ꦥꦸꦤ꧀ꦥꦲꦺꦭꦸ꧉ꦧꦫꦁꦧꦫꦁꦠꦸꦠꦸꦩ꧀ꦧꦱ꧀ꦱꦤ꧀ꦤꦶꦥꦸꦤ꧀ꦭꦗꦼꦁꦏꦠꦸꦩ꧀ꦥꦏ꧀ꦲꦏꦼꦤ꧀ꦲꦶꦁꦏꦥꦭ꧀꧈ꦤꦸꦤ꧀ꦠꦼꦤ꧀ꦮꦁꦱꦸꦭ꧀ꦝꦠꦼꦁꦲꦶꦁꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀꧉ꦱꦢꦸꦩꦸꦒꦶꦤꦶꦁꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀ꦭꦗꦼꦁꦩꦁꦒꦶꦃꦲꦶꦯꦁꦥꦸꦠꦿꦶꦆꦱꦺꦴꦭ꧀ꦢꦺ꧈ꦲꦠꦸꦂꦫꦶꦥꦸꦤ꧀꧇ꦝꦸꦃ꧈ꦯꦁꦦꦿꦩꦺꦱ꧀ꦮꦫꦶ꧈ꦲꦒꦼꦩ꧀ꦲꦒꦼꦩ꧀ꦩꦤ꧀ꦥꦢꦸꦏꦱꦩ꧀ꦥꦸꦤ꧀ꦱꦩꦶꦭꦸꦮꦱ꧀ꦱꦢꦪ꧉ꦥꦢꦸꦏꦩꦸꦒꦶꦏꦂꦱꦲꦤꦩ꧀ꦥꦶꦲꦒꦼꦩ꧀ꦲꦒꦼꦩ꧀ꦩꦤ꧀ꦲꦮꦺꦴꦤ꧀ꦥꦸꦤꦶꦏ꧈ꦏꦒꦼꦩ꧀ꦱꦤ꧀ꦠꦸꦤ꧀ꦧꦺꦚ꧀ꦗꦶꦁꦲꦼꦩ꧀ꦧꦺꦤ꧀ꦩꦤꦮꦶꦥꦢꦸꦏꦥꦁꦏꦠ꧀ꦲꦩꦁꦒꦶꦃꦲꦶꦯꦁꦤꦠ꧉ꦱꦲꦺꦱ꧀ꦠꦸꦤꦶꦥꦸꦤ꧀ꦏꦸꦭꦏꦸꦮꦠꦺꦴꦱ꧀ꦧꦶꦭꦶꦃꦧꦺꦴꦠꦼꦤ꧀ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦤꦸꦗꦸꦤꦶꦁꦥꦁꦒꦭꦶꦃꦝꦠꦼꦁꦲꦒꦼꦩ꧀ꦲꦒꦼꦩ꧀ꦩꦤ꧀ꦥꦸꦤꦶꦏ꧈ꦩꦂꦒꦶꦏꦸꦭꦧꦺꦴꦠꦼꦤ꧀ꦏꦸꦭꦶꦤꦲꦩꦶꦭꦶꦃꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦁꦥꦫꦥꦸꦠꦿꦶ꧉
꧋ꦏꦕꦫꦶꦪꦺꦴꦱ꧀ꦲꦶꦁꦢꦶꦤ꧀ꦠꦼꦤ꧀ꦥꦸꦤꦶꦏꦯꦁꦦꦿꦧꦸ Marc ꦥꦫꦶꦁꦱꦸꦩꦼꦉꦥ꧀ꦝꦠꦼꦁꦱꦢꦪꦠꦶꦪꦁꦲꦶꦁ Cornwallis ꦧꦶꦭꦶꦃꦠꦶꦒꦁꦢꦶꦤ꧀ꦠꦼꦤ꧀ꦩꦭꦶꦃꦯꦁꦦꦿꦧꦸꦧꦝꦺꦲꦤꦩ꧀ꦥꦶꦯꦁꦦꦿꦩꦺꦱ꧀ꦮꦫꦶꦮꦺꦴꦤ꧀ꦠꦼꦤ꧀ꦲꦶꦁꦲꦫꦲꦫꦱꦕꦼꦭꦏ꧀ꦏꦶꦁꦮꦤ Morois꧉ꦱꦉꦁꦢꦸꦩꦸꦒꦶꦲꦶꦁꦢꦶꦤ꧀ꦠꦼꦤ꧀ꦩꦁꦱꦤ꧀ꦤꦶꦥꦸꦤ꧀ꦱꦁꦦꦿꦧꦸꦧꦝꦺꦥꦥꦁꦒꦶꦃꦲꦤ꧀ꦏꦭꦶꦪꦤ꧀ꦦꦿꦧꦸ Tristan꧈ꦱꦲꦧꦝꦺꦔꦠꦸꦂꦫꦏꦼꦤ꧀ꦱꦁꦦꦿꦩꦺꦱ꧀ꦮꦫꦶꦮꦲꦸ꧈ꦲꦫꦲꦫꦮꦲꦸꦏꦼꦧꦏ꧀ꦠꦶꦪꦁ꧈ꦏꦛꦃꦥꦫꦱꦠꦿꦶꦪꦠꦸꦮꦶꦤ꧀ꦥꦫꦥꦸꦠꦿꦶꦧꦺꦴꦁꦱꦭꦸꦲꦸꦂꦲꦶꦁꦏꦁꦱꦩꦶꦫꦮꦸꦃꦲꦶꦁꦲꦫꦲꦫꦥꦸꦤꦶꦏ꧉ꦱꦢꦪꦱꦩꦶꦏꦼꦥꦺꦔꦶꦤ꧀ꦱꦸꦩꦼꦉꦥ꧀ꦩꦭꦶꦃꦝꦠꦼꦁꦯꦁꦦꦿꦩꦺꦱ꧀ꦮꦫꦶ꧈ꦩꦂꦒꦶꦏꦗꦮꦶꦧꦫꦺꦴꦤ꧀ꦠꦶꦠꦶꦒꦲꦶꦁꦏꦁꦱꦩꦶꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦮꦲꦸ꧈ꦱꦢꦪꦱꦩꦶꦮꦼꦭꦱ꧀ꦱꦲꦠꦽꦱ꧀ꦤꦝꦠꦼꦁꦯꦁꦦꦿꦩꦺꦱ꧀ꦮꦫꦶ꧉ꦲꦶꦁꦲꦫꦲꦫꦏꦲꦢꦼꦒ꧀ꦒꦤ꧀ꦥꦱꦁꦒꦿꦃꦲꦤ꧀ꦥꦱꦁꦒꦿꦃꦲꦤ꧀ꦲꦶꦁꦏꦁꦫꦶꦤꦼꦁꦒꦱꦲꦺ꧉ꦲꦶꦁꦮꦚ꧀ꦕꦶꦲꦺꦚ꧀ꦗꦶꦁꦦꦿꦧꦸ Tristan ꦏꦭꦶꦪꦤ꧀ꦱꦁꦥꦸꦠꦿꦶ Isolde ꦱꦩꦶꦲꦤꦶꦠꦶꦃꦠꦶꦠꦶꦃꦲꦤ꧀꧈ꦲꦤꦶꦭꦂꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀ꦏꦾꦲꦶ Ogrin꧈ꦩꦼꦢꦭ꧀ꦱꦠꦼꦔꦃꦲꦶꦁꦮꦤ꧉ꦲꦶꦁꦱꦫꦺꦃꦤꦺꦦꦿꦧꦸ Tristan ꦏꦸꦮꦠꦺꦴꦱ꧀ꦧꦶꦭꦶꦃꦮꦺꦴꦤ꧀ꦠꦼꦤ꧀ꦧꦧꦪꦲꦶꦁꦏꦁꦲꦤ꧀ꦝꦠꦼꦁꦔꦶ꧈ꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦥꦸꦤ꧀ꦏꦱꦠꦿꦶꦪꦤ꧀꧈ꦲꦶꦁꦒꦶꦃꦥꦸꦤꦶꦏꦲꦒꦼꦩ꧀ꦩꦶꦥꦸꦤ꧀ꦏꦼꦫꦺꦢꦶꦥꦸꦤ꧀ꦫꦱꦸꦏ꧀ꦭꦤ꧀ꦥꦼꦝꦁꦔꦶꦥꦸꦤ꧀[8]ꦲꦸꦒꦶꦢꦶꦥꦸꦤ꧀ꦲꦁꦒꦂꦭꦗꦼꦁꦢꦶꦥꦸꦤ꧀ꦠꦸꦠꦸꦥ꧀ꦥꦶꦥꦔꦒꦼꦩ꧀ꦩꦤ꧀ꦤꦶꦥꦸꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦲꦮꦺꦴꦤ꧀꧈ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦢꦸꦩꦸꦒꦶꦲꦶꦁꦱꦥꦶꦁꦒꦶꦂꦫꦶꦁꦮꦤ꧉ꦱꦏꦶꦁꦏꦠꦼꦧꦶꦃꦲꦤ꧀ꦯꦁꦦꦿꦧꦸ Marc ꦏꦠꦶꦔꦭ꧀ꦫꦶꦤꦸꦧꦸꦁꦲꦶꦁꦥꦫꦧꦫꦺꦴꦤ꧀꧉ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦦꦿꦧꦸ Tristan꧇ Isolde꧈ꦏꦺꦏꦱꦶꦃꦏꦸꦭ꧈ꦯꦁꦦꦿꦧꦸꦱꦮꦢꦾꦧꦭꦤꦶꦥꦸꦤ꧀ꦲꦩꦥꦒ꧀ꦒꦏꦼꦤ꧀ꦝꦠꦼꦁꦏꦸꦭꦭꦤ꧀ꦱꦩ꧀ꦥꦺꦪꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦠꦼꦔꦃꦲꦶꦁꦲꦫꦲꦫꦔꦗꦼꦁꦥꦸꦤꦶꦏ꧈ꦱꦏꦼꦝꦥ꧀ꦩꦭꦶꦃꦏꦸꦭꦭꦤ꧀ꦱꦩ꧀ꦥꦺꦪꦤ꧀ꦧꦺꦴꦠꦼꦤ꧀ꦱꦒꦼꦢ꧀ꦉꦉꦩ꧀ꦧꦒ꧀ꦒꦤ꧀ꦩꦭꦶꦃ꧉ꦩꦸꦒꦶꦓꦸꦱ꧀ꦠꦶꦄꦭ꧀ꦭꦃꦏꦂꦱꦲꦲꦤꦼꦏ꧀ꦱꦺꦤꦶ꧈ꦱꦩ꧀ꦥꦺꦪꦤ꧀ꦏꦸꦭꦱꦸꦩ꧀ꦥꦃ꧈ꦲꦶꦁꦠꦼꦩ꧀ꦧꦺꦱꦩꦺꦴꦁꦱꦏꦸꦭꦔꦶꦤ꧀ꦠꦸꦤ꧀ꦤꦏꦼꦤ꧀ꦠꦶꦪꦁꦱꦺꦴꦮꦤ꧀ꦝꦠꦼꦁꦱꦩ꧀ꦥꦺꦪꦤ꧀꧈ꦩꦸꦒꦶꦱꦩ꧀ꦥꦺꦪꦤ꧀ꦏꦂꦱꦲꦲꦔ꧀ꦭꦩ꧀ꦥꦃꦲꦶꦲꦶꦁꦏꦁꦢꦢꦺꦴꦱ꧀ꦥꦤꦼꦝꦏꦸꦭ꧉ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀ꦱꦁꦥꦸꦠꦿꦶ꧇ꦝꦸꦃ꧈Tristan ꦏꦏꦱꦶꦃꦏꦸꦭ꧈ꦱꦩꦺꦴꦁꦱꦏꦸꦭꦤꦶꦔꦭ꧀ꦭꦶꦱꦸꦱꦸꦥꦺꦲꦶꦁꦏꦁꦲꦩꦿꦶꦥꦠ꧀ꦲꦶꦗꦼꦩ꧀ꦥꦸꦤꦶꦏ꧈ꦏꦸꦭꦧꦺꦴꦠꦼꦤ꧀ꦧꦝꦺꦲꦚꦶꦢꦿꦤ꧀ꦤꦶꦗꦁꦗꦶ꧉ꦠꦺꦩ꧀ꦧꦺꦴꦏ꧀ꦲꦶꦁꦏꦁꦱꦤ꧀ꦠꦺꦴꦱꦲꦸꦠꦮꦶꦏꦫꦠꦺꦴꦤ꧀ꦲꦶꦁꦏꦁꦏꦶꦤꦸꦧꦼꦁꦲꦶꦁꦧꦺꦠꦺꦁꦏꦸꦏꦸꦃ꧈ꦧꦺꦴꦠꦼꦤ꧀ꦧꦝꦺꦱꦒꦼꦢ꧀ꦲꦔꦭꦁꦲꦭꦁꦔꦶꦱꦼꦢꦾꦏꦸꦭ꧈ꦏꦸꦭꦠꦩ꧀ꦠꦸꦲꦔ꧀ꦭꦏ꧀ꦱꦤꦤ꧀ꦤꦶꦥꦸꦤꦥꦱꦥꦤꦼꦝꦱꦩ꧀ꦥꦺꦪꦤ꧀꧉ꦦꦿꦧꦸ Tristan ꦲꦔꦤ꧀ꦢꦶꦏꦩꦭꦶꦃ꧇O꧈ Isolde꧈ꦩꦸꦒꦶꦩꦸꦒꦶꦲꦶꦁꦏꦁꦩꦲꦏꦮꦱꦲꦔꦶꦗꦧꦃꦲꦤꦱꦼꦢꦾꦱꦩ꧀ꦥꦺꦪꦤ꧀ꦲꦶꦁꦏꦁꦤꦤ꧀ꦝꦏ꧀ꦲꦏꦼꦤ꧀ꦏꦱꦼꦠꦾꦤ꧀ꦱꦩ꧀ꦥꦺꦪꦤ꧀ꦥꦸꦤꦶꦏ꧉
꧋ꦭꦩ꧀ꦥꦃꦲꦶꦁꦏꦥꦭ꧀ꦭꦶꦥꦸꦤ꧀ꦗꦺꦗꦺꦂꦕꦏꦼꦠ꧀꧉ꦯꦁꦥꦸꦠꦿꦶꦭꦗꦼꦁꦏꦠꦫꦶꦏ꧀ꦫꦥꦼꦠ꧀ꦱꦔꦼꦠ꧀ꦭꦗꦼꦁꦫꦫꦁꦏꦸꦭ꧀ꦭꦤ꧀꧉ꦯꦁꦥꦸꦠꦿꦶꦔꦤ꧀ꦢꦶꦏ꧇ꦱꦝꦺꦫꦺꦏ꧀꧈ꦥꦤꦸꦮꦸꦤ꧀ꦏꦸꦭꦱꦩ꧀ꦥꦺꦪꦤ꧀ꦱꦩ꧀ꦥꦸꦤ꧀ꦲꦺꦁꦒꦭꦺꦁꦒꦭ꧀ꦲꦤꦶꦭꦂꦤꦒꦫꦶ Cornwallis꧉ꦱꦩ꧀ꦥꦺꦪꦤ꧀ꦲꦼꦤ꧀ꦠꦺꦴꦱ꧀ꦱꦶꦱꦮꦠꦮꦶꦱ꧀ꦢꦶꦤ꧀ꦠꦼꦤ꧀ꦩꦭꦶꦃ꧈ꦱꦸꦥꦢꦺꦴꦱ꧀ꦱꦩ꧀ꦥꦺꦪꦤ꧀ꦲꦚꦸꦩꦼꦉꦥ꧀ꦥꦶꦏꦢꦺꦴꦱ꧀ꦥꦸꦤ꧀ꦢꦶꦥꦔꦽꦁꦏꦸꦃꦲꦶꦥꦸꦤ꧀ꦱꦁꦤꦠꦝꦠꦼꦁꦏꦸꦭ꧉ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶꦏꦸꦭꦥꦶꦪꦩ꧀ꦧꦏ꧀ꦏꦤ꧀꧈ꦏꦸꦭꦲꦗꦿꦶꦃꦝꦠꦼꦁꦠꦶꦠꦶꦪꦁꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦥꦸꦤꦶꦏ꧉ꦩꦤꦮꦶꦱꦩ꧀ꦥꦺꦪꦤ꧀ꦲꦺꦁꦒꦭꦺꦁꦒꦭ꧀ꦏꦺꦱꦃ꧈ꦱꦶꦤ꧀ꦠꦼꦤ꧀ꦲꦶꦁꦏꦁꦧꦝꦺꦩꦶꦠꦸꦭꦸꦁꦔꦶꦏꦸꦭ꧈ꦩꦤꦮꦶꦏꦸꦭꦩꦁꦒꦶꦃꦧꦧꦪ꧉ꦩꦤ꧀ꦠꦿꦶꦮꦤ Orri ꦠꦩ꧀ꦠꦸꦥꦸꦫꦸꦤ꧀ꦏꦁꦒꦺꦤ꧀ꦤꦤ꧀ꦱꦩ꧀ꦥꦺꦪꦤ꧀ꦲꦶꦁꦒꦿꦶꦪꦤꦶꦥꦸꦤ꧀꧈ꦱꦂꦠꦲꦚꦸꦏꦤ꧀ꦤꦶꦥꦥꦤ꧀ꦥꦤ꧀ꦝꦼꦭꦶꦏ꧀ꦏꦤ꧀꧈ꦩꦁꦏꦺꦢꦭꦸꦱꦩ꧀ꦥꦺꦪꦤ꧀ꦫꦮꦸꦃꦲꦶꦁꦒꦸꦝꦁꦱꦸꦮꦸꦁꦲꦶꦁꦏꦁꦱꦩ꧀ꦥꦸꦤ꧀ꦫꦶꦱꦏ꧀꧈ꦏꦸꦭꦧꦝꦺꦏꦺꦁꦏꦺꦤ꧀ꦤꦤ꧀ꦥꦸꦤ꧀ Pirinis ꦔꦠꦸꦂꦫꦶꦱꦸꦩꦼꦉꦥ꧀꧈ꦥꦸꦤꦥ[9]ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦲꦮꦺꦴꦤ꧀ꦥꦔꦽꦁꦏꦸꦃꦲꦶꦥꦸꦤ꧀ꦝꦠꦼꦁꦏꦸꦭꦥꦸꦤꦥꦧꦺꦴꦠꦼꦤ꧀꧉ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦦꦿꦧꦸ Tristan꧇ꦩꦶꦠꦿ꧈ꦥꦤ꧀ꦢꦸꦒꦶꦏꦸꦭꦧꦝꦺꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦮꦤꦶꦱꦸꦩꦼꦗꦲꦮꦺꦴꦤ꧀ꦝꦠꦼꦁꦱꦩ꧀ꦥꦺꦪꦤ꧀꧈ꦩꦤꦮꦶꦮꦺꦴꦤ꧀ꦠꦼꦤ꧀ꦤ꧈ꦠꦶꦪꦁꦮꦲꦸꦠꦩ꧀ꦠꦸꦧꦝꦺꦲꦺꦁꦒꦭ꧀ꦤꦩ꧀ꦥꦺꦤ꧀ꦤꦶꦥꦶꦠꦸꦮꦱ꧀ꦱꦶꦁꦏꦭꦏꦸꦮꦤ꧀ꦤꦶꦥꦸꦤ꧀꧈ꦥꦿꦩꦶꦭꦏꦸꦭꦱꦒꦃꦱꦶꦱꦶꦔꦶꦢ꧀ꦢꦤ꧀ꦲꦶꦁꦒꦿꦶꦪꦤ꧀ꦤꦶꦥꦸꦤ꧀ Orri ꦱꦮꦠꦮꦶꦱ꧀ꦢꦶꦤ꧀ꦠꦼꦤ꧀ꦭꦩꦶꦤꦶꦥꦸꦤ꧀꧉ꦱꦉꦁꦭꦩ꧀ꦥꦃꦲꦶꦥꦸꦤ꧀ꦦꦿꦧꦸ Marc ꦱꦮꦢꦾꦧꦭꦤꦶꦥꦸꦤ꧀ꦲꦶꦁꦏꦁꦲꦩꦥꦒ꧀ꦒꦏꦼꦤ꧀ꦝꦠꦼꦁꦔꦶꦥꦸꦤ꧀ꦦꦿꦧꦸ Tristan ꦠꦸꦮꦶꦤ꧀ꦱꦁꦦꦿꦩꦺꦱ꧀ꦮꦫꦶꦮꦲꦸꦱꦩ꧀ꦥꦸꦤ꧀ꦕꦏꦼꦠ꧀꧈ꦭꦗꦼꦁꦱꦩꦶꦱꦸꦏꦲꦸꦂꦩꦠ꧀꧉ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde ꦲꦶꦁꦒꦶꦃꦭꦗꦼꦁꦩꦁꦱꦸꦭ꧀ꦭꦶꦲꦸꦂꦩꦠ꧀꧉ꦭꦩ꧀ꦥꦃꦲꦶꦁꦠꦶꦠꦶꦃꦲꦤ꧀ꦤꦶꦥꦸꦤ꧀ꦱꦁꦤꦠꦲꦔꦿꦸꦩꦶꦪꦶꦤ꧀ꦤꦶꦭꦩ꧀ꦥꦃꦲꦶꦁꦠꦸꦩ꧀ꦥꦏ꧀ꦏꦤ꧀ꦤꦶꦥꦸꦤ꧀ꦥꦫꦧꦫꦺꦴꦤ꧀꧈ꦮꦠꦮꦶꦱ꧀ꦱꦥꦩ꧀ꦧꦤ꧀ꦝꦶꦭ꧀꧉ꦤꦩꦸꦁꦏꦝꦺꦫꦺꦏ꧀ꦲꦏꦼꦤ꧀ꦢꦺꦤꦶꦁꦧꦫꦺꦴꦤ꧀ Dinas ꦲꦶꦁ Lidan꧉ꦱꦉꦁꦥꦫꦧꦫꦺꦴꦤ꧀ꦱꦩ꧀ꦥꦸꦤ꧀ꦲꦚꦏꦼꦠ꧀ꦠꦶꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦦꦿꦧꦸ Tristan꧈ꦦꦿꦧꦸ Tristan ꦤꦸꦤ꧀ꦠꦼꦤ꧀ꦲꦔꦸꦂꦩꦠ꧀ꦠꦶꦯꦁꦦꦿꦧꦸ꧉ꦏꦭꦪꦤ꧀ꦲꦚꦼꦥꦼꦁꦔꦶꦭꦶꦱ꧀ꦱꦶꦁꦠꦶꦠꦶꦃꦲꦤ꧀ꦤꦶꦥꦸꦤ꧀ꦱꦁꦥꦸꦠꦿꦶꦦꦿꦧꦸ Tristan ꦤꦸꦤ꧀ꦠꦼꦤ꧀ꦩꦠꦸꦂꦲꦶꦁꦯꦁꦤꦡ꧇ꦯꦁꦦꦿꦧꦸ꧈ꦏꦮꦸꦭꦔꦠꦸꦂꦫꦏꦼꦤ꧀ꦱꦁꦦꦿꦩꦺꦱ꧀ꦮꦫꦶ꧉ꦢꦶꦥꦸꦤ꧀ꦱꦏ꧀ꦱꦺꦤ꧀ꦤꦤꦢꦺꦤꦶꦁꦥꦫꦧꦫꦺꦴꦤ꧀ꦠꦸꦮꦶꦤ꧀ꦥꦫꦱꦠꦿꦶꦪꦲꦶꦁ Cornwallis ꦱꦢꦪ꧈ꦏꦮꦸꦭꦚꦸꦮꦸꦤ꧀ꦲꦶꦢꦶꦥꦢꦸꦏ꧈ꦲꦩ꧀ꦧꦺꦭꦤ꧀ꦤꦶꦏꦭꦸꦲꦸꦂꦫꦤ꧀ꦤꦶꦁꦏꦫꦠꦺꦴꦤ꧀ꦥꦢꦸꦏ꧈ꦲꦩꦂꦒꦶꦥꦿꦏꦮꦶꦱ꧀ꦥꦤ꧀ꦢꦏ꧀ꦮꦲꦮꦺꦴꦤ꧀ꦝꦠꦼꦁꦏꦮꦸꦭꦲꦶꦁꦏꦁꦩꦒꦼꦥꦺꦴꦏ꧀ꦏꦤ꧀ꦏꦭꦶꦪꦤ꧀ꦲꦶꦱꦺꦤꦶꦁꦏꦫꦠꦺꦴꦤ꧀ꦥꦢꦸꦏꦥꦸꦤꦶꦏ꧈ꦩꦤꦮꦶꦧꦺꦴꦠꦼꦤ꧀ꦏꦊꦉꦱ꧀ꦱꦤ꧀ꦥꦩꦫꦶꦏ꧀ꦱꦤ꧀ꦤꦶꦥꦸꦤ꧀꧈ꦏꦫꦠꦺꦴꦤ꧀ꦥꦢꦸꦏꦧꦝꦺꦥꦶꦏꦤ꧀ꦠꦸꦏ꧀ꦤꦩꦲꦮꦺꦴꦤ꧀꧉ꦏꦁꦒꦺꦲꦔꦶꦕꦭ꧀ꦭꦏꦼꦤ꧀ꦥꦤ꧀ꦢꦏ꧀ꦮꦲꦮꦺꦴꦤ꧀ꦮꦲꦸꦏꦮꦸꦭꦚꦸꦮꦸꦤ꧀ꦢꦶꦥꦸꦤ꧀ꦲꦧꦼꦤ꧀ꦥꦿꦁꦠꦤ꧀ꦝꦶꦁ꧈ꦩꦤꦮꦶꦏꦮꦸꦭꦏꦮꦺꦴꦤ꧀ꦏꦮꦸꦭꦱꦸꦩꦫꦃꦲꦶꦁꦏꦂꦱꦢꦶꦥꦸꦤ꧀ꦧꦼꦱ꧀ꦩꦶ꧈ꦩꦤꦮꦶꦏꦮꦸꦭꦲꦸꦁꦒꦸꦭ꧀ꦲꦶꦁꦗꦸꦫꦶꦠ꧀ꦩꦸꦒꦶꦥꦢꦸꦏꦏꦂꦱꦔꦧ꧀ꦢꦺꦏ꧀ꦲꦏꦼꦤ꧀ꦩꦭꦶꦃꦝꦠꦼꦁꦏꦮꦸꦭ꧉ꦩꦤꦮꦶꦥꦢꦸꦏꦧꦺꦴꦠꦼꦤ꧀ꦏꦂꦱꦔꦧ꧀ꦢꦺꦏ꧀ꦲꦏꦼꦤ꧀ꦩꦭꦶꦃꦝꦠꦼꦁꦏꦮꦸꦭ꧈ꦏꦮꦸꦭꦧꦝꦺꦏꦺꦱꦃꦝꦠꦼꦁꦤꦒꦫꦶꦱꦤꦺꦱ꧀꧉
꧋ꦏꦕꦫꦶꦪꦺꦴꦱ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦧꦫꦺꦴꦤ꧀ꦱꦠꦸꦁꦒꦶꦭ꧀ꦠꦸꦁꦒꦶꦭ꧀ꦭꦲꦶꦁꦏꦁꦮꦤꦶꦲꦔ꧀ꦭꦢꦺꦴꦱ꧀ꦱꦶꦥꦤꦤ꧀ꦠꦁꦔꦶꦥꦸꦤ꧀ꦦꦿꦧꦸ Tristan ꦮꦲꦸ꧉ꦯꦁꦤꦠꦭꦗꦼꦁꦚꦤ꧀ꦝꦏ꧀ꦲꦥꦸꦱ꧀ꦱꦶꦁꦠꦶꦠꦶꦃꦲꦤ꧀ꦤꦶꦥꦸꦤ꧀ꦱꦁꦥꦸꦠꦿꦶ꧈ꦤꦸꦤ꧀ꦠꦼꦤ꧀ꦏꦥꦱꦿꦃꦲꦏꦼꦤ꧀ꦝꦠꦼꦁꦧꦫꦺꦴꦤ꧀ Dinas ꦲꦶꦁꦭꦶꦝꦤ꧀꧈ꦱꦸꦥꦢꦺꦴꦱ꧀ꦢꦶꦥꦸꦤ꧀ꦗꦒꦶꦱꦂꦠꦢꦶꦥꦸꦤ꧀ꦭꦢꦺꦴꦱ꧀ꦱꦶꦱꦥꦼꦂꦭꦸꦤꦶꦥꦸꦤ꧀꧉ꦢꦺꦤꦺꦯꦁꦤꦠꦲꦚꦏꦼꦠ꧀ꦠꦶꦧꦫꦺꦴꦤ꧀ꦧꦫꦺꦴꦤ꧀ꦏꦭꦺꦫꦺꦃꦲꦤ꧀ꦤꦶꦥꦸꦤ꧀꧈ꦥꦼꦂꦭꦸꦧꦝꦩꦶꦏꦠꦩ꧀ꦥꦶꦲꦸꦠꦮꦶꦧꦺꦴꦠꦼꦤ꧀ꦤꦶꦥꦸꦤ꧀ꦦꦿꦧꦸ Tristan ꦧꦝꦺꦱꦸꦮꦶꦠꦩꦭꦶꦃꦝꦠꦼꦁꦯꦁꦤꦠꦥꦸꦤꦶꦏ꧉ꦯꦁꦦꦿꦩꦺꦱ꧀ꦮꦫꦶꦢꦶꦥꦸꦤ꧀ꦲꦸꦂꦩꦠ꧀ꦠꦶꦢꦺꦤꦶꦁꦧꦫꦺꦴꦤ꧀ Dinas ꦏꦭꦪꦤ꧀ꦧꦶꦔꦃꦲꦶꦁꦩꦤꦃ꧉ꦥꦔꦽꦁꦏꦸꦃꦲꦶꦥꦸꦤ꧀ꦧꦺꦴꦠꦼꦤ꧀ꦲꦺꦮꦃꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦱꦩ꧀ꦥꦸꦤ꧀꧉ꦩꦏꦠꦼꦤ꧀ꦲꦸꦒꦶꦥꦫꦧꦫꦺꦴꦤ꧀ꦱꦤꦺꦱ꧀ꦱꦶꦥꦸꦤ꧀ꦠꦸꦮꦶꦤ꧀ꦥꦫꦥꦸꦠꦿꦶꦤꦶꦁꦧꦺꦴꦁꦱꦭꦸꦲꦸꦂꦲꦶꦁ Cornwallis꧉ꦱꦉꦁꦯꦁꦦꦿꦩꦺꦱ꧀ꦮꦫꦶꦭꦸꦏꦂꦩꦤ꧀ꦠꦼꦭ꧀ꦱꦁꦱꦪꦏꦠꦶꦔꦭ꧀ꦭꦁꦏꦸꦁ
