Kaca iki wis divalidasi
-38-
SITA – RAWANA.
Pancamas sarggah.
- Atha ri sěděngniramupu sěkar manusup ring alas těka ta sira ng Daçãnana maharddhika rupanira wiku çuci cuddha çaiwa sira sãtwika çanta katon hulu malĕngis ginunting arată hana kuncir alit.
- Atiçaya çudha huntu maputih spahațikopama ya tuwi magaṇitri kundala waluh ya sinaṇḍang ira lituhayu warnṇa laka daluwang nira ramya mabang, lumaku manasya yeka dalihan nira tan katĕngĕr.
- Majapa mangunyakěn ta sira mantra těhĕr lumaku mrědu mamanis wulat nira marum atisomya katon ikana karākṣasãn ira kadi pwa ya tan hana weh tama ta macangkrame těpining açrama ramya kabeh.
- Tiněmunirata sang janakarājasută ring alas sira juga tunggal-tunggal anusup tama tar matakut dadi ta masö sira ng Daçamukāti saharsa sira makin aparö sagorawa siran pawuwus wěkasan.
- Apa kita dibyarupa manusup mangalap ta sěkar atiçaya tan paḍanta rikanang hayu purṇṇa těměn hayu ni kanang wulan tuwi taman pamaḍeri kita apan awěněs ya ring rahina hina tamarpa sĕnö.
- Kusuma saroja ring talaga kapwa sěděng sumĕkar rahayu sugandha warṇṇa ya mabang maputih sawěneh tuwi tamatan padekana hayunya masör juga ya apan umaluy kacup ya rikanang wengi tan dahayu.
- Iki kahananta bisana amãnusagamya sukět tan awědi ring ulã bisama len aliman magalak syapa çaraṇanta lingku yadiyan hana mong mangawit ikana hayunta heman ari yogya kahatakěna.
- Kita mrědu komalātiçaya koněng-oněng ri hati kadi ta bhinusaṇann ikang alas ri hananta riya sangapa ngaranirata sira sang siniwinta kuněng atiçaya göng ni dharmma rasikan pamaweri kita.
- Aku ta paribhamanta paradeça rikang bhawana tuwi tak anon anung pada padanta surupa těměn kita juga hinganing hayu ya lingku tan ora waneh saphala ike huripku ri huwusku wĕruh ri kita.
***
