ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦩꦼꦢꦂꦫꦤ꧀/11
꧇꧑꧑꧇ 1꧋ꦱꦏ꧀ꦮꦶꦱ꧀ꦱꦺꦏꦸꦮꦶꦲꦏꦸꦠꦼꦫꦸꦱ꧀ꦢꦶꦏꦺꦏ꧀ꦏꦶꦏꦪꦸꦲꦸꦏꦸꦂꦫꦤ꧀꧈ꦲꦏꦸꦢꦶꦲꦺꦴꦩꦺꦴꦁꦔꦶꦔꦺꦤꦺ:“ꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦭ꧀ꦠꦂꦫꦺꦢꦶꦲꦸꦏꦸꦂ꧉ꦢꦶꦲꦶꦠꦸꦁꦱꦼꦥꦶꦫꦕꦕꦃꦲꦺꦮꦺꦴꦁꦱꦶꦁꦚꦼꦩ꧀ꦧꦃꦒꦸꦱ꧀ꦠꦶꦄꦭ꧀ꦭꦃꦤꦁꦏꦺꦴꦤꦺꦴ꧉ 2ꦤꦩꦸꦁꦭꦠꦂꦱꦏ꧀ꦚ꧀ꦗꦧꦤꦺꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃꦲꦗꦢꦶꦲꦸꦏꦸꦂ꧈ꦲꦮꦶꦠ꧀ꦏꦸꦮꦶꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁꦮꦺꦴꦁꦮꦺꦴꦁꦱꦶꦁꦲꦺꦴꦫꦏꦼꦤꦭ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈ꦱꦶꦁꦧꦏꦭ꧀ꦔꦶꦢꦼꦏ꧀ꦲꦶꦢꦼꦏ꧀ꦏꦸꦠꦱꦸꦕꦶꦏꦸꦮꦶꦥꦠꦁꦥꦸꦭꦸꦃꦭꦺꦴꦫꦺꦴꦱꦱꦶꦱꦸꦮꦺꦤꦺ꧉ 3ꦲꦏꦸꦧꦏꦭ꧀ꦔꦺꦴꦁꦏꦺꦴꦤ꧀ꦱꦼꦏ꧀ꦱꦶꦏꦸꦭꦺꦴꦫꦺꦴꦔꦁꦒꦺꦴꦱꦤ꧀ꦢꦔꦤ꧀ꦤꦺꦮꦺꦴꦁꦏꦼꦥꦠꦺꦤ꧀꧈ꦠꦏ꧀ꦏꦺꦴꦁꦏꦺꦴꦤ꧀ꦔꦧꦂꦫꦏꦺꦥꦶꦠꦸꦠꦸꦂꦏꦸꦫꦺꦴꦭꦱ꧀ꦲꦠꦸꦱ꧀ꦱ꧀ꦮꦶꦢꦏ꧀ꦢꦶꦤꦱꦸꦮꦺꦤꦺ꧉”
4꧋ꦱꦼꦏ꧀ꦱꦶꦭꦺꦴꦫꦺꦴꦩꦲꦸꦪꦏꦸꦮꦶꦮꦶꦠ꧀ꦎꦭꦺꦥ꦳꧀ꦭꦺꦴꦫꦺꦴꦭꦤ꧀ꦮꦢꦃꦢꦶꦪꦤ꧀ꦭꦺꦴꦫꦺꦴꦱꦶꦁꦔꦢꦼꦏ꧀ꦤꦁꦔꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦲꦺꦗꦒꦠ꧀꧈ 5ꦤꦺꦏ꧀ꦲꦺꦤꦺꦁꦮꦺꦴꦁꦱꦶꦁꦲꦉꦥ꧀ꦤꦶꦤ꧀ꦢꦏ꧀ꦏꦏꦺꦲꦭꦩꦫꦁꦱꦼꦏ꧀ꦱꦶꦭꦺꦴꦫꦺꦴꦏꦸꦮꦶ꧈ꦧꦏꦭ꧀ꦢꦶꦲꦼꦤ꧀ꦠꦺꦏ꧀ꦏꦏꦺꦏꦫꦺꦴꦒꦼꦤꦶꦱꦶꦁꦩꦼꦠꦸꦱꦁꦏꦕꦁꦏꦼꦩ꧀ꦩꦺꦱꦼꦏ꧀ꦱꦶꦭꦺꦴꦫꦺꦴꦩꦲꦸ꧉ꦩꦼꦁꦏꦺꦴꦤꦺꦴꦏꦸꦮꦶꦏꦧꦺꦃꦮꦺꦴꦁꦱꦶꦁꦲꦉꦥ꧀ꦔ꧀ꦒꦮꦺꦱꦸꦱꦃꦲꦺꦧꦏꦭ꧀ꦢꦶꦥꦠꦺꦤ꧀ꦤꦶ꧉ 6ꦱꦼꦏ꧀ꦱꦶꦭꦺꦴꦫꦺꦴꦩꦲꦸꦢꦶꦏꦺꦏ꧀ꦏꦶꦥꦔ꧀ꦮꦱꦔꦚ꧀ꦕꦶꦁꦭꦔꦶꦠ꧀ ꦱꦸꦥꦪꦲꦺꦴꦫꦲꦺꦤꦺꦁꦲꦸꦢꦤ꧀ꦱꦸꦮꦺꦤꦺꦥꦢꦔꦧꦂꦫꦏꦺꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃ꧉ꦲꦸꦒꦥꦢꦲꦺꦤ꧀ꦠꦸꦏ꧀ꦥꦔ꧀ꦮꦱꦔ꧀ꦒꦤ꧀ꦠꦶꦱꦏ꧀ꦏꦺꦃꦲꦺꦧꦚꦸꦢꦶꦢꦢꦺꦏ꧀ꦏꦏꦺꦒꦼꦠꦶꦃ꧉ꦩꦭꦃꦲꦸꦒꦤ꧀ꦢꦸꦮꦺꦥꦔ꧀ꦮꦱꦔꦗꦂꦧꦸꦩꦶꦔꦁꦒꦺꦴꦱꦏ꧀ꦮꦼꦂꦤꦤꦺꦩꦼꦩꦭ꧈ꦱꦏ꧀ꦮꦠꦸꦱꦶꦁꦢꦶꦏꦉꦥ꧀ꦥꦏꦺ꧉
7꧋ꦤꦺꦏ꧀ꦮꦶꦱ꧀ꦫꦩ꧀ꦥꦸꦁꦲꦼꦁꦒꦺꦴꦤꦺꦥꦢꦔꦼꦠꦺꦴꦏ꧀ꦏꦏꦺꦥꦱꦼꦏ꧀ꦱꦶꦤꦺ꧈ꦏꦺꦮꦤ꧀ꦱꦶꦁꦩꦼꦠꦸꦱꦁꦏꦗꦸꦫꦁꦥꦼꦠꦼꦁꦧꦏꦭ꧀ꦔ꧀ꦭꦮꦤ꧀ ꦔꦭꦃꦲꦏꦺꦭꦤ꧀ꦩꦠꦺꦤ꧀ꦤꦶꦱꦼꦏ꧀ꦱꦶꦭꦺꦴꦫꦺꦴꦩꦲꦸ꧉ 8ꦭꦪꦺꦴꦤꦺꦧꦏꦭ꧀ꦒꦸꦩ꧀ꦭꦺꦠꦏ꧀ꦤꦁꦢꦭꦤ꧀ꦤꦁꦏꦸꦠꦒꦼꦢꦺ꧈ꦥꦁꦒꦺꦴꦤ꧀ꦤꦤ꧀ꦥꦼꦤ꧀ꦠꦺꦔꦤ꧀ꦤꦺꦒꦸꦱ꧀ꦠꦶꦤꦺ꧉ꦏꦸꦠꦩꦲꦸꦢꦶꦗꦼꦤꦼꦁꦔꦏꦺꦱꦺꦴꦢꦺꦴꦩ꧀ꦭꦤ꧀ꦌꦒꦶꦥ꧀ꦠꦼ꧈ꦏꦸꦮꦶꦠꦼꦩ꧀ꦧꦸꦁꦏꦁꦒꦺꦴꦔ꧀ꦒꦩ꧀ꦧꦂꦫꦏꦺ꧉ 9ꦮꦺꦴꦁꦮꦺꦴꦁꦱꦁꦏꦱꦏ꧀ꦏꦺꦃꦲꦺꦠꦊꦂ꧈ꦧꦁꦱ꧈ꦧꦱꦭꦤ꧀ꦤꦼꦒꦫꦧꦏꦭ꧀ꦤꦺꦴꦤ꧀ꦠꦺꦴꦤ꧀ꦭꦪꦺꦴꦤ꧀ꦩꦲꦸꦱꦸꦮꦺꦤꦺꦠꦼꦭꦸꦁꦢꦶꦤꦱꦼꦠꦼꦔꦃ꧉ꦭꦪꦺꦴꦤ꧀ꦩꦲꦸꦲꦺꦴꦫꦏꦼꦭꦶꦭ꧀ꦭꦤ꧀ꦢꦶꦏꦸꦧꦸꦂ꧉ 10ꦮꦺꦴꦁꦮꦺꦴꦁꦤꦁꦧꦸꦩꦶꦧꦏꦭ꧀ꦥꦢꦧꦸꦔꦃꦏꦫꦺꦴꦥꦠꦶꦤꦺꦱꦼꦏ꧀ꦱꦶꦭꦺꦴꦫꦺꦴꦩꦲꦸ꧉ꦠꦼꦫꦸꦱ꧀ꦥꦢꦔꦤꦏ꧀ꦏꦏꦺꦏꦼꦫꦩꦺꦪꦤ꧀ꦭꦤ꧀ꦥꦢꦏꦶꦫꦶꦩ꧀ꦏꦶꦫꦶꦩ꧀ꦩꦤ꧀ꦏꦢꦺꦴ꧈ꦲꦮꦶꦠ꧀ꦤꦧꦶꦭꦺꦴꦫꦺꦴꦱꦶꦁꦔ꧀ꦒꦮꦺꦱꦸꦱꦃꦲꦺꦮꦺꦴꦁꦏꦧꦺꦃꦮꦶꦱ꧀ꦩꦠꦶ꧉ 11ꦤꦁꦔꦶꦁꦱꦏ꧀ꦮꦶꦱ꧀ꦱꦺꦠꦼꦭꦸꦁꦢꦶꦤꦱꦼꦠꦼꦔꦃꦭꦪꦺꦴꦤ꧀ꦭꦺꦴꦫꦺꦴꦩꦲꦸꦠꦼꦫꦸꦱ꧀ꦤꦩ꧀ꦥꦲꦩ꧀ꦧꦼꦏ꧀ꦏꦤ꧀ꦱꦁꦏꦒꦸꦱ꧀ꦠꦶꦄꦭ꧀ꦭꦃ꧉ꦠꦼꦫꦸꦱ꧀ꦥꦢꦠꦔꦶꦭꦤ꧀ꦏꦧꦺꦃꦮꦺꦴꦁꦱꦶꦁꦮꦼꦫꦸꦃꦥꦢꦮꦼꦢꦶꦧꦔꦼꦠ꧀꧈ 12ꦤꦧꦶꦭꦺꦴꦫꦺꦴꦏꦸꦮꦶꦠꦼꦫꦸꦱ꧀ꦥꦢꦏꦿꦸꦔꦸꦱ꧀ꦮꦫꦧꦤ꧀ꦠꦼꦂꦱꦁꦏꦱ꧀ꦮꦂꦒꦚꦼꦭꦸꦏ꧀ꦔꦺꦤꦺ:“ꦥꦢꦩꦸꦁꦒꦃꦲꦫꦺꦤꦺ!”ꦠꦼꦫꦸꦱ꧀ꦥꦢꦩꦸꦁꦒꦃꦤꦁꦱ꧀ꦮꦂꦒꦏꦏꦼꦩꦸꦭ꧀ꦭꦤ꧀ꦩꦺꦒꦭꦤ꧀ꦩꦸꦁꦱꦸꦃꦩꦸꦁꦱꦸꦃꦲꦺꦥꦢꦮꦼꦫꦸꦃꦏꦧꦺꦃ꧉ 13ꦠꦼꦫꦸꦱ꧀ꦲꦺꦤꦺꦁꦭꦶꦤ꧀ꦢꦸꦒꦼꦢꦺꦔꦿꦸꦧꦸꦃꦲꦏꦺꦱꦏ꧀ꦥꦿꦱꦼꦥꦸꦭꦸꦃꦲꦺꦏꦸꦠꦭꦤ꧀ꦮꦺꦴꦁꦥꦶꦠꦸꦁꦲꦺꦮꦸꦩꦠꦶ꧉ꦮꦺꦴꦁꦮꦺꦴꦁꦱꦶꦁꦲꦶꦗꦶꦏ꧀ꦲꦸꦫꦶꦥ꧀ꦥꦢꦮꦼꦢꦶꦧꦔꦼꦠ꧀ ꦠꦼꦫꦸꦱ꧀ꦥꦢꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶꦄꦭ꧀ꦭꦃꦤꦁꦱ꧀ꦮꦂꦒ꧉
14꧋ꦏꦱꦁꦱꦫꦤ꧀ꦱꦶꦁꦥꦶꦤ꧀ꦢꦺꦴꦮꦶꦱ꧀ꦏ꧀ꦭꦶꦮꦠ꧀꧈ꦏꦱꦁꦱꦫꦤ꧀ꦱꦶꦁꦤꦺꦴꦩꦼꦂꦠꦼꦭꦸꦤ꧀ꦢꦁꦤꦸꦱꦸꦭ꧀꧈
15꧋ꦏꦢꦸꦁꦩꦸꦭꦺꦏꦠ꧀ꦤꦺꦴꦩꦼꦂꦥꦶꦠꦸꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈ꦤꦁꦱ꧀ꦮꦂꦒꦠꦼꦫꦸꦱ꧀ꦲꦺꦤꦺꦁꦱ꧀ꦮꦫꦱ꧀ꦮꦫꦧꦤ꧀ꦠꦼꦂꦲꦸꦤꦶꦤꦺꦔꦺꦤꦺ:“ꦥꦔ꧀ꦮꦱꦤꦺꦢꦺꦴꦚꦱꦲꦶꦏꦶꦢꦶꦕꦼꦏꦼꦭ꧀ꦏꦫꦺꦴꦒꦸꦱ꧀ꦠꦶꦤꦺꦲꦮꦏ꧀ꦏꦺꦢꦺꦮꦺꦭꦤ꧀ꦏꦿꦶꦱ꧀ꦡꦸꦱ꧀꧈ꦢꦺꦏ꧀ꦤꦺꦧꦏꦭ꧀ꦢꦢꦶꦫꦠꦸꦭꦤ꧀ꦚꦼꦏꦼꦭ꧀ꦥꦔ꧀ꦮꦱꦱ꧀ꦭꦮꦱ꧀ꦭꦮꦱ꧀ꦱꦺ꧉” 16ꦥꦫꦥꦶꦤꦶꦠꦸꦮꦥꦠ꧀ꦭꦶꦏꦸꦂꦱꦶꦁꦥꦢꦚ꧀ꦗꦒꦺꦴꦁꦤꦁꦢꦩ꧀ꦥꦂꦢꦩ꧀ꦥꦂꦤꦁꦔꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦠꦼꦫꦸꦱ꧀ꦥꦢꦱꦸꦗꦸꦠ꧀ꦩꦫꦁꦢꦺꦏ꧀ꦤꦺ꧉ 17ꦠꦼꦩ꧀ꦧꦸꦁꦔꦺ:
“ꦢꦸꦃꦒꦸꦱ꧀ꦠꦶꦄꦭ꧀ꦭꦃꦱꦶꦁꦏ꧀ꦮꦱꦢꦺꦮꦺ꧈
ꦱꦶꦁꦲꦺꦤꦺꦁꦱꦲꦶꦏꦶꦭꦤ꧀ꦩ꧀ꦧꦶꦪꦺꦤ꧀
ꦲꦮꦏ꧀ꦏꦺꦢꦺꦮꦺꦩꦠꦸꦂꦏꦼꦱꦸꦮꦸꦤ꧀
ꦲꦼꦁꦒꦺꦴꦤꦺꦒꦸꦱ꧀ꦠꦶꦒꦼꦊꦩ꧀ꦚꦼꦏꦼꦭ꧀ꦥꦔ꧀ꦮꦱꦤꦺꦱꦶꦁꦒꦼꦢꦺ
ꦭꦤ꧀ꦱꦲꦶꦏꦶꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱꦏꦸꦮꦶ꧉
18ꦮꦺꦴꦁꦮꦺꦴꦁꦱꦶꦁꦲꦺꦴꦫꦏꦼꦤꦭ꧀ꦩꦫꦁꦒꦸꦱ꧀ꦠꦶꦥꦢꦔꦩꦸꦏ꧀
ꦲꦮꦶꦠ꧀ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺꦲꦼꦁꦒꦺꦴꦤꦺꦒꦸꦱ꧀ꦠꦶꦧꦏꦭ꧀ꦔꦼꦠꦺꦴꦏ꧀ꦏꦏꦺꦤꦼꦱꦸꦤꦺ꧉
ꦮꦚ꧀ꦕꦶꦤꦺꦲꦸꦒꦮꦶꦱ꧀ꦠꦼꦏꦤ꧀ꦲꦼꦁꦒꦺꦴꦤꦺꦒꦸꦱ꧀ꦠꦶꦧꦏꦭ꧀ꦔꦿꦸꦠꦸꦮꦺꦴꦁꦮꦺꦴꦁꦱꦶꦁꦮꦶꦱ꧀ꦩꦠꦶ꧉
ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ
ꦒꦸꦱ꧀ꦠꦶꦧꦏꦭ꧀ꦔꦸꦥꦃꦲꦶꦥꦫꦥꦼꦭꦢꦺꦤ꧀ꦤꦺ꧈
ꦪꦏꦸꦮꦶꦥꦫꦤꦧꦶꦭꦤ꧀ꦏꦧꦺꦃꦲꦸꦩꦠ꧀ꦠꦺꦒꦸꦱ꧀ꦠꦶ꧈
ꦪꦏꦸꦮꦶꦏꦧꦺꦃꦮꦺꦴꦁꦱꦶꦁꦔꦧꦼꦏ꧀ꦠꦶꦩꦫꦁꦒꦸꦱ꧀ꦠꦶ꧈
ꦱꦶꦁꦕꦶꦭꦶꦏ꧀ꦭꦤ꧀ꦱꦶꦁꦒꦼꦢꦺ꧉
ꦱꦲꦶꦏꦶꦮꦶꦱ꧀ꦮꦚ꧀ꦕꦶꦤꦺꦒꦸꦱ꧀ꦠꦶꦔꦿꦩ꧀ꦥꦸꦁꦔꦏꦺꦏꦧꦺꦃꦮꦺꦴꦁꦱꦶꦁꦔꦿꦸꦱꦏ꧀ꦧꦸꦩꦶ꧉”
19꧋ꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦤꦁꦱ꧀ꦮꦂꦒꦠꦼꦫꦸꦱ꧀ꦩꦼꦔꦭꦤ꧀ꦏꦺꦴꦠꦏ꧀ꦮꦢꦃꦥꦽꦗꦚ꧀ꦗꦶꦪꦤ꧀ꦠꦼꦫꦸꦱ꧀ꦏꦺꦠꦺꦴꦏ꧀ꦤꦁꦏꦺꦴꦤꦺꦴ꧉ꦠꦼꦫꦸꦱ꧀ꦲꦺꦤꦺꦁꦏ꧀ꦭꦺꦭꦥ꧀ꦏ꧀ꦭꦺꦭꦥ꧀ ꦱ꧀ꦮꦫꦲ꦳ꦺꦴꦉꦏ꧀ꦭꦤ꧀ꦒꦸꦩ꧀ꦭꦸꦢꦸꦏ꧀ ꦲꦸꦒꦧꦸꦩꦶꦤꦺꦒꦺꦴꦪꦁꦒꦪꦶꦁꦭꦤ꧀ꦲꦸꦢꦤ꧀ꦲꦺꦱ꧀ꦱꦶꦁꦢꦼꦉꦱ꧀ꦧꦔꦼꦠ꧀꧈
| ← ꧇꧑꧐꧇ | ꧇꧑꧒꧇ → |