ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦪꦺꦴꦲ꦳ꦤꦼꦱ꧀
꧇꧑꧇
1꧋ꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ꧈ꦠꦼꦩ꧀ꦧꦸꦁꦮꦶꦱ꧀ꦲꦺꦤꦺꦁ꧉ꦠꦼꦩ꧀ꦧꦸꦁꦲꦶꦏꦶꦩꦲꦸꦤꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦠꦼꦩ꧀ꦧꦸꦁꦲꦶꦏꦶꦪꦥꦚ꧀ꦕꦺꦤ꧀ꦒꦸꦱ꧀ꦠꦶꦄꦭ꧀ꦭꦃ꧉ 2ꦱꦏ꧀ꦢꦸꦫꦸꦁꦔꦺꦗꦒꦠ꧀ꦲꦺꦤꦺꦁ꧈ꦠꦼꦩ꧀ꦧꦸꦁꦮꦶꦱ꧀ꦢꦢꦶꦱꦶꦗꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ 3ꦱꦼꦩ꧀ꦧꦫꦁꦲꦺꦤꦺꦁꦔꦺꦱꦁꦏꦠꦼꦩ꧀ꦧꦸꦁꦭꦤ꧀ꦠꦤ꧀ꦥꦠꦼꦩ꧀ꦧꦸꦁꦪꦲꦺꦴꦫꦲꦺꦤꦺꦁꦲꦥꦲꦥ꧉ 4ꦠꦼꦩ꧀ꦧꦸꦁꦏꦸꦮꦶꦱꦸꦩ꧀ꦧꦼꦂꦫꦺꦲꦸꦫꦶꦥ꧀ꦭꦤ꧀ꦲꦸꦫꦶꦥ꧀ꦏꦸꦮꦶꦢꦢꦶꦥꦼꦥꦢꦁꦔꦺꦩꦤꦸꦁꦱ꧉ 5ꦥꦼꦥꦢꦁꦱꦼꦩ꧀ꦭꦺꦴꦫꦺꦴꦠ꧀ꦲꦶꦁꦥꦼꦥꦼꦠꦼꦁꦭꦤ꧀ꦥꦼꦥꦼꦠꦼꦁꦲꦺꦴꦫꦧꦶꦱꦩꦠꦺꦤ꧀ꦤꦶ꧉
6-7꧋ꦲꦺꦤꦺꦁꦱꦏ꧀ꦮꦶꦗꦶꦤꦺꦮꦺꦴꦁꦱꦶꦁꦗꦼꦤꦼꦁꦔꦺꦪꦺꦴꦲꦤꦼꦱ꧀꧈ꦪꦺꦴꦲꦤꦼꦱ꧀ꦲꦶꦏꦶꦱꦶꦁꦢꦶꦏꦺꦴꦁꦏꦺꦴꦤ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦢꦢꦶꦱꦼꦏ꧀ꦱꦶꦤꦺꦥꦼꦥꦢꦁ꧉ꦠꦼꦏꦤꦺꦪꦺꦴꦲꦤꦼꦱ꧀ꦤꦩꦸꦁꦏꦁꦒꦺꦴꦤ꧀ꦢꦸꦤꦸꦁꦔꦏꦺꦩꦫꦁꦮꦺꦴꦁꦮꦺꦴꦁ꧈ꦱꦸꦥꦪꦥꦢꦥꦽꦕꦪꦩꦫꦁꦥꦼꦥꦢꦁꦲꦶꦏꦶ꧉ 8ꦪꦺꦴꦲꦤꦼꦱ꧀ꦢꦺꦮꦺꦢꦸꦢꦸꦥꦼꦥꦢꦁ꧉ꦢꦺꦏ꧀ꦤꦺꦤꦩꦸꦁꦔꦧꦂꦫꦏꦺꦥꦼꦥꦢꦁꦏꦸꦮꦶꦱꦥ꧉ 9ꦥꦼꦥꦢꦁꦱꦶꦁꦱꦼꦗꦠꦶꦲꦶꦏꦶꦲꦉꦥ꧀ꦠꦼꦏꦭꦤ꧀ꦩꦢꦁꦔꦶꦏꦧꦺꦃꦩꦤꦸꦁꦱ꧉
10꧋ꦠꦼꦩ꧀ꦧꦸꦁꦮꦶꦱ꧀ꦠꦼꦏꦤꦁꦗꦒꦠ꧀꧈ꦤꦁꦔꦶꦁꦱꦼꦤꦗꦤ꧀ꦤꦗꦒꦠ꧀ꦲꦶꦏꦶꦲꦺꦤꦺꦁꦔꦺꦱꦁꦏꦢꦺꦏ꧀ꦤꦺ꧈ꦗꦒꦠ꧀ꦲꦺꦴꦫꦤꦶꦠꦺꦤ꧀ꦤꦶꦢꦺꦏ꧀ꦤꦺ꧉ 11ꦠꦼꦩ꧀ꦧꦸꦁꦤꦼꦏꦤꦶꦧꦁꦱꦤꦺꦢꦺꦮꦺ꧈ꦤꦁꦔꦶꦁꦧꦁꦱꦤꦺꦢꦺꦮꦺꦲꦺꦴꦫꦒꦼꦊꦩ꧀ꦤꦩ꧀ꦥꦢꦺꦏ꧀ꦤꦺ꧉ 12ꦤꦁꦔꦶꦁꦏꦧꦺꦃꦮꦺꦴꦁꦱꦶꦁꦤꦩ꧀ꦥꦢꦺꦏ꧀ꦤꦺꦭꦤ꧀ꦥꦽꦕꦪꦩꦫꦁꦢꦺꦏ꧀ꦤꦺꦥꦢꦢꦶꦲꦏꦸꦲꦤꦏ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ 13ꦧꦶꦱꦤꦺꦢꦢꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦲꦺꦴꦫꦗꦭꦂꦫꦤ꧀ꦩꦤꦸꦁꦱꦱꦶꦁꦔ꧀ꦭꦲꦶꦂꦫꦏꦺꦲꦺꦴꦫ꧈ꦤꦁꦔꦶꦁꦗꦭꦂꦫꦤ꧀ꦭꦲꦶꦂꦱꦁꦏꦒꦸꦱ꧀ꦠꦶꦄꦭ꧀ꦭꦃ꧉
14꧋ꦠꦼꦩ꧀ꦧꦸꦁꦢꦢꦶꦩꦤꦸꦁꦱꦮꦸꦗꦸꦠ꧀ꦢꦒꦶꦁꦭꦤ꧀ꦏꦸꦭꦶꦠ꧀꧈ꦢꦺꦏ꧀ꦤꦺꦩꦁꦒꦺꦴꦤ꧀ꦕꦩ꧀ꦥꦸꦂꦏꦫꦺꦴꦲꦮꦏ꧀ꦏꦺꦢꦺꦮꦺ꧉ꦲꦮꦏ꧀ꦏꦺꦢꦺꦮꦺꦥꦢꦚꦼꦏ꧀ꦱꦺꦤ꧀ꦤꦶꦒꦼꦢꦺꦤꦺꦏ꧀ꦮꦱꦤꦺ꧈ꦱꦶꦁꦤꦩꦸꦁꦲꦤꦏ꧀ꦏꦺꦱꦶꦁꦲꦺꦴꦫꦲꦺꦤꦺꦁꦠꦸꦁꦒꦭ꧀ꦭꦺꦭꦤ꧀ꦱꦶꦁꦏꦼꦧꦼꦏ꧀ꦏꦮꦼꦭꦱ꧀ꦱꦤ꧀ꦭꦤ꧀ꦏꦧꦼꦤꦼꦂꦫꦤ꧀ ꦧꦶꦱꦤꦩ꧀ꦥꦱꦁꦏꦧꦥꦏ꧀ꦏꦺ꧉
15꧋ꦪꦲꦶꦏꦶꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦪꦺꦴꦲꦤꦼꦱ꧀ ꦢꦺꦴꦁꦔꦺꦢꦺꦏ꧀ꦤꦺꦔꦧꦂꦔꦧꦂꦫꦏꦺ꧈ꦔꦺꦴꦩꦺꦴꦁ:“ꦪꦮꦺꦴꦁꦲꦶꦏꦶꦱꦶꦁꦠꦏ꧀ꦲꦺꦴꦩꦺꦴꦁ꧈ꦢꦺꦴꦁꦔꦺꦲꦏꦸꦔꦺꦴꦩꦺꦴꦁ:'ꦱꦏ꧀ꦲꦩ꧀ꦧꦸꦫꦶꦏꦸꦧꦏꦭ꧀ꦲꦺꦤꦺꦁꦮꦺꦴꦁꦠꦼꦏ꧈ꦤꦁꦔꦶꦁꦢꦺꦏ꧀ꦤꦺꦭꦸꦮꦶꦃꦤ꧀ꦢꦶꦱꦶꦏ꧀ꦠꦼꦤꦶꦩ꧀ꦧꦁꦲꦏꦸ꧈ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦲꦺꦤꦺꦁꦱꦏ꧀ꦢꦸꦫꦸꦁꦔꦺꦲꦏꦸꦭꦲꦶꦂ꧉’”
16꧋ꦏꦧꦼꦕꦶꦏ꧀ꦏꦤ꧀ꦤꦺꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦒꦼꦢꦺꦧꦔꦼꦠ꧀꧈ꦱꦁꦏꦭꦸꦧꦺꦂꦫꦺꦏꦧꦼꦕꦶꦏ꧀ꦏꦤ꧀ꦏꦸꦮꦶꦲꦮꦏ꧀ꦏꦺꦢꦺꦮꦺꦏꦧꦺꦃꦱꦧꦼꦤ꧀ꦢꦶꦤꦤꦩ꧀ꦥꦧꦼꦂꦏꦃꦠꦤ꧀ꦥꦩꦤ꧀ꦢꦼꦏ꧀꧈ 17ꦧꦼꦤꦼꦂ꧈ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃꦠꦼꦏꦤꦺꦏꦫꦺꦴꦤꦧꦶꦩꦺꦴꦱꦼꦱ꧀ ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁꦔ꧀ꦒꦮꦏꦧꦼꦕꦶꦏ꧀ꦏꦤ꧀ꦤꦺꦭꦤ꧀ꦏꦮꦸꦗꦸꦠꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦩꦫꦁꦲꦮꦏ꧀ꦏꦺꦢꦺꦮꦺ꧉ 18ꦲꦺꦴꦫꦲꦺꦤꦺꦁꦮꦺꦴꦁꦱꦶꦗꦶꦮꦲꦺꦱꦶꦁꦠꦲꦸꦮꦼꦫꦸꦃꦒꦸꦱ꧀ꦠꦶꦄꦭ꧀ꦭꦃ꧈ꦤꦁꦔꦶꦁꦲꦤꦏ꧀ꦏꦺ꧈ꦱꦶꦁꦲꦺꦴꦫꦲꦺꦤꦺꦁꦠꦸꦁꦒꦭ꧀ꦭꦺ꧈ꦱꦶꦁꦮꦸꦗꦸꦠ꧀ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦢꦢꦶꦱꦶꦗꦶꦏꦫꦺꦴꦧꦥꦏ꧀ꦏꦺ꧈ꦢꦺꦏ꧀ꦤꦺꦱꦶꦁꦔꦼꦠꦺꦴꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃꦩꦫꦁꦲꦮꦏ꧀ꦏꦺꦢꦺꦮꦺ꧉
19꧋ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦤꦁꦏꦸꦠꦪꦺꦫꦸꦱꦭꦺꦩ꧀ꦥꦢꦏꦺꦴꦁꦏꦺꦴꦤ꧀ꦤꦤ꧀ꦥꦫꦲꦶꦩꦩ꧀ꦭꦤ꧀ꦥꦫꦥꦼꦭꦢꦺꦤ꧀ꦤꦺꦒꦿꦺꦗꦒꦼꦢꦺꦤꦁꦔ꧀ꦒꦺꦴꦤ꧀ꦤꦺꦪꦺꦴꦲꦤꦼꦱ꧀꧈ꦏꦺꦴꦁꦏꦺꦴꦤ꧀ꦠꦏꦺꦴꦤ꧀ ꦢꦺꦏ꧀ꦤꦺꦏꦸꦮꦶꦱꦏ꧀ꦗꦤꦺꦱꦥ꧉
20꧋ꦪꦺꦴꦲꦤꦼꦱ꧀ꦱꦮꦸꦫꦤ꧀ꦤꦺꦪꦧ꧀ꦭꦏꦮꦲꦺ:ꦢꦺꦏ꧀ꦤꦺꦔꦏꦺꦴꦤ꧀ꦤꦶꦤꦺꦏ꧀ꦢꦸꦢꦸꦏꦿꦶꦱ꧀ꦡꦸꦱ꧀꧈
21꧋“ꦭꦃꦏꦺꦴꦮꦺꦏꦸꦮꦶꦱꦥ?ꦲꦥꦏꦺꦴꦮꦺꦏꦸꦮꦶꦩꦼꦤꦮꦤꦧꦶꦌꦭꦶꦪ?”
꧋“ꦢꦸꦢꦸ!”
꧋“ꦲꦥꦏꦺꦴꦮꦺꦏꦸꦮꦶꦤꦧꦶꦱꦶꦁꦏꦸꦢꦸꦠꦼꦏ?”
꧋“ꦪꦢꦸꦢꦸ!”
22꧋“ꦭꦃꦱꦥ?ꦲꦩ꧀ꦧꦺꦴꦏ꧀ꦔꦺꦴꦩꦺꦴꦁꦠ?ꦭꦃꦩꦼꦁꦏꦺꦴꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀ꦔꦺꦴꦩꦺꦴꦁꦲꦥꦏꦫꦺꦴꦮꦺꦴꦁꦮꦺꦴꦁꦱꦶꦁꦔꦺꦴꦁꦏꦺꦴꦤ꧀ꦲꦮꦏ꧀ꦏꦺꦢꦺꦮꦺ?”
23꧋ꦪꦺꦴꦲꦤꦼꦱ꧀ꦱꦼꦩꦲꦸꦂꦔꦁꦒꦺꦴꦠꦼꦩ꧀ꦧꦸꦁꦔꦺꦤꦧꦶꦪꦺꦱꦪ:
“ꦲꦏꦸꦲꦶꦏꦶꦱ꧀ꦮꦫꦱꦶꦁꦕꦼꦭꦸꦏ꧀ꦕꦼꦭꦸꦏ꧀ꦤꦁꦮꦸꦱ꧀ꦠꦺꦤ꧀:
ꦢꦭꦤ꧀ꦤꦺꦢꦶꦫꦠꦏꦁꦒꦺꦴꦒꦸꦱ꧀ꦠꦶ!”
24꧋ꦮꦺꦴꦁꦮꦺꦴꦁꦱꦶꦁꦥꦶꦠꦏꦺꦴꦤ꧀ꦤꦤ꧀ꦩꦫꦁꦪꦺꦴꦲꦤꦼꦱ꧀ꦏꦸꦮꦶꦲꦸꦒꦮꦺꦴꦁꦥ꦳ꦫꦶꦱꦶ꧉ 25ꦮꦺꦴꦁꦥ꦳ꦫꦶꦱꦶꦲꦶꦏꦶꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦼꦤꦺꦃꦩꦫꦁꦪꦺꦴꦲꦤꦼꦱ꧀:“ꦭꦃꦤꦺꦏ꧀ꦏꦺꦴꦮꦺꦢꦸꦢꦸꦏꦿꦶꦱ꧀ꦡꦸꦱ꧀ꦭꦤ꧀ꦢꦸꦢꦸꦤꦧꦶꦌꦭꦶꦪꦭꦤ꧀ꦢꦸꦢꦸꦤꦧꦶꦱꦶꦁꦏꦸꦢꦸꦠꦼꦏ꧈ꦭꦃꦏꦺꦴꦮꦺꦏꦺꦴꦏ꧀ꦲꦩ꧀ꦧꦥ꧀ꦠꦶꦱ꧀ꦱꦶꦮꦺꦴꦁꦮꦺꦴꦁ?”
26꧋ꦪꦺꦴꦲꦤꦼꦱ꧀ꦱꦼꦩꦲꦸꦂ:“ꦏꦺꦴꦮꦺꦥꦢꦔꦼꦂꦠꦶꦤꦺꦏ꧀ꦲꦏꦸꦲꦩ꧀ꦧꦥ꧀ꦠꦶꦱ꧀ꦏꦫꦺꦴꦧꦚꦸ꧈ꦤꦁꦔꦶꦁꦤꦁꦠꦼꦔꦃꦩꦸꦲꦺꦤꦺꦁꦱꦏ꧀ꦮꦶꦗꦶꦤꦺꦮꦺꦴꦁꦱꦶꦁꦏꦺꦴꦮꦺꦢꦸꦫꦸꦁꦏꦼꦤꦭ꧀꧈ 27ꦲꦺꦴꦫꦱꦸꦮꦶꦩꦼꦤꦺꦃꦏꦺꦴꦮꦺꦧꦏꦭ꧀ꦮꦼꦫꦸꦃꦥꦼꦁꦒꦮꦺꦤꦺꦢꦺꦏ꧀ꦤꦺ꧉ꦤꦁꦔꦶꦁꦲꦏꦸꦲꦗꦢꦶꦥꦢꦏ꧀ꦏꦏꦺꦏꦫꦺꦴꦢꦺꦏ꧀ꦤꦺ꧈ꦲꦮꦶꦠ꧀ꦤꦭꦺꦤ꧀ꦤꦶꦱꦼꦥꦠꦸꦤꦺꦢꦺꦏ꧀ꦤꦺꦮꦲꦺꦲꦏꦸꦢꦸꦫꦸꦁꦥꦤ꧀ꦠꦼꦱ꧀꧈”
28꧋ꦮꦺꦴꦁꦮꦺꦴꦁꦱꦶꦁꦥꦶꦠꦏꦺꦴꦤ꧀ꦤꦤ꧀ꦏꦸꦮꦶꦩꦲꦸꦤꦁꦢꦺꦱꦨꦺꦠꦤꦶ꧈ꦤꦁꦮꦺꦠꦤꦺꦭꦫꦪꦺꦴꦂꦢꦤ꧀꧈ꦪꦺꦴꦲꦤꦼꦱ꧀ꦲꦩ꧀ꦧꦥ꧀ꦠꦶꦱ꧀ꦱꦶꦮꦺꦴꦁꦮꦺꦴꦁꦤꦁꦭꦫꦲꦶꦏꦶ꧉
29꧋ꦲꦶꦁꦲꦺꦱꦸꦏ꧀ꦏꦺꦪꦺꦴꦲꦤꦼꦱ꧀ꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦩꦫꦤꦶꦢꦺꦏ꧀ꦤꦺ꧉ꦪꦺꦴꦲꦤꦼꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦢꦼꦭꦺꦴꦏ꧀ꦏꦼꦤ꧀ꦏꦲꦺ!ꦪꦲꦶꦏꦸꦕꦼꦩ꧀ꦥꦺꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦤꦼꦧꦸꦱ꧀ꦢꦺꦴꦱꦤꦺꦩꦤꦸꦁꦱ꧉ 30ꦪꦮꦺꦴꦁꦲꦶꦏꦶꦱꦶꦁꦠꦏ꧀ꦲꦺꦴꦩꦺꦴꦁꦏꦲꦺ꧈ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦠꦼꦏꦱꦏ꧀ꦲꦩ꧀ꦧꦸꦫꦶꦏꦸ꧈ꦤꦁꦔꦶꦁꦲꦺꦤꦺꦁꦔꦺꦮꦶꦱ꧀ꦏꦮꦶꦠ꧀ꦩ꧀ꦧꦶꦪꦺꦤ꧀ ꦱꦏ꧀ꦢꦸꦫꦸꦁꦔꦺꦲꦏꦸꦭꦲꦶꦂ꧉ 31ꦲꦏꦸꦢꦺꦮꦺꦩꦲꦸꦤꦺꦪꦢꦸꦫꦸꦁꦤꦶꦠꦺꦤ꧀ꦤꦶꦢꦺꦏ꧀ꦤꦺ꧉ꦤꦁꦔꦶꦁꦲꦼꦁꦒꦺꦴꦤ꧀ꦏꦸꦲꦩ꧀ꦧꦥ꧀ꦠꦶꦱ꧀ꦏꦫꦺꦴꦧꦚꦸꦏꦸꦮꦶꦱꦸꦥꦪꦧꦁꦱꦆꦱꦿꦌꦭ꧀ꦧꦶꦱꦤꦶꦠꦺꦤ꧀ꦤꦶꦢꦺꦏ꧀ꦤꦺꦏꦸꦮꦶꦱꦥ꧉”
32꧋ꦪꦺꦴꦲꦤꦼꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦲꦏꦸꦮꦼꦫꦸꦃꦫꦺꦴꦃꦱꦸꦕꦶꦏꦪꦩꦤꦸꦏ꧀ꦢꦫꦩꦼꦢꦸꦤ꧀ꦱꦁꦏꦭꦔꦶꦠ꧀ꦠꦼꦫꦸꦱ꧀ꦩꦺꦚ꧀ꦕ꧀ꦭꦺꦴꦏ꧀ꦏꦶꦢꦺꦏ꧀ꦤꦺ꧉ 33ꦩꦲꦸꦤꦺꦲꦏꦸꦲꦺꦴꦫꦤꦶꦠꦺꦤ꧀ꦤꦶꦢꦺꦏ꧀ꦤꦺ꧉ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸꦲꦩ꧀ꦧꦥ꧀ꦠꦶꦱ꧀ꦏꦫꦺꦴꦧꦚꦸ꧈ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦔꦺꦴꦩꦺꦴꦁꦩꦫꦁꦲꦏꦸ:'ꦤꦺꦏ꧀ꦏꦺꦴꦮꦺꦮꦼꦫꦸꦃꦫꦺꦴꦃꦱꦸꦕꦶꦩꦼꦢꦸꦤ꧀ꦠꦼꦫꦸꦱ꧀ꦩꦺꦚ꧀ꦕ꧀ꦭꦺꦴꦏ꧀ꦏꦶꦮꦺꦴꦁ꧈ꦪꦮꦺꦴꦁꦏꦸꦮꦶꦱꦶꦁꦧꦏꦭ꧀ꦲꦩ꧀ꦧꦥ꧀ꦠꦶꦱ꧀ꦏꦫꦺꦴꦫꦺꦴꦃꦱꦸꦕꦶ!’ 34ꦱꦲꦶꦏꦶꦲꦏꦸꦮꦶꦱ꧀ꦮꦼꦫꦸꦃꦢꦺꦮꦺꦏꦫꦺꦴꦩꦿꦶꦥꦠ꧀ꦏꦸ꧈ꦩꦸꦭꦤꦺꦲꦏꦸꦔꦼꦂꦠꦶꦠꦼꦤꦤ꧀ꦤꦺꦏ꧀ꦢꦺꦏ꧀ꦤꦺꦏꦸꦮꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧉”
35꧋ꦲꦶꦁꦲꦺꦱꦸꦏ꧀ꦏꦺꦪꦺꦴꦲꦤꦼꦱ꧀ꦪꦤꦁꦏꦺꦴꦤꦺꦴꦩꦼꦤꦺꦃꦏꦫꦺꦴꦩꦸꦫꦶꦢ꧀ꦭꦺꦴꦫꦺꦴ꧉ 36ꦏꦢꦸꦁꦒꦸꦱ꧀ꦠꦶꦪꦺꦯꦸꦱ꧀ꦭꦶꦮꦠ꧀ ꦪꦺꦴꦲꦤꦼꦱ꧀ꦠꦼꦫꦸꦱ꧀ꦚꦮꦁꦢꦺꦏ꧀ꦤꦺꦏꦫꦺꦴꦔꦺꦴꦩꦺꦴꦁ:“ꦪꦏꦸꦮꦶꦕꦼꦩ꧀ꦥꦺꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦧꦏꦭ꧀ꦢꦢꦶꦏꦸꦂꦧꦤ꧀ꦤꦺꦩꦤꦸꦁꦱ꧉”
37꧋ꦩꦸꦫꦶꦢ꧀ꦭꦺꦴꦫꦺꦴꦩꦲꦸꦏꦿꦸꦔꦸꦪꦺꦴꦲꦤꦼꦱ꧀ꦔꦺꦴꦩꦺꦴꦁꦔꦺꦴꦤꦺꦴ꧈ꦩꦸꦭꦤꦺꦠꦼꦫꦸꦱ꧀ꦥꦢꦩꦺꦭꦸꦒꦸꦱ꧀ꦠꦶꦪꦺꦯꦸꦱ꧀꧈ 38ꦒꦸꦱ꧀ꦠꦶꦪꦺꦯꦸꦱ꧀ꦤꦺꦴꦭꦺꦃꦲꦩ꧀ꦧꦸꦫꦶꦮꦼꦫꦸꦃꦮꦺꦴꦁꦭꦺꦴꦫꦺꦴꦩꦲꦸꦩꦺꦭꦸꦢꦺꦏ꧀ꦤꦺꦠꦼꦫꦸꦱ꧀ꦠꦏꦺꦴꦤ꧀:“ꦏꦺꦴꦮꦺꦥꦢꦲꦉꦥ꧀ꦤꦁꦲꦼꦤ꧀ꦢꦶ?”
꧋ꦮꦺꦴꦁꦔꦺꦥꦢꦱꦼꦩꦲꦸꦂ:“ꦒꦸꦫꦸ꧈ꦲꦺꦴꦩꦃꦩꦸꦤꦁꦲꦼꦤ꧀ꦢꦶ?”
39꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲ꦳ꦪꦸꦏ꧀ꦩꦺꦭꦸꦲꦏꦸ꧈ꦩꦼꦁꦏꦺꦴꦏꦺꦴꦮꦺꦭꦲꦸꦠ꧀ꦮꦼꦫꦸꦃꦢꦺꦮꦺ!”ꦩꦸꦭꦤꦺꦠꦼꦫꦸꦱ꧀ꦥꦢꦩꦺꦭꦸꦭꦤ꧀ꦥꦢꦮꦼꦫꦸꦃꦲꦺꦴꦩꦃꦲꦺꦱꦶꦁꦢꦶꦲꦼꦁꦒꦺꦴꦤ꧀ꦤꦶꦒꦸꦱ꧀ꦠꦶꦪꦺꦯꦸꦱ꧀꧈ꦩ꧀ꦧꦼꦔꦶꦤꦺꦥꦢꦔꦶꦤꦼꦥ꧀ꦤꦁꦏꦺꦴꦤꦺꦴ꧈ꦲꦮꦶꦠ꧀ꦠꦼꦏꦤꦺꦮꦶꦱ꧀ꦱꦺꦴꦫꦺ꧈ꦏꦶꦫꦏꦶꦫꦗꦩ꧀ꦥꦥꦠ꧀꧈
40꧋ꦩꦸꦫꦶꦢ꧀ꦭꦺꦴꦫꦺꦴꦩꦲꦸꦱꦶꦁꦏꦿꦸꦔꦸꦱꦁꦏꦪꦺꦴꦲꦤꦼꦱ꧀ꦠꦼꦫꦸꦱ꧀ꦩꦺꦭꦸꦒꦸꦱ꧀ꦠꦶꦪꦺꦯꦸꦱ꧀ ꦱꦶꦁꦱꦶꦗꦶꦗꦼꦤꦼꦁꦔꦺꦄꦤ꧀ꦢꦿꦺꦪꦱ꧀ ꦱꦼꦢꦸꦭꦸꦂꦫꦺꦱꦶꦩꦺꦴꦤ꧀ꦦꦺꦠꦿꦸꦱ꧀꧈ 41ꦲꦺꦱꦸꦏ꧀ꦏꦺꦄꦤ꧀ꦢꦿꦺꦪꦱ꧀ꦠꦼꦫꦸꦱ꧀ꦒꦼꦭꦶꦱ꧀ꦒꦼꦭꦶꦱ꧀ꦔ꧀ꦒꦺꦴꦭꦺꦏ꧀ꦏꦶꦱꦶꦩꦺꦴꦤ꧀ ꦢꦶꦲꦺꦴꦩꦺꦴꦁꦔꦶ:“ꦲꦮꦏ꧀ꦏꦺꦢꦺꦮꦺꦮꦶꦱ꧀ꦏꦼꦥꦼꦠꦸꦏ꧀ꦏꦫꦺꦴꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦱꦶꦁꦮꦶꦱ꧀ꦢꦶꦗꦚ꧀ꦗꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ!”
42꧋ꦄꦤ꧀ꦢꦿꦺꦪꦱ꧀ꦠꦼꦫꦸꦱ꧀ꦔꦼꦠꦼꦂꦫꦏꦺꦱꦶꦩꦺꦴꦤ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀꧈
꧋ꦒꦸꦱ꧀ꦠꦶꦪꦺꦯꦸꦱ꧀ꦚꦮꦁꦱꦶꦩꦺꦴꦤ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦏꦸꦮꦶꦭꦲꦸꦠ꧀ꦱꦶꦩꦺꦴꦤ꧀ꦲꦤꦏ꧀ꦏꦺꦪꦺꦴꦲꦤꦼꦱ꧀ꦠ?ꦱꦲꦶꦏꦶꦏꦺꦴꦮꦺꦠꦏ꧀ꦗꦼꦤꦼꦁꦔꦏꦺꦑꦺꦥ꦳ꦱ꧀!”꧌ꦠꦼꦩ꧀ꦧꦸꦁꦑꦺꦥ꦳ꦱ꧀ꦏꦸꦮꦶꦠꦸꦁꦒꦭ꧀ꦭꦺꦮꦲꦺꦏꦫꦺꦴꦦꦺꦠꦿꦸꦱ꧀ ꦠꦼꦒꦼꦱ꧀ꦱꦺ:ꦮꦠꦸ꧉)
43꧋ꦲꦺꦱꦸꦏ꧀ꦏꦺꦒꦸꦱ꧀ꦠꦶꦪꦺꦯꦸꦱ꧀ꦏꦼꦥꦺꦔꦶꦤ꧀ꦧꦸꦢꦭ꧀ꦤꦁꦓꦭꦶꦭꦺꦪ꧉ꦤꦁꦏꦤꦢꦺꦏ꧀ꦤꦺꦏꦼꦥꦼꦠꦸꦏ꧀ꦏꦫꦺꦴꦥ꦳ꦶꦭꦶꦥꦸꦱ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥ꦳ꦶꦭꦶꦥꦸꦱ꧀ ꦲ꦳ꦪꦸꦏ꧀ꦩꦺꦭꦸꦮꦲꦏꦸ!” 44ꦥ꦳ꦶꦭꦶꦥꦸꦱ꧀ꦏꦸꦮꦶꦩꦁꦒꦺꦴꦤꦺꦤꦁꦧꦺꦠ꧀ꦱꦲꦶꦢ꧈ꦠꦸꦁꦒꦭ꧀ꦭꦺꦮꦲꦺꦏꦫꦺꦴꦄꦤ꧀ꦢꦿꦺꦪꦱ꧀ꦭꦤ꧀ꦦꦺꦠꦿꦸꦱ꧀꧈ 45ꦥ꦳ꦶꦭꦶꦥꦸꦱ꧀ꦏꦢꦸꦁꦏꦼꦠꦼꦩꦸꦏꦫꦺꦴꦤꦠꦤꦲꦺꦭ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦮꦏ꧀ꦏꦺꦢꦺꦮꦺꦮꦶꦱ꧀ꦏꦼꦥꦼꦠꦸꦏ꧀ ꦏꦫꦺꦴꦪꦺꦯꦸꦱ꧀ ꦲꦤꦏ꧀ꦏꦺꦪꦺꦴꦱꦺꦥ꦳꧀ ꦮꦺꦴꦁꦟꦱꦫꦺꦠ꧀꧈ꦮꦺꦴꦁꦲꦶꦏꦶꦱꦶꦁꦢꦶꦲꦺꦴꦩꦺꦴꦁꦤꦁꦏꦶꦠꦧ꧀ꦏꦫꦺꦴꦤꦧꦶꦩꦺꦴꦱꦼꦱ꧀ꦭꦤ꧀ꦤꦧꦶꦭꦶꦪꦭꦶꦪꦤꦺ꧉”
46꧋ꦤꦠꦤꦲꦺꦭ꧀ꦱꦼꦩꦲꦸꦂ:“ꦮꦺꦴꦁꦟꦱꦫꦺꦠ꧀?ꦲꦃ꧈ꦱꦥꦱꦶꦁꦔꦤ꧀ꦢꦼꦭ꧀ꦤꦺꦏ꧀ꦟꦱꦫꦺꦠ꧀ꦏꦸꦮꦶꦔꦼꦠꦺꦴꦏ꧀ꦏꦏꦺꦧꦫꦁꦧꦼꦕꦶꦏ꧀!”ꦥ꦳ꦶꦭꦶꦥꦸꦱ꧀ꦱꦼꦩꦲꦸꦂ:“ꦲꦩ꧀ꦧꦺꦴꦏ꧀ꦲ꦳ꦪꦸꦏ꧀ꦢꦶꦠꦶꦠꦺꦤ꧀ꦤꦶꦢꦺꦮꦺꦠ꧉”
47꧋ꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦤꦠꦤꦲꦺꦭ꧀ꦠꦼꦏꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦃ꧈ꦪꦲꦶꦏꦶꦱꦶꦁꦗꦼꦤꦼꦁꦔꦺꦮꦺꦴꦁꦗꦸꦗꦸꦂ꧈ꦮꦺꦴꦁꦱꦶꦁꦏꦼꦤꦺꦁꦢꦶꦥꦽꦕꦪ꧉ꦪꦲꦶꦏꦶꦠꦸꦫꦸꦤ꧀ꦤꦤ꧀ꦤꦺꦮꦺꦴꦁꦆꦱꦿꦌꦭ꧀ꦠꦼꦤꦤ꧀!”
48꧋ꦤꦠꦤꦲꦺꦭ꧀ꦠꦼꦫꦸꦱ꧀ꦱꦼꦩꦲꦸꦂ:“ꦭꦺꦴ꧈ꦭꦃꦏꦺꦴꦮꦺꦏꦺꦴꦏ꧀ꦔꦼꦂꦠꦶꦲꦏꦸꦲꦶꦏꦶꦱꦥꦒꦸꦱ꧀ꦠꦶ?”ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦱꦏ꧀ꦢꦸꦫꦸꦁꦔꦺꦥ꦳ꦶꦭꦶꦥꦸꦱ꧀ꦔꦼꦗꦺꦏ꧀ꦏꦺꦴꦮꦺ꧈ꦲꦏꦸꦮꦶꦱ꧀ꦮꦼꦫꦸꦃꦏꦺꦴꦮꦺ꧈ꦢꦺꦴꦁꦔꦺꦏꦺꦴꦮꦺꦚ꧀ꦗꦒꦺꦴꦁꦤꦁꦔꦶꦱꦺꦴꦂꦫꦺꦮꦶꦠ꧀ꦲꦚ꧀ꦗꦶꦂ꧉”
49꧋ꦤꦠꦤꦲꦺꦭ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ꧈ꦪꦏꦺꦴꦮꦺꦏꦸꦮꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦠꦼꦤꦤ꧀꧈ꦏꦺꦴꦮꦺꦫꦠꦸꦤꦺꦧꦁꦱꦆꦱꦿꦌꦭ꧀!”
50꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦥꦏꦺꦴꦮꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦗꦭꦂꦫꦤ꧀ꦲꦏꦸꦔꦺꦴꦩꦺꦴꦁꦤꦺꦏ꧀ꦲꦏꦸꦮꦼꦫꦸꦃꦏꦺꦴꦮꦺꦚ꧀ꦗꦒꦺꦴꦁꦤꦁꦔꦶꦱꦺꦴꦂꦮꦶꦠ꧀ꦲꦚ꧀ꦗꦶꦂ?ꦢꦶꦠꦶꦠꦺꦤ꧀ꦤꦶꦠ!ꦏꦺꦴꦮꦺꦧꦏꦭ꧀ꦮꦼꦫꦸꦃꦊꦭꦏꦺꦴꦤ꧀ꦊꦭꦏꦺꦴꦤ꧀ꦭꦶꦪꦤꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦶꦏꦶ꧉” 51ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦠꦶꦠꦺꦤ꧀ꦤꦤ꧀ꦤꦢꦺꦮꦺꦠ!ꦏꦺꦴꦮꦺꦧꦏꦭ꧀ꦮꦼꦫꦸꦃꦭꦔꦶꦠ꧀ꦩꦼꦔꦭꦤ꧀ꦮꦼꦫꦸꦃꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃꦥꦢꦩꦸꦁꦒꦃꦩꦼꦢꦸꦤ꧀ꦔ꧀ꦭꦢꦺꦤ꧀ꦤꦶꦲꦤꦏ꧀ꦏꦺꦩꦤꦸꦁꦱ꧉”
꧇꧒꧇ 1꧋ꦊꦠ꧀ꦫꦺꦴꦁꦢꦶꦤꦤꦁꦏꦤ꧈ꦱꦏ꧀ꦮꦶꦗꦶꦤꦺꦏꦸꦠꦤꦁꦧꦮꦃꦓꦭꦶꦭꦺꦪ꧈ꦲꦺꦤꦺꦁꦏꦮꦶꦤ꧀ꦤꦤ꧀꧈ꦲꦶꦧꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦤꦁꦏꦺꦴꦤꦺꦴ꧉ 2ꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦲꦸꦒꦲꦺꦤ꧀ꦠꦸꦏ꧀ꦲꦸꦤ꧀ꦢꦁꦔꦤ꧀ ꦩꦸꦭꦤꦺꦪꦥꦢꦤꦁꦏꦺꦴꦤꦺꦴꦲꦩ꧀ꦧꦫꦁ꧉ 3ꦏꦢꦸꦁꦲꦺꦴꦩ꧀ꦧꦺꦤ꧀ꦤꦺꦮꦶꦱ꧀ꦲꦼꦤ꧀ꦠꦺꦏ꧀ꦲꦶꦧꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦢꦺꦏ꧀ꦤꦺ:“ꦪꦺꦯꦸꦱ꧀ ꦮꦺꦴꦁꦮꦺꦴꦁꦏꦼꦤ꧀ꦠꦺꦏ꧀ꦏꦤ꧀ꦲꦁꦒꦸꦂ꧉”
4꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦧꦸ꧈ꦲꦶꦏꦶꦲꦸꦫꦸꦱ꧀ꦱꦤ꧀ꦩꦸꦲꦥꦲꦸꦫꦸꦱ꧀ꦱꦤ꧀ꦏꦸ꧉ꦮꦏꦶꦭ꧀ꦏꦸꦢꦸꦫꦸꦁꦠꦼꦏꦏꦁꦒꦺꦴꦠꦸꦩꦤ꧀ꦢꦁ꧉”
5꧋ꦲꦶꦧꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦥꦫꦥꦼꦭꦢꦺꦤ꧀:“ꦲꦥꦠꦼꦩ꧀ꦧꦸꦁꦔꦺꦪꦺꦯꦸꦱ꧀ꦩꦫꦁꦏꦺꦴꦮꦺꦥꦢꦢꦶꦠꦤ꧀ꦢꦁꦔꦶ꧉”
6꧋ꦤꦁꦏꦺꦴꦤꦺꦴꦲꦺꦤꦺꦁꦏꦼꦤ꧀ꦢꦶꦮꦠꦸꦒꦼꦢꦺꦒꦼꦢꦺꦤꦼꦤꦼꦩ꧀꧈ꦏꦼꦤ꧀ꦢꦶꦱꦶꦗꦶꦧꦶꦱꦔꦼꦩꦺꦴꦠ꧀ꦏꦶꦫꦏꦶꦫꦱꦠꦸꦱ꧀ꦭꦶꦠꦼꦂ꧉ꦏꦼꦤ꧀ꦢꦶꦏꦼꦤ꧀ꦢꦶꦏꦸꦮꦶꦮꦢꦃꦧꦚꦸꦮꦶꦱꦸꦃꦲꦤ꧀ꦱꦸꦕꦶ꧈ꦩꦤꦸꦠ꧀ꦥꦼꦂꦤꦠꦤ꧀ꦤꦺꦲꦒꦩꦤꦺꦮꦺꦴꦁꦙꦸ꧉ 7ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦥꦫꦥꦼꦭꦢꦺꦤ꧀ꦔꦶꦱꦺꦤ꧀ꦤꦶꦏꦼꦤ꧀ꦢꦶꦏꦼꦤ꧀ꦢꦶꦤꦺꦏꦫꦺꦴꦧꦚꦸ꧉ꦏꦼꦤ꧀ꦢꦶꦤꦺꦠꦼꦫꦸꦱ꧀ꦢꦶꦲꦶꦱꦺꦤ꧀ꦤꦶꦏꦧꦺꦃꦱꦩ꧀ꦥꦺꦏ꧀ꦏꦼꦧꦼꦏ꧀꧈ 8ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦚ꧀ꦗꦶꦏꦸꦏꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦢꦶꦏꦺꦏ꧀ꦏꦏꦺꦥꦼꦔꦉꦥ꧀ꦥꦺꦥꦺꦱ꧀ꦠꦏꦺꦴꦁꦏꦺꦴꦤ꧀ꦔꦶꦕꦶꦥ꧀ꦥꦶ!”ꦥꦼꦭꦢꦺꦤ꧀ꦤꦺꦪꦩꦤꦸꦠ꧀ꦮꦲꦺ꧉ 9ꦥꦼꦔꦉꦥ꧀ꦥꦺꦥꦺꦱ꧀ꦠꦲꦺꦴꦫꦔꦼꦂꦠꦶꦧ꧀ꦭꦱ꧀ꦧꦧ꧀ꦱꦼꦩ꧀ꦧꦫꦁꦲꦶꦏꦶ꧉ꦱꦶꦁꦔꦼꦂꦠꦶꦪꦤꦩꦸꦁꦥꦫꦥꦼꦭꦢꦺꦤ꧀ꦱꦶꦁꦔꦶꦱꦺꦤ꧀ꦤꦶꦏꦼꦤ꧀ꦢꦶꦤꦺ꧉ꦏꦢꦸꦁꦥꦼꦔꦉꦥ꧀ꦥꦺꦥꦺꦱ꧀ꦠꦔꦶꦕꦶꦥ꧀ꦥꦶꦧꦚꦸꦤꦺꦱꦶꦁꦮꦶꦱ꧀ꦢꦢꦶꦲꦁꦒꦸꦂ꧈ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦤ꧀ꦠꦺꦤ꧀ꦤꦺꦭꦤꦁ: 10“ꦭꦸꦩꦿꦃꦲꦺꦲꦺꦴꦩ꧀ꦧꦺꦤ꧀ꦱꦶꦁꦲꦺꦤꦏ꧀ꦢꦺꦮꦺꦢꦶꦱꦸꦒꦸꦃꦲꦏꦺꦤ꧀ꦢꦶꦱꦶꦏ꧀ ꦭꦃꦤꦺꦏ꧀ꦮꦺꦴꦁꦮꦺꦴꦁꦮꦶꦱ꧀ꦮꦫꦱ꧀ꦩꦸꦠꦼꦫꦸꦱ꧀ꦱꦶꦁꦲꦺꦴꦫꦥꦠꦺꦏꦲꦺꦤꦏ꧀ꦢꦶꦲꦼꦠꦺꦴꦏ꧀ꦏꦏꦺ꧉ꦭꦃꦲꦶꦏꦶꦱꦶꦁꦲꦺꦤꦏ꧀ꦢꦺꦮꦺꦩꦤ꧀ꦢꦏ꧀ꦲꦩ꧀ꦧꦺꦴꦏ꧀ꦱꦸꦒꦸꦃꦲꦏꦺꦏꦺꦫꦶ!”
11꧋ꦠꦤ꧀ꦢꦤꦁꦏꦸꦠꦏꦤꦤꦁꦧꦮꦃꦓꦭꦶꦭꦺꦪꦲꦶꦏꦶꦠꦤ꧀ꦢꦱꦶꦁꦤ꧀ꦢꦶꦱꦶꦏ꧀ꦢꦺꦮꦺ꧈ꦏꦁꦒꦺꦴꦔꦼꦠꦺꦴꦏ꧀ꦏꦏꦺꦱꦼꦥꦶꦫꦒꦼꦢꦺꦤꦺꦏ꧀ꦮꦱꦤꦺꦒꦸꦱ꧀ꦠꦶꦪꦺꦯꦸꦱ꧀꧈ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦥꦽꦕꦪꦩꦫꦁꦢꦺꦏ꧀ꦤꦺ꧉
12꧋ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦠꦑꦥꦺꦂꦤꦏꦸꦩ꧀ ꦧꦉꦁꦏꦫꦺꦴꦲꦶꦧꦸꦤꦺ꧈ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉ꦤꦁꦔꦶꦁꦲꦺꦴꦫꦔꦶꦤꦼꦥ꧀ꦱꦸꦮꦶꦤꦁꦏꦺꦴꦤꦺꦴ꧉
13꧋ꦱꦲꦶꦏꦶꦮꦶꦱ꧀ꦚꦼꦢꦼꦏ꧀ꦏꦶꦫꦶꦪꦪꦥꦱ꧀ꦏꦲꦺꦮꦺꦴꦁꦙꦸ꧉ꦩꦸꦭꦤꦺꦪꦺꦯꦸꦱ꧀ꦧꦸꦢꦭ꧀ꦤꦁꦪꦺꦫꦸꦱꦭꦺꦩ꧀꧈ 14ꦤꦁꦭꦠꦂꦫꦺꦒꦿꦺꦗꦒꦼꦢꦺꦏꦺꦴꦤꦺꦴꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦮꦺꦴꦁꦮꦺꦴꦁꦢꦺꦴꦢꦺꦴꦭ꧀ꦭꦤ꧀꧈ꦲꦺꦤꦺꦁꦱꦶꦁꦢꦺꦴꦢꦺꦴꦭ꧀ꦱꦥꦶ꧈ꦭꦶꦪꦤꦺꦢꦺꦴꦢꦺꦴꦭ꧀ꦮꦼꦢꦸꦱ꧀ꦭꦤ꧀ꦲꦸꦒꦲꦺꦤꦺꦁꦱꦶꦁꦢꦺꦴꦢꦺꦴꦭ꧀ꦩꦤꦸꦏ꧀ꦢꦫ꧉ꦱꦶꦁꦠꦸꦏꦁꦔꦶꦗꦺꦴꦭ꧀ꦭꦶꦢꦸꦮꦶꦠ꧀ꦲꦩ꧀ꦧꦫꦁꦪꦲꦺꦤꦺꦁ꧉ 15ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔ꧀ꦒꦮꦺꦥꦼꦕꦸꦠ꧀ꦔꦁꦒꦺꦴꦠꦭꦶ꧉ꦮꦺꦴꦁꦮꦺꦴꦁꦱꦶꦁꦢꦺꦴꦢꦺꦴꦭ꧀ꦭꦤ꧀ꦮꦼꦢꦸꦱ꧀ꦱꦥꦶꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦭꦸꦔꦱꦁꦏꦏꦺꦴꦤꦺꦴ꧈ꦱꦏ꧀ꦏꦺꦮꦤ꧀ꦏꦺꦮꦤ꧀ꦤꦺꦲꦩ꧀ꦧꦫꦁ꧉ꦢꦸꦮꦶꦠ꧀ꦠꦺꦱꦶꦁꦠꦸꦏꦁꦔꦶꦗꦺꦴꦭ꧀ꦭꦶꦢꦸꦮꦶꦠ꧀ꦢꦶꦱꦼꦧꦂꦤꦁꦊꦩꦃꦭꦤ꧀ꦩꦺꦗꦩꦺꦗꦤꦺꦢꦶꦒ꧀ꦭꦺꦩ꧀ꦥꦁꦒ꧀ꦭꦺꦩ꧀ꦥꦁꦔꦏꦺꦏꦧꦺꦃ꧉ 16ꦱꦶꦁꦢꦺꦴꦢꦺꦴꦭ꧀ꦩꦤꦸꦏ꧀ ꦢꦫꦢꦶꦱꦼꦤꦺꦤ꧀ꦤꦶꦔꦺꦤꦺ:“ꦢꦶꦒꦮꦭꦸꦔꦏꦧꦺꦃꦢꦒꦁꦔꦤ꧀ꦩꦸꦏꦸꦮꦶ!ꦲꦺꦴꦩꦃꦲꦺꦧꦥꦏ꧀ꦏꦸꦲꦗꦢꦶꦒꦮꦺꦥꦱꦂ!” 17ꦏꦢꦸꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦮꦼꦫꦸꦃꦊꦭꦏꦺꦴꦤ꧀ꦲꦶꦏꦶ꧈ꦠꦼꦫꦸꦱ꧀ꦥꦢꦏꦺꦭꦶꦁꦔꦤ꧀ꦠꦸꦭꦶꦱ꧀ꦱꦤ꧀ꦤꦁꦏꦶꦠꦧ꧀ꦱꦶꦁꦔꦺꦴꦩꦺꦴꦁꦔꦺꦤꦺ:“ꦒꦸꦱ꧀ꦠꦶ꧈ꦏꦠꦿꦺꦱ꧀ꦤꦤ꧀ꦏꦸꦩꦫꦁꦲꦺꦴꦩꦃꦩꦸꦏꦪꦒꦼꦤꦶꦩꦸꦫꦸꦥ꧀꧈”
18꧋ꦥꦫꦥꦼꦔꦉꦥ꧀ꦥꦺꦮꦺꦴꦁꦙꦸꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦏꦸꦮꦶꦱꦥꦏꦺꦴꦏ꧀ꦮꦤꦶꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁꦭꦸꦔ?ꦲꦮꦏ꧀ꦏꦺꦢꦺꦮꦺꦏꦼꦥꦺꦔꦶꦤ꧀ꦮꦼꦫꦸꦃꦠꦤ꧀ꦢꦤꦺ꧉”
19꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦩ꧀ꦧꦺꦴꦏ꧀ꦒꦿꦺꦗꦒꦼꦢꦺꦲꦶꦏꦶꦢꦶꦧꦸꦧꦿꦃꦠ꧈ꦱꦏ꧀ꦗꦼꦫꦺꦴꦤꦺꦠꦼꦭꦸꦁꦢꦶꦤꦧꦏꦭ꧀ꦠꦏ꧀ꦢꦼꦏ꧀ꦤꦺꦩꦼꦤꦺꦃ꧉”
20꧋“ꦠꦼꦭꦸꦁꦢꦶꦤ?”ꦮꦺꦴꦁꦮꦺꦴꦁꦩꦲꦸꦱꦼꦩꦲꦸꦂ꧉“ꦥꦠꦁꦥꦸꦭꦸꦃꦤꦼꦩ꧀ꦠꦲꦸꦤ꧀ꦱꦸꦮꦺꦤꦺꦮꦺꦴꦁꦮꦺꦴꦁꦔ꧀ꦒꦮꦺꦒꦿꦺꦗꦲꦶꦏꦶ꧈ꦭꦃꦏꦺꦴꦮꦺꦏꦺꦴꦏ꧀ꦮꦤꦶꦔꦺꦴꦩꦺꦴꦁꦤꦺꦏ꧀ꦧꦶꦱꦔꦼꦢꦼꦏ꧀ꦏꦏꦺꦲꦶꦁꦠꦼꦭꦸꦁꦢꦶꦤ?”
21꧋ꦱꦏ꧀ꦗꦤꦺꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦔꦺꦴꦩꦺꦴꦁꦔꦏꦺꦧꦧ꧀ꦒꦿꦺꦗꦒꦼꦢꦺꦲꦶꦏꦶ꧈ꦤꦁꦔꦶꦁꦧꦧ꧀ꦧꦢꦤ꧀ꦤꦺꦢꦺꦏ꧀ꦤꦺꦢꦺꦮꦺ꧉ 22ꦊꦠ꧀ꦱꦸꦮꦶ꧈ꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦠꦔꦶꦩꦼꦤꦺꦃꦱꦁꦏꦥꦠꦶ꧈ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦏꦺꦭꦶꦁꦔꦤ꧀ꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦲꦶꦏꦶ꧉
23꧋ꦢꦺꦴꦁꦔꦺꦫꦶꦪꦪꦥꦱ꧀ꦏꦃꦒꦸꦱ꧀ꦠꦶꦪꦺꦯꦸꦱ꧀ꦤꦶꦤ꧀ꦢꦏ꧀ꦏꦏꦺꦠꦤ꧀ꦢꦠꦤ꧀ꦢꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺꦤꦁꦪꦺꦫꦸꦱꦭꦺꦩ꧀ꦏꦺꦴꦤꦺꦴ꧉ꦩꦸꦭꦤꦺꦮꦺꦴꦁꦲꦺꦴꦏꦺꦃꦠꦼꦫꦸꦱ꧀ꦥꦢꦥꦽꦕꦪꦩꦫꦁꦢꦺꦏ꧀ꦤꦺ꧉ 24-25ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺꦲꦺꦴꦫꦔꦤ꧀ꦢꦼꦭ꧀ꦩꦫꦁꦮꦺꦴꦁꦮꦺꦴꦁꦏꦸꦮꦶ꧈ꦲꦮꦶꦠ꧀ꦢꦺꦏ꧀ꦤꦺꦔꦼꦂꦠꦶꦲꦠꦶꦤꦺꦱꦶꦗꦶꦱꦶꦗꦶꦤꦺ꧉ꦲꦺꦴꦫꦲꦸꦱꦃꦲꦺꦤꦺꦁꦱꦶꦁꦔꦺꦴꦩꦺꦴꦁꦔꦶꦢꦺꦏ꧀ꦤꦺꦲꦥꦲꦥ꧈ꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺꦔꦼꦂꦠꦶꦚ꧀ꦗꦼꦫꦺꦴꦤꦺꦲꦠꦶꦤꦺꦩꦤꦸꦁꦱ꧉
꧇꧓꧇ 1꧋ꦲꦺꦤꦺꦁꦮꦺꦴꦁꦥ꦳ꦫꦶꦱꦶꦱꦶꦁꦗꦼꦤꦼꦁꦔꦺꦟꦶꦏꦺꦴꦢꦺꦩꦼꦱ꧀ ꦥꦼꦔꦉꦥ꧀ꦥꦺꦲꦒꦩꦙꦸ꧉ 2ꦲꦶꦁꦱꦏ꧀ꦮꦶꦗꦶꦤꦺꦮꦼꦔꦶꦟꦶꦏꦺꦴꦢꦺꦩꦼꦱ꧀ꦩꦫꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ꧈ꦲꦮꦏ꧀ꦏꦺꦢꦺꦮꦺꦔꦼꦂꦠꦶꦤꦺꦏ꧀ꦲꦼꦁꦒꦺꦴꦤ꧀ꦩꦸꦩꦸꦭꦁꦔꦶꦲꦮꦏ꧀ꦏꦺꦢꦺꦮꦺꦏꦸꦮꦶꦱꦁꦏꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦢꦺꦮꦺ꧉ꦲꦮꦶꦠ꧀ꦤꦺꦏ꧀ꦢꦸꦢꦸꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦔꦺꦴꦁꦏꦺꦴꦤ꧀ꦏꦺꦴꦮꦺ꧈ꦏꦺꦴꦮꦺꦲꦺꦴꦫꦧꦶꦱꦔꦼꦏꦺꦏ꧀ꦏꦶꦠꦤ꧀ꦢꦠꦤ꧀ꦢꦱꦶꦁꦔ꧀ꦒꦸꦩꦸꦤ꧀ꦤꦏꦺ꧉”
3꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀:ꦲꦺꦴꦫꦲꦺꦤꦺꦁꦮꦺꦴꦁꦧꦶꦱꦔꦿꦱꦏ꧀ꦏꦏꦺꦏꦿꦠꦺꦴꦤꦺꦒꦸꦱ꧀ꦠꦶꦄꦭ꧀ꦭꦃ꧈ꦤꦺꦏ꧀ꦮꦺꦴꦁꦏꦸꦮꦶꦲꦺꦴꦫꦭꦲꦶꦂꦱꦼꦥꦶꦱ꧀ꦱꦤ꧀ꦩꦼꦤꦺꦃ꧉”
4꧋ꦟꦶꦏꦺꦴꦢꦺꦩꦼꦱ꧀ꦠꦏꦺꦴꦤ꧀:“ꦩꦺꦴꦱꦺꦴꦏ꧀ꦮꦺꦴꦁꦮꦶꦱ꧀ꦠꦸꦮꦧꦶꦱꦭꦲꦶꦂꦩꦼꦤꦺꦃ?ꦭꦃꦏꦼꦥꦿꦶꦪꦺꦏꦸꦮꦶ?ꦩꦺꦴꦱꦺꦴꦏ꧀ꦩ꧀ꦊꦧꦸꦤꦁꦮꦼꦠꦼꦁꦔꦺꦲꦶꦧꦸꦤꦺꦠꦼꦫꦸꦱ꧀ꦢꦶꦭꦲꦶꦂꦫꦏꦺꦩꦼꦤꦺꦃ?”
5꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦶꦏꦶꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀ꦠꦼꦤꦤ꧀!ꦱꦥꦱꦶꦁꦲꦺꦴꦫꦭꦲꦶꦂꦱꦁꦏꦧꦚꦸꦭꦤ꧀ꦱꦁꦏꦫꦺꦴꦃꦱꦸꦕꦶꦲꦺꦴꦫꦧꦏꦭ꧀ꦧꦶꦱꦩ꧀ꦊꦧꦸꦏꦿꦠꦺꦴꦤꦺꦒꦸꦱ꧀ꦠꦶꦄꦭ꧀ꦭꦃ꧉ 6ꦩꦤꦸꦁꦱꦏꦸꦮꦶꦪꦤꦩꦸꦁꦧꦶꦱꦔ꧀ꦭꦲꦶꦂꦫꦏꦺꦲꦸꦫꦶꦥ꧀ꦏꦩꦤꦸꦁꦱꦤ꧀ ꦤꦁꦔꦶꦁꦱꦶꦁꦭꦲꦶꦂꦫꦺꦱꦁꦏꦫꦺꦴꦃꦱꦸꦕꦶꦏꦸꦮꦶꦲꦸꦫꦶꦥ꧀ꦲꦶꦁꦫꦺꦴꦃ꧉ 7ꦩꦸꦭꦤꦺꦏꦺꦴꦮꦺꦲꦗꦔ꧀ꦒꦸꦩꦸꦤ꧀ꦲꦏꦸꦩꦲꦸꦔꦺꦴꦩꦺꦴꦁ:'ꦏꦺꦴꦮꦺꦏꦸꦢꦸꦢꦶꦭꦲꦶꦂꦫꦏꦺꦱꦼꦥꦶꦱ꧀ꦱꦤ꧀ꦩꦼꦤꦺꦃ!’ 8ꦲꦔꦶꦤ꧀ꦏꦲꦺꦩ꧀ꦭꦏꦸꦮꦱꦏ꧀ꦏꦉꦥ꧀ꦥꦺ꧉ꦲꦮꦏ꧀ꦏꦺꦢꦺꦮꦺꦏꦿꦸꦔꦸꦱ꧀ꦮꦫꦤꦺ꧈ꦤꦁꦔꦶꦁꦲꦺꦴꦫꦮꦼꦫꦸꦃꦱꦁꦏꦔꦼꦤ꧀ꦢꦶꦠꦼꦏꦤꦺꦭꦤ꧀ꦤꦁꦲꦼꦤ꧀ꦢꦶꦥꦫꦤ꧀ꦤꦺ꧉ꦮꦺꦴꦁꦱꦶꦁꦢꦶꦭꦲꦶꦂꦫꦏꦺꦩꦼꦤꦺꦃꦏꦫꦺꦴꦫꦺꦴꦃꦱꦸꦕꦶꦪꦏꦪꦔꦺꦴꦤꦺꦴꦏꦸꦮꦶ꧉”
9꧋ꦟꦶꦏꦺꦴꦢꦺꦩꦼꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦏꦪꦔꦺꦴꦤꦺꦴꦏꦸꦮꦶꦧꦶꦱꦤꦺꦏꦼꦥꦿꦶꦪꦺ?”
10꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦭꦲꦸꦠ꧀ꦱꦏ꧀ꦮꦶꦗꦶꦤꦺꦒꦸꦫꦸꦱꦶꦁꦏꦼꦱꦸꦮꦸꦂꦧꦔꦼꦠ꧀ꦠꦤꦁꦆꦱꦿꦌꦭ꧀?ꦭꦃꦧꦧ꧀ꦏꦪꦔꦺꦴꦤꦺꦴꦮꦲꦺꦏꦺꦴꦏ꧀ꦲꦺꦴꦫꦢꦸꦤꦸꦁ꧉ 11ꦔꦤ꧀ꦢꦼꦭ꧀ꦭꦠ꧈ꦲꦏꦸꦔꦼꦂꦠꦶꦲꦥꦱꦶꦁꦠꦏ꧀ꦲꦺꦴꦩꦺꦴꦁꦭꦤ꧀ꦲꦏꦸꦔꦺꦴꦩꦺꦴꦁꦔꦏꦺꦧꦧ꧀ꦱꦶꦁꦲꦏꦸꦮꦼꦫꦸꦃꦢꦺꦮꦺ꧉ꦤꦁꦔꦶꦁꦏꦺꦴꦮꦺꦥꦢꦲꦺꦴꦫꦥꦽꦕꦪꦩꦫꦁꦲꦏꦸ꧉ 12ꦧꦧ꧀ꦱꦶꦁꦢꦶꦲꦭꦩ꧀ꦩꦶꦩꦤꦸꦁꦱꦲꦶꦁꦱꦧꦼꦤ꧀ꦢꦶꦤꦤꦺꦮꦲꦺꦏꦺꦴꦮꦺꦲꦺꦴꦫꦥꦢꦥꦽꦕꦪ꧈ꦭꦃꦤꦺꦏ꧀ꦲꦏꦸꦔꦺꦴꦩꦺꦴꦁꦔꦏꦺꦧꦧ꧀ꦱꦶꦁꦱꦁꦏꦱ꧀ꦮꦂꦒꦩꦼꦤꦺꦃꦏꦺꦴꦮꦺꦔꦤ꧀ꦢꦼꦭ꧀ꦭ! 13ꦢꦸꦫꦸꦁꦠꦲꦸꦲꦺꦤꦺꦁꦮꦺꦴꦁꦱꦶꦗꦶꦮꦲꦺꦩꦸꦁꦒꦃꦤꦁꦱ꧀ꦮꦂꦒ꧈ꦏꦼꦗꦧꦤꦩꦸꦁꦲꦤꦏ꧀ꦏꦺꦩꦤꦸꦁꦱꦱꦶꦁꦠꦼꦏꦤꦺꦱꦁꦏꦱ꧀ꦮꦂꦒꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ꧉
14꧋“ꦏꦺꦴꦮꦺꦔꦼꦂꦠꦶꦢꦺꦮꦺꦠ꧈ꦤꦧꦶꦩꦺꦴꦱꦼꦱ꧀ꦩ꧀ꦧꦶꦪꦺꦤ꧀ꦤꦁꦮꦸꦱ꧀ꦠꦺꦤ꧀ꦔ꧀ꦒꦮꦺꦲꦸꦭꦲꦸꦭꦃꦲꦤ꧀ꦠꦼꦫꦸꦱ꧀ꦢꦶꦲꦸꦁꦒꦃꦲꦏꦺꦢꦸꦮꦸꦂꦤꦁꦏꦪꦸ꧈ꦱꦸꦥꦪꦮꦺꦴꦁꦮꦺꦴꦁꦱꦶꦁꦢꦶꦕꦺꦴꦏꦺꦴꦠ꧀ꦲꦸꦭꦤꦺꦏ꧀ꦚꦮꦁꦲꦸꦭꦲꦸꦭꦃꦲꦤ꧀ꦏꦸꦮꦶꦲꦺꦴꦫꦧꦶꦱꦩꦠꦶ;ꦲꦤꦏ꧀ꦏꦺꦩꦤꦸꦁꦱꦲꦸꦒꦧꦏꦭ꧀ꦢꦶꦲꦸꦁꦒꦃꦲꦏꦺꦤꦁꦏꦪꦸ꧈ꦏꦪꦲꦸꦭꦤꦺꦤꦧꦶꦩꦺꦴꦱꦼꦱ꧀ꦏꦸꦮꦶ꧉ 15ꦢꦢꦶꦤꦺꦱꦥꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦧꦏꦭ꧀ꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉ 16ꦲꦮꦶꦠ꧀ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶꦄꦭ꧀ꦭꦃꦩꦫꦁꦩꦤꦸꦁꦱꦒꦼꦢꦺꦧꦔꦼꦠ꧀ ꦔꦤ꧀ꦠꦶꦢꦺꦏ꧀ꦤꦺꦩꦱꦿꦃꦲꦏꦺꦲꦤꦏ꧀ꦏꦺꦱꦶꦁꦲꦺꦴꦫꦲꦺꦤꦺꦁꦠꦸꦁꦒꦭ꧀ꦭꦺ꧈ꦱꦸꦥꦪꦱꦧꦼꦤ꧀ꦮꦺꦴꦁꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦲꦺꦴꦫꦠꦶꦧꦲꦶꦁꦏꦫꦸꦱꦏ꧀ꦏꦤ꧀ ꦤꦁꦔꦶꦁꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉ 17ꦒꦸꦱ꧀ꦠꦶꦄꦭ꧀ꦭꦃꦲꦼꦁꦒꦺꦴꦤꦺꦔꦺꦴꦁꦏꦺꦴꦤ꧀ꦲꦤꦏ꧀ꦏꦺꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺꦲꦺꦴꦫꦏꦺꦴꦁꦏꦺꦴꦤ꧀ꦚꦭꦃꦚꦭꦃꦲꦏꦺꦩꦤꦸꦁꦱ꧈ꦤꦁꦔꦶꦁꦏꦺꦴꦁꦏꦺꦴꦤ꧀ꦢꦢꦶꦗꦸꦫꦸꦱ꧀ꦭꦩꦼꦠ꧀ꦠꦺꦩꦤꦸꦁꦱ꧉
18꧋“ꦱꦥꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦲꦺꦴꦫꦧꦏꦭ꧀ꦢꦶꦱꦭꦃꦲꦏꦺ꧈ꦤꦁꦔꦶꦁꦱꦥꦱꦶꦁꦲꦺꦴꦫꦒꦼꦊꦩ꧀ꦥꦽꦕꦪꦏꦸꦮꦶꦮꦶꦱ꧀ꦢꦶꦱꦭꦃꦲꦏꦺ꧈ꦲꦮꦶꦠ꧀ꦲꦺꦴꦫꦥꦽꦕꦪꦩꦫꦁꦗꦼꦤꦼꦁꦔꦺꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦲꦺꦴꦫꦲꦺꦤꦺꦁꦠꦸꦁꦒꦭ꧀ꦭꦺ꧉ 19ꦱꦭꦃꦲꦺꦩꦤꦸꦁꦱꦏꦸꦮꦶꦔꦺꦤꦺ:ꦥꦼꦥꦢꦁꦠꦼꦏꦤꦁꦗꦒꦠ꧀ꦏꦺꦤꦺ꧈ꦤꦁꦔꦶꦁꦩꦤꦸꦁꦱꦩꦭꦃꦥꦢꦱꦼꦤꦼꦁꦩꦫꦁꦥꦼꦥꦼꦠꦼꦁꦠꦼꦤꦶꦩ꧀ꦧꦁꦩꦫꦁꦥꦼꦥꦢꦁ꧈ꦲꦮꦶꦠ꧀ꦏ꧀ꦭꦏꦸꦮꦤ꧀ꦤꦺꦲꦭ꧉ 20ꦥꦚ꧀ꦕꦺꦤ꧀ ꦭꦸꦩꦿꦃꦲꦺ꧈ꦮꦺꦴꦁꦱꦶꦁꦔ꧀ꦭꦏꦺꦴꦤ꧀ꦤꦶꦲꦭꦏꦸꦮꦶꦲꦺꦴꦫꦱꦼꦤꦼꦁꦩꦫꦁꦥꦼꦥꦢꦁꦭꦤ꧀ꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦫꦺꦔ꧀ꦭꦸꦔꦤ꧀ꦤꦶꦥꦼꦥꦢꦁ꧈ꦲꦮꦶꦠ꧀ꦮꦼꦢꦶꦤꦺꦏ꧀ꦱꦭꦃꦲꦺꦏꦺꦴꦤꦁꦔꦤ꧀꧈ 21ꦤꦁꦔꦶꦁꦮꦺꦴꦁꦱꦶꦁꦔ꧀ꦭꦏꦺꦴꦤ꧀ꦤꦶꦱꦶꦁꦧꦼꦤꦼꦂꦏꦸꦮꦶꦩꦭꦃꦔ꧀ꦒꦺꦴꦭꦺꦏ꧀ꦏꦶꦥꦼꦥꦢꦁ꧈ꦱꦸꦥꦪꦧꦶꦱꦏꦺꦠꦺꦴꦏ꧀ꦤꦺꦏ꧀ꦱꦶꦁꦢꦶꦭꦏꦺꦴꦤ꧀ꦤꦶꦢꦺꦏ꧀ꦤꦺꦏꦸꦮꦶꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉”
22꧋ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦢꦧꦸꦢꦭ꧀ꦤꦁꦧꦮꦃꦪꦸꦢꦺꦪ꧉ꦱꦸꦮꦺꦤꦺꦤꦁꦏꦺꦴꦤꦺꦴꦒꦸꦱ꧀ꦠꦶꦪꦺꦯꦸꦱ꧀ꦲꦩ꧀ꦧꦥ꧀ꦠꦶꦱ꧀ꦱꦶꦮꦺꦴꦁꦮꦺꦴꦁꦱꦶꦁꦥꦽꦕꦪ꧉ 23-24ꦪꦺꦴꦲꦤꦼꦱ꧀ꦲꦸꦒꦲꦩ꧀ꦧꦥ꧀ꦠꦶꦱ꧀ꦱꦶꦮꦺꦴꦁꦮꦺꦴꦁ꧈ꦲꦮꦶꦠ꧀ꦢꦺꦏ꧀ꦤꦺꦢꦸꦫꦸꦁꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈ꦪꦺꦴꦲꦤꦼꦱ꧀ꦲꦩ꧀ꦧꦥ꧀ꦠꦶꦱ꧀ꦤꦁꦢꦺꦱꦌꦤꦺꦴꦤ꧀ ꦕꦼꦢꦼꦏ꧀ꦏꦫꦺꦴꦏꦸꦠꦱꦭꦶꦩ꧀ ꦲꦮꦶꦠ꧀ꦤꦁꦏꦺꦴꦤꦺꦴꦲꦺꦴꦏꦺꦃꦧꦚꦸꦤꦺ꧉ꦮꦺꦴꦁꦮꦺꦴꦁꦥꦢꦠꦼꦏꦩ꧀ꦧꦿꦺꦴꦤꦺꦴꦭꦤ꧀ꦥꦢꦢꦶꦧꦥ꧀ꦠꦶꦱ꧀꧈
25꧋ꦱꦲꦶꦏꦶꦩꦸꦫꦶꦢ꧀ꦩꦸꦫꦶꦢ꧀ꦢꦺꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦥꦢꦧꦤ꧀ꦠꦃꦧꦤ꧀ꦠꦃꦲꦤ꧀ꦏꦫꦺꦴꦮꦺꦴꦁꦙꦸꦭꦶꦪꦤꦺꦧꦧ꧀ꦮꦶꦱꦸꦃꦱꦸꦕꦶ꧉ 26ꦩꦸꦭꦤꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦩꦲꦸꦠꦼꦫꦸꦱ꧀ꦩꦫꦤꦁꦔ꧀ꦒꦺꦴꦤ꧀ꦤꦺꦪꦺꦴꦲꦤꦼꦱ꧀ꦔꦺꦴꦩꦺꦴꦁ:“ꦒꦸꦫꦸ꧈ꦮꦺꦴꦁꦱꦶꦁꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦔꦏꦺꦏꦲꦺ꧈ꦱꦶꦁꦏꦼꦥꦼꦠꦸꦏ꧀ꦏꦫꦺꦴꦏꦺꦴꦮꦺꦤꦁꦲꦧꦿꦲꦤ꧀ꦤꦺꦭꦫꦪꦺꦴꦂꦢꦤ꧀ꦏꦲꦺꦭꦺꦴ꧈ꦢꦺꦏ꧀ꦤꦺꦲꦩ꧀ꦧꦥ꧀ꦠꦶꦱ꧀ꦮꦺꦴꦁꦮꦺꦴꦁꦲꦩ꧀ꦧꦫꦁꦭꦤ꧀ꦮꦺꦴꦁꦲꦺꦴꦏꦺꦃꦱꦶꦁꦩꦫꦩ꧀ꦧꦿꦺꦴꦤꦺꦴ꧉”
27꧋ꦪꦺꦴꦲꦤꦼꦱ꧀ꦱꦼꦩꦲꦸꦂ:“ꦪꦩꦭꦃꦲꦥꦶꦏ꧀ꦠ?ꦩꦤꦸꦁꦱꦏꦸꦮꦶꦧꦶꦱꦤꦺꦤ꧀ꦢꦸꦮꦺꦲꦥꦲꦥꦤꦩꦸꦁꦗꦭꦂꦫꦤ꧀ꦒꦸꦱ꧀ꦠꦶꦄꦭ꧀ꦭꦃꦔꦼꦏꦺꦏ꧀ꦏꦶ꧉ 28ꦏꦺꦴꦮꦺꦮꦶꦱ꧀ꦥꦢꦏꦿꦸꦔꦸꦢꦺꦮꦺꦤꦺꦏ꧀ꦲꦏꦸꦲꦶꦏꦶꦢꦸꦢꦸꦏꦿꦶꦱ꧀ꦡꦸꦱ꧀꧈ꦲꦏꦸꦤꦩꦸꦁꦢꦶꦏꦺꦴꦁꦏꦺꦴꦤ꧀ꦠꦼꦏꦤ꧀ꦢꦶꦱꦶꦏ꧀ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦢꦺꦏ꧀ꦤꦺ꧉ 29ꦩꦤ꧀ꦠꦺꦤ꧀ꦮꦺꦢꦺꦴꦏ꧀ꦏꦸꦮꦶꦱꦶꦁꦤ꧀ꦢꦸꦮꦺꦤ꧀ꦤꦶꦪꦤꦩꦸꦁꦩꦤ꧀ꦠꦺꦤ꧀ꦤꦺꦭꦤꦁ꧉ꦏꦚ꧀ꦕꦤꦺꦩꦤ꧀ꦠꦺꦤ꧀ꦤꦺꦭꦤꦁꦧꦸꦔꦃꦧꦔꦼꦠ꧀ꦤꦺꦏ꧀ꦮꦼꦫꦸꦃꦩꦤ꧀ꦠꦺꦤ꧀ꦤꦺꦊꦒ꧉ꦏꦪꦔꦺꦴꦤꦺꦴꦲꦸꦒꦲꦏꦸꦲꦶꦏꦶ꧉ꦱꦲꦶꦏꦶꦲꦏꦸꦧꦸꦔꦃꦠꦼꦤꦤ꧀꧈ 30ꦲꦏꦸꦱꦸꦮꦶꦱꦸꦮꦶꦏꦸꦢꦸꦩꦸꦤ꧀ꦢꦸꦂ꧈ꦩꦭꦃꦢꦺꦏ꧀ꦤꦺꦱꦶꦁꦏꦸꦢꦸꦩꦗꦸ꧉
31꧋“ꦲꦏꦸꦲꦶꦏꦶꦩꦸꦁꦮꦺꦴꦁꦗꦒꦠ꧀ꦏꦺꦤꦺ꧈ꦩꦸꦭꦤꦺꦱꦶꦁꦠꦏ꧀ꦲꦺꦴꦩꦺꦴꦁꦪꦩꦤꦸꦠ꧀ꦕꦫꦤꦺꦗꦒꦠ꧀꧈ꦢꦺꦏ꧀ꦤꦺꦠꦼꦏꦤꦺꦱꦁꦏꦱ꧀ꦮꦂꦒ꧈ꦩꦸꦭꦤꦺꦢꦺꦏ꧀ꦤꦺꦔꦸꦁꦏꦸꦭ꧀ꦭꦶꦱꦏ꧀ꦏꦧꦺꦃꦲꦺ꧉ 32ꦱꦶꦁꦢꦶꦉꦩ꧀ꦧꦸꦏ꧀ꦢꦺꦏ꧀ꦤꦺꦏꦸꦮꦶꦧꦫꦁꦱꦶꦁꦢꦺꦏ꧀ꦤꦺꦮꦼꦫꦸꦃꦭꦤ꧀ꦏꦿꦸꦔꦸꦢꦺꦮꦺ꧈ꦤꦁꦔꦶꦁꦲꦺꦴꦫꦲꦺꦤꦺꦁꦱꦶꦁꦥꦽꦕꦪ꧉ 33ꦮꦺꦴꦁꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦏꦸꦮꦶꦥꦢꦔꦏꦺꦴꦤ꧀ꦤꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦼꦤꦼꦂꦱꦏ꧀ꦏꦧꦺꦃꦲꦺ꧉ 34ꦥꦚ꧀ꦕꦺꦤ꧀ ꦱꦶꦁꦢꦶꦏꦺꦴꦁꦏꦺꦴꦤ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦩꦼꦱ꧀ꦠꦶꦪꦤꦩꦸꦁꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦄꦭ꧀ꦭꦃ꧉ꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦼꦏꦺꦏ꧀ꦏꦶꦫꦺꦴꦃꦲꦺꦠꦤ꧀ꦥꦮꦠꦼꦱ꧀ꦩꦫꦁꦢꦺꦏ꧀ꦤꦺ꧉ 35ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦤꦿꦺꦱ꧀ꦤꦤ꧀ꦤꦶꦲꦤꦏ꧀ꦏꦺꦭꦤ꧀ꦱꦼꦩ꧀ꦧꦫꦁꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁꦢꦺꦏ꧀ꦤꦺ꧉ 36ꦮꦺꦴꦁꦱꦶꦁꦥꦽꦕꦪꦩꦫꦁꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧈ꦱꦶꦁꦲꦺꦴꦫꦒꦼꦊꦩ꧀ꦥꦽꦕꦪꦲꦺꦴꦫꦧꦏꦭ꧀ꦔꦿꦱꦏ꧀ꦏꦏꦺꦲꦸꦫꦶꦥ꧀ꦲꦶꦏꦶ꧈ꦤꦁꦔꦶꦁꦧꦏꦭ꧀ꦚꦁꦒꦱꦼꦠꦿꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦏ꧀ꦠꦼꦫꦸꦱ꧀ꦱꦺ꧉”
꧇꧔꧇ 1-3꧋ꦮꦺꦴꦁꦥ꦳ꦫꦶꦱꦶꦥꦢꦏꦿꦸꦔꦸꦤꦺꦏ꧀ꦱꦶꦁꦩꦺꦭꦸꦭꦤ꧀ꦱꦶꦁꦢꦶꦧꦥ꧀ꦠꦶꦱ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦏꦺꦃꦲꦺꦔꦸꦁꦏꦸꦭ꧀ꦭꦶꦱꦶꦁꦩꦺꦭꦸꦪꦺꦴꦲꦤꦼꦱ꧀꧈꧌ꦱꦏ꧀ꦗꦤꦺꦱꦶꦁꦲꦩ꧀ꦧꦥ꧀ꦠꦶꦱ꧀ꦢꦸꦢꦸꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺ꧈ꦤꦁꦔꦶꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉)ꦏꦢꦸꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦸꦔꦸꦧꦧ꧀ꦲꦶꦏꦶ꧈ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔꦱꦁꦏꦧꦮꦃꦪꦸꦢꦺꦪꦭꦤ꧀ꦧꦭꦶꦏ꧀ꦩꦼꦤꦺꦃꦤꦁꦧꦮꦃꦓꦭꦶꦭꦺꦪ꧉ 4ꦢꦺꦏ꧀ꦤꦺꦏꦸꦢꦸꦭꦶꦮꦠ꧀ꦧꦮꦃꦱꦩꦫꦶꦪ꧉
5-6꧋ꦏꦶꦫꦏꦶꦫꦗꦩ꧀ꦫꦺꦴꦭꦱ꧀ꦲꦮꦤ꧀ꦢꦺꦏ꧀ꦤꦺꦠꦼꦏꦤ꧀ꦱꦏ꧀ꦮꦶꦗꦶꦤꦺꦏꦸꦠꦤꦁꦱꦩꦫꦶꦪꦱꦶꦁꦗꦼꦤꦼꦁꦔꦺꦯꦶꦏꦂ꧈ꦲꦺꦴꦫꦲꦢꦺꦴꦃꦏꦫꦺꦴꦏꦼꦧꦺꦴꦤꦺꦪꦺꦴꦱꦺꦥ꦳꧀ꦩ꧀ꦧꦶꦪꦺꦤ꧀ꦱꦶꦁꦢꦶꦏꦺꦏ꧀ꦏꦶꦏꦫꦺꦴꦪꦏꦸꦧ꧀ ꦧꦥꦏ꧀ꦏꦺ꧉ꦤꦁꦏꦼꦧꦺꦴꦤ꧀ꦏꦺꦴꦤꦺꦴꦲꦺꦤꦺꦁꦱꦸꦩꦸꦂꦫꦺ꧈ ꦪꦏꦸꦮꦶꦱꦸꦩꦸꦂꦫꦺꦧꦥꦪꦏꦸꦧ꧀꧈ꦱꦁꦏꦶꦁꦏꦼꦱꦼꦭ꧀ꦭꦺ꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦭꦺꦫꦺꦤ꧀ꦤꦁꦏꦺꦴꦤꦺꦴ꧉ꦢꦺꦏ꧀ꦤꦺꦚ꧀ꦗꦒꦺꦴꦁꦤꦁꦥꦶꦁꦒꦶꦂꦫꦺꦱꦸꦩꦸꦂꦩꦲꦸ꧉
7-8꧋ꦲꦺꦴꦫꦊꦠ꧀ꦱꦸꦮꦶꦲꦺꦤꦺꦁꦮꦺꦴꦁꦮꦺꦢꦺꦴꦏ꧀ꦯꦩꦫꦶꦠꦤ꧀ꦠꦼꦏꦲꦉꦥ꧀ꦤꦶꦩ꧀ꦧꦧꦚꦸ꧉ꦲꦶꦏꦸꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦚ꧀ꦗꦒꦺꦴꦁꦢꦺꦮꦺꦤꦁꦱꦸꦩꦸꦂꦏꦺꦴꦤꦺꦴ꧈ꦲꦮꦶꦠ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦢꦭꦸꦔꦤꦁꦏꦸꦠꦠꦸꦏꦸꦥꦔꦤ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚ꧀ꦗꦭꦸꦏ꧀ꦔꦺꦴꦩ꧀ꦧꦺꦩꦫꦁꦮꦺꦴꦁꦔꦺ꧉
9꧋ꦮꦺꦴꦁꦮꦺꦢꦺꦴꦏ꧀ꦏꦺꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦮꦺꦴꦁꦙꦸ꧈ꦭꦃꦏꦺꦴꦏ꧀ꦮꦤꦶꦚ꧀ꦗꦭꦸꦏ꧀ꦔꦺꦴꦩ꧀ꦧꦺꦩꦫꦁꦲꦏꦸ꧈ꦮꦺꦴꦁꦯꦩꦫꦶꦠꦤ꧀?”꧌ꦭꦸꦩꦿꦃꦲꦺꦮꦺꦴꦁꦙꦸꦲꦺꦴꦫꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦮꦺꦴꦁꦯꦩꦫꦶꦠꦤ꧀꧈)
10꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺꦔꦼꦂꦠꦶꦥꦮꦺꦃꦲꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦤꦺꦏ꧀ꦏꦺꦴꦮꦺꦔꦼꦂꦠꦶꦱꦥꦱꦶꦁꦚ꧀ꦗꦭꦸꦏ꧀ꦔꦺꦴꦩ꧀ꦧꦺꦩꦫꦁꦏꦺꦴꦮꦺꦲꦶꦏꦶ꧈ꦩꦼꦱ꧀ꦠꦶꦩꦭꦃꦏꦺꦴꦮꦺꦢꦺꦮꦺꦱꦶꦁꦧꦏꦭ꧀ꦚ꧀ꦗꦭꦸꦏ꧀ꦔꦺꦴꦩ꧀ꦧꦺꦩꦫꦁꦲꦏꦸꦭꦤ꧀ꦲꦏꦸꦧꦏꦭ꧀ꦔꦼꦏꦺꦏ꧀ꦏꦶꦏꦺꦴꦮꦺꦧꦚꦸꦱꦶꦁꦩꦫꦏ꧀ꦏꦏꦺꦲꦸꦫꦶꦥ꧀꧈”
11꧋ꦮꦺꦴꦁꦮꦺꦢꦺꦴꦏ꧀ꦩꦲꦸꦠꦼꦫꦸꦱ꧀ꦱꦼꦩꦲꦸꦂ:“ꦭꦃꦏꦺꦴꦮꦺꦲꦺꦴꦫꦔ꧀ꦒꦮꦠꦶꦩ꧀ꦧ꧈ꦏꦠꦶꦏ꧀ꦱꦸꦩꦸꦂꦫꦺꦗꦼꦫꦸꦥꦶꦱꦤ꧀꧈ꦏꦼꦥꦿꦶꦪꦺꦲꦼꦁꦒꦺꦴꦤ꧀ꦩꦸꦲꦉꦥ꧀ꦚ꧀ꦗꦶꦏꦸꦏ꧀ꦧꦚꦸꦱꦶꦁꦩꦫꦏ꧀ꦏꦏꦺꦲꦸꦫꦶꦥ꧀ꦲꦶꦏꦶ? 12ꦱꦸꦩꦸꦂꦲꦶꦏꦶꦠꦶꦁꦒꦭꦤ꧀ꦤꦺꦧꦥꦪꦏꦸꦧ꧀꧈ꦢꦺꦏ꧀ꦤꦺꦢꦺꦮꦺꦩ꧀ꦧꦶꦪꦺꦤ꧀ꦔꦺꦴꦩ꧀ꦧꦺꦧꦚꦸꦤꦺꦱꦸꦩꦸꦂꦲꦶꦏꦶ꧈ꦲꦸꦒꦲꦤꦏ꧀ꦲꦤꦏ꧀ꦏꦺꦭꦤ꧀ꦲꦶꦔꦺꦴꦤ꧀ꦲꦶꦔꦺꦴꦤ꧀ꦤꦺ꧉ꦭꦃꦲꦥꦏꦺꦴꦮꦺꦔꦸꦁꦏꦸꦭ꧀ꦭꦶꦧꦥꦪꦏꦸꦧ꧀ ꦏꦺꦴꦏ꧀ꦲꦉꦥ꧀ꦔꦼꦏꦺꦏ꧀ꦏꦶꦧꦚꦸꦱꦶꦁꦔꦸꦁꦏꦸꦭ꧀ꦭꦶꦧꦚꦸꦤꦺꦧꦥꦪꦏꦸꦧ꧀?”
13-14꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦧꦺꦃꦮꦺꦴꦁꦱꦶꦁꦔꦺꦴꦩ꧀ꦧꦺꦧꦚꦸꦲꦶꦏꦶꦧꦏꦭ꧀ꦔꦼꦭꦏ꧀ꦩꦼꦤꦺꦃ꧈ꦤꦁꦔꦶꦁꦱꦥꦱꦶꦁꦔꦺꦴꦩ꧀ꦧꦺꦧꦚꦸꦱꦶꦁꦱꦁꦏꦔ꧀ꦒꦺꦴꦤ꧀ꦏꦸꦲꦺꦴꦫꦧꦏꦭ꧀ꦔꦼꦭꦏ꧀ꦩꦼꦤꦺꦃꦱ꧀ꦭꦮꦱ꧀ꦱꦺ꧉ꦧꦚꦸꦱꦶꦁꦱꦁꦏꦔ꧀ꦒꦺꦴꦤ꧀ꦏꦸꦤ꧀ꦢꦢꦺꦏ꧀ꦏꦏꦺꦱꦸꦩꦸꦂꦱꦶꦁꦩꦶꦭꦶꦠꦼꦫꦸꦱ꧀ꦔꦼꦠꦺꦴꦏ꧀ꦏꦏꦺꦧꦚꦸꦱꦶꦁꦩꦫꦏ꧀ꦏꦏꦺꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉”
15꧋ꦮꦺꦴꦁꦮꦺꦢꦺꦴꦏ꧀ꦏꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ꧈ꦲꦩ꧀ꦧꦺꦴꦏ꧀ꦲꦏꦸꦢꦶꦏꦺꦏ꧀ꦏꦶꦧꦚꦸꦱꦶꦁꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦏꦸꦮꦶꦠ!ꦢꦢꦶꦤꦺꦲꦏꦸꦲꦺꦴꦫꦧꦏꦭ꧀ꦔꦼꦭꦏ꧀ꦩꦼꦤꦺꦃꦭꦤ꧀ꦲꦺꦴꦫꦲꦸꦱꦃꦩ꧀ꦧꦿꦺꦤꦺꦩꦼꦤꦺꦃꦤꦶꦩ꧀ꦧꦧꦚꦸ꧉”
16꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦤꦧꦺꦴꦗꦺꦴꦩꦸꦢꦶꦕꦼꦭꦸꦏ꧀ꦠꦼꦫꦸꦱ꧀ꦧꦭꦶꦏ꧀ꦩ꧀ꦧꦿꦺꦤꦺꦩꦼꦤꦺꦃ!”
17꧋ꦮꦺꦴꦁꦔꦺꦱꦼꦩꦲꦸꦂ:“ꦲꦏꦸꦲꦺꦴꦫꦤ꧀ꦢꦸꦮꦺꦧꦺꦴꦗꦺꦴꦒꦸꦱ꧀ꦠꦶ꧉”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ꦏꦺꦴꦮꦺꦲꦺꦴꦫꦒꦺꦴꦫꦺꦴꦃꦤꦺꦏ꧀ꦏꦺꦴꦮꦺꦔꦺꦴꦩꦺꦴꦁꦲꦺꦴꦫꦤ꧀ꦢꦸꦮꦺꦧꦺꦴꦗꦺꦴ꧉ 18ꦲꦮꦶꦠ꧀ꦏꦺꦴꦮꦺꦮꦶꦱ꧀ꦏꦮꦶꦤ꧀ꦥꦶꦁꦭꦶꦩꦭꦤ꧀ꦮꦺꦴꦁꦱꦶꦁꦱꦲꦶꦏꦶꦩꦁꦒꦺꦴꦤ꧀ꦏꦫꦺꦴꦏꦺꦴꦮꦺꦏꦸꦮꦶꦢꦸꦢꦸꦧꦺꦴꦗꦺꦴꦩꦸꦢꦺꦮꦺ꧉ꦥꦚ꧀ꦕꦺꦤ꧀ꦏꦺꦴꦮꦺꦲꦺꦴꦫꦒꦺꦴꦫꦺꦴꦃ!”
19꧋ꦮꦺꦴꦁꦮꦺꦢꦺꦴꦏ꧀ꦏꦺꦔꦺꦴꦩꦺꦴꦁ:“ꦒꦸꦱ꧀ꦠꦶ꧈ꦲꦏꦸꦱꦲꦶꦏꦶꦔꦼꦂꦠꦶꦤꦺꦏ꧀ꦏꦺꦴꦮꦺꦏꦸꦮꦶꦤꦧꦶ꧉ 20ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺꦢꦺꦮꦺꦩ꧀ꦧꦶꦪꦺꦤ꧀ꦩ꧀ꦧꦶꦪꦺꦤ꧀ꦤꦺꦥꦢꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃꦤꦁꦒꦸꦤꦸꦁꦲꦶꦏꦶ꧉ꦤꦁꦔꦶꦁꦮꦺꦴꦁꦙꦸꦩꦸꦭꦁꦔꦶꦤꦺꦏ꧀ꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦏꦸꦢꦸꦤꦺꦤꦩꦸꦁꦤꦁꦏꦸꦠꦪꦺꦫꦸꦱꦭꦺꦩ꧀꧈ꦏꦸꦮꦶꦱꦏ꧀ꦗꦤꦺꦏꦼꦥꦿꦶꦪꦺꦠ?”
21꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦪꦸ꧈ꦔꦤ꧀ꦢꦼꦭ꧀ꦭꦠ꧈ꦧꦏꦭ꧀ꦲꦺꦤꦺꦁꦮꦚ꧀ꦕꦶꦤꦺꦏꦺꦴꦮꦺꦲꦺꦴꦫꦧꦶꦱꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃꦤꦁꦒꦸꦤꦸꦁꦏꦺꦤꦺꦭꦤ꧀ꦲꦸꦒꦲꦺꦴꦫꦧꦶꦱꦤꦁꦪꦺꦫꦸꦱꦭꦺꦩ꧀꧈ 22ꦏꦺꦴꦮꦺꦏꦸꦮꦶꦮꦺꦴꦁꦯꦩꦫꦶꦠꦤ꧀ꦲꦺꦴꦫꦔꦼꦂꦠꦶꦱꦥꦱꦶꦁꦲꦩ꧀ꦧꦺꦴꦏ꧀ꦱꦼꦩ꧀ꦧꦃ꧈ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦔꦼꦂꦠꦶ꧈ꦲꦮꦶꦠ꧀ꦮꦺꦴꦁꦱꦶꦁꦧꦏꦭ꧀ꦚ꧀ꦭꦩꦼꦠ꧀ꦠꦏꦺꦗꦒꦠ꧀ꦏꦸꦮꦶꦠꦼꦏꦤꦺꦱꦁꦏꦧꦁꦱꦙꦸ꧉ 23ꦲꦺꦴꦫꦢꦢꦶꦱꦼꦧꦧ꧀ꦤꦁꦥꦁꦒꦺꦴꦤ꧀ꦤꦤ꧀ꦲꦼꦤ꧀ꦢꦶꦲꦮꦏ꧀ꦏꦺꦢꦺꦮꦺꦱꦶꦁꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃ꧈ꦤꦁꦔꦶꦁꦱꦶꦁꦢꦢꦶꦱꦼꦧꦧ꧀ꦏꦸꦮꦶꦏꦼꦥꦿꦶꦪꦺꦲꦮꦏ꧀ꦏꦺꦢꦺꦮꦺꦱꦶꦁꦚꦼꦩ꧀ꦧꦃ꧉ꦥꦚꦼꦩ꧀ꦧꦃꦱꦶꦁꦱꦏ꧀ꦩꦼꦱ꧀ꦠꦶꦤꦺꦏꦸꦮꦶꦥꦚꦼꦩ꧀ꦧꦃꦱꦶꦁꦱꦁꦏꦫꦺꦴꦃꦱꦸꦕꦶꦭꦤ꧀ꦱꦁꦏꦲꦠꦶꦱꦶꦁꦉꦱꦶꦏ꧀꧈ꦒꦸꦱ꧀ꦠꦶꦄꦭ꧀ꦭꦃꦏꦼꦥꦺꦔꦶꦤ꧀ꦢꦶꦱꦼꦩ꧀ꦧꦃꦩꦼꦁꦏꦺꦴꦤꦺꦴꦏꦸꦮꦶ꧉ꦥꦚ꧀ꦕꦺꦤ꧀ ꦮꦶꦮꦶꦠ꧀ꦱꦲꦶꦏꦶꦩꦤꦸꦁꦱꦧꦶꦱꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃꦱꦶꦁꦱꦏ꧀ꦧꦼꦤꦼꦂꦫꦺ꧉ 24ꦒꦸꦱ꧀ꦠꦶꦄꦭ꧀ꦭꦃꦲꦶꦏꦸꦮꦸꦗꦸꦠ꧀ꦫꦺꦴꦃ꧉ꦥꦱꦼꦩ꧀ꦧꦃꦲꦤ꧀ꦱꦶꦁꦠꦼꦩꦼꦤ꧀ꦤꦤ꧀ꦏꦸꦮꦶꦪꦥꦱꦼꦩ꧀ꦧꦃꦲꦤ꧀ꦱꦶꦁꦲꦶꦁꦫꦺꦴꦃꦭꦤ꧀ꦱꦁꦏꦲꦠꦶꦱꦶꦁꦉꦱꦶꦏ꧀꧈”
25꧋ꦮꦺꦴꦁꦮꦺꦢꦺꦴꦏ꧀ꦩꦲꦸꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦲꦏꦸꦔꦼꦂꦠꦶꦤꦺꦏ꧀ꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦱꦶꦁꦢꦶꦗꦚ꧀ꦗꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈ꦧꦏꦭ꧀ꦠꦼꦏ꧉ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦠꦼꦏ꧈ꦢꦺꦏ꧀ꦤꦺꦱꦶꦁꦧꦏꦭ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦲꦮꦏ꧀ꦏꦺꦢꦺꦮꦺꦧꦧ꧀ꦥꦽꦏꦫꦲꦶꦏꦶꦏꦧꦺꦃ꧉”
26꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦿꦶꦱ꧀ꦡꦸꦱ꧀ꦏꦸꦮꦶꦪꦲꦏꦸ꧈ꦱꦶꦁꦔꦺꦴꦩꦺꦴꦁꦏꦫꦺꦴꦏꦺꦴꦮꦺꦲꦶꦏꦶ!”
27꧋ꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦮꦺꦴꦁꦮꦺꦢꦺꦴꦏ꧀ꦏꦺ꧈ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦠꦼꦏ꧉ꦏꦧꦺꦃꦏꦒꦺꦠ꧀ꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦮꦺꦴꦁꦮꦺꦢꦺꦴꦏ꧀ ꦤꦁꦔꦶꦁꦲꦺꦴꦫ ꦲꦺꦤꦺꦁꦱꦶꦁꦮꦤꦶꦠꦏꦺꦴꦤ꧀ꦲꦥꦥꦼꦂꦭꦸꦤꦺꦭꦤ꧀ꦲꦥꦱꦶꦁꦢꦶꦲꦺꦴꦩꦺꦴꦁ꧉
28꧋ꦮꦺꦴꦁꦮꦺꦢꦺꦴꦏ꧀ꦏꦺꦩꦭꦃꦠꦼꦫꦸꦱ꧀ꦲꦩ꧀ꦧ꧀ꦭꦪꦸꦩꦸꦭꦶꦃꦤꦁꦏꦸꦠ꧈ꦏꦼꦤ꧀ꦢꦶꦤꦺꦢꦶꦠꦶꦁꦒꦭ꧀ꦤꦁꦏꦺꦴꦤꦺꦴ꧉ꦠꦼꦏꦤ꧀ꦔ꧀ꦒꦺꦴꦤ꧀ꦤꦺꦠꦼꦫꦸꦱ꧀ꦚꦼꦭꦸꦏ꧀ꦏꦶꦮꦺꦴꦁꦮꦺꦴꦁꦔꦺꦴꦩꦺꦴꦁ: 29“ꦲ꦳ꦪꦸꦏ꧀ꦩꦺꦭꦸꦲꦏꦸꦠ!ꦲꦏꦸꦏꦼꦥꦼꦠꦸꦏ꧀ꦮꦺꦴꦁꦱꦶꦁꦔꦺꦴꦩꦺꦴꦁꦔꦶꦲꦏꦸꦧꦧ꧀ꦏꦧꦺꦃꦊꦭꦏꦺꦴꦤꦺꦲꦸꦫꦶꦥ꧀ꦏꦸ꧈ꦱꦼꦤꦗꦤ꧀ꦲꦏꦸꦲꦺꦴꦫꦏꦼꦤꦭ꧀ꦮꦺꦴꦁꦔꦺ꧉ꦩꦼꦤꦮꦮꦲꦺꦢꦺꦏ꧀ꦤꦺꦏꦿꦶꦱ꧀ꦡꦸꦱ꧀!” 30ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦭꦸꦔꦱꦁꦏꦏꦸꦠꦩꦫꦤꦶꦒꦸꦱ꧀ꦠꦶꦪꦺꦯꦸꦱ꧀꧈
31꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦒꦸꦱ꧀ꦠꦶ꧈ꦲꦩ꧀ꦧꦺꦴꦏ꧀ꦩꦁꦔꦤ꧀ꦤ꧀ꦢꦶꦱꦶꦏ꧀ꦠ?”
32꧋“ꦲꦺꦴꦫ꧈”ꦒꦸꦱ꧀ꦠꦶꦱꦼꦩꦲꦸꦂ꧈“ꦲꦏꦸꦤ꧀ꦢꦸꦮꦺꦥꦔꦤ꧀ꦭꦶꦪꦤꦺ꧈ꦤꦁꦔꦶꦁꦏꦺꦴꦮꦺꦲꦺꦴꦫꦔꦼꦂꦠꦶꦲꦥ!”
33꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦫꦁꦱꦏ꧀ꦥꦢꦥꦢ:“ꦲꦥꦮꦶꦱ꧀ꦲꦺꦤꦺꦁꦱꦶꦁꦔꦼꦏꦺꦏ꧀ꦏꦶꦩꦁꦔꦤ꧀ꦢꦺꦏ꧀ꦤꦺꦪ?”
34꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥꦔꦤ꧀ꦏꦸꦏꦸꦮꦶꦔ꧀ꦭꦏꦺꦴꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸꦭꦤ꧀ꦲꦏꦸꦏꦸꦢꦸꦔꦿꦩ꧀ꦥꦸꦁꦔꦏꦺꦥꦼꦁꦒꦮꦺꦤꦺ! 35ꦏꦺꦴꦮꦺꦭꦲꦸꦠ꧀ꦔꦺꦴꦩꦺꦴꦁꦠ:'ꦥꦠꦁꦱꦱꦶꦩꦼꦤꦺꦃꦠꦼꦫꦸꦱ꧀ꦥꦤꦺꦤ꧀꧉'ꦤꦁꦔꦶꦁꦥꦢꦢꦶꦱꦮꦁꦢꦺꦮꦺ꧈ꦱꦮꦃꦱꦮꦃꦲꦺꦮꦶꦱ꧀ꦏꦸꦤꦶꦁꦏꦸꦢꦸꦢꦶꦲꦼꦤꦺꦤ꧀ꦤꦶ꧉ 36-37ꦱꦶꦁꦠꦸꦏꦁꦥꦤꦺꦤ꧀ꦮꦶꦱ꧀ꦤꦩ꧀ꦥꦲꦸꦥꦃꦲꦺ꧉ꦮꦶꦱ꧀ꦔ꧀ꦊꦧꦺꦴꦏ꧀ꦏꦏꦺꦥꦤꦺꦤ꧀ꦤꦤ꧀ꦤꦺꦥꦼꦁꦒꦮꦺꦪꦤ꧀ꦏꦸ꧈ꦪꦏꦸꦮꦶꦮꦺꦴꦁꦮꦺꦴꦁꦱꦶꦁꦥꦢꦤꦩ꧀ꦥꦲꦸꦫꦶꦥ꧀ꦭꦁꦒꦼꦁ꧉ꦱꦲꦶꦏꦶꦱꦶꦁꦚꦼꦧꦂꦭꦤ꧀ꦱꦶꦁꦥꦤꦺꦤ꧀ꦥꦢꦧꦸꦔꦃꦏꦧꦺꦃꦭꦺꦴꦫꦺꦴ꧉ꦧꦼꦤꦼꦂꦱꦶꦁꦔꦺꦴꦩꦺꦴꦁ:'ꦱꦶꦁꦱꦶꦗꦶꦚꦼꦧꦂ꧈ꦭꦶꦪꦤꦺꦥꦤꦺꦤ꧀꧉' 38ꦏꦺꦴꦮꦺꦏꦸꦮꦶꦥꦢꦠꦏ꧀ꦏꦺꦴꦁꦏꦺꦴꦤ꧀ꦔꦼꦤꦺꦤ꧀ꦤꦶꦱꦼꦧꦫꦤꦺꦭꦶꦪꦤꦺ꧉ꦭꦶꦪꦤꦺꦱꦶꦁꦏꦼꦩꦿꦶꦔꦼꦠ꧀ ꦤꦁꦔꦶꦁꦏꦺꦴꦮꦺꦱꦶꦁꦥꦤꦺꦤ꧀꧈”
39꧋ꦮꦺꦴꦁꦯꦩꦫꦶꦠꦤ꧀ꦥꦶꦫꦁꦥꦶꦫꦁꦱꦁꦏꦏꦸꦠꦠꦼꦫꦸꦱ꧀ꦥꦢꦥꦽꦕꦪꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦏꦿꦶꦱ꧀ꦡꦸꦱ꧀꧈ꦧꦶꦱꦤꦺꦔꦼꦂꦠꦶꦪꦱꦁꦏꦥꦱꦼꦏ꧀ꦱꦶꦤꦺꦮꦺꦴꦁꦮꦺꦢꦺꦴꦏ꧀ꦩꦲꦸ꧈ꦱꦶꦁꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦔꦼꦂꦠꦶꦊꦭꦏꦺꦴꦤꦺꦲꦸꦫꦶꦥ꧀ꦥꦺꦢꦺꦏ꧀ꦤꦺ꧉ 40ꦩꦸꦭꦤꦺꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦚꦸꦮꦸꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀ꦏꦺꦴꦁꦏꦺꦴꦤ꧀ꦔꦶꦤꦼꦥ꧀ꦤꦁꦏꦸꦠꦤꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦪꦠꦼꦫꦸꦱ꧀ꦔꦶꦤꦼꦥ꧀ꦫꦺꦴꦁꦢꦶꦤꦤꦁꦏꦺꦴꦤꦺꦴ꧉
41꧋ꦮꦺꦴꦁꦮꦺꦴꦁꦥꦢꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺꦒꦸꦱ꧀ꦠꦶꦪꦺꦯꦸꦱ꧀ ꦩꦸꦭꦤꦺꦱꦶꦁꦥꦢꦥꦽꦕꦪꦠꦼꦫꦸꦱ꧀ꦠꦩ꧀ꦧꦃꦲꦺꦴꦏꦺꦃꦧꦔꦼꦠ꧀꧈ 42ꦮꦺꦴꦁꦮꦺꦴꦁꦲꦶꦏꦶꦥꦢꦔꦺꦴꦩꦺꦴꦁꦏꦫꦺꦴꦮꦺꦴꦁꦮꦺꦢꦺꦴꦏ꧀ꦏꦺ:“ꦲꦮꦏ꧀ꦏꦺꦢꦺꦮꦺꦱꦲꦶꦏꦶꦥꦽꦕꦪꦠꦼꦤꦤ꧀ ꦤꦁꦔꦶꦁꦲꦺꦴꦫꦤꦩꦸꦁꦗꦭꦂꦫꦤ꧀ꦏꦺꦴꦮꦺꦔꦺꦴꦩꦺꦴꦁꦔꦶꦲꦮꦏ꧀ꦏꦺꦢꦺꦮꦺ꧈ꦲꦺꦴꦫ꧈ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦱꦲꦶꦏꦶꦮꦶꦱ꧀ꦏꦿꦸꦔꦸꦢꦺꦮꦺ꧉ꦩꦸꦭꦤꦺꦲꦮꦏ꧀ꦏꦺꦢꦺꦮꦺꦔꦼꦂꦠꦶꦠꦼꦤꦤ꧀ꦤꦺꦏ꧀ꦥꦚ꧀ꦕꦺꦤ꧀ꦢꦺꦏ꧀ꦤꦺꦏꦿꦶꦱ꧀ꦡꦸꦱ꧀ ꦱꦶꦁꦚ꧀ꦭꦩꦼꦠ꧀ꦠꦏꦺꦗꦒꦠ꧀꧈”
43꧋ꦱꦏ꧀ꦮꦶꦱ꧀ꦱꦺꦫꦺꦴꦁꦢꦶꦤꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩ꧀ꦭꦏꦸꦠꦼꦫꦸꦱ꧀ꦤꦁꦧꦮꦃꦓꦭꦶꦭꦺꦪ꧉ 44-45ꦤꦁꦓꦭꦶꦭꦺꦪꦏꦺꦴꦤꦺꦴꦮꦺꦴꦁꦮꦺꦴꦁꦥꦢꦧꦸꦔꦃꦧꦔꦼꦠ꧀ꦢꦶꦠꦼꦏꦤꦶꦒꦸꦱ꧀ꦠꦶꦪꦺꦯꦸꦱ꧀ ꦱꦼꦤꦗꦤ꧀ꦢꦺꦏ꧀ꦤꦺꦢꦺꦮꦺꦔꦺꦴꦩꦺꦴꦁꦤꦺꦏ꧀ꦤꦧꦶꦏꦸꦮꦶꦤꦁꦤꦼꦒꦫꦤꦺꦢꦺꦮꦺꦲꦺꦴꦫꦢꦶꦲꦗꦺꦤ꧀ꦤꦶ꧉ꦤꦁꦔꦶꦁꦱꦲꦶꦏꦶꦥꦢꦔꦼꦂꦠꦶꦏ꧀ꦮꦱꦤꦺꦒꦸꦱ꧀ꦠꦶꦪꦺꦯꦸꦱ꧀ ꦲꦮꦶꦠ꧀ꦢꦺꦴꦁꦔꦺꦥꦢꦩꦺꦭꦸꦤꦁꦪꦺꦫꦸꦱꦭꦺꦩ꧀ꦮꦪꦃꦥꦱ꧀ꦏꦃꦮꦺꦴꦁꦮꦺꦴꦁꦥꦢꦮꦼꦫꦸꦃꦢꦺꦏ꧀ꦤꦺꦤꦶꦤ꧀ꦢꦏ꧀ꦏꦏꦺꦧꦫꦁꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺ꧉
46꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦠꦼꦏꦤꦁꦏꦸꦠꦏꦤꦩꦼꦤꦺꦃ꧉ꦪꦤꦁꦏꦸꦠꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦤ꧀ꦢꦢꦺꦏ꧀ꦏꦏꦺꦧꦚꦸꦢꦢꦶꦲꦁꦒꦸꦂ꧈ꦢꦺꦴꦁꦔꦺꦢꦺꦏ꧀ꦤꦺꦠꦼꦏꦱꦼꦥꦶꦱꦤ꧀ꦤꦤ꧀ꦤꦁꦏꦺꦤꦺ꧉ꦲꦺꦤꦺꦁꦮꦺꦴꦁꦱꦁꦏꦑꦥꦺꦂꦤꦏꦸꦩ꧀ꦱꦶꦁꦲꦤꦏ꧀ꦏꦺꦭꦤꦁꦭꦫ꧉ꦮꦺꦴꦁꦲꦶꦏꦶꦲꦩ꧀ꦠꦼꦤꦂꦒꦼꦢꦺꦤꦁꦥꦭꦺꦱ꧀ꦱꦺꦫꦠꦸꦤꦺ꧉ 47ꦮꦺꦴꦁꦔꦺꦏꦿꦸꦔꦸꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦧꦭꦶꦏ꧀ꦤꦁꦓꦭꦶꦭꦺꦪ꧈ꦮꦶꦱ꧀ꦲꦺꦴꦫꦤꦁꦪꦸꦢꦺꦪꦩꦼꦤꦺꦃ꧉ꦲꦤꦏ꧀ꦏꦺꦮꦺꦴꦁꦔꦺꦭꦫꦤꦼꦩꦼꦤ꧀ ꦮꦶꦱ꧀ꦲꦉꦥ꧀ꦩꦠꦶ꧈ꦩꦸꦭꦤꦺꦮꦺꦴꦁꦔꦺꦠꦼꦫꦸꦱ꧀ꦩꦫꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦚꦸꦮꦸꦤ꧀ꦢꦺꦏ꧀ꦤꦺꦱꦸꦥꦪꦩꦺꦭꦸꦩꦸꦭꦶꦃꦤꦩ꧀ꦧꦤꦶꦧꦺꦴꦕꦃꦲꦺ꧉ 48ꦒꦸꦱ꧀ꦠꦶꦪꦺꦯꦸꦱ꧀ꦩꦤ꧀ꦢꦏ꧀ꦔꦺꦴꦩꦺꦴꦁ:“ꦏꦺꦴꦮꦺꦤꦺꦏ꧀ꦲꦺꦴꦫꦥꦢꦮꦼꦫꦸꦃꦠꦤ꧀ꦢꦏꦫꦺꦴꦩꦿꦶꦥꦠ꧀ꦩꦸꦢꦺꦮꦺꦲꦺꦴꦫꦒꦼꦊꦩ꧀ꦥꦽꦕꦪ!”
49꧋ꦤꦁꦔꦶꦁꦮꦺꦴꦁꦔꦺꦔꦼꦕꦼꦏ꧀ꦮꦲꦺꦚꦸꦮꦸꦤ꧀ꦒꦸꦱ꧀ꦠꦶꦪꦺꦯꦸꦱ꧀:“ꦩ꧀ꦧꦺꦴꦏ꧀ꦩꦼꦭꦱ꧀ꦠꦒꦸꦱ꧀ꦠꦶ꧈ꦲ꦳ꦪꦸꦏ꧀ꦩꦺꦭꦸꦠ꧉ꦩꦼꦁꦏꦺꦴꦲꦤꦏ꧀ꦏꦸꦤ꧀ꦢꦏ꧀ꦩꦠꦶ!”
50꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦮꦶꦱ꧀ ꦏꦤꦩꦸꦭꦶꦃꦮꦲꦺ꧉ꦲꦤꦏ꧀ꦩꦸꦮꦶꦱ꧀ꦩꦫꦶ꧉”
꧋ꦮꦺꦴꦁꦔꦺꦥꦽꦕꦪꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦪꦺꦯꦸꦱ꧀ ꦩꦸꦭꦤꦺꦠꦼꦫꦸꦱ꧀ꦩꦸꦭꦶꦃ꧉ 51ꦤꦁꦢꦭꦤ꧀ꦢꦺꦏ꧀ꦤꦺꦢꦶꦥꦥꦏ꧀ꦏꦫꦺꦴꦥꦫꦥꦼꦭꦢꦺꦤ꧀ꦤꦺ꧉ꦥꦫꦥꦼꦭꦢꦺꦤ꧀ꦩꦲꦸꦔꦺꦴꦩꦺꦴꦁꦤꦺꦏ꧀ꦧꦺꦴꦕꦃꦲꦺꦮꦶꦱ꧀ꦩꦫꦶ꧉
52꧋ꦮꦺꦴꦁꦔꦺꦠꦼꦫꦸꦱ꧀ꦠꦏꦺꦴꦤ꧀ꦗꦩ꧀ꦥꦶꦫꦧꦺꦴꦕꦃꦲꦺꦩꦫꦶ꧉ꦮꦺꦴꦁꦮꦺꦴꦁꦱꦼꦩꦲꦸꦂ:“ꦮꦶꦔꦶꦗꦩ꧀ ꦱꦶꦗꦶ!” 53“ꦗꦩ꧀ꦱꦶꦗꦶ!”ꦮꦺꦴꦁꦔꦺꦠꦼꦫꦸꦱ꧀ꦏꦺꦭꦶꦁꦔꦤ꧀ꦤꦺꦏ꧀ꦲꦶꦏꦶꦮꦚ꧀ꦕꦶꦤꦺꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦢꦺꦏ꧀ꦤꦺ:“ꦏꦤꦩꦸꦭꦶꦃ!ꦲꦤꦏ꧀ꦩꦸꦮꦶꦱ꧀ꦩꦫꦶ!”ꦩꦸꦭꦤꦺꦢꦺꦏ꧀ꦤꦺꦭꦤ꧀ꦮꦺꦴꦁꦱꦏ꧀ꦲꦺꦴꦩꦃꦏꦧꦺꦃꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈
54꧋ꦤꦁꦓꦭꦶꦭꦺꦪꦏꦺꦤꦺꦲꦶꦏꦶꦠꦤ꧀ꦢꦏ꧀ꦮꦱꦤꦺꦒꦸꦱ꧀ꦠꦶꦪꦺꦯꦸꦱ꧀ꦱꦶꦁꦤꦺꦴꦩꦼꦂꦭꦺꦴꦫꦺꦴ꧉ꦊꦭꦏꦺꦴꦤ꧀ꦲꦶꦏꦶꦲꦺꦴꦫꦊꦠ꧀ꦱꦸꦮꦶꦱꦏ꧀ꦮꦶꦱ꧀ꦱꦺꦢꦺꦏ꧀ꦤꦺꦠꦼꦏꦱꦁꦏꦪꦸꦢꦺꦪ꧉
꧇꧕꧇ 1꧋ꦲꦺꦴꦫꦊꦠ꧀ꦱꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦧꦸꦢꦭ꧀ꦤꦁꦪꦺꦫꦸꦱꦭꦺꦩ꧀ ꦲꦉꦥ꧀ꦩꦺꦭꦸꦔ꧀ꦒꦸꦪꦸꦥ꧀ꦥꦶꦫꦶꦪꦪꦤꦺꦮꦺꦴꦁꦙꦸ꧉ 2ꦤꦁꦪꦺꦫꦸꦱꦭꦺꦩ꧀ꦏꦺꦴꦤꦺꦴ꧈ꦲꦺꦴꦫꦲꦢꦺꦴꦃꦏꦫꦺꦴꦭꦮꦁꦮꦼꦢꦸꦱ꧀ ꦲꦺꦤꦺꦁꦧ꧀ꦭꦸꦩ꧀ꦧꦁꦔꦺ꧈ꦱꦶꦁꦲꦶꦁꦧꦱꦆꦧꦿꦤꦶꦗꦼꦤꦼꦁꦔꦺꦨꦼꦠꦺꦱ꧀ꦢ꧉ꦧ꧀ꦭꦸꦩ꧀ꦧꦁꦲꦶꦏꦶꦢꦶꦲꦸꦧꦼꦁꦔꦶꦏꦫꦺꦴꦒꦢꦿꦶꦭꦶꦩ꧉ 3ꦒꦢꦿꦶꦒꦢꦿꦶꦤꦺꦏꦸꦮꦶꦏꦼꦧꦼꦏ꧀ꦏꦫꦺꦴꦮꦺꦴꦁꦭꦫꦱꦶꦁꦥꦠꦶꦁꦒ꧀ꦭꦺꦠꦏ꧀ꦤꦁꦏꦺꦴꦤꦺꦴ꧉ꦲꦺꦤꦺꦁꦱꦶꦁꦭꦩꦸꦂ꧈ꦭꦶꦪꦤꦺꦭꦸꦩ꧀ꦥꦸꦃꦭꦤ꧀ꦲꦸꦒꦲꦺꦤꦺꦁꦱꦶꦁꦥꦶꦚ꧀ꦕꦁꦲꦩ꧀ꦧꦫꦁ꧉ꦮꦺꦴꦁꦮꦺꦴꦁꦲꦶꦏꦶꦥꦢꦔꦼꦤ꧀ꦠꦺꦤ꧀ꦤꦶꦎꦧꦃꦲꦺꦧꦚꦸꦤꦺꦧ꧀ꦭꦸꦩ꧀ꦧꦁꦏꦺꦴꦤꦺꦴ꧉ 4ꦲꦮꦶꦠ꧀ꦲꦺꦤꦺꦁꦮꦚ꧀ꦕꦶꦤꦺꦩꦸꦭꦺꦏꦠ꧀ꦩꦼꦢꦸꦤ꧀ꦔꦺꦴꦧꦃꦲꦏꦺꦧꦚꦸꦤꦺ꧉ꦤꦺꦏ꧀ꦧꦚꦸꦤꦺꦲꦺꦴꦧꦃ꧈ꦱꦥꦱꦶꦁꦚꦼꦩ꧀ꦥ꧀ꦭꦸꦁꦤ꧀ꦢꦶꦱꦶꦏ꧀ꦪꦧꦏꦭ꧀ꦩꦫꦶ꧈ꦲꦺꦴꦫꦥꦼꦂꦢꦸꦭꦶꦲꦥꦭꦫꦤꦺ꧉ 5ꦤꦁꦏꦺꦴꦤꦺꦴꦲꦺꦤꦺꦁꦮꦺꦴꦁꦱꦶꦁꦮꦶꦱ꧀ꦭꦫꦠꦼꦭꦸꦁꦥꦸꦭꦸꦃꦮꦺꦴꦭꦸꦠꦲꦸꦤ꧀ꦱꦸꦮꦺꦤꦺ꧉ 6ꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦮꦺꦴꦁꦔꦺꦭꦤ꧀ꦔꦼꦂꦠꦶꦤꦺꦏ꧀ꦮꦺꦴꦁꦏꦸꦮꦶꦮꦶꦱ꧀ꦭꦫꦱꦸꦮꦶꦧꦔꦼꦠ꧀ ꦩꦸꦭꦤꦺꦢꦶꦠꦏꦺꦴꦤ꧀ꦤꦶ:“ꦲꦥꦏꦺꦴꦮꦺꦏꦼꦥꦺꦔꦶꦤ꧀ꦩꦫꦶꦠꦼꦤꦤ꧀?”
7꧋ꦮꦺꦴꦁꦔꦺꦱꦼꦩꦲꦸꦂ:“ꦭꦃꦏꦼꦥꦿꦶꦪꦺ꧈ꦲꦏꦸꦲꦺꦴꦫꦤ꧀ꦢꦸꦮꦺꦱꦥꦱꦥꦱꦶꦁꦔꦼꦢꦸꦤ꧀ꦤꦏꦺꦲꦏꦸꦤꦺꦏ꧀ꦧꦚꦸꦤꦺꦲꦺꦴꦧꦃ!ꦤꦺꦏ꧀ꦲꦏꦸꦲꦉꦥ꧀ꦚꦼꦩ꧀ꦥ꧀ꦭꦸꦁ꧈ꦲꦏꦸꦮꦶꦱ꧀ꦏꦼꦢꦶꦱꦶꦏ꧀ꦏꦤ꧀ꦭꦶꦪꦤꦺ꧉”
8꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦔꦺ:“ꦏꦺꦴꦮꦺꦔꦢꦼꦏ꧀ꦏ!ꦏ꧀ꦭꦱꦩꦸꦢꦶꦒꦸꦭꦸꦁꦭꦤ꧀ꦩ꧀ꦭꦏꦸꦮ!” 9ꦮꦺꦴꦁꦔꦺꦠꦼꦫꦸꦱ꧀ꦱꦏ꧀ꦮꦠ꧀ꦩꦫꦶ꧈ꦔ꧀ꦒꦸꦭꦸꦁꦏ꧀ꦭꦱꦤꦺꦠꦼꦫꦸꦱ꧀ꦩ꧀ꦭꦏꦸ꧉
꧋ꦏꦸꦮꦶꦠꦶꦧꦢꦶꦤꦱꦧꦠ꧀꧈ 10ꦩꦸꦭꦤꦺꦥꦫꦥꦼꦁꦒꦼꦢꦺꦤꦺꦧꦁꦱꦙꦸꦠꦼꦫꦸꦱ꧀ꦚꦼꦤꦺꦤ꧀ꦤꦶꦮꦺꦴꦁꦱꦶꦁꦢꦶꦠꦩ꧀ꦧꦤꦶꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶ꧈ꦔꦺꦴꦩꦺꦴꦁ:“ꦱꦲꦶꦏꦶꦭꦲꦸꦠ꧀ꦢꦶꦤꦱꦧꦠ꧀ꦠ?ꦏꦺꦴꦮꦺꦲꦺꦴꦫꦏꦼꦤꦺꦁꦩꦁꦒꦸꦭ꧀ꦏ꧀ꦭꦱꦩꦸ꧉”
11꧋ꦤꦁꦔꦶꦁꦮꦺꦴꦁꦔꦺꦱꦼꦩꦲꦸꦂ:“ꦭꦃꦲꦏꦸꦢꦶꦏꦺꦴꦁꦏꦺꦴꦤ꧀ꦏꦫꦺꦴꦮꦺꦴꦁꦱꦶꦁꦤꦩ꧀ꦧꦤꦶꦲꦏꦸꦏꦺꦴꦁꦏꦺꦴꦤ꧀ꦩꦁꦒꦸꦭ꧀ꦏ꧀ꦭꦱꦏꦸꦭꦤ꧀ꦩ꧀ꦭꦏꦸ!” 12“ꦱꦥꦱꦶꦁꦔꦺꦴꦁꦏꦺꦴꦤ꧀ꦏꦺꦴꦮꦺ?” 13ꦤꦁꦔꦶꦁꦮꦺꦴꦁꦔꦺꦲꦺꦴꦫꦔꦼꦂꦠꦶꦱꦥꦱꦶꦁꦤꦩ꧀ꦧꦤꦶꦢꦺꦏ꧀ꦤꦺ꧈ꦲꦮꦶꦠ꧀ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦭꦸꦔ꧈ꦗꦭꦂꦫꦤ꧀ꦤꦁꦏꦺꦴꦤꦺꦴꦮꦺꦴꦁꦔꦺꦩꦭꦶꦃꦲꦺꦴꦏꦺꦃꦧꦔꦼꦠ꧀꧈
14꧋ꦲꦺꦴꦫꦊꦠ꧀ꦱꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦏꦼꦥꦼꦠꦸꦏ꧀ꦮꦺꦴꦁꦔꦺꦤꦁꦒꦿꦺꦗꦒꦼꦢꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦢꦺꦏ꧀ꦤꦺ:“ꦱꦲꦶꦏꦶꦏꦺꦴꦮꦺꦮꦶꦱ꧀ꦩꦫꦶꦠ!ꦲꦗꦔ꧀ꦭꦏꦺꦴꦤ꧀ꦤꦶꦧꦫꦁꦱꦶꦁꦲꦺꦴꦫꦲꦥꦶꦏ꧀ꦩꦼꦤꦺꦃ꧈ꦩꦼꦁꦏꦺꦴꦏꦺꦴꦮꦺꦤ꧀ꦢꦏ꧀ꦠꦶꦧꦲꦶꦁꦏꦱꦁꦱꦫꦤ꧀ꦱꦶꦁꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦩꦲꦸꦤꦺ꧉”
15꧋ꦮꦺꦴꦁꦔꦺꦠꦼꦫꦸꦱ꧀ꦭꦸꦔꦤꦁꦔ꧀ꦒꦺꦴꦤ꧀ꦤꦺꦥꦫꦥꦼꦁꦒꦼꦢꦺꦤꦺꦧꦁꦱꦙꦸ꧈ꦔꦺꦴꦩꦺꦴꦁꦔꦶꦤꦺꦏ꧀ꦱꦶꦁꦤꦩ꧀ꦧꦤꦶꦢꦺꦏ꧀ꦤꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀꧈ 16ꦩꦸꦭꦤꦺꦥꦫꦥꦼꦁꦒꦼꦢꦺꦩꦲꦸꦲꦉꦥ꧀ꦚꦼꦏꦼꦭ꧀ꦒꦸꦱ꧀ꦠꦶꦪꦺꦯꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦤꦩ꧀ꦧꦤꦶꦮꦺꦴꦁꦲꦶꦁꦢꦶꦤꦱꦧꦠ꧀꧈ 17ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦮꦺꦴꦁꦏꦸꦮꦶ:“ꦧꦥꦏ꧀ꦏꦸꦲꦺꦴꦫꦭꦺꦫꦺꦤ꧀ꦲꦼꦁꦒꦺꦴꦤꦺꦠꦤ꧀ꦢꦁꦧꦼꦕꦶꦏ꧀ ꦲꦸꦒꦲꦺꦴꦫꦭꦺꦫꦺꦤ꧀ꦲꦶꦁꦢꦶꦤꦱꦧꦠ꧀ ꦩꦸꦭꦤꦺꦲꦏꦸꦲꦸꦒꦪꦤꦸꦭꦸꦁꦔꦶꦮꦺꦴꦁꦠꦼꦫꦸꦱ꧀ ꦲꦺꦴꦫꦥꦼꦂꦢꦸꦭꦶꦲꦶꦁꦢꦶꦤꦲꦥ꧉”
18꧋ꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦩꦫꦏ꧀ꦏꦏꦺꦥꦫꦥꦼꦁꦒꦼꦢꦺꦠꦩ꧀ꦧꦃꦗꦺꦁꦏꦺꦭ꧀ꦭꦺꦭꦤ꧀ꦥꦢꦏꦼꦥꦺꦔꦶꦤ꧀ꦩꦠꦺꦤ꧀ꦤꦶꦢꦺꦏ꧀ꦤꦺ꧉ꦮꦺꦴꦁꦮꦺꦴꦁꦏꦼꦥꦺꦔꦶꦤ꧀ꦩꦠꦺꦤ꧀ꦤꦶꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦲꦺꦴꦫꦤꦩꦸꦁꦗꦭꦂꦫꦤ꧀ꦢꦺꦏ꧀ꦤꦺꦤꦼꦫꦏ꧀ꦮꦺꦠ꧀ꦠꦺꦢꦶꦤꦱꦧꦠ꧀ ꦤꦁꦔꦶꦁꦲꦸꦒꦗꦭꦂꦫꦤ꧀ꦢꦺꦏ꧀ꦤꦺꦔꦫꦤ꧀ꦤꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦧꦥꦏ꧀ꦏꦺ꧈ꦠꦼꦒꦼꦱ꧀ꦱꦺꦢꦺꦏ꧀ꦤꦺꦩꦢꦏ꧀ꦏꦏꦺꦢꦺꦏ꧀ꦤꦺꦢꦺꦮꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉
19꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦮꦺꦴꦁꦮꦺꦴꦁꦩꦲꦸ:“ꦲꦏꦸꦲꦉꦥ꧀ꦔꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ꧉ꦲꦏꦸꦲꦺꦴꦫꦧꦶꦱꦤꦶꦤ꧀ꦢꦏ꧀ꦏꦏꦺꦲꦥꦲꦥꦱꦁꦏꦏꦉꦥ꧀ꦏꦸꦢꦺꦮꦺ꧈ꦤꦁꦔꦶꦁꦲꦏꦸꦤꦸꦫꦸꦠ꧀ꦠꦶꦏꦉꦥ꧀ꦥꦺꦧꦥꦏ꧀ꦏꦸ꧉ꦲꦥꦱꦶꦁꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦪꦏꦸꦮꦶꦠꦏ꧀ꦠꦶꦤ꧀ꦢꦏ꧀ꦏꦏꦺꦲꦸꦒ꧉ 20ꦧꦥꦏ꧀ꦏꦸꦤꦿꦺꦱ꧀ꦤꦤ꧀ꦤꦶꦲꦏꦸ꧉ꦢꦺꦏ꧀ꦤꦺꦤ꧀ꦢꦸꦢꦸꦃꦲꦏꦺꦱꦼꦩ꧀ꦧꦫꦁꦩꦫꦁꦲꦏꦸ꧈ꦱꦼꦩ꧀ꦧꦫꦁꦱꦶꦁꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴꦢꦺꦏ꧀ꦤꦺ꧉ꦤꦩ꧀ꦧꦤꦶꦮꦺꦴꦁꦏꦸꦮꦶꦢꦸꦫꦸꦁꦲꦥꦲꦥ꧉ꦢꦺꦏ꧀ꦤꦺꦧꦏꦭ꧀ꦤ꧀ꦢꦸꦢꦸꦃꦲꦏꦺꦊꦭꦏꦺꦴꦤ꧀ꦱꦶꦁꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦏꦸꦮꦶ꧈ꦱꦸꦥꦪꦏꦺꦴꦮꦺꦥꦢꦔ꧀ꦒꦸꦩꦸꦤ꧀ꦏꦧꦺꦃ! 21ꦏꦪꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦤꦔꦺꦏ꧀ꦏꦺꦮꦺꦴꦁꦩꦠꦶꦧꦶꦱ ꦲꦸꦫꦶꦥ꧀ꦩꦼꦤꦺꦃ꧈ꦲꦏꦸꦲꦸꦒꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁꦱꦥꦮꦲꦺꦱꦏ꧀ꦏꦉꦥ꧀ꦏꦸ꧉ 22ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦲꦺꦴꦫꦔꦿꦸꦠꦸꦱꦥꦱꦥ꧉ꦏ꧀ꦮꦱꦏꦁꦒꦺꦴꦔꦿꦸꦠꦸꦏꦸꦮꦶꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁꦲꦤꦏ꧀ꦏꦺ꧉ 23ꦢꦢꦶꦤꦺꦮꦺꦴꦁꦏꦧꦺꦃꦏꦸꦢꦸꦔꦗꦺꦤ꧀ꦤꦶꦩꦫꦁꦲꦤꦏ꧀ꦏꦺ꧈ꦏꦪꦲꦼꦁꦒꦺꦴꦤꦺꦔꦗꦺꦤ꧀ꦤꦶꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺ꧉ꦱꦥꦱꦶꦁꦲꦺꦴꦫꦔꦗꦺꦤ꧀ꦤꦶꦩꦫꦁꦲꦤꦏ꧀ꦏꦺꦪꦲꦺꦴꦫꦔꦗꦺꦤ꧀ꦤꦶꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦱꦶꦁꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ꧉”
24꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦏꦺꦴꦮꦺꦠꦏ꧀ꦲꦺꦴꦩꦺꦴꦁꦔꦶꦱꦏ꧀ꦧꦼꦤꦼꦂꦫꦺ!ꦱꦥꦱꦶꦁꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦏꦸꦭꦤ꧀ꦥꦽꦕꦪꦩꦫꦁꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧈ꦮꦺꦴꦁꦏꦸꦮꦶꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉ꦢꦺꦏ꧀ꦤꦺꦲꦺꦴꦫꦧꦏꦭ꧀ꦢꦶꦱꦼꦠꦿꦥ꧀ ꦲꦮꦶꦠ꧀ꦮꦶꦱ꧀ꦲꦸꦕꦸꦭ꧀ꦱꦁꦏꦥꦠꦶꦭꦤ꧀ꦩ꧀ꦊꦧꦸꦲꦶꦁꦲꦸꦫꦶꦥ꧀꧈ 25ꦔꦤ꧀ꦢꦼꦭ꧀ꦭꦲꦏꦸꦠ!ꦲꦺꦴꦫꦱꦸꦮꦶꦩꦼꦤꦺꦃꦱꦶꦁꦥꦢꦩꦠꦶꦧꦏꦭ꧀ꦏꦿꦸꦔꦸꦱ꧀ꦮꦫꦤꦺꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧉ꦱꦥꦱꦶꦁꦏꦿꦸꦔꦸꦱ꧀ꦮꦫꦤꦺꦧꦏꦭ꧀ꦲꦸꦫꦶꦥ꧀꧈ꦱꦶꦁꦠꦏ꧀ꦲꦺꦴꦩꦺꦴꦁꦲꦶꦏꦶꦱꦲꦶꦏꦶꦮꦶꦱ꧀ꦩꦺꦴꦭꦃꦲꦶꦏ꧀ꦭꦏꦺꦴꦤ꧀꧈ 26ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺ꧈ꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁꦱꦼꦩ꧀ꦧꦫꦁꦲꦶꦁꦢꦺꦴꦚꦏꦺꦤꦺ꧈ꦢꦺꦏ꧀ꦤꦺꦮꦶꦱ꧀ꦔꦼꦏꦺꦏ꧀ꦏꦏꦺꦏ꧀ꦮꦱꦤꦺꦩꦫꦁꦲꦤꦏ꧀ꦏꦺ꧈ꦩꦸꦭꦤꦺꦲꦤꦏ꧀ꦏꦺꦲꦸꦒꦧꦶꦱꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁꦱꦼꦩ꧀ꦧꦫꦁꦲꦶꦁꦢꦺꦴꦚ꧉ 27ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦸꦒꦮꦶꦱ꧀ꦔꦼꦏꦺꦏ꧀ꦏꦶꦏ꧀ꦮꦱꦩꦫꦁꦲꦤꦏ꧀ꦏꦺꦏꦁꦒꦺꦴꦔꦿꦸꦠꦸꦩꦤꦸꦁꦱ꧈ꦲꦮꦶꦠ꧀ꦢꦺꦏ꧀ꦤꦺꦏꦸꦮꦶꦲꦤꦏ꧀ꦏꦺꦩꦤꦸꦁꦱ꧉ 28ꦲꦗꦏꦒꦺꦠ꧀ꦭꦤ꧀ꦲꦗꦔ꧀ꦒꦸꦩꦸꦤ꧀!ꦲꦩ꧀ꦧꦺꦱꦸꦏ꧀ꦮꦺꦴꦁꦮꦺꦴꦁꦱꦶꦁꦮꦶꦱ꧀ꦢꦶꦏꦸꦧꦸꦂꦧꦏꦭ꧀ꦏꦿꦸꦔꦸꦱ꧀ꦮꦫꦤꦺ꧉ 29ꦱꦶꦁꦩꦲꦸꦤꦺꦥꦢꦤꦶꦤ꧀ꦢꦏ꧀ꦏꦏꦺꦧꦼꦕꦶꦏ꧀ꦧꦏꦭ꧀ꦠꦔꦶꦤꦩ꧀ꦥꦏꦲꦸꦫꦶꦥ꧀ꦥꦤ꧀꧈ꦱꦶꦁꦥꦢꦤꦶꦤ꧀ꦢꦏ꧀ꦏꦏꦺꦲꦭꦧꦏꦭ꧀ꦠꦔꦶꦤꦩ꧀ꦥꦱꦼꦠꦿꦥꦤ꧀ꦤꦺ꧉ 30ꦲꦏꦸꦲꦺꦴꦫꦧꦶꦱꦤꦶꦤ꧀ꦢꦏ꧀ꦏꦏꦺꦲꦥꦲꦥꦱꦁꦏꦏꦉꦥ꧀ꦏꦸꦢꦺꦮꦺ꧉ꦲꦏꦸꦩꦤꦸꦠ꧀ꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃ꧉ꦲꦸꦒꦤꦺꦏ꧀ꦲꦏꦸꦔꦿꦸꦠꦸꦩꦤꦸꦁꦱ꧈ꦲꦏꦸꦩꦤꦸꦠ꧀ꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃ꧈ꦩꦸꦭꦤꦺꦪꦱꦏ꧀ꦧꦼꦤꦼꦂꦫꦺ꧉ꦲꦏꦸꦲꦺꦴꦫꦤꦸꦫꦸꦠ꧀ꦠꦶꦏꦉꦥ꧀ꦏꦸꦢꦺꦮꦺ꧈ꦤꦁꦔꦶꦁꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃ꧈ꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉”
31꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦤꦺꦏ꧀ꦲꦏꦸꦢꦺꦮꦺꦱꦶꦁꦔꦺꦴꦩꦺꦴꦁꦔꦏꦺꦧꦧ꧀ꦲꦏꦸ꧈ꦧꦼꦤꦼꦂꦏꦺꦴꦮꦺꦤꦺꦏ꧀ꦲꦺꦴꦫꦒꦼꦊꦩ꧀ꦥꦽꦕꦪ꧉ 32ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦩꦺꦴꦁꦔꦏꦺꦧꦧ꧀ꦲꦏꦸ꧉ꦲꦏꦸꦔꦼꦂꦠꦶꦤꦺꦏ꧀ꦢꦺꦏ꧀ꦤꦺꦲꦺꦴꦫꦒꦺꦴꦫꦺꦴꦃ꧉ꦲꦥꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦢꦺꦏ꧀ꦤꦺꦧꦧ꧀ꦲꦏꦸꦏꦸꦮꦶꦠꦼꦤꦤ꧀꧈ 33ꦏꦺꦴꦮꦺꦥꦢꦏꦺꦴꦁꦏꦺꦴꦤ꧀ꦤꦤ꧀ꦠꦏꦺꦴꦤ꧀ꦩꦫꦁꦪꦺꦴꦲꦤꦼꦱ꧀ꦧꦧ꧀ꦲꦏꦸ꧉ꦲꦥꦢꦺꦏ꧀ꦤꦺꦒꦺꦴꦫꦺꦴꦃꦧꦧ꧀ꦲꦏꦸ?ꦭꦲꦸꦠ꧀ꦲꦺꦴꦫꦠ? 34ꦲꦏꦸꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦲꦺꦴꦫꦗꦭꦂꦫꦤ꧀ꦲꦏꦸꦩ꧀ꦧꦸꦠꦸꦃꦲꦏꦺꦥꦱꦼꦏ꧀ꦱꦶꦤꦺꦩꦤꦸꦁꦱ꧈ꦤꦁꦔꦶꦁꦗꦭꦂꦫꦤ꧀ꦲꦏꦸꦏꦼꦥꦺꦔꦶꦤ꧀ꦤꦺꦏ꧀ꦏꦺꦴꦮꦺꦤꦩ꧀ꦥꦏꦼꦱ꧀ꦭꦩꦼꦠ꧀ꦠꦤ꧀꧈ 35ꦪꦺꦴꦲꦤꦼꦱ꧀ꦏꦸꦮꦶꦏꦪꦢꦶꦪꦤ꧀ꦱꦶꦁꦩꦸꦫꦸꦥ꧀ꦭꦤ꧀ꦩꦢꦁꦔꦶꦭꦤ꧀ꦤꦩꦸꦁꦱꦏ꧀ꦲꦸꦤ꧀ꦠꦂꦫꦏꦺꦴꦮꦺꦒꦼꦊꦩ꧀ꦏꦼꦥꦢꦁꦔꦤ꧀ꦢꦶꦪꦤ꧀ꦏꦸꦮꦶ꧉ 36ꦤꦁꦔꦶꦁꦲꦏꦸꦤ꧀ꦢꦸꦮꦺꦤ꧀ꦤꦶꦱꦼꦏ꧀ꦱꦶꦱꦶꦁꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦥꦱꦼꦏ꧀ꦱꦶꦤꦺꦪꦺꦴꦲꦤꦼꦱ꧀꧈ꦲꦮꦶꦠ꧀ꦥꦼꦁꦒꦮꦺꦥꦼꦁꦒꦮꦺꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦠꦏ꧀ꦠꦶꦤ꧀ꦢꦏ꧀ꦏꦏꦺꦱꦲꦶꦏꦶꦔꦸꦗꦸꦠ꧀ꦠꦏꦺꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 37ꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧈ꦢꦺꦏ꧀ꦤꦺꦢꦺꦮꦺꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦲꦏꦸ꧈ꦱꦼꦤꦗꦤ꧀ꦤꦏꦺꦴꦮꦺꦢꦸꦫꦸꦁꦠꦲꦸꦏꦿꦸꦔꦸꦱ꧀ꦮꦫꦤꦺꦭꦤ꧀ꦮꦼꦫꦸꦃꦫꦸꦥꦤꦺ꧉ 38ꦩꦸꦭꦤꦺꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦲꦺꦴꦫꦧꦶꦱꦩꦁꦒꦺꦴꦤ꧀ꦲꦶꦁꦲꦠꦶꦩꦸ꧈ꦲꦮꦶꦠ꧀ꦏꦺꦴꦮꦺꦲꦺꦴꦫꦥꦽꦕꦪꦩꦫꦁꦲꦏꦸ꧈ꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉ 39ꦏꦺꦴꦮꦺꦥꦢꦚꦶꦤꦲꦸꦏꦶꦠꦧ꧀ꦱꦸꦕꦶ꧈ꦲꦮꦶꦠ꧀ꦏꦺꦴꦮꦺꦩꦶꦏꦶꦂꦤꦺꦏ꧀ꦏꦸꦮꦶꦧꦶꦱꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ꧉ꦭꦃꦏꦶꦠꦧ꧀ꦱꦸꦕꦶꦏꦸꦮꦶꦔꦺꦴꦩꦺꦴꦁꦔꦏꦺꦧꦧ꧀ꦱꦥ?ꦲꦥꦲꦺꦴꦫꦔꦺꦴꦩꦺꦴꦁꦔꦏꦺꦧꦧ꧀ꦲꦏꦸ? 40ꦤꦁꦔꦶꦁꦏꦺꦴꦮꦺꦲꦺꦴꦫꦒꦼꦊꦩ꧀ꦩꦫꦤꦁꦔ꧀ꦒꦺꦴꦤ꧀ꦏꦸꦱꦸꦥꦪꦧꦶꦱꦤꦩ꧀ꦥꦲꦸꦫꦶꦥ꧀ꦭꦁꦒꦼꦁ꧉
41꧋“ꦲꦏꦸꦲꦺꦴꦫꦏꦼꦥꦺꦔꦶꦤ꧀ꦲꦩ꧀ꦧꦺꦴꦏ꧀ꦲꦼꦊꦩ꧀꧈ 42ꦭꦤ꧀ꦲꦏꦸꦮꦶꦱ꧀ꦔꦼꦂꦠꦶꦤꦺꦏ꧀ꦏꦺꦴꦮꦺꦲꦺꦴꦫꦠꦿꦺꦱ꧀ꦤꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉ 43ꦲꦏꦸꦠꦼꦏꦗꦭꦂꦫꦤ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦔꦺꦴꦁꦏꦺꦴꦤ꧀ꦲꦏꦸ꧈ꦤꦁꦔꦶꦁꦲꦏꦸꦲꦩ꧀ꦧꦺꦴꦏ꧀ꦠꦩ꧀ꦥꦶꦏ꧀꧈ꦤꦺꦏ꧀ꦲꦺꦤꦺꦁꦮꦺꦴꦁꦭꦶꦪꦤꦺꦱꦶꦁꦠꦼꦏꦤꦺꦱꦁꦏꦏꦉꦥ꧀ꦥꦺꦢꦺꦮꦺꦩꦭꦃꦲꦩ꧀ꦧꦺꦴꦏ꧀ꦠꦩ꧀ꦥ꧉ 44ꦏꦺꦴꦮꦺꦲꦺꦴꦫꦥꦢꦔ꧀ꦒꦺꦴꦭꦺꦏ꧀ꦊꦩ꧀ꦊꦩꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦱꦶꦗꦶ꧉ꦏꦺꦴꦮꦺꦤꦩꦸꦁꦏꦼꦥꦺꦔꦶꦤ꧀ꦢꦶꦲꦼꦊꦩ꧀ꦩꦤꦸꦁꦱ꧈ꦩꦸꦭꦤꦺꦏꦺꦴꦮꦺꦲꦺꦴꦫꦧꦶꦱꦥꦽꦕꦪ꧉ 45ꦲꦗꦩꦶꦏꦶꦂꦤꦺꦏ꧀ꦲꦏꦸꦧꦏꦭ꧀ꦚꦭꦃꦚꦭꦃꦲꦏꦺꦏꦺꦴꦮꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦤꦁꦔꦶꦁꦤꦧꦶꦩꦺꦴꦱꦼꦱ꧀ꦢꦺꦮꦺ꧈ꦱꦶꦁꦲꦩ꧀ꦧꦺꦴꦏ꧀ꦗꦒꦏ꧀ꦏꦏꦺ꧈ꦢꦺꦏ꧀ꦤꦺꦱꦶꦁꦚꦭꦃꦚꦭꦃꦲꦏꦺꦏꦺꦴꦮꦺ꧉ 46ꦏꦺꦴꦮꦺꦏꦸꦮꦶꦲꦺꦴꦫꦥꦽꦕꦪꦩꦫꦁꦤꦧꦶꦩꦺꦴꦱꦼꦱ꧀꧈ꦲꦮꦶꦠ꧀ꦤꦺꦏ꧀ꦏꦺꦴꦮꦺꦥꦽꦕꦪꦩꦫꦁꦤꦧꦶꦩꦺꦴꦱꦼꦱ꧀ ꦏꦺꦴꦮꦺꦩꦼꦱ꧀ꦠꦶꦪꦥꦽꦕꦪꦩꦫꦁꦲꦏꦸ꧈ꦲꦮꦶꦠ꧀ꦱꦶꦁꦢꦶꦠꦸꦭꦶꦱ꧀ꦏꦫꦺꦴꦤꦧꦶꦩꦺꦴꦱꦼꦱ꧀ꦏꦸꦮꦶꦪꦔꦺꦴꦩꦺꦴꦁꦔꦏꦺꦧꦧ꧀ꦲꦏꦸ꧉ 47ꦤꦁꦔꦶꦁꦤꦺꦏ꧀ꦏꦺꦴꦮꦺꦲꦺꦴꦫꦥꦽꦕꦪꦩꦫꦁꦱꦶꦁꦢꦶꦠꦸꦭꦶꦱ꧀ ꦏꦫꦺꦴꦤꦧꦶꦩꦺꦴꦱꦼꦱ꧀ ꦩꦺꦴꦱꦺꦴꦏ꧀ꦏꦺꦴꦮꦺꦪꦧꦏꦭ꧀ꦥꦽꦕꦪꦠꦼꦩ꧀ꦧꦸꦁꦏꦸ?”
꧇꧖꧇ 1꧋ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦧꦿꦃꦩꦺꦂꦓꦭꦶꦭꦺꦪ꧉ꦩꦺꦂꦲꦶꦏꦶꦲꦸꦒꦗꦼꦤꦼꦁꦔꦺꦩꦺꦂꦠꦶꦧꦺꦫꦶꦪꦱ꧀꧈ 2ꦮꦺꦴꦁꦲꦺꦴꦏꦺꦃꦧꦔꦼꦠ꧀ꦥꦢꦔꦼꦠꦸꦠ꧀ꦠꦏꦺꦢꦺꦏ꧀ꦤꦺ꧈ꦲꦮꦶꦠ꧀ꦮꦶꦱ꧀ꦥꦢꦮꦼꦫꦸꦃꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺ꧈ꦢꦺꦴꦁꦔꦺꦢꦺꦏ꧀ꦤꦺꦤꦩ꧀ꦧꦤꦶꦱꦶꦁꦭꦫ꧉ 3ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃꦒꦸꦤꦸꦁꦭꦤ꧀ꦚ꧀ꦗꦒꦺꦴꦁꦤꦁꦏꦺꦴꦤꦺꦴꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉ 4ꦱꦲꦶꦏꦶꦫꦶꦪꦪꦥꦱ꧀ꦏꦃꦮꦶꦱ꧀ꦕꦼꦢꦼꦏ꧀꧉ 5ꦏꦢꦸꦁꦒꦸꦱ꧀ꦠꦶꦪꦺꦯꦸꦱ꧀ꦚꦮꦁꦏꦶꦮꦠꦼꦔꦼꦤ꧀ꦢꦺꦏ꧀ꦤꦺꦮꦼꦫꦸꦃꦮꦺꦴꦁꦲꦺꦴꦏꦺꦃꦒꦼꦩꦿꦸꦢꦸꦏ꧀ꦥꦢꦠꦼꦏ꧉ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦠꦏꦺꦴꦤ꧀ꦩꦫꦁꦫꦱꦸꦭ꧀ꦥ꦳ꦶꦭꦶꦥꦸꦱ꧀:“ꦔꦼꦤ꧀ꦢꦶꦱꦶꦁꦢꦺꦴꦢꦺꦴꦭ꧀ꦫꦺꦴꦠꦶꦏꦁꦒꦺꦴꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁꦮꦺꦴꦁꦏꦧꦺꦃꦲꦶꦏꦶꦪ?” 6ꦱꦏ꧀ꦗꦤꦺꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦔꦼꦂꦠꦶꦏꦼꦥꦿꦶꦪꦺꦲꦼꦁꦒꦺꦴꦤꦺꦲꦉꦥ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁꦮꦺꦴꦁꦲꦶꦏꦶ꧈ꦤꦁꦔꦶꦁꦢꦺꦏ꧀ꦤꦺꦤꦩꦸꦁꦏꦼꦥꦺꦔꦶꦤ꧀ꦔꦼꦂꦠꦶꦱꦼꦥꦶꦫꦒꦼꦢꦺꦤꦺꦥꦼꦔꦤ꧀ꦢꦼꦭ꧀ꦭꦺꦫꦱꦸꦭ꧀ꦥ꦳ꦶꦭꦶꦥꦸꦱ꧀꧈
7꧋ꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦱꦼꦩꦲꦸꦂ:“ꦒꦸꦱ꧀ꦠꦶ꧈ꦢꦸꦮꦶꦠ꧀ꦱꦏ꧀ꦠꦸꦩ꧀ꦥꦸꦏ꧀ꦮꦲꦺꦲꦶꦗꦶꦏ꧀ꦏꦸꦫꦁꦏꦁꦒꦺꦴꦤꦸꦏꦺꦴꦏ꧀ꦏꦏꦺꦩꦁꦔꦤ꧀ꦮꦺꦴꦁꦱꦼꦩꦺꦤꦺꦲꦺꦴꦏꦺꦃꦲꦺꦲꦶꦏꦶ꧈ꦱꦼꦤꦗꦤ꧀ꦤꦤꦩꦸꦁꦢꦶꦏꦺꦏ꧀ꦏꦶꦱꦏ꧀ꦕꦸꦮꦶꦭ꧀ꦱꦏ꧀ꦕꦸꦮꦶꦭ꧀!”
8-9꧋ꦫꦱꦸꦭ꧀ꦄꦤ꧀ꦢꦿꦺꦪꦱ꧀ ꦲꦢꦶꦏ꧀ꦏꦺꦫꦱꦸꦭ꧀ꦦꦺꦠꦿꦸꦱ꧀ ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦲꦶꦏꦶꦲꦺꦤꦺꦁꦧꦺꦴꦕꦃꦤ꧀ꦢꦸꦮꦺꦫꦺꦴꦠꦶꦭꦶꦩꦭꦤ꧀ꦲꦶꦮꦏ꧀ꦭꦺꦴꦫꦺꦴ꧉ꦤꦁꦔꦶꦁꦲꦥꦪꦱꦩ꧀ꦥꦺꦏꦁꦒꦺꦴꦮꦺꦴꦁꦱꦼꦩꦺꦤꦺꦲꦺꦴꦏꦺꦃꦲꦺ?”
10꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ:“ꦮꦺꦴꦁꦮꦺꦴꦁꦥꦢꦏꦺꦴꦁꦏꦺꦴꦤ꧀ꦚ꧀ꦗꦒꦺꦴꦁꦏꦧꦺꦃ!”ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦚ꧀ꦗꦒꦺꦴꦁꦤꦁꦱꦸꦏꦼꦠ꧀ꦠꦤ꧀꧈ꦤꦩꦸꦁꦮꦺꦴꦁꦭꦩꦸꦂꦏꦶꦫꦏꦶꦫꦲꦺꦤꦺꦁꦭꦶꦩꦁꦲꦺꦮꦸꦲꦺꦴꦏꦺꦃꦲꦺ꧉ 11ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚ꧀ꦗꦶꦏꦸꦏ꧀ꦫꦺꦴꦠꦶꦤꦺ꧉ꦱꦏ꧀ꦮꦶꦱ꧀ꦱꦺꦢꦺꦏ꧀ꦤꦺꦩꦠꦸꦂꦏꦼꦱꦸꦮꦸꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦫꦺꦴꦠꦶꦤꦺꦠꦼꦫꦸꦱ꧀ꦢꦶꦲꦼꦢꦸꦩ꧀꧈ꦲꦶꦮꦏ꧀ꦏꦺꦲꦩ꧀ꦧꦫꦁ꧈ꦱꦏ꧀ꦮꦶꦱ꧀ꦱꦺꦢꦶꦢꦺꦴꦔꦏ꧀ꦏꦏꦺꦠꦼꦫꦸꦱ꧀ꦢꦶꦲꦼꦢꦸꦩ꧀ꦩꦼꦢꦸꦩ꧀ꦩꦏꦺ꧉ꦏꦧꦺꦃꦩꦁꦔꦤ꧀ꦱꦏ꧀ꦮꦉꦏ꧀꧈ 12ꦏꦢꦸꦁꦮꦶꦱ꧀ꦮꦫꦱ꧀ꦩꦸꦏꦧꦺꦃꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦔ꧀ꦭꦸꦩ꧀ꦥꦸꦏ꧀ꦏꦏꦺꦠꦸꦫꦃꦲꦤ꧀ꦤꦺ꧈ꦱꦸꦥꦪꦲꦺꦴꦫꦲꦺꦤꦺꦁꦱꦶꦁꦢꦶꦲꦼꦕꦺꦲꦼꦕꦺꦃ꧉ 13ꦠꦸꦫꦸꦃꦲꦤꦺꦫꦺꦴꦠꦶꦭꦶꦩꦩꦲꦸꦢꦶꦭꦸꦩ꧀ꦥꦸꦏ꧀ꦏꦏꦺꦏꦧꦺꦃꦲꦺꦤ꧀ꦠꦸꦏ꧀ꦫꦺꦴꦭꦱ꧀ꦠꦺꦁꦒꦺꦴꦏ꧀꧈
14꧋ꦮꦺꦴꦁꦮꦺꦴꦁꦥꦢꦔ꧀ꦒꦸꦩꦸꦤ꧀ꦮꦼꦫꦸꦃꦊꦭꦏꦺꦴꦤ꧀ꦏꦪꦔꦺꦴꦤꦺꦴꦏꦸꦮꦶ꧈ꦩꦸꦭꦤꦺꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ꦠꦼꦤꦤ꧀ ꦮꦺꦴꦁꦲꦶꦏꦶꦤꦧꦶꦱꦶꦁꦏꦸꦢꦸꦠꦼꦏ꧈ꦤꦧꦶꦱꦶꦁꦢꦶꦲꦉꦥ꧀ꦲꦉꦥ꧀ꦏꦫꦺꦴꦲꦮꦏ꧀ꦏꦺꦢꦺꦮꦺ꧉” 15ꦱꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦔꦼꦂꦠꦶꦤꦺꦏ꧀ꦮꦺꦴꦁꦮꦺꦴꦁꦲꦉꦥ꧀ꦩꦼꦏ꧀ꦱꦢꦺꦏ꧀ꦤꦺꦏꦺꦴꦁꦏꦺꦴꦤ꧀ꦢꦢꦶꦫꦠꦸꦤꦺ꧈ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦭꦸꦔꦩꦼꦤꦺꦃꦩꦸꦁꦒꦃꦒꦸꦤꦸꦁ꧈ꦢꦺꦮꦺꦏ꧀ꦏꦤ꧀꧈
16-17꧋ꦏꦢꦸꦁꦮꦶꦱ꧀ꦱꦸꦫꦸꦥ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦤꦸꦩ꧀ꦥꦏ꧀ꦥꦿꦲꦸꦤꦺꦲꦉꦥ꧀ꦔꦧꦿꦃꦤꦁꦏꦸꦠꦑꦥꦺꦂꦤꦏꦸꦩ꧀꧈ꦱꦲꦶꦏꦶꦮꦶꦱ꧀ꦩꦺꦴꦭꦃꦲꦶꦥꦼꦠꦼꦁ꧈ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦢꦸꦫꦸꦁꦤꦸꦠꦸꦠ꧀ꦠꦶ꧉ 18ꦲꦔꦶꦤ꧀ꦤꦺꦱꦼꦭꦺꦴꦠ꧀ꦧꦤ꧀ꦠꦼꦂꦭꦤ꧀ꦲꦺꦴꦩ꧀ꦧꦏ꧀ꦏꦺꦪꦱꦼꦭꦺꦴꦠ꧀ꦒꦼꦢꦺ꧉ 19ꦏꦢꦸꦁꦮꦶꦱ꧀ꦤ꧀ꦢꦪꦸꦁꦏꦶꦫꦏꦶꦫꦭꦶꦩꦁꦏꦶꦭꦺꦴꦩꦺꦠꦼꦂꦩꦸꦫꦶꦢ꧀ꦩꦸꦫꦶꦢ꧀ꦩꦲꦸꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦩ꧀ꦭꦏꦸꦤꦁꦤ꧀ꦢꦸꦮꦸꦂꦫꦺꦧꦚꦸꦚꦼꦢꦼꦏ꧀ꦏꦶꦥꦿꦲꦸꦤꦺ꧉ꦏꦧꦺꦃꦥꦢꦮꦼꦢꦶ꧉ 20ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦗꦥꦢꦮꦼꦢꦶ!ꦲꦶꦏꦶꦲꦏꦸ!” 21ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦤꦼꦩ꧀ꦧꦸꦁꦒꦸꦱ꧀ꦠꦶꦪꦺꦯꦸꦱ꧀ꦱꦸꦥꦪꦩꦺꦭꦸꦤꦸꦩ꧀ꦥꦏ꧀ꦥꦿꦲꦸꦤꦺ꧉ꦤꦁꦔꦶꦁꦲꦺꦴꦫꦱꦸꦮꦶ꧈ꦲꦮꦶꦠ꧀ꦥꦿꦲꦸꦤꦺꦮꦶꦱ꧀ꦠꦼꦏꦤ꧀ꦔ꧀ꦒꦺꦴꦤ꧀ꦤꦺ꧉
22-24꧋ꦲꦶꦁꦲꦺꦱꦸꦏ꧀ꦏꦺꦮꦺꦴꦁꦥꦶꦫꦁꦥꦶꦫꦁꦥꦢꦠꦼꦏꦩꦼꦤꦺꦃꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦲꦶꦁꦮꦶꦔꦶꦤꦺꦒꦸꦱ꧀ꦠꦶꦪꦺꦯꦸꦱ꧀ꦔꦼꦢꦸꦩ꧀ꦫꦺꦴꦠꦶ꧉ꦮꦺꦴꦁꦮꦺꦴꦁꦲꦶꦏꦶꦩꦶꦏꦶꦫꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦤꦁꦏꦺꦴꦤꦺꦴ꧈ꦲꦮꦶꦠ꧀ꦮꦶꦔꦶꦤꦩꦸꦁꦲꦺꦤꦺꦁꦥꦿꦲꦸꦱꦶꦗꦶꦭꦤ꧀ꦥꦿꦲꦸꦲꦶꦏꦶꦢꦶꦒꦮꦔꦧꦿꦃꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉ꦮꦺꦴꦁꦮꦺꦴꦁꦮꦼꦫꦸꦃꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦩꦺꦭꦸꦔꦧꦿꦃ꧉ꦤꦁꦔꦶꦁꦏꦢꦸꦁꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦏꦼꦠꦼꦩꦸꦤꦁꦏꦺꦴꦤꦺꦴ꧈ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦔꦧꦿꦃꦤꦁꦑꦥꦺꦂꦤꦏꦸꦩ꧀ꦏꦫꦺꦴꦥꦿꦲꦸꦥꦿꦲꦸꦱꦶꦁꦠꦼꦏꦱꦁꦏꦏꦸꦠꦠꦶꦧꦺꦫꦶꦪꦱ꧀꧈ꦮꦺꦴꦁꦮꦺꦴꦁꦲꦉꦥ꧀ꦔ꧀ꦒꦺꦴꦭꦺꦏ꧀ꦏꦶꦒꦸꦱ꧀ꦠꦶꦪꦺꦯꦸꦱ꧀꧈
25꧋ꦤꦁꦲꦧꦿꦃꦲꦤ꧀ꦏꦺꦴꦤꦺꦴꦮꦺꦴꦁꦮꦺꦴꦁꦠꦼꦫꦸꦱ꧀ꦤꦼꦩꦸꦒꦸꦱ꧀ꦠꦶꦪꦺꦯꦸꦱ꧀ ꦠꦼꦫꦸꦱ꧀ꦥꦢꦠꦏꦺꦴꦤ꧀:“ꦒꦸꦫꦸ꧈ꦭꦃꦏꦥꦤ꧀ꦏꦺꦴꦮꦺꦩ꧀ꦧꦿꦺꦤꦺ?”
26꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦏꦸꦔꦼꦂꦠꦶꦲꦥꦗꦭꦂꦫꦤ꧀ꦤꦺꦏꦺꦴꦮꦺꦥꦢꦔ꧀ꦒꦺꦴꦭꦺꦏ꧀ꦏꦶꦲꦏꦸ꧉ꦏꦺꦴꦮꦺꦔ꧀ꦒꦺꦴꦭꦺꦏ꧀ꦏꦶꦲꦏꦸꦗꦭꦂꦫꦤ꧀ꦏꦺꦴꦮꦺꦮꦶꦱ꧀ꦥꦢꦩꦁꦔꦤ꧀ꦫꦺꦴꦠꦶꦱꦩ꧀ꦥꦺꦏ꧀ꦮꦫꦱ꧀ꦩꦸ꧉ꦲꦺꦴꦫꦗꦭꦂꦫꦤ꧀ꦏꦺꦴꦮꦺꦢꦸꦤꦸꦁꦠꦼꦒꦼꦱ꧀ꦱꦺꦠꦤ꧀ꦢꦠꦤ꧀ꦢꦱꦶꦁꦠꦏ꧀ꦠꦶꦤ꧀ꦢꦏ꧀ꦏꦏꦺ! 27ꦲꦗꦔ꧀ꦒꦺꦴꦭꦺꦏ꧀ꦥꦔꦤ꧀ꦱꦶꦁꦧꦏꦭ꧀ꦲꦼꦤ꧀ꦠꦺꦏ꧀ ꦤꦁꦔꦶꦁꦥꦢꦔ꧀ꦭꦸꦩꦸꦃꦲꦶꦔ꧀ꦒꦺꦴꦭꦺꦏ꧀ꦥꦔꦤ꧀ꦱꦶꦁꦲꦺꦴꦫꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ꧈ꦥꦔꦤ꧀ꦱꦶꦁꦧꦶꦱꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ꧉ꦲꦤꦏ꧀ꦏꦺꦩꦤꦸꦁꦱꦱꦶꦁꦧꦶꦱꦔꦼꦏꦺꦏ꧀ꦏꦶꦥꦔꦤ꧀ꦲꦶꦏꦶ꧉ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦮꦶꦱ꧀ꦔꦼꦏꦺꦏ꧀ꦏꦶꦏ꧀ꦮꦱꦩꦫꦁꦲꦏꦸ꧉”
28꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦠꦏꦺꦴꦤ꧀:“ꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦏꦼꦥꦿꦶꦪꦺꦠ?ꦲꦮꦏ꧀ꦏꦺꦢꦺꦮꦺꦏꦸꦢꦸꦔ꧀ꦭꦏꦺꦴꦤ꧀ꦤꦶꦲꦥꦮꦲꦺ?”
29꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦤꦩꦸꦁꦲꦶꦏꦶ:ꦏꦺꦴꦮꦺꦏꦸꦢꦸꦥꦽꦕꦪꦩꦫꦁꦲꦏꦸ꧈ꦲꦮꦶꦠ꧀ꦲꦏꦸꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉”
30꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦔꦺꦴꦤꦺꦴ꧈ꦲꦥꦠꦤ꧀ꦢꦤꦺꦤꦺꦏ꧀ꦏꦺꦴꦮꦺꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ?ꦲꦮꦏ꧀ꦏꦺꦢꦺꦮꦺꦏꦼꦥꦺꦔꦶꦤ꧀ꦮꦼꦫꦸꦃꦱꦸꦥꦪꦧꦶꦱꦥꦽꦕꦪꦩꦫꦁꦏꦺꦴꦮꦺ꧉ 31ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺꦢꦺꦮꦺꦩ꧀ꦧꦶꦪꦺꦤ꧀ꦪꦲꦺꦴꦫꦠꦲꦸꦏꦼꦏꦸꦫꦁꦔꦤ꧀ꦥꦔꦤ꧀ꦤꦁꦮꦸꦱ꧀ꦠꦺꦤ꧀ ꦲꦮꦶꦠ꧀ꦢꦶꦫꦁꦱꦸꦩ꧀ꦩꦶꦫꦺꦴꦠꦶꦱꦁꦏꦱ꧀ꦮꦂꦒꦏꦫꦺꦴꦤꦧꦶꦩꦺꦴꦱꦼꦱ꧀ ꦏꦪꦱꦶꦁꦏꦼꦠꦸꦭꦶꦱ꧀ꦤꦁꦏꦶꦠꦧ꧀:'ꦢꦺꦏ꧀ꦤꦺꦔꦼꦏꦺꦏ꧀ꦏꦶꦩꦁꦔꦤ꧀ꦫꦺꦴꦠꦶꦱꦁꦏꦱ꧀ꦮꦂꦒꦩꦫꦁꦮꦺꦴꦁꦮꦺꦴꦁ꧉’”
32꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦠꦏ꧀ꦲꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ꧈ꦢꦸꦢꦸꦤꦧꦶꦩꦺꦴꦱꦼꦱ꧀ꦱꦶꦁꦔꦼꦏꦺꦏ꧀ꦏꦶꦫꦺꦴꦠꦶꦱꦁꦏꦱ꧀ꦮꦂꦒ꧈ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦢꦺꦏ꧀ꦤꦺꦱꦶꦁꦔꦼꦏꦺꦏ꧀ꦏꦶꦫꦺꦴꦠꦶꦱꦁꦏꦱ꧀ꦮꦂꦒ꧈ꦪꦏꦸꦮꦶꦫꦺꦴꦠꦶꦱꦶꦁꦱꦼꦗꦠꦶ꧉ 33ꦫꦺꦴꦠꦶꦱꦶꦁꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦪꦫꦺꦴꦠꦶꦱꦶꦁꦩꦼꦢꦸꦤ꧀ꦱꦁꦏꦱ꧀ꦮꦂꦒꦭꦤ꧀ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁꦩꦫꦁꦩꦤꦸꦁꦱ꧉”
34꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦤꦼꦩ꧀ꦧꦸꦁ:“ꦒꦸꦫꦸ꧈ꦲꦮꦏ꧀ꦏꦺꦢꦺꦮꦺꦲꦩ꧀ꦧꦺꦴꦏ꧀ꦢꦶꦏꦺꦏ꧀ꦏꦶꦫꦺꦴꦠꦶꦲꦶꦏꦸꦱꦏ꧀ꦠꦼꦫꦸꦱ꧀ꦱꦺꦠ?”
35꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦪꦲꦏꦸꦲꦶꦏꦶꦫꦺꦴꦠꦶꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀꧈ꦱꦥꦱꦶꦁꦩꦫꦤꦁꦔ꧀ꦒꦺꦴꦤ꧀ꦏꦸꦲꦺꦴꦫꦧꦏꦭ꧀ꦔꦼꦭꦶꦃꦩꦼꦤꦺꦃꦭꦤ꧀ꦱꦥꦱꦶꦁꦥꦽꦕꦪꦩꦫꦁꦲꦏꦸꦲꦺꦴꦫꦧꦏꦭ꧀ꦔꦼꦭꦏ꧀ꦩꦼꦤꦺꦃ꧉ 36ꦲꦏꦸꦥꦚ꧀ꦕꦺꦤ꧀ꦮꦶꦱ꧀ꦔꦺꦴꦩꦺꦴꦁ!ꦱꦼꦤꦗꦤ꧀ꦏꦺꦴꦮꦺꦮꦼꦫꦸꦃꦲꦏꦸꦭꦤ꧀ꦥꦼꦁꦒꦮꦺꦏꦸ꧈ꦏꦺꦴꦮꦺꦲꦺꦴꦫꦥꦢꦥꦽꦕꦪꦩꦫꦁꦲꦏꦸ꧉ 37ꦤꦁꦔꦶꦁꦲꦺꦤꦺꦁꦱꦶꦁꦥꦢꦠꦼꦏꦩꦫꦤꦶꦲꦏꦸ꧈ꦪꦏꦸꦮꦶꦮꦺꦴꦁꦱꦶꦁꦢꦶꦥꦶꦭꦶꦃꦭꦤ꧀ꦱꦶꦁꦢꦶꦥꦱꦿꦃꦲꦏꦺꦩꦫꦁꦲꦏꦸꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦮꦺꦴꦁꦱꦶꦁꦥꦢꦠꦼꦏꦩꦫꦤꦶꦲꦏꦸꦏꦸꦮꦶꦲꦺꦴꦫꦧꦏꦭ꧀ꦠꦏ꧀ꦠꦩ꧀ꦥꦶꦏ꧀꧈ 38ꦲꦏꦸꦩꦼꦢꦸꦤ꧀ꦱꦁꦏꦱ꧀ꦮꦂꦒꦏꦸꦮꦶꦲꦺꦴꦫꦲꦉꦥ꧀ꦔ꧀ꦭꦏꦺꦴꦤ꧀ꦤꦶꦏꦼꦏꦉꦥꦤ꧀ꦏꦸꦢꦺꦮꦺ꧈ꦤꦁꦔꦶꦁꦲꦏꦸꦔ꧀ꦭꦏꦺꦴꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 39ꦭꦃꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦲꦥ?ꦪꦲꦶꦏꦶ:ꦮꦺꦴꦁꦱꦶꦁꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁꦲꦏꦸꦏꦸꦮꦶꦲꦗꦱꦩ꧀ꦥꦺꦏ꧀ꦲꦺꦤꦺꦁꦱꦶꦁꦲꦶꦭꦁꦱꦶꦗꦶꦱꦶꦗꦶꦪ꧉ꦩꦭꦃꦲꦩ꧀ꦧꦺꦱꦸꦏ꧀ ꦲꦶꦁꦢꦶꦤꦱꦶꦁꦏꦺꦫꦶꦢꦺꦮꦺ꧈ꦢꦶꦤꦱꦶꦁꦮꦶꦱ꧀ꦢꦶꦕꦮꦶꦱ꧀ꦱꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈ꦮꦺꦴꦁꦮꦺꦴꦁꦲꦶꦏꦶꦧꦏꦭ꧀ꦠꦏ꧀ꦠꦔꦺꦏ꧀ꦏꦏꦺꦱꦁꦏꦥꦠꦶ꧉ 40ꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦔꦺꦤꦺ:ꦱꦥꦱꦶꦁꦤꦶꦠꦺꦤ꧀ꦤꦶꦤꦺꦏ꧀ꦲꦏꦸꦲꦤꦏ꧀ꦏꦺꦭꦤ꧀ꦥꦽꦕꦪꦲꦶꦁꦲꦏꦸꦧꦏꦭ꧀ꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁꦭꦤ꧀ꦧꦏꦭ꧀ꦠꦏ꧀ꦠꦔꦺꦏ꧀ꦏꦏꦺꦲꦶꦁꦢꦶꦤꦏꦸꦮꦶ꧉”
41꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦔ꧀ꦒꦿꦼꦩꦼꦁ꧉ꦲꦺꦴꦫꦥꦢꦔꦤ꧀ꦢꦼꦭ꧀ꦲꦥꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ ꦲꦺꦴꦫꦔꦤ꧀ꦢꦼꦭ꧀ꦤꦺꦏ꧀ꦢꦺꦏ꧀ꦤꦺꦫꦺꦴꦠꦶꦱꦁꦏꦱ꧀ꦮꦂꦒ꧉ 42“ꦩꦺꦴꦱꦺꦴꦏ꧀?ꦢꦺꦏ꧀ꦤꦺꦭꦲꦸꦠ꧀ꦲꦤꦏ꧀ꦏꦺꦪꦺꦴꦱꦺꦥ꦳꧀ꦭꦤ꧀ꦩꦫꦶꦪꦠ?ꦭꦃꦏꦺꦴꦏ꧀ꦮꦤꦶꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦩꦼꦢꦸꦤ꧀ꦱꦁꦏꦱ꧀ꦮꦂꦒ?”
43꧋“ꦲꦗꦥꦢꦥꦠꦶꦁꦒꦽꦩꦼꦁ꧈”ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ꧉ 44“ꦲꦺꦴꦫꦲꦺꦤꦺꦁꦮꦺꦴꦁꦱꦶꦁꦧꦶꦱꦢꦢꦶꦩꦸꦫꦶꦢ꧀ꦏꦸ꧈ꦤꦺꦏ꧀ꦢꦸꦢꦸꦧꦥꦏ꧀ꦏꦸ꧈ꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧈ꦤꦫꦶꦏ꧀ꦮꦺꦴꦁꦏꦸꦮꦶ꧉ꦩꦸꦭꦤꦺꦮꦺꦴꦁꦱꦶꦁꦢꦢꦶꦩꦸꦫꦶꦢ꧀ꦏꦸꦏꦸꦮꦶꦧꦏꦭ꧀ꦠꦏ꧀ꦠꦔꦺꦏ꧀ꦏꦏꦺꦱꦁꦏꦥꦠꦶ꧈ꦲꦩ꧀ꦧꦺꦱꦸꦏ꧀ꦲꦶꦁꦢꦶꦤꦱꦶꦁꦏꦺꦫꦶꦢꦺꦮꦺ꧉ 45ꦱꦥꦮꦲꦺꦱꦶꦁꦮꦶꦱ꧀ꦢꦶꦮꦸꦭꦁꦔꦶꦭꦤ꧀ꦢꦶꦢꦸꦤꦸꦁꦢꦸꦤꦸꦁꦔꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦥꦽꦕꦪꦩꦫꦁꦲꦏꦸ꧉ꦭꦲꦸꦠ꧀ꦮꦶꦱ꧀ꦏꦼꦠꦸꦭꦶꦱ꧀ꦠꦤꦁꦏꦶꦠꦧ꧀ꦧꦺꦥꦫꦤꦧꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦩꦸꦭꦁꦔꦶꦮꦺꦴꦁꦮꦺꦴꦁ! 46ꦲꦺꦴꦫꦔꦺꦴꦩꦺꦴꦁꦤꦺꦏ꧀ꦲꦺꦤꦺꦁꦮꦺꦴꦁꦱꦶꦁꦮꦶꦱ꧀ꦠꦲꦸꦮꦼꦫꦸꦃꦒꦸꦱ꧀ꦠꦶꦄꦭ꧀ꦭꦃ꧈ꦲꦺꦴꦫ꧉ꦱꦶꦁꦮꦶꦱ꧀ꦠꦲꦸꦮꦼꦫꦸꦃꦪꦤꦩꦸꦁꦲꦏꦸꦲꦶꦏꦶ꧈ꦲꦮꦶꦠ꧀ꦲꦏꦸꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 47ꦥꦚ꧀ꦕꦺꦤ꧀ꦠꦼꦤꦤ꧀꧈ꦱꦥꦱꦶꦁꦥꦽꦕꦪꦩꦫꦁꦲꦏꦸꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉ 48ꦲꦏꦸꦲꦶꦏꦶꦫꦺꦴꦠꦶꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀꧈ 49ꦩ꧀ꦧꦃꦩ꧀ꦧꦲꦤ꧀ꦩꦸꦩ꧀ꦧꦶꦪꦺꦤ꧀ꦥꦢꦩꦠꦶꦏꦧꦺꦃꦤꦁꦮꦸꦱ꧀ꦠꦺꦤ꧀ ꦱꦼꦤꦗꦤ꧀ꦥꦢꦩꦁꦔꦤ꧀ꦩꦤꦃ꧉ 50ꦱꦺꦗꦺꦧꦔꦼꦠ꧀ꦏꦫꦺꦴꦫꦺꦴꦠꦶ ꦱꦶꦁꦱꦁꦏꦱ꧀ꦮꦂꦒ꧉ꦮꦺꦴꦁꦱꦶꦁꦩꦁꦔꦤ꧀ꦫꦺꦴꦠꦶꦏꦸꦮꦶꦲꦺꦴꦫꦧꦏꦭ꧀ꦩꦠꦶ꧉ 51ꦲꦏꦸꦲꦶꦏꦶꦫꦺꦴꦠꦶꦱꦶꦁꦔꦸꦫꦶꦥ꧀ꦥꦏꦺ꧈ꦫꦺꦴꦠꦶꦱꦶꦁꦱꦁꦏꦱ꧀ꦮꦂꦒ꧉ꦱꦥꦱꦶꦁꦩꦁꦔꦤ꧀ꦫꦺꦴꦠꦶꦲꦶꦏꦶꦧꦏꦭ꧀ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉ꦫꦺꦴꦠꦶꦱꦶꦁꦠꦏ꧀ꦏꦺꦏ꧀ꦏꦏꦺꦪꦲꦮꦏ꧀ꦏꦸꦢꦺꦮꦺꦲꦶꦏꦶ꧉ꦲꦮꦏ꧀ꦏꦸꦠꦏ꧀ꦏꦺꦏ꧀ꦏꦏꦺꦱꦸꦥꦪꦗꦒꦠ꧀ꦲꦶꦏꦶꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀꧈”
52꧋ꦱꦏ꧀ꦮꦶꦱ꧀ꦱꦺꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦧꦤ꧀ꦠꦃꦧꦤ꧀ꦠꦃꦲꦤ꧀ꦏꦫꦺꦴꦏꦚ꧀ꦕꦏꦚ꧀ꦕꦤꦺꦢꦺꦮꦺꦔꦺꦴꦩꦺꦴꦁ:“ꦭꦃꦒꦺꦏ꧀ꦏꦼꦥꦿꦶꦪꦺꦮꦺꦴꦁꦲꦶꦏꦶꦲꦼꦁꦒꦺꦴꦤꦺꦲꦉꦥ꧀ꦔꦼꦏꦺꦏ꧀ꦏꦏꦺꦢꦒꦶꦁꦔꦺꦩꦫꦁꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀ꦩꦁꦔꦤ꧀?”
53꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥꦢꦲꦺꦭꦶꦁꦔ!ꦤꦺꦏ꧀ꦏꦺꦴꦮꦺꦲꦺꦴꦫꦩꦁꦔꦤ꧀ꦢꦒꦶꦁꦔꦺꦭꦤ꧀ꦔꦺꦴꦩ꧀ꦧꦺꦒꦼꦠꦶꦃꦲꦺꦲꦤꦏ꧀ꦏꦺꦩꦤꦸꦁꦱ꧈ꦏꦺꦴꦮꦺꦲꦺꦴꦫꦧꦏꦭ꧀ꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦧ꧀ꦭꦱ꧀! 54ꦱꦥꦱꦶꦁꦩꦁꦔꦤ꧀ꦢꦒꦶꦁꦏꦸꦭꦤ꧀ꦔꦺꦴꦩ꧀ꦧꦺꦒꦼꦠꦶꦃꦏꦸꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉ꦲꦩ꧀ꦧꦺꦱꦸꦏ꧀ ꦲꦶꦁꦢꦶꦤꦱꦶꦁꦏꦺꦫꦶꦢꦺꦮꦺ꧈ꦮꦺꦴꦁꦏꦸꦮꦶꦧꦏꦭ꧀ꦠꦏ꧀ꦠꦔꦺꦏ꧀ꦏꦏꦺꦱꦁꦏꦥꦠꦶ꧉ 55ꦲꦮꦶꦠ꧀ꦢꦒꦶꦁꦭꦤ꧀ꦒꦼꦠꦶꦃꦏꦸꦏꦸꦮꦶꦥꦔꦤ꧀ꦭꦤ꧀ꦲꦺꦴꦩ꧀ꦧꦺꦤ꧀ꦱꦶꦁꦱꦼꦗꦠꦶ꧉ 56ꦮꦺꦴꦁꦱꦶꦁꦩꦁꦔꦤ꧀ꦢꦒꦶꦁꦏꦸꦭꦤ꧀ꦔꦺꦴꦩ꧀ꦧꦺꦒꦼꦠꦶꦃꦏꦸꦧꦏꦭ꧀ꦢꦢꦶꦱꦶꦗꦶꦏꦫꦺꦴꦲꦏꦸꦭꦤ꧀ꦲꦏꦸꦲꦸꦒꦢꦢꦶꦱꦶꦗꦶꦏꦫꦺꦴꦮꦺꦴꦁꦔꦺ꧉ 57ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧈ꦢꦺꦏ꧀ꦤꦺꦔꦼꦏꦺꦏ꧀ꦏꦶꦲꦸꦫꦶꦥ꧀ꦱꦶꦁꦱꦼꦗꦠꦶ꧉ꦲꦏꦸꦲꦸꦫꦶꦥ꧀ ꦗꦭꦂꦫꦤ꧀ꦢꦺꦏ꧀ꦤꦺꦔꦼꦏꦺꦏ꧀ꦏꦶꦲꦸꦫꦶꦥ꧀ꦲꦶꦏꦶꦩꦫꦁꦲꦏꦸ꧉ꦩꦼꦁꦏꦺꦴꦤꦺꦴꦲꦸꦒꦱꦥꦱꦶꦁꦩꦁꦔꦤ꧀ꦢꦒꦶꦁꦏꦸꦧꦏꦭ꧀ꦲꦸꦫꦶꦥ꧀ ꦗꦭꦂꦫꦤ꧀ꦲꦏꦸꦔꦼꦏꦺꦏ꧀ꦏꦶꦲꦸꦫꦶꦥ꧀ꦲꦶꦏꦶꦩꦫꦁꦢꦺꦏ꧀ꦤꦺ꧉ 58ꦪꦲꦶꦏꦸꦫꦺꦴꦠꦶꦱꦶꦁꦱꦁꦏꦱ꧀ꦮꦂꦒ꧉ꦱꦥꦱꦶꦁꦩꦁꦔꦤ꧀ꦫꦺꦴꦠꦶꦲꦶꦏꦶꦧꦏꦭ꧀ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉ꦲꦺꦴꦫꦠꦸꦁꦒꦭ꧀ꦭꦺꦩꦤꦃꦱꦶꦁꦢꦶꦥꦔꦤ꧀ꦮꦺꦴꦁꦮꦺꦴꦁꦩ꧀ꦧꦶꦪꦺꦤ꧀ꦤꦁꦮꦸꦱ꧀ꦠꦺꦤ꧀꧈ꦲꦮꦶꦠ꧀ꦏꦧꦺꦃꦥꦢꦩꦠꦶ꧉”
59꧋ꦪꦲꦶꦏꦸꦩꦲꦸꦏꦧꦺꦃꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦩꦸꦭꦁꦔꦶꦤꦁꦱꦶꦤꦒꦸꦏ꧀ꦤꦁꦏꦸꦠꦑꦥꦺꦂꦤꦏꦸꦩ꧀꧈
60꧋ꦲꦺꦴꦏꦺꦃꦮꦺꦴꦁꦱꦶꦁꦥꦢꦩꦺꦭꦸꦒꦸꦱ꧀ꦠꦶꦪꦺꦯꦸꦱ꧀꧈ꦏꦢꦸꦁꦏꦿꦸꦔꦸꦥꦶꦮꦸꦭꦁꦩꦲꦸꦠꦼꦫꦸꦱ꧀ꦥꦢꦱꦩ꧀ꦧꦠ꧀:“ꦥꦶꦮꦸꦭꦁꦲꦶꦏꦶꦲꦧꦺꦴꦠ꧀!ꦱꦥꦱꦶꦁꦏꦸꦮꦠ꧀?”
61꧋ꦱꦼꦤꦗꦤ꧀ꦲꦺꦴꦫꦲꦺꦤꦺꦁꦱꦶꦁꦔꦺꦴꦩꦺꦴꦁꦔꦶꦢꦺꦏ꧀ꦤꦺ꧈ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦼꦂꦠꦶꦤꦺꦏ꧀ꦮꦺꦴꦁꦮꦺꦴꦁꦩꦲꦸꦲꦺꦴꦫꦱꦼꦠꦸꦗꦸꦏꦫꦺꦴꦥꦶꦮꦸꦭꦁꦔꦺ꧈ꦩꦸꦭꦤꦺꦥꦢꦔ꧀ꦒꦿꦼꦩꦼꦁ꧉ 62ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦏꦺꦴꦏ꧀ꦥꦢꦏꦒꦺꦠ꧀?ꦲꦩ꧀ꦧꦺꦱꦸꦏ꧀ꦏꦺꦴꦮꦺꦧꦏꦭ꧀ꦥꦢꦮꦼꦫꦸꦃꦢꦺꦮꦺꦲꦤꦏ꧀ꦏꦺꦩꦤꦸꦁꦱꦧꦭꦶꦏ꧀ꦩꦼꦤꦺꦃꦩꦸꦁꦒꦃꦤꦁꦱ꧀ꦮꦂꦒ꧉ 63ꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀ꦏꦸꦮꦶꦤꦩꦸꦁꦫꦺꦴꦃꦲꦺꦒꦸꦱ꧀ꦠꦶꦄꦭ꧀ꦭꦃ꧉ꦏꦼꦏꦸꦮꦠ꧀ꦠꦤ꧀ꦤꦺꦩꦤꦸꦁꦱꦲꦺꦴꦫꦧꦶꦱꦤꦩ꧀ꦧꦃꦲꦶꦲꦥꦲꦥ꧉ꦠꦼꦩ꧀ꦧꦸꦁꦠꦼꦩ꧀ꦧꦸꦁꦱꦶꦁꦠꦏ꧀ꦲꦺꦴꦩꦺꦴꦁꦔꦏꦺꦩꦫꦁꦏꦺꦴꦮꦺꦏꦸꦮꦶꦔꦽꦩ꧀ꦧꦸꦏ꧀ꦧꦧ꧀ꦏꦱꦸꦏ꧀ꦩꦤ꧀꧈ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸꦮꦶꦱꦶꦁꦔꦸꦫꦶꦥ꧀ꦥꦏꦺ꧉ 64ꦤꦁꦔꦶꦁꦤꦁꦠꦼꦔꦃꦩꦸꦲꦺꦤꦺꦁꦱꦶꦁꦲꦺꦴꦫꦥꦽꦕꦪ꧉”ꦏꦮꦶꦠ꧀ꦩꦲꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦔꦼꦂꦠꦶꦱꦥꦮꦲꦺꦱꦶꦁꦲꦺꦴꦫꦒꦼꦊꦩ꧀ꦥꦽꦕꦪꦭꦤ꧀ꦱꦥꦱꦶꦁꦧꦏꦭ꧀ꦔꦼꦭꦸꦁꦔꦏꦺꦢꦺꦏ꧀ꦤꦺꦩꦫꦁꦩꦸꦁꦱꦸꦃꦲꦺ꧉
65꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦩꦸꦭꦤꦺꦲꦏꦸꦮꦶꦱ꧀ꦔꦺꦴꦩꦺꦴꦁꦩꦫꦁꦏꦺꦴꦮꦺꦤꦺꦏ꧀ꦲꦺꦴꦫꦲꦺꦤꦺꦁꦮꦺꦴꦁꦒꦼꦊꦩ꧀ꦢꦢꦶꦩꦸꦫꦶꦢ꧀ꦏꦸ꧈ꦤꦺꦏ꧀ꦲꦺꦴꦫꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦤꦫꦶꦏ꧀꧈” 66ꦱꦏ꧀ꦮꦶꦱ꧀ꦱꦺꦏꦸꦮꦶꦲꦺꦴꦏꦺꦃꦮꦺꦴꦁꦱꦶꦁꦥꦢꦩꦸꦤ꧀ꦢꦸꦂ꧈ꦲꦺꦴꦫꦒꦼꦊꦩ꧀ꦩꦺꦭꦸꦒꦸꦱ꧀ꦠꦶꦪꦺꦯꦸꦱ꧀ꦩꦼꦤꦺꦃ꧉
67꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦱꦶꦁꦫꦺꦴꦭꦱ꧀:“ꦲꦥꦏꦺꦴꦮꦺꦲꦩ꧀ꦧꦫꦁꦲꦉꦥ꧀ꦤꦶꦁꦒꦭ꧀ꦲꦏꦸ?”
68꧋ꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦱꦼꦩꦲꦸꦂ:“ꦒꦸꦱ꧀ꦠꦶ꧈ꦭꦃꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀ꦩꦺꦭꦸꦱꦥ?ꦤꦩꦸꦁꦏꦺꦴꦮꦺꦱꦶꦁꦧꦶꦱꦩꦸꦭꦁꦔꦶꦲꦮꦏ꧀ꦏꦺꦢꦺꦮꦺꦧꦧ꧀ꦲꦸꦫꦶꦥ꧀ꦭꦁꦒꦼꦁ꧉ 69ꦲꦮꦏ꧀ꦏꦺꦢꦺꦮꦺꦱꦲꦶꦏꦶꦮꦶꦱ꧀ꦥꦽꦕꦪꦭꦤ꧀ꦮꦶꦱ꧀ꦔꦼꦂꦠꦶꦠꦼꦤꦤ꧀ꦤꦺꦏ꧀ꦏꦺꦴꦮꦺꦏꦸꦮꦶꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦲꦸꦫꦶꦥ꧀꧈”
70꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦶꦁꦩꦶꦭꦶꦃꦏꦺꦴꦮꦺꦏꦧꦺꦃꦮꦺꦴꦁꦫꦺꦴꦭꦱ꧀ꦭꦲꦸꦠ꧀ꦲꦏꦸꦢꦺꦮꦺꦠ?ꦤꦁꦔꦶꦁꦤꦁꦠꦼꦔꦃꦩꦸꦱꦶꦁꦱꦶꦗꦶꦱꦺꦠꦤ꧀꧈” 71ꦒꦸꦱ꧀ꦠꦶꦪꦺꦯꦸꦱ꧀ꦚꦼꦩꦺꦴꦤ꧀ꦤꦶꦪꦸꦢꦱ꧀ ꦲꦤꦏ꧀ꦏꦺꦱꦶꦩꦺꦴꦤ꧀ꦱꦁꦏꦆꦱ꧀ꦏꦫꦶꦪꦺꦴꦠ꧀꧈ꦲꦮꦶꦠ꧀ ꦱꦼꦤꦗꦤ꧀ꦪꦸꦢꦱ꧀ꦠꦸꦁꦒꦭ꧀ꦭꦺꦩꦸꦫꦶꦢ꧀ꦫꦺꦴꦭꦱ꧀ ꦤꦁꦔꦶꦁꦢꦺꦏ꧀ꦤꦺꦱꦶꦁꦧꦏꦭ꧀ꦔꦼꦭꦸꦁꦔꦏꦺꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦩꦸꦁꦱꦸꦃꦲꦺ꧉
꧇꧗꧇ 1꧋ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦩ꧀ꦭꦏꦸꦠꦸꦫꦸꦠ꧀ꦧꦮꦃꦓꦭꦶꦭꦺꦪ꧉ꦢꦺꦏ꧀ꦤꦺꦲꦺꦴꦫꦒꦼꦊꦩ꧀ꦤꦁꦧꦮꦃꦪꦸꦢꦺꦪ꧈ꦲꦮꦶꦠ꧀ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦤꦁꦏꦺꦴꦤꦺꦴꦥꦢꦔ꧀ꦒꦺꦴꦭꦺꦏ꧀ꦗꦭꦂꦫꦤ꧀ꦲꦉꦥ꧀ꦩꦠꦺꦤ꧀ꦤꦶꦢꦺꦏ꧀ꦤꦺ꧉ 2ꦱꦲꦶꦏꦶꦢꦺꦴꦁꦔꦺꦲꦉꦥ꧀ꦲꦺꦤꦺꦁꦫꦶꦪꦪ ꦒꦼꦢꦺ꧈ꦪꦏꦸꦮꦶꦫꦶꦪꦪꦔꦼꦢꦼꦏ꧀ꦏꦏꦺꦡꦫꦸꦥ꧀꧈ 3ꦩꦸꦭꦤꦺꦲꦢꦶꦏ꧀ꦲꦢꦶꦏ꧀ꦏꦺꦒꦸꦱ꧀ꦠꦶꦪꦺꦯꦸꦱ꧀ꦥꦢꦔꦺꦴꦩꦺꦴꦁꦩꦫꦁꦢꦺꦏ꧀ꦤꦺ:“ꦲꦩ꧀ꦧꦺꦴꦏ꧀ꦏꦺꦤꦺꦢꦶꦠꦶꦁꦒꦭ꧀꧈ꦏꦤꦧꦸꦢꦭ꧀ꦤꦁꦪꦸꦢꦺꦪꦮꦲꦺ꧈ꦢꦢꦶꦤꦺꦩꦸꦫꦶꦢ꧀ꦩꦸꦫꦶꦢ꧀ꦩꦸꦧꦶꦱꦮꦼꦫꦸꦃꦏ꧀ꦮꦱꦩꦸ꧉ 4ꦱꦥꦏꦼꦥꦺꦔꦶꦤ꧀ꦏꦼꦱꦸꦮꦸꦂꦲꦺꦴꦫꦏꦼꦤꦺꦁꦤ꧀ꦢꦼꦭꦶꦏ꧀ꦏꦏꦺꦥꦔ꧀ꦮꦱꦤꦺ꧉ꦤꦺꦏ꧀ꦤꦶꦪꦠ꧀ꦤ꧀ꦢꦸꦢꦸꦃꦲꦏꦺꦏ꧀ꦮꦱꦩꦸ꧈ꦪꦢꦶꦏꦺꦠꦺꦴꦏ꧀ꦏꦏꦺꦩꦫꦁꦮꦺꦴꦁꦏꦧꦺꦃꦥꦶꦱꦤ꧀꧈” 5ꦲꦢꦶꦏ꧀ꦲꦢꦶꦏ꧀ꦏꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶ꧈ꦗꦭꦂꦫꦤ꧀ꦲꦺꦴꦫꦥꦢꦥꦽꦕꦪꦩꦫꦁꦢꦺꦏ꧀ꦤꦺ꧉
6꧋ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦁꦒꦺꦴꦲꦏꦸꦱꦲꦶꦏꦶꦢꦸꦫꦸꦁꦮꦚ꧀ꦕꦶꦤꦺ꧉ꦱꦺꦗꦺꦏꦫꦺꦴꦏꦺꦴꦮꦺ꧈ꦏꦺꦴꦮꦺꦱꦏ꧀ꦮꦚ꧀ꦕꦶꦮꦚ꧀ꦕꦶꦧꦶꦱꦧꦸꦢꦭ꧀꧈ 7ꦮꦺꦴꦁꦮꦺꦴꦁꦲꦺꦴꦫꦧꦶꦱꦱꦼꦔꦶꦠ꧀ꦩꦫꦁꦏꦺꦴꦮꦺ꧈ꦲꦮꦶꦠ꧀ꦏꦺꦴꦮꦺꦠꦸꦁꦒꦭ꧀ꦭꦺꦏꦫꦺꦴꦮꦺꦴꦁꦮꦺꦴꦁ꧉ꦤꦁꦔꦶꦁꦲꦏꦸꦢꦶꦱꦼꦔꦶꦠ꧀ꦠꦶꦧꦔꦼꦠ꧀ ꦲꦮꦶꦠ꧀ꦲꦏꦸꦚꦭꦃꦚꦭꦃꦲꦏꦺꦮꦺꦴꦁꦮꦺꦴꦁꦤꦺꦏ꧀ꦏ꧀ꦭꦏꦸꦮꦤ꧀ꦤꦺꦲꦭ꧉ 8ꦏꦤꦏꦺꦴꦮꦺꦥꦢꦧꦸꦢꦭ꧀꧈ꦲꦏꦸꦲꦺꦴꦫꦧꦸꦢꦭ꧀ꦤ꧀ꦢꦶꦱꦶꦏ꧀ ꦲꦮꦶꦠ꧀ꦏꦁꦒꦺꦴꦲꦏꦸꦲꦶꦏꦶꦢꦸꦫꦸꦁꦮꦚ꧀ꦕꦶꦤꦺ꧉” 9ꦩꦸꦭꦤꦺꦒꦸꦱ꧀ꦠꦶꦪꦺꦯꦸꦱ꧀ꦪꦠꦼꦫꦸꦱ꧀ꦏꦺꦫꦶꦤꦁꦓꦭꦶꦭꦺꦪꦏꦪꦱꦶꦁꦢꦶꦲꦺꦴꦩꦺꦴꦁꦩꦲꦸ꧉
10꧋ꦏꦢꦸꦁꦲꦢꦶꦏ꧀ꦲꦢꦶꦏ꧀ꦏꦺꦮꦶꦱ꧀ꦥꦢꦧꦸꦢꦭ꧀ ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦲꦩ꧀ꦧꦫꦁ꧈ꦤꦁꦔꦶꦁꦲꦶꦗꦺꦤ꧀ ꦠꦤ꧀ꦥꦲꦺꦤꦺꦁꦮꦺꦴꦁꦱꦶꦁꦔꦼꦂꦠꦶ꧉ 11ꦤꦁꦫꦶꦪꦪꦏꦺꦴꦤꦺꦴꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦥꦢꦔ꧀ꦒꦺꦴꦭꦺꦏ꧀ꦏꦶꦒꦸꦱ꧀ꦠꦶꦪꦺꦯꦸꦱ꧀꧈ꦥꦢꦠꦏꦺꦴꦤ꧀ꦩꦫꦁꦱꦏ꧀ꦥꦢꦥꦢ:“ꦮꦺꦴꦁꦔꦺꦤꦁꦲꦼꦤ꧀ꦢꦶ?”
12꧋ꦥꦶꦤꦼꦩꦸꦤꦺꦮꦺꦴꦁꦮꦺꦴꦁꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ꦱꦺꦗꦺꦱꦺꦗꦺ꧉ꦲꦺꦤꦺꦁꦱꦶꦁꦔꦺꦴꦩꦺꦴꦁ:“ꦪꦺꦯꦸꦱ꧀ꦏꦸꦮꦶꦮꦺꦴꦁꦲꦥꦶꦏ꧀!”ꦤꦁꦔꦶꦁꦲꦺꦤꦺꦁꦭꦶꦪꦤꦺꦱꦶꦁꦔꦺꦴꦩꦺꦴꦁ:“ꦲꦺꦴꦫ꧈ꦢꦺꦏ꧀ꦤꦺꦲꦉꦥ꧀ꦚꦤ꧀ꦢꦶꦁꦮꦺꦴꦁꦮꦺꦴꦁ!” 13ꦤꦁꦔꦶꦁꦲꦺꦴꦫꦲꦺꦤꦺꦁꦱꦶꦁꦮꦤꦶꦔꦺꦴꦩꦺꦴꦁꦧ꧀ꦭꦏ꧈ꦲꦮꦶꦠ꧀ꦥꦢꦮꦼꦢꦶꦏꦫꦺꦴꦥꦫꦥꦼꦁꦒꦼꦢꦺ꧉
14꧋ꦤꦁꦠꦼꦔꦃꦲꦺꦩꦶꦁꦒꦸꦫꦶꦪꦪꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩ꧀ꦊꦧꦸꦤꦁꦒꦿꦺꦗꦒꦼꦢꦺꦭꦤ꧀ꦩꦸꦭꦁꦔꦶꦤꦁꦏꦺꦴꦤꦺꦴ꧉ 15ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦥꦢꦔ꧀ꦒꦸꦩꦸꦤ꧀ꦧꦔꦼꦠ꧀ ꦩꦸꦭꦤꦺꦔꦺꦴꦩꦺꦴꦁ:“ꦮꦺꦴꦁꦲꦶꦏꦶꦭꦲꦸꦠ꧀ꦲꦺꦴꦫꦠꦲꦸꦩꦺꦭꦸꦱꦼꦏꦺꦴꦭꦲꦤ꧀ꦤꦺꦲꦮꦏ꧀ꦏꦺꦢꦺꦮꦺꦠ?ꦭꦃꦏꦺꦴꦏ꧀ꦤ꧀ꦢꦸꦮꦺꦤ꧀ꦤꦶꦏꦮꦼꦫꦸꦃꦱꦼꦩꦺꦴꦤꦺꦴꦲꦺꦴꦏꦺꦃꦲꦺ?”
16꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦱꦶꦁꦠꦏ꧀ꦮꦸꦭꦁꦔꦏꦺꦲꦶꦏꦶꦲꦺꦴꦫꦥꦶꦏꦶꦂꦫꦤ꧀ꦏꦸꦢꦺꦮꦺ꧈ꦤꦁꦔꦶꦁꦥꦶꦮꦸꦭꦁꦔꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 17ꦱꦥꦱꦶꦁꦒꦼꦊꦩ꧀ꦤꦸꦫꦸꦠ꧀ꦠꦶꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦩꦼꦱ꧀ꦠꦶꦧꦏꦭ꧀ꦤꦶꦠꦺꦤ꧀ꦤꦶꦢꦺꦮꦺꦤꦺꦏ꧀ꦱꦶꦁꦠꦏ꧀ꦲꦺꦴꦩꦺꦴꦁꦏꦸꦮꦶꦥꦶꦮꦸꦭꦁꦱꦁꦏꦒꦸꦱ꧀ꦠꦶꦄꦭ꧀ꦭꦃ꧈ꦲꦺꦴꦫꦥꦶꦏꦶꦂꦫꦤ꧀ꦏꦸꦢꦺꦮꦺ꧉ 18ꦮꦺꦴꦁꦱꦶꦁꦩꦸꦭꦁꦩꦤꦸꦠ꧀ꦥꦶꦏꦶꦂꦫꦤ꧀ꦤꦺꦢꦺꦮꦺꦏꦸꦮꦶꦤꦩꦸꦁꦔ꧀ꦒꦺꦴꦭꦺꦏ꧀ꦊꦩ꧀ꦊꦩꦤ꧀ꦤꦺꦮꦺꦴꦁꦏꦁꦒꦺꦴꦢꦺꦏ꧀ꦤꦺꦢꦺꦮꦺ꧉ꦤꦁꦔꦶꦁꦱꦥꦱꦶꦁꦤꦸꦗꦸꦱꦸꦥꦪꦒꦸꦱ꧀ꦠꦶꦄꦭ꧀ꦭꦃꦱꦶꦁꦢꦶꦲꦼꦊꦩ꧀ ꦮꦺꦴꦁꦏꦸꦮꦶꦩꦼꦱ꧀ꦠꦶꦏꦼꦤꦺꦁꦢꦶꦲꦼꦤ꧀ꦢꦼꦭ꧀ꦭꦏꦺꦭꦤ꧀ꦢꦺꦏ꧀ꦤꦺꦲꦺꦴꦫꦧꦏꦭ꧀ꦚꦤ꧀ꦢꦶꦁ꧉ 19ꦏꦺꦴꦮꦺꦭꦲꦸꦠ꧀ꦮꦶꦱ꧀ꦢꦶꦠꦶꦁꦒꦭ꧀ꦭꦶꦮꦺꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃꦠꦏꦫꦺꦴꦤꦧꦶꦩꦺꦴꦱꦼꦱ꧀?ꦪꦲꦥꦲꦺꦴꦫ?ꦤꦁꦔꦶꦁꦱꦶꦗꦶꦮꦲꦺꦲꦺꦴꦫꦲꦺꦤꦺꦁꦱꦶꦁꦔ꧀ꦭꦏꦺꦴꦤ꧀ꦤꦶ꧉ꦭꦃꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦲꦉꦥ꧀ꦩꦠꦺꦤ꧀ꦤꦶꦲꦏꦸ?”
20꧋ꦮꦺꦴꦁꦮꦺꦴꦁꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦲꦺꦢꦤ꧀!ꦱꦥꦱꦶꦁꦲꦉꦥ꧀ꦩꦠꦺꦤ꧀ꦤꦶꦏꦺꦴꦮꦺ?”
21꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦤꦩꦸꦁꦧꦫꦁꦱꦶꦗꦶꦱꦶꦁꦠꦏ꧀ꦭꦏꦺꦴꦤ꧀ꦤꦶꦲꦶꦁꦢꦶꦤꦱꦧꦠ꧀ ꦤꦩꦸꦁꦤꦩ꧀ꦧꦤꦶꦮꦺꦴꦁꦭꦫ꧈ꦭꦃꦏꦺꦴꦮꦺꦏꦺꦴꦏ꧀ꦮꦶꦱ꧀ꦥꦢꦫꦩꦺꦏꦪꦔꦺꦴꦤꦺꦴ! 22ꦮꦶꦱ꧀ꦥꦶꦁꦥꦶꦫꦮꦲꦺꦏꦺꦴꦮꦺꦥꦢꦚꦸꦤꦠ꧀ꦠꦶꦧꦪꦶꦭꦤꦁꦲꦶꦁꦢꦶꦤꦱꦧꦠ꧀ꦤꦺꦏ꧀ꦮꦺꦴꦭꦸꦁꦢꦶꦤꦤꦺꦠꦶꦧꦲꦶꦁꦢꦶꦤꦏꦸꦮꦶ꧉ꦲꦮꦶꦠ꧀ꦤꦧꦶꦩꦺꦴꦱꦼꦱ꧀ꦮꦶꦱ꧀ꦩꦸꦭꦁꦔꦶꦏꦺꦴꦮꦺ꧈ꦏꦸꦢꦸꦚꦸꦤꦠ꧀ꦠꦶꦧꦺꦴꦕꦃꦧꦪꦶꦤꦺꦏ꧀ꦲꦸꦩꦸꦂꦫꦺꦮꦶꦱ꧀ꦮꦺꦴꦭꦸꦁꦢꦶꦤ꧉ꦤꦁꦔꦶꦁꦱꦏ꧀ꦗꦤꦺꦢꦸꦢꦸꦤꦧꦶꦩꦺꦴꦱꦼꦱ꧀ꦱꦶꦁꦩꦺꦴꦭꦃꦲꦶꦏꦫꦺꦴꦱꦸꦤꦠ꧀ꦠꦤ꧀꧈ꦱꦏ꧀ꦢꦸꦫꦸꦁꦔꦺꦤꦧꦶꦩꦺꦴꦱꦼꦱ꧀ꦲꦺꦤꦺꦁ꧈ꦱꦸꦤꦠ꧀ꦠꦤ꧀ꦮꦶꦱ꧀ꦢꦶꦭꦏꦺꦴꦏ꧀ꦏꦏꦺ꧉ 23ꦤꦺꦏ꧀ꦏꦺꦴꦮꦺꦚꦸꦤꦠ꧀ꦠꦶꦧꦺꦴꦕꦃꦲꦶꦁꦢꦶꦤꦱꦧꦠ꧀ꦗꦭꦂꦫꦤ꧀ꦏꦺꦴꦮꦺꦩꦤꦸꦠ꧀ꦥꦼꦂꦤꦠꦤ꧀ꦤꦺꦤꦧꦶꦩꦺꦴꦱꦼꦱ꧀ ꦭꦃꦏꦺꦴꦮꦺꦏꦺꦴꦏ꧀ꦥꦢꦤꦼꦱꦸꦏꦫꦺꦴꦲꦏꦸꦤꦺꦏ꧀ꦲꦏꦸꦤꦩ꧀ꦧꦤꦶꦮꦺꦴꦁꦲꦶꦁꦢꦶꦤꦱꦧꦠ꧀? 24ꦩꦸꦭꦤꦺ꧈ꦤꦺꦏ꧀ꦔꦺꦴꦩꦺꦴꦁꦏꦸꦮꦶꦲꦗꦤꦩꦸꦁꦩꦤꦸꦠ꧀ꦱꦏ꧀ꦮꦼꦫꦸꦃꦩꦸꦲꦶꦁꦚ꧀ꦗꦧꦤꦺꦮꦲꦺ꧈ꦤꦁꦔꦶꦁꦱꦼꦩ꧀ꦧꦫꦁꦏꦸꦢꦸꦲꦩ꧀ꦧꦺꦴꦏ꧀ꦠꦶꦩ꧀ꦧꦁꦱꦶꦁꦲꦥꦶꦏ꧀ꦤ꧀ꦢꦶꦱꦶꦏ꧀꧈”
25꧋ꦱꦏ꧀ꦮꦶꦱ꧀ꦱꦺꦏꦸꦮꦶꦠꦼꦫꦸꦱ꧀ꦲꦺꦤꦺꦁꦮꦺꦴꦁꦱꦶꦗꦶꦭꦺꦴꦫꦺꦴꦱꦁꦏꦪꦺꦫꦸꦱꦭꦺꦩ꧀ꦏꦺꦴꦤꦺꦴꦱꦶꦁꦔꦺꦴꦩꦺꦴꦁ:“ꦲꦶꦏꦶꦭꦲꦸꦠ꧀ꦮꦺꦴꦁꦱꦶꦁꦢꦶꦒꦺꦴꦭꦺꦏ꧀ꦏꦶꦲꦉꦥ꧀ꦢꦶꦥꦠꦺꦤ꧀ꦤꦶꦏꦲꦺꦠ! 26ꦭꦃꦢꦺꦏ꧀ꦤꦺꦏꦺꦴꦏ꧀ꦩꦭꦃꦩꦸꦭꦁꦔꦶꦤꦁꦔꦉꦥ꧀ꦥꦺꦮꦺꦴꦁꦮꦺꦴꦁ꧉ꦭꦃꦏꦺꦴꦏ꧀ꦲꦺꦴꦫꦲꦺꦤꦺꦁꦱꦶꦁꦚꦼꦏꦼꦭ꧀?ꦲꦥꦥꦼꦁꦒꦼꦢꦺꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦲꦶꦏꦶꦥꦢꦥꦽꦕꦪꦤꦺꦏ꧀ꦢꦺꦏ꧀ꦤꦺꦏꦿꦶꦱ꧀ꦡꦸꦱ꧀? 27ꦩꦺꦴꦱꦺꦴꦏ꧀ꦲꦃ?ꦗꦫꦺꦤꦺꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏꦲꦺꦴꦫꦲꦺꦤꦺꦁꦮꦺꦴꦁꦔꦼꦂꦠꦶꦢꦺꦏ꧀ꦤꦺꦏꦸꦮꦶꦱꦁꦏꦔꦼꦤ꧀ꦢꦶ!ꦤꦁꦔꦶꦁꦥꦁꦒꦺꦴꦤ꧀ꦤꦤ꧀ꦤꦺꦮꦺꦴꦁꦲꦶꦏꦶꦲꦮꦏ꧀ꦏꦺꦢꦺꦮꦺꦔꦼꦂꦠꦶ!”
28꧋ꦩꦸꦭꦤꦺꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦩꦸꦭꦁꦔꦶꦤꦁꦒꦿꦺꦗꦒꦼꦢꦺꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ ꦏꦫꦺꦴꦱ꧀ꦮꦫꦱꦶꦁꦧꦤ꧀ꦠꦼꦂ:“ꦧꦼꦤꦼꦂ꧈ꦩꦼꦤꦮꦮꦲꦺꦏꦺꦴꦮꦺꦥꦢꦔꦼꦂꦠꦶꦲꦏꦸꦲꦶꦏꦶꦱꦥꦭꦤ꧀ꦲꦏꦸꦲꦶꦏꦶꦱꦁꦏꦔꦼꦤ꧀ꦢꦶ꧉ꦤꦁꦔꦶꦁꦠꦼꦏꦏꦸꦲꦶꦏꦶꦲꦺꦴꦫꦱꦁꦏꦏꦉꦥ꧀ꦏꦸꦢꦺꦮꦺ!ꦲꦏꦸꦲꦶꦏꦶꦲꦺꦤꦺꦁꦱꦶꦁꦔꦺꦴꦁꦏꦺꦴꦤ꧀ꦭꦤ꧀ꦱꦶꦁꦔꦺꦴꦁꦏꦺꦴꦤ꧀ꦲꦏꦸꦏꦸꦮꦶꦏꦼꦤꦺꦁꦲꦩ꧀ꦧꦺꦴꦏ꧀ꦥꦽꦕꦪ꧉ꦩꦸꦁꦮꦲꦺꦏꦺꦴꦮꦺꦲꦺꦴꦫꦏꦼꦤꦭ꧀ꦩꦫꦁꦢꦺꦏ꧀ꦤꦺ꧉ 29ꦤꦁꦔꦶꦁꦲꦏꦸꦔꦼꦂꦠꦶꦢꦺꦏ꧀ꦤꦺ꧈ꦲꦮꦶꦠ꧀ꦲꦏꦸꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦢꦺꦏ꧀ꦤꦺꦭꦤ꧀ꦢꦺꦏ꧀ꦤꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉”
30꧋ꦏꦿꦸꦔꦸꦏꦸꦮꦶꦮꦺꦴꦁꦮꦺꦴꦁꦠꦼꦫꦸꦱ꧀ꦏꦸꦢꦸꦚꦼꦏꦼꦭ꧀ꦒꦸꦱ꧀ꦠꦶꦪꦺꦯꦸꦱ꧀ ꦤꦁꦔꦶꦁꦲꦺꦴꦫꦲꦺꦤꦺꦁꦱꦶꦁꦮꦤꦶ꧈ꦲꦮꦶꦠ꧀ꦢꦸꦫꦸꦁꦮꦚ꧀ꦕꦶꦤꦺ꧉ 31ꦱꦲꦶꦏꦶꦩꦭꦃꦮꦺꦴꦁꦲꦺꦴꦏꦺꦃꦠꦼꦫꦸꦱ꧀ꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈ꦮꦺꦴꦁꦮꦺꦴꦁꦲꦶꦏꦶꦥꦢꦔꦺꦴꦩꦺꦴꦁ:“ꦪꦲꦶꦏꦶꦏꦿꦶꦱ꧀ꦡꦸꦱ꧀꧈ꦲꦥꦧꦏꦭ꧀ꦲꦺꦤꦺꦁꦭꦶꦪꦤꦺꦱꦶꦁꦧꦶꦱꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦒꦼꦢꦺꦤꦺꦔꦸꦁꦏꦸꦭ꧀ꦭꦶꦱꦶꦁꦢꦶꦠꦶꦤ꧀ꦢꦏ꧀ꦏꦏꦺꦮꦺꦴꦁꦲꦶꦏꦶ꧉ꦲꦏꦸꦲꦺꦴꦫꦔꦤ꧀ꦢꦼꦭ꧀!”
32꧋ꦥꦫꦥ꦳ꦫꦶꦱꦶꦏꦿꦸꦔꦸꦲꦺꦴꦩꦺꦴꦁꦔꦤ꧀ꦤꦺꦮꦺꦴꦁꦮꦺꦴꦁꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ ꦩꦸꦭꦤꦺꦠꦼꦫꦸꦱ꧀ꦥꦢꦥꦼꦂꦠꦶꦩ꧀ꦧꦁꦔꦤ꧀ꦏꦫꦺꦴꦥꦫꦥꦼꦔꦉꦥ꧀ꦥꦺꦲꦶꦩꦩ꧀꧈ꦱꦏ꧀ꦮꦶꦱ꧀ꦱꦺꦏꦸꦮꦶꦥꦫꦥ꦳ꦫꦶꦱꦶꦭꦤ꧀ꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦥꦢꦔꦺꦴꦁꦏꦺꦴꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦠꦺꦒꦿꦺꦗꦒꦼꦢꦺꦏꦺꦴꦁꦏꦺꦴꦤ꧀ꦚꦼꦏꦼꦭ꧀ꦒꦸꦱ꧀ꦠꦶꦪꦺꦯꦸꦱ꧀꧈ 33ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦼꦁꦒꦺꦴꦤ꧀ꦏꦸꦕꦩ꧀ꦥꦸꦂꦏꦫꦺꦴꦏꦺꦴꦮꦺꦲꦶꦏꦶꦤꦩꦸꦁꦓꦫꦺꦏ꧀ꦱꦼꦢꦶꦭꦸꦠ꧀꧈ꦲꦺꦴꦫꦱꦸꦮꦶꦩꦼꦤꦺꦃꦲꦏꦸꦧꦏꦭ꧀ꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸꦩ꧀ꦧꦿꦺꦤꦺꦲꦶꦏꦶ꧉ 34ꦏꦺꦴꦮꦺꦧꦏꦭ꧀ꦔ꧀ꦒꦺꦴꦭꦺꦏ꧀ꦏꦶꦲꦏꦸ꧈ꦤꦁꦔꦶꦁꦲꦺꦴꦫꦧꦏꦭ꧀ꦧꦶꦱꦤꦼꦩꦸꦲꦏꦸ꧈ꦲꦮꦶꦠ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦧꦏꦭ꧀ꦠꦏ꧀ꦲꦼꦁꦒꦺꦴꦤ꧀ꦤꦶꦲꦶꦏꦶꦏꦺꦴꦮꦺꦲꦺꦴꦫꦧꦶꦱꦤꦼꦏꦤꦶ꧉”
35꧋ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦩꦲꦸꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦫꦁꦱꦏ꧀ꦥꦢꦥꦢ:“ꦮꦺꦴꦁꦲꦶꦏꦶꦲꦉꦥ꧀ꦭꦸꦔꦤꦁꦲꦼꦤ꧀ꦢꦶꦠꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦧꦏꦭ꧀ꦧꦶꦱꦤꦼꦩꦸꦢꦺꦏ꧀ꦤꦺ꧉ꦲꦥꦢꦺꦏ꧀ꦤꦺꦲꦉꦥ꧀ꦭꦸꦔꦩꦺꦭꦸꦮꦺꦴꦁꦮꦺꦴꦁꦱꦶꦁꦱꦲꦶꦏꦶꦥꦢꦧꦸꦪꦂꦕꦩ꧀ꦥꦸꦂꦮꦺꦴꦁꦒꦿꦶꦏ꧀?ꦩꦼꦤꦮꦲꦉꦥ꧀ꦩꦸꦭꦁꦔꦶꦮꦺꦴꦁꦮꦺꦴꦁꦱꦶꦁꦲꦺꦴꦫꦔꦼꦂꦠꦶꦒꦸꦱ꧀ꦠꦶꦄꦭ꧀ꦭꦃ? 36ꦲꦏꦸꦏꦺꦴꦏ꧀ꦲꦺꦴꦫꦢꦸꦤꦸꦁ꧉ꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺꦢꦺꦮꦺꦧꦏꦭ꧀ꦔ꧀ꦒꦺꦴꦭꦺꦏ꧀ꦏꦶꦢꦺꦏ꧀ꦤꦺ꧈ꦤꦁꦔꦶꦁꦲꦺꦴꦫꦧꦏꦭ꧀ꦤꦼꦩꦸ꧉ꦢꦺꦏ꧀ꦤꦺꦔꦺꦴꦩꦺꦴꦁꦩꦼꦤꦺꦃꦤꦺꦏ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦧꦏꦭ꧀ꦧꦶꦱꦤꦼꦏꦤꦶꦥꦁꦒꦺꦴꦤ꧀ꦤꦤ꧀ꦤꦺꦢꦺꦏ꧀ꦤꦺ꧉ꦢꦺꦏ꧀ꦤꦺꦱꦏ꧀ꦗꦤꦺꦔꦺꦴꦩꦺꦴꦁꦔꦏꦺꦲꦥꦠ?”
37꧋ꦢꦶꦤꦥꦼꦤꦸꦠꦸꦥ꧀ꦥꦺꦫꦶꦪꦪꦏꦸꦮꦶꦢꦶꦤꦱꦶꦁꦥꦼꦤ꧀ꦠꦶꦁꦢꦺꦮꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦔꦢꦼꦏ꧀ꦠꦼꦫꦸꦱ꧀ꦔꦺꦴꦩꦺꦴꦁꦧꦤ꧀ꦠꦼꦂ:“ꦱꦥꦔꦼꦭꦏ꧀ ꦩ꧀ꦧꦿꦺꦤꦺꦪꦤꦁꦔ꧀ꦒꦺꦴꦤ꧀ꦏꦸ꧈ꦧꦏꦭ꧀ꦠꦏ꧀ꦏꦺꦏ꧀ꦏꦶꦔꦺꦴꦩ꧀ꦧꦺ꧉ 38ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦤꦺꦏ꧀ꦧꦚꦸꦱꦶꦁꦔꦸꦫꦶꦥ꧀ꦥꦏꦺꦧꦏꦭ꧀ꦲꦩ꧀ꦧ꧀ꦭꦸꦢꦏ꧀ꦱꦁꦏꦲꦠꦶꦤꦺꦮꦺꦴꦁꦱꦶꦁꦥꦽꦕꦪꦩꦫꦁꦲꦏꦸ!” 39ꦤꦁꦏꦺꦤꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦫꦺꦴꦃꦱꦸꦕꦶ꧈ꦠꦼꦒꦼꦱ꧀ꦱꦺ꧈ꦱꦥꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦧꦏꦭ꧀ꦤꦩ꧀ꦥꦫꦺꦴꦃꦱꦸꦕꦶ꧉ꦤꦁꦔꦶꦁꦫꦺꦴꦃꦱꦸꦕꦶꦢꦸꦫꦸꦁꦠꦼꦏ꧈ꦲꦮꦶꦠ꧀ꦒꦸꦱ꧀ꦠꦶꦪꦺꦯꦸꦱ꧀ꦢꦸꦫꦸꦁꦩꦸꦁꦒꦃꦤꦁꦱ꧀ꦮꦂꦒ꧉
40꧋ꦲꦺꦴꦏꦺꦃꦮꦺꦴꦁꦱꦶꦁꦥꦢꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦩꦲꦸ꧉ꦲꦺꦤꦺꦁꦱꦶꦁꦔꦺꦴꦩꦺꦴꦁ:“ꦮꦺꦴꦁꦲꦶꦏꦶꦥꦚ꧀ꦕꦺꦤ꧀ꦤꦧꦶꦱꦶꦁꦏꦸꦢꦸꦠꦼꦏ!”
41꧋ꦤꦁꦔꦶꦁꦲꦺꦤꦺꦁꦭꦶꦪꦤꦺꦱꦶꦁꦔꦺꦴꦩꦺꦴꦁ:“ꦪ꧈ꦮꦺꦴꦁꦲꦶꦏꦶꦏꦿꦶꦱ꧀ꦡꦸꦱ꧀!”
꧋ꦠꦼꦫꦸꦱ꧀ꦲꦺꦤꦺꦁꦱꦶꦁꦭꦶꦪꦤꦺꦩꦼꦤꦺꦃꦱꦼꦩꦲꦸꦂ:“ꦩꦺꦴꦱꦺꦴꦏ꧀?ꦲꦥꦏꦿꦶꦱ꧀ꦡꦸꦱ꧀ꦠꦼꦏꦤꦺꦱꦁꦏꦓꦭꦶꦭꦺꦪ!ꦲꦺꦴꦫꦔꦤ꧀ꦢꦼꦭ꧀ꦲꦏꦸ? 42ꦭꦲꦸꦠ꧀ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦠꦤꦺꦏ꧀ꦏꦿꦶꦱ꧀ꦡꦸꦱ꧀ꦏꦸꦮꦶꦠꦸꦫꦸꦤ꧀ꦤꦤ꧀ꦤꦺꦫꦠꦸꦣꦮ꦳ꦼꦢ꧀ꦭꦤ꧀ꦭꦲꦶꦂꦫꦺꦏꦸꦮꦶꦤꦁꦧꦺꦠ꧀ꦭꦺꦲꦺꦩ꧀ ꦏꦸꦠꦭꦲꦶꦫꦤ꧀ꦤꦺꦫꦠꦸꦣꦮ꦳ꦼꦢ꧀꧈” 43ꦢꦢꦶꦤꦺꦥꦶꦏꦶꦂꦫꦤ꧀ꦤꦺꦮꦺꦴꦁꦮꦺꦴꦁꦩꦲꦸꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦠꦸꦁꦒꦭ꧀ꦭꦺ꧈ꦲꦺꦤꦺꦁꦱꦶꦁꦔꦺꦴꦩꦺꦴꦁꦔꦺꦤꦺ꧈ꦲꦺꦤꦺꦁꦱꦶꦁꦔꦺꦴꦩꦺꦴꦁꦔꦺꦴꦤꦺꦴ꧉ 44ꦲꦺꦤꦺꦁꦱꦶꦁꦲꦉꦥ꧀ꦚꦼꦏꦼꦭ꧀ꦢꦺꦏ꧀ꦤꦺ꧈ꦤꦁꦔꦶꦁꦲꦺꦴꦫꦥꦢꦮꦤꦶ꧉
45꧋ꦱꦼꦏꦲꦸꦠ꧀ꦱꦼꦏꦲꦸꦠ꧀ꦱꦶꦁꦚ꧀ꦗꦒꦒꦿꦺꦗꦒꦼꦢꦺꦠꦼꦫꦸꦱ꧀ꦥꦢꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦭꦤ꧀ꦥꦫꦥ꦳ꦫꦶꦱꦶ꧈ꦠꦼꦫꦸꦱ꧀ꦥꦢꦢꦶꦠꦏꦺꦴꦤ꧀ꦤꦶ:“ꦭꦃꦲꦼꦤ꧀ꦢꦶꦮꦺꦴꦁꦔꦺ?ꦏꦺꦴꦏ꧀ꦲꦺꦴꦫꦲꦩ꧀ꦧꦺꦴꦏ꧀ꦒꦮꦩ꧀ꦧꦿꦺꦤꦺ?”
46꧋ꦱꦼꦏꦲꦸꦠ꧀ꦱꦼꦏꦲꦸꦠ꧀ꦩꦲꦸꦱꦼꦩꦲꦸꦂ:“ꦥꦶꦮꦸꦭꦁꦔꦺꦮꦺꦴꦁꦔꦺꦗꦤ꧀ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀꧈ꦲꦮꦏ꧀ꦏꦺꦢꦺꦮꦺꦢꦸꦫꦸꦁꦠꦲꦸꦏꦿꦸꦔꦸꦮꦺꦴꦁꦭꦶꦪꦤꦺꦔꦺꦴꦩꦺꦴꦁꦏꦪꦮꦺꦴꦁꦲꦶꦏꦶ!”
47꧋ꦥꦫꦥ꦳ꦫꦶꦱꦶꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦲꦥꦏꦺꦴꦮꦺꦲꦩ꧀ꦧꦫꦁꦮꦶꦱ꧀ꦢꦶꦏꦼꦤꦺꦁꦏꦫꦺꦴꦮꦺꦴꦁꦔꦺ? 48ꦲꦥꦲꦺꦤꦺꦁꦮꦺꦴꦁꦱꦶꦗꦶꦮꦲꦺꦱꦁꦏꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦭꦤ꧀ꦱꦁꦏꦥꦫꦥ꦳ꦫꦶꦱꦶꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺ?ꦭꦲꦸꦠ꧀ꦲꦺꦴꦫꦲꦺꦤꦺꦁꦠ? 49ꦮꦺꦴꦁꦮꦺꦴꦁꦏꦸꦮꦶꦥꦢꦏꦼꦧ꧀ꦭꦶꦔꦼꦂ꧈ꦲꦮꦶꦠ꧀ꦲꦺꦴꦫꦥꦢꦢꦸꦤꦸꦁꦲꦶꦱꦶꦤꦺꦏꦶꦠꦧ꧀!”
50꧋ꦲꦶꦁꦠꦼꦔꦃꦲꦺꦥꦫꦥ꦳ꦫꦶꦱꦶꦲꦶꦏꦶꦲꦺꦤꦺꦁꦮꦺꦴꦁꦱꦶꦗꦶꦱꦶꦁꦮꦶꦱ꧀ꦠꦲꦸꦩꦫꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀꧈ꦢꦺꦏ꧀ꦤꦺꦗꦼꦤꦼꦁꦔꦺꦟꦶꦏꦺꦴꦢꦺꦩꦼꦱ꧀꧈ 51ꦟꦶꦏꦺꦴꦢꦺꦩꦼꦱ꧀ꦔꦺꦴꦩꦺꦴꦁ:“ꦩꦶꦠꦸꦫꦸꦠ꧀ꦮꦺꦠ꧀ꦠꦺꦲꦒꦩꦤꦺꦲꦮꦏ꧀ꦏꦺꦢꦺꦮꦺ꧈ꦲꦮꦏ꧀ꦏꦺꦢꦺꦮꦺꦲꦺꦴꦫꦏꦼꦤꦺꦁꦚꦭꦃꦚꦭꦃꦲꦏꦺꦮꦺꦴꦁ꧈ꦱꦏ꧀ꦢꦸꦫꦸꦁꦔꦺꦮꦺꦴꦁꦔꦺꦢꦶꦠꦏꦺꦴꦤ꧀ꦤꦶꦭꦤ꧀ꦢꦶꦒꦺꦴꦭꦺꦏ꧀ꦏꦶꦲꦥꦱꦭꦃꦲꦺ?”
52꧋ꦭꦶꦪꦤꦺꦥꦢꦱꦼꦩꦲꦸꦂ:“ꦲꦺ꧈ꦲꦺ꧈ꦲꦺꦴꦩꦺꦴꦁꦩꦸꦏꦺꦴꦏ꧀ꦏꦪꦏꦪꦏꦺꦴꦮꦺꦲꦉꦥ꧀ꦲꦩ꧀ꦧꦺꦭꦤꦶꦮꦺꦴꦁꦓꦭꦶꦭꦺꦪꦏꦸꦮꦶ꧉ꦲꦩ꧀ꦧꦺꦴꦏ꧀ꦢꦶꦒꦺꦴꦭꦺꦏ꧀ꦏꦶꦢꦺꦮꦺꦤꦁꦏꦶꦠꦧ꧀ꦠ꧈ꦩꦼꦁꦏꦺꦴꦭꦲꦸꦠ꧀ꦏꦺꦴꦮꦺꦮꦼꦫꦸꦃꦢꦺꦮꦺꦤꦺꦏ꧀ꦓꦭꦶꦭꦺꦪꦏꦸꦮꦶꦲꦺꦴꦫꦠꦲꦸꦔꦼꦠꦺꦴꦏ꧀ꦏꦏꦺꦤꦧꦶ꧉” 53ꦱꦏ꧀ꦮꦶꦱ꧀ꦱꦺꦲꦶꦏꦶꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦩꦸꦭꦶꦃꦤꦁꦲꦺꦴꦩꦃꦲꦺꦢꦺꦮꦺꦢꦺꦮꦺ꧉
꧇꧘꧇ 1꧋ꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦩꦸꦭꦶꦃ꧈ꦤꦁꦔꦶꦁꦠꦼꦫꦸꦱ꧀ꦧꦸꦢꦭ꧀ꦤꦁꦒꦸꦤꦸꦁꦎꦭꦺꦥ꦳꧀꧈ 2ꦲꦺꦱꦸꦏ꧀ꦏꦺꦢꦺꦏ꧀ꦤꦺꦩꦿꦸꦥꦸꦠ꧀ꦧꦸꦢꦭ꧀ꦩꦼꦤꦺꦃꦤꦁꦒꦿꦺꦗꦒꦼꦢꦺ꧉ꦮꦺꦴꦁꦲꦺꦴꦏꦺꦃꦠꦼꦏ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚ꧀ꦗꦒꦺꦴꦁꦭꦤ꧀ꦩꦸꦭꦁꦔꦶꦮꦺꦴꦁꦮꦺꦴꦁꦲꦶꦏꦶ꧉ 3ꦤꦁꦠꦼꦔꦃꦲꦺꦮꦸꦭꦁꦔꦤ꧀ꦠꦼꦫꦸꦱ꧀ꦲꦺꦤꦺꦁꦒꦸꦫꦸꦒꦸꦫꦸꦏꦶꦠꦧ꧀ꦭꦤ꧀ꦮꦺꦴꦁꦥ꦳ꦫꦶꦱꦶꦥꦢꦠꦼꦏꦔ꧀ꦒꦮꦮꦺꦴꦁꦮꦺꦢꦺꦴꦏ꧀ꦏꦺꦴꦁꦏꦺꦴꦤ꧀ꦔꦢꦼꦏ꧀ꦤꦁꦠꦼꦔꦃꦲꦺꦮꦺꦴꦁꦮꦺꦴꦁ꧉ꦮꦺꦴꦁꦮꦺꦢꦺꦴꦏ꧀ꦲꦶꦏꦶꦏꦺꦴꦤꦁꦔꦤ꧀ꦭꦏꦸꦧꦺꦢꦁ꧉ 4ꦒꦸꦫꦸꦒꦸꦫꦸꦏꦶꦠꦧ꧀ꦭꦤ꧀ꦥꦫꦥ꦳ꦫꦶꦱꦶꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦒꦸꦫꦸ꧈ꦮꦺꦴꦁꦮꦺꦢꦺꦴꦏ꧀ꦲꦶꦏꦶꦏꦺꦴꦤꦁꦔꦤ꧀ꦭꦏꦸꦧꦺꦢꦁ꧉ 5ꦩꦶꦠꦸꦫꦸꦠ꧀ꦮꦺꦠ꧀ꦠꦺꦤꦧꦶꦩꦺꦴꦱꦼꦱ꧀ꦮꦺꦴꦁꦱꦶꦁꦔ꧀ꦭꦏꦺꦴꦤ꧀ꦤꦶꦢꦺꦴꦱꦏꦪꦔꦺꦴꦤꦺꦴꦏꦸꦮꦶꦏꦸꦢꦸꦢꦶꦥꦠꦺꦤ꧀ꦤꦶ꧈ꦢꦶꦧꦤ꧀ꦢꦼꦩ꧀ꦩꦶꦮꦠꦸ꧉ꦭꦃꦥꦶꦤꦼꦩꦸꦩꦸꦏꦼꦥꦿꦶꦪꦺ?” 6ꦮꦺꦴꦁꦮꦺꦴꦁꦠꦏꦺꦴꦤ꧀ꦲꦶꦏꦶꦠꦸꦗꦸꦮꦤ꧀ꦤꦺꦤꦩꦸꦁꦲꦉꦥ꧀ꦔꦼꦤꦺꦁꦒꦸꦱ꧀ꦠꦶꦪꦺꦯꦸꦱ꧀ ꦔ꧀ꦒꦺꦴꦭꦺꦏ꧀ꦗꦭꦂꦫꦤ꧀ꦏꦁꦒꦺꦴꦚꦭꦃꦚꦭꦃꦲꦏꦺꦢꦺꦏ꧀ꦤꦺ꧉ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦩꦭꦃꦤ꧀ꦢꦶꦁꦏ꧀ꦭꦸꦏ꧀ꦠꦼꦫꦸꦱ꧀ꦤꦸꦭꦶꦱ꧀ꦤꦁꦊꦩꦃꦏꦫꦺꦴꦢꦿꦶꦗꦶꦤꦺ꧉
7꧋ꦮꦺꦴꦁꦮꦺꦴꦁꦩꦲꦸꦥꦢꦔꦼꦕꦼꦏ꧀ꦠꦼꦫꦸꦱ꧀ꦏꦼꦥꦺꦔꦶꦤ꧀ꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ꧈ꦩꦸꦭꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦔꦺꦴꦩꦺꦴꦁ:“ꦱꦥꦱꦶꦁꦫꦸꦩꦁꦱꦧ꧀ꦭꦱ꧀ꦲꦺꦴꦫꦤ꧀ꦢꦸꦮꦺꦱꦭꦃꦏꦼꦤꦺꦁꦩꦺꦴꦭꦃꦲꦶꦩ꧀ꦧꦤ꧀ꦢꦼꦩ꧀ꦮꦠꦸꦩꦫꦁꦮꦺꦴꦁꦮꦺꦢꦺꦴꦏ꧀ꦲꦶꦏꦶ꧉” 8ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤ꧀ꦢꦶꦁꦏ꧀ꦭꦸꦏ꧀ꦭꦤ꧀ꦤꦸꦭꦶꦱ꧀ꦤꦁꦊꦩꦃꦩꦼꦤꦺꦃ꧉ 9ꦏꦢꦸꦁꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂꦔꦺꦴꦤꦺꦴꦒꦸꦫꦸꦒꦸꦫꦸꦏꦶꦠꦧ꧀ꦭꦤ꧀ꦥꦫꦥ꦳ꦫꦶꦱꦶꦠꦼꦫꦸꦱ꧀ꦥꦢꦭꦸꦔꦱꦶꦗꦶꦱꦶꦗꦶ꧈ꦩꦺꦴꦭꦃꦲꦶꦏꦫꦺꦴꦥꦫꦥꦶꦤꦶꦠꦸꦮ꧉ꦢꦢꦶꦤꦺꦤꦩꦸꦁꦓꦫꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺꦏꦫꦺꦴꦮꦺꦴꦁꦮꦺꦢꦺꦴꦏ꧀ꦏꦺꦱꦶꦁꦲꦶꦗꦶꦏ꧀ꦤꦁꦔꦉꦥ꧀ꦥꦺꦮꦺꦴꦁꦮꦺꦴꦁꦏꦺꦴꦤꦺꦴ꧉ 10ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦠꦏꦺꦴꦤ꧀ꦩꦫꦁꦮꦺꦴꦁꦮꦺꦢꦺꦴꦏ꧀ꦏꦺ:“ꦭꦃꦮꦺꦴꦁꦮꦺꦴꦁꦱꦶꦁꦔ꧀ꦒꦮꦏꦺꦴꦮꦺꦩ꧀ꦧꦿꦺꦤꦺꦥꦢꦤꦁꦲꦼꦤ꧀ꦢꦶꦱꦲꦶꦏꦶ?ꦲꦥꦲꦺꦴꦫꦲꦺꦤꦺꦁꦱꦶꦁꦚꦭꦃꦚꦭꦃꦲꦏꦺꦏꦺꦴꦮꦺ?”
11꧋ꦮꦺꦴꦁꦔꦺꦱꦼꦩꦲꦸꦂ:“ꦲꦺꦴꦫꦒꦸꦱ꧀ꦠꦶ꧈ꦲꦺꦴꦫꦲꦺꦤꦺꦁꦱꦶꦗꦶꦱꦶꦗꦶꦪ!”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦲꦸꦒꦲꦺꦴꦫꦚꦭꦃꦚꦭꦃꦲꦏꦺꦏꦺꦴꦮꦺ꧈ꦏꦤꦩꦸꦭꦶꦃ꧈ꦤꦁꦔꦶꦁꦲꦗꦔ꧀ꦭꦏꦺꦴꦤ꧀ꦤꦶꦢꦺꦴꦱꦩꦼꦤꦺꦃ!”
12꧋ꦲꦶꦁꦭꦶꦪꦮꦏ꧀ꦠꦸꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦮꦺꦴꦁ:“ꦲꦏꦸꦲꦶꦏꦶꦥꦼꦥꦢꦁꦔꦺꦗꦒꦠ꧀꧈ꦮꦺꦴꦁꦱꦶꦁꦩꦺꦭꦸꦲꦏꦸꦲꦺꦴꦫꦧꦏꦭ꧀ꦩ꧀ꦭꦏꦸꦲꦶꦁꦥꦼꦥꦼꦠꦼꦁꦩꦼꦤꦺꦃ꧈ꦤꦁꦔꦶꦁꦧꦏꦭ꧀ꦤ꧀ꦢꦸꦮꦺꦤ꧀ꦤꦶꦥꦼꦥꦢꦁꦔꦺꦲꦸꦫꦶꦥ꧀꧈”
13꧋ꦥꦫꦥ꦳ꦫꦶꦱꦶꦠꦼꦫꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦔꦺꦴꦩꦺꦴꦁꦔꦏꦺꦲꦮꦏ꧀ꦩꦸꦢꦺꦮꦺ꧈ꦲꦺꦴꦫꦲꦺꦤꦺꦁꦱꦼꦏ꧀ꦱꦶꦭꦶꦪꦤꦺ꧈ꦠꦼꦩ꧀ꦧꦸꦁꦩꦸꦲꦺꦴꦫꦏꦁꦒꦺꦴ!”
14꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦠꦼꦩ꧀ꦧꦸꦁꦏꦸꦲꦶꦏꦶꦚꦠ꧈ꦱꦼꦤꦗꦤ꧀ꦤꦤꦩꦸꦁꦲꦏꦸꦢꦺꦮꦺꦱꦶꦁꦔꦺꦴꦩꦺꦴꦁꦔꦏꦺ꧉ꦲꦏꦸꦔꦼꦂꦠꦶꦠꦼꦏꦏꦸꦲꦶꦏꦶꦱꦁꦏꦔꦼꦤ꧀ꦢꦶꦭꦤ꧀ꦥꦫꦤ꧀ꦏꦸꦲꦶꦏꦶꦤꦁꦲꦼꦤ꧀ꦢꦶ꧉ꦤꦁꦔꦶꦁꦏꦺꦴꦮꦺꦲꦺꦴꦫꦔꦼꦂꦠꦶꦲꦥꦲꦥꦧꦧ꧀ꦲꦏꦸ! 15ꦏꦺꦴꦮꦺꦏꦸꦮꦶꦤꦺꦏ꧀ꦔꦺꦴꦩꦺꦴꦁꦤꦩꦸꦁꦩꦤꦸꦠ꧀ꦲꦥꦮꦼꦫꦸꦃꦩꦸꦮꦲꦺ꧉ꦲꦏꦸꦲꦺꦴꦫꦚꦭꦃꦚꦭꦃꦲꦏꦺꦱꦥꦱꦥ꧉ 16ꦤꦁꦔꦶꦁꦱꦼꦩꦸꦁꦒꦺꦴꦤ꧀ꦤꦺꦲꦏꦸꦏꦸꦢꦸꦚꦭꦃꦚꦭꦃꦲꦏꦺ꧈ꦥꦸꦠꦸꦱ꧀ꦱꦤ꧀ꦏꦸꦩꦼꦱ꧀ꦠꦶꦧꦼꦤꦼꦂ꧈ꦲꦮꦶꦠ꧀ꦢꦸꦢꦸꦲꦏꦸꦢꦺꦮꦺꦱꦶꦁꦔ꧀ꦒꦮꦺꦥꦸꦠꦸꦱ꧀ꦱꦤ꧀ ꦤꦁꦔꦶꦁꦲꦏꦸꦏꦫꦺꦴꦧꦥꦏ꧀ꦏꦸꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 17ꦤꦁꦮꦺꦠ꧀ꦩꦸꦢꦺꦮꦺꦏꦼꦠꦸꦭꦶꦱ꧀ꦤꦺꦏ꧀ꦥꦱꦼꦏ꧀ꦱꦶꦧꦶꦱꦤꦺꦏꦁꦒꦺꦴꦤꦩꦸꦁꦤꦺꦏ꧀ꦲꦺꦤꦺꦁꦮꦺꦴꦁꦭꦺꦴꦫꦺꦴꦱꦶꦁꦚꦼꦏ꧀ꦱꦺꦤ꧀ꦤꦶ꧉ 18ꦱꦶꦁꦢꦢꦶꦱꦼꦏ꧀ꦱꦶꦏꦸꦏꦸꦮꦶꦮꦺꦴꦁꦭꦺꦴꦫꦺꦴ꧈ꦪꦏꦸꦮꦶꦲꦏꦸꦢꦺꦮꦺꦭꦤ꧀ꦧꦥꦏ꧀ꦏꦸ꧈ꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉”
19꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦠꦏꦺꦴꦤ꧀:“ꦭꦃꦲꦼꦤ꧀ꦢꦶꦧꦥꦏ꧀ꦩꦸ꧉”
꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦲꦺꦴꦫꦔꦼꦂꦠꦶꦲꦏꦸꦲꦶꦏꦶꦱꦥ꧈ꦩꦸꦭꦤꦺꦏꦺꦴꦮꦺꦪꦲꦺꦴꦫꦥꦢꦔꦼꦂꦠꦶꦧꦥꦏ꧀ꦏꦸ꧉ꦱꦼꦩꦸꦁꦒꦺꦴꦤ꧀ꦤꦺꦏꦺꦴꦮꦺꦔꦼꦂꦠꦶꦲꦏꦸꦲꦶꦏꦶꦱꦥ꧈ꦏꦺꦴꦮꦺꦪꦩꦼꦱ꧀ꦠꦶꦔꦼꦂꦠꦶꦧꦥꦏ꧀ꦏꦸ!”
20꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦲꦶꦏꦶꦢꦺꦴꦁꦔꦺꦢꦺꦏ꧀ꦤꦺꦩꦸꦭꦁꦔꦶꦤꦁꦒꦿꦺꦗꦒꦼꦢꦺ꧉ꦢꦺꦏ꧀ꦤꦺ ꦔꦢꦼꦏ꧀ꦕꦼꦢꦼꦏ꧀ꦏꦫꦺꦴꦏꦺꦴꦠꦏꦤ꧀ꦏꦺꦴꦠꦏ꧀ꦏꦤ꧀ꦮꦢꦃꦢꦸꦮꦶꦠ꧀ꦥꦮꦺꦃꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉ꦲꦺꦴꦫꦲꦺꦤꦺꦁꦮꦺꦴꦁꦱꦶꦁꦚꦼꦏꦼꦭ꧀ꦢꦺꦏ꧀ꦤꦺ꧈ꦲꦮꦶꦠ꧀ꦢꦸꦫꦸꦁꦮꦚ꧀ꦕꦶꦤꦺ꧉
21꧋ꦲꦺꦴꦫꦊꦠ꧀ꦱꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃꦩꦫꦁꦮꦺꦴꦁꦮꦺꦴꦁ:“ꦲꦏꦸꦲꦶꦏꦶꦧꦏꦭ꧀ꦭꦸꦔꦭꦤ꧀ꦏꦺꦴꦮꦺꦧꦏꦭ꧀ꦥꦢꦔ꧀ꦒꦺꦴꦭꦺꦏ꧀ꦏꦶꦲꦏꦸꦭꦤ꧀ꦧꦏꦭ꧀ꦩꦠꦶꦔ꧀ꦒꦺꦩ꧀ꦧꦺꦴꦭ꧀ꦱꦭꦃꦩꦸ꧉ꦏꦺꦴꦮꦺꦲꦺꦴꦫꦧꦶꦱꦠꦼꦏꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦧꦏꦭ꧀ꦠꦏ꧀ꦥꦫꦤ꧀ꦤꦶ꧉”
22꧋ꦥꦫꦥꦼꦔꦉꦥ꧀ꦥꦺꦮꦺꦴꦁꦙꦸꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦮꦺꦴꦁꦏꦸꦮꦶꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦧꦶꦱꦠꦼꦏꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦲꦉꦥ꧀ꦢꦶꦥꦫꦤ꧀ꦤꦶꦢꦺꦏ꧀ꦤꦺ꧉ꦮꦺꦴꦁꦏꦸꦮꦶꦲꦉꦥ꧀ꦔ꧀ꦒꦤ꧀ꦠꦸꦁꦲꦥꦏꦼꦥꦿꦶꦪꦺꦠ?”
23꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦏꦸꦮꦶꦱꦁꦏꦔꦶꦱꦺꦴꦂ꧈ꦤꦁꦔꦶꦁꦲꦏꦸꦱꦁꦏꦤ꧀ꦢꦸꦮꦸꦂ꧉ꦏꦺꦴꦮꦺꦮꦺꦴꦁꦢꦺꦴꦚꦏꦺꦤꦺ꧈ꦤꦁꦔꦶꦁꦲꦏꦸꦲꦺꦴꦫ꧉ 24ꦩꦸꦭꦤꦺ꧈ꦲꦏꦸꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺꦧꦏꦭ꧀ꦩꦠꦶꦔ꧀ꦒꦮꦱꦭꦃꦩꦸ꧉ꦲꦮꦶꦠ꧀ꦤꦺꦏ꧀ꦏꦺꦴꦮꦺꦲꦺꦴꦫꦥꦢꦥꦽꦕꦪꦤꦺꦏ꧀ꦲꦏꦸꦲꦶꦏꦶꦥꦚ꧀ꦕꦺꦤ꧀ꦮꦸꦗꦸꦠ꧀ꦏꦪꦱꦶꦁꦠꦏ꧀ꦲꦺꦴꦩꦺꦴꦁ꧈ꦠꦼꦤꦤ꧀ ꦤꦺꦏ꧀ꦩꦠꦶꦏꦺꦴꦮꦺꦧꦏꦭ꧀ꦔ꧀ꦒꦮꦱꦭꦃꦩꦸ꧉”
25꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦠꦏꦺꦴꦤ꧀:“ꦏꦺꦴꦮꦺꦏꦸꦮꦶꦱꦏ꧀ꦗꦤꦺꦱꦥꦠ?”
꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦶꦏꦸꦮꦶꦱ꧀ꦲꦺꦴꦫꦲꦸꦱꦃꦠꦏ꧀ꦲꦺꦴꦩꦺꦴꦁꦩꦼꦤꦺꦃ꧈ꦲꦮꦶꦠ꧀ꦲꦼꦁꦒꦺꦴꦤ꧀ꦏꦸꦔꦺꦴꦩꦺꦴꦁꦮꦶꦱ꧀ꦲꦺꦴꦫꦏꦸꦫꦁꦏꦸꦫꦁ꧉ 26ꦲꦺꦴꦏꦺꦃꦥꦽꦏꦫꦱꦶꦁꦏꦸꦢꦸꦠꦏ꧀ꦲꦺꦴꦩꦺꦴꦁꦏꦁꦒꦺꦴꦤ꧀ꦢꦸꦢꦸꦃꦲꦏꦺꦱꦭꦃꦩꦸ꧈ꦤꦁꦔꦶꦁꦲꦏꦸꦲꦼꦩꦺꦴꦃꦔꦺꦴꦩꦺꦴꦁꦔꦏꦺꦏꦸꦮꦶ꧉ꦲꦏꦸꦤꦩꦸꦁꦏꦼꦥꦺꦔꦶꦤ꧀ꦔ꧀ꦒꦼꦭꦂꦫꦏꦺꦩꦫꦁꦱꦧꦼꦤ꧀ꦮꦺꦴꦁꦲꦥꦠꦼꦩ꧀ꦧꦸꦁꦔꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ꦢꦺꦏ꧀ꦤꦺꦏꦸꦮꦶꦧꦼꦤꦼꦂꦭꦤ꧀ꦏꦼꦤꦺꦁꦢꦶꦥꦽꦕꦪ꧉”
27꧋ꦮꦺꦴꦁꦮꦺꦴꦁꦲꦺꦴꦫꦔꦼꦂꦠꦶꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦒꦸꦱ꧀ꦠꦶꦄꦭ꧀ꦭꦃ꧈ꦧꦥꦏ꧀ꦏꦺ꧉ 28ꦩꦸꦭꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦺꦴꦮꦺꦮꦶꦱ꧀ꦥꦢꦔꦸꦁꦒꦃꦲꦏꦺꦲꦤꦏ꧀ꦏꦺꦩꦤꦸꦁꦱꦤꦁꦏꦪꦸꦥꦼꦤ꧀ꦠꦺꦁꦔꦤ꧀ ꦏꦺꦴꦮꦺꦧꦏꦭ꧀ꦔꦼꦂꦠꦶꦲꦏꦸꦲꦶꦏꦶꦱꦥ꧉ꦏꦺꦴꦮꦺꦲꦸꦒꦧꦏꦭ꧀ꦔꦼꦂꦠꦶꦤꦺꦏ꧀ꦲꦏꦸꦲꦺꦴꦫꦔ꧀ꦭꦏꦺꦴꦤ꧀ꦤꦶꦲꦥꦲꦥꦱꦁꦏꦏꦉꦥ꧀ꦏꦸꦢꦺꦮꦺ꧈ꦤꦁꦔꦶꦁꦱꦶꦁꦠꦏ꧀ꦲꦺꦴꦩꦺꦴꦁꦤꦩꦸꦁꦩꦤꦸꦠ꧀ꦥꦶꦮꦸꦭꦁꦔꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦩꦫꦁꦲꦏꦸ꧉ 29ꦱꦶꦁꦔꦺꦴꦁꦏꦺꦴꦤ꧀ꦲꦏꦸꦏꦸꦮꦶꦱ꧀ꦭꦮꦱ꧀ꦱꦺꦏꦫꦺꦴꦲꦏꦸ꧉ꦢꦺꦏ꧀ꦤꦺꦲꦺꦴꦫꦠꦲꦸꦤꦶꦁꦒꦭ꧀ꦲꦏꦸꦢꦺꦮꦺ꧈ꦲꦮꦶꦠ꧀ꦲꦏꦸꦱ꧀ꦭꦮꦱ꧀ꦱꦺꦤꦩꦸꦁꦔ꧀ꦭꦏꦺꦴꦤ꧀ꦤꦶꦱꦼꦩ꧀ꦧꦫꦁꦱꦶꦁꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦤꦺꦢꦺꦏ꧀ꦤꦺ꧉” 30ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦏꦸꦮꦶꦩꦲꦸꦏꦧꦺꦃꦠꦼꦫꦸꦱ꧀ꦲꦺꦴꦏꦺꦃꦮꦺꦴꦁꦱꦶꦁꦥꦢꦥꦽꦕꦪꦩꦫꦁꦢꦺꦏ꧀ꦤꦺ꧉
31꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦙꦸꦱꦶꦁꦥꦢꦥꦽꦕꦪ:“ꦤꦺꦏ꧀ꦏꦺꦴꦮꦺꦥꦢꦔ꧀ꦭꦏꦺꦴꦤ꧀ꦤꦶꦥꦶꦮꦸꦭꦁꦏꦸ꧈ꦏꦺꦴꦮꦺꦏꦸꦮꦶꦚꦠꦢꦢꦶꦩꦸꦫꦶꦢ꧀ꦏꦸ꧉ 32ꦏꦺꦴꦮꦺꦧꦏꦭ꧀ꦔ꧀ꦭꦏꦺꦴꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶꦏꦺꦴꦮꦺꦧꦏꦭ꧀ꦩꦼꦂꦢꦺꦏ꧉”
33꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦔꦺꦴꦩꦺꦴꦁꦲꦥꦠ?ꦲꦮꦏ꧀ꦏꦺꦢꦺꦮꦺꦧꦏꦭ꧀ꦩꦼꦂꦢꦺꦏ?ꦏꦥꦤ꧀ꦲꦮꦏ꧀ꦏꦺꦢꦺꦮꦺꦠꦲꦸꦢꦢꦶꦱ꧀ꦭꦥ꦳꧀ꦥ꦳ꦺꦮꦺꦴꦁ?ꦲꦮꦏ꧀ꦏꦺꦢꦺꦮꦺꦭꦲꦸꦠ꧀ꦠꦸꦫꦸꦤ꧀ꦤꦤ꧀ꦤꦺꦧꦥꦄꦨꦿꦲꦩ꧀ꦠ?”
34꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥꦢꦔꦼꦂꦠꦶꦪ!ꦱꦥꦮꦲꦺꦱꦶꦁꦔ꧀ꦭꦏꦺꦴꦤ꧀ꦤꦶꦲꦭꦏꦸꦮꦶꦢꦢꦶꦱ꧀ꦭꦥ꦳꧀ꦥ꦳ꦺꦲꦭ꧉ 35ꦱ꧀ꦭꦥ꦳꧀ꦏꦸꦮꦶꦲꦺꦴꦫꦤ꧀ꦢꦸꦮꦺꦤ꧀ꦤꦶꦏ꧀ꦮꦱꦲꦥꦲꦥꦭꦤ꧀ꦲꦺꦴꦫꦧꦏꦭ꧀ꦱ꧀ꦭꦮꦱ꧀ꦱꦺꦤꦁꦲꦺꦴꦩꦃꦲꦺꦱꦶꦁꦤ꧀ꦢꦸꦮꦺ꧉ꦤꦁꦔꦶꦁꦲꦤꦏ꧀ꦏꦺꦮꦺꦴꦁꦔꦺꦤ꧀ꦢꦸꦮꦺꦤ꧀ꦤꦶꦏ꧀ꦮꦱꦤꦁꦲꦺꦴꦩꦃꦏꦺꦴꦤꦺꦴꦱ꧀ꦭꦮꦱ꧀ꦱꦺ꧉ 36ꦩꦸꦭꦤꦺ꧈ꦤꦺꦏ꧀ꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔ꧀ꦭꦸꦮꦂꦫꦶꦏꦺꦴꦮꦺ꧈ꦏꦺꦴꦮꦺꦧꦏꦭ꧀ꦩꦼꦂꦢꦺꦏꦠꦼꦤꦤ꧀꧈ 37ꦲꦏꦸꦔꦼꦂꦠꦶꦤꦺꦏ꧀ꦏꦺꦴꦮꦺꦏꦸꦮꦶꦏꦧꦺꦃꦠꦸꦫꦸꦤ꧀ꦤꦤ꧀ꦤꦺꦧꦥꦄꦨꦿꦲꦩ꧀ ꦤꦁꦔꦶꦁꦱꦼꦤꦗꦤ꧀ꦔꦺꦴꦤꦺꦴꦏꦺꦴꦮꦺꦥꦢꦲꦉꦥ꧀ꦩꦠꦺꦤ꧀ꦤꦶꦲꦏꦸ꧈ꦲꦮꦶꦠ꧀ꦥꦶꦮꦸꦭꦁꦏꦸꦧ꧀ꦭꦱ꧀ꦲꦺꦴꦫꦲꦩ꧀ꦧꦺꦴꦏ꧀ꦠꦩ꧀ꦥꦲꦶꦁꦲꦠꦶꦩꦸ꧉ 38ꦱꦶꦁꦠꦏ꧀ꦲꦺꦴꦩꦺꦴꦁꦲꦶꦏꦶꦲꦥꦱꦶꦁꦢꦶꦢꦸꦢꦸꦃꦲꦏꦺꦩꦫꦁꦲꦏꦸꦏꦫꦺꦴꦧꦥꦏ꧀ꦏꦸ꧈ꦤꦁꦔꦶꦁꦏꦺꦴꦮꦺꦏꦸꦮꦶꦔ꧀ꦭꦏꦺꦴꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺꦧꦥꦏ꧀ꦩꦸ꧈ꦪꦏꦸꦮꦶꦱꦺꦠꦤ꧀꧈”
39꧋ꦮꦺꦴꦁꦮꦺꦴꦁꦱꦼꦩꦲꦸꦂ:“ꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦏꦸꦮꦶꦧꦥꦄꦨꦿꦲꦩ꧀!”
꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺꦏꦸꦮꦶꦠꦸꦫꦸꦤ꧀ꦤꦤ꧀ꦤꦺꦧꦥꦄꦨꦿꦲꦩ꧀ꦠꦼꦤꦤ꧀ ꦏ꧀ꦭꦏꦸꦮꦤ꧀ꦩꦸꦪꦩꦼꦱ꧀ꦠꦶꦏꦪꦧꦥꦄꦨꦿꦲꦩ꧀! 40ꦲꦏꦸꦔꦺꦴꦩꦺꦴꦁꦔꦶꦏꦺꦴꦮꦺꦧꦧ꧀ꦱꦶꦁꦧꦼꦤꦼꦂꦭꦤ꧀ꦱꦶꦁꦚꦠ꧈ꦲꦮꦶꦠ꧀ꦲꦶꦏꦶꦲꦏꦸꦏꦿꦸꦔꦸꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦢꦺꦮꦺ꧈ꦩꦭꦃꦲꦏꦸꦲꦉꦥ꧀ꦲꦩ꧀ꦧꦺꦴꦏ꧀ꦥꦠꦺꦤ꧀ꦤꦶ꧉ꦲꦥꦧꦥꦄꦨꦿꦲꦩ꧀ꦩ꧀ꦧꦶꦪꦺꦤ꧀ꦪꦔꦺꦴꦤꦺꦴ?ꦭꦲꦸꦠ꧀ꦲꦺꦴꦫꦠ! 41ꦏꦺꦴꦮꦺꦏꦸꦮꦶꦤꦶꦫꦸꦧꦥꦏ꧀ꦩꦸ!”
꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦱꦼꦩꦲꦸꦂ:“ꦧꦥꦏ꧀ꦩꦸ?ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺꦭꦤ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦠꦲꦸꦤꦶꦁꦒꦭ꧀ꦢꦺꦏ꧀ꦤꦺ꧉”
42꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦼꦩꦸꦁꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦧꦥꦏ꧀ꦩꦸꦠꦼꦤꦤ꧀ ꦏꦺꦴꦮꦺꦩꦼꦱ꧀ꦠꦶꦪꦠꦿꦺꦱ꧀ꦤꦩꦫꦁꦲꦏꦸ꧉ꦲꦏꦸꦲꦶꦏꦶꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦠꦼꦫꦸꦱ꧀ꦩꦫꦤꦁꦠꦼꦔꦃꦩꦸ꧉ꦲꦏꦸꦩ꧀ꦧꦿꦺꦤꦺꦲꦶꦏꦶꦲꦺꦴꦫꦱꦁꦏꦏꦉꦥ꧀ꦏꦸꦢꦺꦮꦺ꧈ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 43ꦏꦺꦴꦮꦺꦏꦸꦮꦶꦲꦺꦴꦫꦥꦢꦢꦸꦤꦸꦁꦠꦼꦩ꧀ꦧꦸꦁꦏꦸ꧈ꦲꦮꦶꦠ꧀ꦏꦺꦴꦮꦺꦲꦺꦴꦫꦱꦧꦂꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦏꦸ! 44ꦏꦺꦴꦮꦺꦏꦸꦮꦶꦲꦤꦏ꧀ꦏꦺꦱꦺꦠꦤ꧀ꦭꦤ꧀ꦏꦺꦴꦮꦺꦤꦩꦸꦁꦱꦼꦤꦼꦁꦤꦸꦫꦸꦠ꧀ꦠꦶꦏꦉꦥ꧀ꦥꦺꦧꦥꦏ꧀ꦩꦸ꧉ꦱꦺꦠꦤ꧀ꦏꦸꦮꦶꦏꦮꦶꦠ꧀ꦩ꧀ꦧꦶꦪꦺꦤ꧀ꦤꦺꦠꦸꦏꦁꦩꦠꦺꦤ꧀ꦤꦶ꧉ꦏ꧀ꦭꦏꦸꦮꦤ꧀ꦤꦺꦧ꧀ꦭꦱ꧀ꦲꦺꦴꦫꦠꦲꦸꦲꦺꦤꦺꦁꦧꦼꦤꦼꦂꦫꦺ꧈ꦲꦮꦶꦠ꧀ꦢꦺꦏ꧀ꦤꦺꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦮꦲꦺꦲꦺꦴꦫꦲꦺꦤꦺꦁꦧꦼꦤꦼꦂꦫꦺ꧉ꦤꦺꦏ꧀ꦢꦺꦏ꧀ꦤꦺꦒꦺꦴꦫꦺꦴꦃꦏꦸꦮꦶꦥꦚ꧀ꦕꦺꦤ꧀ꦮꦶꦱ꧀ꦭꦸꦩꦿꦃ꧈ꦲꦮꦶꦠ꧀ꦢꦺꦏ꧀ꦤꦺꦠꦸꦏꦁꦒꦺꦴꦫꦺꦴꦃꦭꦤ꧀ꦒꦺꦴꦫꦺꦴꦃꦏꦸꦮꦶꦠꦸꦏꦸꦭ꧀ꦭꦺꦱꦁꦏꦱꦺꦠꦤ꧀꧈ 45ꦩꦸꦭꦤꦺꦲꦺꦴꦫꦔ꧀ꦒꦸꦩꦸꦤ꧀ꦤꦏꦺꦤꦺꦏ꧀ꦏꦺꦴꦮꦺꦲꦺꦴꦫꦥꦢꦥꦽꦕꦪꦩꦫꦁꦥꦶꦮꦸꦭꦁꦏꦸ꧈ꦲꦮꦶꦠ꧀ꦥꦶꦮꦸꦭꦁꦏꦸꦏꦸꦮꦶꦧꦼꦤꦼꦂ꧉ 46ꦗꦗꦭ꧀ ꦱꦥꦱꦶꦁꦧꦶꦱꦤ꧀ꦢꦸꦢꦸꦃꦲꦏꦺꦢꦺꦴꦱꦏꦸ?ꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦲꦺꦴꦫꦥꦢꦥꦽꦕꦪꦩꦫꦁꦲꦏꦸ꧈ꦱꦼꦤꦗꦤ꧀ꦤꦲꦏꦸꦔꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ꧉ 47ꦥꦚ꧀ꦕꦺꦤ꧀!ꦮꦺꦴꦁꦤꦺꦏ꧀ꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦠꦼꦤꦤ꧀ꦩꦼꦱ꧀ꦠꦶꦪꦔ꧀ꦒꦸꦒꦸꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦄꦭ꧀ꦭꦃ꧉ꦤꦁꦔꦶꦁꦏꦺꦴꦮꦺꦢꦸꦢꦸꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧈ꦩꦸꦭꦤꦺꦪꦲꦺꦴꦫꦥꦢꦔ꧀ꦒꦠꦺꦏ꧀ꦏꦏꦺꦩꦫꦁꦥꦶꦮꦸꦭꦁꦔꦺ!”
48꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦮꦏ꧀ꦏꦺꦢꦺꦮꦺꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠ꧈ꦏꦺꦴꦮꦺꦢꦸꦢꦸꦮꦺꦴꦁꦙꦸꦠꦼꦤꦤ꧀ ꦤꦁꦔꦶꦁꦮꦺꦴꦁꦯꦩꦫꦶꦠꦤ꧀꧈ꦏꦺꦴꦮꦺꦏꦼꦊꦧꦺꦴꦤ꧀ꦱꦺꦠꦤ꧀!”
49꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦺꦴꦫ꧈ꦲꦏꦸꦲꦺꦴꦫꦏꦼꦊꦧꦺꦴꦤ꧀ꦱꦺꦠꦤ꧀꧈ꦲꦏꦸꦔ꧀ꦒꦸꦁꦒꦸꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦤꦁꦔꦶꦁꦏꦺꦴꦮꦺꦩꦭꦃꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦲꦏꦸ꧉ 50ꦲꦏꦸꦲꦺꦴꦫꦏꦼꦥꦺꦔꦶꦤ꧀ꦢꦶꦲꦼꦊꦩ꧀ ꦲꦺꦴꦫ꧉ꦲꦺꦤꦺꦁꦱꦶꦗꦶꦱꦶꦁꦔꦼꦊꦩ꧀ꦲꦏꦸꦭꦤ꧀ꦢꦺꦏ꧀ꦤꦺꦧꦏꦭ꧀ꦤ꧀ꦢꦸꦢꦸꦃꦲꦏꦺꦱꦥꦱꦶꦁꦧꦼꦤꦼꦂꦭꦤ꧀ꦱꦥꦱꦶꦁꦏ꧀ꦭꦺꦫꦸ꧉ 51ꦲꦺꦭꦶꦁꦔ!ꦮꦺꦴꦁꦱꦶꦁꦔ꧀ꦭꦏꦺꦴꦤ꧀ꦤꦶꦥꦶꦮꦸꦭꦁꦏꦸꦏꦸꦮꦶꦱ꧀ꦭꦮꦱ꧀ꦱꦺꦲꦺꦴꦫꦧꦏꦭ꧀ꦔꦭꦩ꧀ꦩꦶꦥꦠꦶ꧉”
52꧋ꦮꦺꦴꦁꦮꦺꦴꦁꦙꦸꦩꦲꦸꦠꦼꦫꦸꦱ꧀ꦥꦢꦔꦺꦴꦩꦺꦴꦁ:“ꦱꦲꦶꦏꦶꦲꦮꦏ꧀ꦏꦺꦢꦺꦮꦺꦔꦼꦂꦠꦶꦠꦼꦤꦤ꧀ꦤꦺꦏ꧀ꦏꦺꦴꦮꦺꦒꦼꦩ꧀ꦧ꧀ꦭꦸꦁ꧉ꦧꦥꦄꦨꦿꦲꦩ꧀ꦭꦲꦸꦠ꧀ꦩꦠꦶꦠ?ꦭꦤ꧀ꦥꦫꦤꦧꦶꦲꦩ꧀ꦧꦫꦁ!ꦭꦃꦏꦺꦴꦮꦺꦏꦺꦴꦏ꧀ꦔꦺꦴꦩꦺꦴꦁ:'ꦱꦥꦱꦶꦁꦔ꧀ꦭꦏꦺꦴꦤ꧀ꦤꦶꦥꦶꦮꦸꦭꦁꦏꦸꦲꦺꦴꦫꦧꦏꦭ꧀ꦩꦠꦶ?’ 53ꦭꦃꦤꦺꦏ꧀ꦧꦥꦄꦨꦿꦲꦩ꧀ꦮꦲꦺꦩꦠꦶ꧈ꦥꦫꦤꦧꦶꦲꦸꦒꦏꦧꦺꦃꦩꦠꦶ꧈ꦭꦃꦏꦺꦴꦮꦺꦏꦸꦮꦶꦱꦥ?ꦲꦥꦏꦺꦴꦮꦺꦔꦸꦁꦏꦸꦭ꧀ꦭꦶꦧꦥꦄꦨꦿꦲꦩ꧀?”
54꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦥꦲꦏꦸꦔꦸꦁꦏꦸꦭ꧀ꦭꦶꦧꦥꦄꦨꦿꦲꦩ꧀?ꦱꦼꦩꦸꦁꦒꦺꦴꦤ꧀ꦤꦺꦲꦏꦸꦔꦼꦊꦩ꧀ꦲꦮꦏ꧀ꦏꦸꦢꦺꦮꦺ꧈ꦠꦼꦩ꧀ꦧꦸꦁꦏꦸꦲꦺꦴꦫꦲꦺꦤꦺꦁꦲꦗꦶꦤꦺ꧉ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦢꦺꦮꦺ꧈ꦧꦥꦏ꧀ꦏꦸ꧈ꦱꦶꦁꦔꦼꦊꦩ꧀ꦲꦏꦸ꧉ꦢꦺꦏ꧀ꦤꦺꦱꦶꦁꦲꦩ꧀ꦧꦺꦴꦏ꧀ꦲꦫꦤ꧀ꦤꦶꦒꦸꦱ꧀ꦠꦶꦄꦭ꧀ꦭꦃꦩꦸ꧉ 55ꦤꦁꦔꦶꦁꦏꦺꦴꦮꦺꦲꦺꦴꦫꦏꦼꦤꦭ꧀ꦩꦫꦁꦢꦺꦏ꧀ꦤꦺ꧉ꦲꦏꦸꦲꦶꦏꦶꦱꦶꦁꦏꦼꦤꦭ꧀ꦩꦫꦁꦢꦺꦏ꧀ꦤꦺ꧉ꦲꦏꦸꦒꦺꦴꦫꦺꦴꦃꦤꦺꦏ꧀ꦲꦏꦸꦔꦺꦴꦩꦺꦴꦁꦲꦏꦸꦲꦺꦴꦫꦏꦼꦤꦭ꧀ꦩꦫꦁꦢꦺꦏ꧀ꦤꦺ꧈ꦏꦪꦲꦼꦁꦒꦺꦴꦤ꧀ꦩꦸꦥꦢꦒꦺꦴꦫꦺꦴꦃꦏꦸꦮꦶ꧉ꦲꦏꦸꦏꦼꦤꦭ꧀ꦩꦫꦁꦢꦺꦏ꧀ꦤꦺꦭꦤ꧀ꦲꦏꦸꦩꦤꦸꦠ꧀ꦩꦫꦁꦠꦼꦩ꧀ꦧꦸꦁꦔꦺ꧉ 56ꦧꦥꦄꦨꦿꦲꦩ꧀ꦔꦉꦥ꧀ꦲꦉꦥ꧀ꦠꦼꦏꦏꦸꦏꦫꦺꦴꦧꦸꦔꦃ꧉ꦱꦲꦶꦏꦶꦏꦸꦮꦶꦮꦶꦱ꧀ꦏ꧀ꦭꦏꦺꦴꦤ꧀ ꦩꦸꦭꦤꦺꦢꦺꦏ꧀ꦤꦺꦪꦧꦸꦔꦃꦠꦼꦤꦤ꧀꧈”
57꧋ꦮꦺꦴꦁꦮꦺꦴꦁꦩꦲꦸꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦭꦃꦲꦸꦩꦸꦂꦩꦸꦮꦲꦺꦢꦸꦫꦸꦁꦲꦺꦤꦺꦁꦱꦺꦏꦼꦠ꧀ꦠꦲꦸꦤ꧀ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦮꦶꦱ꧀ꦮꦼꦫꦸꦃꦧꦥꦄꦨꦿꦲꦩ꧀?”
58꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥꦢꦔꦼꦂꦠꦶꦪ!ꦱꦏ꧀ꦢꦸꦫꦸꦁꦔꦺꦧꦥꦄꦨꦿꦲꦩ꧀ꦲꦺꦤꦺꦁꦲꦏꦸꦮꦶꦱ꧀ꦲꦺꦤꦺꦁ꧉”
59꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦚ꧀ꦗꦶꦏꦸꦏ꧀ꦮꦠꦸꦏꦁꦒꦺꦴꦩ꧀ꦧꦤ꧀ꦢꦼꦩ꧀ꦩꦶꦒꦸꦱ꧀ꦠꦶꦪꦺꦯꦸꦱ꧀ ꦤꦁꦔꦶꦁꦢꦺꦏ꧀ꦤꦺꦠꦼꦫꦸꦱ꧀ꦤ꧀ꦢꦼꦭꦶꦏ꧀ꦭꦤ꧀ꦭꦸꦔꦱꦁꦏꦒꦿꦺꦗꦒꦼꦢꦺꦏꦺꦴꦤꦺꦴ꧉
꧇꧙꧇ 1꧋ꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦩ꧀ꦭꦏꦸꦢꦺꦏ꧀ꦤꦺꦠꦼꦫꦸꦱ꧀ꦮꦼꦫꦸꦃꦮꦺꦴꦁꦱꦶꦁꦭꦩꦸꦂꦏꦮꦶꦠ꧀ꦭꦲꦶꦂꦫꦺ꧉ 2ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦫꦸ꧈ꦲꦥꦱꦶꦁꦩꦫꦏ꧀ꦏꦏꦺꦮꦺꦴꦁꦲꦶꦏꦶꦭꦲꦶꦂꦭꦩꦸꦂ:ꦱꦭꦃꦲꦺꦢꦺꦏ꧀ꦤꦺꦢꦺꦮꦺꦲꦥꦱꦭꦃꦲꦺꦮꦺꦴꦁꦠꦸꦮꦤꦺ?”
3꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦺꦴꦫꦱꦭꦃꦲꦺꦱꦥꦱꦥ!ꦮꦺꦴꦁꦔꦺꦢꦺꦮꦺꦲꦺꦴꦫꦱꦭꦃꦭꦤ꧀ꦮꦺꦴꦁꦠꦸꦮꦤꦺꦪꦲꦺꦴꦫꦱꦭꦃ꧉ꦮꦺꦴꦁꦏꦸꦮꦶꦭꦩꦸꦂꦱꦸꦥꦪꦏ꧀ꦮꦱꦤꦺꦒꦸꦱ꧀ꦠꦶꦄꦭ꧀ꦭꦃꦧꦶꦱꦏꦺꦠꦺꦴꦏ꧀ꦱꦁꦏꦲꦸꦫꦶꦥ꧀ꦥꦺ꧉ 4ꦱꦲꦶꦏꦶꦦꦸꦩ꧀ꦥꦸꦁꦲꦶꦗꦶꦏ꧀ꦲꦮꦤ꧀ꦲꦮꦏ꧀ꦏꦺꦢꦺꦮꦺꦏꦸꦢꦸꦚꦩ꧀ꦧꦸꦠ꧀ꦠꦤꦸꦫꦸꦠ꧀ꦠꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ꦲꦺꦴꦫꦱꦸꦮꦶꦩꦼꦤꦺꦃꦮꦼꦔꦶꦧꦏꦭ꧀ꦠꦼꦏꦭꦤ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦧꦶꦱꦚꦩ꧀ꦧꦸꦠ꧀ꦠꦲꦥꦲꦥꦩꦼꦤꦺꦃ꧉ 5ꦱꦸꦮꦺꦤꦺꦲꦏꦸꦤꦁꦗꦒꦠ꧀ꦏꦺꦤꦺꦲꦏꦸꦥꦼꦥꦢꦁꦔꦺꦗꦒꦠ꧀꧈”
6꧋ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦔꦺꦴꦤꦺꦴꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦲꦶꦢꦸꦤꦁꦊꦩꦃ꧉ꦊꦩꦃꦲꦺꦠꦼꦫꦸꦱ꧀ꦢꦶꦲꦸꦊꦠ꧀ꦠꦸꦊꦠ꧀ꦏꦫꦺꦴꦲꦶꦢꦸꦤꦺꦠꦼꦫꦸꦱ꧀ꦢꦶꦲꦸꦱꦥ꧀ꦥꦏꦺꦩꦿꦶꦥꦠ꧀ꦠꦺꦮꦺꦴꦁꦔꦺꦱꦶꦁꦭꦩꦸꦂ꧉ 7ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦔꦺ:“ꦏꦤꦱꦲꦶꦏꦶꦫꦲꦸꦥ꧀ꦤꦁꦧ꧀ꦭꦸꦩ꧀ꦧꦁꦯꦶꦭꦺꦴꦮꦩ꧀!”꧌ꦯꦶꦭꦺꦴꦮꦩ꧀ꦏꦸꦮꦶꦠꦼꦒꦼꦱ꧀ꦱꦺ:ꦱꦶꦁꦢꦶꦏꦺꦴꦁꦏꦺꦴꦤ꧀꧈)ꦮꦺꦴꦁꦔꦺꦠꦼꦫꦸꦱ꧀ꦧꦸꦢꦭ꧀꧈ꦱꦏ꧀ꦮꦶꦱ꧀ꦱꦺꦫꦲꦸꦥ꧀ꦢꦺꦏ꧀ꦤꦺꦠꦼꦫꦸꦱ꧀ꦩꦸꦭꦶꦃ꧈ꦤꦁꦔꦶꦁꦱꦲꦶꦏꦶꦩꦿꦶꦥꦠ꧀ꦠꦺꦮꦶꦱ꧀ꦮꦼꦫꦸꦃ꧉
8꧋ꦠꦁꦒꦠꦁꦒꦤꦺꦭꦤ꧀ꦮꦺꦴꦁꦮꦺꦴꦁꦭꦶꦪꦤꦺꦱꦶꦁꦱꦧꦼꦤ꧀ꦢꦶꦤꦤꦺꦮꦼꦫꦸꦃꦮꦺꦴꦁꦔꦺꦔꦼꦩꦶꦱ꧀ꦥꦢꦫꦱꦤ꧀ꦫꦱꦤ꧀:“ꦮꦺꦴꦁꦲꦶꦏꦶꦲꦥꦢꦸꦢꦸꦱꦶꦁꦠꦸꦏꦁꦔꦼꦩꦶꦱ꧀ꦏꦲꦺ?”
9꧋ꦲꦺꦤꦺꦁꦱꦶꦁꦱꦼꦩꦲꦸꦂ:“ꦪ꧈ꦥꦚ꧀ꦕꦺꦤ꧀ꦢꦺꦏ꧀ꦤꦺ!”ꦭꦶꦪꦤꦺꦔꦺꦴꦩꦺꦴꦁ:“ꦢꦸꦢꦸ꧈ꦤꦩꦸꦁꦫꦸꦥꦤꦺꦱꦶꦁꦏꦪꦢꦺꦏ꧀ꦤꦺ꧉”
꧋ꦤꦁꦔꦶꦁꦮꦺꦴꦁꦱꦶꦁꦩꦲꦸꦤꦺꦭꦩꦸꦂꦱꦼꦩꦲꦸꦂ:“ꦥꦚ꧀ꦕꦺꦤ꧀ꦲꦏꦸꦲꦶꦏꦶꦱꦶꦁꦠꦸꦏꦁꦔꦼꦩꦶꦱ꧀!”
10꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦠꦏꦺꦴꦤ꧀:“ꦭꦃꦱꦲꦶꦏꦶꦏꦺꦴꦮꦺꦏꦺꦴꦏ꧀ꦧꦶꦱꦮꦼꦫꦸꦃ?”
11꧋“ꦮꦺꦴꦁꦱꦶꦁꦗꦼꦤꦼꦁꦔꦺꦪꦺꦯꦸꦱ꧀ꦱꦶꦁꦤꦩ꧀ꦧꦤꦶꦲꦏꦸ꧉ꦢꦺꦏ꧀ꦤꦺꦔꦸꦊꦠ꧀ꦠꦸꦊꦠ꧀ꦊꦩꦃꦏꦫꦺꦴꦲꦶꦢꦸꦤꦺꦠꦼꦫꦸꦱ꧀ꦢꦶꦲꦸꦱꦥ꧀ꦥꦏꦺꦩꦿꦶꦥꦠ꧀ꦏꦸ꧉ꦱꦏ꧀ꦮꦶꦱ꧀ꦱꦺꦏꦸꦮꦶꦲꦏꦸꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦫꦲꦸꦥ꧀ꦤꦁꦧ꧀ꦭꦸꦩ꧀ꦧꦁꦯꦶꦭꦺꦴꦮꦩ꧀꧈ꦏꦢꦸꦁꦲꦏꦸꦮꦶꦱ꧀ꦫꦲꦸꦥ꧀ꦲꦏꦸꦠꦼꦫꦸꦱ꧀ꦧꦶꦱꦮꦼꦫꦸꦃ꧉”
12꧋ꦮꦺꦴꦁꦮꦺꦴꦁꦠꦏꦺꦴꦤ꧀:“ꦭꦃꦮꦺꦴꦁꦔꦺꦤꦁꦲꦼꦤ꧀ꦢꦶ?”
꧋“ꦲꦼꦩ꧀ꦧꦸꦃꦪ꧈”ꦮꦺꦴꦁꦔꦺꦱꦼꦩꦲꦸꦂ꧉
13-14꧋ꦒꦸꦱ꧀ꦠꦶꦪꦺꦯꦸꦱ꧀ꦲꦼꦁꦒꦺꦴꦤꦺꦔꦸꦊꦠ꧀ꦠꦸꦊꦠ꧀ꦊꦩꦃꦏꦫꦺꦴꦲꦶꦢꦸꦤꦺꦏꦁꦒꦺꦴꦤꦩ꧀ꦧꦤꦶꦮꦺꦴꦁꦭꦩꦸꦂꦩꦲꦸꦲꦶꦁꦢꦶꦤꦱꦧꦠ꧀꧈ꦲꦶꦁꦢꦶꦤꦱꦧꦠ꧀ꦏꦸꦮꦶꦮꦺꦴꦁꦙꦸꦲꦺꦴꦫꦲꦺꦤ꧀ꦠꦸꦏ꧀ꦚꦩ꧀ꦧꦸꦠ꧀ꦠꦲꦥꦲꦥ꧈ꦩꦸꦭꦤꦺꦮꦺꦴꦁꦔꦺꦠꦼꦫꦸꦱ꧀ꦢꦶꦒꦮꦤꦁꦔ꧀ꦒꦺꦴꦤ꧀ꦤꦺꦥꦫꦥ꦳ꦫꦶꦱꦶꦲꦉꦥ꧀ꦢꦶꦏꦼꦭꦃꦲꦏꦺ꧉ 15ꦮꦺꦴꦁꦔꦺꦢꦶꦠꦏꦺꦴꦤ꧀ꦤꦶ:“ꦏꦼꦥꦿꦶꦪꦺꦩꦿꦶꦥꦠ꧀ꦩꦸꦧꦶꦱꦤꦺꦩꦫꦶ?”ꦮꦺꦴꦁꦔꦺꦱꦼꦩꦲꦸꦂ:“ꦩꦿꦶꦥꦠ꧀ꦏꦸꦢꦶꦲꦸꦱꦥ꧀ꦥꦶꦊꦩꦃꦠꦼꦊꦱ꧀ ꦲꦏꦸꦠꦼꦫꦸꦱ꧀ꦫꦲꦸꦥ꧀ꦠꦼꦫꦸꦱ꧀ꦧꦶꦱꦮꦼꦫꦸꦃ!”
16꧋ꦲꦺꦤꦺꦁꦥꦫꦥ꦳ꦫꦶꦱꦶꦱꦶꦁꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦲꦺꦴꦫꦔꦤ꧀ꦢꦼꦭ꧀ꦤꦺꦏ꧀ꦮꦺꦴꦁꦲꦶꦏꦶꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉ꦤꦺꦏ꧀ꦮꦺꦴꦁꦔꦺꦔꦼꦂꦠꦶꦒꦸꦱ꧀ꦠꦶꦄꦭ꧀ꦭꦃꦩꦺꦴꦱꦺꦴꦏ꧀ꦤꦼꦫꦏ꧀ꦮꦺꦠ꧀ꦠꦺꦢꦶꦤꦱꦧꦠ꧀?”
꧋ꦤꦁꦔꦶꦁꦭꦶꦪꦤꦺꦔꦺꦴꦩꦺꦴꦁ:“ꦤꦺꦏ꧀ꦮꦺꦴꦁꦲꦭꦩꦺꦴꦱꦺꦴꦏ꧀ꦧꦶꦱꦤꦩ꧀ꦧꦤꦶꦮꦺꦴꦁꦭꦩꦸꦂ?”ꦥꦶꦤꦼꦩꦸꦤꦺꦮꦺꦴꦁꦮꦺꦴꦁꦱꦺꦗꦺꦱꦺꦗꦺ꧉
17꧋ꦮꦺꦴꦁꦔꦺꦠꦼꦫꦸꦱ꧀ꦢꦶꦠꦏꦺꦴꦤ꧀ꦤꦶꦩꦼꦤꦺꦃ:“ꦏꦺꦴꦮꦺꦱꦶꦁꦢꦶꦠꦩ꧀ꦧꦤꦶꦏꦫꦺꦴꦮꦺꦴꦁꦔꦺ꧈ꦭꦃꦏꦺꦴꦮꦺꦔꦫꦤ꧀ꦤꦶꦮꦺꦴꦁꦔꦺꦏꦸꦮꦶꦱꦥ?”
꧋“ꦢꦺꦏ꧀ꦤꦺꦏꦸꦮꦶꦤꦧꦶ꧈”ꦮꦺꦴꦁꦔꦺꦱꦼꦩꦲꦸꦂ꧉
18꧋ꦤꦁꦔꦶꦁꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦲꦺꦴꦫꦔꦤ꧀ꦢꦼꦭ꧀ꦤꦺꦏ꧀ꦮꦺꦴꦁꦔꦺꦏꦸꦮꦶꦩꦲꦸꦤꦺꦭꦩꦸꦂꦠꦼꦫꦸꦱ꧀ꦱꦲꦶꦏꦶꦧꦶꦱꦮꦼꦫꦸꦃ꧉ꦩꦸꦭꦤꦺꦠꦼꦫꦸꦱ꧀ꦚꦼꦭꦸꦏ꧀ꦮꦺꦴꦁꦠꦸꦮꦤꦺ꧉ 19ꦮꦺꦴꦁꦠꦸꦮꦤꦺꦢꦶꦠꦏꦺꦴꦤ꧀ꦤꦶ:“ꦲꦥꦲꦶꦏꦶꦲꦤꦏ꧀ꦩꦸꦱꦶꦁꦗꦫꦺꦤꦺꦭꦩꦸꦂꦏꦮꦶꦠ꧀ꦭꦲꦶꦂꦫꦺ꧉ꦭꦃꦱꦲꦶꦏꦶꦏꦺꦴꦏ꧀ꦧꦶꦱꦮꦼꦫꦸꦃ?”
20꧋ꦮꦺꦴꦁꦠꦸꦮꦤꦺꦱꦼꦩꦲꦸꦂ:“ꦪ꧈ꦲꦶꦏꦶꦲꦤꦏ꧀ꦏꦸꦱꦶꦁꦭꦩꦸꦂꦏꦮꦶꦠ꧀ꦭꦲꦶꦂꦫꦺ! 21ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦲꦺꦴꦫꦔꦼꦂꦠꦶꦏꦼꦥꦿꦶꦪꦺꦢꦺꦏ꧀ꦤꦺꦧꦶꦱꦤꦺꦮꦼꦫꦸꦃꦱꦲꦶꦏꦶꦭꦤ꧀ꦱꦥꦱꦶꦁꦤꦩ꧀ꦧꦤꦶ꧉ꦲꦩ꧀ꦧꦺꦴꦏ꧀ꦢꦺꦏ꧀ꦤꦺꦢꦶꦠꦏꦺꦴꦤ꧀ꦤꦶꦢꦺꦮꦺꦠ꧉ꦢꦺꦏ꧀ꦤꦺꦮꦶꦱ꧀ꦒꦼꦢꦺ꧈ꦩꦼꦱ꧀ꦠꦶꦪꦧꦶꦱꦔꦺꦴꦩꦺꦴꦁꦢꦺꦮꦺ!” 22ꦮꦺꦴꦁꦠꦸꦮꦤꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶ꧈ꦗꦭꦂꦫꦤ꧀ꦥꦢꦮꦼꦢꦶꦏꦫꦺꦴꦥꦫꦥ꦳ꦫꦶꦱꦶ꧉ꦲꦮꦶꦠ꧀ꦥꦫꦥ꦳ꦫꦶꦱꦶꦮꦶꦱ꧀ꦥꦢꦱꦼꦠꦸꦗꦸꦤꦺꦏ꧀ꦱꦥꦮꦲꦺꦱꦶꦁꦔꦏꦺꦴꦤ꧀ꦤꦶꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦏꦿꦶꦱ꧀ꦡꦸꦱ꧀ ꦮꦺꦴꦁꦏꦸꦮꦶꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀꧈ 23ꦏꦸꦮꦶꦗꦭꦂꦫꦤ꧀ꦤꦺꦮꦺꦴꦁꦠꦸꦮꦤꦺꦔꦺꦴꦩꦺꦴꦁꦩꦫꦁꦮꦺꦴꦁꦮꦺꦴꦁꦏꦺꦴꦁꦏꦺꦴꦤ꧀ꦠꦏꦺꦴꦤ꧀ꦢꦺꦮꦺ꧉
24꧋ꦮꦺꦴꦁꦔꦺꦠꦼꦫꦸꦱ꧀ꦢꦶꦕꦼꦭꦸꦏ꧀ꦱꦼꦥꦶꦱ꧀ꦱꦤ꧀ꦩꦼꦤꦺꦃꦭꦤ꧀ꦢꦶꦲꦺꦴꦩꦺꦴꦁꦔꦶ:“ꦗꦚ꧀ꦗꦶꦪꦤꦁꦔꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦤꦺꦏ꧀ꦏꦺꦴꦮꦺꦲꦺꦴꦫꦒꦺꦴꦫꦺꦴꦃ꧉ꦲꦮꦏ꧀ꦏꦺꦢꦺꦮꦺꦮꦼꦫꦸꦃꦤꦺꦏ꧀ꦪꦺꦯꦸꦱ꧀ꦏꦸꦮꦶꦮꦺꦴꦁꦱꦭꦃ꧉”
25꧋ꦮꦺꦴꦁꦔꦺꦱꦼꦩꦲꦸꦂ:“ꦲꦼꦩ꧀ꦧꦸꦃꦮꦺꦴꦁꦔꦺꦮꦺꦴꦁꦱꦭꦃꦲꦼꦩ꧀ꦧꦸꦃꦲꦺꦴꦫ꧈ꦏꦸꦮꦶꦲꦏꦸꦲꦺꦴꦫꦔꦼꦂꦠꦶ꧉ꦲꦏꦸꦤꦩꦸꦁꦔꦼꦂꦠꦶꦤꦺꦏ꧀ꦲꦏꦸꦩꦲꦸꦤꦺꦭꦩꦸꦂ꧈ꦤꦁꦔꦶꦁꦱꦲꦶꦏꦶꦲꦏꦸꦧꦶꦱꦮꦼꦫꦸꦃ!”
26꧋“ꦭꦃꦏꦺꦴꦮꦺꦢꦶꦲꦥꦏ꧀ꦏꦏꦺꦏꦺꦴꦏ꧀ꦱꦲꦶꦏꦶꦧꦶꦱꦮꦼꦫꦸꦃ?”
27꧋“ꦲꦏꦸꦩꦲꦸꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠ꧈ꦤꦁꦔꦶꦁꦏꦺꦴꦮꦺꦲꦺꦴꦫꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺ꧉ꦲꦥꦏꦺꦴꦮꦺꦲꦩ꧀ꦧꦫꦁꦏꦼꦥꦺꦔꦶꦤ꧀ꦢꦢꦶꦩꦸꦫꦶꦢ꧀ꦢꦺꦢꦺꦏ꧀ꦤꦺ!”
28꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦤꦼꦱꦸꦔꦺꦴꦩꦺꦴꦁ:“ꦏꦺꦴꦮꦺꦱꦶꦁꦢꦢꦶꦩꦸꦫꦶꦢ꧀ꦢꦺꦢꦺꦏ꧀ꦤꦺ꧉ꦲꦮꦏ꧀ꦏꦺꦢꦺꦮꦺꦲꦶꦏꦶꦩꦸꦫꦶꦢ꧀ꦢꦺꦤꦧꦶꦩꦺꦴꦱꦼꦱ꧀꧈ 29ꦲꦮꦏ꧀ꦏꦺꦢꦺꦮꦺꦔꦼꦂꦠꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦤꦧꦶꦩꦺꦴꦱꦼꦱ꧀ ꦤꦁꦔꦶꦁꦪꦺꦯꦸꦱ꧀ꦏꦸꦮꦶꦲꦼꦩ꧀ꦧꦸꦃꦱꦁꦏꦔꦼꦤ꧀ꦢꦶ꧈ꦲꦮꦏ꧀ꦏꦺꦢꦺꦮꦺꦲꦺꦴꦫꦔꦼꦂꦠꦶ꧉”
30꧋ꦮꦺꦴꦁꦔꦺꦠꦼꦫꦸꦱ꧀ꦱꦼꦩꦲꦸꦂ:“ꦱꦲꦶꦏꦶꦲꦏꦸꦗꦤ꧀ꦔ꧀ꦒꦸꦩꦸꦤ꧀ꦠꦼꦤꦤ꧀꧈ꦭꦃꦮꦺꦴꦁꦔꦺꦱꦶꦁ ꦤꦩ꧀ꦧꦤꦶꦩꦿꦶꦥꦠ꧀ꦏꦸꦩꦫꦏ꧀ꦏꦏꦺꦲꦏꦸꦧꦶꦱꦮꦼꦫꦸꦃꦏꦺꦴꦏ꧀ꦏꦺꦴꦮꦺꦢꦸꦫꦸꦁꦔꦼꦂꦠꦶꦢꦺꦏ꧀ꦤꦺꦏꦸꦮꦶꦱꦥ? 31ꦲꦮꦏ꧀ꦏꦺꦢꦺꦮꦺꦔꦼꦂꦠꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦲꦺꦴꦫꦤꦩ꧀ꦥꦥꦤ꧀ꦢꦺꦴꦔꦤꦺꦮꦺꦴꦁꦱꦭꦃ꧉ꦒꦸꦱ꧀ꦠꦶꦄꦭ꧀ꦭꦃꦤꦩꦸꦁꦔꦿꦸꦔꦺꦴꦏ꧀ꦏꦏꦺꦩꦫꦁꦮꦺꦴꦁꦱꦶꦁꦔꦗꦺꦤ꧀ꦤꦶꦭꦤ꧀ꦩꦤꦸꦠ꧀ꦩꦫꦁꦢꦺꦏ꧀ꦤꦺ꧉ 32ꦏꦮꦶꦠ꧀ꦩ꧀ꦧꦶꦪꦺꦤ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦠꦲꦸꦏꦿꦸꦔꦸꦤꦺꦏ꧀ꦲꦺꦤꦺꦁꦮꦺꦴꦁꦠꦲꦸꦤꦩ꧀ꦧꦤꦶꦩꦿꦶꦥꦠ꧀ꦠꦺꦮꦺꦴꦁꦭꦩꦸꦂꦏꦮꦶꦠ꧀ꦭꦲꦶꦂꦫꦺ꧈ꦠꦼꦫꦸꦱ꧀ꦧꦶꦱꦮꦼꦫꦸꦃ꧉ 33ꦤꦺꦏ꧀ꦮꦺꦴꦁꦲꦶꦏꦶꦢꦸꦢꦸꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦢꦺꦏ꧀ꦤꦺꦩꦼꦱ꧀ꦠꦶꦪꦲꦺꦴꦫꦧꦶꦱꦤꦩ꧀ꦧꦤꦶꦲꦏꦸ?”
34꧋ꦥꦫꦥ꦳ꦫꦶꦱꦶꦠꦼꦫꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦏꦸꦮꦶꦲꦥ?ꦏꦮꦶꦠ꧀ꦭꦲꦶꦂꦩꦸꦠꦼꦏꦤ꧀ꦱꦲꦶꦏꦶꦏꦺꦴꦮꦺꦏꦼꦧꦼꦏ꧀ꦱꦭꦃ꧉ꦭꦃꦏꦺꦴꦮꦺꦏꦺꦴꦏ꧀ꦲꦉꦥ꧀ꦩꦸꦭꦁꦔꦶꦲꦮꦏ꧀ꦏꦺꦢꦺꦮꦺ!”ꦮꦺꦴꦁꦔꦺꦠꦼꦫꦸꦱ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀꧈
35꧋ꦒꦸꦱ꧀ꦠꦶꦪꦺꦯꦸꦱ꧀ꦏꦿꦸꦔꦸꦤꦺꦏ꧀ꦮꦺꦴꦁꦔꦺꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀꧈ꦏꦢꦸꦁꦏꦼꦥꦼꦠꦸꦏ꧀ꦏꦫꦺꦴꦮꦺꦴꦁꦔꦺꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦥꦏꦺꦴꦮꦺꦥꦽꦕꦪꦩꦫꦁꦲꦤꦏ꧀ꦏꦺꦩꦤꦸꦁꦱ?”
36꧋ꦮꦺꦴꦁꦔꦺꦱꦼꦩꦲꦸꦂ:“ꦭꦃꦲꦤꦏ꧀ꦏꦺꦩꦤꦸꦁꦱꦏꦸꦮꦶꦱꦥꦠ?ꦲꦏꦸꦏꦼꦥꦺꦔꦶꦤ꧀ꦔꦼꦂꦠꦶ꧈ꦢꦢꦶꦤꦺꦲꦏꦸꦧꦶꦱꦥꦽꦕꦪꦩꦫꦁꦢꦺꦏ꧀ꦤꦺ꧉”
37꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦮꦶꦱ꧀ꦮꦼꦫꦸꦃꦮꦺꦴꦁꦔꦺ꧈ꦪꦱꦶꦁꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦏꦺꦴꦮꦺꦲꦶꦏꦶ!”
38꧋“ꦲꦏꦸꦥꦽꦕꦪ꧈ꦒꦸꦱ꧀ꦠꦶ!”ꦮꦺꦴꦁꦔꦺꦠꦼꦫꦸꦱ꧀ꦤꦶꦧꦚꦼꦩ꧀ꦧꦃꦒꦸꦱ꧀ꦠꦶꦪꦺꦯꦸꦱ꧀꧈
39꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦠꦼꦏꦏꦸꦤꦁꦗꦒꦠ꧀ꦏꦺꦤꦺꦔꦼꦠꦺꦴꦏ꧀ꦏꦏꦺꦱꦥꦱꦶꦁꦒꦼꦊꦩ꧀ꦩꦤꦸꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦱꦥꦱꦶꦁꦲꦺꦴꦫ!ꦢꦢꦶꦤꦺ꧈ꦱꦶꦁꦭꦩꦸꦂꦧꦶꦱꦮꦼꦫꦸꦃꦭꦤ꧀ꦱꦶꦁꦮꦼꦫꦸꦃꦢꦢꦶꦭꦩꦸꦂ꧉”
40꧋ꦲꦺꦤꦺꦁꦮꦺꦴꦁꦥ꦳ꦫꦶꦱꦶꦱꦶꦁꦏꦿꦸꦔꦸꦏꦸꦮꦶꦠꦼꦫꦸꦱ꧀ꦥꦢꦔꦺꦴꦩꦺꦴꦁ:“ꦲꦥꦲꦮꦏ꧀ꦏꦺꦢꦺꦮꦺꦲꦶꦏꦶꦭꦩꦸꦂ?”
41꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦱꦼꦩꦸꦁꦒꦺꦴꦤ꧀ꦤꦺꦏꦺꦴꦮꦺꦭꦩꦸꦂ꧈ꦏꦺꦴꦮꦺꦲꦺꦴꦫꦤ꧀ꦢꦸꦮꦺꦱꦭꦃ꧉ꦭꦃꦱꦲꦶꦏꦶꦏꦺꦴꦮꦺꦢꦺꦮꦺꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺꦮꦼꦫꦸꦃ꧈ꦩꦸꦭꦤꦺꦏꦺꦴꦮꦺꦱꦭꦃꦱꦏ꧀ꦠꦼꦫꦸꦱ꧀ꦱꦺ!”
꧇꧑꧐꧇ 1꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁꦩꦲꦸꦔꦁꦒꦺꦴꦒꦩ꧀ꦧꦂꦔꦺꦤꦺ:“ꦲꦶꦏꦶꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀꧈ꦤꦺꦏ꧀ꦲꦺꦤꦺꦁꦮꦺꦴꦁꦩ꧀ꦊꦧꦸꦏꦤ꧀ꦢꦁꦮꦼꦢꦸꦱ꧀ ꦤꦁꦔꦶꦁꦲꦺꦴꦫꦭꦶꦮꦠ꧀ꦭꦮꦁꦔꦺ꧈ꦮꦺꦴꦁꦏꦸꦮꦶꦩꦼꦱ꧀ꦠꦶꦩꦭꦶꦁꦲꦥꦠꦸꦏꦁꦔꦿꦩ꧀ꦥꦺꦴꦏ꧀꧈ 2-3ꦥꦔꦺꦴꦤ꧀ꦤꦺꦩ꧀ꦊꦧꦸꦏꦤ꧀ꦢꦁꦭꦶꦮꦠ꧀ꦭꦮꦁꦔꦺꦭꦤ꧀ꦱꦶꦁꦗꦒꦏꦤ꧀ꦢꦁꦩꦼꦱ꧀ꦠꦶꦧꦏꦭ꧀ꦩ꧀ꦧꦸꦏꦏ꧀ꦏꦏꦺꦭꦮꦁꦔꦺ꧉ꦮꦼꦢꦸꦱ꧀ꦱꦺꦏꦧꦺꦃꦤꦶꦠꦺꦤ꧀ꦤꦶꦱ꧀ꦮꦫꦤꦺꦥꦔꦺꦴꦤ꧀ꦤꦺ꧉ꦮꦺꦴꦁꦔꦺꦚꦼꦭꦸꦏ꧀ꦏꦶꦗꦼꦤꦼꦁꦔꦺꦮꦼꦢꦸꦱ꧀ꦱꦺꦱꦶꦗꦶꦱꦶꦗꦶꦠꦼꦫꦸꦱ꧀ꦢꦶꦒꦶꦫꦶꦁꦩꦼꦠꦸꦲꦉꦥ꧀ꦢꦶꦲꦼꦔꦺꦴꦤ꧀꧈ 4ꦤꦺꦏ꧀ꦮꦼꦢꦸꦱ꧀ꦱꦺꦏꦧꦺꦃꦮꦶꦱ꧀ꦢꦶꦲꦼꦠꦺꦴꦏ꧀ꦏꦏꦺ꧈ꦥꦔꦺꦴꦤ꧀ꦤꦺꦠꦼꦫꦸꦱ꧀ꦩ꧀ꦭꦏꦸꦤꦁꦔꦉꦥ꧀ꦢꦺꦮꦺ꧉ꦮꦼꦢꦸꦱ꧀ꦱꦺꦠꦼꦫꦸꦱ꧀ꦔꦼꦠꦸꦠ꧀ꦠꦏꦺꦢꦺꦏ꧀ꦤꦺ꧈ꦲꦮꦶꦠ꧀ꦏꦧꦺꦃꦤꦶꦠꦺꦤ꧀ꦤꦶꦱ꧀ꦮꦫꦤꦺ꧉ 5ꦮꦼꦢꦸꦱ꧀ꦮꦼꦢꦸꦱ꧀ꦲꦶꦏꦶꦲꦺꦴꦫꦧꦏꦭ꧀ꦔꦼꦠꦸꦠ꧀ꦠꦏꦺꦮꦺꦴꦁꦭꦶꦪꦤꦺ꧉ꦤꦺꦏ꧀ꦲꦺꦤꦺꦁꦮꦺꦴꦁꦭꦶꦪꦤꦺꦠꦼꦏ꧈ꦮꦼꦢꦸꦱ꧀ꦱꦺꦩꦭꦃꦥꦢꦩ꧀ꦧ꧀ꦭꦪꦸꦭꦸꦔ꧈ꦲꦮꦶꦠ꧀ꦔꦼꦂꦠꦶꦤꦺꦏ꧀ꦏꦸꦮꦶꦢꦸꦢꦸꦥꦔꦺꦴꦤ꧀ꦤꦺ꧉”
6꧋ꦒꦸꦱ꧀ꦠꦶꦪꦺꦯꦸꦱ꧀ꦔꦁꦒꦺꦴꦏ꧀ꦏꦏꦺꦒꦩ꧀ꦧꦂꦲꦶꦏꦶ꧈ꦤꦁꦔꦶꦁꦮꦺꦴꦁꦮꦺꦴꦁꦲꦺꦴꦫꦢꦸꦤꦸꦁ꧉
7-9꧋ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦔꦺꦤꦺ:“ꦲꦺꦴꦩꦺꦴꦁꦏꦸꦲꦶꦏꦶꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀ꦠꦼꦤꦤ꧀!ꦪꦲꦏꦸꦲꦶꦏꦶꦭꦮꦁꦔꦺꦏꦤ꧀ꦢꦁꦮꦼꦢꦸꦱ꧀꧈ꦏꦧꦺꦃꦱꦶꦁꦠꦼꦏꦤꦺꦱꦏ꧀ꦢꦸꦫꦸꦁꦔꦺꦲꦏꦸ꧈ꦏꦸꦮꦶꦩꦭꦶꦁꦭꦤ꧀ꦠꦸꦏꦁꦔꦿꦩ꧀ꦥꦺꦴꦏ꧀꧈ꦩꦸꦭꦤꦺꦮꦼꦢꦸꦱ꧀ꦮꦼꦢꦸꦱ꧀ꦲꦺꦴꦫꦔꦿꦸꦔꦺꦴꦏ꧀ꦏꦏꦺꦱ꧀ꦮꦫꦤꦺ꧉ 9ꦲꦏꦸꦲꦶꦏꦶꦭꦮꦁꦔꦺ꧉ꦮꦺꦴꦁꦱꦶꦁꦩ꧀ꦊꦧꦸꦭꦶꦮꦠ꧀ꦲꦏꦸꦧꦏꦭ꧀ꦱ꧀ꦭꦩꦼꦠ꧀꧈ꦮꦺꦴꦁꦏꦸꦮꦶꦩ꧀ꦊꦧꦸꦩꦼꦠꦸꦧꦏꦭ꧀ꦤꦼꦩꦸꦥꦔꦤ꧀꧈ 10ꦏꦺꦴꦮꦺꦥꦢꦔꦼꦂꦠꦶ꧈ꦩꦭꦶꦁꦏꦸꦮꦶꦠꦼꦏꦤꦺꦤꦩꦸꦁꦲꦉꦥ꧀ꦚꦺꦴꦭꦺꦴꦁ꧈ꦩꦠꦺꦤ꧀ꦤꦶꦭꦤ꧀ꦔꦿꦸꦱꦏ꧀꧈ꦤꦁꦔꦶꦁꦲꦏꦸꦠꦼꦏꦔꦼꦏꦺꦏ꧀ꦏꦶꦲꦸꦫꦶꦥ꧀ꦏꦭꦸꦧꦺꦂꦫꦤ꧀꧈
11꧋“ꦲꦏꦸꦲꦶꦏꦶꦥꦔꦺꦴꦤ꧀ꦱꦶꦁꦱꦼꦗꦠꦶ꧉ꦥꦔꦺꦴꦤ꧀ꦱꦶꦁꦱꦼꦗꦠꦶꦱꦒꦸꦃꦩꦠꦶꦔ꧀ꦭꦧꦸꦃꦲꦶꦮꦼꦢꦸꦱ꧀ꦮꦼꦢꦸꦱ꧀ꦱꦺ꧉ 12-13ꦮꦺꦴꦁꦱꦶꦁꦤꦩꦸꦁꦏꦼꦂꦗꦲꦔꦺꦴꦤ꧀ꦏꦸꦮꦶꦢꦸꦢꦸꦥꦔꦺꦴꦤ꧀ꦤꦺꦭꦤ꧀ꦢꦸꦢꦸꦱꦶꦁꦤ꧀ꦢꦸꦮꦺꦮꦼꦢꦸꦱ꧀ꦱꦺ꧉ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦩꦭꦃꦩ꧀ꦧ꧀ꦭꦪꦸꦭꦸꦔꦤꦺꦏ꧀ꦲꦺꦤꦺꦁꦏꦺꦮꦤ꧀ꦒꦭꦏ꧀ꦠꦼꦏꦲꦉꦥ꧀ꦩꦁꦔꦤ꧀ꦮꦼꦢꦸꦱ꧀ꦱꦺ꧉ꦮꦼꦢꦸꦱ꧀ꦮꦼꦢꦸꦱ꧀ꦱꦺꦩꦼꦱ꧀ꦠꦶꦢꦶꦠꦶꦁꦒꦭ꧀ ꦲꦮꦶꦠ꧀ꦢꦺꦏ꧀ꦤꦺꦤꦩꦸꦁꦏꦼꦂꦗ꧉ꦮꦼꦢꦸꦱ꧀ꦮꦼꦢꦸꦱ꧀ꦱꦺꦢꦶꦠꦸꦧꦿꦸꦏ꧀ꦏꦫꦺꦴꦏꦺꦮꦤꦺꦒꦭꦏ꧀ꦠꦼꦫꦸꦱ꧀ꦥꦢꦧꦸꦪꦂ꧉ 14-15ꦲꦏꦸꦲꦶꦏꦶꦥꦔꦺꦴꦤ꧀ꦱꦶꦁꦱꦼꦗꦠꦶ꧉ꦏꦪꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦩꦔꦼꦂꦠꦺꦤ꧀ꦤꦶꦲꦏꦸꦭꦤ꧀ꦲꦏꦸꦩꦔꦼꦂꦠꦺꦤ꧀ꦤꦶꦢꦺꦏ꧀ꦤꦺ꧈ꦏꦪꦔꦺꦴꦤꦺꦴꦲꦸꦒꦲꦏꦸꦔꦼꦂꦠꦶꦮꦼꦢꦸꦱ꧀ꦏꦸꦱꦶꦗꦶꦱꦶꦗꦶꦤꦺꦭꦤ꧀ꦮꦼꦢꦸꦱ꧀ꦏꦸꦱꦶꦗꦶꦱꦶꦗꦶꦤꦺꦪꦔꦼꦂꦠꦶꦲꦏꦸ꧉ꦲꦏꦸꦲꦺꦴꦫꦲꦺꦩꦤ꧀ꦲꦸꦫꦶꦥ꧀ꦏꦸꦏꦁꦒꦺꦴꦔ꧀ꦭꦧꦸꦃꦲꦶꦮꦼꦢꦸꦱ꧀ꦮꦼꦢꦸꦱ꧀ꦏꦸ꧉ 16ꦲꦏꦸꦲꦸꦒꦤ꧀ꦢꦸꦮꦺꦮꦼꦢꦸꦱ꧀ꦮꦼꦢꦸꦱ꧀ꦭꦶꦪꦤꦺꦱꦶꦁꦲꦺꦴꦫꦤꦁꦏꦤ꧀ꦢꦁꦏꦺꦤꦺ꧉ꦮꦼꦢꦸꦱ꧀ꦮꦼꦢꦸꦱ꧀ ꦏꦸꦮꦶꦲꦸꦒꦏꦸꦢꦸꦠꦏ꧀ꦲꦼꦔꦺꦴꦤ꧀ꦭꦤ꧀ꦧꦏꦭ꧀ꦥꦢꦔꦿꦸꦔꦺꦴꦏ꧀ꦏꦏꦺꦱ꧀ꦮꦫꦏꦸ꧉ꦧꦏꦭ꧀ꦠꦏ꧀ꦒꦶꦫꦶꦁꦢꦢꦶꦱꦶꦗꦶꦏꦫꦺꦴꦮꦼꦢꦸꦱ꧀ꦮꦼꦢꦸꦱ꧀ꦱꦶꦁꦮꦶꦱ꧀ꦤꦁꦏꦺꦤꦺ꧉ꦢꦢꦶꦤꦺꦮꦼꦢꦸꦱ꧀ꦮꦼꦢꦸꦱ꧀ꦏꦸꦏꦧꦺꦃꦧꦏꦭ꧀ꦠꦸꦁꦒꦭ꧀ꦏꦤ꧀ꦢꦁꦭꦤ꧀ꦠꦸꦁꦒꦭ꧀ꦥꦔꦺꦴꦤ꧀꧈
17꧋“ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦤꦿꦺꦱ꧀ꦤꦤ꧀ꦤꦶꦲꦏꦸ꧈ꦲꦮꦶꦠ꧀ꦲꦏꦸꦩꦱꦿꦃꦲꦏꦺꦲꦸꦫꦶꦥ꧀ꦏꦸ꧈ꦱꦸꦥꦪꦲꦏꦸꦧꦶꦱꦤꦩ꧀ꦥꦲꦸꦫꦶꦥ꧀ꦏꦸꦩꦼꦤꦺꦃ꧉ 18ꦲꦏꦸꦩꦱꦿꦃꦲꦏꦺꦲꦸꦫꦶꦥ꧀ꦏꦸꦱꦁꦏꦏꦉꦥ꧀ꦏꦸꦢꦺꦮꦺ꧉ꦲꦺꦴꦫꦲꦺꦤꦺꦁꦱꦶꦁꦧꦶꦱꦔꦽꦧꦸꦠ꧀ꦱꦁꦏꦲꦏꦸ꧉ꦩꦠꦶꦪꦏꦉꦥ꧀ꦏꦸꦢꦺꦮꦺꦭꦤ꧀ꦲꦸꦫꦶꦥ꧀ꦪꦏꦉꦥ꧀ꦏꦸꦢꦺꦮꦺ꧉ꦏꦸꦮꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉”
19꧋ꦠꦼꦩ꧀ꦧꦸꦁꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦩꦫꦏ꧀ꦏꦏꦺꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦶꦁꦤꦁꦏꦺꦴꦤꦺꦴꦥꦢꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀꧈ 20ꦲꦺꦴꦏꦺꦃꦱꦶꦁꦔꦺꦴꦩꦺꦴꦁ:“ꦪꦺꦯꦸꦱ꧀ꦏꦸꦮꦶꦮꦺꦴꦁꦲꦺꦢꦤ꧀ ꦮꦺꦴꦁꦏꦼꦊꦧꦺꦴꦤ꧀ꦱꦺꦠꦤ꧀꧈ꦲꦗꦢꦶꦫꦸꦔꦺꦴꦏ꧀ꦏꦏꦺ꧉”
21꧋ꦱꦭꦺꦴꦏ꧀ꦏꦺꦔꦺꦴꦩꦺꦴꦁ:“ꦤꦺꦏ꧀ꦮꦺꦴꦁꦏꦼꦊꦧꦺꦴꦤ꧀ꦱꦺꦠꦤ꧀ꦩꦺꦴꦱꦺꦴꦏ꧀ꦧꦶꦱꦩꦸꦭꦁꦔꦶꦏꦪꦔꦺꦴꦤꦺꦴ꧉ꦩꦺꦴꦱꦺꦴꦏ꧀ꦱꦺꦠꦤ꧀ꦧꦶꦱꦤꦩ꧀ꦧꦤꦶꦮꦺꦴꦁꦭꦩꦸꦂ?ꦭꦲꦸꦠ꧀ꦲꦺꦴꦫꦠ?”
22꧋ꦱꦲꦶꦏꦶꦤꦁꦏꦸꦠꦪꦺꦫꦸꦱꦭꦺꦩ꧀ꦲꦺꦤꦺꦁꦫꦶꦪꦪꦒꦼꦢꦺ꧉ꦱꦧꦼꦤ꧀ꦠꦲꦸꦤ꧀ꦲꦺꦤꦺꦁꦫꦶꦪꦪꦲꦶꦏꦶꦏꦁꦒꦺꦴꦔꦺꦭꦶꦁꦔꦏꦺꦧꦸꦏꦏꦤ꧀ꦤꦺꦒꦿꦺꦗꦒꦼꦢꦺ꧉ꦫꦶꦪꦪꦲꦶꦏꦶꦠꦶꦧꦮꦪꦃꦲꦺꦲꦢꦼꦩ꧀꧈ 23ꦒꦸꦱ꧀ꦠꦶꦪꦺꦯꦸꦱ꧀ꦩ꧀ꦭꦏꦸꦩ꧀ꦭꦏꦸꦤꦁꦒꦿꦺꦗꦒꦼꦢꦺꦏꦺꦴꦤꦺꦴꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦗꦼꦤꦼꦁꦔꦺꦒꦢꦿꦶꦤꦺꦯꦺꦴꦭꦺꦩꦤ꧀꧈ 24ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦠꦼꦫꦸꦱ꧀ꦥꦢꦔꦸꦧꦼꦁꦔꦶꦢꦺꦏ꧀ꦤꦺꦠꦏꦺꦴꦤ꧀:“ꦲꦩ꧀ꦧꦺꦴꦏ꧀ꦲꦮꦏ꧀ꦏꦺꦢꦺꦮꦺꦤ꧀ꦢꦁꦢꦶꦲꦺꦴꦩꦺꦴꦁꦔꦶꦠ!ꦤꦺꦏ꧀ꦏꦺꦴꦮꦺꦏꦸꦮꦶꦥꦚ꧀ꦕꦺꦤ꧀ꦏꦿꦶꦱ꧀ꦡꦸꦱ꧀ꦠꦼꦤꦤ꧀ ꦲꦩ꧀ꦧꦺꦴꦏ꧀ꦔꦺꦴꦩꦺꦴꦁꦧ꧀ꦭꦏꦠ?”
25꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦲꦏꦸꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠ!ꦤꦁꦔꦶꦁꦏꦺꦴꦮꦺꦲꦺꦴꦫꦒꦼꦊꦩ꧀ꦥꦽꦕꦪ꧉ꦲꦏꦸꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺꦏꦁꦒꦺꦴꦠꦤ꧀ꦢꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦔꦺꦴꦁꦏꦺꦴꦤ꧀ꦲꦏꦸꦭꦤ꧀ꦱꦶꦁꦔꦼꦏꦺꦏ꧀ꦏꦶꦏ꧀ꦮꦱꦲꦏꦸ꧉ 26ꦤꦁꦔꦶꦁꦏꦺꦴꦮꦺꦩꦼꦏ꧀ꦱꦲꦺꦴꦫꦥꦽꦕꦪ꧉ꦏꦺꦴꦮꦺꦔꦼꦂꦠꦶꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦲꦺꦴꦫꦥꦢꦥꦽꦕꦪ?ꦗꦭꦂꦫꦤ꧀ꦏꦺꦴꦮꦺꦏꦸꦮꦶꦢꦸꦢꦸꦮꦼꦢꦸꦱ꧀ꦏꦸ꧉ 27ꦮꦼꦢꦸꦱ꧀ꦏꦸꦤꦶꦠꦺꦤ꧀ꦤꦶꦱ꧀ꦮꦫꦏꦸꦭꦤ꧀ꦩꦺꦭꦸꦲꦏꦸ꧉ꦲꦏꦸꦔꦼꦂꦠꦶꦮꦼꦢꦸꦱ꧀ꦏꦸꦱꦶꦗꦶꦱꦶꦗꦶꦤꦺ꧉ 28ꦏꦧꦺꦃꦠꦏ꧀ꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁꦭꦤ꧀ꦲꦺꦴꦫꦧꦏꦭ꧀ꦠꦶꦧꦲꦶꦁꦏꦫꦸꦱꦏ꧀ꦏꦤ꧀꧈ꦲꦺꦴꦫꦲꦺꦤꦺꦁꦱꦶꦁꦧꦶꦱꦔꦽꦧꦸꦠ꧀ꦮꦼꦢꦸꦱ꧀ꦏꦸꦱꦁꦏꦠꦔꦤ꧀ꦏꦸ꧉ 29ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦔꦼꦏꦺꦏ꧀ꦏꦶꦮꦼꦢꦸꦱ꧀ꦮꦼꦢꦸꦱ꧀ꦏꦸꦮꦶꦩꦫꦁꦲꦏꦸꦭꦤ꧀ꦏ꧀ꦮꦱꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦔꦸꦁꦏꦸꦭ꧀ꦭꦶꦏ꧀ꦮꦱꦱꦏ꧀ꦏꦧꦺꦃꦲꦺ꧉ꦲꦺꦴꦫꦲꦺꦤꦺꦁꦱꦶꦁꦧꦶꦱꦔꦽꦧꦸꦠ꧀ꦮꦼꦢꦸꦱ꧀ꦮꦼꦢꦸꦱ꧀ꦏꦸꦱꦁꦏꦏ꧀ꦮꦱꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 30ꦲꦏꦸꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦠꦸꦁꦒꦭ꧀ꦭꦺ꧉”
31꧋ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦠꦼꦫꦸꦱ꧀ꦚ꧀ꦗꦶꦏꦸꦏ꧀ꦏꦶꦮꦠꦸꦩꦼꦤꦺꦃꦲꦉꦥ꧀ꦢꦶꦲꦼꦁꦒꦺꦴꦩ꧀ꦧꦤ꧀ꦢꦼꦩ꧀ꦩꦶꦒꦸꦱ꧀ꦠꦶꦪꦺꦯꦸꦱ꧀꧈ 32ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦭꦲꦸꦠ꧀ꦮꦶꦱ꧀ꦥꦢꦮꦼꦫꦸꦃꦢꦺꦮꦺꦠ?ꦮꦶꦱ꧀ꦥꦶꦁꦥꦶꦫꦲꦏꦸꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦧꦼꦕꦶꦏ꧀?ꦏꦸꦮꦶꦩꦲꦸꦏꦧꦺꦃꦱꦁꦏꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦭꦃꦱꦶꦁꦲꦼꦤ꧀ꦢꦶꦱꦶꦁꦩꦫꦏ꧀ꦏꦏꦺꦏꦺꦴꦮꦺꦲꦉꦥ꧀ꦩ꧀ꦧꦤ꧀ꦢꦼꦩ꧀ꦩꦶꦮꦠꦸꦲꦏꦸ?”
33꧋ꦮꦺꦴꦁꦮꦺꦴꦁꦩꦲꦸꦠꦼꦫꦸꦱ꧀ꦱꦼꦩꦲꦸꦂ:“ꦢꦸꦢꦸꦏꦸꦮꦶꦱꦶꦁꦩꦫꦏ꧀ꦏꦏꦺꦲꦮꦏ꧀ꦏꦺꦢꦺꦮꦺꦲꦉꦥ꧀ꦩ꧀ꦧꦤ꧀ꦢꦼꦩ꧀ꦩꦶꦏꦺꦴꦮꦺ!ꦏꦺꦴꦮꦺꦏꦸꦮꦶꦤꦩꦸꦁꦩꦤꦸꦁꦱꦠ?ꦭꦃꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦠꦸꦁꦒꦭ꧀ꦭꦺ꧉ꦏꦺꦴꦮꦺꦏꦸꦮꦶꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃ!”
34꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦁꦏꦶꦠꦧ꧀ꦩꦸꦢꦺꦮꦺꦒꦸꦱ꧀ꦠꦶꦄꦭ꧀ꦭꦃꦭꦲꦸꦠ꧀ꦠꦲꦸꦔꦺꦴꦩꦺꦴꦁꦔꦺꦤꦺꦠꦩꦫꦁꦮꦺꦴꦁꦮꦺꦴꦁꦱꦶꦁꦢꦶꦏꦺꦴꦁꦏꦺꦴꦤ꧀ꦤꦸꦤ꧀ꦠꦸꦤ꧀ꦧꦁꦱꦤꦺ:'ꦏꦺꦴꦮꦺꦏꦸꦮꦶꦥꦢꦠꦏ꧀ꦲꦫꦤ꧀ꦤꦶꦄꦭ꧀ꦭꦃ!’ꦭꦤ꧀ꦏꦺꦴꦮꦺꦔꦼꦂꦠꦶꦠꦤꦺꦏ꧀ꦱꦶꦁꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦏꦸꦮꦶꦚꦠ꧉ 35-36ꦭꦃꦤꦺꦏ꧀ꦮꦺꦴꦁꦮꦺꦴꦁꦱꦶꦁꦢꦶꦥꦶꦭꦶꦃꦢꦶꦏꦺꦴꦁꦏꦺꦴꦤ꧀ꦤꦸꦤ꧀ꦠꦸꦤ꧀ꦧꦁꦱꦤꦺꦢꦶꦲꦫꦤ꧀ꦤꦶꦄꦭ꧀ꦭꦃꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈ꦭꦃꦏꦺꦴꦮꦺꦏꦺꦴꦏ꧀ꦥꦢꦚꦭꦃꦚꦭꦃꦲꦏꦺꦲꦏꦸ꧉ꦏꦺꦴꦏ꧀ꦥꦢꦔꦺꦴꦩꦺꦴꦁꦤꦺꦏ꧀ꦲꦏꦸꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶꦄꦭ꧀ꦭꦃ?ꦭꦲꦸꦠ꧀ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦠꦱꦶꦁꦩꦶꦗꦶꦲꦏꦸꦭꦤ꧀ꦔꦺꦴꦁꦏꦺꦴꦤ꧀ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺ?ꦭꦃꦲꦏꦸꦏꦺꦴꦏ꧀ꦲꦺꦴꦫꦲꦺꦤ꧀ꦠꦸꦏ꧀ꦔꦺꦴꦩꦺꦴꦁꦤꦺꦏ꧀ꦲꦏꦸꦲꦶꦏꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ? 37ꦤꦺꦏ꧀ꦲꦏꦸꦲꦺꦴꦫꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦏꦺꦴꦮꦺꦲꦺꦴꦫꦲꦸꦱꦃꦥꦽꦕꦪꦩꦫꦁꦲꦏꦸ꧉ 38ꦏꦺꦴꦮꦺꦏꦧꦺꦃꦮꦶꦱ꧀ꦥꦢꦮꦼꦫꦸꦃꦢꦺꦮꦺ꧈ꦤꦁꦔꦶꦁꦩꦼꦏ꧀ꦱꦏꦺꦴꦮꦺꦲꦺꦴꦫꦥꦢꦥꦽꦕꦪꦩꦫꦁꦲꦏꦸ꧉ꦱꦼꦤꦗꦤ꧀ꦤꦏꦺꦴꦮꦺꦲꦺꦴꦫꦥꦽꦕꦪꦩꦫꦁꦲꦏꦸ꧈ꦲꦩ꧀ꦧꦺꦴꦏ꧀ꦥꦢꦥꦽꦕꦪꦲꦠꦤ꧀ꦢꦠꦤ꧀ꦢꦱꦶꦁꦠꦏ꧀ꦠꦶꦤ꧀ꦢꦏ꧀ꦏꦏꦺꦏꦸꦮꦶ꧉ꦢꦢꦶꦤꦺꦏꦺꦴꦮꦺꦧꦶꦱꦤꦶꦠꦺꦤ꧀ꦤꦶꦭꦤ꧀ꦢꦸꦤꦸꦁꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦫꦺꦴꦲꦏꦸꦱꦶꦗꦶꦭꦤ꧀ꦲꦏꦸꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦪꦱꦶꦗꦶ꧉”
39꧋ꦮꦺꦴꦁꦮꦺꦴꦁꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦠꦼꦫꦸꦱ꧀ꦲꦉꦥ꧀ꦚꦼꦏꦼꦭ꧀ꦢꦺꦏ꧀ꦤꦺ꧈ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔ꧀ꦭꦸꦔꦤ꧀ꦤꦶ꧉
40꧋ꦢꦺꦏ꧀ꦤꦺꦠꦼꦫꦸꦱ꧀ꦔꦧꦿꦃꦭꦫꦪꦺꦴꦂꦢꦤ꧀ꦠꦼꦏꦤ꧀ꦱꦏ꧀ꦮꦶꦗꦶꦤꦺꦥꦁꦒꦺꦴꦤ꧀ꦤꦤ꧀꧈ꦩ꧀ꦧꦶꦪꦺꦤ꧀ꦪꦺꦴꦲꦤꦼꦱ꧀ꦩꦺꦴꦭꦃꦲꦶꦲꦩ꧀ꦧꦥ꧀ꦠꦶꦱ꧀ꦤꦁꦥꦁꦒꦺꦴꦤ꧀ꦤꦤ꧀ꦏꦸꦮꦶ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤꦁꦏꦺꦴꦤꦺꦴꦫꦢꦱꦸꦮꦶ꧉ 41ꦲꦺꦴꦏꦺꦃꦮꦺꦴꦁꦥꦢꦠꦼꦏꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦥꦢꦔꦺꦴꦩꦺꦴꦁ:“ꦪꦺꦴꦲꦤꦼꦱ꧀ꦢꦺꦮꦺꦲꦺꦴꦫꦠꦲꦸꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦤꦏꦺ꧈ꦤꦁꦔꦶꦁꦱꦼꦩ꧀ꦧꦫꦁꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦢꦺꦏ꧀ꦤꦺꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦚꦠ꧉” 42ꦩꦸꦭꦤꦺꦮꦺꦴꦁꦲꦺꦴꦏꦺꦃꦠꦼꦫꦸꦱ꧀ꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈
꧇꧑꧑꧇ 1꧋ꦱꦲꦶꦏꦶꦤꦁꦢꦺꦱꦨꦺꦠꦤꦶꦲꦺꦤꦺꦁꦮꦺꦴꦁꦭꦫ꧉ꦮꦺꦴꦁꦲꦶꦏꦶꦗꦼꦤꦼꦁꦔꦺꦭꦱꦫꦸꦱ꧀ ꦏꦏꦁꦔꦺꦩꦂꦠꦭꦤ꧀ꦩꦫꦶꦪ꧉ 2ꦪꦩꦫꦶꦪꦲꦶꦏꦶꦱꦶꦁꦲꦺꦴꦫꦊꦠ꧀ꦱꦸꦮꦶꦩꦼꦤꦺꦃꦔꦸꦱꦥ꧀ꦥꦶꦱꦶꦏꦶꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦏꦫꦺꦴꦊꦔꦮꦔꦶꦱꦶꦁꦭꦫꦁꦠꦼꦫꦸꦱ꧀ꦢꦶꦭꦥ꧀ꦥꦶꦏꦫꦺꦴꦫꦩ꧀ꦧꦸꦠ꧀ꦠꦺ꧉ 3ꦩꦂꦠꦭꦤ꧀ꦩꦫꦶꦪꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦔꦺꦴꦩꦺꦴꦁꦔꦶꦒꦸꦱ꧀ꦠꦶꦪꦺꦯꦸꦱ꧀ꦤꦺꦏ꧀ꦭꦱꦫꦸꦱ꧀ꦭꦫ꧉ꦭꦱꦫꦸꦱ꧀ꦏꦸꦮꦶꦢꦶꦠꦿꦺꦱ꧀ꦤꦤ꧀ꦤꦶꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈
4꧋ꦏꦢꦸꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦸꦔꦸꦏꦧꦂꦫꦺ꧈ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦥꦼꦂꦚꦏꦶꦠ꧀ꦲꦶꦏꦶꦲꦺꦴꦫꦧꦏꦭ꧀ꦩꦫꦏ꧀ꦏꦏꦺꦭꦱꦫꦸꦱ꧀ꦤꦶꦁꦒꦭ꧀ ꦩꦭꦃꦧꦏꦭ꧀ꦏꦁꦒꦺꦴꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶꦲꦸꦒꦔ꧀ꦭꦸꦲꦸꦂꦫꦏꦺꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧉”
5-6꧋ꦧꦼꦤꦼꦂꦒꦸꦱ꧀ꦠꦶꦪꦺꦯꦸꦱ꧀ꦠꦿꦺꦱ꧀ꦤꦠꦼꦤꦤ꧀ꦩꦫꦁꦭꦱꦫꦸꦱ꧀ ꦩꦂꦠꦭꦤ꧀ꦩꦫꦶꦪ꧈ꦤꦁꦔꦶꦁꦢꦺꦏ꧀ꦤꦺꦩꦼꦏ꧀ꦱꦲꦺꦴꦫꦤ꧀ꦢꦁꦧꦸꦢꦭ꧀ ꦩꦭꦃꦲꦶꦗꦶꦏ꧀ꦔꦼꦤ꧀ꦠꦺꦤ꧀ꦤꦶꦫꦺꦴꦁꦢꦶꦤꦩꦼꦤꦺꦃ꧉ 7ꦱꦏ꧀ꦮꦶꦱ꧀ꦱꦺꦫꦺꦴꦁꦢꦶꦤꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦼꦗꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦔꦺꦴꦩꦺꦴꦁꦔꦺꦤꦺ:“ꦲ꦳ꦪꦸꦏ꧀ꦧꦸꦢꦭ꧀ꦤꦁꦪꦸꦢꦺꦪꦩꦼꦤꦺꦃ!”
8꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦱꦼꦩꦲꦸꦂ:“ꦒꦸꦫꦸ꧈ꦲꦥꦏꦺꦴꦮꦺꦮꦶꦱ꧀ꦭꦭꦶꦤꦺꦏ꧀ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦥꦢꦲꦉꦥ꧀ꦩꦠꦺꦤ꧀ꦤꦶꦏꦺꦴꦮꦺꦤꦁꦏꦤ꧉ꦭꦲꦸꦠ꧀ꦢꦸꦫꦸꦁꦱꦸꦮꦶꦮꦲꦺꦠ?ꦭꦃꦏꦺꦴꦮꦺꦏꦺꦴꦏ꧀ꦲꦉꦥ꧀ꦧꦭꦶꦏ꧀ꦤꦁꦪꦸꦢꦺꦪꦩꦼꦤꦺꦃ?”
9꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦱꦼꦢꦶꦤꦏꦸꦮꦶꦭꦲꦸꦠ꧀ꦫꦺꦴꦭꦱ꧀ꦗꦩ꧀ꦠ꧉ꦤꦺꦏ꧀ꦏꦺꦴꦮꦺꦩ꧀ꦭꦏꦸꦲꦶꦁꦮꦪꦃꦲꦮꦤ꧀ꦏꦺꦴꦮꦺꦲꦺꦴꦫꦧꦏꦭ꧀ꦏꦼꦱꦤ꧀ꦢꦸꦁ꧈ꦲꦮꦶꦠ꧀ꦥꦢꦁ꧉ 10ꦤꦁꦔꦶꦁꦤꦺꦏ꧀ꦏꦺꦴꦮꦺꦩ꧀ꦭꦏꦸꦲꦶꦁꦮꦪꦃꦮꦼꦔꦶ꧈ꦏꦺꦴꦮꦺꦧꦏꦭ꧀ꦏꦼꦱꦤ꧀ꦢꦸꦁ꧈ꦲꦮꦶꦠ꧀ꦥꦼꦠꦼꦁ꧉” 11ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦭꦱꦫꦸꦱ꧀ ꦏꦚ꧀ꦕꦤꦺꦲꦮꦏ꧀ꦏꦺꦢꦺꦮꦺ꧈ꦮꦶꦱ꧀ꦠꦸꦫꦸꦱꦲꦶꦏꦶ꧈ꦤꦁꦔꦶꦁꦢꦺꦏ꧀ꦤꦺꦲꦉꦥ꧀ꦠꦏ꧀ꦒꦸꦒꦃ꧉”
12-13꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦩꦶꦏꦶꦂꦤꦺꦏ꧀ꦭꦱꦫꦸꦱ꧀ꦮꦶꦱ꧀ꦧꦶꦱꦠꦸꦫꦸꦏꦼꦥꦺꦤꦏ꧀ ꦩꦸꦭꦤꦺꦠꦼꦫꦸꦱ꧀ꦥꦢꦔꦺꦴꦩꦺꦴꦁ:“ꦒꦸꦱ꧀ꦠꦶ꧈ꦤꦺꦏ꧀ꦭꦱꦫꦸꦱ꧀ꦮꦶꦱ꧀ꦧꦶꦱꦠꦸꦫꦸꦏꦼꦥꦺꦤꦏ꧀ ꦢꦺꦏ꧀ꦤꦺꦪꦩꦼꦱ꧀ꦠꦶꦤ꧀ꦢꦁꦩꦫꦶ꧉ 14ꦱꦏ꧀ꦗꦤꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦤꦺꦏ꧀ꦭꦱꦫꦸꦱ꧀ꦮꦶꦱ꧀ꦤꦶꦁꦒꦭ꧀ ꦩꦸꦭꦤꦺꦠꦼꦫꦸꦱ꧀ꦔꦺꦴꦩꦺꦴꦁꦧ꧀ꦭꦏꦮꦲꦺ:“ꦭꦱꦫꦸꦱ꧀ꦮꦶꦱ꧀ꦤꦶꦁꦒꦭ꧀! 15ꦲꦏꦸꦧꦸꦔꦃꦤꦺꦏ꧀ꦲꦏꦸꦢꦸꦫꦸꦁꦤꦁꦏꦤ꧈ꦢꦢꦶꦤꦺꦏꦺꦴꦮꦺꦧꦶꦱꦮꦼꦫꦸꦃꦩꦼꦤꦺꦃꦭꦤ꧀ꦧꦶꦱꦥꦽꦕꦪ꧉ꦩꦸꦭꦤꦺꦲ꦳ꦪꦸꦏ꧀ꦱꦲꦶꦏꦶꦥꦢꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦭꦱꦫꦸꦱ꧀꧈”
16꧋ꦫꦱꦸꦭ꧀ꦠꦺꦴꦩꦱ꧀ ꦲꦤꦏ꧀ꦏꦼꦩ꧀ꦧꦂ꧈ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ:“ꦲ꦳ꦪꦸꦏ꧀ꦲꦮꦏ꧀ꦏꦺꦢꦺꦮꦺꦥꦢꦩꦺꦭꦸꦮꦲꦺ꧈ꦢꦢꦶꦤꦺꦧꦶꦱꦩꦠꦶꦧꦉꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈”
17꧋ꦏꦧꦺꦃꦠꦼꦫꦸꦱ꧀ꦧꦸꦢꦭ꧀ꦤꦁꦢꦺꦱꦨꦺꦠꦤꦶ꧉ꦏꦢꦸꦁꦮꦶꦱ꧀ꦠꦼꦏꦤ꧀ꦔ꧀ꦒꦺꦴꦤ꧀ꦤꦺ꧈ꦒꦸꦱ꧀ꦠꦶꦪꦺꦯꦸꦱ꧀ꦏꦿꦸꦔꦸꦤꦺꦏ꧀ꦭꦱꦫꦸꦱ꧀ꦮꦶꦱ꧀ꦢꦶꦏꦸꦧꦸꦂꦥꦠꦁꦢꦶꦤ꧉ 18ꦨꦺꦠꦤꦶꦏꦸꦮꦶꦲꦺꦴꦫꦲꦢꦺꦴꦃꦏꦫꦺꦴꦪꦺꦫꦸꦱꦭꦺꦩ꧀ ꦤꦩꦸꦁꦏꦶꦫꦏꦶꦫꦠꦼꦭꦸꦁꦏꦶꦭꦺꦴꦩꦺꦠꦼꦂ꧉ 19ꦩꦸꦭꦤꦺꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦲꦺꦴꦏꦺꦃꦱꦶꦁꦥꦢꦠꦼꦏꦤꦶꦭꦶꦏ꧀ꦏꦶꦩꦫꦶꦪꦭꦤ꧀ꦩꦂꦠꦱꦶꦁꦏꦼꦥꦠꦺꦤ꧀꧈
20꧋ꦏꦢꦸꦁꦏꦿꦸꦔꦸꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦠꦼꦏ꧈ꦩꦂꦠꦠꦼꦫꦸꦱ꧀ꦩꦼꦠꦸꦲꦉꦥ꧀ꦩꦥꦏ꧀ ꦤꦁꦔꦶꦁꦩꦫꦶꦪꦲꦺꦴꦫꦩꦺꦭꦸ꧉ 21ꦩꦂꦠꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦲꦺꦴꦒꦸꦱ꧀ꦠꦶ꧈ꦤꦺꦏ꧀ꦏꦺꦴꦮꦺꦮꦶꦱ꧀ꦠꦼꦏꦏꦮꦶꦠ꧀ꦮꦶꦔꦶꦮꦶꦔꦶꦏꦏꦁꦏꦸꦩꦼꦱ꧀ꦠꦶꦲꦺꦴꦫꦱꦶꦢꦤꦶꦁꦒꦭ꧀꧈ 22ꦤꦁꦔꦶꦁꦲꦸꦒꦱꦲꦶꦏꦶ꧈ꦱꦼꦤꦗꦤ꧀ꦢꦺꦏ꧀ꦤꦺꦮꦶꦱ꧀ꦤꦶꦁꦒꦭ꧀ ꦲꦏꦸꦔꦼꦂꦠꦶꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔꦼꦏꦺꦏ꧀ꦏꦶꦏꦺꦴꦮꦺꦲꦥꦥꦼꦚ꧀ꦗꦭꦸꦏ꧀ꦩꦸ꧉”
23꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦩꦂꦠ꧈ꦏꦏꦁꦩꦸꦧꦏꦭ꧀ꦲꦸꦫꦶꦥ꧀ꦩꦼꦤꦺꦃ꧉”
24꧋ꦠꦼꦩ꧀ꦧꦸꦁꦔꦺꦩꦂꦠ:“ꦧꦼꦤꦼꦂꦒꦸꦱ꧀ꦠꦶ꧈ꦲꦏꦸꦔꦼꦂꦠꦶꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦲꦸꦫꦶꦥ꧀ꦩꦼꦤꦺꦃ꧈ꦲꦩ꧀ꦧꦺꦱꦸꦏ꧀ꦲꦶꦁꦢꦶꦤꦱꦶꦁꦏꦺꦫꦶꦢꦺꦮꦺ꧈ꦤꦺꦏ꧀ꦏꦧꦺꦃꦮꦺꦴꦁꦩꦠꦶꦧꦏꦭ꧀ꦠꦔꦶꦩꦼꦤꦺꦃ!”
25꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦪꦲꦏꦸꦲꦶꦏꦶꦱꦶꦁꦤꦔꦺꦏ꧀ꦏꦺꦮꦺꦴꦁꦩꦠꦶꦭꦤ꧀ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ꧉ꦱꦥꦱꦶꦁꦥꦽꦕꦪꦩꦫꦁꦲꦏꦸꦧꦏꦭ꧀ꦲꦸꦫꦶꦥ꧀ꦩꦼꦤꦺꦃ꧈ꦱꦼꦤꦗꦤ꧀ꦮꦶꦱ꧀ꦩꦠꦶ꧉ 26ꦮꦺꦴꦁꦏꦸꦮꦶꦮꦶꦱ꧀ꦤꦩ꧀ꦥꦲꦸꦫꦶꦥ꧀ꦭꦁꦒꦼꦁꦭꦤ꧀ꦲꦺꦴꦫꦧꦏꦭ꧀ꦩꦠꦶꦱ꧀ꦭꦮꦱ꧀ꦱꦺ꧈ꦗꦭꦂꦫꦤ꧀ꦥꦽꦕꦪꦩꦫꦁꦲꦏꦸ꧉ꦲꦥꦏꦺꦴꦮꦺꦥꦽꦕꦪꦏꦸꦮꦶ꧈ꦩꦂꦠ?”
27꧋ꦩꦂꦠꦱꦼꦩꦲꦸꦂ:“ꦪꦒꦸꦱ꧀ꦠꦶ꧈ꦲꦏꦸꦥꦽꦕꦪꦠꦼꦤꦤ꧀ꦤꦺꦏ꧀ꦏꦺꦴꦮꦺꦏꦸꦮꦶꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦏꦸꦢꦸꦠꦼꦏꦤꦁꦗꦒꦠ꧀ꦏꦺꦤꦺ꧉”
28꧋ꦩꦂꦠꦠꦼꦫꦸꦱ꧀ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦤꦺꦩꦫꦶꦪꦭꦤ꧀ꦔꦺꦴꦩꦺꦴꦁꦲꦭꦺꦴꦤ꧀ꦲꦭꦺꦴꦤ꧀ꦩꦫꦁꦢꦺꦏ꧀ꦤꦺ:“ꦩꦫꦶꦪ꧈ꦒꦸꦫꦸꦤꦺꦮꦶꦱ꧀ꦠꦼꦏ꧉ꦢꦺꦏ꧀ꦤꦺꦤꦺꦏꦺꦴꦏ꧀ꦏꦏꦺꦏꦺꦴꦮꦺ!” 29ꦱꦏ꧀ꦮꦶꦱ꧀ꦱꦺꦏꦿꦸꦔꦸꦏꦸꦮꦶꦩꦫꦶꦪꦠꦼꦫꦸꦱ꧀ꦱꦏ꧀ꦮꦠ꧀ꦔꦢꦼꦏ꧀ꦲꦉꦥ꧀ꦩꦼꦠꦸꦮꦒꦸꦱ꧀ꦠꦶꦪꦺꦯꦸꦱ꧀꧈ 30ꦒꦸꦱ꧀ꦠꦶꦪꦺꦯꦸꦱ꧀ꦢꦸꦫꦸꦁꦩ꧀ꦊꦧꦸꦤꦁꦢꦺꦱꦤꦺ꧈ꦤꦁꦔꦶꦁꦲꦶꦗꦶꦏ꧀ꦤꦁꦥꦁꦒꦺꦴꦤ꧀ꦤꦤ꧀ꦢꦺꦴꦁꦔꦺꦏꦼꦥꦼꦠꦸꦏ꧀ꦏꦫꦺꦴꦩꦂꦠ꧉ 31ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦶꦁꦥꦢꦠꦼꦏꦔ꧀ꦭꦶꦥꦸꦂꦩꦫꦶꦪꦮꦼꦫꦸꦃꦢꦺꦏ꧀ꦤꦺꦩꦼꦚꦠ꧀ꦭꦸꦔ꧈ꦤ꧀ꦢꦫꦤ꧀ꦤꦶꦩꦫꦶꦪꦲꦉꦥ꧀ꦤꦔꦶꦱ꧀ꦤꦁꦏꦸꦧꦸꦂꦫꦤ꧀ ꦠꦼꦫꦸꦱ꧀ꦥꦢꦔꦼꦠꦸꦠ꧀ꦠꦏꦺ꧉
32꧋ꦏꦢꦸꦁꦩꦫꦶꦪꦮꦶꦱ꧀ꦠꦼꦏꦤ꧀ꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ ꦢꦺꦏ꧀ꦤꦺꦠꦼꦫꦸꦱ꧀ꦤꦶꦧꦤꦁꦔꦉꦥ꧀ꦥꦺꦔꦺꦴꦩꦺꦴꦁ:“ꦲꦺꦴꦒꦸꦱ꧀ꦠꦶ꧈ꦤꦺꦏ꧀ꦏꦺꦴꦮꦺꦮꦶꦱ꧀ꦤꦁꦏꦺꦤꦺꦏꦮꦶꦠ꧀ꦮꦶꦔꦶꦮꦶꦔꦶ꧈ꦏꦏꦁꦏꦸꦩꦼꦱ꧀ꦠꦶꦲꦺꦴꦫꦱꦶꦢꦤꦶꦁꦒꦭ꧀꧈”
33꧋ꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦩꦫꦶꦪꦭꦤ꧀ꦮꦺꦴꦁꦮꦺꦴꦁꦱꦶꦁꦥꦢꦩꦺꦭꦸꦩ꧀ꦧꦿꦺꦴꦤꦺꦴꦩꦲꦸꦥꦢꦤꦔꦶꦱ꧀ ꦢꦺꦏ꧀ꦤꦺꦠꦼꦫꦸꦱ꧀ꦏꦿꦱꦩꦼꦭꦱ꧀ꦭꦤ꧀ꦱꦼꦢꦶꦧꦔꦼꦠ꧀꧈ 34ꦢꦺꦏ꧀ꦤꦺꦠꦼꦫꦸꦱ꧀ꦠꦏꦺꦴꦤ꧀:“ꦭꦱꦫꦸꦱ꧀ꦲꦩ꧀ꦧꦺꦴꦏ꧀ꦏꦸꦧꦸꦂꦤꦁꦲꦼꦤ꧀ꦢꦶ?”
꧋“ꦲ꦳ꦪꦸꦏ꧀ꦠꦏ꧀ꦒꦮꦤꦁꦏꦸꦧꦸꦂꦫꦤ꧀ꦤꦺ꧈ꦒꦸꦱ꧀ꦠꦶ꧈”ꦮꦺꦴꦁꦮꦺꦴꦁꦱꦼꦩꦲꦸꦂ꧉
35꧋ꦩꦿꦶꦥꦠ꧀ꦠꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩꦼꦠꦸꦌꦭꦸꦃꦲꦺ꧉ 36ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦶꦁꦥꦢꦮꦼꦫꦸꦃꦏꦸꦮꦶꦠꦼꦫꦸꦱ꧀ꦔꦺꦴꦩꦺꦴꦁ:“ꦢꦺꦏ꧀ꦤꦺꦗꦤ꧀ꦠꦿꦺꦱ꧀ꦤꦠꦼꦤꦤ꧀ꦩꦫꦁꦭꦱꦫꦸꦱ꧀!”
37꧋ꦤꦁꦔꦶꦁꦱꦭꦺꦴꦏ꧀ꦏꦺꦲꦺꦤꦺꦁꦱꦶꦁꦔꦺꦴꦩꦺꦴꦁꦔꦺꦤꦺ:“ꦢꦺꦏ꧀ꦤꦺꦭꦲꦸꦠ꧀ꦧꦶꦱꦤꦩ꧀ꦧꦤꦶꦮꦺꦴꦁꦱꦶꦁꦭꦩꦸꦂꦠ!ꦄꦗꦸꦂꦫꦺꦪꦧꦶꦱꦔꦭꦁꦔꦭꦁꦔꦶꦱꦸꦥꦪꦭꦱꦫꦸꦱ꧀ꦲꦺꦴꦫꦩꦠꦶ꧉”
38꧋ꦱꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦠꦼꦏꦤ꧀ꦏꦸꦧꦸꦂꦫꦤ꧀ꦤꦺ꧈ꦲꦠꦶꦤꦺꦠꦼꦫꦸꦱ꧀ꦏꦿꦱꦱꦸꦱꦃꦭꦤ꧀ꦗꦺꦁꦏꦺꦭ꧀ꦩꦼꦤꦺꦃ꧉ꦏꦸꦧꦸꦂꦫꦤ꧀ꦤꦺꦏꦸꦮꦶꦒꦸꦮꦱꦶꦁꦢꦶꦠꦸꦠꦸꦥ꧀ꦥꦶꦮꦠꦸꦒꦼꦢꦺ꧉ 39ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦸꦧꦸꦂꦫꦤ꧀ꦤꦺꦢꦶꦧꦸꦏꦏ꧀!”
꧋ꦩꦂꦠꦱꦼꦩꦲꦸꦂ:“ꦒꦸꦱ꧀ꦠꦶ꧈ꦏꦏꦁꦏꦸꦮꦶꦱ꧀ꦢꦶꦏꦸꦧꦸꦂꦥꦠꦁꦢꦶꦤꦱꦸꦮꦺꦤꦺ꧉ꦱꦲꦶꦏꦶꦮꦶꦱ꧀ꦩꦩ꧀ꦧꦸ!”
40꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦩꦂꦠ:“ꦲꦏꦸꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦩꦫꦁꦏꦺꦴꦮꦺꦠ!ꦤꦺꦏ꧀ꦏꦺꦴꦮꦺꦥꦽꦕꦪꦠꦼꦤꦤ꧀ꦩꦫꦁꦲꦏꦸ꧈ꦏꦺꦴꦮꦺꦧꦏꦭ꧀ꦮꦼꦫꦸꦃꦱꦼꦥꦶꦫꦒꦼꦢꦺꦤꦺꦏ꧀ꦮꦱꦤꦺꦒꦸꦱ꧀ꦠꦶꦄꦭ꧀ꦭꦃ!” 41ꦮꦠꦸꦤꦺꦱꦶꦁꦢꦶꦲꦼꦁꦒꦺꦴꦤꦸꦠꦸꦥ꧀ꦥꦶꦏꦸꦧꦸꦂꦫꦤ꧀ꦤꦺꦠꦼꦫꦸꦱ꧀ꦢꦶꦱꦸꦫꦸꦁ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚꦮꦁꦤ꧀ꦢꦸꦮꦸꦂꦭꦤ꧀ꦤ꧀ꦢꦺꦴꦁꦔ:“ꦧꦥꦏ꧀ꦏꦸ꧈ꦲꦏꦸꦏꦼꦱꦸꦮꦸꦤ꧀ꦤꦺꦏ꧀ꦏꦺꦴꦮꦺꦤꦩ꧀ꦥꦥꦤ꧀ꦢꦺꦴꦔꦏꦸ꧉ 42ꦲꦏꦸꦢꦺꦮꦺꦔꦼꦂꦠꦶꦤꦺꦏ꧀ꦱꦧꦼꦤ꧀ꦱꦧꦼꦤ꧀ꦲꦏꦸꦤ꧀ꦢꦺꦴꦁꦔꦩꦫꦁꦏꦺꦴꦮꦺ꧈ꦲꦥꦥꦼꦚ꧀ꦗꦭꦸꦏ꧀ꦏꦸꦏꦼꦠꦸꦫꦸꦠ꧀ꦠꦤ꧀꧈ꦤꦁꦔꦶꦁꦲꦏꦸꦔꦺꦴꦩꦺꦴꦁꦏꦸꦮꦶꦩꦲꦸ꧈ꦱꦸꦥꦪꦮꦺꦴꦁꦮꦺꦴꦁꦱꦶꦁꦤꦁꦏꦺꦤꦺꦲꦶꦏꦶꦥꦢꦏꦿꦸꦔꦸꦭꦤ꧀ꦥꦢꦥꦽꦕꦪꦤꦺꦏ꧀ꦏꦺꦴꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉” 43ꦱꦏ꧀ꦮꦶꦱ꧀ꦱꦺꦤ꧀ꦢꦺꦴꦁꦔ꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦲꦩ꧀ꦧꦼꦔꦺꦴꦏ꧀:“ꦭꦱꦫꦸꦱ꧀ ꦩꦼꦠꦸꦮꦩ꧀ꦧꦿꦺꦤꦺ!” 44ꦭꦱꦫꦸꦱ꧀ ꦱꦶꦁꦩꦲꦸꦤꦺꦩꦠꦶ꧈ꦠꦼꦫꦸꦱ꧀ꦩꦼꦠꦸ꧈ꦤꦁꦔꦶꦁꦠꦔꦤ꧀ꦤꦺꦭꦤ꧀ꦱꦶꦏꦶꦭ꧀ꦭꦺꦲꦶꦗꦶꦏ꧀ꦢꦶꦧꦸꦤ꧀ꦠꦼꦭ꧀ꦩꦺꦴꦫꦶ꧉ꦫꦲꦶꦤꦺꦲꦩ꧀ꦧꦫꦁꦲꦶꦗꦶꦏ꧀ꦢꦶꦠꦸꦠꦸꦥ꧀ꦥꦶꦏꦕꦸꦩꦺꦴꦫꦶ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦩꦺꦴꦫꦶꦤꦺꦢꦶꦲꦸꦕꦸꦭ꧀ꦭꦶꦱꦸꦥꦪꦮꦺꦴꦁꦔꦺꦧꦶꦱꦩ꧀ꦭꦏꦸ꧉”
45꧋ꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦶꦁꦩꦺꦭꦸꦩꦫꦶꦪꦥꦢꦮꦼꦫꦸꦃꦊꦭꦏꦺꦴꦤ꧀ꦏꦸꦮꦶꦩꦲꦸ꧈ꦩꦸꦭꦤꦺꦠꦼꦫꦸꦱ꧀ꦲꦺꦤꦺꦁꦲꦺꦴꦏꦺꦃꦱꦶꦁꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈ 46ꦤꦁꦔꦶꦁꦲꦺꦤꦺꦁꦱꦶꦁꦥꦢꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦥꦫꦥ꦳ꦫꦶꦱꦶꦲꦩ꧀ꦧꦫꦁꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦔꦸꦫꦶꦥ꧀ꦥꦏꦺꦭꦱꦫꦸꦱ꧀ꦩꦼꦤꦺꦃ꧉ 47ꦩꦸꦭꦤꦺꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦭꦤ꧀ꦥꦫꦥ꦳ꦫꦶꦱꦶꦠꦼꦫꦸꦱ꧀ꦥꦢꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦫꦥꦼꦤꦸꦤ꧀ꦠꦸꦤꦺꦲꦒꦩꦭꦤ꧀ꦤꦁꦧꦼꦒꦤ꧀ꦢꦿꦶꦁꦔꦤ꧀ꦏꦺꦴꦤꦺꦴꦠꦼꦫꦸꦱ꧀ꦥꦢꦠꦏꦺꦴꦤ꧀:“ꦭꦃꦲꦮꦏ꧀ꦏꦺꦢꦺꦮꦺꦱꦲꦶꦏꦶꦏꦼꦥꦿꦶꦪꦺ?ꦪꦺꦯꦸꦱ꧀ꦲꦶꦏꦶꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺ꧉ 48ꦤꦺꦏ꧀ꦢꦶꦲꦼꦗꦂꦫꦏꦺꦔꦺꦴꦤꦺꦴꦱꦸꦮꦶꦱꦸꦮꦶꦮꦺꦴꦁꦏꦧꦺꦃꦥꦢꦩꦺꦭꦸꦢꦺꦏ꧀ꦤꦺ꧉ꦩꦼꦁꦏꦺꦴꦧꦁꦱꦬꦸꦩ꧀ꦮꦼꦢꦶꦤꦺꦏ꧀ꦧꦁꦱꦤꦺꦲꦮꦏ꧀ꦏꦺꦢꦺꦮꦺꦲꦺꦴꦫꦧꦏꦭ꧀ꦩꦤꦸꦠ꧀ꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺꦧꦁꦱꦬꦸꦩ꧀ꦧꦏꦭ꧀ꦔꦿꦸꦱꦏ꧀ꦒꦿꦺꦗꦒꦼꦢꦺꦭꦤ꧀ꦧꦁꦱꦤꦺꦲꦮꦏ꧀ꦏꦺꦢꦺꦮꦺ꧉”
49-50꧋ꦤꦁꦔꦶꦁꦏꦪꦥ꦳ꦱ꧀ ꦲꦶꦩꦩ꧀ꦒꦼꦢꦺ꧈ꦱꦼꦩꦲꦸꦂꦔꦺꦤꦺ:“ꦩꦺꦴꦱꦺꦴꦏ꧀ꦏꦺꦴꦮꦺꦢꦸꦫꦸꦁꦥꦢꦢꦸꦤꦸꦁ?ꦭꦸꦮꦸꦁꦢꦺꦏ꧀ꦤꦺꦱꦶꦁ ꦩꦠꦶꦠꦼꦤꦶꦩ꧀ꦧꦁꦲꦮꦏ꧀ꦏꦺꦢꦺꦮꦺꦏꦧꦺꦃꦱꦏ꧀ꦧꦁꦱ꧉” 51ꦏꦪꦥ꦳ꦱ꧀ꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦲꦺꦴꦫꦱꦁꦏꦥꦶꦏꦶꦂꦫꦤ꧀ꦤꦺꦢꦺꦏ꧀ꦤꦺꦢꦺꦮꦺ꧈ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦼꦏꦺꦏ꧀ꦏꦶꦠꦼꦩ꧀ꦧꦸꦁꦢꦺꦏ꧀ꦤꦺ꧈ꦲꦮꦶꦠ꧀ꦢꦺꦏ꧀ꦤꦺꦏꦸꦮꦶꦲꦶꦩꦩ꧀ꦒꦼꦢꦺꦲꦶꦁꦠꦲꦸꦤ꧀ꦏꦸꦮꦶ꧉ꦏꦸꦮꦶꦗꦭꦂꦫꦤ꧀ꦤꦺꦢꦺꦏ꧀ꦤꦺꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦢꦸꦩꦠꦶꦔ꧀ꦭꦧꦸꦃꦲꦶꦧꦁꦱꦤꦺ꧉ 52ꦭꦤ꧀ꦩꦼꦤꦺꦃ꧈ꦒꦸꦱ꧀ꦠꦶꦪꦺꦯꦸꦱ꧀ꦲꦼꦁꦒꦺꦴꦤꦺꦩꦠꦶꦲꦺꦴꦫꦤꦩꦸꦁꦔ꧀ꦭꦧꦸꦃꦲꦶꦧꦁꦱꦤꦺꦮꦲꦺ꧈ꦤꦁꦔꦶꦁꦲꦸꦒꦱꦸꦥꦪꦏꦧꦺꦃꦮꦺꦴꦁꦱꦶꦁꦥꦽꦕꦪꦩꦫꦁꦢꦺꦏ꧀ꦤꦺꦧꦶꦱꦢꦢꦶꦱꦶꦗꦶ꧈ꦱꦼꦤꦗꦤ꧀ꦤꦥꦢꦥꦼꦚ꧀ꦕꦂꦱꦏ꧀ꦥꦫꦤ꧀ꦥꦫꦤ꧀꧈
53꧋ꦱꦏ꧀ꦥ꧀ꦭꦺꦴꦏ꧀ꦏꦺꦢꦶꦤꦏꦸꦮꦶꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦥꦢꦔ꧀ꦒꦺꦴꦭꦺꦏ꧀ꦲꦏꦭ꧀ꦲꦉꦥ꧀ꦩꦠꦺꦤ꧀ꦤꦶꦒꦸꦱ꧀ꦠꦶꦪꦺꦯꦸꦱ꧀꧈ 54ꦩꦸꦭꦤꦺꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦔꦺꦠꦺꦴꦏ꧀ꦩꦼꦤꦺꦃꦤꦁꦠꦼꦔꦃꦲꦺꦮꦺꦴꦁꦮꦺꦴꦁ꧈ꦤꦁꦔꦶꦁꦢꦺꦏ꧀ꦤꦺꦠꦼꦫꦸꦱ꧀ꦭꦸꦔꦱꦁꦏꦏꦺꦴꦤꦺꦴꦧꦸꦢꦭ꧀ꦤꦁꦏꦸꦠꦌꦥ꦳ꦿꦲꦶꦩ꧀ ꦕꦼꦢꦼꦏ꧀ꦏꦫꦺꦴꦮꦸꦱ꧀ꦠꦺꦤ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤꦁꦏꦺꦴꦤꦺꦴꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉
55꧋ꦱꦲꦶꦏꦶꦮꦪꦃꦲꦺꦥꦱ꧀ꦏꦃꦮꦶꦱ꧀ꦕꦼꦢꦼꦏ꧀꧈ꦩꦸꦭꦤꦺꦮꦺꦴꦁꦲꦺꦴꦏꦺꦃꦥꦢꦠꦼꦏꦤꦁꦪꦺꦫꦸꦱꦭꦺꦩ꧀ꦲꦉꦥ꧀ꦥꦢꦤꦶꦤ꧀ꦢꦏ꧀ꦏꦏꦺꦱꦼꦱꦸꦕꦺꦤ꧀꧉ 56ꦮꦺꦴꦁꦮꦺꦴꦁꦥꦢꦭꦶꦔꦏ꧀ꦭꦶꦔꦸꦏ꧀ꦔ꧀ꦒꦺꦴꦭꦺꦏ꧀ꦏꦶꦒꦸꦱ꧀ꦠꦶꦪꦺꦯꦸꦱ꧀꧈ꦤꦺꦏ꧀ꦥꦢꦔꦸꦩ꧀ꦥꦸꦭ꧀ꦤꦁꦒꦿꦺꦗꦒꦼꦢꦺꦏꦺꦴꦤꦺꦴꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦫꦁꦱꦏ꧀ꦥꦢꦥꦢ:“ꦢꦺꦏ꧀ꦤꦺꦧꦏꦭ꧀ꦠꦼꦏꦲꦥꦲꦺꦴꦫꦪ?” 57ꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦭꦤ꧀ꦥꦫꦥ꦳ꦫꦶꦱꦶꦮꦶꦱ꧀ꦔꦺꦴꦁꦏꦺꦴꦤ꧀ꦔꦧꦂꦔꦧꦂꦫꦏꦺ꧈ꦤꦺꦏ꧀ꦲꦺꦤꦺꦁꦮꦺꦴꦁꦔꦼꦂꦠꦶꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦤꦁꦲꦼꦤ꧀ꦢꦶ꧈ꦏꦸꦢꦸꦢꦶꦲꦺꦴꦩꦺꦴꦁꦔꦏꦺ꧈ꦱꦸꦥꦪꦢꦺꦏ꧀ꦤꦺꦢꦶꦕꦼꦏꦼꦭ꧀꧈
꧇꧑꧒꧇ 1꧋ꦤꦼꦩ꧀ꦢꦶꦤꦱꦏ꧀ꦢꦸꦫꦸꦁꦔꦺꦫꦶꦪꦪꦥꦱ꧀ꦏꦃꦩꦺꦴꦭꦃꦲꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦤꦁꦢꦺꦱꦨꦺꦠꦤꦶ꧉ꦨꦺꦠꦤꦶꦏꦸꦮꦶꦥꦁꦒꦺꦴꦤ꧀ꦤꦤ꧀ꦤꦺꦭꦱꦫꦸꦱ꧀ ꦱꦶꦁꦩꦲꦸꦤꦺꦮꦶꦱ꧀ꦩꦠꦶ꧈ꦤꦁꦔꦶꦁꦠꦼꦫꦸꦱ꧀ꦢꦶꦠꦔꦺꦏ꧀ꦏꦏꦺꦩꦼꦤꦺꦃꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ 2ꦩꦸꦭꦤꦺꦱꦲꦶꦏꦶꦮꦺꦴꦁꦮꦺꦴꦁꦥꦢꦩꦁꦔꦤ꧀ꦲꦺꦤꦏ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ꦱꦶꦁꦭꦢꦺꦤ꧀ꦩꦂꦠ꧈ꦭꦃꦭꦱꦫꦸꦱ꧀ꦗꦼꦗꦒꦺꦴꦁꦔꦤ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ 3ꦩꦫꦶꦪꦏꦺꦴꦏ꧀ꦠꦼꦫꦸꦱ꧀ꦚ꧀ꦗꦶꦏꦸꦏ꧀ꦊꦔꦮꦔꦶꦱꦏ꧀ꦧꦺꦴꦠꦺꦴꦭ꧀ꦢꦶꦲꦼꦱꦺꦴꦏ꧀ꦏꦏꦺꦤꦁꦱꦶꦏꦶꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦸꦱꦥ꧀ꦥꦶꦏꦫꦺꦴꦫꦩ꧀ꦧꦸꦠ꧀ꦠꦺ꧉ꦱꦏ꧀ꦲꦺꦴꦩꦃꦠꦼꦫꦸꦱ꧀ꦩꦭꦶꦃꦩꦩ꧀ꦧꦸꦊꦔꦮꦔꦶꦤꦺ꧉ꦏꦸꦮꦶꦊꦔꦮꦔꦶꦤꦂꦢꦸꦱ꧀ꦱꦶꦁꦠꦸꦱ꧀ ꦱꦶꦁꦉꦒꦤꦺꦭꦫꦁꦧꦔꦼꦠ꧀꧈ 4-5ꦤꦁꦔꦶꦁꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ꦱꦶꦁꦗꦼꦤꦼꦁꦔꦺꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀ ꦚꦼꦤꦺꦤ꧀ꦤꦶꦩꦫꦶꦪꦔꦺꦤꦺ:“ꦊꦔꦮꦔꦶꦏꦸꦮꦶꦱꦼꦩꦸꦁꦒꦺꦴꦤ꧀ꦤꦺꦢꦶꦲꦼꦢꦺꦴꦭ꧀ꦥꦪꦸꦥꦶꦫꦁꦢꦸꦮꦶꦠ꧀ꦮꦲꦺ꧈ꦭꦲꦸꦠ꧀ꦏꦼꦤꦺꦁꦢꦶꦲꦼꦁꦒꦺꦴꦤꦸꦭꦸꦁꦔꦶꦮꦺꦴꦁꦱꦶꦁꦲꦺꦴꦫꦤ꧀ꦢꦸꦮꦺꦠ?”ꦪꦪꦸꦢꦱ꧀ꦲꦶꦏꦶꦱꦶꦁꦲꦩ꧀ꦧꦺꦱꦸꦏ꧀ꦏꦺꦔꦼꦭꦸꦁꦔꦏꦺꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦩꦸꦁꦱꦸꦃꦲꦺ꧉ 6ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦱꦏ꧀ꦗꦤꦺꦲꦺꦴꦫꦗꦭꦂꦫꦤ꧀ꦢꦺꦏ꧀ꦤꦺꦩꦶꦏꦶꦂꦫꦏꦺꦮꦺꦴꦁꦱꦶꦁꦲꦺꦴꦫꦤ꧀ꦢꦸꦮꦺ꧈ꦲꦺꦴꦫ꧈ꦤꦁꦔꦶꦁꦗꦭꦂꦫꦤ꧀ꦢꦺꦏ꧀ꦤꦺꦏꦸꦮꦶꦩꦭꦶꦁ꧉ꦢꦺꦏ꧀ꦤꦺꦱꦶꦁꦚꦼꦏꦼꦭ꧀ꦢꦸꦮꦶꦠ꧀ꦭꦤ꧀ꦢꦺꦏ꧀ꦤꦺꦲꦗꦼꦏ꧀ꦚ꧀ꦗꦶꦏꦸꦏ꧀ꦏꦶꦢꦶꦲꦼꦁꦒꦺꦴꦢꦺꦏ꧀ꦤꦺꦢꦺꦮꦺ꧉
7꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦲꦩ꧀ꦧꦺꦴꦏ꧀ꦧꦺꦤ꧀!ꦩꦫꦶꦪꦔꦸꦱꦥ꧀ꦥꦶꦲꦏꦸꦏꦫꦺꦴꦊꦔꦮꦔꦶꦲꦶꦏꦶꦲꦺꦤꦺꦁꦠꦸꦗꦸꦮꦤ꧀ꦤꦺ꧉ꦢꦺꦏ꧀ꦤꦺꦩꦺꦴꦭꦃꦲꦶꦠꦠꦠꦠꦏꦁꦒꦺꦴꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸꦧꦏꦭ꧀ꦢꦶꦏꦸꦧꦸꦂ꧉ 8ꦮꦺꦴꦁꦩ꧀ꦭꦫꦠ꧀ꦏꦸꦮꦶꦱ꧀ꦭꦮꦱ꧀ꦱꦺꦲꦺꦤꦺꦁꦮꦲꦺ꧈ꦤꦁꦔꦶꦁꦲꦼꦁꦒꦺꦴꦤ꧀ꦏꦸꦕꦩ꧀ꦥꦸꦂꦏꦫꦺꦴꦏꦺꦴꦮꦺꦲꦶꦏꦶꦲꦺꦴꦫꦱꦸꦮꦶ꧉”
9꧋ꦱꦲꦶꦏꦶꦮꦺꦴꦁꦲꦺꦴꦏꦺꦃꦥꦢꦏꦿꦸꦔꦸꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦤꦁꦨꦺꦠꦤꦶꦏꦺꦴꦤꦺꦴ꧈ꦩꦸꦭꦤꦺꦠꦼꦫꦸꦱ꧀ꦥꦢꦩ꧀ꦧꦿꦺꦴꦤꦺꦴꦲꦩ꧀ꦧꦫꦁ꧉ꦤꦁꦔꦶꦁꦲꦺꦴꦫꦤꦩꦸꦁꦏꦼꦥꦺꦔꦶꦤ꧀ꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦮꦲꦺ꧈ꦮꦺꦴꦁꦮꦺꦴꦁꦲꦸꦒꦏꦼꦥꦺꦔꦶꦤ꧀ꦮꦼꦫꦸꦃꦭꦱꦫꦸꦱ꧀ꦱꦶꦁꦲꦸꦫꦶꦥ꧀ꦩꦼꦤꦺꦃ꧉ 10-11ꦊꦭꦏꦺꦴꦤꦺꦭꦱꦫꦸꦱ꧀ꦏꦸꦮꦶꦩꦫꦏ꧀ꦏꦏꦺꦮꦺꦴꦁꦙꦸꦥꦶꦫꦁꦥꦶꦫꦁꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈ꦩꦸꦭꦤꦺꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦱꦲꦶꦏꦶꦲꦉꦥ꧀ꦩꦠꦺꦤ꧀ꦤꦶꦭꦱꦫꦸꦱ꧀ꦲꦩ꧀ꦧꦫꦁ꧉
12꧋ꦭꦶꦪꦤꦺꦢꦶꦤꦮꦺꦴꦁꦥꦶꦫꦁꦥꦶꦫꦁꦥꦢꦠꦼꦏꦤꦁꦪꦺꦫꦸꦱꦭꦺꦩ꧀ꦲꦉꦥ꧀ꦔꦸꦂꦩꦠ꧀ꦫꦶꦪꦪꦥꦱ꧀ꦏꦃ꧉ꦮꦺꦴꦁꦮꦺꦴꦁꦲꦶꦏꦶꦏꦿꦸꦔꦸꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦲꦉꦥ꧀ꦠꦼꦏꦩ꧀ꦧꦿꦺꦴꦤꦺꦴꦲꦩ꧀ꦧꦫꦁ꧉ 13ꦩꦸꦭꦤꦺꦠꦼꦫꦸꦱ꧀ꦥꦢꦩꦼꦠꦸꦱꦁꦏꦏꦸꦠꦤꦺꦲꦉꦥ꧀ꦩꦥꦏ꧀ꦒꦸꦱ꧀ꦠꦶꦪꦺꦯꦸꦱ꧀꧈ꦮꦺꦴꦁꦮꦺꦴꦁꦔ꧀ꦒꦮꦒꦺꦴꦢꦺꦴꦁꦥꦊꦩ꧀ꦠꦼꦫꦸꦱ꧀ꦥꦢꦚꦸꦫꦏ꧀ꦏꦶꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦲ꦳ꦺꦴꦱꦤ꧈ꦩꦸꦒꦱ꧀ꦭꦩꦼꦠ꧀ꦠꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦠꦼꦏꦲꦶꦏꦶ꧈ꦱꦶꦁꦧꦏꦭ꧀ꦢꦢꦶꦫꦠꦸꦤꦺꦧꦁꦱꦆꦱꦿꦌꦭ꧀꧈”
14꧋ꦒꦸꦱ꧀ꦠꦶꦪꦺꦯꦸꦱ꧀ꦤꦼꦩꦸꦏꦶꦩꦂꦲꦼꦤꦺꦴꦩ꧀ꦠꦼꦫꦸꦱ꧀ꦢꦶꦠꦸꦩ꧀ꦥꦏ꧀ꦏꦶ꧉ꦏꦸꦮꦶꦕꦺꦴꦕꦺꦴꦏ꧀ꦏꦫꦺꦴꦱꦶꦁꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧉ 15ꦲꦪꦠ꧀ꦏꦸꦮꦶꦲꦸꦤꦶꦤꦺꦔꦺꦤꦺ:
“ꦲꦗꦮꦼꦢꦶ꧈ꦲꦤꦏ꧀ꦱꦶꦪꦺꦴꦤ꧀!
ꦢꦼꦭꦺꦴꦏ꧀ꦏꦼꦤ꧀ ꦫꦠꦸꦩꦸꦠꦼꦏꦤꦸꦩ꧀ꦥꦏ꧀ꦏꦶꦩꦂꦲꦼꦤꦺꦴꦩ꧀꧈”
16꧋ꦲꦶꦁꦮꦏ꧀ꦠꦸꦏꦸꦮꦶꦩꦸꦫꦶꦢ꧀ꦩꦸꦫꦶꦢ꧀ꦢꦺꦢꦸꦫꦸꦁꦢꦸꦤꦸꦁꦲꦥꦱꦶꦁꦏ꧀ꦭꦏꦺꦴꦤ꧀ꦲꦶꦏꦶ꧈ꦤꦁꦔꦶꦁꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦩꦠꦶꦭꦤ꧀ꦠꦔꦶꦩꦼꦤꦺꦃꦱꦁꦏꦥꦠꦶꦠꦼꦫꦸꦱ꧀ꦥꦢꦏꦺꦭꦶꦁꦔꦤ꧀ꦲꦥꦱꦶꦁꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦭꦤ꧀ꦥꦢꦔꦼꦂꦠꦶꦤꦺꦏ꧀ꦏꦸꦮꦶꦱꦲꦶꦏꦶꦮꦶꦱ꧀ꦏ꧀ꦭꦏꦺꦴꦤ꧀ꦏꦧꦺꦃ꧉
17꧋ꦮꦺꦴꦁꦮꦺꦴꦁꦱꦶꦁꦥꦢꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦤꦔꦺꦏ꧀ꦏꦺꦭꦱꦫꦸꦱ꧀ꦱꦁꦏꦥꦠꦶꦠꦼꦫꦸꦱ꧀ꦥꦢꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ꧉ 18ꦩꦸꦭꦤꦺꦮꦺꦴꦁꦥꦶꦫꦁꦥꦶꦫꦁꦠꦼꦫꦸꦱ꧀ꦧꦸꦢꦭ꧀ꦩꦼꦠꦸꦮꦒꦸꦱ꧀ꦠꦶꦪꦺꦯꦸꦱ꧀ ꦗꦭꦂꦫꦤ꧀ꦥꦢꦏꦿꦸꦔꦸꦢꦺꦏ꧀ꦤꦺꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀꧈ 19ꦥꦫꦥ꦳ꦫꦶꦱꦶꦱꦲꦶꦏꦶꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦱꦏ꧀ꦥꦢꦥꦢ:“ꦏꦺꦴꦮꦺꦮꦼꦫꦸꦃꦢꦺꦮꦺꦠ!ꦲꦮꦏ꧀ꦏꦺꦢꦺꦮꦺꦮꦶꦱ꧀ꦲꦺꦴꦫꦧꦶꦱꦲꦥꦲꦥ!ꦢꦼꦭꦺꦴꦏ꧀ꦏꦼꦤ꧀ꦏꦸꦮꦶ!ꦱꦱꦠ꧀ꦠꦺꦮꦺꦴꦁꦏꦧꦺꦃꦥꦢꦔꦼꦠꦸꦠ꧀ꦠꦏꦺꦪꦺꦯꦸꦱ꧀!”
20꧋ꦧꦉꦁꦏꦫꦺꦴꦮꦺꦴꦁꦮꦺꦴꦁꦱꦶꦁꦥꦢꦤꦁꦫꦶꦪꦪꦏꦺꦴꦤꦺꦴꦲꦸꦒꦲꦺꦤꦺꦁꦮꦺꦴꦁꦒꦿꦶꦏ꧀ꦱꦶꦗꦶꦭꦺꦴꦫꦺꦴꦠꦼꦏꦲꦉꦥ꧀ꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃ꧉ 21ꦭꦃꦠꦼꦫꦸꦱ꧀ꦲꦺꦤꦺꦁꦱꦶꦁꦩꦫꦤꦁꦔ꧀ꦒꦺꦴꦤ꧀ꦤꦺꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦲꦩ꧀ꦧꦫꦁ꧉ꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦏꦸꦮꦶꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ꦱꦶꦁꦱꦁꦏꦏꦸꦠꦧꦺꦠ꧀ꦱꦲꦶꦢꦤꦁꦧꦮꦃꦓꦭꦶꦭꦺꦪ꧉ꦮꦺꦴꦁꦮꦺꦴꦁꦒꦿꦶꦏ꧀ꦏꦸꦮꦶꦠꦏꦺꦴꦤ꧀ꦩꦫꦁꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦔꦺꦤꦺ:“ꦏꦔꦺ꧈ꦲꦮꦏ꧀ꦏꦺꦢꦺꦮꦺꦏꦼꦥꦺꦔꦶꦤ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦪꦺꦯꦸꦱ꧀!”
22꧋ꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦶꦄꦤ꧀ꦢꦿꦺꦪꦱ꧀ꦭꦤ꧀ꦏꦧꦺꦃꦭꦺꦴꦫꦺꦴꦠꦼꦫꦸꦱ꧀ꦩꦫꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦉꦥ꧀ꦥꦺꦮꦺꦴꦁꦮꦺꦴꦁꦒꦿꦶꦏ꧀ꦩꦲꦸ꧉ 23ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂꦔꦺꦤꦺ:“ꦥꦚ꧀ꦕꦺꦤ꧀꧈ꦱꦲꦶꦏꦶꦮꦶꦱ꧀ꦮꦚ꧀ꦕꦶꦤꦺ꧉ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔ꧀ꦭꦸꦲꦸꦂꦫꦏꦺꦲꦤꦏ꧀ꦏꦺꦩꦤꦸꦁꦱ꧉ 24ꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀ꦲꦺꦴꦩꦺꦴꦁꦏꦸꦲꦶꦏꦶ:ꦒꦧꦃꦱꦏ꧀ꦲꦼꦭꦱ꧀ꦏꦲꦺꦤꦺꦏ꧀ꦲꦺꦴꦫꦢꦶꦥꦼꦤ꧀ꦢꦼꦩ꧀ꦤꦁꦊꦩꦃꦠꦼꦫꦸꦱ꧀ꦩꦠꦶꦪꦲꦺꦴꦫꦧꦏꦭ꧀ꦢꦢꦶꦲꦺꦴꦏꦺꦃ꧉ꦱ꧀ꦭꦮꦱ꧀ꦱꦺꦪꦱꦏ꧀ꦲꦼꦭꦱ꧀ꦮꦲꦺ꧉ꦤꦁꦔꦶꦁꦤꦺꦏ꧀ꦢꦶꦥꦼꦤ꧀ꦢꦼꦩ꧀ꦤꦁꦊꦩꦃꦠꦼꦫꦸꦱ꧀ꦩꦠꦶ꧈ꦩꦭꦃꦧꦶꦱꦔꦼꦠꦺꦴꦏ꧀ꦏꦏꦺꦮꦺꦴꦃꦲꦺꦴꦏꦺꦃ꧉ 25ꦩꦸꦭꦤꦺ꧈ꦱꦥꦱꦶꦁꦲꦺꦩꦤ꧀ꦲꦸꦫꦶꦥ꧀ꦥꦺꦩꦭꦃꦧꦏꦭ꧀ꦏꦺꦭꦁꦔꦤ꧀꧈ꦤꦁꦔꦶꦁꦱꦥꦱꦶꦁꦲꦺꦴꦫꦲꦺꦩꦤ꧀ꦲꦸꦫꦶꦥ꧀ꦥꦺꦲꦶꦁꦢꦺꦴꦚꦲꦶꦏꦶ꧈ꦩꦭꦃꦧꦏꦭ꧀ꦤꦼꦩꦸꦲꦸꦫꦶꦥ꧀ꦱꦶꦁꦭꦁꦒꦼꦁ꧉ 26ꦭꦤ꧀ꦩꦼꦤꦺꦃ꧈ꦱꦥꦱꦶꦁꦏꦼꦥꦺꦔꦶꦤ꧀ꦔ꧀ꦭꦢꦺꦤ꧀ꦤꦶꦲꦏꦸꦏꦸꦢꦸꦔꦼꦠꦸꦠ꧀ꦠꦏꦺꦲꦏꦸ꧈ꦱꦸꦥꦪꦧꦶꦱꦩꦺꦭꦸꦲꦏꦸꦔꦼꦤ꧀ꦢꦶꦥꦫꦤ꧀ꦏꦸ꧉ꦱꦥꦱꦶꦁꦔ꧀ꦭꦢꦺꦤ꧀ꦤꦶꦲꦏꦸꦧꦏꦭ꧀ꦢꦶꦲꦗꦺꦤ꧀ꦤꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉”
27꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦲꦠꦶꦏꦸꦱꦲꦶꦏꦶꦱꦼꦢꦶꦭꦤ꧀ꦧꦶꦔꦸꦁ꧉ꦭꦃꦲꦏꦸꦏꦸꦢꦸꦔꦺꦴꦩꦺꦴꦁꦲꦥ?ꦩꦺꦴꦱꦺꦴꦏ꧀ꦲꦏꦸꦤꦼꦩ꧀ꦧꦸꦁꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦸꦥꦪꦲꦏꦸꦲꦺꦴꦫꦲꦸꦱꦃꦔ꧀ꦭꦏꦺꦴꦤ꧀ꦤꦶꦏꦱꦁꦱꦫꦤ꧀ꦲꦶꦏꦶ?ꦲꦺꦴꦫ꧈ꦲꦮꦶꦠ꧀ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺꦠꦸꦗꦸꦮꦤ꧀ꦤꦺꦔ꧀ꦭꦏꦺꦴꦤ꧀ꦤꦶꦏꦸꦮꦶ!” 28ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤ꧀ꦢꦺꦴꦁꦔ:“ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦲꦩ꧀ꦧꦺꦴꦏ꧀ꦢꦶꦭꦸꦲꦸꦂꦫꦏꦺꦗꦼꦤꦼꦁꦩꦸ!”
꧋ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦤ꧀ꦢꦺꦴꦁꦔꦔꦺꦴꦤꦺꦴꦏꦸꦮꦶꦠꦼꦫꦸꦱ꧀ꦲꦺꦤꦺꦁꦱ꧀ꦮꦫꦱꦁꦏꦭꦔꦶꦠ꧀ꦔꦺꦴꦩꦺꦴꦁꦔꦺꦤꦺ:“ꦮꦶꦱ꧀ꦠꦏ꧀ꦏꦺꦠꦺꦴꦏ꧀ꦏꦏꦺꦏ꧀ꦮꦱꦏꦸ꧈ꦤꦁꦔꦶꦁꦧꦏꦭ꧀ꦠꦏ꧀ꦮꦸꦗꦸꦠ꧀ꦠꦏꦺꦱꦼꦥꦶꦱ꧀ꦱꦤ꧀ꦩꦼꦤꦺꦃ!”
29꧋ꦮꦺꦴꦁꦮꦺꦴꦁꦱꦶꦁꦤꦁꦏꦺꦴꦤꦺꦴꦲꦸꦒꦏꦿꦸꦔꦸꦱ꧀ꦮꦫꦤꦺ꧈ꦤ꧀ꦢꦫꦤ꧀ꦤꦶꦲꦺꦤꦺꦁꦒ꧀ꦭꦸꦢꦸꦏ꧀꧈ꦭꦶꦪꦭꦶꦪꦤꦺꦔꦺꦴꦩꦺꦴꦁꦤꦺꦏ꧀ꦲꦺꦤꦺꦁꦩꦸꦭꦺꦏꦠ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈
30꧋ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦱ꧀ꦮꦫꦏꦸꦮꦶꦩꦲꦸꦲꦺꦴꦫꦏꦁꦒꦺꦴꦲꦏꦸ꧈ꦤꦁꦔꦶꦁꦏꦁꦒꦺꦴꦏꦺꦴꦮꦺ꧉ 31ꦱꦲꦶꦏꦶꦮꦶꦱ꧀ꦮꦚ꧀ꦕꦶꦤꦺꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦤ꧀ꦢꦸꦢꦸꦃꦲꦏꦺꦱꦭꦃꦲꦺꦩꦤꦸꦁꦱꦤꦁꦗꦒꦠ꧀ꦏꦺꦤꦺ꧉ꦱꦲꦶꦏꦶꦮꦶꦱ꧀ꦮꦚ꧀ꦕꦶꦤꦺꦲꦼꦁꦒꦺꦴꦤꦺꦱꦺꦠꦤ꧀꧈ꦱꦶꦁꦔ꧀ꦮꦱꦤꦶꦗꦒꦠ꧀ꦲꦶꦏꦶ꧈ꦧꦏꦭ꧀ꦢꦶꦲꦼꦢꦸꦤ꧀ꦤꦏꦺ꧉ 32ꦤꦁꦔꦶꦁꦲꦏꦸꦧꦏꦭ꧀ꦢꦶꦲꦸꦁꦒꦃꦲꦏꦺꦱꦁꦏꦧꦸꦩꦶꦲꦶꦏꦶ꧉ꦤꦺꦏ꧀ꦲꦏꦸꦢꦶꦲꦸꦁꦒꦃꦲꦏꦺꦱꦁꦏꦧꦸꦩꦶꦲꦶꦏꦶ꧈ꦲꦏꦸꦧꦏꦭ꧀ꦤꦫꦶꦏ꧀ꦮꦺꦴꦁꦏꦧꦺꦃꦩꦫꦁꦲꦏꦸ!” 33ꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦩꦠꦶꦤꦁꦏꦪꦸꦥꦼꦤ꧀ꦠꦺꦁꦔꦤ꧀꧈
34꧋ꦩꦸꦭꦤꦺꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦱꦼꦩꦲꦸꦂ:“ꦭꦺꦴ꧈ꦲꦮꦏ꧀ꦏꦺꦢꦺꦮꦺꦔꦼꦂꦠꦶꦱꦁꦏꦏꦶꦠꦧ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉ꦭꦃꦗꦫꦺꦤꦺꦏꦺꦴꦮꦺꦲꦤꦏ꧀ꦏꦺꦩꦤꦸꦁꦱ꧈ꦭꦃꦏꦺꦴꦮꦺꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺꦧꦏꦭ꧀ꦩꦠꦶ꧉ꦭꦃꦲꦤꦏ꧀ꦏꦺꦩꦤꦸꦁꦱꦏꦸꦮꦶꦱꦥ?”
35꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦮꦺꦴꦁꦮꦺꦴꦁ:“ꦲꦗꦥꦢꦧꦶꦔꦸꦁ꧉ꦥꦼꦥꦢꦁꦲꦶꦏꦶꦤꦁꦠꦼꦔꦃꦩꦸꦩꦸꦁꦓꦫꦺꦏ꧀ꦱꦏ꧀ꦒꦼꦧꦾꦂꦫꦤ꧀ꦮꦲꦺ꧉ꦩꦸꦭꦤꦺ꧈ꦦꦸꦩ꧀ꦥꦸꦁꦲꦶꦗꦶꦏ꧀ꦲꦺꦤꦺꦁ꧈ꦩ꧀ꦭꦏꦸꦮꦤꦁꦥꦼꦥꦢꦁ꧉ꦩꦼꦁꦏꦺꦴꦤꦺꦏ꧀ꦮꦶꦱ꧀ꦥꦼꦠꦼꦁꦏꦺꦴꦮꦺꦲꦺꦴꦫꦮꦼꦫꦸꦃꦢꦭꦤ꧀꧈ 36ꦥꦽꦕꦪꦲꦩꦫꦁ ꦥꦼꦥꦢꦁ꧈ꦦꦸꦩ꧀ꦥꦸꦁꦲꦶꦗꦶꦏ꧀ꦲꦺꦤꦺꦁꦤꦁꦠꦼꦔꦃꦩꦸ꧈ꦱꦸꦥꦪꦏꦺꦴꦮꦺꦢꦢꦶꦲꦤꦏ꧀ꦏꦺꦥꦼꦥꦢꦁ꧉”
꧋ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ꧈ꦲꦺꦴꦫꦔꦺꦠꦺꦴꦏ꧀ꦩꦫꦁꦮꦺꦴꦁꦮꦺꦴꦁ꧉ 37ꦤꦁꦔꦶꦁꦱꦼꦤꦗꦤ꧀ꦤꦒꦸꦱ꧀ꦠꦶꦪꦺꦯꦸꦱ꧀ꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺꦭꦤ꧀ꦮꦺꦴꦁꦮꦺꦴꦁꦥꦢꦮꦼꦫꦸꦃꦢꦺꦮꦺ꧈ꦩꦼꦏ꧀ꦱꦮꦺꦴꦁꦮꦺꦴꦁꦲꦺꦴꦫꦥꦽꦕꦪꦩꦫꦁ ꦢꦺꦏ꧀ꦤꦺ꧉ 38ꦥꦚ꧀ꦕꦺꦤ꧀ꦕꦺꦴꦕꦺꦴꦏ꧀ꦠꦼꦤꦤ꧀ꦏꦫꦺꦴꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦤꦧꦶꦪꦺꦱꦪ꧈ꦱꦶꦁꦲꦸꦤꦶꦤꦺꦔꦺꦤꦺ:
“ꦒꦸꦱ꧀ꦠꦶ꧈ꦱꦥꦱꦶꦁꦒꦼꦊꦩ꧀ꦥꦽꦕꦪꦠꦼꦩ꧀ꦧꦸꦁꦔꦺꦲꦮꦏ꧀ꦏꦺꦢꦺꦮꦺ?
ꦱꦥꦱꦶꦁꦒꦼꦊꦩ꧀ꦔ꧀ꦒꦠꦺꦏ꧀ꦏꦏꦺꦩꦫꦁꦏ꧀ꦮꦱꦩꦸ?ꦲꦺꦴꦫꦲꦺꦤꦺꦁ!”
39꧋ꦩꦸꦭꦤꦺ꧈ꦏꦔꦺꦭ꧀ꦭꦤ꧀ꦠꦼꦤꦤ꧀ꦮꦺꦴꦁꦮꦺꦴꦁꦲꦼꦁꦒꦺꦴꦤꦺꦲꦉꦥ꧀ꦥꦽꦕꦪ꧉ꦤꦧꦶꦪꦺꦱꦪꦩ꧀ꦧꦶꦪꦺꦤ꧀ꦪꦮꦶꦱ꧀ꦠꦲꦸꦔꦺꦴꦩꦺꦴꦁꦔꦺꦤꦺꦲꦩ꧀ꦧꦫꦁ:
40“ꦒꦸꦱ꧀ꦠꦶꦄꦭ꧀ꦭꦃꦱꦶꦁꦩꦫꦏ꧀ꦏꦏꦺꦮꦺꦴꦁꦮꦺꦴꦁꦲꦺꦴꦫꦮꦼꦫꦸꦃ
ꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦱꦶꦁꦩꦫꦏ꧀ꦏꦏꦺꦮꦺꦴꦁꦮꦺꦴꦁꦲꦠꦶꦤꦺꦏꦏꦸ꧉
ꦤꦺꦏ꧀ꦲꦺꦴꦫꦔꦺꦴꦤꦺꦴ꧈ꦩꦼꦁꦏꦺꦴꦤ꧀ꦢꦏ꧀ꦥꦢꦢꦸꦤꦸꦁ
ꦭꦤ꧀ꦥꦢꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦢꦶꦮꦫꦱ꧀ꦱꦏꦺ꧉”
41꧋ꦏꦸꦮꦶꦩꦲꦸꦤꦧꦶꦪꦺꦱꦪꦔꦺꦴꦩꦺꦴꦁꦔꦏꦺꦧꦧ꧀ꦒꦸꦱ꧀ꦠꦶꦪꦺꦯꦸꦱ꧀ ꦲꦮꦶꦠ꧀ꦤꦧꦶꦪꦺꦱꦪꦮꦶꦱ꧀ꦮꦼꦫꦸꦃꦏ꧀ꦮꦱꦤꦺꦒꦸꦱ꧀ꦠꦶꦪꦺꦯꦸꦱ꧀꧈
42꧋ꦤꦁꦔꦶꦁꦱꦼꦤꦗꦤ꧀ꦏꦼꦥꦿꦶꦪꦺꦮꦲꦺꦲꦺꦤꦺꦁꦮꦺꦴꦁꦒꦼꦢꦺꦒꦼꦢꦺꦥꦶꦫꦁꦥꦶꦫꦁ꧈ꦪꦏꦸꦮꦶꦥꦼꦁꦒꦼꦢꦺꦥꦼꦁꦒꦼꦢꦺꦤꦺꦮꦺꦴꦁꦙꦸ꧈ꦱꦶꦁꦥꦢꦥꦽꦕꦪꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉ꦤꦁꦔꦶꦁꦮꦺꦴꦁꦮꦺꦴꦁꦲꦶꦏꦶꦥꦢꦮꦼꦢꦶꦏꦫꦺꦴꦥꦫꦥ꦳ꦫꦶꦱꦶ꧈ꦩꦸꦭꦤꦺꦲꦺꦴꦫꦒꦼꦊꦩ꧀ꦧ꧀ꦭꦏꦤꦺꦏ꧀ꦥꦽꦕꦪ꧈ꦩꦼꦁꦏꦺꦴꦤ꧀ꦢꦏ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀꧈ 43ꦏꦫꦺꦴꦩꦼꦤꦺꦃꦮꦺꦴꦁꦮꦺꦴꦁꦭꦸꦮꦶꦃꦱꦼꦤꦼꦁꦢꦶꦲꦼꦊꦩ꧀ꦩꦤꦸꦁꦱꦠꦼꦤꦶꦩ꧀ꦧꦁꦢꦶꦲꦼꦊꦩ꧀ꦒꦸꦱ꧀ꦠꦶꦄꦭ꧀ꦭꦃ꧉
44꧋ꦲꦶꦁꦭꦶꦪꦢꦶꦤꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦮꦺꦴꦁꦮꦺꦴꦁ:“ꦮꦺꦴꦁꦱꦶꦁꦥꦽꦕꦪꦩꦫꦁꦲꦏꦸꦏꦸꦮꦶꦱꦏ꧀ꦗꦤꦺꦲꦺꦴꦫꦤꦩꦸꦁꦥꦽꦕꦪꦩꦫꦁꦲꦏꦸꦮꦲꦺ꧈ꦤꦁꦔꦶꦁꦮꦺꦴꦁꦏꦸꦮꦶꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 45ꦢꦢꦶꦤꦺꦮꦺꦴꦁꦱꦶꦁꦮꦼꦫꦸꦃꦲꦏꦸꦏꦸꦮꦶꦲꦸꦒꦮꦼꦫꦸꦃꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 46ꦠꦼꦏꦏꦸꦤꦁꦗꦒꦠ꧀ꦏꦺꦤꦺꦢꦢꦶꦥꦼꦥꦢꦁ꧈ꦱꦸꦥꦪꦮꦺꦴꦁꦱꦶꦁꦥꦽꦕꦪꦩꦫꦁꦲꦏꦸꦲꦺꦴꦫꦤꦁꦥꦼꦥꦼꦠꦼꦁꦩꦼꦤꦺꦃ꧉ 47ꦤꦺꦏ꧀ꦲꦺꦤꦺꦁꦮꦺꦴꦁꦔꦿꦸꦔꦺꦴꦏ꧀ꦏꦏꦺꦥꦶꦠꦸꦠꦸꦂꦏꦸꦤꦁꦔꦶꦁꦲꦺꦴꦫꦢꦶꦭꦏꦺꦴꦤ꧀ꦤꦶ꧈ꦲꦏꦸꦲꦺꦴꦫꦧꦏꦭ꧀ꦚꦼꦠꦿꦥ꧀ꦮꦺꦴꦁꦏꦸꦮꦶ꧉ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺꦲꦺꦴꦫꦲꦉꦥ꧀ꦚꦭꦃꦚꦭꦃꦲꦏꦺꦩꦤꦸꦁꦱ꧈ꦲꦺꦴꦫ꧉ꦲꦏꦸꦩ꧀ꦧꦿꦺꦤꦺꦲꦶꦏꦶꦲꦉꦥ꧀ꦤꦸꦭꦸꦁꦔꦶꦩꦤꦸꦁꦱ꧉ 48ꦲꦏꦸꦲꦺꦴꦫꦧꦏꦭ꧀ꦚꦭꦃꦚꦭꦃꦲꦏꦺꦮꦺꦴꦁꦱꦶꦁꦚꦼꦥꦺꦭꦺꦏ꧀ꦏꦏꦺꦲꦏꦸꦭꦤ꧀ꦱꦶꦁꦲꦺꦴꦫꦩꦤꦸꦠ꧀ꦥꦶꦠꦸꦠꦸꦂꦏꦸ꧈ꦲꦺꦴꦫ!ꦤꦁꦔꦶꦁꦥꦶꦠꦸꦠꦸꦂꦱꦶꦁꦠꦏ꧀ꦒꦼꦭꦂꦫꦏꦺ꧈ꦏꦸꦮꦶꦱꦶꦁꦧꦏꦭ꧀ꦚꦭꦃꦚꦭꦃꦲꦏꦺꦩꦤꦸꦁꦱ꧈ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦧꦺꦃꦮꦺꦴꦁꦧꦏꦭ꧀ꦢꦶꦏꦿꦸꦠꦸ꧉ 49ꦲꦼꦁꦒꦺꦴꦤ꧀ꦏꦸꦩꦼꦩꦸꦭꦁꦲꦺꦴꦫꦩꦼꦠꦸꦱꦁꦏꦏꦉꦥ꧀ꦏꦸꦢꦺꦮꦺ꧈ꦲꦺꦴꦫ꧉ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧈ꦢꦺꦏ꧀ꦤꦺꦱꦶꦁꦔꦺꦴꦩꦺꦴꦁꦔꦶꦲꦏꦸꦲꦥꦱꦶꦁꦏꦸꦢꦸꦠꦏ꧀ꦲꦺꦴꦩꦺꦴꦁ꧉ 50ꦭꦤ꧀ꦲꦏꦸꦔꦼꦂꦠꦶꦤꦺꦏ꧀ꦱꦶꦁꦢꦶꦏꦉꦥ꧀ꦥꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦔ꧀ꦒꦮꦲꦸꦫꦶꦥ꧀ꦭꦁꦒꦼꦁꦏꦁꦒꦺꦴꦩꦤꦸꦁꦱ꧉ꦩꦸꦭꦤꦺ꧈ꦱꦶꦁꦠꦏ꧀ꦲꦺꦴꦩꦺꦴꦁꦪꦤꦩꦸꦁꦲꦥꦲꦺꦴꦩꦺꦴꦁꦔꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉”
꧇꧑꧓꧇ 1꧋ꦫꦶꦪꦪꦥꦱ꧀ꦏꦃꦮꦶꦱ꧀ꦏꦸꦫꦁꦱꦼꦢꦶꦤ꧉ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦔꦼꦂꦠꦶꦤꦺꦏ꧀ꦱꦲꦶꦏꦶꦢꦺꦏ꧀ꦤꦺꦏꦸꦢꦸꦤꦶꦁꦒꦭ꧀ꦗꦒꦠ꧀ꦏꦺꦤꦺꦭꦤ꧀ꦏꦸꦢꦸꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦥꦚ꧀ꦕꦺꦤ꧀ꦤꦿꦺꦱ꧀ꦤꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦢꦺꦱꦶꦁꦤꦁꦗꦒꦠ꧀ꦏꦺꦤꦺꦭꦤ꧀ꦱꦲꦶꦏꦶꦢꦺꦏ꧀ꦤꦺꦏꦼꦥꦺꦔꦶꦤ꧀ꦤ꧀ꦢꦸꦢꦸꦃꦲꦏꦺꦤꦺꦏ꧀ꦏꦠꦿꦺꦱ꧀ꦤꦤꦺꦢꦺꦏ꧀ꦤꦺꦭꦁꦒꦼꦁ꧉
2꧋ꦱꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦲꦶꦗꦶꦏ꧀ꦗꦼꦗꦒꦺꦴꦁꦔꦤ꧀ꦩꦁꦔꦤ꧀꧈ꦪꦸꦢꦱ꧀ ꦲꦤꦏ꧀ꦏꦺꦱꦶꦩꦺꦴꦤ꧀ꦆꦱ꧀ꦏꦫꦶꦪꦺꦴꦠ꧀ ꦮꦶꦱ꧀ꦢꦶꦏꦼꦤꦺꦁꦏꦫꦺꦴꦱꦺꦠꦤ꧀ꦭꦤ꧀ꦲꦉꦥ꧀ꦔꦼꦭꦸꦁꦔꦏꦺꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦩꦸꦁꦱꦸꦃꦲꦺ꧉ 3ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦔꦼꦂꦠꦶꦏꦸꦮꦶꦭꦤ꧀ꦢꦺꦏ꧀ꦤꦺꦲꦸꦒꦔꦼꦂꦠꦶꦤꦺꦏ꧀ꦱꦼꦩ꧀ꦧꦫꦁꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁꦢꦺꦏ꧀ꦤꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ꦒꦸꦱ꧀ꦠꦶꦪꦺꦯꦸꦱ꧀ꦲꦸꦒꦔꦼꦂꦠꦶꦤꦺꦏ꧀ꦢꦺꦏ꧀ꦤꦺꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦏꦸꦢꦸꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉ 4ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦔꦢꦼꦏ꧀ ꦱꦭꦶꦤ꧀ꦤꦺꦚ꧀ꦗꦧꦢꦶꦱꦺꦭꦺꦃꦲꦏꦺ꧈ꦠꦼꦫꦸꦱ꧀ꦔꦸꦧꦼꦠ꧀ꦠꦏꦺꦒꦺꦴꦩ꧀ꦧꦭ꧀ꦤꦁꦧꦁꦏꦺꦏ꧀ꦏꦤ꧀ꦤꦺ꧉ 5ꦱꦏ꧀ꦮꦶꦱ꧀ꦱꦺꦏꦸꦮꦶꦱꦶꦏꦶꦭ꧀ꦭꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦢꦶꦱꦶꦫꦩ꧀ꦩꦶꦭꦤ꧀ꦢꦶꦮꦶꦱꦸꦃꦲꦶꦠꦼꦫꦸꦱ꧀ꦢꦶꦭꦥ꧀ꦥꦶꦏꦫꦺꦴꦒꦺꦴꦩ꧀ꦧꦭ꧀ꦱꦶꦁꦢꦶꦲꦸꦧꦼꦠ꧀ꦠꦏꦺꦤꦁꦧꦁꦏꦺꦏ꧀ꦏꦤ꧀ꦤꦺꦩꦲꦸ꧉ 6ꦏꦢꦸꦁꦠꦶꦧꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦱꦶꦁꦏꦸꦢꦸꦢꦶꦱꦶꦫꦩ꧀ꦱꦶꦏꦶꦭ꧀ꦭꦺ꧈ꦢꦺꦏ꧀ꦤꦺꦩꦼꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦒꦸꦱ꧀ꦠꦶ꧈ꦩꦺꦴꦱꦺꦴꦏ꧀ꦏꦺꦴꦮꦺꦲꦉꦥ꧀ꦩꦶꦱꦸꦃꦲꦶꦱꦶꦏꦶꦭ꧀ꦏꦸ?”
7꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦼꦁꦒꦺꦴꦤ꧀ꦏꦸꦩꦶꦱꦸꦃꦲꦶꦱꦶꦏꦶꦭ꧀ꦩꦸꦲꦶꦏꦶꦱꦲꦶꦏꦶꦏꦺꦴꦮꦺꦢꦸꦫꦸꦁꦔꦼꦂꦠꦶꦲꦥꦠꦼꦒꦼꦱ꧀ꦱꦺ꧈ꦤꦁꦔꦶꦁꦲꦩ꧀ꦧꦺꦱꦸꦏ꧀ꦏꦺꦴꦮꦺꦧꦏꦭ꧀ꦢꦸꦤꦸꦁ꧉”
8꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗꦒꦸꦱ꧀ꦠꦶ꧈ꦏꦺꦴꦮꦺꦲꦗꦥꦶꦱꦤ꧀ꦥꦶꦱꦤ꧀ꦩꦶꦱꦸꦃꦲꦶꦱꦶꦏꦶꦭ꧀ꦏꦸ!”
꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦤꦺꦏ꧀ꦏꦺꦴꦮꦺꦲꦺꦴꦫꦠꦏ꧀ꦮꦶꦱꦸꦃꦲꦶ꧈ꦏꦺꦴꦮꦺꦲꦺꦴꦫꦧꦶꦱꦚꦩ꧀ꦧꦸꦠ꧀ꦠꦏꦫꦺꦴꦲꦏꦸ꧉”
9꧋ꦱꦲꦶꦏꦶꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦔꦺꦴꦤꦺꦴꦪꦲꦗꦤꦩꦸꦁꦱꦶꦏꦶꦭ꧀ꦏꦸꦱꦶꦁꦢꦶꦮꦶꦱꦸꦃꦲꦶ꧈ꦤꦁꦔꦶꦁꦠꦔꦤ꧀ꦏꦸꦭꦤ꧀ꦱꦶꦫꦃꦏꦸꦲꦩ꧀ꦧꦫꦁ!”
10꧋ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦮꦺꦴꦁꦱꦶꦁꦮꦶꦱ꧀ꦲꦢꦸꦱ꧀ꦏꦸꦮꦶꦮꦶꦱ꧀ꦉꦱꦶꦏ꧀ꦏꦧꦺꦃꦲꦮꦏ꧀ꦏꦺ꧉ꦤꦩꦸꦁꦱꦶꦏꦶꦭ꧀ꦭꦺꦱꦶꦁꦏꦸꦢꦸꦢꦶꦮꦶꦱꦸꦃꦲꦶ꧉ꦏꦺꦴꦮꦺꦮꦶꦱ꧀ꦉꦱꦶꦏ꧀ ꦲꦮꦶꦠ꧀ꦱꦭꦃꦩꦸꦮꦶꦱ꧀ꦢꦶꦔꦥꦸꦫ꧈ꦤꦁꦔꦶꦁꦲꦺꦴꦫꦏꦺꦴꦮꦺꦏꦧꦺꦃ꧉” 11ꦒꦸꦱ꧀ꦠꦶꦪꦺꦯꦸꦱ꧀ꦔꦼꦂꦠꦶꦱꦥꦱꦶꦁꦲꦉꦥ꧀ꦔꦼꦭꦸꦁꦔꦏꦺꦢꦺꦏ꧀ꦤꦺꦩꦫꦁꦩꦸꦁꦱꦸꦃꦲꦺ꧈ꦩꦸꦭꦤꦺꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦲꦺꦴꦫꦏꦧꦺꦃꦉꦱꦶꦏ꧀꧈
12꧋ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦩꦶꦱꦸꦃꦲꦶꦱꦶꦏꦶꦭ꧀ꦭꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ꧈ꦢꦺꦏ꧀ꦤꦺꦠꦼꦫꦸꦱ꧀ꦔꦁꦒꦺꦴꦱꦭꦶꦤ꧀ꦤꦺꦚ꧀ꦗꦧꦩꦼꦤꦺꦃꦠꦼꦫꦸꦱ꧀ꦚ꧀ꦗꦒꦺꦴꦁ꧉ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦥꦏꦺꦴꦮꦺꦥꦢꦢꦸꦤꦸꦁꦏꦼꦤꦺꦁꦲꦥꦏꦺꦴꦏ꧀ꦲꦏꦸꦩꦶꦱꦸꦃꦲꦶꦱꦶꦏꦶꦭ꧀ꦩꦸ? 13ꦏꦺꦴꦮꦺꦭꦲꦸꦠ꧀ꦔꦫꦤ꧀ꦤꦶꦲꦏꦸꦲꦶꦏꦶꦒꦸꦫꦸꦩꦸꦭꦤ꧀ꦒꦸꦱ꧀ꦠꦶꦩꦸꦠ?ꦏꦸꦮꦶꦧꦼꦤꦼꦂ꧈ꦲꦏꦸꦥꦚ꧀ꦕꦺꦤ꧀ꦒꦸꦫꦸꦩꦸꦭꦤ꧀ꦒꦸꦱ꧀ꦠꦶꦩꦸꦠꦼꦤꦤ꧀꧈ 14ꦭꦃꦤꦺꦏ꧀ꦲꦏꦸꦲꦶꦏꦶ꧈ꦱꦶꦁꦢꦢꦶꦒꦸꦫꦸꦩꦸꦭꦤ꧀ꦒꦸꦱ꧀ꦠꦶꦩꦸ꧈ꦩꦶꦱꦸꦃꦲꦶꦱꦶꦏꦶꦭ꧀ꦩꦸ꧈ꦏꦺꦴꦮꦺꦲꦸꦒꦏꦸꦢꦸꦩꦶꦱꦸꦃꦲꦶꦱꦶꦏꦶꦭ꧀ꦭꦺꦭꦶꦪꦤꦺ꧉ 15ꦲꦏꦸꦮꦶꦱ꧀ꦔꦼꦏꦺꦏ꧀ꦏꦶꦠꦸꦭꦢꦩꦫꦁꦏꦺꦴꦮꦺ꧈ꦏꦸꦮꦶꦏꦸꦢꦸꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶꦲꦸꦒ꧉ 16ꦩꦸꦭꦤꦺꦥꦢꦲꦺꦭꦶꦁꦔꦱꦶꦁꦠꦏ꧀ꦲꦺꦴꦩꦺꦴꦁꦲꦶꦏꦶ:ꦱ꧀ꦭꦥ꦳꧀ꦏꦸꦮꦶꦲꦺꦴꦫꦔꦸꦁꦏꦸꦭ꧀ꦭꦶꦱꦶꦁꦤ꧀ꦢꦸꦮꦺꦭꦤ꧀ꦮꦺꦴꦁꦱꦶꦁꦢꦶꦏꦺꦴꦁꦏꦺꦴꦤ꧀ꦲꦺꦴꦫꦔꦸꦁꦏꦸꦭ꧀ꦭꦶꦱꦶꦁꦔꦺꦴꦁꦏꦺꦴꦤ꧀꧈ 17ꦱꦲꦶꦏꦶꦏꦺꦴꦮꦺꦮꦶꦱ꧀ꦥꦢꦔꦼꦂꦠꦶꦲꦶꦏꦶ꧈ꦧꦼꦗꦏꦺꦴꦮꦺ꧈ꦤꦺꦏ꧀ꦏꦸꦮꦶꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ꧉”
18꧋“ꦤꦁꦔꦶꦁꦲꦏꦸꦲꦺꦴꦫꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺꦏꦧꦺꦃꦧꦏꦭ꧀ꦱ꧀ꦭꦩꦼꦠ꧀꧈ꦲꦏꦸꦔꦼꦂꦠꦶꦱꦥꦱꦶꦁꦠꦏ꧀ꦥꦶꦭꦶꦃ꧉ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ:'ꦮꦺꦴꦁꦱꦶꦁꦩꦁꦔꦤ꧀ꦧꦉꦁꦏꦫꦺꦴꦲꦏꦸꦧꦏꦭ꧀ꦩꦸꦁꦱꦸꦃꦲꦏꦸ꧉'ꦠꦸꦭꦶꦱ꧀ꦱꦤ꧀ꦏꦸꦮꦶꦏꦸꦢꦸꦏ꧀ꦭꦏꦺꦴꦤ꧀꧈ 19ꦏꦸꦮꦶꦢꦸꦫꦸꦁꦏ꧀ꦭꦏꦺꦴꦤ꧀ ꦤꦁꦔꦶꦁꦏꦺꦴꦮꦺꦱꦲꦶꦏꦶꦩꦺꦴꦭꦃꦲꦶꦠꦏ꧀ꦲꦺꦴꦩꦺꦴꦁꦔꦶ꧉ꦢꦢꦶꦤꦺꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦏ꧀ꦭꦏꦺꦴꦤ꧀ ꦏꦺꦴꦮꦺꦏꦧꦺꦃꦥꦢꦥꦽꦕꦪꦤꦺꦏ꧀ꦲꦏꦸꦲꦶꦏꦶꦱꦶꦁꦢꦶꦏꦺꦴꦁꦏꦺꦴꦤ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ 20ꦲꦺꦭꦶꦁꦔꦲꦶꦏꦶ:ꦱꦥꦱꦶꦁꦤꦩ꧀ꦥꦏꦺꦴꦁꦏꦺꦴꦤꦤ꧀ꦏꦸꦪꦤꦩ꧀ꦥꦲꦏꦸ꧉ꦭꦤ꧀ꦱꦥꦤꦩ꧀ꦥꦲꦏꦸꦪꦤꦩ꧀ꦥꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉”
21꧋ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦱꦼꦢꦶꦲꦠꦶꦤꦺ꧉ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦏꦸꦲꦺꦴꦫꦒꦺꦴꦫꦺꦴꦃ꧉ꦲꦺꦤꦺꦁꦱꦶꦗꦶꦤꦁꦠꦼꦔꦃꦩꦸꦱꦶꦁꦧꦏꦭ꧀ꦔꦼꦭꦸꦁꦔꦏꦺꦲꦏꦸꦩꦫꦁꦩꦸꦁꦱꦸꦃꦲꦺ꧉”
22꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦲꦺꦴꦫꦥꦠꦺꦏꦥꦽꦕꦪꦠꦼꦫꦸꦱ꧀ꦥꦢꦤ꧀ꦢꦼꦭꦺꦴꦏ꧀ꦏꦏꦺꦱꦏ꧀ꦥꦢꦥꦢ꧈ꦲꦺꦴꦫꦔꦼꦂꦠꦶꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦔꦺꦴꦩꦺꦴꦁꦔꦏꦺꦱꦥ꧉ 23ꦫꦱꦸꦭ꧀ꦪꦺꦴꦲꦤꦼꦱ꧀ ꦩꦸꦫꦶꦢ꧀ꦱꦶꦁꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ ꦚ꧀ꦗꦒꦺꦴꦁꦤꦁꦗꦺꦗꦺꦂꦫꦺ꧉ 24ꦩꦸꦭꦤꦺꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦠꦏꦺꦴꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀ ꦱꦥꦱꦶꦁꦲꦉꦥ꧀ꦔꦼꦭꦸꦁꦔꦏꦺꦢꦺꦏ꧀ꦤꦺꦩꦫꦁꦩꦸꦁꦱꦸꦃꦲꦺ꧉
25꧋ꦫꦱꦸꦭ꧀ꦪꦺꦴꦲꦤꦼꦱ꧀ꦠꦼꦫꦸꦱ꧀ꦭꦺꦤ꧀ꦢꦺꦤ꧀ꦚꦼꦢꦼꦏ꧀ꦏꦶꦒꦸꦱ꧀ꦠꦶꦪꦺꦯꦸꦱ꧀ꦏꦫꦺꦴꦠꦏꦺꦴꦤ꧀:“ꦱꦥꦠꦒꦸꦱ꧀ꦠꦶ?”
26꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦏꦸꦲꦉꦥ꧀ꦔꦼꦕ꧀ꦭꦸꦥ꧀ꦥꦏꦺꦫꦺꦴꦠꦶꦱꦏ꧀ꦕꦸꦮꦶꦭ꧀ꦤꦁꦩꦁꦏꦺꦴꦏ꧀꧈ꦱꦶꦁꦠꦏ꧀ꦲꦼꦭꦸꦁꦔꦶꦕꦸꦮꦶꦭ꧀ꦭꦤ꧀ꦫꦺꦴꦠꦶ꧈ꦪꦏꦸꦮꦶꦮꦺꦴꦁꦔꦺ!”ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦼꦕ꧀ꦭꦸꦥ꧀ꦥꦏꦺꦫꦺꦴꦠꦶꦱꦏ꧀ꦕꦸꦮꦶꦭ꧀ꦤꦁꦩꦁꦏꦺꦴꦏ꧀ꦏꦺꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦩꦫꦁꦪꦸꦢꦱ꧀ ꦲꦤꦏ꧀ꦏꦺꦱꦶꦩꦺꦴꦤ꧀ꦆꦱ꧀ꦏꦫꦶꦪꦺꦴꦠ꧀꧈ 27ꦏꦢꦸꦁꦪꦸꦢꦱ꧀ꦤꦩ꧀ꦥꦤꦶꦫꦺꦴꦠꦶꦏꦸꦮꦶꦩꦲꦸ꧈ꦱꦺꦠꦤ꧀ꦠꦼꦫꦸꦱ꧀ꦔ꧀ꦊꦧꦺꦴꦤ꧀ꦤꦶꦢꦺꦏ꧀ꦤꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁꦪꦸꦢꦱ꧀:“ꦲꦥꦱꦶꦁꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺꦤ꧀ꦢꦁꦢꦶꦭꦏꦺꦴꦤ꧀ꦤꦶ꧉” 28ꦤꦁꦔꦶꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦲꦺꦴꦫꦢꦸꦤꦸꦁꦱꦶꦁꦢꦶꦲꦺꦴꦩꦺꦴꦁꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦪꦸꦢꦱ꧀꧈ 29ꦤ꧀ꦢꦫꦤ꧀ꦤꦶꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦁꦏꦺꦴꦤ꧀ꦪꦸꦢꦱ꧀ꦤ꧀ꦢꦁꦠꦸꦏꦸꦏꦥꦼꦂꦭꦸꦮꦤ꧀ꦤꦺꦫꦶꦪꦪꦩꦶꦁꦒꦸꦥꦱ꧀ꦏꦃꦏꦸꦮꦶ꧈ꦲꦥꦔꦼꦏꦺꦏ꧀ꦏꦶꦢꦸꦮꦶꦠ꧀ꦩꦫꦁꦮꦺꦴꦁꦱꦶꦁꦲꦺꦴꦫꦤ꧀ꦢꦸꦮꦺ꧈ꦲꦮꦶꦠ꧀ꦪꦸꦢꦱ꧀ꦱꦶꦁꦚꦼꦏꦼꦭ꧀ꦢꦸꦮꦶꦠ꧀꧈
30꧋ꦱꦏ꧀ꦮꦶꦱ꧀ꦱꦺꦪꦸꦢꦱ꧀ꦤꦩ꧀ꦥꦫꦺꦴꦠꦶꦤꦺꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ꧉ꦱꦲꦶꦏꦶꦮꦶꦱ꧀ꦮꦪꦃꦮꦼꦔꦶ꧉
31꧋ꦏꦢꦸꦁꦪꦸꦢꦱ꧀ꦮꦶꦱ꧀ꦭꦸꦔꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦱꦲꦶꦏꦶꦲꦤꦏ꧀ꦏꦺꦩꦤꦸꦁꦱꦧꦏꦭ꧀ꦢꦶꦭꦸꦲꦸꦂꦫꦏꦺꦭꦤ꧀ꦭꦤ꧀ꦠꦂꦫꦤ꧀ꦢꦺꦏ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦢꦶꦭꦸꦲꦸꦂꦫꦏꦺ꧉ 32ꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦢꦶꦭꦸꦲꦸꦂꦫꦏꦺꦭꦤ꧀ꦠꦂꦫꦤ꧀ꦲꦤꦏ꧀ꦏꦺ꧈ꦒꦸꦱ꧀ꦠꦶꦄꦭ꧀ꦭꦃꦲꦸꦒꦧꦏꦭ꧀ꦔ꧀ꦭꦸꦲꦸꦂꦫꦏꦺꦲꦤꦏ꧀ꦏꦺꦭꦤ꧀ꦠꦂꦫꦤ꧀ꦢꦺꦏ꧀ꦤꦺꦢꦺꦮꦺ꧉ꦭꦤ꧀ꦲꦺꦴꦫꦱꦸꦮꦶꦩꦼꦤꦺꦃꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔꦼꦠꦺꦴꦏ꧀ꦏꦏꦺꦲꦶꦏꦶ꧉ 33ꦏꦚ꧀ꦕꦏꦸꦱꦶꦁꦠꦏ꧀ꦠꦿꦺꦱ꧀ꦤꦤ꧀ꦤꦶ꧈ꦲꦼꦁꦒꦺꦴꦤ꧀ꦏꦸꦏꦸꦩ꧀ꦥꦸꦭ꧀ꦏꦫꦺꦴꦏꦺꦴꦮꦺꦓꦫꦺꦏ꧀ꦱꦼꦢꦶꦭꦸꦠ꧀꧈ꦏꦺꦴꦮꦺꦧꦏꦭ꧀ꦔ꧀ꦒꦺꦴꦭꦺꦏ꧀ꦏꦶꦲꦏꦸ꧉ꦲꦏꦸꦮꦶꦱ꧀ꦠꦲꦸꦔꦺꦴꦩꦺꦴꦁꦩꦫꦁꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦭꦤ꧀ꦱꦲꦶꦏꦶꦲꦏꦸꦔꦺꦴꦩꦺꦴꦁꦩꦫꦁꦏꦺꦴꦮꦺ:ꦥꦁꦒꦺꦴꦤ꧀ꦤꦤ꧀ꦱꦶꦁꦠꦏ꧀ꦥꦫꦤ꧀ꦤꦶꦏꦺꦴꦮꦺꦲꦺꦴꦫꦧꦶꦱꦤꦼꦏꦤꦶ꧉ 34ꦱꦲꦶꦏꦶꦏꦺꦴꦮꦺꦠꦏ꧀ꦏꦺꦏ꧀ꦏꦶꦥꦼꦥꦏꦺꦴꦤ꧀ꦲꦚꦂꦱꦶꦁꦏꦸꦢꦸꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶꦠꦼꦤꦤ꧀:ꦥꦢꦠꦿꦺꦱ꧀ꦤꦲꦩꦫꦁꦱꦏ꧀ꦥꦢꦥꦢ꧉ꦏꦪꦲꦼꦁꦒꦺꦴꦤ꧀ꦏꦸꦤꦿꦺꦱ꧀ꦤꦤ꧀ꦤꦶꦏꦺꦴꦮꦺ꧈ꦏꦺꦴꦮꦺꦲꦸꦒꦏꦸꦢꦸꦤꦿꦺꦱ꧀ꦤꦤ꧀ꦤꦶꦱꦏ꧀ꦥꦢꦥꦢ꧉ 35ꦤꦺꦏ꧀ꦏꦺꦴꦮꦺꦥꦢꦠꦿꦺꦱ꧀ꦤꦠꦼꦤꦤ꧀ꦩꦫꦁꦱꦏ꧀ꦥꦢꦥꦢ꧈ꦮꦺꦴꦁꦮꦺꦴꦁꦭꦶꦪꦤꦺꦧꦏꦭ꧀ꦤꦶꦠꦺꦤ꧀ꦤꦶꦤꦺꦏ꧀ꦏꦺꦴꦮꦺꦏꦸꦮꦶꦩꦸꦫꦶꦢ꧀ꦩꦸꦫꦶꦢ꧀ꦏꦸ꧉”
36꧋ꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦠꦏꦺꦴꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦭꦃꦏꦺꦴꦮꦺꦲꦉꦥ꧀ꦭꦸꦔꦤꦁꦲꦼꦤ꧀ꦢꦶꦒꦸꦱ꧀ꦠꦶ?”
꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦱꦲꦶꦏꦶꦢꦸꦫꦸꦁꦧꦶꦱꦩꦺꦭꦸꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦲꦉꦥ꧀ꦠꦏ꧀ꦥꦫꦤ꧀ꦤꦶꦲꦶꦏꦶ꧈ꦤꦁꦔꦶꦁꦲꦩ꧀ꦧꦺꦱꦸꦏ꧀ꦏꦺꦴꦮꦺꦧꦏꦭ꧀ꦤꦸꦠꦸꦠ꧀ꦠꦶꦲꦏꦸ꧉”
37꧋“ꦭꦃꦏꦼꦤꦺꦁꦲꦥꦲꦏꦸꦱꦲꦶꦏꦶꦏꦺꦴꦏ꧀ꦲꦺꦴꦫꦧꦶꦱꦔꦼꦠꦸꦠ꧀ꦠꦏꦺꦏꦺꦴꦮꦺꦒꦸꦱ꧀ꦠꦶ?ꦲꦏꦸꦏꦼꦥꦺꦔꦶꦤ꧀ꦩꦺꦭꦸꦏꦺꦴꦮꦺ꧈ꦱꦼꦤꦗꦤ꧀ꦠꦏ꧀ꦭꦧꦸꦃꦲꦶꦩꦠꦶ!”
38꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦒꦼꦊꦩ꧀ꦠꦼꦤꦤ꧀?ꦲꦺꦴꦫꦦꦺꦠꦿꦸꦱ꧀ ꦠꦶꦠꦺꦤ꧀ꦤꦤꦠ꧈ꦱꦏ꧀ꦢꦸꦫꦸꦁꦔꦺꦗꦒꦺꦴꦏ꧀ꦭꦸꦫꦸꦏ꧀ꦏꦺꦴꦮꦺꦧꦏꦭ꧀ꦔꦺꦴꦩꦺꦴꦁꦱꦩ꧀ꦥꦺꦏ꧀ꦥꦶꦁꦠꦼꦭꦸꦤꦺꦏ꧀ꦏꦺꦴꦮꦺꦲꦺꦴꦫꦏꦼꦤꦭ꧀ꦏꦫꦺꦴꦲꦏꦸ!”
꧇꧑꧔꧇ 1꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ:“ꦏꦺꦴꦮꦺꦲꦗꦥꦢꦱꦼꦢꦶꦭꦤ꧀ꦧꦶꦔꦸꦁ꧈ꦤꦁꦔꦶꦁꦥꦢꦥꦽꦕꦪꦠꦼꦫꦸꦱ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦩꦫꦁꦲꦏꦸ꧉ 2ꦤꦁꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦲꦺꦴꦏꦺꦃꦥꦁꦒꦺꦴꦤ꧀ꦤꦤ꧀ꦤꦺ꧉ꦱꦼꦩꦸꦁꦒꦺꦴꦤ꧀ꦤꦺꦲꦺꦴꦫꦔꦺꦴꦤꦺꦴꦩꦼꦱ꧀ꦠꦶꦏꦺꦴꦮꦺꦪꦠꦏ꧀ꦲꦺꦴꦩꦺꦴꦁꦔꦶ꧉ꦱꦲꦶꦏꦶꦲꦏꦸꦲꦉꦥ꧀ꦧꦸꦢꦭ꧀ꦔ꧀ꦒꦮꦺꦏ꧀ꦏꦏꦺꦥꦁꦒꦺꦴꦤ꧀ꦤꦤ꧀ꦏꦺꦴꦮꦺ꧉ 3ꦤꦺꦏ꧀ꦲꦏꦸꦮꦶꦱ꧀ꦫꦩ꧀ꦥꦸꦁꦲꦏꦸꦧꦏꦭ꧀ꦧꦭꦶꦏ꧀ꦩꦼꦤꦺꦃꦩꦫꦤꦶꦏꦺꦴꦮꦺ꧈ꦱꦸꦥꦪꦏꦺꦴꦮꦺꦧꦶꦱꦩꦁꦒꦺꦴꦤ꧀ꦢꦢꦶꦱꦶꦗꦶꦏꦫꦺꦴꦲꦏꦸ꧉ 4ꦥꦁꦒꦺꦴꦤ꧀ꦤꦤ꧀ꦱꦶꦁꦧꦏꦭ꧀ꦠꦏ꧀ꦥꦫꦤ꧀ꦤꦶꦏꦸꦮꦶꦏꦺꦴꦮꦺꦮꦶꦱ꧀ꦥꦢꦔꦼꦂꦠꦶꦢꦭꦤ꧀ꦤꦺ!”
5꧋ꦫꦱꦸꦭ꧀ꦠꦺꦴꦩꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦒꦸꦱ꧀ꦠꦶ꧈ꦥꦁꦒꦺꦴꦤ꧀ꦤꦤ꧀ꦱꦶꦁꦲꦉꦥ꧀ꦲꦩ꧀ꦧꦺꦴꦏ꧀ꦥꦫꦤ꧀ꦤꦶꦮꦲꦺꦲꦮꦏ꧀ꦏꦺꦢꦺꦮꦺꦲꦺꦴꦫꦔꦼꦂꦠꦶ꧈ꦭꦃꦢꦭꦤ꧀ꦤꦺꦩꦼꦤꦺꦃꦲꦮꦏ꧀ꦏꦺꦢꦺꦮꦺꦔꦼꦂꦠꦶꦪ꧉”
6꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦲꦶꦏꦶꦢꦭꦤ꧀ꦤꦺꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦏꦸꦱꦶꦁꦤ꧀ꦢꦸꦢꦸꦃꦲꦏꦺꦒꦸꦱ꧀ꦠꦶꦄꦭ꧀ꦭꦃꦏꦸꦮꦶꦱꦥꦭꦤ꧀ꦲꦏꦸꦱꦶꦁꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁꦩꦤꦸꦁꦱ꧉ꦲꦺꦴꦫꦲꦺꦤꦺꦁꦮꦺꦴꦁꦧꦶꦱꦩꦫꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦤꦺꦏ꧀ꦲꦺꦴꦫꦭꦶꦮꦠ꧀ꦲꦏꦸ꧉ 7ꦤꦺꦏ꧀ꦏꦺꦴꦮꦺꦔꦼꦂꦠꦶꦲꦏꦸꦏꦺꦴꦮꦺꦪꦔꦼꦂꦠꦶꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦱꦲꦶꦏꦶꦏꦺꦴꦮꦺꦮꦶꦱ꧀ꦔꦼꦂꦠꦶꦢꦺꦏ꧀ꦤꦺ꧈ꦲꦮꦶꦠ꧀ꦏꦺꦴꦮꦺꦮꦶꦱ꧀ꦮꦼꦫꦸꦃꦢꦺꦏ꧀ꦤꦺ꧉ 8ꦫꦱꦸꦭ꧀ꦥ꦳ꦶꦭꦶꦥꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀:ꦒꦸꦱ꧀ꦠꦶ꧈ꦲꦮꦏ꧀ꦏꦺꦢꦺꦮꦺꦮꦶꦱ꧀ꦊꦒꦤꦺꦏ꧀ꦲꦩ꧀ꦧꦺꦴꦏ꧀ꦢꦸꦢꦸꦃꦲꦶꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺꦲꦮꦏ꧀ꦏꦺꦢꦺꦮꦺ!”
9꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥ꦳ꦶꦭꦶꦥꦸꦱ꧀ ꦲꦏꦸꦭꦲꦸꦠ꧀ꦮꦶꦱ꧀ꦱꦸꦮꦶꦧꦼꦧꦉꦁꦔꦤ꧀ꦏꦫꦺꦴꦏꦺꦴꦮꦺꦠ?ꦭꦃꦏꦺꦴꦏ꧀ꦏꦺꦴꦮꦺꦲꦺꦴꦫꦤꦶꦠꦺꦤ꧀ꦤꦶꦲꦏꦸ?ꦱꦥꦱꦶꦁꦮꦼꦫꦸꦃꦲꦏꦸꦪꦮꦼꦫꦸꦃꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦭꦃꦏꦺꦴꦮꦺꦏꦺꦴꦏ꧀ꦲꦶꦗꦶꦏ꧀ꦠꦏꦺꦴꦤ꧀ꦏꦼꦥꦺꦔꦶꦤ꧀ꦮꦼꦫꦸꦃꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ? 10ꦏꦺꦴꦮꦺꦭꦲꦸꦠ꧀ꦔꦼꦂꦠꦶꦠꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦫꦺꦴꦲꦏꦸꦏꦸꦮꦶꦠꦸꦁꦒꦭ꧀ꦭꦺ꧉ꦥꦶꦠꦸꦠꦸꦂꦱꦶꦁꦠꦏ꧀ꦮꦸꦭꦁꦔꦏꦺꦩꦫꦁꦏꦺꦴꦮꦺꦏꦸꦮꦶꦲꦺꦴꦫꦱꦁꦏꦏꦉꦥ꧀ꦏꦸꦢꦺꦮꦺ꧈ꦤꦁꦔꦶꦁꦱꦁꦏꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦢꦺꦏ꧀ꦤꦺꦩꦁꦒꦺꦴꦤ꧀ꦲꦶꦁꦲꦏꦸꦭꦤ꧀ꦢꦺꦏ꧀ꦤꦺꦱꦶꦁꦠꦸꦩꦤ꧀ꦢꦁꦱꦁꦏꦲꦏꦸ꧉ 11ꦔꦤ꧀ꦢꦼꦭ꧀ꦭꦠꦤꦺꦏ꧀ꦲꦏꦸꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦠꦸꦁꦒꦭ꧀ꦭꦺ꧉ꦥꦼꦁꦒꦮꦺꦏꦸꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺꦏꦸꦮꦶꦭꦲꦸꦠ꧀ꦮꦶꦱ꧀ꦔꦸꦗꦸꦠ꧀ꦠꦏꦺꦏꦸꦮꦶꦠ! 12ꦲꦶꦏꦶꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀:ꦱꦥꦱꦶꦁꦥꦽꦕꦪꦩꦫꦁꦲꦏꦸꦧꦶꦱꦏꦪꦲꦏꦸꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺ꧉ꦲꦺꦴꦫꦤꦩꦸꦁꦏꦸꦮꦶꦮꦲꦺ꧈ꦤꦁꦔꦶꦁꦩꦭꦃꦧꦶꦱꦤꦶꦤ꧀ꦢꦏ꧀ꦏꦏꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦏꦸꦮꦶ꧈ꦲꦮꦶꦠ꧀ꦲꦏꦸꦲꦉꦥ꧀ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 13ꦭꦤ꧀ꦗꦭꦂꦫꦤ꧀ꦲꦏꦸꦤꦁꦏꦤ꧈ꦲꦥꦥꦼꦚ꧀ꦗꦭꦸꦏ꧀ꦩꦸ ꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀ ꦗꦚ꧀ꦗꦶꦏꦺꦴꦮꦺꦤꦼꦩ꧀ꦧꦸꦁꦔꦁꦒꦺꦴꦗꦼꦤꦼꦁꦏꦸ꧉ꦩꦼꦱ꧀ꦠꦶꦲꦏꦸꦧꦏꦭ꧀ꦤꦸꦫꦸꦠ꧀ꦠꦶꦥꦼꦚ꧀ꦗꦭꦸꦏ꧀ꦩꦸ꧈ꦢꦢꦶꦤꦺꦲꦏꦸꦧꦶꦱꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 14ꦤꦺꦏ꧀ꦏꦺꦴꦮꦺꦚ꧀ꦗꦭꦸꦏ꧀ꦲꦥꦮꦲꦺꦔꦁꦒꦺꦴꦗꦼꦤꦼꦁꦏꦸ꧈ꦧꦏꦭ꧀ꦠꦏ꧀ꦠꦸꦫꦸꦠ꧀ꦠꦶ꧉”
15꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦤꦺꦏ꧀ꦏꦺꦴꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁꦲꦏꦸꦏꦺꦴꦮꦺꦲꦸꦒꦩꦼꦱ꧀ꦠꦶꦔ꧀ꦭꦏꦺꦴꦤ꧀ꦤꦶꦲꦺꦴꦩꦺꦴꦁꦏꦸ꧉ 16ꦱꦼꦩꦺꦴꦤꦺꦴꦲꦸꦒ꧈ꦲꦏꦸꦧꦏꦭ꧀ꦤꦼꦩ꧀ꦧꦸꦁꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦱꦸꦥꦪꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦭꦶꦪꦤꦺꦱꦶꦁꦧꦏꦭ꧀ꦤꦸꦭꦸꦁꦔꦶꦏꦺꦴꦮꦺꦱ꧀ꦭꦮꦱ꧀ꦱꦺ꧉ꦏꦸꦮꦶꦫꦺꦴꦃꦱꦸꦕꦶ꧈ꦱꦶꦁꦧꦏꦭ꧀ꦩꦸꦭꦁꦔꦶꦏꦺꦴꦮꦺꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦏꦪꦱꦏ꧀ꦧꦼꦤꦼꦂꦫꦺ꧉ 17ꦮꦺꦴꦁꦱꦶꦁꦲꦺꦴꦫꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦺꦴꦫꦧꦶꦱꦤꦩ꧀ꦥꦫꦺꦴꦃꦱꦸꦕꦶ꧈ꦲꦮꦶꦠ꧀ꦲꦺꦴꦫꦤꦶꦠꦺꦤ꧀ꦤꦶꦭꦤ꧀ꦲꦺꦴꦫꦢꦸꦤꦸꦁ꧉ꦤꦁꦔꦶꦁꦏꦺꦴꦮꦺꦧꦏꦭ꧀ꦔꦼꦂꦠꦶꦫꦺꦴꦃꦱꦸꦕꦶ꧈ꦲꦮꦶꦠ꧀ꦢꦺꦏ꧀ꦤꦺꦧꦏꦭ꧀ꦏꦫꦺꦴꦏꦺꦴꦮꦺꦭꦤ꧀ꦧꦏꦭ꧀ꦩꦁꦒꦺꦴꦤ꧀ꦲꦶꦁꦲꦸꦫꦶꦥ꧀ꦩꦸ꧉
18꧋“ꦲꦺꦴꦫ꧈ꦏꦺꦴꦮꦺꦲꦺꦴꦫꦧꦏꦭ꧀ꦠꦏ꧀ꦠꦶꦁꦒꦭ꧀ꦢꦺꦮꦺ꧈ꦲꦏꦸꦧꦏꦭ꧀ꦧꦭꦶꦏ꧀ꦩꦫꦁꦏꦺꦴꦮꦺ꧉ 19ꦲꦺꦴꦫꦱꦸꦮꦶꦩꦼꦤꦺꦃꦮꦺꦴꦁꦗꦒꦠ꧀ꦧꦏꦭ꧀ꦲꦺꦴꦫꦮꦼꦫꦸꦃꦲꦏꦸꦩꦼꦤꦺꦃ꧈ꦤꦁꦔꦶꦁꦲꦏꦸꦧꦼꦧꦉꦁꦔꦤ꧀ꦏꦫꦺꦴꦏꦺꦴꦮꦺꦠꦼꦫꦸꦱ꧀꧈ꦭꦤ꧀ꦏꦺꦴꦮꦺꦧꦏꦭ꧀ꦲꦸꦫꦶꦥ꧀ ꦲꦮꦶꦠ꧀ꦲꦏꦸꦲꦸꦫꦶꦥ꧀꧈ 20ꦲꦶꦁꦮꦚ꧀ꦕꦶꦏꦸꦮꦶꦏꦺꦴꦮꦺꦧꦏꦭ꧀ꦢꦸꦤꦸꦁꦤꦺꦏ꧀ꦲꦏꦸꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦢꦢꦶꦱꦶꦗꦶ꧉ꦱꦼꦩꦺꦴꦤꦺꦴꦲꦸꦒꦏꦺꦴꦮꦺꦧꦏꦭ꧀ꦢꦸꦤꦸꦁꦤꦺꦏ꧀ꦏꦺꦴꦮꦺꦏꦫꦺꦴꦲꦏꦸꦲꦶꦏꦶꦲꦸꦒꦢꦢꦶꦱꦶꦗꦶ꧉
21꧋“ꦮꦺꦴꦁꦱꦶꦁꦔꦼꦂꦠꦶꦥꦶꦠꦸꦠꦸꦂꦏꦸꦭꦤ꧀ꦔ꧀ꦭꦏꦺꦴꦤ꧀ꦤꦶꦲꦥꦲꦺꦴꦩꦺꦴꦁꦏꦸ꧈ꦪꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦱꦶꦁꦠꦿꦺꦱ꧀ꦤꦩꦫꦁꦲꦏꦸꦠꦼꦤꦤ꧀꧈ꦮꦺꦴꦁꦏꦸꦮꦶꦧꦏꦭ꧀ꦢꦶꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦭꦤ꧀ꦲꦏꦸꦲꦩ꧀ꦧꦫꦁꦧꦏꦭ꧀ꦤꦿꦺꦱ꧀ꦤꦤ꧀ꦤꦶꦮꦺꦴꦁꦏꦸꦮꦶ꧉ꦭꦤ꧀ꦩꦼꦤꦺꦃ꧈ꦲꦏꦸꦧꦏꦭ꧀ꦤ꧀ꦢꦸꦢꦸꦃꦲꦏꦺꦩꦫꦁꦢꦺꦏ꧀ꦤꦺꦲꦏꦸꦲꦶꦏꦶꦱꦥ꧉”
22꧋ꦲꦺꦤꦺꦁꦩꦸꦫꦶꦢ꧀ꦱꦶꦁꦗꦼꦤꦼꦁꦔꦺꦪꦸꦢꦱ꧀ ꦤꦁꦔꦶꦁꦢꦸꦢꦸꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀꧈ꦪꦸꦢꦱ꧀ꦲꦶꦏꦶꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦒꦸꦱ꧀ꦠꦶ꧈ꦭꦃꦏꦺꦴꦮꦺꦏꦺꦴꦏ꧀ꦔꦼꦠꦺꦴꦏ꧀ꦏꦏꦺꦏ꧀ꦮꦱꦩꦸꦤꦩꦸꦁꦩꦫꦁꦲꦮꦏ꧀ꦏꦺꦢꦺꦮꦺ꧈ꦲꦺꦴꦫꦩꦫꦁꦮꦺꦴꦁꦮꦺꦴꦁꦭꦶꦪꦤꦺꦱꦶꦁꦲꦺꦴꦫꦥꦽꦕꦪꦩꦫꦁꦏꦺꦴꦮꦺ?”
23꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦮꦺꦴꦁꦱꦶꦁꦠꦿꦺꦱ꧀ꦤꦩꦫꦁꦲꦏꦸꦏꦸꦮꦶꦲꦸꦒꦧꦏꦭ꧀ꦤꦸꦫꦸꦠ꧀ꦥꦶꦠꦸꦠꦸꦂꦏꦸꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦤꦿꦺꦱ꧀ꦤꦤ꧀ꦤꦶꦮꦺꦴꦁꦱꦶꦁꦏꦪꦔꦺꦴꦤꦺꦴꦏꦸꦮꦶ꧉ꦲꦏꦸꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦲꦸꦫꦶꦥ꧀ꦧꦼꦧꦉꦁꦔꦤ꧀ꦏꦫꦺꦴꦮꦺꦴꦁꦏꦸꦮꦶ꧉ 24ꦤꦁꦔꦶꦁꦮꦺꦴꦁꦱꦶꦁꦲꦺꦴꦫꦠꦿꦺꦱ꧀ꦤꦩꦫꦁꦲꦏꦸꦲꦸꦒꦲꦺꦴꦫꦧꦏꦭ꧀ꦤꦸꦫꦸꦠ꧀ꦥꦶꦠꦸꦠꦸꦂꦏꦸ꧈ꦱꦼꦤꦗꦤ꧀ꦤꦥꦶꦠꦸꦠꦸꦂꦏꦸꦏꦸꦮꦶꦢꦸꦢꦸꦠꦼꦩ꧀ꦧꦸꦁꦏꦸꦢꦺꦮꦺ꧈ꦤꦁꦔꦶꦁꦠꦼꦩ꧀ꦧꦸꦁꦔꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉
25꧋“ꦱꦸꦮꦺꦤꦺꦲꦏꦸꦲꦶꦗꦶꦏ꧀ꦕꦩ꧀ꦥꦸꦂꦏꦫꦺꦴꦏꦺꦴꦮꦺꦲꦏꦸꦩꦸꦭꦁꦔꦶꦏꦺꦴꦮꦺꦱꦼꦩ꧀ꦧꦫꦁꦩ꧀ꦧꦫꦁꦏꦸꦮꦶ꧉ 26ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦔꦺꦴꦁꦏꦺꦴꦤ꧀ꦫꦺꦴꦃꦱꦸꦕꦶ꧈ꦥꦼꦤꦸꦭꦸꦁꦩꦸ꧈ꦠꦼꦏꦢꦢꦶꦮꦲꦺ꧉ꦢꦺꦏ꧀ꦤꦺꦱꦶꦁꦧꦏꦭ꧀ꦔꦿꦺꦮꦁꦔꦶꦏꦺꦴꦮꦺꦭꦤ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁꦏꦺꦴꦮꦺꦧꦧ꧀ꦱꦼꦩ꧀ꦧꦫꦁ꧉ꦢꦺꦏ꧀ꦤꦺꦲꦸꦒꦧꦏꦭ꧀ꦔꦺꦭꦶꦁꦔꦺꦭꦶꦁꦔꦏꦺꦩꦫꦁꦏꦺꦴꦮꦺꦧꦧ꧀ꦱꦼꦩ꧀ꦧꦫꦁꦱꦶꦁꦮꦶꦱ꧀ꦠꦏ꧀ꦮꦸꦭꦁꦔꦏꦺ꧉
27꧋“ꦱꦲꦶꦏꦶꦏꦺꦴꦮꦺꦠꦏ꧀ꦠꦶꦁꦒꦭ꧀ꦭꦶꦏꦠꦼꦤ꧀ꦠꦽꦩ꧀ꦩꦤ꧀꧈ꦲꦺꦴꦫꦏꦠꦼꦤ꧀ꦠꦽꦩꦤ꧀ꦤꦺꦢꦺꦴꦚꦏꦺꦤꦺ꧈ꦲꦺꦴꦫ꧈ꦤꦁꦔꦶꦁꦏꦠꦼꦤ꧀ꦠꦽꦩ꧀ꦩꦤ꧀ꦱꦶꦁꦤꦩꦸꦁꦲꦏꦸꦢꦺꦮꦺꦧꦶꦱꦔꦼꦏꦺꦏ꧀ꦏꦶ꧉ꦩꦸꦭꦤꦺ꧈ꦏꦺꦴꦮꦺꦲꦗꦥꦢꦱꦼꦢꦶꦭꦤ꧀ꦲꦗꦥꦢꦮꦼꦢꦶ꧉ 28ꦥꦚ꧀ꦕꦺꦤ꧀ꦲꦏꦸꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦲꦏꦸꦲꦉꦥ꧀ꦭꦸꦔ꧈ꦤꦁꦔꦶꦁꦲꦏꦸꦧꦏꦭ꧀ꦧꦭꦶꦏ꧀ꦩꦼꦤꦺꦃ꧉ꦩꦸꦭꦤꦺ꧈ꦤꦺꦏ꧀ꦏꦺꦴꦮꦺꦥꦢꦠꦿꦺꦱ꧀ꦤꦠꦼꦤꦤ꧀ꦩꦫꦁꦲꦏꦸ꧈ꦏꦺꦴꦮꦺꦩꦭꦃꦏꦸꦢꦸꦧꦸꦔꦃꦤꦺꦏ꧀ꦲꦏꦸꦧꦏꦭ꧀ꦭꦸꦔꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦒꦼꦢꦺꦤꦺꦔꦸꦁꦏꦸꦭ꧀ꦭꦶꦲꦏꦸ꧉ 29ꦱꦏ꧀ꦢꦸꦫꦸꦁꦔꦺꦱꦼꦩ꧀ꦧꦫꦁꦲꦶꦏꦶꦏ꧀ꦭꦏꦺꦴꦤ꧀ꦏꦺꦴꦮꦺꦮꦶꦱ꧀ꦠꦏ꧀ꦲꦺꦴꦩꦺꦴꦁꦔꦶ꧈ꦢꦢꦶꦤꦺꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦏ꧀ꦭꦏꦺꦴꦤ꧀ꦠꦼꦤꦤ꧀ ꦏꦺꦴꦮꦺꦧꦶꦱꦤꦶꦠꦺꦤ꧀ꦤꦶꦤꦺꦏ꧀ꦱꦼꦩ꧀ꦧꦫꦁꦱꦶꦁꦠꦏ꧀ꦲꦺꦴꦩꦺꦴꦁꦏꦸꦮꦶꦠꦼꦤꦤ꧀꧈ 30ꦲꦏꦸꦮꦶꦱ꧀ꦲꦺꦴꦫꦧꦶꦱꦔꦺꦴꦩꦺꦴꦁꦲꦺꦴꦏꦺꦃꦲꦺꦴꦏꦺꦃꦩꦼꦤꦺꦃꦩꦫꦁꦏꦺꦴꦮꦺ꧈ꦲꦮꦶꦠ꧀ꦱꦺꦠꦤ꧀ ꦫꦠꦸꦤꦺꦢꦺꦴꦚ꧈ꦮꦶꦱ꧀ꦔꦺꦠꦺꦴꦏ꧀꧈ꦲꦏꦸꦲꦺꦴꦫꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦏꦸꦮꦶꦧꦶꦱꦩꦼꦤꦁꦔꦏꦺꦲꦏꦸ꧈ꦲꦺꦴꦫ꧉ 31ꦤꦁꦔꦶꦁꦲꦏꦸꦤꦩꦸꦁꦩꦤꦸꦠ꧀ꦲꦥꦏꦺꦴꦁꦏꦺꦴꦤ꧀ꦤꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦢꦢꦶꦤꦺꦮꦺꦴꦁꦏꦧꦺꦃꦧꦶꦱꦤꦶꦠꦺꦤ꧀ꦤꦶꦤꦺꦏ꧀ꦲꦏꦸꦠꦿꦺꦱ꧀ꦤꦠꦼꦤꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉
꧋“ꦮꦶꦱ꧀ ꦲ꦳ꦪꦸꦏ꧀ꦱꦲꦶꦏꦶꦥꦢꦭꦸꦔ!”
꧇꧑꧕꧇ 1꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ:“ꦲꦏꦸꦲꦶꦏꦶꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴꦮꦶꦠ꧀ꦠꦺ꧈ꦭꦃꦏꦺꦴꦮꦺꦥꦁꦔꦺ꧉ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴꦱꦶꦁꦠꦸꦏꦁꦏꦼꦧꦺꦴꦤ꧀꧈ 2ꦥꦁꦱꦶꦁꦲꦺꦴꦫꦔꦼꦠꦺꦴꦏ꧀ꦏꦏꦺꦮꦺꦴꦃꦏꦸꦮꦶꦩꦼꦱ꧀ꦠꦶꦢꦶꦏꦼꦠꦺꦴꦏ꧀ꦏꦫꦺꦴꦱꦶꦁꦠꦸꦏꦁꦏꦼꦧꦺꦴꦤ꧀ꦭꦤ꧀ꦥꦁꦱꦶꦁꦩꦼꦠꦸꦮꦺꦴꦃꦲꦺꦢꦶꦏꦼꦥꦿꦱ꧀ꦱꦶꦭꦤ꧀ꦢꦶꦉꦱꦶꦏ꧀ꦏꦶꦱꦸꦥꦪꦔꦼꦠꦺꦴꦏ꧀ꦏꦏꦺꦮꦺꦴꦃꦱꦶꦁꦭꦸꦮꦶꦃꦲꦺꦴꦏꦺꦃ꧉ 3ꦏꦺꦴꦮꦺꦮꦶꦱ꧀ꦥꦢꦉꦱꦶꦏ꧀ꦲꦠꦶꦤꦺ꧉ꦥꦶꦠꦸꦠꦸꦂꦱꦶꦁꦠꦏ꧀ꦮꦸꦭꦁꦔꦏꦺꦩꦫꦁꦏꦺꦴꦮꦺꦏꦸꦮꦶꦮꦶꦱ꧀ꦔꦽꦱꦶꦏ꧀ꦏꦶꦲꦠꦶꦩꦸ꧉ 4ꦫꦸꦩꦏꦼꦠ꧀ꦠꦩꦫꦁꦲꦏꦸ꧈ꦢꦢꦶꦤꦺꦲꦏꦸꦲꦸꦒꦧꦶꦱꦫꦸꦩꦏꦼꦠ꧀ꦩꦫꦁꦏꦺꦴꦮꦺ꧉ꦥꦁꦔꦺꦏꦸꦮꦶꦲꦺꦴꦫꦧꦶꦱꦔꦼꦠꦺꦴꦏ꧀ꦏꦏꦺꦮꦺꦴꦃꦤꦺꦏ꧀ꦲꦺꦴꦫꦫꦸꦩꦏꦼꦠ꧀ꦩꦫꦁꦮꦶꦠ꧀ꦠꦺ꧈ꦏꦪꦔꦺꦴꦤꦺꦴꦲꦸꦒꦏꦺꦴꦮꦺ꧈ꦤꦺꦏ꧀ꦲꦺꦴꦫꦫꦸꦩꦏꦼꦠ꧀ꦩꦫꦁꦲꦏꦸꦏꦺꦴꦮꦺꦲꦺꦴꦫꦧꦶꦱꦔꦼꦠꦺꦴꦏ꧀ꦏꦏꦺꦮꦺꦴꦃ꧉
5꧋“ꦲꦏꦸꦲꦶꦏꦶꦮꦶꦠ꧀ꦠꦺꦭꦤ꧀ꦏꦺꦴꦮꦺꦏꦸꦮꦶꦥꦁꦔꦺ꧉ꦤꦺꦏ꧀ꦏꦺꦴꦮꦺꦫꦸꦩꦏꦼꦠ꧀ꦩꦫꦁꦲꦏꦸꦭꦤ꧀ꦲꦏꦸꦫꦸꦩꦏꦼꦠ꧀ꦩꦫꦁꦏꦺꦴꦮꦺ꧈ꦏꦺꦴꦮꦺꦧꦏꦭ꧀ꦔꦼꦠꦺꦴꦏ꧀ꦏꦏꦺꦮꦺꦴꦃꦲꦺꦴꦏꦺꦃ꧉ꦥꦼꦢꦺꦴꦠ꧀ꦱꦁꦏꦲꦏꦸꦏꦺꦴꦮꦺꦲꦺꦴꦫꦧꦶꦱꦲꦥꦲꦥ꧉ 6ꦮꦺꦴꦁꦱꦶꦁꦲꦺꦴꦫꦫꦸꦩꦏꦼꦠ꧀ꦩꦫꦁꦲꦏꦸꦏꦸꦮꦶꦏꦪꦥꦁꦱꦶꦁꦢꦶꦏꦼꦠꦺꦴꦏ꧀ꦢꦢꦶꦒꦫꦶꦁ꧈ꦠꦼꦫꦸꦱ꧀ꦢꦶꦭꦸꦩ꧀ꦥꦸꦏ꧀ꦏꦏꦺꦭꦤ꧀ꦢꦶꦧꦸꦮꦁꦤꦁꦒꦼꦤꦶꦧꦺꦤ꧀ꦏꦺꦴꦧꦺꦴꦁ꧉ 7ꦤꦺꦏ꧀ꦏꦺꦴꦮꦺꦫꦸꦩꦏꦼꦠ꧀ꦩꦫꦁꦲꦏꦸꦭꦤ꧀ꦔ꧀ꦭꦏꦺꦴꦤ꧀ꦤꦶꦥꦶꦠꦸꦠꦸꦂꦏꦸ꧈ꦲꦩ꧀ꦧꦺꦴꦏ꧀ꦚ꧀ꦗꦭꦸꦏ꧀ꦏꦲꦥꦮꦲꦺꦠ꧈ꦩꦼꦱ꧀ꦠꦶꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀꧈ 8ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦢꦶꦭꦸꦲꦸꦂꦫꦏꦺꦤꦺꦏ꧀ꦏꦺꦴꦮꦺꦔꦼꦠꦺꦴꦏ꧀ꦏꦏꦺꦮꦺꦴꦃꦲꦺꦴꦏꦺꦃ꧉ꦏꦸꦮꦶꦔꦼꦠꦺꦴꦏ꧀ꦏꦏꦺꦤꦺꦏ꧀ꦏꦺꦴꦮꦺꦢꦢꦶꦩꦸꦫꦶꦢ꧀ꦏꦸꦠꦼꦤꦤ꧀꧈ 9ꦒꦸꦱ꧀ꦠꦶꦄꦭ꧀ꦭꦃꦤꦿꦺꦱ꧀ꦤꦤ꧀ꦤꦶꦲꦏꦸ꧈ꦩꦼꦁꦏꦺꦴꦤꦺꦴꦲꦸꦒꦏꦠꦿꦺꦱ꧀ꦤꦤ꧀ꦏꦸꦩꦫꦁꦏꦺꦴꦮꦺ꧉ꦥꦢꦩꦤ꧀ꦠꦼꦥ꧀ꦥꦲꦶꦁꦏꦠꦿꦺꦱ꧀ꦤꦤ꧀ꦲꦶꦏꦶ꧉ 10ꦏꦪꦲꦼꦁꦒꦺꦴꦤ꧀ꦏꦸꦩꦤꦸꦠ꧀ꦩꦫꦁꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦭꦤ꧀ꦔꦭꦩ꧀ꦩꦶꦏꦠꦿꦺꦱ꧀ꦤꦤꦺ꧈ꦱꦼꦩꦺꦴꦤꦺꦴꦲꦸꦒꦏꦺꦴꦮꦺ꧉ꦤꦺꦏ꧀ꦏꦺꦴꦮꦺꦩꦤꦸꦠ꧀ꦩꦫꦁꦥꦶꦠꦸꦠꦸꦂꦏꦸ꧈ꦏꦺꦴꦮꦺꦲꦸꦒꦧꦏꦭ꧀ꦔꦭꦩ꧀ꦩꦶꦏꦠꦿꦺꦱ꧀ꦤꦤ꧀ꦏꦸꦱꦏ꧀ꦠꦼꦫꦸꦱ꧀ꦱꦺ꧉
11꧋“ꦲꦏꦸꦔꦺꦴꦩꦺꦴꦁꦏꦸꦮꦶꦩꦲꦸꦏꦧꦺꦃꦩꦫꦁꦏꦺꦴꦮꦺ꧈ꦱꦸꦥꦪꦏꦺꦴꦮꦺꦧꦶꦱꦤ꧀ꦢꦸꦮꦺꦤ꧀ꦤꦶꦏꦧꦸꦔꦃꦲꦤ꧀ꦏꦸꦭꦤ꧀ꦱꦸꦥꦪꦏꦧꦸꦔꦃꦲꦤ꧀ꦲꦶꦏꦶꦧꦶꦱꦩꦸꦤ꧀ꦢꦏ꧀ꦠꦼꦫꦸꦱ꧀꧈ 12ꦥꦶꦠꦸꦠꦸꦂꦏꦸꦩꦫꦁꦏꦺꦴꦮꦺꦪꦲꦶꦏꦶ:ꦥꦢꦠꦿꦺꦱ꧀ꦤꦲꦠꦼꦫꦸꦱ꧀ꦩꦫꦁꦱꦏ꧀ꦥꦢꦥꦢꦏꦪꦲꦼꦁꦒꦺꦴꦤ꧀ꦏꦸꦠꦿꦺꦱ꧀ꦤꦩꦫꦁꦏꦺꦴꦮꦺ꧉ 13ꦮꦺꦴꦁꦱꦶꦁꦠꦿꦺꦱ꧀ꦤꦭꦤ꧀ꦱꦒꦸꦃꦩꦠꦶꦔ꧀ꦭꦧꦸꦃꦲꦶꦏꦚ꧀ꦕꦤꦺ꧈ꦏꦸꦮꦶꦮꦺꦴꦁꦱꦶꦁꦤ꧀ꦢꦸꦮꦺꦤ꧀ꦤꦶꦏꦠꦿꦺꦱ꧀ꦤꦤ꧀ꦠꦼꦤꦤ꧀꧈ꦲꦺꦴꦫꦲꦺꦤꦺꦁꦏꦠꦿꦺꦱ꧀ꦤꦤ꧀ꦱꦶꦁꦒꦼꦢꦺꦤꦺꦔꦸꦁꦏꦸꦭ꧀ꦭꦶꦏꦸꦮꦶ꧉ 14ꦏꦺꦴꦮꦺꦢꦢꦶꦏꦚ꧀ꦕꦏꦸꦤꦺꦏ꧀ꦏꦺꦴꦮꦺꦥꦢꦩꦤꦸꦠ꧀ꦩꦫꦁꦥꦶꦠꦸꦠꦸꦂꦏꦸ꧉ 15ꦏꦺꦴꦮꦺꦱꦲꦶꦏꦶꦮꦶꦱ꧀ꦲꦺꦴꦫꦠꦏ꧀ꦲꦫꦤ꧀ꦤꦶꦱ꧀ꦭꦥ꦳꧀ꦩꦼꦤꦺꦃ꧈ꦲꦮꦶꦠ꧀ꦱ꧀ꦭꦥ꦳꧀ꦏꦸꦮꦶꦲꦺꦴꦫꦠꦲꦸꦢꦶꦲꦼꦗꦺꦏ꧀ꦏꦶꦲꦠꦸꦁꦔꦤ꧀ꦏꦫꦺꦴꦱꦶꦁꦤ꧀ꦢꦸꦮꦺꦲꦺꦴꦩꦃ꧉ꦤꦁꦔꦶꦁꦲꦥꦲꦺꦴꦩꦺꦴꦁꦔꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦩꦫꦁꦲꦏꦸ꧈ꦏꦧꦺꦃꦠꦏ꧀ꦢꦸꦤꦸꦁꦢꦸꦤꦸꦁꦔꦏꦺꦩꦫꦁꦏꦺꦴꦮꦺ꧈ꦱꦸꦥꦪꦏꦺꦴꦮꦺꦲꦸꦒꦥꦢꦔꦼꦂꦠꦶ꧉ꦩꦸꦭꦤꦺꦏꦺꦴꦮꦺꦏꦸꦮꦶꦲꦺꦴꦫꦠꦏ꧀ꦲꦫꦤ꧀ꦤꦶꦱ꧀ꦭꦥ꦳꧀ꦩꦼꦤꦺꦃ꧈ꦤꦁꦔꦶꦁꦏꦺꦴꦮꦺꦏꦚ꧀ꦕꦏꦸ꧉ 16ꦲꦏꦸꦱꦶꦁꦩꦶꦭꦶꦃꦏꦺꦴꦮꦺ꧈ꦢꦸꦢꦸꦏꦺꦴꦮꦺꦱꦶꦁꦩꦶꦭꦶꦃꦲꦏꦸ꧉ꦏꦺꦴꦮꦺꦠꦏ꧀ꦥꦶꦭꦶꦃꦭꦤ꧀ꦠꦏ꧀ꦏꦺꦴꦁꦏꦺꦴꦤ꧀ꦧꦸꦢꦭ꧀ꦔꦼꦠꦺꦴꦏ꧀ꦏꦏꦺꦮꦺꦴꦃꦠꦼꦫꦸꦱ꧀ ꦲꦗꦱꦩ꧀ꦥꦺꦏ꧀ꦲꦶꦭꦁꦮꦺꦴꦃꦲꦺ꧉ꦲꦥꦥꦼꦚ꧀ꦗꦭꦸꦏ꧀ꦩꦸꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦩꦼꦱ꧀ꦠꦶꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀ꦤꦺꦏ꧀ꦏꦺꦴꦮꦺꦤꦼꦩ꧀ꦧꦸꦁꦔꦁꦒꦺꦴꦗꦼꦤꦼꦁꦏꦸ꧉” 17ꦱꦼꦥꦶꦱ꧀ꦱꦤ꧀ꦩꦼꦤꦺꦃꦠꦼꦩ꧀ꦧꦸꦁꦏꦸꦩꦫꦁꦏꦺꦴꦮꦺ:“ꦥꦢꦠꦿꦺꦱ꧀ꦤꦲꦩꦫꦁꦱꦏ꧀ꦥꦢꦥꦢ꧉”
18꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦮꦺꦴꦁꦮꦺꦴꦁꦱꦶꦁꦲꦺꦴꦫꦥꦽꦕꦪꦩꦫꦁꦲꦏꦸꦥꦢꦱꦼꦔꦶꦠ꧀ꦩꦫꦁꦏꦺꦴꦮꦺ꧉ꦤꦁꦔꦶꦁꦲꦗꦥꦢꦏꦒꦺꦠ꧀ ꦩꦭꦃꦥꦢꦔꦼꦂꦠꦶꦪꦤꦺꦏ꧀ꦮꦺꦴꦁꦮꦺꦴꦁꦏꦸꦮꦶꦥꦚ꧀ꦕꦺꦤ꧀ꦱꦼꦔꦶꦠ꧀ꦩꦫꦁꦲꦏꦸ꧉ 19ꦱꦼꦩꦸꦁꦒꦺꦴꦤ꧀ꦤꦺꦏꦺꦴꦮꦺꦠꦸꦁꦒꦭ꧀ꦭꦺꦏꦫꦺꦴꦮꦺꦴꦁꦮꦺꦴꦁꦏꦸꦮꦶ꧈ꦮꦺꦴꦁꦮꦺꦴꦁꦩꦼꦱ꧀ꦠꦶꦥꦢꦱꦼꦤꦼꦁꦏꦫꦺꦴꦏꦺꦴꦮꦺ꧈ꦲꦮꦶꦠ꧀ꦏꦺꦴꦮꦺꦢꦶꦲꦏꦸꦠꦸꦁꦒꦭ꧀ꦭꦺꦮꦲꦺ꧉ꦤꦁꦔꦶꦁꦏꦺꦴꦮꦺꦮꦶꦱ꧀ꦠꦏ꧀ꦥꦶꦭꦶꦃꦭꦤ꧀ꦠꦏ꧀ꦱꦶꦁꦏꦶꦂꦫꦏꦺꦱꦁꦏꦠꦼꦔꦃꦲꦺꦮꦺꦴꦁꦮꦺꦴꦁꦏꦸꦮꦶ꧈ꦢꦢꦶꦤꦺꦏꦺꦴꦮꦺꦮꦶꦱ꧀ꦲꦺꦴꦫꦠꦸꦁꦒꦭ꧀ꦭꦺꦏꦫꦺꦴꦮꦺꦴꦁꦮꦺꦴꦁꦏꦸꦮꦶ꧈ꦩꦸꦭꦤꦺꦏꦺꦴꦮꦺꦪꦢꦶꦱꦼꦔꦶꦠ꧀ꦠꦶ꧉ 20ꦲꦏꦸꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠꦤꦺꦏ꧀ꦱ꧀ꦭꦥ꦳꧀ꦏꦸꦮꦶꦲꦺꦴꦫꦔꦸꦁꦏꦸꦭ꧀ꦭꦶꦱꦶꦁꦤ꧀ꦢꦸꦮꦺ꧉ꦩꦸꦭꦤꦺ꧈ꦤꦺꦏ꧀ꦮꦺꦴꦁꦮꦺꦴꦁꦮꦶꦱ꧀ꦚꦶꦪꦚꦶꦪꦲꦏꦸ꧈ꦮꦺꦴꦁꦮꦺꦴꦁꦲꦸꦒꦧꦏꦭ꧀ꦚꦶꦪꦚꦶꦪꦏꦺꦴꦮꦺ꧉ꦱꦼꦩꦸꦁꦒꦺꦴꦤ꧀ꦤꦺꦮꦺꦴꦁꦮꦺꦴꦁꦒꦼꦊꦩ꧀ꦤꦩ꧀ꦥꦥꦶꦠꦸꦠꦸꦂꦏꦸ꧈ꦮꦺꦴꦁꦮꦺꦴꦁꦩꦼꦱ꧀ꦠꦶꦲꦸꦒꦧꦏꦭ꧀ꦤꦩ꧀ꦥꦠꦼꦩ꧀ꦧꦸꦁꦩꦸ꧉ 21ꦤꦁꦔꦶꦁꦲꦗꦔ꧀ꦒꦸꦩꦸꦤ꧀ ꦮꦺꦴꦁꦮꦺꦴꦁꦥꦢꦔꦺꦴꦤꦺꦴꦏꦫꦺꦴꦏꦺꦴꦮꦺꦏꦸꦮꦶ꧈ꦗꦭꦂꦫꦤ꧀ꦏꦺꦴꦮꦺꦩꦸꦫꦶꦢ꧀ꦏꦸ꧉ꦮꦺꦴꦁꦮꦺꦴꦁꦏꦸꦮꦶꦲꦺꦴꦫꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 22ꦱꦼꦩꦸꦁꦒꦺꦴꦤ꧀ꦤꦺꦲꦏꦸꦲꦺꦴꦫꦠꦼꦏꦭꦤ꧀ꦩꦶꦠꦸꦠꦸꦂꦫꦶꦮꦺꦴꦁꦮꦺꦴꦁꦧꦧ꧀ꦒꦸꦱ꧀ꦠꦶꦄꦭ꧀ꦭꦃ꧈ꦮꦺꦴꦁꦮꦺꦴꦁꦏꦸꦮꦶꦥꦚ꧀ꦕꦺꦤ꧀ꦲꦺꦴꦫꦏꦼꦤꦺꦁꦢꦶꦱꦭꦃꦲꦏꦺꦤꦺꦏ꧀ꦲꦺꦴꦫꦒꦼꦊꦩ꧀ꦤꦩ꧀ꦥꦲꦏꦸ꧉ꦤꦁꦔꦶꦁꦲꦏꦸꦮꦶꦱ꧀ꦩꦶꦠꦸꦠꦸꦂꦫꦶꦮꦺꦴꦁꦮꦺꦴꦁꦏꦸꦮꦶ꧈ꦩꦸꦭꦤꦺꦥꦢꦱꦭꦃꦠꦼꦤꦤ꧀꧈ 23ꦱꦥꦱꦶꦁꦱꦼꦔꦶꦠ꧀ꦩꦫꦁꦲꦏꦸꦪꦥꦢꦮꦲꦺꦱꦼꦔꦶꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ ꦧꦥꦏ꧀ꦏꦸ꧉ 24ꦱꦼꦩꦸꦁꦒꦺꦴꦤ꧀ꦤꦺꦲꦏꦸꦲꦺꦴꦫꦔꦸꦗꦸꦠ꧀ꦠꦏꦺꦠꦼꦩ꧀ꦧꦸꦁꦏꦸꦔꦁꦒꦺꦴꦠꦤ꧀ꦢꦱꦶꦁꦔ꧀ꦒꦸꦩꦸꦤ꧀ꦔ꧀ꦒꦸꦩꦸꦤ꧀ꦤꦏꦺ꧈ꦱꦶꦁꦢꦸꦫꦸꦁꦠꦲꦸꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴꦮꦺꦴꦁꦭꦶꦪꦤꦺ꧈ꦮꦺꦴꦁꦮꦺꦴꦁꦏꦸꦮꦶꦧ꧀ꦭꦱ꧀ꦲꦺꦴꦫꦏꦼꦤꦺꦁꦢꦶꦱꦭꦃꦲꦏꦺ꧉ꦤꦁꦔꦶꦁꦮꦺꦴꦁꦮꦺꦴꦁꦥꦢꦮꦼꦫꦸꦃꦱꦼꦩ꧀ꦧꦫꦁꦩ꧀ꦧꦫꦁꦏꦸꦮꦶꦏꦫꦺꦴꦩꦿꦶꦥꦠ꧀ꦠꦺꦢꦺꦮꦺ꧈ꦱꦼꦤꦗꦤ꧀ꦔꦺꦴꦤꦺꦴꦩꦼꦏ꧀ꦱꦲꦶꦗꦶꦏ꧀ꦱꦼꦔꦶꦠ꧀ꦩꦫꦁꦲꦏꦸꦭꦤ꧀ꦱꦼꦔꦶꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 25ꦥꦚ꧀ꦕꦺꦤ꧀ ꦤꦁꦏꦶꦠꦧ꧀ꦧꦺꦏꦺꦴꦤꦺꦴꦢꦺꦮꦺꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ:'ꦮꦺꦴꦁꦮꦺꦴꦁꦥꦢꦱꦼꦔꦶꦠ꧀ꦩꦫꦁꦲꦏꦸꦠꦤ꧀ꦥꦗꦭꦂꦫꦤ꧀꧉'ꦠꦸꦭꦶꦱ꧀ꦱꦤ꧀ꦲꦶꦏꦶꦥꦚ꧀ꦕꦺꦤ꧀ꦏ꧀ꦭꦏꦺꦴꦤ꧀꧈
26꧋“ꦤꦁꦔꦶꦁꦲꦗꦥꦢꦮꦼꦢꦶ꧈ꦲꦏꦸꦲꦉꦥ꧀ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦭꦤ꧀ꦲꦏꦸꦧꦏꦭ꧀ꦔꦺꦴꦁꦏꦺꦴꦤ꧀ꦫꦺꦴꦃꦱꦸꦕꦶ꧈ꦥꦼꦤꦸꦭꦸꦁꦩꦸ꧈ꦤ꧀ꦢꦁꦠꦼꦏꦤꦁꦔ꧀ꦒꦺꦴꦤ꧀ꦩꦸ꧉ꦢꦺꦏ꧀ꦤꦺꦏꦸꦮꦶꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦭꦤ꧀ꦢꦺꦏ꧀ꦤꦺꦧꦏꦭ꧀ꦤ꧀ꦢꦸꦢꦸꦃꦲꦏꦺꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦏꦪꦱꦏ꧀ꦧꦼꦤꦼꦂꦫꦺꦭꦤ꧀ꦲꦸꦒꦧꦧ꧀ꦲꦏꦸ꧉ 27ꦤꦁꦔꦶꦁꦏꦺꦴꦮꦺꦲꦸꦒꦢꦢꦶꦱꦼꦏ꧀ꦱꦶꦏꦸ꧈ꦲꦮꦶꦠ꧀ꦏꦮꦶꦠ꧀ꦲꦏꦸꦩꦺꦴꦭꦃꦲꦶꦚꦩ꧀ꦧꦸꦠ꧀ꦠꦏꦺꦴꦮꦺꦩꦺꦭꦸꦲꦏꦸ꧉”
꧇꧑꧖꧇ 1꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦸꦮꦶꦩꦲꦸꦏꦧꦺꦃꦠꦏ꧀ꦢꦸꦤꦸꦁꦢꦸꦤꦸꦁꦔꦏꦺꦩꦫꦁꦏꦺꦴꦮꦺ꧈ꦱꦸꦥꦪꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦏ꧀ꦭꦏꦺꦴꦤ꧀ꦠꦼꦤꦤ꧀ ꦏꦺꦴꦮꦺꦲꦗꦱꦩ꧀ꦥꦺꦏ꧀ꦏꦒꦺꦠ꧀ꦭꦤ꧀ꦲꦶꦭꦁꦥꦼꦔꦤ꧀ꦢꦼꦭ꧀ꦭꦺ꧉ 2ꦥꦚ꧀ꦕꦺꦤ꧀ꦧꦏꦭ꧀ꦏ꧀ꦭꦏꦺꦴꦤ꧀ꦠꦼꦤꦤ꧀꧈ꦏꦺꦴꦮꦺꦲꦺꦴꦫꦤꦩꦸꦁꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀ ꦤꦁꦔꦶꦁꦮꦺꦴꦁꦮꦺꦴꦁꦧꦏꦭ꧀ꦩꦠꦺꦤ꧀ꦤꦶꦏꦺꦴꦮꦺꦲꦩ꧀ꦧꦫꦁ꧉ꦩꦭꦃꦩꦶꦏꦶꦫꦺꦥꦢꦔ꧀ꦒꦮꦺꦧꦼꦕꦶꦏ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦤꦺꦏ꧀ꦔ꧀ꦭꦏꦺꦴꦤ꧀ꦤꦶꦔꦺꦴꦤꦺꦴꦏꦸꦮꦶ꧉ 3ꦮꦺꦴꦁꦮꦺꦴꦁꦥꦢꦔ꧀ꦭꦏꦺꦴꦤ꧀ꦤꦶꦏꦪꦔꦺꦴꦤꦺꦴꦏꦸꦮꦶ꧈ꦗꦭꦂꦫꦤ꧀ꦲꦺꦴꦫꦥꦢꦔꦼꦂꦠꦶꦠꦼꦤꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦩꦫꦁꦲꦏꦸ꧉ 4ꦤꦁꦔꦶꦁꦏꦺꦴꦮꦺꦠꦏ꧀ꦲꦺꦴꦩꦺꦴꦁꦔꦶꦱꦏ꧀ꦢꦸꦫꦸꦁꦔꦺ꧈ꦱꦸꦥꦪꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦧꦺꦃꦲꦶꦏꦶꦏ꧀ꦭꦏꦺꦴꦤ꧀ꦠꦼꦤꦤ꧀ꦏꦺꦴꦮꦺꦥꦢꦲꦺꦭꦶꦁꦩꦫꦁꦠꦼꦩ꧀ꦧꦸꦁꦏꦸꦭꦤ꧀ꦲꦺꦴꦫꦥꦢꦏꦒꦺꦠ꧀꧈
꧋“ꦩꦲꦸꦤꦺꦏꦺꦴꦮꦺꦲꦺꦴꦫꦠꦏ꧀ꦲꦺꦴꦩꦺꦴꦁꦔꦶꦧꦧ꧀ꦲꦶꦏꦶ꧈ꦲꦮꦶꦠ꧀ꦲꦏꦸꦲꦶꦗꦶꦏ꧀ꦕꦩ꧀ꦥꦸꦂꦏꦫꦺꦴꦏꦺꦴꦮꦺ꧉ 5ꦤꦁꦔꦶꦁꦱꦲꦶꦏꦶꦲꦏꦸꦲꦉꦥ꧀ꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺ꧉ꦥꦚ꧀ꦕꦺꦤ꧀ꦲꦏꦸꦲꦉꦥ꧀ꦭꦸꦔ꧈ꦭꦃꦏꦺꦴꦏ꧀ꦲꦺꦴꦫꦲꦺꦤꦺꦁꦱꦶꦁꦠꦏꦺꦴꦤ꧀ꦩꦫꦁꦲꦏꦸꦏꦼꦤꦺꦁꦲꦥꦲꦏꦸꦏꦺꦴꦏ꧀ꦲꦉꦥ꧀ꦭꦸꦔ꧉ 6ꦩꦭꦃꦠꦼꦫꦸꦱ꧀ꦥꦢꦱꦼꦢꦶꦔꦺꦴꦤꦺꦴꦧꦧ꧀ꦱꦼꦩ꧀ꦧꦫꦁꦱꦶꦁꦠꦏ꧀ꦲꦺꦴꦩꦺꦴꦁꦔꦏꦺꦏꦸꦮꦶ꧉ 7ꦤꦁꦔꦶꦁꦠꦼꦤꦤ꧀ ꦭꦸꦮꦶꦃꦲꦥꦶꦏ꧀ꦏꦁꦒꦺꦴꦏꦺꦴꦮꦺꦤꦺꦏ꧀ꦲꦏꦸꦭꦸꦔ꧈ꦱꦸꦥꦪꦲꦏꦸꦧꦶꦱꦔꦺꦴꦁꦏꦺꦴꦤ꧀ꦫꦺꦴꦃꦱꦸꦕꦶ꧈ꦥꦼꦤꦸꦭꦸꦁꦩꦸ꧈ꦠꦼꦏ꧉ꦤꦺꦏ꧀ꦲꦏꦸꦲꦺꦴꦫꦭꦸꦔ꧈ꦢꦺꦏ꧀ꦤꦺꦲꦺꦴꦫꦧꦏꦭ꧀ꦠꦼꦏ꧉ 8ꦩꦭꦃꦲꦩ꧀ꦧꦺꦱꦸꦏ꧀ꦤꦺꦏ꧀ꦫꦺꦴꦃꦱꦸꦕꦶꦠꦼꦏ꧈ꦢꦺꦏ꧀ꦤꦺꦧꦏꦭ꧀ꦤ꧀ꦢꦸꦢꦸꦃꦲꦏꦺꦩꦫꦁꦩꦤꦸꦁꦱꦤꦺꦏ꧀ꦥꦶꦏꦶꦂꦫꦤ꧀ꦤꦺꦧꦧ꧀ꦢꦺꦴꦱ꧈ꦧꦧ꧀ꦱꦶꦁꦧꦼꦤꦼꦂꦭꦤ꧀ꦧꦧ꧀ꦏꦿꦸꦠꦺꦴꦤ꧀ꦏ꧀ꦭꦺꦫꦸꦏꦧꦺꦃ꧉ 9ꦫꦺꦴꦃꦱꦸꦕꦶꦤ꧀ꦢꦸꦢꦸꦃꦲꦏꦺꦲꦥꦧꦧ꧀ꦢꦺꦴꦱ?ꦩꦤꦸꦁꦱꦢꦺꦴꦱ꧈ꦗꦭꦂꦫꦤ꧀ꦲꦺꦴꦫꦥꦽꦕꦪꦩꦫꦁꦲꦏꦸ꧉ 10ꦧꦧ꧀ꦱꦶꦁꦧꦼꦤꦼꦂ꧈ꦫꦺꦴꦃꦱꦸꦕꦶꦧꦏꦭ꧀ꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦔꦁꦒꦼꦥ꧀ꦲꦏꦸꦧꦼꦤꦼꦂ꧉ꦤꦺꦏ꧀ꦲꦺꦴꦫꦔꦺꦴꦤꦺꦴꦩꦺꦴꦱꦺꦴꦏ꧀ꦲꦏꦸꦲꦉꦥ꧀ꦤꦶꦁꦒꦭ꧀ꦏꦺꦴꦮꦺꦭꦤ꧀ꦧꦭꦶꦏ꧀ꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 11ꦧꦧ꧀ꦏꦿꦸꦠꦺꦴꦤ꧀ ꦫꦺꦴꦃꦱꦸꦕꦶꦧꦏꦭ꧀ꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔ꧀ꦒꦮꦺꦥꦸꦠꦸꦱ꧀ꦱꦤ꧀ꦚꦼꦠꦿꦥ꧀ꦫꦠꦸꦤꦺꦗꦒꦠ꧀ ꦪꦏꦸꦮꦶꦱꦺꦠꦤ꧀ ꦱ꧀ꦭꦮꦱ꧀ꦱꦺ꧉
12꧋“ꦲꦺꦤꦺꦁꦲꦺꦴꦏꦺꦃꦱꦶꦁꦲꦶꦗꦶꦏ꧀ꦏꦸꦢꦸꦠꦏ꧀ꦲꦺꦴꦩꦺꦴꦁꦩꦫꦁꦏꦺꦴꦮꦺ꧈ꦤꦁꦔꦶꦁꦱꦲꦶꦏꦶꦏꦺꦴꦮꦺꦢꦸꦫꦸꦁꦧꦶꦱꦢꦸꦤꦸꦁꦏꦸꦮꦶꦏꦧꦺꦃ꧉ 13ꦲꦩ꧀ꦧꦺꦱꦸꦏ꧀ꦤꦺꦏ꧀ꦫꦺꦴꦃꦱꦸꦕꦶꦠꦼꦏ꧈ꦢꦺꦏ꧀ꦤꦺꦱꦶꦁꦧꦏꦭ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦱꦼꦩ꧀ꦧꦫꦁ꧉ꦢꦺꦏ꧀ꦤꦺꦱꦶꦁꦧꦏꦭ꧀ꦩꦸꦭꦁꦔꦶꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦏꦪꦱꦏ꧀ꦧꦼꦤꦼꦂꦫꦺ;ꦲꦺꦴꦫꦤꦸꦫꦸꦠ꧀ꦥꦶꦏꦶꦂꦫꦤ꧀ꦤꦺꦢꦺꦏ꧀ꦤꦺꦢꦺꦮꦺ꧈ꦲꦺꦴꦫ꧈ꦤꦁꦔꦶꦁꦢꦺꦏ꧀ꦤꦺꦤꦩꦸꦁꦩꦸꦭꦁꦔꦏꦺꦲꦥꦲꦺꦴꦩꦺꦴꦁꦔꦺꦒꦸꦱ꧀ꦠꦶꦄꦭ꧀ꦭꦃ꧉ꦭꦤ꧀ꦩꦼꦤꦺꦃ꧈ꦫꦺꦴꦃꦱꦸꦕꦶꦲꦸꦒꦧꦏꦭ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦱꦼꦩ꧀ꦧꦫꦁꦩ꧀ꦧꦫꦁꦱꦶꦁꦧꦏꦭ꧀ꦏ꧀ꦭꦏꦺꦴꦤ꧀꧈ 14ꦱꦼꦩ꧀ꦧꦫꦁꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦢꦺꦏ꧀ꦤꦺꦏꦸꦮꦶꦱꦁꦏꦔ꧀ꦒꦺꦴꦤ꧀ꦏꦸ꧈ꦩꦸꦭꦤꦺꦢꦺꦏ꧀ꦤꦺꦧꦏꦭ꧀ꦔ꧀ꦭꦸꦲꦸꦂꦫꦏꦺꦲꦏꦸ꧉ 15ꦱꦼꦩ꧀ꦧꦫꦁꦱꦶꦁꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦏꦸꦮꦶꦪꦱꦁꦏꦔ꧀ꦒꦺꦴꦤ꧀ꦏꦸꦲꦸꦒ꧉ꦩꦸꦭꦤꦺꦲꦏꦸꦩꦲꦸꦔꦺꦴꦩꦺꦴꦁꦤꦺꦏ꧀ꦱꦼꦩ꧀ꦧꦫꦁꦱꦶꦁꦢꦶꦮꦸꦭꦁꦔꦏꦺꦏꦫꦺꦴꦫꦺꦴꦃꦱꦸꦕꦶꦏꦸꦮꦶꦱꦁꦏꦔ꧀ꦒꦺꦴꦤ꧀ꦏꦸ꧉”
16꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦲꦺꦴꦫꦱꦸꦮꦶꦩꦼꦤꦺꦃꦲꦏꦸꦧꦏꦭ꧀ꦭꦸꦔꦭꦤ꧀ꦏꦺꦴꦮꦺꦲꦺꦴꦫꦧꦏꦭ꧀ꦮꦼꦫꦸꦃꦲꦏꦸꦩꦼꦤꦺꦃ꧈ꦤꦁꦔꦶꦁꦲꦺꦴꦫꦊꦠ꧀ꦱꦸꦮꦶꦱꦏ꧀ꦮꦶꦱ꧀ꦱꦺꦏꦸꦮꦶꦲꦏꦸꦧꦏꦭ꧀ꦠꦼꦏꦩꦼꦤꦺꦃ꧉”
17꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦫꦁꦱꦏ꧀ꦥꦢꦥꦢ:“ꦭꦃꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦱꦏ꧀ꦗꦤꦺꦔꦺꦴꦩꦺꦴꦁꦔꦏꦺꦧꦧ꧀ꦲꦥꦠ꧈ ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦲꦺꦴꦫꦱꦸꦮꦶꦩꦼꦤꦺꦃꦧꦏꦭ꧀ꦭꦸꦔꦭꦤ꧀ꦲꦺꦴꦫꦊꦠ꧀ꦱꦸꦮꦶꦱꦏ꧀ꦮꦶꦱ꧀ꦱꦺꦭꦸꦔꦧꦏꦭ꧀ꦠꦼꦏꦩꦼꦤꦺꦃ꧉ꦭꦤ꧀ꦩꦼꦤꦺꦃ꧈ꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦲꦉꦥ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺ꧉ 18ꦏꦺꦴꦏ꧀ꦔꦺꦴꦩꦺꦴꦁꦲꦺꦴꦫꦊꦠ꧀ꦱꦸꦮꦶꦩꦼꦤꦺꦃ?ꦏꦸꦮꦶꦔꦺꦴꦩꦺꦴꦁꦔꦏꦺꦲꦥꦠ?ꦲꦮꦏ꧀ꦏꦺꦢꦺꦮꦺꦏꦺꦴꦏ꧀ꦲꦺꦴꦫꦢꦸꦤꦸꦁ!”
19꧋ꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦤꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦢꦏꦼꦥꦺꦔꦶꦤ꧀ꦠꦏꦺꦴꦤ꧀ꦩꦫꦁꦢꦺꦏ꧀ꦤꦺ꧈ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦲꦺꦴꦫꦥꦢꦢꦸꦤꦸꦁꦲꦼꦁꦒꦺꦴꦤ꧀ꦏꦸꦔꦺꦴꦩꦺꦴꦁꦤꦺꦏ꧀ꦲꦺꦴꦫꦱꦸꦮꦶꦩꦼꦤꦺꦃꦲꦏꦸꦧꦏꦭ꧀ꦭꦸꦔꦠꦼꦫꦸꦱ꧀ꦲꦺꦴꦫꦊꦠ꧀ꦱꦸꦮꦶꦩꦼꦤꦺꦃꦲꦏꦸꦧꦏꦭ꧀ꦠꦼꦏꦩꦼꦤꦺꦃ꧉ 20ꦱꦲꦶꦏꦶꦲꦉꦥ꧀ꦠꦏ꧀ꦢꦸꦤꦸꦁꦔꦏꦺ꧈ꦩꦸꦭꦤꦺꦢꦶꦫꦸꦔꦺꦴꦏ꧀ꦏꦏꦺꦱꦶꦁꦲꦥꦶꦏ꧀꧈ꦏꦺꦴꦮꦺꦧꦏꦭ꧀ꦥꦢꦱꦩ꧀ꦧꦠ꧀ꦭꦤ꧀ꦠꦔꦶꦱ꧀ꦱꦤ꧀ ꦤꦁꦔꦶꦁꦮꦺꦴꦁꦮꦺꦴꦁꦱꦶꦁꦲꦺꦴꦫꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦥꦢꦧꦸꦔꦃ꧉ꦏꦺꦴꦮꦺꦧꦏꦭ꧀ꦥꦢꦱꦼꦢꦶ꧈ꦤꦁꦔꦶꦁꦱꦼꦢꦶꦩꦸꦧꦏꦭ꧀ꦢꦢꦶꦏꦧꦸꦔꦃꦲꦤ꧀꧈ 21ꦏꦪꦮꦺꦴꦁꦮꦺꦢꦺꦴꦏ꧀ꦱꦶꦁꦲꦉꦥ꧀ꦩ꧀ꦧꦪꦶꦏꦲꦺ:ꦱꦸꦮꦺꦤꦺꦩ꧀ꦧꦪꦶꦔꦿꦱꦏ꧀ꦏꦏꦺꦭꦫ꧈ꦤꦁꦔꦶꦁꦤꦺꦏ꧀ꦧꦪꦶꦤꦺꦮꦶꦱ꧀ꦭꦲꦶꦂꦮꦺꦴꦁꦔꦺꦧꦸꦔꦃꦠꦼꦤꦤ꧀ ꦭꦭꦶꦭꦫꦤꦺ꧉ 22ꦏꦪꦔꦺꦴꦤꦺꦴꦲꦸꦒꦏꦺꦴꦮꦺ꧉ꦱꦲꦶꦏꦶꦏꦺꦴꦮꦺꦥꦢꦱꦼꦢꦶ꧈ꦗꦭꦂꦫꦤ꧀ꦲꦏꦸꦲꦉꦥ꧀ꦭꦸꦔ꧉ꦤꦁꦔꦶꦁꦤꦺꦏ꧀ꦲꦏꦸꦧꦭꦶꦏ꧀ꦩꦼꦤꦺꦃꦏꦺꦴꦮꦺꦧꦏꦭ꧀ꦥꦢꦧꦸꦔꦃꦲꦺꦴꦫꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ꧉ꦲꦺꦴꦫꦲꦺꦤꦺꦁꦮꦺꦴꦁꦱꦶꦁꦧꦏꦭ꧀ꦧꦶꦱꦔꦽꦧꦸꦠ꧀ꦏꦧꦸꦔꦃꦲꦤ꧀ꦲꦶꦏꦶꦱꦁꦏꦲꦠꦶꦩꦸ꧉
23꧋“ꦲꦶꦁꦮꦪꦃꦏꦸꦮꦶꦏꦺꦴꦮꦺꦲꦺꦴꦫꦲꦸꦱꦃꦠꦏꦺꦴꦤ꧀ꦲꦏꦸꦲꦥꦲꦥꦩꦼꦤꦺꦃ꧉ꦢꦶꦲꦺꦭꦶꦁꦠꦼꦤꦤ꧀ꦲꦺꦴꦩꦺꦴꦁꦏꦸꦲꦶꦏꦶ:ꦤꦼꦩ꧀ꦧꦸꦁꦔꦲꦥꦮꦲꦺꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧈ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦸꦫꦸꦠ꧀ꦠꦶ꧈ꦗꦭꦂꦫꦤ꧀ꦱꦁꦏꦲꦏꦸ꧉ 24ꦠꦸꦩꦼꦏꦤꦺꦱꦲꦶꦏꦶꦏꦺꦴꦮꦺꦢꦸꦫꦸꦁꦠꦲꦸꦤꦼꦩ꧀ꦧꦸꦁꦲꦥꦲꦥꦔꦁꦒꦺꦴꦗꦼꦤꦼꦁꦏꦸ꧉ꦥꦢꦤꦼꦩ꧀ꦧꦸꦁꦔ꧈ꦒꦸꦱ꧀ꦠꦶꦄꦭ꧀ꦭꦃꦩꦼꦱ꧀ꦠꦶꦧꦏꦭ꧀ꦔꦼꦏꦺꦏ꧀ꦏꦶ꧉ꦏꦸꦮꦶꦏꦼꦏꦉꦥ꧀ꦥꦤ꧀ꦤꦺꦢꦺꦏ꧀ꦤꦺ꧈ꦱꦸꦥꦪꦏꦺꦴꦮꦺꦧꦶꦱꦧꦸꦔꦃꦠꦼꦤꦤ꧀꧈”
25꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦠꦼꦏꦤꦺꦱꦲꦶꦏꦶꦲꦼꦁꦒꦺꦴꦤ꧀ꦏꦸꦩꦸꦭꦁꦔꦶꦏꦺꦴꦮꦺꦤꦩꦸꦁꦔꦁꦒꦺꦴꦠꦼꦩ꧀ꦧꦸꦁꦠꦼꦩ꧀ꦧꦸꦁꦒꦩ꧀ꦧꦂ꧈ꦤꦁꦔꦶꦁꦲꦺꦴꦫꦊꦠ꧀ꦱꦸꦮꦶꦩꦼꦤꦺꦃꦲꦏꦸꦲꦺꦴꦫꦲꦸꦱꦃꦩꦸꦭꦁꦔꦶꦔꦺꦴꦤꦺꦴꦩꦼꦤꦺꦃ꧉ꦱꦼꦩ꧀ꦧꦫꦁꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦧꦏꦭ꧀ꦠꦏ꧀ꦲꦺꦴꦩꦺꦴꦁꦔꦏꦺꦧ꧀ꦭꦏꦮꦲꦺ꧉ 26ꦲꦶꦁꦮꦪꦃꦏꦸꦮꦶꦲꦏꦸꦲꦺꦴꦫꦲꦸꦱꦃꦤꦼꦩ꧀ꦧꦸꦁꦔꦏꦺꦏꦺꦴꦮꦺ꧈ꦤꦁꦔꦶꦁꦏꦺꦴꦮꦺꦢꦺꦮꦺꦱꦶꦁꦧꦏꦭ꧀ꦤꦼꦩ꧀ꦧꦸꦁꦔꦁꦒꦺꦴꦗꦼꦤꦼꦁꦏꦸꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ 27ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦠꦿꦺꦱ꧀ꦤꦩꦫꦁꦏꦺꦴꦮꦺ꧈ꦗꦭꦂꦫꦤ꧀ꦏꦺꦴꦮꦺꦥꦢꦠꦿꦺꦱ꧀ꦤꦩꦫꦁꦲꦏꦸꦭꦤ꧀ꦥꦢꦥꦽꦕꦪꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 28ꦥꦚ꧀ꦕꦺꦤ꧀ꦠꦼꦤꦤ꧀ ꦲꦏꦸꦲꦶꦏꦶꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ꧉ꦱꦲꦶꦏꦶꦲꦏꦸꦲꦉꦥ꧀ꦤꦶꦁꦒꦭ꧀ꦗꦒꦠ꧀ꦲꦶꦏꦶꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉”
29꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦲꦩ꧀ꦧꦺꦴꦏ꧀ꦔꦺꦴꦤꦺꦴꦠꦒꦸꦱ꧀ꦠꦶ!ꦱꦲꦶꦏꦶꦏꦺꦴꦮꦺꦱꦶꦁꦩꦸꦭꦁꦔꦶꦲꦺꦴꦫꦲꦔꦺꦭ꧀꧈ 30ꦱꦲꦶꦏꦶꦲꦮꦏ꧀ꦏꦺꦢꦺꦮꦺꦔꦼꦂꦠꦶꦤꦺꦏ꧀ꦏꦺꦴꦮꦺꦔꦼꦂꦠꦶꦱꦼꦩ꧀ꦧꦫꦁ꧉ꦲꦮꦏ꧀ꦏꦺꦢꦺꦮꦺꦲꦺꦴꦫꦲꦸꦱꦃꦠꦏꦺꦴꦤ꧀ꦩꦫꦁꦏꦺꦴꦮꦺꦩꦼꦤꦺꦃ꧉ꦩꦸꦭꦤꦺꦱꦲꦶꦏꦶꦲꦮꦏ꧀ꦏꦺꦢꦺꦮꦺꦥꦽꦕꦪꦤꦺꦏ꧀ꦏꦺꦴꦮꦺꦏꦸꦮꦶꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉”
31꧋ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦥꦏꦺꦴꦮꦺꦥꦢꦥꦽꦕꦪꦠꦼꦤꦤ꧀ꦱꦲꦶꦏꦶ?ꦲꦏꦸꦲꦺꦴꦫꦔꦤ꧀ꦢꦼꦭ꧀ꦤꦺꦏ꧀ꦏꦺꦴꦮꦺꦤ꧀ꦢꦸꦮꦺꦥꦽꦕꦪꦱꦶꦁꦩꦤ꧀ꦠꦼꦥ꧀ꦠꦼꦤꦤ꧀꧈ 32ꦢꦶꦠꦶꦠꦺꦤ꧀ꦤꦶꦠ!ꦧꦏꦭ꧀ꦲꦺꦤꦺꦁꦮꦚ꧀ꦕꦶꦤꦺ꧈ꦲꦺꦴꦫꦱꦸꦮꦶꦩꦼꦤꦺꦃ꧈ꦏꦺꦴꦮꦺꦏꦧꦺꦃꦧꦏꦭ꧀ꦧꦸꦪꦂꦢꦺꦮꦺꦢꦺꦮꦺꦥꦫꦤ꧀ꦤꦺ꧉ꦲꦏꦸꦧꦏꦭ꧀ꦩ꧀ꦧꦺꦴꦏ꧀ꦠꦶꦁꦒꦭ꧀ꦢꦺꦮꦺ꧉ꦱꦏ꧀ꦗꦤꦺꦪꦲꦺꦴꦫꦢꦺꦮꦺ꧈ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦔꦚ꧀ꦕꦤꦶꦲꦏꦸ꧉ 33ꦏꦺꦴꦮꦺꦠꦏ꧀ꦲꦺꦴꦩꦺꦴꦁꦔꦶꦏꦸꦮꦶꦩꦲꦸꦏꦧꦺꦃꦱꦸꦥꦪꦏꦺꦴꦮꦺꦧꦶꦱꦫꦸꦩꦏꦼꦠ꧀ꦩꦫꦁꦲꦏꦸꦭꦤ꧀ꦤ꧀ꦢꦸꦮꦺꦤ꧀ꦤꦶꦲꦪꦼꦩ꧀꧈ꦤꦁꦗꦒꦠ꧀ꦏꦺꦤꦺꦏꦺꦴꦮꦺꦧꦏꦭ꧀ꦏꦔꦺꦭ꧀ꦭꦤ꧀ꦠꦼꦤꦤ꧀ ꦲꦮꦶꦠ꧀ꦏꦺꦴꦮꦺꦤꦸꦫꦸꦠ꧀ꦲꦏꦸ꧈ꦤꦁꦔꦶꦁꦢꦶꦏꦸꦮꦠ꧀ꦠꦏꦺꦠꦼꦫꦸꦱ꧀ ꦲꦏꦸꦮꦶꦱ꧀ꦩꦼꦤꦁꦔꦏꦺꦱꦼꦩ꧀ꦧꦫꦁꦏꦸꦮꦶ꧉”
꧇꧑꧗꧇ 1꧋ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦏꦸꦮꦶꦩꦲꦸꦏꦧꦺꦃꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚꦮꦁꦤ꧀ꦢꦸꦮꦸꦂꦭꦤ꧀ꦤ꧀ꦢꦺꦴꦁꦔ:“ꦢꦸꦃꦧꦥꦏ꧀ꦏꦸ꧈ꦱꦲꦶꦏꦶꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ꧉ꦩ꧀ꦧꦺꦴꦏ꧀ꦢꦶꦭꦸꦲꦸꦂꦫꦏꦺꦲꦤꦏ꧀ꦩꦸ꧈ꦱꦸꦥꦪꦲꦤꦏ꧀ꦩꦸꦧꦶꦱꦔ꧀ꦭꦸꦲꦸꦂꦫꦏꦺꦏꦺꦴꦮꦺ꧉ 2ꦏꦺꦴꦮꦺꦮꦶꦱ꧀ꦔꦼꦏꦺꦏ꧀ꦏꦶꦏ꧀ꦮꦱꦩꦫꦁꦢꦺꦏ꧀ꦤꦺ꧈ꦱꦸꦥꦪꦢꦺꦏ꧀ꦤꦺꦧꦶꦱꦔ꧀ꦮꦱꦤꦶꦱꦧꦼꦤ꧀ꦮꦺꦴꦁꦭꦤ꧀ꦧꦶꦱꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁꦩꦫꦁꦱꦧꦼꦤ꧀ꦮꦺꦴꦁꦱꦶꦁꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦢꦺꦏ꧀ꦤꦺ꧉ 3ꦲꦸꦫꦶꦥ꧀ꦭꦁꦒꦼꦁꦲꦶꦏꦸꦪꦏꦸꦮꦶ:ꦤꦺꦏ꧀ꦮꦺꦴꦁꦮꦺꦴꦁꦥꦢꦔꦏꦺꦴꦤ꧀ꦤꦶꦤꦺꦏ꧀ꦏꦺꦴꦮꦺꦢꦺꦮꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦚꦠꦭꦤ꧀ꦲꦺꦴꦫ ꦲꦺꦤꦺꦁꦠꦸꦁꦒꦭ꧀ꦭꦺꦭꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦤꦸꦭꦸꦁꦔꦶꦩꦤꦸꦁꦱ꧉ 4ꦢꦸꦃꦧꦥꦏ꧀ꦏꦸ꧈ꦲꦏꦸꦮꦶꦱ꧀ꦔ꧀ꦭꦸꦲꦸꦂꦫꦏꦺꦏꦺꦴꦮꦺꦲꦶꦁꦗꦒꦠ꧀ꦏꦺꦤꦺ꧈ꦲꦮꦶꦠ꧀ꦲꦏꦸꦮꦶꦱ꧀ꦔꦿꦩ꧀ꦥꦸꦁꦔꦏꦺꦥꦼꦁꦒꦮꦺꦏꦸꦏꦺꦴꦁꦏꦺꦴꦤ꧀ꦤꦤ꧀ꦩꦸꦩꦫꦁꦲꦏꦸ꧉ 5ꦩꦸꦭꦤꦺ꧈ꦲꦩ꧀ꦧꦺꦴꦏ꧀ꦱꦲꦶꦏꦶꦲꦏꦸꦢꦶꦗꦶꦏꦸꦏ꧀ꦩꦼꦤꦺꦃ꧈ꦱꦸꦥꦪꦲꦏꦸꦧꦶꦱꦤꦩ꧀ꦥꦏꦭꦸꦲꦸꦂꦫꦤ꧀ꦤꦁꦔꦉꦥ꧀ꦩꦸ꧈ꦏꦪꦩ꧀ꦧꦶꦪꦺꦤ꧀ꦱꦏ꧀ꦢꦸꦫꦸꦁꦔꦺꦗꦒꦠ꧀ꦲꦺꦤꦺꦁ꧉
6꧋“ꦮꦺꦴꦁꦮꦺꦴꦁꦱꦶꦁꦮꦶꦱ꧀ꦲꦩ꧀ꦧꦺꦴꦏ꧀ꦥꦶꦭꦶꦃꦱꦁꦏꦢꦺꦴꦚꦭꦤ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸꦏꦸꦮꦶꦱꦲꦶꦏꦶꦮꦶꦱ꧀ꦥꦢꦔꦼꦂꦠꦶꦏꦺꦴꦮꦺꦏꦸꦮꦶꦱꦥ꧈ꦲꦮꦶꦠ꧀ꦲꦏꦸꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦺꦴꦮꦺꦩꦫꦁꦮꦺꦴꦁꦮꦺꦴꦁꦏꦸꦮꦶ꧉ꦮꦺꦴꦁꦮꦺꦴꦁꦲꦶꦏꦶꦩꦲꦸꦤꦺꦮꦺꦏ꧀ꦩꦸ꧈ꦤꦁꦔꦶꦁꦱꦲꦶꦏꦶꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸ꧉ꦥꦚ꧀ꦕꦺꦤ꧀ꦮꦺꦴꦁꦮꦺꦴꦁꦲꦶꦏꦶꦥꦢꦤꦩ꧀ꦥꦥꦶꦠꦸꦠꦸꦂꦩꦸ꧉ 7ꦩꦸꦭꦤꦺꦱꦲꦶꦏꦶꦥꦢꦤꦶꦠꦺꦤ꧀ꦤꦶꦤꦺꦏ꧀ꦱꦼꦩ꧀ꦧꦫꦁꦱꦶꦁꦠꦏ꧀ꦮꦸꦭꦁꦔꦏꦺꦭꦤ꧀ꦠꦏ꧀ꦠꦶꦤ꧀ꦢꦏ꧀ꦏꦏꦺꦏꦸꦮꦶꦩꦲꦸꦏꦧꦺꦃꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦩꦸ꧉ 8ꦥꦚ꧀ꦕꦺꦤ꧀ ꦲꦏꦸꦤꦩꦸꦁꦩꦸꦭꦁꦔꦏꦺꦩꦫꦁꦮꦺꦴꦁꦮꦺꦴꦁꦲꦥꦲꦺꦴꦩꦺꦴꦁꦩꦸꦩꦫꦁꦲꦏꦸ꧉ꦏꦸꦮꦶꦏꦧꦺꦃꦥꦢꦢꦶꦠꦩ꧀ꦥ꧈ꦩꦸꦭꦤꦺꦱꦲꦶꦏꦶꦏꦧꦺꦃꦥꦢꦢꦸꦤꦸꦁꦠꦼꦤꦤ꧀ꦤꦺꦏ꧀ꦲꦏꦸꦠꦼꦏꦤꦺꦱꦁꦏꦔ꧀ꦒꦺꦴꦤ꧀ꦩꦸꦭꦤ꧀ꦥꦢꦥꦽꦕꦪꦤꦺꦏ꧀ꦏꦺꦴꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉
9꧋“ꦲꦏꦸꦱꦲꦶꦏꦶꦲꦺꦴꦫꦤ꧀ꦢꦺꦴꦔꦏ꧀ꦏꦏꦺꦮꦺꦴꦁꦮꦺꦴꦁꦱꦶꦁꦲꦺꦴꦫꦥꦽꦕꦪ꧈ꦲꦺꦴꦫ꧈ꦲꦏꦸꦤ꧀ꦢꦺꦴꦔꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶ꧈ꦱꦶꦁꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸ꧉ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦥꦢꦮꦲꦺꦮꦺꦏ꧀ꦩꦸ꧉ 10ꦲꦥꦱꦶꦁꦮꦺꦏ꧀ꦏꦸꦏꦸꦮꦶꦪꦮꦺꦏ꧀ꦩꦸꦭꦤ꧀ꦲꦥꦱꦶꦁꦮꦺꦏ꧀ꦩꦸꦪꦥꦢꦮꦲꦺꦮꦺꦏ꧀ꦏꦸ꧉ꦥꦚ꧀ꦕꦺꦤ꧀ ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦔꦼꦠꦺꦴꦏ꧀ꦏꦏꦺꦱꦼꦥꦶꦫꦒꦼꦢꦺꦤꦺꦏꦠꦿꦺꦱ꧀ꦤꦤ꧀ꦏꦸꦭꦤ꧀ꦏ꧀ꦮꦱꦏꦸ꧉ 11ꦲꦏꦸꦱꦲꦶꦏꦶꦲꦉꦥ꧀ꦭꦸꦔꦱꦁꦏꦗꦒꦠ꧀ꦲꦶꦏꦶ꧈ꦲꦏꦸꦲꦉꦥ꧀ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦩꦸꦩꦼꦤꦺꦃ꧈ꦤꦁꦔꦶꦁꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦠꦏ꧀ꦠꦶꦁꦒꦭ꧀ꦤꦁꦏꦺꦤꦺ꧉ꦢꦸꦃꦧꦥꦏ꧀ꦏꦸꦱꦶꦁꦱꦸꦕꦶ꧈ꦲꦏꦸꦚꦸꦮꦸꦤ꧀ ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦱꦶꦁꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸ꧈ꦲꦩ꧀ꦧꦺꦴꦏ꧀ꦢꦶꦥꦒꦼꦂꦫꦶꦏꦫꦺꦴꦏ꧀ꦮꦱꦤꦺꦗꦼꦤꦼꦁꦩꦸ꧉ꦲꦏꦸꦚꦸꦮꦸꦤ꧀ꦱꦸꦥꦪꦥꦢꦧꦶꦱꦧꦼꦧꦉꦁꦔꦤ꧀ꦢꦢꦶꦱꦶꦗꦶꦲꦶꦁꦱꦼꦩ꧀ꦧꦫꦁ꧈ꦏꦪꦲꦮꦏ꧀ꦏꦺꦢꦺꦮꦺꦲꦶꦏꦶ꧉ 12ꦱꦸꦮꦺꦤꦺꦲꦏꦸꦤꦁꦗꦒꦠ꧀ꦏꦺꦤꦺꦲꦏꦸꦢꦺꦮꦺꦱꦶꦁꦤꦸꦤ꧀ꦠꦸꦤ꧀ꦔꦁꦒꦺꦴꦏ꧀ꦮꦱꦤꦺꦗꦼꦤꦼꦁꦩꦸꦭꦤ꧀ꦲꦺꦴꦫꦲꦺꦤꦺꦁꦱꦶꦁꦲꦩ꧀ꦧꦭꦶꦏ꧀ꦢꦭꦤ꧀ꦏꦫꦸꦱꦏ꧀ꦏꦤ꧀ ꦏꦼꦗꦧꦩꦸꦁꦱꦶꦗꦶ꧉ꦥꦚ꧀ꦕꦺꦤ꧀ꦱꦶꦁꦱꦶꦗꦶꦏꦸꦮꦶꦮꦶꦱ꧀ꦤ꧀ꦢꦸꦮꦺꦏꦉꦥ꧀ꦲꦭ꧈ꦱꦸꦥꦪꦲꦥꦱꦶꦁꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦏ꧀ꦭꦏꦺꦴꦤ꧀ꦠꦼꦤꦤ꧀꧈ 13ꦤꦁꦔꦶꦁꦲꦏꦸꦱꦲꦶꦏꦶꦲꦉꦥ꧀ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦩꦸ꧉ꦩꦸꦭꦤꦺ꧈ꦦꦸꦩ꧀ꦥꦸꦁꦲꦏꦸꦲꦶꦗꦶꦏ꧀ꦤꦁꦗꦒꦠ꧀ꦏꦺꦤꦺꦲꦏꦸꦔꦺꦴꦩꦺꦴꦁꦱꦼꦩ꧀ꦧꦫꦁꦲꦶꦏꦶ꧈ꦱꦸꦥꦪꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦧꦶꦱꦤ꧀ꦢꦸꦮꦺꦤ꧀ꦤꦶꦏꦧꦸꦔꦃꦲꦤ꧀ꦠꦼꦤꦤ꧀ ꦏꦧꦸꦔꦃꦲꦤ꧀ꦱꦶꦁꦤꦩꦸꦁꦲꦏꦸꦢꦺꦮꦺꦧꦶꦱꦔꦼꦏꦺꦏ꧀ꦏꦶ꧉ 14ꦥꦢꦠꦏ꧀ꦮꦸꦭꦁꦔꦶꦥꦶꦠꦸꦠꦸꦂꦩꦸꦭꦤ꧀ꦱꦲꦶꦏꦶꦲꦸꦫꦶꦥ꧀ꦥꦺꦥꦢꦮꦲꦺꦏꦪꦲꦏꦸ꧈ꦩꦭꦶꦃꦱꦺꦗꦺꦏꦫꦺꦴꦮꦺꦴꦁꦱꦶꦁꦲꦺꦴꦫꦥꦽꦕꦪꦩꦫꦁꦏꦺꦴꦮꦺ꧉ꦩꦸꦭꦤꦺꦪꦥꦢꦢꦶꦱꦼꦔꦶꦠ꧀ꦠꦶꦠꦼꦤꦤ꧀ꦏꦫꦺꦴꦮꦺꦴꦁꦱꦶꦁꦲꦺꦴꦫꦥꦽꦕꦪ꧉ 15ꦢꦸꦃꦧꦥꦏ꧀ꦏꦸ꧈ꦲꦏꦸꦲꦺꦴꦫꦚꦸꦮꦸꦤ꧀ꦱꦸꦥꦪꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦲꦩ꧀ꦧꦺꦴꦏ꧀ꦗꦶꦏꦸꦏ꧀ꦱꦁꦏꦗꦒꦠ꧀ꦏꦺꦤꦺ꧈ꦤꦁꦔꦶꦁꦲꦏꦸꦚꦸꦮꦸꦤ꧀ꦱꦸꦥꦪꦲꦩ꧀ꦧꦺꦴꦏ꧀ꦥꦒꦼꦂꦫꦶꦱꦁꦏꦏ꧀ꦮꦱꦤꦺꦱꦺꦠꦤ꧀꧈ 16ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦲꦸꦫꦶꦥ꧀ꦥꦺꦮꦶꦱ꧀ꦲꦺꦴꦫꦠꦸꦁꦒꦭ꧀ꦭꦺꦏꦫꦺꦴꦮꦺꦴꦁꦮꦺꦴꦁꦱꦶꦁꦲꦺꦴꦫꦥꦽꦕꦪꦩꦫꦁꦏꦺꦴꦮꦺ꧈ꦲꦮꦶꦠ꧀ꦲꦏꦸꦪꦲꦺꦴꦫꦠꦸꦁꦒꦭ꧀ꦭꦺꦲꦸꦒ꧉ 17ꦩꦸꦭꦤꦺꦲꦏꦸꦚꦸꦮꦸꦤ꧀ ꦱꦸꦥꦪꦥꦢꦤꦸꦫꦸꦠ꧀ꦥꦶꦠꦸꦠꦸꦂꦩꦸ꧈ꦢꦢꦶꦤꦺꦧꦶꦱꦠꦼꦩꦼꦤ꧀ꦤꦸꦫꦸꦠ꧀ꦏꦺꦴꦮꦺ꧉ꦥꦶꦠꦸꦠꦸꦂꦩꦸꦱꦶꦁꦔꦼꦠꦺꦴꦏ꧀ꦏꦏꦺꦏꦺꦴꦮꦺꦱꦏ꧀ꦚꦠꦤꦺ꧉ 18ꦏꦪꦲꦼꦁꦒꦺꦴꦤ꧀ꦩꦸꦔꦺꦴꦁꦏꦺꦴꦤ꧀ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺꦔꦧꦂꦫꦏꦺꦥꦶꦠꦸꦠꦸꦂꦩꦸꦩꦫꦁꦩꦤꦸꦁꦱ꧈ꦲꦏꦸꦱꦼꦩꦺꦴꦤꦺꦴꦲꦸꦒꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶ꧉ 19ꦲꦏꦸꦩꦱꦿꦃꦲꦏꦺꦲꦸꦫꦶꦥ꧀ꦏꦸꦩꦫꦁꦏꦺꦴꦮꦺꦏꦁꦒꦺꦴꦔ꧀ꦭꦧꦸꦃꦲꦶꦩꦸꦫꦶꦢ꧀ꦩꦸꦫꦶꦢ꧀ꦏꦸꦲꦶꦏꦶ꧈ꦱꦸꦥꦪꦏꦧꦺꦃꦲꦸꦒꦥꦢꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁꦏꦺꦴꦮꦺꦲꦶꦁꦭꦲꦶꦂꦭꦤ꧀ꦧꦠꦶꦤ꧀꧈
20꧋“ꦢꦸꦃꦧꦥꦏ꧀ꦏꦸ꧈ꦲꦏꦸꦲꦺꦴꦫꦤꦩꦸꦁꦤ꧀ꦢꦺꦴꦔꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦮꦲꦺ꧈ꦤꦁꦔꦶꦁꦲꦏꦸꦲꦸꦒꦤ꧀ꦢꦺꦴꦔꦏ꧀ꦏꦏꦺꦮꦺꦴꦁꦱꦶꦁꦤꦩ꧀ꦥꦥꦶꦠꦸꦠꦸꦂꦫꦺꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦠꦼꦫꦸꦱ꧀ꦥꦢꦥꦽꦕꦪꦩꦫꦁꦲꦏꦸ꧉ 21ꦲꦏꦸꦚꦸꦮꦸꦤ꧀ꦧꦶꦱꦲꦏꦧꦺꦃꦥꦢꦫꦸꦏꦸꦤ꧀ꦧꦼꦧꦉꦁꦔꦤ꧀ꦭꦤ꧀ꦧꦶꦱꦲꦫꦸꦩꦏꦼꦠ꧀ꦩꦫꦁꦲꦮꦏ꧀ꦏꦺꦢꦺꦮꦺ꧈ꦏꦪꦲꦼꦁꦒꦺꦴꦤ꧀ꦏꦸꦫꦸꦩꦏꦼꦠ꧀ꦩꦫꦁꦏꦺꦴꦮꦺꦭꦤ꧀ꦏꦺꦴꦮꦺꦩꦫꦁꦲꦏꦸ꧉ꦢꦢꦶꦤꦺꦮꦺꦴꦁꦱꦶꦁꦲꦺꦴꦫꦥꦽꦕꦪꦧꦶꦱꦤꦶꦠꦺꦤ꧀ꦤꦶꦤꦺꦏ꧀ꦏꦺꦴꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺ꧉ 22ꦏꦪꦲꦼꦁꦒꦺꦴꦤ꧀ꦩꦸꦔꦼꦠꦺꦴꦏ꧀ꦏꦏꦺꦲꦶꦁꦲꦸꦫꦶꦥ꧀ꦏꦸꦏꦺꦴꦮꦺꦏꦸꦮꦶꦏꦪꦔꦥ꧈ꦲꦏꦸꦲꦸꦒꦔꦼꦠꦺꦴꦏ꧀ꦏꦏꦺꦲꦶꦁꦲꦸꦫꦶꦥ꧀ꦥꦺꦱꦶꦁꦥꦢꦥꦽꦕꦪ꧈ꦲꦏꦸꦲꦶꦏꦶꦏꦪꦔꦥ꧉ꦤꦺꦏ꧀ꦏꦧꦺꦃꦧꦶꦱꦏꦪꦲꦏꦸ꧈ꦏꦧꦺꦃꦲꦸꦒꦧꦏꦭ꧀ꦧꦶꦱꦫꦸꦏꦸꦤ꧀ꦢꦢꦶꦱꦶꦗꦶꦏꦪꦲꦼꦁꦒꦺꦴꦤꦺꦏꦺꦴꦮꦺꦏꦫꦺꦴꦲꦏꦸꦲꦶꦏꦶꦢꦢꦶꦱꦶꦗꦶ꧉ 23ꦢꦢꦶꦤꦺꦏꦺꦴꦮꦺꦲꦸꦫꦶꦥ꧀ꦲꦶꦁꦲꦏꦸꦭꦤ꧀ꦲꦏꦸꦲꦸꦫꦶꦥ꧀ꦲꦶꦁꦲꦠꦶꦤꦺ ꦮꦺꦴꦁꦮꦺꦴꦁꦏꦸꦮꦶꦭꦤ꧀ꦏꦧꦺꦃꦧꦶꦱꦢꦢꦶꦱꦶꦗꦶ꧈ꦏꦪꦱꦶꦁꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺ꧉ꦤꦺꦏ꧀ꦧꦶꦱꦔꦺꦴꦤꦺꦴꦗꦒꦠ꧀ꦧꦏꦭ꧀ꦥꦽꦕꦪꦤꦺꦏ꧀ꦏꦺꦴꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸꦭꦤ꧀ꦲꦸꦒꦧꦶꦱꦥꦽꦕꦪꦤꦺꦏ꧀ꦏꦺꦴꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁꦩꦤꦸꦁꦱ꧈ꦏꦪꦲꦼꦁꦒꦺꦴꦤ꧀ꦩꦸꦠꦿꦺꦱ꧀ꦤꦩꦫꦁꦲꦏꦸ꧉
24꧋“ꦢꦸꦃꦧꦥꦏ꧀ꦏꦸ꧈ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸ꧉ꦏꦉꦥ꧀ꦏꦸꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶꦧꦶꦱꦤꦁꦔ꧀ꦒꦺꦴꦤ꧀ꦏꦸ꧈ꦱꦸꦥꦪꦧꦶꦱꦮꦼꦫꦸꦃꦏꦩꦸꦭꦾꦤ꧀ꦏꦸ꧉ꦪꦏꦺꦴꦮꦺꦱꦶꦁꦔꦼꦏꦺꦏ꧀ꦏꦶꦏꦩꦸꦭꦾꦤ꧀ꦲꦶꦏꦶꦩꦫꦁꦲꦏꦸ꧈ꦲꦮꦶꦠ꧀ꦏꦺꦴꦮꦺꦠꦿꦺꦱ꧀ꦤꦩꦫꦁꦲꦏꦸꦏꦮꦶꦠ꧀ꦗꦒꦠ꧀ꦲꦶꦏꦶꦢꦸꦫꦸꦁꦲꦺꦤꦺꦁ꧉ 25ꦢꦸꦃꦧꦥꦏ꧀ꦏꦸꦱꦶꦁꦧꦼꦤꦼꦂꦱ꧀ꦭꦮꦱ꧀ꦱꦺ꧈ꦱꦼꦤꦗꦤ꧀ꦮꦺꦴꦁꦗꦒꦠ꧀ꦏꦺꦤꦺꦲꦺꦴꦫꦔꦼꦂꦠꦶꦏꦺꦴꦮꦺ꧈ꦲꦏꦸꦔꦼꦂꦠꦶꦏꦺꦴꦮꦺꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦏꦸꦲꦶꦏꦶꦱꦲꦶꦏꦶꦮꦶꦱ꧀ꦔꦼꦂꦠꦶꦤꦺꦏ꧀ꦏꦺꦴꦮꦺꦱꦶꦁꦔꦺꦴꦁꦏꦺꦴꦤ꧀ꦲꦏꦸ꧉ 26ꦲꦏꦸꦮꦶꦱ꧀ꦤ꧀ꦢꦸꦢꦸꦃꦲꦏꦺꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦏꦸꦏꦺꦴꦮꦺꦏꦸꦮꦶꦱꦥꦭꦤ꧀ꦧꦏꦭ꧀ꦠꦏ꧀ꦢꦸꦢꦸꦃꦲꦏꦺꦠꦼꦫꦸꦱ꧀꧈ꦏꦉꦥ꧀ꦏꦸ꧈ꦱꦸꦥꦪꦥꦢꦤ꧀ꦢꦸꦮꦺꦤ꧀ꦤꦶꦏꦠꦿꦺꦱ꧀ꦤꦤ꧀ꦏꦪꦲꦼꦁꦒꦺꦴꦤ꧀ꦩꦸꦤꦿꦺꦱ꧀ꦤꦤ꧀ꦤꦶꦲꦏꦸꦭꦤ꧀ꦱꦸꦥꦪꦲꦏꦸꦧꦶꦱꦢꦢꦶꦱꦶꦗꦶꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦏꦸꦏꦸꦮꦶ꧉”
꧇꧑꧘꧇ 1꧋ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦤ꧀ꦢꦺꦴꦁꦔꦏꦸꦮꦶꦢꦺꦏ꧀ꦤꦺꦠꦼꦫꦸꦱ꧀ꦔꦧꦿꦃꦏꦿꦶꦏꦶꦏꦶꦢꦿꦺꦴꦤ꧀ꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉ꦏꦢꦸꦁꦮꦶꦱ꧀ꦔꦧꦿꦃꦠꦼꦫꦸꦱ꧀ꦥꦢꦩ꧀ꦊꦧꦸꦤꦁꦏꦼꦧꦺꦴꦤ꧀ꦎꦭꦺꦥ꦳꧀꧈ 2ꦒꦸꦱ꧀ꦠꦶꦪꦺꦯꦸꦱ꧀ꦲꦗꦼꦏ꧀ꦩ꧀ꦧꦿꦺꦤꦺꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦢꦺ꧈ꦩꦸꦭꦤꦺꦪꦸꦢꦱ꧀ꦲꦩ꧀ꦧꦫꦁꦪꦔꦼꦂꦠꦶꦥꦁꦒꦺꦴꦤ꧀ꦤꦤ꧀ꦲꦶꦏꦶ꧉ꦪꦪꦸꦢꦱ꧀ꦲꦶꦏꦶꦱꦶꦁꦲꦺꦴꦫꦊꦠ꧀ꦱꦸꦮꦶꦔꦼꦭꦸꦁꦔꦏꦺꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦩꦸꦁꦱꦸꦃꦲꦺ꧉ 3ꦪꦸꦢꦱ꧀ꦲꦩ꧀ꦧꦫꦁꦩ꧀ꦧꦿꦺꦴꦤꦺꦴꦔ꧀ꦒꦮꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦱꦶꦁꦚ꧀ꦗꦒꦒꦿꦺꦗꦒꦼꦢꦺ꧉ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦲꦶꦏꦶꦏꦺꦴꦁꦏꦺꦴꦤ꧀ꦤꦤ꧀ꦤꦺꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦭꦤ꧀ꦥꦫꦥ꦳ꦫꦶꦱꦶꦭꦤ꧀ꦥꦢꦠꦼꦏꦔ꧀ꦒꦮꦲꦺꦴꦧꦺꦴꦂꦭꦤ꧀ꦱꦼꦤ꧀ꦠꦶꦂꦭꦤ꧀ꦲꦸꦒꦒꦩꦤ꧀ꦒꦩꦤ꧀꧈ 4ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦔꦼꦂꦠꦶꦧꦏꦭ꧀ꦲꦺꦤꦺꦁꦲꦥ꧈ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦩꦼꦠꦸꦩꦥꦏ꧀ꦮꦺꦴꦁꦮꦺꦴꦁ꧉ꦢꦺꦏ꧀ꦤꦺꦠꦏꦺꦴꦤ꧀:“ꦏꦺꦴꦮꦺꦏꦸꦮꦶꦥꦢꦔ꧀ꦒꦺꦴꦭꦺꦏ꧀ꦏꦶꦱꦥ?”
5꧋ꦮꦺꦴꦁꦮꦺꦴꦁꦱꦼꦩꦲꦸꦂ:“ꦲꦮꦏ꧀ꦏꦺꦢꦺꦮꦺꦔ꧀ꦒꦺꦴꦭꦺꦏ꧀ꦏꦶꦪꦺꦯꦸꦱ꧀ ꦮꦺꦴꦁꦱꦁꦏꦟꦱꦫꦺꦠ꧀!”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦪꦺꦯꦸꦱ꧀ꦏꦸꦮꦶꦪꦲꦏꦸꦲꦶꦏꦶ!”
꧋ꦪꦸꦢꦱ꧀ꦲꦩ꧀ꦧꦫꦁꦪꦤꦁꦏꦺꦴꦤꦺꦴꦏꦫꦺꦴꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦱꦶꦁꦥꦢꦠꦼꦏꦩꦲꦸ꧉ 6ꦮꦺꦴꦁꦮꦺꦴꦁꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦠꦼꦫꦸꦱ꧀ꦥꦢꦩꦸꦤ꧀ꦢꦸꦂꦱꦩ꧀ꦥꦺꦏ꧀ꦔ꧀ꦒꦼꦧ꧀ꦭꦏ꧀꧈ 7ꦒꦸꦱ꧀ꦠꦶꦪꦺꦯꦸꦱ꧀ꦠꦏꦺꦴꦤ꧀ꦱꦼꦥꦶꦱ꧀ꦱꦤ꧀ꦩꦼꦤꦺꦃ:“ꦱꦥꦠꦱꦶꦁꦲꦩ꧀ꦧꦺꦴꦏ꧀ꦒꦺꦴꦭꦺꦏ꧀ꦏꦶꦏꦸꦮꦶ?”
꧋ꦠꦼꦫꦸꦱ꧀ꦥꦢꦱꦼꦩꦲꦸꦂ:“ꦪꦺꦯꦸꦱ꧀ ꦮꦺꦴꦁꦱꦁꦏꦟꦱꦫꦺꦠ꧀!”
8꧋“ꦲꦏꦸꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠꦤꦺꦏ꧀ꦪꦺꦯꦸꦱ꧀ꦏꦸꦮꦶꦪꦲꦏꦸꦲꦶꦏꦶ꧉ꦤꦺꦏ꧀ꦤꦩꦸꦁꦔ꧀ꦒꦺꦴꦭꦺꦏ꧀ꦏꦶꦲꦏꦸ꧈ꦏꦚ꧀ꦕꦏꦚ꧀ꦕꦏꦸꦲꦶꦏꦶꦪꦢꦶꦲꦼꦗꦂꦫꦏꦺꦮꦲꦺ꧉” 9ꦪꦥꦚ꧀ꦕꦺꦤ꧀ꦧꦼꦤꦼꦂ꧈ꦲꦮꦶꦠ꧀ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦠꦲꦸꦔꦺꦴꦩꦺꦴꦁꦔꦺꦤꦺꦩꦫꦁꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦺ:“ꦱꦶꦁꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁꦲꦏꦸꦲꦺꦴꦫꦲꦺꦤꦺꦁꦱꦶꦗꦶꦱꦶꦗꦶꦪꦱꦶꦁꦠꦏ꧀ꦲꦶꦭꦁꦔꦏꦺ!”
10꧋ꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ ꦱꦶꦁꦔ꧀ꦒꦮꦥꦼꦢꦁ꧈ꦤꦫꦶꦏ꧀ꦥꦼꦢꦁꦔꦺꦢꦶꦲꦼꦁꦒꦺꦴꦚꦧꦼꦠ꧀ꦏꦸꦥꦶꦁꦔꦺꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺꦱꦩ꧀ꦥꦺꦏ꧀ꦕꦼꦥꦺꦴꦭ꧀꧉ꦱ꧀ꦭꦥ꦳꧀ꦲꦶꦏꦶꦗꦼꦤꦼꦁꦔꦺꦩꦭ꧀ꦏꦸꦱ꧀꧈ 11ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦩꦭꦃꦚꦼꦤꦺꦤ꧀ꦤꦶꦫꦱꦸꦭ꧀ꦦꦺꦠꦿꦸꦱ꧀:“ꦥꦼꦢꦁꦩꦸꦏꦸꦮꦶꦢꦶꦊꦧꦺꦴꦏ꧀ꦏꦏꦺꦩꦼꦤꦺꦃ!ꦩꦺꦴꦱꦺꦴꦏ꧀ꦲꦏꦸꦲꦺꦴꦫꦒꦼꦊꦩ꧀ꦔ꧀ꦭꦏꦺꦴꦤ꧀ꦤꦶꦏꦱꦁꦱꦫꦤ꧀ꦱꦶꦁꦮꦶꦱ꧀ꦢꦶꦏꦉꦥ꧀ꦥꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ?”
12꧋ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦭꦤ꧀ꦏꦸꦩꦼꦤ꧀ꦢꦤ꧀ꦤꦺꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦠꦺꦒꦿꦺꦗꦒꦼꦢꦺꦠꦼꦫꦸꦱ꧀ꦥꦢꦚꦼꦏꦼꦭ꧀ꦒꦸꦱ꧀ꦠꦶꦪꦺꦯꦸꦱ꧀꧈ 13ꦠꦔꦤ꧀ꦤꦺꦢꦶꦠꦭꦺꦤ꧀ꦤꦶꦠꦼꦫꦸꦱ꧀ꦢꦶꦒꦮꦤꦁꦔ꧀ꦒꦺꦴꦤ꧀ꦤꦺꦄꦤꦱ꧀꧈ꦄꦤꦱ꧀ꦲꦶꦏꦶꦧꦥꦏ꧀ꦩꦫꦠꦸꦮꦤꦺꦏꦪꦥ꦳ꦱ꧀ ꦱꦶꦁꦢꦢꦶꦲꦶꦩꦩ꧀ꦒꦼꦢꦺꦲꦶꦁꦮꦪꦃꦏꦸꦮꦶ꧉ 14ꦪꦏꦪꦥ꦳ꦱ꧀ꦲꦶꦏꦶꦱꦶꦁꦔꦺꦴꦩꦺꦴꦁꦩꦫꦁꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦤꦺꦏ꧀ꦭꦸꦮꦶꦃꦲꦥꦶꦏ꧀ꦮꦺꦴꦁꦱꦶꦗꦶꦩꦠꦶꦠꦼꦤꦶꦩ꧀ꦧꦁꦱꦏ꧀ꦧꦁꦱꦏꦧꦺꦃ꧉
15꧋ꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦭꦤ꧀ꦩꦸꦫꦶꦢ꧀ꦭꦶꦪꦤꦺ꧈ꦪꦏꦸꦮꦶꦫꦱꦸꦭ꧀ꦪꦺꦴꦲꦤꦼꦱ꧀ ꦥꦢꦔꦼꦠꦸꦠ꧀ꦠꦏꦺꦒꦸꦱ꧀ꦠꦶꦪꦺꦯꦸꦱ꧀꧈ꦫꦱꦸꦭ꧀ꦪꦺꦴꦲꦤꦼꦱ꧀ꦏꦸꦮꦶꦏꦼꦤꦭ꧀ꦏꦫꦺꦴꦲꦶꦩꦩ꧀ꦩꦺꦒꦼꦢꦺ꧈ꦩꦸꦭꦤꦺꦢꦺꦏ꧀ꦤꦺꦠꦼꦫꦸꦱ꧀ꦩꦺꦭꦸꦩ꧀ꦊꦧꦸꦤꦁꦲꦺꦴꦩꦃꦲꦺꦲꦶꦩꦩ꧀ꦩꦺꦒꦼꦢꦺ꧉ 16ꦤꦁꦔꦶꦁꦫꦱꦸꦭ꧀ꦦꦺꦠꦿꦸꦱ꧀ꦔꦼꦤ꧀ꦠꦺꦤ꧀ꦤꦶꦤꦁꦚ꧀ꦗꦧꦤꦺꦭꦮꦁ꧉ꦩꦸꦫꦶꦢ꧀ꦭꦶꦪꦤꦺꦱꦶꦁꦏꦼꦤꦭ꧀ꦏꦫꦺꦴꦲꦶꦩꦩ꧀ꦩꦺꦒꦼꦢꦺꦠꦼꦫꦸꦱ꧀ꦩꦼꦠꦸꦭꦤ꧀ꦔꦺꦴꦩꦺꦴꦁꦩꦫꦁꦮꦺꦴꦁꦮꦺꦢꦺꦴꦏ꧀ꦏꦺꦱꦶꦁꦠꦸꦏꦁꦲꦩ꧀ꦧꦸꦏꦏ꧀ꦭꦮꦁ꧉ꦫꦱꦸꦭ꧀ꦦꦺꦠꦿꦸꦱ꧀ ꦲꦩ꧀ꦧꦫꦁꦠꦼꦫꦸꦱ꧀ꦢꦶꦲꦼꦗꦺꦏ꧀ꦩ꧀ꦊꦧꦸ꧉ 17ꦮꦺꦴꦁꦮꦺꦢꦺꦴꦏ꧀ꦱꦶꦁꦗꦒꦭꦮꦁꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦫꦱꦸꦭ꧀ꦦꦺꦠꦿꦸꦱ꧀:“ꦲꦥꦏꦺꦴꦮꦺꦢꦸꦢꦸꦠꦸꦁꦒꦭ꧀ꦭꦺꦩꦸꦫꦶꦢ꧀ꦢꦺꦮꦺꦴꦁꦔꦺ?”
꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ:“ꦲꦺꦴꦫ!”
18꧋ꦲꦶꦏꦶꦢꦺꦴꦁꦔꦺꦮꦪꦃꦲꦢꦼꦩ꧀ ꦩꦸꦭꦤꦺꦱ꧀ꦭꦥ꦳꧀ꦱ꧀ꦭꦥ꦳꧀ꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦠꦺꦒꦿꦺꦗꦒꦼꦢꦺꦱꦶꦁꦤꦁꦏꦺꦴꦤꦺꦴꦥꦢꦔ꧀ꦒꦮꦺꦧꦼꦢꦶꦪꦁꦏꦫꦺꦴꦲꦉꦁꦱꦸꦥꦪꦲꦔꦼꦠ꧀꧈ꦮꦺꦴꦁꦮꦺꦴꦁꦥꦢꦔꦢꦼꦏ꧀ꦔꦸꦧꦼꦁꦔꦶꦧꦼꦢꦶꦪꦁꦔꦺ꧉ꦫꦱꦸꦭ꧀ꦦꦺꦠꦿꦸꦱ꧀ꦲꦩ꧀ꦧꦫꦁꦩꦺꦭꦸꦔꦢꦼꦏ꧀ꦤꦁꦏꦺꦴꦤꦺꦴ꧉
19꧋ꦱꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦢꦶꦠꦏꦺꦴꦤ꧀ꦤꦶꦏꦫꦺꦴꦲꦶꦩꦩ꧀ꦩꦺꦒꦼꦢꦺꦧꦧ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺꦭꦤ꧀ꦥꦶꦮꦸꦭꦁꦔꦺ꧉ 20ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦲꦏꦸꦤꦺꦏ꧀ꦩꦸꦭꦁꦔꦶꦤꦁꦔꦉꦥ꧀ꦥꦺꦮꦺꦴꦁꦲꦺꦴꦏꦺꦃ꧈ꦤꦁꦱꦶꦤꦒꦸꦏ꧀ꦲꦥꦤꦁꦒꦿꦺꦗꦒꦼꦢꦺ꧈ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦲꦼꦁꦒꦺꦴꦔꦸꦩ꧀ꦥꦸꦭ꧀ꦮꦺꦴꦁꦙꦸ꧉ꦲꦏꦸꦲꦺꦴꦫꦠꦲꦸꦤ꧀ꦢꦼꦭꦶꦏ꧀ꦤ꧀ꦢꦼꦭꦶꦏ꧀꧈ 21ꦤꦺꦏ꧀ꦏꦼꦥꦺꦔꦶꦤ꧀ꦔꦼꦂꦠꦶꦲꦥꦱꦶꦁꦠꦏ꧀ꦮꦸꦭꦁꦔꦏꦺꦪꦠꦏꦺꦴꦤ꧀ꦩꦫꦁꦮꦺꦴꦁꦮꦺꦴꦁꦱꦶꦁꦥꦢꦔꦿꦸꦔꦺꦴꦏ꧀ꦏꦏꦺ꧉ꦮꦺꦴꦁꦮꦺꦴꦁꦏꦸꦮꦶꦩꦼꦱ꧀ꦠꦶꦔꦼꦂꦠꦶꦲꦥꦱꦶꦁꦠꦏ꧀ꦮꦸꦭꦁꦔꦏꦺ꧉”
22꧋ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦠꦼꦫꦸꦱ꧀ꦱꦼꦏꦲꦸꦠ꧀ꦠꦺꦒꦿꦺꦗꦒꦼꦢꦺꦱꦶꦁꦔꦢꦼꦏ꧀ꦤꦁꦏꦺꦴꦤꦺꦴꦤꦥꦸꦏ꧀ꦢꦺꦏ꧀ꦤꦺꦏꦫꦺꦴꦔꦺꦴꦩꦺꦴꦁ:“ꦏꦫꦺꦴꦲꦶꦩꦩ꧀ꦒꦼꦢꦺꦲꦗꦮꦤꦶꦔꦺꦴꦩꦺꦴꦁꦔꦺꦴꦤꦺꦴꦪ!”
23꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦤꦺꦏ꧀ꦲꦺꦴꦩꦺꦴꦁꦏꦸꦏꦸꦮꦶꦩꦲꦸꦲꦺꦴꦫꦧꦼꦤꦼꦂ꧈ꦲꦥꦏ꧀ꦭꦺꦫꦸꦤꦺ?ꦭꦃꦤꦺꦏ꧀ꦲꦺꦴꦩꦺꦴꦁꦏꦸꦧꦼꦤꦼꦂ꧈ꦲꦏꦸꦏꦺꦴꦏ꧀ꦲꦩ꧀ꦧꦺꦴꦏ꧀ꦠꦥꦸꦏ꧀?”
24꧋ꦄꦤꦱ꧀ꦠꦼꦫꦸꦱ꧀ꦩꦿꦺꦤ꧀ꦠꦃꦏꦺꦴꦁꦏꦺꦴꦤ꧀ꦔ꧀ꦒꦮꦒꦸꦱ꧀ꦠꦶꦪꦺꦯꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦏꦪꦥ꦳ꦱ꧀ ꦲꦶꦩꦩ꧀ꦩꦺꦒꦼꦢꦺ꧉ꦠꦔꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦢꦶꦧꦤ꧀ꦢ꧉
25꧋ꦱꦲꦶꦏꦶꦫꦱꦸꦭ꧀ꦦꦺꦠꦿꦸꦱ꧀ꦲꦶꦗꦶꦏ꧀ꦔꦢꦼꦏ꧀ꦤꦁꦧꦼꦢꦶꦪꦁꦔꦤ꧀ꦏꦺꦴꦤꦺꦴ꧉ꦮꦺꦴꦁꦮꦺꦴꦁꦱꦶꦁꦤꦁꦏꦺꦴꦤꦺꦴꦠꦏꦺꦴꦤ꧀ꦩꦫꦁꦢꦺꦏ꧀ꦤꦺ:“ꦏꦺꦴꦮꦺꦭꦲꦸꦠ꧀ꦩꦸꦫꦶꦢ꧀ꦢꦺꦮꦺꦴꦁꦏꦸꦮꦶꦠ?”
꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ:“ꦲꦺꦴꦫꦲꦃ!”
26꧋ꦠꦼꦫꦸꦱ꧀ꦲꦺꦤꦺꦁꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺ꧈ꦱꦼꦢꦸꦭꦸꦂꦫꦺꦱ꧀ꦭꦥ꦳꧀ꦱꦶꦁꦢꦶꦧꦕꦺꦴꦏ꧀ꦏꦸꦥꦶꦁꦔꦺꦏꦫꦺꦴꦫꦱꦸꦭ꧀ꦦꦺꦠꦿꦸꦱ꧀ ꦔꦺꦴꦩꦺꦴꦁ:“ꦏꦪꦏꦪꦲꦏꦸꦮꦼꦫꦸꦃꦏꦺꦴꦮꦺꦲꦩ꧀ꦧꦫꦁꦏꦫꦺꦴꦢꦺꦏ꧀ꦤꦺꦤꦁꦏꦼꦧꦺꦴꦤ꧀ꦎꦭꦺꦥ꦳꧀!”
27꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦱꦼꦩꦲꦸꦂꦩꦼꦤꦺꦃ:“ꦲꦺꦴꦫꦲꦃ!”
꧋ꦱꦏ꧀ꦮꦠ꧀ꦠꦼꦫꦸꦱ꧀ꦲꦺꦤꦺꦁꦗꦒꦺꦴꦏ꧀ꦭꦸꦫꦸꦏ꧀꧈
28꧋ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮꦭꦸꦔꦱꦁꦏꦲꦺꦴꦩꦃꦲꦺꦏꦪꦥ꦳ꦱ꧀꧈ꦱꦲꦶꦏꦶꦢꦶꦒꦮꦤꦁꦲꦺꦴꦩꦃꦲꦺꦒꦿꦩꦁꦔꦺ꧉ꦏꦸꦮꦶꦲꦶꦗꦶꦏ꧀ꦲꦺꦱꦸꦏ꧀ꦧꦔꦼꦠ꧀꧈ꦮꦺꦴꦁꦮꦺꦴꦁꦙꦸꦩꦭꦃꦲꦺꦴꦫꦥꦢꦩ꧀ꦊꦧꦸꦤꦁꦲꦺꦴꦩꦃꦲꦺꦒꦿꦩꦁꦔꦺ꧈ꦲꦮꦶꦠ꧀ꦒꦿꦩꦁꦔꦺꦏꦸꦮꦶꦢꦸꦢꦸꦮꦺꦴꦁꦙꦸ꧉ꦭꦤ꧀ꦩꦶꦠꦸꦫꦸꦠ꧀ꦲꦒꦩꦤꦺꦮꦺꦴꦁꦙꦸꦲꦺꦴꦫꦲꦺꦤ꧀ꦠꦸꦏ꧀ꦩ꧀ꦊꦧꦸꦲꦺꦴꦩꦃꦲꦺꦱꦶꦁꦢꦸꦢꦸꦧꦁꦱꦤꦺ꧈ꦩꦼꦁꦏꦺꦴꦤ꧀ꦢꦏ꧀ꦉꦒꦼꦠ꧀ꦲꦮꦏ꧀ꦏꦺ꧉ꦤꦺꦏ꧀ꦲꦺꦴꦫꦉꦱꦶꦏ꧀ꦲꦺꦴꦫꦲꦺꦤ꧀ꦠꦸꦏ꧀ꦩꦺꦭꦸꦩꦁꦔꦤ꧀ꦥꦔꦤ꧀ꦥꦱ꧀ꦏꦃ꧉ 29ꦩꦸꦭꦤꦺꦒꦿꦩꦁꦥꦶꦭꦠꦸꦱ꧀ꦠꦼꦫꦸꦱ꧀ꦔ꧀ꦭꦸꦩꦸꦃꦲꦶꦩꦼꦠꦸꦭꦤ꧀ꦠꦏꦺꦴꦤ꧀ꦩꦫꦁꦮꦺꦴꦁꦮꦺꦴꦁ:“ꦲꦥꦱꦭꦃꦲꦺꦮꦺꦴꦁꦲꦶꦏꦶ?”
30꧋ꦮꦺꦴꦁꦮꦺꦴꦁꦱꦼꦩꦲꦸꦂ:“ꦤꦺꦏ꧀ꦲꦺꦴꦫꦮꦺꦴꦁꦤꦏꦭ꧀ꦩꦺꦴꦱꦺꦴꦏ꧀ꦢꦶꦒꦮꦩ꧀ꦧꦿꦺꦤꦺꦏꦫꦺꦴꦲꦮꦏ꧀ꦏꦺꦢꦺꦮꦺ!”
31꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤꦢꦶꦏꦿꦸꦠꦸꦏꦺꦴꦮꦺꦢꦺꦮꦺꦩꦶꦠꦸꦫꦸꦠ꧀ꦮꦺꦠ꧀ꦠꦺꦲꦒꦩꦩꦸꦢꦺꦮꦺ!”
꧋ꦮꦺꦴꦁꦮꦺꦴꦁꦱꦼꦩꦲꦸꦂ:“ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦲꦺꦴꦫꦢꦶꦭꦶꦭꦤꦶꦔꦺꦴꦁꦏꦺꦴꦤ꧀ꦩꦠꦺꦤ꧀ꦤꦶꦮꦺꦴꦁ!” 32ꦥꦚ꧀ꦕꦺꦤ꧀ꦏꦸꦢꦸꦏ꧀ꦭꦏꦺꦴꦤ꧀ꦱꦶꦁꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦧꦧ꧀ꦏꦼꦥꦿꦶꦪꦺꦢꦺꦏ꧀ꦤꦺꦲꦼꦁꦒꦺꦴꦤꦺꦧꦏꦭ꧀ꦩꦠꦶ꧉
33꧋ꦒꦿꦩꦁꦥꦶꦭꦠꦸꦱ꧀ꦠꦼꦫꦸꦱ꧀ꦩ꧀ꦊꦧꦸꦩꦼꦤꦺꦃꦤꦁꦲꦺꦴꦩꦃꦲꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦕꦼꦭꦸꦏ꧀ꦭꦤ꧀ꦢꦶꦠꦏꦺꦴꦤ꧀ꦤꦶ:“ꦲꦥꦏꦺꦴꦮꦺꦏꦸꦮꦶꦫꦠꦸꦤꦺꦧꦁꦱꦙꦸꦠꦼꦤꦤ꧀?”
34꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦏꦸꦮꦶꦥꦶꦠꦏꦺꦴꦤ꧀ꦤꦤ꧀ꦩꦸꦢꦺꦮꦺꦲꦥꦮꦺꦴꦁꦭꦶꦪꦤꦺꦱꦶꦁꦔꦺꦴꦁꦏꦺꦴꦤ꧀ꦏꦺꦴꦮꦺ?”
35꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦄꦁꦒꦶꦠꦤ꧀ꦩꦸꦏꦸꦮꦶꦲꦏꦸꦮꦺꦴꦁꦙꦸ?ꦧꦁꦱꦩꦸꦢꦺꦮꦺꦭꦤ꧀ꦥꦼꦔꦉꦥ꧀ꦥꦼꦔꦉꦥ꧀ꦥꦺꦲꦶꦩꦩ꧀ꦱꦶꦁꦔ꧀ꦒꦮꦏꦺꦴꦮꦺꦩ꧀ꦧꦿꦺꦤꦺꦤꦁꦔ꧀ꦒꦺꦴꦤ꧀ꦏꦸ!ꦱꦭꦃꦩꦸꦲꦥꦏꦺꦴꦏ꧀ꦏꦺꦴꦮꦺꦢꦶꦕꦼꦏꦼꦭ꧀!”
36꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦢꦸꦢꦸꦮꦺꦴꦁꦗꦒꦠ꧀ꦏꦺꦤꦺꦱꦶꦁꦤ꧀ꦢꦢꦺꦏ꧀ꦏꦏꦺꦲꦏꦸꦢꦢꦶꦫꦠꦸ꧉ꦱꦼꦩꦸꦁꦒꦺꦴꦤ꧀ꦤꦺꦮꦺꦴꦁꦗꦒꦠ꧀ꦏꦺꦤꦺꦱꦶꦁꦤ꧀ꦢꦢꦺꦏ꧀ꦏꦏꦺꦲꦏꦸꦢꦢꦶꦫꦠꦸ꧈ꦧꦭꦏꦸꦩꦼꦱ꧀ꦠꦶꦥꦢꦔ꧀ꦭꦮꦤ꧀ꦲꦩ꧀ꦧꦺꦭꦤꦶꦲꦏꦸꦱꦸꦥꦪꦲꦏꦸꦲꦺꦴꦫꦢꦶꦕꦼꦏꦼꦭ꧀ꦏꦫꦺꦴꦮꦺꦴꦁꦙꦸ꧉ꦤꦁꦔꦶꦁꦪꦏꦸꦮꦶ꧈ꦢꦸꦢꦸꦮꦺꦴꦁꦗꦒꦠ꧀ꦏꦺꦤꦺꦱꦶꦁꦤ꧀ꦢꦢꦺꦏ꧀ꦏꦏꦺꦲꦏꦸꦢꦢꦶꦫꦠꦸ꧉”
37꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦤꦺꦏ꧀ꦔꦺꦴꦤꦺꦴꦏꦺꦴꦮꦺꦫꦠꦸꦠꦼꦤꦤ꧀?”
꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦥꦚ꧀ꦕꦺꦤ꧀ ꦧꦼꦤꦼꦂꦱꦶꦁꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦏꦸꦮꦶ꧉ꦲꦏꦸꦭꦲꦶꦂꦭꦤ꧀ ꦲꦏꦸꦠꦼꦏꦤꦁꦗꦒꦠ꧀ꦏꦺꦤꦺꦏꦁꦒꦺꦴꦤ꧀ꦢꦸꦢꦸꦃꦲꦏꦺꦧꦧ꧀ꦱꦶꦁꦧꦼꦤꦼꦂ꧉ꦱꦥꦱꦶꦁꦱꦼꦤꦼꦁꦩꦫꦁꦥꦶꦠꦸꦠꦸꦂꦱꦶꦁꦧꦼꦤꦼꦂꦩꦼꦱ꧀ꦠꦶꦔ꧀ꦒꦸꦒꦸꦠꦼꦩ꧀ꦧꦸꦁꦏꦸ꧉”
38꧋ꦥꦶꦭꦠꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦥꦶꦠꦸꦠꦸꦂꦱꦶꦁꦧꦼꦤꦼꦂ?ꦲꦃ꧈ꦏꦸꦮꦶꦲꦥ!”
꧋ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦏꦸꦮꦶꦥꦶꦭꦠꦸꦱ꧀ꦠꦼꦫꦸꦱ꧀ꦩꦫꦩꦼꦤꦺꦃꦤꦁꦔ꧀ꦒꦺꦴꦤ꧀ꦤꦺꦮꦺꦴꦁꦮꦺꦴꦁꦙꦸꦱꦶꦁꦤꦁꦚ꧀ꦗꦧ꧉ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦲꦺꦴꦫꦤꦼꦩꦸꦱꦭꦃꦲꦶꦁꦮꦺꦴꦁꦲꦶꦏꦶ! 39ꦤꦁꦔꦶꦁꦮꦶꦱ꧀ꦭꦸꦩꦿꦃꦲꦺꦲꦏꦸꦔꦼꦠꦺꦴꦏ꧀ꦏꦏꦺꦮꦺꦴꦁꦱꦼꦠꦿꦥꦤ꧀ꦱꦶꦗꦶꦤꦺꦏ꧀ꦮꦪꦃꦥꦱ꧀ꦏꦃ꧉ꦭꦃꦏꦉꦥ꧀ꦩꦸꦏꦼꦥꦿꦶꦪꦺ?ꦲꦥꦏꦺꦴꦮꦺꦚ꧀ꦗꦭꦸꦏ꧀ꦫꦠꦸꦤꦺꦧꦁꦱꦙꦸꦱꦶꦁꦠꦏ꧀ꦲꦼꦠꦺꦴꦏ꧀ꦏꦏꦺ?”
40꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦲꦩ꧀ꦧꦼꦔꦺꦴꦏ꧀:“ꦲꦺꦴꦫ꧈ꦲꦺꦴꦫꦢꦺꦏ꧀ꦤꦺ!ꦲꦮꦏ꧀ꦏꦺꦢꦺꦮꦺꦚ꧀ꦗꦭꦸꦏ꧀ꦨꦫꦧꦱ꧀!”ꦨꦫꦧꦱ꧀ꦏꦸꦮꦶꦮꦺꦴꦁꦤꦏꦭ꧀꧈
꧇꧑꧙꧇ 1꧋ꦒꦿꦩꦁꦥꦶꦭꦠꦸꦱ꧀ꦩꦿꦺꦤ꧀ꦠꦃꦔꦺꦴꦁꦏꦺꦴꦤ꧀ꦩꦼꦕꦸꦠ꧀ꦠꦶꦒꦸꦱ꧀ꦠꦶꦪꦺꦯꦸꦱ꧀꧈ 2ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦱꦶꦁꦤꦁꦏꦺꦴꦤꦺꦴꦠꦼꦫꦸꦱ꧀ꦥꦢꦔꦸꦧꦼꦠ꧀ꦠꦸꦧꦼꦠ꧀ꦠꦏꦺꦥꦁꦔꦺꦲꦼꦫꦶꦢꦶꦒꦮꦺꦏꦪꦩꦏꦸꦠꦠꦼꦫꦸꦱ꧀ꦢꦶꦥꦱꦁꦤꦁꦱꦶꦫꦃꦲꦺꦒꦸꦱ꧀ꦠꦶꦪꦺꦯꦸꦱ꧀ ꦠꦼꦫꦸꦱ꧀ꦢꦶꦲꦼꦁꦒꦺꦴꦤ꧀ꦤꦶꦱꦭꦶꦤ꧀ꦲꦧꦁꦲꦩ꧀ꦧꦫꦁ꧈ꦱꦸꦥꦪꦏꦺꦠꦺꦴꦏ꧀ꦏꦪꦫꦠꦸ꧉ 3ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦩꦲꦸꦠꦼꦫꦸꦱ꧀ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦩ꧀ꦧꦒꦺꦏ꧀ꦏꦏꦺꦔꦺꦴꦩꦺꦴꦁ:“ꦱ꧀ꦭꦩꦼꦠ꧀ꦠꦫꦠꦸꦤꦺꦧꦁꦱꦙꦸ!”ꦱꦏ꧀ꦮꦶꦱ꧀ꦱꦺꦔꦺꦴꦤꦺꦴꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦏꦼꦥ꧀ꦭꦏ꧀ꦏꦶ꧉
4꧋ꦥꦶꦭꦠꦸꦱ꧀ꦠꦼꦫꦸꦱ꧀ꦩꦼꦠꦸꦱꦼꦥꦶꦱ꧀ꦱꦤ꧀ꦩꦼꦤꦺꦃꦤꦁꦔꦉꦥ꧀ꦥꦺꦮꦺꦴꦁꦮꦺꦴꦁꦙꦸꦩꦲꦸ!ꦢꦺꦏ꧀ꦤꦺꦔꦺꦴꦩꦺꦴꦁ:“ꦭꦃꦲꦶꦏꦶꦮꦺꦴꦁꦔꦺꦠꦏ꧀ꦒꦮꦤꦁꦔ꧀ꦒꦺꦴꦤ꧀ꦩꦸꦩꦼꦤꦺꦃ꧉ꦱꦏ꧀ꦔꦼꦂꦠꦶꦪꦮꦺꦴꦁꦲꦶꦏꦶꦲꦺꦴꦫꦤ꧀ꦢꦸꦮꦺꦱꦭꦃꦲꦥꦲꦥ!” 5ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮꦩꦼꦠꦸ꧈ꦲꦶꦗꦶꦏ꧀ꦔꦁꦒꦺꦴꦩꦏꦸꦠꦲꦼꦫꦶꦭꦤ꧀ꦱꦭꦶꦤ꧀ꦲꦧꦁꦩꦲꦸ꧉ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃꦩꦫꦁꦮꦺꦴꦁꦮꦺꦴꦁ:“ꦪꦲꦶꦏꦶꦮꦺꦴꦁꦔꦺ!”
6꧋ꦏꦢꦸꦁꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦭꦤ꧀ꦱꦼꦏꦲꦸꦠ꧀ꦱꦼꦏꦲꦸꦠ꧀ꦠꦺꦒꦿꦺꦗꦒꦼꦢꦺꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ ꦱꦏ꧀ꦮꦠ꧀ꦠꦼꦫꦸꦱ꧀ꦥꦢꦲꦩ꧀ꦧꦼꦔꦺꦴꦏ꧀:“ꦢꦶꦥꦼꦤ꧀ꦠꦺꦁ!ꦢꦶꦥꦼꦤ꧀ꦠꦺꦁ!”
꧋ꦥꦶꦭꦠꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦪꦏꦺꦴꦤꦺꦴꦤꦺꦏ꧀ꦲꦉꦥ꧀ꦲꦩ꧀ꦧꦺꦴꦏ꧀ꦥꦼꦤ꧀ꦠꦺꦁ꧉ꦏꦁꦒꦺꦴꦲꦏꦸꦮꦺꦴꦁꦲꦶꦏꦶꦲꦺꦴꦫꦱꦭꦃꦲꦥꦲꦥ!”
7꧋ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦱꦼꦩꦲꦸꦂ:“ꦩꦶꦠꦸꦫꦸꦠ꧀ꦮꦺꦠ꧀ꦠꦺꦲꦒꦩꦤꦺꦲꦮꦏ꧀ꦏꦺꦢꦺꦮꦺꦮꦺꦴꦁꦏꦸꦮꦶꦏꦸꦢꦸꦢꦶꦥꦠꦺꦤ꧀ꦤꦶ꧈ꦲꦮꦶꦠ꧀ꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦏꦸꦮꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ!”
8꧋ꦥꦶꦭꦠꦸꦱ꧀ꦏꦿꦸꦔꦸꦮꦺꦴꦁꦮꦺꦴꦁꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦩꦲꦸꦠꦼꦫꦸꦱ꧀ꦠꦩ꧀ꦧꦃꦮꦼꦢꦶ꧉ 9ꦢꦺꦏ꧀ꦤꦺꦠꦼꦫꦸꦱ꧀ꦩ꧀ꦊꦧꦸꦩꦼꦤꦺꦃꦭꦤ꧀ꦠꦏꦺꦴꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦏꦺꦴꦮꦺꦏꦸꦮꦶꦱꦏ꧀ꦗꦤꦺꦱꦥꦠ?”
꧋ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦱꦼꦩꦲꦸꦂꦲꦥꦲꦥ꧉ 10ꦩꦸꦭꦤꦺꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦩꦼꦱ꧀ꦠꦶꦔꦼꦂꦠꦶꦠꦱꦥꦱꦶꦁꦤꦏꦺꦴꦤ꧀ꦤꦶꦏꦺꦴꦮꦺꦲꦶꦏꦶ?ꦭꦃꦏꦺꦴꦏ꧀ꦲꦺꦴꦫꦒꦼꦊꦩ꧀ꦱꦼꦩꦲꦸꦂ?ꦲꦥꦏꦺꦴꦮꦺꦲꦺꦴꦫꦔꦼꦂꦠꦶꦤꦺꦏ꧀ꦲꦏꦸꦤ꧀ꦢꦸꦮꦺꦤ꧀ꦤꦶꦏ꧀ꦮꦱꦔꦺꦴꦁꦏꦺꦴꦤ꧀ꦔꦸꦕꦸꦭ꧀ꦭꦶꦭꦤ꧀ꦔꦺꦴꦁꦏꦺꦴꦤ꧀ꦩꦼꦤ꧀ꦠꦺꦁꦏꦺꦴꦮꦺ!”
11꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦲꦺꦴꦫꦔꦼꦏꦺꦏ꧀ꦏꦶꦏ꧀ꦮꦱꦏꦺꦴꦮꦺ꧈ꦏꦺꦴꦮꦺꦧ꧀ꦭꦱ꧀ꦲꦺꦴꦫꦧꦶꦱꦔꦥꦔꦥꦏ꧀ꦏꦏꦺꦲꦏꦸ꧉ꦩꦸꦭꦤꦺ꧈ꦱꦶꦁꦱꦭꦃꦒꦼꦢꦺꦢꦺꦮꦺꦏꦸꦮꦶꦪꦮꦺꦴꦁꦱꦶꦁꦔꦼꦭꦸꦁꦔꦏꦺꦲꦏꦸꦩꦫꦁꦏꦺꦴꦮꦺ!”
12꧋ꦥꦶꦭꦠꦸꦱ꧀ꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦠꦼꦫꦸꦱ꧀ꦔ꧀ꦒꦺꦴꦭꦺꦏ꧀ꦲꦏꦭ꧀ꦱꦸꦥꦪꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦲꦸꦱꦃꦢꦶꦱꦼꦠꦿꦥ꧀ꦩꦼꦤꦺꦃ꧈ꦤꦁꦔꦶꦁꦮꦺꦴꦁꦮꦺꦴꦁꦥꦢꦲꦩ꧀ꦧꦼꦔꦺꦴꦏ꧀:“ꦤꦺꦏ꧀ꦮꦺꦴꦁꦏꦸꦮꦶꦲꦺꦴꦫꦲꦩ꧀ꦧꦺꦴꦏ꧀ꦱꦼꦠꦿꦥ꧀ ꦏꦺꦴꦮꦺꦪꦢꦸꦢꦸꦏꦚ꧀ꦕꦤꦺꦫꦠꦸꦤꦺ꧈ꦲꦮꦶꦠ꧀ꦱꦥꦱꦶꦁꦔꦏꦸꦤꦺꦏ꧀ꦢꦺꦏ꧀ꦤꦺꦏꦸꦮꦶꦫꦠꦸꦪꦔ꧀ꦭꦮꦤ꧀ꦫꦠꦸꦤꦺ꧉”
13꧋ꦏꦢꦸꦁꦥꦶꦭꦠꦸꦱ꧀ꦏꦿꦸꦔꦸꦮꦺꦴꦁꦮꦺꦴꦁꦔꦺꦴꦩꦺꦴꦁꦔꦺꦴꦤꦺꦴꦢꦺꦏ꧀ꦤꦺꦠꦼꦫꦸꦱ꧀ꦔ꧀ꦒꦮꦒꦸꦱ꧀ꦠꦶꦪꦺꦯꦸꦱ꧀ꦩꦼꦠꦸ꧈ꦠꦼꦫꦸꦱ꧀ꦚ꧀ꦗꦒꦺꦴꦁꦤꦁꦏꦿꦺꦴꦱꦶꦱꦶꦁꦢꦶꦲꦼꦁꦒꦺꦴꦔꦿꦸꦠꦸ꧉ꦏꦿꦺꦴꦱꦶꦲꦶꦏꦶꦔꦢꦼꦏ꧀ꦤꦁꦗꦺꦴꦒꦤ꧀ꦮꦠꦸ꧈ꦤꦺꦏ꧀ꦕꦫꦆꦧꦿꦤꦶꦗꦼꦤꦼꦁꦔꦺꦒꦧꦠ꧉ 14ꦲꦶꦏꦶꦠꦶꦧꦢꦶꦤꦤꦺꦮꦺꦴꦁꦙꦸꦥꦢꦕꦼꦕꦮꦶꦱ꧀ꦱꦤ꧀ꦏꦁꦒꦺꦴꦢꦶꦤꦱꦧꦠ꧀ꦩꦶꦁꦒꦸꦥꦱ꧀ꦏꦃꦏꦸꦮꦶ꧈ꦏꦶꦫꦏꦶꦫꦗꦩ꧀ꦫꦺꦴꦭꦱ꧀ꦲꦮꦤ꧀꧈ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦮꦺꦴꦁꦮꦺꦴꦁ:“ꦭꦃꦲꦶꦏꦶꦫꦠꦸꦩꦸ!”
15꧋ꦮꦺꦴꦁꦮꦺꦴꦁꦩꦭꦃꦠꦼꦫꦸꦱ꧀ꦥꦢꦧꦼꦔꦺꦴꦏ꧀ꦧꦼꦔꦺꦴꦏ꧀:“ꦢꦶꦒꦮꦭꦸꦔ꧈ꦢꦶꦒꦮꦭꦸꦔꦮꦺꦴꦁꦏꦸꦮꦶ꧈ꦏꦤꦢꦶꦥꦼꦤ꧀ꦠꦺꦁ!”
꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦩꦺꦴꦱꦺꦴꦏ꧀ꦲꦏꦸꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦩꦼꦤ꧀ꦠꦺꦁꦫꦠꦸꦩꦸ?”
꧋ꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦠꦼꦫꦸꦱ꧀ꦱꦼꦩꦲꦸꦂ:“ꦤꦩꦸꦁꦯꦺꦱꦂꦫꦠꦸꦤꦺꦲꦮꦏ꧀ꦏꦺꦢꦺꦮꦺ꧈ꦲꦮꦏ꧀ꦏꦺꦢꦺꦮꦺꦲꦺꦴꦫꦤ꧀ꦢꦸꦮꦺꦫꦠꦸꦭꦶꦪꦤꦺ꧉”
16꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦱꦿꦃꦲꦏꦺꦩꦫꦁꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦱꦸꦥꦪꦢꦶꦥꦼꦤ꧀ꦠꦺꦁ꧉
17꧋ꦥꦫꦱꦺꦴꦭ꧀ꦢꦠ꧀ꦠꦼꦫꦸꦱ꧀ꦔ꧀ꦒꦮꦒꦸꦱ꧀ꦠꦶꦪꦺꦯꦸꦱ꧀ꦩꦼꦠꦸꦱꦁꦏꦏꦸꦠꦤꦺꦏꦺꦴꦤꦺꦴꦢꦶꦒꦮꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦗꦼꦤꦼꦁꦔꦺ“ꦲꦼꦤ꧀ꦢꦱ꧀ꦱꦺꦮꦺꦴꦁꦩꦠꦶ꧈”ꦤꦺꦏ꧀ꦕꦫꦆꦧꦿꦤꦶꦗꦼꦤꦼꦁꦔꦺꦒꦺꦴꦭ꧀ꦒꦺꦴꦠ꧉ 18ꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺꦱꦶꦁꦩꦁꦒꦸꦭ꧀ꦏꦪꦸꦤꦺꦱꦶꦁꦲꦉꦥ꧀ꦢꦶꦲꦼꦁꦒꦺꦴꦩꦼꦤ꧀ꦠꦺꦁꦢꦺꦏ꧀ꦤꦺ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦼꦤ꧀ꦠꦺꦁꦧꦉꦁꦏꦫꦺꦴꦮꦺꦴꦁꦭꦺꦴꦫꦺꦴꦭꦶꦪꦤꦺ꧈ꦱꦶꦁꦱꦶꦗꦶꦤꦁꦠꦼꦔꦼꦤꦺꦭꦤ꧀ꦭꦶꦪꦤꦺꦤꦁꦱꦼꦧꦼꦭꦃꦏꦶꦮ꧈ꦢꦢꦶꦤꦺꦒꦸꦱ꧀ꦠꦶꦪꦺꦯꦸꦱ꧀ꦤꦁꦠꦼꦔꦃꦠꦼꦔꦃ꧉ 19ꦤꦁꦏꦪꦸꦤꦺꦥꦼꦤ꧀ꦠꦺꦁꦔꦤ꧀ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦔꦼꦏꦺꦏ꧀ꦏꦶꦠꦸꦭꦶꦱ꧀ꦱꦤ꧀ꦔꦺꦤꦺꦏꦫꦺꦴꦥꦶꦭꦠꦸꦱ꧀:“ꦪꦺꦯꦸꦱ꧀ꦱꦁꦏꦟꦱꦫꦺꦠ꧀ ꦫꦠꦸꦤꦺꦮꦺꦴꦁꦙꦸ!” 20ꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦲꦼꦁꦒꦺꦴꦩꦼꦤ꧀ꦠꦺꦁꦏꦸꦮꦶꦲꦺꦴꦫꦲꦢꦺꦴꦃꦏꦫꦺꦴꦏꦸꦠꦤꦺꦏꦺꦴꦤꦺꦴ꧈ꦩꦸꦭꦤꦺꦮꦺꦴꦁꦙꦸꦲꦺꦴꦏꦺꦃꦥꦢꦮꦼꦫꦸꦃꦭꦤ꧀ꦩꦕꦠꦸꦭꦶꦱ꧀ꦱꦤ꧀ꦏꦸꦮꦶ꧉ꦏꦫꦺꦴꦩꦼꦤꦺꦃꦏꦸꦮꦶꦏꦼꦠꦸꦭꦶꦱ꧀ꦲꦶꦁꦠꦼꦩ꧀ꦧꦸꦁꦆꦧꦿꦤꦶ꧈ꦭꦠꦶꦤ꧀ꦭꦤ꧀ꦒꦿꦶꦏ꧀꧈ 21ꦥꦫꦥꦼꦔꦉꦥ꧀ꦥꦺꦲꦶꦩꦩ꧀ꦩꦺꦧꦁꦱꦙꦸꦠꦼꦫꦸꦱ꧀ꦥꦢꦤꦼꦩ꧀ꦧꦸꦁꦩꦫꦁꦥꦶꦭꦠꦸꦱ꧀ꦔ꧀ꦒꦤ꧀ꦠꦶꦠꦸꦭꦶꦱ꧀ꦱꦤ꧀ꦏꦸꦮꦶ꧉ꦢꦢꦶꦤꦺꦠꦸꦭꦶꦱ꧀ꦱꦤ꧀ꦤꦺꦲꦺꦴꦫ:“ꦫꦠꦸꦤꦺꦮꦺꦴꦁꦙꦸ꧈”ꦤꦁꦔꦶꦁ:“ꦮꦺꦴꦁꦲꦶꦏꦶꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦫꦠꦸꦤꦺꦮꦺꦴꦁꦙꦸ!”
22꧋ꦤꦁꦔꦶꦁꦥꦶꦭꦠꦸꦱ꧀ꦱꦼꦩꦲꦸꦂ:“ꦲꦥꦱꦶꦁꦮꦶꦱ꧀ꦠꦏ꧀ꦠꦸꦭꦶꦱ꧀ꦮꦶꦱ꧀ꦧꦺꦤ꧀ꦔꦺꦴꦤꦺꦴ!”
23꧋ꦱꦏ꧀ꦮꦶꦱ꧀ꦱꦺꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦥꦢꦩꦼꦤ꧀ꦠꦺꦁꦒꦸꦱ꧀ꦠꦶꦪꦺꦯꦸꦱ꧀ ꦱꦭꦶꦤ꧀ꦤꦺꦢꦺꦏ꧀ꦤꦺꦠꦼꦫꦸꦱ꧀ꦢꦶꦲꦸꦕꦸꦭ꧀ꦭꦶꦏꦧꦺꦃꦭꦤ꧀ꦢꦶꦲꦼꦢꦸꦩ꧀ꦢꦢꦶꦥꦥꦠ꧀ ꦢꦢꦶꦤꦺꦏꦧꦺꦃꦥꦥꦠ꧀ꦲꦺꦤ꧀ꦠꦸꦏ꧀ꦧꦒꦺꦪꦤ꧀꧈ꦤꦩꦸꦁꦓꦫꦺꦏ꧀ꦱꦭꦶꦤ꧀ꦤꦺꦚ꧀ꦗꦼꦫꦺꦴ꧈ꦱꦶꦁꦲꦺꦴꦫꦲꦺꦤꦺꦁꦢꦺꦴꦤ꧀ꦢꦺꦴꦩ꧀ꦩꦤ꧀ꦤꦺ꧉ 24ꦩꦸꦭꦤꦺꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦩꦲꦸꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗꦢꦶꦱꦸꦮꦺꦏ꧀ꦲꦃ꧈ꦲ꦳ꦪꦸꦏ꧀ꦢꦶꦭꦺꦴꦠꦿꦺꦮꦲꦺ꧈ꦱꦶꦁꦩꦼꦤꦁꦱꦶꦁꦲꦺꦤ꧀ꦠꦸꦏ꧀!”ꦲꦶꦏꦶꦕꦺꦴꦕꦺꦴꦏ꧀ꦏꦫꦺꦴꦱꦶꦁꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧈ꦲꦸꦤꦶꦤꦺꦔꦺꦤꦺ:
“ꦱꦤ꧀ꦢꦁꦔꦤ꧀ꦏꦸꦢꦶꦲꦼꦢꦸꦩ꧀ꦩꦼꦢꦸꦩ꧀ꦩꦏꦺꦭꦤ꧀ꦱꦭꦶꦤ꧀ꦏꦸꦢꦶꦭꦺꦴꦠꦿꦺ!”
ꦲꦥꦱꦶꦁꦢꦶꦲꦺꦴꦩꦺꦴꦁꦪꦠꦼꦫꦸꦱ꧀ꦢꦶꦭꦏꦺꦴꦤ꧀ꦤꦶꦠꦼꦤꦤ꧀ꦏꦫꦺꦴꦥꦫꦱꦺꦴꦭ꧀ꦢꦠ꧀꧈
25꧋ꦲꦶꦧꦸꦤꦺꦭꦤ꧀ꦧꦶꦧꦶꦏ꧀ꦏꦺꦒꦸꦱ꧀ꦠꦶꦪꦺꦯꦸꦱ꧀ ꦲꦸꦒꦩꦫꦶꦪꦏ꧀ꦭꦺꦴꦥꦱ꧀ꦭꦤ꧀ꦩꦫꦶꦪꦩꦏ꧀ꦢꦭꦺꦤꦥꦢꦔꦢꦼꦏ꧀ꦤꦁꦔꦉꦥ꧀ꦥꦺꦏꦪꦸꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ꧉ 26ꦒꦸꦱ꧀ꦠꦶꦪꦺꦯꦸꦱ꧀ꦮꦼꦫꦸꦃꦲꦶꦧꦸꦤꦺꦏꦫꦺꦴꦫꦱꦸꦭ꧀ꦪꦺꦴꦲꦤꦼꦱ꧀꧈ꦫꦱꦸꦭ꧀ꦪꦺꦴꦲꦤꦼꦱ꧀ꦏꦸꦮꦶꦩꦸꦫꦶꦢ꧀ꦱꦶꦁꦢꦶꦱꦼꦤꦼꦁꦔꦶꦠꦼꦤꦤ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦲꦶꦧꦸꦤꦺ:“ꦧꦸ꧈ꦏꦸꦮꦶꦲꦤꦏ꧀ꦩꦸ!”
27꧋ꦱꦏ꧀ꦮꦶꦱ꧀ꦱꦺꦔꦺꦴꦤꦺꦴꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦱꦶꦁꦢꦶꦱꦼꦤꦼꦁꦔꦶꦏꦸꦮꦶꦔꦺꦤꦺ:“ꦏꦸꦮꦶꦲꦶꦧꦸꦩꦸ!”ꦩꦸꦭꦤꦺꦱꦏ꧀ꦥ꧀ꦭꦺꦴꦏ꧀ꦏꦺꦏꦸꦮꦶꦲꦶꦧꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦫꦸꦩꦠ꧀ꦠꦶꦏꦫꦺꦴꦫꦱꦸꦭ꧀ꦪꦺꦴꦲꦤꦼꦱ꧀꧈
28꧋ꦒꦸꦱ꧀ꦠꦶꦪꦺꦯꦸꦱ꧀ꦔꦼꦂꦠꦶꦤꦺꦏ꧀ꦱꦲꦶꦏꦶꦱꦼꦩ꧀ꦧꦫꦁꦮꦶꦱ꧀ꦏ꧀ꦭꦏꦺꦴꦤ꧀ ꦩꦸꦭꦤꦺ꧈ꦱꦸꦥꦪꦲꦥꦱꦶꦁꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦲꦸꦒꦧꦶꦱꦏ꧀ꦭꦏꦺꦴꦤ꧀ ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦏꦸꦔꦼꦭꦏ꧀!”
29꧋ꦤꦁꦏꦺꦴꦤꦺꦴꦲꦺꦤꦺꦁꦏꦼꦤ꧀ꦢꦶꦲꦶꦱꦶꦤꦺꦲꦁꦒꦸꦂꦏꦼꦕꦸꦠ꧀꧈ꦠꦼꦫꦸꦱ꧀ꦲꦺꦤꦺꦁꦱꦺꦴꦭ꧀ꦢꦠ꧀ꦔꦼꦕ꧀ꦭꦸꦥ꧀ꦥꦏꦺꦱ꧀ꦥꦺꦴꦤ꧀ꦤꦁꦲꦁꦒꦸꦂꦫꦺꦏꦸꦮꦶꦠꦼꦫꦸꦱ꧀ꦢꦶꦥꦱꦁꦤꦁꦥꦸꦕꦸꦏ꧀ꦏꦺꦏꦪꦸꦲ꦳ꦶꦱꦺꦴꦥ꧀ ꦠꦼꦫꦸꦱ꧀ꦢꦶꦢꦺꦏꦺꦏ꧀ꦏꦏꦺꦤꦁꦭꦩ꧀ꦧꦺꦤꦺꦒꦸꦱ꧀ꦠꦶꦪꦺꦯꦸꦱ꧀꧈ 30ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦚꦼꦱꦼꦥ꧀ꦲꦁꦒꦸꦂꦫꦺ꧈ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦶꦱ꧀ꦫꦩ꧀ꦥꦸꦁ!”
꧋ꦢꦺꦏ꧀ꦤꦺꦠꦼꦫꦸꦱ꧀ꦤ꧀ꦢꦶꦁꦏ꧀ꦭꦸꦏ꧀ꦠꦼꦫꦸꦱ꧀ꦤꦶꦁꦒꦭ꧀꧈
31꧋ꦭꦃꦏꦸꦮꦶꦠꦶꦧꦢꦶꦤꦗꦼꦩꦸꦮꦃ꧈ꦢꦶꦤꦮꦪꦃꦲꦺꦮꦺꦴꦁꦙꦸꦥꦢꦕꦼꦕꦮꦶꦱ꧀ꦱꦤ꧀ꦏꦁꦒꦺꦴꦢꦶꦤꦱꦧꦠ꧀꧈ꦮꦺꦴꦁꦮꦺꦴꦁꦲꦺꦴꦫꦒꦼꦊꦩ꧀ꦤꦺꦏ꧀ꦲꦶꦁꦢꦶꦤꦱꦧꦠ꧀ꦏꦸꦮꦶꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦤꦁꦏꦪꦸꦥꦼꦤ꧀ꦠꦺꦁꦔꦤ꧀ ꦲꦮꦶꦠ꧀ꦲꦶꦏꦶꦢꦶꦤꦱꦧꦠ꧀ꦱꦶꦁꦒꦼꦢꦺ꧉ꦩꦸꦭꦤꦺꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸꦥꦢꦤꦼꦩ꧀ꦧꦸꦁꦩꦫꦁꦥꦶꦭꦠꦸꦱ꧀ ꦱꦸꦥꦪꦮꦺꦴꦁꦮꦺꦴꦁꦱꦶꦁꦢꦶꦥꦼꦤ꧀ꦠꦺꦁꦥꦢꦢꦶꦉꦩꦸꦏ꧀ꦏꦶꦱꦶꦏꦶꦭ꧀ꦭꦺꦭꦤ꧀ꦢꦶꦲꦼꦢꦸꦤ꧀ꦤꦏꦺꦱꦁꦏꦏꦪꦸꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ꧉ 32ꦥꦫꦱꦺꦴꦭ꧀ꦢꦠ꧀ꦠꦼꦫꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦱꦶꦁꦭꦶꦪꦤꦺꦤ꧀ꦢꦶꦱꦶꦏ꧀ꦱꦶꦁꦢꦶꦥꦼꦤ꧀ꦠꦺꦁꦧꦉꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ꦏꦧꦺꦃꦭꦺꦴꦫꦺꦴꦱꦶꦏꦶꦭ꧀ꦭꦺꦠꦼꦫꦸꦱ꧀ꦢꦶꦉꦩꦸꦏ꧀꧈ 33ꦤꦁꦔꦶꦁꦏꦢꦸꦁꦥꦫꦱꦺꦴꦭ꧀ꦢꦠ꧀ꦩꦲꦸꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦥꦢꦮꦼꦫꦸꦃꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦩꦠꦶ꧉ꦩꦸꦭꦤꦺꦱꦶꦏꦶꦭ꧀ꦭꦺꦢꦺꦏ꧀ꦤꦺꦲꦺꦴꦫꦱꦶꦢꦢꦶꦉꦩꦸꦏ꧀꧈ 34ꦤꦁꦔꦶꦁꦠꦼꦫꦸꦱ꧀ꦲꦺꦤꦺꦁꦱꦺꦴꦭ꧀ꦢꦠ꧀ꦚ꧀ꦗꦺꦴꦗꦺꦴꦃꦧꦁꦏꦺꦏ꧀ꦏꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦫꦺꦴꦠꦸꦩ꧀ꦧꦏ꧀ ꦠꦼꦫꦸꦱ꧀ꦱꦏ꧀ꦮꦠ꧀ꦩꦼꦠꦸꦒꦼꦠꦶꦃꦲꦺꦭꦤ꧀ꦧꦚꦸꦤꦺ꧉ 35ꦲꦏꦸ꧈ꦪꦺꦴꦲꦤꦼꦱ꧀ ꦮꦼꦫꦸꦃꦱꦼꦩ꧀ꦧꦫꦁꦲꦶꦏꦶꦭꦤ꧀ꦲꦏꦸꦢꦢꦶꦱꦼꦏ꧀ꦱꦶ꧈ꦲꦏꦸꦲꦺꦴꦫꦒꦺꦴꦫꦺꦴꦃ꧉ꦲꦏꦸꦔꦼꦂꦠꦶꦠꦼꦤꦤ꧀ꦭꦤ꧀ꦱꦶꦁꦠꦏ꧀ꦲꦺꦴꦩꦺꦴꦁꦲꦶꦏꦶꦲꦥꦮꦸꦗꦸꦠ꧀ꦠꦺ꧉ꦲꦏꦸꦔꦺꦴꦩꦺꦴꦁꦲꦶꦏꦶꦱꦸꦥꦪꦏꦺꦴꦮꦺꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀꧈ 36ꦔꦼꦂꦠꦶꦪꦤꦺꦏ꧀ꦱꦼꦩ꧀ꦧꦫꦁꦲꦶꦏꦶꦏ꧀ꦭꦏꦺꦴꦤ꧀ ꦲꦮꦶꦠ꧀ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ:“ꦧꦭꦸꦁꦔꦺꦢꦺꦏ꧀ꦤꦺꦧ꧀ꦭꦱ꧀ꦲꦺꦴꦫꦲꦺꦤꦺꦁꦱꦶꦁꦧꦏꦭ꧀ꦢꦶꦉꦩꦸꦏ꧀꧉”ꦢꦢꦶꦤꦺꦠꦸꦭꦶꦱ꧀ꦱꦤ꧀ꦲꦶꦏꦶꦮꦶꦱ꧀ꦏ꧀ꦭꦏꦺꦴꦤ꧀꧈ 37ꦭꦤ꧀ꦲꦺꦤꦺꦁꦠꦸꦭꦶꦱ꧀ꦱꦤ꧀ꦭꦶꦪꦤꦺꦩꦼꦤꦺꦃꦤꦁꦏꦶꦠꦧ꧀ꦱꦶꦁꦲꦸꦤꦶꦤꦺꦔꦺꦤꦺ:“ꦮꦺꦴꦁꦮꦺꦴꦁꦧꦏꦭ꧀ꦚꦮꦁꦩꦫꦁꦮꦺꦴꦁꦱꦶꦁꦮꦶꦱ꧀ꦢꦶꦗꦺꦴꦗꦺꦴꦃ꧉”
38꧋ꦱꦏ꧀ꦮꦶꦱ꧀ꦱꦺꦏꦸꦮꦶꦩꦲꦸꦏꦧꦺꦃꦠꦼꦫꦸꦱ꧀ꦪꦺꦴꦱꦺꦥ꦳꧀ ꦩꦸꦫꦶꦢ꧀ꦱꦶꦁꦱꦁꦏꦏꦸꦠꦄꦫꦶꦩꦠꦺꦪ꧈ꦤꦼꦩ꧀ꦧꦸꦁꦩꦫꦁꦥꦶꦭꦠꦸꦱ꧀ ꦲꦥꦲꦺꦤ꧀ꦠꦸꦏ꧀ꦚ꧀ꦗꦶꦏꦸꦏ꧀ꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀꧈ꦪꦺꦴꦱꦺꦥ꦳꧀ꦲꦶꦏꦶꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ ꦤꦁꦔꦶꦁꦩꦲꦸꦤꦺꦤ꧀ꦢꦼꦭꦶꦏ꧀ꦤ꧀ꦢꦼꦭꦶꦏ꧀ ꦲꦮꦶꦠ꧀ꦮꦼꦢꦶꦏꦫꦺꦴꦥꦫ ꦥꦼꦁꦒꦼꦢꦺꦤꦺꦮꦺꦴꦁꦙꦸ꧉ꦥꦶꦭꦠꦸꦱ꧀ꦪꦔ꧀ꦭꦶꦭꦤꦶꦥꦼꦚ꧀ꦗꦭꦸꦏ꧀ꦏꦺꦪꦺꦴꦱꦺꦥ꦳꧀ ꦩꦸꦭꦤꦺꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀ꦪꦠꦼꦫꦸꦱ꧀ꦲꦉꦥ꧀ꦢꦶꦗꦶꦏꦸꦏ꧀ꦏꦫꦺꦴꦪꦺꦴꦱꦺꦥ꦳꧀꧈ 39ꦟꦶꦏꦺꦴꦢꦺꦩꦼꦱ꧀ꦲꦩ꧀ꦧꦫꦁꦩꦺꦭꦸꦠꦼꦏꦏꦫꦺꦴꦔ꧀ꦒꦮꦮꦔꦶꦮꦔꦶꦕꦩ꧀ꦥꦸꦂꦫꦤ꧀ꦤꦺꦩꦸꦂꦭꦤ꧀ꦲꦭꦸꦃꦲꦺ꧉ꦲꦺꦴꦏꦺꦃꦲꦺꦏꦶꦫꦏꦶꦫꦲꦺꦤꦺꦁꦠꦼꦭꦸꦁꦥꦸꦭꦸꦃꦏꦶꦭꦺꦴ꧉ꦪꦟꦶꦏꦺꦴꦢꦺꦩꦼꦱ꧀ꦲꦶꦏꦶꦱꦶꦁꦠꦼꦏꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦁꦮꦪꦃꦮꦼꦔꦶ꧈ꦢꦺꦴꦁꦔꦺꦠꦼꦏꦱꦼꦥꦶꦱꦤ꧀ꦤꦤ꧀꧈ 40ꦪꦺꦴꦱꦺꦥ꦳꧀ꦭꦤ꧀ꦟꦶꦏꦺꦴꦢꦺꦩꦼꦱ꧀ꦠꦼꦫꦸꦱ꧀ꦚ꧀ꦗꦶꦏꦸꦏ꧀ꦭꦪꦺꦴꦤꦺꦱꦁꦏꦏꦪꦸꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ꧈ꦠꦼꦫꦸꦱ꧀ꦢꦶꦧꦸꦤ꧀ꦠꦼꦭ꧀ꦩꦺꦴꦫꦶꦧꦉꦁꦏꦫꦺꦴꦮꦚ꧀ꦕꦶꦤꦺꦲꦩ꧀ꦧꦫꦁ꧉ꦏꦸꦮꦶꦥꦚ꧀ꦕꦺꦤ꧀ꦮꦶꦱ꧀ꦢꦢꦶꦭꦸꦩꦿꦃꦲꦺꦮꦺꦴꦁꦙꦸꦤꦺꦏ꧀ꦲꦉꦥ꧀ꦔꦸꦧꦸꦂꦮꦺꦴꦁꦩꦠꦶ꧉ 41ꦕꦼꦢꦼꦏ꧀ꦏꦫꦺꦴꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦲꦼꦁꦒꦺꦴꦩꦼꦤ꧀ꦠꦺꦁꦒꦸꦱ꧀ꦠꦶꦪꦺꦯꦸꦱ꧀ꦏꦺꦴꦤꦺꦴꦲꦺꦤꦺꦁꦏꦼꦧꦺꦴꦤ꧀꧈ꦤꦁꦏꦼꦧꦺꦴꦤ꧀ꦏꦸꦮꦶꦲꦺꦤꦺꦁꦏꦸꦧꦸꦂꦫꦤ꧀ꦤꦺꦲꦚꦂꦱꦶꦁꦢꦸꦫꦸꦁꦠꦲꦸꦢꦶꦲꦼꦁꦒꦺꦴꦔꦸꦧꦸꦂꦮꦺꦴꦁ꧉ 42ꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦏꦸꦧꦸꦂꦤꦁꦏꦺꦴꦤꦺꦴ꧈ꦲꦮꦶꦠ꧀ꦏꦸꦧꦸꦂꦫꦤ꧀ꦏꦸꦮꦶꦕꦼꦢꦼꦏ꧀꧈ꦏꦠꦶꦏ꧀ꦮꦶꦱ꧀ꦭꦔꦶꦠ꧀ꦧꦸꦩꦶꦥꦶꦱꦤ꧀ ꦢꦶꦤꦱꦧꦠ꧀ꦮꦶꦱ꧀ꦲꦉꦥ꧀ꦩꦺꦴꦭꦃꦲꦶ꧉
꧇꧒꧐꧇ 1꧋ꦲꦶꦁꦢꦶꦤꦩꦶꦁꦒꦸꦤꦺ꧈ꦲꦺꦱꦸꦏ꧀ꦲꦺꦱꦸꦏ꧀ꦲꦶꦗꦶꦏ꧀ꦥꦼꦠꦼꦁ꧈ꦩꦫꦶꦪꦩꦏ꧀ꦢꦭꦺꦤꦠꦼꦏꦤꦁꦏꦸꦧꦸꦂꦫꦤ꧀꧈ꦤꦁꦏꦺꦴꦤꦺꦴꦢꦺꦏ꧀ꦤꦺꦮꦼꦫꦸꦃꦤꦺꦏ꧀ꦮꦠꦸꦤꦺꦱꦶꦁꦢꦶꦲꦼꦁꦒꦺꦴꦤꦸꦠꦸꦥ꧀ꦥꦶꦏꦸꦧꦸꦂꦫꦤ꧀ꦤꦺꦮꦶꦱ꧀ꦲꦺꦴꦫꦲꦺꦤꦺꦁ꧉ 2ꦩꦫꦶꦪꦠꦼꦫꦸꦱ꧀ꦱꦏ꧀ꦮꦠ꧀ꦭꦸꦔꦔ꧀ꦒꦺꦴꦭꦺꦏ꧀ꦏꦶꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦭꦤ꧀ꦩꦸꦫꦶꦢ꧀ꦭꦶꦪꦤꦺꦱꦶꦁꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀꧈ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦩꦸꦫꦶꦢ꧀ꦭꦺꦴꦫꦺꦴꦏꦸꦮꦶ:“ꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀ꦢꦶꦗꦶꦏꦸꦏ꧀ꦏꦫꦺꦴꦮꦺꦴꦁꦮꦺꦴꦁ꧈ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦲꦺꦴꦫꦔꦼꦂꦠꦶꦲꦼꦩ꧀ꦧꦸꦃꦢꦶꦢꦺꦏꦺꦏ꧀ꦤꦁꦲꦼꦤ꧀ꦢꦶ꧉”
3꧋ꦫꦱꦸꦭ꧀ꦦꦺꦠꦿꦸꦱ꧀ꦭꦤ꧀ꦩꦸꦫꦶꦢ꧀ꦭꦶꦪꦤꦺꦩꦲꦸꦠꦼꦫꦸꦱ꧀ꦒꦼꦭꦶꦱ꧀ꦒꦼꦭꦶꦱ꧀ꦧꦸꦢꦭ꧀ꦤꦁꦏꦸꦧꦸꦂꦫꦤ꧀꧈ 4ꦏꦧꦺꦃꦭꦺꦴꦫꦺꦴꦩ꧀ꦧ꧀ꦭꦪꦸ꧈ꦤꦁꦔꦶꦁꦫꦱꦸꦭ꧀ꦪꦺꦴꦲꦤꦼꦱ꧀ꦲꦩ꧀ꦧ꧀ꦭꦪꦸꦮꦭꦸꦮꦶꦃꦧꦤ꧀ꦠꦼꦂ꧈ꦩꦸꦭꦤꦺꦢꦺꦏ꧀ꦤꦺꦱꦶꦁꦠꦼꦏꦤ꧀ꦢꦶꦱꦶꦏ꧀ꦤꦁꦏꦸꦧꦸꦂꦫꦤ꧀ꦤꦺ꧉ 5ꦫꦱꦸꦭ꧀ꦪꦺꦴꦲꦤꦼꦱ꧀ꦔꦶꦔꦸꦏ꧀ꦚ꧀ꦗꦼꦫꦸꦃꦠꦼꦫꦸꦱ꧀ꦮꦼꦫꦸꦃꦩꦺꦴꦫꦶꦤꦺꦤꦁꦏꦺꦴꦤꦺꦴ꧈ꦤꦁꦔꦶꦁꦢꦺꦏ꧀ꦤꦺꦲꦺꦴꦫꦩ꧀ꦊꦧꦸ꧉ 6ꦲꦺꦴꦫꦊꦠ꧀ꦱꦸꦮꦶꦫꦱꦸꦭ꧀ꦦꦺꦠꦿꦸꦱ꧀ꦠꦼꦏꦠꦼꦫꦸꦱ꧀ꦩ꧀ꦊꦧꦸ꧉ 7ꦫꦱꦸꦭ꧀ꦦꦺꦠꦿꦸꦱ꧀ꦮꦼꦫꦸꦃꦩꦺꦴꦫꦶꦤꦺꦭꦤ꧀ꦲꦸꦒꦒꦺꦴꦩ꧀ꦧꦭ꧀ꦩꦺꦴꦫꦶꦱꦶꦁꦢꦶꦲꦼꦁꦒꦺꦴꦲꦩ꧀ꦧꦸꦤ꧀ꦠꦼꦭ꧀ꦱꦶꦫꦃꦲꦺ꧉ꦤꦁꦔꦶꦁꦒꦺꦴꦩ꧀ꦧꦭ꧀ꦲꦶꦏꦶꦲꦺꦴꦫꦕꦩ꧀ꦥꦸꦂꦏꦫꦺꦴꦩꦺꦴꦫꦶꦭꦶꦪꦤꦺ꧈ꦩꦭꦃꦮꦶꦱ꧀ꦢꦶꦊꦩ꧀ꦥꦶꦠ꧀꧈ 8ꦫꦱꦸꦭ꧀ꦪꦺꦴꦲꦤꦼꦱ꧀ ꦱꦶꦁꦠꦼꦏꦤ꧀ꦢꦶꦱꦶꦏ꧀ꦤꦁꦏꦸꦧꦸꦂꦫꦤ꧀ꦤꦺ꧈ꦠꦼꦫꦸꦱ꧀ꦩꦺꦭꦸꦩ꧀ꦊꦧꦸꦲꦩ꧀ꦧꦫꦁ꧉ꦢꦺꦏ꧀ꦤꦺꦮꦼꦫꦸꦃꦏꦸꦮꦶꦩꦲꦸꦏꦧꦺꦃꦠꦼꦫꦸꦱ꧀ꦥꦽꦕꦪꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦮꦶꦱ꧀ꦠꦔꦶꦩꦼꦤꦺꦃ꧉ 9ꦲꦮꦶꦠ꧀ ꦱꦼꦤꦗꦤ꧀ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦧꦏꦭ꧀ꦩꦠꦶꦠꦼꦫꦸꦱ꧀ꦲꦸꦫꦶꦥ꧀ꦩꦼꦤꦺꦃ꧈ꦩꦸꦫꦶꦢ꧀ꦩꦸꦫꦶꦢ꧀ꦢꦺꦩꦲꦸꦤꦺꦢꦸꦫꦸꦁꦥꦢꦢꦸꦤꦸꦁꦠꦸꦭꦶꦱ꧀ꦱꦤ꧀ꦏꦸꦮꦶ꧉ 10ꦫꦱꦸꦭ꧀ꦦꦺꦠꦿꦸꦱ꧀ꦭꦤ꧀ꦪꦺꦴꦲꦤꦼꦱ꧀ꦠꦼꦫꦸꦱ꧀ꦥꦢꦩꦸꦭꦶꦃꦩꦼꦤꦺꦃ꧉
11꧋ꦩꦫꦶꦪ꧈ꦱꦶꦁꦲꦸꦒꦩꦺꦭꦸꦫꦺꦴꦤꦺꦴꦩꦼꦤꦺꦃ꧈ꦱꦲꦶꦏꦶꦤꦁꦏꦺꦴꦤꦺꦴꦢꦺꦮꦺꦤꦁꦚ꧀ꦗꦧꦤꦺꦏꦸꦧꦸꦂꦫꦤ꧀ꦤꦺ꧉ꦢꦺꦏ꧀ꦤꦺꦠꦼꦫꦸꦱ꧀ꦔꦶꦔꦸꦏ꧀ꦚ꧀ꦗꦼꦫꦸꦃꦏꦫꦺꦴꦤꦔꦶꦱ꧀꧈ 12ꦩꦫꦶꦪꦠꦼꦫꦸꦱ꧀ꦮꦼꦫꦸꦃꦩꦸꦭꦺꦏꦠ꧀ꦭꦺꦴꦫꦺꦴꦔꦁꦒꦺꦴꦱꦭꦶꦤ꧀ꦥꦸꦠꦶꦃꦚ꧀ꦗꦒꦺꦴꦁꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦩꦲꦸꦤꦺꦢꦶꦲꦼꦁꦒꦺꦴꦔ꧀ꦒꦺꦠꦏ꧀ꦏꦏꦺꦭꦪꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀꧈ꦱꦶꦁꦱꦶꦗꦶꦚ꧀ꦗꦒꦺꦴꦁꦤꦁꦱꦼꦧꦼꦭꦃꦱꦶꦏꦶꦭ꧀ꦭꦤ꧀ꦭꦶꦪꦤꦺꦱꦼꦧꦼꦭꦃꦱꦶꦫꦃ꧉ 13ꦩꦸꦭꦺꦏꦠ꧀ꦠꦺꦩꦲꦸꦠꦼꦫꦸꦱ꧀ꦥꦢꦠꦏꦺꦴꦤ꧀ꦩꦫꦁꦩꦫꦶꦪ:“ꦪꦸ꧈ꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦤꦔꦶꦱ꧀?” ꦩꦫꦶꦪꦱꦼꦩꦲꦸꦂ:“ꦒꦸꦱ꧀ꦠꦶꦏꦸꦢꦶꦒꦮꦭꦸꦔꦏꦫꦺꦴꦮꦺꦴꦁꦮꦺꦴꦁ꧈ꦤꦁꦔꦶꦁꦲꦏꦸꦲꦺꦴꦫꦔꦼꦂꦠꦶꦢꦺꦏ꧀ꦤꦺꦲꦼꦩ꧀ꦧꦸꦃꦢꦶꦢꦺꦏꦺꦏ꧀ꦤꦁꦲꦼꦤ꧀ꦢꦶ!”
14꧋ꦱꦏ꧀ꦮꦶꦱ꧀ꦱꦺꦱꦼꦩꦲꦸꦂꦔꦺꦴꦤꦺꦴꦢꦺꦏ꧀ꦤꦺꦠꦼꦫꦸꦱ꧀ꦩꦶꦔꦼꦂꦭꦤ꧀ꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ ꦤꦁꦔꦶꦁꦩꦫꦶꦪꦲꦺꦴꦫꦤꦶꦠꦺꦤ꧀ꦤꦶꦤꦺꦏ꧀ꦏꦸꦮꦶꦢꦺꦏ꧀ꦤꦺ꧉ 15ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦪꦸ꧈ꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦤꦔꦶꦱ꧀?ꦏꦺꦴꦮꦺꦏꦸꦮꦶꦔ꧀ꦒꦺꦴꦭꦺꦏ꧀ꦏꦶꦱꦥ?”
꧋ꦤ꧀ꦢꦫꦤ꧀ꦤꦶꦩꦫꦶꦪꦱꦶꦁꦠꦏꦺꦴꦤ꧀ꦏꦸꦮꦶꦮꦺꦴꦁꦱꦶꦁꦠꦸꦏꦁꦉꦱꦶꦏ꧀ꦉꦱꦶꦏ꧀ꦏꦼꦧꦺꦴꦤ꧀ꦏꦺꦴꦤꦺꦴ꧈ꦩꦸꦭꦤꦺꦢꦺꦏ꧀ꦤꦺꦱꦼꦩꦲꦸꦂ:“ꦏꦁ꧈ꦤꦺꦏ꧀ꦏꦺꦴꦮꦺꦱꦶꦁꦔ꧀ꦒꦮꦭꦸꦔꦭꦪꦺꦴꦤꦺ꧈ꦩ꧀ꦧꦺꦴꦏ꧀ꦲꦏꦸꦢꦶꦢꦸꦢꦸꦃꦲꦶꦔ꧀ꦒꦺꦴꦤ꧀ꦤꦺꦠ꧈ꦲꦉꦥ꧀ꦠꦏ꧀ꦗꦶꦏꦸꦏ꧀!”
16꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦩꦫꦶꦪ!”
꧋ꦩꦫꦶꦪꦠꦼꦫꦸꦱ꧀ꦱꦏ꧀ꦮꦠ꧀ꦩꦶꦔꦼꦂꦭꦤ꧀ꦱꦼꦩꦲꦸꦂ:“ꦫꦧꦸꦤꦶ!”꧌ꦫꦧꦸꦤꦶꦲꦶꦏꦸꦠꦼꦩ꧀ꦧꦸꦁꦆꦧꦿꦤꦶꦠꦼꦒꦼꦱ꧀ꦱꦺ:“ꦒꦸꦫꦸꦏꦸ꧉꧍
17꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦲꦗꦢꦶꦢꦼꦩꦺꦏ꧀ꦤ꧀ꦢꦶꦱꦶꦏ꧀ ꦲꦮꦶꦠ꧀ꦲꦏꦸꦢꦸꦫꦸꦁꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸ꧉ꦏꦤꦱꦲꦶꦏꦶꦱꦼꦢꦸꦭꦸꦂꦱꦼꦢꦸꦭꦸꦂꦏꦸꦢꦶꦲꦺꦴꦩꦺꦴꦁꦔꦶꦤꦺꦏ꧀ꦲꦏꦸꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦱꦶꦁꦲꦸꦒꦧꦥꦏ꧀ꦩꦸ꧈ꦒꦸꦱ꧀ꦠꦶꦄꦭ꧀ꦭꦃꦏꦸꦭꦤ꧀ꦲꦸꦒꦒꦸꦱ꧀ꦠꦶꦄꦭ꧀ꦭꦃꦩꦸ꧉”
18꧋ꦩꦫꦶꦪꦠꦼꦫꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦔꦺꦴꦩꦺꦴꦁ:“ꦲꦏꦸꦮꦼꦫꦸꦃꦒꦸꦱ꧀ꦠꦶ!”ꦲꦥꦱꦶꦁꦢꦶꦲꦺꦴꦩꦺꦴꦁꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦏꦺꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ꧉
19꧋ꦩ꧀ꦧꦼꦔꦶꦤꦺꦏꦸꦮꦶꦩꦸꦫꦶꦢ꧀ꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ꦥꦢꦔꦸꦩ꧀ꦥꦸꦭ꧀꧈ꦭꦮꦁꦭꦮꦁꦔꦺꦢꦶꦏꦚ꧀ꦕꦶꦁꦔꦶꦏꦧꦺꦃ꧈ꦲꦮꦶꦠ꧀ꦥꦢꦮꦼꦢꦶꦏꦫꦺꦴꦥꦫꦥꦼꦁꦒꦼꦢꦺꦤꦺꦮꦺꦴꦁꦙꦸ꧉ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦢꦢꦏ꧀ꦏꦤ꧀ꦠꦼꦏꦔꦢꦼꦏ꧀ꦤꦁꦔꦉꦥ꧀ꦥꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦢꦱ꧀ꦭꦩꦼꦠ꧀ꦠ!” 20ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤ꧀ꦢꦸꦢꦸꦃꦲꦏꦺꦠꦔꦤ꧀ꦤꦺꦭꦤ꧀ꦧꦁꦏꦺꦏ꧀ꦏꦤ꧀ꦤꦺ꧉ꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦢꦧꦸꦔꦃꦠꦼꦤꦤ꧀ꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀꧈ 21ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦱꦼꦥꦶꦱ꧀ꦱꦤ꧀ꦩꦼꦤꦺꦃ:“ꦥꦢꦱ꧀ꦭꦩꦼꦠ꧀ꦠ!ꦏꦪꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦔꦺꦴꦁꦏꦺꦴꦤ꧀ꦲꦏꦸ꧈ꦱꦼꦩꦺꦴꦤꦺꦴꦲꦸꦒꦲꦏꦸꦔꦺꦴꦁꦏꦺꦴꦤ꧀ꦏꦺꦴꦮꦺ꧉” 22-23ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦤ꧀ꦢꦩꦸꦩꦸꦫꦶꦢ꧀ꦩꦸꦫꦶꦢ꧀ꦢꦺꦏꦫꦺꦴꦔꦺꦴꦩꦺꦴꦁ:“ꦤꦩ꧀ꦥꦲꦫꦺꦴꦃꦱꦸꦕꦶ!ꦱꦥꦱꦶꦁꦲꦩ꧀ꦧꦺꦴꦏ꧀ꦔꦥꦸꦫꦱꦭꦃꦲꦺꦪꦤꦩ꧀ꦥꦥꦔꦥꦸꦫ꧈ꦱꦶꦁꦲꦺꦴꦫꦲꦩ꧀ꦧꦺꦴꦏ꧀ꦔꦥꦸꦫꦪꦲꦸꦒꦲꦺꦴꦫꦤꦩ꧀ꦥꦥꦔꦥꦸꦫ꧉”
24꧋ꦫꦱꦸꦭ꧀ꦠꦺꦴꦩꦱ꧀ ꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ꦱꦶꦁꦢꦶꦲꦫꦤ꧀ꦤꦶꦲꦤꦏ꧀ꦏꦼꦩ꧀ꦧꦂ꧈ꦲꦺꦴꦫꦤꦁꦏꦺꦴꦤꦺꦴꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦤꦁꦠꦼꦔꦃꦲꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦩꦲꦸ꧉ 25ꦤꦁꦔꦶꦁꦏꦢꦸꦁꦢꦺꦏ꧀ꦤꦺꦢꦶꦲꦺꦴꦩꦺꦴꦁꦔꦶꦏꦫꦺꦴꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺꦤꦺꦏ꧀ꦥꦢꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ ꦢꦺꦏ꧀ꦤꦺꦲꦺꦴꦫꦔꦤ꧀ꦢꦼꦭ꧀꧈
꧋ꦩꦭꦃꦔꦺꦴꦩꦺꦴꦁ:“ꦲꦏꦸꦔꦤ꧀ꦢꦼꦭ꧀ꦤꦺꦏ꧀ꦲꦏꦸꦮꦼꦫꦸꦃꦠꦶꦥꦏ꧀ꦏꦺꦧꦺꦴꦭꦺꦴꦁꦔꦤ꧀ꦤꦺꦥꦏꦸꦤꦺꦤꦁꦠꦔꦤ꧀ꦤꦺꦭꦤ꧀ꦲꦏꦸꦧꦶꦱꦔ꧀ꦊꦧꦺꦴꦏ꧀ꦏꦏꦺꦢꦿꦶꦗꦶꦏꦸꦤꦁꦧꦺꦴꦭꦺꦴꦁꦔꦤ꧀ꦤꦺꦏꦸꦮꦶꦭꦤ꧀ꦲꦏꦸꦧꦶꦱꦤ꧀ꦢꦼꦩꦺꦏ꧀ꦧꦁꦏꦺꦏ꧀ꦏꦤ꧀ꦤꦺꦱꦶꦁꦢꦶꦗꦺꦴꦗꦺꦴꦃ!”
26꧋ꦊꦠ꧀ꦱꦼꦩꦶꦁꦒꦸꦩꦸꦫꦶꦢ꧀ꦩꦸꦫꦶꦢ꧀ꦢꦺꦒꦸꦱ꧀ꦠꦶꦪꦺꦯꦸꦱ꧀ꦥꦢꦔꦸꦩ꧀ꦥꦸꦭ꧀ꦩꦼꦤꦺꦃ꧉ꦱꦲꦶꦏꦶꦫꦱꦸꦭ꧀ꦠꦺꦴꦩꦱ꧀ꦲꦩ꧀ꦧꦫꦁꦲꦺꦤꦺꦁ꧉ꦭꦮꦁꦭꦮꦁꦔꦺꦢꦶꦏꦚ꧀ꦕꦶꦁꦔꦶꦏꦧꦺꦃ꧈ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦩꦼꦤꦺꦃ꧈ꦔꦼꦂꦠꦶꦔꦼꦂꦠꦶꦮꦶꦱ꧀ꦔꦢꦼꦏ꧀ꦤꦁꦠꦼꦔꦃꦲꦺꦠꦼꦫꦸꦱ꧀ꦩ꧀ꦧꦒꦺꦏ꧀ꦏꦏꦺ:“ꦥꦢꦱ꧀ꦭꦩꦼꦠ꧀ꦠꦏꦧꦺꦃ!” 27ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦫꦱꦸꦭ꧀ꦠꦺꦴꦩꦱ꧀:“ꦠꦺꦴꦩꦱ꧀ ꦢꦼꦭꦺꦴꦏ꧀ꦏꦼꦤ꧀ꦠꦔꦤ꧀ꦏꦸꦲꦶꦏꦶ꧈ꦫꦺꦤꦺꦢꦼꦩꦺꦏ꧀ꦏꦼꦤ꧀꧈ꦧꦁꦏꦺꦏ꧀ꦏꦤ꧀ꦏꦸꦲꦩ꧀ꦧꦫꦁꦲꦶꦏꦶꦢꦶꦢꦼꦩꦺꦏ꧀ꦗꦗꦭ꧀!ꦲꦩ꧀ꦧꦺꦴꦏ꧀ꦲꦗꦏꦪꦮꦺꦴꦁꦱꦶꦁꦲꦺꦴꦫꦥꦽꦕꦪ꧈ꦤꦁꦔꦶꦁꦔꦤ꧀ꦢꦼꦭ꧀ꦭ!”
28꧋ꦫꦱꦸꦭ꧀ꦠꦺꦴꦩꦱ꧀ꦠꦼꦫꦸꦱ꧀ꦱꦼꦩꦲꦸꦂ:“ꦢꦸꦃꦒꦸꦱ꧀ꦠꦶ꧈ꦥꦚ꧀ꦕꦺꦤ꧀ꦏꦺꦴꦮꦺꦒꦸꦱ꧀ꦠꦶꦄꦭ꧀ꦭꦃꦏꦸ꧉”
29꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺꦱꦲꦶꦏꦶꦥꦽꦕꦪ꧈ꦲꦮꦶꦠ꧀ꦏꦺꦴꦮꦺꦮꦶꦱ꧀ꦮꦼꦫꦸꦃꦲꦏꦸ꧉ꦤꦁꦔꦶꦁꦧꦼꦗꦠꦼꦤꦤ꧀ꦮꦺꦴꦁꦱꦶꦁꦥꦽꦕꦪꦠꦤ꧀ꦥꦮꦼꦫꦸꦃꦲꦏꦸ!”
30꧋ꦲꦶꦗꦶꦏ꧀ꦲꦺꦤꦺꦁꦥꦽꦏꦫꦭꦶꦪꦤꦺꦥꦶꦫꦁꦥꦶꦫꦁꦩꦼꦤꦺꦃꦱꦶꦁꦔ꧀ꦒꦸꦩꦸꦤ꧀ꦤꦏꦺ꧈ꦱꦶꦁꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦤꦁꦔꦉꦥ꧀ꦥꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ꧈ꦱꦶꦁꦲꦺꦴꦫꦏꦼꦠꦸꦭꦶꦱ꧀ꦤꦁꦧꦸꦏꦸꦲꦶꦏꦶ꧉ 31ꦤꦁꦔꦶꦁꦱꦶꦁꦏꦼꦠꦸꦭꦶꦱ꧀ꦲꦶꦏꦶꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦏꦿꦶꦱ꧀ꦡꦸꦱ꧀ꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧉ꦤꦺꦏ꧀ꦏꦺꦴꦮꦺꦥꦽꦕꦪꦩꦫꦁꦢꦺꦏ꧀ꦤꦺ꧈ꦏꦺꦴꦮꦺꦤ꧀ꦢꦸꦮꦺꦤ꧀ꦤꦶꦲꦸꦫꦶꦥ꧀ꦭꦁꦒꦼꦁ꧉
꧇꧒꧑꧇ 1꧋ꦲꦺꦴꦫꦊꦠ꧀ꦱꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦔꦺꦠꦺꦴꦏ꧀ꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦱꦼꦥꦶꦱ꧀ꦱꦤ꧀ꦩꦼꦤꦺꦃ꧉ꦱꦲꦶꦏꦶꦤꦁꦩꦺꦂꦠꦶꦧꦺꦫꦶꦪꦱ꧀꧈ꦏꦸꦮꦶꦔꦺꦤꦺ꧉ 2ꦩꦸꦫꦶꦢ꧀ꦩꦸꦫꦶꦢ꧀ꦢꦺꦢꦺꦴꦁꦔꦺꦥꦢꦔꦸꦩ꧀ꦥꦸꦭ꧀ ꦪꦏꦸꦮꦶꦱꦶꦩꦺꦴꦤ꧀ꦦꦺꦠꦿꦸꦱ꧀ ꦠꦺꦴꦩꦱ꧀ꦏꦼꦩ꧀ꦧꦂ꧈ꦤꦠꦤꦲꦺꦭ꧀ꦱꦶꦁꦱꦁꦏꦏꦸꦠꦏꦤꦤꦁꦧꦮꦃꦓꦭꦶꦭꦺꦪ꧈ꦲꦤꦏ꧀ꦏꦺꦯꦺꦧꦺꦢꦺꦪꦸꦱ꧀ꦭꦺꦴꦫꦺꦴꦭꦤ꧀ꦩꦸꦫꦶꦢ꧀ꦭꦺꦴꦫꦺꦴꦭꦶꦪꦤꦺ꧉ 3ꦭꦃꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦏꦫꦺꦴꦭꦶꦪꦭꦶꦪꦤꦺ:“ꦲꦏꦸꦲꦉꦥ꧀ꦔ꧀ꦒꦺꦴꦭꦺꦏ꧀ꦲꦶꦮꦏ꧀!”
꧋ꦭꦶꦪꦭꦶꦪꦤꦺꦱꦼꦩꦲꦸꦂ:“ꦲꦮꦏ꧀ꦏꦺꦢꦺꦮꦺꦲꦉꦥ꧀ꦩꦺꦭꦸ!”ꦏꦧꦺꦃꦠꦼꦫꦸꦱ꧀ꦧꦸꦢꦭ꧀ꦏꦫꦺꦴꦥꦿꦲꦸꦤꦺ꧈ꦤꦁꦔꦶꦁꦩ꧀ꦧꦼꦔꦶꦏꦸꦮꦶꦲꦺꦴꦫꦲꦺꦤ꧀ꦠꦸꦏ꧀ꦲꦥꦲꦥ꧉ 4ꦲꦺꦱꦸꦏ꧀ꦏꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦤꦁꦥꦶꦁꦒꦶꦂꦩꦺꦂꦏꦺꦴꦤꦺꦴ꧈ꦤꦁꦔꦶꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦲꦺꦴꦫꦤꦶꦠꦺꦤ꧀ꦤꦶꦤꦺꦏ꧀ꦏꦸꦮꦶꦢꦺꦏ꧀ꦤꦺ꧉ 5ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦲꦺꦴꦫꦲꦺꦤ꧀ꦠꦸꦏ꧀ꦲꦥꦲꦥ?”
꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺꦱꦼꦩꦲꦸꦂ:“ꦲꦺꦴꦫ!”
6꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦗꦭꦤꦺꦢꦶꦲꦸꦚ꧀ꦕꦭ꧀ꦭꦏꦺꦤꦁꦠꦼꦔꦼꦤꦺꦥꦿꦲꦸꦤꦺꦠ꧈ꦩꦼꦁꦏꦺꦴꦭꦲꦸꦠ꧀ꦲꦺꦤ꧀ꦠꦸꦏ꧀!”ꦩꦸꦫꦶꦢ꧀ꦩꦸꦫꦶꦢ꧀ꦠꦺꦠꦼꦫꦸꦱ꧀ꦔꦸꦚ꧀ꦕꦭ꧀ꦭꦏꦺꦗꦭꦤꦺ꧈ꦤꦁꦔꦶꦁꦱꦁꦏꦶꦁꦲꦺꦴꦏꦺꦃꦲꦺꦲꦶꦮꦏ꧀ꦏꦺꦲꦺꦴꦫꦏꦸꦮꦠ꧀ꦤꦫꦶꦏ꧀꧈
7꧋ꦫꦱꦸꦭ꧀ꦪꦺꦴꦲꦤꦼꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦫꦱꦸꦭ꧀ꦦꦺꦠꦿꦸꦱ꧀:“ꦏꦸꦮꦶꦒꦸꦱ꧀ꦠꦶ!”ꦏꦢꦸꦁꦫꦱꦸꦭ꧀ꦦꦺꦠꦿꦸꦱ꧀ꦏꦿꦸꦔꦸꦤꦺꦏ꧀ꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ ꦢꦺꦏ꧀ꦤꦺꦱꦏ꧀ꦮꦠ꧀ꦔꦁꦒꦺꦴꦱꦭꦶꦤ꧀ꦤꦺꦠꦼꦫꦸꦱ꧀ꦚ꧀ꦗꦼꦒꦸꦂ꧈ꦲꦮꦶꦠ꧀ꦩꦲꦸꦤꦺꦤꦩꦸꦁꦔꦁꦒꦺꦴꦱꦭꦶꦤ꧀ꦚ꧀ꦗꦼꦫꦺꦴ꧉ 8ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺꦠꦼꦫꦸꦱ꧀ꦔ꧀ꦒꦮꦥꦿꦲꦸꦤꦺꦤꦁ ꦢꦫꦠ꧀ꦠꦤ꧀ꦏꦫꦺꦴꦤꦫꦶꦏ꧀ꦗꦭꦤꦺꦱꦶꦁꦏꦼꦧꦼꦏ꧀ꦲꦶꦮꦏ꧀꧈ꦢꦫꦠ꧀ꦠꦤ꧀ꦤꦺꦲꦺꦴꦫꦲꦢꦺꦴꦃ꧈ꦏꦶꦫꦏꦶꦫꦱꦠꦸꦱ꧀ꦩꦺꦠꦼꦂ꧉ 9ꦏꦢꦸꦁꦮꦶꦱ꧀ꦠꦼꦏꦤ꧀ꦢꦫꦠ꧀ꦠꦤ꧀ꦠꦼꦫꦸꦱ꧀ꦥꦢꦮꦼꦫꦸꦃꦒꦼꦤꦶꦲꦉꦁꦭꦤ꧀ꦲꦶꦮꦏ꧀ꦢꦶꦥꦁꦒꦁꦤꦁꦤ꧀ꦢꦸꦮꦸꦂꦫꦺ꧉ꦲꦺꦤꦺꦁꦫꦺꦴꦠꦶꦤꦺꦲꦩ꧀ꦧꦫꦁ꧉ 10ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤꦚ꧀ꦗꦶꦏꦸꦏ꧀ꦲꦶꦮꦏ꧀ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦺꦤ꧀ꦠꦸꦏ꧀ꦩꦸꦚ꧀ꦗꦭꦏꦸꦮꦶ!”
11꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦤꦫꦶꦏ꧀ꦗꦭꦤꦺꦤꦁꦢꦫꦠ꧀ꦠꦤ꧀꧈ꦗꦭꦤꦺꦏꦼꦧꦼꦏ꧀ꦏꦫꦺꦴꦲꦶꦮꦏ꧀ꦒꦼꦢꦺꦒꦼꦢꦺ꧈ꦲꦺꦤꦺꦁꦱꦠꦸꦱ꧀ꦱꦺꦏꦼꦠ꧀ꦠꦼꦭꦸ꧈ꦤꦁꦔꦶꦁꦱꦼꦤꦗꦤ꧀ꦤꦲꦶꦮꦏ꧀ꦏꦺꦲꦺꦴꦏꦺꦃꦲꦺꦱꦼꦩꦺꦴꦤꦺꦴ꧈ꦗꦭꦤꦺꦲꦺꦴꦫꦧꦼꦢꦃ꧉ 12ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ:“ꦫꦺꦤꦺꦥꦢꦱꦫꦥ꧀ꦥꦤ꧀!”ꦲꦺꦴꦫꦲꦺꦤꦺꦁꦱꦶꦁꦮꦤꦶꦠꦏꦺꦴꦤ꧀ꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦲꦥꦢꦸꦢꦸ꧈ꦲꦮꦶꦠ꧀ꦮꦶꦱ꧀ꦥꦢꦔꦼꦂꦠꦶꦤꦺꦏ꧀ꦏꦸꦮꦶꦢꦺꦏ꧀ꦤꦺ꧉ 13ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦚ꧀ꦗꦶꦏꦸꦏ꧀ꦫꦺꦴꦠꦶꦤꦺꦢꦶꦏꦺꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ꧈ꦲꦶꦮꦏ꧀ꦏꦺꦲꦩ꧀ꦧꦫꦁ꧉
14꧋ꦱꦏ꧀ꦮꦶꦱ꧀ꦱꦺꦒꦸꦱ꧀ꦠꦶꦪꦺꦯꦸꦱ꧀ꦠꦔꦶꦱꦁꦏꦥꦠꦶꦢꦺꦏ꧀ꦤꦺꦮꦶꦱ꧀ꦔꦺꦠꦺꦴꦏ꧀ꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦶꦁꦠꦼꦭꦸꦲꦶꦏꦶ꧉
15꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁꦫꦱꦸꦭ꧀ꦦꦺꦠꦿꦸꦱ꧀:“ꦱꦶꦩꦺꦴꦤ꧀ ꦲꦤꦏ꧀ꦏꦺꦪꦺꦴꦲꦤꦼꦱ꧀ ꦲꦥꦏꦺꦴꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁꦲꦏꦸ꧈ꦔꦸꦁꦏꦸꦭ꧀ꦭꦶꦭꦶꦪꦭꦶꦪꦤꦺ?”
꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ:“ꦏꦺꦴꦮꦺꦮꦶꦱ꧀ꦔꦼꦂꦠꦶꦢꦺꦮꦺꦒꦸꦱ꧀ꦠꦶ꧈ꦲꦏꦸꦠꦿꦺꦱ꧀ꦤꦩꦫꦁꦏꦺꦴꦮꦺ!”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦕꦼꦩ꧀ꦥꦺꦕꦼꦩ꧀ꦥꦺꦏꦸꦥꦢꦢꦶꦲꦼꦔꦺꦴꦤ꧀!” 16ꦒꦸꦱ꧀ꦠꦶꦪꦺꦯꦸꦱ꧀ꦠꦏꦺꦴꦤ꧀ꦱꦼꦥꦶꦱ꧀ꦱꦤ꧀ꦩꦼꦤꦺꦃ:“ꦱꦶꦩꦺꦴꦤ꧀ ꦲꦤꦏ꧀ꦏꦺꦪꦺꦴꦲꦤꦼꦱ꧀ ꦲꦥꦏꦺꦴꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁꦲꦏꦸ?”
꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ:“ꦪꦒꦸꦱ꧀ꦠꦶ꧈ꦏꦺꦴꦮꦺꦮꦶꦱ꧀ꦔꦼꦂꦠꦶꦢꦺꦮꦺꦠ!”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦼꦢꦸꦱ꧀ꦮꦼꦢꦸꦱ꧀ꦏꦸꦥꦢꦢꦶꦲꦼꦔꦺꦴꦤ꧀!” 17ꦱꦲꦶꦏꦶꦒꦸꦱ꧀ꦠꦶꦪꦺꦯꦸꦱ꧀ꦠꦏꦺꦴꦤ꧀ꦥꦶꦁꦠꦼꦭꦸꦤꦺ:“ꦱꦶꦩꦺꦴꦤ꧀ ꦲꦤꦏ꧀ꦏꦺꦪꦺꦴꦲꦤꦼꦱ꧀ ꦲꦥꦏꦺꦴꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁꦲꦏꦸ?”
꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦱꦼꦢꦶꦧꦔꦼꦠ꧀ꦏꦿꦸꦔꦸꦒꦸꦱ꧀ꦠꦶꦪꦺꦯꦸꦱ꧀ꦠꦏꦺꦴꦤ꧀ꦏꦪꦔꦺꦴꦤꦺꦴꦏꦸꦮꦶꦱꦩ꧀ꦥꦺꦏ꧀ꦥꦶꦁꦠꦼꦭꦸ꧉
꧋ꦢꦺꦏ꧀ꦤꦺꦱꦼꦩꦲꦸꦂ:“ꦒꦸꦱ꧀ꦠꦶ꧈ꦏꦺꦴꦮꦺꦔꦼꦂꦠꦶꦱꦼꦩ꧀ꦧꦫꦁ꧉ꦏꦺꦴꦮꦺꦔꦼꦂꦠꦶꦤꦺꦏ꧀ꦲꦏꦸꦠꦿꦺꦱ꧀ꦤꦩꦫꦁꦏꦺꦴꦮꦺ!”
꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦼꦢꦸꦱ꧀ꦮꦼꦢꦸꦱ꧀ꦏꦸꦥꦢꦢꦶꦲꦼꦔꦺꦴꦤ꧀!” 18ꦒꦸꦱ꧀ꦠꦶꦪꦺꦯꦸꦱ꧀ꦱꦲꦶꦏꦶꦔꦺꦴꦩꦺꦴꦁ:“ꦩ꧀ꦧꦶꦪꦺꦤ꧀ꦢꦺꦴꦁꦔꦺꦏꦺꦴꦮꦺꦲꦶꦗꦶꦏ꧀ꦲꦼꦤꦺꦴꦩ꧀ ꦏꦺꦴꦮꦺꦱꦧꦸꦏ꧀ꦏꦤ꧀ꦢꦺꦮꦺꦭꦤ꧀ꦏꦺꦴꦮꦺꦫꦤꦫꦺꦤꦺꦱꦏ꧀ꦏꦉꦥ꧀ꦩꦸꦢꦺꦮꦺ꧉ꦤꦁꦔꦶꦁꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦺꦴꦮꦺꦮꦶꦱ꧀ꦠꦸꦮ꧈ꦏꦺꦴꦮꦺꦧꦏꦭ꧀ꦔꦸꦁꦒꦃꦲꦏꦺꦠꦔꦤ꧀ꦩꦸꦭꦤ꧀ꦮꦺꦴꦁꦭꦶꦪꦤꦺꦧꦏꦭ꧀ꦚꦧꦸꦏ꧀ꦏꦶꦏꦺꦴꦮꦺꦭꦤ꧀ꦔ꧀ꦒꦮꦏꦺꦴꦮꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦏꦺꦴꦮꦺꦲꦺꦴꦫꦱꦼꦤꦼꦁ꧉” 19ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦏꦁꦒꦺꦴꦩ꧀ꦭꦩ꧀ꦧꦁꦔꦶꦫꦱꦸꦭ꧀ꦦꦺꦠꦿꦸꦱ꧀ꦏꦼꦥꦿꦶꦪꦺꦢꦺꦏ꧀ꦤꦺꦲꦼꦁꦒꦺꦴꦤꦺꦧꦏꦭ꧀ꦩꦠꦶꦏꦁꦒꦺꦴꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶꦄꦭ꧀ꦭꦃ꧉ꦱꦏ꧀ꦮꦶꦱ꧀ꦱꦺꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲ꦳ꦪꦸꦏ꧀ꦩꦺꦭꦸꦲꦏꦸ!”
20꧋ꦏꦢꦸꦁꦫꦱꦸꦭ꧀ꦦꦺꦠꦿꦸꦱ꧀ꦤꦺꦴꦭꦺꦃꦲꦩ꧀ꦧꦸꦫꦶꦢꦺꦏ꧀ꦤꦺꦮꦼꦫꦸꦃꦤꦺꦏ꧀ꦫꦱꦸꦭ꧀ꦪꦺꦴꦲꦤꦼꦱ꧀ꦲꦩ꧀ꦧꦫꦁꦩꦺꦭꦸ꧉ꦪꦫꦱꦸꦭ꧀ꦪꦺꦴꦲꦤꦼꦱ꧀ꦲꦶꦏꦶꦱꦶꦁꦚ꧀ꦗꦒꦺꦴꦁꦗꦺꦗꦺꦂꦫꦺꦒꦸꦱ꧀ꦠꦶꦪꦺꦯꦸꦱ꧀ꦢꦺꦴꦁꦔꦺꦥꦢꦩꦁꦔꦤ꧀ꦧꦉꦁꦭꦤ꧀ꦢꦺꦏ꧀ꦤꦺꦱꦶꦁꦠꦏꦺꦴꦤ꧀:“ꦱꦥꦱꦶꦁꦲꦉꦥ꧀ꦔꦼꦭꦸꦁꦔꦏꦺꦏꦺꦴꦮꦺꦩꦫꦁꦩꦸꦁꦱꦸꦃꦲꦺ꧈ꦒꦸꦱ꧀ꦠꦶ?” 21ꦫꦱꦸꦭ꧀ꦦꦺꦠꦿꦸꦱ꧀ꦮꦼꦫꦸꦃꦫꦱꦸꦭ꧀ꦪꦺꦴꦲꦤꦼꦱ꧀ꦏꦸꦮꦶꦠꦼꦫꦸꦱ꧀ꦠꦏꦺꦴꦤ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀:“ꦒꦸꦱ꧀ꦠꦶ꧈ꦭꦃꦪꦺꦴꦲꦤꦼꦱ꧀ꦏꦼꦥꦿꦶꦪꦺ?”
22꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦱꦼꦩꦸꦁꦒꦺꦴꦤ꧀ꦤꦺꦲꦏꦸꦏꦉꦥ꧀ꦤꦺꦏ꧀ꦢꦺꦏ꧀ꦤꦺꦲꦸꦫꦶꦥ꧀ꦠꦼꦫꦸꦱ꧀ꦠꦼꦏꦤꦺꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸꦠꦼꦏꦩꦼꦤꦺꦃ꧈ꦭꦃꦏꦸꦮꦶꦭꦲꦸꦠ꧀ꦢꦸꦢꦸꦥꦽꦏꦫꦩꦸꦠ!ꦤꦁꦔꦶꦁꦏꦺꦴꦮꦺꦏꦸꦢꦸꦩꦺꦭꦸꦲꦏꦸ!”
23꧋ꦤꦁꦠꦼꦔꦃꦲꦺꦮꦺꦴꦁꦮꦺꦴꦁꦱꦶꦁꦥꦢꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦲꦺꦤꦺꦁꦲꦺꦴꦩꦺꦴꦁꦔꦤ꧀ꦩꦿꦺꦩꦺꦤ꧀ꦩꦿꦺꦩꦺꦤ꧀ ꦗꦫꦺꦤꦺꦫꦱꦸꦭ꧀ꦪꦺꦴꦲꦤꦼꦱ꧀ꦲꦺꦴꦫꦧꦏꦭ꧀ꦩꦠꦶ꧉ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦲꦺꦴꦫꦔꦺꦴꦩꦺꦴꦁꦤꦺꦏ꧀ꦫꦱꦸꦭ꧀ꦪꦺꦴꦲꦤꦼꦱ꧀ꦲꦺꦴꦫꦧꦏꦭ꧀ꦩꦠꦶ꧈ꦢꦺꦏ꧀ꦤꦺꦔꦺꦴꦩꦺꦴꦁ:“ꦱꦼꦩꦸꦁꦒꦺꦴꦤ꧀ꦤꦺꦲꦏꦸꦏꦉꦥ꧀ꦤꦺꦏ꧀ꦢꦺꦏ꧀ꦤꦺꦲꦸꦫꦶꦥ꧀ꦠꦼꦫꦸꦱ꧀ꦠꦼꦏꦤꦺꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸꦠꦼꦏꦩꦼꦤꦺꦃ꧈ꦭꦃꦏꦸꦮꦶꦭꦲꦸꦠ꧀ꦢꦸꦢꦸꦥꦽꦏꦫꦩꦸꦠ?”
24꧋ꦪꦲꦏꦸꦲꦶꦏꦶ꧈ꦪꦺꦴꦲꦤꦼꦱ꧀ ꦱꦶꦁꦚꦼꦏ꧀ꦱꦺꦤ꧀ꦤꦶꦭꦤ꧀ꦤꦸꦭꦶꦱ꧀ꦱꦼꦩ꧀ꦧꦫꦁꦲꦶꦏꦶ꧉ꦲꦮꦏ꧀ꦏꦺꦢꦺꦮꦺꦔꦼꦂꦠꦶꦤꦺꦏ꧀ꦱꦼꦩ꧀ꦧꦫꦁꦱꦶꦁꦠꦏ꧀ꦲꦺꦴꦩꦺꦴꦁꦏꦸꦮꦶꦮꦸꦗꦸꦠ꧀ꦠꦼꦤꦤ꧀꧈ 25ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦤꦶꦤ꧀ꦢꦏ꧀ꦏꦏꦺꦧꦫꦁꦭꦶꦪꦭꦶꦪꦤꦺꦲꦺꦴꦏꦺꦃꦧꦔꦼꦠ꧀꧈ꦱꦼꦩꦸꦁꦒꦺꦴꦤ꧀ꦤꦺꦏꦧꦺꦃꦢꦶꦠꦸꦭꦶꦱ꧀ꦱꦶꦗꦶꦱꦶꦗꦶ꧈ꦲꦏꦸꦩꦶꦏꦶꦂꦗꦒꦠ꧀ꦲꦶꦏꦶꦲꦺꦴꦫꦏꦩꦺꦴꦠ꧀ꦏꦁꦒꦺꦴꦩꦢꦃꦲꦶꦧꦸꦏꦸꦧꦸꦏꦸꦤꦺꦱꦶꦁꦢꦶꦠꦸꦭꦶꦱ꧀꧈
| ← ꦭꦸꦏꦱ꧀ | ꦥꦫꦫꦱꦸꦭ꧀ → |