Kaca iki wis divalidasi
| Tiong Hoa | : | "Nek, sasat kenging dipestekake nemu bebaya, botena disuduk, enggih ditumbak tiyang, dados awis sing purun numbas, ewadene jembar-jembaring jagad boten onten barang sing boten pajeng disade, nanging enggih kedah narimah tuna sawatawis." |
| Blantik | : | "Nek tuni kula boten suka, mung kula bukake mawon, panumbas kula resik Rp 1.000.000,00 kawrat onten serat lulusan." |
| Tiong Hoa | : | "Kula bektane kapale saniki, nanging kedah disipengake sedalu sing ajeng tumbas, ditandha gedhog watuke, nek boten enggih siyos ditumbas." |
| Blantik | : | "Sing ajeng tumbas niku sinten?" |
| Tiong Hoa | : | "O, niku wados Bah, samang mung nyerepi jangkepe yatra Rp 1.000.000,00 kejawi kalong ujuran teng kula. |
| Blantik | : | "O, nek prekawis ujuran kula boten saged nyukani. Sasat nama tuni, mang pados ujuran saking ngrika. |
| Tiong Hoa | : | "Mangsa alama tiyang tumbas ditedhani ujuran." |
| Blantik | : | "Ujurane yatra Rp 1.000.000,00 pinten ? |
| Tiong Hoa | : | "Ming Rp 40.000,00 petangan 2,5%." |
| Blantik | : | "Enggih tah gampil, nek saged pajeng buk sapanumbas kula Rp 1.000.000,00." |
(Pethikan Serat Erang-erang)
kanthi ewah-ewahan.
VI. KASUSASTRAN
A. Tembang macapat pethikan saka layang Wedhatama iki tembangna!
SINOM
1. Nulada laku utama,
tumrap ing wong tanah Jawi,
wong agung ing Ngeksiganda,
Panembahan Senapati,
kapati amarsudi,
sudane hawa lan napsu,
pinesu tapa-brata,
tanapi ing siyang-ratri,
amamangun karyenak tyasing sasama.
128
