Kaca iki wis divalidasi
154
BAB XXII. PEṬIKAN SAKA BUKU SAWATARA.
I. Serat Wéḍaraga (R. Ng. Ranggawarsita).
Trusan RONG saptèng lebu (1799), Ki Pudjang- GA pang- gupitanipun, tawi ta- WAR ing surasa tanpa manis, marma, kong- SI karja pému, mung mèt mar- TA karahajon.
II. Sabdadjati (R. Ng. Ranggawarsita).
- Ki Pudjangga njambiwara wèh pitutur, saka mangunahing Wiḍi, ambuka warananipun, aling-aling kang ngalingi, angalingkap temah katon.
- Para djanma sadjroné djaman pakéwuh, kasudranira andadi, ḍahuruné saja ndlarung, kèh tyas mirong murang margi, kasektèn wus nora katon.
- Katuwoné winawas dahad matrenjuh, kenjaraing sasmita, jekti, sanityasa tyas malat kung, kongas welasé kepati, sulaking djanma prihatos.
- Walujané béndjang jèn wus ana Wiku, memudji ngèsṭi sawidji (1887), sabuk lebu lir madjenun, galibedan tudang-tuding, anatjahken sakèhing wong.
- Iku lagi sirep djaman Kalabenḍu, Kalasuba kang gumanti, wong tjilik bisa gumuju, nora kurang sandang-bukti, sedyané kabèh kalakon.
- Panduluné Ki Pudjangga durung kemput, mulur lir benang tinarik, nanging kaserang ing umur, andringkap kasidan djati, mulih marang djatininggon.
- Amung kurang wolung ari kang kadulu, tamating pati patitis, wus katon nèng Lochil-makful, angumpul ing madya ari, amarengi ri Buda. Pon.
- Tanggal kaping lima antarané luhur, Sela ing taun Djimakir, Tolu Huma Arjang Djagur, Sengara winduning pati, netepi ngumpul saenggon.
- Tjinitra ri Buda kaping wolulikur, Sawal ing taun Djimakir, tjandraning warsa pinétung, Sembah Muksa Pudjangga Dji (1802), Ki Pudjangga pamit lajon.
III. Serat Rama (R. Ng. Jasadipura I).
- Kukusing dupa, kumelun, ngeningken tyas Sang apekik, kawengku sagung djadjahan, nanging sanget angikibi. Sang Resi Kanékaputra, kang andjlog saking wijati.
- Kagjat ri Sang kapirangu, pinengkul kinempit-kempit, ḍuh Sang retnaning bawana, ja ki tukang walang-ati, ja ki tukang ngenes ing tyas, ja ki tukang kudu gering.
- Ana ndadak milu-milu, kaja polahé wong tjeplik, lali jèn kalengkaning rat, ing bawana amurwani, mustikaning djagad-raja, ḍemen lalèn sangga-runggi.
