ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦌꦥ꦳ꦼꦱꦸꦱ꧀/4

Saka Wikisumber

ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​

꧋ꦱꦺꦗꦺ​ꦥꦼꦁꦒꦮꦺꦪꦤ꧀ꦏꦸ꧈​ꦱꦶꦗꦶ​ꦠꦸꦗꦸꦮꦤ꧀ꦤꦺ꧉​

꧇​꧔꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦶꦁ​ꦤꦁꦱꦼꦠꦿꦥꦤ꧀ꦗꦭꦂꦫꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧈​ ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​:ꦲꦩ꧀ꦧꦺꦴꦏ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦥꦤ꧀ꦠꦼꦱ꧀ꦭꦤ꧀ꦱꦶꦁ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦩꦁꦒꦶꦭ꧀ꦏꦺꦴꦮꦺ​꧉​ 2ꦥꦢ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧈​ꦱꦶꦁ​ꦲꦭꦸꦱ꧀ꦭꦤ꧀ꦱꦶꦁ​ꦱꦧꦂ​ꦩꦫꦁ​ꦱꦏ꧀ꦥꦢꦥꦢꦔꦁꦒꦺꦴ​ꦏꦠꦿꦺꦱ꧀ꦤꦤ꧀꧈​ 3ꦱꦏ꧀ꦧꦶꦱꦧꦶꦱꦩꦸꦥꦢ​ꦔꦸꦢꦶꦪ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦱꦶꦁ​ꦫꦸꦏꦸꦤ꧀ ꦲꦮꦶꦠ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ 4ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦩꦼꦱ꧀ꦠꦶꦮꦶꦱ꧀ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​ꦭꦤ꧀ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​ꦪ​ꦫꦺꦴꦃ​ꦱꦸꦕꦶ​ꦱꦶꦁ​ꦠꦸꦁꦒꦭ꧀ꦭꦺ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦏꦺꦴꦮꦺ​꧈​ꦥꦼꦔꦉꦥ꧀ꦲꦉꦥ꧀ꦩꦸ​ꦪ​ꦠꦸꦁꦒꦭ꧀ꦭꦺ​꧉​ 5ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶꦩꦸ​ꦪ​ꦠꦸꦁꦒꦭ꧀ꦭꦺ​꧈​ꦥꦼꦔꦤ꧀ꦢꦼꦭ꧀ꦩꦸ​ꦪ​ꦠꦸꦁꦒꦭ꧀ꦭꦺ​ꦭꦤ꧀ꦧꦥ꧀ꦠꦶꦱꦤ꧀ꦩꦸꦪ​ꦠꦸꦁꦒꦭ꧀ꦭꦺ​꧉​ 6ꦭꦤ꧀ꦩꦼꦤꦺꦃ​꧈​ꦤꦩꦸꦁ​ꦲꦺꦤꦺꦁꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦗꦶ​꧈​ꦧꦥꦏ꧀ꦏꦺꦭꦤ꧀ꦒꦸꦱ꧀ꦠꦶꦤꦺ​ꦏꦺꦴꦮꦺ​ꦏꦧꦺꦃ​꧉​ꦢꦺꦏ꧀ꦤꦺꦱꦶꦁ​ꦔꦁꦒꦺꦴꦏ꧀ꦏꦏꦺꦏꦺꦴꦮꦺ​ꦏꦧꦺꦃ​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦭꦤ꧀ꦢꦺꦏ꧀ꦤꦺꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​ꦏꦧꦺꦃ​꧉​

7꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦥꦢ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦢꦺꦮꦺꦢꦺꦮꦺ꧉​ꦏꦸꦮꦶ​ꦥꦮꦺꦃꦲꦺ​ꦏꦿꦶꦱ꧀ꦡꦸꦱ꧀ ꦱꦶꦁ​ꦔꦼꦏꦺꦏ꧀ꦏꦶꦩꦫꦁ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦠꦏꦼꦫꦤ꧀ꦤꦺꦢꦺꦏ꧀ꦤꦺꦢꦺꦮꦺ꧉​ 8ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦭꦤ꧀ꦏꦼꦠꦸꦭꦶꦱ꧀ꦔꦺꦤꦺ​ꦤꦁꦏꦶꦠꦧ꧀ꦱꦸꦕꦶ​:

“ꦢꦺꦏ꧀ꦤꦺꦩꦸꦁꦒꦃ​ꦱ꧀ꦮꦂꦒ​꧈​
ꦚꦁꦏꦶꦁ​ꦏꦧꦺꦃ​
ꦱꦶꦁ​ꦮꦶꦱ꧀ꦢꦶꦏꦭꦃꦲꦏꦺ
ꦭꦤ꧀ꦢꦺꦏ꧀ꦤꦺꦔꦼꦏꦺꦏ꧀ꦏꦶꦥꦮꦺꦃ
ꦩꦫꦁ​ꦩꦤꦸꦁꦱ​꧉​”

9ꦥꦫ​ꦱꦼꦢꦸꦭꦸꦂ​꧈​ꦭꦃ​ꦠꦼꦩ꧀ꦧꦸꦁ​“ꦩꦸꦁꦒꦃ​”ꦏꦸꦮꦶ​ꦲꦥ​ꦠ​ꦠꦼꦒꦼꦱ꧀ꦱꦺ​?ꦏꦸꦮꦶ​ꦠꦼꦒꦼꦱ꧀ꦱꦺ​:ꦱꦏ꧀ꦢꦸꦫꦸꦁꦔꦺꦏꦿꦶꦱ꧀ꦡꦸꦱ꧀ꦩꦸꦁꦒꦃ​ꦤꦁꦱ꧀ꦮꦂꦒ​꧈​ꦢꦺꦏ꧀ꦤꦺꦩꦼꦢꦸꦤ꧀​ꦤ꧀ꦢꦶꦱꦶꦏ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦏ꧀ꦔꦶꦱꦺꦴꦂꦫꦺ​ꦧꦸꦩꦶ​꧉​ 10ꦢꦢꦶꦤꦺ​꧈​ꦢꦺꦏ꧀ꦤꦺꦱꦶꦁ​ꦩꦼꦢꦸꦤ꧀ꦭꦤ꧀ꦢꦺꦏ꧀ꦤꦺꦲꦸꦒ​ꦱꦶꦁ​ꦩꦸꦁꦒꦃ​ꦢꦸꦮꦸꦂꦫꦺꦔ꧀ꦭꦶꦮꦠ꧀ꦠꦶ​ꦭꦔꦶꦠ꧀ ꦱꦸꦥꦪ​ꦧꦶꦱ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​ 11ꦪ​ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦩꦫꦁ​ꦮꦺꦴꦁꦮꦺꦴꦁ​:ꦲꦺꦤꦺꦁꦱꦶꦁ​ꦢꦢꦶ​ꦫꦱꦸꦭ꧀ ꦱꦭꦺꦴꦏ꧀ꦏꦺꦢꦢꦶ​ꦤꦧꦶ​꧈​ꦭꦶꦪꦤꦺ​ꦩꦼꦤꦺꦃ​ꦢꦢꦶ​ꦠꦸꦏꦁ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦱꦭꦺꦴꦏ꧀ꦏꦺꦩꦼꦤꦺꦃ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦭꦤ꧀ꦲꦸꦒ​ꦲꦺꦤꦺꦁꦱꦶꦁ​ꦢꦢꦶ​ꦒꦸꦫꦸ​꧉​ 12ꦏꦿꦶꦱ꧀ꦡꦸꦱ꧀ꦔꦼꦏꦺꦏ꧀ꦏꦶꦮꦺꦴꦁꦮꦺꦴꦁ​ꦲꦶꦏꦶ​ꦩꦫꦁ​ꦥꦱꦩꦸꦮꦤ꧀ꦤꦺꦏꦁꦒꦺꦴ​ꦲꦩ꧀ꦧꦔꦸꦤ꧀ꦏꦧꦺꦃ​ꦱꦶꦁ​ꦥꦢ​ꦥꦽꦕꦪ​꧈​ꦱꦸꦥꦪ​ꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ꦢꦢꦶꦤꦺ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀ꦱꦸꦮꦶꦱꦸꦮꦶꦧꦶꦱ​ꦠꦩ꧀ꦧꦃ​ꦫꦺꦴꦱ​꧉​ 13ꦤꦺꦏ꧀ꦧꦶꦱ​ꦔꦺꦴꦤꦺꦴ​꧈​ꦱꦸꦮꦶꦱꦸꦮꦶꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦧꦶꦱ​ꦢꦢꦶ​ꦱꦶꦗꦶ​ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦲꦶꦁ​ꦥꦔꦼꦂꦠꦶ​ꦧꦧ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦮꦺꦴꦁ​ꦱꦶꦁ​ꦢꦶꦮꦱ​ꦲꦶꦁ​ꦏꦱꦸꦏ꧀ꦩꦤ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦭꦤ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦏꦿꦶꦱ꧀ꦡꦸꦱ꧀꧈​ 14ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦲꦺꦴꦫ​ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦩꦼꦤꦺꦃ​꧈​ꦏꦪ​ꦲꦺꦴꦩ꧀ꦧꦏ꧀ꦫꦤꦫꦺꦤꦺ​ꦏꦠꦸꦠ꧀ꦲꦔꦶꦤ꧀ꦤꦺ​ꦥꦶꦮꦸꦭꦁ​ꦱꦶꦁ​ꦩꦺꦴꦭꦃꦩꦭꦶꦃ​꧉​ꦏꦸꦮꦶ​ꦥꦶꦮꦸꦭꦁꦔꦺ​ꦮꦺꦴꦁ​ꦱꦶꦁ​ꦔꦥꦸꦱ꧀ꦱꦶ​ꦏꦺꦴꦮꦺ​ꦭꦤ꧀ꦠꦸꦗꦸꦮꦤ꧀ꦤꦺꦤꦩꦸꦁ​ꦲꦉꦥ꧀ꦚꦤ꧀ꦢꦶꦁꦏꦺꦴꦮꦺ​ꦔꦁꦒꦺꦴ​ꦮꦼꦂꦤꦮꦼꦂꦤ​ꦲꦏꦭ꧀꧈​

15꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦼꦤꦺꦁꦔꦺꦴꦩꦺꦴꦁꦔꦏꦺꦧꦧ꧀ꦥꦶꦠꦸꦠꦸꦂ​ꦱꦶꦁ​ꦭꦶꦪꦤꦺ​꧈​ꦏꦼꦗꦧ​ꦤꦩꦸꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦱꦏ꧀ꦥꦢꦥꦢꦠꦼꦫꦸꦱ꧀ ꦱꦸꦥꦪ​ꦱꦸꦮꦶꦱꦸꦮꦶꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦿꦶꦱ꧀ꦡꦸꦱ꧀ ꦱꦼꦱꦶꦫꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧈​ꦲꦺꦴꦫ​ꦧꦺꦢ​ꦏꦪ​ꦧꦢꦤ꧀ꦏꦲꦺ​ꦩꦼꦱ꧀ꦠꦶꦪ​ꦩꦤꦸꦠ꧀ꦱꦶꦫꦃꦲꦺ​꧉​ 16ꦲꦸꦒ​ꦏꦪ​ꦧꦢꦤ꧀ꦏꦲꦺ​꧈​ꦱꦼꦤꦗꦤ꧀ꦱꦶꦏꦶꦭ꧀ꦠꦔꦤ꧀ꦤꦺꦔ꧀ꦒꦺꦴꦤ꧀ꦤꦺꦢꦺꦮꦺꦢꦺꦮꦺ꧈​ꦤꦁꦔꦶꦁ​ꦢꦢꦶ​ꦱꦶꦗꦶ​ꦭꦤ꧀ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ ꦱꦸꦥꦪ​ꦲꦮꦏ꧀ꦱꦏ꧀ꦏꦸꦗꦸꦂꦧꦶꦱ​ꦩꦸꦤ꧀ꦢꦏ꧀ꦒꦼꦢꦺꦭꦤ꧀ꦩꦸꦤ꧀ꦢꦏ꧀ꦫꦺꦴꦱ​꧉​ꦪ​ꦔꦺꦴꦤꦺꦴ​ꦏꦸꦮꦶ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦤꦠ​ꦥꦱꦩꦸꦮꦤ꧀ꦤꦺ꧉​ꦤꦺꦏ꧀ꦏꦧꦺꦃ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦥꦢ​ꦩꦼꦤꦸꦁꦒꦭ꧀ꦢꦢꦶ​ꦱꦶꦗꦶ​ꦭꦤ꧀ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦔꦁꦒꦺꦴ​ꦏꦠꦿꦺꦱ꧀ꦤꦤ꧀ ꦱꦸꦮꦶꦱꦸꦮꦶꦩꦼꦱ꧀ꦠꦶꦠꦼꦫꦸꦱ꧀ꦩꦸꦤ꧀ꦢꦏ꧀ꦏꦸꦮꦠ꧀ꦲꦼꦁꦒꦺꦴꦤꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦲꦸꦫꦶꦥ꧀ꦲꦚꦂ​ꦲꦶꦁ​ꦏꦿꦶꦱ꧀ꦡꦸꦱ꧀꧈​

17꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​:ꦲꦸꦫꦶꦥ꧀ꦩꦸ​ꦲꦩ꧀ꦧꦺꦴꦏ꧀ꦲꦗ​ꦥꦢ​ꦏꦪ​ꦲꦸꦫꦶꦥ꧀ꦥꦺꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧈​ꦱꦶꦁ​ꦤꦩꦸꦁ​ꦩꦶꦏꦶꦂ​ꦧꦫꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ 18ꦲꦔꦼꦤ꧀ꦤꦔꦼꦤ꧀ꦤꦺꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦏꦼꦥꦼꦠꦼꦁꦔꦼꦤ꧀ꦭꦤ꧀ꦲꦺꦴꦫ​ꦧꦶꦱ​ꦔꦿꦱꦏ꧀ꦏꦏꦺꦲꦸꦫꦶꦥ꧀ꦲꦚꦂ​ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦥꦢ​ꦔꦼꦂꦠꦶ​ꦧꦧ꧀ꦲꦶꦏꦶ​꧈​ꦗꦭꦂꦫꦤ꧀ꦥꦢ​ꦏꦏꦸ​ꦲꦠꦶꦤꦺ​꧉​ 19ꦮꦶꦱ꧀ꦲꦺꦴꦫ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦲꦶꦱꦶꦤ꧀​ꦧ꧀ꦭꦱ꧀꧈​ꦱꦼꦤꦼꦁꦔꦺ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦲꦭ​ꦭꦤ꧀ꦔꦸꦩ꧀ꦧꦂ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​

20꧋ꦤꦁꦔꦶꦁ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦸꦫꦶꦥ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦕꦺꦴꦕꦺꦴꦏ꧀​ꦧ꧀ꦭꦱ꧀ꦏꦫꦺꦴ​ꦥꦶꦮꦸꦭꦁꦔꦺ​ꦏꦿꦶꦱ꧀ꦡꦸꦱ꧀꧈​ 21ꦏꦺꦴꦮꦺ​ꦮꦶꦱ꧀ꦏꦿꦸꦔꦸ​ꦧꦧ꧀ꦏꦿꦶꦱ꧀ꦡꦸꦱ꧀ꦭꦤ꧀ꦮꦶꦱ꧀ꦢꦶꦮꦸꦭꦁꦔꦶꦕꦫꦤꦺ​ꦮꦺꦴꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦮꦶꦱ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ 22ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦩ꧀ꦧꦶꦪꦺꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦁꦒꦭ꧀ ꦲꦮꦶꦠ꧀ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦭ​ꦏꦸꦮꦶ​ꦱꦶꦁ​ꦚꦤ꧀ꦢꦶꦁꦭꦤ꧀ꦔꦿꦸꦱꦏ꧀ꦏꦺꦴꦮꦺ​꧉​ 23ꦥꦶꦏꦶꦂꦫꦤ꧀ꦩꦸ​ꦏꦸꦢꦸ​ꦩꦭꦶꦃ​ꦱꦏ꧀ꦏꦧꦺꦃꦲꦺ꧉​ 24ꦱꦲꦶꦏꦶ​ꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦲꦚꦂ​꧈​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​꧈​ꦲꦸꦫꦶꦥ꧀ꦱꦶꦁ​ꦧꦼꦤꦼꦂ​ꦭꦤ꧀ꦱꦶꦁ​ꦱꦸꦕꦶ​꧉​

25꧋ꦩꦸꦭꦤꦺ​꧈​ꦲꦗ​ꦥꦢ​ꦒꦺꦴꦫꦺꦴꦃ​ꦩꦼꦤꦺꦃ​ꦩꦫꦁ​ꦱꦏ꧀ꦥꦢꦥꦢ꧈​ꦤꦁꦔꦶꦁ​ꦤꦺꦏ꧀ꦔꦺꦴꦩꦺꦴꦁꦱꦶꦁ​ꦱꦏ꧀ꦧꦼꦤꦼꦂꦫꦺ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​ꦮꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​꧈​ꦪꦏꦸꦮꦶ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀꧈​ 26ꦤꦺꦏ꧀ꦏꦺꦴꦮꦺꦤꦼꦱꦸꦏꦫꦺꦴꦱꦥꦱꦥ꧈​ꦲꦗꦱꦩ꧀ꦥꦺꦏ꧀ꦠꦼꦫꦸꦱ꧀​ꦔ꧀ꦭꦏꦺꦴꦤ꧀ꦤꦶꦱꦶꦁꦲꦭ꧉​ꦤꦼꦱꦸꦩꦸꦲꦗꦢꦶꦲꦼꦤ꧀ꦢꦼꦩ꧀ꦲꦶꦁꦲꦠꦶꦔꦤ꧀ꦠꦶꦱꦼꦢꦶꦤꦱꦸꦮꦺꦤꦺ꧈​ꦤꦁꦔꦶꦁꦤ꧀ꦢꦁꦢꦶꦧꦸꦮꦁ꧉​ 27ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦔꦼꦏꦺꦏ꧀ꦏꦶꦢꦭꦤ꧀ꦩꦫꦁ​ꦱꦺꦠꦤ꧀꧈​ 28ꦮꦺꦴꦁ​ꦱꦶꦁ​ꦩꦲꦸꦤꦺ​ꦠꦸꦏꦁ​ꦚꦺꦴꦭꦺꦴꦁ​꧈​ꦱꦲꦶꦏꦶ​ꦲꦗ​ꦚꦺꦴꦭꦺꦴꦁ​ꦩꦼꦤꦺꦃ​꧈​ꦩꦭꦃ​ꦥꦢ​ꦚꦩꦫꦶꦤꦺꦒꦮꦺ​ꦔ꧀ꦒꦺꦴꦭꦺꦏ꧀ꦥꦔꦤ꧀ꦤꦺ​ꦢꦺꦮꦺꦭꦤ꧀ꦏꦁꦒꦺꦴ​ꦤꦸꦭꦸꦁꦔꦶ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧉​ 29ꦲꦗꦥꦢꦔꦁꦒꦺꦴꦏ꧀ꦏꦏꦺꦠꦼꦩ꧀ꦧꦸꦁꦱꦶꦁꦲꦺꦴꦫꦲꦥꦶꦏ꧀ ꦱꦶꦁꦚꦺꦴꦕꦺꦴꦏ꧀ꦲꦠꦶꦤꦺꦮꦺꦴꦁꦭꦶꦪ꧉​ꦲꦥꦶꦏ꧀ꦏꦺꦩꦭꦃꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦱꦶꦁꦧꦶꦱꦔ꧀ꦭꦶꦥꦸꦂ꧉​ꦢꦢꦶꦤꦺꦱꦶꦁꦩ꧀ꦧꦺꦴꦏ꧀ꦲꦺꦴꦩꦺꦴꦁꦧꦶꦱꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴꦮꦺꦴꦁꦮꦺꦴꦁꦱꦶꦁꦔꦿꦸꦔꦺꦴꦏ꧀ꦏꦏꦺ꧉​ 30ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦔ꧀ꦒꦮꦺ​ꦱꦼꦢꦶꦤꦺꦫꦺꦴꦃ​ꦱꦸꦕꦶ​꧈​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦲꦶꦏꦶ​ꦠꦤ꧀ꦢꦤꦺꦤꦺꦏ꧀ꦏꦺꦴꦮꦺ​ꦮꦶꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦫꦺꦴꦃ​ꦱꦸꦕꦶ​ꦱꦶꦁ​ꦧꦏꦭ꧀ꦔꦿꦺꦮꦁꦔꦶ​ꦏꦺꦴꦮꦺ​ꦠꦼꦫꦸꦱ꧀ꦔꦤ꧀ꦠꦶ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦏꦺꦴꦮꦺ​ꦧꦏꦭ꧀ꦢꦶꦭꦸꦮꦂꦫꦶ​ꦱꦏ꧀ꦏꦧꦺꦃꦲꦺꦱꦁꦏꦥꦔ꧀ꦮꦱꦤꦺ​ꦲꦭ​꧉​ 31ꦥꦢ​ꦢꦶꦧꦸꦮꦁ​ꦏꦧꦺꦃ​ꦫꦱ​ꦗꦺꦁꦏꦺꦭ꧀ꦭꦤ꧀ꦤꦼꦱꦸ​ꦭꦤ꧀ꦲꦗ​ꦥꦢ​ꦔ꧀ꦒꦼꦤ꧀ꦠꦏ꧀​ꦔ꧀ꦒꦼꦤ꧀ꦠꦏ꧀ꦭꦤ꧀ꦲꦗ​ꦥꦢ​ꦔꦺꦴꦩꦺꦴꦁꦲꦭ​ꦧꦧ꧀ꦭꦶꦪꦤꦺ​꧉​ꦲꦸꦒ​ꦫꦱ​ꦱꦼꦔꦶꦠ꧀ ꦲꦗ​ꦢꦶꦲꦼꦤ꧀ꦢꦼꦩ꧀ ꦤꦁꦔꦶꦁ​ꦢꦶꦧꦸꦮꦁ​꧉​ 32ꦲꦥꦶꦏ꧀ꦏꦺ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦥꦢ​ꦧꦼꦕꦶꦏ꧀ꦭꦤ꧀ꦒꦼꦩꦠꦶ​ꦩꦫꦁ​ꦱꦏ꧀ꦥꦢꦥꦢ꧉​ꦱꦶꦁ​ꦱꦭꦃ​ꦥꦢ​ꦢꦶꦔꦥꦸꦫ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦔꦥꦸꦫ​ꦩꦫꦁ​ꦏꦺꦴꦮꦺ​ꦏꦧꦺꦃ​ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀꧈​

↑ ↑ ↑

← ꧇​꧓꧇​   ꧇​꧕꧇​ →