ꦔꦃꦧꦔꦼꦠ꧀꧈ꦱꦧꦧ꧀ꦏꦶꦫꦏꦸꦏꦥꦶꦠꦤ꧀ Orme ꦏꦸꦮꦶꦲꦏꦺꦃꦧꦔꦼꦠ꧀ꦒꦸꦤꦤꦼꦠꦸꦩꦿꦥ꧀ꦥꦼꦲꦏꦸꦏꦧꦺꦃꦪꦏꦧꦺꦃꦪꦺꦤ꧀ꦮꦶꦱ꧀ꦲꦉꦥ꧀ꦲꦉꦥ꧀ꦥꦤ꧀ꦏꦫꦺꦴꦮꦺꦴꦁ Fung꧉ꦏꦗꦧꦲꦶꦏꦸ꧈ꦱꦼꦂꦱꦤ꧀ Quick ꦩꦼꦱ꧀ꦛꦶꦤꦼꦫꦏ꧀ꦲꦶꦪꦩꦶꦭꦸꦝꦺꦮꦺꦏ꧀ꦏꦼ꧈ꦮꦸꦱꦤꦤꦼꦏꦥꦿꦶꦪꦼꦢꦢꦶꦤꦼꦲꦏꦸꦏꦧꦺꦃꦪꦺꦤ꧀ꦲꦺꦴꦫꦲꦤꦏꦸꦮꦶ꧉ꦧꦧ꧀ꦥꦸꦤꦶꦏꦧꦺꦴꦠꦼꦤ꧀ꦮꦠꦮꦶꦱ꧀ꦭꦩꦶꦭꦗꦼꦁꦏꦸꦭꦉꦩ꧀ꦧꦒ꧀ꦏꦭꦶꦪꦤ꧀ꦱꦼꦂꦱꦤ꧀ Quick꧉ꦱꦼꦂꦱꦤ꧀ Quick ꦩꦶꦉꦁꦔꦏꦼꦤ꧀ꦏꦤ꧀ꦛꦶꦠꦼꦩꦼꦤ꧀ꦠꦼꦩꦼꦤ꧀ꦝꦠꦼꦁꦥꦩꦁꦒꦶꦃꦒꦶꦃꦏꦸꦭꦲꦶꦁꦔꦶꦁꦒꦶꦭ꧀ꦮꦲꦸ꧈ꦱꦭꦗꦼꦁꦔꦶꦥꦸꦤ꧀ꦤꦸꦤ꧀ꦠꦼꦤ꧀ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ ꦱꦩ꧀ꦥꦸꦤ꧀ꦢꦢꦺꦴꦱ꧀ꦥꦁꦒꦭꦶꦃꦧꦤ꧀ꦢꦫ꧈ꦏꦶꦤ꧀ꦠꦼꦤ꧀ꦏꦸꦭ꧈ꦥꦩꦁꦒꦶꦃꦥꦚ꧀ꦗꦼꦤꦼꦁꦔꦤ꧀ꦥꦸꦤꦶꦏꦲꦶꦁꦒꦶꦃꦱꦲꦼꦲꦶꦁꦒꦶꦃꦧꦺꦴꦠꦼꦤ꧀꧈ꦱꦢꦪꦱꦢꦪꦥꦸꦤꦶꦏꦮꦺꦴꦤ꧀ꦠꦼꦤ꧀ꦠꦶꦠꦶꦩ꧀ꦧꦁꦔꦤ꧀ꦤꦶꦥꦸꦤ꧀꧉ꦏꦸꦭꦱꦢꦪꦧꦺꦴꦠꦼꦤ꧀ꦒꦸꦩꦸꦤ꧀ꦝꦠꦼꦁꦠꦶꦠꦶꦪꦁꦲꦶꦁꦏꦁꦲꦂꦠꦤꦶꦥꦸꦤ꧀ꦩꦶꦩ꧀ꦭꦶꦪꦸꦤ꧀ꦤꦤ꧀꧈ꦲꦤꦔꦶꦁꦲꦶꦁꦏꦁꦏꦸꦭꦒꦸꦩꦸꦤ꧀ꦤꦶꦲꦶꦁꦒꦶꦃꦲꦂꦠꦤꦶꦥꦸꦤ꧀ꦲꦶꦁꦏꦁꦩ꧀ꦭꦶꦪꦸꦤ꧀ꦤꦤ꧀ꦥꦸꦤꦶꦏ꧉ꦲꦤꦔꦶꦁꦩꦤꦮꦶꦠꦶꦠꦶꦪꦁꦮꦲꦸꦢꦸꦩꦸꦒꦶꦤꦶꦁꦥꦼꦗꦃ꧈ꦲꦂꦠꦤꦶꦥꦸꦤ꧀ꦲꦶꦁꦏꦁꦩꦶꦩ꧀ꦭꦶꦪꦸꦤ꧀ꦤꦤ꧀ꦮꦲꦸꦫꦏ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦧꦼꦏ꧀ꦠ꧈ꦲꦩꦶꦭꦫꦏ꧀ꦭꦗꦼꦁꦮꦺꦴꦤ꧀ꦠꦼꦤ꧀ꦥꦫꦶꦧꦱꦤ꧀ꦤꦶꦥꦸꦤ꧀ꦮꦭꦤ꧀ꦢꦶꦩꦏꦠꦼꦤ꧀꧇ ꦱꦶꦁꦱꦶꦗꦶꦩꦠꦶ꧈ꦭꦶꦪꦤꦼꦲꦺꦤ꧀ꦠꦸꦏ꧀ꦫꦺꦴꦠꦶ꧉ꦧꦤ꧀ꦢꦫꦏꦥ꧀ꦠꦶꦤ꧀ꦱꦩ꧀ꦥꦸꦤ꧀ꦱꦸꦩ꧀ꦥꦃꦧꦝꦼꦠꦸꦩꦸꦠ꧀꧈ꦱꦩꦁꦏꦼꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦏꦂꦱꦔꦼꦮꦃꦲꦶꦱꦸꦩ꧀ꦥꦃꦲꦶꦥꦸꦤ꧀ꦮꦲꦸ꧉ꦏꦗꦮꦶꦥꦸꦤꦶꦏ꧈ꦮꦺꦴꦤ꧀ꦠꦼꦤ꧀ꦲꦶꦁꦭꦺꦴꦤ꧀ꦝꦼꦤ꧀ꦏꦸꦭꦱꦩ꧀ꦥꦸꦤ꧀ꦩꦠꦸꦂ꧈ꦧꦶꦭꦶꦃꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦥꦼꦗꦃꦲꦶꦁꦏꦁꦩꦭꦺꦱꦺꦢ꧀ꦱꦩꦼꦤꦶꦠ꧀ꦱꦏꦶꦁꦠꦏ꧀ꦢꦶꦂꦫꦶꦥꦸꦤ꧀꧈ꦭꦤ꧀ꦧꦝꦼꦧꦺꦴꦠꦼꦤ꧀ꦩꦁꦒꦶꦃꦥꦸꦤꦥꦥꦸꦤꦥꦲꦶꦁꦏꦁꦩꦫꦺꦴꦗꦺꦴꦭ꧀ꦱꦏꦶꦁꦠꦏ꧀ꦢꦶꦂꦫꦶꦥꦸꦤ꧀꧈ꦢꦢꦺꦴꦱ꧀ꦧꦺꦴꦠꦼꦤ꧀ꦥꦽꦭꦸꦔꦽꦩ꧀ꦧꦒ꧀ꦧꦫꦁꦧꦫꦁꦲꦶꦁꦏꦁꦩꦼꦱ꧀ꦛꦶꦧꦝꦼꦏꦭꦩ꧀ꦥꦃꦲꦤ꧀ꦲꦸꦠꦮꦶꦲꦶꦁꦏꦁꦧꦝꦼꦧꦺꦴꦠꦼꦤ꧀ꦏꦭꦩ꧀ꦥꦃꦲꦤ꧀꧉ꦱꦩꦁꦏꦼꦏꦸꦭꦚꦸꦮꦸꦤ꧀ꦥꦩꦶꦠ꧀ꦧꦝꦼꦤꦸꦮꦺꦤ꧀ꦤꦶꦲꦸꦤ꧀ꦠꦲꦸꦤ꧀ꦠꦭꦤ꧀ꦥꦤ꧀ꦢꦸꦁꦲꦮꦺꦴꦤ꧀ꦲꦮꦺꦴꦤ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦮꦱ꧀ꦠꦤ꧀ꦤꦶꦠꦶꦠꦶꦪꦁ ꦄꦨꦠꦶ꧉ꦠꦶꦠꦶꦪꦁꦮꦲꦸꦱꦩꦶꦚꦺꦴꦭꦺꦴꦁꦱꦕꦤ꧀ꦝꦏ꧀ꦕꦤ꧀ꦝꦏ꧀ꦏꦶꦥꦸꦤ꧀꧈ꦏꦭꦮꦶꦔꦶꦱꦩꦶꦚꦺꦴꦭꦺꦴꦁꦧꦸꦩ꧀ꦧꦸꦤꦶꦁꦝꦶꦤꦩꦶꦠ꧀꧈ꦧꦺꦴꦏ꧀ꦩꦤꦮꦶꦢꦶꦥꦸꦤ꧀ꦏꦶꦤ꧀ꦠꦼꦤ꧀ꦱꦼꦊ꧉ꦩꦤꦮꦶꦏꦸꦭꦱꦢꦪꦧꦺꦴꦠꦼꦤ꧀ꦗꦒꦶꦗꦒꦶꦱꦪꦼꦏ꧀ꦠꦺꦴꦱ꧀꧈ꦧꦺꦴꦏ꧀ꦩꦤꦮꦶꦥꦫꦫꦗꦫꦗꦲꦶꦁꦏꦁꦱꦸꦩꦂꦫꦼꦲꦶꦁꦔꦿꦶꦏꦶꦱꦩꦶꦢꦶꦥꦸꦤ꧀ꦲꦺꦴꦭꦏ꧀ꦲꦭꦶꦏ꧀ꦢꦼꦤꦶꦁꦠꦶꦠꦶꦪꦁꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦥꦱꦉꦪꦤ꧀ꦤꦶꦥꦸꦤ꧀꧉
꧋ꦱꦭꦗꦼꦁꦔꦶꦥꦸꦤ꧀ Quick ꦭꦗꦼꦁꦏꦼꦱꦃ꧈ꦭꦤ꧀ꦏꦸꦭꦱꦢꦪꦭꦗꦼꦁꦧꦶꦝꦭ꧀ꦝꦠꦼꦁꦩꦸꦂ꧉
꧋ꦭꦭꦩ꧀ꦥꦃꦲꦤ꧀ꦲꦶꦁꦏꦁꦏꦥꦶꦁꦏꦭꦶꦃ꧈ꦲꦶꦁꦏꦁꦥꦤ꧀ꦠꦼꦱ꧀ꦏꦕꦫꦶꦪꦺꦴꦱ꧀ꦱꦏꦼꦤ꧀ꦲꦶꦁꦔꦿꦶꦏꦶ꧈ꦲꦶꦁꦒꦶꦃꦥꦸꦤꦶꦏꦤꦭꦶꦏꦏꦸꦭꦱꦢꦪꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶ꧈ꦏꦶꦫꦁꦭꦁꦏꦸꦁꦏꦭꦶꦃꦮꦸꦭꦤ꧀꧉
꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦩꦶꦁꦒꦸꦏꦸꦭꦱꦢꦪꦭꦸꦩꦩ꧀ꦥꦃꦲꦸꦫꦸꦠ꧀ꦱꦒꦤ꧀ꦠꦼꦤ꧀ꦮꦼꦝꦶ꧈ꦲꦶꦁꦏꦁꦔꦼꦭꦔꦸꦠ꧀ꦠꦤ꧀ꦥꦠꦼꦥꦶ꧈ꦱꦂꦠꦲꦶꦁꦏꦁꦚꦼꦝꦶꦃꦲꦶ꧈ꦱꦲꦏꦊꦉꦱ꧀ꦏꦮꦤ꧀ꦮꦼꦭꦱ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦏꦥꦶꦠꦤ꧀ Orme ꦲꦁꦱꦭ꧀ꦱꦒꦮꦺꦴꦤ꧀꧈ꦲꦶꦁꦏꦁꦏꦤꦩꦏ꧀ꦲꦏꦼꦤ꧀ Pharaoh꧈ꦏꦸꦭꦱꦢꦪꦭꦗꦼꦁꦢꦸꦩꦸꦒꦶꦲꦶꦁꦥꦝꦼꦏꦃꦲꦤ꧀ꦱꦠꦼꦔꦃꦲꦶꦁꦱꦒꦤ꧀ꦠꦼꦤ꧀ꦮꦼꦝꦶ꧈ꦤꦩꦤꦶꦥꦸꦤ꧀ꦥꦝꦼꦏꦃꦲꦤ꧀ Zeu꧉ꦥꦝꦼꦏꦃꦲꦤ꧀ꦥꦸꦤꦶꦏꦲꦶꦁꦒꦶꦃꦊꦉꦱ꧀ꦧꦺꦴꦠꦼꦤ꧀ꦮꦶꦪꦂꦱꦔꦼꦠ꧀꧈ꦲꦤꦔꦶꦁꦠꦸꦏ꧀ꦠꦸꦏ꧀ꦏꦶꦥꦸꦤ꧀ꦲꦶꦁꦔꦿꦶꦏꦸꦱꦲꦼ꧈ꦠꦺꦴꦪꦤꦶꦥꦸꦤ꧀ꦧꦼꦤꦶꦁꦱꦂꦠꦚꦼꦒꦼꦂꦫꦶ꧈ꦭꦤ꧀ꦮꦺꦴꦤ꧀ꦠꦼꦤ꧀ꦥꦏꦼꦧꦺꦴꦤ꧀ꦤꦤ꧀ꦤꦶꦥꦸꦤ꧀ꦏꦸꦂꦩ꧉ꦥꦤꦩ꧀ꦥꦶꦤꦶꦥꦸꦤ꧀ꦠꦶꦠꦶꦪꦁꦲꦶꦁꦔꦿꦶꦏꦸꦝꦠꦼꦁꦏꦸꦭꦱꦢꦪꦫꦸꦩꦏꦼꦠ꧀ꦱꦔꦼꦠ꧀꧈ꦗꦭꦂꦫꦤ꧀ꦏꦭꦏꦼꦱꦃꦏꦸꦭꦲꦶꦁꦏꦁꦫꦸꦩꦶꦪꦶꦤ꧀꧈ꦏꦸꦭꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦲꦚ꧀ꦗꦩ꧀ꦥꦺꦤ꧀ꦤꦶꦭꦸꦫꦃꦲꦶꦥꦸꦤ꧀ꦥꦝꦼꦏꦃꦲꦤ꧀ꦔꦿꦶꦏꦸꦗꦭꦂꦫꦤ꧀ꦱꦏꦶꦠ꧀ꦩꦿꦶꦥꦠ꧀꧈ꦭꦤ꧀ꦠꦶꦪꦁꦠꦶꦪꦁꦱꦤꦺꦱ꧀ꦱꦶꦥꦸꦤ꧀ꦲꦶꦁꦏꦁꦱꦩꦶꦤꦤ꧀ꦝꦁꦱꦏꦶꦠ꧀ꦮꦂꦤꦶꦮꦂꦤꦶ꧉ꦱꦤꦢꦾꦤ꧀ꦏꦸꦭꦏꦥꦼꦔꦶꦤ꧀ꦱꦔꦼꦠ꧀ꦲꦔ꧀ꦭꦗꦼꦁꦔꦏꦼꦤ꧀ꦭꦩ꧀ꦥꦃ꧈ꦏꦸꦭꦏꦼꦥꦼꦏ꧀ꦱꦤꦸꦫꦸꦠ꧀ꦠꦶꦚꦼꦥꦼꦁꦮꦺꦴꦤ꧀ꦠꦼꦤ꧀ꦲꦶꦁꦥꦝꦼꦏꦃꦲꦤ꧀ Zeu ꦮꦲꦸꦭꦩꦶꦤꦶꦥꦸꦤ꧀ꦱꦩꦶꦁꦒꦸ꧈ꦲꦶꦁꦒꦶꦃꦥꦸꦤꦶꦏꦗꦭꦂꦫꦤ꧀ꦱꦏꦶꦁꦥꦤꦼꦝꦤ꧀ꦤꦶꦥꦸꦤ꧀ꦠꦶꦪꦁꦏꦛꦃ꧈ꦱꦂꦠꦗꦭꦂꦫꦤ꧀ꦱꦏꦶꦁꦉꦩ꧀ꦧꦒ꧀ꦒꦶꦥꦸꦤ꧀ꦥꦔꦗꦼꦁꦔꦶꦁꦠꦶꦠꦶꦪꦁꦲꦶꦁꦏꦁꦱꦩꦶꦠꦸꦩꦸꦠ꧀ꦏꦸꦭꦱꦢꦪ꧈ꦱꦠꦸꦁꦒꦶꦭ꧀ꦭꦶꦁꦠꦶꦪꦁ ꦄꦨꦠꦶ꧈ꦲꦶꦁꦏꦁꦗꦸꦭꦶꦒ꧀ꦭꦤ꧀ꦠꦽꦁꦒꦶꦤꦱ꧀꧈ꦲꦤꦔꦶꦁꦏꦸꦭꦥꦶꦪꦩ꧀ꦧꦏ꧀ꦧꦺꦴꦠꦼꦤ꧀ꦥꦶꦠꦢꦺꦴꦱ꧀ꦧꦧꦂꦥꦶꦱꦤ꧀꧉ꦠꦶꦪꦁꦥꦸꦤꦶꦏꦤꦩꦤꦶꦥꦸꦤ꧀ Shadrach꧈ꦢꦼꦤꦶꦁꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀ꦢꦶꦥꦸꦤ꧀ꦥꦫꦧ꧀ꦧꦶꦏꦸꦕꦶꦁ꧈ꦱꦧꦧ꧀ꦧꦶꦥꦸꦤ꧀ꦢꦶꦥꦸꦤ꧀ꦥꦫꦧ꧀ꦧꦶꦩꦏꦠꦼꦤ꧀ꦥꦸꦤꦶꦏꦏꦸꦭꦧꦺꦴꦠꦼꦤ꧀ꦱꦸꦩꦼꦉꦥ꧀꧉ꦲꦶꦁꦫꦲꦶꦤꦶꦥꦸꦤ꧀ꦠꦶꦪꦁꦮꦲꦸꦮꦺꦴꦤ꧀ꦠꦼꦤ꧀ꦧꦶꦛꦼꦠꦤ꧀ꦤꦶꦥꦸꦤ꧀ꦠꦶꦒ꧈ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦥꦸꦤ꧀ꦏꦼꦔꦶꦁꦏꦸꦏꦸꦤꦶꦁꦱꦶꦔꦧꦫꦺꦴꦁ꧈ꦩꦶꦭꦩꦼꦁꦱꦃꦲꦶꦥꦸꦤ꧀ꦧꦺꦴꦁꦱꦮꦲꦸꦲꦶꦁꦏꦁꦲꦒꦼꦁꦥꦶꦪꦩ꧀ꦧꦏ꧀ꦲꦶꦁꦒꦶꦃꦱꦶꦔꦺꦴꦧꦫꦺꦴꦁ꧉ꦲꦶꦁꦱꦠꦸꦁꦒꦭ꧀ꦭꦶꦁꦩꦺꦴꦁꦱꦱꦊꦧꦼꦠ꧀ꦠꦶꦁꦱꦠꦲꦸꦤ꧀꧈ꦧꦺꦴꦏ꧀ꦩꦤꦮꦶꦩꦤꦮꦶꦤꦸꦗꦸꦏꦶꦫꦁꦩꦁꦱꦤ꧀꧈ꦱꦏꦶꦁꦭꦺꦴꦫꦺꦴꦒꦤ꧀ꦤꦶꦁꦉꦢꦶꦱꦏ꧀ꦭꦺꦂꦮꦼꦠꦤ꧀ꦭꦤ꧀ꦏꦶꦭꦺꦤ꧀ꦤꦶꦁꦥꦝꦼꦏꦃꦲꦤ꧀ꦮꦲꦸꦱꦶꦔꦺꦴꦧꦫꦺꦴꦁꦩꦤ꧀ꦝꦥ꧀ꦱꦲꦏ꧀ꦭꦶꦤ꧀ꦠꦼꦂꦫꦤ꧀ꦲꦶꦁꦱꦒꦤ꧀ꦠꦼꦤ꧀ꦮꦼꦝꦶ꧈ꦱꦂꦠꦱꦺꦴꦏ꧀ꦭꦗꦼꦁꦚꦺꦴꦭꦺꦴꦁꦫꦗꦏꦪꦤꦶꦥꦸꦤ꧀ꦠꦶꦪꦁ Zeu꧈ꦩꦭꦃꦠꦽꦏꦝꦁꦱꦺꦴꦏ꧀ꦭꦗꦼꦁꦩꦺꦴꦁꦱꦠꦶꦪꦁꦠꦶꦪꦁꦔꦶꦥꦸꦤ꧀꧉ꦲꦶꦁꦱꦫꦺꦃꦤꦶꦁꦠꦶꦠꦶꦪꦁ Zeu ꦥꦸꦤꦶꦏꦧꦺꦴꦠꦼꦤ꧀ꦲꦒꦝꦃꦲꦶꦢꦢꦩꦼꦭ꧀ꦱꦚ꧀ꦗꦠ꧈ꦢꦢꦺꦴꦱ꧀ꦥꦼꦗꦃꦒꦼꦱꦁꦔꦶꦥꦸꦤ꧀ꦥꦿꦱꦱꦠ꧀ꦢꦶꦥꦸꦤ꧀ꦥꦱꦿꦃꦲꦏꦼꦤ꧀ꦝꦠꦼꦁꦱꦁꦱꦶꦔꦺꦴꦧꦫꦺꦴꦁꦲꦶꦁꦏꦁꦱꦏꦭꦁꦏꦸꦁꦮꦤꦶꦮꦲꦸ꧉ꦢꦺꦤꦺꦉꦏꦢꦪꦤꦶꦥꦸꦤ꧀ꦠꦶꦠꦶꦪꦁꦲꦶꦁꦔꦿꦶꦏꦸꦲꦶꦁꦒꦶꦃꦤꦩꦸꦁꦩꦱꦁꦔꦶ꧈ꦩꦸꦫꦶꦃꦱꦶꦔꦧꦫꦺꦴꦁꦮꦲꦸꦩꦊꦧꦼꦠ꧀ꦲꦶꦁꦠꦼꦩ꧀ꦧꦺꦴꦏ꧀ꦏꦤ꧀ꦩꦸꦧꦼꦁ꧈ꦭꦤ꧀ꦠꦶꦠꦶꦪꦁꦔꦶꦥꦸꦤ꧀ꦥꦶꦪꦩ꧀ꦧꦏ꧀ꦲꦤ꧀ꦝꦼꦭꦶꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦸꦧꦸꦒ꧀ꦒꦶꦥꦸꦤ꧀꧉ꦲꦶꦁꦲꦤ꧀ꦠꦮꦶꦱ꧀ꦱꦶꦁꦱꦼꦫꦠ꧀ꦭꦤ꧀ꦥ꧀ꦭꦼꦛꦺꦏ꧀ꦏꦶꦁꦱꦽꦔꦼꦁꦔꦼ꧈ꦠꦶꦠꦶꦪꦁꦔꦿꦶꦏꦸꦲꦁꦒꦺꦤ꧀ꦤꦶꦁꦏꦼꦱꦃꦤꦶꦭꦂꦒꦿꦶꦪꦤ꧀ꦤꦶꦥꦸꦤ꧀꧈ꦤꦩꦸꦁꦩꦤꦮꦶꦤꦸꦗꦸꦔꦒꦼꦁꦔꦏꦼꦤ꧀ꦭꦠꦸꦤꦶꦁꦧꦼꦝꦶꦪꦤ꧀꧈ꦲꦶꦁꦏꦁꦏꦁꦒꦼꦤꦼꦧꦶꦃꦲꦏꦼꦤ꧀ꦱꦶꦔꦧꦫꦺꦴꦁꦮꦲꦸ꧉ꦱꦤꦢꦾꦤ꧀ꦏꦭꦥꦸꦤꦶꦏꦩꦁꦱꦤꦶꦥꦸꦤ꧀ꦱꦶꦔꦧꦫꦺꦴꦁꦩꦼꦢꦭ꧀꧈ꦲꦤꦔꦶꦁꦏꦸꦭꦱꦢꦪꦢꦺꦫꦺꦁꦤꦠꦼꦩꦿꦁꦒꦸꦭ꧀ꦭꦶꦱꦠꦸꦁꦒꦭ꧀ꦱꦠꦸꦁꦒꦭ꧀ꦭ꧈ꦲꦺꦮꦢꦼꦤꦼꦱꦉꦁꦤꦼꦩ꧀ꦢꦭꦸꦤꦶꦥꦸꦤ꧀꧈ꦏꦸꦭꦱꦢꦪꦱꦩꦶꦏꦒꦺꦠ꧀꧈ꦗꦭꦂꦫꦤ꧀ꦱꦏꦶꦁꦥꦁꦒꦼꦫꦺꦴꦤ꧀ꦤꦶꦁꦱꦶꦔꦧꦫꦺꦴꦁꦠꦸꦮꦶꦤ꧀ꦠꦶꦪꦁꦧꦼꦔꦺꦴꦏ꧀ꦧꦼꦔꦺꦴꦏ꧀꧉ꦲꦺꦚ꧀ꦗꦶꦁꦔꦶꦥꦸꦤ꧀ꦏꦭꦏꦸꦭꦱꦢꦪꦱꦩꦶꦏꦼꦏꦼꦱꦃꦲꦤ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶꦏꦸꦭꦏꦼꦥꦼꦛꦸꦏ꧀ꦠꦶꦪꦁꦗꦊꦂꦲꦺꦱ꧀ꦠꦿꦶꦲꦶꦫꦶꦁꦲꦶꦫꦶꦁꦔꦤ꧀꧈ꦲꦁꦒꦺꦴꦠꦺꦴꦁꦥꦶꦏꦸꦭ꧀ꦭꦤ꧀ꦲꦶꦱꦶꦠꦶꦫꦃꦠꦶꦫꦃꦲꦤ꧀ꦤꦶꦁꦧꦢꦤ꧀ꦠꦶꦪꦁ꧉ꦧꦺꦴꦠꦼꦤ꧀ꦮꦠꦮꦶꦱ꧀ꦢꦔꦸꦮꦺꦴꦤ꧀ꦠꦼꦤ꧀ꦠꦶꦪꦁꦚꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦩꦼꦤ꧀ꦠꦱ꧀ꦮꦺꦴꦤ꧀ꦠꦼꦤ꧀ꦱꦶꦔꦺꦴꦧꦫꦺꦴꦁꦏꦭꦶꦃꦲꦸꦠꦮꦶꦠꦶꦒꦔꦿꦶꦱꦏ꧀ꦥꦪꦺꦴꦤ꧀ꦤꦶꦥꦸꦤ꧀ꦱꦭꦃꦱꦠꦸꦁꦒꦶꦭ꧀ꦭꦶꦁꦒꦿꦶꦪꦤ꧀ꦤꦶꦥꦸꦤ꧀ꦧꦺꦴꦗꦺꦴꦤꦶꦁꦭꦸꦫꦃꦲꦶꦁꦥꦏꦩ꧀ꦥꦸꦁꦔꦤ꧀ꦲꦶꦁꦔꦿꦶꦏꦸ꧈ꦠꦶꦪꦁꦲꦺꦱ꧀ꦠꦿꦶꦮꦲꦸꦢꦶꦥꦸꦤ꧀ꦱꦸꦮꦺꦏ꧀ꦱꦸꦮꦺꦏ꧀꧈ꦱꦲꦲꦤꦏ꧀ꦏꦶꦥꦸꦤ꧀ꦗꦊꦂꦢꦶꦥꦸꦤ꧀ꦒꦺꦴꦤ꧀ꦝꦺꦴꦭ꧀꧈ꦱꦶꦱꦤꦶꦁꦧꦢꦤ꧀ꦤꦶꦥꦸꦤ꧀ꦠꦶꦪꦁꦏꦭꦶꦃꦥꦸꦤꦶꦏꦲꦶꦁꦒꦶꦃꦲꦶꦁꦏꦁꦢꦶꦥꦸꦤ꧀ꦧꦼꦏ꧀ꦠꦲꦶꦁꦠꦶꦪꦁꦗꦊꦂꦲꦺꦱ꧀ꦠꦿꦶꦏꦱꦼꦧꦸꦠ꧀ꦔꦶꦁꦒꦶꦭ꧀꧉ꦱꦭꦗꦼꦁꦔꦶꦥꦸꦤ꧀ꦭꦸꦫꦃꦲꦶꦁꦥꦏꦩ꧀ꦥꦸꦁꦔꦤ꧀ꦲꦔꦫꦶꦃꦲꦫꦶꦃꦝꦠꦼꦁꦏꦸꦭ꧈ꦩꦸꦫꦶꦃꦲꦩꦊꦱ꧀ꦱꦏꦼꦤ꧀ꦲꦤꦏ꧀ꦱꦼꦩꦃꦲꦶꦥꦸꦤ꧀ꦏꦭꦶꦪꦤ꧀ꦢꦢꦩꦼꦭ꧀ꦏꦸꦭꦱꦚ꧀ꦗꦠ꧈ꦗꦭꦂꦫꦤ꧀ꦭꦸꦫꦃꦏꦩ꧀ꦥꦸꦁꦮꦲꦸꦏꦸꦮꦠꦺꦴꦱ꧀ꦧꦶꦭꦶꦃꦱꦶꦔꦺꦴꦧꦫꦺꦴꦁꦮꦲꦸꦠꦩ꧀ꦠꦸꦢꦩꦼꦭ꧀ꦥꦼꦥꦼꦗꦃꦭꦁꦏꦸꦁꦏꦛꦃ꧈ꦲꦮꦶꦠ꧀ꦱꦩ꧀ꦥꦸꦤ꧀ꦚꦺꦴꦧꦶꦔꦿꦲꦺꦴꦱ꧀ꦱꦏꦼꦤ꧀ꦢꦒꦶꦁꦩꦤꦸꦱ꧉ꦗꦭꦂꦫꦤ꧀ꦱꦏꦶꦁꦏꦠꦿꦁꦔꦤ꧀ꦤꦶꦥꦸꦤ꧀ꦗꦸꦫꦸꦧꦱ꧈ꦲꦶꦁꦏꦁꦩꦔꦽꦠꦺꦴꦱ꧀ꦧꦱꦄꦫꦧ꧀꧈ꦲꦩꦂꦒꦶꦱꦤꦢꦾꦤ꧀ꦥꦿꦺꦴꦥꦼꦱꦺꦴꦂ Higgs ꦥꦶꦪꦩ꧀ꦧꦏ꧀ꦧꦺꦴꦠꦼꦤ꧀ꦱꦒꦼꦢ꧀ꦩꦔꦽꦠꦺꦴꦱ꧀ꦝꦠꦼꦁꦮꦶꦕꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁ Zeu꧈ꦏꦸꦭꦱꦢꦪꦭꦗꦼꦁꦱꦸꦩꦼꦉꦥ꧀꧈ꦧꦶꦭꦶꦃꦱꦶꦔꦺꦴꦧꦫꦺꦴꦁꦱꦩꦶꦔꦸꦩ꧀ꦥꦼꦠ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦒꦸꦩꦸꦏ꧀ꦏꦤ꧀ꦥꦱꦶꦂꦧꦺꦴꦠꦼꦤ꧀ꦠꦼꦧꦶꦃꦱꦏꦶꦁꦔꦿꦶꦏꦸ꧈ꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦁꦠꦸꦏ꧀ꦲꦭꦶꦠ꧀ꦲꦶꦁꦏꦁꦏꦛꦃꦲꦭꦁꦲꦭꦁꦔꦶꦥꦸꦤ꧀꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
