Masö tang ratu kabeh kapwa sumambut sanjatanya. Hana ta sang ratu ring Andyakapura, sang Mandarapati ngaranya. Ikã ta pinakãdinya tumututi sang Dewabrata. Padha wãninireng palagan. Makweh lwir ikang sanjata: hana gadã muçala, cakra, tomara. Iběk pěpět ikang ãkãçadeça dening warayangnya. nDatan pangĕne salah siki ning astranya, apan tinulak, tinanggul ri warayang sang Dewabrata. Sira tãmanahakĕn sarwãstranipuna, tan hana wenang tumahĕn i çakti nira. Kãndhĕg ta ya lakunya mãri sãhasa ri sang Dewabrata, linud nira pinanah ring diwyãstra. Mangkin kanglihan manahnira. Kunang sang Mandarapati krodha manah nira, salahāsa kalapan raranãma sang Ambã, apan kahyun ira nguni. Masö ta sang Mandarapati umudani sarwãstra. Mamalěsi ta sang Dewabrata, Bãruṇãstra pamanah nira. Pějah ta kudanya kãrun tĕkeng sãrathinya. Kerangan ta sang Mandharapati, tar wěnang mapag sang Dewabrata. Tatan kãwara lakunirãn makolih kanyã tělung siki. Datĕng ta sira ing Hãstinapura.
Mãjar ta sira sang Gandhawati ri kawiwahan sang Citrãnggada mwang Citrawirya. Mangrěngö pwa sang Ambã, yan sira winehakĕn i sang ari, salah tunggal pinaka swãmya, yan sang Citranggada, sang Citrawirya kunang, tan anggata sira. Mojar ta sang Ambã ri sang Dewabrata, ling nira: „Ai kaka sang Dewabrata. Tan ahyun nghulun tarimãkna ri arinta salah siki. Don ing hulun nguni kita, malapeking putri tiga, apan nguni rãma ning hulun pinakang hulun sumungakĕn i kita juga, nduk ing swayamwara.“
Mojar ta sang Dewabrata: „Ibu sang Ambã! Taha tan nghulun malape kita. Nihan ari ni nghulun sang Citrãnggada mwang sang Citrawirya pametakna mami kanya tiga, nghulun adĕgakĕn ratu rasikã. Nghulun tan wenang mastri. Sãdyaning wwang gumawayakna brata kabrahmacaryan.“
Mojar sang Ambã: „Kita juga sang Dewabrata pakaswãmya ni nghulun, tan wanehan!“
