Sénapati adining prang, soelihé oewa Djin Koe Wi." Sigra pangéran dipatya, njanḍak gelas isi awis, sarwi ngandika manis: „Manira paring sirèkoe, salamet tigang gelas, moegi-moegi mbangkat kardi, bisa toeloeng rama Praboe nèng kepoengan.”
Sik Ting San nampani gelas, inginoem ping tiga enting, Dyah Ko Kim matoer wotsekar: „Noewoen anggèr dipoen aglis, pandjenengan ḍawoehi, pra sentana ingkang kantoen, kinèn saḍija dandan, béndjing-éndjing patjak baris, mbantoe joeda oepami ḍanḍang dahana.
29. Ḍanḍanggoela.
Woes kedangon waoe Sriboepati, ngarsa-arsa bebantoe praptanja." Pangéran dipati anèm, ḍawah mring mantri toegoer: „Ḍawoehena paréntah-mami. mring para poetra-poetra, adja na kang kantoen, konen dandan pradjoeritan, béndjing-éndjing mangkat mbantoni ramadji." Mantri djaga mit nembah.
Djeng pangéran ngeḍaton toemoeli, ing paséban poenggawa boebaran, mantri moendi timbalané, woes doemawoeh sadaroem, para poetra-poetra pradjoerit, sadaloe aboesekan, dandan koeda lawoeng, miwah wadya-bala tata, sangoe-sangoe sadaja samja tjoemawis, bjar rahina tengara.
