Kakawin Wṛttasañcaya (Hendrik Kern)
_____
awighnamastu.
sang hyang wāgīçwarīndah lihati satatabhaktingkwi jöng dhātṛdewī |
pinrih ring citta munggwing sarasija ri dalĕmtwas lanenastawangku ||
nityāwehang warānugraha kaluputa ring duhka sangsāra wighna |
lāwantāstu wruheng çāstra sakalaguṇanning janma tapwanhanewĕh || 1[1] ||
nāhandonkwājapāngarccana ri sira kĕdö mrākṛtāng candaçāstra |
mangke tingkahnya pintonakĕna gumawayang wṛddhyaning wālabuddhi ||
sangkyāning warṇna munggwing sapada ta nginaran canda ling sang kawīndra |
patsangkyānyang pada byakta dadi sakakawin monumunggwing palāmbang || 2[2] ||
tunggalsangkyaningakṣare sapada huktāranya tapwankalen |
yan rwātyukta ngaranya yantiga tikang warṇnāngaranmadhyama ||
yapwanpatmangaran pratiṣṭha milu tekang supratiṣṭhanlima |
gāyatrī nĕmangakṣaranya huningan syuṣṇik ngaranyāpitu || 3[3] ||
byakteki wwalungakṣaranya sapadānuṣṭup ngaranyātĕhĕr |
ndah yapwansangangakṣaranya wṛhatī nāmanya kapwāpagĕh ||
manggĕh yansapuluh si pangkti sawĕlas triṣṭāpanāmeriya |
yapwan dwādaça yekyanāma jagatī ngke rāmasarmmenucap || 4[4] ||
yan warṇna tridaça pwayātijagatī yanpadbĕlas çakwarī |
gangsalwlas ya tikātiçakwarī masangjñāṣṭi pwa yan ṣoḍaça ||
atyaṣṭīki ngaranya yanpituwĕlas yapwan wwaluwlas dhṛti |
byaktātidhṛti yanwilang sangawĕlas kṛtyākyaning wingçati || 5[5] ||
yansangkyā nikangakṣaranya salikuryekāngaran prākṛti |
dwāwingçatpwa wilang nikeng sapada warṇnanyā ngaranyākṛti ||
yekī wīkṛti nāma yantīgalīkuryan padlikursangskṛti |
kapwābhīkṛti yanwilang limalikuryannĕmlikurwyutkṛti || 6 ||
hanghing sangkyaningakṣareng sapada yekā canda koktengaji |
yapwanlintanga ḍĕṇḍakāngaranikī mālāwa lengadyaka ||
wṛttanyeki muwah yatājarakĕn angkun kokta ring pinggala /
tingahning guru len parungguni laghunyekāpadudwan naran // 7 //
yadyastun pada sangkyaning yati lamun gurulaghunika bheda ring tata /
yāwat mangkana tang prayaga nikanang gurulaghu patatanya kawruhi //
tāwatbeda ngaranya ring sapada yeki hinikĕtakĕn an tatan salah /
wyaktinyeki nihan rĕngön karacanan hyun inikĕtakĕn ing palambanga // 8 //
a /
na //
nda /
yang // 9 // (nanda)
dewī /
gorī //
bhadrā /
saśrī // 10 // (bhadrāśrīwaneh)
hyang bhrahmā /
mwang wiṣṇu //
bāṇī śrī /
nārī hyang // 11 // (nārī)
sahana sang /
sura kabeh //
cinaru ring /
wanamṛgī // 12 // (wanamṛgī)
donku n amūjā /
ring surasanggha //
mwang stutini ngwang /
oṃ wijayanti // 13 // (wijayanti)
ngwang mrākṛta wṛtta /
panggil tiki rakwa /
mangdeya lulutning /
kanyā tanumadhyā // 14 // (tanumadhyā)
kṣamakĕna ta ngwang /
tĕkapira sang wruh //
nguni-uni sakweh /
kusumita janma // 15 // (kusumitajanma)
kĕcapi kawirasa /
ndi tan amuhara kung //
pahi mara kalawan /
madhukaralalita // 16 // (madhukaralalita)
āpan mūḍa dahat ngwang /
tan wruh ring rasamātra //
manggĕh yan cacadĕn ngwang /
rehnya lwir madaleka // 17 // (madaleka)
ndatan turidaha ngwang /
apan tuhu mapunggung //
kĕdö manutakĕn kung /
kumāralalitāswi // 18 // (kumāralalitā)
waktraning cariteng lambing /
strī wiyoga dinohan sih //
sakṣaṇāngdani duhkāgĕng /
tan wruh ing daya yan kāngĕn // 19 // (waktra)
yan ing rātrī tatan pāmrĕm /
bhramīteng twas wimohita //
nāhan lingnira sang kakung tĕlas adan mantuk lumampah sira |
ndātan sah madulur tikang wihaga tut mārggālangö lālana ||
tan waktan gatining hawan krama huwus prāptî dalĕmning puri |
rāmyāwor turideng paturwana ngajöng sihning makārwan lulut || 108 ||
anghing hinghaniking palāmbang agurit mpu Tanakung atimūḍa duryaça |
candaprākṛta wṛttaning guru lawan laghu racanika ndatan kalen ||
akweh wṛtta turung lining mami palenakĕna muwahi kopalakṣaṇan |
yan ring pinggalaçāstra kewala kadîkang inajarakĕn ing palambanga || 109[6] ||
tuhun sahana sang kawîndra mangupakṣamā ri nghulun |
gatingku n angikĕt palambanga kurang raras tan padon ||
tĕhĕr matiki wṛttasañcaya ngaranya dening mangö |
palar magawayang wiçuddha ri manahning anggöng langö || 110 ||
sāmpun prākṛtaning mangö yatika warṇna tanuhuti manahnya duryyaça |
wetning bhranta wisāṭa kārwa lĕpihan panamukika riringranging hati ||
āpan tan hana tang wĕnang mawĕlase sagati nikin atīta kāsy asih |
nora ng hetu maśabda kewala samângguyu-guyu ri kapinggingi nghulun || 111[7] ||
ndan hantusākĕna damĕl Tanakung palambang |
arddhākikuk tan alangö tan amĕtwakĕn kung ||
sotanya n antuk ikang aspada ring kalangwan |
kawyênjuh anwam inucap magawe panas twas || 112 ||
iti wṛttasañcaya || cakrawākadūta carita || tanakung ||