ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦪꦏꦺꦴꦧꦸꦱ꧀

Saka Wikisumber
꧁꧋ꦭꦪꦁꦔꦺꦪꦏꦺꦴꦧꦸꦱ꧀꧈​꧂

ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦏꦧꦂꦱ꧀ꦭꦩꦼꦠ꧀꧈​

꧇​꧑꧇​

1꧋ꦭꦪꦁꦱꦁꦏꦪꦏꦺꦴꦧꦸꦱ꧀ ꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦫꦁꦱꦼꦢꦸꦭꦸꦂꦱꦼꦢꦸꦭꦸꦂꦏꦿꦶꦱ꧀ꦠꦼꦤ꧀ꦱꦁꦏꦧꦁꦱꦙꦸꦱꦶꦁꦥꦼꦚ꧀ꦕꦂꦤꦁꦱꦏ꧀ꦭꦸꦩꦃꦲꦺꦗꦒꦠ꧀꧈​ꦏꦧꦂꦱ꧀ꦭꦩꦼꦠ꧀ꦩꦫꦁꦏꦺꦴꦮꦺꦏꦧꦺꦃ꧉​

꧋ꦧꦧ꧀ꦥꦼꦔꦤ꧀ꦢꦼꦭ꧀ꦱꦶꦁꦩꦤ꧀ꦠꦼꦥ꧀ꦭꦤ꧀ꦏꦮꦼꦫꦸꦃ꧉​

2-3꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦧꦸꦔꦃꦲ​ꦤꦺꦏ꧀ꦏꦺꦴꦮꦺ​ꦏꦠꦼꦏꦤ꧀ꦮꦼꦂꦤꦮꦼꦂꦤ​ꦏꦔꦺꦭ꧀ꦭꦤ꧀꧈​ꦏꦸꦮꦶ​ꦤꦩꦸꦁ​ꦏꦁꦒꦺꦴ​ꦚ꧀ꦗꦗꦭ꧀ꦥꦼꦔꦤ꧀ꦢꦼꦭ꧀ꦩꦸ​꧉​ꦤꦺꦏ꧀ꦏꦺꦴꦮꦺ​ꦠꦼꦩꦼꦤ꧀ꦠꦼꦫꦸꦱ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦏꦔꦺꦭ꧀ꦭꦤ꧀ ꦥꦼꦔꦤ꧀ꦢꦼꦭ꧀ꦩꦸ​ꦧꦏꦭ꧀ꦠꦩ꧀ꦧꦃ​ꦩꦤ꧀ꦠꦼꦥ꧀꧈​ 4ꦏꦸꦮꦶ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦒꦺꦴꦭꦺꦏ꧀ꦏꦶ;ꦥꦼꦔꦤ꧀ꦢꦼꦭ꧀ꦩꦸ​ꦏꦸꦢꦸ​ꦩꦤ꧀ꦠꦼꦥ꧀ꦭꦤ꧀ꦩꦠꦼꦁ​ꦭꦤ꧀ꦲꦺꦴꦫ​ꦲꦺꦤꦺꦁꦏꦸꦫꦁꦔꦺꦲꦥꦲꦥ​꧉​ 5ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦫꦸꦩꦁꦱ​ꦏꦸꦫꦁ​ꦏꦮꦼꦫꦸꦃ꧈​ꦤ꧀ꦢꦼꦢꦺꦴꦔꦲ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​;ꦢꦺꦏ꧀ꦤꦺꦧꦏꦭ꧀ꦔꦼꦏꦺꦏ꧀ꦏꦶꦩꦫꦁ​ꦱꦥ​ꦮꦲꦺ​ꦠꦤ꧀ꦥ​ꦩꦲꦶꦢꦺꦴ​꧉​ 6ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤ꧀ꦢꦺꦴꦁꦔ꧈​ꦏꦺꦴꦮꦺ​ꦏꦸꦢꦸ​ꦥꦽꦕꦪ​ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦔꦼꦏꦺꦏ꧀ꦏꦶ꧉​ꦲꦗ​ꦩꦔꦸꦩꦔꦸ​꧉​ꦮꦺꦴꦁ​ꦱꦶꦁ​ꦩꦔꦸꦩꦔꦸ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦲꦺꦴꦩ꧀ꦧꦏ꧀ꦏꦺ​ꦭꦫꦏꦲꦺ​ꦱꦶꦁ​ꦫꦤꦫꦺꦤꦺ​ꦏꦼꦠꦼꦫꦏ꧀ꦲꦔꦶꦤ꧀꧈​ 7-8ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦗ​ꦚ꧀ꦗꦒꦏ꧀ꦏꦏꦺꦤꦺꦏ꧀ꦧꦏꦭ꧀ꦤꦩ꧀ꦥ​ꦲꦥꦲꦥ​ꦱꦁꦏꦒꦸꦱ꧀ꦠꦶ​꧈​ꦲꦮꦶꦠ꧀ꦲꦠꦶꦤꦺ​ꦩꦁꦒꦩꦫꦭꦤ꧀ꦲꦺꦴꦫ​ꦩꦤ꧀ꦠꦼꦥ꧀ꦏꦼꦏꦉꦥ꧀ꦥꦤ꧀ꦤꦺ​ꦲꦶꦁ​ꦠꦶꦤ꧀ꦢꦏ꧀ꦲꦥ​ꦮꦲꦺ​꧉​

꧋ꦱꦶꦁ​ꦩ꧀ꦭꦫꦠ꧀ꦭꦤ꧀ꦱꦶꦁ​ꦱꦸꦒꦶꦃ​꧉​

9꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦭꦤ꧀ꦢꦢꦶ​ꦮꦺꦴꦁ​ꦕꦶꦭꦶꦏ꧀ꦲꦶꦁ​ꦢꦺꦴꦚ​ꦏꦺꦤꦺ​꧈​ꦥꦢ​ꦧꦸꦔꦃꦲ​!ꦲꦶꦁ​ꦩꦿꦶꦥꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦮꦺꦴꦁ​ꦒꦼꦢꦺ꧉​ 10-11ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦱꦸꦒꦶꦃ​꧈​ꦥꦢ​ꦧꦸꦔꦃꦲ​ꦤꦺꦏ꧀ꦢꦶꦢꦢꦺꦏ꧀ꦏꦏꦺꦮꦺꦴꦁ​ꦕꦶꦭꦶꦏ꧀ꦲꦶꦁ​ꦢꦺꦴꦚ​ꦏꦺꦤꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦮꦺꦴꦁ​ꦱꦸꦒꦶꦃ​ꦪ​ꦧꦏꦭ꧀ꦩꦠꦶ​ꦲꦸꦒ​꧉​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦏꦼꦩ꧀ꦧꦁꦔꦺ​ꦱꦸꦏꦼꦠ꧀ꦏꦲꦺ​:ꦤꦺꦏ꧀ꦱꦽꦔꦺꦔꦺ​ꦱꦼꦩ꧀ꦭꦺꦴꦫꦺꦴꦠ꧀ꦭꦤ꧀ꦥꦤꦱ꧀ꦱꦺ​ꦠꦼꦏ​꧈​ꦱꦸꦏꦼꦠ꧀ꦠꦺ​ꦠꦼꦫꦸꦱ꧀ꦲꦭꦸꦩ꧀ꦭꦤ꧀ꦏꦼꦩ꧀ꦧꦁꦔꦺ​ꦠꦼꦫꦸꦱ꧀ꦒꦺꦴꦒꦿꦺꦴꦏ꧀ ꦲꦶꦭꦁ​ꦲꦥꦶꦏ꧀ꦏꦺ​꧉​ꦏꦪ​ꦔꦺꦴꦤꦺꦴ​ꦏꦸꦮꦶ​ꦊꦭꦏꦺꦴꦤꦺ​ꦮꦺꦴꦁ​ꦱꦸꦒꦶꦃ​:ꦲꦶꦁ​ꦱꦏ꧀ꦗꦼꦫꦺꦴꦤꦺꦩꦼꦩ꧀ꦥꦼꦁ​ꦔꦸꦤ꧀ꦢꦏ꧀ꦏꦏꦺꦏꦱꦸꦒꦶꦃꦲꦤ꧀ꦤꦺ​ꦢꦺꦏ꧀ꦤꦺꦧꦏꦭ꧀ꦩꦠꦶ​꧉​

꧋ꦧꦧ꧀ꦥꦁꦒꦺꦴꦢ꧉​

12꧋ꦧꦼꦗꦱꦼꦢꦸꦭꦸꦂ​ꦱꦶꦁ​ꦩꦤ꧀ꦠꦼꦥ꧀ꦥꦼꦔꦤ꧀ꦢꦼꦭ꧀ꦭꦺ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦁꦒꦺꦴꦢ꧉​ꦲꦩ꧀ꦧꦺꦱꦸꦏ꧀ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦩ꧀ꦥ​ꦲꦸꦥꦃꦲꦺ;ꦏꦸꦮꦶ​ꦠꦤ꧀ꦢꦏꦩꦼꦤꦁꦔꦤ꧀ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺ꧉​ꦠꦤ꧀ꦢꦏꦩꦼꦤꦁꦔꦤ꧀ꦏꦸꦮꦶ​ꦲꦸꦫꦶꦥ꧀ꦭꦁꦒꦼꦁ​꧉​ 13ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦏꦼꦤꦺꦁꦥꦁꦒꦺꦴꦢ꧈​ꦱꦼꦢꦸꦭꦸꦂ​ꦏꦸꦮꦶ​ꦲꦺꦴꦫ​ꦏꦼꦤꦺꦁꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦺꦴꦢꦢꦺꦏ꧀ꦤꦺ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏꦼꦤꦺꦁꦢꦶꦒꦺꦴꦢꦏꦫꦺꦴ​ꦲꦭ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦪ​ꦲꦺꦴꦫ​ꦩꦫꦏ꧀ꦏꦏꦺꦮꦺꦴꦁ​ꦢꦶꦒꦺꦴꦢꦏꦫꦺꦴ​ꦲꦭ​꧉​ 14ꦤꦁꦔꦶꦁ​ꦥꦼꦥꦺꦔꦶꦤ꧀ꦩꦸꦢꦺꦮꦺꦱꦶꦁ​ꦲꦭ​ꦏꦸꦮꦶ​꧈​ꦏꦸꦮꦶ​ꦱꦶꦁ​ꦤꦫꦶꦏ꧀ꦏꦺꦴꦮꦺ​ꦲꦶꦁ​ꦥꦁꦒꦺꦴꦢ꧉​ 15ꦪ​ꦥꦼꦥꦺꦔꦶꦤ꧀ꦩꦸꦱꦶꦁ​ꦲꦭ​ꦏꦸꦮꦶ​ꦤꦺꦏ꧀ꦢꦶꦠꦸꦫꦸꦠ꧀ꦠꦶ​ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦢꦺꦴꦱ​ꦏꦸꦮꦶ​ꦤꦺꦏ꧀ꦢꦶꦠꦼꦫꦸꦱ꧀ꦱꦏꦺꦔꦼꦏꦏ꧀ꦏꦺꦥꦠꦶ​꧉​

16꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗ​ꦱꦩ꧀ꦥꦺꦏ꧀ꦥꦢ​ꦏ꧀ꦭꦺꦫꦸ​ꦔꦺꦴꦤꦺꦴ​꧈​ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦼꦏꦏ꧀ꦏꦏꦺꦥꦁꦒꦺꦴꦢ꧉​ 17ꦤꦩꦸꦁ​ꦱꦼꦩ꧀ꦧꦫꦁ​ꦱꦶꦁ​ꦲꦥꦶꦏ꧀ꦭꦤ꧀ꦱꦶꦁ​ꦱꦩ꧀ꦥꦸꦂꦤ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​꧉​ꦢꦺꦏ꧀ꦤꦺꦱꦶꦁ​ꦔ꧀ꦒꦮꦺ​ꦱꦏ꧀ꦲꦺꦤꦺꦁꦔꦺꦥꦼꦥꦢꦁꦤꦁꦭꦔꦶꦠ꧀ꦭꦤ꧀ꦢꦺꦏ꧀ꦤꦺꦥꦢꦁꦱꦏ꧀ꦏꦧꦺꦃꦲꦺ꧈​ꦲꦺꦴꦫ​ꦲꦺꦤꦺꦁꦥꦼꦠꦼꦁꦔꦺ​ꦧ꧀ꦭꦱ꧀꧈​ 18ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦲꦚꦂ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦠꦂꦫꦤ꧀ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦱꦶꦁ​ꦢꦶꦏꦧꦂꦫꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦏ꧀ꦤꦺ꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦏꦪ​ꦲꦤꦏ꧀ꦲꦤꦏ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦲꦶꦁ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦔꦿꦸꦔꦺꦴꦏ꧀ꦏꦏꦺꦭꦤ꧀​ꦔ꧀ꦭꦏꦺꦴꦤ꧀ꦤꦶ​꧉​

19꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦥꦢ​ꦔꦼꦂꦠꦶꦪ​!ꦱꦧꦼꦤ꧀ꦮꦺꦴꦁ​ꦏꦸꦢꦸ​ꦕꦼꦥꦼꦠ꧀ꦤꦺꦏ꧀ꦔꦿꦸꦔꦺꦴꦏ꧀ꦏꦏꦺ꧈​ꦤꦁꦔꦶꦁ​ꦲꦭꦺꦴꦤ꧀ꦲꦭꦺꦴꦤ꧀ꦤꦺꦏ꧀ꦲꦉꦥ꧀ꦔꦺꦴꦩꦺꦴꦁꦲꦥ​ꦤꦼꦱꦸ​꧉​ 20ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​?ꦲꦮꦶꦠ꧀ꦮꦺꦴꦁ​ꦱꦶꦁ​ꦒꦩ꧀ꦥꦁ​ꦤꦼꦱꦸ​ꦏꦸꦮꦶ​ꦲꦺꦴꦫ​ꦧꦶꦱ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 21ꦩꦸꦭꦤꦺ​꧈​ꦥꦫ​ꦱꦼꦢꦸꦭꦸꦂ​꧈​ꦱꦼꦩ꧀ꦧꦫꦁ​ꦲꦶꦁ​ꦲꦸꦫꦶꦥ꧀ꦩꦸ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦭꦤ꧀ꦱꦏ꧀ꦮꦼꦂꦤꦤꦺ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦧꦸꦮꦁꦔꦼꦤ꧀ꦏꦧꦺꦃ​꧉​ꦱꦲꦶꦏꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧈​ꦱꦶꦁ​ꦮꦶꦱ꧀ꦢꦶꦢꦼꦢꦼꦂꦲꦶꦁ​ꦲꦠꦶꦩꦸ​꧈​ꦢꦶꦒꦠꦺꦏ꧀ꦏꦏꦺꦔꦁꦒꦺꦴ​ꦲꦤ꧀ꦢꦥ꧀ꦥꦱꦺꦴꦂ꧈​ꦲꦮꦶꦠ꧀ꦥꦶꦠꦸꦠꦸꦂ​ꦏꦸꦮꦶ​ꦱꦶꦁ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦚꦮꦩꦸ​ꦏꦧꦺꦃ​꧉​

22꧋ꦤꦁꦔꦶꦁ​ꦲꦗ​ꦤꦩꦸꦁ​ꦢꦶꦫꦸꦔꦺꦴꦏ꧀ꦏꦏꦺꦮꦲꦺ​꧈​ꦥꦶꦠꦸꦠꦸꦂ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦠꦼꦤꦤ꧀꧈​ꦤꦺꦏ꧀ꦏꦺꦴꦮꦺ​ꦤꦩꦸꦁ​ꦔꦿꦸꦔꦺꦴꦏ꧀ꦏꦏꦺ꧈​ꦠꦶꦧꦏꦺ​ꦏꦺꦴꦮꦺ​ꦔꦥꦸꦱ꧀ꦱꦶ​ꦲꦮꦏ꧀ꦩꦸ​ꦢꦺꦮꦺ꧉​ 23ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦤꦩꦸꦁ​ꦔꦿꦸꦔꦺꦴꦏ꧀ꦏꦏꦺ꧈​ꦤꦁꦔꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦏꦺꦴꦮꦺ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦱꦶꦁ​ꦔꦢꦼꦏ꧀ꦤꦁꦔꦉꦥ꧀ꦥꦼꦔꦶꦭꦺꦴꦤ꧀ꦏꦲꦺ​ꦭꦤ꧀ꦮꦼꦫꦸꦃ​ꦫꦸꦥꦤꦺ​ꦢꦺꦮꦺ꧉​ 24ꦤꦁꦔꦶꦁ​ꦤꦺꦏ꧀ꦮꦶꦱ꧀ꦭꦸꦔ​ꦱꦁꦏꦏꦺꦴꦤꦺꦴ​ꦮꦺꦴꦁꦔꦺ​ꦭꦭꦶ​ꦩꦼꦤꦺꦃ​ꦫꦸꦥꦤꦺ​ꦏꦪ​ꦔꦥ​꧉​ 25ꦤꦁꦔꦶꦁ​ꦱꦥ​ꦱꦶꦁ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦤ꧀ꦠꦶꦠꦼꦩꦼꦤ꧀ ꦠꦼꦒꦼꦱ꧀ꦱꦺ​ꦲꦺꦴꦫ​ꦤꦩꦸꦁ​ꦔꦿꦸꦔꦺꦴꦏ꧀ꦏꦏꦺꦮꦲꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁ​ꦏꦸꦮꦶ​ꦲꦶꦁ​ꦠꦤ꧀ꦢꦁꦒꦮꦺꦲꦥ​ꦮꦲꦺ​꧈​ꦲꦮꦶꦠ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦩ꧀ꦥꦸꦂꦤ​ꦭꦤ꧀​ꦔ꧀ꦭꦸꦮꦂꦫꦶ​ꦩꦤꦸꦁꦱ​ꦱꦁꦏꦲꦸꦫꦶꦥ꧀ꦱꦶꦁ​ꦲꦭ​꧉​

26꧋ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦫꦸꦩꦁꦱ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦤꦤ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦭꦃ​ꦏꦫꦺꦴ​ꦲꦶꦭꦠ꧀ꦠꦺ​꧈​ꦱꦼꦢꦸꦭꦸꦂ​ꦏꦸꦮꦶ​ꦔꦥꦸꦱ꧀ꦱꦶ​ꦲꦮꦏ꧀ꦏꦺ​ꦢꦺꦏ꧀ꦤꦺꦢꦺꦮꦺꦭꦤ꧀ꦲꦼꦁꦒꦺꦴꦤꦺ​ꦤꦸꦫꦸꦠ꧀ꦒꦸꦱ꧀ꦠꦶ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​꧉​ 27ꦭꦃ​ꦱꦼꦢꦸꦭꦸꦂ​ꦱꦶꦁ​ꦢꦶꦲꦫꦤ꧀ꦤꦶ​ꦤꦸꦫꦸꦠ꧀ꦒꦸꦱ꧀ꦠꦶ​ꦱꦶꦁ​ꦠꦼꦩꦼꦤ꧀ꦤꦤ꧀ꦭꦤ꧀ꦱꦶꦁ​ꦢꦶꦲꦁꦒꦼꦥ꧀ꦠꦸꦱ꧀ꦥꦼꦔꦤ꧀ꦢꦼꦭ꧀ꦭꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦏꦸꦮꦶ​ꦱꦼꦢꦸꦭꦸꦂ​ꦱꦶꦁ​ꦏꦪ​ꦔꦥ​?ꦪꦏꦸꦮꦶ​ꦱꦼꦢꦸꦭꦸꦂ​ꦱꦶꦁ​ꦤꦸꦭꦸꦁꦔꦶ​ꦧꦺꦴꦕꦃ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦮꦺꦴꦁ​ꦠꦸꦮ​ꦭꦤ꧀ꦲꦸꦒ​ꦱꦼꦢꦸꦭꦸꦂ​ꦱꦶꦁ​ꦤꦸꦭꦸꦁꦔꦶ​ꦫꦤ꧀ꦢꦫꦤ꧀ꦢꦲꦶꦁ​ꦏꦔꦺꦭ꧀ꦭꦤ꧀ꦤꦺ​꧉​ꦱꦼꦢꦸꦭꦸꦂ​ꦱꦶꦁ​ꦢꦶꦲꦫꦤ꧀ꦤꦶ​ꦠꦸꦱ꧀ꦥꦼꦔꦤ꧀ꦢꦼꦭ꧀ꦭꦺ​ꦏꦸꦮꦶ​ꦱꦼꦢꦸꦭꦸꦂ​ꦱꦶꦁ​ꦔꦠꦶꦲꦠꦶ​ꦲꦸꦫꦶꦥ꧀ꦥꦺ꧈​ꦱꦸꦥꦪ​ꦲꦺꦴꦫ​ꦏꦼꦤꦺꦁꦉꦒꦼꦠ꧀ꦠꦺꦢꦺꦴꦚ​꧉​

↑ ↑ ↑


꧋ꦲꦗ​ꦥꦶꦭꦶꦃꦱꦶꦃ꧉​

꧇​꧒꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦢꦶꦲꦗꦺꦤ꧀ꦤꦶ​ꦧꦔꦼꦠ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦲꦗ​ꦥꦢ​ꦥꦶꦭꦶꦃꦱꦶꦃꦭꦤ꧀​ꦩ꧀ꦧꦺꦢꦏ꧀​ꦩ꧀ꦧꦺꦢꦏ꧀ꦏꦏꦺꦩꦤꦸꦁꦱ​꧈​ꦩꦤꦸꦠ꧀ꦏꦺꦠꦺꦴꦏ꧀ꦏꦺ​ꦚ꧀ꦗꦧꦤꦺ​꧉​ 2ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​꧈​ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦮꦺꦴꦁ​ꦩ꧀ꦊꦧꦸ​ꦤꦁꦏꦸꦩ꧀ꦥꦸꦭ꧀ꦭꦤ꧀ꦩꦸ​ꦔꦁꦒꦺꦴ​ꦲꦭꦶꦲꦭꦶ​ꦲꦼꦩꦱ꧀ꦭꦤ꧀ꦱꦭꦶꦤ꧀ꦱꦶꦁ​ꦭꦫꦁ​꧈​ꦠꦼꦫꦸꦱ꧀ꦧꦉꦁ​ꦏꦫꦺꦴ​ꦮꦺꦴꦁ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦭꦶꦪꦤꦺ​ꦩꦺꦭꦸ​ꦩ꧀ꦊꦧꦸ​꧈​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧈​ꦱꦶꦁ​ꦔꦁꦒꦺꦴ​ꦱꦭꦶꦤ꧀ꦲꦺꦭꦺꦏ꧀꧈​ 3ꦭꦃ​ꦏꦺꦴꦮꦺ​ꦠꦼꦫꦸꦱ꧀ꦩꦫꦤꦶ​ꦮꦺꦴꦁ​ꦱꦶꦁ​ꦔꦁꦒꦺꦴ​ꦱꦭꦶꦤ꧀ꦱꦶꦁ​ꦭꦫꦁ​ꦲꦩ꧀ꦧꦺꦴꦏ꧀ꦒꦺꦴꦭꦺꦏ꧀ꦏꦏꦺꦗꦒꦺꦴꦁꦔꦤ꧀ꦱꦶꦁ​ꦲꦥꦶꦏ꧀꧈​ꦤꦁꦔꦶꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦩꦭꦃ​ꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦔꦢꦼꦏ꧀ꦲꦥ​ꦚ꧀ꦗꦒꦺꦴꦁꦤꦁꦗꦺꦴꦒꦤ꧀꧈​ 4ꦭꦃ​ꦠꦶꦧꦏꦺ​ꦏꦺꦴꦮꦺ​ꦥꦶꦭꦶꦃꦱꦶꦃꦩꦫꦁ​ꦱꦏ꧀ꦥꦢꦥꦢꦭꦤ꧀ꦱꦶꦁ​ꦤꦩ꧀ꦥ​ꦮꦺꦴꦁ​ꦲꦺꦴꦫ​ꦔꦁꦒꦺꦴ​ꦥꦶꦏꦶꦂꦫꦤ꧀ꦱꦶꦁ​ꦧꦼꦤꦼꦂ​꧉​

5꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦶꦏꦶ​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀!ꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦁꦒꦼꦥ꧀ꦲꦺꦴꦫ​ꦤ꧀ꦢꦸꦮꦺꦲꦶꦁ​ꦢꦺꦴꦚ​ꦏꦺꦤꦺ​ꦩꦭꦃ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦥꦢ​ꦱꦸꦒꦶꦃ​ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦩꦫꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺ꧉​ 6ꦤꦁꦔꦶꦁ​ꦏꦺꦴꦮꦺ​ꦩꦭꦃ​ꦥꦢ​ꦚꦼꦥꦺꦭꦺꦏ꧀ꦏꦏꦺꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧉​ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦢꦺꦮꦺꦠ​!ꦱꦥ​ꦱꦶꦁ​ꦩꦼꦉꦱ꧀ꦏꦺꦴꦮꦺ​ꦭꦤ꧀ꦱꦥ​ꦱꦶꦁ​ꦔꦺꦫꦺꦠ꧀ꦠꦺꦫꦺꦠ꧀ꦏꦺꦴꦮꦺ​ꦤꦁꦏꦿꦸꦠꦺꦴꦤ꧀?ꦲꦥ​ꦢꦸꦢꦸ​ꦮꦺꦴꦁ​ꦱꦶꦁ​ꦱꦸꦒꦶꦃ​? 7ꦲꦥ​ꦢꦸꦢꦸ​ꦮꦺꦴꦁꦮꦺꦴꦁ​ꦲꦶꦏꦶ​ꦱꦶꦁ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦗꦼꦤꦼꦁꦔꦺ​ꦒꦸꦱ꧀ꦠꦶ​ꦱꦶꦁ​ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

8꧋ꦥꦚ꧀ꦕꦺꦤ꧀ꦏꦺꦴꦮꦺ​ꦧꦼꦤꦼꦂ​ꦤꦺꦏ꧀ꦏꦺꦴꦮꦺ​ꦤꦼꦠꦼꦥ꧀ꦥꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦸꦭꦁꦔꦶꦤꦺꦏ꧀ꦏꦺꦴꦮꦺ​ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦠꦸꦁꦒꦭ꧀ꦩꦤꦸꦁꦱ​ꦏꦪ​ꦲꦼꦁꦒꦺꦴꦤ꧀ꦩꦸ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦩꦸ​ꦢꦺꦮꦺ꧉​ 9ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦥꦶꦭꦶꦃꦱꦶꦃꦔꦺꦴꦤꦺꦴ​꧈​ꦠꦶꦧꦏꦺ​ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦩꦶꦠꦸꦫꦸꦠ꧀ꦏꦶꦠꦧ꧀ꦏꦺꦴꦮꦺ​ꦥꦢ​ꦮꦲꦺ​ꦮꦺꦴꦁ​ꦱꦶꦁ​ꦤꦼꦫꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ 10ꦲꦮꦶꦠ꧀ ꦱꦼꦤꦗꦤ꧀ꦏꦺꦴꦮꦺ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧈​ꦤꦁꦔꦶꦁ​ꦤꦼꦫꦏ꧀ꦤꦩꦸꦁ​ꦱꦶꦗꦶ​ꦮꦲꦺ​꧈​ꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦤꦺꦏ꧀ꦏꦺꦴꦮꦺ​ꦤꦼꦫꦏ꧀ꦏꦧꦺꦃ​꧉​ 11ꦱꦶꦁ​ꦔꦺꦴꦩꦺꦴꦁ:“ꦏꦺꦴꦮꦺ​ꦲꦗ​ꦭꦏꦸ​ꦧꦺꦢꦁ”ꦏꦸꦮꦶ​ꦭꦲꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠ​?ꦭꦤ꧀ꦪ​ꦠꦸꦁꦒꦭ꧀ꦭꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦠ​ꦱꦶꦁ​ꦲꦸꦒ​ꦔꦺꦴꦩꦺꦴꦁ:“ꦲꦗ​ꦩꦼꦩꦠꦺꦤ꧀ꦤꦶ​!”ꦢꦢꦶꦤꦺ​ꦱꦼꦤꦗꦤ꧀ꦏꦺꦴꦮꦺ​ꦲꦺꦴꦫ​ꦭꦏꦸ​ꦧꦺꦢꦁ꧈​ꦤꦁꦔꦶꦁ​ꦏꦺꦴꦮꦺ​ꦩꦼꦩꦠꦺꦤ꧀ꦤꦶ​꧈​ꦠꦶꦧꦏꦺ​ꦏꦺꦴꦮꦺ​ꦪ​ ꦤꦼꦫꦏ꧀ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ 12ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦠꦼꦩ꧀ꦧꦸꦁꦩꦸ​ꦭꦤ꧀ꦠꦶꦤ꧀ꦢꦏ꧀ꦩꦸ​ꦱꦶꦁ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀;ꦏꦸꦮꦶ​ꦮꦺꦠ꧀ꦱꦶꦁ​ꦧꦶꦱ​ꦔ꧀ꦭꦸꦮꦂꦫꦶ​ꦩꦤꦸꦁꦱ​ꦭꦤ꧀ꦏꦺꦴꦮꦺ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦢꦶꦏꦿꦸꦠꦸꦔꦁꦒꦺꦴ​ꦮꦺꦠ꧀ꦏꦸꦮꦶ​꧉​ 13ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦤ꧀ꦢꦸꦮꦺꦩꦼꦭꦱ꧀​ꦧ꧀ꦭꦱ꧀ꦏꦫꦺꦴ​ꦮꦺꦴꦁ​ꦭꦶꦪꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦧꦏꦭ꧀​ꦤ꧀ꦢꦸꦮꦺꦩꦼꦭꦱ꧀ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦩꦼꦭꦱ꧀ꦩꦫꦁ​ꦭꦶꦪꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦩꦼꦭꦱ꧀ꦩꦫꦁ​ꦏꦺꦴꦮꦺ​ꦭꦤ꧀ꦲꦺꦴꦫ​ꦧꦏꦭ꧀ꦚꦼꦠꦿꦥ꧀ꦏꦺꦴꦮꦺ​꧉​

꧋ꦥꦽꦕꦪ​ꦱꦶꦁ​ꦚꦠ​꧉​

14꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦒꦸꦤꦤꦺ​ꦮꦺꦴꦁ​ꦔꦺꦴꦩꦺꦴꦁꦤꦺꦏ꧀ꦥꦽꦕꦪ​꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺ꧈​ꦲꦮꦶꦠ꧀ꦲꦺꦴꦫ​ꦢꦶꦭꦏꦺꦴꦤ꧀ꦤꦶ​꧉​ꦲꦥ​ꦥꦽꦕꦪꦤꦺ​ꦮꦺꦴꦁꦔꦺ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦲꦸꦫꦶꦥ꧀ꦥꦺ?ꦩꦼꦱ꧀ꦠꦶꦲꦺꦴꦫ​꧉​ 15ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​꧈​ꦲꦺꦤꦺꦁꦱꦼꦢꦸꦭꦸꦂ​ꦭꦤꦁ​ꦲꦥ​ꦮꦺꦢꦺꦴꦏ꧀ꦧꦸꦠꦸꦃ​ꦱꦤ꧀ꦢꦁꦭꦤ꧀ꦥꦔꦤ꧀꧈​ 16ꦭꦃ​ꦏꦺꦴꦮꦺ​ꦤꦩꦸꦁ​ꦔꦺꦴꦩꦺꦴꦁꦏꦫꦺꦴ​ꦮꦺꦴꦁꦔꦺ​:“ꦩ꧀ꦭꦏꦸ​ꦱꦶꦁ​ꦲꦥꦶꦏ꧀ꦲꦥꦶꦏ꧀꧈​ꦩꦸꦒꦩꦸꦒ​ꦱꦩ꧀ꦥꦺꦱꦤ꧀ꦢꦁꦭꦤ꧀ꦥꦔꦤ꧀ꦩꦸ​꧈​”ꦤꦁꦔꦶꦁ​ꦮꦺꦴꦁꦔꦺ​ꦲꦺꦴꦫ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦲꦥ​ꦧꦸꦠꦸꦃꦲꦺ​꧉​ꦠꦶꦧꦏꦺ​ꦲꦺꦴꦩꦺꦴꦁꦩꦸꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺ꧉​ 17ꦩꦼꦁꦏꦺꦴꦤꦺꦴ​ꦲꦸꦒ​ꦥꦽꦕꦪ​꧈​ꦤꦺꦏ꧀ꦲꦺꦴꦫ​ꦏꦺꦠꦺꦴꦏ꧀ꦮꦸꦗꦸꦠ꧀ꦠꦺ꧈​ꦥꦽꦕꦪ​ꦏꦸꦮꦶ​ꦩꦠꦶ​꧈​ꦲꦺꦴꦫ​ꦏꦁꦒꦺꦴ​ꦒꦮꦺ​꧉​

18꧋ꦤꦁꦔꦶꦁꦩꦼꦤꦮꦮꦲꦺꦠꦼꦫꦸꦱ꧀ꦲꦺꦤꦺꦁꦱꦼꦢꦸꦭꦸꦂꦱꦶꦁꦔꦺꦴꦩꦺꦴꦁ:“ꦲꦃ꧈​ꦲꦶꦏꦸꦪꦒꦫꦺꦏ꧀ꦮꦺꦴꦁꦔꦺ!ꦲꦺꦤꦺꦁꦱꦶꦁꦤꦩꦸꦁꦚ꧀ꦗꦒꦏ꧀ꦏꦏꦺꦥꦽꦕꦪꦤꦺꦭꦤ꧀ꦲꦺꦤꦺꦁꦱꦶꦁꦤꦩꦸꦁꦚ꧀ꦗꦒꦏ꧀ꦏꦏꦺꦥꦼꦁꦒꦮꦺꦤꦺ꧉”ꦱꦲꦸꦂꦫꦤ꧀ꦏꦸꦩꦫꦁꦮꦺꦴꦁꦱꦶꦁꦤ꧀ꦢꦸꦮꦺꦤ꧀ꦤꦶꦲꦺꦴꦩꦺꦴꦁꦏꦪꦔꦺꦴꦤꦺꦴꦏꦸꦮꦶꦔꦺꦤꦺ:“ꦲꦏꦸꦏꦼꦥꦺꦔꦶꦤ꧀ꦔꦼꦂꦠꦶꦏꦼꦥꦿꦶꦪꦺꦲꦼꦁꦒꦺꦴꦤ꧀ꦩꦸꦲꦉꦥ꧀​ꦤ꧀ꦢꦸꦢꦸꦃꦲꦏꦺꦥꦽꦕꦪꦩꦸꦠꦤ꧀ꦥꦏꦺꦠꦺꦴꦏ꧀ꦥꦼꦁꦒꦮꦺꦤꦺ꧉​ꦭꦤ꧀ꦲꦏꦸꦧꦏꦭ꧀​ꦤ꧀ꦢꦸꦢꦸꦃꦲꦏꦺꦥꦽꦕꦪꦏꦸꦱꦁꦏꦥꦼꦁꦒꦮꦺꦏꦸ꧉​” 19ꦏꦺꦴꦮꦺ​ꦩꦼꦱ꧀ꦠꦶꦥꦽꦕꦪ​ꦠ​ꦤꦺꦏ꧀ꦤꦩꦸꦁ​ꦲꦺꦤꦺꦁꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦗꦶ​?ꦏꦸꦮꦶ​ꦧꦼꦤꦼꦂ​!ꦤꦁꦔꦶꦁ​ꦱꦺꦠꦤ꧀ꦱꦺꦠꦤ꧀ꦲꦸꦒ​ꦥꦽꦕꦪ​ꦏꦸꦮꦶ​꧉​ꦩꦭꦃ​ꦥꦢ​ꦤ꧀ꦢꦽꦢꦼꦏ꧀ꦱꦁꦏꦶꦁꦮꦼꦢꦶꦤꦺ​꧉​ 20ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦮꦶ​ꦗꦤ꧀​ꦏ꧀ꦭꦺꦫꦸ​ꦠꦼꦤꦤ꧀꧈​ꦩꦺꦴꦱꦺꦴꦏ꧀ꦏꦺꦴꦮꦺ​ꦢꦸꦫꦸꦁ​ꦧꦶꦱ​ꦢꦸꦤꦸꦁꦤꦺꦏ꧀ꦥꦽꦕꦪ​ꦱꦶꦁ​ꦲꦺꦴꦫ​ꦢꦶꦒꦤ꧀ꦢꦺꦁꦔꦶꦏꦫꦺꦴ​ꦥꦼꦁꦒꦮꦺ​ꦏꦸꦮꦶ​ꦥꦽꦕꦪ​ꦱꦶꦁ​ꦩꦠꦶ​꧉​ 21ꦢꦶꦥꦶꦏꦶꦂ​ꦧꦥ​ꦄꦨꦿꦲꦩ꧀ ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀꧈​ꦢꦺꦏ꧀ꦤꦺꦧꦶꦱꦤꦺ​ꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦥ​ꦲꦺꦴꦫ​ꦗꦭꦂꦫꦤ꧀ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦢꦺꦏ꧀ꦤꦺ꧉​ꦲꦮꦶꦠ꧀ꦢꦺꦏ꧀ꦤꦺꦩꦤꦸꦠ꧀ꦠꦼꦫꦸꦱ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦤꦗꦤ꧀ꦏꦸꦢꦸ​ꦩꦱꦿꦃꦲꦏꦺꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀ ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦲꦭ꧀ꦠꦂ꧉​ 22ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦥꦽꦕꦪ​ꦏꦸꦮꦶ​ꦏꦸꦢꦸ​ꦢꦶꦧꦉꦁꦔꦶ​ꦏꦫꦺꦴ​ꦥꦼꦁꦒꦮꦺ​꧈​ꦠꦼꦒꦼꦱ꧀ꦱꦺ​꧈​ꦥꦽꦕꦪꦤꦺ​ꦧꦶꦱꦤꦺ​ꦏꦺꦠꦺꦴꦏ꧀ꦮꦸꦗꦸꦠ꧀ꦠꦺꦱꦁꦏꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺ꧉​ 23ꦢꦢꦶꦤꦺ​ꦪ​ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦱꦁꦏꦥꦽꦕꦪ​ꦏꦸꦮꦶ​ꦢꦺꦏ꧀ꦤꦺꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉”ꦩꦸꦭꦤꦺ​ꦢꦺꦏ꧀ꦤꦺꦪ​ꦢꦶꦲꦫꦤ꧀ꦤꦶ​“ꦏꦚ꧀ꦕꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” 24ꦭꦤ꧀ꦱꦲꦶꦏꦶ​ꦪ​ꦮꦶꦱ꧀ꦕꦼꦠ​ꦧꦔꦼꦠ꧀ꦤꦺꦏ꧀ꦩꦤꦸꦁꦱ​ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤꦩꦸꦁ​ꦗꦭꦂꦫꦤ꧀ꦱꦁꦏꦥꦽꦕꦪꦤꦺ​ꦮꦲꦺ​꧈​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦥꦽꦕꦪꦤꦺ​ꦭꦤ꧀ꦥꦼꦁꦒꦮꦺꦤꦺ​꧉​

25꧋ꦏꦪꦢꦺꦤꦺꦭꦺꦴꦤ꧀ꦠꦺꦫꦲꦧ꧀ ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​꧉​ꦢꦺꦏ꧀ꦤꦺꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦱꦁꦏꦥꦼꦁꦒꦮꦺꦤꦺ​꧈​ꦲꦮꦶꦠ꧀ꦫꦲꦧ꧀​ꦤ꧀ꦢꦼꦭꦶꦏ꧀ꦏꦏꦺꦮꦺꦴꦁꦮꦺꦴꦁ​ꦙꦸꦱꦶꦁ​ꦢꦶꦏꦺꦴꦁꦏꦺꦴꦤ꧀ꦔꦶꦤ꧀ꦢꦶꦏ꧀꧈​ꦱꦏ꧀ꦮꦶꦱ꧀ꦱꦺ​ꦢꦶꦢꦼꦭꦶꦏ꧀ꦏꦏꦺꦤꦁꦲꦺꦴꦩꦃꦲꦺ​ꦠꦼꦫꦸꦱ꧀ꦢꦶꦲꦼꦠꦺꦴꦏ꧀ꦏꦏꦺꦩꦼꦠꦸ​ꦢꦭꦤ꧀ꦭꦶꦪ​꧉​

26꧋ꦏꦪꦢꦺꦤꦺꦲꦮꦏ꧀ꦤꦺꦏ꧀ꦮꦶꦱ꧀ꦲꦺꦴꦫ​ꦲꦺꦤꦺꦁꦲꦩ꧀ꦧꦼꦏ꧀ꦏꦤ꧀ꦤꦺ​ꦩꦼꦱ꧀ꦠꦶꦩꦠꦶ​꧈​ꦩꦼꦁꦏꦺꦴꦤꦺꦴ​ꦲꦸꦒ​ꦥꦽꦕꦪ​꧈​ꦤꦺꦏ꧀ꦲꦺꦴꦫ​ꦲꦺꦤꦺꦁꦥꦼꦁꦒꦮꦺꦤꦺ​ꦪ​ꦩꦠꦶ​꧉​

↑ ↑ ↑


꧋ꦲꦶꦭꦠ꧀ꦠꦺ​ꦩꦤꦸꦁꦱ​꧉​

꧇​꧓꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦤꦁꦠꦼꦔꦃꦩꦸ​ꦲꦗ​ꦱꦼꦢꦸꦭꦸꦂ​ꦲꦺꦴꦏꦺꦃꦲꦺꦴꦏꦺꦃꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦒꦸꦫꦸ​꧈​ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦢꦢꦶ​ꦒꦸꦫꦸ​ꦭꦸꦮꦶꦃ​ꦭꦤꦁꦠꦼꦤꦶꦩ꧀ꦧꦁꦮꦺꦴꦁꦮꦺꦴꦁ​ꦭꦶꦪꦤꦺ​꧉​ 2ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦏꦼꦉꦥ꧀​ꦔ꧀ꦒꦮꦺ​ꦏ꧀ꦭꦺꦫꦸ​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦲꦮꦏ꧀ꦏꦺ​ꦢꦺꦮꦺ꧉​ꦮꦺꦴꦁ​ꦱꦶꦁ​ꦲꦺꦴꦫ​ꦠꦲꦸ​ꦔ꧀ꦒꦮꦺ​ꦏ꧀ꦭꦺꦫꦸ​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦏꦸꦮꦶ​ꦗꦤ꧀ꦮꦺꦴꦁ​ꦱꦶꦁ​ꦱꦩ꧀ꦥꦸꦂꦤ​ꦠꦼꦤꦤ꧀꧈​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦧꦶꦱ​ꦤꦠ​ꦏꦉꦥ꧀ꦥꦺ​ꦲꦮꦏ꧀ꦏꦺ​꧉​ 3ꦲꦏꦸ​ꦲꦉꦥ꧀​ꦔ꧀ꦒꦩ꧀ꦧꦂꦫꦏꦺꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​꧉​ꦢꦼꦭꦺꦴꦏ꧀ꦏꦼꦤ꧀ꦗꦫꦤ꧀ꦏꦲꦺ​:ꦤꦺꦏ꧀ꦮꦶꦱ꧀ꦢꦶꦥꦱꦁ​ꦏꦼꦤ꧀ꦢꦭ꧀ꦭꦶꦕꦁꦏꦼꦩ꧀ꦩꦺ​꧈​ꦗꦫꦤ꧀ꦤꦺ​ꦩꦤꦸꦠ꧀ꦏꦉꦥ꧀ꦥꦺ​ꦲꦮꦏ꧀ꦏꦺ​ꦢꦺꦮꦺ꧉​ 4ꦏꦥꦭ꧀ꦏꦲꦺ​ꦪ​ꦔꦺꦴꦤꦺꦴ​:ꦱꦼꦤꦗꦤ꧀ꦒꦼꦢꦺꦧꦔꦼꦠ꧀ꦭꦤ꧀ꦢꦶꦱꦸꦫꦸꦁ​ꦲꦔꦶꦤ꧀ꦧꦤ꧀ꦠꦼꦂ​꧈​ꦤꦁꦔꦶꦁ​ꦱꦶꦁ​ ꦔꦺꦁꦒꦏ꧀ꦔꦺꦁꦒꦺꦴꦏ꧀ꦏꦏꦺꦏꦥꦭ꧀ꦭꦺ​ꦤꦩꦸꦁ​ꦏꦼꦩꦸꦢꦶꦤꦺꦱꦶꦁ​ꦕꦶꦭꦶꦏ꧀ꦧꦔꦼꦠ꧀ ꦩꦤꦸꦠ꧀ꦏꦉꦥ꧀ꦥꦺ​ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺ꧉​ 5ꦥꦫ​ꦱꦼꦢꦸꦭꦸꦂ​꧈​ꦲꦶꦭꦠ꧀ꦠꦺ​ꦩꦤꦸꦁꦱ​ꦪ​ꦏꦪ​ꦔꦺꦴꦤꦺꦴ​:ꦱꦼꦤꦗꦤ꧀ꦕꦶꦭꦶꦏ꧀ ꦤꦁꦔꦶꦁ​ꦧꦶꦱ​ꦔꦼꦠꦺꦴꦏ꧀ꦏꦏꦺꦉꦩ꧀ꦧꦸꦏ꧀ꦏꦤ꧀ꦱꦶꦁ​ꦒꦼꦢꦺꦒꦼꦢꦺ꧉​

꧋ꦢꦶꦥꦶꦏꦶꦂ​ꦠ​꧈​ꦒꦼꦤꦶ​ꦱꦏ꧀ꦲꦶꦭꦠ꧀ꦮꦲꦺ​ꦧꦶꦱ​ꦔꦺꦴꦧꦺꦴꦁ​ꦲꦭꦱ꧀ꦒꦼꦢꦺ꧉​ 6ꦲꦶꦭꦠ꧀ꦠꦺ​ꦩꦤꦸꦁꦱ​ꦏꦸꦮꦶ​ꦪ​ꦏꦪ​ꦒꦼꦤꦶ​꧈​ꦱꦼꦤꦗꦤ꧀ꦕꦶꦭꦶꦏ꧀ꦧꦶꦱ​ꦤꦼꦏꦏ꧀ꦏꦏꦺꦏꦫꦸꦱꦏ꧀ꦏꦤ꧀ꦒꦼꦢꦺ꧉​ꦲꦶꦭꦠ꧀ꦏꦸꦮꦶ​ꦮꦶꦮꦶꦠ꧀ꦠꦤ꧀ꦤꦺ​ꦱꦏ꧀ꦮꦼꦂꦤꦤꦺ​ꦲꦭ​꧉​ꦭꦤ꧀ꦗꦭꦂꦫꦤ꧀ꦲꦶꦭꦠ꧀ꦏꦸꦮꦶ​ꦤꦁꦲꦮꦏ꧀ ꦩꦸꦭꦤꦺ​ꦱꦏ꧀ꦲꦮꦏ꧀ꦏꦧꦺꦃ​ꦧꦶꦱ​ꦏꦼꦠꦸꦭꦂꦫꦤ꧀ ꦩꦫꦏ꧀ꦏꦏꦺꦮꦺꦴꦁꦔꦺ​ꦲꦸꦒ​ꦢꦢꦶ​ꦲꦭ​ꦭꦤ꧀ꦱꦁꦱꦫ​ꦱ꧀ꦭꦮꦱ꧀ꦱꦺꦲꦸꦫꦶꦥ꧀ ꦲꦮꦶꦠ꧀ꦲꦶꦭꦠ꧀ꦏꦸꦮꦶ​ꦢꦶꦲꦺꦴꦧꦺꦴꦁꦔꦺꦴꦧꦺꦴꦁꦔꦶꦱꦁꦏꦤꦼꦫꦏ꧉​ 7ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦩꦤꦸꦁꦱ​ꦮꦶꦱ꧀ꦧꦶꦱ​ꦤꦼꦭꦸꦏ꧀ꦏꦏꦺꦏꦺꦮꦤ꧀ꦏꦺꦮꦤ꧀ꦱꦶꦁ​ꦒꦭꦏ꧀ ꦩꦤꦸꦏ꧀ꦩꦤꦸꦏ꧀ ꦏꦺꦮꦤ꧀ꦏꦺꦮꦤ꧀ꦱꦶꦁ​ꦲꦩ꧀ꦧꦿꦁꦏꦁ​ꦭꦤ꧀ꦲꦸꦒ​ꦏꦺꦮꦤ꧀ꦏꦺꦮꦤ꧀ꦤꦁꦭꦫ꧉​ 8ꦤꦁꦔꦶꦁꦲꦶꦭꦠ꧀ꦠꦺꦢꦺꦮꦺꦩꦤꦸꦁꦱꦲꦺꦴꦫꦧꦶꦱꦤꦼꦭꦸꦏ꧀ꦏꦏꦺ꧉​ꦲꦶꦭꦠ꧀ꦏꦸꦮꦶꦱꦏ꧀ꦮꦶꦗꦶꦤꦺꦲꦭꦱꦶꦁꦲꦺꦴꦫꦏꦼꦤꦺꦁꦢꦶꦲꦼꦤ꧀ꦢꦼꦏ꧀ ꦏꦪꦫꦕꦸꦤ꧀ꦤꦺꦲꦸꦭꦱꦶꦁꦩꦠꦺꦤ꧀ꦤꦶ꧉​ 9ꦲꦮꦏ꧀ꦏꦺ​ꦢꦺꦮꦺꦩꦼꦩꦸꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦲꦶꦭꦠ꧀ꦠꦺ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦏꦫꦺꦴ​ꦲꦶꦭꦠ꧀ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦩꦸꦗꦺꦏ꧀ꦏꦏꦺꦲꦭ​ꦩꦫꦁ​ꦮꦺꦴꦁ​ꦭꦶꦪꦤꦺ​ꦱꦶꦁ​ꦢꦶꦒꦮꦺ​ꦤꦸꦫꦸꦠ꧀ꦒꦩ꧀ꦧꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ 10ꦥꦫ​ꦱꦼꦢꦸꦭꦸꦂ​꧈​ꦏꦸꦮꦶ​ꦏ꧀ꦭꦺꦫꦸ​ꦠꦼꦤꦤ꧀:ꦭꦃ​ꦥꦩꦸꦗꦶ​ꦲꦥꦶꦏ꧀ꦭꦤ꧀ꦥꦩꦸꦗꦶ​ꦲꦭ​ꦏꦺꦴꦏ꧀ꦩꦼꦠꦸ​ꦱꦁꦏꦕꦁꦏꦼꦩ꧀ꦱꦶꦗꦶ​? 11ꦲꦥ​ꦱꦸꦩꦸꦂ​ꦱꦶꦗꦶ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦺꦤꦏ꧀ꦧꦉꦁ​ꦏꦫꦺꦴ​ꦧꦚꦸ​ꦥꦲꦶꦠ꧀? 12ꦲꦥ​ꦮꦶꦠ꧀ꦲꦚ꧀ꦗꦶꦂ​ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦎꦭꦺꦥ꦳꧀ꦭꦤ꧀ꦮꦶꦠ꧀ꦢꦽꦲꦶꦥ꦳꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦲꦚ꧀ꦗꦶꦂ​?ꦲꦥ​ꦱꦸꦩꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦱꦶꦤ꧀ꦲꦸꦒ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦺꦤꦏ꧀?ꦩꦼꦱ꧀ꦠꦶꦲꦺꦴꦫ​ꦠ​?

꧋ꦏꦮꦼꦫꦸꦃꦱꦶꦁ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

13꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦮꦺꦴꦁ​ꦱꦶꦁ​ꦫꦸꦩꦁꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦭꦤ꧀ꦏꦥꦶꦤ꧀ꦠꦼꦂꦫꦤ꧀ ꦮꦺꦴꦁ​ꦏꦸꦮꦶ​ꦏꦸꦢꦸ​ꦔꦼꦠꦺꦴꦏ꧀ꦏꦏꦺꦏꦮꦼꦫꦸꦃꦲꦺꦭꦤ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦔꦁꦒꦺꦴ​ꦲꦸꦫꦶꦥ꧀ꦱꦶꦁ​ꦲꦥꦶꦏ꧀ꦭꦤ꧀ꦥꦤ꧀ꦠꦼꦱ꧀ꦭꦤ꧀ꦠꦸꦩꦶꦤ꧀ꦢꦏ꧀ꦏꦺ​ꦩꦫꦁ​ꦭꦶꦪꦤꦺ​ꦏꦸꦢꦸ​ꦱꦶꦁ​ꦲꦭꦸꦱ꧀꧈​ 14ꦭꦃ​ꦤꦁꦔꦶꦁ​ꦤꦺꦏ꧀ꦲꦠꦶꦩꦸ​ꦏꦼꦧꦼꦏ꧀ꦏꦫꦺꦴ​ꦫꦱ​ꦱꦼꦔꦶꦠ꧀ꦭꦤ꧀ꦩꦺꦫꦶ​ꦭꦤ꧀ꦏꦺꦴꦮꦺ​ꦤꦩꦸꦁ​ꦥꦢ​ꦩꦶꦏꦶꦂ​ꦲꦸꦫꦶꦥ꧀ꦥꦺꦢꦺꦮꦺꦢꦺꦮꦺꦔꦺꦴꦤꦺꦴ​꧈​ꦠꦶꦧꦏꦺ​ꦲꦼꦁꦒꦺꦴꦤ꧀ꦩꦸ​ꦱꦺꦴꦩ꧀ꦧꦺꦴꦁꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺꦧ꧀ꦭꦱ꧀꧈​ꦏꦺꦴꦮꦺ​ꦤꦩꦸꦁ​ꦒꦺꦴꦫꦺꦴꦃ​꧉​ 15ꦲꦗ​ꦩꦶꦏꦶꦂ​ꦤꦺꦏ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦫꦤ꧀ꦤꦶꦏꦮꦼꦫꦸꦃꦏꦸꦮꦶ​ꦠꦼꦏꦤꦺ​ꦱꦁꦏꦤ꧀ꦢꦸꦮꦸꦂ!ꦧ꧀ꦭꦱ꧀ꦲꦺꦴꦫ​!ꦏꦸꦮꦶ​ꦏꦮꦼꦫꦸꦃꦱꦏ꧀ꦕꦫꦤꦺ​ꦢꦺꦴꦚ​꧈​ꦲꦺꦴꦫ​ꦩꦼꦠꦸ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦁꦏꦥꦶꦏꦶꦂꦫꦤ꧀ꦤꦺ​ꦱꦺꦠꦤ꧀꧈​ 16ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦥꦢ​ꦩꦼꦩꦺꦫꦺꦤ꧀ꦭꦤ꧀ꦤꦩꦸꦁ​ꦔ꧀ꦒꦺꦴꦭꦺꦏ꧀ꦏꦼꦩꦗꦸꦮꦤ꧀ꦤꦺꦢꦺꦮꦺꦢꦺꦮꦺꦔꦺꦴꦤꦺꦴ​꧈​ꦩꦼꦱ꧀ꦠꦶꦤꦁꦠꦼꦔꦃꦩꦸ​ꦲꦸꦒ​ꦲꦺꦤꦺꦁꦊꦭꦏꦺꦴꦤ꧀ꦫꦸꦱꦸꦭꦤ꧀ꦱꦏ꧀ꦮꦼꦂꦤꦤꦺ​ꦭꦏꦸ​ꦲꦭ​꧉​ 17ꦤꦁꦔꦶꦁ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦥꦶꦁ​ꦥꦶꦱꦤ꧀ꦉꦱꦶꦏ꧀ꦲꦠꦶꦤꦺ​꧈​ꦏꦥꦶꦁ​ꦥꦶꦤ꧀ꦢꦺꦴꦤꦺꦱꦼꦤꦼꦁ​ꦫꦸꦏꦸꦤ꧀ꦭꦤ꧀ꦲꦸꦒ​ꦤ꧀ꦢꦸꦮꦺꦤ꧀ꦤꦶ​ꦮꦫꦶꦱꦤ꧀ꦤꦺꦲꦭꦸꦱ꧀ꦭꦤ꧀ꦒꦼꦊꦩ꧀ꦩꦤ꧀꧈​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦱꦁꦏꦱ꧀ꦮꦂꦒ​ꦏꦸꦮꦶ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦲꦺꦴꦏꦺꦃꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦭꦶꦪꦤꦺ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦥꦶꦭꦶꦃꦱꦶꦃꦭꦤ꧀ꦲꦺꦴꦫ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​ 18ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦱꦼꦤꦼꦁ​ꦫꦸꦏꦸꦤ꧀ꦏꦸꦮꦶ​ꦩꦫꦏ꧀ꦏꦏꦺꦭꦶꦪꦭꦶꦪꦤꦺ​ꦤ꧀ꦢꦸꦮꦺꦲꦪꦼꦩ꧀ꦭꦤ꧀ꦏꦸꦮꦶ​ꦧꦏꦭ꧀ꦤꦼꦏꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀꧈​

↑ ↑ ↑


꧋ꦲꦗ​ꦥꦢ​ꦤꦸꦫꦸꦠ꧀ꦠꦶ​ꦏꦢꦺꦴꦚꦃꦲꦤ꧀꧈​

꧇​꧔꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦠ​ꦱꦶꦁ​ꦩꦫꦏ꧀ꦏꦏꦺꦏꦺꦴꦮꦺ​ꦥꦢ​ꦥꦢꦸ​ꦭꦤ꧀ꦠꦸꦏꦂꦫꦤ꧀?ꦏꦺꦴꦮꦺ​ꦔꦼꦂꦠꦶ​ꦲꦥ​?ꦗꦭꦂꦫꦤ꧀ꦏꦺꦴꦮꦺ​ꦲꦶꦤ꧀ꦠꦼꦂꦲꦺꦴꦫ​ꦲꦶꦤ꧀ꦠꦼꦂꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦱꦼꦤꦼꦁꦔꦺ​ꦲꦠꦶꦩꦸ​ꦱꦶꦁ​ꦲꦺꦴꦫ​ꦲꦥꦶꦏ꧀꧈​ 2ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦲꦥꦲꦥ​ꦏꦺꦴꦮꦺ​ꦲꦺꦴꦫ​ꦥꦼꦂꦢꦸꦭꦶꦩꦠꦺꦤ꧀ꦤꦶ​ꦮꦺꦴꦁ​꧈​ꦗꦚ꧀ꦗꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺ꧉​ꦤꦺꦏ꧀ꦏꦺꦴꦮꦺ​ꦮꦼꦫꦸꦃ​ꦭꦶꦪꦤꦺ​ꦤ꧀ꦢꦸꦮꦺ꧈​ꦏꦺꦴꦮꦺ​ꦠꦼꦫꦸꦱ꧀ꦩꦺꦫꦶ​꧉​ꦭꦃ​ꦤꦺꦏ꧀ꦲꦺꦴꦫ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦏꦉꦥ꧀ꦥꦺ​꧈​ꦏꦸꦮꦶ​ꦠꦼꦫꦸꦱ꧀ꦩꦫꦏ꧀ꦏꦏꦺꦥꦢꦸ​ꦭꦤ꧀ꦠꦸꦏꦂꦫꦤ꧀꧈​ꦏꦺꦴꦮꦺ​ꦲꦺꦴꦫ​ꦧꦶꦱ​ꦤꦼꦩꦸ​ꦱꦶꦁ​ꦲꦩ꧀ꦧꦺꦴꦏ꧀ꦏꦼꦥꦺꦔꦶꦤ꧀ꦤꦶꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦤ꧀ꦢꦺꦴꦁꦔꦚ꧀ꦗꦭꦸꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 3ꦤꦺꦏ꧀ꦏꦺꦴꦮꦺ​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦸꦫꦸꦁ​ꦩꦼꦱ꧀ꦠꦶꦤꦺꦏ꧀ꦧꦏꦭ꧀ꦤꦩ꧀ꦥ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ ꦗꦭꦂꦫꦤ꧀ꦏꦼꦏꦉꦥ꧀ꦥꦤ꧀ꦩꦸ​ꦲꦺꦴꦫ​ꦲꦥꦶꦏ꧀;ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ꦏꦸꦮꦶ​ꦤꦩꦸꦁ​ꦲꦉꦥ꧀ꦲꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺꦤꦸꦫꦸꦠ꧀ꦠꦶ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀꧈​ 4ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧈​ꦏꦪ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦤꦶꦁꦒꦭ꧀ꦧꦺꦴꦗꦺꦴꦤꦺ​꧉​ꦲꦥ​ꦏꦺꦴꦮꦺ​ꦲꦺꦴꦫ​ꦥꦢ​ꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦱꦼꦤꦼꦁ​ꦒꦿꦸꦢꦸꦏ꧀ꦏꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦭꦤ꧀ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦢꦢꦶ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦢꦢꦶꦤꦺ​ꦱꦥ​ꦱꦶꦁ​ꦩꦺꦭꦸꦩꦺꦭꦸ​ꦏꦫꦺꦴ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ ꦢꦢꦶ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 5ꦩꦸꦭꦤꦺ​ꦲꦗ​ꦢꦶꦒꦮꦺ​ꦱꦼꦩ꧀ꦧꦿꦤ​ꦠꦼꦩ꧀ꦧꦸꦁꦔꦺ​ꦏꦶꦠꦧ꧀ꦱꦶꦁ​ꦔꦺꦴꦩꦺꦴꦁ:“ꦲꦠꦶꦤꦺ​ꦩꦤꦸꦁꦱ​ꦤꦩꦸꦁ​ꦏꦸꦢꦸ​ꦫꦸꦩꦏꦼꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​” 6ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦱꦶꦁ​ꦒꦼꦢꦺꦩꦫꦁ​ꦩꦤꦸꦁꦱ​꧉​ꦩꦸꦭꦤꦺ​ꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩ꧀ꦥꦶꦏ꧀ꦮꦺꦴꦁ​ꦱꦶꦁ​ꦱꦺꦴꦩ꧀ꦧꦺꦴꦁ꧈​ꦤꦁꦔꦶꦁ​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦮꦺꦴꦁ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧉​”

7꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦩꦤꦸꦠ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦺꦠꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦭꦮꦤ꧀ ꦩꦼꦱ꧀ꦠꦶꦢꦺꦏ꧀ꦤꦺꦧꦏꦭ꧀ꦲꦩ꧀​ꦧ꧀ꦭꦪꦸꦭꦸꦔ​꧉​ 8ꦥꦢ​ꦚꦼꦢꦼꦏ꧀ꦏꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦲꦸꦒ​ꦧꦏꦭ꧀ꦚꦼꦢꦼꦏ꧀ꦏꦶꦏꦺꦴꦮꦺ​꧉​ꦏꦺꦴꦮꦺ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧈​ꦢꦶꦭꦺꦫꦺꦤ꧀ꦤꦶ​ꦭꦏꦸꦩꦸ​ꦱꦶꦁ​ꦲꦭ​ꦏꦸꦮꦶ​꧉​ꦭꦤ꧀ꦏꦺꦴꦮꦺ​ꦱꦶꦁ​ꦲꦠꦶꦤꦺ​ꦫꦤꦫꦺꦤꦺ​꧈​ꦉꦱꦶꦏ꧀ꦏꦤ​ꦭꦤ꧀ꦤꦸꦫꦸꦠ꧀ꦠ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 9ꦥꦢꦤ꧀ꦭꦁꦱꦲ꧈​ꦤꦔꦶꦱ꧀ꦱꦭꦤ꧀ꦥꦢꦱꦩ꧀ꦧꦠ꧀ꦠ꧉​ꦒꦼꦒꦸꦪꦸꦩꦸꦢꦢꦶꦪꦠꦔꦶꦱ꧀ꦭꦤ꧀ꦏꦧꦸꦔꦃꦲꦤ꧀ꦩꦸꦢꦢꦶꦪꦏꦱꦸꦱꦃꦲꦤ꧀ ꦲꦮꦶꦠ꧀ꦏꦺꦴꦮꦺꦔ꧀ꦭꦏꦺꦴꦤ꧀ꦤꦶꦢꦺꦴꦱ꧉​ 10ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​:ꦥꦢ​ꦱꦸꦗꦸꦠ꧀ꦠꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦭꦤ꧀ꦢꦺꦏ꧀ꦤꦺꦧꦏꦭ꧀ꦔꦁꦏꦠ꧀ꦏꦺꦴꦮꦺ​꧉​

꧋ꦲꦗ​ꦥꦢ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦭꦶꦪꦤꦺ​꧉​

11꧋ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦔꦺꦴꦩꦺꦴꦁꦔꦏꦺꦲꦭ​ꦧꦧ꧀ꦭꦶꦪꦤꦺ​꧉​ꦲꦮꦶꦠ꧀ꦱꦥ​ꦚꦭꦃꦚꦭꦃꦲꦏꦺꦱꦼꦢꦸꦭꦸꦂꦫꦺ​ꦢꦺꦮꦺꦏꦸꦮꦶ​ꦱꦏ꧀ꦗꦤꦺꦚꦭꦃꦚꦭꦃꦲꦏꦺꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦱꦥ​ꦱꦶꦁ​ꦚꦭꦃꦚꦭꦃꦲꦏꦺꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦠꦶꦧꦏꦺ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺ꧈​ꦩꦭꦃ​ꦲꦉꦥ꧀ꦔꦸꦁꦏꦸꦭ꧀ꦭꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦢꦶ​ꦱꦶꦁ​ꦠꦸꦏꦁ​ꦔꦿꦸꦠꦸ꧉​ 12ꦭꦃ​ꦱꦶꦁ​ꦔ꧀ꦒꦮꦺ​ꦮꦺꦠ꧀ꦏꦸꦮꦶ​ꦱꦥ​ꦭꦤ꧀ꦱꦶꦁ​ꦔꦿꦸꦠꦸꦩꦤꦸꦁꦱ​ꦏꦸꦮꦶ​ꦱꦥ​?ꦲꦥ​ꦲꦺꦴꦫ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ?ꦤꦩꦸꦁ​ꦢꦺꦏ꧀ꦤꦺꦱꦶꦁ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦭꦤ꧀ꦚꦼꦠꦿꦥ꧀ꦩꦤꦸꦁꦱ​꧉​ꦫꦸꦩꦁꦱꦩꦸ​ꦏꦺꦴꦮꦺ​ꦏꦸꦮꦶ​ꦱꦥ​ꦏꦺꦴꦏ꧀ꦮꦤꦶ​ꦚꦭꦃꦚꦭꦃꦲꦏꦺꦠꦸꦁꦒꦭ꧀ꦱꦼꦢꦸꦭꦸꦂ​꧉​

꧋ꦲꦥꦶꦏ꧀ꦏꦺ​ꦚ꧀ꦗꦒꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

13꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦲꦉꦥ꧀​ꦤ꧀ꦢꦸꦮꦺꦲꦺꦴꦩꦺꦴꦁ​ꦩꦫꦁ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦸꦏꦁ​ꦢꦼꦢꦒꦁ꧉​ꦏꦺꦴꦮꦺ​ꦥꦢ​ꦱꦼꦤꦼꦁ​ꦔꦺꦴꦩꦺꦴꦁ:“ꦱꦲꦶꦏꦶ​ꦲꦥ​ꦱꦺꦱꦸꦏ꧀ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦧꦸꦢꦭ꧀ꦤꦁꦏꦸꦠꦲꦶꦏꦶ​ꦲꦥ​ꦏꦸꦠꦏꦲꦺ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦤꦁꦏꦤ​ꦱꦼꦠꦲꦸꦤ꧀ꦱꦸꦮꦺꦤꦺ​꧉​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀​ꦤ꧀ꦢꦒꦁꦭꦤ꧀​ꦔ꧀ꦒꦮꦺ​ꦧꦠꦶꦱꦶꦁ​ꦲꦺꦴꦏꦺꦃ꧉​” 14ꦭꦃ​ꦏꦺꦴꦮꦺ​ꦥꦢ​ꦮꦤꦶ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦲꦥ​ꦏꦺꦴꦮꦺ​ꦔꦼꦂꦠꦶ​ꦠꦼꦤꦤ꧀ꦲꦥ​ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ꦱꦺꦱꦸꦏ꧀?ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦲꦸꦫꦶꦥ꧀ꦩꦸ​ꦏꦸꦮꦶ​ꦤꦩꦸꦁ​ꦏꦪ​ꦥꦼꦢꦸꦠ꧀ꦏꦲꦺ​꧈​ꦱꦲꦶꦏꦶ​ꦠꦼꦏ​꧈​ꦩꦼꦁꦏꦺꦴ​ꦮꦶꦱ꧀ꦲꦶꦭꦁ​꧉​ 15ꦏꦺꦴꦮꦺ​ꦏꦸꦢꦸ​ꦔꦺꦴꦩꦺꦴꦁꦔꦺꦤꦺ​:“ꦤꦺꦏ꧀ꦒꦸꦱ꧀ꦠꦶ​ꦔ꧀ꦭꦶꦭꦤꦶ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦢꦶꦏꦺꦏ꧀ꦏꦶꦲꦸꦫꦶꦥ꧀ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦔꦺꦤꦺ​ꦲꦥ​ꦔꦺꦴꦤꦺꦴ​꧉​” 16ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦩꦭꦃ​ꦥꦢ​ꦱꦺꦴꦩ꧀ꦧꦺꦴꦁꦭꦤ꧀ꦥꦩꦺꦂ​ꦔꦺꦴꦤꦺꦴ​꧉​ꦏꦸꦮꦶ​ꦏ꧀ꦭꦺꦫꦸ​ꦧꦔꦼꦠ꧀꧈​

17꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦔꦼꦂꦠꦶ​ꦲꦥ​ꦱꦶꦁ​ꦧꦼꦤꦼꦂ​ꦤꦁꦔꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦠꦶꦧꦏꦺ​ꦏꦺꦴꦮꦺ​ꦢꦺꦴꦱ​꧉​

↑ ↑ ↑


꧋ꦠꦼꦩ꧀ꦧꦸꦁ​ꦩꦫꦁ​ꦮꦺꦴꦁ​ꦱꦸꦒꦶꦃ​ꦱꦶꦁ​ꦥꦢ​ꦩꦼꦉꦱ꧀ꦭꦶꦪꦤꦺ​꧉​

꧇​꧕꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦲꦺꦴꦩꦺꦴꦁ​ꦩꦫꦁ​ꦮꦺꦴꦁ​ꦱꦸꦒꦶꦃ​ꦱꦶꦁ​ꦩꦼꦉꦱ꧀ꦭꦶꦪꦤꦺ​꧉​ꦲꦺꦴꦩꦺꦴꦁꦏꦸꦔꦺꦤꦺ​:ꦏꦺꦴꦮꦺ​ꦱꦶꦁ​ꦱꦸꦒꦶꦃ​꧈​ꦲꦥꦶꦏ꧀ꦏꦺ​ꦏꦺꦴꦮꦺ​ꦥꦢ​ꦱꦩ꧀ꦧꦠ꧀ꦭꦤ꧀ꦠꦔꦶꦱ꧀ꦱꦤ꧀ꦮꦲꦺ​꧈​ꦲꦮꦶꦠ꧀ꦏꦺꦴꦮꦺ​ꦧꦏꦭ꧀ꦏꦠꦼꦏꦤ꧀ꦏꦱꦁꦱꦫꦤ꧀ꦒꦼꦢꦺ꧉​ 2ꦲꦶꦁ​ꦩꦿꦶꦥꦠ꧀ꦠꦺ​ꦒꦸꦱ꧀ꦠꦶ​ꦥꦔꦤ꧀ꦩꦸ​ꦱꦶꦁ​ꦤꦸꦩ꧀ꦥꦸꦏ꧀ꦤꦸꦩ꧀ꦥꦸꦏ꧀ꦏꦸꦮꦶ​ꦧꦺꦴꦱꦺꦴꦏ꧀ꦔꦁꦒꦸꦂ​ꦭꦤ꧀ꦱꦤ꧀ꦢꦔꦤ꧀ꦩꦸꦱꦶꦁ​ꦲꦩ꧀ꦧꦺꦴꦏ꧀ꦱꦶꦩ꧀ꦥꦼꦤ꧀ꦢꦶꦥꦔꦤ꧀ꦉꦔꦼꦠ꧀ꦏꦧꦺꦃ​꧉​ 3ꦧꦫꦁꦧꦫꦁꦩꦸ​ꦱꦶꦁ​ꦲꦼꦩꦱ꧀ꦭꦤ꧀ꦱꦼꦭꦏ​ꦥꦢ​ꦫꦸꦱꦏ꧀ꦏꦧꦺꦃ​;ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦤꦺꦏ꧀ꦲꦸꦫꦶꦥ꧀ꦩꦸ​ꦧꦏꦭ꧀ꦫꦸꦱꦏ꧀ꦲꦸꦒ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦲꦩ꧀ꦧꦸꦮꦁ​ꦏꦺꦴꦮꦺ​ꦤꦁꦤꦼꦫꦏ꧈​ꦲꦮꦶꦠ꧀ꦱꦼꦤꦗꦤ꧀ꦢꦶꦤꦤꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦩꦤꦸꦁꦱ​ꦮꦶꦱ꧀ꦕꦼꦢꦼꦏ꧀​꧈​ꦏꦺꦴꦮꦺ​ꦥꦢ​ꦩꦼꦩ꧀ꦥꦼꦁ​ꦠꦼꦫꦸꦱ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦧꦤ꧀ꦢ꧉​ 4ꦢꦶꦫꦸꦔꦺꦴꦏ꧀ꦏꦏꦺꦱ꧀ꦮꦫꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦏꦼꦂꦗ​ꦥꦤꦺꦤ꧀ꦤꦁꦏꦼꦧꦺꦴꦤ꧀ꦩꦸ​ꦏꦲꦺ​꧈​ꦤꦁꦔꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦧꦪꦂ​ꦒꦗꦶꦲꦤ꧀ꦤꦺ꧉​ꦮꦺꦴꦁꦮꦺꦴꦁ​ꦥꦢ​ꦕꦼꦭꦸꦏ꧀ꦕꦼꦭꦸꦏ꧀ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺꦏꦿꦸꦔꦸ​ꦱꦩ꧀ꦧꦠ꧀ꦠꦺ​ꦮꦺꦴꦁꦮꦺꦴꦁ​ꦏꦸꦮꦶ​꧉​ 5ꦏꦺꦴꦮꦺ​ꦥꦢ​ꦔꦼꦥꦺꦤꦏ꧀ꦏꦏꦺꦲꦸꦫꦶꦥ꧀ꦩꦸ​ꦲꦶꦁ​ꦢꦺꦴꦚ​ꦏꦺꦤꦺ​ꦭꦤ꧀ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦠꦶ​ꦲꦥ​ꦱꦼꦤꦼꦁꦩꦸ​꧈​ꦏꦪ​ꦲꦶꦔꦺꦴꦤ꧀ꦲꦶꦔꦺꦴꦤ꧀ꦏꦲꦺ​ꦢꦶꦥꦏꦤ꧀ꦤꦶ​ꦧꦺꦤ꧀ꦊꦩꦸ​ꦲꦉꦥ꧀ꦢꦶꦧꦼꦭꦺꦃ​꧉​ 6ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦱꦭꦃ​ꦲꦩ꧀ꦧꦺꦴꦏ꧀ꦱꦺꦫꦺꦠ꧀ꦤꦁꦏꦿꦸꦠꦺꦴꦤ꧀ ꦲꦩ꧀ꦧꦺꦴꦏ꧀ꦲꦫꦤ꧀ꦤꦶꦱꦭꦃ​ꦭꦤ꧀ꦲꦩ꧀ꦧꦺꦴꦏ꧀ꦥꦠꦺꦤ꧀ꦤꦶ​꧈​ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦔ꧀ꦭꦮꦤ꧀​ꦧ꧀ꦭꦱ꧀ꦩꦫꦁ​ꦏꦺꦴꦮꦺ​꧉​

꧋ꦱꦧꦂ​ꦠꦼꦫꦸꦱ꧀ꦲꦶꦁ​ꦏꦔꦺꦭ꧀ꦭꦤ꧀꧈​

7꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦥꦢ​ꦔꦭꦩ꧀ꦩꦶ​ꦏꦔꦺꦭ꧀ꦭꦤ꧀ ꦥꦢ​ꦢꦶꦏꦸꦮꦠ꧀ꦠꦏꦺꦠꦼꦫꦸꦱ꧀ꦏꦫꦺꦴ​ꦱꦧꦂ​ꦏꦫꦺꦴ​ꦔꦼꦤ꧀ꦠꦺꦤ꧀ꦤꦶ​ꦠꦼꦏꦤꦺ​ꦒꦸꦱ꧀ꦠꦶ​꧉​ꦮꦺꦴꦁ​ꦠꦤ꧀ꦢꦸꦂꦏꦲꦺ​ꦩꦼꦱ꧀ꦠꦶꦪ​ꦔꦉꦥ꧀ꦲꦉꦥ꧀ꦧꦶꦱ​ꦥꦤꦺꦤ꧀ꦒꦼꦢꦺ꧉​ꦩꦸꦭꦤꦺ​ꦢꦺꦏ꧀ꦤꦺꦪ​ꦱꦧꦂ​ꦔꦼꦤ꧀ꦠꦺꦤ꧀ꦤꦶ​ꦠꦼꦏꦤꦺ​ꦲꦸꦢꦤ꧀ꦲꦶꦁ​ꦉꦤ꧀ꦢꦼꦁꦔꦤ꧀ꦕꦶꦭꦶꦏ꧀ꦭꦤ꧀ꦉꦤ꧀ꦢꦼꦁꦔꦤ꧀ꦒꦼꦢꦺ꧉​ 8ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦱꦧꦂ​ꦔꦼꦤ꧀ꦠꦺꦤ꧀ꦤꦶ​꧉​ꦢꦶꦏꦸꦮꦠ꧀ꦠꦏꦺꦠꦼꦫꦸꦱ꧀!ꦲꦺꦴꦫ​ꦱꦸꦮꦶꦩꦼꦤꦺꦃ​ꦒꦸꦱ꧀ꦠꦶ​ꦧꦏꦭ꧀ꦠꦼꦏ​꧉​

9꧋ꦩꦸꦭꦤꦺ​꧈​ꦤꦺꦏ꧀ꦚꦁꦒ​ꦲꦧꦺꦴꦠ꧀ ꦲꦗ​ꦠꦼꦫꦸꦱ꧀ꦥꦢ​ꦚꦭꦃꦚꦭꦃꦲꦏꦺꦭꦤ꧀ꦩꦲꦶꦢꦺꦴ​ꦱꦏ꧀ꦥꦢꦥꦢ꧈​ꦩꦼꦁꦏꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦏ꧀ꦚꦭꦃꦚꦭꦃꦲꦏꦺꦏꦺꦴꦮꦺ​꧉​ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​꧈​ꦱꦶꦁ​ꦔꦿꦸꦠꦸꦩꦤꦸꦁꦱ​꧈​ꦮꦶꦱ꧀​ꦤ꧀ꦢꦁꦠꦼꦏ​ꦮꦲꦺ​꧉​ 10ꦥꦢ​ꦢꦶꦲꦺꦭꦶꦁ​ꦥꦫ​ꦤꦧꦶ​ꦱꦶꦁ​ꦥꦢ​ꦔ꧀ꦒꦮ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀​ꦩ꧀ꦧꦶꦪꦺꦤ꧀꧈​ꦱꦼꦤꦗꦤ꧀ꦢꦶꦱꦶꦪꦱꦶꦪ​꧈​ꦤꦁꦔꦶꦁ​ꦥꦢ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦚꦁꦒ​ꦏꦱꦁꦱꦫꦤꦺ​ꦏꦫꦺꦴ​ꦱꦧꦂ​꧉​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦫꦸ​꧉​ 11ꦧꦼꦗꦠꦼꦤꦤ꧀ꦥꦫ​ꦤꦧꦶ​ꦏꦸꦮꦶ​꧈​ꦲꦮꦶꦠ꧀ꦥꦢ​ꦏꦸꦮꦠ꧀ꦚꦁꦒ​ꦠꦼꦫꦸꦱ꧀ꦏꦫꦺꦴ​ꦱꦧꦂ​꧉​ꦏꦺꦴꦮꦺ​ꦩꦼꦱ꧀ꦠꦶꦏꦺꦭꦶꦁꦔꦤ꧀ꦊꦭꦏꦺꦴꦤꦺ​ꦪꦺꦴꦧ꧀ ꦱꦼꦤꦗꦤ꧀ꦲꦧꦺꦴꦠ꧀ꦠꦺ​ꦏꦪ​ꦔꦥ​꧈​ꦢꦺꦏ꧀ꦤꦺꦱꦧꦂ​ꦠꦼꦫꦸꦱ꧀ꦭꦤ꧀ꦲꦺꦴꦫ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ꦭꦤ꧀ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦔꦸꦥꦃꦲꦶꦢꦺꦏ꧀ꦤꦺꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦲꦮꦶꦠ꧀ꦒꦸꦱ꧀ꦠꦶ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​꧉​

꧋ꦲꦗ​ꦱꦸꦩ꧀ꦥꦃ​꧉​

12꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦫꦁ​ꦭꦶꦪꦤꦺ​ꦱꦶꦁ​ꦥꦼꦤ꧀ꦠꦶꦁ​ꦲꦸꦒ​꧉​ꦤꦺꦏ꧀ꦏꦺꦴꦮꦺ​ꦲꦉꦥ꧀​ꦔ꧀ꦒꦮꦺ​ꦗꦚ꧀ꦗꦶ​ꦲꦥꦲꦥ​꧈​ꦏꦺꦴꦮꦺ​ꦲꦺꦴꦫ​ꦲꦸꦱꦃꦱꦸꦩ꧀ꦥꦃ​꧉​ꦲꦗ​ꦱꦸꦩ꧀ꦥꦃ​ꦔꦁꦒꦺꦴ​ꦱꦼꦏ꧀ꦱꦶ​ꦭꦔꦶꦠ꧀ꦲꦥ​ꦧꦸꦩꦶ​꧈​ꦲꦥ​ꦱꦼꦏ꧀ꦱꦶ​ꦲꦥ​ꦮꦲꦺ​꧉​ꦤꦺꦏ꧀ꦤꦶꦪꦠ꧀“ꦪ​”ꦏꦺꦴꦮꦺ​ꦏꦸꦢꦸ​ꦔꦺꦴꦩꦺꦴꦁ“ꦪ​”ꦤꦺꦏ꧀ꦤꦶꦪꦠ꧀“ꦲꦺꦴꦫ​”ꦪ​ꦔꦺꦴꦩꦺꦴꦁ“ꦲꦺꦴꦫ​꧉”ꦤꦺꦏ꧀ꦏꦺꦴꦮꦺ​ꦱꦸꦩ꧀ꦥꦃ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦭꦃꦚꦭꦃꦲꦏꦺꦏꦺꦴꦮꦺ​꧉​

꧋ꦥꦤ꧀ꦢꦺꦴꦔ​ꦏꦁꦒꦺꦴ​ꦱꦶꦁ​ꦭꦫ​꧉​

13꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ ꦢꦺꦏ꧀ꦤꦺꦏꦸꦢꦸ​ꦤ꧀ꦢꦺꦴꦁꦔ꧉​ꦭꦃ​ꦱꦶꦁ​ꦔꦭꦩ꧀ꦩꦶ​ꦏꦧꦸꦔꦃꦲꦤ꧀ꦏꦸꦢꦸ​ꦱꦶꦔꦶꦱꦶꦔꦶꦩꦼꦩꦸꦗꦶ​ꦒꦸꦱ꧀ꦠꦶ​꧉​ 14ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦭꦫ​꧈​ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦤꦺꦥꦱꦩꦸꦮꦤ꧀ꦏꦸꦢꦸ​ꦢꦶꦕꦼꦭꦸꦏ꧀​꧉​ꦢꦢꦶꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦧꦶꦱ​ꦤ꧀ꦢꦺꦴꦔꦏ꧀ꦏꦏꦺꦱꦶꦁ​ꦭꦫ​ꦭꦤ꧀ꦔꦸꦱꦥ꧀ꦥꦶ​ꦊꦔ​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​꧉​ 15ꦥꦤ꧀ꦢꦺꦴꦔꦤꦺ​ꦥꦫ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦔꦁꦒꦺꦴ​ꦥꦼꦔꦤ꧀ꦢꦼꦭ꧀ꦧꦏꦭ꧀ꦤꦩ꧀ꦧꦤꦶ​ꦱꦶꦁ​ꦭꦫ​ꦭꦤ꧀ꦤꦺꦏ꧀ꦢꦺꦏ꧀ꦤꦺꦤ꧀ꦢꦸꦮꦺꦱꦭꦃ​꧈​ꦒꦸꦱ꧀ꦠꦶ​ꦲꦸꦒ​ꦧꦏꦭ꧀ꦔꦥꦸꦫ​꧉​ 16ꦩꦸꦭꦤꦺ​꧈​ꦱꦶꦁ​ꦭꦫ​ꦏꦸꦢꦸ​ꦔꦺꦴꦩꦺꦴꦁꦔꦏꦺꦱꦭꦃꦲꦺ​ꦭꦤ꧀ꦭꦶꦪꦭꦶꦪꦤꦺ​ꦏꦸꦢꦸ​ꦤ꧀ꦢꦺꦴꦔꦏ꧀ꦏꦏꦺꦱꦶꦁ​ꦭꦫ​ꦱꦸꦥꦪ​ꦧꦶꦱ​ꦩꦫꦶ​꧉​ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦥꦤ꧀ꦢꦺꦴꦔꦤꦺ​ꦮꦺꦴꦁ​ꦱꦶꦁ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦏꦸꦮꦶ​ꦒꦼꦢꦺꦏ꧀ꦮꦱꦤꦺ​꧉​ 17ꦏꦺꦴꦮꦺ​ꦩꦼꦱ꧀ꦠꦶꦏꦺꦭꦶꦁꦔꦤ꧀ꦊꦭꦏꦺꦴꦤꦺ​ꦤꦧꦶ​ꦌꦭꦶꦪ​꧉​ꦢꦺꦏ꧀ꦤꦺꦪ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦏꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ꦭꦃ​ꦢꦺꦏ꧀ꦤꦺꦤ꧀ꦢꦺꦴꦁꦔꦠꦼꦤꦤ꧀ꦤꦤ꧀ꦱꦸꦥꦪ​ꦲꦺꦴꦫ​ꦲꦸꦢꦤ꧀ꦭꦤ꧀ꦮꦸꦗꦸꦠ꧀ꦠꦺꦪ​ꦠꦼꦫꦸꦱ꧀ꦲꦺꦴꦫ​ꦲꦸꦢꦤ꧀ꦠꦼꦭꦸꦁ​ꦠꦲꦸꦤ꧀ꦱꦼꦠꦼꦔꦃ​ꦱꦸꦮꦺꦤꦺ​꧉​ 18ꦏꦢꦸꦁ​ꦢꦺꦏ꧀ꦤꦺꦤ꧀ꦢꦺꦴꦁꦔꦩꦼꦤꦺꦃ​ꦚ꧀ꦗꦭꦸꦏ꧀ꦲꦸꦢꦤ꧀ ꦮꦸꦗꦸꦠ꧀ꦠꦺꦪ​ꦠꦼꦫꦸꦱ꧀ꦲꦸꦢꦤ꧀ꦠꦼꦫꦸꦱ꧀ꦭꦤ꧀ꦠꦤ꧀ꦢꦸꦂꦫꦤ꧀ꦤꦺ​ꦧꦶꦱ​ꦠꦸꦏꦸꦭ꧀ꦩꦼꦤꦺꦃ​꧉​

19-20꧋ꦥꦫꦱꦼꦢꦸꦭꦸꦂ꧈​ꦤꦺꦏ꧀ꦤꦁꦠꦼꦔꦃꦩꦸꦲꦺꦤꦺꦁꦱꦏ꧀ꦮꦶꦗꦶꦤꦺꦱꦼꦢꦸꦭꦸꦂꦤꦶꦁꦒꦭ꧀ꦢꦭꦤ꧀ꦤꦺꦒꦸꦱ꧀ꦠꦶꦠꦼꦫꦸꦱ꧀ꦲꦺꦤꦺꦁꦱꦼꦢꦸꦭꦸꦂꦭꦶꦪꦤꦺꦱꦶꦁꦤꦫꦶꦏ꧀ꦮꦺꦴꦁꦏꦸꦮꦶꦧꦶꦱꦩꦤꦸꦠ꧀ꦩꦼꦤꦺꦃ꧈​ꦔꦼꦂꦠꦶꦪꦲꦶꦏꦶꦥꦫꦱꦼꦢꦸꦭꦸꦂ:ꦱꦼꦢꦸꦭꦸꦂꦱꦶꦁꦤꦫꦶꦏ꧀ꦮꦺꦴꦁꦢꦺꦴꦱꦱꦁꦏꦢꦭꦤ꧀ꦱꦶꦁꦲꦭꦏꦸꦮꦶꦱꦏ꧀ꦗꦤꦺꦤꦫꦶꦏ꧀ꦚꦮꦤꦺꦮꦺꦴꦁꦔꦺꦱꦁꦏꦥꦠꦶ꧉​ꦱꦼꦢꦸꦭꦸꦂꦏꦸꦮꦶꦤꦸꦭꦸꦁꦔꦶꦮꦺꦴꦁꦱꦶꦁꦔ꧀ꦒꦮꦺꦢꦺꦴꦱꦏꦸꦮꦶ꧈​ꦱꦸꦥꦪꦒꦸꦱ꧀ꦠꦶꦄꦭ꧀ꦭꦃꦧꦶꦱꦔꦥꦸꦫꦢꦺꦴꦱꦢꦺꦴꦱꦤꦺꦏꦧꦺꦃ꧉​

꧋ꦥꦫꦱꦼꦢꦸꦭꦸꦂ꧈​ꦕꦸꦏꦸꦥ꧀ꦱꦼꦩꦺꦤꦺꦭꦪꦁꦲꦶꦏꦶ꧉​

ꦪꦏꦺꦴꦧꦸꦱ꧀

↑ ↑ ↑


← ꦆꦧꦿꦤꦶ   ꧇꧑꧇ꦦꦺꦠꦿꦸꦱ꧀ →