ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦆꦧꦿꦤꦶ/7

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦲꦶꦩꦩ꧀ꦒꦼꦢꦺ​ꦩꦺꦭ꧀ꦏꦶꦱꦼꦢꦺꦏ꧀꧈​

꧇​꧗꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦠꦏ꧀ꦏꦶꦫꦏꦺꦴꦮꦺ​ꦏꦧꦺꦃ​ꦔꦼꦂꦠꦶ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦱꦥ​꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦫꦠꦸꦤꦺ​ꦏꦸꦠꦱꦭꦺꦩ꧀ꦭꦤ꧀ꦲꦸꦒ​ꦢꦢꦶ​ꦲꦶꦩꦩ꧀ꦩꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧉​ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦩꦸꦭꦶꦃ​ꦱꦁꦏꦥꦺꦫꦁꦔꦤ꧀ꦭꦤ꧀ꦮꦶꦱ꧀ꦩꦼꦤꦁꦔꦏꦺꦫꦠꦸꦫꦠꦸ​꧈​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦩꦼꦠꦸꦮꦢꦺꦏ꧀ꦤꦺꦠꦼꦫꦸꦱ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦢꦺꦏ꧀ꦤꦺ꧉​ ²ꦧꦥ​ꦄꦨꦿꦲꦩ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦱꦏ꧀ꦥꦿꦱꦼꦥꦸꦭꦸꦃꦲꦤ꧀ꦤꦺ​ꦒꦮꦤꦺ​ꦱꦁꦏꦥꦼꦥꦼꦫꦁꦔꦤ꧀ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀꧈​ꦠꦼꦩ꧀ꦧꦸꦁ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦠꦼꦒꦼꦱ꧀ꦱꦺ​“ꦫꦠꦸꦤꦺ​ꦏꦧꦼꦤꦼꦂꦫꦤ꧀”ꦭꦤ꧀ꦗꦭꦂꦫꦤ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦫꦠꦸꦤꦺ​ꦏꦸꦠꦱꦭꦺꦩ꧀ꦭꦤ꧀ꦠꦼꦩ꧀ꦧꦸꦁ​ꦱꦭꦺꦩ꧀ꦏꦸꦮꦶ​ꦠꦼꦒꦼꦱ꧀ꦱꦺ​“ꦏꦠꦼꦤ꧀ꦠꦽꦩ꧀ꦩꦤ꧀”꧈​ꦢꦢꦶꦤꦺ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦲꦸꦒ​ꦠꦼꦒꦼꦱ꧀ꦱꦺ​“ꦫꦠꦸꦤꦺ​ꦏꦠꦼꦤ꧀ꦠꦽꦩ꧀ꦩꦤ꧀”꧉​ ³ꦧꦧ꧀ꦧꦥꦧꦶꦪꦸꦁꦔꦺ​ꦭꦤ꧀ꦱꦥ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦲꦺꦴꦫ​ꦏꦼꦠꦸꦭꦶꦱ꧀​ꦧ꧀ꦭꦱ꧀ꦤꦁꦏꦶꦠꦧ꧀ ꦱꦼꦩꦺꦴꦤꦺꦴ​ꦲꦸꦒ​ꦧꦧ꧀ꦭꦲꦶꦂꦫꦺ​ꦭꦤ꧀ꦥꦠꦶꦤꦺ​꧉​ꦲꦸꦒ​ꦲꦺꦴꦫ​ꦏꦼꦠꦸꦭꦶꦱ꧀​ꦧ꧀ꦭꦱ꧀ꦤꦺꦏ꧀ꦢꦺꦏ꧀ꦤꦺꦭꦺꦫꦺꦤ꧀ꦢꦢꦶ​ꦲꦶꦩꦩ꧀ꦒꦼꦢꦺ꧉​ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦩ꧀ꦧꦺꦴꦏ꧀ꦥꦶꦏꦶꦂ​ꦱꦶꦁ​ꦲꦥꦶꦏ꧀ ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦏꦪ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

⁴꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦶꦥꦶꦏꦶꦂ​ꦩꦺꦭ꧀ꦏꦶꦱꦼꦢꦺꦏ꧀ꦪ​ꦗꦤ꧀ꦒꦼꦢꦺꦠꦼꦤꦤ꧀ ꦔꦸꦁꦏꦸꦭ꧀ꦭꦶ​ꦧꦥ​ꦄꦨꦿꦲꦩ꧀꧈​ꦭꦃ​ꦧꦥ​ꦄꦨꦿꦲꦩ꧀ꦏꦸꦮꦶ​ꦭꦲꦸꦠ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦧꦁꦱꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦠ​!ꦭꦃ​ꦤꦁꦔꦶꦁ​ꦢꦺꦏ꧀ꦤꦺꦏꦺꦴꦏ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦤꦺ​ꦒꦮꦤꦺ​ꦱꦁꦏꦥꦼꦥꦼꦫꦁꦔꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​ ⁵ꦧꦁꦱ​ꦆꦱꦿꦌꦭ꧀ꦏꦸꦮꦶ​ꦭꦲꦸꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦠ​?ꦭꦃ​ꦤꦁꦔꦶꦁ​ꦮꦺꦴꦁꦮꦺꦴꦁ​ꦆꦱꦿꦌꦭ꧀ ꦱꦼꦤꦗꦤ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦏꦸꦢꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦩꦫꦁ​ꦥꦫ​ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦲꦶꦩꦩ꧀ꦭꦺꦮ꦳ꦶ꧈​ꦱꦶꦁ​ꦲꦸꦒ​ꦠꦸꦁꦒꦭ꧀ꦧꦁꦱ​ꦆꦱꦿꦌꦭ꧀꧈​ꦏꦸꦮꦶ​ꦥꦼꦂꦤꦠꦤ꧀ꦤꦺꦏꦶꦠꦧ꧀ꦭꦤ꧀ꦏꦸꦮꦶ​ꦱꦶꦁ​ꦢꦶꦲꦫꦤ꧀ꦤꦶ​ꦥꦿꦱꦼꦥꦸꦭꦸꦃꦲꦤ꧀꧈​ ⁶ꦭꦃ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦢꦸꦢꦸ​ꦠꦸꦫꦸꦤ꧀ꦤꦤ꧀ꦤꦺ​ꦲꦶꦩꦩ꧀ꦭꦺꦮ꦳ꦶ꧈​ꦢꦢꦶꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦲꦺꦤ꧀ꦠꦸꦏ꧀​ꦚ꧀ꦗꦭꦸꦏ꧀ꦧꦼꦭꦱ꧀ꦠꦶꦁꦱꦁꦏꦧꦁꦱ​ꦆꦱꦿꦌꦭ꧀꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦼꦥꦿꦶꦪꦺ​?ꦩꦭꦃ​ꦧꦥ​ꦄꦨꦿꦲꦩ꧀ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦢꦺꦏ꧀ꦤꦺ꧉​ꦏꦼꦗꦧ​ꦱꦁꦏꦏꦸꦮꦶ​꧈​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦧꦥ​ꦄꦨꦿꦲꦩ꧀ ꦱꦼꦤꦗꦤ꧀ꦧꦥ​ꦄꦨꦿꦲꦩ꧀ꦱꦶꦁ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁷ꦢꦢꦶꦤꦺ​ꦪ​ꦮꦶꦱ꧀ꦕꦼꦠ​ꦧꦔꦼꦠ꧀ꦤꦺꦏ꧀ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦧꦥ​ꦄꦨꦿꦲꦩ꧀ ꦲꦮꦶꦠ꧀ꦮꦺꦴꦁ​ꦱꦶꦁ​ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁ​ꦭꦶꦪꦤꦺ​ꦏꦸꦮꦶ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦮꦺꦴꦁ​ꦱꦶꦁ​ꦢꦶꦠꦸꦩ꧀ꦥꦁꦔꦶ​ꦠꦔꦤ꧀꧈​

⁸꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦔꦼꦂꦠꦶ​ꦤꦺꦏ꧀ꦲꦶꦩꦩ꧀ꦲꦶꦩꦩ꧀ꦱꦶꦁ​ꦤꦩ꧀ꦥ​ꦥꦿꦱꦼꦥꦸꦭꦸꦃꦲꦤ꧀ꦏꦸꦮꦶ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦱꦶꦁ​ꦭꦸꦩꦿꦃ​꧈​ꦱꦶꦁ​ꦲꦸꦒ​ꦩꦠꦶ​꧉​ꦤꦁꦔꦶꦁ​ꦧꦧ꧀ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦶꦠꦧ꧀ꦱꦸꦕꦶ​ꦔꦺꦴꦩꦺꦴꦁꦔꦏꦺꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ ⁹ꦩꦭꦃ​ꦤꦺꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦗꦤꦺꦲꦶꦩꦩ꧀ꦭꦺꦮ꦳ꦶꦏꦸꦮꦶ​ꦲꦩ꧀ꦧꦪꦂ​ꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ ꦱꦼꦤꦗꦤ꧀ꦭꦸꦩꦿꦃꦲꦺ​ꦲꦶꦩꦩ꧀ꦭꦺꦮ꦳ꦶꦱꦶꦁ​ꦏꦸꦢꦸ​ꦤꦩ꧀ꦥ​ꦥꦿꦱꦼꦥꦸꦭꦸꦃꦲꦤ꧀꧈​ꦲꦥ​ꦗꦭꦂꦫꦤ꧀ꦤꦺ​ꦏꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦺꦴꦩꦺꦴꦁꦔꦺꦴꦤꦺꦴ​?ꦗꦭꦂꦫꦤ꧀ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ ꦲꦸꦒ​ꦲꦶꦩꦩ꧀ꦭꦺꦮ꦳ꦶ꧈​ꦱꦶꦁ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦏꦼꦤꦺꦁꦢꦶꦲꦫꦤ꧀ꦤꦶ​ꦏꦠꦸꦠ꧀ꦩꦺꦭꦸ​ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦏꦸꦮꦶ​ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀꧈​ ¹⁰ꦱꦼꦤꦗꦤ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦶꦩꦩ꧀ꦭꦺꦮ꦳ꦶꦢꦸꦫꦸꦁ​ꦭꦲꦶꦂ​꧈​ꦤꦁꦔꦶꦁ​ꦢꦺꦴꦁꦔꦺꦩꦺꦭ꧀ꦏꦶꦱꦼꦢꦺꦏ꧀ꦩꦼꦠꦸꦮꦧꦥ​ꦄꦨꦿꦲꦩ꧀ꦭꦤ꧀ꦧꦥ​ꦄꦨꦿꦲꦩ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦤꦺ​ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀ ꦏꦼꦤꦺꦁꦢꦶꦲꦫꦤ꧀ꦤꦶ​ꦤꦺꦏ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦭꦺꦮ꦳ꦶꦲꦶꦗꦶꦏ꧀ꦤꦁꦲꦮꦏ꧀ꦏꦺ​ꦩ꧀ꦧꦃꦩ꧀ꦧꦲꦤ꧀ꦤꦺ꧈​ꦪꦏꦸꦮꦶ​ꦧꦥ​ꦄꦨꦿꦲꦩ꧀꧈​

꧋ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦶꦩꦩ꧀ꦱꦶꦁ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦄꦫꦺꦴꦤ꧀꧈​

¹¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲ꦳ꦪꦸꦏ꧀ꦥꦢ​ꦩꦶꦏꦶꦂ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ ꦢꦢꦶ​ꦲꦶꦩꦩ꧀ꦒꦼꦢꦺꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦩꦼꦤꦮ​ꦏꦺꦴꦮꦺ​ꦠꦏꦺꦴꦤ꧀:“ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦏꦺꦴꦏ꧀​ꦩ꧀ꦧꦸꦠꦸꦃꦲꦏꦺꦲꦶꦩꦩ꧀ꦒꦼꦢꦺꦱꦶꦁ​ꦭꦶꦪꦤꦺ​꧈​ꦱꦶꦁ​ꦏꦪ​ꦩꦺꦭ꧀ꦏꦶꦱꦼꦢꦺꦏ꧀ ꦲꦺꦴꦫ​ꦏꦪ​ꦭꦺꦮ꦳ꦶꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ?”ꦲꦏꦸ​ꦧꦶꦱ​ꦱꦼꦩꦲꦸꦂ​ꦔꦺꦤꦺ​:ꦢꦺꦴꦁꦔꦺꦤꦧꦶ​ꦩꦺꦴꦱꦼꦱ꧀ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦩꦶꦗꦶ​ꦄꦫꦺꦴꦤ꧀ꦭꦤ꧀ꦠꦸꦫꦸꦤ꧀ꦤꦤ꧀ꦤꦺ​꧈​ꦱꦸꦥꦪ​ꦤꦠ​ꦭꦤ꧀ꦤꦸꦤ꧀ꦠꦸꦤ꧀ꦧꦁꦱꦤꦺ​ꦲꦼꦁꦒꦺꦴꦤꦺ​ꦥꦢ​ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺ꧉​ꦤꦁꦔꦶꦁ​ꦱꦼꦤꦗꦤ꧀ꦤ​ꦥꦢ​ꦠꦼꦩꦼꦤ꧀ ꦏꦸꦮꦶ​ꦩꦼꦏ꧀ꦱ​ꦲꦺꦴꦫ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦱꦏ꧀ꦏꦧꦺꦃꦲꦺꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹²ꦩꦸꦭꦤꦺ​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦒꦼꦢꦺꦭꦶꦪꦤꦺ​ꦱꦶꦁ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦧꦶꦱ​ꦥꦤ꧀ꦠꦼꦱ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦗꦭꦂꦫꦤ꧀ꦱꦁꦏꦏꦸꦮꦶ​꧈​ꦩꦸꦭꦤꦺ​ꦲꦸꦒ​ꦥꦼꦂꦭꦸ​ꦧꦔꦼꦠ꧀ꦮꦺꦠ꧀ꦮꦺꦠ꧀ꦭꦤ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦕꦫꦤꦺ​ꦥꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦏꦸꦢꦸ​ꦢꦶꦒꦤ꧀ꦠꦶ​꧉​ ¹³ꦩꦸꦭꦤꦺ​꧈​ꦮꦺꦴꦁ​ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺꦩꦶꦠꦸꦫꦸꦠ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦲꦚꦂ​ꦲꦶꦏꦶ​ꦪ​ꦲꦺꦴꦫ​ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧈​ꦤꦁꦔꦶꦁ​ꦱꦁꦏꦏꦿꦧꦠ꧀ꦭꦶꦪꦤꦺ​꧈​ꦱꦶꦁ​ꦢꦸꦫꦸꦁ​ꦠꦲꦸ​ꦲꦺꦤꦺꦁꦱꦶꦗꦶ​ꦮꦲꦺ​ꦢꦢꦶ​ꦲꦶꦩꦩ꧀ꦭꦤ꧀ꦩꦱꦿꦃꦲꦏꦺꦏꦸꦂꦧꦤ꧀ꦤꦁꦲꦭ꧀ꦠꦂꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦩꦭꦃ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦼꦠꦸꦤꦺ​ꦱꦁꦏꦏꦿꦧꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦪꦸꦢꦃ꧉​ꦭꦤ꧀ꦢꦺꦴꦁꦔꦺꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦏꦸꦢꦸ​ꦢꦢꦶ​ꦲꦶꦩꦩ꧀ ꦢꦺꦏ꧀ꦤꦺꦪ​ꦲꦺꦴꦫ​ꦠꦲꦸ​ꦔꦺꦴꦩꦺꦴꦁꦔꦏꦺꦧ꧀ꦭꦱ꧀ꦧꦧ꧀ꦏꦿꦧꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦪꦸꦢꦃꦲꦶꦏꦶ​꧉​

^15-16꧋ꦥꦫ​ꦱꦼꦢꦸꦭꦸꦂ​꧈​ꦥꦽꦏꦫ​ꦧꦧ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦲꦚꦂ​ꦲꦶꦏꦶ​ꦩꦭꦃ​ꦠꦩ꧀ꦧꦃ​ꦕꦼꦠ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦒꦼꦢꦺ​ꦭꦶꦪꦤꦺ​꧈​ꦱꦶꦁ​ꦏꦪ​ꦩꦺꦭ꧀ꦏꦶꦱꦼꦢꦺꦏ꧀ ꦲꦺꦴꦫ​ꦢꦢꦶ​ꦲꦶꦩꦩ꧀ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦲꦸꦫꦶꦥ꧀ꦠꦼꦫꦸꦱ꧀ ꦲꦺꦴꦫ​ꦧꦶꦱ​ꦩꦠꦶ​꧈​ꦩꦸꦭꦤꦺ​ꦧꦶꦱ​ꦢꦢꦶ​ꦲꦶꦩꦩ꧀ꦱꦭꦮꦱ꧀ꦭꦮꦱ꧀ꦱꦺ​꧉​ ¹⁷ꦧꦧ꧀ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦲꦤꦏ꧀ꦏꦺ​꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀:“ꦏꦺꦴꦮꦺ​ꦧꦏꦭ꧀ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦏꦪ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​” ¹⁸ꦢꦢꦶꦤꦺ​ꦥꦼꦂꦤꦠ꧀ꦠꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​ꦱꦲꦶꦏꦶ​ꦢꦶꦱꦶꦁꦏꦶꦂꦫꦏꦺ꧈​ꦗꦭꦂꦫꦤ꧀ꦏꦸꦮꦶ​ꦏꦸꦫꦁ​ꦏꦼꦏꦸꦮꦠ꧀ꦠꦤ꧀ꦤꦺ​ꦭꦤ꧀ꦲꦺꦴꦫ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺꦭꦤ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦥꦤ꧀ꦠꦼꦱ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁹ꦮꦸꦗꦸꦠ꧀ꦠꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦥꦤ꧀ꦠꦼꦱ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦶꦏꦺꦏ꧀ꦏꦶꦥꦼꦔꦉꦥ꧀ꦲꦉꦥ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦼꦔꦉꦥ꧀ꦲꦉꦥ꧀ꦱꦶꦁ​ꦧꦶꦱ​ꦔ꧀ꦒꦮ​ꦲꦮꦏ꧀ꦏꦺ​ꦢꦺꦮꦺꦕꦼꦢꦼꦏ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁰꧋ꦏꦼꦗꦧ​ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦱꦸꦩ꧀ꦥꦃ​꧈​ꦏꦁꦒꦺꦴ​ꦔꦤ꧀ꦠꦼꦥ꧀ꦥꦏꦺꦥꦼꦂꦤꦠ꧀ꦠꦤ꧀ꦲꦚꦂ​ꦲꦶꦏꦶ​꧉​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧈​ꦢꦺꦏ꧀ꦤꦺꦲꦺꦴꦫ​ꦱꦸꦩ꧀ꦥꦃ​꧉​ ²¹ꦤꦁꦔꦶꦁ​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦢꦢꦺꦏ꧀ꦏꦏꦺꦲꦶꦩꦩ꧀ꦒꦼꦢꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦸꦩ꧀ꦥꦃ​ꦔꦺꦤꦺ​:

“ꦲꦏꦸ​ꦮꦶꦱ꧀ꦱꦸꦩ꧀ꦥꦃ​꧈​
ꦲꦏꦸ​ꦲꦺꦴꦫ​ꦧꦏꦭ꧀ꦩꦭꦶꦃ​ꦥꦶꦏꦶꦂꦫꦤ꧀ꦤꦺ​꧉​
ꦏꦺꦴꦮꦺ​ꦧꦏꦭ꧀ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦱꦺ꧉​”

²²ꦭꦤ꧀ꦗꦭꦂꦫꦤ꧀ꦧꦺꦢ​ꦏꦫꦺꦴ​ꦲꦶꦩꦩ꧀ꦭꦶꦪꦭꦶꦪꦤꦺ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦪ​ꦢꦢꦶ​ꦥꦚ꧀ꦗꦼꦂꦫꦺꦥꦽꦗꦚ꧀ꦗꦶꦪꦤ꧀ꦲꦚꦂ​ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦠꦼꦤꦤ꧀꧈​

²³꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦥꦽꦏꦫ​ꦩꦼꦤꦺꦃ​ꦱꦶꦁ​ꦩꦫꦏ꧀ꦏꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦧꦺꦢ​ꦏꦫꦺꦴ​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧉​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶꦏꦸꦮꦶ​ꦥꦶꦫꦁꦥꦶꦫꦁ​꧈​ꦗꦭꦂꦫꦤ꧀ꦥꦢ​ꦩꦠꦶ​ꦭꦤ꧀ꦱꦧꦼꦤ꧀ꦱꦧꦼꦤ꧀ꦏꦸꦢꦸ​ꦢꦶꦒꦤ꧀ꦠꦶ​꧉​ ²⁴ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦲꦸꦱꦃꦢꦶꦒꦤ꧀ꦠꦶ​ꦏꦫꦺꦴ​ꦲꦶꦩꦩ꧀ꦭꦶꦪꦤꦺ​꧉​ ²⁵ꦢꦢꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦤꦸꦭꦸꦁꦔꦶ​ꦱꦥ​ꦮꦲꦺ​ꦱꦶꦁ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦮꦺꦴꦁ​ꦏꦸꦮꦶ​ꦧꦶꦱ​ꦥꦤ꧀ꦠꦼꦱ꧀ꦔꦢꦼꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦱ꧀ꦭꦮꦱ꧀ꦱꦺꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦩ꧀ꦧꦸꦁꦔꦏꦺꦲꦮꦏ꧀ꦏꦺ​ꦢꦺꦮꦺ꧉​

²⁶꧋ꦥꦫ​ꦱꦼꦢꦸꦭꦸꦂ​꧈​ꦠꦏ꧀ꦏꦶꦫꦱꦲꦶꦏꦶ​ꦮꦶꦱ꧀ꦕꦼꦠ​ꦧꦔꦼꦠ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦲꦶꦩꦩ꧀ꦒꦼꦢꦺ​ꦱꦶꦁ​ꦢꦶꦧꦸꦠꦸꦃꦲꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦠꦼꦤꦤ꧀ ꦲꦮꦶꦠ꧀ꦢꦺꦏ꧀ꦤꦺꦱꦸꦕꦶ​꧈​ꦲꦺꦴꦫ​ꦤ꧀ꦢꦸꦮꦺꦱꦭꦃ​ꦲꦥ​ꦢꦺꦴꦱ​꧉​ꦢꦺꦏ꧀ꦤꦺꦲꦸꦒ​ꦲꦢꦺꦴꦃ​ꦧꦔꦼꦠ꧀ꦏꦫꦺꦴ​ꦮꦺꦴꦁ​ꦲꦭ​꧈​ꦩꦭꦃ​ꦕꦼꦢꦼꦏ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁷ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦩꦩ꧀ꦒꦼꦢꦺꦱꦶꦁ​ꦧꦺꦢ​ꦠꦼꦤꦤ꧀ꦏꦫꦺꦴ​ꦲꦶꦩꦩ꧀ꦭꦶꦪꦭꦶꦪꦤꦺ​꧈​ꦲꦮꦶꦠ꧀ꦲꦶꦩꦩ꧀ꦭꦶꦪꦭꦶꦪꦤꦺ​ꦱꦧꦼꦤ꧀ꦢꦶꦤ​ꦏꦸꦢꦸ​ꦩꦱꦿꦃꦲꦏꦺꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦢꦺꦴꦱꦤꦺ​ꦢꦺꦮꦺꦤ꧀ꦢꦶꦱꦶꦏ꧀ꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦧꦶꦱ​ꦩꦱꦿꦃꦲꦏꦺꦏꦸꦂꦧꦤ꧀ꦏꦁꦒꦺꦴ​ꦢꦺꦴꦱꦤꦺ​ꦧꦁꦱꦤꦺ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ ꦲꦸꦱꦃꦔꦺꦴꦤꦺꦴ​꧈​ꦲꦮꦶꦠ꧀ꦮꦶꦱ꧀ꦩꦱꦿꦃꦲꦏꦺꦏꦸꦂꦧꦤ꧀ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦢꦺꦴꦱꦤꦺ​ꦩꦤꦸꦁꦱ​ꦭꦤ꧀ꦏꦸꦮꦶ​ꦏꦁꦒꦺꦴ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ ²⁸ꦲꦶꦩꦩ꧀ꦲꦶꦩꦩ꧀ꦒꦼꦢꦺꦱꦶꦁ​ꦢꦶꦥꦶꦗꦶ​ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦱꦶꦁ​ꦲꦺꦴꦏꦺꦃꦏꦫꦶꦁꦏꦶꦲꦤ꧀ꦤꦺ꧉​ꦤꦁꦔꦶꦁ​ꦲꦶꦩꦩ꧀ꦒꦼꦢꦺꦩꦶꦠꦸꦫꦸꦠ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦠꦼꦏꦤꦺ​ꦱꦏ꧀ꦮꦶꦱ꧀ꦱꦺ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦱꦶꦁ​ꦢꦶꦥꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦱꦸꦩ꧀ꦥꦃ​꧈​ꦏꦸꦮꦶ​ꦲꦶꦩꦩ꧀ꦒꦼꦢꦺꦱꦶꦁ​ꦲꦺꦴꦫ​ꦲꦺꦤꦺꦁꦏꦫꦶꦁꦏꦶꦲꦤ꧀ꦤꦺꦭꦤ꧀ꦱꦶꦁ​ꦭꦁꦒꦼꦁ​꧈​ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​

↑ ↑ ↑

← ꧇​꧖꧇​

꧇​꧘꧇​ →