Ăngka 21, 24 Dulkangidah Taun Wawu 1857, 26 Mèi 1927, Taun II.

Sêrat Minggon

Kajawèn

Bale Pustaka=Wèltêvrèdhên.

[ Cover ]

꧋ꦎꦁꦏ 21꧈ ꧒꧔꧇ ꦢꦸꦭ꧀ꦏꦔꦶꦢꦃꦠꦲꦸꦤ꧀ꦮꦮꦸ꧇ ꧑꧘꧕꧗꧇꧈ 26 ꦩꦺꦲꦶ 1927꧈ ꦠꦲꦸꦤ꧀ II.

ꦏꦗꦮꦺꦤ꧀꧈

ꦏꦮꦼꦢꦭ꧀ꦭꦏꦼꦤ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦼꦩꦶꦱ꧀

꧋ꦉꦒꦶꦤꦶꦁꦱꦼꦫꦠ꧀ꦏꦧꦂꦥꦸꦤꦶꦏꦲꦶꦁꦢꦊꦩ꧀ꦠꦶꦒꦁꦮꦸꦭꦤ꧀ f. 150

ꦧꦪꦫꦤꦶꦥꦸꦤ꧀ꦏꦱꦸꦮꦸꦤ꧀ꦫꦸꦩꦶꦪꦶꦤ꧀꧈ꦧꦺꦴꦠꦼꦤ꧀ꦏꦺꦔꦶꦁꦭꦁꦒꦤꦤ꧀ꦏꦶꦫꦁꦱꦏꦶꦁ 3 ꦮꦸꦭꦤ꧀꧉

꧋ꦗꦸꦫꦸꦔꦫꦁꦲꦢ꧀ꦩꦶꦤꦶꦱ꧀ꦠꦿꦱꦶ ꦧꦭꦺꦥꦸꦱ꧀ꦠꦏ꧈ꦲꦶꦁꦱꦮꦶꦁꦏꦶꦔꦶꦁꦏꦤ꧀ꦠꦺꦴꦂꦥꦭꦶꦱ꧀꧈

ꦠꦶꦭ꧀ꦥꦸꦤ꧀ꦤꦺꦴꦩꦼꦂ 2791 ꦮꦺꦭ꧀ꦠꦼꦦ꦳ꦿꦺꦝꦼꦤ꧀꧉

꧋ꦠꦶꦠꦶꦔꦭ꧀ꦭꦤ꧀ꦲꦶꦁꦏꦤ꧀ꦱꦏꦭꦁꦏꦸꦔꦱꦿꦶ꧉

Ăngka 21, 24 Dulkangidah Taun Wawu 1857, 26 Mèi 1927, Taun II.

Kawêdalakên Sabên Dintên Kêmis.

Rêgining sêrat kabar punika ing dalêm tigang wulan ... f 1.50, bayaranipun kasuwun rumiyin, botên kenging langganan kirang saking 3 wulan.

Juru ngarang - administrasi Bale Pustaka, ing sawingkinging kantor palis, tilpon nomêr 2791 - Wèltêprèdhên.

Têtingalan ingkang sakalangkung asri

[Grafik]

Wawasan ing Aèr Putri, Ambon, inggih punika pasiraman ingkang nêngsêmakên, botên anèh bilih ing jaman kina papan ingkang kados makatên wau dados pasiramaning para widadari.

[ 322 ]

P.A.A. Kusumayuda,
Gedelegeerde saha 1e
Plaatsvervangend Voorzitter,

Mr. A. Neytzell de Wilde,
Voorzitter Volksraad,

T.H. de Hoog,
Gedelegeerde saha 2e.
Plaatsvervangend Voorzitter,

C.H.M.H. Kiès,
Gedelegeerde,

J.A. Monod de
Froideville,

Abdoel Firman
gelar Maharaja
Soangkupon,

G.J. van Lonkhuyzen,

R.A.A. Ahmad Jayadiningrat, Gedelegeerde,	R.P. Surasa,	R.M.A.A. Kusumahutaya, Gedelegeerde.
	Pangeran Muhammad Ali,

[ 323 ]

꧋ꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦥꦉꦥꦠ꧀ꦠꦤ꧀ꦥꦺꦴꦊꦏ꧀ꦱꦿꦢ꧀꧈

꧋ꦲꦶꦁꦏꦗꦮꦺꦤ꧀ꦲꦁꦏ꧇꧒꧐꧇ꦲꦶꦁꦧꦒꦶꦪꦤ꧀ꦏꦧꦂꦮꦂꦤꦶꦮꦂꦤꦶꦱꦩ꧀ꦥꦸꦤ꧀ꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦭꦢꦶꦤ꧀ꦠꦼꦤ꧀ꦱꦼꦤꦺꦤ꧀ꦠꦁꦒꦭ꧀꧇꧑꧖꧇ꦩꦺꦲꦶꦥꦸꦤꦶꦏ꧈ꦥꦉꦥꦠ꧀ꦠꦤ꧀ꦥꦺꦴꦊꦏ꧀ꦱꦿꦢ꧀ꦲꦺꦁꦒꦭ꧀ꦏꦧꦶꦏꦏ꧀ꦏꦤ꧀ꦛꦶꦲꦸꦥꦕꦫ꧉ꦩꦸꦫꦶꦃꦲꦢꦩꦼꦭ꧀ꦱꦼꦤꦼꦁꦔꦶꦁꦥꦁꦒꦭꦶꦃꦲꦶꦥꦸꦤ꧀ꦥꦫꦩꦲꦺꦴꦱ꧀ꦱꦢꦪ꧈ꦲꦶꦁꦔꦿꦶꦏꦶꦲꦩꦕꦏ꧀ꦒꦩ꧀ꦧꦂꦫꦶꦥꦸꦤ꧀ꦥꦫꦭꦶꦢ꧀ꦭꦶꦢ꧀ꦢꦶꦁꦥꦺꦴꦊꦏ꧀ꦱꦿꦢ꧀ꦲꦼꦁꦒꦭ꧀ꦥꦸꦤꦶꦏ꧉ꦏꦗꦮꦶꦥꦸꦤꦶꦏꦲꦶꦁꦏꦗꦮꦺꦤ꧀ꦲꦶꦁꦏꦁꦏꦥꦼꦁꦏꦼꦂꦱꦩ꧀ꦥꦸꦤ꧀ꦲꦗꦔꦔꦿꦮꦠ꧀ꦱꦼꦱꦺꦴꦫꦃꦢꦊꦩ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀ꦏꦭꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦥꦉꦥꦠ꧀ꦠꦤ꧀ꦥꦺꦴꦊꦏ꧀ꦱꦿꦢ꧀꧉ꦲꦶꦁꦱꦫꦺꦃꦤꦶꦁꦥꦸꦤꦶꦏꦏꦢꦺꦴꦱ꧀ꦥꦽꦭꦸꦏꦱꦸꦩꦼꦉꦥ꧀ꦥꦤ꧀ꦲꦶꦁꦔꦏꦛꦃ꧈ꦲꦩꦶꦭꦲꦶꦁꦔꦤ꧀ꦝꦥ꧀ꦥꦸꦤꦶꦏꦥꦽꦭꦸꦲꦔꦼꦮꦿꦠ꧀ꦱꦼꦱꦺꦴꦫꦃꦢꦊꦩ꧀ꦮꦲꦸ꧈ꦤꦔꦶꦁꦏꦤ꧀ꦛꦶꦏꦕꦼꦏꦏ꧀ꦏꦼꦩꦮꦺꦴꦤ꧀꧉

꧋ꦝꦮꦸꦃꦢꦊꦩ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀꧈ꦱꦏ꧀ꦭꦁꦏꦸꦁꦉꦤꦥꦁꦒꦭꦶꦃꦢꦊꦩ꧀꧈ꦢꦼꦤꦼꦱꦒꦼꦢ꧀ꦲꦚ꧀ꦗꦼꦤꦼꦁꦔꦶꦏꦭꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦥꦉꦥ꧀ꦥꦠꦤ꧀ꦥꦺꦴꦊꦏ꧀ꦱꦿꦢ꧀ꦲꦺꦁꦒꦭ꧀ꦥꦸꦤꦶꦏ꧉ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦭꦸꦁꦮꦸꦭꦤ꧀ꦲꦶꦁꦏꦁꦏꦥꦼꦁꦏꦼꦂ꧈ꦏꦭꦲꦶꦁꦏꦁꦮꦶꦕꦏ꧀ꦱꦤꦲꦤꦩ꧀ꦥꦶꦥꦔꦸꦮꦱꦤꦒꦫꦶ꧈ꦱꦩ꧀ꦥꦸꦤ꧀ꦥꦫꦶꦁꦝꦮꦸꦃꦥꦔꦤ꧀ꦢꦶꦏꦮꦺꦴꦤ꧀ꦠꦼꦤ꧀ꦲꦶꦁꦱꦔꦗꦼꦁꦔꦶꦁꦥꦉꦥ꧀ꦥꦠꦤ꧀ꦥꦺꦴꦊꦏ꧀ꦱꦿꦢ꧀ꦲꦸꦒꦶ꧈ꦲꦔꦗꦼꦁꦲꦗꦼꦁꦏꦤ꧀ꦛꦶꦱꦔꦼꦠ꧀꧈ꦩꦸꦒꦶꦩꦸꦒꦶꦥꦩꦉꦤ꧀ꦠꦃꦭꦤ꧀ꦥꦺꦴꦊꦏ꧀ꦱꦿꦢ꧀ꦱꦩꦶꦪꦥꦶꦠꦢꦺꦴꦱ꧀ꦥꦶꦤꦶꦠꦢꦺꦴꦱ꧀꧈ꦭꦤ꧀ꦱꦩꦶꦪꦱꦒꦼꦢ꧀ꦲꦚꦩ꧀ꦧꦸꦢ꧀ꦢꦩꦼꦭ꧀ꦱꦼꦱꦉꦔꦤ꧀꧈ꦩꦸꦫꦶꦃꦱꦒꦼꦢ꧀ꦢꦶꦥꦸꦤ꧀ꦲꦚ꧀ꦗꦒꦶꦠꦠꦠꦼꦤ꧀ꦠꦽꦩꦶꦥꦸꦤ꧀ꦤꦒꦫꦶꦱꦲꦶꦱꦶꦤꦶꦥꦸꦤ꧀꧉ꦏꦤ꧀ꦛꦶꦉꦤꦤꦶꦁꦥꦁꦒꦭꦶꦃꦢꦊꦩ꧀꧈ꦱꦩꦁꦏꦼꦲꦶꦁꦏꦁꦮꦶꦕꦏ꧀ꦱꦤꦱꦒꦼꦢ꧀ꦔꦤ꧀ꦢꦶꦏꦏ꧀ꦏꦏꦼꦤ꧀꧈ꦧꦶꦭꦶꦃꦥꦔꦗꦼꦁꦲꦗꦼꦁꦢꦊꦩ꧀ꦮꦲꦸꦠꦼꦠꦼꦭꦮꦺꦴꦤ꧀ꦠꦼꦤ꧀ꦢꦩꦼꦭ꧀ꦭꦶꦥꦸꦤ꧀꧉ꦱꦼꦱꦿꦮꦸꦔꦤ꧀ꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤꦏꦭꦶꦲꦤ꧀ꦥꦫꦠꦸꦮꦤ꧀ꦠꦸꦮꦤ꧀ꦲꦶꦁꦧꦧ꧀ꦥꦸꦤꦥꦏꦼꦩꦮꦺꦴꦤ꧀ꦠꦤ꧀ꦱꦃꦱꦲꦼ꧉ꦥꦸꦤꦥꦩꦭꦶꦃꦏꦭꦲꦶꦁꦱꦊꦧꦼꦠ꧀ꦠꦶꦁꦧꦼꦧꦪ꧈ꦥꦩ꧀ꦧꦤ꧀ꦠꦸꦱꦲꦏꦥꦶꦠꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦝꦠꦼꦁꦲꦶꦁꦏꦁꦮꦶꦕꦏ꧀ꦱꦤꦥꦸꦤꦶꦏꦕꦼꦛꦱꦪꦼꦏ꧀ꦠꦺꦴꦱ꧀꧉ꦲꦶꦁꦏꦁꦥꦸꦤꦶꦏꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀ꦲꦤ꧀ꦝꦮꦸꦃꦲꦏꦼꦤ꧀ꦒꦼꦁꦔꦶꦁꦥꦤꦫꦶꦩꦃꦲꦶꦥꦸꦤ꧀꧉

꧋ꦩꦼꦁꦒꦃꦠꦸꦩꦿꦥ꧀ꦥꦺꦴꦊꦏ꧀ꦱꦿꦢ꧀꧈ꦲꦶꦁꦏꦁꦮꦶꦕꦏ꧀ꦱꦤꦥꦫꦶꦁꦝꦮꦸꦃꦥꦔꦤ꧀ꦢꦶꦏ꧈ꦧꦶꦭꦶꦃꦱꦩꦁꦏꦼꦱꦢꦪꦱꦂꦮꦲꦺꦁꦒꦭ꧀꧈ꦭꦶꦢ꧀ꦢꦶꦥꦸꦤ꧀ꦮꦼꦮꦃꦏꦛꦃ꧈ꦥꦿꦤꦠꦤꦶꦥꦸꦤ꧀ꦲꦺꦁꦒꦭ꧀꧈ꦩꦏꦠꦼꦤ꧀ꦲꦸꦒꦶꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦲꦸꦒꦶꦲꦺꦁꦒꦭ꧀꧉ꦢꦢꦺꦴꦱ꧀ꦠꦤꦃꦆꦤ꧀ꦢꦶꦪꦥꦸꦤꦶꦏꦲꦶꦁꦔꦼꦧꦾꦸꦏ꧀ꦲꦶꦁꦗꦩꦤ꧀ꦥꦥꦽꦤ꧀ꦠꦃꦲꦤ꧀ꦲꦺꦁꦒꦭ꧀꧉ꦱꦭꦗꦼꦁꦔꦶꦥꦸꦤ꧀ꦲꦶꦁꦏꦁꦮꦶꦕꦏ꧀ꦱꦤꦭꦗꦼꦁꦲꦥꦫꦶꦁꦮꦶꦭꦸꦗꦼꦁꦝꦠꦼꦁꦥꦫꦭꦶꦢ꧀ꦭꦶꦢ꧀ꦥꦺꦴꦊꦏ꧀ꦱꦿꦢ꧀꧉ꦝꦮꦸꦃꦥꦔꦤ꧀ꦢꦶꦏꦤꦶꦥꦸꦤ꧀꧈ꦧꦶꦭꦶꦃꦥꦺꦴꦊꦏ꧀ꦱꦿꦢ꧀ꦱꦩꦁꦏꦼꦥꦸꦤꦶꦏꦧꦺꦴꦠꦼꦤ꧀ꦮꦼꦮꦃꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀꧈ꦲꦤꦔꦶꦁꦮꦼꦮꦃꦠꦼꦠꦁꦒꦼꦭ꧀ꦭꦤ꧀ꦤꦶꦥꦸꦤ꧀꧉ꦗꦭꦫꦤ꧀ꦱꦏꦶꦁꦥꦸꦤꦶꦏꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦥꦫꦭꦶꦢ꧀ꦭꦶꦢ꧀ꦲꦶꦁꦒꦶꦃꦭꦗꦼꦁꦮꦼꦮꦃꦲꦮꦿꦠ꧀꧈ꦲꦤꦔꦶꦁꦲꦶꦁꦏꦁꦮꦶꦕꦏ꧀ꦱꦤꦏꦒꦸꦔꦤ꧀ꦏꦪꦏꦶꦤ꧀ꦤꦤ꧀꧈ꦧꦶꦭꦶꦃꦥꦫꦭꦶꦢ꧀ꦭꦶꦢ꧀ꦮꦲꦸꦠꦼꦩ꧀ꦠꦸꦱꦒꦼꦢ꧀ꦚꦏꦸꦥ꧀ꦱꦢꦪꦥꦢꦩꦼꦭ꧀ꦭꦤ꧀꧈ꦏꦸꦮꦗꦶꦧ꧀ꦧꦤ꧀ꦭꦤ꧀ꦠꦼꦠꦁꦒꦼꦭ꧀ꦭꦤ꧀ꦤꦶꦥꦸꦤ꧀ꦮꦲꦸ꧉

꧋ꦩꦏꦠꦼꦤ꧀ꦲꦸꦒꦶꦲꦶꦁꦏꦁꦮꦶꦕꦏ꧀ꦱꦤꦲꦔ꧀ꦭꦲꦶꦂꦫꦏꦼꦤ꧀ꦉꦤꦤꦶꦁꦥꦁꦒꦭꦶꦃꦢꦊꦩ꧀꧈ꦧꦶꦭꦶꦃꦏꦚ꧀ꦗꦼꦁꦱꦿꦶꦩꦲꦫꦗꦥꦸꦠꦿꦶꦲꦤꦼꦠꦼꦥ꧀ꦥꦏꦼꦤ꧀ꦥꦢꦸꦏꦠꦸꦮꦤ꧀ Mr. A. Neytzell de Wilde ꦢꦢꦺꦴꦱ꧀ꦥꦔꦂꦱꦤꦶꦁꦥꦺꦴꦊꦏ꧀ꦱꦿꦢ꧀ꦩꦭꦶꦃ꧉ꦱꦶꦤ꧀ꦠꦼꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦚꦸꦩꦼꦉꦥ꧀ꦥꦶꦏꦢꦺꦴꦱ꧀ꦥꦸꦤ꧀ꦢꦶꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦥꦢꦸꦏꦠꦸꦮꦤ꧀ꦮꦲꦸ꧈ꦏꦭꦢꦢꦺꦴꦱ꧀ꦥꦔꦂ

Pambikakipun Parêpatan Polêksrad

Ing Kajawèn ăngka 20 ing bagian Kabar Warni-warni sampun kawartosakên, bilih kala dintên Sênèn tanggal 16 Mèi punika, parêpatan polêksrad enggal kabikak kanthi upacara. Murih adamêl sênênging panggalihipun para maos sadaya, ing ngriki amacak gambaripun para lid-liding polêksrad enggal punika. Kajawi punika ing Kajawèn ingkang kapêngkêr sampun ajangji ngrawat sêsorah dalêm kangjêng tuwan ingkang wicaksana gupêrnur jendral kala pambikakipun parêpatan polêksrad. Ing sarèhning punika kados prêlu kasumêrêpan ing ngakathah, amila ing ngandhap punika prêlu angêwrat sêsorah dalêm wau, nanging kanthi kacêkak kemawon.

Dhawuh dalêm kangjêng tuwan ingkang wicaksana gupêrnur jendral, saklangkung rêna panggalih dalêm, dene sagêd anjênêngi kala pambikakipun parêpatan polêksrad enggal punika. Kintên-kintên wolung wulan ingkang kapêngkêr, kala ingkang wicaksana anampi panguwasa nagari, sampun paring dhawuh pangandika wontên ing sangajênging parêpatan polêksrad ugi, angajêng-ajêng kanthi sangêt, mugi-mugi pamarentah lan polêksrad samia pitados-pinitados, lan samia sagêd anyambud damêl sêsarêngan, murih sagêdipun anjagi tata têntrêmipun nagari saisinipun. Kanthi rênaning panggalih dalêm, samangke ingkang wicaksana sagêd ngandikakakên, bilih pangajêng-ajêng dalêm wau têtela wontên damêlipun. Sêsrawungan dalêm ingkang wicaksana kalihan para tuwan-tuwan ing bab punapa kemawon tansah sae. Punapa malih kala ing salêbêting bêbaya, pambantu saha kapitadosanipun dhatêng ingkang wicaksana punika cêtha sayêktos. Ingkang punika kangjêng tuwan ingkang wicaksana gupêrnur jendral andhawuhakên gênging panarimahipun.

Mênggah tumrap polêksrad, ingkang wicaksana paring dhawuh pangandika, bilih samangke sadaya sarwa enggal, lidipun wêwah kathah, pranatanipun enggal, makatên ugi padamêlanipun ugi enggal. Dados tanah Indiya punika ingêbyuk ing jaman paprentahan enggal. Salajêngipun ingkang wicaksana lajêng aparing wilujêng dhatêng para lid-lid polêksrad. Dhawuh pangandikanipun, bilih polêksrad samangke punika botên wêwah padamêlanipun, ananging wêwah têtanggêlanipun. Jalaran saking punika padamêlanipun para lid-lid inggih lajêng wêwah awrat, ananging ingkang wicaksana kagungan kayakinan, bilih para lid-lid wau têmtu sagêd nyakup sadaya padamêlan, kuwajiban lan têtanggêlanipun wau.

Makatên ugi ingkang wicaksana anglairakên rênaning panggalih dalêm, bilih kangjêng sri maharaja putri anêtêpakên paduka tuwan Mr. A. Neytzell de Wilde dados pangarsaning polêksrad malih. Sintên ingkang sampun nyumêrêpi kadospundi padamêlanipun paduka tuwan wau, kala dados pangarsaning polêksrad ingkang kapêngkêr, têmtu sagêd mastani, bilih pamilihan punika kalêrêsan sayêktos.

[ 324 ]

H.C. Kerkkamp,
Gedelegeerde,

Dr. J.I.J.M. Schmutzer,
Gedelegeerde,

P.A. Mandagie,
Gedelegeerde,

R.W. Dwijasewaya,
Gedelegeerde,

F.H.K. Zaalberg,

H.H. Kan, Gedelegeerde
saha 3e Plaatsvervangend Voorzitter,

Ali Musa,
Gedelegeerde,

B. Roep,
Gedelegeerde,

Mr. P.A. Blaauw,
Gedelegeerde,

Ir. Dr. Han Tiauw
Tjong,

Khouw Kim An,

Th. Ligthart.

[ 325 ] ꦱꦤꦶꦁꦥꦺꦴꦊꦏ꧀ꦱꦿꦢ꧀ꦲꦶꦁꦏꦁꦏꦥꦼꦁꦏꦼꦂ꧈ꦠꦼꦩ꧀ꦠꦸꦱꦒꦼꦢ꧀ꦩꦱ꧀ꦠꦤꦶ꧈ꦧꦶꦭꦶꦃꦥꦩꦶꦭꦶꦃꦲꦤ꧀ꦥꦸꦤꦶꦏꦏꦊꦉꦱ꧀ꦱꦤ꧀ꦱꦪꦼꦏ꧀ꦠꦺꦴꦱ꧀꧉

꧋ꦲꦶꦁꦏꦁꦮꦶꦕꦏ꧀ꦱꦤꦲꦔꦤ꧀ꦢꦶꦏ꧈ꦧꦶꦭꦶꦃꦱꦮꦼꦤꦺꦃꦲꦶꦁꦠꦸꦮꦤ꧀ꦠꦸꦮꦤ꧀ꦲꦶꦁꦏꦁꦏꦭꦫꦸꦩꦶꦪꦶꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦉꦥ꧀ꦥꦠꦤ꧀ꦥꦸꦤꦶꦏ꧈ꦱꦩꦁꦏꦼꦧꦺꦴꦠꦼꦤ꧀ꦮꦁꦱꦸꦭ꧀ꦲꦶꦁꦔꦿꦶꦏꦸꦩꦭꦶꦃ꧉ꦩꦶꦤꦁꦏꦒꦤ꧀ꦠꦺꦴꦱ꧀ꦱꦶꦥꦸꦤ꧀ꦠꦸꦮꦤ꧀ꦠꦸꦮꦤ꧀ꦲꦶꦁꦏꦁꦧꦺꦴꦠꦼꦤ꧀ꦮꦁꦱꦸꦭ꧀ꦩꦭꦶꦃꦮꦲꦸ꧈ꦲꦶꦁꦏꦁꦮꦶꦕꦏ꧀ꦱꦤꦲꦤꦶꦤ꧀ꦢꦏ꧀ꦏꦏꦼꦤ꧀ꦉꦏꦢꦪꦱꦱꦒꦼꦢ꧀ꦱꦒꦼꦢ꧀ꦢꦶꦥꦸꦤ꧀꧈ꦲꦺꦩꦤ꧀ꦱꦔꦼꦠ꧀꧈ꦢꦼꦤꦼꦉꦏꦢꦪꦢꦊꦩ꧀ꦥꦸꦤꦶꦏꦧꦺꦴꦠꦼꦤ꧀ꦱꦒꦼꦢ꧀ꦏꦠꦶꦤ꧀ꦢꦏ꧀ꦏꦏꦼꦤ꧀ꦱꦢꦪ꧉ꦠꦸꦩꦿꦥ꧀ꦊꦭꦧꦼꦠ꧀ꦠꦤ꧀ꦤꦶꦥꦸꦤ꧀ꦥꦫꦲꦶꦁꦏꦁꦧꦺꦴꦠꦼꦤ꧀ꦮꦁꦱꦸꦭ꧀ꦲꦶꦁꦥꦉꦥ꧀ꦥꦠꦤ꧀ꦥꦸꦤꦶꦏꦩꦭꦶꦃ꧈ꦲꦶꦁꦏꦁꦮꦶꦕꦏ꧀ꦱꦤꦲꦠꦱ꧀ꦤꦩꦤꦶꦁꦥꦩꦉꦤ꧀ꦠꦃꦲꦤ꧀ꦝꦮꦸꦃꦲꦏꦼꦤ꧀ꦒꦼꦁꦔꦶꦁꦥꦤꦫꦶꦩꦃꦲꦶꦥꦸꦤ꧀꧉

꧋ꦲꦶꦁꦔꦗꦼꦁꦲꦶꦁꦏꦁꦮꦶꦕꦏ꧀ꦱꦤꦱꦩ꧀ꦥꦸꦤ꧀ꦲꦤ꧀ꦝꦮꦸꦃꦲꦏꦼꦤ꧀꧈ꦧꦶꦭꦶꦃꦠꦤꦃꦆꦤ꧀ꦢꦶꦪꦥꦸꦤꦶꦏꦲꦩꦶꦮꦶꦠꦶꦔꦚ꧀ꦕꦶꦏ꧀ꦲꦶꦁꦗꦩꦤ꧀ꦲꦼꦁꦒꦭ꧀ꦥꦸꦤꦶꦏ꧉ꦮꦶꦮꦶꦠ꧀ꦢꦶꦤ꧀ꦠꦼꦤ꧀ꦥꦸꦤꦶꦏ꧈ꦥꦿꦤꦠꦤ꧀ꦤꦒꦫꦶꦆꦤ꧀ꦢꦶꦪꦲꦶꦁꦏꦁꦲꦼꦁꦒꦭ꧀ꦏꦮꦶꦮꦶꦠ꧀ꦠꦤ꧀ꦏꦠꦶꦤ꧀ꦢꦏ꧀ꦏꦏꦼꦤ꧀ꦏꦤ꧀ꦛꦶꦱꦊꦉꦱ꧀ꦭꦼꦉꦱ꧀ꦱꦶꦥꦸꦤ꧀꧉ꦧꦶꦭꦶꦃꦥꦿꦤꦠꦤ꧀ꦲꦼꦁꦒꦭ꧀ꦥꦸꦤꦶꦏꦧꦺꦴꦠꦼꦤ꧀ꦲꦢꦩꦼꦭ꧀ꦩꦉꦩ꧀ꦩꦶꦁꦠꦼꦠꦶꦪꦁꦱꦢꦪ꧈ꦩꦶꦭꦲꦶꦁꦒꦶꦃꦱꦩ꧀ꦥꦸꦤ꧀ꦗꦩꦤ꧀ꦭꦶꦩꦿꦃ꧉ꦱꦤꦢꦾꦤ꧀ꦩꦏꦠꦼꦤ꧀ꦤꦲꦸꦒꦶꦱꦢꦪꦠꦶꦪꦁꦠꦼꦩ꧀ꦠꦸꦱꦩꦶꦥꦸꦫꦸꦤ꧀ꦲꦔꦏꦼꦤ꧀ꦤꦶꦩꦼꦁꦒꦃꦒꦸꦤꦤꦶꦥꦸꦤ꧀ꦥꦿꦤꦠꦤ꧀ꦏꦱ꧀ꦧꦸꦠ꧀ꦔꦶꦁꦒꦶꦭ꧀꧉

꧋ꦏꦗꦮꦶꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦥꦚ꧀ꦕꦺꦤ꧀ꦢꦶꦥꦸꦤ꧀ꦥꦶꦪꦩ꧀ꦧꦏ꧀ꦏꦏꦼꦤ꧀꧈ꦧꦺꦴꦠꦼꦤ꧀ꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦲꦸꦤ꧀ꦝꦁꦲꦸꦤ꧀ꦝꦁꦭꦤ꧀ꦥꦿꦤꦠꦤ꧀ꦥꦥꦽꦤ꧀ꦠꦃꦲꦤ꧀ꦲꦸꦩꦸꦩ꧀ꦲꦶꦁꦏꦁꦩꦭꦶꦒꦶꦲꦸꦠꦮꦶꦱꦧꦒꦶꦪꦤ꧀ꦲꦒꦼꦁꦲꦔꦺꦁꦔꦶꦁꦔꦶꦆꦤ꧀ꦢꦶꦪ꧈ꦱꦢꦺꦫꦺꦁꦔꦶꦥꦸꦤ꧀ꦥꦺꦴꦊꦏ꧀ꦱꦿꦢ꧀ꦱꦸꦏꦠꦶꦩ꧀ꦧꦔꦤ꧀ꦫꦸꦩꦶꦪꦶꦤ꧀꧉ꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦔꦺꦁꦔꦶꦁꦔꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦤꦃꦆꦤ꧀ꦢꦶꦪ꧈ꦲꦸꦠꦮꦶꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦩꦼꦱ꧀ꦛꦶꦏꦥꦿꦤꦠꦢꦼꦤꦶꦁꦲꦺꦴꦂꦝꦼꦤꦤ꧀ꦱꦶ꧈ꦮꦶꦮꦶꦠ꧀ꦱꦩꦁꦏꦼꦥꦿꦤꦠꦤꦶꦥꦸꦤ꧀ꦮꦲꦸꦏꦢꦩꦼꦭ꧀ꦢꦼꦤꦶꦁꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀ꦏꦤ꧀ꦛꦶꦩꦸꦥꦏꦠ꧀ꦠꦤꦶꦥꦸꦤ꧀ꦥꦺꦴꦊꦏ꧀ꦱꦿꦢ꧀ꦥꦶꦪꦩ꧀ꦧꦏ꧀ꦲꦸꦠꦮꦶꦥꦫꦥꦤꦔꦿꦺꦃꦲꦶꦁꦥꦢꦶꦤ꧀ꦠꦼꦤ꧀ꦤꦤ꧀ꦥꦺꦴꦊꦏ꧀ꦱꦿꦢ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶ꧇ꦕꦺꦴꦊꦒꦼꦮ꦳ꦤ꧀ꦒꦼꦢꦼꦊꦒꦼꦲꦼꦂꦢꦼꦤ꧀꧉ꦫꦚ꧀ꦕꦔꦤ꧀ꦮꦿꦒꦢ꧀ꦆꦤ꧀ꦢꦶꦪꦲꦸꦒꦶꦏꦼꦢꦃꦏꦠꦼꦠꦼꦥ꧀ꦥꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦔꦿꦶꦏꦸ꧈ꦲꦶꦁꦒꦶꦃꦥꦸꦤꦶꦏꦥꦼꦫꦔꦤ꧀ꦥꦼꦫꦔꦤ꧀ꦤꦶꦥꦸꦤ꧀ꦲꦶꦁꦏꦁꦢꦶꦥꦸꦤ꧀ꦩꦸꦥꦏꦠꦶꦢꦼꦤꦶꦁꦥꦺꦴꦊꦏ꧀ꦱꦿꦢ꧀ꦭꦤ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀꧉

꧋ꦲꦶꦁꦏꦁꦮꦶꦕꦏ꧀ꦱꦤꦲꦤ꧀ꦝꦮꦸꦃꦲꦏꦼꦤ꧀꧈ꦧꦶꦭꦶꦃꦱꦔꦁꦠꦲꦸꦤ꧀ꦲꦶꦁꦏꦁꦏꦥꦼꦁꦏꦼꦂꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀Graaf van Limburg Stirum ꦱꦩ꧀ꦥꦸꦤ꧀ꦏꦒꦸꦔꦤ꧀ꦲꦶꦝꦩ꧀ꦲꦶꦝꦩꦤ꧀ꦲꦼꦮꦃꦲꦼꦮꦃꦲꦤ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏ꧈ꦲꦩꦶꦭꦝꦮꦸꦃꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤ꧈ꦱꦩ꧀ꦥꦸꦤ꧀ꦢꦢꦺꦴꦱ꧀ꦥꦤ꧀ꦠꦼꦱꦶꦥꦸꦤ꧀꧈ꦧꦶꦭꦶꦃꦏꦶꦠꦱꦢꦪꦲꦧꦶꦔꦃꦧꦶꦔꦃ꧈ꦲꦶꦔꦠꦱ꧀ꦱꦶꦥꦸꦤ꧀ꦱꦊꦧꦼꦠ꧀ꦠꦶꦁꦱꦔꦁꦠꦲꦸꦤ꧀꧈ꦲꦶꦝꦩ꧀ꦲꦶꦝꦩꦤ꧀ꦮꦲꦸꦱꦩ꧀ꦥꦸꦤ꧀ꦱꦒꦼꦢ꧀ꦏꦢꦸꦩꦸꦒ꧀ꦒꦺꦤ꧀꧈ꦲꦤꦔꦶꦁꦧꦧ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦲꦶꦁꦱꦫꦺꦃꦤꦶꦁꦢꦺꦫꦺꦁꦮꦺꦴꦤ꧀ꦠꦼꦤ꧀ꦮꦺꦴꦃꦲꦶꦥꦸꦤ꧀ꦧꦧꦂꦥꦶꦱꦤ꧀꧈ꦱꦩ꧀ꦥꦸꦤ꧀ꦢꦢꦺꦴꦱ꧀ꦮꦗꦶꦧ꧀ꦧꦶꦥꦸꦤ꧀ꦏꦶꦠꦱꦢꦪꦏꦼꦢꦃꦲꦤꦶꦤ꧀ꦢꦏ꧀ꦏꦏꦼꦤ꧀ꦏꦤ꧀ꦛꦶꦱꦠꦼꦩꦼꦤ꧀ꦠꦼꦩꦼꦤ꧀ꦤꦶꦥꦸꦤ꧀꧈ꦱꦶꦤ꧀ꦠꦼꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦤꦠꦼꦩꦲꦺꦴꦱ꧀ꦱꦼꦱꦺꦴꦫꦃꦢꦊꦩ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀Graaf van Limburg Stirum ꦱꦩ꧀ꦥꦸꦤ꧀ꦠꦼꦩ꧀ꦠꦸꦭꦗꦼꦁꦛꦸꦏꦸꦭ꧀ꦒꦒꦱꦤ꧀ꦤꦶꦥꦸꦤ꧀ꦮꦂꦤꦶꦮꦂꦤꦶ꧈ꦏꦢꦺꦴꦱ꧀ꦠ꧇ꦲꦩꦼꦮꦲꦶꦏꦩꦗꦼꦁꦔꦤꦶꦁꦫꦏꦾꦠ꧀꧈ꦏꦒꦸꦤꦤ꧀ꦠꦼꦠꦶꦪꦁꦥꦿꦶꦧꦸꦩꦶ꧈ꦲꦤꦸꦩ꧀ꦧꦱꦶꦮꦁꦱꦸꦭ꧀ꦱꦶꦠꦶꦱꦶꦠꦶꦥꦂꦠꦶꦏꦸꦭꦶꦂ꧈ꦲꦔꦗꦼꦁꦔꦏꦼꦤ꧀ꦠꦼꦠꦤꦺꦤ꧀ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉

Ingkang wicaksana angandika, bilih sawênèhing tuwan-tuwan ingkang kala rumiyin wontên ing parêpatan punika, samangke botên wangsul ing ngriku malih. Minăngka gantosipun tuwan-tuwan ingkang botên wangsul malih wau, ingkang wicaksana anindakakên rekadaya sasagêd-sagêdipun, eman sangêt, dene rekadaya dalêm punika botên sagêd katindakakên sadaya. Tumrap lêlabêtanipun para ingkang botên wangsul ing parêpatan punika malih, ingkang wicaksana atas namaning pamarentah andhawuhakên gênging panarimahipun.

Ing ngajêng ingkang wicaksana sampun andhawuhakên, bilih tanah Indiya punika amiwiti ngancik ing jaman enggal punika. Wiwit dintên punika, pranatan nagari Indiya ingkang enggal kawiwitan katindakakên kanthi salêrês-lêrêsipun. Bilih pranatan enggal punika botên adamêl marêming têtiyang sadaya, mila inggih sampun jaman limrah. Sanadyan makatêna ugi sadaya tiyang têmtu sami purun angakêni mênggah gunanipun pranatan kasbut nginggil.

Kajawi prakawis-prakawis ingkang pancèn dipun piyambakakên, botên badhe dipun wontênakên undhang-undhang lan pranatan paprentahan umum ingkang maligi utawi sabagian agêng angèngingi Indiya, sadèrèngipun polêksrad suka timbangan rumiyin. Prakawis-prakawis ingkang ngèngingi kawontênanipun tanah Indiya, utawi prakawis-prakawis ingkang mêsthi kapranata dening ordhênansi, wiwit samangke pranatanipun wau kadamêl dening kangjêng tuwan ingkang wicaksana gupêrnur jendral kanthi mupakatanipun polêksrad piyambak utawi para pangrèhing padintênan polêksrad, inggih punika ingkang dipun wastani: College van Gedelegeerden. Rancangan wragad Indiya ugi kêdah katêtêpakên wontên ing ngriku, inggih punika perangan-peranganipun ingkang dipun mupakati dening polêksrad lan kangjêng tuwan ingkang wicaksana gupêrnur jendral.

Ingkang wicaksana andhawuhakên, bilih sangang taun ingkang kapêngkêr kangjêng tuwan ingkang wicaksana gupêrnur jendral Graaf van Limburg Stirum sampun kagungan idham-idhaman ewah-ewahan ingkang makatên punika, amila dhawuh dalêm ingkang wicaksana, sampun dados pantêsipun, bilih kita sadaya abingah-bingah, ingatasipun salêbêting sangang taun, idham-idhaman wau sampun sagêd kadumugèn, ananging bab sanès-sanèsipun, ing sarèhning dèrèng wontên wohipun babarpisan, sampun dados wajibipun kita sadaya kêdah anindakakên kanthi satêmên-têmênipun, sintên ingkang sampun nate maos sêsorah dalêm kangjêng tuwan ingkang wicaksana gupêrnur jendral Graaf van Limburg Stirum sampun têmtu lajêng thukul gagasanipun warni-warni, kados ta: amêwahi kamajênganing rakyat, kagunan têtiyang pribumi, anumbasi wangsul siti-siti partikulir, angajêngakên têtanèn lan sanès-sanèsipun.

(Badhe kasambêtan)

[ 326 ]꧋ꦱꦠꦺꦴꦏꦼꦮꦤ꧀ꦲꦶꦱꦶꦤꦶꦁꦱꦒꦤ꧀ꦠꦼꦤ꧀

꧋ꦩꦼꦁꦒꦃꦲꦶꦱꦶꦤꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦱꦏꦶꦁꦥꦼꦥꦏ꧀꧈ꦏꦛꦃꦱꦲꦩꦮꦂꦤꦶꦮꦂꦤꦶꦤꦶꦥꦸꦤ꧀꧈ꦔꦤ꧀ꦠꦺꦴꦱ꧀ꦲꦤꦸꦏꦸꦭ꧀ꦭꦏꦼꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦕꦫꦶꦪꦺꦴꦱ꧀ꦲꦶꦁꦏꦁꦲꦱꦿꦶꦁꦚꦼꦧꦭ꧀ꦱꦏꦶꦁꦤꦭꦂ꧈ꦏꦢꦺꦴꦱ꧀ꦠ꧇ꦮꦺꦴꦤ꧀ꦠꦼꦤ꧀ꦕꦫꦶꦪꦺꦴꦱ꧀ꦲꦶꦁꦏꦁꦔꦤ꧀ꦝꦂꦫꦏꦼꦤ꧀꧈ꦧꦶꦭꦶꦃꦲꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦢꦼꦮꦤꦶꦥꦸꦤ꧀ꦲꦶꦁꦏꦁꦲꦔꦿꦠꦺꦴꦤꦶꦲꦶꦁꦱꦲꦶꦤ꧀ꦢꦼꦁꦔꦶꦁꦱꦩꦸꦢꦿꦱꦢꦪ꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦄꦗꦼꦗꦸꦭꦸꦏ꧀꧇ꦧꦛꦫꦧꦫꦸꦤ꧈ꦩꦭꦃꦲꦶꦁꦕꦫꦶꦪꦺꦴꦱ꧀ꦥꦝꦭꦁꦔꦤ꧀ꦮꦺꦴꦤ꧀ꦠꦼꦤ꧀ꦭꦩ꧀ꦥꦃꦲꦤ꧀ꦲꦶꦁꦏꦁꦚꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦱꦁꦲꦾꦁꦧꦫꦸꦤꦮꦲꦸꦩꦸꦤ꧀ꦝꦸꦠ꧀ꦩꦤ꧀ꦠꦸꦢꦫꦃꦥꦤ꧀ꦝꦮ꧈ꦲꦶꦁꦒꦶꦃꦥꦸꦤꦶꦏꦥꦸꦠꦿꦗꦺꦴꦝꦶꦥꦠꦶꦫꦢꦺꦤ꧀ꦲꦤ꧀ꦠꦉꦗꦏꦝꦲꦸꦥ꧀ꦥꦏꦼꦤ꧀ꦏꦭꦶꦲꦤ꧀ꦥꦸꦠꦿꦤꦶꦥꦸꦤ꧀ꦥꦸꦠꦿꦶꦆꦁꦏꦁꦏꦼꦏꦱꦶꦃꦢꦺꦮꦶꦧꦫꦸꦤꦮꦠꦶ꧉ꦱꦒꦼꦢ꧀ꦲꦸꦒꦶꦧꦶꦭꦶꦃꦭꦩ꧀ꦥꦃꦲꦤ꧀ꦆꦁꦏꦁꦩꦏꦠꦼꦤ꧀ꦮꦲꦸꦤꦩꦸꦁꦕꦫꦔꦤ꧀ꦏꦼꦩꦮꦺꦴꦤ꧀꧈ꦢꦢꦺꦴꦱ꧀ꦚꦼꦧꦭ꧀ꦱꦏꦶꦁꦥꦏꦼꦩ꧀ꦩꦶꦥꦸꦤ꧀꧈ꦲꦤꦔꦶꦁꦲꦶꦁꦱꦮꦼꦤꦺꦃꦲꦶꦁꦥꦁꦒꦼꦤ꧀ꦤꦤ꧀꧈ꦏꦢꦺꦴꦱ꧀ꦠꦲꦶꦁꦩꦒꦼꦭꦁ꧈ꦠꦼꦩꦁꦒꦸꦁꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦭꦩ꧀ꦥꦃꦲꦤ꧀ꦮꦲꦸꦱꦩ꧀ꦥꦸꦤ꧀ꦤꦩꦭꦶꦩꦿꦃ꧉ꦩꦭꦃꦲꦶꦁꦤꦔꦿꦶꦏꦏꦛꦃꦠꦼꦠꦶꦪꦁꦆꦁꦏꦁꦱꦩꦶꦉꦩꦼꦤ꧀꧈ꦲꦩꦂꦒꦶꦱꦏꦶꦁꦲꦁꦒꦺꦤꦶꦥꦸꦤ꧀ꦲꦤꦼꦁꦱꦼꦩ꧀ꦩꦏꦼꦤ꧀ꦱꦲꦫꦩꦼꦤꦶꦁꦭꦩ꧀ꦥꦃꦲꦤ꧀꧉

꧋ꦧꦺꦴꦠꦼꦤ꧀ꦤꦩꦸꦁꦧꦁꦱꦮꦺꦠꦤ꧀ꦤꦤ꧀ꦏꦺꦩꦮꦺꦴꦤ꧀ꦲꦶꦁꦏꦁꦒꦝꦃꦕꦫꦶꦪꦺꦴꦱ꧀ꦱꦤ꧀ꦲꦶꦁꦏꦁꦲꦤꦺꦃꦲꦤꦺꦃꦧꦧ꧀ꦲꦶꦱꦶꦤꦶꦁꦱꦒꦤ꧀ꦠꦼꦤ꧀꧈ꦱꦤꦗꦤ꧀ꦧꦁꦱꦏꦶꦭꦺꦤ꧀ꦤꦤ꧀ꦩꦏꦠꦼꦤ꧀ꦲꦸꦒꦶ꧈ꦏꦢꦺꦴꦱ꧀ꦠꦏꦭꦫꦸꦩꦶꦪꦶꦤ꧀ꦧꦁꦱꦏꦶꦭꦺꦤ꧀ꦤꦤ꧀ꦲꦁꦒꦝꦃꦲꦶꦏꦥꦶꦠꦢꦺꦴꦱ꧀ꦱꦤ꧀꧈ꦧꦶꦭꦶꦃꦲꦶꦁꦱꦊꦧꦼꦠ꧀ꦠꦶꦁꦱꦩꦸꦢꦿꦥꦸꦤꦶꦏꦮꦺꦴꦤ꧀ꦠꦼꦤ꧀ꦱꦮꦼꦂꦫꦶꦥꦸꦤ꧀ꦲꦶꦁꦏꦁꦱꦏ꧀ꦭꦁꦏꦸꦁꦲꦒꦼꦁ꧈ꦲꦶꦁꦏꦁꦲꦩ꧀ꦧꦼꦧꦪꦤꦶꦠꦸꦩꦿꦥ꧀ꦧꦲꦶꦠꦏꦥꦭ꧀ꦲꦶꦁꦏꦁꦱꦩꦶꦊꦭꦪꦂꦫꦤ꧀꧈ꦩꦏꦠꦼꦤ꧀ꦲꦸꦒꦶꦥꦸꦁꦒꦮꦧꦲꦶꦠꦧꦁꦱꦏꦶꦭꦺꦤ꧀ꦤꦤ꧀ꦱꦩꦶꦲꦁꦒꦝꦃꦲꦶꦏꦥꦶꦠꦢꦺꦴꦱ꧀ꦱꦤ꧀꧈ꦧꦶꦭꦶꦃꦲꦶꦁꦱꦊꦧꦼꦠ꧀ꦠꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦮꦂꦤꦶꦠꦶꦠꦃ꧈ꦲꦶꦁꦏꦁꦲꦁꦒꦝꦃꦲꦶꦫꦲꦶꦱꦲꦧꦢꦤ꧀ꦏꦢꦺꦴꦱ꧀ꦢꦺꦤꦺꦩꦤꦸꦱ꧈ꦲꦤꦔꦶꦁꦲꦶꦁꦥꦺꦫꦔꦤ꧀ꦔꦤ꧀ꦝꦥ꧀ꦲꦸꦭꦩ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦱꦺꦴꦏ꧀ꦏꦮꦱ꧀ꦠꦤꦤ꧀ꦱꦫꦶꦤꦃ꧌ꦗ꦳ꦺꦲꦺꦩꦺꦲꦺꦂꦩꦶꦤ꧀꧍ꦢꦺꦤꦺꦥꦫꦲꦲꦫꦶꦤꦃꦮꦲꦸꦢꦶꦥꦸꦤ꧀ꦕꦫꦶꦪꦺꦴꦱ꧀ꦱꦏꦼꦤ꧀ꦩꦤꦮꦶꦱꦩꦶꦲꦤꦏ꧀ꦏꦶꦥꦸꦤ꧀ꦢꦺꦮꦤꦶꦁꦱꦩꦸꦢꦿ꧉ꦢꦢꦺꦴꦱ꧀ꦧꦁꦱꦏꦶꦭꦺꦤ꧀ꦤꦤ꧀ꦏꦭꦫꦸꦩꦶꦪꦶꦤ꧀ꦲꦶꦁꦒꦶꦃꦥꦶꦠꦢꦺꦴꦱ꧀꧈ꦧꦶꦭꦶꦃꦲꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦢꦺ [ 327 ]ꦮꦤꦶꦥꦸꦤ꧀ꦲꦶꦁꦏꦁꦲꦔꦿꦠꦺꦴꦤꦶꦲꦶꦁꦔꦿꦶꦏꦸ꧉ꦢꦺꦮꦤꦶꦁꦱꦒꦤ꧀ꦠꦼꦤ꧀ꦢꦺꦤꦶꦁꦠꦼꦠꦶꦪꦁꦗꦮꦶꦢꦶꦥꦸꦤ꧀ꦤꦩꦤꦶ꧇ꦧꦛꦫꦧꦫꦸꦤ꧈ꦩꦼꦁꦒꦃꦲꦶꦁꦥꦫꦏꦶꦭꦺꦤ꧀ꦤꦤ꧀ꦢꦺꦮꦤꦶꦁꦱꦒꦤ꧀ꦠꦼꦤ꧀ꦮꦲꦸꦏꦤꦩꦺꦏꦏꦼꦤ꧀꧇ꦤꦺꦥ꧀ꦠꦸꦤꦸꦱ꧀꧉ꦥꦫꦥꦸꦁꦒꦮꦏꦥꦭ꧀ꦲꦶꦁꦗꦩꦤ꧀ꦫꦸꦩꦶꦪꦶꦤ꧀ꦱꦩꦶꦲꦁꦒꦝꦃꦲꦶꦏꦥꦶꦠꦢꦺꦴꦱ꧀ꦱꦤ꧀꧈ꦧꦶꦭꦶꦃꦱꦫꦶꦤꦃꦏꦱ꧀ꦧꦸꦠ꧀ꦔꦶꦁꦒꦶꦭ꧀꧈ꦲꦱꦿꦶꦁꦲꦁꦒꦼꦒꦺꦴꦝꦝꦠꦼꦁꦥꦫꦠꦼꦠꦶꦪꦁꦏꦥꦭ꧀꧉ꦲꦶꦁꦱꦫꦺꦃꦤꦶꦁꦥꦫꦱꦫꦶꦤꦃꦮꦲꦸꦱꦩꦶꦲꦺꦤ꧀ꦢꦃꦲꦶꦁꦮꦂꦤꦶ꧈ꦏꦛꦃꦥꦫꦠꦼꦠꦶꦪꦁꦏꦥꦭ꧀ꦲꦶꦁꦏꦁꦱꦩꦶꦏꦥꦺꦚ꧀ꦕꦸꦠ꧀ꦱꦲꦭꦗꦼꦁꦲꦁꦒꦼꦧꦾꦸꦂꦲꦶꦁꦱꦒꦤ꧀ꦠꦼꦤ꧀꧈ꦲꦶꦁꦏꦁꦱꦠꦼꦩꦃꦢꦢꦺꦴꦱ꧀ꦠꦶꦮꦱ꧀ꦱꦶꦥꦸꦤ꧀꧉

꧋ꦠꦸꦩꦿꦥ꧀ꦠꦼꦠꦶꦪꦁꦗꦮꦶꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦲꦶꦁꦏꦁꦱꦩꦶꦥꦶꦠꦢꦺꦴꦱ꧀꧈ꦧꦶꦭꦶꦃꦲꦶꦁꦱꦊꦧꦼꦠ꧀ꦠꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦲꦸꦭꦩ꧀ꦲꦶꦁꦏꦁꦲꦧꦢꦤ꧀ꦩꦤꦸꦱ꧉ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦲꦸꦭꦩ꧀ꦝꦸꦪꦸꦁ꧉ꦩꦼꦁꦒꦃꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦁꦠꦶꦪꦁ꧈ꦲꦸꦭꦩ꧀ꦝꦸꦪꦸꦁꦮꦲꦸꦲꦶꦁꦱꦏꦮꦶꦠ꧀ꦲꦶꦁꦒꦶꦃꦩꦤꦸꦱꦲꦸꦒꦶ꧈ꦲꦤꦔꦶꦁꦱꦉꦁꦏꦥꦼꦗꦃꦲꦤ꧀ꦲꦶꦁꦭꦏꦶꦤꦶꦥꦸꦤ꧀ꦭꦗꦼꦁꦔ꧀ꦭꦭꦸꦱꦲꦲꦁꦒꦼꦧꦾꦸꦂꦲꦶꦁꦱꦒꦤ꧀ꦠꦼꦤ꧀꧉ꦏꦭꦏꦭꦩꦤꦮꦶꦥꦶꦤꦸꦗꦸꦲꦺꦩꦸꦠ꧀ꦝꦠꦼꦁꦲꦶꦁꦏꦁꦗꦊꦂ꧈ꦭꦗꦼꦁꦩꦼꦛꦸꦔꦸꦭ꧀ꦱꦏꦶꦁꦱꦒꦤ꧀ꦠꦼꦤ꧀ꦱꦲꦤꦸꦤ꧀ꦠꦼꦤ꧀ꦲꦠꦮꦁꦠꦔꦶꦱ꧀꧉ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦁꦠꦶꦪꦁ꧈ꦱꦶꦤ꧀ꦠꦼꦤ꧀ꦲꦶꦁꦏꦁꦱꦒꦼꦢ꧀ꦲꦁꦱꦭ꧀ꦭꦸꦲꦶꦁꦲꦸꦭꦩ꧀ꦝꦸꦪꦸꦁꦏꦭꦤꦶꦥꦸꦤ꧀ꦤꦔꦶꦱ꧀ꦥꦸꦤꦶꦏ꧈ꦭꦗꦼꦁꦱꦒꦼꦢ꧀ꦲꦔꦼꦭꦸꦠ꧀ꦠꦏꦼꦤ꧀ꦝꦠꦼꦁꦠꦶꦪꦁꦱꦤꦺꦱ꧀꧈ꦲꦩꦶꦭꦭꦗꦼꦁꦮꦺꦴꦤ꧀ꦠꦼꦤ꧀ꦠꦼꦠꦼꦩ꧀ꦧꦸꦔꦤ꧀꧇ꦠꦶꦪꦁꦏꦼꦔꦶꦁꦝꦸꦪꦸꦁꦲꦸꦠꦮꦶꦭꦶꦱꦃꦝꦸꦪꦸꦁ꧉ꦥꦸꦤꦥꦥꦸꦤꦶꦏꦊꦉꦱ꧀ꦲꦸꦠꦮꦶꦧꦺꦴꦠꦼꦤ꧀ꦤꦶꦥꦸꦤ꧀ꦏꦱꦸꦩꦁꦒꦏ꧀ꦏꦏꦼꦤ꧀ꦲꦶꦁꦥꦫꦩꦲꦺꦴꦱ꧀꧈ꦲꦤꦔꦶꦁꦩꦶꦠꦸꦫꦸꦠ꧀ꦔꦶꦭ꧀ꦩꦸꦑꦏ꧀꧈ꦏꦢꦺꦴꦱ꧀ꦲꦶꦁꦒꦶꦃꦏꦛꦃꦢꦺꦴꦫꦤꦶꦥꦸꦤ꧀꧉

꧋ꦠꦸꦭꦢꦤ꧀ꦠꦸꦭꦢꦤ꧀ꦏꦱ꧀ꦧꦸꦠ꧀ꦔꦶꦁꦒꦶꦭ꧀ꦏꦢꦺꦴꦱ꧀ꦱꦩ꧀ꦥꦸꦤ꧀ꦕꦼꦏꦥ꧀ꦠꦸꦩꦿꦥ꧀ꦲꦩ꧀ꦧꦸꦏ꧀ꦠꦺꦏ꧀ꦏꦏꦼꦤ꧀ꦏꦛꦃꦲꦶꦁꦕꦫꦶꦪꦺꦴꦱ꧀ꦕꦫꦶꦪꦺꦴꦱ꧀ꦲꦶꦁꦏꦁꦚꦼꦧꦭ꧀ꦱꦏꦶꦁꦤꦭꦂ꧈ꦗꦭꦫꦤ꧀ꦱꦏꦶꦁꦏꦛꦃꦱꦲꦩꦮꦂꦤꦶꦮꦂꦤꦶꦤꦶꦁꦲꦶꦱꦶꦱꦩꦸꦢꦿ꧉ꦢꦼꦤꦼꦕꦫꦶꦪꦺꦴꦱ꧀ꦕꦫꦶꦪꦺꦴꦱ꧀ꦲꦶꦁꦏꦁꦥꦚ꧀ꦕꦺꦤ꧀ꦧꦺꦴꦠꦼꦤ꧀ꦢꦺꦴꦫꦩꦶꦭꦲꦶꦁꦒꦶꦃꦏꦛꦃ꧈ꦏꦢꦺꦴꦱ꧀ꦠ꧇ꦧꦶꦭꦶꦃꦲꦶꦁꦱꦊꦧꦼꦠ꧀ꦠꦶꦁꦱꦒꦤ꧀ꦠꦼꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦱꦠꦺꦴꦏꦼꦮꦤ꧀ꦲꦶꦁꦏꦁꦏꦤꦩꦺꦏ꧀ꦏꦏꦼꦤ꧀ꦱꦒꦮꦺꦴꦤ꧀ꦱꦒꦤ꧀ꦠꦼꦤ꧀꧈ꦥꦸꦤꦶꦏꦩꦶꦭꦊꦉꦱ꧀ꦱꦪꦼꦏ꧀ꦠꦺꦴꦱ꧀꧈ꦠꦤ꧀ꦝꦪꦼꦏ꧀ꦠꦶꦤꦶꦥꦸꦤ꧀ꦒꦩ꧀ꦧꦂꦲꦶꦁꦏꦁꦏꦕꦼꦛꦲꦶꦁꦱꦶꦱꦶꦃꦥꦸꦤꦶꦏ꧈ꦠꦼꦩ꧀ꦠꦸꦤꦶꦥꦸꦤ꧀ꦱꦭꦃꦱꦠꦸꦁꦒꦶꦭ꧀ꦭꦶꦁꦥꦫꦩꦲꦺꦴꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦩꦲꦶꦧꦼꦤ꧀꧈ꦧꦶꦭꦶꦃꦏꦼꦮꦤ꧀ꦥꦸꦤꦶꦏꦢꦼꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦱꦒꦤ꧀ꦠꦼꦤ꧀꧈ꦗꦭꦫꦤ꧀ꦲꦶꦁꦔꦿꦶꦏꦸꦏꦠꦶꦔꦭ꧀ꦲꦁꦒꦝꦃꦲꦶꦏꦸꦥꦶꦁꦏꦢꦺꦴꦱ꧀ꦢꦼꦤꦼꦏꦼꦮꦤ꧀ꦲꦶꦁꦮꦤ꧈ꦲꦤꦔꦶꦁꦏꦲꦸꦤꦶꦔꦤ꧇ꦱꦒꦮꦺꦴꦤ꧀ꦱꦒꦤ꧀ꦠꦼꦤ꧀ꦥꦸꦤꦶꦏꦲꦶꦁꦏꦁꦏꦼꦉꦥ꧀ꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦏꦶꦱꦶꦏ꧀꧈ꦢꦢꦺꦴꦱ꧀ꦒꦼꦱꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦝꦫꦠꦤ꧀ꦭꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦒꦤ꧀ꦠꦼꦤ꧀꧉

Sato Kewan Isining Sagantên

Mênggah isining sagantên punika saking pêpak, kathah saha mawarni-warninipun, ngantos anukulakên pintên-pintên cariyos ingkang asring nyêbal saking nalar, kados ta: wontên cariyos ingkang ngandharakên, bilih ing sagantên punika wontên dewanipun ingkang angratoni ing saindênging samudra sadaya, inggih punika ingkang ajêjuluk: Bathara Baruna, malah ing cariyos padhalangan wontên lampahan ingkang nyariyosakên, bilih Sang Hyang Baruna wau mundhut mantu darah Pandhawa, inggih punika putra Jodhipati Radèn Ăntarêja kadhaupakên kalihan putranipun putri ingkang kêkasih Dèwi Barunawati. Sagêd ugi bilih lampahan ingkang makatên wau namung carangan kemawon, dados nyêbal saking pakêmipun, ananging ing sawênèhing panggenan, kados ta ing Magêlang, Têmanggung lan sanès-sanèsipun, lampahan wau sampun nama limrah. Malah ing ngrika kathah têtiyang ingkang sami rêmên, amargi saking anggènipun anêngsêmakên saha ramening lampahan.

[Grafik]

Botên namung băngsa wetanan kemawon ingkang gadhah cariyosan ingkang anèh-anèh bab isining sagantên, sanajan băngsa kilenan makatên ugi, kados ta kala rumiyin băngsa kilenan anggadhahi kapitadosan, bilih ing salêbêting samudra punika wontên sawêripun ingkang saklangkung agêng, ingkang ambêbayani tumrap baita kapal ingkang sami lêlayaran, makatên ugi punggawa baita băngsa kilenan sami anggadhahi kapitadosan, bilih ing salêbêting sagantên punika wontên warni titah, ingkang anggadhahi rai saha badan kadosdene manusa, ananging ing perangan ngandhap ulam, inggih punika ingkang sok kawastanan Sarinah (Zeemeermin) dene para Sarinah wau dipun cariyosakên manawi sami anakipun dewaning samudra. Dados băngsa kilenan kala rumiyin inggih pitados, bilih ing sagantên punika wontên dewanipun ingkang angratoni ing ngriku. Dewaning sagantên dening têtiyang Jawi dipun namani: Bathara Baruna, mênggahing para kilenan dewaning sagantên wau kanamèkakên: Nèptunês (Neptunus). Para punggawa kapal ing jaman rumiyin sami anggadhahi kapitadosan, bilih Sarinah kasbut nginggil, asring anggêgodha dhatêng para têtiyang kapal. Ing sarèhning para Sarinah wau sami endah ing warni, kathah para têtiyang kapal ingkang sami kapencut saha lajêng anggêbyur ing sagantên, ingkang satêmah dados tiwasipun.

Tumrap têtiyang Jawi inggih wontên ingkang sami pitados, bilih ing salêbêting sagantên punika wontên ulam ingkang abadan manusa. Inggih punika ingkang dipun wastani ulam dhuyung. Mênggah miturut cariyosing tiyang, ulam dhuyung wau ing sakawit inggih manusa ugi, ananging sarêng kapêjahan ing lakinipun lajêng nglalu saha anggêbyur ing sagantên. Kala-kala manawi pinuju emut dhatêng ingkang jalêr, lajêng mêthungul saking sagantên saha nuntên atawang-tangis. Miturut cariyosing tiyang, sintên ingkang sagêd angsal luhing ulam dhuyung kalanipun nangis punika, lajêng sagêd angelutakên dhatêng tiyang sanès, amila lajêng wontên têtêmbungan: tiyang kenging dhuyung utawi lisah dhuyung. Punapa punika lêrês utawi botênipun kasumanggakakên ing para maos, ananging miturut ngilmu Khak, kados inggih kathah doranipun.

Tuladan-tuladan kasbut nginggil kados sampun cêkap tumrap ambuktèkakên kathahing cariyos-cariyos ingkang nyêbal saking nalar, jalaran saking kathah saha mawarni-warnining isi samudra. Dene cariyos-cariyos ingkang pancèn botên dora mila inggih kathah, kados ta: bilih ing salêbêting sagantên punika wontên sato kewan ingkang kanamèkakên sagawon sagantên, punika mila lêrês sayêktos, tăndha yêktinipun gambar ingkang kacêtha ing sisih punika, têmtunipun salah satunggiling para maos wontên ingkang maibên, bilih kewan punika dêdunung wontên ing sagantên, jalaran ing ngriku katingal anggadhahi kuping kadosdene kewan ing wana, ananging kauningana: sagawon sagantên punika ingkang kêrêp sami wontên ing kisik, dados gêsangipun wontên ing dharatan lan wontên ing sagantên.

[ 328 ]꧋ꦠꦠꦥꦿꦸꦁꦒꦸ

꧋ꦥꦚ꧀ꦕꦺꦤ꧀ꦤꦶꦥꦸꦤ꧀ꦏꦶꦫꦁꦩꦸꦁꦒꦸꦃꦏꦭꦮꦂꦠꦶꦏꦗꦮꦺꦤ꧀ꦥꦸꦤꦶꦏꦢꦶꦥꦸꦤ꧀ꦲꦶꦱꦺꦤꦶꦏꦫꦔꦤ꧀ꦧꦧ꧀ꦠꦠꦥꦿꦸꦁꦒꦸ꧈ꦲꦤꦔꦶꦁꦏꦮꦸꦤꦶꦔꦤ꧇ꦮꦺꦴꦤ꧀ꦠꦼꦤ꧀ꦱꦝꦺꦫꦺꦏ꧀ꦒꦸꦫꦸꦏꦶꦤ꧀ꦠꦸꦤ꧀ꦱꦼꦫꦠ꧀ꦝꦠꦼꦁꦉꦝꦏ꧀ꦱꦶꦧꦊꦥꦸꦱ꧀ꦠꦏ꧈ꦒꦝꦃꦥꦤꦼꦝꦱꦸꦥꦢꦺꦴꦱ꧀ꦉꦝꦏ꧀ꦱꦶꦤꦼꦫꦁꦔꦏꦼꦤ꧀ꦧꦧ꧀ꦠꦠꦥꦿꦸꦁꦒꦸꦮꦺꦴꦤ꧀ꦠꦼꦤ꧀ꦲꦶꦁꦱꦿꦶꦥꦸꦱ꧀ꦠꦏ꧈ꦗꦭꦫꦤ꧀ꦱꦝꦺꦫꦺꦏ꧀ꦒꦸꦫꦸꦮꦲꦸꦧꦺꦴꦠꦼꦤ꧀ꦔꦽꦠꦺꦴꦱ꧀ꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦠꦠꦥꦿꦸꦁꦒꦸ꧈ꦱꦩ꧀ꦥꦸꦤ꧀ꦉꦩ꧀ꦧꦒꦤ꧀ꦏꦭꦶꦲꦤ꧀ꦏꦚ꧀ꦕꦏꦚ꧀ꦕꦤꦶꦥꦸꦤ꧀ꦒꦸꦫꦸꦩꦼꦏ꧀ꦱꦧꦺꦴꦠꦼꦤ꧀ꦲꦁꦱꦭ꧀ꦢꦩꦼꦭ꧀꧈ꦩꦁꦏꦏꦼꦥꦼꦏ꧀ꦱꦩꦸꦭꦁꦔꦏꦼꦤ꧀꧉ꦲꦶꦁꦏꦁꦥꦸꦤꦶꦏꦉꦝꦏ꧀ꦱꦶꦩꦤꦃꦥꦽꦭꦸꦩꦶꦠꦸꦫꦸꦠ꧀ꦠꦶꦥꦤꦼꦝꦤꦶꦥꦸꦤ꧀ꦱꦝꦺꦫꦺꦏ꧀ꦒꦸꦫꦸꦮꦲꦸ꧈ꦲꦤꦔꦶꦁꦏꦠꦶꦩ꧀ꦧꦁꦲꦤ꧀ꦝꦫꦤ꧀ꦧꦧ꧀ꦠꦠꦥꦿꦸꦁꦒꦸꦥꦸꦤꦶꦏꦏꦥꦕꦏ꧀ꦮꦺꦴꦤ꧀ꦠꦼꦤ꧀ꦲꦶꦁ ꦱꦿꦶꦥꦸꦱ꧀ꦠꦏ꧈ꦲꦭꦸꦮꦸꦁꦮꦺꦴꦤ꧀ꦠꦼꦤ꧀ꦲꦶꦁꦏꦗꦮꦺꦤ꧀ꦔꦿꦶꦏꦶ꧈ꦲꦮꦶꦠ꧀ꦱꦿꦶꦥꦸꦱ꧀ꦠꦏ꧈ꦥꦸꦤꦶꦏꦏꦭꦮꦂꦠꦶꦧꦱꦩ꧀ꦭꦪꦸ꧈ꦢꦢꦺꦴꦱ꧀ꦧꦧ꧀ꦠꦠꦥꦿꦸꦁꦒꦸꦮꦲꦸꦢꦼꦢꦼꦩꦼꦱ꧀ꦛꦶꦤꦶꦥꦸꦤ꧀ꦏꦉꦩ꧀ꦧꦒ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧉

꧋ꦱꦗꦠꦺꦴꦱ꧀ꦱꦶꦥꦸꦤ꧀ꦲꦶꦁꦏꦁꦥꦶꦠꦏꦺꦤ꧀ꦧꦧ꧀ꦠꦠꦥꦿꦸꦁꦒꦸꦥꦸꦤꦶꦏꦱꦩ꧀ꦥꦸꦤ꧀ꦏꦛꦃ꧈ꦲꦶꦁꦱꦼꦫꦠ꧀ꦏꦧꦂꦱꦼꦢꦾꦠꦩꦲꦶꦁꦒꦶꦃꦱꦩ꧀ꦥꦸꦤ꧀ꦤꦠꦼꦮꦺꦴꦤ꧀ꦠꦼꦤ꧀ꦏꦫꦔꦤ꧀ꦲꦶꦁꦏꦁꦔ꧀ꦭꦲꦶꦂꦫꦏꦼꦤ꧀ꦥꦶꦠꦏꦺꦤ꧀ꦧꦧ꧀ꦩꦏꦠꦼꦤ꧀ꦮꦲꦸ꧈ꦲꦤꦔꦶꦁꦱꦱꦸꦩꦼꦉꦥ꧀ꦏꦸꦭꦢꦺꦫꦺꦁꦮꦺꦴꦤ꧀ꦠꦼꦤ꧀ꦮꦁꦱꦸꦭꦤ꧀ꦲꦶꦁꦏꦁꦒꦸꦩꦛꦺꦴꦏ꧀꧈ꦧꦺꦴꦏ꧀ꦩꦤꦮꦶꦏꦼꦩꦮꦺꦴꦤ꧀ꦱꦒꦼꦢ꧀ꦝꦠꦼꦁꦲꦶꦁꦏꦁꦏꦗꦶꦧꦃꦩꦁꦱꦸꦭꦶ꧈ꦲꦶꦁꦒꦶꦃꦥꦸꦤꦶꦏꦏꦸꦩꦶꦱꦶꦧꦧ꧀ꦏꦱꦸꦱꦱ꧀ꦠꦿꦤ꧀ꦗꦮꦶꦲꦶꦁꦱꦽꦮꦼꦢꦫꦶ꧉ꦲꦶꦁꦱꦢꦺꦫꦺꦁꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦏꦠꦼꦫꦔꦤ꧀ꦱꦏꦶꦁꦏꦸꦩꦶꦱꦶꦏꦱꦸꦱꦱ꧀ꦠꦿꦤ꧀ꦥꦸꦤꦶꦏꦩꦼꦱ꧀ꦛꦶꦏꦼꦩꦮꦺꦴꦤ꧀ꦠꦶꦪꦁꦠꦶꦪꦁꦢꦺꦫꦺꦁꦱꦸꦩꦼꦉꦥ꧀ꦥꦠꦶꦠꦶꦱ꧀ꦝꦠꦼꦁꦧꦧ꧀ꦠꦠꦥꦿꦸꦁꦒꦸꦮꦲꦸ꧈ꦱꦒꦼꦢ꧀ꦢꦶꦥꦸꦤ꧀ꦤꦩꦸꦁꦢꦸꦒꦶꦢꦸꦒꦶꦲꦮꦼꦮꦠꦺꦴꦤ꧀ꦥꦩꦁꦒꦶꦃꦲꦶꦁꦏꦁꦏꦼꦭꦶꦩꦿꦃꦲꦶꦁꦱꦢꦺꦫꦺꦁꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦼꦥꦛꦺꦴꦏ꧀ꦏꦤ꧀ꦲꦼꦁꦒꦭ꧀ꦧꦧ꧀ꦏꦱꦸꦱꦱ꧀ꦠꦿꦤ꧀ꦗꦮꦶꦏꦢꦺꦴꦱ꧀ꦲꦶꦁꦏꦁꦏꦝꦮꦸꦃꦲꦏꦼꦤ꧀ꦱꦩꦁꦏꦼꦥꦸꦤꦶꦏ꧉ꦢꦢꦺꦴꦱ꧀ꦥꦩꦁꦒꦶꦃꦲꦶꦁꦔꦤ꧀ꦝꦥ꧀ꦥꦸꦤꦶꦏꦢꦺꦫꦺꦁꦏꦼꦔꦶꦁꦢꦶꦥꦸꦤ꧀ꦲꦸꦒꦼꦩꦶꦊꦉꦱ꧀ꦱꦶꦥꦸꦤ꧀꧈ꦤꦩꦸꦁꦭꦸꦩꦪꦤ꧀ꦏꦁꦒꦼꦲꦩ꧀ꦧꦭꦧꦫꦶꦲꦶꦁꦱꦢꦺꦫꦺꦁꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦮꦁꦱꦸꦭꦤ꧀ꦤꦶꦥꦸꦤ꧀ꦲꦶꦁꦏꦁꦮꦗꦶꦧ꧀꧉

꧋ꦤꦩ꧇ꦠꦠꦥꦿꦸꦁꦒꦸ꧈ꦥꦸꦤꦶꦏꦲꦶꦁꦱꦱꦸꦩꦼꦉꦥ꧀ꦏꦸꦭꦮꦺꦴꦤ꧀ꦠꦼꦤ꧀ꦲꦶꦁꦠꦤꦃꦒꦸꦥꦽꦩꦼꦤꦤ꧀ꦧꦺꦴꦠꦼꦤ꧀ꦏꦼꦭꦶꦩꦿꦃ꧈ꦗꦭꦂꦫꦤ꧀ꦱꦼꦫꦠ꧀ꦥꦫꦩꦱꦱ꧀ꦠꦿꦲꦶꦁꦏꦁꦭꦶꦩꦿꦃꦏꦁꦒꦼꦲꦸꦒꦶꦧꦺꦴꦠꦼꦤ꧀ꦚꦼꦧꦸꦠ꧀ꦠꦏꦼꦤ꧀꧈ꦩꦶꦭꦧꦺꦴꦠꦼꦤ꧀ꦲꦁꦒꦸꦩꦸꦤ꧀ꦤꦏꦼꦤ꧀ꦩꦤꦮꦶꦥꦫꦒꦸꦫꦸꦏꦛꦃꦲꦶꦁꦏꦁꦱꦩꦶꦧꦺꦴꦠꦼꦤ꧀ꦩꦔꦽꦠꦺꦴꦱ꧀꧉ꦢꦢꦺꦴꦱ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦶꦁꦏꦁꦔꦁꦒꦺꦏ꧀ꦏꦏꦼꦤ꧀ꦤꦩꦠꦠꦥꦿꦸꦁꦒꦸꦮꦲꦸꦤꦩꦸꦁꦧꦁꦱꦤꦶꦁꦱꦼꦫꦠ꧀ꦥꦫꦩꦱꦱ꧀ꦠꦿꦮꦼꦢꦭ꧀ꦭꦤ꧀ꦠꦤꦃꦏꦗꦮꦺꦤ꧀꧈ꦧꦏꦸꦤꦶꦥꦸꦤ꧀ꦲꦶꦁꦱꦸꦫꦏꦂꦠ꧉ꦮꦺꦴꦤ꧀ꦠꦼꦤ꧀ꦲꦶꦁꦱꦼꦫꦠ꧀ꦱꦼꦫꦠ꧀ꦲꦸꦠꦮꦶꦲꦶꦁꦥꦔꦤ꧀ꦢꦶꦏꦤ꧀꧈ꦏꦸꦭꦲꦶꦁꦒꦶꦃꦢꦺꦫꦺꦁꦤꦠꦼꦩꦽꦒꦺꦴꦏꦶꦲꦸꦠꦮꦶꦩꦶꦉꦁꦧꦧ꧀ꦠꦼꦒꦼꦱ꧀ꦱꦶꦁꦤꦩꦠꦠꦥꦿꦸꦁꦒꦸꦮꦲꦸ꧉ꦲꦶꦁꦧꦲꦸꦱꦱ꧀ꦠꦿ T. Roorda ꦱꦂꦠ K.F. W꧈ꦤꦩ꧇ꦠꦠꦥꦿꦸꦁꦒꦸꦮꦲꦸꦲꦶꦁꦒꦶꦃꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀꧉ꦱꦏꦶꦁꦥꦩꦁꦒꦶꦃꦏꦸꦭꦥꦶꦪꦩ꧀ꦧꦏ꧀꧈ꦠꦼꦒꦼꦱꦶꦥꦸꦤ꧀ꦤꦩ꧇ꦠꦠꦥꦿꦸꦁꦒꦸ꧈ꦠꦠꦤꦶꦁꦉꦉꦁꦒꦤ꧀꧈ꦠꦠꦤꦶꦁꦥꦔꦽꦁꦒ꧈ꦠꦠꦤꦶꦁꦥꦱꦿꦺꦤ꧀꧉ꦩꦼꦁꦒꦃꦠꦼꦫꦁꦔꦶꦥꦸꦤ꧀ꦩꦏꦠꦼꦤ꧀꧇ꦠꦠ=ꦲꦠꦸꦫꦤ꧀꧈ꦥꦿꦤꦠꦤ꧀꧉ꦠꦼꦩ꧀ꦧꦸꦁ꧇ꦥꦿꦸꦁꦒꦸ=ꦲꦶꦁꦤꦔꦿꦶꦏꦸꦥꦏꦺꦮꦼꦢ꧀ꦲꦁꦒꦺꦤ꧀ꦏꦸꦭꦧꦝꦼꦤꦼꦒꦼꦱꦶ꧈ꦗꦭꦫꦤ꧀ꦲꦶꦁꦱꦱꦸꦩꦼꦉꦥ꧀ꦏꦸꦭ꧈ꦥꦿꦸꦁꦒꦸ꧇ꦥꦸꦤꦶꦏꦤꦩꦤꦶꦁꦕꦩ꧀ꦥꦸꦂꦫꦤ꧀ꦤꦶꦥꦸꦤ꧀ꦠꦼꦩ꧀ꦧꦒꦏꦭꦶꦲꦤ꧀ꦗꦱꦠ꧀ꦱꦤꦺꦱ꧀꧈ꦱꦺꦁꦲꦸꦠꦮꦶꦠꦶꦩꦃ꧈ꦥꦤꦸꦁꦒꦶꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦏꦁꦏꦮꦱ꧀ꦠꦤꦤ꧀ꦧꦿꦺꦴꦤ꧀ꦱ꧀ꦲꦶꦁꦧꦁꦱꦮꦭꦤ꧀ꦢꦶ꧈ꦮꦂꦤꦶꦤꦶꦥꦸꦤ꧀ꦲꦶꦁꦒꦶꦃꦏꦢꦺꦴꦱ꧀ꦠꦼꦩ꧀ꦧꦒ꧉ꦲꦤꦔꦶꦁꦠꦼꦒꦼꦱꦶꦥꦸꦤ꧀ꦠꦼꦩ꧀ꦧꦸꦁꦥꦿꦸꦁꦒꦸ꧇ꦲꦶꦁꦏꦁꦩꦏꦠꦼꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦏꦁꦤꦩ꧇ꦠꦠꦥꦿꦸꦁꦒꦸ꧇ꦧꦺꦴꦠꦼꦤ꧀ꦱꦒꦼꦢ꧀ꦩꦤ꧀ꦠꦸꦏ꧀꧉ꦩꦶꦭꦱꦏꦶꦁꦥꦔꦶꦤ꧀ꦠꦼꦤ꧀ꦏꦸꦭ꧈ꦥꦿꦸꦁꦒꦸ꧇ꦮꦲꦸꦩꦼꦱ꧀ꦛꦶꦤꦶꦥꦸꦤ꧀ꦏꦼꦭꦤ꧀ꦠꦸꦂꦫꦶꦁꦠꦼꦩ꧀ꦧꦸꦁ꧇ꦥꦫꦸꦁꦒꦸ=ꦥ+ꦫꦸꦁꦒꦸ꧉ꦠꦼꦩ꧀ꦧꦸꦁꦫꦸꦁꦒꦸ꧇ꦥꦸꦤꦶꦏꦩꦶꦠꦸꦫꦸꦠ꧀ꦱꦼꦫꦠ꧀ꦧꦲꦸꦱꦱ꧀ꦠꦿꦱꦩꦶꦏꦭꦶꦲꦤ꧀꧇ꦫꦸꦔ꧀ꦒ꧀ꦮ꧈ꦫꦸꦔ꧀ꦒꦾ꧈ꦠꦼꦒꦼꦱꦶꦥꦸꦤ꧀ꦮꦂꦤꦶꦮꦂꦤꦶ꧈ꦱꦏꦶꦁꦥꦩꦁꦒꦶꦃꦏꦸꦭꦤꦩꦸꦁꦱꦠꦸꦁꦒꦭ꧀ꦲꦶꦁꦏꦁꦱꦒꦼꦢ꧀ꦩꦤ꧀ꦠꦸꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦩ꧇ꦠꦠꦥꦿꦸꦁꦒꦸ꧈ꦲꦶꦁꦒꦶꦃꦥꦸꦤꦶꦏ꧇ꦉꦁꦒ꧉ꦢꦢꦺꦴꦱ꧀ꦏꦗꦼꦁꦔꦶꦁꦤꦩ꧇ꦠꦠꦥꦿꦸꦁꦒꦸ꧇ꦥꦸꦤꦶꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀꧇ꦠꦠꦤꦶꦁꦥꦔꦽꦁꦒ꧈ꦠꦠꦤꦶꦁꦥꦱꦿꦺꦤ꧀꧈ꦲꦤꦔꦶꦁ꧇ꦥꦔꦽꦁꦒ꧈ꦲꦸꦠꦮꦶ꧇ꦥꦱꦿꦺꦤ꧀꧈ꦲꦶꦁꦤꦩꦥꦸꦤꦶꦏꦧꦺꦴꦏ꧀ꦩꦤꦮꦶꦏꦼꦩꦮꦺꦴꦤ꧀ꦲꦶꦁꦏꦁꦢꦶꦥꦸꦤ꧀ꦏꦗꦼꦁꦔꦏꦼꦤ꧀꧇ꦥꦔꦽꦁꦒꦲꦸꦠꦮꦶꦥꦱꦿꦺꦤ꧀ꦲꦶꦁꦏꦁꦩꦶꦤꦁꦏꦥꦏꦸꦂꦩꦠ꧀ꦠꦤ꧀꧉ꦠꦤ꧀ꦝꦤꦶꦥꦸꦤ꧀ꦲꦸꦔꦼꦭ꧀ꦲꦸꦔꦼꦭꦤ꧀꧇ꦏꦁꦒꦼꦮꦺꦴꦤ꧀ꦠꦼꦤ꧀ꦲꦶꦁꦠꦠꦥꦿꦸꦁꦒꦸ꧇ꦢꦶꦥꦸꦤ꧀ꦠꦼꦒꦼꦱꦶ꧇ꦏꦁꦒꦼꦥꦏꦸꦂꦩꦠꦤ꧀꧌ꦮꦼꦮꦠꦺꦴꦤ꧀ꦥꦚꦼꦫꦠ꧀ꦠꦶꦥꦸꦤ꧀ꦠꦼꦩ꧀ꦧꦸꦁꦗꦮꦶꦩꦮꦶꦱꦱ꧀ꦠꦿꦗꦮꦶꦩꦶꦠꦸꦫꦸꦠ꧀ꦥꦸꦠꦸꦱꦤ꧀ꦥꦉꦥ꧀ꦥꦠꦤ꧀ꦏꦸꦩꦶꦱꦶꦏꦱꦸꦱꦱ꧀ꦠꦿꦤ꧀ꦲꦶꦁꦱꦿꦶꦮꦼꦢꦫꦶꦏꦕ꧇꧑꧒꧇ꦧꦧ꧀ꦼꦲꦢꦲꦢ꧇꧑꧇꧍

꧋ꦩꦶꦠꦸꦫꦸꦠ꧀ꦱꦼꦫꦠ꧀ꦮꦼꦮꦠꦺꦴꦤ꧀ꦲꦶꦁꦏꦁꦩꦼꦤ꧀ꦠꦱ꧀ꦏꦸꦭꦱꦼꦧꦸꦠ꧀ꦠꦏꦼꦤ꧀ꦥꦸꦤꦶꦏ꧈ꦲꦏ꧀ꦱꦫꦩꦸꦂꦢꦏꦺꦔꦶꦁꦔꦶꦥꦸꦤ꧀ꦏꦁꦒꦺꦤ [ 329 ]ꦩꦸꦁꦮꦺꦴꦤ꧀ꦠꦼꦤ꧀ꦲꦶꦁꦠꦠꦥꦿꦸꦁꦒꦸ꧈ꦢꦢꦺꦴꦱ꧀ꦤꦩꦸꦁꦏꦁꦒꦺꦥꦏꦸꦂꦩꦠ꧀ꦠꦤ꧀꧉ꦱꦧꦼꦤ꧀ꦠꦶꦪꦁꦱꦩ꧀ꦥꦸꦤ꧀ꦔꦽꦠꦺꦴꦱ꧀ꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦥꦏꦸꦂꦩꦠ꧀ꦠꦤ꧀꧈ꦲꦶꦁꦒꦶꦃꦥꦸꦤꦶꦏꦥꦿꦠꦤ꧀ꦝꦲꦶꦁꦏꦁꦏꦁꦒꦺꦤꦺꦭꦏ꧀ꦏꦏꦼꦤ꧀ꦥꦔꦗꦶꦲꦗꦶꦤꦶꦁꦩꦤꦃꦝꦠꦼꦁꦠꦶꦪꦁꦱꦤꦺꦱ꧀ꦩꦶꦠꦸꦫꦸꦠ꧀ꦠꦠꦏꦿꦩ꧉ꦢꦢꦺꦴꦱ꧀ꦥꦔꦁꦒꦺꦤ꧀ꦤꦶꦥꦸꦤ꧀ꦲꦏ꧀ꦱꦫꦩꦸꦂꦢꦩꦶꦠꦸꦫꦸꦠ꧀ꦱꦼꦫꦠ꧀ꦮꦼꦮꦠꦺꦴꦤ꧀ꦮꦲꦸ꧈ꦱꦏꦶꦁꦥꦩꦁꦒꦶꦃꦏꦸꦭꦤꦩꦸꦁꦩꦤꦸꦠ꧀ꦮꦠꦺꦴꦤ꧀ꦤꦶꦁꦠꦠꦏꦿꦩꦧꦊꦗꦼꦢ꧀꧈ꦥꦸꦤ꧀ꦢꦶꦲꦶꦁꦏꦁꦮꦗꦶꦧ꧀ꦢꦶꦥꦸꦤ꧀ꦏꦸꦂꦩꦠꦶꦲꦶꦁꦒꦶꦃꦏꦱꦼꦫꦠ꧀ꦩꦮꦶꦲꦏ꧀ꦱꦫꦩꦸꦂꦢ꧉ꦲꦶꦁꦏꦁꦥꦸꦤꦶꦏꦩꦤꦮꦶꦧꦝꦺꦊꦉꦱ꧀ꦥꦔꦁꦒꦺꦤ꧀ꦤꦶꦥꦸꦤ꧀ꦲꦏ꧀ꦱꦫꦩꦸꦂꦢ꧈ꦲꦶꦁꦒꦶꦃꦏꦼꦢꦃꦝꦩꦁꦱꦼꦱꦼꦉꦥ꧀ꦥꦤ꧀ꦤꦶꦥꦸꦤ꧀ꦝꦠꦼꦁꦲꦸꦁꦒꦃꦲꦸꦁꦒꦸꦃꦲꦶꦁꦠꦠꦏꦿꦩ꧉ꦱꦼꦫꦠ꧀ꦠꦠꦱꦱ꧀ꦠꦿ꧌ꦥꦛꦺꦴꦏꦤ꧀ꦤꦶꦁꦥꦚꦼꦫꦠ꧀ꦱꦏꦶꦁꦥꦩꦺꦴꦂꦫꦶꦥꦸꦤ꧀ꦥꦶꦮꦸꦭꦁꦥꦫꦩꦱꦱ꧀ꦠꦿ꧈ꦮꦾꦏꦫꦤ꧈ꦒꦿꦩ꧀ꦩꦠꦶꦕꦱꦂꦠꦥꦫꦩꦧꦱ꧍ꦮꦼꦢꦭꦤ꧀ꦱꦸꦫꦏꦂꦠꦤꦼꦫꦁꦔꦏꦼꦤ꧀꧈ꦧꦶꦭꦶꦃꦠꦠꦥꦿꦸꦁꦒꦸꦥꦸꦤꦶꦏꦱꦩꦶꦱꦩꦶꦏꦊꦧꦼꦠ꧀ꦲꦔꦺꦭ꧀ꦥꦶꦪꦩ꧀ꦧꦏ꧀ꦥꦩꦛꦺꦴꦏ꧀ꦏꦶꦥꦸꦤ꧀꧈ꦗꦭꦫꦤ꧀ꦲꦸꦁꦒꦃꦲꦸꦁꦒꦸꦃꦲꦶꦁꦠꦠꦏꦿꦩꦥꦸꦤꦶꦏꦥꦿꦱꦱꦠ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦤ꧀ꦝꦼꦒ꧀ꦒꦶꦥꦸꦤ꧀꧈ꦲꦮꦶꦠ꧀ꦱꦤꦢꦾꦤ꧀ꦥꦿꦶꦪꦤ꧀ꦠꦸꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦲꦒꦼꦁꦲꦶꦁꦒꦶꦃꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦲꦶꦁꦏꦁꦔꦸꦁꦏꦸꦭꦶꦲꦒꦼꦁꦔꦶꦥꦸꦤ꧀ꦩꦭꦶꦃ꧈ꦱꦩꦤ꧀ꦠꦼꦤ꧀ꦲꦸꦒꦶꦏꦺꦴꦱꦺꦴꦏ꧀ꦮꦁꦱꦸꦭ꧀ꦭꦶꦥꦸꦤ꧀꧈ꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦲꦭꦶꦠ꧀ꦱꦒꦼꦢ꧀ꦢꦢꦺꦴꦱ꧀ꦲꦒꦼꦁꦗꦭꦫꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦭꦁꦏꦸꦁꦲꦭꦶꦠ꧀ꦩꦭꦶꦃ꧉

꧋ꦢꦢꦺꦴꦱ꧀ꦥꦔꦁꦒꦼꦤ꧀ꦤꦶꦥꦸꦤ꧀ꦲꦏ꧀ꦱꦫꦩꦸꦂꦢꦩꦶꦠꦸꦫꦸꦠ꧀ꦠꦠꦥꦿꦸꦁꦒꦸꦥꦸꦤꦶꦏꦠꦼꦫꦁꦧꦺꦴꦠꦼꦤ꧀ꦒꦩ꧀ꦥꦶꦭ꧀꧈ꦲꦤꦔꦶꦁꦲꦶꦁꦒꦶꦃꦏꦼꦔꦶꦁꦢꦶꦥꦸꦤ꧀ꦲꦚ꧀ꦕꦼꦂꦲꦚ꧀ꦕꦼꦫꦶꦱꦮꦠꦮꦶꦱ꧀ꦩꦏꦠꦼꦤ꧀꧇ꦲꦶꦁꦏꦁꦮꦗꦶꦧ꧀ꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦩꦸꦂꦢꦥꦸꦤꦶꦏꦲꦶꦁꦏꦁꦮꦗꦶꦧ꧀ꦲꦁꦱꦭ꧀ꦥꦏꦸꦂꦩꦠ꧀ꦠꦤ꧀꧈ꦏꦢꦺꦴꦱ꧀ꦠ꧇ꦱꦼꦱꦼꦧꦸꦠ꧀ꦠꦤ꧀ꦱꦂꦠꦲꦱ꧀ꦩꦤꦶꦥꦸꦤ꧀ꦲꦶꦁꦏꦁꦮꦗꦶꦧ꧀ꦢꦶꦥꦸꦤ꧀ꦲꦗꦺꦤꦶ꧉ꦲꦤꦔꦶꦁꦧꦺꦴꦠꦼꦤ꧀ꦱꦢꦪꦲꦶꦁꦏꦁꦮꦗꦶꦧ꧀ꦢꦶꦥꦸꦤ꧀ꦲꦗꦺꦤꦶꦮꦲꦸꦧꦺꦴꦠꦼꦤ꧀[꧇꧑꧇]ꦩꦼꦱ꧀ꦛꦶꦮꦗꦶꦧ꧀ꦲꦁꦱꦭ꧀ꦥꦏꦸꦂꦩꦪ꧀ꦠꦤ꧀꧈ꦗꦭꦫꦤ꧀ꦩꦤꦮꦶꦲꦶꦁꦏꦁꦮꦗꦶꦧ꧀ꦢꦶꦥꦸꦤ꧀ꦲꦗꦺꦤꦶꦥꦸꦤꦶꦏꦏꦛꦃ꧈ꦲꦶꦁꦏꦁꦮꦗꦶꦧ꧀ꦲꦁꦱꦭ꧀ꦥꦏꦸꦂꦩꦪ꧀ꦠꦤ꧀ꦤꦩꦸꦁꦲꦶꦁꦏꦁꦭꦸꦲꦸꦂꦭꦸꦲꦸꦂꦏꦼꦩꦮꦺꦴꦤ꧀꧈ꦩꦭꦃꦲꦶꦁꦏꦁꦮꦗꦶꦧ꧀ꦲꦁꦱꦭ꧀ꦥꦏꦸꦂꦩꦠ꧀ꦠꦤ꧀ꦗꦁꦏꦼꦥ꧀ꦤꦩꦸꦁꦱꦠꦸꦁꦒꦭ꧀ꦲꦶꦁꦏꦁꦭꦸꦲꦸꦂꦥꦶꦪꦩ꧀ꦧꦏ꧀꧈ꦩꦤꦮꦶꦮꦼꦤꦁꦱꦶꦤꦼꦩ꧀ꦧꦃꦲꦶꦁꦒꦶꦃꦲꦁꦱꦭ꧀ꦱꦼꦩ꧀ꦧꦃꦩꦶꦪꦩ꧀ꦧꦏ꧀ꦏꦶ꧉ꦈꦥꦩꦶꦤꦶꦥꦸꦤ꧀ꦏꦶꦤ꧀ꦠꦸꦤ꧀ꦱꦼꦫꦠ꧀ꦝꦠꦼꦁꦊꦭꦸꦫꦃ꧈ꦥꦸꦤꦶꦏꦲꦱ꧀ꦩꦤꦶꦁꦊꦭꦸꦫꦃꦮꦲꦸꦮꦗꦶꦧ꧀ꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦩꦸꦂꦢ꧈ꦱꦂꦠꦱꦼꦱꦼꦧꦸꦠ꧀ꦠꦤ꧀ꦤꦶꦥꦸꦤ꧀꧈ꦩꦤꦮꦶꦱꦏꦶꦤ꧀ꦠꦼꦤ꧀ꦥꦤ꧀ꦠꦼꦱ꧀ꦲꦶꦁꦒꦶꦃꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦩꦸꦂꦢꦲꦸꦒꦶ꧈ꦢꦼꦤꦼꦱꦼꦱꦼꦧꦸꦠ꧀ꦠꦤ꧀ꦱꦂꦠꦤꦩꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦏꦼꦢꦃꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦲꦭꦶꦠ꧀꧉ꦩꦤꦮꦶꦏꦶꦤ꧀ꦠꦸꦤ꧀ꦱꦼꦫꦠ꧀ꦝꦠꦼꦁꦠꦶꦪꦁꦱꦔꦤ꧀ꦝꦥ꧀ꦥꦶꦥꦸꦤ꧀꧈ꦥꦸꦤꦶꦏꦩꦮꦶꦩꦮꦁꦩꦮꦁ꧉ꦪꦺꦤ꧀ꦲꦶꦁꦏꦁꦢꦶꦥꦸꦤ꧀ꦏꦶꦤ꧀ꦠꦸꦤ꧀ꦤꦶꦥꦸꦤꦶꦏꦥꦽꦭꦸꦢꦶꦥꦸꦤ꧀ꦲꦗꦺꦤꦶꦲꦸꦠꦮꦶꦢꦶꦥꦸꦤ꧀ꦠꦏ꧀ꦭꦶꦩꦶ꧈ꦱꦼꦱꦼꦧꦸꦠ꧀ꦠꦤ꧀ꦲꦸꦠꦮꦶꦤꦩꦤꦶꦥꦸꦤ꧀ꦲꦶꦁꦒꦶꦃꦥꦤ꧀ꦠꦼꦱ꧀ꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦩꦸꦂꦢ꧉ꦈꦥꦩꦶꦚꦫꦶꦪꦺꦴꦱ꧀ꦱꦏꦼꦤ꧀ꦠꦶꦪꦁꦮꦺꦴꦤ꧀ꦠꦼꦤ꧀ꦲꦶꦁꦱꦼꦫꦠ꧀ꦲꦸꦠꦮꦶꦏꦫꦔꦤ꧀꧈ꦩꦤꦮꦶꦠꦶꦪꦁꦥꦸꦤꦶꦏꦥꦤ꧀ꦠꦼꦱ꧀ꦢꦶꦥꦸꦤ꧀ꦏꦸꦂꦩꦠꦶꦝꦠꦼꦁꦲꦶꦁꦏꦁꦏꦶꦤ꧀ꦠꦸꦤ꧀ꦱꦂꦠꦠꦩ꧀ꦥꦶꦱꦼꦫꦠ꧀꧈ꦱꦼꦱꦼꦧꦸꦠ꧀ꦠꦤ꧀ꦠꦸꦮꦶꦤ꧀ꦲꦱ꧀ꦩꦤꦶꦥꦸꦤ꧀ꦲꦶꦁꦏꦁꦏꦕꦫꦶꦪꦺꦴꦱ꧀ꦱꦏꦼꦤ꧀ꦥꦸꦤꦶꦏꦮꦗꦶꦧ꧀ꦏꦱꦼꦫꦠ꧀ꦔꦁꦒꦼꦲꦏ꧀ꦱꦫꦩꦸꦂꦢ꧉ꦲꦤꦔꦶꦁꦩꦤꦮꦶꦲꦶꦁꦏꦁꦏꦕꦫꦶꦪꦺꦴꦱ꧀ꦱꦏꦼꦤ꧀ꦥꦸꦤꦶꦏꦏꦛꦃ꧈ꦲꦶꦁꦏꦁꦩꦼꦱ꧀ꦛꦶꦲꦁꦱꦭ꧀ꦥꦏꦸꦂꦩꦠ꧀ꦠꦤ꧀ꦲꦏ꧀ꦱꦫꦩꦸꦂꦢꦤꦩꦸꦁꦱꦠꦸꦁꦒꦭ꧀ꦲꦶꦁꦏꦁꦭꦸꦲꦸꦂꦥꦶꦪꦩ꧀ꦧꦏ꧀꧉

꧋ꦠꦸꦭꦝ꧇ꦏꦸꦭꦔꦠꦸꦂꦫꦶꦥꦿꦶꦏ꧀ꦱꦝꦠꦼꦁꦏꦁꦩꦱ꧀ꦩꦤ꧀ꦠꦿꦶꦄꦂꦗꦢꦂꦱꦤꦱꦏꦭꦶꦲꦤ꧀꧈ꦧꦶꦭꦶꦃꦧꦼꦚ꧀ꦗꦶꦁꦢꦶꦤ꧀ꦠꦼꦤ꧀ꦉꦧꦺꦴꦥꦺꦴꦤ꧀ꦠꦁꦒꦭ꧀꧇꧒꧇ꦮꦸꦭꦤ꧀ꦥꦸꦤꦶꦏꦏꦸꦭꦒꦝꦃꦏꦗꦠ꧀ꦧꦝꦼꦚꦸꦤꦠ꧀ꦠꦏꦼꦤ꧀ꦲꦶꦁꦏꦁꦥꦸꦠꦿꦲꦤꦏ꧀ꦏꦸꦭꦲꦺꦱ꧀ꦠꦿꦶꦥꦸꦤ꧀ꦒꦼꦤ꧀ꦝꦸꦏ꧀ꦱꦸꦢꦂꦩꦶ꧉

꧋ꦏꦸꦭꦠꦩ꧀ꦥꦶꦮꦼꦭꦶꦁꦔꦶꦥꦸꦤ꧀ꦲꦶꦁꦏꦁꦫꦩꦏꦁꦩꦱ꧀ꦥꦠꦶꦃꦥꦿꦗꦥꦸꦱꦫ꧈ꦧꦼꦚ꧀ꦗꦶꦁꦢꦶꦤ꧀ꦠꦼꦤ꧀ꦔꦲꦢ꧀ꦔꦗꦼꦁꦥꦸꦤꦶꦏꦲꦶꦁꦏꦁꦫꦏꦫꦢꦺꦤ꧀ꦩꦱ꧀ꦄꦱꦶꦱ꧀ꦠꦺꦤ꧀ꦥꦿꦗꦱꦸꦮꦶꦒ꧀ꦚꦏꦠꦶꦩ꧀ꦧꦭ꧀ꦭꦤ꧀ꦝꦠꦼꦁꦠꦼꦩꦁꦒꦸꦁ꧉

꧋ꦱꦉꦁꦩꦤ꧀ꦠꦿꦶꦥꦸꦭꦶꦱꦶꦏꦶꦛꦫꦢꦺꦤ꧀ꦩꦱ꧀ꦱꦸꦗꦤꦠꦩ꧀ꦥꦶꦥꦭꦥꦸꦂꦫꦤꦶꦁꦭꦸꦫꦃ꧈ꦲꦺꦁꦒꦭ꧀ꦲꦺꦁꦒꦭ꧀ꦢꦤ꧀ꦢꦺꦴꦱ꧀ꦱꦂꦠꦱꦺꦴꦮꦤ꧀ꦝꦠꦼꦁꦲꦶꦁꦏꦁꦫꦏꦫꦢꦺꦤ꧀ꦩꦱ꧀ꦮꦢꦤꦤꦶꦠꦶꦥꦸꦫ꧉

꧋ꦲꦶꦁꦏꦁꦱꦺꦴꦮꦤ꧀ꦲꦶꦁꦏꦧꦸꦥꦠꦺꦤ꧀ꦥꦼꦥꦏ꧀꧇ꦫꦢꦺꦤ꧀ꦥꦿꦗꦥꦸꦱꦫ꧇ꦥꦠꦶꦃ꧈ꦫꦢꦺꦤ꧀ꦩꦱ꧀ꦤꦶꦠꦶꦥꦸꦫ꧇ꦮꦢꦤ꧈ꦫꦢꦺꦤ꧀ꦉꦏ꧀ꦱꦲꦂꦢꦤ꧇ꦏꦺꦴꦭꦺꦏ꧀ꦠꦸꦂ꧈ꦫꦢꦺꦤ꧀ꦩꦱ꧀ꦥꦿꦗꦱꦸꦮꦶꦒ꧀ꦚ꧇ꦲꦱꦶꦱ꧀ꦠꦺꦤ꧀ꦮꦢꦤ꧈ꦫꦢꦺꦤ꧀ꦩꦱ꧀ꦱꦸꦗꦤ꧇ꦩꦤ꧀ꦠꦿꦶꦥꦸꦭꦶꦱꦶ꧉ꦱꦉꦁꦏꦚ꧀ꦗꦼꦁꦧꦸꦥꦠꦶꦩꦶꦪꦺꦴꦱ꧀ꦱꦏꦶꦁꦢꦊꦩ꧀꧈ꦲꦶꦁꦏꦁꦱꦩꦶꦱꦺꦴꦮꦤ꧀ꦭꦗꦼꦁꦱꦩꦶꦔꦢꦼꦒ꧀ꦱꦏꦶꦁꦏꦸꦂꦱꦶꦔꦠꦸꦂꦫꦶꦲꦸꦂꦩꦠ꧀꧉

꧋ꦩꦏꦠꦼꦤ꧀ꦥꦩꦁꦒꦶꦃꦏꦸꦭꦧꦧ꧀ꦥꦔꦁꦒꦼꦤ꧀ꦤꦶꦥꦸꦤ꧀ꦲꦏ꧀ꦱꦫꦩꦸꦂꦢꦩꦶꦠꦸꦫꦸꦠ꧀ꦠꦠꦥꦿꦸꦁꦒꦸ꧈ꦲꦤꦔꦶꦁꦊꦉꦱ꧀ꦊꦥꦠ꧀ꦠꦶꦥꦸꦤ꧀ꦥꦿꦪꦺꦴꦒꦶꦔꦼꦤ꧀ꦠꦺꦴꦱ꧀ꦱꦶꦏꦠꦼꦫꦔꦤ꧀ꦱꦏꦶꦁꦏꦸꦩꦶꦱꦶꦏꦱꦸꦱꦱ꧀ꦠꦿꦤ꧀ꦲꦶꦁꦱꦿꦶꦮꦼꦢꦫꦶ꧉

Tataprunggu

Pancènipun kirang mungguh kalawarti Kajawèn punika dipun isèni karangan bab tataprunggu, ananging kawuningana: wontên sadhèrèk guru kintun sêrat dhatêng rêdhaksi Bale Pustaka, gadhah panêdha supados rêdhaksi nêrangakên bab tataprunggu wontên ing Sri Poestaka, jalaran sadhèrèk guru wau botên ngrêtos ingkang dipun wastani tataprunggu, sampun rêmbagan kalihan kănca-kancanipun guru mêksa botên angsal damêl, măngka kêpêksa mulangakên. Ingkang punika rêdhaksi manah prêlu mituruti panêdhanipun sadhèrèk guru wau, ananging katimbang andharan bab tataprunggu punika kapacak wontên ing Sri Poestaka, aluwung wontên ing Kajawèn ngriki, awit Sri Poestaka, punika kalawarti basa Mlayu, dados bab tataprunggu wau dede mêsthinipun karêmbag wontên ing ngriku.

Sajatosipun ingkang pitakèn bab tataprunggu punika sampun kathah, ing sêrat kabar Sêdyatama inggih sampun nate wontên karangan ingkang nglairakên pitakèn bab makatên wau, ananging sasumêrêp kula dèrèng wontên wangsulan ingkang gumathok, bokmanawi kemawon sagêd dhatêng ingkang kajibah mangsuli, inggih punika kumisi bab kasusastran Jawi ing Srêwêdari. Ing sadèrèngipun wontên katêrangan saking kumisi kasusastran punika mêsthi kemawon tiyang-tiyang dèrèng sumêrêp patitis dhatêng bab tataprunggu wau, sagêdipun namung dugi-dugi awêwaton pamanggih ingkang kêlimrah ing sadèrèngipun wontên pêpathokan enggal bab kasusastran Jawi kados ingkang kadhawuhakên samangke punika. Dados pamanggih ing ngandhap punika dèrèng kenging dipun ugêmi lêrêsipun, namung lumayan kangge ambalabari ing sadèrèngipun wontên wangsulanipun ingkang wajib.

Nama: tataprunggu, punika ing sasumêrêp kula wontên ing tanah guprêmenan botên kêlimrah, jalaran Sêrat Paramasastra ingkang limrah kangge ugi botên nyêbutakên, mila botên anggumunakên manawi para guru kathah ingkang sami botên mangrêtos. Dados kintên-kintên ingkang nganggèkakên nama tataprunggu wau namung bangsaning Sêrat Paramasastra wêdalan tanah Kajawèn, bakunipun ing Surakarta. Wontên ing sêrat-sêrat utawi ing pangandikan, kula inggih dèrèng nate mrêgoki utawi mirêng bab têgêsing nama tataprunggu wau. Ing bausastra T. Roorda sarta K.F. Winter, nama: tataprunggu wau inggih botên wontên. Saking pamanggih kula piyambak, têgêsipun nama: tataprunggu, tataning rêrênggan, tataning pangrêngga, tataning pasrèn. Mênggah têrangipun makatên: tata = aturan, pranatan. Têmbung: prunggu = ing ngriku pakèwêd anggèn kula badhe nêgêsi, jalaran ing sasumêrêp kula, prunggu: punika namaning campuranipun têmbaga kalihan jasat sanès, sèng utawi timah, panunggilanipun ingkang kawastanan brons ing băngsa Walandi, warninipun inggih kados têmbaga. Ananging têgêsipun têmbung prunggu: ingkang makatên wau wontên ingkang nama: tataprunggu: botên sagêd mantuk. Mila saking pangintên kula, prunggu: wau mêsthinipun kêlanturing têmbung: parunggu = pa + runggu. Têmbung runggu: punika miturut Sêrat Bausastra sami kalihan: runggwa, runggya, têgêsipun warni-warni, saking pamanggih kula namung satunggal ingkang sagêd mantuk wontên ing nama: tataprunggu, inggih punika: rêngga. Dados kajênging nama: tataprunggu: punika kintên-kintên: tataning pangrêngga, tataning pasrèn, ananging: pangrêngga, utawi: pasrèn, ing nama punika bokmanawi kemawon ingkang dipun kajêngakên: pangrêngga utawi pasrèn ingkang minăngka pakurmatan. Tandhanipun ungêl-ungêlan: kangge wontên ing tataprunggu: dipun têgêsi: kangge pakurmatan (wêwaton panyêratipun têmbung Jawi mawi sastra Jawi miturut putusan parêpatan kumisi kasusastran ing Sriwêdari kaca 12 bab X ada-ada 1):

Miturut sêrat wêwaton ingkang mêntas kula sêbutakên punika, aksara murda kengingipun kangge namung wontên ing tataprunggu, dados namung kangge pakurmatan. Sabên tiyang sampun ngrêtos ingkang dipun wastani pakurmatan, inggih punika pratăndha ingkang kangge nelakakên pangaji-ajining manah dhatêng tiyang sanès miturut tatakrama. Dados panganggenipun aksara murda miturut sêrat wêwaton wau, saking pamanggih kula namung manut watoning tatakrama balêjêd, pundi ingkang wajib dipun kurmati inggih kasêrat mawi aksara murda. Ingkang punika manawi badhe lêrês panganggenipun aksara murda, inggih kêdah dhamang sêsêrêpanipun dhatêng unggah-ungguhing tatakrama. Sêrat Tatasastra (pathokaning panyêrat saking pamoripun piwulang paramasastra, wyakarana, grammatica sarta paramabasa) wêdalan Surakarta nêrangakên, bilih tataprunggu punika sami-sami kalêbêt angèl piyambak pamathokipun, jalaran unggah-ungguhing tatakrama punika prasasat botên wontên andhêgipun, awit sanadyan priyantun ingkang sampun agêng inggih taksih wontên ingkang ngungkuli agêngipun malih, samantên ugi kosokwangsulipun, ingkang dipun wastani alit sagêd dados agêng jalaran wontên ingkang langkung alit malih.

Dados panganggenipun aksara murda miturut tataprunggu punika têrang botên gampil, ananging inggih kenging dipun ancêr-ancêri sawatawis makatên: ingkang wajib kasêrat ngangge aksara murda punika ingkang wajib angsal pakurmatan, kados ta: sêsêbutan sarta asmanipun ingkang wajib dipun ajèni. Ananging botên sadaya ingkang wajib dipun ajèni wau botên[1] mêsthi wajib angsal pakurmatan, jalaran manawi ingkang wajib dipun ajèni punika kathah, ingkang wajib angsal pakurmatan namung ingkang luhur-luhur kemawon, malah ingkang wajib angsal pakurmatan jangkêp namung satunggal ingkang luhur piyambak, manawi wênang sinêmbah inggih angsal sêmbah miyambaki. Upaminipun kintun sêrat dhatêng lêlurah, punika asmaning lêlurah wau wajib kasêrat ngangge aksara murda, sarta sêsêbutanipun, manawi sakintên pantês inggih kasêrat ngangge aksara murda ugi, dene sêsêbutan sarta namanipun piyambak kêdah kasêrat ngangge aksara alit. Manawi kintun sêrat dhatêng tiyang sangandhapipun, punika mawi mawang-mawang. Yèn ingkang dipun kintuni punika prêlu dipun ajèni utawi dipun taklimi, sêsêbutan utawi namanipun inggih pantês kasêrat ngangge aksara murda. Upami nyariyosakên tiyang wontên ing sêrat utawi karangan, manawi tiyang punika pantês dipun kurmati dhatêng ingkang kintun sarta tampi sêrat, sêsêbutan tuwin asmanipun ingkang kacariyosakên punika wajib kasêrat ngangge aksara murda. Ananging manawi ingkang kacariyosakên punika kathah, ingkang mêsthi angsal pakurmatan aksara murda namung satunggal ingkang luhur piyambak.

Tuladha: Kula ngaturi priksa dhatêng kangmas Mantri Arjadarsana sakalihan, bilih benjing dintên Rêbo Pon tanggal 2 wulan punika kula gadhah kajat badhe nyunatakên ingkang putra anak kula èstri pun gêndhuk Sudarmi.

Kula tampi wêlingipun ingkang rama kangmas Patih Praja Pusara, benjing dintên Ngahad ngajêng punika ingkang raka Radèn Mas Asistèn Prajasuwignya katimbalan dhatêng Têmanggung.

Sarêng mantri pulisi kitha Radèn Mas Sujana tampi palapuraning lurah, enggal-enggal dandos sarta sowan dhatêng ingkang raka Radèn Mas Wadana Nitipura.

Ingkang sowan ing kabupatèn pêpak: Radèn Prajapusara: patih, Radèn Mas Nitipura: wadana, Radèn Rêksaardana: kolèktur, Radèn Mas Prajasuwignya: asistèn wadana, Radèn Mas Sujana: mantri pulisi. Sarêng Kangjêng Bupati miyos saking dalêm, ingkang sami sowan lajêng sami ngadêg saking kursi ngaturi urmat.

Makatên pamanggih kula bab panganggenipun aksara murda miturut tataprunggu, ananging lêrês lêpatipun prayogi ngêntosi katêrangan saking kumisi kasusastran ing Sriwêdari.

[ 330 ]

꧋ꦮꦮꦱꦤ꧀ꦢꦊꦩ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀꧈ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦠꦤꦃꦱꦸꦩꦠꦿꦃꦱꦶꦱꦶꦃꦏꦶꦭꦺꦤ꧀꧉

꧋ꦲꦶꦁꦔꦤ꧀ꦝꦥ꧀ꦥꦸꦤꦶꦏꦱꦼꦫꦠ꧀ꦮꦮꦱꦤ꧀ꦢꦊꦩ꧀ꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦼꦤ꧀ꦢꦿꦭ꧀ꦲꦶꦁꦏꦁꦏꦠꦸꦂꦝꦸꦩꦠꦼꦁꦏꦚ꧀ꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦩꦶꦤꦶꦱ꧀ꦠꦼꦂꦗꦗꦲꦤ꧀꧌ꦩꦶꦤꦶꦱ꧀ꦠꦼꦂꦮ꦳ꦤ꧀ꦏꦺꦴꦭꦺꦴꦤꦶꦪꦼꦤ꧀꧍ꦲꦶꦁꦤꦒꦫꦶꦮꦭꦤ꧀ꦢꦶ꧉ꦲꦶꦁꦱꦫꦺꦃꦤꦶꦁꦏꦼꦥꦚ꧀ꦗꦔꦼꦤ꧀ꦲꦸꦥꦩꦶꦱꦼꦫꦠ꧀ꦮꦲꦸꦏꦥꦕꦏꦱꦢꦪ꧈ꦲꦩꦶꦭꦲꦶꦁꦔꦿꦶꦏꦶꦤꦩꦸꦁꦩꦼꦤ꧀ꦝꦼꦠ꧀ꦮꦺꦴꦱ꧀ꦱꦶꦥꦸꦤ꧀ꦏꦼꦩꦮꦺꦴꦤ꧀꧈ꦩꦼꦁꦒꦃꦱꦸꦫꦲꦺꦴꦱꦶꦥꦸꦤ꧀ꦏꦶꦫꦁꦭꦁꦏꦸꦁꦩꦏꦠꦼꦤ꧀꧇

꧋ꦏꦭꦠꦁꦒꦭ꧀꧇꧔꧇ꦩꦉꦠ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦏꦁꦮꦶꦕꦏ꧀ꦱꦤꦏꦺꦴꦤ꧀ꦢꦸꦂꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦠꦼꦝꦏ꧀ꦱꦏꦶꦁꦱꦸꦩꦠꦿꦃ꧈ꦲꦩꦶꦭꦲꦶꦁꦒꦶꦃꦱꦩ꧀ꦥꦸꦤ꧀ꦢꦢꦺꦴꦱ꧀ꦥꦤ꧀ꦠꦼꦱ꧀ꦱꦶꦥꦸꦤ꧀꧈ꦧꦶꦭꦶꦃꦲꦶꦁꦏꦁꦮꦶꦕꦏ꧀ꦱꦤꦮꦲꦸꦔꦠꦸꦫꦶꦲꦁꦱꦭ꧀ꦲꦁꦱꦭꦤ꧀ꦢꦊꦩ꧀ꦮꦮꦱꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦔꦿꦶꦏꦝꦠꦼꦁꦲꦶꦁꦏꦁꦮꦶꦕꦏ꧀ꦱꦤꦩꦶꦤꦶꦱ꧀ꦠꦼꦂꦗꦗꦲꦤ꧀꧈ꦲꦤꦔꦶꦁꦱꦫꦺꦃꦤꦶꦁꦠꦶꦤ꧀ꦢꦏ꧀ꦢꦊꦩ꧀ꦮꦲꦸꦤꦩꦸꦁꦱꦮꦠꦮꦶꦱ꧀ꦢꦶꦤ꧀ꦠꦼꦤ꧀ꦏꦼꦩꦮꦺꦴꦤ꧀꧈ꦠꦼꦩ꧀ꦠꦸꦤꦶꦥꦸꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦱꦒꦼꦢ꧀ꦔꦠꦸꦂꦫꦶꦏꦼꦠꦿꦔꦤ꧀ꦏꦼꦠꦿꦔꦤ꧀ꦲꦶꦁꦏꦁꦚꦼꦏꦥꦶꦪꦼꦏ꧀ꦠꦺꦴꦱ꧀꧈ꦩꦼꦁꦒꦃꦱꦧꦧ꧀ꦱꦧꦧ꧀ꦧꦶꦥꦸꦤ꧀ꦲꦶꦁꦏꦁꦲꦤꦸꦮꦸꦃꦲꦏꦼꦤ꧀ꦊꦭꦩ꧀ꦥꦃꦲꦤ꧀ꦮꦂꦤꦶꦮꦂꦤꦶꦲꦶꦁꦠꦤꦃꦱꦸꦩꦠꦿꦃꦱꦶꦱꦶꦃꦏꦶꦭꦺꦤ꧀꧉ꦲꦼꦮꦱꦩꦤ꧀ꦠꦼꦤ꧀ꦏꦠꦿꦔꦤ꧀ꦏꦠꦿꦔꦤ꧀ꦢꦊꦩ꧀ꦮꦲꦸꦏꦼꦔꦶꦁꦏꦮꦱ꧀ꦠꦤꦤ꧀ꦩꦠꦺꦴꦤ꧀꧈ꦲꦩꦂꦒꦶꦏꦠꦿꦔꦤ꧀ꦏꦠꦿꦔꦤ꧀ꦮꦲꦸꦱꦢꦪ꧈ꦏꦗꦮꦶꦲꦶꦁꦏꦁꦮꦶꦕꦏ꧀ꦱꦤꦲꦔꦸꦤꦶꦁꦔꦤꦶꦥꦶꦪꦩ꧀ꦧꦏ꧀꧈ꦲꦸꦒꦶꦲꦁꦱꦭ꧀ꦏꦠꦿꦔꦤ꧀ꦏꦠꦿꦔꦤ꧀ꦱꦏꦶꦁꦥꦫꦥꦔꦒꦼꦁꦲꦶꦁꦔꦿꦶꦏ꧈ꦥꦫꦲꦺꦴꦥ꧀ꦱꦶꦂꦲꦺꦴꦥ꧀ꦱꦶꦂꦭꦤ꧀ꦥꦫꦥꦂꦠꦶꦏꦸꦭꦶꦂ꧉ꦠꦶꦤ꧀ꦢꦏ꧀ꦢꦊꦩ꧀ꦝꦠꦼꦁꦱꦸꦩꦠꦿꦃꦥꦸꦤꦶꦏꦧꦺꦴꦠꦼꦤ꧀ꦔꦼꦩꦸꦁꦔꦏꦼꦤ꧀ꦲꦚ꧀ꦗꦼꦩ꧀ꦧꦂꦫꦏꦼꦤ꧀ꦱꦼꦱꦼꦉꦥ꧀ꦥꦤ꧀ꦢꦊꦩ꧀꧈ꦤꦔꦶꦁꦭꦗꦼꦁꦤꦸꦮꦸꦃꦲꦏꦼꦤ꧀ꦥꦶꦠꦏꦼꦤ꧀ꦤꦤ꧀꧈ꦥꦸꦤꦥꦠꦼꦝꦏ꧀ꦢꦊꦩ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦒꦸꦤꦤꦶꦥꦸꦤ꧀ꦠꦸꦩꦿꦥ꧀ꦠꦤꦃꦠꦤꦃꦲꦶꦁꦏꦁꦢꦶꦥꦸꦤ꧀ꦠꦼꦝꦏ꧀ꦏꦶꦮꦲꦸ꧉ꦥꦶꦠꦏꦼꦤꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧈ꦠꦸꦩꦿꦥ꧀ꦲꦶꦁꦱꦩꦁꦏꦼꦩꦶꦭꦢꦺꦫꦺꦁꦱꦒꦼꦢ꧀ꦏꦱꦸꦩꦼꦉꦥ꧀ꦥꦤ꧀ꦲꦶꦁꦱꦤꦺꦱ꧀꧈ꦲꦤꦔꦶꦁꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤꦶꦥꦸꦤ꧀ꦥꦫꦥꦔꦒꦼꦁꦲꦶꦁꦔꦿꦶꦏ꧈ꦭꦁꦏꦸꦁꦩꦭꦶꦃꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦥꦢꦸꦏꦠꦸꦮꦤ꧀ꦒꦸꦥꦼꦂꦤꦸꦂꦲꦶꦁꦔꦕꦶꦃ꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦩꦶꦭꦲꦶꦁꦒꦶꦃꦲꦒꦼꦁꦒꦸꦤꦤꦶꦥꦸꦤ꧀꧉ꦲꦶꦁꦠꦼꦩ꧀ꦧꦼꦠꦼꦩ꧀ꦠꦸꦲꦶꦁꦒꦶꦃꦧꦝꦼꦏꦱꦸꦩꦼꦉꦥ꧀ꦥꦤ꧀ꦩꦼꦁꦒꦃꦮꦺꦴꦃꦲꦶꦥꦸꦤ꧀ꦠꦶꦤ꧀ꦢꦏ꧀ꦢꦊꦩ꧀ꦮꦲꦸ꧉ꦲꦼꦮꦱꦩꦤ꧀ꦠꦼꦤ꧀ꦱꦩꦁꦏꦼꦱꦩ꧀ꦥꦸꦤ꧀ꦏꦼꦔꦶꦁꦏꦠꦼꦩ꧀ꦠꦺꦴꦏ꧀ꦏꦏꦼꦤ꧀꧈ꦧꦶꦭꦶꦃꦠꦶꦤ꧀ꦢꦏ꧀ꦢꦊꦩ꧀ꦮꦲꦸꦱꦒꦼꦢ꧀ꦲꦔꦶꦕꦭ꧀ꦭꦏꦼꦤ꧀ꦥꦩꦤꦃꦲꦶꦁꦠꦶꦪꦁ꧈ꦧꦶꦭꦶꦃꦥꦩꦉꦤ꧀ꦠꦃꦥꦸꦤꦶꦏꦤꦩꦸꦁꦲꦩꦁꦒꦭꦶꦃꦝꦠꦼꦁꦏꦮꦺꦴꦤ꧀ꦠꦼꦤꦤ꧀ꦤꦶꦥꦸꦤ꧀ꦠꦤꦃꦗꦮꦶꦭꦤ꧀ꦩꦢꦸꦫ꧉

꧋ꦲꦶꦁꦏꦁꦮꦶꦕꦏ꧀ꦱꦤꦱꦏ꧀ꦭꦁꦏꦸꦁꦉꦤꦲꦶꦁꦥꦁꦒꦭꦶꦃꦢꦊꦩ꧀꧈ꦢꦼꦤꦼꦏꦭꦤꦶꦥꦸꦤ꧀ꦠꦶꦤ꧀ꦢꦏ꧀ꦮꦲꦸꦱꦒꦼꦢ꧀ꦲꦔꦸꦤꦶꦔꦤꦶ꧈ꦧꦶꦭꦶꦃꦥꦫꦲꦩ꧀ꦠꦼꦤꦂꦲꦩ꧀ꦠꦼꦤꦂꦥꦔꦿꦺꦃꦥꦿꦗꦱꦩꦶꦠꦸꦩꦼꦩꦼꦤ꧀ꦲꦶꦁꦏꦁꦮꦶꦕꦏ꧀ꦱꦤꦱꦏ꧀ꦭꦁꦏꦸꦁꦉꦤꦲꦶꦁꦥꦁꦒꦭꦶꦃꦢꦊꦩ꧀꧈ꦢꦺꦤꦺꦏꦭꦤꦶꦥꦸꦤ꧀ꦠꦶꦤ꧀ꦢꦏ꧀ꦮꦲꦸꦱꦒꦼꦢ꧀ꦲꦔꦸꦤꦶꦔꦤꦶ꧈ꦧꦶꦭꦶꦃꦥꦫꦲꦩ꧀ꦠꦼꦤꦂꦲꦩ꧀ꦠꦼꦤꦂꦥꦔꦿꦺꦃꦥꦿꦗꦱꦩꦶꦠꦸꦩꦼꦩꦼ [ 331 ]ꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦤꦶꦤ꧀ꦢꦏ꧀ꦏꦏꦼꦤ꧀ꦏꦸꦮꦗꦶꦧꦤ꧀ꦤꦶꦥꦸꦤ꧀꧈ꦩꦏꦠꦼꦤ꧀ꦲꦸꦒꦶꦥꦫꦲꦺꦴꦥ꧀ꦱꦶꦂꦲꦺꦴꦥ꧀ꦱꦶꦂꦱꦩꦶꦏꦠꦶꦔꦭ꧀ꦕꦶꦏꦠ꧀ꦲꦶꦁꦢꦩꦼꦭ꧀꧉ꦏꦗꦮꦶꦥꦸꦤꦶꦏꦲꦶꦁꦏꦁꦮꦶꦕꦏ꧀ꦱꦤꦠꦤ꧀ꦱꦃꦲꦔꦊꦩ꧀ꦧꦤꦝꦠꦼꦁꦥꦫꦒꦂꦮꦤꦶꦁꦲꦩ꧀ꦠꦼꦤꦂꦲꦩ꧀ꦠꦼꦤꦂꦭꦤ꧀ꦲꦺꦴꦥ꧀ꦱꦶꦂꦲꦺꦴꦥ꧀ꦱꦶꦂꦲꦶꦁꦏꦁꦠꦤ꧀ꦱꦃꦧꦺꦭꦲꦶꦁꦢꦩꦼꦭ꧀꧉

꧋ꦏꦭꦫꦸꦩꦶꦪꦶꦤ꧀ꦲꦶꦁꦏꦁꦮꦶꦕꦏ꧀ꦱꦤꦱꦩ꧀ꦥꦸꦤ꧀ꦤꦠꦼꦔꦠꦸꦂꦫꦶꦲꦸꦤꦶꦔꦝꦠꦼꦁꦲꦶꦁꦏꦁꦮꦶꦕꦏ꧀ꦱꦤꦩꦶꦤꦶꦱ꧀ꦠꦼꦂꦗꦗꦲꦤ꧀꧈ꦧꦶꦭꦶꦃꦏꦮꦺꦴꦤ꧀ꦠꦼꦤ꧀ꦤꦤꦶꦥꦸꦤ꧀ꦲꦶꦁꦱꦸꦩꦠꦿꦃꦱꦶꦱꦶꦃꦏꦶꦭꦺꦤ꧀ꦠꦼꦤ꧀ꦠꦽꦩ꧀꧉ꦱꦤꦢꦾꦤ꧀ꦏꦭꦮꦺꦴꦤ꧀ꦠꦼꦤ꧀ꦒꦼꦒꦼꦂꦫꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦱꦩꦶꦠꦶꦮꦱ꧀꧈ꦲꦤꦔꦶꦁꦩꦤꦮꦶꦏꦩꦤꦃꦥꦚ꧀ꦗꦁ꧈ꦏꦢꦺꦴꦱ꧀ꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦱꦲꦼꦤꦶꦥꦸꦤ꧀꧈ꦗꦭꦫꦤ꧀ꦠꦸꦮꦸꦃꦲꦶꦥꦸꦤ꧀ꦒꦼꦒꦼꦂꦫꦤ꧀ꦮꦲꦸ꧈ꦢꦺꦫꦺꦁꦔꦤ꧀ꦠꦺꦴꦱ꧀ꦏꦲꦸꦩ꧀ꦏꦺꦴꦩꦸꦤꦶꦱ꧀ꦲꦔꦩ꧀ꦧꦿꦲꦩ꧀ꦧꦿ꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦥꦫꦥꦔꦿꦺꦃꦥꦿꦗꦱꦲꦥꦸꦭꦶꦱꦶꦲꦺꦁꦒꦭ꧀ꦱꦒꦼꦢ꧀ꦲꦔꦽꦒꦼꦩ꧀꧈ꦱꦲꦠꦼꦠꦶꦪꦁꦲꦶꦁꦏꦁꦥꦚ꧀ꦕꦺꦤ꧀ꦲꦢꦩꦼꦭ꧀ꦉꦉꦱꦃꦱꦒꦼꦢ꧀ꦲꦺꦁꦒꦭ꧀ꦏꦺꦴꦤꦔꦤ꧀ꦱꦲꦱꦒꦼꦢ꧀ꦏꦱꦶꦁꦏꦶꦂꦫꦏꦼꦤ꧀ꦱꦏꦶꦁꦔꦿꦶꦏꦸ꧉ꦥꦸꦤꦥꦩꦭꦶꦃꦥꦤꦶꦤ꧀ꦢꦏ꧀ꦏꦶꦥꦸꦤ꧀ꦥꦫꦲꦩ꧀ꦠꦼꦤꦂꦮꦲꦸ꧈ꦱꦒꦼꦢ꧀ꦲꦔ꧀ꦭꦸꦮꦫꦶꦥꦫꦠꦼꦠꦶꦪꦁꦲꦶꦁꦏꦁꦠꦼꦤ꧀ꦠꦽꦩ꧀ꦩꦤꦃꦲꦶꦥꦸꦤ꧀ꦱꦏꦶꦁꦧꦼꦧꦪꦧꦼꦧꦪꦲꦶꦁꦏꦁꦲꦤ꧀ꦝꦠꦼꦔꦶꦮꦲꦸ꧈ꦱꦲꦏꦥꦶꦠꦢꦺꦴꦱ꧀ꦱꦤ꧀ꦤꦶꦁꦝꦠꦼꦁꦏꦏꦸꦮꦲꦺꦴꦱꦤ꧀ꦤꦶꦥꦸꦤ꧀ꦥꦩꦉꦤ꧀ꦠꦃꦠꦏ꧀ꦱꦶꦃꦲꦗꦼꦒ꧀ꦭꦤ꧀ꦱꦪꦮꦼꦮꦃ꧉ꦲꦩꦂꦒꦶꦲꦶꦁꦔꦿꦶꦏꦸꦲꦚꦸꦩꦼꦉꦥ꧀ꦥꦶ꧈ꦧꦶꦭꦶꦃꦥꦩꦉꦤ꧀ꦠꦃꦱꦒꦼꦢ꧀ꦲꦚ꧀ꦗꦒꦶꦏꦮꦶꦭꦸꦗꦼꦁꦔꦤ꧀ꦱꦲꦏꦠꦼꦤ꧀ꦠꦽꦩ꧀ꦩꦤꦶꦁꦱꦶꦠꦶꦱꦠꦼꦠꦶꦪꦁꦔꦶꦥꦸꦤ꧀꧉ꦠꦤ꧀ꦝꦪꦼꦏ꧀ꦠꦶꦤꦶꦥꦸꦤ꧀꧈ꦏꦭꦒꦼꦒꦼꦝꦸꦒ꧀ꦒꦶꦁꦏꦺꦴꦩꦸꦤꦶꦱ꧀ꦤꦩ꧇ꦱꦶꦥꦠꦼꦱꦩ꧀ꦥꦸꦤ꧀ꦥꦶꦤꦼꦗꦃꦲꦤ꧀꧈ꦠꦼꦠꦶꦪꦁꦲꦶꦁꦔꦿꦶꦏꦸꦱꦩꦶꦲꦢꦩꦼꦭ꧀ꦥꦶꦱ꧀ꦠꦲꦒꦼꦁꦲꦒꦼꦁꦔꦤ꧀꧈ꦩꦶꦤꦁꦏꦲꦔꦸꦂꦩꦠꦶꦮꦺꦴꦲꦶꦁꦥꦔꦽꦏꦢꦪꦤꦶꦁꦥꦩꦉꦤ꧀ꦠꦃ꧈ꦲꦤꦸꦩ꧀ꦥꦼꦱ꧀ꦉꦉꦱꦃꦮꦲꦸ꧉ꦲꦤꦔꦶꦁꦥꦚ꧀ꦗꦒꦶꦤꦶꦥꦸꦤ꧀ꦢꦸꦩꦸꦒꦶꦤꦶꦁꦱꦩꦁꦏꦼꦏꦼꦢꦃꦠꦤ꧀ꦱꦃꦏꦭꦗꦼꦁꦔꦏꦼꦤ꧀꧉ꦥꦫꦠꦼꦠꦶꦪꦁꦲꦶꦁꦏꦁꦱꦸꦩꦼꦢꦾꦲꦢꦩꦼꦭ꧀ꦉꦉꦱꦃꦏꦼꦢꦃꦏꦕꦼꦥꦼꦁꦱꦲꦏꦱꦶꦁꦏꦶꦂꦫꦏꦼꦤ꧀ꦱꦏꦶꦁꦔꦿꦶꦏꦸ꧉ꦏꦭꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦺꦴꦤ꧀ꦥꦼꦫꦺꦤ꧀ꦱꦶꦲꦶꦁꦥꦺꦴꦂꦝꦼꦏꦺꦴꦏ꧀꧈ꦥꦫꦥꦔꦒꦼꦁꦥꦔꦒꦼꦁꦒꦺꦴꦭꦺꦴꦔꦤ꧀ꦥꦔꦿꦺꦃꦥꦿꦗꦱꦩꦶꦔꦠꦸꦂꦫꦶꦏꦠꦿꦔꦤ꧀꧈ꦧꦶꦭꦶꦃꦏꦮꦺꦴꦤ꧀ꦠꦼꦤꦤ꧀ꦤꦶꦥꦸꦤ꧀ꦱꦠꦸꦁꦒꦭ꧀ꦱꦠꦸꦁꦒꦭ꧀ꦭꦶꦁꦠꦤꦃꦧꦮꦃꦲꦶꦥꦸꦤ꧀ꦱꦩꦶꦮꦁꦱꦸꦭ꧀ꦠꦼꦤ꧀ꦠꦽꦩ꧀ꦩꦭꦶꦃ꧈ꦱꦲꦧꦺꦴꦠꦼꦤ꧀ꦥꦼꦂꦭꦸꦢꦶꦥꦸꦤ꧀ꦏꦸꦮꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦠꦼꦩ꧀ꦧꦼꦧꦝꦼꦠꦸꦮꦸꦃꦒꦼꦒꦼꦫꦤ꧀ꦩꦭꦶꦃ꧉ꦩꦼꦁꦒꦃꦏꦠꦿꦔꦤ꧀ꦏꦠꦿꦔꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧈ꦩꦶꦠꦸꦫꦸꦠ꧀ꦝꦮꦸꦃꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤꦩꦶꦭꦲꦶꦁꦒꦶꦃꦏꦼꦁꦔꦶꦁꦢꦶꦥꦸꦤ꧀ꦥꦶꦠꦢꦺꦴꦱ꧀꧈ꦤꦩꦸꦁꦮꦺꦴꦤ꧀ꦠꦼꦤ꧀ꦱꦠꦸꦁꦒꦭ꧀꧈ꦲꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀꧈ꦲꦶꦁꦒꦶꦃꦥꦸꦤꦶꦏꦲꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ꦲꦶꦁꦠꦤꦃꦝꦠꦂ꧈ꦥꦢꦸꦏꦠꦸꦮꦤ꧀ꦏꦂꦱꦼꦤ꧀ꦲꦶꦁꦏꦁꦢꦺꦫꦺꦁꦱꦒꦼꦢ꧀ꦲꦤꦼꦩ꧀ꦠꦺꦴꦏ꧀ꦏꦏꦼꦤ꧀꧈ꦥꦸꦤꦥꦲꦶꦁꦠꦼꦩ꧀ꦧꦼꦱꦶꦠꦶꦧꦮꦃꦲꦶꦥꦸꦤ꧀ꦱꦒꦼꦢ꧀ꦠꦼꦤ꧀ꦠꦽꦩ꧀ꦱꦭꦩꦶꦤꦶꦥꦸꦤ꧀꧉ꦏꦠꦿꦔꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸꦩꦶꦭꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦊꦉꦱ꧀ꦱꦶꦥꦸꦤ꧀꧈ꦩꦤꦮꦶꦲꦔꦺꦔꦼꦠ꧀ꦠꦶ꧈ꦧꦶꦭꦶꦃꦲꦶꦁꦱꦧꦒꦶꦪꦤꦶꦁꦲꦥ꧀ꦝꦺꦭꦶꦁꦔꦿꦶꦏꦸ꧌ꦲꦶꦁꦱꦶꦭꦸꦁꦏꦁ꧍ꦠꦼꦠꦶꦪꦁꦔꦶꦥꦸꦤ꧀꧈ꦏꦗꦮꦶꦏꦸꦭꦶꦤꦩꦁꦒꦺꦤ꧀ꦤꦶꦥꦸꦤ꧀ꦠꦤ꧀ꦱꦃꦥꦶꦤ꧀ꦝꦃꦥꦶꦤ꧀ꦝꦃ꧈ꦲꦸꦒꦶꦠꦏ꧀ꦱꦶꦃꦏꦼꦚ꧀ꦕꦼꦁꦲꦁꦒꦺꦤ꧀ꦤꦶꦥ꧀ꦥꦸꦤ꧀ꦔꦼꦁꦒꦺꦤꦶꦲꦢꦠ꧀ꦠꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦏꦗꦮꦶꦥꦸꦤꦶꦏꦠꦼꦠꦶꦪꦁꦮꦲꦸꦱꦩꦶꦠꦸꦩꦸꦠ꧀ꦠꦸꦩꦸꦠ꧀ꦲꦢꦩꦼꦭ꧀ꦉꦉꦱꦃ꧉

꧋ꦩꦼꦁꦒꦃꦠꦸꦩꦿꦥ꧀ꦲꦶꦁꦏꦁꦮꦶꦕꦏ꧀ꦱꦤꦥꦶꦪꦩ꧀ꦧꦏ꧀꧈ꦱꦤꦗꦤ꧀ꦠꦶꦤ꧀ꦢꦏ꧀ꦢꦊꦩ꧀ꦮꦲꦸꦩꦶꦪꦺꦴꦱ꧀ꦥꦁꦒꦼꦤꦤ꧀ꦥꦁꦒꦼꦤꦤ꧀ꦲꦶꦁꦏꦁꦩꦼꦤ꧀ꦠꦱ꧀ꦏꦠꦿꦗꦁꦲꦶꦁꦒꦼꦒꦼꦫꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦥꦝꦁ꧈ꦱꦺꦴꦭꦺꦴꦏ꧀꧈ꦱꦮꦃꦭꦸꦤ꧀ꦠ꧈ꦥꦺꦴꦂꦥꦤ꧀ꦠꦼꦏꦥꦺꦊꦤ꧀꧈ꦥꦝꦁꦥꦚ꧀ꦗꦁ꧈ꦥꦺꦴꦂꦝꦼꦏꦺꦴꦏ꧀꧈ꦥꦪꦏꦺꦴꦩ꧀ꦧꦺꦴ꧈ꦭꦸꦧꦸꦏ꧀ꦱꦶꦏꦥꦶꦁꦭꦤ꧀ꦧꦲꦺꦴ꧈ꦏꦤ꧀ꦛꦶꦤꦶꦠꦶꦃꦲꦺꦴꦠꦺꦴꦏꦼꦩꦮꦺꦴꦤ꧀꧈ꦲꦺꦮꦱꦩꦤ꧀ꦠꦼꦤ꧀ꦧꦺꦴꦠꦼꦤ꧀ꦱꦒꦼꦢ꧀ꦲꦔꦸꦤꦶꦁꦔꦤꦶꦲꦸꦤ꧀ꦠꦧ꧀ꦧꦶꦁꦥꦫꦏꦮꦸꦭ꧉ꦲꦤꦔꦶꦁꦲꦶꦁꦏꦁꦮꦶꦕꦏ꧀ꦱꦤꦗꦭꦫꦤ꧀ꦱꦧꦧ꧀ꦲꦶꦁꦏꦁꦱꦩ꧀ꦥꦸꦤ꧀ꦕꦼꦛ꧈ꦧꦺꦴꦠꦼꦤ꧀ꦏꦼꦂꦱꦲꦩꦶꦒꦠꦺꦴꦱ꧀ꦱꦏꦼꦤ꧀꧉

꧋꧌ꦧꦝꦺꦏꦱꦩ꧀ꦧꦼꦠ꧀ꦠꦤ꧀꧍

Wawasan Dalêm Kangjêng Tuwan Ingkang Wicaksana Gupêrnur Jendral, Bab Kawontênanipun ing Tanah Sumatrah Sisih Kilèn

Ing ngandhap punika sêrat wawasan dalêm kangjêng tuwan ingkang wicaksana gupêrnur jendral ingkang katur dhumatêng kangjêng tuwan ingkang wicaksana ministêr jajahan (Minister van kolonien) ing nagari Walandi. Ing sarèhning kêpanjangên upami sêrat wau kapacaka sadaya, amila ing ngriki namung mêndhêt wosipun kemawon, mênggah suraosipun kirang langkung makatên:

Kala tanggal 4 Marêt ingkang kapêngkêr punika, ingkang wicaksana kondur saking anggènipun têdhak saking Sumatrah, amila inggih sampun dados pantêsipun, bilih ingkang wicaksana wau ngaturi angsal-angsalan dalêm wawasan kawontênanipun ing ngrika dhatêng ingkang wicaksana ministêr jajahan, ananging sarèhning tindak dalêm wau namung sawatawis dintên kemawon, têmtunipun inggih botên sagêd ngaturi kêtrangan-kêtrangan ingkang nyêkapi yêktos, mênggah sabab-sababipun ingkang anuwuhakên lêlampahan warni-warni ing tanah Sumatrah sisih kilèn. Ewasamantên katrangan-katrangan dalêm wau kenging kawastanan maton, amargi katrangan-katrangan wau sadaya, kajawi ingkang wicaksana anguningani piyambak, ugi angsal katrangan-katrangan saking para pangagêng ing ngrika, para opsir-opsir lan para partikulir. Tindak dalêm dhatêng Sumatrah punika botên ngêmungakên anjêmbarakên sêsêrêpan dalêm, nanging lajêng nuwuhakên pitakenan, punapa têdhak dalêm punika wontên gunanipun tumrap tanah-tanah ingkang dipun têdhaki wau. Pitakenan ingkang makatên wau, tumrap ing samangke mila dèrèng sagêd kasumêrêpan ing sanès, ananging miturut pangandikanipun para pangagêng ing ngrika, langkung malih miturut pangandikanipun paduka tuwan gupêrnur ing Ngacih, kintên-kintên mila inggih agêng gunanipun. Ing têmbe têmtu inggih badhe kasumêrêpan mênggah wohipun tindak dalêm wau. Ewasamantên samangke sampun kenging katêmtokakên, bilih tindak dalêm wau sagêd angicalakên pamanahing tiyang, bilih pamarentah punika namung amanggalih dhatêng kawontênanipun tanah Jawi lan Madura.

Ingkang wicaksana saklangkung rêna ing panggalih dalêm, dene kalanipun tindak wau sagêd anguningani, bilih para amtênar-amtênar pangrèh praja sami tumêmên anggènipun nindakakên kuwajibanipun, makatên ugi para opsir-opsir sami katingal cikat ing damêl. Kajawi punika ingkang wicaksana tansah angalêmbana dhatêng para garwaning amtênar-amtênar lan opsir-opsir ingkang tansah bela ing damêl.

Kala rumiyin ingkang wicaksana sampun nate ngaturi uninga dhatêng ingkang wicaksana ministêr jajahan, bilih kawontênanipun ing Sumatrah sisih kilèn têntrêm. Sanadyan kala wontên gegeran wontên ingkang sami tiwas, ananging manawi kamanah panjang, kados inggih wontên saenipun, jalaran tuwuhipun gegeran wau, dèrèng ngantos kaum komunis angămbra-ămbra. Ingkang makatên wau para pangrèh praja saha pulisi enggal sagêd angrêgêm, saha têtiyang ingkang pancèn adamêl rêrêsah sagêd enggal konangan saha sagêd kasingkirakên saking ngriku. Punapa malih panindakipun para amtênar wau, sagêd angluwari para têtiyang ingkang têntrêm manahipun saking bêbaya-bêbaya ingkang andhatêngi wau, saha kapitadosaning dhatêng kakuwaosanipun pamarentah taksih ajêg lan saya wêwah. Amargi ing ngriku anyumêrêpi, bilih pamarentah sagêd anjagi kawilujêngan saha katêntrêmaning siti satêtiyangipun. Tăndha-yêktinipun, kala gêgêdhuging komunis nama: Si Pate sampun pinêjahan, têtiyang ing ngriku sami adamêl pista agêng-agêngan, minăngka angurmati wohing pangrekadayaning pamarentah, anumpês rêrêsah wau. Ananging panjaginipun dumugining samangke kêdah tansah kalajêngakên. Para têtiyang ingkang sumêdya adamêl rêrêsah kêdah kacêpêng saha kasingkirakên saking ngriku. Kala dipun wontênakên konpêrènsi ing Pordhêkok, para pangagêng-pangagêng golongan pangrèh praja sami ngaturi katrangan, bilih kawontênanipun satunggal-satunggaling tanah bawahipun sami wangsul têntrêm malih, saha botên pêrlu dipun kuwatosakên, bilih ing têmbe badhe tuwuh gegeran malih. Mênggah katrangan-katrangan ingkang makatên wau, miturut dhawuh dalêm ingkang wicaksana mila inggih kenging dipun pitados, namung wontên satunggal, asistèn residhèn, inggih punika asistèn residhèn ing Tanah Dhatar, Paduka Tuwan Karsen ingkang dèrèng sagêd anêmtokakên, punapa ing têmbe siti bawahipun sagêd têntrêm salaminipun. Katrangan ingkang makatên wau mila inggih wontên lêrêsipun, manawi angèngêti, bilih ing sabagiyaning apdhèling ngriku (ing Silungkang) têtiyangipun, kajawi kulina manggènipun tansah pindhah-pindhah, ugi taksih kêncêng anggènippun ngênggèni adatipun piyambak, kajawi punika têtiyang wau sami tumut-tumut adamêl rêrêsah.

Mênggah tumrap ingkang wicaksana piyambak, sanajan tindak dalêm wau miyos panggenan-panggenan ingkang mêntas katrajang ing gegeran, inggih punika ing Padhang, Solok, Sawahlunta, Porpantêkapèlên, Padhang Panjang, Pordhêkok, Payakombo, Lubuk Sikaping Lanbao, kanthi nitih oto kemawon, ewasamantên botên sagêd anguningani untabing para kawula. Ananging ingkang wicaksana jalaran sabab ingkang sampun cêtha, botên kêrsa amigatosakên.

(Badhe kasambêtan)

[ 332 ]꧋ꦥꦚꦸꦮꦸꦤ꧀ꦤꦤ꧀

꧋ꦱꦩ꧀ꦥꦸꦤ꧀ꦮꦠꦮꦶꦱ꧀ꦭꦩꦶꦏꦸꦭꦒꦝꦃꦤꦶꦪꦠ꧀ꦧꦝꦼꦚꦸꦮꦸꦤ꧀ꦝꦠꦼꦁꦥꦫꦭꦁꦒꦤ꧀ꦤꦤ꧀ꦏꦼꦗꦮꦺꦤ꧀꧈ꦥꦸꦤꦥꦩꦭꦶꦃꦝꦠꦼꦁꦥꦚ꧀ꦗꦼꦤꦼꦔꦤ꧀ꦤꦶꦥꦸꦤ꧀ꦥꦢꦸꦏꦉꦝꦏ꧀ꦠꦸꦂ꧈ꦲꦤꦔꦶꦁꦢꦺꦫꦺꦁꦏꦢꦸꦩꦸꦒꦺꦤ꧀꧉ꦱꦩ꧀ꦥꦸꦤ꧀ꦮꦠꦏ꧀ꦏꦶꦁꦠꦶꦪꦁꦲꦶꦁꦏꦁꦏꦶꦫꦁꦲꦶꦁꦧꦸꦢꦶ꧈ꦥꦸꦤꦶꦏꦠꦤ꧀ꦱꦃꦲꦁꦒꦝꦃꦲꦶꦫꦶꦏꦸꦃ꧈ꦲꦸꦠꦮꦶꦩꦭꦶꦃꦥꦔꦁꦒꦼꦥ꧀ꦲꦶꦁꦏꦁꦫꦸꦥꦶꦫꦸꦥꦶ꧈ꦭ꧇ꦱꦮꦁꦱꦸꦭ꧀ꦭꦶꦥꦸꦤ꧀ꦥꦫꦱꦒꦼꦢ꧀ꦝꦱꦂꦠꦏ꧀ꦱꦶꦃꦢꦼꦢꦊꦩ꧀ꦲꦶꦁꦱꦸꦫꦏꦂꦠ꧈ꦠꦸꦩꦤ꧀ꦢꦸꦏ꧀ꦏꦶꦁꦏꦫꦔꦤ꧀ꦤꦶꦥꦸꦤ꧀ꦢꦸꦩꦭꦸꦤ꧀ꦢꦸꦁꦕꦼꦛꦠꦸꦂꦒꦩ꧀ꦥꦶꦭ꧀ꦩꦔꦼꦂꦠꦺꦴꦱ꧀꧈ꦢꦭꦱꦤ꧀ꦠꦼꦠꦼꦩ꧀ꦧꦸꦔꦤ꧀ꦤꦶꦥꦸꦤ꧀ꦲꦕꦼꦁꦏꦺꦴꦏ꧀ꦲꦔꦽꦱꦼꦥ꧀ꦥꦏꦼꦤ꧀꧉

꧋ꦲꦶꦁꦫꦺꦃꦤꦼꦏꦸꦭꦥꦸꦤꦶꦏꦱꦩ꧀ꦥꦸꦤ꧀ꦤꦩꦶꦏꦝꦸꦁ꧈ꦔꦠꦸꦂꦫꦶꦥꦿꦶꦏ꧀ꦱꦥꦚꦸꦮꦸꦤ꧀ꦤꦤ꧀꧈ꦢꦢꦺꦴꦱ꧀ꦏꦸꦭꦏꦼꦢꦃꦩꦼꦂꦱꦗꦏ꧀ꦏꦏꦼꦤ꧀ꦲꦶꦁꦏꦁꦢꦢꦺꦴꦱ꧀ꦏꦧꦼꦠꦃꦲꦤ꧀ꦏꦸꦭꦮꦲꦸ꧈ꦲꦶꦁꦒꦶꦃꦥꦸꦤꦶꦏꦱꦼꦫꦠ꧀ꦏꦗꦮꦺꦤ꧀꧈ꦱꦒꦼꦢꦏꦮꦼꦢꦭ꧀ꦭꦏꦼꦤ꧀ꦱꦩꦶꦁꦒꦸꦏꦥꦶꦁꦏꦭꦶꦃꦲꦸꦠꦮꦶꦏꦥꦶꦁꦠꦶꦒ꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦩꦸꦒꦶꦥꦫꦩꦲꦺꦴꦱ꧀ꦱꦩꦶꦏꦂꦱꦥꦫꦶꦁꦥꦔꦏ꧀ꦱꦩ꧈ꦲꦮꦶꦠ꧀ꦱꦸꦩꦼꦭꦏꦸꦭꦏꦢꦺꦴꦱ꧀ꦒꦸꦩꦒꦒꦃꦲꦶꦁꦒꦶꦃꦧꦺꦴꦠꦼꦤ꧀꧈ꦤꦩꦸꦁꦏꦼꦩꦮꦺꦴꦤ꧀ꦱꦒꦼꦢ꧀ꦢꦩꦶꦤ꧀ꦝꦏ꧀ꦉꦩꦼꦤ꧀ꦩꦭꦶꦃ꧉ꦩꦼꦁꦒꦃꦭꦸꦒꦸꦤꦶꦥꦸꦤ꧀ꦏꦸꦭꦱꦩ꧀ꦥꦸꦤ꧀ꦫꦸꦩꦲꦺꦴꦱ꧀ꦲꦁꦱꦭ꧀ꦥꦔꦪꦺꦴꦩꦤ꧀ꦏꦭꦸꦤ꧀ꦠꦸꦂꦫꦤ꧀ꦤꦶꦁꦥꦫꦱꦒꦼꦢ꧀ꦲꦶꦁꦏꦁꦱꦩꦶꦏꦂꦱꦱꦸꦢꦶꦔꦫꦁꦲꦶꦁꦏꦗꦮꦺꦤ꧀꧉ꦱꦧꦧ꧀ꦲꦶꦁꦱꦢꦪꦤꦶꦁꦏꦫꦔꦤ꧀꧈ꦱꦢꦸꦩꦢꦏ꧀ꦱꦩꦶꦒꦝꦃꦱꦸꦫꦲꦺꦴꦱ꧀ꦥꦫꦶꦁꦥꦶꦠꦼꦢꦃꦤꦼꦤꦸꦤ꧀ꦠꦸꦤ꧀ꦝꦠꦼꦁꦥꦫꦩꦲꦺꦴꦱ꧀ꦲꦶꦁꦏꦁꦕꦸꦥꦼꦠ꧀ꦏꦮꦿꦸꦃꦲꦶꦥꦸꦤ꧀꧈ꦥꦸꦤꦥꦩꦭꦶꦃꦝꦠꦼꦁꦏꦸꦭ꧈ꦥꦔꦊꦩ꧀ꦏꦸꦭꦠꦤ꧀ꦥꦲꦸꦥꦩꦶ꧈ꦝꦱꦂꦫꦶꦥꦸꦤ꧀ꦏꦸꦭꦥꦸꦤꦶꦏꦠꦿꦃꦲꦶꦁꦲꦭꦶꦠ꧀꧈ꦩꦁꦏꦢꦼꦢꦸꦤꦸꦁꦲꦶꦁꦥꦉꦢꦺꦤ꧀꧈ꦗꦼꦧꦸꦭ꧀ꦩꦁꦒꦶꦃꦗꦮꦶꦠꦸꦭꦺꦤ꧀꧌ꦱꦸꦫꦏꦂꦠ꧍ꦒꦼꦁꦔꦶꦁꦥꦤꦸꦮꦸꦤ꧀ꦏꦸꦭꦠꦤ꧀ꦱꦃꦲꦩ꧀ꦧꦭ꧀ꦲꦩ꧀ꦧꦭꦤ꧀꧉ꦲꦶꦁꦏꦗꦮꦺꦤ꧀ꦫꦸꦩꦶꦪꦶꦤ꧀ꦱꦩ꧀ꦥꦸꦤ꧀ꦏꦮꦿꦠ꧀ꦧꦤ꧀ꦠꦃꦲꦤ꧀ꦤꦶꦥꦸꦤ꧀ꦒꦫꦺꦁꦭꦤ꧀ꦥꦼꦠꦿꦸꦏ꧀꧈ꦲꦶꦁꦒꦶꦃꦥꦸꦤꦶꦏꦏꦗꦮꦺꦤ꧀ꦧꦝꦼꦏꦢꦩꦼꦭ꧀ꦱꦲꦼꦏꦢꦺꦴꦱ꧀ꦢꦼꦤꦼꦥꦚ꧀ꦗꦶꦥꦸꦱ꧀ꦠꦏ꧈ꦤꦔꦶꦁꦠꦼꦏꦮꦠꦮꦶꦱ꧀ꦭꦩꦶꦢꦺꦫꦺꦁꦏꦼꦢꦢꦺꦴꦱ꧀ꦱꦤ꧀꧉ꦝꦱꦂꦫꦶꦥꦸꦤ꧀ꦏꦸꦭꦥꦸꦤꦶꦏꦤꦩꦶꦏꦥꦼꦚ꧀ꦕꦸꦠ꧀꧈ꦱꦤꦢꦾꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦔꦼꦤ꧀ꦢꦶꦏꦏ꧀ꦏꦏꦼꦤ꧀ꦏꦢꦺꦴꦱ꧀ꦥꦸꦤ꧀ꦢꦶ꧈ꦏꦸꦭꦲꦶꦁꦒꦶꦃꦧꦺꦴꦠꦼꦤ꧀ꦩꦸꦤ꧀ꦢꦸꦂ꧈ꦠꦩ꧀ꦧꦃꦏꦸꦭꦝꦼꦭꦶꦏ꧀ꦏꦏꦼꦤ꧀ꦲꦶꦱꦶꦤ꧀ꦏꦸꦭ꧈ꦱꦸꦏꦸꦂꦏꦸꦭꦱꦒꦼꦢ꧀ꦏꦠꦩ꧀ꦥꦺꦤ꧀ꦥꦔꦸꦤꦼꦒ꧀ꦲꦸꦤꦼꦒ꧀ꦒꦶꦁꦥꦶꦏꦶꦂꦏꦸꦭ꧉ꦩꦶꦭꦱꦏꦶꦁꦲꦢꦽꦁꦔꦶꦁꦩꦤꦃ꧈ꦏꦸꦭꦭꦗꦼꦁꦒꦝꦃꦥꦚꦸꦮꦸꦤ꧀ꦤꦤ꧀꧈ꦲꦶꦁꦏꦁꦱꦸꦥꦢꦺꦴꦱ꧀ꦠꦸꦩꦸꦤ꧀ꦠꦼꦤ꧀ꦏꦶꦤꦧꦸꦭ꧀ꦭꦏꦼꦤ꧀꧉ꦱꦲꦸꦥꦩꦶꦥꦚ꧀ꦗꦼꦤꦼꦔꦤ꧀ꦤꦶꦥꦸꦤ꧀ꦥꦫꦭꦁꦒꦤꦤ꧀ꦱꦩ꧀ꦥꦸꦤ꧀ꦱꦫꦸꦗꦸꦏ꧀ꦱꦩꦶꦏꦂꦱ꧈ꦤꦩꦸꦁꦏꦼꦩꦮꦺꦴꦤ꧀ꦉꦒꦶꦤꦶꦁꦏ꧀ꦮꦂꦠꦭ꧀ꦲꦶꦁꦒꦶꦃꦧꦝꦼꦏꦲꦶꦤ꧀ꦝꦏ꧀ꦏꦏꦼꦤ꧀꧈ꦤꦔꦶꦁꦲꦶꦁꦏꦁꦥꦸꦤꦶꦏꦒꦸꦩꦤ꧀ꦠꦸꦁꦝꦠꦼꦁꦥꦢꦸꦏꦥꦔꦒꦼꦁꦔꦶꦁꦏꦗꦮꦺꦤ꧀꧈ꦱꦤꦢꦾꦤ꧀ꦏꦉꦧꦃꦏꦸꦭꦲꦶꦁꦒꦶꦃꦥꦽꦕꦢꦺꦴꦱ꧀ꦭꦤ꧀ꦥꦸꦠꦸꦱ꧀ꦲꦏꦤ꧀ꦛꦶꦱꦸꦕꦶꦤꦶꦁꦥꦼꦁꦒꦭꦶꦃ꧈ꦲꦸꦠꦮꦶꦩꦭꦶꦃꦧꦺꦴꦠꦼꦤ꧀ꦢꦩꦼꦭ꧀ꦕꦸꦮꦤꦶꦁꦥꦫꦭꦁꦒꦤꦤ꧀꧉

꧋ꦏꦸꦭꦭꦁꦒꦤ꧀ꦤꦤ꧀ 342 ꦠꦸꦫꦺꦤ꧀꧉ꦫꦢꦺꦤ꧀꧉ꦯꦱꦿꦱꦺꦮꦪ꧉

꧋ꦉꦝꦏ꧀ꦱꦶꦏꦗꦮꦺꦤ꧀ꦫꦸꦩꦲꦺꦴꦱ꧀ꦧꦶꦔꦃꦤꦩ꧀ꦥꦺꦤꦶꦱꦼꦫꦠ꧀ꦥꦚ꧀ꦗꦼꦤꦼꦔꦤ꧀ꦲꦶꦁꦏꦁꦱꦸꦫꦲꦺꦴꦱꦶꦥꦸꦤ꧀ꦏꦢꦺꦴꦱ꧀ꦲꦶꦁꦔꦶꦁꦒꦶꦭ꧀ꦥꦸꦤꦶꦏ꧈ꦲꦩꦿꦠꦤ꧀ꦝꦤꦶꦧꦶꦭꦶꦃꦥꦚ꧀ꦗꦼꦤꦼꦔꦤ꧀ꦏꦉꦤ꧀ꦤꦤ꧀ꦠꦸꦮꦶꦤ꧀ꦩꦶꦒꦠꦺꦴꦱ꧀ꦱꦏꦼꦤ꧀ꦝꦠꦼꦁꦱꦸꦫꦲꦺꦴꦱꦶꦁꦏꦗꦮꦺꦤ꧀꧈ꦩꦶꦭꦉꦝꦏ꧀ꦱꦶꦔꦠꦸꦂꦫꦏꦼꦤ꧀ꦒꦼꦁꦔꦶꦁꦥꦤꦸꦮꦸꦤ꧀꧉

꧋ꦧꦧ꧀ꦱꦤ꧀ꦠꦸꦤ꧀ꦤꦶꦁꦠꦥꦶꦃꦲꦶꦥꦸꦤ꧀ꦏꦗꦮꦺꦤ꧀꧈ꦥꦸꦤꦶꦏꦏꦸꦭꦲꦠꦸꦫꦶꦚꦧꦂꦫꦏꦼꦤ꧀꧈ꦏꦢꦺꦴꦱ꧀ꦠꦸꦩꦸꦤ꧀ꦠꦼꦤ꧀ꦏꦭꦩ꧀ꦥꦃꦲꦤ꧀꧉ꦢꦼꦤꦼꦧꦧ꧀ꦲꦶꦤ꧀ꦝꦏ꧀ꦏꦶꦁꦮꦼꦢꦭ꧀ꦭꦶꦥꦸꦤ꧀ꦏꦗꦮꦺꦤ꧀꧈ꦱꦤꦢꦾꦤ꧀ꦢꦺꦫꦺꦁꦏꦭꦩ꧀ꦥꦃꦲꦤ꧀꧈ꦤꦔꦶꦁꦲꦶꦁꦱꦥꦸꦤꦶꦏꦕꦕꦃꦲꦶꦁꦏꦕꦤꦶꦥꦸꦤ꧀ꦱꦩ꧀ꦥꦸꦤ꧀ꦏꦲꦶꦤ꧀ꦝꦏ꧀ꦏꦤ꧀ꦢꦢꦺꦴꦱ꧀꧇꧒꧐꧇꧈ꦧꦺꦴꦏ꧀ꦩꦤꦮꦶꦲꦶꦤ꧀ꦝꦏ꧀ꦏꦶꦁꦏꦕꦮꦲꦸꦱꦩ꧀ꦥꦸꦤ꧀ꦫꦒꦶꦢꦩꦼꦭ꧀ꦥꦩꦉꦩ꧀ꦩꦶꦁꦒꦭꦶꦃ꧉ꦩꦶꦭꦱꦲꦸꦥꦩꦶꦱꦥꦸꦤꦶꦏꦲꦶꦁꦢꦊꦩ꧀ꦱꦩꦶꦁꦒꦸꦧꦝꦼꦏꦮꦼꦢꦭ꧀ꦭꦏꦼꦤ꧀ꦏꦥꦶꦁꦏꦭꦶꦃ꧈ꦫꦒꦶꦮꦺꦴꦤ꧀ꦠꦼꦤ꧀ꦥꦏꦺꦮꦼꦢ꧀ꦢꦶꦥꦸꦤ꧀꧉

Red. Kadjawèn.

Panyuwunan

Sampun watawis lami kula gadhah niyat badhe nyuwun dhatêng para langganan Kêjawèn, punapa malih dhatêng panjênênganipun paduka rêdhaktur, ananging dèrèng kadumugèn. Sampun wataking tiyang ingkang kirang ing budi, punika tansah anggadhahi rikuh, utawi malih panganggêp ingkang rupi-rupi, la: sawangsulipun para sagêd dhasar taksih dêdalêm ing Surakarta, tumanduking karanganipun dumalundung cêtha tur gampil mangêrtos, dalasan têtêmbunganipun acengkok angrêsêpakên.

Ing rèhne kula punika sampun nami kadhung, ngaturi priksa panyuwunan, dados kula kêdah mêrsajakakên ingkang dados kabêtahan kula wau, inggih punika sêrat Kajawèn, sagêda kawêdalakên saminggu kaping kalih utawi kaping tiga. Ingkang makatên wau mugi para maos sami karsa paring pangaksama, awit sumêla kula kados gumagagah inggih botên, namung kemawon sagêda mindhak rêmên malih. Mênggah lugunipun kula sampun rumaos angsal pangayoman kalunturaning para sagêd ingkang sami karsa sudi ngarang ing Kajawèn. Sabab ing sadayaning karangan, sadumadak sami gadhah suraos paring pitêdah nênuntun dhatêng para maos ingkang cupêt kawruhipun, punapa malih dhatêng kula, pangalêm kula tanpa upami, dhasaripun kula punika trahing alit, măngka dêdunung ing parêdèn, jêbul manggih Jawi tulèn (Surakarta) gênging panuwun kula tansah ambal-ambalan. Ing Kajawèn rumiyin sampun kawrat bantahanipun Garèng lan Petruk, inggih punika Kajawèn badhe kadamêl sae kadosdene Panji Pustaka, nanging têka watawis lami dèrèng kêdadosan. Dhasaripun kula punika nami kapencut, sanadyan wontên ingkang ngêndikakakên kadospundi, kula inggih botên mundur, tambah kula dhêlikakên isin kula, sukur kula sagêd katampèn pangunêg-unêging pikir kula. Mila saking adrênging manah, kula lajêng gadhah panyuwunan, ingkang supados tumuntên kinabulakên. Saupami panjênênganipun para langganan sampun sarujuk sami karsa, namung kemawon rêgining kwartal inggih badhe kaindhakakên, nanging ingkang punika gumantung dhatêng paduka pangagênging Kajawèn, sanadyan karebah kula inggih prêcados lan putus akanthi sucining pênggalih, utawi malih botên damêl cuwaning para langganan.

Kula langganan 342 Turèn. Radèn Sasrasewaya.

Rêdhaksi Kajawèn rumaos bingah nampèni sêrat panjênêngan ingkang suraosipun kados ing nginggil punika, amratandhani bilih panjênêngan karênan tuwin migatosakên dhatêng suraosing Kajawèn, mila rêdhaksi ngaturakên gênging panuwun.

Bab santuning tapihipun Kajawèn, punika kula aturi nyabarakên, kados tumuntên kalampahan. Dene bab indhaking wêdalipun Kajawèn, sanadyan dèrèng kalampahan, nanging ing sapunika cacahing kacanipun sampun kaindhakan dados 20, bokmanawi indhaking kaca wau sampun ragi damêl pamarêming galih. Mila saupami sapunika ing dalêm saminggu badhe kawêdalakên kaping kalih, ragi wontên pakèwêdipun.

Red. Kajawèn.

[ 333 ]꧋ꦥꦉꦥꦠ꧀ꦠꦤ꧀ꦥꦏꦼꦩ꧀ꦥꦭ꧀ꦭꦤ꧀ꦱꦼꦢꦾꦩꦸꦭꦾ

꧋ꦕꦤ꧀ꦝꦏ꧀ꦏꦶꦥꦸꦤ꧀ꦏꦗꦮꦺꦤ꧀꧉ꦮ꧀ꦢꦁꦏ 20꧉

꧋ꦲꦔ꧀ꦭꦗꦼꦁꦔꦏꦼꦤ꧀ꦱꦼꦱꦺꦴꦫꦃꦲꦶꦥꦸꦤ꧀ꦏꦚ꧀ꦗꦼꦁꦫꦢꦺꦤ꧀ꦩꦱ꧀ꦄꦢꦶꦥꦠꦶꦄꦂꦪꦏꦸꦱꦸꦩꦲꦸꦠꦪ꧈ꦗꦸꦫꦸꦱꦧ꧀ꦢꦲꦔꦤ꧀ꦢꦶꦏꦏ꧀ꦏꦏꦼꦤ꧀꧈ꦧꦶꦭꦶꦃꦫꦢ꧀ꦝꦸꦱꦸꦤ꧀ꦥꦸꦤꦶꦏꦩꦤꦮꦶꦱꦩ꧀ꦥꦸꦤ꧀ꦏꦮꦺꦴꦤ꧀ꦠꦼꦤ꧀ꦤꦏꦼꦤ꧀꧈ꦏꦠꦼꦠꦼꦥ꧀ꦥꦤ꧀ꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀ꦧꦺꦴꦠꦼꦤ꧀ꦏꦺꦴꦏ꧀ꦭꦗꦼꦁꦏꦤ꧀ꦛꦶꦥꦶꦭꦶꦲꦤ꧀ꦏꦢꦺꦴꦱ꧀ꦱꦩꦁꦏꦼꦥꦸꦤꦶꦏ꧈ꦲꦤꦔꦶꦁꦏꦼꦢꦃꦏꦠꦼꦠꦼꦥ꧀ꦥꦏꦼꦤ꧀ꦱꦏꦶꦁꦔꦶꦁꦒꦶꦭ꧀꧈ꦥꦽꦭꦸꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀ꦱꦒꦼꦢ꧀ꦢꦤꦶꦤ꧀ꦢꦏ꧀ꦏꦏꦼꦤ꧀ꦥꦔꦸꦮꦱꦤꦶꦥꦸꦤ꧀ꦥꦸꦤꦥꦩꦼꦱ꧀ꦛꦶꦤꦶꦥꦸꦤ꧀꧉

꧋ꦩꦶꦠꦸꦫꦸꦠ꧀ꦈꦠꦸꦱ꧀ꦱꦤ꧀ꦥꦤꦭꦶꦠꦶꦈꦒꦶꦄꦩꦶꦒꦠꦺꦴꦱ꧀ꦱꦏꦼꦤ꧀꧈ꦩꦼꦁꦒꦃꦮꦺꦴꦃꦲꦶꦥꦸꦤ꧀ꦥꦿꦤꦠꦤ꧀ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦱꦶꦠꦶꦏꦿꦗꦤ꧀꧈ꦆꦁꦏꦁꦄꦚ꧀ꦗꦭꦫꦶꦠꦸꦮꦸꦃꦲꦶꦁꦥꦿꦤꦠꦤ꧀ꦥꦿꦤꦠꦤ꧀ꦆꦁꦏꦁꦧꦺꦴꦠꦼꦤ꧀ꦱꦲꦺꦱꦲꦥꦿꦺꦤ꧀ꦠꦃꦄꦭꦸꦱ꧀꧉ꦲꦱꦿꦶꦁꦏꦺꦩꦮꦺꦴꦤ꧀ꦏꦭꦩ꧀ꦥꦃꦲꦤ꧀꧈ꦮꦺꦴꦤ꧀ꦠꦼꦤ꧀ꦠꦶꦪꦁꦠꦤꦶꦱꦶꦠꦶꦤꦶꦥꦸꦤ꧀ꦏꦕꦧꦸꦠ꧀꧈ꦆꦁꦏꦁꦏꦭꦥꦸꦤꦶꦏꦢꦺꦫꦺꦁꦢꦶꦥꦸꦤ꧀ꦠꦤꦼꦩꦶ꧉ꦩꦁꦒꦢꦶꦥꦸꦤ꧀ꦥꦁꦒꦭꦶꦃꦏꦺꦩꦮꦺꦴꦤ꧀꧈ꦈꦥꦩꦶꦱꦶꦠꦶꦒꦝꦲꦤ꧀ꦤꦶꦁꦥꦧꦿꦶꦏ꧀꧈ꦮꦼꦏ꧀ꦢꦭ꧀ꦭꦶꦥꦸꦤ꧀ꦩꦁꦱꦥꦕꦼꦏ꧀ꦭꦶꦏ꧀꧈ꦧꦺꦴꦠꦼꦤ꧀ꦢꦶꦥꦸꦤ꧀ꦠꦤꦼꦩꦶꦈꦗꦸꦒ꧀ꦈꦗꦸꦒ꧀ꦭꦗꦼꦁꦏꦕꦧꦸꦠ꧀ꦏꦺꦩꦮꦺꦴꦤ꧀꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦄꦱꦿꦶꦁꦱꦺꦴꦏ꧀ꦏꦠꦶꦤ꧀ꦢꦏ꧀ꦏꦏꦼꦤ꧀ꦮꦺꦴꦤ꧀ꦠꦼꦤ꧀ꦆꦁꦥꦝꦸꦱꦸꦤ꧀ꦤꦤ꧀ꦏꦤ꧀ꦛꦶꦒꦼꦒꦤ꧀ꦝꦸꦭ꧀ꦭꦤ꧀꧈ꦎꦂꦝꦺꦴꦤꦤ꧀ꦱꦶꦤꦶꦁꦒꦼꦩꦶꦤ꧀ꦠꦼꦝꦸꦱꦸꦤ꧀꧉ꦦꦉꦥꦠ꧀ꦠꦤ꧀ꦝꦸꦱꦸꦤ꧀ꦭꦗꦼꦁꦏꦥꦿꦺꦤ꧀ꦠꦃꦏꦺꦩꦮꦺꦴꦤ꧀꧈ꦩꦸꦫꦶꦃꦄꦢꦩꦼꦭ꧀ꦥꦸꦠꦸꦱꦤ꧀ꦆꦁꦏꦁꦩꦏꦠꦼꦤ꧀ꦮꦲꦸ꧉ꦣꦺꦤꦺꦩꦤꦮꦶꦩꦏꦠꦼꦤ꧀ꦮꦲꦸꦧꦺꦴꦠꦼꦤ꧀ꦢꦶꦥꦸꦤ꧀ꦠꦸꦫꦸꦠ꧀꧈ꦭꦗꦼꦁꦠꦼꦠꦶꦪꦔꦶꦥꦸꦤ꧀ꦱꦏꦼꦝꦥ꧀ꦱꦏꦼꦝꦥ꧀ꦠꦤ꧀ꦱꦃꦏꦠꦶꦩ꧀ꦧꦭ꧀ꦭꦤ꧀ꦮꦺꦴꦤ꧀ꦠꦼꦤ꧀ꦆꦁꦄꦱꦶꦱ꧀ꦠꦺꦤ꧀ꦤꦤ꧀ꦈꦠꦮꦶꦆꦁꦏꦮꦼꦢꦤ꧀ꦤꦤ꧀꧉ꦖꦫꦆꦁꦏꦁꦩꦏꦠꦼꦤ꧀ꦮꦲꦸꦈꦒꦶꦏꦠꦶꦤ꧀ꦢꦏ꧀ꦏꦏꦼꦤ꧀ꦏꦭꦧꦝꦺꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦭꦸꦩ꧀ꦧꦸꦁꦝꦸꦱꦸꦤ꧀꧉ꦑꦭꦆꦁꦏꦝꦶꦱ꧀ꦠꦿꦶꦏ꧀ꦏꦤ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦼꦩ꧀ꦥꦭ꧀ꦭꦤ꧀ꦆꦁꦏꦁꦏꦥꦶꦁꦤꦼ [ 334 ]ꦩ꧀ꦲꦔꦽꦩ꧀ꦧꦒ꧀ꦧꦧ꧀ꦥꦸꦤꦶꦏ꧈ꦱꦩ꧀ꦥꦸꦤ꧀ꦏꦛꦃꦠꦼꦠꦶꦪꦁꦆꦁꦏꦁꦭꦗꦼꦁꦩꦤꦸꦠ꧀ꦏꦺꦩꦮꦺꦴꦤ꧀꧈ꦱꦉꦁꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦼꦩ꧀ꦥꦭꦤ꧀ꦆꦁꦏꦁꦏꦥꦶꦁꦥꦶꦠꦸꦤꦶꦥꦸꦤ꧀꧈ꦱꦢꦪꦠꦼꦠꦶꦪꦁꦝꦸꦱꦸꦤ꧀ꦱꦩꦶꦩꦸꦥꦏꦠ꧀ꦏꦭꦶꦲꦤ꧀ꦏꦂꦱꦤꦶꦁꦏꦥꦭꦤꦶꦥꦸꦤ꧀ꦝꦶꦱ꧀ꦠꦿꦶꦏ꧀꧈ꦧꦶꦭꦶꦃꦭꦸꦩ꧀ꦧꦸꦁꦥꦸꦤꦶꦏꦧꦝꦺꦄꦚꦸꦒꦶꦃꦲꦏꦼꦤ꧀ꦱꦢꦪꦠꦶꦪꦁꦆꦁꦝꦸꦱꦸꦤ꧀꧉ꦯꦱꦩ꧀ꦥꦸꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦏꦼꦩ꧀ꦥꦭꦤ꧀ꦆꦁꦏꦁꦏꦥꦶꦁ꧇꧗꧇ꦆꦁꦏꦺꦴꦤ꧀ꦝꦶꦱꦶꦱꦼꦠꦠꦶꦥꦸꦤ꧀ꦥꦿꦶꦪꦤ꧀ꦠꦸꦤ꧀ꦮꦲꦸꦭꦗꦼꦁꦏꦱꦼꦫꦠ꧀ꦩꦏꦠꦼꦤ꧀꧇ꦥꦶꦤ꧀ꦠꦼꦂꦧꦔꦼꦠ꧀ꦱꦼꦱꦿꦮꦸꦔꦤ꧀ꦤꦺꦏꦫꦺꦴꦮꦺꦴꦁꦕꦶꦭꦶꦏ꧀꧉

꧋ꦥꦸꦁꦏꦱꦤ꧀ꦤꦶꦁꦱꦼꦱꦺꦴꦫꦃꦲꦶꦥꦸꦤ꧀ꦏꦚ꧀ꦗꦼꦁꦫꦢꦺꦤ꧀ꦩꦱ꧀ꦄꦢꦶꦥꦠꦶꦄꦂꦪꦏꦸꦱꦸꦩꦲꦸꦠꦪ꧈ꦲꦔꦠꦸꦫꦶꦠꦼꦠꦶꦩ꧀ꦧꦁꦔꦤ꧀꧈ꦩꦸꦒꦶꦩꦸꦒꦶꦥꦿꦤꦠꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸꦲꦺꦁꦒꦭ꧀ꦭꦏꦲꦶꦕꦭ꧀ꦭꦏꦼꦤ꧀꧈ꦧꦺꦴꦏ꧀ꦩꦤꦮꦶꦲꦶꦁꦠꦼꦩ꧀ꦧꦼꦠꦼꦠꦶꦪꦁꦗꦮꦶꦭꦗꦼꦁꦧꦺꦴꦠꦼꦤ꧀ꦥꦠꦺꦴꦱ꧀ꦏꦺꦭꦸꦱꦔꦼꦠ꧀ꦱꦔꦼꦠ꧀ꦝꦠꦼꦁꦱꦢꦪꦲꦶꦁꦏꦁꦲꦱ꧀ꦭꦶꦱꦏꦶꦁꦠꦤꦃꦌꦫꦺꦴꦥꦃ꧈ꦲꦤꦔꦶꦁꦮꦸꦱꦤꦤꦶꦥꦸꦤ꧀ꦭꦗꦼꦁꦱꦒꦼꦢ꧀ꦫꦸꦩꦒꦁꦥꦶꦪꦩ꧀ꦧꦏ꧀꧉ꦥꦿꦤꦠꦤ꧀ꦲꦶꦁꦏꦁꦱꦩꦁꦏꦼꦥꦸꦤꦶꦏꦠꦸꦩꦿꦥ꧀ꦲꦔꦗꦼꦁꦔꦏꦼꦤ꧀ꦫꦏꦾꦠ꧀ꦩꦶꦭꦊꦥꦠ꧀꧉

꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦫꦩ꧀ꦥꦸꦁ꧈ꦲꦶꦁꦏꦁꦭꦗꦼꦁꦏꦲꦠꦸꦂꦫꦤ꧀ꦱꦼꦱꦺꦴꦫꦃꦏꦗꦼꦁꦫꦢꦺꦤ꧀ꦠꦸꦩꦼꦁꦒꦸꦁꦲꦂꦪꦯꦱꦿꦲꦢꦶꦮꦶꦗꦪ꧈ꦲꦶꦁꦏꦁꦧꦸꦥꦠꦶꦲꦶꦁꦢꦼꦩꦏ꧀꧉ꦲꦶꦁꦱꦏꦮꦶꦠ꧀ꦗꦸꦫꦸꦱꦧ꧀ꦢꦲꦔꦤ꧀ꦢꦶꦏꦏ꧀ꦏꦏꦼꦤ꧀ꦧꦧ꧀ꦮꦗꦶꦧ꧀ꦭꦤ꧀ꦥꦁꦏꦠ꧀ꦭꦸꦫꦃꦝꦸꦱꦸꦤ꧀꧈ꦲꦸꦠꦮꦶꦩꦭꦶꦃꦏꦠꦼꦠꦼꦥ꧀ꦥꦤ꧀ꦤꦶꦥꦸꦤ꧀ꦭꦸꦫꦃꦥꦸꦤꦶꦏꦠꦸꦫꦸꦤ꧀ꦩꦶꦠꦸꦫꦸꦤ꧀꧈ꦱꦢꦪꦮꦲꦸꦩꦶꦠꦸꦫꦸꦠ꧀ꦱꦼꦫꦠ꧀ꦈꦠꦸꦱꦤ꧀ꦥꦤꦭꦶꦠꦶ꧌ꦲꦼꦔꦸꦮꦼꦠꦼ꧍ꦲꦶꦁꦔꦿꦶꦏꦸꦗꦸꦫꦸꦱꦧ꧀ꦢꦲꦔꦤ꧀ꦢꦶꦏꦏ꧀ꦏꦏꦼꦤ꧀꧈ꦧꦶꦭꦶꦃꦥꦔꦿꦺꦃꦥꦿꦗꦧꦺꦴꦠꦼꦤ꧀ꦥꦶꦱꦤ꧀ꦥꦶꦱꦤ꧀ꦲꦤ꧀ꦢꦪꦤꦶꦝꦠꦼꦁꦥꦶꦭꦶꦲꦤ꧀ꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀꧈ꦲꦶꦁꦔꦿꦶꦏꦸꦲꦶꦁꦒꦶꦃꦊꦉꦱ꧀ꦱꦺꦴꦏ꧀ꦲꦱꦿꦶꦁꦮꦺꦴꦤ꧀ꦠꦼꦤ꧀ꦠꦸꦩꦶꦤ꧀ꦢꦏ꧀ꦧꦼꦱꦼꦭ꧀꧈ꦲꦤꦔꦶꦁꦱꦉꦁꦮꦺꦴꦤ꧀ꦠꦼꦤ꧀ꦢꦼꦢꦸꦏꦲꦶꦁꦏꦁꦱꦤ꧀ꦢꦶ꧈ꦲꦶꦁꦏꦁꦩꦏꦠꦼꦤ꧀ꦮꦲꦸꦱꦥꦿꦶꦏꦶꦭꦗꦼꦁꦧꦺꦴꦠꦼꦤ꧀ꦠꦸꦩꦶꦤ꧀ꦢꦏ꧀ꦩꦭꦶꦃ꧉ꦱꦭꦗꦼꦁꦔꦶꦥꦸꦤ꧀ꦗꦸꦫꦸꦱꦧ꧀ꦢꦭꦗꦼꦁꦲꦔꦤ꧀ꦢꦶꦏꦏ꧀ꦏꦏꦼꦤ꧀ꦩꦶꦠꦸꦫꦸꦠ꧀ꦕꦛꦼꦠꦚ꧀ꦕꦼꦛꦼꦠꦤ꧀ꦤꦶꦥꦸꦤ꧀꧈ꦩꦼꦁꦒꦃꦥꦔꦱꦶꦭ꧀ꦭꦤ꧀ꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀꧉ꦲꦶꦁꦔꦿꦶꦏꦸꦏꦕꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦼꦉꦥ꧀ꦱꦔꦼꦠ꧀ꦏꦭꦩ꧀ꦥꦃꦲꦤ꧀ꦮꦺꦴꦤ꧀ꦠꦼꦤ꧀ꦭꦸꦫꦃꦏꦥꦼꦕꦠ꧀ꦱꦏꦶꦁꦥꦢꦩꦼꦭ꧀ꦭꦤꦶꦥꦸꦤ꧀꧈ꦢꦼꦤꦼꦲꦶꦁꦏꦁꦚꦸꦮꦸꦤ꧀ꦏꦺꦤ꧀ꦢꦼꦭ꧀ꦱꦏꦶꦁꦥꦶꦏꦗꦼꦁꦔꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦥꦸꦤꦶꦏꦲꦮꦶꦱ꧀ꦲꦮꦶꦱ꧀꧉

꧋ꦱꦭꦗꦼꦁꦔꦶꦥꦸꦤ꧀ꦗꦸꦫꦸꦱꦧ꧀ꦢꦭꦗꦼꦁꦲꦤꦼꦫꦁꦔꦏꦼꦤ꧀꧈ꦏꦢꦺꦴꦱ꧀ꦥꦸꦤ꧀ꦢꦶꦕꦫꦕꦫꦢꦶꦥꦸꦤ꧀[꧇꧒꧇]ꦏꦼꦩ꧀ꦥꦭꦤ꧀ꦝꦸꦱꦸꦤ꧀꧈ꦏꦤ꧀ꦛꦶꦔꦤ꧀ꦢꦶꦏꦏ꧀ꦏꦏꦼꦤ꧀꧈ꦧꦶꦭꦶꦃꦥꦸꦁꦒꦮꦥꦔꦿꦺꦃꦥꦝꦸꦱꦸꦤ꧀ꦤꦤ꧀ꦥꦸꦤꦶꦏꦲꦮꦶꦱ꧀ꦱꦔꦼꦠ꧀ꦲꦁꦒꦺꦤ꧀ꦤꦶꦥꦸꦤ꧀ꦏꦺꦤ꧀ꦢꦼꦭ꧀ꦱꦏꦶꦁꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀꧉ꦱꦗꦠꦺꦴꦱ꧀ꦱꦶꦥꦸꦤ꧀ꦥꦸꦁꦒꦮꦥꦔꦿꦺꦃꦥꦝꦸꦱꦸꦤ꧀ꦤꦤ꧀ꦥꦸꦤꦶꦏꦏꦼꦔꦶꦁꦏꦮꦱ꧀ꦠꦤꦤ꧀ꦥꦩ꧀ꦧꦤ꧀ꦠꦸꦤꦶꦥꦸꦤ꧀ꦭꦸꦫꦃ

[ 335 ]ꦝꦸꦱꦸꦤ꧀꧈ꦲꦸꦠꦮꦶꦲꦶꦁꦏꦁꦱꦩꦶꦤꦶꦤ꧀ꦢꦏ꧀ꦏꦏꦼꦤ꧀ꦱꦢꦪꦥꦸꦠꦸꦱꦤ꧀ꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀꧉ꦭꦶꦩꦿꦃꦲꦶꦥꦸꦤ꧀ꦩꦤꦮꦶꦏꦊꦉꦱ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤꦶꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀꧈ꦏꦛꦃꦲꦶꦁꦏꦁꦱꦩꦶꦝꦠꦼꦁ꧉ꦥꦿꦤꦠꦤ꧀ꦥꦿꦤꦠꦤ꧀ꦱꦤꦺꦱ꧀ꦱꦶꦥꦸꦤ꧀꧈ꦝꦸꦱꦸꦤ꧀ꦧꦏꦸꦤꦶꦥꦸꦤ꧀ꦧꦺꦴꦠꦼꦤ꧀ꦒꦝꦃ꧉ꦲꦶꦁꦒꦶꦃꦊꦉꦱ꧀꧈ꦧꦶꦭꦶꦃꦲꦶꦁꦥꦝꦸꦱꦸꦤ꧀ꦤꦤ꧀ꦱꦺꦴꦏ꧀ꦲꦱꦿꦶꦁꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦒꦺꦴꦭꦺꦴꦔꦤ꧀ꦤꦶꦁꦠꦼꦠꦶꦪꦁꦱꦼꦥꦸꦃ꧈ꦲꦶꦁꦏꦁꦲꦱꦿꦶꦁꦢꦶꦥꦸꦤ꧀ꦠꦼꦝꦤꦶꦠꦼꦠꦶꦩ꧀ꦧꦔꦤ꧀ꦮꦂꦤꦶꦮꦂꦤꦶ꧉ꦩꦏꦠꦼꦤ꧀ꦲꦸꦒꦶꦗꦸꦫꦸꦱꦧ꧀ꦢꦲꦔꦤ꧀ꦢꦶꦏꦏ꧀ꦏꦏꦼꦤ꧀꧈ꦧꦶꦭꦶꦃꦏꦮꦺꦴꦤ꧀ꦠꦼꦤ꧀ꦤꦤ꧀ꦒꦺꦴꦭꦺꦴꦔꦤ꧀ꦒꦺꦴꦭꦺꦴꦔꦤ꧀ꦲꦶꦁꦝꦸꦱꦸꦤ꧀ꦥꦸꦤꦶꦏꦱꦺꦴꦏ꧀ꦲꦤ꧀ꦢꦪꦤꦶꦝꦠꦼꦁꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀꧈ꦲꦩꦂꦒꦶꦲꦶꦁꦔꦿꦶꦏꦸꦤꦩꦸꦁꦏꦸꦭꦶꦏꦸꦭꦶꦏꦼꦚ꧀ꦕꦼꦁꦏꦼꦩꦮꦺꦴꦤ꧀꧈ꦲꦶꦁꦏꦁꦲꦁꦒꦝꦃꦲꦶꦮꦮꦼꦤꦁꦩꦶꦭꦶꦃ꧉ꦩꦼꦁꦒꦃꦏꦏꦶꦪꦠꦤ꧀ꦤꦶꦥꦸꦤ꧀ꦝꦸꦱꦸꦤ꧀ꦥꦸꦤꦶꦏ꧈ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤꦶꦥꦸꦤ꧀ꦗꦸꦫꦸꦱꦧ꧀ꦢ꧈ꦧꦺꦴꦠꦼꦤ꧀ꦏꦤ꧀ꦛꦶꦥꦶꦫꦤ꧀ꦠꦺꦴꦱ꧀ꦏꦏꦶꦪꦠꦤ꧀꧈ꦲꦤꦔꦶꦁꦔꦼꦩꦸꦔꦏꦼꦤ꧀ꦏꦤ꧀ꦛꦶꦥꦔꦽꦩ꧀ꦧꦒ꧀ꦏꦼꦩꦮꦺꦴꦤ꧀꧉ꦩꦏꦠꦼꦤ꧀ꦲꦸꦒꦶꦲꦏ꧀ꦲꦶꦁꦝꦸꦱꦸꦤ꧀ꦧꦧ꧀ꦥꦔꦢꦶꦭ꧀ꦭꦤ꧀꧈ꦱꦤꦢꦾꦤ꧀ꦠꦏ꧀ꦱꦶꦃꦏꦲꦁꦒꦼꦥ꧀꧈ꦲꦤꦔꦶꦁꦱꦩꦁꦏꦼꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦥꦶꦒꦸꦤꦏꦏ꧀ꦏꦼꦤ꧀ꦩꦭꦶꦃ꧉ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤꦶꦥꦸꦤ꧀ꦗꦸꦫꦸꦱꦧ꧀ꦢ꧈ꦢꦸꦩꦸꦒꦶꦤꦶꦁꦢꦶꦤ꧀ꦠꦼꦤ꧀ꦱꦩꦁꦏꦼꦏꦸꦮꦗꦶꦧ꧀ꦧꦤ꧀ꦤꦶꦥꦸꦤ꧀ꦝꦸꦱꦸꦤ꧀ꦱꦒꦼꦢ꧀ꦢꦶꦥꦸꦤ꧀ꦠꦶꦤ꧀ꦢꦏ꧀ꦏꦏꦼꦤ꧀ꦏꦤ꧀ꦛꦶꦱꦲꦼ꧈ꦲꦤꦔꦶꦁꦲꦶꦁꦠꦼꦩ꧀ꦧꦼꦠꦼꦩ꧀ꦠꦸꦧꦺꦴꦠꦼꦤ꧀ꦱꦲꦼꦩꦭꦶꦃ꧈ꦩꦤꦮꦶꦥꦿꦤꦠꦤꦶꦥꦸꦤ꧀ꦥꦔꦿꦺꦃꦝꦸꦱꦸꦤ꧀ꦧꦺꦴꦠꦼꦤ꧀ꦭꦗꦼꦁꦢꦶꦥꦸꦤ꧀ꦲꦺꦮꦲꦶ꧉ꦱꦪꦢꦔꦸꦏꦸꦮꦗꦶꦧ꧀ꦧꦤ꧀ꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀ꦥꦸꦤꦶꦏ꧈ꦤꦩꦸꦁꦩꦶꦠꦸꦫꦸꦠ꧀ꦥꦽꦤ꧀ꦠꦃꦱꦏꦶꦁꦔꦶꦁꦒꦶꦭ꧀꧈ꦠꦸꦩꦿꦥ꧀ꦥꦢꦺꦴꦱ꧀ꦉꦏꦢꦪꦥꦶꦪꦩ꧀ꦧꦏ꧀ꦥꦿꦱꦱꦠ꧀ꦧꦺꦴꦠꦼꦤ꧀ꦱꦒꦼꦢ꧀꧈ꦱꦠꦼꦩꦃꦔꦢꦼꦒꦶꦁꦥꦿꦶꦧꦢꦶꦲꦶꦁꦝꦸꦱꦸꦤ꧀ꦝꦸꦱꦸꦤ꧀ꦱꦪꦢꦔꦸꦭꦗꦼꦁꦱꦪꦲꦶꦕꦭ꧀꧉ꦲꦩꦶꦭꦥꦿꦤꦠꦤ꧀ꦕꦫꦩꦺꦴꦝꦺꦭ꧀ꦲꦺꦁꦒꦭ꧀ꦥꦼꦂꦭꦸꦱꦔꦼꦠ꧀ꦤꦸꦤ꧀ꦠꦼꦤ꧀ꦏꦠꦶꦤ꧀ꦢꦏ꧀ꦏꦏꦼꦤ꧀꧉ꦩꦼꦁꦒꦃꦥꦶꦭꦶꦃꦲꦤ꧀ꦤꦶꦥꦸꦤ꧀ꦭꦸꦫꦃꦝꦸꦱꦸꦤ꧀ꦩꦸꦒꦶꦏꦊꦱ꧀ꦠꦤ꧀ꦠꦸꦤ꧀ꦤꦏꦼꦤ꧀꧈ꦲꦤꦔꦶꦁꦲꦶꦁꦏꦁꦏꦼꦢꦃꦧꦝꦼꦏꦥꦶꦭꦶꦃꦢꦢꦺꦴꦱ꧀ꦭꦸꦫꦃꦥꦸꦤꦶꦏ꧈ꦲꦶꦁꦱꦢꦺꦫꦺꦁꦔꦶꦥꦸꦤ꧀ꦏꦼꦢꦃꦲꦩꦶꦭꦶꦃꦠꦶꦪꦁꦲꦶꦁꦏꦁꦲꦚꦼꦏꦥ꧀ꦥꦶꦱꦪꦼꦏ꧀ꦠꦺꦴꦱ꧀꧈ꦗꦭꦫꦤ꧀ꦭꦸꦫꦃꦝꦸꦱꦸꦤ꧀ꦥꦸꦤꦶꦏꦲꦶꦁꦒꦶꦃꦏꦼꦢꦃꦠꦶꦪꦁꦲꦶꦁꦏꦁꦏꦼꦔꦶꦁꦢꦶꦥꦸꦤ꧀ꦥꦶꦠꦢꦺꦴꦱ꧀ꦢꦼꦤꦶꦁꦝꦸꦱꦸꦤ꧀ꦤꦶꦥꦸꦤ꧀꧉ꦢꦼꦤꦼꦭꦸꦫꦃꦲꦶꦁꦏꦁꦥꦽꦭꦸꦏꦠꦼꦠꦼꦥ꧀ꦥꦏꦼꦤ꧀ꦱꦏꦶꦁꦔꦶꦁꦒꦶꦭ꧀ꦥꦸꦤꦶꦏ꧈ꦤꦩꦸꦁꦠꦸꦩꦿꦥ꧀ꦲꦶꦁꦱꦮꦼꦤꦺꦃꦲꦶꦁꦝꦸꦱꦸꦤ꧀ꦏꦼꦩꦮꦺꦴꦤ꧀꧉ꦩꦼꦁꦒꦃꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀ꦥꦸꦤꦶꦏꦱꦗꦠꦺꦴꦱ꧀ꦱꦶꦥꦸꦤ꧀ꦲꦱꦿꦶꦁꦲꦢꦩꦼꦭ꧀ꦥꦶꦠꦸꦤꦤ꧀ꦤꦶꦥꦸꦤ꧀ꦠꦼꦠꦶꦪꦁꦝꦸꦱꦸꦤ꧀꧈ꦲꦩꦶꦭꦲꦶꦁꦒꦶꦃꦥꦽꦭꦸꦱꦔꦼꦠ꧀ꦭꦗꦼꦁꦲꦺꦁꦒꦭ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦫꦢ꧀ꦝꦸꦱꦸꦤ꧀꧉ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀꧈ꦤꦩꦸꦁꦩꦤꦮꦶꦧꦝꦼꦲꦔꦽꦩ꧀ꦧꦒ꧀ꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦮꦶꦒꦠꦺꦴꦱ꧀ꦏꦼꦩꦮꦺꦴꦤ꧀꧈ꦢꦢꦺꦴꦱ꧀ꦲꦶꦁꦔꦿꦶꦏꦸꦥꦏꦼꦩ꧀ꦥꦭ꧀ꦭꦤ꧀ꦝꦸꦱꦸꦤ꧀ꦲꦶꦁꦏꦁꦲꦢꦩꦼꦭ꧀ꦥꦿꦤꦠꦤ꧀꧈ꦭꦤ꧀ꦫꦢ꧀ꦝꦸꦱꦸꦤ꧀ꦲꦶꦁꦏꦁꦲꦤꦶꦤ꧀ꦢꦏ꧀ꦏꦏꦼꦤ꧀꧉

꧋ꦥꦸꦁꦏꦱ꧀ꦱꦤꦶꦁꦱꦼꦱꦺꦴꦫꦃꦲꦶꦥꦸꦤ꧀꧈ꦗꦸꦫꦸꦱꦧ꧀ꦢꦲꦤꦶꦩ꧀ꦧꦁꦥꦼꦂꦭꦸ꧈ꦧꦶꦭꦶꦃꦝꦸꦱꦸꦤ꧀ꦥꦸꦤꦶꦏꦢꦶꦥꦸꦤ꧀ꦮꦼꦤꦁꦔꦏꦼꦤ꧀ꦲꦤꦫꦶꦏ꧀ꦥꦲꦺꦴꦱ꧀꧈ꦲꦤꦔꦶꦁꦲꦸꦒꦶꦏꦮꦼꦤꦁꦤꦲꦢꦩꦼꦭ꧀ꦥꦿꦤꦠꦤ꧀ꦲꦸꦏꦸꦩ꧀ꦩꦤ꧀꧉

꧋ꦱꦭꦗꦼꦁꦔꦶꦥꦸꦤ꧀ꦲꦶꦁꦏꦁꦱꦼꦱꦺꦴꦫꦃ꧇ꦩꦱ꧀ꦩꦸꦲꦩꦢ꧀ꦱꦸꦢꦶꦪꦤ꧈ꦮꦢꦤꦲꦶꦁꦧꦼꦱ꧀ꦠꦶꦂꦱꦼꦏꦸꦭ꧀꧈ꦩꦶꦤꦁꦏꦮꦼꦮꦏꦶꦭ꧀ꦭꦶꦥꦸꦤ꧀ꦥꦫꦲꦩ꧀ꦠꦼꦤꦂꦲꦶꦁꦏꦁꦱꦩꦶꦱꦶꦤꦲꦸꦮꦺꦴꦤ꧀ꦠꦼꦤ꧀ꦲꦶꦁꦧꦼꦱ꧀ꦠꦶꦂꦱꦼꦏꦸꦭ꧀꧉ꦗꦸꦫꦸꦱꦧ꧀ꦢꦲꦤꦼꦫꦁꦔꦏꦼꦤ꧀꧈ꦧꦶꦭꦶꦃꦥꦶꦮꦸꦭꦁꦩꦺꦴꦝꦺꦭ꧀ꦲꦺꦁꦒꦭ꧀ꦥꦸꦤꦶꦏ꧈ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦥꦝꦸꦱꦸꦤ꧀ꦤꦤ꧀꧈ꦏꦢꦺꦴꦱ꧀ꦠꦧꦧ꧀ꦥꦥꦿꦺꦤ꧀ꦠꦃꦲꦤ꧀ꦲꦸꦠꦮꦶꦥꦿꦤꦠꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦫꦸꦩꦱꦸꦏ꧀ꦔꦤ꧀ꦠꦺꦴꦱ꧀ꦊꦧꦼꦠ꧀ꦱꦔꦼꦠ꧀꧉ꦲꦶꦁꦩꦁꦏꦥꦝꦸꦱꦸꦤꦤ꧀ꦥꦝꦸꦱꦸꦤꦤ꧀ꦧꦺꦴꦠꦼꦤ꧀ꦱꦒꦼꦢ꧀ꦲꦤꦁꦒꦸꦭꦁꦔꦶꦏꦩꦗꦼꦁꦔꦤ꧀ꦕꦫꦩꦺꦴꦝꦺꦭ꧀ꦲꦺꦁꦒꦭ꧀ꦮꦲꦸ꧈ꦱꦠꦼꦩꦃꦮꦺꦴꦃꦲꦶꦥꦸꦤ꧀ꦠꦩ꧀ꦠꦸꦲꦶꦁꦒꦶꦃꦭꦗꦼꦁꦧꦺꦴꦠꦼꦤ꧀ꦱꦲꦺ꧉ꦗꦭꦫꦤ꧀ꦭꦗꦼꦁꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦿꦤꦠꦤ꧀ꦩꦮꦂꦤꦶꦮꦂꦤꦶ꧈ꦲꦶꦁꦏꦁꦤꦸꦤ꧀ꦠꦼꦤ꧀ꦏꦥꦱꦿꦃꦲꦏꦼꦤ꧀ꦝꦠꦼꦁꦠꦼꦠꦶꦪꦁꦔꦶꦥꦸꦤ꧀ꦝꦸꦱꦸꦤ꧀꧉ꦥꦢꦩꦼꦭ꧀ꦭꦤ꧀ꦱꦼꦫꦠ꧀ꦱꦼꦫꦠ꧀ꦠꦤ꧀ꦭꦗꦼꦁꦩꦶꦤ꧀ꦝꦏ꧀ꦏꦛꦃ꧈ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦝꦸꦱꦸꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦱꦒꦼꦢ꧀ꦤꦶꦤ꧀ꦢꦏ꧀ꦏꦏꦼꦤ꧀꧉

꧋꧌ꦧꦝꦺꦏꦱꦩ꧀ꦧꦼꦠ꧀꧍

Parêpatan Pakêmpalan Sêdyamulya

Candhakipun Kajawèn ăngka 20.

Anglajêngakên sêsorahipun Kangjêng Radèn Mas Adipati Arya Kusumahutaya, juru sabda angandikakakên, bilih rad dhusun punika manawi sampun kawontênakên, katêtêpanipun lurah dhusun botên kok lajêng kanthi pilihan kados samangke punika, ananging kêdah katêtêpakên saking nginggil, prêlunipun lurah dhusun sagêda nindakakên panguwasanipun punapa mêsthinipun.

[Grafik]

Nginggil punika gambaripun panampining para tamu ingkang sami rawuh ing konggrès pakêmpalaning para bupati ing kantor rad kabupatèn ing Batawi.

Miturut utusan panaliti ugi amigatosakên, mênggah wohipun pranatan wontênipun siti krajan, ingkang anjalari tuwuhing pranatan-pranatan ingkang botên sae saha prentah alus. Asring kemawon kalampahan, wontên tiyang tani sitinipun kacabut, ingkang kala punika dèrèng dipun tanêmi. Măngga dipun panggalih kemawon, upami siti gadhahaning pabrik, wêkdalipun măngsa pacêklik, botên dipun tanêmi ujug-ujug lajêng kacabut kemawon. Ingkang makatên wau asring sok katindakakên wontên ing padhusunan kanthi gêgandhulan, ordhonansining gêmintê dhusun. Parêpatan dhusun lajêng kaprentah kemawon, murih adamêl putusan ingkang makatên wau. Dene manawi makatên wau botên dipun turut, lajêng têtiyangipun sakêdhap-sakêdhap tansah katimbalan wontên ing asistenan utawi ing kawêdanan. Cara ingkang makatên wau ugi katindakakên kala badhe ngawontênakên lumbung dhusun. Kala ing kadhistrikan dipun wontênakên kêmpalan ingkang kaping nêm angrêmbag bab punika, sampun kathah têtiyang ingkang lajêng manut kemawon, sarêng dipun wontênakên kêmpalan ingkang kaping pitunipun, sadaya têtiyang dhusun sami mupakat kalihan karsaning kapalanipun dhistrik, bilih lumbung punika badhe anyugihakên sadaya tiyang ing dhusun. Sasampunipun wontên kêmpalan ingkang kaping 7 ing kondhisi sêtatipun priyantun wau lajêng kasêrat makatên: pintêr bangêt sêsrawungane karo wong cilik.

[Grafik]

Para tamu ingkang sami rawuh ing konggrès sami dhahar pasugatan.

Pungkasaning sêsorahipun Kangjêng Radèn Mas Adipati Arya Kusumahutaya, angaturi têtimbangan, mugi-mugi pranatan ingkang makatên wau enggala kaicalakên, bokmanawi ing têmbe têtiyang Jawi lajêng botên patos kèlu sangêt-sangêt dhatêng sadaya ingkang asli saking tanah Eropah, ananging wusananipun lajêng sagêd rumagang piyambak. Pranatan ingkang samangke punika tumrap angajêngakên rakyat mila lêpat.

Sasampunipun rampung, ingkang lajêng kaaturan sêsorah Kangjêng Radèn Tumênggung Arya Sasra Adiwijaya, ingkang bupati ing Dêmak. Ing sakawit juru sabda angandikakakên bab wajib lan pangkat lurah dhusun, utawi malih katêtêpanipun lurah punika turun-miturun, sadaya wau miturut sêrat utusan panaliti (enguete) ing ngriku juru sabda angandikakakên, bilih pangrèh praja botên pisan-pisan andayani dhatêng pilihanipun lurah dhusun, ing ngriku inggih lêrês sok asring wontên tumindak bêsêl, ananging sarêng wontên dêduka ingkang sandi, ingkang makatên wau sapriki lajêng botên tumindak malih. Salajêngipun juru sabda lajêng angandikakakên miturut cathêtan-cêthêtanipun, mênggah pangasilanipun lurah dhusun. Ing ngriku kacariyosakên, bilih kêrêp sangêt kalampahan wontên lurah kapêcat saking padamêlanipun, dene ingkang nyuwun kèndêl saking pikajêngipun piyambak, punika awis-awis.

Salajêngipun juru sabda lajêng anêrangakên, kadospundi cara-caradipun[2] kêmpalan dhusun, kanthi ngandikakakên, bilih punggawa pangrèh padhusunan punika awis sangêt anggènipun kèndêl saking padamêlanipun. Sajatosipun punggawa pangrèh padhusunan punika kenging kawastanan pambantunipun lurah dhusun, utawi ingkang sami nindakakên sadaya putusaning pakêmpalan dhusun. Limrahipun manawi kalêrês dipun wontêni pakêmpalan dhusun, kathah ingkang sami dhatêng. Pranatan-pranatan sanèsipun, dhusun bakunipun botên gadhah. Inggih lêrês, bilih ing padhusunan sok asring wontên satunggiling golonganing têtiyang sêpuh, ingkang asring dipun têdhani têtimbangan warni-warni. Makatên ugi juru sabda angandikakakên, bilih kawontênan golongan-golongan ing dhusun punika sok andayani dhatêng pakêmpalan dhusun, amargi ing ngriku namung kuli-kuli kêncêng kemawon, ingkang anggadhahi wawênang milih. Mênggah kakiyatanipun dhusun punika, miturut pangandikanipun juru sabda, botên kanthi pirantos kakiyatan, ananging ngêmungakên kanthi pangrêmbag kemawon. Makatên ugi haking dhusun bab pangadilan, sanadyan taksih kaanggêp, ananging samangke sampun botên dipun pigunakakên malih. Miturut pangandikanipun juru sabda, dumugining dintên samangke kuwajibanipun dhusun sagêd dipun tindakakên kanthi sae, ananging ing têmbe têmtu botên sae malih, manawi pranatanipun pangrèh dhusun botên lajêng dipun ewahi. Saya dangu kuwajibanipun lurah dhusun punika, namung miturut prentah saking nginggil, tumrap pados rekadaya piyambak prasasat botên sagêd, satêmah ngadêging pribadi ing dhusun-dhusun saya dangu lajêng saya ical. Amila pranatan cara modhèl enggal pêrlu sangêt nuntên katindakakên. Mênggah pilihanipun lurah dhusun mugi kalêstantunakên, ananging ingkang kêdah badhe kapilih dados lurah punika, ing sadèrèngipun kêdah amilih tiyang ingkang anyêkapi sayêktos, jalaran lurah dhusun punika inggih kêdah tiyang ingkang kenging dipun pitados dening dhusunipun. Dene lurah ingkang prêlu katêtêpakên saking nginggil punika, namung tumrap ing sawênèhing dhusun kemawon. Mênggah wontênipun pakêmpalan dhusun punika sajatosipun asring adamêl pitunanipun têtiyang dhusun, amila inggih prêlu sangêt lajêng enggal dipun wontênakên rad dhusun. Wontênipun pakêmpalan dhusun, namung manawi badhe angrêmbag prakawis-prakawis ingkang wigatos kemawon, dados ing ngriku pakêmpalan dhusun ingkang adamêl pranatan, lan rad dhusun ingkang anindakakên.

Pungkasaning sêsorahipun, juru sabda animbang pêrlu, bilih dhusun punika dipun wênangakên anarik paos, ananging ugi kawênangna adamêl pranatan ukuman.

Salajêngipun ingkang sêsorah: Mas Muhamad Sudiyana, wadana ing bêstir sêkul, minăngka wêwakilipun para amtênar ingkang sami sinau wontên ing bêstir sêkul. Juru sabda anêrangakên, bilih piwulang modhèl enggal punika, bab kawontênan padhusunan, kados ta bab paprentahan utawi pranatan sanès-sanèsipun, rumasuk ngantos lêbêt sangêt. Ing măngka padhusunan-padhusunan botên sagêd ananggulangi kamajêngan cara modhèl enggal wau, satêmah wohipun tamtu inggih lajêng botên sae. Jalaran lajêng ngawontênakên pranatan mawarni-warni, ingkang nuntên kapasrahakên dhatêng têtiyangipun dhusun. Padamêlan sêrat-sêratan lajêng mindhak kathah, ingkang makatên punika dhusun inggih botên sagêd nindakakên.

(Badhe kasambêt)

[ 336 ]꧋ꦗꦒꦢ꧀ꦢꦶꦁꦮꦤꦶꦠ

꧋ꦏꦒꦭꦶꦃꦲꦏꦭꦶꦲꦤ꧀ꦠꦶꦤ꧀ꦢꦏ꧀꧉

꧋ꦩꦺꦃꦱꦧꦼꦤ꧀ꦥꦁꦒꦺꦤ꧀ꦤꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦔꦶꦥꦸꦤ꧀ꦲꦶꦁꦏꦁꦧꦺꦴꦠꦼꦤ꧀ꦒꦝꦃꦲꦤꦏ꧀꧉ꦱꦏꦶꦁꦏꦸꦩꦼꦢꦃꦏꦼꦢꦃꦲꦶꦥꦸꦤ꧀ꦧꦝꦺꦲꦩꦺꦴꦩꦺꦴꦁꦭꦫꦺ꧈ꦠꦂꦏꦝꦁꦫꦶꦤ꧀ꦠꦼꦤ꧀ꦢꦭꦸꦔꦤ꧀ꦠꦺꦴꦱ꧀ꦢꦶꦥꦸꦤ꧀ꦫꦺꦚ꧀ꦕꦔꦶꦲꦚꦼꦚꦸꦮꦸꦤ꧀꧈ꦔꦼꦔꦶꦫꦁꦔꦶ꧈ꦩꦿꦶꦏꦩꦿꦶꦏꦶꦲꦩꦼꦂꦝꦸꦏꦸꦤ꧀꧈ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦱꦶꦤ꧀ꦠꦼꦤ꧀ꦲꦶꦁꦏꦁꦧꦺꦴꦠꦼꦤ꧀ꦮꦼꦭꦱ꧀꧈ꦩꦤꦮꦶꦱꦸꦩꦼꦉꦥ꧀ꦠꦶꦪꦁꦏꦢꦺꦴꦱ꧀ꦩꦏꦠꦼꦤ꧀꧉ꦭꦁꦏꦸꦁꦭꦁꦏꦸꦁꦩꦤꦮꦶꦩꦶꦉꦁꦱꦩ꧀ꦧꦠ꧀ꦠꦶꦥꦸꦤ꧀꧇ꦧꦺꦱꦸꦏ꧀ꦪꦺꦤ꧀ꦩꦠꦶꦱꦥꦱꦶꦁꦔꦺꦴꦥꦺꦤ꧀ꦤꦶ꧉ꦱꦩꦤ꧀ꦠꦼꦤ꧀ꦲꦥꦼꦱ꧀ꦱꦶꦥꦸꦤ꧀ꦠꦶꦪꦁꦧꦺꦴꦠꦼꦤ꧀ꦒꦝꦃꦲꦤꦏ꧀꧉ꦢꦢꦺꦴꦱ꧀ꦏꦺꦴꦱꦺꦴꦏ꧀ꦮꦁꦱꦸꦭ꧀ꦭꦶꦥꦸꦤ꧀꧇ꦲꦒꦼꦁꦱꦔꦼꦠ꧀ꦏꦧꦼꦒ꧀ꦗꦤ꧀ꦤꦶꦥꦸꦤ꧀ꦠꦶꦪꦁꦥꦶꦤꦫꦶꦔꦤ꧀ꦩꦺꦴꦩꦺꦴꦔꦤ꧀꧉ꦱꦫꦺꦃꦤꦺꦧꦼꦒ꧀ꦗꦮꦲꦸꦲꦔ꧀ꦭꦁꦏꦸꦁꦔꦶ꧈ꦥꦿꦩꦶꦭꦏꦼꦢꦃꦏꦗꦒꦶꦱꦸꦥꦢꦺꦴꦱ꧀ꦏꦧꦼꦒ꧀ꦗꦤ꧀ꦱꦒꦼꦢꦠꦸꦭꦸꦱ꧀꧈ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦱꦶꦂꦤ꧉ꦲꦶꦁꦔꦿꦶꦏꦶꦲꦶꦁꦏꦁꦏꦼꦢꦃꦢꦶꦥꦸꦤ꧀ꦩꦤꦃ꧈ꦭꦗꦼꦁꦥꦚꦼꦥꦼꦁꦔꦶꦁꦭꦫꦺ꧉ꦥꦸꦤꦶꦏꦧꦺꦴꦠꦼꦤ꧀ꦒꦩ꧀ꦥꦶꦭ꧀꧈ꦩ꧀ꦭꦺꦱꦺꦢ꧀ꦱꦏꦼꦝꦶꦏ꧀ꦲꦱꦿꦶꦁꦲꦤꦸꦮꦸꦃꦲꦏꦼꦤ꧀ꦏꦕꦶꦭꦏꦤ꧀ꦲꦒꦼꦁ꧉

꧋ꦱꦶꦤ꧀ꦠꦼꦤ꧀ꦲꦶꦁꦏꦁꦢꦶꦥꦸꦤ꧀ꦥꦱꦿꦃꦲꦶꦥꦿꦏꦮꦶꦱ꧀ꦥꦸꦤꦶꦏ

1. ꦩꦤꦮꦶꦭꦫꦺꦠꦏ꧀ꦱꦶꦃꦲꦭꦶꦠ꧀꧈ꦧꦥꦧꦶꦪꦸꦁ꧉

2. ꦩꦤꦮꦶꦭꦫꦺꦱꦩ꧀ꦥꦸꦤ꧀ꦱꦶꦤꦲꦸ꧈ꦒꦸꦫꦸ꧉

꧋ꦧꦒꦺꦪꦤ꧀ꦤꦺꦴꦩꦼꦂ 1 ꦧꦥꦧꦶꦪꦸꦁ꧉ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦏꦸꦮꦗꦶꦧ꧀ꦧꦤ꧀ꦲꦁꦒꦸꦭꦮꦼꦤ꧀ꦛꦃꦲꦤꦏ꧀ꦱꦏꦶꦁꦮꦶꦮꦶꦠ꧀ꦠꦤ꧀꧉ꦃꦔ꧀ꦒꦸꦭꦮꦼꦤ꧀ꦛꦃꦲꦶꦁꦒꦶꦃꦥꦸꦤꦶꦏꦏꦒꦸꦤꦤ꧀ꦲꦶꦁꦏꦁꦏꦁꦒꦺꦲꦩ꧀ꦧꦔꦸꦤ꧀ꦭꦫꦺ꧈ꦱꦫꦤꦚꦩ꧀ꦥꦸꦂꦤꦏ꧀ꦏꦏꦼꦤ꧀ꦢꦪꦤꦶꦁꦭꦫꦺꦲꦶꦁꦏꦁꦱꦲꦺ꧈ꦲꦚꦶꦂꦤꦏ꧀ꦏꦏꦼꦤ꧀ꦠꦸꦩꦶꦪꦸꦔꦶꦁꦭꦫꦺꦝꦠꦼꦁꦥꦶꦲꦮꦺꦴꦤ꧀꧉ꦥꦸꦤꦥꦲꦶꦁꦒꦶꦃꦩꦏꦠꦼꦤ꧀꧉ꦧꦺꦴꦏ꧀ꦩꦤꦮꦶꦏꦺꦩꦮꦺꦴꦤ꧀ꦲꦶꦁꦱꦊꦧꦼꦠ꧀ꦠꦶꦁꦭꦫꦺꦠꦏ꧀ꦱꦶꦃꦊꦩ꧀ꦧꦠ꧀꧈ꦲꦶꦁꦏꦁꦏꦲꦸꦢꦶꦭꦁꦏꦸꦁꦥꦽꦭꦸꦧꦧ꧀ꦏꦱꦫꦱ꧀ꦱꦤꦶꦁꦧꦢꦤ꧀꧈ꦲꦩꦂꦒꦶꦮꦼꦝꦂꦫꦶꦁꦥꦏꦂꦪꦤꦶꦁꦱꦸꦏ꧀ꦩꦏꦢꦺꦴꦱ꧀ꦏꦢꦺꦴꦱ꧀ꦢꦺꦫꦺꦁꦏꦼꦠꦮꦶꦱ꧀꧉ꦲꦤꦔꦶꦁꦲꦸꦒꦶꦱꦩ꧀ꦥꦸꦤ꧀꧌ꦲꦸꦮꦶꦱ꧀꧍ꦕꦼꦕꦮꦶꦱ꧀ꦱꦲꦚꦶꦁꦏꦶꦂꦫꦏꦼꦤ꧀ꦥꦿꦏꦮꦶꦱ꧀ꦲꦶꦁꦏꦁꦱꦏꦶꦤ꧀ꦠꦼꦤ꧀ꦢꦢꦺꦴꦱ꧀ꦝꦝꦏꦤ꧀ꦤꦶꦁꦥꦶꦪꦮꦺꦴꦤ꧀꧉ꦭ꧀ꦲ꧈ꦥꦸꦤꦶꦏꦧꦶꦪꦸꦁꦲꦶꦁꦏꦁꦏꦼꦢꦃꦲꦔꦠꦺꦴꦱ꧀ꦲꦠꦺꦴꦱ꧀꧈ꦲꦮꦶꦠ꧀ꦏꦼꦩ꧀ꦥꦭ꧀ꦭꦶꦁꦭꦫꦺꦏꦭꦶꦲꦤ꧀ꦧꦶꦪꦸꦁꦥꦸꦤꦶꦏꦭꦁꦏꦸꦁꦏꦛꦃꦏꦠꦶꦩ꧀ꦧꦁꦏꦭꦶꦲꦤ꧀ꦧꦥ꧉ꦥꦿꦩꦶꦭꦏꦼꦢꦃꦠꦤ꧀ꦱꦃꦲꦺꦔꦼꦠ꧀ꦧꦶꦭꦶꦃꦢꦪꦤꦶꦁꦧꦪꦶ꧈ꦭꦁꦏꦸꦁꦭꦁꦏꦸꦁꦲꦶꦁꦏꦁꦧꦤ꧀ꦠꦼꦂꦏꦱꦩ꧀ꦥꦸꦂꦤꦤ꧀ꦤꦶꦥꦸꦤ꧀꧈ꦲꦶꦁꦒꦶꦃꦥꦸꦤꦶꦏꦱꦼꦤꦼꦁꦚꦛꦼꦠ꧀ꦱꦢꦪꦲꦶꦁꦏꦁꦏꦼꦥꦶꦉꦁꦭꦤ꧀ꦤꦶꦫꦺꦴꦏ꧀ꦏꦏꦼꦤ꧀ꦱꦩꦸꦏꦮꦶꦱ꧀ꦠꦶꦤ꧀ꦢꦏ꧀ꦲꦶꦁꦏꦁꦢꦶꦥꦸꦤ꧀ꦠꦶꦔꦭꦶ꧉ꦩꦶꦭꦤꦶꦥꦸꦤ꧀ꦱꦢꦪꦲꦶꦁꦏꦁꦠꦼꦠꦸꦁꦒꦶꦭ꧀ꦭꦤ꧀ꦏꦭꦶꦲꦤ꧀ꦭꦫꦺꦮꦲꦸꦏꦼꦢꦃꦔꦠꦺꦴꦱ꧀ꦲꦠꦺꦴꦱ꧀ꦩꦼꦁꦒꦃꦲꦶꦁꦠꦠꦥꦔꦸꦕꦥ꧀ꦥꦶꦥꦸꦤ꧀꧉ꦧꦥꦧꦶꦪꦸꦁ꧉ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦏꦸꦮꦗꦶꦧ꧀ꦧꦤ꧀ꦲꦁꦒꦸꦭꦮꦼꦤ꧀ꦛꦃꦲꦤꦏ꧀ꦱꦏꦶꦁꦮꦶꦮꦶꦠ꧀ꦠꦤ꧀꧉ꦃꦔ꧀ꦒꦸꦭꦮꦼꦤ꧀ꦛꦃꦲꦶꦁꦒꦶꦃꦥꦸꦤꦶꦏꦏꦒꦸꦤꦤ꧀ꦲꦶꦁꦏꦁꦏꦁꦒꦺꦲꦩ꧀ꦧꦔꦸꦤ꧀ꦭꦫꦺ꧈ꦱꦫꦤꦚꦩ꧀ꦥꦸꦂꦤꦏ꧀ꦏꦏꦼꦤ꧀ꦢꦪꦤꦶꦁꦭꦫꦺꦲꦶꦁꦏꦁꦱꦲꦺ꧈ꦲꦚꦶꦂꦤꦏ꧀ꦏꦏꦼꦤ꧀ꦠꦸꦩꦶꦪꦸꦔꦶꦁꦭꦫꦺꦝꦠꦼꦁꦥꦶꦲꦮꦺꦴꦤ꧀꧉ꦥꦸꦤꦥꦲꦶꦁꦒꦶꦃꦩꦏꦠꦼꦤ꧀꧉ꦧꦺꦴꦏ꧀ꦩꦤꦮꦶꦏꦺꦩꦮꦺꦴꦤ꧀ꦲꦶꦁꦱꦊꦧꦼꦠ꧀ꦠꦶꦁꦭꦫꦺꦠꦏ꧀ꦱꦶꦃꦊꦩ꧀ꦧꦠ꧀꧈ꦲꦶꦁꦏꦁꦏꦲꦸꦢꦶꦭꦁꦏꦸꦁꦥꦽꦭꦸꦧꦧ꧀ꦏꦱꦫꦱ꧀ꦱꦤꦶꦁꦧꦢꦤ꧀꧈ꦲꦩꦂꦒꦶꦮꦼꦝꦂꦫꦶꦁꦥꦏꦂꦪꦤꦶꦁꦱꦸꦏ꧀ꦩꦏꦢꦺꦴꦱ꧀ꦏꦢꦺꦴꦱ꧀ꦢꦺꦫꦺꦁꦏꦼꦠꦮꦶꦱ꧀꧉ꦲꦤꦔꦶꦁꦲꦸꦒꦶꦱꦩ꧀ꦥꦸꦤ꧀꧌ꦲꦸꦮꦶꦱ꧀꧍ꦕꦼꦕꦮꦶꦱ꧀ꦱꦲꦚꦶꦁꦏꦶꦂꦫꦏꦼꦤ꧀ꦥꦿꦏꦮꦶꦱ꧀ꦲꦶꦁꦏꦁꦱꦏꦶꦤ꧀ꦠꦼꦤ꧀ꦢꦢꦺꦴꦱ꧀ꦝꦝꦏꦤ꧀ꦤꦶꦁꦥꦶꦪꦮꦺꦴꦤ꧀꧉ꦭ꧀ꦲ꧈ꦥꦸꦤꦶꦏꦧꦶꦪꦸꦁꦲꦶꦁꦏꦁꦏꦼꦢꦃꦲꦔꦠꦺꦴꦱ꧀ꦲꦠꦺꦴꦱ꧀꧈ꦲꦮꦶꦠ꧀ꦏꦼꦩ꧀ꦥꦭ꧀ꦭꦶꦁꦭꦫꦺꦏꦭꦶꦲꦤ꧀ꦧꦶꦪꦸꦁꦥꦸꦤꦶꦏꦭꦁꦏꦸꦁꦏꦛꦃꦏꦠꦶꦩ꧀ꦧꦁꦏꦭꦶꦲꦤ꧀ꦧꦥ꧉ꦥꦿꦩꦶꦭꦏꦼꦢꦃꦠꦤ꧀ꦱꦃꦲꦺꦔꦼꦠ꧀ꦧꦶꦭꦶꦃꦢꦪꦤꦶꦁꦧꦪꦶ꧈ꦭꦁꦏꦸꦁꦭꦁꦏꦸꦁꦲꦶꦁꦏꦁꦧꦤ꧀ꦠꦼꦂꦏꦱꦩ꧀ꦥꦸꦂꦤꦤ꧀ꦤꦶꦥꦸꦤ꧀꧈ꦲꦶꦁꦒꦶꦃꦥꦸꦤꦶꦏꦱꦼꦤꦼꦁꦚꦛꦼꦠ꧀ꦱꦢꦪꦲꦶꦁꦏꦁꦏꦼꦥꦶꦉꦁꦭꦤ꧀ꦤꦶꦫꦺꦴꦏ꧀ꦏꦏꦼꦤ꧀ꦱꦩꦸꦏꦮꦶꦱ꧀ꦠꦶꦤ꧀ꦢꦏ꧀ꦲꦶꦁꦏꦁꦢꦶꦥꦸꦤ꧀ꦠꦶꦔꦭꦶ꧉ꦩꦶꦭꦤꦶꦥꦸꦤ꧀ꦱꦢꦪꦲꦶꦁꦏꦁꦠꦼꦠꦸꦁꦒꦶꦭ꧀ꦭꦤ꧀ꦏꦭꦶꦲꦤ꧀ꦭꦫꦺꦮꦲꦸꦏꦼꦢꦃꦔꦠꦺꦴꦱ꧀ꦲꦠꦺꦴꦱ꧀ꦩꦼꦁꦒꦃꦲꦶꦁꦠꦠꦥꦔꦸꦕꦥ꧀ꦥꦶꦥꦸꦤ꧀꧉

꧋ꦧꦥꦧꦶꦪꦸꦁꦮꦗꦶꦧ꧀ꦲꦔꦮꦶꦱ꧀ꦱꦶꦪꦺꦤ꧀ꦮꦺꦴꦤ꧀ꦠꦼꦤ꧀ꦭꦫꦺꦲꦸꦠꦮꦶꦠꦶꦪꦁꦲꦶꦁꦏꦁꦒꦼꦒꦶꦤꦼꦩ꧀ꦩꦤ꧀ꦲꦸꦠꦮꦶꦤꦶꦤ꧀ꦢꦏ꧀ꦏꦏꦼꦤ꧀ꦏꦶꦫꦁꦥꦤ꧀ꦠꦼꦱ꧀꧉ꦥꦩꦶꦭꦶꦃꦲꦶꦥꦸꦤ꧀ꦫꦺꦚ꧀ꦕꦁꦲꦶꦁꦏꦁꦏꦁꦒꦺꦲꦩꦺꦴꦩꦺꦴꦁꦏꦼꦢꦃꦲꦶꦁꦏꦁꦥꦿꦪꦶꦠ꧀ꦤ꧈ꦱꦸꦥꦢꦺꦴꦱ꧀ꦱꦒꦼꦢ꧀ꦠꦸꦩ꧀ꦧꦸꦏ꧀ꦏꦗꦼꦁꦔꦶꦁꦧꦥꦧꦶꦪꦸꦁꦲꦩ꧀ꦧꦔꦸꦤ꧀ꦮꦼꦮꦠꦼꦏ꧀ꦏꦤ꧀ꦭꦤ꧀ꦏꦱꦸꦱꦶꦭꦤꦶꦁꦭꦫꦺ꧉ꦲꦧ꧀ꦢꦶꦲꦶꦁꦏꦁꦲꦮꦺꦴꦤ꧀ꦒꦩ꧀ꦥꦶꦭ꧀ꦲꦁꦒꦺꦤ꧀ꦤꦶꦥꦸꦤ꧀ꦤꦸꦭꦂꦫꦏꦼꦤ꧀ꦠꦼꦠꦼꦩ꧀ꦧꦸꦁꦔꦤ꧀ꦲꦮꦺꦴꦤ꧀ꦭꦤ꧀ꦏꦼꦭꦏꦸꦮꦤ꧀ꦲꦸꦒꦶ꧉ꦭꦫꦺꦥꦸꦤꦶꦏꦩꦤꦮꦶꦮꦶꦮꦶꦠ꧀ꦠꦤ꧀ꦱꦩ꧀ꦥꦸꦤ꧀ꦲꦮꦺꦴꦤ꧀꧈ꦲꦢꦠ꧀ꦲꦔꦺꦭ꧀ꦲꦁꦒꦺꦤ꧀ꦤꦶꦥꦸꦤ꧀ꦲꦔꦺꦮꦃꦲꦶ꧈ꦏꦢꦺꦴꦱ꧀ꦲꦸꦥꦩꦶꦤꦶꦥꦸꦤ꧀ꦥꦱꦩ꧀ꦥꦸꦤ꧀ꦧꦺꦁꦏꦺꦴꦁ꧈ꦲꦔꦺꦭ꧀ꦲꦁꦒꦺꦤꦶꦥꦸꦤ꧀ꦲꦔ꧀ꦭꦼꦉꦱ꧀ꦱꦏꦼꦤ꧀꧉

꧋ꦩꦤꦮꦶꦭꦫꦺꦱꦩ꧀ꦥꦸꦤ꧀ꦏꦛꦃꦥꦔꦽꦠꦺꦴꦱ꧀ꦱꦤꦶꦥꦸꦤ꧀꧈ꦱꦩ꧀ꦥꦸꦤ꧀꧌ꦲꦗ꧍ꦏꦏꦸꦭꦶꦤꦏ꧀ꦏꦏꦼꦤ꧀ꦏꦭꦶꦲꦤ꧀ꦠꦼꦩ꧀ꦧꦸꦁꦥꦔꦊꦩ꧀꧉ꦠꦼꦠꦼꦩ꧀ꦧꦸꦁꦔꦤ꧀ꦥꦸꦤꦶꦏꦱꦒꦼꦢ꧀ꦲꦤꦸꦮꦸꦃꦲꦏꦼꦤ꧀ꦮꦠꦏ꧀ꦝꦶꦫꦶ꧈ꦭꦤ꧀ꦭꦗꦼꦁꦧꦺꦴꦠꦼꦤ꧀ꦥꦸꦫꦸꦤ꧀ꦲꦔꦏꦼꦤ꧀ꦤꦶꦭꦤ꧀ꦲꦚꦸꦩꦼꦉꦥ꧀ꦥꦶꦊꦥꦠ꧀ꦠꦶꦥꦸꦤ꧀ꦥꦶꦪꦩ꧀ꦧꦏ꧀꧉ꦠꦼꦩ꧀ꦧꦸꦁꦥꦔꦊꦩ꧀ꦕꦼꦏꦥ꧀ꦱꦥꦽꦭꦸꦤꦶꦥꦸꦤ꧀ [ 337 ]ꦭꦫꦺꦱꦩ꧀ꦥꦸꦤ꧀ꦏꦲꦶꦩꦶꦁꦲꦶꦩꦶꦔꦶꦧꦫꦁꦲꦶꦁꦏꦁꦲꦢꦶꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦲꦩꦂꦒꦶꦏꦱꦸꦥꦺꦤ꧀ꦲꦸꦠꦮꦶꦩꦶꦭꦤꦩꦸꦁꦏꦁꦒꦺꦔꦪꦼꦩ꧀ꦲꦪꦼꦩꦶꦭꦫꦺꦱꦮꦠꦮꦶꦱ꧀ꦮꦼꦏ꧀ꦢꦭ꧀꧈ꦧꦥꦧꦶꦪꦸꦁꦭꦗꦼꦁꦧꦺꦴꦠꦼꦤ꧀ꦲꦤꦸꦲꦺꦴꦤ꧀ꦤꦶ*ꦗꦔ꧈ꦭꦫꦺꦧꦺꦴꦠꦼꦤ꧀ꦠꦩ꧀ꦥꦶꦥꦸꦤꦥꦥꦸꦤꦥ꧈ꦥꦸꦤꦶꦏꦤꦸꦏꦸꦭ꧀ꦭꦏꦼꦤ꧀ꦏꦶꦫꦁꦏꦥꦶꦠꦢꦺꦴꦱ꧀ꦱꦤꦶꦁꦭꦫꦺꦝꦠꦼꦁꦠꦶꦪꦁꦱꦼꦥꦸꦃ꧉ꦩꦤꦮꦶꦏꦼꦭꦗꦼꦁꦭꦗꦼꦁ꧈ꦲꦒꦼꦁꦔꦶꦥꦸꦤ꧀ꦭꦫꦺꦭꦗꦼꦁꦲꦚꦼꦥꦺꦭꦺꦏ꧀ꦏꦏꦼꦤ꧀ꦝꦠꦼꦁꦠꦶꦪꦁꦱꦼꦥꦸꦃ꧈[꧇꧓꧇]ꦲꦩꦂꦒꦶꦢꦶꦥꦸꦤ꧀ꦢꦺꦴꦫꦤꦶ꧉ꦥꦿꦩꦶꦭꦢꦺꦴꦫꦏꦁꦒꦺꦭꦫꦺꦲꦭꦶꦠ꧀ꦥꦸꦤꦶꦏꦱꦔꦼꦠ꧀ꦲꦩꦸꦠꦮꦠꦺꦴꦱ꧀ꦱꦶ꧉

꧋ꦥꦿꦏꦮꦶꦱ꧀ꦒꦼꦩꦶꦭꦤ꧀ꦲꦚꦽꦁꦔꦼꦤꦶꦭꦫꦺꦏꦢꦺꦴꦱ꧀ꦱꦩ꧀ꦥꦸꦤ꧀ꦏꦱꦼꦧꦠ꧀ꦲꦶꦁꦏꦗꦮꦺꦤ꧀꧉ꦏꦥꦉꦁꦔꦲꦩꦼꦮꦃꦲꦶꦱꦏꦼꦝꦶꦏ꧀ꦲꦶꦁꦏꦁꦲꦱꦿꦶꦁꦏꦼꦥꦶꦉꦁꦭꦤ꧀ꦏꦸꦭꦱꦸꦩꦼꦉꦥ꧀ꦥꦶ꧇ꦱꦽꦔꦼꦤ꧀ꦱꦒꦼꦢ꧀ꦤꦸꦮꦸꦃꦲꦏꦼꦤ꧀ꦮꦠꦏ꧀ꦲꦁꦒꦿꦒꦥ꧀꧈ꦭꦫꦺꦢꦢꦺꦴꦱ꧀ꦧꦶꦔꦸꦔꦤ꧀꧈ꦲꦗꦿꦶꦃꦝꦠꦼꦁꦧꦥꦧꦶꦪꦸꦁ꧉ꦲꦶꦁꦩꦁꦏꦭꦫꦺꦧꦺꦴꦠꦼꦤ꧀ꦏꦼꦢꦃꦲꦗꦿꦶꦃꦝꦠꦼꦁꦠꦶꦪꦁꦱꦼꦥꦸꦃ꧈ꦤꦔꦶꦁꦏꦼꦢꦃꦲꦗꦿꦶꦃꦲꦱꦶꦃ꧉ꦭ꧀ꦭꦼꦥꦠ꧀ꦲꦁꦒꦺꦤ꧀ꦤꦶꦥꦸꦤ꧀ꦔꦼꦤꦼꦁꦲꦼꦤꦼꦔꦶꦧꦶꦪꦸꦁꦱꦫꦤꦠꦼꦩ꧀ꦧꦸꦁ꧇ꦩꦼꦤꦼꦁ꧈ꦧꦥꦏ꧀ꦩꦸꦠꦼꦏ꧉ꦲꦶꦁꦔꦿꦶꦏꦶꦧꦥꦭꦗꦼꦁꦏꦲꦸꦥꦩꦺꦏ꧀ꦏꦏꦼꦤ꧀ꦠꦶꦪꦁꦲꦶꦁꦏꦁꦲꦔꦗꦿꦶꦃꦲꦗꦿꦶꦲꦶ꧉

꧋ꦲꦶꦁꦔꦶꦁꦒꦶꦭ꧀ꦱꦩ꧀ꦥꦸꦤ꧀ꦏꦱꦼꦧꦠ꧀꧈ꦫꦺꦚ꧀ꦕꦁꦏꦼꦢꦃꦠꦸꦩ꧀ꦧꦸꦏ꧀ꦏꦭꦶꦲꦤ꧀ꦏꦗꦼꦔꦶꦁꦧꦥꦧꦶꦪꦸꦁꦲꦶꦁꦧꦧ꧀ꦲꦩ꧀ꦧꦔꦸꦤ꧀ꦮꦼꦮꦠꦼꦏ꧀ꦏꦤ꧀ꦭꦤ꧀ꦏꦱꦸꦱꦶꦭꦤꦶꦁꦭꦫꦺ꧉ꦲꦶꦧꦸꦭꦤ꧀ꦧꦥꦱꦼꦩꦤ꧀ꦠꦼꦤ꧀ꦲꦸꦒꦶ꧈ꦏꦼꦢꦃꦲꦤꦸꦁꦒꦶꦭ꧀ꦏꦗꦼꦁ꧉ꦏꦼꦉꦥ꧀ꦏꦭꦩ꧀ꦥꦃꦲꦤ꧀꧈ꦧꦥꦏꦼꦫꦱ꧀꧈ꦧꦶꦪꦸꦁꦮꦼꦭꦱ꧀꧉ꦭꦫꦺꦭꦗꦼꦁꦧꦶꦔꦸꦁ꧈ꦥꦸꦤ꧀ꦢꦶꦲꦶꦁꦏꦁꦢꦶꦥꦸꦤ꧀ꦠꦸꦫꦸꦠ꧀ꦩꦸꦫꦶꦃꦱꦲꦺꦤꦶꦁꦭꦩ꧀ꦥꦃ꧈ꦧꦥꦭꦤ꧀ꦧꦶꦪꦸꦁꦏꦼꦢꦃꦲꦱꦿꦶꦁꦉꦩ꧀ꦧꦒꦤ꧀ꦧꦧ꧀ꦥꦸꦤꦶꦏ꧈ꦏꦢꦺꦴꦱ꧀ꦢꦺꦤꦺꦲꦔꦽꦩ꧀ꦧꦒ꧀ꦠꦚ꧀ꦗꦤꦶꦁꦲꦂꦠꦏꦁꦒꦺꦏꦧꦼꦠꦲꦤ꧀ꦤꦶꦁꦒꦿꦶꦪ꧉

Mevr. ꦕꦏꦿꦮꦂꦢꦪ

(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)

Jagading Wanita

Kagaliha kalihan tindak.

Mèh sabên panggenan wontên tiyangipun ingkang botên gadhah anak. Saking kumêdah-kêdahipun badhe amomong lare, tarkadhang rintên dalu ngantos dipun rencangi anyênyuwun, ngêngirangi, mrika-mriki amêrdhukun, lan sanès-sanèsipun. Sintên ingkang botên wêlas, manawi sumêrêp tiyang kados makatên. Langkung-langkung manawi mirêng sambatipun: besuk yèn mati sapa sing ngopèni. Samantên apêsipun tiyang botên gadhah anak. Dados kosok wangsulipun: agêng sangêt kabêgjanipun tiyang pinaringan momongan. Sarèhne bêgja wau anglangkungi, pramila kêdah kajagi supados kabêgjan sagêda tulus, sampun ngantos sirna. Ing ngriki ingkang kêdah dipun manah, lajêng panyêpênging lare. Punika botên gampil, mlèsèd sakêdhik asring anuwuhakên kacilakan agêng.

Sintên ingkang dipun pasrahi prakawis punika?

1. Manawi lare taksih alit, bapa biyung.

2. Manawi lare sampun sinau, guru.

Bageyan nomêr 1 bapa biyung. Inggih punika ingkang kuwajiban anggulawênthah anak saking wiwitan. Anggulawênthah inggih punika kagunan ingkang kangge ambangun lare, sarana nyampurnakakên dayaning lare ingkang sae, anyirnakakên tumiyunging lare dhatêng piawon. Punapa inggih makatên. Bokmanawi kemawon ing salêbêting lare taksih lêmbat, ingkang kaudi langkung prêlu bab kasarasaning badan, amargi wêdharing pakaryaning sukma kados-kados dèrèng kêtawis. Ananging ugi sampun (uwis) cêcawis saha nyingkirakên prakawis ingkang sakintên dados dhadhakaning piawon. Lha, punika biyung ingkang kêdah angatos-atos, awit kêmpaling lare kalihan biyung punika langkung kathah katimbang kalihan bapa. Pramila kêdah tansah èngêt bilih dayaning bayi, langkung-langkung ingkang bantêr kasampurnanipun, inggih punika sênêng nyathêt sadaya ingkang kêpirêng lan nirokakên samukawis tindak ingkang dipun tingali. Milanipun sadaya ingkang têtunggilan kalihan lare wau kêdah ngatos-atos mênggahing tata pangucapipun.

Bapa biyung wajib angawisi yèn wontên lare utawi tiyang ingkang gêginêman utawi nindakakên kirang pantês. Pamilihipun rencang ingkang kangge amomong kêdah ingkang prayitna, supados sagêd tumbuk kajênging bapa biyung ambangun wêwatêkan lan kasusilaning lare. Abdi ingkang awon gampil anggènipun nularakên têtêmbungan awon lan kêlakuwan ugi. Lare punika manawi wiwitan sampun awon, adat angèl anggènipun angewahi, kados upaminipun pa sampun bengkong, angèl anggènipun anglêrêsakên.

Manawi lare sampun kathah pangrêtosanipun, sampun (aja) kakulinakakên kalihan têmbung pangalêm. Têtêmbungan punika sagêd anuwuhakên watak dhiri, lan lajêng botên purun angakêni lan anyumêrêpi lêpatipun piyambak. Têmbung pangalêm cêkap saprêlunipun kemawon.

Lare sampun kaiming-imingi barang ingkang adi lan sanès-sanèsipun. Amargi kasupèn utawi mila namung kangge ngayêm-ayêmi lare sawatawis wêkdal, bapa biyung lajêng botên anuhoni jangji, lare botên tampi punapa-punapa, punika nukulakên kirang kapitadosaning lare dhatêng tiyang sêpuh. Manawi kêlajêng-lajêng, agêngipun lare lajêng anyêpèlèkakên dhatêng tiyang sêpu,[3] amargi dipun dorani. Pramila dora kangge lare alit punika sangêt amutawatosi.

Prakawis gêmi lan anyrêngêni lare kados sampun kasêbat ing Kajawèn. Kaparênga amêwahi sakêdhik ingkang asring kêpirêng lan kula sumêrêpi: srêngên sagêd nuwuhakên watak anggragap, lare dados bingungan, ajrih dhatêng bapa biyung. Ing măngka lare botên kêdah ajrih dhatêng tiyang sêpuh, nanging kêdah ajrih asih. Lêpat anggènipun ngênêng-ênêngi biyung sarana têmbung: mênêng, bapakmu têka. Ing ngriki bapa lajêng kaupamèkakên tiyang ingkang angajrih-ajrihi.

Ing nginggil sampun kasêbat, rencang kêdah tumbuk kalihan kajênging bapa biyung ing bab ambangun wêwatêkan lan kasusilaning lare. Ibu lan bapa sêmantên ugi, kêdah anunggil kajêng. Kêrêp kalampahan, bapa kêras, biyung wêlas. Lare lajêng bingung, pundi ingkang dipun turut murih saening lampah, bapa lan biyung kêdah asring rêmbagan bab punika, kadosdene angrêmbag tanjaning arta kangge kabêtahaning griya.

Mevr. Cakrawardaya.

(Badhe Kasambêtan)

[Grafik]

Dèrèng dangu punika wontên pawartos, bilih ing griya Pajagalan enggal ing Pagirikan (Surabaya) lêmbu-lêmbu ingkang sami kapragat ing ngriku botên kapragat miturut pranatan Islam. Ing nginggil punika minăngka katrangan, manawi kabar ingkang makatên wau botên lêrês.

[ 338 ]

Kala tanggal 14 Mèi ingkang kapêngkêr punika, ing Batawi dipun wontênakên tandhingan bal-balan, inggih punika pakêmpalan Oliveo (Batawi) kamêngsahakên kalihan pakêmpalan main bal saking Manilah, pungkasanipun Batawi ingkang jaya 4-2. Nginggil punika gambaripun main tandhingan wau. Ingkang rasukan pêthak, clana cêmêng Oliveo, dene ingkang rasukan cêmêng clana pêthak: Manilah.

[ 339 ]---=== KRONIEK ===---

꧋ꦏꦧꦂꦮꦂꦤꦶꦮꦂꦤꦶ꧉

꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧉

꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦸꦥ꧀ꦧꦼꦱ꧀ꦠꦶꦂꦩꦸꦲꦩꦢꦶꦪꦃꦲꦶꦁꦔꦪꦺꦴꦒꦾꦏꦂꦠ꧈ꦱꦩ꧀ꦥꦸꦤ꧀ꦠꦸꦩ꧀ꦧꦱ꧀ꦱꦶꦠꦶꦲꦶꦁꦏꦼꦠꦁꦒꦸꦔꦤ꧀꧉ꦱꦲꦭꦗꦼꦁꦢꦶꦥꦸꦤ꧀ꦲꦼꦢꦼꦒꦶꦒꦿꦶꦪꦥꦩꦸꦭꦁꦔꦤ꧀ H.I.S. ꦥꦩꦸꦭꦁꦔꦤ꧀ꦱꦩ꧀ꦧꦼꦠ꧀ꦠꦤ꧀ (Schakelschool)ꦭꦤ꧀ꦥꦩꦸꦭꦁꦔꦤ꧀ꦕꦭꦺꦴꦤ꧀ꦒꦸꦫꦸ(Kweekschool)꧉ ꦲꦶꦁꦥꦩꦸꦭꦁꦔꦤ꧀ꦠꦶꦒꦠꦶꦒꦤꦶꦥꦸꦤ꧀ꦮꦲꦸꦩꦮꦶꦮꦸꦭꦔꦤ꧀ꦲꦒꦩꦶ꧉

꧋ꦏꦧꦂꦫꦶꦥꦸꦤ꧀꧈ꦲꦸꦥ꧀ꦧꦼꦱ꧀ꦠꦶꦂꦫꦶꦁꦥꦏꦼꦩ꧀ꦥꦭ꧀ꦭꦤ꧀ꦩꦸꦲꦩꦢꦶꦪꦃꦲꦶꦁꦔꦪꦺꦴꦒꦾꦱꦩꦁꦏꦺꦱꦩ꧀ꦥꦸꦤ꧀ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦱꦠꦸꦁꦒꦶꦭꦶꦁꦫꦢ꧀ꦲꦶꦁꦏꦁꦏꦤꦩꦏ꧀ꦏꦏꦼꦤ꧀꧇ꦫꦢ꧀ꦠꦿꦗꦺꦃ꧉ꦩꦼꦁꦒꦃꦱꦼꦢꦾꦤꦶꦥꦸꦤ꧀ꦫꦢ꧀ꦮꦲꦸ꧈ꦤꦶꦠꦶꦥꦿꦶꦏ꧀ꦱꦱꦲꦩꦸꦠꦸꦱ꧀ꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦒꦼꦒꦪꦸꦠ꧀ꦠꦤ꧀ꦏꦭꦶꦲꦤ꧀ꦥꦿꦏꦮꦶꦱ꧀ꦲꦒꦩꦶ꧉ꦲꦶꦁꦒꦶꦃꦥꦸꦤꦶꦏꦩꦤꦮꦶꦏꦊꦉꦱ꧀ꦮꦺꦴꦤ꧀ꦠꦼꦤ꧀ꦒꦺꦱꦺꦃꦲꦶꦁꦥꦩꦁꦒꦶꦃꦲꦶꦔꦠꦱ꧀ꦱꦶꦥꦸꦤ꧀ꦧꦧ꧀ꦮꦲꦸ꧉ꦢꦺꦤꦺꦲꦶꦁꦏꦁꦏꦥꦶꦭꦶꦃꦢꦢꦺꦴꦱ꧀ꦮꦂꦒꦤꦶꦁꦫꦢ꧀ꦠꦿꦗꦺꦃ꧇ 1 ꦠꦸꦮꦤ꧀ꦲꦗꦶꦩꦤ꧀ꦱꦸꦂ(ꦱꦸꦫꦧꦪ)꧈ 2 ꦠꦸꦮꦤ꧀ꦲꦗꦶꦩꦸꦏ꧀ꦠꦶ (ꦏꦸꦢꦸꦱ꧀)꧈ 3 ꦠꦸꦮꦤ꧀ꦱꦸꦠꦤ꧀ꦩꦤ꧀ꦱꦸꦂ (ꦠꦥꦤꦸꦭꦶ)꧈ 4 ꦠꦸꦮꦤ꧀ꦏꦂꦠꦱꦸꦢꦂꦩ (ꦧꦠꦮꦶ)꧈ 5 ꦭꦤ꧀ 6 ꦠꦸꦮꦤ꧀ꦠꦸꦮꦤ꧀ꦲꦗꦶꦩꦸꦃꦠꦂ꧈ꦭꦤ꧀ꦄꦤꦶꦱ꧀ (ꦔꦪꦺꦴꦒꦾꦏꦂꦠ)꧉

꧋ꦏꦧꦂꦫꦶꦥꦸꦤ꧀ꦲꦶꦁꦠꦲꦸꦤ꧀ 1928 ꦥꦸꦤꦶꦏ꧈ꦤꦒꦫꦶꦏꦒꦸꦔꦤ꧀ꦏꦂꦱꦧꦝꦺꦪꦱꦒꦼꦝꦺꦴꦁ A.M.S. ꦥꦶꦪꦩ꧀ꦧꦏ꧀ꦲꦶꦁꦱꦸꦫꦏꦂꦠ꧉ꦲꦶꦁꦱꦩꦁꦏꦺꦥꦩꦸꦭꦁꦔꦤ꧀ A.M.S ꦥꦸꦤꦶꦏꦩꦁꦒꦺꦤ꧀ꦲꦶꦁꦒꦿꦶꦪꦱꦺꦮꦤ꧀ꦏꦺꦩꦮꦺꦴꦤ꧀꧉

꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦠꦸꦮꦤ꧀ Dr. ꦯꦂꦢꦤ꧈ꦲꦶꦁꦏꦁꦲꦔ꧀ꦭꦗꦼꦁꦔꦏꦼꦤ꧀ꦥꦱꦶꦤꦲꦺꦴꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦮꦭꦤ꧀ꦢꦶ꧈ꦠꦶꦭꦂꦢꦺꦴꦚꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏ꧉ꦲꦤꦶꦭꦂꦒꦂꦮꦭꦤ꧀ꦥꦸꦠꦿꦱꦠꦸꦁꦒꦭ꧀ꦲꦶꦁꦏꦁꦱꦮꦼꦒ꧀ꦈꦩꦸꦂꦱꦠꦲꦸꦤ꧀꧉

꧋ ꦱꦏꦶꦁꦯꦺꦫꦁꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦶꦪꦁꦕꦕꦃꦲꦶꦥꦸꦤ꧀ 300 ꦲꦶꦁꦏꦁꦏꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦸꦚ꧀ꦗꦫꦲꦩꦂꦒꦶꦏꦢꦏ꧀ꦮꦒꦼꦒꦪꦸꦠ꧀ꦠꦤ꧀ꦏꦭꦶꦲꦤ꧀ꦒꦺꦒꦺꦂꦫꦤ꧀ꦏꦺꦴꦩꦸꦤꦶꦱ꧀꧈ꦱꦩꦁꦏꦺꦱꦩꦶꦏꦮꦼꦢꦭ꧀ꦭꦏꦼꦤ꧀ꦱꦏꦶꦁꦠꦲꦤ꧀ꦤꦤ꧀꧈ꦲꦩꦂꦒꦶꦏꦶꦫꦁꦠꦼꦫꦁꦏꦊꦥꦠ꧀ꦠꦤ꧀ꦤꦶꦥꦸꦤ꧀꧉

꧋ꦠꦸꦩꦿꦥ꧀ꦲꦩꦶꦠꦸꦭꦸꦁꦔꦶꦠꦼꦠꦶꦪꦁꦲꦶꦁꦏꦁꦏꦺꦔꦶꦁꦧꦼꦧꦪꦭꦶꦤ꧀ꦝꦸꦲꦶꦁꦯꦸꦩꦠꦿꦃꦱꦶꦱꦶꦃꦏꦶꦭꦺꦤ꧀꧈ꦢꦸꦩꦸꦒꦶꦱꦩꦁꦏꦺ꧈ꦱꦼꦩꦺꦫꦸꦥꦺꦴꦤ꧀ꦱꦩ꧀ꦥꦸꦤ꧀ꦱꦒꦼꦢ꧀ꦲꦔꦼꦩ꧀ꦥꦭ꧀ꦭꦏꦼꦤ꧀ꦲꦂꦠꦒꦸꦁꦒꦸꦁ f 581021,81 ꦢꦺꦤꦺꦏꦺꦴꦩꦶꦠꦺꦲꦶꦁꦦꦝꦁꦱꦩ꧀ꦥꦸꦤ꧀ꦱꦒꦼꦢ꧀ꦲꦔꦼꦩ꧀ꦥꦭ꧀ꦭꦏꦼꦤ꧀ f 222739,17 ꦢꦢꦺꦴꦱ꧀ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦱꦼꦩꦺꦫꦸꦥꦺꦴꦤ꧀꧈ꦒꦸꦁꦒꦸꦁꦮꦺꦴꦤ꧀ꦠꦼꦤ꧀ f 803.760,98꧈ꦲꦂꦠꦱꦩꦤ꧀ꦠꦼꦤ꧀ꦮꦲꦸꦲꦶꦁꦏꦁ f 25000,- ꦱꦏꦶꦁ Oranje Kruis ꦲꦶꦁꦄꦩ꧀ꦱꦼꦠꦼꦂꦝꦩ꧀ (ꦤꦒꦫꦶꦮꦭꦤ꧀ꦢꦶ)꧉ ꦢꦺꦤꦺꦲꦶꦁꦏꦁꦱꦩ꧀ꦥꦸꦤ꧀ꦏꦢꦂꦩꦏ꧀ꦏꦏꦼꦤ꧀ꦝꦠꦼꦁꦠꦼꦠꦶꦪꦁꦲꦶꦁꦏꦁꦱꦩꦶꦏꦺꦔꦶꦁꦲꦶꦁꦧꦼꦧꦪꦮꦲꦸ f 230880,50꧈ ꦲꦶꦁꦏꦁꦱꦩ꧀ꦥꦸꦤ꧀ꦏꦠꦩ꧀ꦠꦺꦴꦏ꧀ꦏꦏꦼꦤ꧀ꦧꦝꦺꦏꦢꦂꦩꦏ꧀ꦏꦏꦼꦤ꧀ꦩꦭꦶꦃ f 443.077.75꧈ ꦢꦢꦺꦴꦱ꧀ꦒꦸꦁꦒꦸꦁꦔꦶꦁꦲꦂꦠꦲꦶꦁꦏꦁꦧꦝꦺꦏꦢꦂꦩꦏ꧀ꦏꦏꦼꦤ꧀ f 673.958,25꧉ ꦏꦗꦮꦶꦥꦸꦤꦶꦏꦮꦺꦴꦤ꧀ꦠꦼꦤ꧀ꦠꦶꦪꦁꦕꦕꦃꦲꦶꦥꦸꦤ꧀ 7163 ꦲꦶꦁꦏꦁꦧꦝꦺꦏꦢꦂꦩꦤ꧀ꦲꦂꦠ f 94 ꦱꦧꦼꦤ꧀ꦠꦶꦪꦁꦱꦠꦸꦁꦒꦭ꧀꧉

꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦠꦸꦮꦤ꧀ Ir. ꦯꦸꦫꦃꦩꦤ꧀꧈ ꦧꦺꦴꦠꦼꦤ꧀ꦢꦔꦸꦩꦭꦶꦃꦧꦝꦺꦝꦠꦼꦁꦱꦸꦫꦏꦂꦠꦥꦽꦭꦸꦲꦤꦭꦶꦠꦶꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦥꦁꦒꦲꦺꦴꦠ꧀ꦠꦤ꧀ꦧꦛꦶꦏ꧀ꦲꦶꦁꦔꦿꦶꦏꦸ꧉

꧋ꦧꦺꦚ꧀ꦗꦶꦁꦠꦁꦒꦭ꧀ 5 ꦗꦸꦤꦶꦔꦗꦼꦁꦥꦸꦤꦶꦏ꧈ꦥꦏꦼꦩ꧀ꦥꦭ꧀ꦭꦤ꧀ꦩꦸꦲꦩꦢꦶꦪꦃꦲꦥ꧀ꦝꦺꦭꦶꦁ ꦯꦸꦫꦏꦂꦠ꧈ꦧꦝꦺꦲꦢꦩꦼꦭ꧀ꦥꦶꦱ꧀ꦠꦠꦼꦠꦏ꧀ꦏꦤ꧀ꦠꦸꦩꦿꦥ꧀ꦭꦫꦺꦭꦫꦺꦪꦠꦶꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦩꦂꦧꦺꦴꦭꦃꦩꦶꦭꦶꦠꦺꦂꦩꦁꦏꦸꦤꦒꦫꦤ꧀꧉ꦩꦼꦁꦒꦃꦕꦕꦃꦲꦶꦁꦭꦫꦺꦲꦶꦁꦏꦁꦧꦝꦺꦢꦶꦥꦸꦤ꧀ꦠꦼꦠꦏ꧀ꦏꦶꦥꦸꦤꦶꦏꦱꦢꦪꦮꦺꦴꦤ꧀ꦠꦼꦤ꧀ 100 ꦥꦏꦼꦩ꧀ꦥꦭ꧀ꦭꦤ꧀ꦱꦩꦁꦏꦺꦱꦩ꧀ꦥꦸꦤ꧀ꦔꦠꦸꦂꦫꦏꦼꦤ꧀ꦱꦼꦫꦠ꧀ꦥꦤꦸꦮꦸꦤ꧀ꦤꦤ꧀ꦝꦠꦼꦁꦤꦒꦫꦶ꧈ꦩꦸꦫꦶꦃꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦤꦥꦫꦧꦺꦴꦁꦲꦸꦠꦮꦶꦝꦺꦴꦏ꧀ꦠꦼꦂ꧈ꦲꦶꦁꦏꦁꦏꦗꦶꦧꦃꦤꦼꦠꦏ꧀ꦏꦶꦲꦸꦠꦮꦶꦲꦚ꧀ꦗꦩ꧀ꦥꦺꦤ꧀ꦤꦶꦭꦫꦺꦭꦫꦺꦪꦠꦶꦩ꧀ꦮꦲꦸ꧉

꧋ꦧꦺꦚ꧀ꦗꦶꦁꦮꦸꦭꦤ꧀ꦙꦸꦭꦶꦲꦶꦁꦔꦗꦼꦁꦥꦸꦤꦶꦏ꧈ꦱꦏꦶꦁꦝꦮꦸꦃꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦯꦸꦫꦏꦂꦠ꧈ꦲꦶꦁꦔꦿꦶꦏꦧꦝꦺꦲꦩ꧀ꦧꦶꦏꦏ꧀ꦥꦩꦸꦭꦁꦔꦤ꧀ H.I.S. ꦠꦸꦩꦿꦥ꧀ꦥꦫꦮꦤꦶꦠ꧈ꦢꦺꦤꦺꦲꦶꦁꦏꦁꦢꦶꦥꦸꦤ꧀ꦠꦩ꧀ꦥꦶꦲꦶꦁꦥꦩꦸꦭꦁꦔꦤ꧀ꦏꦱ꧀ꦧꦸꦠ꧀ꦔꦼꦩꦸꦔꦏ꧀ꦏꦼꦤ꧀ꦥꦫꦥꦸꦠꦿꦶꦱꦤ꧀ꦠꦤꦢꦊꦩ꧀ꦏꦺꦩꦮꦺꦴꦤ꧀ꦔꦤ꧀ꦠꦺꦴꦱ꧀ꦒꦿꦢ꧀ 4꧉ꦥꦩꦸꦭꦁꦔꦤ꧀ H.I.S. ꦲꦺꦁꦒꦭ꧀ꦥꦸꦤꦶꦏ꧈ꦧꦝꦺꦤꦶꦥꦸꦤ꧀ꦢꦢꦺꦴꦱ꧀ꦱꦼꦱꦩ꧀ꦧꦼꦠ꧀ꦠꦤ꧀ꦤꦶꦥꦸꦤ꧀ꦥꦩꦸꦭꦁꦔꦤ꧀ꦥꦿꦺꦴꦧꦼꦭ꧀ꦏꦿꦠꦺꦴꦤ꧀ꦲꦶꦁꦏꦁꦱꦩꦁꦏꦺꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦏꦮꦱ꧀ꦠꦤ꧀ꦤꦤ꧀꧇ꦥꦩꦂꦢꦶꦥꦸꦠꦿꦶ꧉

꧋ꦏꦭꦢꦶꦤ꧀ꦠꦼꦤ꧀ꦱ꧀ꦭꦱꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦥꦏꦼꦩ꧀ꦥꦭ꧀ꦭꦤ꧀ꦩꦸꦃꦲꦩꦢ꧀ꦢꦶꦪꦃꦄꦥ꧀ꦝꦺꦭ꧀ꦭꦶꦁꦯꦸꦫꦏꦂꦠ꧈ ꦱꦩ꧀ꦥꦸꦤ꧀ꦊꦱ꧀ꦠꦤ꧀ꦠꦸꦤ꧀ꦲꦩ꧀ꦧꦶꦏꦏ꧀ꦒꦿꦶꦪꦱꦏꦶꦠ꧀ꦒꦝꦃꦲꦤ꧀ꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦏꦱ꧀ꦧꦸꦠ꧀꧉ꦑꦭꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦮꦲꦸꦏꦛꦃꦲꦶꦁꦏꦁꦱꦩꦶꦲꦚ꧀ꦗꦼꦤꦼꦁꦔꦶ꧈ꦏꦢꦺꦴꦱ꧀ꦠ꧇ꦠꦸꦮꦤ꧀ꦠꦸꦮꦤ꧀ꦏꦥ꧀ꦠꦺꦤ꧀ꦡꦶꦪꦺꦴꦤ꧀ꦒ꧀ꦃꦮ꧀꧈ꦏꦥ꧀ꦠꦺꦤ꧀ꦄꦫꦧ꧀꧈ꦭꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦥꦫꦄꦩ꧀ꦠꦼꦤꦂꦥꦿꦶꦧꦸꦩꦶ꧉ꦑꦭꦥꦸꦤꦶꦏꦩꦸꦝꦥꦔꦂꦱꦤ꧀ꦤꦶꦁꦥꦏꦺꦩ꧀ꦥꦭ꧀ꦭꦤ꧀ꦏꦱ꧀ꦧꦸꦠ꧀꧈ꦩꦱ꧀ꦔꦧꦺꦲꦶꦩꦂꦠꦱꦸꦮꦶꦒ꧀ꦚꦲꦢꦩꦼꦭ꧀ꦱꦼꦱꦺꦴꦫꦃ꧈ꦲꦤꦼꦫꦁꦔꦏꦼꦤ꧀꧈ꦧꦶꦭꦶꦃꦒꦿꦶꦪꦱꦏꦶꦠ꧀ꦮꦲꦸꦏꦱꦝꦶꦪꦏ꧀ꦏꦏꦼꦤ꧀ꦠꦸꦩꦿꦥ꧀ꦏꦥꦼꦂꦭꦸꦮꦤ꧀ꦤꦶꦥꦸꦤ꧀ꦱꦢꦪꦧꦁꦱ꧈ꦧꦺꦴꦠꦼꦤ꧀ꦥꦶꦱꦤ꧀ꦥꦶꦱꦤ꧀ꦲꦔꦺꦔꦼꦠ꧀ꦠꦶꦝꦠꦼꦁꦲꦒꦩꦶꦤꦶꦥꦸꦤ꧀ꦱꦠꦸꦁꦒꦭ꧀ꦭꦤ꧀ꦱꦠꦸꦁꦒꦭ꧀ꦭꦶꦥꦸꦤ꧀ꦠꦶꦪꦁꦲꦶꦁꦏꦁꦧꦝꦺꦗꦼꦗꦩ꧀ꦥꦶ꧉ꦑꦗꦮꦶꦥꦸꦤꦶꦏꦗꦸꦫꦸꦱꦧ꧀ꦢꦲꦔ꧀ꦭꦲꦶꦂꦫꦏꦼꦤ꧀ꦒꦼꦁꦔꦶꦁꦥꦤꦸꦮꦸꦤ꧀ꦤꦶꦥꦸꦤ꧀ꦝꦠꦼꦁꦡꦸꦮꦤ꧀ Dr. ꦯꦸꦫꦠ꧀ꦩꦤ꧀꧈ꦢꦺꦤꦺꦥꦚ꧀ꦗꦼꦤꦼꦔꦤ꧀ꦤꦶꦥꦸꦤ꧀ꦮꦲꦸꦱꦩ꧀ꦥꦸꦤ꧀ꦱꦒꦃꦱꦸꦩꦼꦢꦾꦥꦫꦶꦁꦥꦶꦠꦸꦭꦸꦁꦔꦤ꧀ꦏꦤ꧀ꦛꦶꦊꦭꦲꦤ꧀ꦤꦤ꧀ꦏꦺꦩꦮꦺꦴꦤ꧀꧉

KRONIEK

Kabar warni-warni

Pêthikan saking sêrat-sêrat kabar sanès.

Wontên pawartos, bilih up bêstir Muhamadiyah ing Ngayogyakarta, sampun tumbas siti ing Kêtanggungan. Saha lajêng dipun êdêgi griya pamulangan H.I.S. pamulangan sambêtan (Schakelschool) lan pamulangan calon guru (Kweekschool). Ing pamulangan tiga-tiganipun wau mawi wulangan agami.

Kabaripun, up bêstiring pakêmpalan Muhamadiyah ing Ngayogya samangke sampun ngawontênakên satunggiling rad ingkang kanamakakên: Rad Trajèh. Mênggah sêdyanipun rad wau, nitipriksa saha mutus prakawis-prakawis ingkang gêgayutan kalihan prakawis agami. Inggih punika manawi kalêrês wontên gèsèhing pamanggih ingatasipun bab wau. Dene ingkang kapilih dados warganing Rad Trajèh: 1 Tuwan Haji Mansur (Surabaya), 2 Tuwan Haji Mukti (Kudus), 3 Tuwan Sutan Mansur (Tapanuli), 4 Tuwan Karta Sudarma (Batawi), 5 lan 6 Tuwan-tuwan Haji Muhtar, lan Anis (Ngayogyakarta).

Kabaripun ing taun 1928 punika, nagari kagungan karsa badhe yasa gêdhong A.M.S. piyambak ing Surakarta. Ing samangke pamulangan A.M.S. punika manggèn ing griya sewan kemawon.

Wontên pawartos, bilih Tuwan Dr. Sardana, ingkang anglajêngakên pasinaonipun wontên ing nagari Walandi, tilar donya wontên ing ngrika. Anilar garwa lan putra satunggal ingkang sawêg umur sataun.

Saking Serang kawartosakên, bilih tiyang cacahipun 300 ingkang katahan wontên ing kunjara amargi kadakwa gêgayutan kalihan gegeran komunis, samangke sami kawêdalakên saking tahanan, amargi kirang têrang kalêpatanipun.

Tumrap amitulungi têtiyang ingkang kenging bêbaya lindhu ing Sumatrah sisih kilèn, dumugi samangke, Sêmèru pon sampun sagêd angêmpalakên arta gunggung f 581021,81 dene komite ing Padhang sampun sagêd angêmpalakên f 222739,17 dados angsal-angsalanipun Sêmèru pon, gunggung wontên f 803.760,98, arta samantên wau ingkang f 25000.- saking Oranje Kruis ing Amsêtêrdham (nagari Walandi). Dene ingkang sampun kadarmakakên dhatêng têtiyang ingkang sami kenging ing bêbaya wau f 230880,50, ingkang sampun katamtokakên badhe kadarmakakên malih f 443.077.75, dados gunggunging arta ingkang badhe kadarmakakên f 673.958,25. Kajawi punika wontên tiyang cacahipun 7163 ingkang badhe kadarman arta f 94- sabên tiyang satunggal.

Wontên pawartos, bilih Tuwan Ir. Surahman, botên dangu malih badhe dhatêng Surakarta prêlu analiti bab kawontênanipun panggaotan bathik ing ngriku.

Benjing tanggal 5 Juni ngajêng punika, pakêmpalan Muhamadiyah apdhèling Surakarta, badhe adamêl pista têtakan tumrap lare-lare yatim wontên ing kamar bolah militèr Mangkunagaran. Mênggah cacahing lare ingkang badhe dipun têtaki punika sadaya wontên 100, pakêmpalan samangke sampun ngaturakên sêrat panuwunan dhatêng nagari, murih dipun wontênana para bong utawi dhoktêr, ingkang kajibah nêtaki utawi anjampèni lare-lare yatim wau.

Benjing wulan Juli ing ngajêng punika, saking dhawuh dalêm ingkang Sinuhun ing Surakarta, ing ngrika badhe ambikak pamulangan H.I.S. tumrap para wanita, dene ingkang dipun tampi ing pamulangan kasbut ngêmungakên para putri santana dalêm kemawon ngantos grad 4. Pamulangan H.I.S. enggal punika, badhenipun dados sêsambêtanipun pamulangan probêl kraton ingkang samangke sampun wontên, inggih punika ingkang kawastanan: Pamardi Putri.

Kala dintên Slasa ingkang kapêngkêr punika, pakêmpalan Muhamadiyah apdhèling Surakarta, sampun lêstantun ambikak griya sakit gadhahanipun pakêmpalan kasbut. Kala pambikakipun wau kathah ingkang sami anjênêngi, kados ta: tuwan-tuwan kaptèn Tiyonghwa, kaptèn Arab, lan pintên-pintên para amtênar pribumi. Kala punika mudha pangarsaning pakêmpalan kasbut, Mas Ngabèi Martasuwignya adamêl sêsorah, anêrangakên, bilih griya sakit wau kasadhiyakakên tumrap kapêrluwanipun sadaya băngsa, botên pisan-pisan angèngêti dhatêng agaminipun satunggal lan satunggalipun tiyang ingkang badhe jêjampi. Kajawi punika juru sabda anglairakên gênging panuwunipun dhatêng Tuwan Dr. Suratman, dene panjênênganipun wau sampun sagah sumêdya paring pitulungan kanthi lêlahanan kemawon.

[ 340 ]---=== Feuilleton ===---

꧋ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde ꧋꧇꧒꧇ ꧋ꦦꦿꦧꦸ Tristan ꦏꦭꦠꦏ꧀ꦱꦶꦃꦠꦶꦩꦸꦂ꧉

꧋ꦮ꧀ꦢ꧈ꦠꦸꦮꦤ꧀꧈ꦧꦥꦏꦸꦭꦱꦸꦢꦒꦂ꧈ꦱꦤꦺꦱ꧀ꦧꦫꦺꦴꦤ꧀꧈ꦏꦺꦱꦃꦏꦸꦭꦱꦏꦶꦁꦲꦶꦁꦒꦿꦶꦪ꧈ꦏꦸꦭꦧꦺꦴꦠꦼꦤ꧀ꦕꦫꦶꦪꦺꦴꦱ꧀ꦝꦠꦼꦁꦱꦶꦤ꧀ꦠꦼꦤ꧀ꦱꦶꦤ꧀ꦠꦼꦤ꧀꧈ꦝꦠꦼꦁꦥꦸꦤ꧀ꦧꦥꦲꦶꦁꦒꦶꦃꦧꦺꦴꦠꦼꦤ꧀꧈ꦏꦺꦱꦃꦏꦸꦭꦤꦸꦩ꧀ꦥꦏ꧀ꦧꦲꦶꦠ꧈ꦲꦮꦶꦠ꧀ꦏꦸꦭꦏꦼꦥꦺꦁꦔꦶꦤ꧀ꦱꦸꦩꦼꦉꦥ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦱꦂꦠꦠꦠꦕꦫꦤꦶꦥꦸꦤ꧀ꦠꦼꦠꦶꦪꦁꦲꦶꦁꦤꦒꦫꦶꦱꦤꦺꦱ꧀꧈ꦩꦤꦮꦶꦱꦩ꧀ꦥꦺꦪꦤ꧀ꦏꦂꦱꦤꦩ꧀ꦥꦺꦤꦶ꧈ꦏꦸꦭꦥꦸꦫꦸꦤ꧀ꦲꦤ꧀ꦝꦺꦫꦺꦏ꧀ꦢꦢꦺꦴꦱ꧀ꦒꦼꦂꦩ꧈ꦩꦁꦏꦺꦏꦸꦭꦲꦠꦸꦂꦫꦶꦱꦸꦩꦼꦉꦥ꧀ꦠꦠꦕꦫꦤꦶꦁꦒꦼꦂꦩꦲꦶꦁꦏꦁꦭꦁꦏꦸꦁꦲꦸꦠꦩꦶ꧉ꦥꦔꦗꦼꦁꦔꦶꦁꦒꦼꦂꦩꦮꦶꦕꦤ꧀ꦠꦼꦤ꧀꧇ꦱꦝꦺꦫꦺꦏ꧀ Tristan꧈ꦏꦸꦭꦒꦸꦩꦸꦤ꧀ꦱꦔꦼꦠ꧀ꦢꦺꦤꦺꦮꦺꦴꦤ꧀ꦠꦼꦤ꧀ꦤꦒꦫꦶꦲꦶꦁꦏꦁꦥꦫꦲꦤꦏ꧀ꦏꦶꦁꦱꦸꦢꦒꦂꦏꦺꦩꦮꦺꦴꦤ꧀ꦠꦼꦏꦱꦩꦶꦒꦝꦃꦏꦱꦒꦼꦢ꧀ꦢꦤ꧀ꦲꦶꦁꦏꦁꦧꦺꦴꦠꦼꦤ꧀ꦏꦱꦸꦩꦼꦉꦥ꧀ꦥꦤ꧀ꦢꦺꦤꦶꦁꦥꦫꦥꦸꦠꦿꦤꦶꦁꦱꦠꦿꦶꦪꦲꦶꦁꦤꦒꦫꦶꦱꦤꦺꦱ꧀꧉ꦥꦤꦼꦝꦱꦩ꧀ꦥꦺꦪꦤ꧀ꦠꦸꦩꦸꦠ꧀ꦢꦢꦺꦴꦱ꧀ꦒꦼꦂꦩꦏꦸꦭꦠꦩ꧀ꦥꦺꦤꦶꦠꦔꦤ꧀ꦏꦭꦶꦃ꧉ꦩꦁꦒꦱꦩ꧀ꦥꦺꦪꦤ꧀ꦏꦸꦭꦱꦺꦴꦮꦤ꧀ꦤꦏꦼꦤ꧀ꦲꦶꦁꦔꦂꦱꦤꦶꦥꦸꦤ꧀ꦱꦁꦦꦿꦧꦸ Marc꧉

꧋ꦏꦱꦩ꧀ꦧꦶꦲꦉꦉꦩ꧀ꦧꦒ꧀ꦒꦤ꧀꧈ꦲꦁꦒꦺꦤ꧀ꦤꦶꦥꦸꦤ꧀ꦲꦩꦸꦫꦏ꧀ꦩꦸꦫꦏ꧀ꦱꦁꦱꦩ꧀ꦱꦩ꧀ꦥꦸꦤ꧀ꦫꦩ꧀ꦥꦸꦁ꧉ꦗꦤ꧀ꦠꦸꦁꦠꦸꦮꦶꦤ꧀ꦗꦼꦫꦺꦴꦮꦤ꧀ꦱꦤꦺꦱ꧀ꦱꦶꦥꦸꦤ꧀ꦠꦸꦮꦶꦤ꧀ꦧꦭꦸꦁꦔꦶꦁꦧꦛꦸꦏ꧀ꦏꦠꦼꦝꦏ꧀ꦏꦏꦼꦤ꧀ꦝꦠꦼꦁꦱꦒꦮꦺꦴꦤ꧀ꦱꦒꦮꦺꦴꦤ꧀ꦮꦲꦸ꧈ꦥꦸꦤꦥꦩꦭꦶꦃꦱꦁꦥꦔꦺꦫꦤ꧀ꦭꦗꦼꦁꦲꦩ꧀ꦧꦸꦏꦤꦶꦕꦺꦴꦤ꧀ꦠꦺꦴꦝꦠꦼꦁꦥꦫꦒꦼꦂꦩ꧈ꦏꦢꦺꦴꦱ꧀ꦥꦸꦤ꧀ꦢꦶꦥꦔꦼꦢꦸꦩ꧀ꦩꦶꦁꦠꦼꦝꦤꦶꦥꦸꦤ꧀ꦱꦼꦒꦮꦺꦴꦤ꧀꧈ꦠꦸꦮꦶꦤ꧀ꦏꦢꦺꦴꦱ꧀ꦥꦸꦤ꧀ꦢꦶꦥꦔꦸꦤ꧀ꦢꦁꦔꦶꦥꦸꦤ꧀꧉ꦢꦺꦤꦺꦥꦤ꧀ꦢꦸꦩ꧀ꦩꦤ꧀ꦤꦶꦥꦸꦤ꧀ꦥꦫꦒꦼꦂꦩꦱꦩꦶꦢꦶꦥꦸꦤ꧀ꦱꦸꦤ꧀ꦢꦸꦏ꧀ꦏꦶꦲꦶꦁꦱꦸꦗꦺꦤ꧀ꦲꦒꦼꦁꦲꦒꦼꦁꦲꦶꦁꦏꦁꦏꦮꦔꦸꦤ꧀ꦏꦢꦺꦴꦱ꧀ꦒꦂꦥꦸ꧉ꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦼꦧꦒꦺꦪꦤ꧀ꦲꦼꦤ꧀ꦝꦱ꧀꧈ꦥꦸꦥꦸ꧈ꦭꦸꦭꦸꦂꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦫꦒꦼꦂꦩꦱꦩꦶꦲꦚꦺꦁꦏ꧀ꦭꦏ꧀ꦏꦥꦭ꧀ꦭꦶꦥꦸꦤ꧀꧈ꦭꦩ꧀ꦥꦃꦲꦶꦥꦸꦤ꧀ꦭꦗꦼꦁꦏꦠꦠꦢꦺꦤꦶꦁꦥꦔꦺꦫꦤ꧀ Tristan ꦗꦺꦗꦺꦂꦏꦭꦶꦃꦏꦭꦶꦃꦱꦲꦠꦸꦩꦸꦤ꧀ꦠꦼꦤ꧀ꦧꦶꦝꦭ꧀꧉ꦱꦫꦺꦃꦤꦶꦁꦭꦩ꧀ꦥꦃꦲꦶꦥꦸꦤ꧀ꦩꦮꦶꦢꦶꦥꦸꦤ꧀ꦠꦠ꧈ꦥꦿꦩꦶꦭꦧꦶꦭꦶꦃꦠꦶꦤꦶꦔꦭ꧀ꦭꦤ꧀꧈ꦱꦏꦭꦁꦏꦸꦁꦉꦩ꧀ꦥꦼꦒ꧀ꦲꦚꦼꦤꦼꦁꦔꦏꦼꦤ꧀꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦱꦁꦥꦔꦺꦫꦤ꧀ꦱꦸꦩꦼꦉꦥ꧀ꦏꦫꦠꦺꦴꦤ꧀ꦱꦲꦺꦠꦸꦮꦶꦤ꧀ꦏꦠꦶꦔꦭ꧀ꦏꦶꦪꦠ꧀ꦱꦔꦼꦠ꧀꧉ꦏꦫꦠꦺꦴꦤ꧀ꦮꦲꦸꦲꦔꦗꦼꦁꦔꦏꦼꦤ꧀ꦱꦒꦤ꧀ꦠꦼꦤ꧀꧈ꦏꦶꦤꦸꦧꦼꦁꦲꦶꦁꦥꦠꦩꦤ꧀ꦤꦤ꧀ꦱꦲꦲꦫꦲꦫꦗꦼꦩ꧀ꦧꦂꦱꦔꦼꦠ꧀꧉ꦭꦺꦥꦺꦤ꧀ꦭꦺꦥꦺꦤ꧀ꦤꦶꦥꦸꦤ꧀ꦏꦠꦶꦔꦭ꧀ꦥꦠꦶꦁꦱꦿꦺꦮꦺꦃꦱꦩꦶꦲꦚ꧀ꦗꦺꦴꦒ꧀ꦲꦶꦁꦱꦒꦤ꧀ꦠꦼꦤ꧀꧉ꦲꦶꦁꦥꦭꦧꦸꦃꦲꦤ꧀ꦏꦛꦃꦧꦲꦶꦠꦢꦒꦁꦱꦏꦶꦁꦤꦒꦫꦶꦱꦤꦺꦱ꧀ꦱꦩꦶꦭꦧꦸꦃ꧉ꦲꦶꦁꦱꦲꦸꦧꦼꦔꦶꦁꦏꦫꦠꦺꦴꦤ꧀ꦏꦠꦺꦩ꧀ꦧꦺꦴꦏ꧀ꦲꦶꦁꦒꦶꦭ꧀ꦱꦂꦠꦱꦤ꧀ꦠꦺꦴꦱ꧈ꦥꦿꦩꦶꦭꦧꦺꦴꦠꦼꦤ꧀ꦒꦩ꧀ꦥꦶꦭ꧀ꦏꦊꦧꦼꦠ꧀ꦠꦤ꧀ꦲꦶꦁꦩꦼꦁꦱꦃ꧈ꦠꦸꦂꦮꦺꦴꦤ꧀ꦠꦼꦤ꧀ꦩꦼꦤꦫꦤꦶꦥꦸꦤ꧀ꦲꦶꦁꦒꦶꦭ꧀ꦲꦶꦁꦒꦶꦭ꧀꧈ꦲꦶꦁꦏꦁꦏꦢꦩꦼꦭ꧀ꦱꦺꦭꦕꦼꦩꦼꦁ꧉ꦩꦶꦠꦸꦫꦸꦠ꧀ꦏꦥꦶꦠꦢꦺꦴꦱ꧀ꦱꦤꦶꦁꦠꦼꦠꦶꦪꦁꦲꦶꦁꦗꦩꦤ꧀ꦱꦩꦤ꧀ꦠꦼꦤ꧀꧈ꦩꦼꦤꦫꦮꦲꦸꦢꦩꦼꦭ꧀ꦭꦤꦶꦥꦸꦤ꧀ꦢꦤꦮ꧉ꦥꦫꦥꦿꦗꦸꦫꦶꦠ꧀ꦲꦶꦁꦏꦁꦱꦩꦶꦗꦒꦶꦏꦫꦠꦺꦴꦤ꧀ꦱꦒꦼꦢ꧀ꦤꦶꦔꦭ꧀ꦭꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦱꦗꦮꦶꦤꦶꦁꦏꦫꦠꦺꦴꦤ꧀ꦔꦤ꧀ꦠꦺꦴꦱ꧀ꦠꦼꦧꦶꦃꦱꦔꦼꦠ꧀꧉ꦱꦉꦁꦥꦔꦺꦫꦤ꧀ Tristan ꦤꦶꦔꦭ꧀ꦭꦶꦏꦫꦠꦺꦴꦤ꧀ꦮꦲꦸꦭꦗꦼꦁꦥꦶꦠꦏꦺꦤ꧀꧇ꦥꦸꦤꦥꦤꦩꦤꦶꦥꦸꦤ꧀ꦏꦫꦠꦺꦴꦤ꧀ꦥꦸꦤꦶꦏ꧉ꦥꦔꦒꦼꦁꦔꦶꦁꦒꦼꦂꦩꦲꦩꦁꦱꦸꦭ꧀ꦭꦶ꧇ꦏꦿꦠꦺꦴꦤ꧀ꦥꦸꦤꦶꦏꦤꦩꦤꦶꦥꦸꦤ꧀ Tintagel꧉ ꦥꦔꦺꦫꦤ꧀ Tristan ꦮꦶꦕꦤ꧀ꦠꦼꦤ꧀꧇ Tintagel꧈ ꦩꦸꦒꦶꦩꦸꦒꦶꦲꦶꦁꦏꦁꦩꦲꦏꦮꦱꦲꦥꦫꦶꦁꦧꦼꦂꦏꦃꦝꦠꦼꦁꦏꦫꦠꦺꦴꦤ꧀ꦥꦸꦤꦶꦏꦠꦸꦮꦶꦤ꧀ꦝꦠꦼꦁꦲꦶꦁꦏꦁꦱꦩꦶꦩꦁꦒꦺꦤ꧀ꦲꦶꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ꦔꦿꦶꦏꦸ꧉

꧋ꦏꦭꦫꦸꦩꦶꦪꦶꦤ꧀ꦱꦁꦥꦸꦠꦿꦶ Blaneeflor ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦲꦶꦧꦸꦱꦁꦥꦔꦺꦫꦤ꧀ Tristan ꦮꦲꦸꦏꦝꦲꦸꦥ꧀ꦥꦏꦼꦤ꧀ꦏꦭꦶꦲꦤ꧀ꦲꦶꦁꦏꦁꦫꦩꦦꦿꦧꦸ Rivalen ꦮꦺꦴꦤ꧀ꦠꦼꦤ꧀ꦆꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ Tintagel ꦥꦸꦤꦶꦏꦤꦔꦶꦁꦥꦔꦺꦫꦤ꧀ Tristan ꦧꦺꦴꦠꦼꦤ꧀ꦱꦸꦩꦼꦉꦥ꧀꧉ꦱꦢꦸꦩꦸꦒꦶꦤꦶꦥꦸꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦩꦼꦤꦫꦥꦁꦒꦺꦤꦤ꧀ꦤꦶꦁꦥꦿꦗꦸꦫꦶꦠ꧀ꦗꦒꦶ꧈ꦥꦫꦒꦼꦂꦩꦭꦗꦼꦁꦱꦩꦶꦲꦔꦸꦔꦼꦭ꧀ꦭꦏ꧀ꦏꦼꦤ꧀ꦱꦭꦺꦴꦩ꧀ꦥꦿꦺꦠ꧀ꦠꦶꦥꦸꦤ꧀꧉ꦦꦿꦧꦸ Marc ꦱꦲꦥꦫꦧꦫꦺꦴꦤ꧀ꦭꦗꦼꦁꦠꦶꦤ꧀ꦢꦏ꧀ꦝꦠꦼꦁꦲꦶꦁꦒꦥꦸꦫꦤꦶꦁꦏꦫꦠꦺꦴꦤ꧀꧈ꦥꦔꦗꦼꦁꦔꦶꦁꦒꦼꦂꦩꦒꦼꦂꦩꦮꦲꦸꦭꦗꦼꦁꦔꦠꦸꦂꦫꦶꦮꦸꦤꦶꦔꦝꦠꦼꦁꦦꦿꦧꦸ Marc ꦱꦢꦪꦊꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦏꦭꦲꦩ꧀ꦧꦸꦗꦼꦁꦱꦁꦱꦩ꧀ꦔꦤ꧀ꦠꦺꦴꦱ꧀ꦠꦼꦥꦁꦏꦭꦶꦲꦤ꧀ Tristan ꦠꦸꦮꦶꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦭꦫꦺꦤꦺꦤꦺꦩ꧀ꦩꦤ꧀ꦮꦲꦸꦲꦁꦒꦺꦤ꧀ꦤꦶꦁꦒꦝꦃꦏꦱꦒꦼꦢ꧀ꦢꦤ꧀ꦩꦼꦁꦒꦃꦕꦫꦕꦫꦤꦶꦁꦒꦼꦂꦩꦲꦸꦠꦩꦶꦲꦶꦁꦏꦁꦱꦩ꧀ꦥꦸꦤ꧀ꦏꦥꦶꦠꦺꦴꦁꦠꦺꦴꦤ꧀ꦤꦏꦼꦤ꧀ꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦠꦸꦮꦶꦤ꧀ꦝꦠꦼꦁꦥꦫꦏꦚ꧀ꦕꦏꦚ꧀ꦕꦤꦶꦥꦸꦤ꧀ꦱꦢꦪ꧉ꦦꦿꦧꦸ Marc ꦒꦸꦩꦸꦤ꧀ꦱꦔꦼꦠ꧀ꦲꦩꦿꦶꦏ꧀ꦱꦤꦶꦱꦲꦺꦤꦶꦁꦥꦿꦤꦠꦤ꧀ꦤꦶꦁꦭꦩ꧀ꦥꦃꦲꦶꦥꦸꦤ꧀ꦥꦫꦒꦼꦂꦩꦲꦶꦁꦏꦁꦱꦩꦶꦤꦸꦩ꧀ꦥꦏ꧀ꦏꦥꦭ꧀꧈ꦩꦏꦠꦼꦤ꧀ꦲꦸꦒꦶꦧꦧ꧀ꦥꦩ꧀ꦧꦒꦺꦤ꧀ꦤꦶꦥꦸꦤ꧀ꦱꦁꦱꦩ꧀꧈ꦭꦁꦏꦸꦁꦒꦸꦩꦸꦤ꧀ꦩꦭꦶꦃꦱꦉꦁꦲꦩꦿꦶꦏ꧀ꦱꦤꦶꦝꦠꦼꦁꦭꦫꦺꦤꦺꦤꦺꦩꦤ꧀ꦲꦶꦁꦏꦁꦧꦒꦸꦱ꧀ꦮꦂꦤꦶꦤꦶꦥꦸꦤ꧀ꦥꦸꦤꦶꦏ꧈ꦢꦺꦤꦺꦭꦗꦼꦁꦏꦒꦸꦔꦤ꧀ꦥꦁꦒꦭꦶꦃꦠꦽꦱ꧀ꦤꦝꦠꦼꦁꦭꦫꦺꦲꦶꦁꦏꦁꦱꦮꦼꦒ꧀ꦏꦲꦸꦤꦶꦁꦔꦤ꧀ꦱꦥꦶꦱꦤ꧀ꦥꦸꦤꦶꦏ꧉

꧋ꦥꦫꦩꦲꦺꦴꦱ꧀ꦠꦩ꧀ꦠꦸꦧꦝꦺꦱꦒꦼꦢ꧀ꦔꦶꦤ꧀ꦠꦼꦤ꧀ꦔꦶꦤ꧀ꦠꦼꦤ꧀ꦥꦶꦪꦩ꧀ꦧꦏ꧀꧈ꦥꦸꦤꦥꦱꦧꦧ꧀ꦧꦶꦥꦸꦤ꧀ꦢꦺꦤꦺꦦꦿꦧꦸ Marc ꦭꦗꦼꦁꦏꦒꦸꦔꦤ꧀ꦠꦚ꧀ꦕꦼꦥ꧀ꦮꦼꦭꦱ꧀ꦭꦤ꧀ꦲꦱꦶꦃꦝꦠꦼꦁꦥꦔꦺꦫꦤ꧀ Tristan ꦮꦲꦸ꧉ꦱꦤꦗꦤ꧀ꦱꦁꦦꦿꦨꦸꦧꦺꦴꦠꦼꦤ꧀ꦮꦸꦤꦶꦁꦔꦧꦶꦭꦶꦃꦭꦫꦺꦤꦺꦤꦺꦩ꧀ꦩꦤ꧀ꦥꦸꦤꦶꦏꦏꦥꦺꦤꦏꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦤꦔꦶꦁꦫꦲꦺꦴꦱ꧀ꦱꦶꦁꦩꦤꦃꦧꦺꦴꦠꦼꦤ꧀ꦏꦺꦔꦶꦁꦢꦶꦥꦸꦤ꧀ꦕꦺꦴꦭꦺꦴꦁ꧉ꦲꦶꦁꦮꦚ꧀ꦕꦶꦱꦺꦴꦤ꧀ꦠꦼꦤ꧀ꦱꦧꦶꦧꦂꦫꦶꦥꦸꦤ꧀ꦝꦲꦂ꧈ꦯꦁꦦꦿꦨꦸꦱꦲꦧꦫꦺꦴꦤ꧀ꦧꦫꦺꦴꦤ꧀ꦱꦩꦶꦩꦶꦉꦁꦔꦏꦼꦤ꧀ꦱꦶꦤ꧀ꦝꦺꦤ꧀ꦭꦤ꧀ꦱꦼꦤ꧀ꦝꦺꦴꦤ꧀ꦤꦶꦥꦸꦤ꧀ꦠꦸꦏꦁꦱꦸꦭꦥ꧀ꦱꦏꦶꦁ Wales꧉ ꦲꦁꦒꦺꦤ꧀ꦤꦶꦥꦸꦤ꧀ꦱꦶꦤ꧀ꦝꦺꦤ꧀ꦏꦧꦂꦫꦸꦁꦲꦸꦔꦼꦭ꧀ꦭꦶꦁꦕ꧀ꦭꦼꦩ꧀ꦥꦸꦁ꧈ꦲꦶꦁꦏꦁꦏꦠꦧꦸꦃꦥꦶꦪꦩ꧀ꦧꦏ꧀꧉ꦱ꧀ꦮꦫꦤꦶꦥꦸꦤ꧀ꦱꦏꦺꦕꦱꦔꦼꦠ꧀꧈ꦠꦸꦂꦱꦶꦤ꧀ꦝꦺꦤ꧀ꦤꦶꦥꦸꦤ꧀ꦚꦫꦶꦪꦺꦴꦱ꧀ꦱꦏꦼꦤ꧀ꦢꦺꦴꦔꦺꦁꦱꦲꦺꦱꦲꦺ꧉ꦱꦉꦁꦠꦸꦏꦁꦱꦸꦭꦥ꧀ꦮꦲꦸꦧꦝꦺꦩꦶꦮꦶꦠꦶꦱꦶꦤ꧀ꦝꦺꦤ꧀ꦕꦫꦶꦪꦺꦴꦱ꧀ꦱꦤꦺꦱ꧀ꦱꦶꦥꦸꦤ꧀ꦩꦭꦶꦃ꧈ꦥꦔꦺꦫꦤ꧀ Tristan ꦠꦸꦩꦸꦤ꧀ꦠꦼꦤ꧀ꦮꦶꦕꦤ꧀ꦠꦼꦤ꧀꧇ꦠꦶꦪꦁꦱꦒꦼꦢ꧀ꦠꦼꦩ꧀ꦧꦁꦲꦶꦁꦏꦁꦧꦝꦺꦱꦩ꧀ꦥꦺꦪꦤ꧀ꦲꦁꦒꦺꦱꦶꦤ꧀ꦝꦺꦤ꧀ꦤꦤ꧀ꦥꦸꦤꦶꦏꦱꦲꦺꦱꦔꦼꦠ꧀꧈ꦩꦤꦮꦶꦧꦺꦴꦠꦼꦤ꧀ꦊꦥꦠ꧀ꦠꦼꦩ꧀ꦧꦁꦥꦸꦤꦶꦏꦏꦫꦔꦤ꧀ꦤꦶꦥꦸꦤ꧀ꦧꦁꦱ Bretagne ꦗꦩꦤ꧀ꦫꦸꦩꦶꦪꦶꦤ꧀꧈ꦲꦶꦁꦒꦶꦃꦥꦸꦤꦶꦏꦏꦁꦒꦺꦩꦺꦔꦼꦠ꧀ꦠꦶꦊꦭꦩ꧀ꦥꦃꦲꦤ꧀ꦱꦲꦏꦠꦽꦱ꧀ꦤꦤ꧀ꦤꦶꦥꦸꦤ꧀ Graelent꧉

꧋(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)

FEUILLETON

Lêlampahanipun Prabu Tristan lan Putri Isolde

Prabu Tristan Kala Taksih Timur

O, tuwan, bapa kula sudagar, sanès baron, kesah kula saking ing griya, kula botên cariyos dhatêng sintên-sintên, dhatêng pun bapa inggih botên, kesah kula numpak baita, awit kula kêpengin sumêrêp kawontênan sarta tatacaranipun têtiyang ing nagari sanès, manawi sampeyan karsa nampèni, kula purun andhèrèk dados gêrma, mangke kula aturi sumêrêp tata caraning gêrma ingkang langkung utami. Pangajênging gêrma wicantên: sadhèrèk Tristan, kula gumun sangêt dene wontên nagari ingkang para anaking sudagar kemawon têka sami gadhah kasagêdan ingkang botên kasumêrêpan dening para putraning satriya ing nagari sanès. Panêdha sampeyan tumut dados gêrma kula tampèni tangan kalih. Măngga sampeyan kula sowanakên ing ngarsanipun Sang Prabu Marc.

Kasambi arêrêmbagan, anggènipun amurak-murak sangsam sampun rampung. Jantung tuwin jêroan sanèsipun tuwin balunging bathuk katêdhakakên dhatêng sagawon-sagawon wau, punapa malih sang pangeran lajêng ambukani conto dhatêng para gêrma, kadospundi pangêduming têdhanipun sêgawon, tuwin kadospundi pangundangipun. Dene pandumanipun para gêrma sami dipun sunduki ing sujèn agêng-agêng ingkang kawangun kados garpu. Wontên ingkang kêbagean êndhas, pupu, lulur tuwin sanès-sanèsipun. Sasampunipun para gêrma sami anyengklak kapalipun, lampahipun lajêng katata dening Pangeran Tristan jèjèr kalih-kalih saha tumuntên bidhal. Sarèhning lampahipun mawi dipun tata, pramila bilih tiningalan, sakalangkung rêmpêg anyênêngakên. Botên antawis dangu sang pangeran sumêrêp karaton sae tuwin katingal kiyat sangêt. Karaton wau angajêngakên sagantên, kinubêng ing patamanan saha ara-ara jêmbar sangêt. Lèpèn-lèpènipun katingal pating srèwèh sami anjog ing sagantên. Ing palabuhan kathah baita dagang saking nagari sanès sami labuh. Ing saubênging karaton katembok inggil sarta santosa, pramila botên gampil kalêbêtan ing mêngsah, tur wontên mênaranipun inggil-inggil, ingkang kadamêl sela cêmêng. Miturut kapitadosaning têtiyang ing jaman samantên, mênara wau damêlanipun danawa. Para prajurit ingkang sami jagi karaton sagêd ningali kawontênan ing sajawining karaton ngantos têbih sangêt. Sarêng Pangeran Tristan ningali karaton wau lajêng pitakèn: punapa namanipun karaton punika. Pangagênging gêrma amangsuli: kraton punika namanipun Tintagel. Pangeran Tristan wicantên: Tintagel, mugi-mugi ingkang Maha Kawasa aparing bêrkah dhatêng karaton punika tuwin dhatêng ingkang sami manggèn ing salêbêting karaton ngriku.

Kala rumiyin Sang Putri Blaneeflor inggih punika ingkang ibu Sang Pangeran Tristan wau kadhaupakên kalihan ingkang rama Prabu Rivalen wontên ing salêbêting karaton Tintagel punika, nanging Pangeran Tristan botên sumêrêp. Sadumuginipun ing sangandhaping mênara panggenaning prajurit jagi, para gêrma lajêng sami angungêlakên salomprètipun. Prabu Marc saha para baron lajêng tindak dhatêng ing gapuraning karaton, pangajênging gêrma-gêrma wau lajêng ngaturi wuninga dhatêng Prabu Marc sadaya lêlampahanipun kala ambujêng sangsam ngantos têpang kalihan Tristan tuwin kawontênanipun lare neneman wau anggèning gadhah kasagêdan mênggah cara-caraning gêrma utami ingkang sampun kapitongtonakên dhatêng piyambakipun tuwin dhatêng para kănca-kancanipun sadaya. Prabu Marc gumun sangêt amriksani saening pranataning lampahipun para gêrma ingkang sami numpak kapal, makatên ugi bab pambagenipun sangsam, langkung gumun malih sarêng amriksani dhatêng lare neneman ingkang bagus warninipun punika, dene lajêng kagungan panggalih trêsna dhatêng lare ingkang sawêg kauningan sapisan punika.

Para maos tamtu badhe sagêd ngintên-ngintên piyambak, punapa sababipun dene Prabu Marc lajêng kagungan tancêp wêlas lan asih dhatêng Pangeran Tristan wau. Sanajan sang prabu botên wuninga bilih lare neneman punika kapenakanipun piyambak, nanging raosing manah botên kenging dipun colong. Ing wanci sontên sabibaripun dhahar, sang prabu saha baron-baron sami mirêngakên sindhèn lan sêndhonipun tukang sulap saking Wales. Anggènipun sindhèn kabarung ungêling clêmpung, ingkang katabuh piyambak. Swaranipun sakeca sangêt, tur sindhènipun nyariyosakên dongèng sae-sae. Sarêng tukang sulap wau badhe miwiti sindhèn cariyos sanèsipun malih, Pangeran Tristan tumuntên wicantên: tiyang sagêd têmbang ingkang badhe sampeyan angge sindhenan punika sae sangêt, manawi botên lêpat têmbang punika karanganipun băngsa Bretagne jaman rumiyin, inggih punika kangge mèngêti lêlampahan saha katrêsnanipun Graelent.

(Badhe kasambêtan)

}}

Majalah Kajawen taun 1927

Kajawen 006 1927-02-10 (Index) Kalantipaning Lare Sapihan Kajawèn Paduka Tuwan Prof. Dr. C. SNOUCK HURGRONJE Ama Kopi Wangsul Dhatêng Basanipun Cina. Lêlampahanipun Abunawas Pawartos Warni-Warni saking Ijas Panglipur Manah Ewah-ewahan ing Karajan Turki Rêmbagipun Petruk lan Garèng Kabar warni-warni Sêrat Jayalêngkara Pawartos saking Administrasi	Kajawen 021 1927-05-26 (Index) Pambikakipun Parêpatan Polêksrad Sato Kewan Isining Sagantên Tataprunggu Wawasan Dalêm Kangjêng Tuwan Ingkang Wicaksana Gupêrnur Jendral, Bab Kawontênanipun ing Tanah Sumatrah Sisih Kilèn Panyuwunan Parêpatan Pakêmpalan Sêdyamulya Jagading Wanita Kabar warni-warni Lêlampahanipun Prabu Tristan lan Putri Isolde (2)	Kajawen 026 1927-06-30 (Index) Tiyang Lêlana Madosi Têlênging Panggayuh Lêlampahan Ringgit Tiyang ing Bali Cariyos Aslinipun Nênggala lan Alugora: Miturut cêcariyosan ing Madura. Jagading Sato Kewan: Nyariyosakên Bab Kêthèk. Pantês Sinudarsana Rêmbagipun Petruk lan Garèng: Bab Wisa ing Salêbêting Sata. Kabar Warni-warni Lêlampahanipun Prabu Tristan lan putri Isolde (7)	Kajawen 031 1927-08-04 (Index) Samaking Kajawèn Sedanipun Raja ing Rumèni Padamêlan Utami Punika Kêdah Dipun Ajèni Satunggaling Sudagar Ingkang Mangrêtos Dhatêng Ubat-ubêting Jaman Jagading Sato Kewan: Bab Gajah. Bab Dhuwung Rêmbagipun Petruk lan Garèng: Bab Sata Murugakên Sêsakit Jantung Jagading Wanita: Bab Dayaning Sate tuwin Saoto Madura. Kabar Warni-warni Lêlampahanipun Prabu Tristan lan putri Isolde (12)	Kajawen 034 1927-08-25 (Index) Wawasan Tumrap Sêrat-sêrat Anggitan Dalêm Swargi Kangjêng Gusti Pangeran Adipati Arya Mangkunagara IV Babadipun Tiyang Tani Pribumi Pralambang Jayabaya Bab Dhuwung Pambikakipun Pamulangan Dhoktêr Luhur Rêmbagipun Petruk lan Garèng: Bab Ngingah Gramèh. Jagading Wanita: Kasêtyanipun Wanita Jêpang dhatêng Lakinipun Kabar Warni-warni Lêlampahanipun Prabu Tristan lan Putri Isolde (15)	Kajawen 035 1927-09-01 (Index) Wawasan Tumrap Sêrat-sêrat Anggitan Dalêm Swargi Kangjêng Gusti Pangeran Adipati Arya Mangkunagara IV Pambikakipun Pamulangan Dhoktêr Luhur Bandera Kabangsan Jêpang Babadipun Tiyang Tani Pribumi Kêthoprak ing Ngayogyakarta Ingkang Bupati Enggal ing Batawi Radèn Tumênggung Ahmad Rêmbagipun Petruk lan Garèng: Bab Sata Murugakên Kunthing. Jagading Wanita: Kasêtyanipun Wanita Jêpang. Kabar Warni-warni Lêlampahanipun Prabu Tristan lan Putri Isolde (16)

Kajawen 037 1927-09-15 (Index)	Kajawen 040 1927-10-06 (Index)	Kajawen 041 1927-10-13 (Index)	Kajawen 043 1927-10-27 (Index)	Kajawen 050 1927-12-15 (Index)	Kajawen 052 1927-12-29 (Index)

{{#ifeq:1927|1927|