ꦏꦲꦶꦁꦠꦼꦥꦶꦱ꧀ꦮꦶꦫꦶꦁꦔꦶꦥꦸꦤ꧀ꦧꦚꦸꦮꦔꦶꦧꦺꦴꦠꦼꦤ꧀ꦱꦒꦼꦢ꧀ꦔꦶꦤ꧀ꦠꦸꦤ꧀ꦤꦏꦼꦤ꧀ꦥꦶꦱꦁꦲꦶꦁꦏꦁꦢꦢꦺꦴꦱ꧀ꦏꦧꦼꦠꦃꦲꦤ꧀ꦤꦶꦥꦸꦤ꧀ꦲꦶꦁꦠꦤꦃꦎꦱ꧀ꦠꦿꦭꦶ꧉ꦲꦩꦶꦭꦤꦒꦫꦶꦭꦗꦼꦁꦲꦩ꧀ꦧꦒꦶꦠꦿꦸꦧꦸꦱ꧀ꦱꦤ꧀ꦥꦶꦱꦁꦕꦕꦃꦲꦶꦥꦸꦤ꧀ꦏꦶꦫꦁꦭꦁꦏꦸꦁ 18000 ꦲꦶꦗꦶꦝꦠꦼꦁꦠꦶꦠꦶꦪꦁꦲꦶꦁꦱꦕꦼꦭꦏ꧀ꦏꦶꦥꦸꦤ꧀ꦧꦚꦸꦮꦔꦶ꧈ꦠꦸꦮꦶꦤ꧀ꦲꦩꦫꦶꦔꦶꦱꦶꦠꦶꦮꦶꦪꦂꦫꦶꦥꦸꦤ꧀ 150 ꦧꦲꦸꦝꦠꦼꦁꦠꦶꦠꦶꦪꦁꦔꦿꦶꦏꦸꦏꦁꦒꦺꦲꦤꦤꦼꦩ꧀ꦥꦶꦱꦁ꧉ꦩꦸꦫꦶꦃꦠꦤꦼꦩ꧀ꦩꦤ꧀ꦥꦭꦮꦶꦗꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦲꦁꦱꦭ꧀ꦏꦥꦶꦠꦸꦤ꧀ꦤꦤ꧀꧈ꦲꦩꦶꦭꦥꦤꦤꦼꦩ꧀ꦩꦶꦥꦸꦤ꧀ꦥꦶꦱꦁꦊꦠ꧀ꦠꦶꦥꦸꦤ꧀ꦠꦼꦧꦶꦃ꧉
꧋ꦮꦶꦮꦶꦠ꧀ꦥꦸꦤꦶꦏꦲꦶꦁꦨꦚꦸꦮꦔꦶꦲꦶꦁꦥꦸꦤ꧀ꦢꦶꦥꦸꦤ꧀ꦢꦶꦱꦩꦶꦏꦠꦤꦼꦩ꧀ꦩꦤ꧀ꦥꦶꦱꦁ꧈ꦔꦤ꧀ꦠꦺꦴꦱ꧀ꦠꦶꦠꦶꦪꦁꦲꦶꦁꦔꦿꦶꦏꦸꦱꦒꦼꦢ꧀ꦔꦶꦤ꧀ꦠꦸꦤ꧀ꦤꦏꦼꦤ꧀ꦥꦶꦱꦁꦏꦛꦃꦝꦠꦼꦁꦠꦤꦃꦎꦱ꧀ꦠꦿꦭꦶ꧈ꦲꦶꦁꦱꦩꦁꦏꦺꦠꦤꦼꦩ꧀ꦩꦤ꧀ꦥꦶꦱꦁꦲꦶꦁꦨꦚꦸꦮꦔꦶꦏꦺꦔꦶꦁꦏꦮꦱ꧀ꦠꦤꦤ꧀ꦱꦠꦸꦁꦒꦶꦭ꧀ꦭꦶꦁꦥꦔꦸꦥꦗꦶꦮꦲꦶꦁꦏꦁꦱꦪꦼꦏ꧀ꦠꦺꦴꦱꦏꦛꦃꦥꦩꦼꦢꦭ꧀ꦭꦶꦥꦸꦤ꧀꧉ꦲꦺꦩꦤ꧀ꦲꦔꦼꦠ꧀꧈ꦢꦺꦤꦺꦢꦸꦩꦸꦒꦶꦤꦶꦁꦱꦩꦁꦏꦺꦧꦺꦴꦠꦼꦤ꧀ꦏꦧꦸꦢꦶꦢꦪꦱꦒꦼꦢ꧀ꦢꦶꦥꦸꦤ꧀ꦲꦤꦁꦒꦸꦭꦁꦔꦶꦉꦔꦼꦠ꧀ꦠꦶꦁꦥꦶꦱꦁ꧈ꦲꦶꦁꦏꦁꦲꦚ꧀ꦗꦭꦂꦫꦶꦏꦸꦭꦶꦠ꧀ꦠꦶꦥꦸꦤ꧀ꦥꦶꦱꦁꦢꦢꦺꦴꦱ꧀ꦫꦶꦱꦏ꧀꧉ꦲꦶꦁꦒꦶꦃꦊꦉꦱ꧀꧈ꦧꦶꦭꦶꦃꦲꦶꦁꦱꦮꦼꦤꦺꦃꦲꦶꦁꦏꦼꦧꦺꦴꦤ꧀ꦥꦶꦱꦁ꧈ꦤꦒꦫꦶꦚꦺꦴꦧꦶꦲꦩꦼꦫꦁꦔꦶꦲꦩꦤꦶꦁꦥꦶꦱꦁꦮꦲꦸ꧈ꦠꦸꦂꦮꦺꦴꦃꦲꦶꦥꦸꦤ꧀ꦲꦶꦁꦒꦶꦃꦱꦲꦺꦱꦔꦼꦠ꧀꧉ꦲꦤꦔꦶꦁꦲꦶꦁꦠꦼꦩ꧀ꦧꦺꦮꦶꦁꦏꦶꦁꦔꦶꦥꦸꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦲꦩꦼꦫꦁꦔꦶꦲꦩꦤꦶꦁꦥꦶꦱꦁꦮꦲꦸ꧈ꦏꦼꦢꦃꦏꦠꦶꦤ꧀ꦢꦏ꧀ꦲꦏꦼꦤ꧀ꦲꦶꦁꦥꦸꦤ꧀ꦢꦶꦥꦸꦤ꧀ꦢꦶ꧈ꦱꦩ꧀ꦥꦸꦤ꧀ꦔꦼꦩꦸꦁꦔꦏꦼꦤ꧀ꦲꦶꦁꦱꦠꦸꦁꦒꦭ꧀ꦥꦁꦒꦺꦤ꧀ꦤꦤ꧀ꦏꦺꦩꦮꦺꦴꦤ꧀꧉ꦲꦮꦶꦠ꧀ꦲꦶꦁꦧꦺꦚ꧀ꦗꦶꦁꦔꦶꦥꦸꦤ꧀ꦱꦒꦼꦢ꧀ꦲꦸꦒꦶꦏꦭꦩ꧀ꦥꦃꦲꦤ꧀꧈ꦧꦶꦭꦶꦃꦠꦤꦃꦎꦱ꧀ꦠꦿꦭꦶꦲꦸꦗꦸꦒ꧀ꦲꦸꦗꦸꦒ꧀ꦭꦗꦼꦁꦧꦺꦴꦠꦼꦤ꧀ꦥꦸꦫꦸꦤ꧀ꦤꦸꦩ꧀ꦧꦱ꧀ꦥꦶꦱꦁꦮꦼꦢꦭ꧀ꦭꦤ꧀ꦠꦤꦃꦗꦮꦶ꧈ꦩꦤꦮꦶꦠꦤꦃꦏ꧀ꦮꦶꦤꦼꦱ꧀ꦭꦤ꧀ꦲꦸꦠꦮꦶꦲꦶꦁꦥꦸꦭꦺꦴꦥꦸꦭꦺꦴꦦꦸꦪꦶꦱꦩ꧀ꦥꦸꦤ꧀ꦱꦒꦼꦢ꧀ꦚꦼꦏꦥ꧀ꦥꦶꦥꦔꦶꦤ꧀ꦠꦸꦤ꧀ꦤꦶꦥꦸꦤ꧀ꦥꦶꦱꦁ꧈ꦲꦮꦶꦠ꧀ꦲꦶꦁꦠꦤꦃꦏꦏꦭꦶꦃꦮꦲꦸꦥꦩ꧀ꦧꦸꦢꦶꦢꦪꦤꦶꦥꦸꦤ꧀ꦲꦩꦼꦫꦁꦔꦶꦲꦩꦥꦶꦱꦁꦢꦶꦥꦸꦤ꧀ꦱꦤ꧀ꦠꦺꦴꦱꦤꦶꦱꦪꦼꦏ꧀ꦠꦺꦴꦱ꧀꧉
꧋ꦢꦢꦺꦴꦱ꧀ꦩꦤꦮꦶꦠꦤꦃꦗꦮꦶꦧꦝꦺꦱꦭꦩꦶꦭꦩꦶꦤꦶꦥꦸꦤ꧀ꦱꦒꦼꦢ꧀ꦢꦢꦒꦁꦔꦤ꧀ꦥꦶꦱꦁꦏꦭꦶꦪꦤ꧀ꦠꦤꦃꦎꦱ꧀ꦠꦿꦭꦶ꧈ꦥꦩ꧀ꦧꦸꦢꦶꦢꦪꦤꦶꦥꦸꦤ꧀ꦲꦤꦁꦒꦸꦭꦁꦔꦶꦉꦔꦼꦠ꧀ꦠꦶꦁꦥꦶꦱꦁꦮꦲꦸꦲꦶꦁꦒꦶꦃꦏꦼꦢꦃꦢꦶꦥꦸꦤ꧀ꦮꦶꦒꦠꦺꦴꦱ꧀ꦱꦏꦼꦤ꧀꧉ꦲꦶꦁꦠꦲꦸꦤ꧀ 1916 ꦩꦼꦢꦭ꧀ꦧꦸꦏꦸꦏꦫꦔꦤ꧀ꦤꦶꦥꦸꦤ꧀ꦡꦸꦮꦤ꧀ S.Leefmans ꦩꦶꦤꦁꦏꦥꦮꦂꦠꦺꦴꦱ꧀ꦱꦶꦥꦸꦤ꧀꧈ꦲꦶꦤ꧀ꦱꦼꦠꦶꦠꦸꦠ꧀ꦠꦸꦩꦿꦥ꧀ꦱꦱꦏꦶꦠ꧀ꦠꦠꦤꦼꦩ꧀ꦩꦤ꧀꧈ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦉꦔꦼꦠ꧀ꦥꦶꦱꦁ꧉ꦲꦶꦁꦧꦸꦏꦸꦔꦿꦶꦏꦸꦏꦕꦫꦶꦪꦺꦴꦱ꧀ꦱꦏꦼꦤ꧀ꦏꦤ꧀ꦛꦶꦕꦼꦛꦩꦼꦁꦒꦃꦒꦼꦱꦁꦔꦶꦥꦸꦤ꧀ꦉꦔꦼꦠ꧀ꦥꦶꦱꦁꦮꦲꦸ꧈ꦩꦏꦠꦼꦤ꧀ꦲꦸꦒꦶꦱꦮꦼꦤꦺꦃꦲꦶꦁꦕꦺꦴꦧꦚ꧀ꦕꦺꦴꦧꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦲꦩꦼꦫꦁꦔꦶꦲꦩꦥꦶꦱꦁꦮꦲꦸ꧉ꦥꦸꦁꦏꦱ꧀ꦱꦤꦶꦁꦥꦩꦁꦒꦶꦃꦲꦶꦥꦸꦤ꧀ꦡꦸꦮꦤ꧀ S.Leefmans ꦥꦩꦼꦫꦁꦔꦶꦥꦸꦤ꧀ꦉꦔꦼꦠ꧀ꦥꦶꦱꦁꦥꦸꦤꦶꦏ꧈ꦱꦼꦏꦂꦥꦶꦱꦁꦲꦶꦁꦱꦊꦧꦼꦠ꧀ꦠꦶꦁꦠꦸꦤ꧀ꦝꦸꦤ꧀ꦤꦤ꧀꧈ꦏꦼꦢꦃꦢꦶꦥꦸꦤ꧀ꦱꦼꦩ꧀ꦥꦿꦺꦴꦠ꧀ꦠꦶꦩꦮꦶꦱꦧꦁꦱꦤꦶꦁꦱꦼꦏꦂꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦒꦶꦭꦶꦁꦊꦩ꧀ꦧꦠ꧀ꦱꦔꦼꦠ꧀꧈ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦒꦶꦭꦶꦁꦔꦤ꧀ꦱꦼꦏꦂꦮꦲꦸꦲꦶꦁꦠꦤꦃꦌꦫꦺꦴꦥꦃꦏꦛꦃꦱꦔꦼꦠ꧀꧈ꦩꦶꦭꦲꦶꦁꦔꦿꦶꦏꦱꦼꦏꦂꦮꦲꦸꦤꦶꦪꦠ꧀ꦢꦶꦥꦸꦤ꧀ꦲꦸꦥꦏꦫꦔꦼꦩꦸꦁꦔꦏꦼꦤ꧀ꦏꦁꦒꦺꦲꦩꦼꦫꦁꦔꦶꦲꦩꦥꦶꦱꦁꦮꦲꦸ꧉ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤꦶꦥꦸꦤ꧀ꦡꦸꦮꦤ꧀ S. Leefmans ꦲꦶꦁꦏꦁꦲꦢꦩꦼꦭ꧀ꦫꦶꦱꦏ꧀ꦏꦶꦁꦠꦤꦼꦩ꧀ꦩꦤ꧀ꦥꦶꦱꦁꦲꦶꦁꦏꦁꦱꦔꦼꦠ꧀ꦥꦸꦤꦶꦏ꧈ꦩꦤꦮꦶꦧꦝꦺꦥꦼꦤ꧀ꦠꦶꦭ꧀ꦲꦸꦠꦮꦶꦥꦼꦤ꧀ꦠꦶꦭ꧀ꦭꦶꦥꦸꦤ꧀ꦢꦶꦥꦸꦤ꧀ꦩꦁꦱꦲꦶꦁꦉꦔꦼꦠ꧀ꦮꦲꦸ꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦭꦶꦩꦿꦃꦲꦶꦥꦸꦤ꧀ꦩꦤꦮꦶꦏꦊꦉꦱ꧀ꦏꦸꦭꦶꦠ꧀ꦠꦶꦁꦲꦺꦴꦤ꧀ꦠꦺꦴꦁꦔꦶꦥꦸꦤ꧀ꦱꦩꦶꦝꦮꦃ꧉ꦱꦢꦺꦫꦺꦁꦔꦶꦥꦸꦤ꧀ꦏꦭꦩ꧀ꦥꦃꦲꦤ꧀ꦩꦏꦠꦼꦤ꧀ꦱꦼꦏꦂꦥꦶꦫꦤ꧀ꦠꦺꦴꦱ꧀ꦏꦁꦒꦺꦲꦩꦼꦫꦁꦔꦶꦲꦩꦥꦶꦱꦁꦮꦲꦸꦏꦼꦢꦃꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦩꦏ꧀ꦏꦏꦼꦤ꧀꧈ꦩꦼꦁꦒꦃꦥꦠꦿꦥ꧀ꦥꦶꦥꦸꦤ꧀ꦩꦏꦠꦼꦤ꧀꧇ꦏ꧀ꦭꦺꦴꦛꦺꦴꦏ꧀ꦏꦤ꧀ꦤꦶꦁꦠꦸꦤ꧀ꦠꦸꦠ꧀ꦲꦶꦁꦏꦁꦲꦧꦿꦶꦠ꧀ꦏꦼꦢꦃꦢꦶꦥꦸꦤ꧀ꦲꦸꦝꦂꦫꦶꦱꦲꦢꦶꦥꦸꦤ꧀ꦗꦸꦚ꧀ꦗꦸꦁ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦧꦶꦱꦶꦁꦥꦸꦩ꧀ꦥꦭꦗꦼꦁꦏꦊꦧꦼꦠ꧀ꦠꦏꦼꦤ꧀꧉ꦥꦩꦱꦁꦔꦶꦥꦸꦤ꧀ꦧꦶꦱꦶꦁꦥꦸꦩ꧀ꦥꦏꦼꦢꦃꦲꦶꦁꦱꦔꦤ꧀ꦝꦥ꧀ꦥꦶꦥꦸꦤ꧀ꦠꦸꦤ꧀ꦠꦸꦠ꧀ꦮꦲꦸ꧈ꦥꦽꦭꦸꦤꦶꦥꦸꦤ꧀ꦏꦁꦒꦺꦲꦚ꧀ꦗꦒꦶꦮꦺꦴꦃꦲꦶꦥꦸꦤ꧀ꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦔꦤ꧀ꦝꦥ꧀ꦔꦿꦶꦏꦸ꧉ꦩꦤꦮꦶꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ 6 ꦢꦶꦤ꧀ꦠꦼꦤ꧀꧈ꦭꦗꦼꦁꦏꦠꦶꦤ꧀ꦢꦏ꧀ꦏꦏꦼꦤ꧀ꦲꦶꦁꦭꦶꦫꦁꦔꦤ꧀ꦔꦤ꧀ꦝꦥ꧀ꦥꦶꦥꦸꦤ꧀꧈ꦩꦏꦠꦼꦤ꧀ꦩꦼꦁꦒꦃꦥꦔꦤ꧀ꦢꦶꦏꦤꦶꦥꦸꦤ꧀ꦡꦸꦮꦤ꧀ S. Leefmans꧉
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)
