Kaca iki wis divalidasi
-22-
- Bisikanira Narpati,Susunan Paku Buwana, prawignja pekik warnanē,kēḏep dēning wadya bala,mangkja sira winarna, nitih kuda gula gempung, binusanan abra muntjar.
- Atata lampahing baris,kang wadya pangawat kanan,Dipati Surabajanē, Panembahan ing Madura,wadya pangawat kiwa, kang minangka ḏaḏanipun,wadya kumpeni sadaja,
- Dēnē kang mungging ing wuri,wadyēng pasisir malatar,anggarebeg ing Sang Katong,punggawa ing Kartasura,mjang Patih Tjakradjaja,samja lumampah ing pungkur, rumeksa ing para garwa.
- Datan kawarna ing margi,sampun prapta ing Ungaran,amasanggrahan Sang Katong,sagung kang para punggawa, akarja pamonḏokan, dēnē kang dadya pangandjur, ing Lopait sampun prapta.
- Kawarnaa Komisaris, modjar ḏateng Tuwan Amral: "Daweg sowan ing Sang Katong, jēn sepi para punggawa, pukul satengah lima, daweg sami anunuwun marang Gusti Sri Narēndra.
- Jēn wonten pun Adipati,Semarang mangsa antuka". Tuwan Amral lon wuwusē: "Ija bener aturina,lah pajo paḏa sēba". Anulja sareng lumaku, Komisaris lawan Amral.
- Punggawa kapanggih sepi,miwah Dipati Semarang,sampun mantuk mring ponḏoke,Sang Nata kapanggih lenggah, anulja Tuwan Amral, tumamēng ngarsa Sang Prabu,menḏek sarja tatabēan.
- Sigra Amral matur aris; "Pukulun atur kawula, nenggih patikbra ing mangkē , anglampahi karja Nata, parēntahipun Djēndral, sanadyan ḏateng ing lampus, tan gingsir ing ngarsa Nata.
- Lebura dēn kados siti,wadya kumpeni sadaja, tan atilar ing Djeng Katong,nanging panuwun kawula, wontena sih Narēndra, ḏateng kawula pukulun, sinten kang ingarsa-arsa.
- Wonten nagri tanah Djawi, jēn dēdē kekutjah Nata, panuwun kawula anggēr, jēn suka galih Narēndra, nuhun uwos kēwala, sēwu kojan kaṭahipun, nenggih saben-saben warsa.