ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦆꦧꦿꦤꦶ/4

꧋ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦏꦠꦼꦤ꧀ꦠꦽꦩ꧀ꦩꦤ꧀꧈​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺ꧈​ꦲꦶꦗꦶꦏ꧀ꦏꦁꦒꦺꦴ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦱꦸꦥꦪ​ꦤꦁꦠꦼꦔꦃꦩꦸ​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦩ꧀ꦥꦺꦏ꧀ꦲꦺꦴꦫ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦲꦮꦶꦠ꧀ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦤꦁꦔꦶꦁ​ꦲꦶꦏꦸ​ꦲꦺꦴꦫ​ꦤꦼꦏꦏ꧀ꦏꦏꦺꦧꦼꦕꦶꦏ꧀​ꦧ꧀ꦭꦱ꧀ꦏꦁꦒꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦮꦶꦠ꧀ꦱꦼꦤꦗꦤ꧀ꦏꦿꦸꦔꦸ​꧈​ꦤꦁꦔꦶꦁ​ꦩꦼꦏ꧀ꦱ​ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​ ³ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦤꦶꦤꦺ​ꦔꦺꦤꦺ​:

“ꦗꦭꦂꦫꦤ꧀ꦲꦏꦸ​ꦤꦼꦱꦸ​ꦠꦼꦤꦤ꧀ꦩꦫꦁ​ꦧꦁꦱ​ꦲꦶꦏꦶ​꧈​
ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦲꦺꦴꦫ​ꦧꦏꦭ꧀
ꦔ꧀ꦭꦶꦭꦤꦶ​ꦧꦁꦱ​ꦲꦶꦏꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉​”

ꦱꦼꦤꦗꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸꦏꦮꦶꦠ꧀​ꦩ꧀ꦧꦶꦪꦺꦤ꧀ꦢꦺꦴꦁꦔꦺꦢꦺꦏ꧀ꦤꦺꦔ꧀ꦒꦮꦺ​ꦗꦒꦠ꧀ ꦩꦼꦏ꧀ꦱ​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦩꦲꦸ​꧉​ ⁴ꦧꦧ꧀ꦢꦶꦤ​ꦱꦶꦁ​ꦤꦺꦴꦩꦼꦂ​ꦥꦶꦠꦸ​ꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦲꦶꦁ​ꦥꦶꦠꦸꦁ​ꦢꦶꦤꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦺꦫꦺꦤ꧀ꦱꦏ꧀ꦮꦶꦱ꧀ꦱꦺ​ꦏꦼꦂꦗꦤꦤ꧀ꦤꦺꦏꦧꦺꦃ​ꦫꦩ꧀ꦥꦸꦁ​꧉​” ⁵ꦲꦸꦒ​ꦲꦺꦤꦺꦁꦲꦪꦠ꧀ꦭꦶꦪꦤꦺ​ꦤꦁꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉​” ⁶ꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦩꦭꦃ​ꦲꦺꦴꦫ​ꦥꦢ​ꦤꦩ꧀ꦥ​ ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦥꦽꦕꦪ​꧉​ꦤꦁꦔꦶꦁ​ꦲꦺꦤꦺꦁꦮꦺꦴꦁ​ꦭꦶꦪꦭꦶꦪꦤꦺ​ꦱꦶꦁ​ꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦏꦸꦮꦶ​꧉​ ⁷ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦮꦶꦱ꧀ꦱꦏꦺꦢꦶꦤ​ꦭꦶꦪꦤꦺ​꧈​ꦪꦏꦸꦮꦶ​ꦢꦶꦤ​ꦱꦶꦁ​ꦢꦶꦲꦫꦤ꧀ꦤꦶ​“ꦢꦶꦤ​ꦲꦶꦏꦶ​꧈​”ꦏꦁꦒꦺꦴ​ꦮꦺꦴꦁꦮꦺꦴꦁ​꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦩꦫꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦺꦏ꧀​ꦩ꧀ꦧꦶꦪꦺꦤ꧀ ꦤꦁꦔꦶꦁ​ꦊꦠ꧀ꦥꦶꦫꦁꦥꦶꦫꦁ​ꦠꦲꦸꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦩꦼꦤꦺꦃ​ꦭꦤ꧀ꦠꦂꦫꦤ꧀ꦫꦠꦸ​ꦣꦮ꦳ꦼꦢ꧀ ꦱꦶꦁ​ꦲꦸꦤꦶꦤꦺ​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀ꦩꦲꦸ​:

“ꦲꦶꦁ​ꦢꦶꦤ​ꦲꦶꦏꦶ​꧈​
ꦤꦺꦏ꧀ꦏꦺꦴꦮꦺ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦏꦺꦴꦮꦺ​ꦲꦗ​ꦥꦢ​ꦮꦁꦏꦺꦴꦠ꧀ꦲꦠꦶꦩꦸ​꧉​”

⁸꧋ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦲꦺꦴꦫ​ꦲꦺꦤꦺꦁꦢꦶꦤ​ꦭꦶꦪꦤꦺ​ꦩꦼꦤꦺꦃ​꧈​ꦩꦼꦱ꧀ꦠꦶꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦩꦼꦤꦺꦃ​ꦱꦏ꧀ꦮꦶꦱ꧀ꦱꦺ​ꦪꦺꦴꦱꦸꦮ​ꦮꦶꦱ꧀ꦤꦸꦤ꧀ꦠꦸꦤ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦊꦧꦸ​ꦤꦁꦤꦼꦒꦫ​ꦱꦶꦁ​ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦭꦺꦫꦺꦤ꧀꧈​ ⁹ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦲꦶꦏꦶ​ꦲꦶꦗꦶꦏ꧀ꦲꦺꦤꦺꦁꦢꦶꦤ​ꦭꦶꦪꦤꦺ​ꦩꦼꦤꦺꦃ​ꦏꦁꦒꦺꦴ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​꧈​ꦥꦢ​ꦮꦲꦺ​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦱꦏ꧀ꦏꦏꦺꦏꦠꦼꦤ꧀ꦠꦽꦩ꧀ꦩꦤ꧀ꦱꦏ꧀ꦧꦉꦁꦔꦺꦭꦺꦫꦺꦤ꧀ꦲꦶꦁ​ꦥꦶꦠꦸꦁ​ꦢꦶꦤꦤꦺ​꧈​ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸ꧉​ ¹⁰ꦲꦮꦶꦠ꧀ꦱꦥ​ꦮꦲꦺ​ꦱꦶꦁ​ꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦲꦸꦒ​ꦭꦺꦫꦺꦤ꧀ꦱꦁꦏꦥꦼꦁꦒꦮꦺꦪꦤ꧀ꦏꦸ꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦺꦫꦺꦤ꧀ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸ꧉​ ¹¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦏ꧀ꦏꦸꦮꦠ꧀ꦏꦸꦮꦠ꧀ꦠꦺ꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦶꦗꦶ​ꦮꦲꦺ​ꦤꦁꦠꦼꦔꦃꦩꦸ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦺꦭꦁꦔꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​꧈​ꦏꦪ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦺꦏ꧀​ꦩ꧀ꦧꦶꦪꦺꦤ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹²꧋ꦲꦮꦶꦠ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦸꦫꦶꦥ꧀ꦭꦤ꧀ꦒꦼꦢꦺ​ꦏ꧀ꦮꦱꦤꦺ​ꦭꦤ꧀ꦭꦤꦁꦮꦺꦢꦺꦴꦏ꧀ꦔꦸꦁꦏꦸꦭ꧀ꦭꦶ​ꦥꦼꦢꦁꦱꦶꦁ​ꦭꦤꦁꦏꦶꦮꦠꦼꦔꦼꦤ꧀꧈​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦩ꧀ꦊꦧꦸ​ꦗꦼꦫꦸꦲꦶꦁ​ꦲꦠꦶꦤꦺ​ꦩꦤꦸꦁꦱ​꧈​ꦩꦶꦱꦃ​ꦫꦺꦴꦃ​ꦭꦤ꧀ꦚꦮ​꧈​ꦧꦭꦸꦁ​ꦭꦤ꧀ꦱꦸꦁꦱꦸꦩ꧀꧈​ꦩꦸꦭꦤꦺ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦠꦺꦴꦏ꧀ꦏꦏꦺꦲꦭꦧꦼꦕꦶꦏ꧀ꦏꦺ​ꦥꦶꦏꦶꦂꦫꦤ꧀ꦭꦤ꧀ꦏꦼꦏꦉꦥ꧀ꦥꦤ꧀ꦤꦺ​ꦩꦤꦸꦁꦱ​꧉​ ¹³ꦥꦫ​ꦱꦼꦢꦸꦭꦸꦂ​꧈​ꦲꦺꦴꦫ​ꦲꦺꦤꦺꦁꦥꦽꦏꦫ​ꦱꦶꦗꦶ​ꦮꦲꦺ​ꦤꦁꦗꦒꦠ꧀ꦏꦺꦤꦺ​ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧉​ꦢꦺꦏ꧀ꦤꦺꦔꦼꦂꦠꦶ​ꦭꦤ꧀ꦮꦼꦫꦸꦃ​ꦱꦼꦩ꧀ꦧꦫꦁ​ꦲꦶꦁ​ꦲꦠꦶꦤꦺ​ꦩꦤꦸꦁꦱ​꧉​ꦩꦸꦭꦤꦺ​꧈​ꦲꦩ꧀ꦧꦺꦱꦸꦏ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦩꦩ꧀ꦒꦼꦢꦺ꧉​

¹⁴꧋ꦗꦭꦂꦫꦤ꧀ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦒꦺꦴꦤ꧀ꦢꦺꦭ꧀ꦭꦶꦱꦶꦁ​ꦏꦼꦚ꧀ꦕꦼꦁ​ꦩꦫꦁ​ꦥꦼꦔꦤ꧀ꦢꦼꦭ꧀ꦱꦶꦁ​ꦢꦶꦲꦏꦺꦴꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦏꦸꦮꦶ​?ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦤ꧀ꦢꦸꦮꦺꦲꦶꦩꦩ꧀ꦒꦼꦢꦺ​ꦱꦶꦁ​ꦮꦶꦱ꧀​ꦩ꧀ꦊꦧꦸ​ꦱ꧀ꦮꦂꦒ​ꦭꦤ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦲꦶꦩꦩ꧀ꦒꦼꦢꦺꦲꦶꦏꦶ​ꦢꦸꦢꦸ​ꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦲꦺꦴꦫ​ꦧꦶꦱ​ꦔꦿꦱꦏ꧀ꦏꦏꦺꦏꦔꦺꦭ꧀ꦭꦤ꧀ꦤꦺ​ꦭꦤ꧀ꦏꦫꦶꦁꦏꦶꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦢꦺꦏ꧀ꦤꦺꦩꦭꦃ​ꦮꦶꦱ꧀ꦏꦒꦺꦴꦢꦲꦶꦁ​ꦥꦽꦏꦫ​ꦲꦥ​ꦮꦲꦺ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦧꦺꦢꦤꦺ​ꦤꦩꦸꦁ​ꦲꦶꦏꦶ​:ꦢꦺꦏ꧀ꦤꦺꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦠꦶꦧ​ꦲꦶꦁ​ꦢꦺꦴꦱ​꧉​ ¹⁶ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦫ​ꦏꦫꦺꦴ​ꦏꦼꦤ꧀ꦢꦼꦭ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦥꦚ꧀ꦕꦺꦤ꧀ꦒꦼꦢꦺꦏ꧀ꦮꦱꦤꦺ​ꦭꦤ꧀ꦧꦶꦱ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦠꦿꦺꦱ꧀ꦤꦭꦤ꧀ꦒꦼꦊꦩ꧀ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦲꦶꦁ​ꦮꦏ꧀ꦠꦸ​ꦏꦔꦺꦭ꧀ꦭꦤ꧀ꦲꦥ​ꦮꦲꦺ​꧈​ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦼꦏꦏ꧀ꦏꦏꦺꦥꦶꦠꦸꦭꦸꦁꦔꦤ꧀꧈​

↑ ↑ ↑

← ꧇​꧓꧇​

꧇​꧕꧇​ →