Kaca iki wis divalidasi
68
6. Kedjaba ana ing basa gantjaran, sanépa uga kerep tinemu ana ing basa kang sinawung ing tembang. Tuladhané:
KINANTHI.
Tut-runtut kumepjur pulut
jwa nganti benggang senjari
mimba mimi lan mintuna
widadaa slami - lami
tebiha rubed - rubéda
Sang pangantèn kakung-putri.......(Pm).
BAB IX. UKARA SESUMBAR.
Sumbar (sesumbar), ateges: nglairaké tetembungan kang ngemu surasa nantang ngadu tyasa, ngadu kaluwihan. unggul-unggulan karosan, kasektèn lsp. Disumbari, ateges: ditantang ngadu tyasa, ngadu kaluwihan lsp. Njumbari, ateges: nantang ngadu tyasa lsp.
Ukara sesumbar iku lumrahé kautjapaké kanți santak (tarkadhang kawoworan tembung kasar), isi surasa ngepak kagunan utawa kadigdajané wong sing disumbari.
Tuladha:
- Jèn njata lanang, metua!
- Ngadjak apa, pirang dina, dakladèni !
- Ngadjak rupak, apa ngadjak djembar?!
- Wah, ora djamak! Sumbarmu kaja bisa mutung wesi gligèn! Kaja lanang-lananga dhéwé! Baja satjengkang mana kulitmu! Madjua, daktètèr kaluwihanmu!
- Jèn dakkeḍèpaké ora ilang, dakuntal malang mangsa ngambaha ing tjeṭak (kowé):
- . Mlebua menjang lak-lakaning naga, mangsa wurunga karasa ing tanganku kowé !
- Ndjerokna djagang, nduwurna kapurantjang! Mangsa wurunga dakgawé karang-abang nagaramu!
- Keriga satjinḍhilé abang, tjaweta sawadoné!
- Ampjaken kaja wong ndjala, krubuten kaja mendjangan mati!
- Adja genti mara, barenga mara, ora-orané daktinggal mlaju!
- Madjua sajuta ngarsa, sakeți wuri !
- Kopat-kapita kaja ula tapak-angin, kekedjera kaja manuk brandjangan! Daksaut daksabetaké prabatang, sirna ilang kuwandamu.
- Tumengaa ing akasa, tumungkula ing pratiwi, sambata mring sudarmamu!
