Kaca:Mardi Basa lan Sastra Jawi 1.pdf/55

W U L A N G A N VI

I.A. Pacelathon

Tindakna !

Cariyos Bratayuda

Irawan	:	“Mbah, kula nyuwun dongeng."
Embah	:	"Kok kadingaren kowe nyuwun dongeng Simbah; malah Embah critanana kabare jaman saiki, kowe luwih ngerti."
Irawan	:	“Leres Mbah, menawi bab kabar jaman sapunika rak sampun kawrat ing serat kabar utawi radhio.”
Embah	:	“Sing kokarepake crita apa ta, Le ?”
Irawan	:	“Pak guru kula punika kok ngendikakaken lampahan Bratayuda.”
Embah	:	“Lha nyuwuna priksa gurumu rak wijang.”
Irawan	:	“Temtunipun mekaten, Mbah. Nanging, duka kok malah dhawuh nyuwun priksa dhateng Embah.”
Embah	:	"O, ngono, ta. Ya bener ngendikane bapak gurumu kuwi. Amarga, ndongeng Bratayuda kuwi ora rampung sawengi rong wengi, yen didongengake ana sekolahan mesthine banjur ngentekake wektu.”
Irawan	:	"Kinten kula leres ngendikanipun Embah punika, awit satunggal minggu namung dipun wucal basa Jawi kaping kalih.”
Embah	:	"Mula kuwi, bapak gurumu ora kleru, tur gamblang banget yen nyritakake lakon Bratayuda kuwi.”

Mbs-1- 53