Rapporté bapak
Tèngelèng . .. tèngelèng!
Bèlé sekolahan muni. Dina iku dina sekolahan sing kèri déwé ing taun kuwi.
Bocah-bocah pada gemrudug metu sangka klas-klasé, arep mulih. [ 20 ]
Okèh sing pada bungah, nanging uga ènèng sing pada sedi, mergané éntuk rapport lan pada ngerti over apa ora.
Paidjo mbarang mlaku mulih; dèkné omahé ora adoh karo sekolahané. Dongé dèkné tekan omah, maké isik isah-isah nang pawon.
“Dag Mak!”
“Dag Lik, lah kok wis mulih yaéné?”
“Wis éntuk vakansi ta Mak. Mau njikuk rapport.” [ 21 ] “O ya nding, kok lali aku. Lah endi rapporté Lik?”
Paidjo terus njikuk rapporté sangka tasé, têrus diulungké maké.
Maké ndelok karo mèsem terus ngomong: “Waduh, over kowé Lik. Aku bungah mbanget. Mengko nèk Paké mulih mesti mèlu bungah mbarang. Suk minggu ngarep, nèk Paké pajihan, tak tukoké katok, klambi karo sepatu anyar ya? Aku bungah kowé temen lih sekolah, ora kaya bapakmu mbiyèn.”
Paidjo terus takon: “Lah Paké mbiyèn kepriyé ta Mak?”
Maké terus ndongèng: “Bapakmu kuwi mbiyèn sembrana mbanget. Wayahé éntuk rapport ngéné iki, [ 22 ]dèkné ngapusi Mbahé. Rapporté Paké abwang kabèh. Lah sangking wediné karo Mbahé, tulisané sing abang-abang iku digawé biru, bèn ketoké pakmu over waé. Nanging let rong dina Mbahé ndilalahé kepetuk mèsteré nang dalan, terus diomongi karo mêèsteré nèk bapakmu ora over.”
“Lah terus kepriyé Mak karo Paké?”
“Bapakmu diamuk karo Mbahé, diswabeti lan disetrap ora éntuk nang endi-endi. Suwéné vakansi dèkné dikongkon nyambutgawé, kudu babat kebon.” [ 23 ]
“Lah kowé kok ngerti Mak?”
“Mbiyèn aku iki tanggané bapakmu ta, mulané aku ngerti!” h
“Lah rapporté Paké terus dikapaké?”
“Mbahé terus nang nggoné mêèsteré njaluk rapport liyané, Sing lawas kena dicekel.”
Sakwisé Maké rampung lih isah-isah terus ngomong: “Lik, aku arep niliki Bik Ngatijem, aku krungu jaréné dèkné lara. Mengko nèk Paké mulih diomongi, kon marani aku ya?”
“Jam pira Mak?” [ 24 ]
“Ya nèk Paké wis lèrèn.”
Maké terus lunga, Paidjo saiki nang omah déwé. Bar mangan dèkné terus nata buku-buku sekolahan nang wadah buku ing gedèg. Dèkné kok terus weruh fotoalbum, wadah potrèk, sing kétok lawas mbanget. Terus dijikuk lan didelok.
Potrèk-potrèké kabèh lawas, wèké jaman mbiyèn.
Sakbaré ndelok potrèk-potrèké, Paidjo neruské sing nata buku-buku.
Ora let suwi dèkné kok nemu rapport nylempit campur buku-buku, terus dijikuk.
Dèkné weruh nèk kuwi rapporté Paké. Rapporté jan èlèk mbanget, sasaté kabèh abang. [ 25 ]
Bar ndelok rapporté terus didèkèk nang méja, jèjèr karo rapporté dèkné déwé. Paidjo terus nata buku-buku mau menèh. |
Ora let suwi Paké teka.
“Dag Lik, Maké nang endi?”
“Dag Pak, Maké niliki Bik Ngatijem, jaréné dèkné lara. Maké ngomong mengko kowé, kon marani.”
“Lah kepriyé mau lih sekolah? Entuk rapport?”
“Ya Pak, lah iku nang méja rapporté.” [ 26 ]
Paké ora ndelok-ndelok ndisik, mulané terus klèru njikuk rapporté dèkné déwé. Kadung weruh abang-abangé terus nesu. Paidjo digentak-pentak sampèk mengkeret.
Karo ndredeg Paidjo terus ngomong: “Pak, sing mbok delok kuwi dukuk rapportku, nanging rapportmu déwé.”
“Rapportku?”
“Ya Pak! Didelok sing apik ta; rapportku sing nang méja iku! Aku mau nemu rapportmu terus ta sèlèké nang méja.” [ 27 ]
Paké saiki weruh tenan nèk sing dicekel kuwi rapporté dèkné déwé, mulané terus rumungsa isin. Dèkné terus ndelok rapporté Paidjo.
Bungah weruh nèk rapporté anaké apik. Paké terus mèsem, ngrumangsani klèruné, terus njaluk ngapura.
Bar mangan lan lèrèn sedilut, Paké terus ngejèk Paidjo marani Maké.
Paidjo bungahé éram-éram, ngerti nèk mengko
bakal ditukoké énak-énakan karo wong tuwané.
L. Poewasak