ꦲꦺꦤ꧀ꦢꦃꦮꦂꦤꦶꦤꦶꦥꦸꦤ꧀꧉ꦯꦁꦥꦸꦠꦿꦶꦩꦺꦱꦼꦩ꧀꧈ꦲꦺꦔꦼꦠ꧀ꦝꦠꦼꦁꦏꦾꦲꦶ Ogrin ꦲꦶꦁꦏꦁꦱꦩ꧀ꦥꦸꦤ꧀ꦲꦤꦸꦩ꧀ꦧꦱ꧀ꦱꦏꦼꦤ꧀ꦲꦒꦼꦩ꧀ꦲꦒꦼꦩ꧀ꦩꦤ꧀ꦤꦶꦥꦸꦤ꧀ꦥꦸꦤꦶꦏ꧉ꦱꦉꦁꦧꦫꦺꦴꦤ꧀ꦧꦫꦺꦴꦤ꧀ꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦮꦲꦸꦱꦸꦩꦼꦉꦥ꧀ꦧꦶꦭꦶꦃꦯꦁꦥꦸꦠꦿꦶꦢꦶꦥꦸꦤ꧀ꦲꦸꦂꦩꦠ꧀ꦠꦶꦱꦂꦠꦢꦶꦥꦸꦤ꧀ꦠꦽꦱ꧀ꦤꦤ꧀ꦤꦶꦢꦺꦤꦶꦁꦠꦶꦪꦁꦏꦛꦃꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦱꦩ꧀ꦥꦸꦤ꧀꧈ꦱꦩꦶꦱꦏꦭꦁꦏꦸꦁꦤꦼꦥ꧀ꦱꦸꦱꦔꦼꦠ꧀ꦱꦂꦠꦱꦏꦶꦠ꧀ꦩꦤꦃꦲꦶꦥꦸꦤ꧀꧈ꦭꦗꦼꦁꦚꦏꦼꦠ꧀ꦠꦶꦝꦠꦼꦁꦯꦁꦦꦿꦧꦸ꧉ꦏꦭꦱꦩꦤ꧀ꦠꦼꦤ꧀ꦱꦁꦦꦿꦧꦸꦱꦮꦼꦒ꧀ꦲꦶꦩ꧀ꦧꦭ꧀ꦮꦕꦤꦏꦭꦶꦪꦤ꧀ꦧꦫꦺꦴꦤ꧀ Andre ꦲꦶꦁ Nicole꧉ꦧꦫꦺꦴꦤ꧀ Andre ꦩꦠꦸꦂ꧇ꦓꦸꦱ꧀ꦠꦶ꧈ꦩꦸꦒꦶꦥꦢꦸꦏꦏꦂꦱꦲꦔꦧ꧀ꦢꦺꦏ꧀ꦲꦏꦼꦤ꧀ꦩꦭꦶꦃꦝꦠꦼꦁ Tristan꧉ꦩꦤꦮꦶ Tristan ꦠꦼꦠꦼꦥ꧀ꦲꦱꦸꦮꦶꦠꦲꦶꦁꦥꦢꦸꦏ꧈ꦏꦫꦠꦺꦴꦤ꧀ꦥꦢꦸꦏꦧꦝꦺꦢꦶꦥꦸꦤ꧀ꦲꦗꦿꦶꦃꦲꦶꦢꦺꦤꦶꦁꦥꦫꦫꦗꦱꦤꦺꦱ꧀ꦱꦶꦥꦸꦤ꧀꧉ꦮꦲꦸꦤꦶꦥꦸꦤ꧀ꦱꦁꦦꦿꦧꦸꦧꦝꦺꦏꦂꦱꦩꦶꦠꦸꦫꦸꦠ꧀ꦠꦶꦲꦠꦸꦂꦫꦶꦥꦸꦤ꧀ꦧꦫꦺꦴꦤ꧀ Andre ꦮꦲꦸ꧉ꦤꦔꦶꦁꦭꦗꦼꦁꦢꦶꦥꦸꦤ꧀ꦲꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶꦢꦺꦤꦶꦁꦧꦫꦺꦴꦤ꧀ꦧꦫꦺꦴꦤ꧀ꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦥꦸꦤꦶꦏ꧈ꦲꦠꦸꦂꦫꦶꦥꦸꦤ꧀꧇ꦯꦁꦦꦿꦧꦸ꧈ꦥꦢꦸꦏꦩꦸꦒꦶꦏꦂꦱꦲꦲꦤ꧀ꦝꦲꦂꦲꦠꦸꦂꦏꦮꦸꦭ꧉ꦊꦉꦱ꧀ꦕꦕꦿꦶꦪꦺꦴꦱ꧀ꦱꦤ꧀ꦲꦶꦁꦏꦁꦲꦔꦮꦺꦴꦤ꧀ꦲꦮꦺꦴꦤ꧀ꦠꦸꦩꦿꦥ꧀ꦱꦁꦥꦸꦠꦿꦶꦫꦸꦩꦶꦪꦶꦤ꧀ꦥꦸꦤꦶꦏꦕꦫꦶꦪꦺꦴꦱ꧀ꦔꦪꦮꦫ꧈ꦲꦤꦔꦶꦁꦩꦤꦮꦶꦯꦁꦦꦿꦩꦺꦱ꧀ꦮꦫꦶꦠꦸꦮꦶꦤ꧀ Tristan ꦏꦼꦩ꧀ꦥꦭ꧀ꦩꦭꦶꦃꦮꦺꦴꦤ꧀ꦠꦼꦤ꧀ꦲꦶꦁꦏꦫꦠꦺꦴꦤ꧀꧈ꦱꦲꦺꦱ꧀ꦠꦸꦧꦝꦺꦮꦺꦴꦤ꧀ꦠꦼꦤ꧀ꦕꦕꦿꦶꦪꦺꦴꦱ꧀ꦱꦤ꧀ꦲꦮꦺꦴꦤ꧀ꦩꦭꦶꦃ꧉ꦥꦿꦩꦶꦭꦭꦁꦏꦸꦁꦱꦲꦺ Tristan ꦧꦺꦴꦠꦼꦤ꧀ꦥꦢꦸꦏꦲꦧ꧀ꦢꦺꦏ꧀ꦲꦏꦼꦤ꧀꧈ꦱꦸꦥꦢꦺꦴꦱ꧀ꦲꦺꦁꦒꦭ꧀ꦏꦺꦱꦃꦱꦏꦶꦁꦤꦒꦫꦶꦔꦿꦶꦏꦶ꧉ꦲꦶꦁꦠꦼꦩ꧀ꦧꦺꦩꦤꦮꦶꦥꦼꦂꦭꦸꦥꦢꦸꦏꦱꦒꦼꦢ꧀ꦤꦶꦩ꧀ꦧꦭ꧀ꦭꦶꦩꦭꦶꦃꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀꧉ꦱꦠꦼꦩꦃꦯꦁꦤꦠꦲꦔ꧀ꦭꦏ꧀ꦱꦤꦤ꧀ꦤꦶꦥꦤꦸꦮꦸꦤ꧀ꦤꦶꦥꦸꦤ꧀ꦧꦫꦺꦴꦤ꧀ꦠꦶꦠꦶꦒꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦥꦸꦤꦶꦏ꧈ꦤꦸꦤ꧀ꦠꦼꦤ꧀ꦝꦮꦸꦃꦝꦠꦼꦁꦥꦫꦧꦫꦺꦴꦤ꧀ꦱꦸꦥꦢꦺꦴꦱ꧀ Tristan ꦏꦝꦮꦸꦃꦲꦤ꧀ꦲꦺꦁꦒꦭ꧀ꦏꦺꦱꦃ꧉ꦦꦿꦧꦸ Tristan ꦭꦗꦼꦁꦚꦏꦼꦠ꧀ꦠꦶꦯꦁꦦꦿꦩꦺꦱ꧀ꦮꦫꦶ꧈ꦲꦥꦩꦶꦠ꧀ꦠꦤ꧀꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦭꦗꦼꦁꦏꦢꦔꦸꦢꦺꦤꦶꦁꦯꦁꦤꦠ꧈ꦩꦂꦒꦶꦯꦁꦤꦠꦮꦼꦭꦱ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀꧈ꦥꦔꦤ꧀ꦢꦶꦏꦤꦶꦥꦸꦤ꧀꧇ Tristan꧈ꦱꦶꦫꦧꦏꦭ꧀ꦭꦸꦔꦩꦫꦁꦔꦼꦤ꧀ꦢꦶ꧉ꦥꦔꦁꦒꦺꦴꦤ꧀ꦤꦶꦫꦮꦶꦱ꧀ꦥꦝꦭꦸꦮꦱ꧀ꦧꦔꦼꦠ꧀꧈ꦩꦸꦭꦤꦺꦱꦢꦸꦫꦸꦁꦔꦺꦩꦁꦏꦠ꧀ꦲꦚ꧀ꦗꦸꦥꦸꦏ꧀ꦏꦱꦭꦶꦤ꧀ꦥꦔꦁꦒꦺꦴꦝꦶꦱꦶꦏ꧀ꦩꦼꦚꦁꦲꦶꦁꦏꦫꦠꦺꦴꦤ꧀ꦲꦶꦁꦱꦸꦤ꧀꧈ꦱꦂꦠꦲꦁꦒꦮꦲꦲꦼꦩꦱ꧀ꦭꦤ꧀ꦥꦺꦫꦏ꧀ꦱꦏꦉꦥ꧀ꦩꦸ꧈ꦒꦶꦤꦮꦺꦱꦔꦸ꧉ꦦꦿꦧꦸ Tristan ꦲꦩꦁꦱꦸꦭ꧀ꦭꦶ꧇ꦯꦁꦦꦿꦧꦸ꧈ꦏꦮꦸꦭꦧꦺꦴꦠꦼꦤ꧀ꦧꦝꦺꦩꦼꦤ꧀ꦝꦼꦠ꧀ꦥꦸꦤꦥꦥꦸꦤꦥꦱꦏꦶꦁꦲꦶꦁꦒꦼꦝꦺꦴꦁꦫꦗꦧꦫꦤꦥꦢꦸꦏ꧉ꦏꦭꦪꦤ꧀ꦥꦔꦁꦒꦺꦠꦸꦮꦶꦤ꧀ꦧꦫꦁꦧꦫꦁꦒꦝꦃꦲꦤ꧀ꦏꦮꦸꦭꦥꦶꦪꦩ꧀ꦧꦏ꧀ꦱꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦏꦮꦸꦭꦧꦝꦺꦏꦺꦱꦃꦝꦠꦼꦁ Friesland꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦩꦠꦸꦂꦩꦏꦠꦼꦤ꧀ꦦꦿꦧꦸ Tristan ꦲꦔꦶꦔꦼꦂꦫꦏꦼꦤ꧀ꦠꦶꦠꦶꦃꦲꦤ꧀ꦤꦶꦥꦸꦤ꧀ꦭꦗꦼꦁꦏꦱꦤ꧀ꦢꦼꦂꦫꦏꦼꦤ꧀ꦝꦠꦼꦁꦥꦱꦶꦱꦶꦂ꧉ꦯꦁꦦꦿꦩꦺꦱ꧀ꦮꦫꦶꦲꦁꦒꦺꦤ꧀ꦤꦶꦥꦸꦤ꧀ꦲꦩꦿꦶꦏ꧀ꦱꦤ꧀ꦤꦶꦝꦠꦼꦁꦦꦿꦧꦸ Tristan ꦧꦺꦴꦠꦼꦤ꧀ꦤꦺꦴꦭꦶꦃꦤꦺꦴꦭꦶꦃ꧈ꦔꦤ꧀ꦠꦺꦴꦱ꧀ꦦꦿꦧꦸ Tristan ꦧꦺꦴꦠꦼꦤ꧀ꦏꦠꦶꦔꦭ꧀꧉ꦲꦶꦁꦔꦶꦁꦒꦶꦭ꧀ꦱꦩ꧀ꦥꦸꦤ꧀ꦏꦕꦫꦶꦪꦺꦴꦱ꧀ꦱꦏꦼꦤ꧀ꦧꦶꦭꦶꦃꦲꦶꦁꦢꦶꦤ꧀ꦠꦼꦤ꧀ꦥꦸꦤꦶꦏꦲꦶꦁꦲꦫꦲꦫꦮꦲꦸꦏꦼꦧꦏ꧀ꦠꦶꦪꦁ꧈ꦗꦭꦂꦫꦤ꧀ꦱꦢꦪꦠꦶꦪꦁꦲꦶꦁꦱꦊꦧꦼꦠ꧀ꦠꦶꦁꦏꦶꦛ꧈ꦗꦊꦂꦲꦺꦱ꧀ꦠꦿꦶ꧈ꦱꦼꦥꦸꦃꦲꦤꦺꦩ꧀꧈ꦱꦩꦶꦩꦼꦂꦭꦺꦴꦏ꧀ꦲꦏꦼꦤ꧀ꦩꦥꦒ꧀ꦫꦮꦸꦃꦲꦶꦥꦸꦤ꧀ꦱꦁꦦꦿꦩꦺꦱ꧀ꦮꦫꦶꦏꦤ꧀ꦛꦶꦧꦶꦔꦃꦧꦶꦔꦃ꧉ꦲꦤꦔꦶꦁꦧꦶꦔꦃꦲꦶꦥꦸꦤ꧀ꦮꦲꦸꦏꦮꦺꦴꦂꦫꦤ꧀ꦱꦶꦱꦃ꧈ꦩꦂꦒꦶꦦꦿꦧꦸ Tristan ꦧꦺꦴꦠꦼꦤ꧀ꦢꦶꦥꦸꦤ꧀ꦠꦩ꧀ꦥꦶꦥꦤꦸꦮꦸꦤꦤ꧀ꦤꦶꦥꦸꦤ꧀ꦔꦧ꧀ꦢꦶꦩꦭꦶꦃꦢꦺꦤꦶꦁꦯꦁꦤꦠ꧉ꦯꦁꦤꦠꦱꦮꦢꦾꦧꦭꦤꦶꦥꦸꦤ꧀ꦭꦗꦼꦁꦏꦺꦴꦤ꧀ꦢꦸꦂꦝꦠꦼꦁꦲꦶꦁꦏꦶꦛ꧉ꦭꦺꦴꦚ꧀ꦕꦺꦁꦭꦺꦴꦚ꧀ꦕꦺꦁꦲꦶꦁꦒꦫꦺꦗꦢꦶꦥꦸꦤ꧀ꦠꦧꦸꦃꦧꦺꦴꦠꦼꦤ꧀ꦏꦼꦤ꧀ꦝꦠ꧀ꦏꦼꦤ꧀ꦝꦠ꧀ꦩꦶꦤꦺꦴꦁꦏꦥꦏꦸꦂꦩꦠ꧀ꦠꦤ꧀꧉ꦩꦂꦒꦶꦩꦂꦒꦶꦲꦶꦁꦏꦁꦢꦶꦥꦸꦤ꧀ꦭꦁꦏꦸꦁꦔꦶꦱꦁꦤꦠꦠꦸꦮꦶꦤ꧀ꦱꦁꦦꦿꦩꦺꦱ꧀ꦮꦫꦶ꧈ꦱꦮꦢꦾꦧꦭꦤꦶꦥꦸꦤ꧀ꦮꦲꦸꦱꦩꦶꦫꦶꦤꦼꦁꦒꦉꦁꦒꦱꦲꦺ꧈ꦱꦂꦠꦱꦶꦤꦮꦸꦂꦫꦤ꧀ꦲꦶꦁꦱꦼꦏꦂ꧉ꦱꦢꦪꦠꦶꦪꦁꦗꦊꦂꦲꦺꦱ꧀ꦠꦿꦶ꧈ꦱꦼꦥꦸꦃꦲꦤꦺꦩ꧀꧈ꦱꦸꦒꦶꦃꦩꦶꦱ꧀ꦏꦶꦤ꧀꧈ꦏꦥꦉꦁꦭꦸꦩꦼꦧꦼꦠ꧀ꦲꦶꦁꦏꦫꦠꦺꦴꦤ꧀꧈ꦲꦤ꧀ꦝꦺꦫꦺꦏ꧀ꦱꦸꦏꦤ꧀ꦱꦸꦏꦤ꧀꧉ꦲꦶꦁꦢꦶꦤ꧀ꦠꦼꦤ꧀ꦥꦸꦤꦶꦏꦯꦁꦤꦠꦲꦩꦂꦢꦶꦏꦏ꧀ꦲꦏꦼꦤ꧀ꦲꦧ꧀ꦢꦶꦠꦸꦩ꧀ꦧꦱ꧀ꦱꦤ꧀ꦱꦠꦸꦱ꧀꧈ꦠꦸꦮꦶꦤ꧀ꦲꦚ꧀ꦗꦸꦚ꧀ꦗꦸꦁꦧꦺꦴꦁꦱꦤꦺꦤ꧀ꦤꦺꦩ꧀ꦩꦤ꧀ꦥꦫꦥꦸꦠꦿꦤꦶꦁꦱꦠꦿꦶꦪꦏꦭꦶꦃꦢꦱ꧉ꦏꦢꦢꦺꦴꦱ꧀ꦱꦏꦼꦤ꧀ꦱꦠꦿꦶꦪ꧈ꦱꦲꦏꦥꦫꦶꦁꦔꦤ꧀ꦥꦼꦝꦁꦠꦸꦮꦶꦤ꧀ꦥꦔꦁꦒꦺꦏꦱꦠꦿꦶꦪꦤ꧀꧉
꧋ꦏꦕꦫꦶꦪꦺꦴꦱ꧀ꦢꦭꦸꦤꦶꦥꦸꦤ꧀ꦦꦿꦧꦸ Tristan ꦫꦮꦸꦃꦲꦶꦁꦒꦿꦶꦪꦤ꧀ꦤꦶꦥꦸꦤ꧀ꦩꦤ꧀ꦠꦿꦶꦮꦤ Orri ꦱꦫꦤꦝꦼꦝꦼꦩꦶꦠ꧀ꦠꦤ꧀꧈ꦱꦂꦠꦢꦶꦥꦸꦤ꧀ꦲꦠꦸꦂꦫꦶꦱꦶꦔꦶꦢ꧀ꦢꦤ꧀ꦲꦶꦁꦱꦊꦧꦼꦠ꧀ꦠꦶꦁꦒꦸꦝꦁꦱꦸꦮꦸꦁ꧈ꦲꦶꦁꦏꦁꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦲꦁꦒꦺ꧉ꦩꦸꦒꦶꦩꦸꦒꦶꦥꦫꦧꦫꦺꦴꦤ꧀ꦲꦶꦁꦏꦁꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦱꦩꦶꦲꦔꦠꦺꦴꦱ꧀ꦲꦠꦺꦴꦱ꧀ꦲꦚ꧀ꦗꦒꦶꦏꦮꦶꦭꦸꦗꦼꦁꦔꦤ꧀ꦤꦶꦁꦱꦫꦶꦫꦤꦶꦥꦸꦤ꧀꧉
꧇꧑꧒꧇
꧋ꦯꦁꦦꦿꦩꦺꦱ꧀ꦮꦫꦶꦢꦶꦥꦸꦤ꧀ꦱꦸꦩ꧀ꦥꦃ
꧋ꦏꦕꦫꦶꦪꦺꦴꦱ꧀꧈ꦧꦫꦺꦴꦤ꧀ Denoalen꧈ Andret ꦠꦸꦮꦶꦤ꧀ Gondoine ꦱꦩ꧀ꦥꦸꦤ꧀ꦱꦩꦶꦧꦺꦴꦠꦼꦤ꧀ꦏꦸꦮꦠꦺꦴꦱ꧀ꦝꦠꦼꦁꦥꦩꦊꦱ꧀ꦱꦶꦥꦸꦤ꧀ꦦꦿꦧꦸ Tristan꧈ꦩꦂꦒꦶꦥꦫꦧꦫꦺꦴꦤ꧀ꦮꦲꦸꦱꦩꦶꦔꦶꦤ꧀ꦠꦼꦤ꧀ꦧꦶꦭꦶꦃꦦꦿꦧꦸ Tristan ꦱꦩ꧀ꦥꦸꦤ꧀ꦏꦺꦱꦃꦱꦏꦶꦁꦤꦒꦫꦶ Cornwallis꧉ꦲꦤꦸꦗꦸꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀ꦱꦁꦦꦿꦧꦸ Marc ꦠꦶꦤ꧀ꦢꦏ꧀ꦲꦩ꧀ꦧꦼꦧꦼꦝꦒ꧀ꦝꦠꦼꦁꦲꦶꦁꦮꦤ꧈ꦧꦫꦺꦴꦤ꧀ꦠꦶꦠꦶꦒꦮꦲꦸꦲꦶꦁꦒꦶꦃꦲꦤ꧀ꦝꦺꦫꦺꦏ꧀꧈ꦱꦂꦠꦱꦉꦁꦯꦁꦦꦿꦧꦸꦏꦊꦉꦱ꧀ꦱꦤ꧀ꦥꦶꦤꦸꦗꦸꦏꦺꦤ꧀ꦢꦼꦭ꧀ꦲꦩꦶꦉꦁꦔꦏꦼꦤ꧀ꦗꦸꦒꦸꦒ꧀ꦒꦶꦥꦸꦤ꧀ꦱꦒꦮꦺꦴꦤ꧀ꦥꦩ꧀ꦧꦸꦗꦼꦁꦔꦤ꧀꧈ꦭꦗꦼꦁꦱꦩꦶꦲꦚꦼꦭꦏ꧀ꦏꦶꦯꦁꦦꦿꦧꦸꦱꦂꦮꦶꦩꦠꦸꦂꦩꦏꦠꦼꦤ꧀꧇ꦓꦸꦱ꧀ꦠꦶ꧈ꦏꦭꦫꦸꦩꦶꦪꦶꦤ꧀ꦥꦢꦸꦏꦲꦤ꧀ꦝꦮꦃꦲꦏꦼꦤ꧀ꦲꦸꦏꦸꦩ꧀ꦩꦤ꧀ꦝꦠꦼꦁꦯꦁꦦꦿꦩꦺꦱ꧀ꦮꦫꦶꦧꦺꦴꦠꦼꦤ꧀ꦔꦁꦒꦺꦢꦶꦥꦸꦤ꧀ꦠꦶꦠꦶꦥꦫꦶꦏ꧀ꦱꦫꦸꦩꦶꦪꦶꦤ꧀ꦥꦿꦏꦮꦶꦱ꧀ꦱꦶꦥꦸꦤ꧀꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦱꦲꦺꦱ꧀ꦠꦸꦤꦶꦥꦸꦤ꧀ꦏꦶꦫꦁꦲꦢꦶꦭ꧀ꦱꦂꦠꦱꦶꦪꦱꦶꦪꦱꦔꦼꦠ꧀꧉ꦱꦩꦁꦏꦺꦥꦢꦸꦏꦥꦫꦶꦁꦥꦔꦥꦸꦤ꧀ꦠꦼꦤ꧀ꦝꦠꦼꦁꦯꦁꦦꦿꦩꦺꦱ꧀ꦮꦫꦶꦲꦶꦁꦒꦶꦃꦧꦺꦴꦠꦼꦤ꧀ꦔꦁꦒꦺꦢꦶꦥꦸꦤ꧀ꦠꦶꦠꦶꦥꦫꦶꦏ꧀ꦱꦫꦸꦩꦶꦪꦶꦤ꧀꧈ꦥꦸꦤꦥꦯꦁꦥꦸꦠꦿꦶꦠꦼꦩꦼꦤ꧀ꦧꦺꦴꦠꦼꦤ꧀ꦲꦁꦒꦝꦃꦲꦶꦢꦺꦴꦱꦲꦸꦠꦮꦶꦠꦼꦩꦼꦤ꧀ꦢꦺꦴꦱꦤꦶꦥꦸꦤ꧀꧉ꦥꦸꦤꦥꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦲꦶꦁꦒꦶꦃꦤꦩꦲꦢꦶꦭ꧀꧉ꦥꦿꦩꦶꦭꦩꦸꦒꦶꦮꦺꦴꦤ꧀ꦠꦼꦤ꧀ꦤꦏꦂꦱꦥꦢꦸꦏꦥꦫꦶꦁꦝꦮꦸꦃꦝꦠꦼꦁꦯꦁꦦꦿꦩꦺꦱ꧀ꦮꦫꦶ꧈ꦱꦸꦥꦢꦺꦴꦱ꧀ꦏꦂꦱꦲꦱꦸꦩ꧀ꦥꦃꦝꦠꦼꦁꦧꦭꦸꦁꦧꦭꦸꦁꦔꦶꦥꦸꦤ꧀ꦧꦺꦴꦁꦱꦏꦿꦩꦠ꧀ꦲꦶꦁꦏꦁꦩꦭꦠ꧀ꦠꦶꦥꦸꦤꦶꦏ꧈ꦱꦂꦠꦲꦔꦱ꧀ꦠꦠꦺꦴꦱꦤ꧀ꦲꦶꦁꦏꦁꦩꦼꦔꦔꦃ꧉ꦩꦤꦮꦶꦯꦁꦦꦿꦩꦺꦱ꧀ꦮꦫꦶꦱꦲꦺꦱ꧀ꦠꦸꦧꦺꦴꦠꦼꦤ꧀ꦢꦺꦴꦱ꧈ꦱꦤꦗꦤ꧀ꦔꦱ꧀ꦠꦲꦠꦺꦴꦱꦤ꧀ꦲꦶꦁꦏꦁꦩꦼꦔꦔꦃꦲꦶꦁꦒꦶꦃꦧꦺꦴꦠꦼꦤ꧀ꦧꦝꦺꦏꦿꦲꦺꦴꦱ꧀ꦥꦸꦤꦥꦥꦸꦤꦥ꧉ꦤꦩꦸꦁꦱꦸꦩ꧀ꦥꦃꦥꦸꦤꦶꦏꦲꦶꦁꦏꦁꦱꦒꦼꦢ꧀ꦔꦶꦕꦭ꧀ꦭꦏꦼꦤ꧀ꦥꦤ꧀ꦢꦏ꧀ꦮꦝꦠꦼꦁꦯꦁꦦꦿꦩꦺꦱ꧀ꦮꦫꦶꦮꦲꦸ꧉
꧋ꦯꦁꦦꦿꦧꦸꦢꦸꦏꦱꦔꦼꦠ꧀ꦩꦶꦉꦁꦔꦏꦼꦤ꧀ꦲꦠꦸꦂꦫꦶꦥꦸꦤ꧀ꦥꦫꦧꦫꦺꦴꦤ꧀ꦩꦏꦠꦼꦤ꧀ꦥꦸꦤꦶꦏ꧈ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀꧇ꦲꦺꦃ꧈ꦮꦺꦴꦁꦲꦭ꧈ꦩꦸꦒꦩꦸꦒꦦꦔꦺꦫꦤ꧀ꦲꦔ꧀ꦭꦼꦧꦸꦂꦫꦩꦫꦁꦱꦶꦫꦏꦧꦺꦃ꧉ꦱꦭꦮꦱ꧀ꦱꦺꦱꦶꦫꦠꦤ꧀ꦱꦃꦲꦩ꧀ꦧꦸꦢꦶꦢꦪꦲꦩꦼꦩꦶꦫꦁꦩꦫꦁꦥꦚ꧀ꦗꦼꦤꦼꦁꦔꦤ꧀ꦲꦶꦁꦱꦸꦤ꧀꧉ꦲꦶꦁꦱꦸꦤ꧀ꦮꦶꦱ꧀ꦲꦔ꧀ꦭꦏ꧀ꦱꦤ꧀ꦤꦤ꧀ꦤꦶꦥꦤꦸꦮꦸꦤ꧀ꦤꦶꦫꦱꦸꦥꦪ Tristan ꦲꦶꦁꦱꦸꦤ꧀ꦠꦸꦤ꧀ꦝꦸꦁꦱꦏꦤꦒꦫ Cornwallis꧈ꦱꦲꦶꦏꦶꦱꦶꦫꦥꦝꦢꦸꦮꦺꦥꦚ꧀ꦗꦭꦸꦏ꧀ꦩꦤꦺꦃꦏꦁꦲꦔ꧀ꦭꦸꦮꦶꦃꦲꦶꦱꦏꦩꦼꦱ꧀ꦛꦶ꧉ꦲꦥ Isolde ꦏꦸꦢꦸꦢꦶꦪꦸꦭꦶꦃꦲꦏꦺꦩꦫꦁꦲꦶꦁꦆꦂꦭꦤ꧀꧉ꦲꦥꦢꦺꦴꦱꦤꦺꦭꦤ꧀ꦲꦥꦏꦭꦸꦥꦸꦠ꧀ꦠꦤꦺꦩꦫꦁꦱꦶꦫꦏꦧꦺꦃ꧉ꦝꦺꦏ꧀ꦲꦤꦸꦲꦶꦏꦸTristan ꦏꦼꦥꦺꦔꦶꦁꦢꦶꦲꦼꦢꦸꦥꦼꦫꦁꦠꦤ꧀ꦝꦶꦁꦩꦶꦤꦺꦴꦁꦏꦠꦺꦴꦤ꧀ꦝꦪꦼꦏ꧀ꦠꦶ꧈ꦩꦤꦮꦝꦺꦮꦺꦏ꧀ꦏꦺꦲꦸꦠꦮ Isolde ꦲꦺꦴꦫꦢꦸꦮꦺꦢꦺꦴꦱ꧈ꦤꦔꦶꦁꦱꦶꦫꦥꦝꦩꦼꦤꦼꦁꦧꦲꦺ꧈ꦲꦺꦴꦫꦲꦤꦏꦁꦮꦤꦶꦲꦔ꧀ꦭꦢꦺꦤ꧀ꦤꦶꦥꦤꦤ꧀ꦠꦁꦔꦺ꧉
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)
