Kaca iki wis divalidasi
27 NOPEMBER.
No. 233. Gusti Jesus diampirake Sachejus.
nDemenakake tenan tjarita iki bab Sri Jesus kang rawuh menjang omahe Sachejus, wong dosa.
Apa ora lutju, Sachejus menek ing wit, supaja bisa weruh Gusti Jesus? Wong dosa rak butuh marang katresnan lan palimirma Dalem Sri Jesus. Aku uga butuh ! Aku uga wong dosa! Apa aku uga ngudi supaja bisa weruh Sri Jesus, bisa luwih tjedak karo Sri Jesus? Sachejus terus mertobat! Mesti bae! Gusti kok karsa rawuh ing omahe. Apa aku ngerti tegese Sabda Dalem Sri Jesus: Djer rawuhe Putraning manungsa (Gusti Jesus Pribadi) mono perlu nggoleki kang wis pada ilang?
28 NOPEMBER.
No. 235. Wong wuta loro pada kasarasake.
Prajogo sok ngangen² bab pangeram-eram Dalem Gusti Jesus, amarga sok bisa lali marang Mahakuwasa Dalem. Sri Jesus iki djumeneng Allah, kang tresna banget karo manungsa kabeh, luwih² karo manungsa tjilaka kaja wong wuta loro iku.
Wong tjilaka iki pada nguwuh-uwuh: „Jesus Putranipun Dawud, melasana kula”. Gede banget adrenging panjuwune, metu saka butuhe kang djero banget kepengin weruh.
Sapa sing ora kepranan, jen matja. Apa Gusti ora kepranan mriksani wong wuta iki kang njuwun mukdjidjad ? Gusti tresna, nanging tresna kanti Mahakuwasa Dalem: mripate kabuka.
171
