Kaca iki wis divalidasi
12 AGUSTUS
No. 179. Utusan murid pitung puluh loro.
Wis apik banget meditasi iki, jen mung di-limbang2 saprapat djam bab sabda Dalem iki: ,,Panenane mono akeh, nanging sing derep mung setitik".
Saiki wektu panen. Wong akeh satemene wis kepengin mangerti marang sapa kang bisa ngentasake sukmane saka ing dosa, sapa kang bisa nentremake atine. Akeh uga durung ngerti marang sing kuwasa kaja ngono, j.i. Sang Kristus.
Apa aku ing saben dinane njenjuwun marang Bendara sing nderepake, j.i. Allah Hjang Rama, supaja karsaa ngutus wong derep, j.i. Imam², Suster², Bruder², lan wong Katulik akeh kang sregep?
Apa aku bokmenawa wedi diutus, ditimbali ?
13 AGUSTUS
No. 180. Bilahi, kowe Korosaim, Betsaida, Kapharnaum.
Akeh kang ngantu² supaja dosane ditebus, nanging durung ngerti dalane menjang Sri Jesus. Iku kerep kelakon, amarga kesede lan wedine wong Katulik, utawa amarga kelakuane wong Katulik kang ala, nganti tuladane wong Katulik iki malah saja mbingungake wong lija kang satemene kepengin ngerti marang Sri Jesus.
Uga tansah ana wong maneh, kang atos atine, kang ora gelem ngandel ing Sang Kristus, kang luwih seneng nuruti umuke lan djenese.
Apa aku dadi wong kaja ngono? Aku — Warga Konggregasi? Apa aku njingkiri panggoda kabeh, luwih² panggoda djenes lan umuk?
128
