀ꦲꦶꦁꦧꦼꦤꦁꦲꦼꦩꦱ꧀꧉ꦫꦺꦩꦤꦶꦥꦸꦤ꧀ꦥꦚ꧀ꦗꦁꦔꦤ꧀ꦠꦺꦴꦱ꧀ꦢꦸꦩꦸꦒꦶꦲꦶꦁꦱꦔꦤ꧀ꦝꦥ꧀ꦗꦼꦁꦏꦸ꧈ꦢꦶꦥꦸꦤ꧀ꦏꦭꦧꦁ꧉ꦱꦶꦤ꧀ꦠꦼꦤ꧀ꦠꦶꦪꦔꦶꦥꦸꦤ꧀ꦲꦶꦁꦏꦁꦧꦺꦴꦠꦼꦤ꧀ꦮꦼꦭꦱ꧀ꦤꦶꦔꦭ꧀ꦭꦶꦯꦁꦥꦸꦠꦿꦶꦲꦶꦁꦏꦁꦱꦏꦭꦁꦏꦸꦁꦲꦺꦤ꧀ꦢꦃꦲꦶꦁꦮꦂꦤꦶꦥꦸꦤꦶꦏꦱꦲꦺꦱ꧀ꦠꦸꦠꦶꦪꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀꧉ꦲꦱ꧀ꦠꦤꦶꦥꦸꦤ꧀ꦏꦭꦶꦃꦥꦶꦱꦤ꧀ꦧꦶꦤꦺꦴꦤ꧀ꦢꦱꦶꦁꦱꦼꦠ꧀ꦱꦔꦼꦠ꧀꧉ ꧋ꦏꦭꦱꦩꦤ꧀ꦠꦼꦤ꧀ꦭꦗꦼꦁꦮꦺꦴꦤ꧀ꦠꦼꦤ꧀ꦏꦺꦫꦺꦱꦠꦸꦱ꧀ꦲꦚꦼꦭꦏ꧀ꦏꦶꦥꦥꦤ꧀ꦥꦔꦺꦴꦧꦺꦴꦁꦔꦤ꧀꧈ꦱꦂꦠꦱꦺꦴꦮꦤ꧀ꦲꦶꦁꦔꦂꦱꦤꦶꦥꦸꦤ꧀ꦱꦁꦦꦿꦧꦸ꧉ꦏꦺꦫꦺꦏꦺꦫꦺꦮꦲꦸꦱꦩꦶꦒꦝꦃꦱ꧀ꦱ꧀ꦱꦏꦶꦠ꧀ꦭꦺꦥꦿꦃ꧈ꦧꦢꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦮꦼꦠꦃ꧈ꦠꦸꦂꦱꦩꦶꦠꦼꦏꦼꦤ꧀ꦤꦤ꧀ꦱꦢꦪ꧈ꦩꦂꦒꦶꦱꦸꦏꦸꦤꦶꦥꦸꦤ꧀ꦱꦩꦶꦥꦶꦚ꧀ꦕꦁ꧉ꦥꦔꦗꦼꦁꦔꦶꦁꦏꦺꦫꦺꦤꦩ Yvain ꦩꦠꦸꦂꦝꦠꦼꦁꦯꦁꦦꦿꦧꦸ꧇ꦓꦸꦱ꧀ꦠꦶ꧈ꦥꦢꦸꦏꦏꦂꦱꦲꦩ꧀ꦧꦼꦱ꧀ꦩꦶꦯꦁꦦꦿꦩꦺꦱ꧀ꦮꦫꦶ꧈ꦥꦸꦤꦶꦏꦱꦪꦏ꧀ꦠꦺꦴꦱ꧀ꦱꦶꦥꦸꦤ꧀ꦲꦸꦏꦸꦩ꧀ꦩꦤ꧀ꦲꦶꦁꦏꦁꦲꦮꦿꦠ꧀ꦱꦔꦼꦠ꧀꧈ꦤꦔꦶꦁꦠꦸꦩꦚ꧀ꦗꦤ꧀ꦤꦶꦥꦸꦤ꧀ꦤꦩꦸꦁꦱꦏꦼꦝꦥ꧀꧉ꦱꦩꦺꦴꦁꦱꦭꦠꦸꦤꦶꦁꦥꦔꦺꦴꦧꦺꦴꦁꦔꦤ꧀ꦥꦼꦗꦃꦯꦁꦥꦸꦠꦿꦶꦲꦶꦁꦒꦶꦃꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦔꦿꦲꦺꦴꦱ꧀ꦱꦏꦼꦤ꧀ꦱꦏꦶꦠ꧀ꦩꦭꦶꦃ꧉ꦏꦮꦸꦭꦱꦸꦩꦼꦉꦥ꧀ꦲꦸꦏꦸꦩ꧀ꦩꦤ꧀ꦲꦶꦁꦏꦁꦭꦁꦏꦸꦁꦲꦮꦿꦠ꧀ꦠꦶꦤꦶꦩ꧀ꦧꦁꦭꦤ꧀ꦲꦸꦏꦸꦩ꧀ꦩꦤ꧀ꦢꦶꦥꦸꦤ꧀ꦧꦼꦱ꧀ꦩꦶ꧉ꦯꦁꦥꦸꦠꦿꦶꦧꦺꦴꦠꦼꦤ꧀ꦧꦝꦺꦲꦁꦒꦭ꧀ꦱꦺꦢ꧈ꦤꦔꦶꦁꦧꦝꦺꦲꦤꦤ꧀ꦝꦁꦱꦁꦱꦫꦲꦶꦁꦱꦭꦩꦶꦤꦶꦥꦸꦤ꧀꧈ꦠꦸꦂꦱꦧꦼꦤ꧀ꦢꦶꦤ꧀ꦠꦼꦤ꧀ꦧꦝꦺꦔꦗꦼꦁꦲꦗꦼꦁꦥꦼꦗꦃ꧉ ꧋ꦯꦁꦦꦿꦧꦸꦔꦤ꧀ꦢꦶꦏ꧇ Isolde ꦧꦏꦭ꧀ꦲꦶꦁꦱꦸꦤ꧀ꦲꦸꦫꦶꦥ꧀ꦥꦶ꧈ꦤꦔꦶꦁꦲꦸꦫꦶꦥ꧀ꦥꦺꦏꦸꦢꦸꦱꦁꦱꦫꦧꦔꦼꦠ꧀ꦔꦤ꧀ꦠꦶꦲꦔꦸꦁꦏꦸꦭ꧀ꦭꦶꦥꦠꦶ꧉ꦱꦶꦁꦱꦥꦧꦶꦱꦚꦼꦧꦸꦠ꧀ꦲꦸꦏꦸꦩ꧀ꦩꦤ꧀ꦏꦁꦏꦪꦩꦁꦏꦺꦴꦤꦺꦴꦲꦶꦏꦸ꧈ꦲꦶꦁꦱꦸꦤ꧀ꦠꦫꦶꦩꦧꦔꦼꦠ꧀꧉ ꧋Yvain ꦭꦗꦼꦁꦩꦠꦸꦂ꧇ꦓꦸꦱ꧀ꦠꦶ꧈ꦩꦸꦒꦶꦏꦲꦸꦤꦶꦁꦔꦤ꧈ꦫꦺꦚ꧀ꦕꦁꦏꦮꦸꦭꦱꦢꦪꦮꦺꦴꦤ꧀ꦠꦼꦤ꧀ꦱꦠꦸꦱ꧀꧈ꦧꦶꦭꦶꦃꦥꦢꦸꦏꦏꦂꦱꦲꦩꦫꦶꦁꦔꦏꦼꦤ꧀ꦱꦁꦥꦸꦠꦿꦶꦝꦠꦼꦁꦏꦮꦸꦭꦱꦢꦪ꧈ꦧꦝꦺꦱꦩꦶꦏꦮꦸꦭꦏꦁꦒꦺꦱꦺꦩꦃ꧉ꦱꦪꦏ꧀ꦠꦺꦴꦱ꧀ꦱꦶꦥꦸꦤ꧀ꦲꦸꦏꦸꦩ꧀ꦩꦤ꧀ꦥꦸꦤꦶꦏꦲꦔ꧀ꦭꦁꦏꦸꦁꦔꦶꦲꦸꦏꦸꦩ꧀ꦩꦤ꧀ꦥꦼꦗꦃ꧉ꦓꦸꦱ꧀ꦠꦶ꧈ꦩꦸꦒꦶꦥꦢꦸꦏꦏꦂꦱꦲꦩꦫꦶꦏ꧀ꦱꦤ꧀ꦤꦶꦩꦩꦭꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦧꦢꦤ꧀ꦏꦮꦸꦭꦱꦢꦪ꧈ꦠꦸꦮꦶꦤ꧀ꦥꦔꦁꦒꦺꦒꦺꦴꦩ꧀ꦧꦭ꧀ꦲꦶꦁꦏꦁꦤꦺꦩ꧀ꦥ꧀ꦭꦺꦏ꧀ꦲꦶꦁꦩꦩꦭꦥꦸꦤꦶꦏ꧈ꦒꦤ꧀ꦢꦤꦶꦥꦸꦤ꧀ꦧꦺꦴꦠꦼꦤ꧀ꦲꦩꦿꦶꦏ꧀ꦮꦔꦶ꧉ꦯꦁꦥꦸꦠꦿꦶꦲꦶꦁꦏꦁꦱꦩ꧀ꦥꦸꦤ꧀ꦏꦸꦭꦶꦤꦢꦢꦺꦴꦱ꧀ꦦꦿꦩꦺꦱ꧀ꦮꦫꦶꦤꦶꦁꦤꦠ꧈ꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦥꦸꦤ꧀ꦱꦂꦮꦱꦲꦺ꧈ꦱꦂꦠꦲꦔꦽꦁꦒꦤ꧀ꦤꦶꦏꦫꦠꦺꦴꦤ꧀ꦲꦶꦁꦏꦁꦲꦺꦤ꧀ꦢꦃꦱꦔꦼꦠ꧀ꦥꦸꦤꦶꦏ꧈ꦩꦤꦮꦶꦭꦗꦼꦁꦩꦁꦒꦺꦤ꧀ꦲꦶꦁꦏꦫꦠꦺꦴꦤꦶꦁꦏꦺꦫꦺ꧈ꦱꦂꦠꦏꦼꦩ꧀ꦥꦭ꧀ꦏꦭꦶꦪꦤ꧀ꦏꦮꦸꦭꦱꦢꦪ꧈ꦱꦧꦼꦤ꧀ꦢꦶꦤ꧀ꦠꦼꦤ꧀ꦱꦲꦺꦱ꧀ꦠꦸꦧꦝꦺꦠꦤ꧀ꦱꦃꦲꦺꦔꦼꦠ꧀ꦝꦠꦼꦁꦥꦥꦤ꧀ꦥꦔꦺꦴꦧꦺꦴꦁꦔꦤ꧀ꦥꦸꦤꦶꦏ꧉ ꧋ꦱꦉꦁꦯꦁꦤꦠꦩꦶꦝꦔꦼꦠ꧀ꦲꦠꦸꦂꦫꦶꦥꦸꦤ꧀ Yvain ꦩꦏꦠꦼꦤ꧀ꦮꦲꦸ꧈ꦭꦗꦼꦁꦗꦸꦩꦼꦤꦼꦁꦱꦏꦶꦁꦥꦥꦤ꧀ꦥꦊꦁꦒꦃꦲꦤ꧀ꦤꦶꦥꦸꦤ꧀꧈ꦤꦔꦶꦁꦢꦔꦸꦏꦺꦤ꧀ꦢꦼꦭ꧀ꦏꦺꦩꦮꦺꦴꦤ꧀꧈ꦮꦸꦱꦤꦭꦗꦼꦁꦠꦼꦝꦏ꧀ꦩꦉꦥꦼꦏ꧀ꦏꦶꦯꦁꦦꦿꦩꦺꦱ꧀ꦮꦫꦶꦱꦂꦠꦲꦔꦱ꧀ꦠꦲꦱ꧀ꦠꦤꦶꦥꦸꦤ꧀꧉ꦯꦁꦥꦸꦠꦿꦶꦲꦚ꧀ꦗꦼꦫꦶꦠ꧀꧇ꦞꦸꦃ꧈ꦯꦁꦤꦠ꧈ꦩꦸꦒꦶꦏꦂꦱꦥꦫꦶꦁꦏꦮꦼꦭꦱ꧀ꦱꦤ꧀ꦝꦠꦼꦁꦗꦱꦠ꧀ꦏꦮꦸꦭ꧉ꦠꦶꦤꦶꦩ꧀ꦧꦁꦏꦥꦫꦶꦁꦔꦏꦼꦤ꧀ꦝꦠꦼꦁꦏꦺꦫꦺꦏꦺꦫꦺꦥꦸꦤꦶꦏꦭꦁꦏꦸꦁꦱꦲꦺꦏꦮꦸꦭꦥꦼꦗꦃꦮꦺꦴꦤ꧀ꦠꦼꦤ꧀ꦲꦶꦁꦥꦔꦺꦴꦧꦺꦴꦁꦔꦤ꧀꧉ ꦤꦔꦶꦁꦯꦁꦤꦠꦧꦺꦴꦠꦼꦤ꧀ꦏꦂꦱꦩꦶꦝꦔꦼꦠ꧀ꦠꦏꦼꦤ꧀ꦱꦱꦩ꧀ꦧꦠ꧀ꦠꦶꦥꦸꦤ꧀ꦱꦁꦥꦸꦠꦿꦶ꧈ꦯꦁꦥꦸꦠꦿꦶꦭꦗꦼꦁꦏꦥꦫꦶꦁꦔꦏꦼꦤ꧀ꦝꦠꦼꦁꦏꦺꦫꦺꦏꦺꦫꦺꦥꦸꦤꦶꦏ꧉ꦏꦺꦫꦺꦏꦺꦫꦺꦮꦲꦸꦱꦢꦪꦲꦶꦁꦒꦶꦃꦤꦸꦤ꧀ꦠꦼꦤ꧀ꦱꦩꦶꦚꦼꦭꦏ꧀ꦏꦶꦯꦁꦥꦸꦠꦿꦶꦏꦤ꧀ꦛꦶꦧꦶꦔꦃꦲꦶꦁꦩꦤꦃ꧉ꦱꦢꦪꦠꦶꦪꦁꦲꦶꦁꦏꦁꦤꦶꦔꦭ꧀ꦭꦶꦱꦩꦶꦮꦼꦭꦱ꧀ꦝꦠꦼꦁꦱꦁꦥꦸꦠꦿꦶ꧉ꦤꦔꦶꦁ Yvain ꦧꦶꦔꦃꦲꦶꦥꦸꦤ꧀ꦠꦤ꧀ꦥꦲꦸꦥꦩꦶ꧈ꦢꦺꦤꦺꦩꦁꦒꦶꦃꦏꦧꦼꦒ꧀ꦗꦤ꧀ꦱꦩꦤ꧀ꦠꦼꦤ꧀ꦲꦒꦼꦁꦔꦶꦥꦸꦤ꧀꧉ꦯꦁꦥꦸꦠꦿꦶꦭꦗꦼꦁꦏꦲꦶꦫꦶꦢ꧀ꦏꦺꦱꦃ꧈ꦏꦲꦶꦫꦶꦁꦔꦏꦼꦤ꧀ꦲꦶꦁꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦭꦩ꧀ꦥꦃꦲꦶꦥꦸꦤ꧀ꦢꦸꦩꦸꦒꦶꦲꦶꦁꦱꦗꦮꦶꦤꦶꦁꦏꦶꦛ꧈ꦩꦼꦢꦭ꧀ꦲꦶꦁꦩꦂꦒꦶꦲꦶꦁꦏꦁꦔ꧀ꦭꦁꦏꦸꦁꦔꦶꦒꦫꦸꦩ꧀ꦧꦸꦭ꧀ꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦱꦶꦱꦶꦔꦶꦢ꧀ꦢꦤ꧀ꦦꦿꦧꦸ Tristan ꦮꦲꦸ꧉ꦯꦁ Corneval ꦭꦗꦼꦁꦮꦶꦕꦤ꧀ꦠꦼꦤ꧀ꦱꦼꦫꦸ꧇ꦲꦁꦒꦺꦂ꧈ꦥꦸꦤꦶꦏꦩꦶꦠꦿꦱꦩ꧀ꦥꦺꦪꦤ꧀ꦝꦠꦼꦁ꧈ꦏꦲꦶꦫꦶꦢ꧀ꦲꦶꦁꦏꦺꦫꦺꦏꦺꦫꦺꦲꦶꦁꦏꦁꦏꦠꦫꦶꦩ꧀ꦩꦤ꧀ꦱꦁꦥꦸꦠꦿꦶꦢꦺꦤꦶꦁꦯꦁꦤꦠ꧉ꦦꦿꦧꦸ Tristan ꦭꦗꦼꦁꦤꦶꦠꦶꦃꦲꦶꦠꦶꦠꦶꦃꦲꦤ꧀ꦤꦶꦥꦸꦤ꧀꧈ꦩꦼꦢꦭ꧀ꦱꦏꦶꦁꦲꦶꦁꦒꦫꦸꦩ꧀ꦧꦸꦭ꧀꧈ꦩꦉꦥꦼꦏ꧀ꦏꦶ Yvain ꦱꦏꦚ꧀ꦕꦤꦶꦥꦸꦤ꧀ꦮꦲꦸ꧉ꦥꦔꦤ꧀ꦢꦶꦏꦤꦶꦥꦸꦤ꧀꧇ꦲꦸꦮꦶꦱ꧀ꦱꦸꦮꦺꦲꦁꦒꦺꦴꦤ꧀ꦤꦶꦫꦔꦼꦠꦸꦠ꧀ꦠꦏꦺꦯꦁꦥꦸꦠꦿꦶ꧈ꦩꦤꦮꦱꦶꦫꦏꦼꦥꦺꦔꦶꦤ꧀ꦲꦸꦫꦶꦥ꧀꧈ꦯꦁꦥꦸꦠꦿꦶꦲꦺꦁꦒꦭ꧀ꦲꦸꦕꦸꦭ꧀ꦤ꧉ Yvain ꦤꦼꦥ꧀ꦱꦸꦱꦔꦼꦠ꧀꧈ꦭꦗꦼꦁꦲꦔꦗꦏ꧀ꦏꦚ꧀ꦕꦤꦶꦥꦸꦤ꧀ꦲꦔꦿꦸꦧꦸꦠ꧀ꦦꦿꦧꦸꦤꦼꦥ꧀ꦱꦸꦱꦔꦼꦠ꧀꧈ꦭꦗꦼꦁꦲꦔꦗꦏ꧀ꦏꦚ꧀ꦕꦤꦶꦥꦸꦤ꧀ꦲꦔꦿꦸꦧꦸꦠ꧀ꦦꦿꦧꦸꦸ Tristan꧉ꦏꦕꦫꦶꦪꦺꦴꦱ꧀ꦦꦿꦧꦸ Tristan ꦧꦺꦴꦠꦼꦤ꧀ꦩꦼꦤ꧀ꦠꦭꦲꦩꦽꦗꦪꦏꦺꦫꦺꦏꦺꦫꦺꦮꦲꦸꦱꦫꦤꦥꦼꦝꦁꦔꦶꦥꦸꦤ꧀꧉ꦱꦮꦼꦤꦺꦃꦲꦶꦁꦏꦲꦺꦴꦭ꧀ꦲꦚꦫꦶꦪꦺꦴꦱ꧀ꦱꦏꦼꦤ꧀ꦧꦶꦭꦶꦃ Yvain ꦥꦶꦤꦼꦗꦃꦲꦤ꧀ꦢꦺꦤꦶꦁꦦꦿꦧꦸ Tristan꧈ꦤꦔꦶꦁꦱꦪꦼꦏ꧀ꦠꦺꦴꦱ꧀ꦱꦶꦥꦸꦤ꧀ꦲꦶꦁꦏꦁꦩꦼꦗꦃꦲꦶ Yvain ꦮꦲꦸ Corneval ꦲꦶꦁꦒꦶꦃꦥꦸꦤꦶꦏꦢꦶꦥꦸꦤ꧀ꦲꦼꦧꦿꦸꦏ꧀ꦏꦶꦏꦗꦼꦁꦲꦒꦼꦁ꧈ꦲꦼꦤ꧀ꦝꦱ꧀ꦱꦶꦥꦸꦤ꧀ꦔꦤ꧀ꦠꦺꦴꦱ꧀ꦉꦩꦸꦏ꧀꧉ꦯꦁꦥꦸꦠꦿꦶꦭꦗꦼꦁꦢꦶꦥꦸꦤ꧀ꦲꦸꦕꦸꦭ꧀ꦭꦶꦧꦧꦤ꧀ꦢꦤ꧀ꦤꦶꦥꦸꦤ꧀꧈ꦱꦂꦠꦏꦧꦼꦏ꧀ꦠꦏꦺꦱꦃꦢꦺꦤꦶꦁꦦꦿꦧꦸ Tristan ꦲꦤꦶꦭꦂꦲꦫꦲꦫꦔꦿꦶꦏꦸꦭꦸꦩꦼꦧꦼꦠ꧀ꦮꦤꦲꦒꦼꦁꦲꦶꦁ Morois ꦏꦝꦺꦫꦺꦑꦏꦼꦤ꧀ꦢꦺꦤꦶꦁꦯꦁ Corneval꧉ꦮꦶꦮꦶꦠ꧀ꦏꦭꦱꦩꦤ꧀ꦠꦼꦤ꧀ꦥꦫꦭꦸꦲꦸꦂꦲꦶꦁꦏꦁꦠꦤ꧀ꦱꦃꦱꦶꦃꦱꦶꦤꦶꦱꦶꦃꦲꦤ꧀ꦥꦸꦤꦶꦏꦧꦺꦴꦠꦼꦤ꧀ꦔꦿꦲꦺꦴꦱ꧀ꦱꦏꦼꦤ꧀ꦩꦭꦶꦃꦏꦱꦸꦱꦃꦲꦤ꧀ꦠꦸꦮꦶꦤ꧀ꦱꦏꦶꦠ꧀ꦠꦶꦁꦱꦫꦶꦫꦤ꧀ꦤꦶꦥꦸꦤ꧀꧉ꦲꦶꦁꦮꦚ꧀ꦕꦶꦱꦼꦫꦥ꧀ꦱꦸꦂꦪꦭꦩ꧀ꦥꦃꦲꦶꦥꦸꦤ꧀ꦥꦿꦶꦪꦤ꧀ꦠꦸꦤ꧀ꦠꦶꦠꦶꦒꦮꦲꦸꦱꦩ꧀ꦥꦸꦤ꧀ꦔꦚ꧀ꦕꦶꦏ꧀ꦲꦶꦁꦱꦸꦏꦸꦤꦶꦁꦉꦢꦶ꧈ꦤꦸꦤ꧀ꦠꦼꦤ꧀ꦱꦩꦶꦊꦉꦥ꧀ꦲꦶꦁꦔꦿꦶꦏꦸ꧉ꦱꦏꦶꦁꦱꦔꦼꦠ꧀ꦠꦶꦁꦱꦪꦃꦲꦶꦥꦸꦤ꧀꧈ꦯꦁꦥꦸꦠꦿꦶꦲꦺꦁꦒꦭ꧀ꦱꦫꦺ꧉ ꧋ꦲꦺꦚ꧀ꦗꦶꦁꦔꦶꦥꦸꦤ꧀ Corneval ꦚꦺꦴꦭꦺꦴꦁꦗꦼꦩ꧀ꦥꦂꦫꦶꦁꦲꦶꦁꦒꦿꦶꦪꦤꦶꦥꦸꦤ꧀ꦥꦸꦁꦒꦮꦲꦶꦁꦏꦁꦲꦚ꧀ꦗꦒꦶꦮꦤꦏꦲꦠꦸꦂꦫꦏꦼꦤ꧀ꦝꦠꦼꦁꦦꦿꦧꦸ Tristan ꦒꦤ꧀ꦝꦺꦮꦤꦶꦥꦸꦤ꧀ꦏꦶꦪꦠ꧀꧈ꦥꦤꦃꦲꦶꦥꦸꦤ꧀ꦏꦭꦶꦃ꧉ꦦꦿꦧꦸ Tristan ꦭꦗꦼꦁꦲꦚ꧀ꦗꦼꦩ꧀ꦥꦂꦫꦶꦁꦏꦶꦢꦁꦗꦊꦂ꧈ Corneval ꦲꦢꦢꦺꦴꦱ꧀ꦭꦠꦸꦏꦁꦒꦺꦔꦿꦠꦼꦁꦔꦶꦢꦒꦶꦁꦔꦶꦁꦏꦶꦢꦁꦮꦲꦸ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦱꦩꦶꦤꦼꦝ꧈ꦤꦸꦤ꧀ꦠꦼꦤ꧀ꦱꦩꦶꦢꦩꦼꦭ꧀ꦧꦸꦧꦸꦒ꧀ꦲꦭꦶꦠ꧀ꦢꦶꦥꦸꦤ꧀ꦥꦪꦺꦴꦤ꧀ꦤꦶꦫꦺꦴꦤꦿꦺꦴꦤꦤ꧀꧉ꦩꦏꦠꦼꦤ꧀ꦩꦸꦭꦧꦸꦏꦤꦶꦥꦸꦤ꧀ꦥꦿꦶꦪꦤ꧀ꦠꦸꦤ꧀ꦠꦶꦠꦶꦒꦮꦲꦸꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦊꦧꦼꦠ꧀ꦠꦶꦁꦮꦤꦲꦒꦼꦁ꧈ꦱꦂꦠꦤꦤ꧀ꦝꦁꦏꦏꦶꦫꦁꦔꦤ꧀꧉ꦤꦔꦶꦁꦊꦱ꧀ꦠꦤ꧀ꦠꦸꦤ꧀ꦲꦁꦒꦺꦤ꧀ꦤꦶꦁꦱꦩꦶꦱꦶꦃꦱꦶꦤꦶꦱꦶꦃꦲꦤ꧀꧉ ꧋(ꦧꦝꦺꦏꦱꦩ꧀ꦧꦼꦠ꧀ꦠꦤ꧀) |
FEUILLETON Lêlampahanipun Prabu Tristan lan Putri Isolde[besut]16 Wangsulanipun Sang Corneval: Punika pêdhang paduka, satriya, kula bêktakakên saking ing karaton. Pangandikanipun Prabu Tristan: Sakalangkung nuwun, guru, sapunika kula botên ajrih dhatêng sintên kemawon, kajawi dhatêng Pangeran Ingkang Maha Wêlas sarta Maha Asih. Wicantênipun Corneval: Dhuh, satriya, ing sangandhaping rasukan kawula wontên rasukanipun kêre, sumăngga sampeyan agêm manawi wontên pêrlunipun. Prabu Tristan amangsuli: Sampeyan bêkta mriki, guru, sapunika ugi kula badhe mitulungi Isolde. Corneval wicantên malih: O, sampun kasêsa, satriya, sanajan paduka tansah rinêksa ing Pangeran, sarta kajurungakên kangge malês dhatêng têtiyang wau, nanging sapintên kiyatipun tiyang satunggal mêngsah tiyang samantên kathahipun. Paduka saèstu botên badhe sagêd nyêlaki papan pangobongan ingkang dipun jagi ing tiyang kathah, ingkang sami ajrih dhatêng ing sang prabu. Sanajan kathah tiyang ingkang kapengin mitulungi dhatêng sampeyan, nanging sadaya wau badhe amrêjaya sampeyan, pramila sae dipun êntosi kemawon sawatawis dangunipun. Sayaktosipun lêrês cariyosing tiyang makatên: Bèring kawanèn ingkang kirang dugi prayogi punika, dene wataking satriya ingkang limpad ing budi. Kacariyos, kala Prabu Tristan mlumpat saking ing jandhelaning gareja wau, wontên satunggiling tiyang miskin ingkang nyumêrêpi dhawahipun saha anggènipun lumajêng anyingkiri bêbaya. Tiyang wau enggal dhatêng ing kitha gêgancangan sarta lajêng lumêbêt ing karaton dhêdhêmitan, amanggihi sang putri, aturipun: Sang pramèswari, mugi sampun muwun kemawon, mitra paduka sagêd angoncati bêbaya. Sang putri angandika: Sakalangkung panuwun kula dhatêng ing Pangeran, sanajan kula dipun bănda utawi dipun uculi bandan kula punika, makatên ugi sanajan kula dipun gêsangi utawi dipun pêjahi, sapunika tumraping jasad kula sami kemawon. Saking singsêtipun anggèning anangsuli astanipun sang putri, astanipun ngantos mêdal rahipun. Sang putri ngandika sarwi mèsêm: Saupami kula nangis samargi nandhang sakit punika, saèstunipun kula kenging kawastanan kirang panarimah kula dhatêng ing Pangeran saking anggènipun sampun aparing kawêlasan dhatêng mitra kula wau, ngantos sagêd angoncati bêbaya pêjah. Sarêng Sang Prabu Marc midhangêt wartos bilih Prabu Tristan sagêd uwal saking tanganing para abdi ingkang angirid saha oncat saking bêbaya, sakalangkung sangêt dukanipun, nuntên dhawuh: Sang putri kawêdalna saking ing karaton. Sang putri lajêng kabêkta sowan ing ngarsanipun sang prabu, dumugi ing sangajênging griya papan palênggahanipun sang nata, sang putri angacungakên astanipun ingkang mêdal rahipun wau. Ing margi kathah tiyang ingkang anjêrit sêsakit: O, Pangeran, mugi aparinga piwêlas dhatêng sang putri, dhuh, Putri Isolde, ratu ingkang kamulyakakên ing ngakathah. Saèstunipun têtiyang ingkang awon manahipun, ingkang anjalari paduka dhumawah ing panguwasaning pangadilan punika, badhe ngawontênakên kasisahan agêng. Mugi-mugi têtiyang wau sami pikantuka bêbênduning Pangeran. Sang putri lajêng kabêkta dhatêng ing sacêlaking pangobongan. Kala samantên Baron Dinas ing Lidan nuntên angrungkêbi sampeyanipun sang prabu, aturipun: Gusti, mugi paduka karsa amidhangêtakên atur kawula. Sampun lami anggèn kawula suwita wontên ngarsa paduka, dados mantri pangajênging karaton kalayan sêtyaning manah, têmên sarta botên angajêng-ajêng kauntungan. Minăngka ganjaran paduka dhatêng kawula, mugi paduka karsa amaring pangapuntên dhatêng sang putri. Paduka badhe ambêsmi sang putri, botên ngangge ngawontênakên pangadilaning Pangeran. Ingkang makatên punika kirang adil sangêt, margi sang putri botên ngakêni dhatêng pandakwa paduka. Kajawi punika paduka mugi karsa angèngêti bilih Tristan sampun oncat saking panguwasa paduka, sarta wontên ing nagari Cornwallis ngriki jajah sangêt, piyambakipun sumêrêp kawontênaning sadaya ara-ara, wana-wana, lèpèn-lèpèn, tuwin sadaya margi-margi ing parêdèn, wêwah-wêwah bèr ing kawanèn. Saupami sang putri saèstu dipun bêsmi, nagari Cornwallis saèstu dados wêrit sangêt, para baron tuwin kalerehan paduka sadaya badhe botên sagêd têntrêm gêsangipun, awit sanajan Tristan botên badhe malês awon dhatêng paduka, têmtu badhe malês mêjahi dhatêng sadaya tiyang ingkang pinanggih ing piyambakipun ingkang kaanggêp dados satrunipun. Mirêng aturipun Baron Dinas ing Lidan makatên punika, baron sakawan ingkang awon manahipun wau sami pucêt, amargi rumaos giris manahipun, pangraosipun Tristan sampun tansah ngulat-ulatakên piyambakipun. Baron Dinas matur malih: Gusti, salaminipun kawula suwita ing ngarsa paduka tansah sêtya saha têmên, mila mugi karsaa amaringakên sang putri dhatêng kawula, kawula sagah anjagi, saha sagah nanggêl kasaenanipun. Nanging sang nata botên karsa andhahar aturipun Baron Dinas wau. Lajêng angasta astanipun Baron Dinas sarwi prasêtya bilih sang putri badhe enggal kapatrapan paukuman. Baron Dinas nuntên matur malih: Sang prabu, manawi makatên kawula badhe wangsul dhatêng ing Lidan, saha kawula botên sagah dados mantri pangajêng ing karaton. Sang putri mèsêm amriksani Baron Dinas sarwi nalăngsa. Baron Dinas nuntên numpaki kapalipun, kasandêrakên wangsul dhatêng ing Lidan kalayan susahing manah. Kacariyos, sang putri ngadêg ing sacêlaking pangobongan, para têtiyang ingkang wontên ing sacêlakipun sang putri sadaya sami nyupatani sang nata tuwin têtiyang ingkang sami awon manahipun wau. Sang putri tansah muwun, waspanipun daleweran, anêlêsi pangarasanipun. Agêm-agêmanipun kalèt, warninipun klawu, sinulam ing bênang êmas. Remanipun panjang ngantos dumugi ing sangandhap jêngku, dipun kalabang. Sintên tiyangipun ingkang botên wêlas ningali sang putri ingkang sakalangkung endah ing warni punika saèstu tiyang awon manahipun. Astanipun kalih pisan binănda singsêt sangêt. Kala samantên lajêng wontên kere satus anyêlaki papan pangobongan, sarta sowan ing ngarsanipun sang prabu. Kere-kere wau sami gadhah sêsakit leprah, badanipun botên wontên ingkang wêtah, tur sami têkênan sadaya, margi sukunipun sami pincang. Pangajênging kere nama Yvain matur dhatêng sang prabu: Gusti, paduka karsa ambêsmi sang pramèswari, punika sayaktosipun ukuman ingkang awrat sangêt, nanging tumanjanipun namung sakêdhap. Samăngsa latuning pangobongan pêjah sang putri inggih sampun botên ngraosakên sakit malih. Kawula sumêrêp ukuman ingkang langkung awrat tinimbang lan ukuman dipun bêsmi. Sang putri botên badhe anggal[8] seda, nanging badhe anandhang sangsara ing salaminipun, tur sabên dintên badhe ngajêng-ajêng pêjah. Sang prabu ngandika: Isolde bakal ingsun uripi, nanging uripe kudu sangsara bangêt nganti angungkuli pati. Sing sapa bisa nyêbut ukuman kang kaya mangkono iku, ingsun tarima bangêt. Yvain lajêng matur: Gusti, mugi kauningana, rencang kawula sadaya wontên satus, bilih paduka karsa amaringakên sang putri dhatêng kawula sadaya, badhe sami kawula kangge semah. Sayaktosipun ukuman punika anglangkungi ukuman pêjah. Gusti, mugi paduka karsa amariksani mêmala ingkang wontên ing badan kawula sadaya, tuwin pangangge gombal ingkang nèmplèk ing mêmala punika, gandanipun botên amrik wangi. Sang putri ingkang sampun kulina dados pramèswarining nata, agêm-agêmanipun sarwa sae, sarta angrênggani karaton ingkang endah sangêt punika, manawi lajêng manggèn ing karatoning kere, sarta kêmpal kalihan kawula sadaya, sabên dintên saèstu badhe tansah èngêt dhatêng papan pangobongan punika. Sarêng sang nata midhangêt aturipun Yvain makatên wau, lajêng jumênêng saking papan palênggahanipun, nanging dangu kèndêl kemawon, wusana lajêng têdhak marêpêki sang pramèswari sarta angasta astanipun. Sang putri anjêrit: Dhuh, sang nata, mugi karsa paring kawêlasan dhatêng jasat kawula. Tinimbang kaparingakên dhatêng kere-kere punika langkung sae kawula pêjah wontên ing pangobongan. Nanging sang nata botên karsa midhangêtakên sêsambatipun sang putri, sang putri lajêng kaparingakên dhatêng kere-kere punika. Kere-kere wau sadaya inggih nuntên sami nyêlaki sang putri kanthi bingahing manah. Sadaya tiyang ingkang ningali sami wêlas dhatêng sang putri. Nanging Yvain bingahipun tanpa upami, dene manggih kabêgjan samantên agêngipun. Sang putri lajêng kairid kesah, kairingakên ing kănca-kancanipun. Botên antawis dangu lampahipun dumugi ing sajawining kitha, mêdal ing margi ingkang nglangkungi garumbul panggenanipun sêsingidan Prabu Tristan wau. Sang Corneval lajêng wicantên sêru: Anggèr, punika mitra sampeyan dhatêng, kairid ing kere-kere ingkang katariman sang putri dening sang nata. Prabu Tristan lajêng nitihi titihanipun, mêdal saking ing garumbul, marêpêki Yvain sakancanipun wau. Pangandikanipun: Uwis suwe anggonira ngêtutake sang putri, manawa sira kêpengin urip, sang putri enggal uculna. Yvain nêpsu sangêt, lajêng angajak kancanipun angrubut Prabu Tristan. Kacariyos Prabu Tristan botên mêntala amrêjaya kere-kere wau sarana pêdhangipun. Sawênèhing kaol anyariyosakên bilih Yvain pinêjahan dening Prabu Tristan, nanging sayêktosipun ingkang mêjahi Yvain wau Corneval inggih punika dipun êbruki kajêng agêng, êndhasipun ngantos rêmuk. Sang putri lajêng dipun uculi bêbandanipun, sarta kabêkta kesah dening Prabu Tristan anilar ara-ara ngriku lumêbêt wana agêng ing Morois kadhèrèkakên dening Sang Corneval. Wiwit kala samantên para luhur ingkang tansah sih-sinisihan punika botên ngraosakên malih kasusahan tuwin sakiting sariranipun. Ing wanci sêrap surya lampahipun priyantun têtiga wau sampun ngancik ing sukuning rêdi, nuntên sami lêrêp ing ngriku. Saking sangêting sayahipun, sang putri enggal sare. Enjingipun Corneval nyolong jêmparing ing griyanipun punggawa ingkang anjagi wana kaaturakên dhatêng Prabu Tristan gandhewanipun kiyat, panahipun kalih. Prabu Tristan lajêng anjêmparing kidang jalêr, Corneval adados latu kangge ngratêngi daginging kidang wau. Sasampunipun sami nêdha, nuntên sami damêl bubug[9] alit dipun payoni ron-ronan. Makatên mula bukanipun priyantun têtiga wau manggèn wontên ing salêbêting wana agêng, sarta nandhang kakirangan. Nanging lêstantun anggèning sami sih-sinisihan. (Badhe kasambêtan) |
}}
{{#ifeq:1927|1927|