Dandanggula
Sang Ratu Wadat ngandika aris, sira Wudjil dèn kaparèng ngarsa, tur dèn asta kekutjiré, sarwi ingelus-elus, tibaning sih ing sabda wadi, lah Wudjil rungokena, ing sasmitaningsun, lamun sira kalebuwa, ing naraka pan ingsun ingkang ngleboni, adja kuwatir sira.
Sigra Wudjil sira asung bekti, matur maring Kang Sinembah ika, sakalangkung panuwuné, sampun inggih Pukulun, leheng dasihipun pun Wudjil, mandjinga ing naraka, pun Wudjil sawegung, pan sami wruhira tjipta, guru lawan ing abdi tan slajeng kapti, apan saéka-praja.
Pèngetingsun marang sira Wudjil, dipun njata urip anèng dunja, adja sabaran ing gawé, kawruhana dèn èstu, sariranta pan dudu djati, kang djati dudu sira, sing sapa kang weruh, ing sarirané prijangga, sasat weruh Pangérané kang sadjati, iku marga utama.
Utamané sarira puniki,ngawruhana sadjatining salat, sembahhjang lawan pudjiné, djatiné salat iku, dudu 'isja dudu mahgerib, sembahhjang aranira, wenangé puniku, lamun aranana salat, pan minangka kembanganing salat daim, ingaran tatakrama.
Sembahhjangé wong kang sampun luwih, lumaku linggih turu. asalat, enengé dadi sembahé, nora awektu-wektu, sembahhjangé kang tan udani, kadya anulup gagak, pungluné dèn sawur, manuké masa kenaa, abèn-abèn amangéran 'adam sarfin, sembahé sija-sija.
Sira Wudjil ing ngaurip iki, adja nembah jèn tan katingalan, temahé asor kulané, ing wong kaum puniku, tuwang-tuwang dèn kabekteni, anembah ing brahala, madep maring watu, dèn sidep ana ing kana, Pangérané kaja ana luhur langit, iku sembah kesasar.
Endi kang aran pudji sadjati, amudjija dalu lan rahina, jèn tan kalawan tuduhé, tan sampurna ing laku, lamun sira arsa amudji, dèn wruh ing napasira, mandjing-wetunipun, kang atuduh ananing Hjang, pandjing metu ing napas dipun udani, suksma patang prakara.
Tjatur prakara 'anasir bumi, geni angin lawan toja ika, samana auk panapelé, sifat tjatur puniku, djalal kahar djamal lan kamil, katrapan sifating Hjang, wuwuh lungguhipun, lampahé mungguh sarira, mandjing metu dèn weruh ing prenahnèki, jèn mandjing ndi nggonira.Bénang=Bonang.
5
