Kaca iki wis divalidasi
47
- Sarkara drawa linama, kèlang, gelang swéda: ali-ali, kramané warah siwi, wula ilang lalijèng wulangun, mundu lit ḍaonira, tjlaket, lumeketing kajuwananirèng kajun, parab madyaning Panḍawa, Ardjuna, sardjua ardjanindir.
- Singgang gung kang pinijara winih, mardi siswa, mulang, kekawinirèng estri, watu, winèh winulangken wadu, pepuṭut mong Pergiwa, Djanaloka, kang suméwa paséwakaning kalangun, pangrantamirèng pradangga, senḍon, sesenḍonan genti-genti.
- Witjara tanpa karana, ngajawara, bebasané djanma nunggal sapanti, dunung, ngajawara tanpa dunung, sampang panggilap wreksa, prenis, peprenésan linaras resmining kajun, narmada lit ngalang marga, kali, tan lija amung ngrerepi.
- Ron deling tengering marga, sawi, barat Wétan, timur, mina lembut djaladri, teri, sun sawèni timuripun, wantya Sang Naribrangta, Abijasa, mangké sampun diwasa warnané pundjul, krama sengseming sesana, krasan, teka ana kang ngrasani.
- Djambé geng widjiling ngarga, ḍawé, sarpa warna, ula welang, kisma mawur kapilis, lebu, gawé sumelanging kalbu, satrija di Singgela, Bisawarna, datan bisa néndra kalanirèng dalu, mamèt brana djro pratala, melik, nétra tansah merem melik.
- Sumenḍi putrèng Ngalengka, Trikaja, balé Nata dampar, Sang Endrakila resi, Mintaraga, kaja paran raganingsun, ḍanḍang lit mitra dusta, manuk tuhu, jèn tuhua lir pawarta kang sun rungu, kutjumbining dwidjawara, éndang, seḍeng sun kéndang sing ngriki.
- Paningset sampur wanila, uḍet, natèng angga: ati, rangkep tundaning sari, sungsun, katjandeting manahingsun, kaḍang tepunging basa, karuh, déné durung kinaruh ing sidanipun, taru wilis tanpa patra, kaju urip, djroning urip sun antèni.
- Wreksa angkuring sujasa, taḍa, kang toh kuda: tapak jang, senḍang lubèr kang warih, agung, sun teteda ring Hjang Agung, tirta widjiling ngangga, kringet, mung èngeta baé marang dasihipun, palwa kanḍeg ing muwara, labuh, sun labuh nḍepani nagri.
- Katga pangruwat durmala, sinduraga: kringet, pasang ilining tasik, arus, pakarjan kringeta marus, surja talu diwasa, lingsir, datan nedya gumingsir ing tyas sarambut, séla tjurna ring pawaka, luluh, lebur luluh sun anḍemi.
- Saron geng mangka manggala, demung, petjuk séta: kontul, kawuk kang maḍa warni, menjawak, mung tolèhen awakingsun, kudji geng Tasikwadja, kasangé Umarmaja, kasangsaja kadarpaning tyas kadurus, bantuning djanma baksana, imbuh, wimbuh jèn mulat maskwari.
