Pramulané ana wajang iki, pan kinarja kanjalahan dalang, ananingsun iki mangké, dzat sifat wajang iku, miwah mangké af'alé ringgit, kinarja lelarapan, mring ki dalang wau, anging njata nora njata, suksma agung jèn tan ana ringgitnèki, dalang masa njataa.
Anané dalang lan wajang singgih, tan prabéda ing kahanan. tunggal, tunggalena ing karoné, ajwa tunggal pandulu, tunggal iku pestiné sirik, lamun pisaha ika, tékadé djalmèku, tan prabéda lawan. ménda, idepipun kawruhé kadi si kapir, anembah tawang tuwang.
Lamun sira aningali ringgit, dèn waspada mring Ki Pangseng ika, lawan Ki Dremawangsané, miwah ing keliripun, panggungira dipun udani, miwah kotaké ika, pandjak dèn kadulu, gamelan dipun uninga, baléntjongé punika dipun nastiti, arané kawruhana.
Nanging Ki Widdhi ing mangké niki, wus anuksma mring Darmakusuma, wajang nuksma gamelané, punika dipun weruh, ajwa sira kérup ing ringgit, adja katut gamelan, dènira andulu, jèn tan waspada ing tingal, nora wandé mělu kérup ta sirèki, wuta anonton wajang.
Lamun sira tan awas ing ringgit, pondoh tjengkir mangké salokanja, tembaga tjinarub djené, sapolahé puniku, raganira kuwasanèki, ija saking Ki Tjrema, dalangé puniku, solahé datan prabéda, ija dalang ija wajang iku singgih, nora tebih prenahnja.
Pangseng lawan Djanaka puniki, wudjud tunggal tan kena pisaha, tan kena woworan mangké, lamun pisaha suwung, jèn tunggala puniku sirik, wudjudira ki dalang, tan gantya-gantyèku, nora jèn bebarengana, Kjai Pangseng kalawan Prabu Kiriti, jèku pada dèn awas.
Nora kari miwah datan dingin, ora mangké lamun atunggala, ora ta sasul wudjudé, nora ndjero ndjaběku, nora nduwur lan ngisor singgih, Widdhi lawan Ki Samba, iku dipun weruh, ajwa tungkul geguritan, dèn waspada banjolé mangké kang ringgit, kang aran wudjud tunggal.
Dalang iku pan tetiga singgih, wudjud echak lawan wudjud mutlak, ping tiga wudjud batilé, wajangipun puniku, lawan mangké tan béda malih, iku dipun waspada, dalang chak puniku, kalawan kang dalang mutlak, lamun mangké wajangé kang batil singgih, iku waspadakena.
Lamun ki dalang mangké puniki, anembaha maring wajangira. sapa kang sinembah mangké, déné wajangé iku, panembahé kadi punapi, sembahé sama ika, lamun wajangipun, ingkang anembah.
punika, pesti sasar tingalé mangké sirèki, ingkang anonton wajang.
12
