Kaca iki wis divalidasi
― 59 ―
- sang lwir agni sakĕng tahĕn kadi minak sakeng dadhi
kita,
sang sãkşãt mĕtu yan hana wwang amutĕr tutur pina-
hayu.
- Wyãpĩwyãpaka sãrining paramatatwa durlabha kita,
iccãtã ng hana - tanahanãganal - alit lawan halahayu,
utpatti sthiti lĩṇaning dadi kitãta karãṇanika,
sang sangkan-paraning sarãt sakala-niskalãtmaka kita.
*
XI. Totaka.
‿ ‿ _ | ‿ ‿ _ | ‿ ‿ _ | ‿ ‿ _ ‖
- Çaçiwimba haneng ghaṭa mesi banu,
ndan asing çuci nirmala mesi wulan,
iwa mangkana rakwa kiteng kadadin,
ring angambĕki yogya kiteng sakala. - Katĕmunta mareka si tan katĕmu,
kahiḍĕpta mareka si tan kahiḍĕp,
kawĕnangta mareka si tan kawĕnang,
paramãrtha çiwatwa nirãwaraṇa.
*
XII. Nardataka (Narkutaka).
‿ ‿ ‿ | ‿ _ ‿ | _ ‿ ‿ | ‿ _ ‿ | ‿ _ ‿ | ‿ [...]‖
- Stutinira tan tulus, sinahuran paramãrtha Çiwa:
„Anaku huwus katon abhimatãn katĕmunta kabeh,
hana panganugrahangkwa caduçakti winimba çara,
paçupati çastrakãstu pangaranya nihan wulati.” - Wuwusira sanghyang ĩçwara mijil tangapuy ri tangan
wawang açarĩra kãtara mangiṇḍitakĕn warayang,
tinarima sang Dhananjaya tikãng çara sũksma tikã,
ng anala çarĩra sãtmaka lawan warayang wĕkasan. - Krĕtawara sang dhananjaya manambah ati praṇata,
pinisalin laras makuṭa tan hana kãlah-alah,
winara-warah sireng aji dhanurdharaçãstra kabeh,
krĕtasamaya ng prayoga dadi sũkşma bhaṭãra Çiwa.
