Alkitab/Purwaning Dumadi/6

^6:1 ꦩꦤꦸꦁꦱꦱꦁꦱꦪꦲꦏꦺꦃ꧈​ꦱꦸꦩꦼꦧꦂꦲꦶꦁꦧꦸꦩꦶ꧈​ꦭꦤ꧀ꦢꦸꦮꦺꦲꦤꦏ꧀ꦮꦢꦺꦴꦤ꧀ꦮꦢꦺꦴꦤ꧀꧉​

^6:2 ꦥꦫꦥꦸꦠꦿꦤꦺꦄꦭ꧀ꦭꦃꦧꦉꦁꦮꦼꦫꦸꦃꦪꦺꦤ꧀ꦲꦤꦏ꧀ꦲꦤꦏ꧀ꦏꦺꦮꦢꦺꦴꦤ꧀ꦥꦫꦩꦤꦸꦁꦱꦩꦲꦸꦥꦝꦲꦪꦸꦲꦪꦸ꧈​ꦲꦼꦤ꧀ꦢꦶꦱꦶꦁꦢꦶꦱꦼꦤꦼꦁꦔꦶꦤꦸꦭꦶꦢꦶꦥꦺꦏ꧀ꦧꦺꦴꦗꦺꦴ꧉​

^6:3 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏ꧈​"ꦫꦺꦴꦃꦏꦸꦲꦺꦴꦫꦧꦏꦭ꧀ꦱꦼꦭꦮꦱ꧀ꦱꦺꦤꦸꦁꦒꦶꦭ꧀ꦏꦫꦺꦴꦩꦤꦸꦁꦱ꧈​ꦱꦶꦁꦲꦸꦫꦶꦥ꧀ꦥꦺꦩꦸꦁꦤꦸꦫꦸꦠ꧀ꦠꦶꦲꦮꦤꦼꦥ꧀ꦱꦸꦤꦶꦁꦢꦒꦶꦁ꧉​ꦩꦤꦸꦁꦱꦩꦼꦱ꧀ꦛꦶꦩꦠꦶ꧉​ꦲꦸꦩꦸꦂꦫꦺꦲꦺꦴꦫꦧꦏꦭ꧀ꦭꦸꦮꦶꦃꦱꦏ120ꦠꦲꦸꦤ꧀꧉"​

^6:4 ꦮꦶꦮꦶꦠ꧀ꦤꦭꦶꦏꦱꦼꦩꦺꦴꦤꦺꦴꦲꦶꦁꦧꦸꦩꦶꦲꦤꦮꦺꦴꦁꦮꦺꦴꦁꦱꦶꦁꦢꦼꦢꦼꦒꦒꦼꦝꦺꦝꦸꦮꦸꦂꦒꦒꦃꦥꦿꦏꦺꦴꦱ꧈​ꦪꦏꦸꦮꦶꦲꦤꦏ꧀ꦠꦸꦫꦸꦤꦺꦥꦫꦮꦺꦴꦁꦮꦢꦺꦴꦤ꧀ꦲꦤꦏ꧀ꦏꦺꦩꦤꦸꦁꦱ꧈​ꦱꦶꦁꦏꦮꦶꦤ꧀ꦏꦫꦺꦴꦥꦫꦥꦸꦠꦿꦤꦺꦄꦭ꧀ꦭꦃ꧉​ꦮꦺꦴꦁꦮꦺꦴꦁꦥꦿꦏꦺꦴꦱꦩꦲꦸꦥꦫꦥꦼꦂꦮꦶꦫꦲꦶꦁꦗꦩꦤ꧀ꦏꦸꦤ꧈​ꦱꦶꦁꦏꦺꦴꦤ꧀ꦝꦁꦗꦼꦤꦼꦁꦔꦺ꧉​

^6:5 ꦧꦉꦁꦒꦸꦱ꧀ꦠꦶꦄꦭ꧀ꦭꦃꦥꦶꦂꦱꦒꦼꦝꦺꦤꦶꦁꦢꦸꦫꦏꦤꦺꦩꦤꦸꦁꦱꦲꦶꦁꦧꦸꦩꦶ꧈​ꦭꦤ꧀ꦱꦲꦺꦴꦧꦃꦲꦶꦱꦶꦏ꧀ꦏꦶꦁꦲꦠꦶꦤꦺꦱꦼꦭꦮꦱ꧀ꦱꦺꦲꦭꦮꦲꦺ꧈​

^6:6 ꦲꦶꦁꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦏꦼꦢꦸꦮꦸꦁꦲꦼꦁꦒꦺꦴꦤꦺꦤꦶꦠꦃꦲꦏꦺꦩꦤꦸꦁꦱꦲꦤꦲꦶꦁꦧꦸꦩꦶ꧉​ꦒꦸꦱ꧀ꦠꦶꦄꦭ꧀ꦭꦃꦕꦸꦮꦲꦶꦁꦥꦼꦁꦒꦭꦶꦃ꧈​

^6:7 ꦔꦤ꧀ꦠꦶꦔꦤ꧀ꦢꦶꦏ꧈​"ꦩꦤꦸꦁꦱꦏꦁꦢꦏ꧀ꦠꦶꦠꦃꦲꦏꦺꦧꦏꦭ꧀ꦢꦏ꧀ꦠꦸꦩ꧀ꦥꦼꦱ꧀ꦱꦏꦭꦸꦩꦃꦲꦶꦁꦧꦸꦩꦶ꧈​ꦱꦼꦩꦺꦴꦤꦺꦴꦲꦸꦒꦱꦏꦺꦃꦲꦺꦏꦺꦮꦤ꧀ꦭꦤ꧀ꦱꦫꦸꦥꦤꦶꦁꦩꦤꦸꦏ꧀꧈​ꦩꦼꦂꦒꦲꦏꦸꦏꦼꦢꦸꦮꦸꦁꦩꦫꦁꦲꦥꦏꦁꦮꦶꦱ꧀ꦢꦏ꧀ꦠꦶꦠꦃꦲꦏꦺ꧉"​

^6:8 ꦩꦸꦁ​꧊ꦤꦸꦃꦱꦶꦁꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^6:9 ꦲꦶꦏꦶꦕꦿꦶꦠꦤꦺ​꧊ꦤꦸꦃ꧉​​꧊ꦤꦸꦃꦏꦸꦮꦶꦮꦺꦴꦁꦩꦸꦂꦱꦶꦢ꧀꧈​ꦠꦤ꧀ꦥꦕꦕꦢ꧀ꦲꦤꦲꦶꦁꦲꦤ꧀ꦠꦫꦤꦺꦮꦺꦴꦁꦮꦺꦴꦁꦲꦶꦁꦗꦩꦤ꧀ꦱꦼꦩꦺꦴꦤꦺꦴ꧉​ꦲꦸꦫꦶꦥ꧀ꦥꦺ​꧊ꦤꦸꦃꦠꦤ꧀ꦱꦃꦠꦼꦠꦸꦁꦒꦶꦭ꧀ꦭꦤ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉​

^6:10 ​꧊ꦤꦸꦃꦢꦸꦮꦺꦲꦤꦏ꧀ꦭꦤꦁꦠꦼꦭꦸ꧈​ꦗꦼꦤꦼꦁꦔꦺ:​꧊ꦱꦺꦩ꧀꧈​​꧊ꦏꦩ꧀ꦭꦤ꧀​꧊ꦪꦥ꦳ꦺꦠ꧀꧉​

^6:11 ꦤꦁꦔꦶꦁꦮꦺꦴꦁꦭꦶꦪꦭꦶꦪꦤꦺꦩꦲꦸꦲꦭꦲꦤꦲꦶꦁꦥꦩꦶꦂꦱꦤꦺꦄꦭ꧀ꦭꦃ꧉​ꦲꦶꦁꦲꦼꦤ꧀ꦢꦶꦲꦼꦤ꧀ꦢꦶꦲꦤꦤꦺꦩꦸꦁꦥꦔꦤꦶꦪꦪ꧉​

^6:12 ꦒꦸꦱ꧀ꦠꦶꦄꦭ꧀ꦭꦃꦥꦶꦂꦱꦪꦺꦤ꧀ꦧꦸꦩꦶꦮꦶꦱ꧀ꦢꦢꦶꦲꦭꦧꦧꦂꦥꦶꦱꦤ꧀꧈​ꦲꦮꦶꦠ꧀ꦩꦤꦸꦁꦱꦏꦧꦺꦃꦲꦸꦫꦶꦥ꧀ꦥꦺꦏꦼꦧꦏ꧀ꦥꦶꦪꦭ꧉​

^6:13 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏꦩꦫꦁ​꧊ꦤꦸꦃ꧈​"ꦲꦏꦸꦮꦶꦱ꧀ꦒꦮꦺꦥꦸꦠꦸꦱ꧀ꦱꦤ꧀ꦩꦸꦁꦏꦱ꧀ꦱꦶꦲꦸꦫꦶꦥ꧀ꦥꦺꦩꦤꦸꦁꦱꦏꦧꦺꦃ꧈​ꦲꦉꦥ꧀ꦢꦏ꧀ꦠꦸꦩ꧀ꦥꦼꦱ꧀ꦧꦧꦂꦥꦶꦱꦤ꧀꧈​ꦩꦼꦂꦒꦧꦸꦩꦶꦮꦶꦱ꧀ꦏꦼꦧꦏ꧀ꦥꦔꦤꦶꦪꦪ꧉​

^6:14 ꦏꦺꦴꦮꦺꦒꦮꦺꦪꦥꦿꦲꦸ;ꦒꦮꦺꦤꦼꦤ꧀ꦱꦏꦏꦪꦸꦒꦺꦴꦥ꦳ꦺꦂ꧈​ꦏꦪꦸꦱꦶꦁꦱꦼꦤ꧀ꦠꦺꦴꦱ꧉​ꦲꦶꦁꦚ꧀ꦗꦼꦫꦺꦴꦤꦺꦥꦿꦲꦸꦒꦮꦺꦤꦼꦤ꧀ꦱꦶꦁꦒꦼꦠꦤ꧀ꦱꦶꦁꦒꦼꦠꦤ꧀꧈​ꦲꦶꦁꦚ꧀ꦗꦼꦫꦺꦴꦭꦤ꧀ꦲꦶꦁꦚ꧀ꦗꦧꦤꦺꦲꦸꦱꦂꦫꦤꦊꦔꦏꦼꦤ꧀ꦛꦼꦭ꧀꧉​

^6:15 ꦒꦮꦺꦤꦼꦤ꧀ꦢꦮꦤꦺ133ꦩꦺꦠꦼꦂ꧈​ꦲꦩ꧀ꦧꦤꦺ22ꦩꦺꦠꦼꦂ꧈​ꦭꦤ꧀ꦝꦸꦮꦸꦂꦫꦺ13ꦩꦺꦠꦼꦂ꧉​

^6:16 ꦥꦿꦲꦸꦩꦲꦸꦒꦮꦺꦏ꧀ꦤꦥꦪꦺꦴꦤ꧀꧈​ꦭꦤ꧀ꦲꦶꦁꦲꦤ꧀ꦠꦫꦤꦺꦥꦪꦺꦴꦤ꧀ꦭꦤ꧀ꦱꦶꦱꦶꦃꦲꦺꦥꦿꦲꦸꦏꦸꦢꦸꦲꦤꦭꦺꦴꦮꦺꦴꦁꦔꦤ꧀44ꦱꦺꦤ꧀ꦠꦶꦩꦺꦠꦼꦂ꧉​ꦥꦿꦲꦸꦏꦸꦮꦶꦒꦮꦺꦤꦼꦤ꧀ꦠꦸꦤ꧀ꦝꦠꦼꦭꦸ꧉​ꦭꦮꦁꦔꦺꦥꦱꦁꦔꦼꦤ꧀ꦲꦶꦁꦭꦩ꧀ꦧꦸꦁꦔꦺ꧉​

^6:17 ꦲꦏꦸꦧꦏꦭ꧀ꦤꦼꦏꦏ꧀ꦏꦏꦺꦧꦚ꧀ꦗꦶꦂꦒꦼꦝꦺꦱꦶꦁꦔꦼꦊꦧ꧀ꦧꦶꦧꦸꦩꦶ꧈​ꦏꦁꦒꦺꦴꦤꦸꦩ꧀ꦥꦼꦱ꧀ꦱꦫꦸꦥꦤꦺꦠꦸꦩꦶꦠꦃꦱꦶꦁꦲꦸꦫꦶꦥ꧀꧉​ꦱꦏꦺꦃꦲꦺꦠꦸꦩꦶꦠꦃꦱꦶꦁꦲꦤꦲꦶꦁꦧꦸꦩꦶꦩꦼꦱ꧀ꦛꦶꦧꦏꦭ꧀ꦩꦠꦶ꧉​

^6:18 ꦤꦁꦔꦶꦁꦲꦏꦸꦏꦼꦂꦱꦒꦮꦺꦥꦽꦗꦚ꧀ꦗꦶꦪꦤ꧀ꦏꦫꦺꦴꦏꦺꦴꦮꦺ꧉​ꦩ꧀ꦭꦼꦧꦸꦮꦲꦶꦁꦥꦿꦲꦸ꧈​ꦏꦺꦴꦮꦺꦭꦤ꧀ꦲꦤꦏ꧀ꦲꦤꦏ꧀ꦩꦸ꧈​ꦧꦺꦴꦗꦺꦴꦩꦸꦭꦤ꧀ꦧꦺꦴꦗꦺꦴꦤꦺꦲꦤꦏ꧀ꦲꦤꦏ꧀ꦩꦸ꧉​

^6:19 ꦲꦶꦪꦔ꧀ꦒꦮꦲꦩ꧀ꦭꦼꦧꦸꦱꦫꦸꦥꦤꦺꦧꦁꦱꦏꦺꦮꦤ꧀꧈​ꦱꦧꦼꦤ꧀ꦗꦶꦤꦶꦱ꧀ꦚꦼꦗꦺꦴꦝꦺꦴ꧈​ꦱꦸꦥꦪꦥꦝꦲꦸꦫꦶꦥ꧀ꦧꦉꦁꦏꦫꦺꦴꦏꦺꦴꦮꦺ꧉​

^6:20 ꦱꦮꦼꦂꦤꦤꦺꦲꦤꦲꦱꦶꦁꦭꦤꦁꦭꦤ꧀ꦱꦶꦁꦮꦢꦺꦴꦤ꧀꧉​ꦧꦁꦱꦩꦤꦸꦏ꧀ꦮꦼꦂꦤꦮꦼꦂꦤ꧈​ꦧꦁꦱꦏꦺꦮꦤ꧀ꦤꦸꦱꦺꦴꦤ꧀ꦤꦶꦮꦼꦂꦤꦮꦼꦂꦤ꧈​ꦲꦥꦢꦺꦤꦺꦱꦏꦺꦃꦲꦺꦧꦁꦱꦏꦺꦮꦤ꧀ꦫꦸꦩꦁꦏꦁ꧈​ꦤ꧀ꦭꦺꦴꦱꦺꦴꦂꦭꦤ꧀ꦒꦸꦩꦽꦩꦼꦠ꧀ꦲꦤꦲꦶꦁꦧꦸꦩꦶꦮꦼꦂꦤꦮꦼꦂꦤ;ꦱꦧꦼꦤ꧀ꦗꦶꦤꦶꦱ꧀ꦱꦺꦧꦏꦭ꧀ꦲꦤꦱꦼꦗꦺꦴꦝꦺꦴꦤꦼꦏꦤꦶꦏꦺꦴꦮꦺ꧈​ꦱꦸꦥꦪꦊꦱ꧀ꦠꦫꦶꦪꦲꦸꦫꦶꦥ꧀꧉​

^6:21 ꦱꦼꦩꦺꦴꦤꦺꦴꦲꦸꦒꦔ꧀ꦒꦮꦲꦱꦫꦸꦥꦤꦶꦁꦥꦔꦤ꧀ꦏꦁꦒꦺꦴꦏꦺꦴꦮꦺꦭꦤ꧀ꦏꦁꦒꦺꦴꦏꦺꦮꦤ꧀ꦏꦺꦮꦤ꧀ꦩꦲꦸ꧉"​

^6:22 ​꧊ꦤꦸꦃꦤꦶꦤ꧀ꦢꦏ꧀ꦏꦏꦺꦱꦏꦺꦃꦲꦶꦁꦝꦮꦸꦃꦲꦺꦒꦸꦱ꧀ꦠꦶꦄꦭ꧀ꦭꦃ꧉​